Қазақстан Республикасының Израиль Мемлекетіндегі Елшісі Дәулет Ембердиев Израиль Еңбек министрлігінің Бас директоры Руби Шемшемен кездесу өткізді. Кездесу барысында еңбек қатынастары саласындағы Қазақстан-Израиль ынтымақтастығын одан әрі дамыту және екіжақты өзара іс-қимылдың шарттық-құқықтық базасын кеңейту мәселелері талқыланды.
Қазақстан тарапы Израиль тарапының қарауындағы құжаттарды келісу жөніндегі жұмысты жеделдетуге мүдделі екенін атап өтіп, тиісті халықаралық шарттарға жақын арада қол қойылады деген үміт білдірді.
Д. Ембердиев аталған бағыттағы жұмыстың 2021 жылдан бері жүргізіліп келе жатқанын, сол кезде тиісті бастаманы Израиль тарапы көтергенін атап өтті. Осыған байланысты Қазақстан тарапы ведомствоаралық өзара іс-қимылды жандандырып, құжаттарды келісу процесін жеделдетуге шақырды.
Кездесу барысында Қазақстан Республикасы азаматтарының Израиль Мемлекетіндегі еңбек қызметін реттеу туралы келісімнің жобасына ерекше назар аударылды.
Сонымен қатар, Қазақстан Республикасының Еңбек және халықты әлеуметтік қорғау министрлігі мен Израиль Мемлекетінің Еңбек министрлігі арасындағы ынтымақтастық туралы меморандумның жобасы бойынша пікір алмасу өтті.
Кездесу қорытындысы бойынша тараптар еңбек саласындағы екіжақты ынтымақтастықты одан әрі нығайту мақсатында тиісті мемлекеттік органдар арасындағы сындарлы диалог пен үйлестіруді жалғастыруға дайын екендерін растады.

Ақпарат көзі : https://www.gov.kz/memleket/entities/mfa-tel-aviv/press/news/details/1294928?lang=ru