Шымкенттің базарында, дүкенінде, көше бойындағы шағын кафесінде бағаның өзгерісін ең алдымен қала тұрғындары сезеді. Жас отбасылар айлық бюджетін жоспарлағанда, зейнеткерлер дәріханада мен азық-түлік дүкенінде есеп жүргізгенде, шағын кәсіпкерлер шикізат құнын санағанда бір сұрақ қайталанады: ақша қаншалықты жететін болады? Мемлекет басшысы 28 қазанда халыққа арнаған Жолдауында дәл осы күнделікті алаңдаушылыққа тікелей қатысты мәселені, яғни инфляция тақырыбын көтерді.
Президент инфляцияны азаматтардың әл-ауқатына тікелей нұқсан келтіретін «үнсіз жау» деп бағалады. Бұл баға өсімі күрт өзгеріс болып көрінбей, жылдам байқалмай, табыстың сатып алу қабілетін біртіндеп азайтатынын меңзейді. Жолдауда айтылғандай, қазір елде инфляция қарқынының бәсеңдеу үрдісі бар, алайда оның жалпы деңгейі әлі жоғары. Сондықтан бағаның өсуін тежеу және макроэкономикалық тұрақтылықты қамтамасыз ету мемлекеттің басты міндеттерінің бірі болып қала береді.
Шымкент республикалық маңызы бар қала, елдің оңтүстігіндегі ірі мегаполис әрі халқының жасы жас, көп ұлтты шаһар. Мұндай қалада тұтыну сұранысы жоғары, отбасылар үлкен, күнделікті шығынның үлесі айтарлықтай. Сондықтан азық-түлік пен қызмет бағасының өзгеруі мұнда кең қабатқа әсер етеді. Жолдаудағы инфляция туралы тармақ Шымкент үшін қағаз жүзіндегі макроэкономикалық ұғым емес, әрбір үйдің қалтасына қатысты нақты тақырып.
Президент инфляциялық қысымды төмендету үшін сыртқы және ішкі факторларды ескеретін кешенді шаралар қажет екенін атап өтті. Бұл ретте Үкімет пен Ұлттық банктің жұмысы жоғары деңгейде үйлестірілуі тиіс. Ұлттық банктің міндеті базалық мөлшерлеме құралдары арқылы ақша массасын реттеп, инфляцияны нысаналы дәлізге қайтару. Қарапайым тұрғын үшін бұл несие мен депозит жағдайына, жинақтың құнына, ұзақ мерзімді жоспар құру мүмкіндігіне ықпал ететін бағыт.
Үкіметке келетін болсақ, Жолдауда бюджет шығыстарын оңтайландыру, монополиялық нарықтардағы бағаның негізсіз өсуіне және коммуналдық тарифтердің күрт қымбаттауына жол бермеу міндеті қойылған. Шымкент тұрғындары үшін тарифтер мәселесі ерекше өзекті, себебі жылу, су, электр қуаты мен өзге де коммуналдық қызметтің құны отбасы бюджетінің тұрақты бөлігін құрайды. Тарифтің күрт өсуі жоспарды бұзады, ал алдын ала болжауға келетін, негізделген баға тұрғынға сенімділік береді. Осы тұрғыдан жергілікті органдардың тарифтік саясатты ашық түсіндіруі де маңызды.
Жолдаудағы үшінші бағыт ішкі өндірісті дамыту. Президент азық-түлік инфляциясын төмендетудің ең тиімді жолы импортқа тәуелділікті азайту және отандық тауар өндірушілерді қолдау екенін көрсетті. Шымкент өңірдегі ірі сауда-тұтыну орталықтарының бірі болғандықтан, жергілікті өндіріс пен өңдеу саласының күшеюі қала нарығына тікелей әсер етуі мүмкін. Отандық өнім көбейген сайын жеткізу тізбегі қысқарады, сыртқы бағаның құбылуына тәуелділік азаяды, жергілікті кәсіпкерлерге жаңа мүмкіндік ашылады. Бұл қала экономикасына да, жұмыспен қамтуға да оң ықпал етер еді.
Жолдаудың ең маңызды ойы бәлкім мынада: инфляциямен күрестің нәтижесі қағаздағы көрсеткіштермен емес, азаматтардың сатып алу қабілетімен өлшенуі тиіс. Мемлекеттік саясаттың басты бағыты халықтың нақты табысын арттыру. Нақты табыс баға өсімінен озып отырғанда ғана отбасы өзгерісті сезінеді: тұрмыс сапасы жақсарады, жинақ жасауға, білімге, денсаулыққа, баспанаға жұмсауға мүмкіндік артады. Шымкенттің жас халқы үшін бұл ерекше мәнді, өйткені жас отбасылар болашағын дәл осы табыс пен баға арақатынасына қарап жоспарлайды.
Қорытындылай айтқанда, Жолдаудағы бұл тармақ баға тұрақтылығы мен азаматтардың табысын қорғау ел экономикасының тұрақтылығының кепілі екенін еске салады. Президент атап өткендей, мемлекеттік органдар жай бақылаушы болып қалмай, нарықтағы баға тұрақтылығы мен халық әл-ауқатын арттыру үшін пәрменді әрі үйлесімді әрекет етуге міндетті. Шымкент тұрғындары үшін ең маңыздысы осы міндеттердің дүкен сөресіндегі баға мен үйге келетін тарифтен көрінуі. Қала тұрғындары мен кәсіпкерлері жергілікті билік жұмысын нақты нәтижемен бағалайтыны сөзсіз, ал нәтиже тұрақты баға мен өсіп жатқан нақты табыс болғанда ғана толық саналады.