- Лондон, 2025 жылғы 20-21 қазан. Қазақстанның инвестициялық стратегиясы мен экономикалық басымдықтары Ұлыбритания астанасында өткен Future Resilience Forum 2025 халықаралық форумы аясындағы «Kazakhstan – Diplomacy & Trade: Middle Power Countries» атты эксклюзивті панельдік сессияда таныстырылды.

Қазақстан делегациясын Сыртқы істер министрінің орынбасары Әлібек Қуантыров басқарды. Делегация құрамына Энергетика вице-министрі Санжар Жаркешов, «Ұлттық геологиялық қызмет» АҚ төрағасы Ерлан Ғалиев, Астана халықаралық қаржы орталығы әкімшілігінің басқарма төрағасы Бақтияр Тілеубеков, KIDF қорының төрағасы Жүсіп Ералин, сондай-ақ «Kazakh Invest» ұлттық компаниясы басқарма төрағасының орынбасары Мадияр Сұлтанбек кірді.

Сессияны аша келе, Әлібек Қуантыров Қазақстанның тұрақты және сенімді экономика құруға бағытталған дәйекті саясатын атап өтті:

«Қазақстан тұрақтылыққа, ашықтық пен сенімге негізделген экономика құруда. 474 миллиард доллардан астам тікелей шетелдік инвестиция тарту – бұл әлемдік бизнестің Қазақстанға деген сенімділігінің дәлелі. Қазақстан тұрақты, инклюзивті және өзара байланысты болашақты құруда сіздің серіктесіңіз болуға дайын. Біз шынайы тұрақтылық ынтымақтастық арқылы қалыптасады, ал болашақ – бөлетіндердің емес, біріктіретіндердің еншісінде деп сенеміз».

Энергетика вице-министрі Санжар Жаркешов еліміздің энергетикалық қауіпсіздігін қамтамасыз ету және «жасыл» энергетикаға кезең-кезеңімен көшу стратегиясын таныстырып, Қазақстанның дәстүрлі және жаңартылатын энергия көздерін теңгерімді дамытуға басымдық беріп отырғанын айтты.

Сессия барысында аса маңызды минералдар мен олардың өңдеуі, энергетика, ауыл шаруашылығы, көлік, қаржы және денсаулық сақтау салаларындағы инвестициялық мүмкіндіктер егжей-тегжейлі қарастырылды. Қазақстан Транскаспий халықаралық көлік бағытының негізгі буыны және Еуразиядағы азық-түлік пен энергия қауіпсіздігін қамтамасыз етудегі сенімді серіктес ретінде таныстырылды.

Шетелдік аудиторияның ерекше назарын AstraZeneca компаниясының 2025 жылы Қазақстанда өндіріс ашқан сәтті тәжірибесі аударды. Бұл – еліміздің жаһандық фармацевтикалық компаниялар үшін тартымды бағытқа айналып келе жатқанын және инвестициялық реформалардың нәтижелі жүзеге асырылып жатқанын дәлелдейді.

Қазақстандық делегацияның баяндамалары мазмұндылығымен, прагматикалық және стратегиялық көзқарасымен ерекшеленіп, британдық инвесторлар мен сарапшылар тарапынан жоғары бағаланды. Қазақстан тұрақты, болжамды және сенімді серіктес, жаңа жаһандық экономикалық архитектура жағдайында ұзақ мерзімді өзара тиімді жобаларды дамытуға дайын ел ретінде танылды.

2023 жылы құрылған Future Resilience Forum бүгінде үкіметтер, бизнес және сарапшылар қауымдастығы арасындағы халықаралық диалогтың беделді алаңына айналды. 2025 жылғы форумның басты тақырыбы – «New World Order, New World Thinking» – халықаралық ынтымақтастық пен тұрақты экономикалық байланыстарды нығайтудағы «орта державалардың» рөліне арналды.

Қазақстан делегациясының бағдарламасы аясында Ұлыбритания үкіметінің өкілдерімен, іскер топтармен, инвесторлармен және халықаралық қаржы институттарымен бірқатар кездесулер өтті. Бұл кездесулердің басты мақсаты – серіктестікті кеңейту және Қазақстанның инвестициялық әлеуетін одан әрі ілгерілету болды.

Қазақстанның әлеуетін Лондонда таныстыру елдің тұрақты өсімін, инновация мен технологиялық прогресті қамтамасыз ететін инвестицияларды тарту және халықаралық ынтымақтастықты нығайту жолындағы маңызды қадамға айналды.

Ақпарат көзі : https://www.gov.kz/memleket/entities/mfa-london/press/news/details/1091154?lang=kk