Афина, 2025 жылғы 15 маусым – Жексенбі күні Грекия астанасында Қазақстанда өмір сүрген және өмір сүруді жалғастырып жатқан понти гректерінің тарихына арналған ғылыми-тарихи конференция өтті. Іс-шараны Каллифея муниципалитетінің Эллинизмді қолдау орталығы мен Қазақстан грек қоғамдарының «Филия» қауымдастығы ұйымдастырды.Конференцияға Қазақстаннан келген грек диаспорасының өкілдері, қоғамдық және саяси қайраткерлер, Каллифея муниципалитетінің басшылығы, сондай-ақ Қазақстанның достары мен серіктестері қатысты.Іс-шараға қатысушылар понти гректерінің Қазақстан мен Орталық Азияның басқа аймақтарына қоныс аударуына алып келген тарихи үдерістерді зерделеуге баса назар аударды. Бұл оқиғалар мыңдаған грек отбасының тағдырына айтарлықтай әсер етіп, екі халықтың тарихи жадында терең із қалдырды.Конференция аясында тарихи мұраны сақтау, Қазақстан мен Грекия арасындағы гуманитарлық және мәдени байланыстарды нығайту, сондай-ақ Қазақстан қоғамының ажырамас бөлігіне айналған грек қауымдастығын қолдау мәселелері маңызды тақырыпқа айналды.Шара барысында Қазақстан халқы Ассамблеясының көпжылдық мүшесі, «Филия» қауымдастығының құрметті төрағасы Павел Иванович Феодоридидің еңбегіне ерекше назар аударылды. Ол Қазақстанда – «Достық» орденімен, ал Грекияда – Феникс орденінің Күміс крестімен марапатталған. Оның Қазақстан мен Грекия арасындағы достықты нығайтуға және Қазақстан гректерінің мәдени бірегейлігін сақтауға қосқан үлесі жоғары бағаланды.Қазақстанның Грекиядағы Елшісі Тимур Сұлтанғожин өз сөзінде ұлтаралық келісімнің, төзімділік пен ынтымақтастықтың Қазақстанның қоғамдық даму үлгісінің ажырамас бөлігі екенін атап өтті. Сондай-ақ ол Қазақстандағы грек қауымының танымал өкілдерінің – футболшы Евстафий Пехлеваниди мен халық әртісі Лаки Кесоглудың – екіжақты қатынастар мен мәдени алмасуды дамытуға қосқан үлесін ерекше атап өтті.Конференция Қазақстан мен Грекия арасындағы ортақ тарихи мұраны сақтау, мәдени диалог пен гуманитарлық ынтымақтастықты нығайту жолындағы маңызды қадам болды.Ақпарат көзі : https://www.gov.kz/memleket/entities/mfa-athens/press/news/details/1017993?lang=kk

Брюссель, 2025 жылғы 12–13 маусым – Қазақстан Республикасы Президентінің кеңесшісі – ҚР Президентінің халықаралық экологиялық ынтымақтастық жөніндегі арнайы өкілі З. Сүлейменова Брюссель қаласына жұмыс сапарымен барып, Халықаралық энергетикалық агенттіктің (ХЭА) энергия тиімділігі жөніндегі 10-шы жаһандық жыл сайынғы конференциясына (IEA 10th Annual Global Conference on Energy Efficiency) қатысты.Конференция аясында З. Сүлейменова жоғары деңгейдегі дөңгелек үстел отырысында сөз сөйлеп, энергия тиімділігін арттыру және көміртегі бейтараптығына қол жеткізу мәселелері жөніндегі Қазақстанның көзқарасын таныстырды. Ол Қазақстан энергия тиімділігін ұлттық климаттық саясат пен орнықты экономикалық өсудің негізгі элементі ретінде қарастыратынын атап өтті. Ерекше назар 2060 жылға қарай көміртегі бейтараптығына қол жеткізу стратегиясына аударылды.Сапар барысында Еуропалық комиссияның Энергетика жөніндегі бас директораттың (DG ENER) бас директоры Д. Йоргенсенмен, Климат жөніндегі бас директораттың (DG CLIMA) бас директордың орынбасары Я. Дюсикпен, ЕО-ның климат және қоршаған орта мәселелері жөніндегі арнайы өкілі Э. Аготамен, сондай-ақ Халықаралық энергетикалық агенттіктің атқарушы директоры Ф. Биролмен екіжақты кездесулер өтті.Кездесулерде тараптар Қазақстанның климаттық күн тәртібін ілгерілету және ұлттық энергетикалық секторды түрлендіру бағытындағы күш-жігерін жоғары бағалады. Сонымен қатар, метан шығарындыларын реттеу саласындағы ынтымақтастыққа зор қызығушылық атап өтілді. Тараптар нақты нәтижелерге қол жеткізу үшін техникалық кездесулер өткізудің маңыздылығымен келісті.Конференцияға қатысудан бөлек, З. Сүлейменова «TÜV AUSTRIA Belgium» компаниясына барды. Ұйым басшылығымен өткен кездесуде ол компанияның қызметімен танысып, оның инспекциялық және сертификаттау жұмыстары, зертханалық зерттеулер, бұзбайтын бақылау, коррозия диагностикасы, сондай-ақ менеджмент жүйелері мен персоналды сертификаттау салаларындағы қызметтері туралы ақпарат алды.Жұмыс сапары тараптардың әріптестікті одан әрі нығайтуға деген өзара мүдделілігін растады. Орнықты энергетикалық даму, энергия тиімділігін арттыру және қоршаған ортаға зиянсыз энергия көздеріне көшу – ұзақ мерзімді энергетикалық қауіпсіздікті қамтамасыз етудің іргелі элементтері ретінде ерекше назарда болды.  Ақпарат көзі : https://www.gov.kz/memleket/entities/mfa-brussels/press/news/details/1017958?lang=kk

Аудан орталығында және елді мекендерде «Таза Қазақстан» экологиялық акциясы аясында сенбілік жұмыстары жүргізілді. Тазалық жұмыстарына аудандағы меншік түріне қарамастан барлық мекеме атсалысты. Сенбілік барысында әрбір мекеме қызметкерлері өздеріне бекітілген көше бойындағы шөптерді шауып, тазалық жұмыстарын жүргізді.Алдағы уақытта да сенбілік жұмыстары жалғасын табатын болады. Аудан тұрғындарын тазалық шараларына белсене қатысуға және тазалық сақтауға шақырамыз!Ақпарат көзі : https://www.gov.kz/memleket/entities/kyzylorda-syrdarya/press/news/details/1017903?lang=kk

Бангкок, 2025 жылғы 13 маусым – Қазақстанның Таиландтағы Елшісі Арман Исетов Таиланд туристік агенттігі (ТАТ) басшысының орынбасары Чиравади Кхунсубпен кездесті. Кездесу барысында тараптар екіжақты ынтымақтастықтың өзекті мәселелерін талқылап, екі елдің туризм және қонақ үй бизнесі саласындағы өзара іс-қимылын кеңейту перспективаларына қатысты пікір алмасты.Елші Исетов Таиланд халқының саяхаттың жаңа бағыттарына қызығушылығының артуын және Қазақстанның Орталық Азияға «қақпа» ретіндегі стратегиялық жағдайын ескере отырып, екі елдің нарықтарында туристік өнімдерді өзара ілгерілету үшін «Қазақтуризм» және ТАТ бейінді туристік ведомстволарының бірлескен күш-жігерін жандандыру қажеттігін атап өтті. Бұған, соның ішінде Қазақстан мен Таиланд арасындағы тікелей авиарейстер санын ұлғайту ықпал етуі мүмкін.Өз кезегінде, Чиравади Кхунсуб Таиландтағы қазақстандық туристерді Корольдіктегі демалыс өткізу орындары туралы көбірек хабардар ету есебінен ұлғайтуға қызығушылық білдірді, сондай-ақ Таиландтың жаңа туристік өнімдерімен және бағыттарымен танысу мақсатында ағымдағы жылдың шілде айының басында Агенттігінің өкілді делегациясының Қазақстанға сапарын ұйымдастыру жөніндегі жоспарлары туралы хабардар етті.Ақпарат көзі : https://www.gov.kz/memleket/entities/mfa-thailand/press/news/details/1017773?lang=kk

Вице-премьер – ұлттық экономика министрі Серік Жұманғарин өткізген кеңесте биылғы 5 айдағы еліміздің ЖІӨ өсімінің құрамдас бөлігі мен экономикаға қомақты үлес қосып отырған салалардың даму серпінін арттыру мүмкіндіктері талқыланды.Өнеркәсіп экономикалық өсудің негізгі қозғаушы күші болып қала береді: 2024 жылғы қорытынды бойынша оның ЖІӨ-дегі үлесі 25,7%-ды құрады. 2025 жылғы қаңтар–мамыр айларында сала 6,4%-ға өскен. Дегенмен, қарқын бәсеңдеп барады: бір ай бұрын өсім 6,6%-ды құраған. Оның басты себебі – өндірістің өскеніне қарамастан өңдеу өнеркәсібінің баяулауы. Өнеркәсіптік өндіріс индексінің төмендеуі үш өңірде: Шығыс Қазақстан облысы (90,4%), Ұлытау облысы (96,2%) және Қостанай облысында (97,6%) тіркелді.Өңдеу жоспарынан артта қалу, ең алдымен, өңдеу өнеркәсібінің 40%-ын құрайтын металлургиямен байланысты. Кеңесте басқа сегменттердегі – машина жасау, тамақ, химия және мұнай өңдеу өнеркәсібіндегі өсу әлеуеті де қарастырылды.Белсенді өсу қарқыны бар тағы бір сала – құрылыс. Оның 5 айдағы өсімі 15,4%-ды, жұмыс көлемі 2 трлн теңгені құрады. Алайда, екі өңір, Атырау мен Ұлытау облыстары артта қалып келеді. Атырауда (жоспардың 43,2%) ТШО жобасы шеңберінде зауыт жұмысының тоқтауына байланысты, Ұлытауда (78,4%) тау-кен өндіру саласындағы нысандар салу мен жөндеудің қысқаруына байланысты қарқын бәсеңдеген.Тұрғын үй құрылысы саласында биыл 19 млн шаршы метр тұрғын үйді пайдалануға беру міндеті тұр. Соңғы 5 айда 6 млн шаршы метр тұрғын үй пайдалануға берілген. Бұл 2024 жылғы қаңтар-мамырмен салыстырғанда 5,7%-ға жоғары.«Біздің мақсатымыз – биыл ЖІӨ 6%-дық өсіміне қол жеткізу. Ол үшін нақты сектордағы барлық сала белгіленген индикаторға сәйкес жұмыс істеуі тиіс. Әкімшілік кедергілерді жедел жойып, компаниялар өз өнімін шығаруды ұлғайтуы үшін әрбір саладағы қарқынның баяулауы есебінен нақты айлық жоспарлар әзірлеу қажет», — деп атап өтті Серік Жұманғарин.https://primeminister.kz/news/ekonomikalyk-shtab-kazakstan-6-zhio-osimine-kalay-kol-zhetkizbek-30159 Ақпарат көзі : https://www.gov.kz/memleket/entities/economy/press/news/details/1017743?lang=kk

ҚР ІІМ Ұлттық ұланының әскери қызметшілері әлемге танымал әнші, халықтың сүйікті ұлы Димаш Құдайберген бастаған шығармашылық челленджге қолдау білдіріп, отандық өнер мен мәдени мұраға деген құрметін көрсетті.Ұландықтардың қатысуымен түсірілген бейнеролик челлендждің ерекше көріністерінің біріне айналды. Онда әскери қызметшілер саптық дайындық пен заманауи хореография элементтері үйлескен әсерлі би орындады. Қозғалыстар ұлттық нақыш пен музыкалық ырғақтың көркем үйлесімдігін айқындады.Бұл бастама – мәдениет пен әскери қызметтің өзара үндесе алатынын, олардың ел бірлігі мен мақтаныш сезімін қалыптастыруда маңызды рөл атқаратынын көрсетті.- Біз үшін бұл жай ғана интернеттегі флешмоб емес, — дейді түсірілімге қатысқан Әсел Мұханбетзәкір. — Біз ұландықтардың тек жарғыны бұлжытпай орындайтын сарбаздар ғана емес, өз елін, оның табиғатын, өнерін шын жүректен сүйетін азамат екенін көрсеткіміз келді.Бұл шығармашылық бастаманың негізіне Димаш Құдайбергеннің «Тау ішінде» атты жаңа бейнебаяны арқау болды. Әннің сөзін қазақ әдебиетінің негізін қалаушылардың бірі, көрнекті ақын әрі жазушы - Сәкен Сейфуллин жазған.Ұлттық ұлан әскери қызметшілерінің бұл челлендж аясындағы өнері тың әрі әсерлі форматымен ерекшеленді. Ол өнердің шекарасы жоқ екенін, шен мен шекке бағынбайтынын тағы бір мәрте дәлелдеді. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/1017655?lang=kk

2025 жылғы 13 маусымда Солтүстік Қазақстан облысы Әділет департаментінің Әдеп жөніндегі уәкілі Г.К. Кожахметова Департамент қызметкерлері үшін «Мемлекеттік қызметшілердің Әдеп кодексінің нормаларын сақтау» тақырыбында семинар өткізілді.Ақпарат көзі : https://www.gov.kz/memleket/entities/adilet-sko/press/news/details/1017660?lang=kk

Алматы облысының әкімі Марат Сұлтанғазиевтің Алатау қаласына жасаған жұмыс сапары барысында заңсыз құрылыс фактілері анықталып, жауапты мемлекеттік органдарға нақты тапсырмалар берілді.Заречный шағынауданында өткен көшпелі кеңес барысында «LH AL» ЖШС-ға тиесілі құрылыс нысанында рұқсат құжаттарынсыз жер қазу жұмыстары жүргізілгені белгілі болды. Тексеру нәтижесінде компанияның Қазақстан Республикасының құрылыс заңнамаларын сақтамай жұмыс жүргізіп жатқаны анықталған.Облыс әкімі заңбұзушылықтарды қатаң сынға алып, тиісті шаралар қабылданатынын атап өтті.– Біз ретсіз құрылысқа және жер мен экологияға немқұрайлы қарауға жол бермейміз. Барлық жұмыстар заң талаптарына сәйкес жүргізілуі тиіс, – деді Марат Сұлтанғазиев.Осыған байланысты әкім бірқатар мемлекеттік органдарға нақты тапсырмалар жүктеді. Алматы облысының Мемлекеттік сәулет-құрылыс бақылау басқармасына «LH AL» ЖШС нысанындағы барлық құрылыс жұмыстарын тиісті жобалық және рұқсат құжаттары толық реттелгенге дейін тоқтату тапсырылды. Алатау қаласының әкімдігіне уәкілетті органдармен бірлесе отырып, ұңғыманың өздігінен ағуын жою бойынша іс-шаралар жоспарын әзірлеу міндеттелді.Сонымен қатар, «БАБИ» республикалық мемлекеттік кәсіпорнына ұңғыманың ағуын жою процесіне тұрақты бақылау орнату тапсырылды. Алматы облысының Экология департаменті тарапынан ұңғымадан тараған судың қоршаған ортаға әсерін бағалап, тиісті экологиялық мониторинг жүргізілуі қажет. Ал Төтенше жағдайлар департаментіне нысанда төтенше жағдайдың туындауына жол бермеу мақсатында бақылауды қамтамасыз ету жүктелді.Табиғат қорғау прокуратурасы мен Полиция департаментіне заңнама талаптарының сақталуына бақылау орнатып, құқықтық шаралар қабылдау тапсырылды. Облыс әкімінің аппаратына бұл жағдай бойынша облыстық деңгейдегі тиісті құрылымдардың әрекетсіздігі туралы орталық мемлекеттік органдарға ұсыныс жолдау міндеті жүктелді. Сонымен қатар, «LH AL» ЖШС-ға анықталған заңбұзушылықтарды жою бойынша күн сайын Алатау қаласы әкімдігіне есеп беріп отыру тапсырылды.Аталған мәселе облыс әкімінің жеке бақылауында. Құқықтық баға беру үшін барлық материалдар уәкілетті органдарға жолданады. Экология саласындағы мамандардың пікірі мен қосымша ақпараттар кейінірек ұсынылады.Ақпарат көзі : https://www.gov.kz/memleket/entities/almobl/press/news/details/1017629?lang=kk

13 маусым 2025 ж. Будапешт қаласында - Туризм және спорт министрі Ербол Мырзабосынов дзюдодан Будапеште өтіп жатқан әлем чемпионатының марапаттау рәсіміне қатысты.Министр әйелдер арасында 48 келі салмақта жүлдеге ие болған спортшыларды марапаттады.Айта кетейік, осы салмақта белдескен отандасымыз Әбиба Әбужақынова финалға дейін жетіп, отандық дзюдо тарихында әлем чемпионатында күміс медаль жеңіп алған тұңғыш қазақ қызы атанды.Ресми веб-сайтқа сілтеме: Туризм және спорт министрі Ербол Мырзабосынов дзюдодан әлем чемпионатының марапаттау рәсіміне қатыстыАқпарат көзі : https://www.gov.kz/memleket/entities/mfa-budapest/press/news/details/1017605?lang=kk

Астанада кәсіби мерекеге орай Қорғаныс министрлігінің Бас әскери клиникалық госпиталінде салтанатты жиналыс өтті.Әскери дәрігерлерді құттықтауға м.ғ.к., "Астана медицина университеті" КЕАҚ реабилитология және спорттық медицина кафедрасының профессоры Виктор Ткачев; PhD, доцент, кафедра меңгерушісі Әлия Смағұлова; м.ғ.к., ішкі аурулар кафедрасының доценті Айнагүл Қазбекова; м.ғ.д., профессор "Достармед" клиникасының директоры Амангелді Асабаев; PhD, дерматовенерология және дерматокосметология кафедрасының доценті Наталья Цой; КСРО Денсаулық сақтау ісінің үздігі, Еуропалық урологтар мен андрологтар қауымдастығының мүшесі Гафур Хайрли келді.– Медицина ғылымы мен практикасының танымал майталмандарын көргеніме қуаныштымын. Сіздердің кәсіби және әдістемелік еңбектеріңіз біз үшін маңызды. Тәжірибемен бөлісіп, бізді қолдап, жеке құрамды дамытуға жігер бергендеріңіз үшін рахмет, – деді Бас әскери клиникалық госпиталь бастығы медициналық қызмет полковнигі Арман Ескендіров. Ол сол секілді медицина ардагерлеріне жылы лебіздерін білдіріп, олардың еңбек жолы денсаулық сақтауды дамыту тарихы, бүгінгі ұрпаққа өнеге екенін атап өтті.– Бүгін сіздердің араларыңызда тұру мен үшін үлкен мәртебе. Госпиталь басшылығына академиялық қоғамдастықпен ынтымақтастық үшін шын жүректен алғыс айтамын. Әскери медицина қызметі – бұл мамандық пен Отанға деген адалдықтың ең жоғары көрінісі. Бұл тек білім мен тәжірибені ғана емес, батылдықты да қажет ететін еңбек, – деп атап өтті құрметті қонақ Виктор Ткачев.Кәсіби мереке құрметіне денсаулық сақтау саласындағы көпжылдық, жемісті еңбегі үшін "Денсаулық сақтау ісіне қосқан үлесі үшін" төсбелгісімен госпиталь бастығының орынбасары медициналық қызмет полковнигі Аслан Асылханов және урология бөлімшесінің бастығы медициналық қызмет подполковнигі Дастан Кенжерахманов марапатталды.Ерекше көзге түскен мамандарға Денсаулық сақтау министрінің алғыс хаттары, ал құрметті қонақтарға Қарулы Күштердің Бас әскери-медициналық басқармасы бастығының алғыс хаттары табыс етілді. Аурухананың үздік қызметкерлері медициналық мекеме бастығының құрмет грамоталарымен марапатталды.Ақпарат көзі : https://www.gov.kz/memleket/entities/mod/press/news/details/1017602?lang=kk

Будапешт, 2025 жылғы 11 маусым — Қазақстанның Мажарстандағы Елшілігінде Елші Абзал Сапарбекұлы мен мажар іскер топтарының өкілдерімен кездесу өтті.Кездесу барысында тараптар QazTrade және HEPA (Мажар экспортты дамыту агенттігі) сияқты ұйымдармен бірлескен бизнес іс-шараларды Қазақстан мен Мажарстанда өткізу мүмкіндіктерін талқылады. Әсіресе, қазақстандық тауарларды Еуропалық Одақ нарығына шығару, дистрибуция арналарының кеңеюі және мажар импорттаушыларымен тұрақты серіктестік байланыстарды орнату мәселелеріне ерекше назар аударылды.Елші Қазақстанның агроөнеркәсіптік кешен, қайта өңдеу, фармацевтика, жасыл энергетика және инновациялық технологиялар сияқты негізгі салаларға мажар инвестицияларын тартуға мүдделі екенін атап өтті. Мажар бизнес өкілдері Қазақстанның инвестициялық климатын зерттеуге қызығушылық білдіріп, диалогты жалғастыруға дайын екендіктерін білдірді.Тараптар тақырыптық іскерлік форумдар, B2B кездесулер мен екіжақты таныстырылымдарды қамтитын ынтымақтастықты жалғастыруға уағдаласты.Ақпарат көзі : https://www.gov.kz/memleket/entities/mfa-budapest/press/news/details/1017589?lang=kk

Дунавaршань 2025 жылғы 12 маусым — Қазақстан Елшісі Абзал Сапарбекұлы Мажарстандағы жетекші «Aranynektár Kft» компаниясына барып, басқарушы директоры Вароши Иштванмен кездесті. Кездесуде Қазақстанда жоғары сапалы балды бірлесіп өндіру және экспорттық арналарды дамыту мүмкіндігі талқыланды.Мажарстан жыл сайын шамамен 25–30 мың тонна бал өндіреді және өндіріс көлемі бойынша Еуропалық Одақтағы үздік бес елдің қатарына кіреді. «Aranynektár Kft» — елдегі балды қайта өңдейтін және экспорттайтын жетекші компаниялардың бірі. Компания жылына 4 000 тоннаға дейін балды өңдей алатын өндірістік қуаттылыққа ие және өнімдерін ЕО, Таяу Шығыс пен Азия нарықтарына жеткізеді.Қазақстан тарапы балды ел ішінде өндіріп, қайта өңдеу және кейін Еуропаға, Парсы шығанағы елдеріне және Оңтүстік-Шығыс Азия нарықтарына экспорттау мүмкіндігін қарастыруды ұсынды.Қазақстан органикалық бал өндіруге қолайлы табиғи жағдайларға ие және жыл сайын 5 мың тоннадан астам бал өндіреді. 2025 жылдың басында Қазақстан Еуропалық Одақпен ветеринарлық сертификатқа қол жеткізіп, балды ЕО нарығына ресми түрде экспорттауға мүмкіндік алды.Серіктестер үшін қызығушылық тудыратын ұсыныстардың қатарында: салықтық және кедендік жеңілдіктер, агроөнеркәсіптік аймақтарда дайын инфрақұрылым, сондай-ақ логистика мен энергиямен қамтамасыз етуге арналған мемлекеттік қолдау шаралары бар.Тараптар ықтимал ынтымақтастықты одан әрі талқылауға уағдаласты. «Aranynektár Kft» компаниясының Қазақстанға сапары мен жергілікті серіктестермен байланысын кеңейту жоспарланып отыр.Ақпарат көзі : https://www.gov.kz/memleket/entities/mfa-budapest/press/news/details/1017586?lang=kk

Дзюдодан Қазақстан әйелдер құрамасының көшбасшысы, ҚР ІІМ Ұлттық ұланының ефрейторы Абиба Әбужақынова Венгрия астанасы Будапештте өткен Әлем чемпионатының күміс медалін жеңіп алды.Спортшы 48 келіге дейінгі салмақ дәрежесінде өнер көрсетті және бірнеше жарқын жеңістерге қол жеткізіп, финалға шықты. Шешуші жекпе-жекте оның қарсыласы әлемдік дзюдо жұлдызы — итальяндық Ассунта Скутто болды. Жекпе-жек мерзімінен бұрын итальяндық Ассунтаның жеңісімен аяқталды, осылайша оның бұрынғы олжаларына (екі "қола" және "күміс") көптен күткен "алтын" қосылды.Финалда жеңілгеніне қарамастан, Абиба Әбужақынованың күмісі тарихта қалды: себебі ол дзюдодан Әлем чемпионатының финалына шыққан алғашқы қазақ әйел.  Абиба қоржынында қазір үш әлемдік біріншілік марапаты бар — ол бұған дейін тұғырдың үшінші сатысына екі рет көтерілген болатын.3-ші Халықаралық дзюдо федерациясының (IJF) иегері Абиба Әбужақынова Қазақстанның ең атақты спортшыларының бірі болып саналады. Ол елімізді ірі халықаралық турнирлерде тұрақты түрде таныстырады және ұлттық команданың ең мықты дзюдошысы болып қала береді.Ұлттық ұлан қатарында қызмет ете отырып, ефрейтор Әбужақынова жоғары спорттық көрсеткіштерді көрсетіп қана қоймай, төзімділіктің, тәртіптің және Отанға деген адалдықтың үлгісі болып табылады. Оның жеңістері — бүкіл ел үшін мақтаныш және жас спортшыларға өнеге. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/1017587?lang=kk

Қазақстанда маусым айының үшінші жексенбісі — Медицина қызметкерлерінің күні. Биыл бұл кәсіби мереке 15 маусымға түсіп отыр. Бұл – дәрігерлерге, медбикелерге, фельдшерлер мен санитарларға, яғни халықтың өмірі мен денсаулығын қорғауда алдыңғы шепте жүрген барша медицина мамандарына арналған күн.Бұл күн әсіресе қауіп-қатер жағдайында – әскери іс-қимылдарда, төтенше жағдайларда және лаңкестікке қарсы операцияларда медициналық көмек көрсететіндер үшін ерекше мәнге ие. Сол себепті Қазақстан Республикасы Ұлттық ұланы құрылымында 2025 жылғы маңызды бастамалардың бірі – тактикалық медицина қызметін құру болды.Тактикалық медицина – бұл шұғыл жағдайларда, санаулы минуттар шешуші рөл атқаратын кезде, дәстүрлі азаматтық медицинаның тәсілдері тиімсіз болатын сәттерде көмек көрсету жүйесі. Жалпыға мәлім, ҚР ІІМ Ұлттық ұланының әскери қызметшілері қоғамдық қауіпсіздікті қамтамасыз етуге, арнайы операцияларға, лаңкестікке қарсы іс-шараларға, табиғи апаттар мен төтенше жағдайлардың салдарын жоюға қатысады. Мұндай жағдайда кәсіби медицина мамандары келгенге дейін алғашқы медициналық көмекті жедел әрі сауатты көрсете білу аса маңызды.Ұлттық ұланда тактикалық медициналық дайындық Tactical Combat Casualty Care (TCCC) халықаралық стандарты бойынша жүргізіледі. Бұл – ұрыс жағдайында жарақат алғандарға көмек көрсету хаттамасы. Ол құқықтық тәртіп әскерлерінің міндеттеріне бейімделген және үш негізгі кезеңнен тұрады:Care Under Fire – оқ астында көмек көрсету (қан тоқтататын таңғыштар салу, қауіпсіздікті қамтамасыз ету);Tactical Field Care – дала жағдайында көмек көрсету (қан кетуді тоқтату, тыныс алуды қалпына келтіру, жағдайды тұрақтандыру);Tactical Evacuation Care – эвакуация кезінде көмек (медициналық мекемеге дейін сүйемелдеу және көмек көрсету).Оқыту арнайы оқу орталықтарында өткізіледі. Бағдарлама теориялық сабақтармен қатар, жауынгерлік жарақаттар мен төтенше жағдай сценарийлерін нақты модельдейтін заманауи тренажерларда практикалық жаттығуларды қамтиды.Тактикалық медициналық дайындық – бір реттік шара емес, ол құқықтық тәртіп әскерін жаңғыртуға бағытталған ұзақмерзімді стратегиялық қадам. Оның мақсаты – әскери бөлімдердің жауынгерлік қабілетін арттыру, жеке құрам арасындағы адам шығынын азайту және әскери ортада медициналық сауаттылық мәдениетін қалыптастыру.Бұған қоса, ҚР ІІМ Ұлттық ұланының патрульдік қызмет атқаратын әскери қызметшілерінің әрқайсысы алғашқы медициналық көмектің базалық дағдыларына үйретіледі. Бұл жауынгер жарақат алған сәтте немесе бейбіт тұрғын зардап шеккен жағдайда, кәсіби медицина мамандары келгенге дейін дұрыс әрекет ете білу үшін қажет.Тактикалық медицина нұсқаушылары оқу-жаттығу сабақтарын үнемі өткізіп тұрады, оның ішінде шынайы жағдайға барынша жақын ортада далалық жаттығулар ұйымдастырылады. Бұл — әскери қызметшілердің күйзеліске төзімділігін арттырып, өзінің я өзгелердің  өміріне болсын төнген қауіпке шұғыл әрекет етуді үйренуге мүмкіндік береді.Медицина қызметкерлерінің күні – тек ауруханадағы дәрігерлердің еңбегін ғана емес, сондай-ақ қауіпті жағдайда жұмыс істейтін әскердегі медицина мамандарының, нұсқаушылар мен фельдшерлердің күнделікті ерлікке толы қызметін еске алатын маңызды күн.Бүгінде Қазақстан Республикасы ІІМ Ұлттық ұланы - бейбіт күнде және қауіп-қатер аймағында өмірді сақтап қалуға бағытталған заманауи тактикалық медицина стандарттарын енгізу арқылы маңызды әрі батыл қадам жасап отыр. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/1017588?lang=kk

Веспрем, 2025 жылғы 10 маусым — Қазақстан Елшісі Абзал Сапарбекұлы күн энергетикасы мен маңызды инфрақұрылым нысандарын энергиямен қамтамасыз етуге арналған шешімдерді әзірлейтін және өндіретін жетекші мажар компанияларының бірі — «CoreComm Group» зауытына барды.Сапар барысында Елші компанияның бас директоры Балаж Хорватпен келіссөздер жүргізіп, «CoreComm» технологияларын Қазақстанда жергіліктендіру мүмкіндіктері және жаңартылатын энергия көздері (ЖЭК) саласындағы жобаларға қатысу мәселелерін талқылады.Абзал Сапарбекұлы Қазақстанның 2025 жылы энергетикалық көшу кезеңіне нақты қадам жасағанын атап өтті. Қазіргі таңда елде жалпы қуаты 3 ГВт-тан асатын 154 ЖЭК нысаны жұмыс істеп тұр. 2024 жылдың өзінде 7,6 млрд кВт·сағ жасыл энергия өндірілді. 2027 жылға дейін қосымша 6,7 ГВт қуат енгізу жоспарланған. Елдің стратегиялық мақсаты — 2030 жылға қарай ЖЭК үлесін 15%, ал 2050 жылға қарай кемінде 50% жеткізу.Осыған байланысты Елші «CoreComm» компаниясын Қазақстанда құрастыру өндірісін немесе бірлескен кәсіпорын ашу мүмкіндігін қарастыруға және күн электр станцияларын салу бойынша аукциондарға қатысуға шақырды.Сонымен қатар, мектептерді, медициналық мекемелерді және ауыл шаруашылығы инфрақұрылымын энергиямен қамтамасыз етуге арналған модульдік күн жүйелері, энергия сақтау құрылғылары және үздіксіз қуатпен жабдықтау көздері (UPS) шешімдеріне ерекше қызығушылық танытылды.«CoreComm» басшылығы Қазақстан нарығына шығу мүмкіндігін зерделеуге ниетті екенін білдіріп, елдегі инвестициялық ахуалдың тартымдылығын және ЖЭК-ке көрсетілетін мемлекеттік қолдаудың жоғары деңгейін атап өтті.Тараптар Kazakh Invest компаниясының үйлестіруімен жұмысты жалғастыруға, соның ішінде Қазақстанға сапар ұйымдастыру, инфрақұрылым мүмкіндіктерін бағалау және жобалық алаңдарды қарастыру туралы уағдаласты.Ақпарат көзі : https://www.gov.kz/memleket/entities/mfa-budapest/press/news/details/1017581?lang=kk

Ақтау қаласында еліміздің түкпір-түкпірінен келген 150-ден астам мықты спортшының қатысуымен жағажай самбосынан Қазақстан чемпионаты өтті.Бұл жарыста ҚР ІІМ  Ұлттық ұланының намысын абыроймен қорғаған әскери қызметшілер жеке есепте жоғары нәтижелер көрсетіп, төрт бірдей жүлделі орынды жеңіп алды.71 келіге дейінгі салмақ дәрежесінде күміс медальді 6654 әскери бөлімінің қатардағы жауынгері Нұрсұлтан Нұрсейітов иеленді.Ал 88 келіге дейінгі салмақта екінші орынды 5573 әскери бөлімінің сержанты Бекзат Алтынбаев алды.100 келіден жоғары салмақ дәрежесінде бірден екі ұландық жоғары нәтиже көрсетті:– 5573 әскери бөлімінің қатардағы жауынгері Жандос Сейтенов күміс медаль алса,– ал 5451 әскери бөлімінің жауынгері Болат Сапар өз салмақ дәрежесінде топ жарып, алтын медаль иеленді.Бұл жетістіктер —ұландықтардың жүйелі дайындығының, рухани қуаты мен жауынгерлік мінезінің айқын дәлелі.Айта кетейік, барлық жүлдегерлер биыл Сингапурда өтетін жағажай самбосынан Әлем кубогына жолдама алды. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/1017583?lang=kk

Астана қаласына жақын орналасқан Мичурино шағын ауданында  әскери-патриоттық «Батырлар» орталығы базасында құрылған жазғы «ALASH CAMP» лагерінің салтанатты ашылу рәсімі өтті. Іс-шараға Ұлттық ұланның «Жас Бүркіт» клубы тәрбиеленушілері, күштік құрылымдардың әскери қызметшілері мен құрметті қонақтар қатысты.Ұлттық ұланның әскери қызметшілері көрермендерге арналған мазмұнды мәдени-әскери бағдарлама ұсынды. Ән-би ансамблінің солистері отансүйгіштік рухтағы әндерді шырқап, кештің шырайын аша түсті. Үлгілі-көрсетімді оркестрдің орындауындағы ерлік пен жеңісті ұлықтайтын музыкалық шығармалар көпшіліктің көңілінен шықты. Ал Құрмет қарауылы ротасының саптық дефилесі — олардың кәсіби даярлығының, бірізді қозғалысы мен темірдей тәртібінің жарқын үлгісіне айналды.Салтанатты ашылу рәсімінің құрметті қонағы ретінде Ұлттық ұлан Бас қолбасшысының тәрбие және әлеу-меттік-құқықтық жұмыстар жөніндегі орынбасары генерал-майор Қайрат Үмбетов қатысты.Іс-шараға қатысушылар  өз сөздерінде өскелең ұрпаққа елге деген сүйіспеншілік, әскери борышқа құрмет және Отан алдындағы жауапкершілік сезімін дарытудың маңыздылығын атап өтті.«ALASH CAMP» лагері — 12 мен 17 жас аралығындағы жасөспірімдерге арналған 10 күндік ерекше жоба. Оның басты мақсаты — жас ұрпақтың көшбасшылық қабілеттерін дамытып, физикалық және зияткерлік әлеуетін арттырумен қатар, патриоттық рух пен азаматтық жауапкершілікті қалыптастыру. Қатысушылар взводтық шатырларда тұрып, бес мезгіл тамақпен және қажетті киім-кешекпен толық қамтамасыз етіледі.Лагерь бағдарламасы теориялық және практикалық сабақтарға толы. Балалар тактикалық медицина, дрондарды басқару негіздері, жергілікті жерде бағдарлау, нысана көздеу, шахмат турнирлері мен жекпе-жек жаттығулары бойынша білім алады. Сондай-ақ, шайқаста ерлікпен қаза тапқан әйелдерге арналған естелік кабинеті мен әскери тарих пен дәстүрмен таныстыратын «Сарбаз» сыныбы ерекше орын алады.Бұдан бөлек, лагерьде киберспорт кабинеті, қару-жарақ бөлмесі мен заманауи мультимедиялық сыныптар жұмыс істейді. Мұның бәрі — жастарды заманауи түрде тәрбиелеуге бағытталған тиімді құрал.«Батырлар» әскери-патриоттық орталығы Ұлттық ұланның тікелей қолдауымен жұмыс істейді. Ұландықтардың бастамасымен жүзеге асырылып жатқан «ALASH CAMP» секілді жобалар жас буынға әскери-патриоттық тәрбие берудің, азаматтық жауапкершілік пен көшбасшылық қасиеттерді қалыптастырудың негізгі алаңына айналуда. ҚР ІІМ Ұлттық ұланының баспасөз қызметі  Ақпарат көзі : https://www.gov.kz/memleket/entities/kvv/press/news/details/1017585?lang=kk

Қостанай облысында KАZ19 «Қостанай – Рудный – Денисовка – Комсомол – Қарабұтақ» автожолын кезең-кезеңімен жаңарту жұмыстары жалғасуда. Бұл жұмыстар Мемлекет басшысының тапсырмасын орындау аясында, еліміздің көлік инфрақұрылымын дамыту мақсатында жүзеге асырылуда.Президент тапсырмасын орындаудың жарқын мысалдарының бірі – 2021 жылы Рудный қаласына кіреберістегі 5,1 шақырым жол учаскесінің қайта жаңғыртылып, пайдалануға берілуі болды. Жобаны «Қостанай жолдары» ЖШС жүзеге асырды. Жоба құны — 4,5 миллиард теңге. Нәтижесінде автожол ІІІ техникалық санаттан І-Б техникалық санатқа ауыстырылып, көлік қозғалысының қауіпсіздігі мен жайлылығы едәуір артты.Биыл бұл бағыттағы жұмыс қарқын ала түсті: Рудный қаласының жолайрығынан Қостанайдағы Абай даңғылына дейінгі 31,5 шақырым жол учаскесінде орташа жөндеу басталды. Жөндеу жұмыстарын «АБЗ плюс» ЖШС жүргізіп жатыр. Жобаның жалпы құны — 6,7 миллиард теңге. Орташа жөндеу аясында жолға екі қабатты асфальт-бетон жамылғысы төселуде. Қазіргі таңда оң жақ жолақта төменгі қабат 28,2 шақырымға (90%) төселсе, сол жақта — 10,2 шақырымға (32%) аяқталған. Жобаны 2025 жылдың қазан айында толық аяқтау жоспарланып отыр.Қостанай – Рудный бағыты бойындағы көшені жарықтандыру мәселесі де назардан тыс қалған жоқ. 2024 жылы Қонай тұрғын үй массиві маңында бір шақырымдық жарық шамдары орнатылды. Ал 2025 жылы Қостанай қаласынан Қонайға дейінгі аралықта тағы 3,8 шақырым жарықтандыру желісі тартылады.Бұған қоса, Қонайдан Рудныйға дейінгі 25 шақырым жол учаскесін жарықтандыру жобасы әзірленуде. Құрылыс-монтаж жұмыстары тамыз айында басталып, 2025 жылдың желтоқсан айына дейін аяқталады деп күтілуде.Аталған жобалар – өңірдегі жол сапасын арттыру мен инфрақұрылымды жаңғыртуға бағытталған жүйелі жұмыстың бір бөлігі. Жолдардың қолжетімділігі мен қауіпсіздігін арттыру, халық үшін ыңғайлы жағдай жасау – Мемлекет басшысы айқындап берген басым бағыттардың бірі.Ақпарат көзі : https://www.gov.kz/memleket/entities/kostanay/press/news/details/1017534?lang=kk

Tumar Innovation Hub DIFC-пен бірлесе отырып, Astana Hub пен IT Park Uzbekistan қолдауымен Орталық Азия фаундерлеріне ерекше мүмкіндік берілді. Биыл күзде БАӘ-де Қазақстан мен Өзбекстан стартаптарына арналған алғашқы акселерациялық бағдарлама өтеді. Бағдарлама стартаптарға өз қызметін жергілікті нарыққа бейімдеуге, ауқымын кеңейтуге және MENA аймағындағы мүмкіндіктерге жол ашуға көмектеседі.Бағдарлама 2025 жылдың қыркүйек айының ортасынан қарашаның ортасына дейін жалғасады. Өтінім беру басталды. Өтінім беру сілтемесі: https://tumarhub.com/acceleration1            Дедлайн: 20 маусымDigital Startups Scale Up Program — Central Asian Innovation Hub-тың жаңа бастамасы, ол өңірдегі үздік стартаптарды жаһандық нарыққа ілгерілетуге бағытталған. БАӘ — Қазақстан мен Өзбекстанның Парсы шығанағы өңіріндегі негізгі саяси және экономикалық серіктесі. Сонымен қатар, соңғы жылдары Дубай әлемдегі үздік технологиялық компаниялардың орталығына айналды. Digital Startups Scale Up бағдарламасы IT-технологиялар экспортын алдағы жылдары 1 миллиард АҚШ долларына дейін арттыру мақсатын көздейді.Акселерациялық бағдарлама алдын ала және соңғы іріктеу кезеңінен, дайындық, бағдарлама, Demo Day-ден және пост-бағдарламалық қолдаудан тұрады. Қатысу үшін стартаптар келесі талаптарға сай болуы керек:Өз елінің ішінде тұрақты даму көрсеткіштеріКомпанияның қызметін, командасын және өнімін БАӘ, Таяу Шығыс пен Солтүстік Африка нарығына бейімдеуге дайын болуБАӘ-ге шығу стратегиясы мен негіздемесі бар питч-декБағдарламаның барлық 8 аптасында стартап иесі немесе серіктестің БАӘ-ге көшу мүмкіндігі БАӘ-де компания тіркелгеннен кейін таңдалған стартаптар DIFC Innovation Hub сарапшылары дайындаған 8 апталық акселерациялық бағдарламаға қатысады. Бағдарламаның негізгі құрамдас бөліктері:Кураторлық менторлық және оқыту сессияларыБизнес дамуына қолдау, соның ішінде әлеуетті клиенттермен, инвесторлармен және корпоративтік серіктестермен танысуБАӘ нарығына шығуға сараптамалық және нормативтік жетекшілікӨнім мен нарыққа шығу стратегиясын локализациялауға қолдауDIFC Innovation Hub негізіндегі коворкинг кеңістігіне қол жеткізуҚараша айының соңында өтетін Demo Day аясында стартаптар соңғы питч жасап, бағдарламаның үздік түлектері таңдалады. Үздік стартаптар инвестиция алып, серіктестер тарапынан одан әрі қолдау таба алады. Сонымен қатар, барлық қатысушылар БАӘ-дегі Tumar Innovation Hub-та бір жылдық тегін резиденцияға ие болады.Сәуір айында Dubai AI Week аясында Astana Hub, IT Park Uzbekistan, DIFC Innovation Hub және Al-Farabi Innovation Hub өзара түсіністік туралы меморандумға қол қойды. Осы меморандум аясында Дубайда Tumar Innovation Hub іске қосылады, ол алғашқы акселерациялық бағдарламасын 2025 жылдың күзінде іске қосады. Бұл бастамалар Қазақстан мен Өзбекстаннан келген стартаптарға MENA нарығына шығуға: капитал, жұмыс орындарына және менторлар желісіне қол жеткізуге мүмкіндік береді. Tumar Innovation Hub-ты Аслан Сұлтанов және MENA-дағы екі инновациялық хаб пен Tumar VC-ді басқаратын White Hill Capital басқарады. Салтанатты рәсімге DIFC губернаторы Эсса Казим және Қазақстан Республикасының цифрлық даму, инновациялар және аэроғарыш өнеркәсібі министрі Жаслан Мадиев қатысты. Ақпарат көзі : https://www.gov.kz/memleket/entities/mdai/press/news/details/1017522?lang=kk

Вашингтон, 2025 жылғы 12 маусым – Қазақстан Республикасы Премьер-министрінің орынбасары – Сыртқы істер министрі Мұрат Нұртілеудің Америка Құрама Штаттарына ресми сапары аясында Қазақстан Республикасы Президентінің экономикалық мәселелер жөніндегі көмекшісі Қанат Шарлапаевтың төрағалығымен дөңгелек үстел өтті.Іс-шараға америкалық трансұлттық корпорациялар, инвестициялық қорлар мен Қазақстан Республикасының мемлекеттік органдарының өкілдері қатысты. Олардың қатарында ҚР Сыртқы істер министрлігінің Инвестициялар комитетінің төрағасы Ғабидолла Оспанқұлов болды.Кездесу барысында инвестициялық серіктестіктің басым бағыттары, оның ішінде шикізаттық емес секторларды дамыту, орнықты өсу технологиялары, инфрақұрылым және өндірісті жергіліктендіру мәселелері талқыланды. Қазақстандық тарап АҚШ-ты ел экономикасына 62 млрд АҚШ долларынан астам тікелей инвестиция салған ірі инвестор ретінде атап өтіп, ынтымақтастықты одан әрі тереңдетудің маңыздылығын жеткізді.Ғ.Оспанқұлов АҚШ бизнесінің Қазақстанға деген қызығушылығы артып келе жатқанын атап өтті: «АҚШ – біздің негізгі стратегиялық серіктесіміз. Бүгінде қазақстандық нарықта ірі америкалық компаниялар табысты жұмыс істеуде, және біз олардың қатарын кеңейтуге мүдделіміз. Біз тек капитал тартуға емес, бірлескен өндірістерді іске қосуға, озық технологияларды енгізуге және жаңа экспорттық тауашаларды дамытуға ұмтыламыз. Бүгінгі кездесу жаңа жобаларға қосымша серпін береді деп сенеміз».Сондай-ақ сапар аясында АҚШ Сауда палатасының Таяу Шығыс, Түркия және Қазақстан бойынша вице-президенті Дженнифер Милмен кездесу өтті. Тараптар Қазақстан мен АҚШ арасындағы іскерлік серіктестіктің ағымдағы жай-күйін және Қазақстандық-америкалық іскерлік кеңес аясындағы өзара іс-қимылды кеңейту жолдарын талқылады. Әсіресе Қазақстанның америкалық бизнес қауымдастығы арасында танымалдылығын арттыру және нақты инвестициялық бастамаларды іске асыру мәселелеріне баса назар аударылды.Бұдан бөлек, Комитет басшысы «Jones Equity Fund», «Heeney Capital», «Honeywell», «IG Global», «Amazon Kuiper», «Jennmar» және басқа да компаниялармен бірқатар екіжақты кездесулер өткізді.Қазақстан тарапы жобаларды толық сүйемелдеуге, соның ішінде әкімшілік қолдау көрсетуге, мемлекеттік қолдау шараларына және жергілікті серіктестерді іздеуге дайын екенін растады.Ақпарат көзі : https://www.gov.kz/memleket/entities/invest/press/news/details/1017675?lang=kk