Вашингтон қ., 2026 жылғы 16 сәуір – АҚШ-қа жұмыс сапары аясында Қазақстан Республикасы Сыртқы істер министрінің орынбасары Әлібек Қуантыров АҚШ Мемлекеттік хатшысының экономикалық өсім, энергетика және қоршаған орта мәселелері жөніндегі орынбасары Джейкоб Хелбергпен кездесу өткізді.

Келіссөздер барысында тараптар сауда-экономикалық және инвестициялық ынтымақтастықтың қазіргі жай-күйі мен оны кеңейту перспективаларын мазмұнды түрде талқылады. Тау-кен өнеркәсібіндегі өзара іс-қимылға, соның ішінде аса маңызды және сирек жер металдарын өндіру және терең өңдеу жобаларына, сондай-ақ көлік-логистика инфрақұрылымын және цифрлық технологияларды дамытуға ерекше назар аударылды.

Сонымен қатар, Мемлекет басшысы мен Қазақстан Республикасы Сыртқы істер министрінің АҚШ-қа жасаған сапарлары аясында қол жеткізілген уағдаластықтарды іске асыру барысы талқыланды.

Салалық серіктестікті одан әрі тереңдету мақсатында қазақстандық тарап Дж.Хелбергті ағымдағы жылғы маусымда Астанада өтетін «Astana Mining & Metallurgy» халықаралық тау-кен металлургия конгресіне, сондай-ақ «C5+1» форматы аясындағы аса маңызды минералдар бойынша алғашқы диалог отырысына қатысуға шақырды.

Америка тарапы шақыру үшін алғыс білдіріп, қатысуға қызығушылық танытты және Қазақстанға жоғары деңгейдегі өкілді делегация жіберу ниетін растады.

Кездесу қорытындысы бойынша тараптар өзара тиімді ынтымақтастықты одан әрі дамытуға және сындарлы диалогты жалғастыруға бейілділігін растады.

Ақпарат көзі : https://www.gov.kz/memleket/entities/mfa-washington/press/news/details/1202681?lang=kk