Мемлекет басшысының «Әкімдердің халықпен кездесулерін өткізу туралы» Жарлығына сәйкес Жамбыл облысының әкімі Ербол Қарашөкеев Тараз қаласының тұрғындарымен кездесті.Алдымен Ербол Қарашөкеев халықты облыста атқарылып жатқан жұмыстар туралы хабардар етті.2024 жылдың 11 айының қорытындысы бойынша экономикалық өсім 4,1 пайызды құрады.814,7 млрд. теңгенің өнеркәсіп өнімі өндірілді. 239,3 млрд. теңгенің құрылыс жұмыстары атқарылып, өткен жылдың тиісті кезеңімен салыстырғанда 18 пайызға артты.Ербол Қарашөкеев Тараз қаласының әлеуметтік-экономикалық даму көрсеткіштерінде оң динамика қалыптасып отырғанын атап өтті.Көне шаһарға тартылған инвестиция көлемі 5,3 пайызға, құрылыс жұмыстарының көлемі 2,8 пайызға артқан. Баспана кезегінде тұрған азаматтарға 317,4 шаршы метр тұрғын үй пайдалануға берілді.Биыл Тараз қаласындағы М-1 жылу магистралінің 4,1 шақырымы қайта жаңғыртудан өтті. 2025 жылы М-3 жылу желілері мен жылу магистралін жаңарту жоспарлануда.Бұдан соң Тараз қаласының әкімі Бақытжан Орынбеков халық алдында есеп берді.Негізгі баяндамалардан кейін тұрғындар көкейлерінде жүрген сауалдарын ортаға салды. Атап айтқанда, жарық, жол, байланыс, ауыз су мәселесін көтерді, сондай-ақ әлеуметтік нысандардың құрылысын жүргізу, бағдаршам орнату, жаяу жүргіншілер жолағын салу бойынша ұсыныс-пікірлерін білдірді.- Тараз қаласында тұрғын үйге, жылуға, көше жарығы мен жолына қатысты көкейкесті мәселелер бар. Дегенмен аталған түйткілдердің түйінін бірден тарқату мүмкін емес. Оған уақыт пен қаржы керек. Бүгінде нақты жоспарға сәйкес мәселелер рет-ретімен шешімін тауып келеді, – деді облыс әкімі.Ербол Қарашөкеев Тараз қаласының әкімдігіне халықтың өмір сүру сапасын арттыруға ерекше назар аударып, тұрғындардың, оның ішінде жастар арасындағы жұмыссыздық деңгейін төмендетуге бағытталған шараларды жандандыруды тапсырды.Сонымен бірге құрылыс жұмыстарының сапасы мен мерзімінде аяқталуын қамтамасыз етуді, қала аумағын абаттандыру, санитарлық тазалық шараларын тұрақты бақылауға алуды, азық-түлік, жанар-жағармай, сұйытылған газ тапшылығын болдырмау мақсатында кәсіпкерлермен жүйелі жұмыс жүргізуді жүктеді. Ең бастысы, халықпен тұрақты кері байланыс орнатып, олардың мәселелеріне дер кезінде жауап беруді міндеттеді.Кездесуден кейін облыс әкімі азаматтарды жеке мәселелері бойынша қабылдады.Айта кетейік, Жамбыл облысында бүгінге дейін барлық деңгейдегі әкімдер 758 кездесу өткізіп, халықтың 2 745 мәселесіне құлақ түрді. Оның 2 053-і шешімін тапты, 452 түйткілге түсінік берілілсе, 240 сауал бақылауға алынды.Ақпарат көзі : https://www.gov.kz/memleket/entities/zhambyl/press/news/details/906910

Түркістан облысында көлік инфрақұрылымы қарқынды дамып келеді. Соның ішінде шағын авиацияны дамыту мәселесі де назарға алынған. Бұл өңірге барыс-келісті жақсартып, туризмді дамытуда маңызды рөл атқарады. Осы бастама аясында шағын авиация талаптарына сай жаңа әуе бағыттарын ашу және аэродромдар салу жобалары қарастырылуда. Аталған мәселе облыс әкімдігінде талқыланды.Түркістан облысының әкімі Дархан Сатыбалды осы саланы дамытып, тиісті ұсыныстар енгізуді тапсырды. Сонымен бірге Түркістандағы халықаралық әуежайдың әлеуетін көтеруді тапсырды.– Түркістанның халықаралық әуежайының мүмкіндігі өте жоғары. Соны тиімді пайдалану керек. Бұл – бірінші кезекте көлік инфрақұрылымын дамытады. Екіншіден, туризм саласы өркендейді. Ізденіңіздер, шетел тәжірибелерін зерделеңіздер. Шағын авиацияны дамыту бойынша да нақты ұсыныстар күтемін. Жұмысты ширатыңыздар, – деді Дархан Сатыбалды.Мәжілісте Түркістан облысының жолаушылар көлігі және автомобиль жолдары басқармасының басшысы Қуатжан Жұматаев авиация саласын жүйелеу бағытындағы жұмыстар мен жоспарларды баяндады. Бүгінде бірнеше әуе компанияларының өкілдерімен, сондай-ақ шағын авиацияны дамытуға қызығушылық танытқан кәсіпкерлермен келіссөздер жүргізілуде. Ішкі рейстерді қалыптастыру және туризмді дамыту мақсатында Түркістан облысында ішкі рейстерін ашу көзделген. Сонымен бірге «Түркістан-Ташкент», «Түркістан-Самарқанд» бағыттарында халықаралық рейс ашу мәселесі де талқыланып жатыр. Қысқа қашықтықтарға жолаушылар тасымалдау үшін 19 орындық шағын ұшақтарын пайдалану жоспарлануда. Шағын авиацияның қызмет көрсету инфрақұрылымын дамыту мақсатында аймақта шағын аэродромдар салу қажет. Бұл жобалар әлі талқыланып, қаржыландыру көздері зерделеніп, тиісті келіссөздер жалғасады.Түркістан облысы әкімінің баспасөз қызметі Ақпарат көзі : https://www.gov.kz/memleket/entities/ontustik/press/news/details/906559

Түркістан қаласында мүмкіндігі шектеулі азаматтарға Жаңа жыл мерекесі ұйымдастырылды. Түркістан қаласы әкімдігінің Жұмыспен қамту және әлеуметтік бағдарламалар бөлімі қолға алған бұл бастама ерекше жандарға қуаныш сыйлап, тең қоғам құндылықтарын насихаттауды мақсат етті.Мерекелік кештің шымылдығын Түркістан қаласы әкімінің орынбасары Мекенхан Қырықбаев жүрекжарды құттықтауымен ашты. Шараға арнайы қатысқан қалалық мәслихат төрағасы Ғаппар Сәрсенбаев да өзінің жылы лебізін білдірді.Кеш барысында ерекше жандар өз өнерлерін көрсетіп, көпшіліктің ықыласына бөленді. Мерекелік концерттің соңында қатысушыларға арнайы сыйлықтар табысталып, шара мейірім мен қуанышқа толы сәттермен аяқталды.Бұл мерекелік шара ерекше жандарға қуаныш сыйлап қана қоймай, қоғамның жылы қарым-қатынасы мен қамқорлығын тағы бір мәрте айшықтай түсті.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/906562

Түркістанда Бекзат Саттарханов атындағы спорт кешені пайдалануға берілді. Заман талабына сай ғимараттың ашылу салтанатына Түркістан облысының әкімі Дархан Сатыбалды, бапкерлер мен спортшылар және спорт ардагерлері қатысты. Өңір басшысы көпшілікті ғимараттың ашылуымен құттықтады.– Алдымен баршаңызды келе жатқан Жаңа жыл мерекесімен құтықтаймын! Бүгін Түркістан төрінде қуанышты сәтте жолығып тұрмыз. Ел Президенті Қасым-Жомарт Кемелұлы халыққа Жолдауында спорт саласын дамыту міндетін жүктеді. Әсіресе, балалардың спортпен айналысуына жағдай жасау қажет екенін айтты. Осы бағытта Түркістан облысында спорт инфрақұрылымын жақсартуға көңіл бөлінуде. Өңірде 3500-ден астам спорт нысаны бар. Биыл 11 айда облыста 10 ірі спорт кешені пайдалануға берілді. Түркістан қаласы облыс орталығы болғалы бері шаһарда «Түркістан-Арена» стадионы, «Olympic Center» спорт кешені, «Теннис орталығы», «Мұз сарайы» ғимараттары пайдалануға беріліп, спортшыларымыз тыңғылықты жаттығу жұмыстарын жүргізуде. Қазіргі таңда ескек есу каналы мен халықаралық талапқа сай атшабардың құрылысы жүргізіліп жатыр. Бұның бәрі – спорт саласына жасалған қамқорлық әрі үлкен қолдау. Ал бүгін қазақ халқының даңқты перзенті, Түркістаннан шыққан Олимпиада чемпионы Бекзат Саттарханов атындағы спорт кешені ел игілігіне берілуде. Түркістан өңірінде чемпионның атын ұлықтау бағытында жүйелі жұмыстар атқарылуда. Бүгін ашылғалы тұрған спорт кешенін де ел перзентіне лайықты құрмет деп білеміз. Біз спортты дамыту бағытындағы жұмысты жалғастыра береміз, – деді Дархан Сатыбалды.Бекзаттың анасы Сырлыкүл Саттарханова игі іске мұрындық болған азаматтарға алғысын айтып, аймақта «чемпионның ізбасарлары көбейе берсін» деген тілегін жеткізді.«Самұрық-Қазына» АҚ корпоративтік басқару, әлеуметтік-еңбек қатынастары және еңбекті қорғау жөніндегі басқарушы директоры Ғибрат Ауғанов та көпшілікті құттықтап, жаңа ғимарат чемпиондарды даярлауға үлесін қосатынын атап өтті.Бұл нысанның құрылысына Түркістан облысы әкімдігі тарапынан 2,7 млрд теңге бағытталды. «Самұрық-Қазына» АҚ компаниялар тобы атынан «Samruk-Kazyna Trust» қайырымдылық қорынан технологиялық құрал-жабдықпен қамтамасыз етуге, ішкі әрлеуге, инженерлік инфрақұрылыммен қамтамасыз етуге 500 млн теңге бөлінді. Ғимараттың ауданы – 7248 шаршы метр, жалпы жер ауданы – 1,8 гектар.Бұл спорт кешенінде бокс, қазақ күресі, грек-рим, еркін күрес, әйелдер күресі, таеквондо, каратэ, үстел теннисі және ойын спорт түрлерін дамытуға мүмкіндік бар. 300-ден астам жанкүйер сыятын көрермен залы, жаттығу залдарымен қамтылған. Республикалық және халықаралық жарыстарды өткізуге болады.Айта кетейік, Түркістан облысында спорт қарқынды дамып келеді. Өңірде 29 олимпиадалық, 34 ұлттық және олимпиадалық емес спорт түрлері дамып жатыр. Биыл Түркістан облысының спортшылары әлем чемпионаттарынан 106 медаль, Азия чемпионаттарынан 214 медаль жеңіп алды. Дүниежүзілік көшпенділер ойындарында 16 алтын, 10 күміс, 5 қола медаль олжалады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/906581

Түркістанда «Жайлы мектеп» жобасы аясында тағы бір мектеп ашылды. 2 мың оқушыға арналған білім ұясы «Жаңа қала» ықшамауданында бой көтерді. Мұнда балалардың сапалы білім алуына барлық жағдай жасалған.Қасым-Жомарт Тоқаевтың тапсырмасымен салынған білім ұясының ашылу салтанатына Түркістан облысының әкімі Дархан Сатыбалды мен білім саласының ардагерлері қатысты.– Еліміздің болашағы – білімді ұрпақтың қолында. Мемлекет басшысының бастамасымен бүгінгі таңда елімізде «Жайлы мектеп» ұлттық жобасы қабылданып, заманауи, озық үлгідегі білім ошақтары салынуда. Бұл бастама апатты және үш ауысымдық мектептер мәселесін шешіп, оқушы орындарының тапшылығын жояды. Сіздердің мектептеріңіз жай ғана жаңа ғимарат емес. Бұл – даму мен оқу үшін тамаша жағдайлар жасалған орын. Жаңа білім ордасының ашылуы құтты болсын! – деді Дархан Сатыбалды.Аталған білім ордасы қаладағы 2 мектептегі жүктемені азайтуға мүмкіндік береді. Түркістан қаласының «Жаңа қала» аумағында салынған 4 қабатты білім ордасындағы физика, химия, биология және робототехника кабинеттері заманауи құралдармен жабдықталған. Білім алушылардың жан-жақты дамуы үшін мектепте спорт залдары, шеберлік залдары, зертханалар мен демалыс аймақтары ұйымдастырылған. Жоғары жылдамдықтағы интернетке қосылған. Бастауыш пен жоғары сынып оқушылары жекелеген блоктарда оқиды. Балалардың жас ерекшелігіне орай блоктардың әрқайсысы оқу сыныптарымен, санитарлық тораптармен, спорт залдарымен және жеке шкафтармен қамтылған.Айта кетейік, елімізде «Жайлы мектептердің» басым бөлігі Түркістан облысында салынуда. Қазір өңірде 29 мектептің құрылысы жүргізіліп жатыр. Оның үшеуі ашылып үлгерді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/906868

Бүгін Түркістан қаласы, Отырар мөлтек ауданында азық-түлік тауарларының жәрмеңкесі ұйымдастырылды. Жәрмеңкеде ет, сүт, ауыл шаруашылығы өнімдері тиімді әрі арзан бағада ұсынылып, халық күнделікті тұтынатын әлеуметтік маңызы бар 19-дан астам тауар түрі нарықтағы бағадан 40-50 пайызға төмен бағада саудаланды.Мәселен, нан бөлкесінің бағасы - 70 теңге болса, жұмыртқа данасы - 40 теңге, тұз - 45 теңге, ал пияз - 77 теңгеден сатылды. Картоп пен сәбіз - 100 теңге, І сұрыпты бидай құны – 190 теңге, күнбағыс майы - 520 теңгеден бағаланды. Тұрғындар қолжетімді өнімдер үшін ризашылығын білдірді.Баға тұрақтылығын сақтау бағытындағы жәрмеңкелер «Түркістан әлеуметтік-кәсіпкерлік корпорациясы» АҚ бастамасымен тұрақты түрде өткізіліп келеді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/906875

Бүгін Ақтөбеде өңір баспасөзінің қара шаңырағы «Ақтөбе» қоғамдық-саяси газетінің 100 жылдық мерейтойы аталып өтілуде. Шара аясында «Жүз жыл жылнамасы» көрмесі, ғылыми-практикалық конференция, «Ақтөбе – 100 жыл» фотокөрмесі және салтанатты жиын ұйымдастырылады. Мерейтойға арнайылап еліміздің түкпір-түкпірінен құрметті қонақтар шақырылған. Оның ішінде Сенат депутаты Нұртөре Жүсіп, Мәжіліс депутаты Жанарбек Әшімжан, Қазақстанның құрметті журналисі Мейрамбек Төлепбергенов, филология ғылымдарының докторы, профессор, «Ақтөбе» газеті бас редакторының бұрынғы орынбасары Серікқали Байменше, Қазақстанның құрметті журналисі, Қазақстан Республикасы еңбек сіңірген қайраткері Қайнар Олжай, халықаралық «Түркістан» газетінің бас редакторы, «Ақтөбе» газетінің бұрынғы бас редакторы Бауыржан Бабажанұлы бар. Өңір басшысы Асхат Шахаров шара алдында құрметті қонақтарды және «Ақтөбе Медиа» ЖШС директоры Раукен Отыншинді қабылдады. Өз сөзінде облыс әкімі талай тұлғалар басшылық жасап, қаламы қарымды қаламгерлер мен журналистер негізін салған дәстүрді абыроймен жалғастырған «Ақтөбе» газеті бүгінгінің талабына сай жаңғырып, ғасырлық туын жаңа жетістіктермен қарсы алып отырғандығына баса назар аударды.Басқосуда қатысушылар сөз алып,«Ақтөбе» газетінің кешегісі мен бүгінгісіне тоқталды, қазақ баспасөзі туралы ой қозғады. Кездесу соңында өңір басшысы әр мейманға жақында жарық көрген, 29 нұсқасы толықтай үш тілде енгізілген Қобыланды батыр жырының 7 томдық жинағын және «Ақтөбе» газетіне - 100 жыл» мерейтойлық медалін табыстап, алғысын білдірді. Ақпарат көзі : https://www.gov.kz/memleket/entities/aktobe/press/news/details/906532

Өңірдің орнықты дамуының негізгі факторларының бірі – сумен жабдықтау.Биыл 2 мыңнан астам тұрғыны бар 7 ауылды сумен қамтылды.Бұдан өзге, ауылдарға одан әрі көгілдір отын тарту міндеті өзекті болып қала береді.Биыл 2 мыңға жуық халқы бар 5 ауылды газдандыруды аяқтап, қамтамасыз ету үлесі 95,7%-ға дейін жеткізілді.Сонымен қатар, 2023 жылы айтылғандай, өңірдегі магистральды газ құбырларының жүктеме мәселесі шешілді.Биылғы жылы «Бұхара-Орал» газ құбырының үшінші желісін салу жобасы аяқталу сатысында. Бұл алдағы 50 жылда облыс орталығындағы газ тапшылығын шешуге толық мүмкіндік береді.Ақпарат көзі : https://www.gov.kz/memleket/entities/aktobe/press/news/details/906647

Желтоқсан айының әрбір үшінші жексенбісінде Қазақстанда Энергетик күні аталып өтеді. Бұл - еңбегі қарапайым азаматтар мен жалпы ел өмірінде жылумен, жарықпен электр энергиясымен қамтамасыз ету сияқты маңызды міндетпен байланысты адамдардың кәсіби мерекесі.Өңір басшысы Ақтөбе облысындағы энергетика саласында еңбек етіп жүрген мамандарды кәсіби мерекесімен құттықтады.Әкім өз сөзінде энергетика саласының өңірдің дамуы мен халықтың өмір сапасын жақсартудағы маңызды рөлін ерекше атап өтті. Оның айтуынша, бұл сала – тұрақтылықтың негізі, ал энергетиктердің қажырлы еңбегі экономиканың алға басуына және тұрмыстық жағдайдың жақсаруына тікелей әсер етеді.«Мемлекет басшысы энергетикалық кәсіпорындардағы жабдықтардың жұмысқа жарамдылығын қолдау үшін жаңа өндіруші қуаттарды жаңғырту, іске қосу және оған инвестициялар тартудың маңыздылығына бірнеше рет тоқталып, арнайы тапсырма бергенін де білеміз. Бүгін біз энергетика жүйесін реформалау қарсаңында тұрмыз. Энергетика – бұл тек мамандық қана емес, бұл нағыз күш-қуат пен жауапкершілікті талап ететін сала. Халықтың үйінде жылу мен жарықтың болуы - сіздердің еңбектеріңіз. Осы ретте әр маманға алғыс білдіремін,” – деді әкім.Салтанатты шара барысында облыс басшысы сала мамандарына елдің энергетика саласын дамытуға қосқан елеулі үшін ҚР Президенті Жарлығымен бекітілген мемлекеттік наградаларды табыстады. ІІІ дәрежелі «Даңқ» ордені «Ақтөбе ЖЭО» АҚ от қалаушысы Нұртас Әбуовке және осы мекеменің ауысым бастығы Нұрболат Сарбасовқа, «Энергосистема» ЖШС қызмет бастығы Талғат Сисенбаев және компанияның аға шебері Сайлаубай Тажғаринге, «Аqtobe su-energy group» АҚ Магистралдық жылу желілері ауданының бастығы Мұса Ыбырайға берілді.«Ерен еңбегі үшін» медалімен «Ақтөбеэнергоснаб» ЖШС Ақтөбе электр энергиясымен жабдықтау учаскесі бастығының орынбасары Людмила Кольцова наградталды.Айтып өтейік, облыста энергетика саласында 5 мыңнан астам маман қызмет атқаруда. Өңірдің тұтынатын қуаты орта есеппен 944 МВт құрайды, оның ішінде жергілікті энергия көздерінен 485МВт электр энергиясы өндіріледі.Ақпарат көзі : https://www.gov.kz/memleket/entities/aktobe/press/news/details/906767

Абай облысының әкімі Нұрлан Ұранхаев Бородулиха ауданы Жаңа Шүлбі ауылындағы Арнаулы әлеуметтік қызметтерге мұқтаж балаларды қолдау орталығында болды. Сапар барысында өңір басшысы мекеменің ағымдағы жағдайымен танысып, қызметкерлердің ұсыныс-пікірлерін тыңдады. Орталық тәрбиеленушілермен әңгімелесті.Мекемеде педагог-психолог кабинеттері, үйірме жұмысына арналғалған орындар, хореография, акт залы, медициналық пункт, жаттығу залы, сондай-ақ «Орман жиегі» деп аталатын жазғы сауықтыру алаңы жабдықталған. Тәрбиеленушілерді жан-жақты дамыту үшін орталықта 20-дан астам шығармашылық және спорттық бағыттағы үйірмелер мен секциялар ұйымдастырылған. Балалардың таланттарын ұштап қана қоймай, әлеуметтік бейімделуге көмектеседі. Орталық аумағында спорт және ойын алаңдары да бар.Аймақ басшысы ұжым мүшелерімен кездесіп, тәрбиеленушілердің білім алуы мен өмір сүру сапасын жақсарту бойынша пікір алмасты. Саннан сапаға ерекше көңіл бөлу керектігін айтқан әкім балалардың қызығушылықтарын ескеріп, болашақтарына қажетті дағдыларға баулитын үйірмелер ашуды тапсырды. Ал Білім басқармасы басшысына орталыққа әдістемелік көмек көрсету, ұжымдар арасында тәжірибе алмасуды жолға қоюды, аудан әкіміне балалардың қалаға саяхаттауына жағдай жасауды міндеттеді.«Біз барлығымыз бала тәрбиелеп отырмыз. Бұл орталықтағы балалар ерекше қамқорлықты қажет етеді. Олар қоғамда өздерін еркін сезіну үшін барлық жағдайды жасауымыз керек. Болашақ өмірге бүгіннен бастап даярлау біздің ортақ міндетіміз», - деді әкім.Облыс әкімі орталыққа жасаған сапарында бокс секциясына қажетті жабдықтарды сыйға тартса, биыл шаңғыға қажетті жиынтық табыс етті.Балалардың қауіпсіздігін қамтамасыз ету үшін бейнебақылау камералары орнатылды. Қазандық, кір жуатын орын, гараж, қоймалар жабдықталып, жарықтандыру жүргізілді. Орталықтың барлық аумағы қоршалды.Орталықта бүгінде 48 бала тәрбиеленуде. 26 педагог еңбек етеді. Мекеменің 75 балаға дейін қабылдауға мүмкіндігі бар. Мұнда арнаулы әлеуметтік қызметтерге мұқтаж 3 жастан 18 жасқа дейінгі балаларға, оның ішінде физикалық және психикалық дамуында шамалы ауытқулары бар балаларға кешенді қолдау көрсетіледі.Ақпарат көзі : https://www.gov.kz/memleket/entities/abay/press/news/details/906482

АҚПАРАТТЫҚ ХАБАРЛАМА Зейнетақы жинақтарыңызды хабарландыру таратқыш делдалдарға сеніп тапсырмаңыз! Соңғы уақытта әлеуметтік желілерде және онлайн-хабарландыру платформаларында азаматтардың кез келген санаты үшін ең төменгі жеткіліктілік шегінен (ТЖШ) асатын зейнетақы жинақтарын алу бойынша делдалдық қызметтерді төмен пайызбен көрсету туралы ұсыныстар таратылуда. "БЖЗҚ" АҚ өз салымшылары мен алушыларына ЕСКЕРТЕДІ: зейнетақы жинақтарын алу Қазақстан Республикасының Әлеуметтік кодексінде қатаң белгіленген жағдайларда ғана мүмкін. Ең алдымен, бұл зейнет жасына толу, 1 немесе 2 топтағы мерзімсіз мүгедектік, шет елге тұрақты тұруға кету, мұрагерлік. Зейнетақы жинақтарын тұрғын үй жағдайларын жақсартуға және/немесе емделуге заңнамамен белгіленген шарттар сақталған жағдайда, төмендегі азаматтардың санаты пайдалана алады:· ең төменгі жеткіліктілік шегінен асатын жинақтары бар салымшылар (ТЖШ-дан асатын сома шегінде);· зейнетақысы жоғалған табыстың (бұрын алынған жалақысының) кемінде 40% құрайтын зейнеткерлер - олар шотта қалған жинақтарының 50% дейін пайдалана алады;· еңбек сіңірген жылдары бойынша зейнеткерлер (жинақтарының 100% дейін пайдалана алады);· зейнетақы аннуитеті шартын жасасқан салымшылар (жинақтарының 100% дейін пайдалана алады). Зейнетақы жинақтарын тұрғын үйге немесе емделуге мақсатты пайдалану тек уәкілетті операторлар – екінші деңгейдегі банктер арқылы мүмкін болады. Тиісінше, делдалдық қызметтер қажет емес. Бұл ретте БЖЗҚ ешқандай ақы алмайды.Күмәнді әрекетке қатысуға келісе отырып, сіз ақшаңызды жоғалту қауіпін тудырып қана қоймай, болашақта басқа алаяқтық әрекеттер үшін пайдаланылуы мүмкін жеке деректеріңіздің сақталуына да қауіп төндіресіз.БЖЗҚ өз салымшылары мен алушыларына мұндай ұсыныстарды елемеуге, тек ресми көздерден ақпарат алуға және құқықтық тұрғыдан қорғалған салада ғана әрекет етуге қатаң кеңес береді.Барлық сауалдарыңызға жауап алып, ақпараттың дұрыстығын БЖЗҚ бөлімшелерінде де, қашықтықтан да:enpf.kz сайты, БЖЗҚ/ЕНПФ ұялы қосымшасы арқылы,байланыс орталығының 1418 нөміріне қоңырау шалу жолымен көп арналы тегін байланыс немесе +7 777 000 1418 нөмірі бойынша WhatsApp арқылы,БЖЗҚ-ның Одноклассники, Telegram, Facebook, Вконтакте, Х және Instagram сияқты танымал платформалардағы әлеуметтік желілердегі ресми парақшалары арқылы да тексере аласыз. БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. Зейнетақы заңнамасына сәйкес БЖЗҚ міндетті зейнетақы жарналарын, жұмыс берушінің міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, сондай-ақ "Қазақстан Республикасының екінші деңгейдегі банктерінде орналастырылған депозиттерге міндетті кепілдік беру туралы" Қазақстан Республикасының Заңына сәйкес депозиттерге міндетті кепілдік беруді жүзеге асыратын ұйым аударған кепілдік берілген депозит бойынша кепілдік берілген өтемнің талап етілмеген сомасы есебінен қалыптастырылған ерікті зейнетақы жарналарын есепке алып, оның есебін жүргізеді, зейнетақы төлемдерін жүзеге асыруды қамтамасыз етеді. Сондай-ақ Қор нысаналы активтер мен нысаналы талаптарды есепке алуды, нысаналы жинақтау шоттарына нысаналы жинақтарды (НЖ) есепке алу мен есептеуді, НЖ төлемдерін оларды алушының банк шоттарына есептеуді, "Ұлттық қор – балаларға" бағдарламасы шеңберінде Қазақстан Республикасының Үкіметі айқындаған тәртіппен НЖ қайтарымдарын есепке алуды жүзеге асырады (толығырақ www.enpf.kz сайтында). Ақпарат көзі : https://www.gov.kz/memleket/entities/abay/press/news/details/906549

Қазақстанның авиациялық әкімшілігінде авиациялық қауіпсіздік және формальдылықты оңайлату жөніндегі ведомство аралық комиссиясының отырысы өтті, оған Қазақстан Республикасы КМ Азаматтық авиация комитеті, Авиациялық әкімшілігі, мемлекеттік және қадағалау органдарының өкілдері, сондай-ақ комиссия құрамына кірген авиация саласының өкілдері қатысты.Отырыста 2024 жылғы жұмыстың қорытындысы шығарылып, азаматтық авиация саласындағы жолаушыларға қызмет көрсету сапасы мен авиациялық қауіпсіздік стандарттарына сәйкестігін бағалауға бағытталған ИКАО-ның алдағы аудиті талқыланды.Мемлекеттік органдар арасындағы үйлестіру, авиациялық қауіпсіздік мәселелері бойынша ведомство аралық әуежай комиссиялары жұмысының тиімділігі мен формальдылықты жеңілдету мәселелеріне ерекше назар аударылды. Соныменқатар, Қазақстан Республикасы Ұлттық қауіпсіздік комитетінің шекара қызметі мен Қазақстанның авиациялық әкімшілігінің авиациялық инспекторлардың перрондарды тексеру кезіндегі өзара іс-қимыл мәселелері қаралды.Отырыс қорытындысы бойынша ведомствоаралық жұмысты жақсартуға және жүктелген міндеттерді орындауға бағытталған шешімдер қабылданды. Азаматтық авиация қауіпсіздігін қамтамасыз ету жөніндегі ведомствоаралық комиссияның келесі отырысын 2025 жылдың бірінші тоқсанында өткізу жоспарланған.Ақпарат көзі : https://www.gov.kz/memleket/entities/transport/press/news/details/906297

Қарағанды облыстық бейнелеу өнері мұражайы барлық ниет білдірушілерді 2024 жылы алынған жәдігерлер көрмесіне шақырады. Олардың қатарында қазақ халқының тағдырына арналған бірегей картиналар және қаланың шетінде кездейсоқ табылған Қарағанды суретшісінің бұрын белгісіз туындылары бар.Биыл мұражай қоры 117 өнер нысандарымен толықтырылды. Оның 72-сі – кескіндеме және графикалық кенептер, мүсіндер, сәндік-қолданбалы өнер нысандары. Олар негізгі қорға кірді. Тағы 45 бірлік – плакаттар, буклеттер, газет қиындылары, фотосуреттер – мұражайдың ғылыми-көмекші қорына түсті.Бұл экспонаттардың барлығы мұражайға тегін берілді. Олардың кейбіреулері көрмелер мен түрлі іс-шаралардан кейін сыйға тартылды, олардың бір бөлігін мұражайға қарағандылық суретшілердің туыстары әкелді. Сондай-ақ, биыл қор шетелдік шеберлердің жұмыстарымен толықтырылды.– Мұражайымыздың жақсы досы Валентин Даниленко бізге пошта арқылы Балтық суретшілерінің графикалық және кескіндемелік суреттерін жіберді. Барлығы 19 автор, онымен бірге 20 автор болды. Ол бізге 47 жұмысты тапсырды. Бұл суретшілердің бәрі тірі, әртүрлі техникада жұмыс істейді, соның ішінде заманауи техникада. Мәселен, олардың бірі – Виталий Ермолаев – өз техникасын – жарық кескіндемесін ойлап тапқан суретші, – деді Қарағанды облыстық бейнелеу өнері мұражайының бас сақтаушысы Дәмелі Данкеева.Сондай-ақ, көрмеге ҚазКСР еңбек сіңірген өнер қайраткері Мыңғыш Әбілқасовтың триптихі қойылды. 30-шы жылдардағы аштыққа арналған картиналарды туыстары мұражай қорына суретшінің мемориалдық көрмесін өткізгеннен кейін тапсырды.Өнер сүйер қауым Қарағанды суретшісі Владимир Беличенконың жұмыстарымен де танысады.– Өкінішке орай, ол ерте қайтыс болды, біз ол туралы өте аз білеміз. Ол кісі 1950 жылы дүниеге келген және Харьков өнер мектебін бітірген. Мұны бізге оның туыстары айтты. Оның өмірі туралы басқа мәліметтер жоқ. Суретгінің жұмысы Майқұдық қоқыс алаңынан табылды. Бақытымызға орай, №61 мектептің оқытушысы өтіп бара жатып, картинаны байқап, мектепке әкелген. Осы мектеп әкімшілігінің рұқсатымен жұмыстар мұражай қорына берілді, – дейді Дәмелі Данкеева. "Жаңа экспонаттар – 2024" көрмесі Қарағанды облыстық бейнелеу өнері мұражайында 2024 жылдың 22 желтоқсанына дейін жалғасады. Ақпарат көзі : https://www.gov.kz/memleket/entities/karaganda/press/news/details/906764

Ақмола облысының әкімі Марат Ахметжановтың төрағалығымен өткен әкімдік отырысында жол инфрақұрылымын дамыту мәселесі қаралды.Жолаушылар көлігі және автомобиль жолдары басқармасының басшысы Владимир Кулаков 2024 жылы республикалық және жергілікті маңызы бар автожолдарды салу және жөндеу бойынша 130-дан астам жобаны іске асыруға шамамен 104 млрд теңге бөлінгенін хабарлады. Нәтижесінде елді мекендерде 800 км жуық жалпыға ортақ пайдаланылатын автожолдар мен көше-жол желісі салынды және жөнделді.«Астана қаласына іргелес елді мекендерді әлеуметтік-экономикалық дамытудың кешенді жоспары» және «Астана қаласының шетіндегі әлеуметтік және инженерлік инфрақұрылымды дамыту» бағдарламалары аясында 18,8 млрд теңге бөлінді. Осы қаражаттың арқасында 29 елді мекенде 100 км автожол жөнделді. «Ауыл-ел бесігі» бағдарламасы облыстың тоғыз өңірінде 24 жобаны іске асыруға мүмкіндік берді. Осы мақсаттарға 4,1 млрд теңге бағытталды, бұл 50,4 км жолды жөндеуді қамтамасыз етті», - деді В.Кулаков.Сондай-ақ, спикер ағымдағы жылдың көктемгі су тасқыны нәтижесінде автожолдарды еріген қар су басуының 141 жағдайы тіркелгенін, жалпы ұзындығы 20 км-ден астам 40 учаске зақымданғанын, үш көпір: Жалтыр-Макинск, Кийма-Терісаққан және Көкшетаудағы Әшімов көшесіндегі көпір қирағанын атап өтті. Бүгінгі таңда жолдарды қалпына келтіру аяқталды, ал көпірлер бойынша жобалау-сметалық құжаттама әзірленуде.Облыс аумағында 108 тұрақты маршрут жұмыс істейді, оның 91-і әлеуметтік маңызды деп танылды және субсидиялауға жатады. Соңғы үш жылда жергілікті бюджеттен әлеуметтік тарифті субсидиялауға 5,1 млрд теңге бөлінді, оның ішінде 2024 жылы 2,3 млрд теңге.Жергілікті маңызы бар 12 262 км автомобиль жолдарын қыста күтіп ұстау үшін 11 мердігер ұйыммен шарттар жасалды. 132 бірлік қар тазалау техникасы бар, 150 тоннадан астам ЖЖМ және 5000 текше метр мұзға қарсы материал дайындалды.Бұдан әрі «ҚазАвтоЖол «ҰК» АҚ директоры Нұржан Жұқабетов тыңдалды, ол Ақмола филиалының жүргізіп жатқан жұмысы және облыс өңірлерінде жоспарланған жобалар туралы айтып берді.Жиынды қорытындылай келе, облыс әкімі Марат Ахметжанов құрылыс-монтаждау жұмыстары мен пайдаланылатын материалдардың сапасына бақылауды күшейту қажеттігін атап өтті. Сондай-ақ, бюджет қаражатын тиімді игеруге және мерзімдерді қатаң сақтауға баса назар аударылды.Жол инфрақұрылымы өңірді дамыту және Ақмола облысы тұрғындарының тіршілік сапасын арттыру үшін басым бағыт болып табылады.Ақпарат көзі : https://www.gov.kz/memleket/entities/aqmola/press/news/details/906379

Целиноград ауданына қарасты Қаражар ауылында электр энергиясымен қамтамасыз ету бойынша жұмыстардың екінші кезеңі аяқталды, бұл жергілікті тұрғындар үшін маңызды оқиға болды. Бас жоспарға сәйкес әзірленген жоба ауылдың барлық тұрғын үй массивтерін қамтитын заманауи инфрақұрылым құруға мүмкіндік берді.Жұмыстар аясында РП-2 тарату пункті мен 10 трансформаторлық қосалқы станция қосылды. Барлық жабдық тексеріліп, пайдалануға берілді. Құжаттары реттелген үйлерді электр желісіне қосу басталды.Ауыл тұрғындары атқарылған жұмысқа ризашылықтарын білдіріп, жаңа жылды жарық пен жайлылықта қарсы алатындарына қуанып отыр. Ақпарат көзі : https://www.gov.kz/memleket/entities/aqmola/press/news/details/906473

Ақмола облысында Энергетика күні аталып өтіліп, саланың дамуына елеулі үлес қосқан және кәсіби шеберлігімен көзге түскен бір топ еңбек озаты марапатталды, деп хабарлайды Өңірлік коммуникациялар қызметінен.Президенттің Жарлығымен «Көкшетау Энерго» ЖШС орталық диспетчерлік қызметінің жетекші инженері Наталья Ушакова, Қорғалжын аудандық желілерінің басшысы Уәлихан Бейсембеков және «Көкшетау Энерго» ЖШС Щучье ауданаралық электр желілері бөлімшесінің шебері Бақытжан Кәрімов «Құрмет» орденімен марапатталды.ІІІ дәрежелі «Еңбек Даңқы» ордені Целиноград аудандық электр желілерінің Қоянды желілік – шебер учаскесінің шебері Ганбат Сағынғанға және «Көкшетау Жылу» жылу желілерінің бақылаушысы Талап Игенбаевқа табыс етілді.«Ерен еңбегі үшін» медалімен «Көкшетау Жылу» қазандық цехының басшысы Анатолий Кульков марапатталды.Шарада «Көкшетау Энерго» ЖШС басшысы Досымхан Аралбаевтың еңбегі де аталып өтілді. Саладағы 44 жыл ішінде ол өңірді энергиямен жабдықтау жүйесін жаңғыртып, заманауи технологияларды енгізіп, жұмысшылардың еңбек жағдайларын жақсарта алды.Ақмола облысы әкімінің бірінші орынбасары Елдос Рамазанов өңір әкімі мен тұрғындардың атынан барлық энергетиктерге шын жүректен алғысын білдірді.«Облыстың дамуына энергетиктердің қосып отырған үлесі өлшеусіз. Тұрғын үйлерді мен өндіріс орындарын жылумен және жарықпен қамтамасыз ету энергетиктерсіз мүмкін емес. Сіздердің кәсіби шеберліктеріңіз бен жауапкершіліктерің алғыс айтуға тұрарлықтай», - деді Елдос Рамазанов.Айта кетейік, өткен жылы Облыстың энергетика саласында айтарлықтай жетістіктерге қол жеткізілді. Электрмен жабдықтау бойынша 16 жобаны іске асыруға 4,2 млрд теңге бөлінді, оның ішінде жеті жоба аяқталды. 26,7 км жаңа желі салынды, ал Бурабай кентінде туристік аймақтағы электр энергиясының тапшылығын жабатын трансформаторлық қосалқы станция қайта жаңартылды.Сондай-ақ, 2025-2027 жылдары Көкшетау, Қосшы және Аршалы аудандарында алты жаңа қосалқы станция салу жоспарлануда, бұл қажеттіліктердің өсуі жағдайында энергиямен жабдықтаудың тұрақтылығын қамтамасыз етеді.2024 жылы жылу маусымына дайындыққа 39,9 млрд теңге бөлінді, бұл 22 км жылу желілерін жөндеуге және олардың тозуын 39% - ға дейін қысқартуға мүмкіндік берді. «Инвестиция орнына Тариф» бағдарламасы да айтарлықтай нәтиже беріп, жылу желілерін жаңғыртуға 7,4 млрд теңге жұмсалды. Ақпарат көзі : https://www.gov.kz/memleket/entities/aqmola/press/news/details/906629

Алматы қаласы экологиялық жағдайды жақсартуға, аумақтарды абаттандыруға және қала тұрғындарының өмір сүру сапасын арттыруға бағытталған ауқымды бағдарламаларды іске асырып, жайлы қалалық орта құру жолында нық қадам басуда. 2024 жылы мегаполистегі негізгі бағыттар – «Алматы – бақ қала» мәртебесін қалпына келтіру, аула аумақтарын жаңғырту, «Таза Қазақстан» бағдарламасы аясындағы бастамаларды жүзеге асыру және «Қасбеттен қасбетке дейін» қағидатын дамыту бағдарларына арналды. Жасыл аумақтарды қорғау мен күтудің жаңа ережелері: 2023 жылдың қаңтар айынан бастап қала әкімдігі Алматы қаласының жасыл желектерін қорғау және күтіп-ұстаудың жаңа қағидаларын белсенді түрде енгізуде, ал ағымдағы жылдың шілде айында бұл ережелер жайлы қалалық ортаны қамтамасыз ету үшін жаңартылды.Бұл Мемлекет басшысының Алматы қаласында жаңа демалыс аймақтарын құру және көгалдандыру туралы тапсырмасын жүзеге асыру аясында жасыл желектерді қорғау және күтіп-баптау қағидалары қабылданды.Ережелер суару жүйесін міндетті түрде салу нормасын енгізді. Өткен 2 жылда 500 км автосуару желілері орнатылды, 2025 жылы тағы 290 км желілер орнатылмақ, бұл 1 млн-ға жуық ағашты автосуарумен қамтуды мүмкіндік береді. Алматы қаласының жасыл желектерін отырғызу және күтіп ұстау бойынша жаңа тәсілдерді қолдану нәтижесінде көшеттер шығыны 2022 жылғы 30%-тен 2024 жылы 10%-ке дейін төмендеді. «Таза Қазақстан» акциясы. Бұл маңызды ұлттық бағдарлама аясында Алматы экология мен қаланың санитарлық жағдайын жақсартуға бағытталған бірқатар бастамаларды қолға алды. Санитарлық тазарту жұмыстары тек орталық аудандарда ғана емес, сонымен қатар қаланың шалғай аймақтарын да қамтып, көшелер мен саябақтардың тазалығы қамтамасыз етілді. Қайталама шикізат қабылдау пункттері мен экологиялық акциялар іске қосылды. «Алматы – бақ қала» мәртебесін қалпына келтіру. Алматы тарихи тұрғыдан «бақ қала» мәртебесімен танылған. Бүгінде қалалық әкімдік бұл мәртебелі атақты қайта жаңғырту, жандандыру үшін белсенді жұмыс атқаруда. 2024 жылы шаһарда 650 мың ағаш отырғызылды. 2025 жылдан бастап Алматы әкімдігі алғаш рет ірі көлемді көшеттерді қолданатын болады. Олар агрессивті қалалық ортада жоғары өмір сүруге бейімді және ыңғайлы кеңістікті қарқынды қалыптастыруға мүмкіндік береді. Биіктігі 4 және 6 метрден асатын 27 мың көшет отырғызу жоспарлануда. Жасыл желектерді қорғауға ерекше көңіл бөлініп, ағаштар мен бұталарға күтім жасау, оларды сақтау және қалпына келтіру ережелері әзірленді. «Қасбеттен қасбетке дейін» қағидаты. 2024 жылы Алматы қаласы «Қасбеттен қасбетке дейін» қағидатын жүзеге асыруда көшбасшы болды. Бұл қағидат қалалық ортаны кешенді абаттандыруды көздейді: тротуарларды жөндеу, жарықтандыруды жаңғырту, қоқыс жәшіктері мен орындықтарды орнату, аулаларды көгалдандыру және мүмкіндігі шектеулі азаматтар үшін қолжетімділікті жақсарту.2025-2026 жылдары 49,2 шақырым болатын 11 көшеге кешенді көріктендіру жүргізіледі. Бүгінгі таңда Достық даңғылын (Әл-Фараби даңғылынан Абай даңғылына дейін) және Пушкин көшесін (Гоголь көшесінен Райымбек даңғылына дейін) қайта құру бойынша жобалардың ЖСҚ-ларын әзірлеу аяқталды. Құрылыстың басталуы 2025 жылдың наурызына жоспарланған. 2025 жылғы ақпанда Радостовец көшесі мен Мақатаев көшесін жобалау арқылы 2025 жылғы мамырда ҚМЖ-ы басталмақ. Халық қатысатын бюджет. Қала тұрғындары өз аудандарында қандай абаттандыру жобаларын жүзеге асыру керектігі туралы шешім қабылдауға белсенділікпен қатысады. «Халық қатысатын бюджет» бағдарламасы алматылықтардан ерекше қолдау тапты. Бүгінде қала тұрғындары белсенді қатысып, өз идеялары мен ойларын ұсынуда.2022-2024 жылдары тұрғындардың ұсыныстарын ескере отырып, Алматыда 39,1 млрд теңгеге 938 жоба іске асырылды. Бағдарлама аясында жобаларды іске асыруға жыл сайынғы лимит 17 млрд теңге деңгейінде бекітілді. Сондай-ақ, жүзеге асырылған жобаларды күтіп-ұстауға алғаш рет әр ауданға орташа 150-200 млн теңгеге дейін қаражат бөлінді. 2022 жылдан бастап «Халық қатысатын бюджет» бағдарламасын қаржыландыру 2,6 есеге ұлғайды, берілген жобалар саны 5,7 есеге өсті. Аулаларды санитарлық тазарту және жөндеу. Қаланың 4 мыңнан астам аула аумағын кешенді күтіп ұстау үшін қаржыландыру 2024 жылғы 24,8 млрд теңгеден 2025 жылы 27 млрд теңгеге дейін ұлғайтылды. Тұрмыстық қатты қалдықтарды (ҚТҚ) тиімді басқару жайлы орта құру – маңызды міндет. Қалада 2012 жылы құрылған ҚТҚ жинау инфрақұрылымының әбден тозуы және «моральдық» ескіруі байқалады. Осыған байланысты, 2023 жылдан бастап саланы терең жаңғырту жүргізілуде. Қазірдің өзінде 400 алаңда 2,8 мың еуроконтейнерлер және көмілген контейнерлер жаңартылды. 2025 жылы 723 алаңға тағы 2,7 мың жаңа контейнер орнату арқылы қала бойынша барлық контейнерлік алаңдарды толық жаңғырту жұмыстары аяқталмақ. Ақпарат көзі : https://www.gov.kz/memleket/entities/almaty/press/news/details/906378

Бүгін Алматыдағы барлық 80 шыршаның шамдары 19:00-де жағылады. Бас шыршаның шамын жағу рәсімі Абай атындағы алаңда өтеді. Биіктігі 25 метр болатын шыршаны безендіру үшін 6 шақырым гирлянда, сәндік элементтер, шырша шарлары, ірі банттар және қайта өңделген экологиялық қауіпсіз материалдардан жасалған жаңа жылдық ойыншықтар пайдаланылды.Шырша шамдарын жағу рәсіміне дейін, сағат 18:00-де Абай алаңындағы Республика Сарайының алдында «Алматының 8 кереметі: отбасылық мереке — таңғажайып Жаңа жыл» атты ауқымды шоу басталады. Іс-шарада Роза Рымбаева, Тұрар, Балжан Бидаш, «Альфа» тобы, Динара, Назым Әділдина, Мәди Рымбаев, Dakelot, «Астра» тобы, Adill және Malika Yes және басқа да эстрада жұлдыздары өнер көрсетеді (кіру тегін).Абай алаңына келген қала тұрғындары мен қонақтарын Күлбике күймесі, Зімбір адам және басқа да ертегі кейіпкерлері қарсы алады. Ірі әрі жарқын фотозоналар, жарқыраған субұрқақтар және басқа да инсталляциялар халыққа ерекше мерекелік атмосфера сыйлайды. Іс-шараға келген қонақтар естелік фотосурет жасап, жаңа жылдық бейне түсіре алады.Сонымен қатар, Абай алаңында 2024 жылдың 20 желтоқсанынан 2025 жылғы 5 қаңтарға дейін мерекелік жәрмеңке өтеді. Мұнда қолөнер бұйымдары, кәдесыйлар және жаңа жылдық ойыншықтар ұсынылады.Сағат 18:00-ден бастап мерекелік іс-шаралар қаланың 8 ауданында да өтеді:Алатау ауданында – «Алатау» дәстүрлі өнер театрының аумағында (Нұркент шағын ауданы, 6).Алмалы ауданында – Ғабит Мүсірепов атындағы Қазақ мемлекеттік академиялық балалар мен жасөспірімдер театрының аумағында (Абылай хан даңғылы, 38).Әуезов ауданында – Н.Сац атындағы мемлекеттік академиялық орыс балалар мен жасөспірімдер театрының аумағында (Шаляпин көшесі, 22).Бостандық ауданында – «Атакент» көрме орталығының алаңында (Тимирязев пен Әуезов көшелерінің қиылысы).Медеу ауданында – Dostyk Plaza сауда ойын-сауық орталығының аумағында және Достық даңғылы, 85а/1 мекенжайында.Наурызбай ауданында – Амфитеатр алаңында (Шұғыла шағын ауданы, 347).Түрксіб ауданында – №6 Оқушылар үйінің аумағында (Сейфуллин даңғылы, 13/1).Жетісу ауданында – Айнабұлақ шағын ауданындағы Арбатта (Мақатаев пен Жұмабаев көшелерінің қиылысы).Ақпарат көзі : https://www.gov.kz/memleket/entities/almaty/press/news/details/906847

Алматы қаласы әкімдігінің және Қазақстан Республикасының Сербия Республикасындағы Елшілігінің қолдауымен Белград қаласы музейлерінің құрамына кіретін Ханшайым Любица сарайында Алматы қаласы тарихы музейінің «Ұлы даланың мәдени мұрасы» атты көрмесі ашылды.Көрмеге Алматы қаласы музейлерінің бірлестігі қорынан 220-дан астам экспонат қойылды. Экспозиция негізін қазақ халқының тұрмысы мен дәстүрлері, қолданбалы өнері туралы баяндайтын этнографиялық артефактілер құрайды.Көрменің ашылуына Сербия Президенті Александр Вучичтің жұбайы Тамара Вучич ханым, Сербия Президентінің мәдени мәселелер жөніндегі кеңесшісі Деян Савич мырза, Сербияның саяси тұлғалары, дипломатиялық корпус, академиялық және ғылыми топтардың өкілдері, қоғамдық ұйымдардың басшылары, мәдениет қайраткерлері және БАҚ қатысты.Қазақстан Республикасының Сербиядағы елшісі Мәди Атамқұлов өз сөзінде Ұлы дала халқының тарихы мен мәдениетін, көшпелі өркениет дәстүрлерін, тұрмысын, қазақ көшпенділерінің философиясы мен дүниетанымын таныстыру болып табылатынын атап өтті. Ұлы дала халқының тарихы мен мәдениетін бейнелейтін Балқан түбегінде алғаш рет ұйымдастырылған көрме екенін атап өтті.Көрме 12 қаңтарға дейін жалғасады.Бұған дейін Алматы қаласы музейлер бірлестігі Алматы әкімдігінің қолдауымен халықаралық мәдени ынтымақтастықты дамыту шеңберінде Италия, Австрия, Түркия, Оңтүстік Корея, Прага, Венгрияда көрме өткізіп, Францияда Ұлттық ескерткіштер орталығы және Сингапурдың Ғылыми орталығында Бірлестік қызметкерлері біліктіліктерін арттырды.Ақпарат көзі : https://www.gov.kz/memleket/entities/almaty/press/news/details/906852

Алматыда бүгін таңғы сағат 8:00-ден бастап жауа бастаған қар болжам бойынша кешкі 21:00-ге дейін жалғасады. Қар күреу жұмыстарына 603 арнайы техника мен 1 034 жұмысшы жұмылдырылды.Қалада 130 құмшашқыш, оның ішінде «Эпока», «Джетбрум» және т.б. кезекшілік етуде. Әсіресе, әл-Фараби даңғылынан оңтүстікке қарай орналасқан таулы аймақтарға ерекше назар аударылып, 28 құмшашқыш жолды мұзға қарсы материалдармен өңдеп жүр.Шағын көлемді 70 техника тротуар, қоғамдық көлік аялдамасы және автотұрақ аймағын тазалауға кіріскен.15-16 желтоқсанда Алматыда қар жауғаннан кейін түнгі уақытта магистральды көшелерден қарды жаппай шығару аяқталды. 4 тәулікте 45 500 м³ қар шығарылды, жоспарланған көлем толық орындалды.«Қазгидромет» РМК мәліметінше, бүгінгі жаңа қардың қалыңдығы 9 мм-ге дейін жетеді. Күндіз ауа температурасы шамамен 0°C, түнде -9…-11°C дейін төмендейді. 21 желтоқсанда жауын-шашынсыз, күндізгі температура -5…-7°C болады.Қаланың коммуналдық қызметі жол қауіпсіздігін қамтамасыз ету үшін күшейтілген режимде жұмысын жалғастыруда. Қала тұрғындарына сақ болып, жолда мұқият болуға шақырады.Сондай-ақ, қар жауып біткенше «Медеу» мұз айдыны мен «Шымбұлақ» тау-шаңғы курортына баруды уақытша қоя тұру керек. Бұл жол қозғалысына қосымша жүктеме түсіріп, жолдарды қар шығару жұмыстарын қиындатады.Ақпарат көзі : https://www.gov.kz/memleket/entities/almaty/press/news/details/906859