Павлодар облысы бойынша Мемлекеттік кірістер департаменті жалпыға бірдей белгіленген режимді (ЖБР) қолданатын салық төлеушілерге корпоративтік (КТС) және жеке (ЖТС) табыс салықтарын есептеу кезіндегі шығыстарды есепке алу ерекшеліктері туралы ескертеді.

2026 жылдан бастап жаңа шектеу енгізілді: оңайлатылған декларация негізінде арнаулы салық режимін (АСР) қолданатын контрагенттерден тауарларды, жұмыстарды және көрсетілетін қызметтерді сатып алу бойынша шығыстар шегерімге жатқызылмайды.

Қазақстан Республикасы Салық кодексінің 286-бабының нормаларына (атап айтқанда, 1-тармақтың 16-тармақшасына) сәйкес, ЖБР-дегі салық төлеушілер осындай ТЖҚ алған күні оңайлатылған декларация негізінде арнаулы салық режимін (АСР) қолданатын контрагенттерден тауарларды, жұмыстарды және көрсетілетін қызметтерді (ТЖҚ) сатып алу бойынша шығыстарды шегерімге жатқызуға құқылы емес.

Сонымен бірге, қолданыстағы заңнамалық тыйымға қарамастан, кейбір компаниялар салықтық тәуекелдерді арттыра отырып, оңайлатылған декларация негізіндегі АСР қолданатын жеткізушілерді тартуды жалғастыруда.

2026 жылдың басынан бері Павлодар облысында ЖБР-дегі 890-нан астам салық төлеуші тіркелді, олар АСР-дегі 12 мыңнан астам жеткізушіден жалпы сомасы 20 млрд теңгеге жуық ТЖҚ сатып алған.

Талдамалық мониторинг барысында АСР-дегі жеткізушілермен миллиондаған айналым кезінде шығындарды көрсетіп, сол арқылы өзінің салықтық міндеттемелерін азайтатын кәсіпкерлік субъектілері анықталды.

Жұмыскерлер саны 1 адамды құрайтын «А» ЖШС жалпыға бірдей белгіленген режимді қолданады. 2026 жылдың 1 жартыжылдығында АСР қолданатын 7 салық төлеушіден жалпы айналым сомасы 140 млн теңгеге қызметтер сатып алынған. Өткен жылы осы салық төлеуші бойынша барлық шығыстардың 83%-ын АСР бойынша шегерімдер құрады (барлығы АСР қолданатын 36 жеткізуші), осыған байланысты компанияда жыл қорытындысы бойынша 350 млн теңге көлемінде шығын қалыптасқан.

Сонымен қатар, салық төлеушілер тарапынан КТС аванстық төлемдерінің төмендеуіне жол берілген жағдайлар байқалады, бұл ретте шығыстардың елеулі бөлігін АСР бойынша шегерімдер құрайды.

Мәселен, «Б» ЖШС-де айналымның 1 200 млн теңгеге (85%-ға) өсуі жағдайында сатып алулардың 700 млн теңгеге төмендеуі тіркелді, оның ішінде АСР қолданатын жеткізушілер бойынша – 609 млн теңгеге (жалпы төмендеудің 87%-ы). КТС бойынша аванстық төлемдердің 167 млн теңгеге төмендеуіне жол берілген.

Салық төлеушілердің бұл санаттары мемлекеттік кірістер органдарының ерекше назарына ілігетінін ескертеміз.

Сонымен бірге салық төлеушілерден 2026 жылға арналған корпоративтік табыс салығы бойынша аванстық төлемдердің толық есептелуіне назар аударуды сұраймыз. Мемлекеттік кірістер комитеті салық салынатын табыс өскен кезде аванстық төлемдердің төмендеуі туралы ақпараттандырумен салық төлеушілерге PUSH-хабарламалар жіберді.

Салық төлеушілер нені білуі маңызды

Норма Салық кодексінің 286-бабымен (Шегерілуге жатпайтын шығыстар) реттеледі. Көрсетілген шығыстар бухгалтерлік есепте шығындар құрамында көрініс табады, алайда салықтық есептілікті (КТС/ЖТС декларациясын) қалыптастыру кезінде олар салық салынатын табысты азайтпайды.

Тыйым тек «оңайлатылған декларациядағы» АСР контрагенттеріне қатысты. Өзге салық режимдерін төлеушілермен мәмілелер бойынша шығыстар барлық растаушы құжаттар болған кезде жалпы белгіленген тәртіппен шегерімге жатқызылады.

Павлодар облысы бойынша МКД бұзушылықтар мен қосымша есептеулерді болдырмау үшін кәсіпкерлерді мәмілелерді рәсімдеуге мұқият қарауға және салықтық есептілікті дұрыс қалыптастыруға шақырады.

Павлодар облысы бойынша МКД

Камералдық мониторинг басқармасы

Ақпарат көзі : https://www.gov.kz/memleket/entities/kgd-pavlodar/press/news/details/1279975?lang=ru