22 қараша күні аймақ басшысы Нұрлыбек Нәлібаев Жалағаш ауданына қарасты Ақсу, М.Шәменов ауылының тұрғындарымен кездеседі.Ақпарат көзі : https://www.gov.kz/memleket/entities/kyzylorda/press/news/details/887766

Е.Рахмадиев атындағы мемлекеттік академиялық филармонияның концерт залында Астана қаласы әкімдігінің «Наз» мемлекеттік би театрының 25 жылдығы аясында «Алдар көсе» хореографиялық спектаклінің премьерасы өтті. Бұл қойылым – театрдың XXV маусымдағы ірі жобаларының бірі, деп хабарлайды елорда әкімдігінің ресми сайты.Қойылым басталмас бұрын сахнадан құттықтаулар оқылып, марапаттар тапсырылды. Ұлттық ғылым академиясының академигі, TURKSOY халықаралық ұйымы Бас хатшысының Қазақстан бойынша кеңесшісі, Ұлттық құрылтай мен Астана қаласы Қоғамдық кеңесінің мүшесі Кәрімбек Құрманәлиев TURKSOY медалін театрдың көркемдік жетекшісі, бас балетмейстер Қадиша Ағымбаеваға табыс етті және Құрмет грамоталарын Бас хатшы Сұлтан Раевтың атынан тапсырып, құттықтау хатын оқып берді.Мәдениет және ақпарат министрлігінің басқарма басшысы Рига Оңаева «Наз» театрының тарихына, өнерде алатын орнына тоқталып өтті. Өнер ұжымын Қазақстанның Халық әртісі Гүлжан Талпақова құттықтады.«Алдар көсе» хореографиялық спектаклі либреттосының авторы – Нұрлан Сегізбаев. Қоюшы балетмейстерлер – Уәлитбек Сиязбеков пен Әмина Самарбаева. Композиторы – Алмабек Мейірбеков. Қойылым «Астана» эстрадалық-симфониялық оркестрінің сүйемелдеуімен ұсынылды. Музыканы өңдеген әрі дирижерлік еткен – осы оркестрдің көркемдік жетекшісі Қасым Айтбаев. Алдар көсе бейнесін Санат Қалимбетов сомдады.Спектакльде Алдар көсенің бастан кешкен оқиғалары, сараң байдың қулығы мен жамандығы әшкере болады. Ғашықтар оқиғасы да қамтылған. Көрермен Елентай мен Айсұлумен бірге қуанып, бірге мұңаяды.«Театрдың басты ұстанымдарының бірі – қазақ фольклоры мен этнографиясын насихаттау болса, қойылымда қазақтың тұрмыс-салт жырлары, дәстүрлері де көрініс табады. Жалпы «Наз» мемлекеттік би театры соңғы жылдары қазақ хореографиясында ерекше орын ала отырып, тек танымалдыққа ғана қол жеткізбей, сонымен қатар көрерменнің сүйіспеншілігіне бөленді. Театр шығармашылығы тек Қазақстанда ғана емес, халықаралық деңгейде де танылды. Осы уақыт ішінде театр хореографтары өз қойылымдарында романтикалық нәзіктік пен драмалық шиеленістен бастап, кең ауқымды эмоциялар мен терең сезімдерге дейінгі түрлі оқиғаларды көрсетуге жетті. Театр бірнеше буын хореографтар мен орындаушыларды тәрбиелеп, олардың еңбектері арқылы театрдың даңқты дәстүрлерін жалғастырып келеді. Театрдың жетістігі мен құпиясы да, бәлкім, осы адалдық пен шеберлікте жатқан шығар», - дейді «Наз» мемлекеттік би театрының директоры Еркебұлан Ағымбаев.Ақпарат көзі : https://www.gov.kz/memleket/entities/astana/press/news/details/888571

Астана қаласының әкімі Жеңіс Қасымбек Instagram парақшасында Агроқалашықта қандай өзгерістер болатыны туралы жазды, деп хабарлайды елорда әкімдігінің ресми сайты.«Агроқалашық елді мекенінің белсенділерімен кездестім. Елді мекенді ары қарай дамыту мәселелерін талқыладық. Мұнда шамамен 67 мың адам тұрады.Агроқалашықта 13 білім беру нысаны, 1 денсаулық сақтау нысаны, 1 әлеуметтік-мәдени нысан, 2 спорт нысаны бар. Елорданың бас жоспарында аталмыш елді мекенде 3 мектеп, балабақша, медициналық орталық және т.б. салу көзделген.Биыл бұл елді мекенде бірқатар жұмыс орындалды: 5 көшеге орташа жөндеу жүргізілді, тағы 8 көшеге тротуар орнатылды, сондай-ақ Тілендиев даңғылы мен Ш.Бейсекова көшесінің қиылысында көлік айрығының құрылысы жүргізіліп жатыр.Сол сияқты жаңадан жарықтандыру тіректері, 3 жылы аялдама орнатылды, Юбилейная көшесі, 22 мекенжайындағы екі аула мен қоғамдық кеңістік абаттандырылды; бұзылған апатты күйдегі барак типтес үйлердің орнына 100 орындық тұрақ аймағы және т.б. ашылды.Тұрғындар кездесулерде ЭБ-8 желісі бойынша проблеманы бірнеше рет көтерді. Қазір электрмен жабдықтау желілері «Астана-АЭК» АҚ балансына берілді. Олар апатты жағдайдағы тіректер мен электрмен жабдықтаудың кабельдік желілерін ауыстыру бойынша тиісті жұмыс жүргізіп жатыр.Аталған жұмыстың бәрі ары қарай да жалғасады. Кездесуде көтерілген мәселелерді Агроқалашықтың алдағы даму жоспарына енгіземіз», - деп жазды Жеңіс Қасымбек.Ақпарат көзі : https://www.gov.kz/memleket/entities/astana/press/news/details/888573

Семейде Қазақстан Республикасы мәслихаттарының 30 жылдығына арналған облыстық форум өтті. Шараға 450-ден астам қатысушы жиналды. Олардың қатарында облыс әкімі Нұрлан Ұранхаев, Қазақстан Республикасы Парламенті Сенатының депутаттары Қайрат Тастекеев пен Айнұр Арғынбекова, «Қазақстан мәслихаттары депутаттарының бірлестігі» ҚБ төрағасы Төлеубек Мұқашев, облыстық мәслихат төрағасы Қуаныш Сүлейменов, сондай-ақ ардагерлер мен қазіргі барлық деңгейдегі депутаттар бар.Форумда демократия мен жергілікті өзін-өзі басқару жүйесін нығайтудағы мәслихаттардың рөлі зор екені атап өтілді.«Мәслихаттардың құрылуы – еліміздің демократиялық дамуындағы маңызды белестерінің бірі. Халық пен билік арасындағы «алтын көпір» болған бұл мемлекеттік институт елдік мүдде жолында өзінің тиімділігін көрсетіп келеді. Абай елі қайта түлеп, еңсе көтергенде де, біздің депутаттық корпус өзінің саяси белсенділігі мен жауапкершілігін көрсете білді. Орайы келгенде, өңірдің әлеуметтік-экономикалық дамуына зор үлесін қосқан барша депутаттарға шынайы ризашылығым мен алғысымды білдіргім келеді», — деді өзінің құттықтау сөзінде облыс әкімі Нұрлан Ұранхаев.Форум барысында Қазақстан Республикасы Парламенті Сенаты мен Мәжілісінің, министрліктердің, сондай-ақ облыс әкімінің және облыс мәслихаты төрағасының Құрмет грамоталары мен Алғыс хаттары табысталды. Еліміздің дамуына елеулі үлес қосқан депутаттарға арнайы марапат – «Құрметті депутат» атағы берілді.Ақпарат көзі : https://www.gov.kz/memleket/entities/abay/press/news/details/888506

Қазақстан Премьер-министрі Олжас Бектенов америкалық ірі технологиялық компаниялардың бірі EPAM Systems директорлар кеңесінің төрағасы, бас директоры әрі президенті Аркадий Добкинмен цифрландыру, IT-білім беру және Қазақстанның технологиялық экожүйесін дамыту саласындағы ынтымақтастық мәселелерін талқылады.Әңгімелесу барысында әлемдік технологиялар нарығын дамытудың заманауи трендтері және жаңа бірлескен бизнес-шешімдерді, зерттеу бастамаларды, оның ішінде Ұлттық жасанды интеллект орталығында жасанды интеллект зертханасын ашу шеңберінде әзірлеу перспективасы қарастырылды. EPAM Systems – бағдарламалық қамтамасыз етуді әзірлеу және консалтинг саласындағы әлемдік көшбасшы. Бүгінгі таңда EPAM компаниясы Қазақстанның 17-ден астам қаласында таныстырылған және 1000-ға жуық қызметкері бар, 2024 жылы Astana Hub-қа қатысу шеңберінде $40 млн астам сомаға қызметтер экспортталды. Тараптар IT-білім беруді дамыту бағытында 5000-нан астам маманды оқытқан EPAM Kazakhstan оқу орталығының маңызын атап өтті. Tech Orda бағдарламасы арқылы компания 700-ден астам студентке Java, Python және Data Engineering сияқты негізгі бағыттар бойынша IT дағдыларын үйретті. Биыл оқу үшін тағы 300 студент таңдалды. «Президент Қасым-Жомарт Тоқаев стратегиялық міндет қойды. Қазақстан жаппай цифрландыру және жасанды интеллектіні жедел дамыту аумағына айналуға тиіс. Біз осы бағытта жұмыс жүргізіп жатырмыз. 5 жыл ішінде IT-қызметтер экспортының көлемі $30 млн-нан $600 млн-ға дейін өсті. Дегенмен, бұл жеткіліксіз, бізде үлкен әлеует бар. Қазақстандық мамандар дарынды әрі бәсекеге қабілетті. Әлемдік алпауыттармен ынтымақтастық бізге тиімділікті арттыруға және озық қарқынмен дамуды қамтамасыз етуге мүмкіндік береді», — деп атап өтті Олжас Бектенов. Өз кезегінде Аркадий Добкин Қазақстандағы қолайлы инвестициялық ахуалды атап өтіп, цифрландыру және экономиканың нақты секторларына жаңа технологияларды енгізу саласындағы одан әрі ынтымақтастық үшін бірқатар ұсыныстарды айтты. Кездесу қорытындысы бойынша цифрлық даму, инновациялар және аэроғарыш өнеркәсібі министріне қажетті көмекті қамтамасыз ете отырып, жобаларды сүйемелдеуді күшейту тапсырылды.Ақпарат көзі : https://www.gov.kz/memleket/entities/mdai/press/news/details/888577

Тұрғын үй сатып алу кезінде қиын жағдайға тап болмас үшін астаналықтар үлескерлердің қаражатын құрылыс салушыдан жинау мақсатында рұқсат құжаттарын толықтай мұқият тексеруі керек. Мамандар нақты не нәрсеге назар аудару керек екенін айтты, деп хабарлайды Астана әкімдігінің ресми сайты.Тұрғын үй құрылысына үлестік қатысу мынадай тәсілдердің бірімен ұйымдастырылады:- тұрғын үй құрылысының бірыңғай операторының кепілдігін алу;- Екінші деңгейдегі банктің жобасына қатысу;- тұрғын үйдің қаңқасын тұрғызғаннан кейін үлескерлердің ақшасын қабылдау.Тұрғын үй салу үшін үлескерлердің ақшасын алдын ала брондау шарты, резервтеу шарты, инвестициялау шарты, талап ету құқығын басқаға беру шарты арқылы өзге тәсілдермен қабылдауға тыйым салынады.Тұрғын үй құрылысына үлестік қатысу саласындағы жергілікті атқарушы органнан берілген рұқсаттар туралы мәліметтер тізбесімен «Астана қаласының Сәулет, қала құрылысы және жер қатынастары басқармасы» мемлекеттік мекемесінің ресми сайтынан хабардар болуға болады. «Қазақстан тұрғын үй компаниясы» АҚ-ның салынып жатқан объектілеріне кепілдік беру туралы келісімдердің тізілімі, сонымен қатар Астана әкімдігінің ресми сайтында үлескерлердің ақшасын қабылдауға рұқсаты жоқ салынып жатқан көппәтерлі тұрғын үй кешендерінің тізімі жүйелі түрде жарияланады.Азаматтар тұрғын үй құрылысына үлестік қатысу туралы шарт жасамас бұрын бірнеше ережені білуі керек:- шарт жазбаша нысанда жасалады және ол жергілікті атқарушы органда есепке қойылған сәттен бастап жасалған болып есептеледі;- үлескерлердің ақшасын қабылдауды уәкілетті компания жергілікті атқарушы органның рұқсаты негізінде жүзеге асырады;- уәкілетті компания тұрғын үй құрылысына үлестік қатысу туралы шарт жасасу мақсатында жүгінген жеке және заңды тұлғаларға танысу үшін құрылыс нысаны туралы толық ақпарат береді;- уәкілетті компания толық емес және дұрыс емес ақпарат берген жағдайда, үлескер тұрғын үй құрылысына үлестік қатысу туралы шартты жарамсыз деп тану туралы талап-арызбен сотқа жүгінуге құқылы.Егер сізбен қолданыстағы заңды бұзу арқылы мәміле жасалған болса, Астана қаласы, Бейбітшілік көшесі 9, 324-кабинет мекенжайында орналасқан «Астана қаласының қалалық орта сапасын бақылау және бақылау басқармасы» ММ уәкілетті органына жүгіну қажет. Байланыс телефондары: 8 (7172) – 55-04-28, 55-67-03. Ақпарат көзі : https://www.gov.kz/memleket/entities/astana/press/news/details/888545

Семейдегі екі университет Денсаулық сақтау бойынша МВА аштыAlikhan Bokeikhan University және Семей қаласындағы Медицина университеті «Денсаулық сақтаудағы Master of Business Administration (MBA)» бірлескен магистрлік бағдарламасын іске қосты.Бірлескен бағдарламаны іске асыру жөніндегі келісімге Alikhan Bokeikhan University Президенті Шырын Курманбаева мен Семей қаласындағы Медицина университетінің ректоры Алтай Дюсупов қол қойды. Келісім Қазақстанның денсаулық сақтау жүйесіне қажетті жоғары білікті басқарушы мамандар даярлауды мақсат етеді.Бағдарлама екі университеттің кең көлемді, сыртқы және ішкі байланыстарының, атап айтқанда, Швейцария, Италия, Франция және Болгария елдерінің жетекші бизнес мектептерінің, сонымен қатар отандық және шетелдік жетекші медицина орталықтарының қолдауымен жүзеге асады. Бұл өз кезегінде білім алушыларға өзекті білім мен үздік халықаралық тәжірибелерді игеруге мүмкіндік береді.Бұл екі университет арасындағы алғашқы ынтымақтастық емес. Бұған дейін Alikhan Bokeikhan University мен Семей қаласындағы Медицина университеті 2019 жылы «Денсаулық сақтаудағы IT» бакалавриат бағдарламасын іске қосқан болатын. Бүгінде бұл бағдарлама – түлектері 100% жұмыспен қамтылған жетекші білім беру бағдарламаларының бірі.Денсаулық сақтаудағы MBA – еліміздегі медицина менеджментінің негізгі міндеттерін жүзеге асыратын кәсіпқой мамандарды даярлаудағы маңызды қадам болмақ.Ақпарат көзі : https://www.gov.kz/memleket/entities/sci/press/news/details/888534

ӨСКЕМЕНДЕГІ ТЕХНИКАЛЫҚ УНИВЕРСИТЕТӘЛЕМДІК БЕДЕЛДІ ЛИГАҒА ЕНДІД.Серікбаев атындағы ШҚТУ Қазақстаннан алғашқы университеттердің бірі болып World TVET League (Дүниежүзілік техникалық және кәсіптік білім беру лигасы) құрамына енді. ШҚТУ делегациясы – Басқарма Төрағасы – ректоры Сәуле Рахметуллина, ғылым және инновациялар бойынша проректоры Жадыра Қонурбаева және академиялық мәселелер жөніндегі проректоры Асия Машекенова, Тяньцзинь қаласында (Қытай) өткен World TVET League-дің I Бас Ассамблеясына және Дүниежүзілік техникалық және кәсіптік білім беру дамуы жөніндегі конференцияға қатысты.Ауқымды шара барысында Лиганың ресми ашылу рәсімі өтті, ол кәсіби білім берудегі инновациялық тәсілдер мен үздік тәжірибелерді талқылауға арналған алаңға айналмақ.– Біз үшін Қазақстанды әлемдік білім беру платформасында ұсыну үлкен құрмет. World TVET League-ке қатысу университетіміздің білім беру процесіне ең үздік халықаралық тәжірибелерді енгізуге, сондай-ақ осы тәжірибелерді негізге ала отырып, жоғары білім сапасын жақсартуға көмектеседі, - деп атап өтті ШҚТУ ректоры Сәуле Рахметуллина.Лига жоғары білікті кадрларды даярлауда инновациялар мен серіктестіктің маңыздылығына ерекше назар аударды. Еңбек нарығындағы жаһандық өзгерістер білім беру жүйелерін бейімдеуді талап етеді, және дәл осы World TVET League-ке қатысу ВКТУ-ға жаңа мүмкіндіктер ашады – университет осы ынтымақтастық аясында жаңа білім беру технологияларын енгізу мен халықаралық байланыстарды кеңейтуді жоспарлап отыр.World TVET League-мен ынтымақтастық ШҚТУ үшін ғана емес, бүкіл Қазақстан үшін маңызды жетістік. Бұл оқиға қазақстандық университеттердің өзгерістер көшбасшысы болуға дайын екенін және заманауи әлемге жоғары білікті мамандар даярлау саласындағы өз орындарын нығайтуды жалғастыратынын көрсетеді.Ақпарат көзі : https://www.gov.kz/memleket/entities/sci/press/news/details/888541

Үкіметтегі кеңесте вице-премьер Серік Жұманғарин Қазақстандағы астықты терең өңдеуді дамыту және осы саладағы жобаларды іске асыратын инвесторлардың жағдайын тыңдады. Бүгінгі таңда Қазақстанда астықты терең өңдеу бойынша үш зауыт жұмыс істейді. Іске асыру сатысында тағы 4 жоба бар. Жетісудағы «Жаркент крахмал зауыты» ЖШС жылдық қуаты 150 мың тонна жүгеріні қайта өңдейді; Алматы облысындағы «Азия-Агрофуд» ЖШС (60 мың тонна жүгері, крахмал, крахмал сірнесі және крахмал шәрбатын) және СҚО-дағы «Биооперейшн» ЖШС-250 мың тонна бидай (крахмал, глютен, биоэтанол, ауыл шаруашылығы жануарларына арналған жем) өндіреді. «2023 жылы Қазақстанда барлығы 111 мың тонна крахмал өнімдері өндірілді. Бұл 27,7 мың тонна жүгері крахмалы, 2022 жылы бұл көрсеткіш 15,5 мың тоннаны құрады; 21,1 мың тонна бидай крахмалы, 2022 жылғы көрсеткіш 19,7 мың тонна болды; 51,8 мың тонна крахмал сірнесі, 2022 жылғы көрсеткіш – 57,3 мың тонна; 10,1 мың тонна глютен, 2022 жылы бұл көрсеткіш 10,7 мың тоннаны құрады», — деп мәлімдеді ауыл шаруашылығы вице-министрі Азат Сұлтанов.2023 жылы астықтан өңделген өнім экспортының көлемі едәуір өсті: жүгері крахмалы – 11,5 мың тонна (2022 жылы 9,3 мың тонна), бидай крахмалы – 15,7 мың тонна (2022 жылы 10,6 мың тонна), глютен – 6,9 мың тонна ( 2022 жылы 7,7 мың тонна), крахмал сірнесі – 19,4 мың тонна (2022 жылы 16 мың тонна). Өткен жылғы импорт 265 тонна бидай крахмалын, 4,2 мың тонна жүгері крахмалын, 8,1 мың тонна крахмал сірнесін, 76,1 тонна глютенді құрады.2028 жылға дейін астықты терең өңдеу бойынша тағы үш жобаны іске асыру жоспарлануда. Қазақстандық «Qostanai Grain Industry» ЖШС Қостанай облысында жылдық қуаты 415 мың тонна астықты терең өңдеу жобасын бастады. Кәсіпорын лизин, глютен, биоэтанол, көмірқышқыл газын шығаратын болады. Пайдалануға беру мерзімі – 2027 жыл, 650 жұмыс орнын ашу жоспарлануда. Түркістан облысында «Қазкрахмал» ЖШС крахмал өнімдерін өндіру үшін жүгеріні өңдеуді жоспарлауда. Қайта өңдеу қуаты – жылына 100-150 мың тонна. Пайдалануға беру мерзімі – 2026 жыл. 500 жұмыс орнын ашу көзделуде. Түркиялық Tiryaki Agro компаниясы Катарлық Hassad Food компаниясымен бірлесіп Астанада қуаты жылына 240 мың тонна астықты терең өңдеу бойынша жобаны бастады. Крахмал, глютен, глюкоза-фруктоза шәрбаты түріндегі соңғы өнімдерді әлемдік нарықтарға экспорттау жоспарлануда. Пайдалануға беру мерзімі – 2026 жыл. 250 жұмыс орнын ашу көзделіп отыр. Қазіргі сәтте жалпы қуаты жылына 2 млн тоннадан асатын бидай мен жүгеріні терең өңдеу бойынша тағы төрт инвестициялық жоба бойынша келіссөздер жүргізіліп, пысықталып жатқаны айтылды.Вице-министр Азат Сұлтановтың айтуынша, Қазақстанда өндірілетін астық көлемі барлық қолданыстағы және жаңа қуаттарды жүктеу үшін жеткілікті.Мемлекет тарапынан астықты терең қайта өңдеу жөніндегі жобаларға, яғни технологиялық күрделілігі жоғары заманауи кәсіпорындар, ауқымды инвестициялық қолдау көрсетілуде. Жұмыс істеп тұрған өндірістерді салу және кеңейту кезіндегі инвестициялық субсидиялар, негізгі және айналым қаражаттарына кредит беру кезінде пайыздық мөлшерлемені арзандату, салықтық преференциялар қарастырылған.Серік Жұманғарин астықты терең өңдеу бойынша жобаларды іске асыратын кәсіпорындардың басшыларын тыңдап, мемлекет тарапынан барлық қажетті қолдау көрсетілетінін атап өтті. Жобаның әрбір кезеңін уақтылы іске асырудың маңызын ескере отырып, вице-премьер ай сайын жоба жетекшілерімен кездесулер өткізуді тапсырды.Ақпарат көзі : https://www.gov.kz/memleket/entities/moa/press/news/details/888549

Раманхан Төрегелдиев 1984 жылы Оңтүстік Қазақстан облысының дүниеге келген. Мұхтар Әуезов атындағы Оңтүстік Қазақстан мемлекеттік университетін, Шымкент әлеуметтік-педагогикалық университетін және Қаржы академиясын бітірген.Мемлекеттік қызметтегі жалпы еңбек өтілі 14 жылдан асады. Ол мемлекеттік аудит және қаржылық бақылау саласындағы мансабын 2009 жылы Қазақстан Республикасы Қаржы министрлігі Қаржылық бақылау комитетінің Ішкі әкімшілендіру және персоналмен жұмыс басқармасының сарапшысы лауазымынан бастады.2017-2020 жылдар аралығында Ішкі мемлекеттік аудит комитетінде басқарма басшысы болып жұмыс істеді, сондай-ақ Алматы облысы бойынша Ішкі мемлекеттік аудит департаменті басшысының орынбасары қызметін атқарды.2020 жылдан 2023 жылға дейін Батыс Қазақстан облысы бойынша Ішкі мемлекеттік аудит департаментінің басшысы болды.2023 жылдан бастап Қазақстан Республикасы Қаржы министрлігінің Ішкі мемлекеттік аудит жөніндегі апелляция департаментінің директоры қызметін атқарып келді.Ақпарат көзі : https://www.gov.kz/memleket/entities/minfin/press/news/details/888540

«AMANAT» партиясының бастамасымен Жетісу облысының орталығы Талдықорған қаласында ауыл әкімдерінің басын қосқан форум өтті.Жиынның басты мақсаты – мемлекет пен қоғам алдында тұрған, ауыл халқын толғандырып отырған өзекті де өткір мәселелерді бірлесіп ашық талқылау, олардың шешу жолдарын іздеу.Басқосуға Жетісу облысы әкімінің бірінші орынбасары Әлібек Жақанбаев және орынбасары Диас Есдаулетов, «AMANAT» партиясы орталық аппаратының басшысы Мади Оспанов, ҚР Парламенті Мәжілісінің депутаты Болат Керімбек, басқарма басшылары мен аймақтағы 113 ауылдық окургтің әкімдері қатысты.Алғаш ұйымдастырылған форум партияның сайлауалды бағдарламасын жүзеге асыру, ауыл-аймақтардың әлеуметтік-экономикалық дамуы, ауыл әкімдерінің сайлауы және олардың атқарар жұмыстарының негізгі мәселелерін талқылауға арналған алаңға айналды.Әлібек Жақанбаев қоғамдық-саяси тұрақтылықты және орнықты дамуды қамтамасыз ету әкімдердің басты міндеті екеніне тоқталды.«Облыс экономикасын одан әрі дамыту мен халықтың өмір сүруіне қолайлы жағдай жасау үшін біз бірлескен, тиімді жұмыстың арқасында өңірдің әл-ауқатын жақсартудағы міндеттерге қол жеткізе алатынымызға сенімдімін», - деді облыс басшысының бірінші орынбасары Әлібек Жақанбаев форумның ашылу рәсімінде.Осы орайда «AMANAT» партиясының аппарат басшысы Мәди Жарылқасынұлы жергілікті атқарушы биліктің жауапкершілігі жоғары болуға тиіс екенін тілге тиек етті.«Ауыл әкімдерінің форумы қазіргі уақытта еліміздің барлық аймақтарында өтуде. Форумда айтылған ұсыныстар мен идеялар, тың бастамалар «AMANAT» партиясының атынан сайланған ауыл әкімдерінің табанды жұмысы мен кәсіби шеберлігіне жаңа серпін береді деп есептеймін. Мемлекет басшысы Қасым-Жомарт Тоқаев ауыл әкімдерін тікелей сайлау жүйесін енгізгеннен бері жыл сайын халық елді мекен басшыларына қатысты өз таңдауын жасап келеді. Өңірде 2021 жылдың шілдеден бастап 113 ауыл әкімдерінің сайлауы өткізілді, оның ішінде партиядан ұсынылған 111 (98%) кандидат жеңіске жетті. Бұл – біздің бағдарламаларымыз бен бастамаларымызға деген халық сенімінің айқын дәлелі», - деді Мәди Оспанов.«AMANAT» партиясы елді мекендердегі кәсіпкерлікті дамытуға, экономикалық ахуалды арттыруға баса назар аударуда. Дәл осы мақсатта форум барысында «Қарызсыз қоғам», «Құқықтық көмек» жобаларының және Жол картасы аясында жүзеге асып жатқан жетістіктер талқыланды.Мәселен, «Қарызсыз қоғам» жобасын іске асыру үшін облыс орталығында жобалық кеңсе ашылып, осы жылдың 5 ақпанынан бастап Жетісу облысының барлық аудан, қалаларында 7300 адам оқытылды.Биыл өңірде 349,3 мың шаршы метр тұрғын үй салу жоспарланған, 8 айда 150,2 мың шаршы метр немесе 43% тұрғын үй пайдалануға берілді. Жыл соңына дейін 4117 үй беріліп, тұрғын үй кезегі 14%-ға төмендейді. Облыста орталықтандырылған сумен қамту деңгейі 91,1%. Облыстық деңгейдегі 182 шақырым және 54 елді мекеннің ішкі жолдары жөнделіп, Балқаш көліне дейінгі 132 шақырым жолдың 117 шақырымына асфальт төселген.Ауылдық әкімдер форумның ұйымдастырылуы өздері үшін пайдалы болғанын айтады. - Халықтың партия мен атқарушы билікке деген сенімі сайлауалды уәделердің орындалуымен тікелей байланысты, сондықтан оларды уақытылы және сапалы орындау – баршамыздың басты міндетіміз. Шалғайдағы ауыл әкімдерінің жұмысына әртүрлі бағыттар бойынша әдістемелік қолдау қашанда қажет. Бүгінгі жиында өз жұмысымды жүйелі ұйымдастырудың тағы да бір қырын игердім,- деді Панфилов ауданы Үлкенағаш ауылдық округінің әкімі Ермек Нұрахметов. Форум аясында панелдік сессиялары да ұйымдастырылды. Онда ауыл әкімдері «AMANAT» партиясының Сайлауалды бағдарламасын іске асыру, партиялық жобаларды ілгерілету, қызметті кәсібилендіруге негізделген мемлекеттік қызметтің жаңа принциптер мен қадамдар, сыбайлас жемқорлықтың алдын алу, мемлекеттік сатып алуды іске асыру, агроөнеркәсіп кешеніндегі мемлекеттік қолдаудың қолжетімді тетіктерін қалыптастыру, кәсіпкерлікке қолдау көрсету және инвестиция тарту шаралары, қоғамдық-саяси ахуал және бұқарамен жұмыс істеу секілді түрлі бағыттарда арнайы мамандардан дәріс алды. «Amanat» партиясының Жетісу облыстық филиалының мәліметі бойынша дайындалды.Ақпарат көзі : https://www.gov.kz/memleket/entities/zhetysu-oblysy/press/news/details/888538

Жетісай ауданына қарасты Қарақай ауылдық округі, Сәтпаев ауылдық мәдениет үйі кітапханашыларының ұйымдастыруымен «Тарихыңды таны – тұлғаңды құрметте» атты облыстық акциясы өтті.Ауыл кітапханалары арасындағы әріптестік қарым-қатынасты нығайтып, өз өлкесінің әр саласын дамытуға сүбелі үлес қосқан бабалар мен отаншыл, елжанды азаматтарды өскелең ұрпаққа таныту, киелі, қасиетті мұраларын кеңінен насихаттау мақсатында Түркістан облыстық «Фараб» әмбебап-ғылыми кітапханасының бастамасымен жүзеге асып жатқан жоба аудан әкімінің орынбасары Тұрышбек Елшібаев пен аудандық мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев, Сарыағаш ауданынан арнайы келген қонақтар қатысты.Іс-шара барысында жергілікті және отандық, әлемдік ақын-жазушылардың кітаптарының көрмесі ұйымдастырылып, аудан өнерпаздарының концерттік бағдарламасы ұсынылды. Жергілікті ұстаз-ақын Сержан Құлдырақұлымен кездесу өтті.Айта кетейік, бүгінде ауданда 1 аудандық орталық кітапхана, 1 орталық балалар кітапханасы мен 19 ауылдық кітапханалар тұрақты түрде жұмыс істейді. Оларда жыл басынан бері өткізілген 546 іс-шараға 11 781 оқырман қамтылған. Кітапханалардағы 337 390 дана кітаптың 181 734-і қазақ тіліндегі әдебиеттер.Сонымен қатар қала, кент, ауылдық округтердің аумақтарында орнатылған 50 монументті өнер туындылары мен мемориал тақтайшалардың 14-і Жетісай қаласында, 36-сы ауылдық округтерде. 18-і ҰОС-на арналса, 32-сі қоғам қайраткерлеріне арналған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888138

Түркістан облысында өндіріс орындарын ашу, инвестиция тартуға басымдық берілген. Облыс әкімдігінің қолдауымен аудан, қала әкімдері мен кәсіпкерлер көршілес елдердің кәсіпорындарын аралап, инвесторлармен келіссөздер жүргізіп, ол кездесулер жемісін беруде. Ордабасы ауданында бой көтеретін зауытта Қытай елінің тәжірибесі мен жоғары технологиясы қолданылады. Облыс әкімі жобаны уақтылы жүзеге асыру керектігін айтты.– Шетелдің озық технологияларын меңгеріп, батыл шешімдер қабылдау керек. Бұл зауыттың жоспарланған мерзімде ашылуы қадағаланады. Жұмыс істеймін, халықты жұмыспен қамтимын дейтін инвесторлар мен кәсіпкерлерімізге қолдау көрсетіледі, – деген Дархан Сатыбалды жаңа зауыттың уақыт капсуласын салу рәсіміне қатысты.«Altyn land» ЖШС-нің директоры Береке Дүйсебеков жобаға қолдау көрсеткен облыс, аудан басшылығына алғысын білдірді. Оның айтуынша, қыш зауытында заманауи технологиялр қолданылады. Жобаның жалпы құны – 5 млрд. теңге, кәсіпкердің жеке қаржысы және несие арқылы жүзеге асырылады. Аталған зауытта жылына 90 млн. дана кірпіш, күніне 250 мың дана кірпіш шығарылады деп жоспарланып отыр. Осы арқылы жергілікті нарықта импортты азайтып, отандық өнім көлемін арттыру көзделген. Қазақстанда теңдесі жоқ зауытта жергілікті 70 тұрғын жұмыспен қамтылады. Бүгінде жобаның ЖСҚ-сы әзірленуде, ҚХР-дан құрал-жабдықты жеткізу туралы келісімшартқа қол қойылып, жер тегістеу, іргетасын құю жұмыстары жүріп жатыр.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888142

Түлкібас ауданында 2025 жылы жалпы инвестициялық құны 67,5 млрд теңгені құрайтын 10 жобаны іске асыру жоспарлануда. Одан түсетін болжамды салық көлемі 97,7 млн теңгені құрайтын болады. Сонымен қатар, 858 азамат тұрақты жұмыспен қамтылмақ. Жоспарға енген жобалардың ішінде «Састөбе инновациялық кешені» ЖШС зауыты бар. Онда каустикалық сода, ПВХ, кальций карбиді, әк өндірілмек. Сонымен қатар, «Azia Food Company» ұн диірмені де алдағы жылы толықтай іске қосылады деп күтілуде. Бұл жайында Түлкібас ауданының әкімі Нұржан Ізтілеуов БАҚ өкілдерімен өткен брифингте мәлімдеді.«2024 жылдың 10 айында аудандағы жалпы өңірлік өнім көлемі 81 млрд 519,2 млн теңгені құрады. Ал, шағын және орта бизнес нысандарының саны 9 787-ге жетіп, 13 мыңнан астам адам жұмыспен қамтылды. 2025 жылы аталған саланы дамыту мақсатында жалпы құны 2,2 млрд теңгені құрайтын, 22 жоба іске асырылмақ. Бұл жобалар толықтай іске асырылса 226 жаңа жұмыс орны ашылып, аудан бюджетіне қосымша 138 млн теңге салық түседі деп күтілуде»- деді өңір басшысы.Сонымен қатар, ауданды туристік аймаққа айналдыру бағытында да бірқатар жұмыстар атқарылуда. Бүгінде өңірде 36 туристік нысан жұмыс істейді. Ал, келер жылы құны 3,1 млрд теңгелік 5 жобаны іске асыру жоспарланып отыр. Көзделген мақсат толықтай іске асса, 235 жаңа жұмыс орны ашылмақ. Сондай-ақ, Түлкібас ауданындағы ауылшаруашылық өнімінің көлемі жыл басынан бері 46 млрд 452 млн теңгені құраған. 2025 жылы да аталған саланы дамыту мақсатында 8 жоба іске асырылмақ. Инвестициялық құны 15,5 млрд теңгені құрайтын жобалар арқасында 97 азаматты жұмыспен қамтуға мүмкіндік алады.Аудандағы инфрақұрылым саласы да ілгері жылжыған. Нақтырақ айтар болсақ, ауыз су саласы бойынша 59 елді мекеннің 58-і орталықтандырылған ауыз су құбырымен қамтамасыз етілген. Сонымен қатар, аудандағы 21 135 тұрғын үй, яғни 99,8 %-ы табиғи газ жүйесіне қосылған.Түркістан облысының Өңірлік коммуникациялар қызметіАқпарат көзі : https://www.gov.kz/memleket/entities/ontustik/press/news/details/888143

Түркістан облысындағы Сарыағаш медресе-колледжінде «Кітапты сыйға тарту» акциясы өтті. Аталған іс-шараға Сарыағаш ауданы әкімінің орынбасары Алдияр Қозыбаев , «FARAB» облыстық әмбебап кітапханасының бөлім меңгерушісі Дана Таженова, Облыстық дін істері басқармасы басшысы Рүстем Сабыржанұлы, Қазақстан мұсылмандары діни басқармасының Түркістан облысы бойынша өкілі Ержан Төлепов, «Сарыағаш медресе-колледжінің» директоры Дінмұхамед Сманов қатысып, іс-шараның маңыздылығына тоқталды.Түркістан облысының дін істері басқармасы және Мәдениет басқармасының ұйымдастыруымен өткен акция аясында Сарыағаш медресе-колледжіне 300-ден аса кітап сыйға берілді. Атап айтсақ, «FARAB» облыстық кітапханасынан 100 кітап, Сарыағаш ауданының кітапханасы атынан 100 кітап, Қазығұрт және Келес ауданының кітапханаларынан 60 кітап, Мақтаарал және Жетісай ауданының кітапханаларынан 100 кітап, Түркістан облысының бас имамының атынан 3 кітап сыйға тартылды.Айта кетейік, ҚР Президентінің кеңесшісі Мәлік Отарбаевтың ұсынысымен, облыс әкімдігінің тапсырмасына сәйкес ұйымдастырылған іс-шара мақсаты – кітап мәртебесін көтеру, жастарды патриотизмге, еңбекті сүюге, жалпыұлттық құндылықты әрбір жастың бойына сіңіріп, білімді де мәдениетті болып тәрбиеленуіне үлес қосып, кітап оқуды насихаттап, ұлттық ақын-жазушылардың шығармаларын насихаттау, кітапханаға оқырман тарту, кітап қорын толықтыру.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888144

Отырар ауданында 2024 жылдың 10 айында жалпы өңірлік өнім көлемі 66,4 млрд теңгені құрап, өткен жылдың тиісті кезеңімен салыстырғанда 300 млн теңгеге артық орындалған. Оның ішінде, ауыл шаруашылығы - 33,3 млрд теңге, тартылған инвестиция - 23,6 млрд теңге, сауда - 2,8 млрд теңге, өнеркәсіп - 22 млрд теңге, құрылыс көлемі - 8,2 млрд теңгені құраған. Бұл жайында Отырар ауданының әкімі Қайрат Жолдыбай БАҚ өкілдерімен өткен брифингте мәлімдеді.«Биыл Отырар ауданында 35 000 гектарға егін егіліп, егістік алқабынан 395 993 тонна өнім жиналды. Одан бөлек, ауданда 2024 жылдың ІІ тоқсанында бірнеше инвестициялық жоба іске асырылды. Мәселен, «Баржоу Хинкай Трейд гоу» ЛТД компаниясымен бірлесіп 500 гектар алқапқа тамшылатып суару әдісімен мақта дақылын егу жұмыстары жүргізіліп, 1 200 тонна мақта өнімі алынды. Сонымен қатар, ауданда жыл соңына дейін 800 млн теңгеге сауда саласы бойынша екі шағын инвестициялық жобаны іске қосу жоспарланып отыр. Бұдан бөлек, 2025 жылы құны 360 млн теңгені құрайтын түйе сүтін өңдеп, ұнтақ шығаратын кәсіпорын құру көзделген. Бүгінде Қытай мемлекетімен келіссөздер жүргізілуде. Сондай-ақ, 2025-2030 жылдары құны 145 млрд 625 млн теңгені құрайтын 157 ірі және шағын инвестициялық жобалар жүзеге асып, 1 790 адам жұмыспен қамтылмақ. Сондай-ақ, келесі жылы ауданда «Nomad» ЖШС-ң демалыс аймағы іске қосылады. Ал, 2026 жылы «Жанұя» ЖШС-ң емдік балшық пен жылы сумен емдеу орталығын іске қосу көзделген»,- деді аудан басшысы.Бұдан бөлек, аудандағы Шәуілдір ауылында «Жайлы мектеп» ұлттық пилоттық жобасы аясында 600 орындық мектеп құрылысы жүргізілуде. Нысан 2024 жылдың 15 желтоқсанына дейін пайдалануға берілмек. Сондай-ақ, «Ауылдық денсаулық сақтауды жаңғырту» ұлттық жобасы аясында Аққұм ауылынан дәрігерлік амбулатория құрылысы мен Шытты ауылынан фельдшерлік-акушерлік нысанның құрылысы жүргізілуде. Ғимараттар 2024 жылдың 1 желтоқсанына дейін ел игілігіне беріледі.Инфрақұрылыммен қамту бойынша аудандағы 37 елді мекеннің 35-і орталықтандырылған ауыз су жүйесімен қамтылған. Қалған екі елді мекенді ауыз сумен қамту жұмыстары жүргізілуде. 2018-2023 жылдар аралығында 21 елді мекен табиғи газ жүйесіне қосылып, жалпы аудан халқының газбен қамтылу деңгейі 71,4 %-ға жеткен. 2024 жылы «Ауыл – Ел бесігі» бағдарламасы аясында 13,7 шақырымдық 7 ішкі көшеге, жергілікті бюджет қаржысы есебінен 34,8 шақырымдық 29 көшеге орта және ағымдағы жөндеу жұмыстары жүріп, қанағаттанарлық дәрежедегі жолдар үлесі 80,1%-ды құрап отыр.Түркістан облысының Өңірлік коммуникациялар қызметіАқпарат көзі : https://www.gov.kz/memleket/entities/ontustik/press/news/details/888146

Түркістан облысы, Ордабасы ауданы, Бадам ауылында заманауи спорттық-сауықтыру кешені ашылды. Нысанның ашылу салтанатына Түркістан облысының әкімі Дархан Сатыбалды қатысып, тұрғындарды құттықтады.– Өңірімізде ауылды елді мекендердің инфрақұрылымын жақсарту жұмыстары жүріп жатыр. Білім, медицина, спорт, мәдениет нысандары салынуда. Бүгін спорт кешенін ашқалы тұрмыз. Бұның бәрі сіздер үшін, жастар үшін үлкен қолдау деп ойлаймын. Осында жаттыққан спортшы жастарымыз әлемдік деңгейде Қазақстанның атын шығара берсін! – деген Дархан Сатыбалды спорт кешенін аралап көріп, спортшылармен, бапкерлермен жүздесті.Жобаның құны – 1 132 223,6 мың теңге. Жер телімінің ауданы – 1,5 гектар болса, құрылыстың ауданы – 2488,59 шаршы метр. Нысанның құрылысын «Қаратау ЛТД» ЖШС жүргізген.Заманауи спорттық-сауықтыру кешенінде грек-рим күресі, еркін күрес, самбо, дзюдо және бокспен шұғылдануға жағдай жасалған. Сонымен қатар баскетбол, волейбол, гандбол секілді командалық спорт түрлерімен де айналысуға болады. Залға 210 көрермен сияды.Ауыл ақсақалдары мен тұрғындары спорт кешенінің салынғанына ризашылықтарын білдіріп, өңір басшысымен еркін пікір алмасты. Ұсыныстар айтылып, аймақты дамыту жолдары сөз болды. Аталған спорт кешенінде Қажымұқан атындағы №1 облыстық балалар мен жасөспірімдер спорт мектебі орналасады. Бұл спорт мектебінде 1000-ға жуық бала жаттығып жүр.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888147

Түркістанда «Бабалар дәстүрі – тәрбиенің бастауы» атты байқауы өтті. Шараның ашылу салтанатына облыс әкімінің орынбасары Ертай Алтаев қатысып, ұлттық құндылықтарды насихаттауда байқаудың маңызы жоғары екенін айтып, қатысушыларға сәттілік тіледі.– Өздеріңізге белгілі, қазақ халқы әлемдегі салт-дәстүрге бай халықтардың бірі. Тәрбиелік маңызға ие бұл байқауды, жыл сайын дәстүрлі түрде өткізуді қолға алдық. Облыстың барлық аудан, қаласында жалғасын тауып, жастарға үлгі-өнеге көрсететін ұлттық патриоттық іс-шараға айналып отыр. Халық арасында бабалар тәрбиесінің ізгі мұрасын бүгінгі өскелең жастарға насихаттау әрбіріміздің өшпес парызымыз. Осыған орай, бүгінгі байқау үлкен мәнге ие. Әдет-ғұрыпымызды дәріптейтін осындай жобалар көп болып, ұрпақ санасы серпіле берсін, – деді Ертай Кенжебекұлы.Шараға аудан, қалалардан жалпы саны 20 команда қатысып, бақ сынады. Ата-бабамыздың салт-дәстүрлері халықтың рухани өзегі, мәдениетінің дінгегі, тілінің тірегі. Осы құндылықтарды кеңінен дәріптеу мақсатында қолға алынған шарада қазылар алқасы 20 топтың дайындығын 2 кезең бойынша байқады. Алғашқы кезең ұмытылып бара жатқан салт-дәстүр бойынша, бүгінгі ұрпақ тәрбиесі мен ел бірлігіне өте қажет деген отау көтеру, тәрбие, отбасы, тұрмыс дәстүрлері, еңбек дәстүрлері сахналық қойылымдар үйлесімін тауып көрермен назарына ұсынылды.Ұлтымыздың дәстүрлерін әділ қазылар алқасына тереңінен жеткізіп, көрерменге көрініс барысында толыққанды сипаттап берді. Ал екінші кезеңде ұлттық қадір-қасиеттерді дәріптеді. Қазылар алқасының шешімімен Бас жүлде Арыс қаласына бұйырды. Жүлделі 1-орынды Қазығұрт пен Төлеби ауданы, жүлделі 2-орынды Түркістан қаласы, Шардара мен Сарыағаш ауданы, жүлделі 3-орынды Жетісай, Созақ, Түлкібас аудандары иеленді. Байқау жеңімпаздарына қаржылай сыйлықтар табысталды.Айта кетейік, облыс әкімдігінің қолдауымен өткен байқаудың мақсаты – ұмыт қалған салт-дәстүрді қайта жаңғыртып, шешендік сөздердің қуатын ұрпақтың бойына сіңіру. Түркістан облыстық Ақсақалдар алқасының бастамасымен, байқау биыл екінші рет өткізіліп отыр. Ұйымдастырушы – «Серпіліс» қоғамдық қоры.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888447

Түркістан облысына ҚР Парламенті Мәжілісінің депутаттары мен вице-министрлер жұмыс сапарымен келді. Сапар аясында «Базардағы кітапхана» жобасы шеңберінде «Қуаныш» сауда орталығында кітапхана пунктіне ат басын бұрып, сондағы жұмыстармен танысты. Облыс әкімінің орынбасары Бейсенбай Тәжібаев бұл жобаның негізгі мақсаты кәсіпкерлерге өз бизнесін дамытуға, тұлға ретінде қалыптасуына үлес қосып, креативті идеялардың тууына мүмкіндік беретінін жеткізді. Сондай-ақ аудан, қалаларда жалғасып жатқанын атап өтті.ҚР Парламенті Мәжілісінің депутаты Нұртай Сабильянов Түркістан қаласына ерекше мәртебе беру туралы заң жобасын әзірлеу барысына тоқталды. Содан соң елімізде алғаш қолға алынған жобаның өзге өңірлерге де үлгі боларын айтты. Сауда орталығының басшысы, облыстық мәслихат депутаты Инара Намазбаева тұтыншулар мен жеке кәсіпкерлер арасында үлкен сұранысқа ие болып, келушілердің артып келе жатқанын жеткізді. Облыстық кітапхана басшысы Жанат Шардарбекованың айтуынша қазірге дейін 10-мыңға жуық адам кітапхана қызметтерін пайдаланған. Мәдени ошаққа ҚР Парламенті Мәжілісінің депутаты Темір Қырықбаев, Түркістан облыстық мәдениет басқармасы басшысының орынбасары Ержан Исатаев, Түркістан қаласы әкімі Әзімбек Пазылбекұлы да қатысып, кітапхана жұмысын жоғары бағалады.Облыс әкімдігінің тапсырмасына сәйкес ашылған кітапхана пунктінде көркем әдебиет пен кәсіпті нығайтуға бағытталған және әлемдік бестселлерден құралған 3 мыңға жуық кітап қоры бар. Балаларға арналған туындыларды да табуға болады. Оқырман сұранысына сай кітап сөрелері мен мерзімді басылымдар тұрақты түрде жаңартылады. Кітапхана қызметі білімге қолжетімділікті, мәдени құндылықтармен алмасуды көздейді.Айта кетейік, өңірде «Ашық әкімдіктегі – ашық кітапхана» жобасы да іске асырылып, облыстағы барлық әкімдікте ашылған болатын. Бұдан бөлек мешіт-медреселерде де кітапхана бұрыштары әзірленуде. Мұндай кітапхана оқуға жайлы орта жасап, оқырманмен тығыз байланыс орнатып, келушілердің уақытын тиімді өткізуіне ықпал етеді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888453

Түркістан облыстық қоғамдық даму басқармасы «Қоғамдық келісім» КММ-нің ұйымдастыруымен Кентау қаласы мен Сауран ауданында БАҚ өкілдеріне арналған баспасөз туры өтті.Сапар аясында журналистер Жаңа Иқан ауыл округінде ашылған «Рамазан» ЖК трансформаторларды жөндеу цехының жұмысымен танысты.Энергетикалық қуатты нығайту – мемлекетіміздің экономика саласының басым бөлігі. Оның ішінде трансформатор – электр-техникалық бұйымдар рыногының ең талапты және бәсекелі бөлігі. Кентау қаласындағы транформатор зауытының өнімдері өңірдің ғана емес елдің мәртебесін көтеріп, өңір тұрғындарын өмір сапасын жақсартып жатқаны баршаға мәлім.Осы орайда, Сауран ауданындағы шағын ғана ауылдан трансформатор жөндеп, адал еңбегімен отбасын асырап отырған Ибата елді мекенінің тұрғыны, Қазақстан халқы Ассамблеясының мүшесі, жеке кәсіпкер Махсұд Тажибаев қазіргі таңда 5 адамды жұмыспен қамтып отыр. Балаларының осы салаға бейімділігін байқап, өзінің білгенін үйреткен әкесі Дадахан Тажибайұлы да көп жылдар бойы Ибатада электрик болып еңбек еткен. Енді балалары Махсұд, Махмұд, Мұхаммед әке жолымен электрик болып жұмыс істеп, ел игілігі үшін аянбай еңбек етуде.2016 жылы ашылған цехта жұмыс өнімділігі мен тапсырысқа қарай ауыл тұрғындары еңбек етіп келеді. Кәсіпорында қуатты кернеу диапазонындағы трансформаторлардың қорабы құрастырылады. Жылына 60-тан аса трансформатор қалпына келтіріліп, қайта жасақталады. Сонымен қатар кәсіпорын жөндеуді қажет ететін, тозығы жеткен трансформаторларды жөндеумен айналысады. Бүгінде кәсіпорын өз өнімін өзге аудандар мен қалаларға шығара бастаған.«Айына кемі 4-5 транформатор жөндейтін «Рамазан» ЖК-не тапсырыс берушілер көп. Елімізден бөлек, Ресейден де іздеп келетіндер бар. Олар негізінен Қазақстан электр желілері орталығының істен шыққан транформаторларға жаңа серпін береді. Әсіресе, өндіріс орындары шағын трансформаторларға қызығушылық танытады. Зауыттан әлдеқайда арзан өнімдерге сұраныс жоғары» - дейді Махсұд Дадаханұлы.Кәсіпкердің айтуынша, аудан әкімі Мақсат Таңғатаров кәсіпорын жұмысымен арнайы танысып, кәсіпкерге қолдау білдіретінін жеткізген.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/888455