Шымкент қаласының әкімі Ғабит Сыздықбеков Орталық коммуникациялар қызметі алаңында өткен көшпелі есеп беру кездесуінде экономикалық көрсеткіштердің халықтың өмір сүру сапасына тікелей әсер ететінін атап өтті. Шымкент қаласы төмен жалақы деңгейімен белгілі өңірлер қатарына кіреді. Алайда, жалақыны арттыруға бағытталған жүйелі шаралар қабылданып жатыр. «Біз төмен жалақы алатын 15 мыңға жуық азаматтық қызметкердің жалақысын 50 мың теңгеге арттырдық. Бұл мақсатқа жергілікті бюджеттен 10 миллиард теңге бөлінді. Нәтижесінде, жергілікті бюджет есебінен қаржыландырылатын мекемелерде ең төменгі жалақы 140 мың теңгеден асты. Қазіргі уақытта қаланың орташа жалақы мөлшері 12,5%-ға өсіп, 304 мың теңгені құрады», – деді Ғ. Сыздықбеков. Мегаполис басшысы жұмыс орындарын құру және халықтың табысын тұрақтандыру бағытында жүйелі жұмыс жүргізіліп жатқанын жеткізді. Қалада белсенді жұмыс істейтін азаматтар саны 468 мыңнан асты. Жұмыссыздық деңгейін төмендету мақсатында биыл 45 мыңнан астам адамды жұмыспен қамту шараларымен қамту жоспарланған, оның ішінде 32 мың адам тұрақты жұмысқа орналастырылды. Жұмыспен қамту және мемлекеттік қолдау шараларының нәтижесінде атаулы әлеуметтік көмек алушылардың саны 30%-ға қысқарды, ал өткен жылмен салыстырғанда жұмыссыздық деңгейі 4,8%-ға дейін төмендеді. Шымкент қаласы әкімінің баспасөз қызметіАқпарат көзі : https://www.gov.kz/memleket/entities/shymkent/press/news/details/888668

Білім – біздің басым бағыттарымыздың бірі. Қазіргі уақытта қала мектептерінде оқушы орындарының жетіспеушілігі байқалады. Мемлекет басшысының бастамасымен жүзеге асырылып жатқан «Жайлы мектеп» ұлттық жобасы аясында Шымкентте 18 мектеп салу жоспарланған. Қазіргі уақытта олардың ішінде 3200 орынға арналған2 мектеп іске қосылды. Бұл туралы Шымкент қаласының әкімі Ғабит Сыздықбеков Орталық коммуникациялар қызметі алаңында өткен есеп беру кездесуінде айтты. «Білім инфрақұрылымын қолдау қорының қаражаты есебінен 3 мектептің құрылысына 7,9 млрд теңге бөлінді, ал инвесторлар қаражаты есебінен 5 мектеп пайдалануға берілді, оларда 2800 орын бар. Ел Президентінің тапсырмасы бойынша Тұран шағын ауданында 500 орындық «Оқушылар сарайы» салынып жатыр, қазіргі уақытта құрылыс жұмыстары 80%-ға аяқталды. Сонымен қатар, жастардың сапалы білім алуына жағдай жасау мақсатында жергілікті бюджеттен 285 грант бөлінді. Бұған қоса, технологиялық кәсіпкерлікті насихаттау және технологиялық стартаптарды құру мақсатында өңірлік IT-орталық «Shymkent HUB» іске қосылды», – деді Ғ. Сыздықбеков. Қала әкімі сондай-ақ мәдениет саласындағы жұмыстарға тоқталды. Биыл Шымкентте 2066 орындық көпфункционалды Конгресс-холл пайдалануға берілді, мұнда халықаралық деңгейдегі мәдени іс-шаралар өткізіледі. Жергілікті бюджет қаражаты есебінен төрт шағын ауданында жаңа «Мәдениет үйлері» ашылды. Мегаполис тұрғындарының мәдениетке деген қызығушылығын арттыру және мәдени өмірді жандандыру үшін саябақтарда және Мәдениет үйлерінде «Шымқала кештері» іс-шаралары ұйымдастырылуда. Шымкент қаласы әкімінің баспасөз қызметіАқпарат көзі : https://www.gov.kz/memleket/entities/shymkent/press/news/details/888674

Бүгін облыс әкімі Нұрлыбек Нәлібаевтың қатысуымен «Қыс-2024» республикалық штабтық оқу-жаттығуы өтті.Жаттығудың республикалық штабы Көкшетау қаласында орналасқан.Оқу-жаттығу осы жылдың 21-22 қарашасы аралығында азаматтық қорғау мемлекеттік жүйесінің және халықтың қысқы кезеңде төтенше жағдайларды жоюға дайындығын, қабілетін арттыру, азаматтық қорғау қызметтері мен құрылымдарының төтенше жағдайға ден қою әзірлігін тексеру мақсатында өткізіледі.Командалық-штабтық жаттығулар, авариялық құтқару қызметтерінің және азаматтық қорғау құрылымдарының практикалық іс-қимылдары пысықталады. Саптық қарауға азаматтық қорғау, авариялық-құтқару құтқару қызметтерінен 49 техника, 119 қызметкер қатысады. Оқу-жаттығу барысында электр сиреналары іске қосылып, құлақтандыру жүйесіне техникалық тексеру жүргізіледі. Ақпарат көзі : https://www.gov.kz/memleket/entities/kyzylorda/press/news/details/887734

22 қараша күні аймақ басшысы Нұрлыбек Нәлібаев Сырдария ауданына қарасты А.Тоқмағанбетов, С.Сейфуллин ауылының тұрғындарымен кездеседі.Ақпарат көзі : https://www.gov.kz/memleket/entities/kyzylorda/press/news/details/887739

22 қараша күні аймақ басшысы Нұрлыбек Нәлібаев Жалағаш ауданына қарасты Ақсу, М.Шәменов ауылының тұрғындарымен кездеседі.Ақпарат көзі : https://www.gov.kz/memleket/entities/kyzylorda/press/news/details/887766

«AMANAT» партиясының бастамасымен Жетісу облысының орталығы Талдықорған қаласында ауыл әкімдерінің басын қосқан форум өтті.Жиынның басты мақсаты – мемлекет пен қоғам алдында тұрған, ауыл халқын толғандырып отырған өзекті де өткір мәселелерді бірлесіп ашық талқылау, олардың шешу жолдарын іздеу.Басқосуға Жетісу облысы әкімінің бірінші орынбасары Әлібек Жақанбаев және орынбасары Диас Есдаулетов, «AMANAT» партиясы орталық аппаратының басшысы Мади Оспанов, ҚР Парламенті Мәжілісінің депутаты Болат Керімбек, басқарма басшылары мен аймақтағы 113 ауылдық окургтің әкімдері қатысты.Алғаш ұйымдастырылған форум партияның сайлауалды бағдарламасын жүзеге асыру, ауыл-аймақтардың әлеуметтік-экономикалық дамуы, ауыл әкімдерінің сайлауы және олардың атқарар жұмыстарының негізгі мәселелерін талқылауға арналған алаңға айналды.Әлібек Жақанбаев қоғамдық-саяси тұрақтылықты және орнықты дамуды қамтамасыз ету әкімдердің басты міндеті екеніне тоқталды.«Облыс экономикасын одан әрі дамыту мен халықтың өмір сүруіне қолайлы жағдай жасау үшін біз бірлескен, тиімді жұмыстың арқасында өңірдің әл-ауқатын жақсартудағы міндеттерге қол жеткізе алатынымызға сенімдімін», - деді облыс басшысының бірінші орынбасары Әлібек Жақанбаев форумның ашылу рәсімінде.Осы орайда «AMANAT» партиясының аппарат басшысы Мәди Жарылқасынұлы жергілікті атқарушы биліктің жауапкершілігі жоғары болуға тиіс екенін тілге тиек етті.«Ауыл әкімдерінің форумы қазіргі уақытта еліміздің барлық аймақтарында өтуде. Форумда айтылған ұсыныстар мен идеялар, тың бастамалар «AMANAT» партиясының атынан сайланған ауыл әкімдерінің табанды жұмысы мен кәсіби шеберлігіне жаңа серпін береді деп есептеймін. Мемлекет басшысы Қасым-Жомарт Тоқаев ауыл әкімдерін тікелей сайлау жүйесін енгізгеннен бері жыл сайын халық елді мекен басшыларына қатысты өз таңдауын жасап келеді. Өңірде 2021 жылдың шілдеден бастап 113 ауыл әкімдерінің сайлауы өткізілді, оның ішінде партиядан ұсынылған 111 (98%) кандидат жеңіске жетті. Бұл – біздің бағдарламаларымыз бен бастамаларымызға деген халық сенімінің айқын дәлелі», - деді Мәди Оспанов.«AMANAT» партиясы елді мекендердегі кәсіпкерлікті дамытуға, экономикалық ахуалды арттыруға баса назар аударуда. Дәл осы мақсатта форум барысында «Қарызсыз қоғам», «Құқықтық көмек» жобаларының және Жол картасы аясында жүзеге асып жатқан жетістіктер талқыланды.Мәселен, «Қарызсыз қоғам» жобасын іске асыру үшін облыс орталығында жобалық кеңсе ашылып, осы жылдың 5 ақпанынан бастап Жетісу облысының барлық аудан, қалаларында 7300 адам оқытылды.Биыл өңірде 349,3 мың шаршы метр тұрғын үй салу жоспарланған, 8 айда 150,2 мың шаршы метр немесе 43% тұрғын үй пайдалануға берілді. Жыл соңына дейін 4117 үй беріліп, тұрғын үй кезегі 14%-ға төмендейді. Облыста орталықтандырылған сумен қамту деңгейі 91,1%. Облыстық деңгейдегі 182 шақырым және 54 елді мекеннің ішкі жолдары жөнделіп, Балқаш көліне дейінгі 132 шақырым жолдың 117 шақырымына асфальт төселген.Ауылдық әкімдер форумның ұйымдастырылуы өздері үшін пайдалы болғанын айтады. - Халықтың партия мен атқарушы билікке деген сенімі сайлауалды уәделердің орындалуымен тікелей байланысты, сондықтан оларды уақытылы және сапалы орындау – баршамыздың басты міндетіміз. Шалғайдағы ауыл әкімдерінің жұмысына әртүрлі бағыттар бойынша әдістемелік қолдау қашанда қажет. Бүгінгі жиында өз жұмысымды жүйелі ұйымдастырудың тағы да бір қырын игердім,- деді Панфилов ауданы Үлкенағаш ауылдық округінің әкімі Ермек Нұрахметов. Форум аясында панелдік сессиялары да ұйымдастырылды. Онда ауыл әкімдері «AMANAT» партиясының Сайлауалды бағдарламасын іске асыру, партиялық жобаларды ілгерілету, қызметті кәсібилендіруге негізделген мемлекеттік қызметтің жаңа принциптер мен қадамдар, сыбайлас жемқорлықтың алдын алу, мемлекеттік сатып алуды іске асыру, агроөнеркәсіп кешеніндегі мемлекеттік қолдаудың қолжетімді тетіктерін қалыптастыру, кәсіпкерлікке қолдау көрсету және инвестиция тарту шаралары, қоғамдық-саяси ахуал және бұқарамен жұмыс істеу секілді түрлі бағыттарда арнайы мамандардан дәріс алды. «Amanat» партиясының Жетісу облыстық филиалының мәліметі бойынша дайындалды.Ақпарат көзі : https://www.gov.kz/memleket/entities/zhetysu-oblysy/press/news/details/888538

Жергілікті ресурстардан тауар өндіретін негізінен ауылдық жерлердегі кәсіпкерлік бастамаларды қолдау мақсатында іске асырыла бастаған «Бір ауыл – бір өнім» жобасы Жетісуда өзінің тиімділігін көрсетіп отыр. Мәселен, 2023 жылы аталған жоба аясындағы облыстық көрмеде үш адам жеңімпаз атанса, биылғы жобада тоғыз жетісулық кәсіпкер үздік ден танылды. Соның ішінде ауылдарда сабын және косметика, сол сияқты азық-түлік өндірісімен, ағаш, гипс, киіз тәрізді түрлі материалдардан бұйым жасау ісімен айналысатындар бар, - деп хабарлайды Жетісу облысы әкімінің баспасөз қызметі. Соңғы екі жылда «Бір ауыл – бір өнім» жобасының жеңімпазы болғандардың үшеуі – Сарқан ауданынан кәсіпкерлері. Сабын өндірісімен айналысатын Юлия Фисюкова, жеміс-жидек өңдеу және өндіріс саласында белсенді Светлана Мұқашева, қазақтың дәстүрлі қолөнері мен этнодизайн бағытында еңбектеніп жүрген шебер Эльмира Ақпанова облыстық деңгейде жеңімпаз атанып, гранттарға ие болғандар қатарында.Солардың бірі Қойлық ауылының тұрғыны Светлана Мұқашева 33 жыл бойы сауда саласында жұмыс істеді. Кейіннен бау-бақшамен айналысып, он жылдан астам уақыт бойы жеміс-жидек дақылдарын өсіріп, өңдеп, тұтынушыларға табиғи өнімдерін ұсынып келеді. Оның қызметі дақылдарды отырғызу мен күтуден бастап оларды өңдеуге және түпкілікті өнімді сатуға дейінгі өндірістің толық цикліне бағытталған.- Қарап отырсам, немерелеріміздің жейтін тағамдарында қоспа көп. Ең алдымен соларға табиғи таза өнімдер берсем екен деген оймен осы істі бастап кеттім. Жеміс-жидектерден джем, компот дайындадым. Бірте-бірте ауылдастарымнан тапсырыстар түсе бастады. 2013 жылы жеке кәсіпкерлігімді ашып, өз учаскемде өнім өсіріп, оны өңдеумен шұғылдандым. Кәсібім алма, таңқурай, қаражидек, мүкжидек сынды бау-бақша дақылдарын өсіруден басталды. Бәрін өзіміз егеміз, өзіміз өсіреміз, өзіміз өңдейміз. Қазір білесіздер, нарықта тағамға неше түрлі қоспа қосылады, ал біздікі түгелдей табиғи экологиялық таза өнім. Қолдағы барды ұқсата білсе, адал еңбекпен мол табыс табуға болады. Біздің ең үлкен тұтынушымыз - «Алматықалабазендіру» ұжымы. Солардың тапсырысына сәйкес бір айда 100 келі тосап дайындалады. Кептірілген алманы ауылдағы, Сарқан қаласындағы балабақшаларға жеткіземін, - дейді кәсіпкер. Алдымен істі жалғыз өзі бастаған С. Мұқашеваға кейін отбасы мүшелері көмекке жұмылған. Дегенмен бизнес тұрақты табыс әкеле бастағанда, кәсіп иесі жұмысшылар алуды жөн көрген. Бүгінде «Мұқашева» жеке кәсіпкерлігінде 3 адам еңбек етеді, ал жұмыс көлемі көбейетін маусымдық кезеңде жұмысшылар саны жиырма-жиырма бес адамға дейін жетеді. Кәсіпкер бірте-бірте қол жұмысын механикаландырып, цех ашып, 10 гектар алма бағы, 1 гектар таңқурай, қара қарақаттан тұратын жеміс-жидек дақылдарын өңдеу желісін іске қосуды жоспарлап отыр. Қойлықтың тағы бір тұрғыны Юлия Николаевна Фисюкова сабын жасайды, мамандығы - фармацевт. Сабын жасаумен 10 жыл бойы хобби ретінде айналысқан ол кейінгі 5 жыл бойы осы кәсібінен нәсіп көріп келе жатыр. Өйткені оның сабынына деген сұраныс жоғары. Өнімі сан алуан - сыйлыққа лайықталған сабын, эксклюзивті сабын, шөптен жасалған сабын т.б.- Біз табиғаты экологиялық таза Жетісу өңірінде тұратындықтан, сабындардың бәріне шөптердің сығындыларын қосамыз. Өсімдіктерден сығынды жасаймыз, оны жазда, күзде алдын ала дайындаймыз. Дәрілік шөптерден сабынның 40-тан аса түрі өндіріледі. «Бір ауыл – бір өнім» жобасына қатысудың арқасында кәсібімді ілгерілетуге айқын жол ашылды. Біріншіден, жаңа клиенттер пайда болды, өнімімнің жарнамасы жасалды. Өнімді ресімдеуге, ісімді одан ары дамытуға «Атамекен» Ұлттық кәсіпкерлер палатасы жәрдемдесті, демек бұдан әрі де жұмыс істеуге мол мүмкіндік бар, - дейді кәсіпкер Ю. Фисюкова.Осы орайда Сарқан ауданы іскер әйелдер кеңесінің төрайымы Кенжетай Тазабекова әйелдердің кәсіпкерлік бастамаларын қолдау арқылы олардың экономикалық белсенділігін арттырудың маңызы мен отбасылық кәсіптің балаларды еңбекке тәрбиелеудегі рөліне ерекше мән берілетінін айтады. - 2015 жылы құрылған Сарқан ауданының іскер әйелдер кеңесі бүгінде 40-қа жуық мүшені біріктіріп отыр. Оның ішінде 20-дан астам белсенді кәсіпкер өз ісін сәтті жүргізіп келеді. Кеңестің негізгі мақсаты — әйелдердің жаңа бизнес бастамаларын қолдау, олардың қаржылық сауаттылығын арттыру, бухгалтерлік есеп-қисапты жүргізу дағдыларын дамыту және жеңілдетілген несиелер мен гранттарға қолжетімділікті қамтамасыз ету,-дейді ол.Жалпы 2023-2024 жылдары «Бір ауыл – бір өнім» жобасына жетісулық 70-тен астам кәсіпкер қатысты. Соның 20-сы жартылай финалға өтсе, 12-сі жеңімпаз атанды. Оларға кәсіпкерлікті дамытуға арналған 5 млн. теңге грантының конкурсына қатысуға, сол сияқты түрлі республикалық және халықаралық көрмелерге қатысуға мүмкіндіктер жасалды. Сол сияқты тауарын брендтеу, сатылымын ілгерілету бойынша көмек көрсетілді. Жетісу облысы әкімінің баспасөз қызметі.Ақпарат көзі : https://www.gov.kz/memleket/entities/zhetysu-oblysy/press/news/details/888075

Тараз қаласы «Ұлы дала» (15) шағынауданында №67 мектеп балалар игілігіне берілді. Бұл білім беру нысанының құрылысы Президенттің тапсырмасына сәйкес «Жайлы мектеп» Ұлттық жобасы аясында жүргізілді.Білім ошағы 1 200 орынды құрайды.Жаңа мектептің салтанатты ашылу рәсімінде Жамбыл облысының әкімі Ербол Қарашөкеев құттықтау сөз сөйлеп, балалардың алаңсыз білім мен тәрбие алуына қолайлы жағдай жасау – негізгі міндет екенін атап өтті.– Білім – шамшырақ, ғылым мен ілімнің бастау көзі. Болашағын ойлаған кез келген мемлекет білім беру ісіне айрықша мән береді.Мемлекет басшысы Қасым-Жомарт Кемелұлы Тоқаевтың бастамасымен қолға алынған «Жайлы мектеп» Ұлттық жобасы аясында заманауи үлгіде жабдықталған тағы бір мектеп балаларды қабылдауға дайын. Бұған дейін Байзақ ауданы Сарыкемер ауылында және Тараз қаласы «Бәйтерек» шағынауданында дәл осындай білім беру нысанының құрылысы аяқталып, қолданысқа берілді, – деген облыс әкімі оқу ордасынан білімді, болашағы жарқын азаматтар шығатынына сенім білдірді. Әлеуметтік нысанның салынуына, құрылыстың сапалы жүргізілуіне зор үлес қосқан «Самұрық-Қазына» акционерлік қоғамы мен «Integra Construction KZ» ЖШС-не ризашылығын жеткізді.– Бүгін «Ұлы дала» шағынауданында мерейлі күн. Қуанышымызда шек жоқ. Жайлы мектептің бірінші кірпіші қаланған сәттен бастап бақыладым. Сапасы өте жақсы, көңілімізден шықты. Жаңа мектептің табалдырығын 4 немерем аттап отыр, – дейді зейнеткер Алмаш Ауғанбаева.Жайлы мектеп ең озық технологиялармен жарақтандырылған. Оқушылардың қауіпсіз білім алуына барлық мүмкіндіктер қарастырылып отыр.Ғимаратта интерактивті тақтасы бар 59 оқу кабинеті, 3 асхана, 2 спортзал, мәжіліс залы, кітапхана, 2 лингафон, 2 компьютер кабинеті бар, сондай-ақ 3 зертхана мен 3 шеберхана, 10 коворкинг-орталық қарастырылған.Айта кетейік, Жамбыл облысында «Жайлы мектеп» Ұлттық жобасы аясында 12 мектеп салу жоспарланған. Бұл бастаманың арқасында оқушы орнының тапшылығын жоюға, үш ауысымды оқытуды және апатты мектептерді болдырмауға мүмкіндік туады.Сондай-ақ облыста ағымдағы жылы құрылысы басталған 36 білім беру нысанының 10-ы пайдалануға берілді. Жыл соңына дейін тағы 5 мектептің құрылысы аяқталады деп күтілуде.Келер жылы 26 білім ошағының құрылысы бастау алады.Ақпарат көзі : https://www.gov.kz/memleket/entities/zhambyl/press/news/details/887637

Жамбыл облысының 85 жылдық мейтойы қарсаңында өңірдегі алғашқы медициналық-санитарлық көмек ұйымдарына 20 санитарлық автокөлік табысталды. Ағымдағы жыл соңына дейін тағы 13 бірлік қызметтік көлік беріледі деп күтілуде.Салтанатты шараға облыс әкімі Ербол Қарашөкеев қатысып, медицина қызметкерлерін құттықтап, саланың өркендеуіне жан-жақты қолдау көрсетіле беретінін айтты.Санитарлық жедел жәрдем көліктері Байзақ ауданына (2), Жамбыл (3), Жуалы (3), Қордай (2) Т.Рысқұлов (3), Меркі (2), Сарысу (3), Талас (3), Мойынқұм (3), Шу (3), Тараз қалалық көпбейінді ауруханасы және консультативтік диагностикалық орталығы мен облыстық медициналық орталықтарға 1 данадан табыс етілді.Облыста бекітілген нормативке сәйкес алғашқы медициналық-санитарлық көмек ұйымдарын санитарлық автокөлікпен қамтамасыз ету қажеттілігі 272 бірлікті құрайды. Аудандық медициналық ұйымдардың теңгерімінде 235 бірлік санитарлық автокөлік бар, оның 112 – сі 100% тозған. Осы мәселені ескере отырып, тозығы жеткен автокөліктерді кезең-кезеңімен жаңарту бағытында тиісті шаралар атқарылуда.Айта кетейік, биыл өңірдің медицина саласында ауқымды жобалар жүзеге асуда.Мәселен, өткен жылы 24 нысанның құрылысы жүргізіліп, оның 10-ы «Ауылда денсаулық сақтауды жаңғырту» Ұлттық жобасы аясында іске асты. 11 нысан күрделі жөндеуден өтті.Сондай-ақ биыл Ұлттық жоба аясында 3 медициналық-санитарлық нысан пайдалануға берілді.Ақпарат көзі : https://www.gov.kz/memleket/entities/zhambyl/press/news/details/887904

Жамбыл облысында аса көрнекті мемлекет және қоғам қайраткері Тұрар Рыcқұловтың 130 жылдығына орай «Ұлық тұлға» тақырыбында халықаралық ғылыми-тәжірибелік конференция өтті.Ауқымды шараға Жамбыл облысының әкімі Ербол Қарашөкеев, ҚР Президентінің кеңесшісі Мәлік Отарбаев, зиялы қауым өкілдері, шетелдік ғалымдар, ғылыми қызметкерлер, сондай-ақ оқытушылар мен студенттер қатысты.Іс-шараның шымылдығы Тұрар Рысқұловтың қайраткерлігі туралы бейнеүзікпен түрілді.Бұдан соң құрметті қонақтар президиумға жайғасып, жиынды бастады. Конференцияны ҚР Орталық мемлекеттік архивінің директоры, тарих ғылымдарының кандидаты Сәбит Шілдебай жүргізіп отырды.Басқосуда алғаш болып Президент кеңесшісі Мәлік Отарбаев сөз алып, Мемлекет басшысы Қасым-Жомарт Тоқаевтың құттықтау хатын оқып берді.– Тұрар Рысқұлов – мемлекеттілігімізді нығайтуға өлшеусіз үлес қосқан тарихи тұлға. Күрделі кезеңде ел игілігі үшін аянбай қызмет етіп, талай игі бастамаға ұйытқы болды. Нәубет жылдары халықты аштықтан құтқаруға атсалысты. Қазақтың біртуар перзенті еліміздің егемендігі, түркі жұртының азаттығы жолында табанды күрес жүргізді.Бауырлас халықтардың ынтымағы мен ұлт мүддесі үшін аянбай еңбек еткен тұлғаларды ұлықтау және сол арқылы өскелең жас ұрпақты отаншылдыққа тәрбиелеу – баршамызға ортақ міндет, — делінген Президенттің құттықтау хатында.Облыс әкімі қасиетті Әулиеата топырағында Тұрар Рысқұлов табанының ізі қалғанын жоғары бағалап, жамбылдықтар ұлт қайраткерімен мақтанатынын айтты. Ардақты азаматтың жасампаз идеялары мен жарқын істері бүгінге дейін ел игілігіне қызмет етіп келе жатқанына назар аударды.– Өткен ғасырдың халық үшін қиын кезеңдерге толы болғаны белгілі. Қилы заман өз батырларын, тұғырлы тұлғаларын қалыптастырды. Сол дәуірден түлеп ұшқан асыл перзенттің бірі, мемлекет және қоғам қайраткері Тұрар Рысқұлов болатын.Тұрар Рысқұлов есімінің ел тарихында алар орны ерекше. Оның қоғам өмірінде атқарған істері, күрескерлік рухы – көпке үлгі.Дана халқымыз «Өткенді білмей, келешекті болжау мүмкін емес» деген. Бұл ретте Тұрар Рысқұловтай қайраткердің ерлік істерін бүгінгі жас ұрпаққа таныту баршамыздың парызымыз деп санаймын.Өйткені, бүгінгі буын ел іргесінің берік болуына, халық бірлігінің сақталуына ықпал еткен ерен тұлғаларды білуге міндетті, – деп сөзін түйіндеген облыс әкімі Тұрар Рысқұловтың тарихтағы алар орнын айшықтауға бағытталған басқосуға қатысқан қонақтарға алғысын білдірді.Конференцияда зиялы қауым өкілдері мен тұрартанушылар келелі пікір мен ойлы ұсыныстарын мінберде тұрып жеткізді.– Рысқұлов – озық ойымен қыруар іс жасаған тарихта сирек кездесетін нағыз мемлекетшіл тұлға. Біз Тұрардың рухани мұрасын, оның шыққан биігі мен әлеуетін бағалап, насихаттауымыз керек. Ол туралы әлі айтылмаған ақиқат, жазылмаған дерек көп. Тұрар - болашақ ұрпақ үшін керек! – деп баяндамасын ұсынған белгілі экономист, қоғам қайраткері Оразалы Сәбден Тұрартану ғылыми-зерттеу институтын құру идеясын ұсынды.– Тұрар Рысқұлов – қазақ елінің ғана емес, түбі бір түркі халықтарының қайраткері, – деген Қырғыз Республикасы білім беру ісінің үздігі, тарих ғылымдарының кандидаты, профессор Доолотбек Сапаралиев түркі тұтастығын армандаған тұлғаның маңызды қадамдарын жіпке тізді.Қоғам қайраткері, тұрартанушы ғалым Мұхтар Қазыбек Тұрар Рысқұловтың өмір жолын төрт кезеңге бөліп қарап, оның ерік-жігері, ойлау жүйесі, батылдығы мен басқару стилі дәл қазіргі алмағайып заманда өзекті әрі қажетті екенін алға тартты. «Тұрардың асыл мұралары өміршеңдігін ешқашан жоғалтпайды», – деді ол.Сондай-ақ конференцияда М.Х. Дулати атындағы Тараз өңірлік университетінің Басқарма төрағасы - ректор Мұхтар Байжұманов, ақын, жазушы, тарих ғылымдарының кандидаты Сұраған Рахметұлы, журналист, тұрартанушы Мейрамхан Жәпек, тарих ғылымдарының кандидаты, профессор Сейдехан Бақторазов сөз сөйледіСтудент жастар спикерлердің тың деректерінен тағылым алып, Тұрар Рысқұловтың өнегелі өмір жолы, халқына, ұрпағына қалдырған мол мұрасына көз жүгіртті.Ақпарат көзі : https://www.gov.kz/memleket/entities/zhambyl/press/news/details/888176

Жамбыл мен Алматы облыстары бірлесе «Қыс-2024» республикалық командалық-штабтық оқу-жаттығуын өткізді.Оқу-жаттығу Қордай ауданы «Алматы-Ташкент-Термез» республикалық маңызы бар автожолдың 205 шақырымында (Қордай асуы) ұйымдастырылды.Шараға Жамбыл облысының әкімі Ербол Қарашөкеев, Алматы облысының әкімі Марат Сұлтанғазиев қатысты. Алдымен техникалардың жай-күйін тексеріп, бұдан соң жауыптылардың дайындық деңгейін бақылады.Командалық-штабтық оқу-жаттығу арнайы дайындалған сценарий бойынша жүргізілді.Оқу-жаттығу барында авариялық-құтқару және шұғыл жұмыстарды ұйымдастыру, адамдарды іздеу және құтқару, алғашқы медициналық көмек көрсету, қауіпті аймақтардан жылыту пункттеріне, жақын елді мекендер мен емдеу мекемелеріне эвакуациялау шаралары іс жүзінде тексерілді.Іс-шараға жергілікті атқарушы органдар, авариялық-құтқару қызметтері мен құрылымдары, азаматтық қорғау қызметтері, төтенше жағдайлар департаменті және оның бағынысты бөлімшелері, ҚР ТЖМ-нің «Апаттар медицинасы орталығы» мемлекеттік мекемесінің Жамбыл облыстық филиалы,Полиция департаментінің құрылымдық және бағынысты бөлімшелері атсалысты.Жамбыл мен Алматы облысынан барлығы 150 адам, 42 бірлік техника жұмылдырылды.Өз кезегінде қос өңірдің әкімі оқу-жаттығу жинына атсалысқан азаматтарға алғыс білдіріп, төтенше жағдайдың алдын алу, азаматтардың қауіпсіздігін қамтамасыз ету – басты мақсат екенін жеткізді.Айта кетейік, Жамбыл облысының барлық аудандарында қысқы кезеңдегі төтенше жағдайларды жоюға дайындық бойынша оқу-жаттығулар ұйымдастырылды. Оған 850-ден астам адам мен 200 техника тартылды.Ағымдағы жылдың 10 айында төтенше жағдайлар департаментінің аумақтық бөлімшелері жергілікті атқарушы орган және азаматтық қорғау құрылымдарымен бірлесіп 7 933 оқу-жаттығу өткізді.Облыс құтқарушылары 344 адамды құтқарып, 600 адамды эвакуациялады, зардап шеккен 47 адамға алғашқы медициналық көмек көрсетті.Ақпарат көзі : https://www.gov.kz/memleket/entities/zhambyl/press/news/details/888332

Солтүстік Қазақстан облысының делегациясы Қытайдың Шэньси провинциясында ресми сапармен болды. Бұл сапар Мемлекет басшысының Қытайға мемлекеттік сапары барысында қол қойылған СҚО мен Шэньси провинциясы арасында бауырлас қатынастарды орнату туралы келісімнің аясында өтті. Сапарды Бас консул Жошыхан Қыраубаев бастаған Қазақстан Республикасының Сиань қаласындағы Бас консулдығы ұйымдастырды. СҚО әкімі Ғауез Нұрмұхамбетов Шэньси провинциясының губернаторы Чжао Идэмен ресми кездесу өткізді. Жиында өзара серіктестікті дамыту мәселелерін талқылап, Солтүстік Қазақстан мен Шэньси провинциясы арасындағы ынтымақтастықты нығайту жөніндегі іс-шаралар жоспары мен "Чан-Ба" халықаралық портымен сауда байланысын кеңейту бойынша меморандум жасалды. Ресми және іскер делегация Сиань қаласындағы бірқатар өндірістік нысандарды аралады. Делегация сауда-логистикалық компания мен халықаралық порттың қызметімен танысты. Сонымен қатар, өңір басшысы Aiju компаниясының өндірістік кешенінің жұмысымен танысып, компания басшысы Цзя Хэй кездесу өткізді. Сонымен қатар, Сиань қаласында СҚО өнімдерінің орталығы ашылды. Aiju компаниясы СҚО-ның бұрынғы серіктесі, облыста майлы дақылдарды өңдейтін және ұн-тарту кешені кіретін үлкен агроөнеркәсіптік кластер құрды. Бұл компания облыс аумағында агропарк жасамақ, оның құрамына жел электр станциясы, ең өндеу зауыты, азық-түлік өндірісі мен логистикалық орталық кіреді. Бұл жобалар бойынша 93.5 млрд теңгеге меморандумдарға қол қойылды, оның ішінде 5.5 млрд.тг "Атамекен-Агро" мен "ФамСам" компаниясы арасында элеватор қондырғысын жасауға бағытталған контракт. Бөлек кездесуде облыс әкімі инвесторлармен жобаларды жүзеге асыру бойынша мәселелерді талқылады. Сапар барысында делегация Янлин қаласындағы Солтүстік-Батыс ауыл шаруашылығы және орман шаруашылығы университетінің заманауи жылыжайы және жетістіктерімен танысты. Ғауез Нұрмұхамбетов ссы университетте білім алып жатқан қазақстандық докторанттармен кездесті. Университетте ғылыми жобаларды зерттеп, әзірлейтін бірлескен қазақ-қытай мал шаруашылығы зертханасының ашылу салтанаты өтті.Ақпарат көзі : https://www.gov.kz/memleket/entities/sko/press/news/details/887828

20 қараша күні Маңғыстау облысының әкімі Нұрдәулет Қилыбай Қарақия ауданында тұрғындармен кездесу өткізіп, азаматтарды жеке мәселелері бойынша қабылдады.Жеке қабылдауға келген тұрғындардың басым бөлігі мұнай компанияларына жұмысқа орналасуға жәрдемдесуді сұрады. Оларға аудан аумағындағы шекара қызметі, өрт сөндіру бөлімі, полиция және басқа да мекемелерден бос жұмыс орындарын ұсынды. Алайда ұсынылған жұмыс орындарын қабылдамағандар болды, тек 3-4 азамат қана келісімін берді.Мұнайшы ауылынан бір топ азамат келіп, әкімнің қабылдауында өз өтініштерін жеткізді. Олар ауылға спорт зал салуды, Мұнайшы мен Жетібай елді мекендері арасындағы жолдың жарығын жақсартуды сұрады.Сонымен қатар, егін шаруашылығымен айналысуға ниетті тұрғындар су жеткізу мәселесіне жәрдемдесуді және мемлекеттік қолдау алу жолдары бойынша көмек көрсетуді өтінді.Айта кетейік, қабылдау барысында 150-ден астам азамат облыс әкіміне түрлі мәселелер бойынша жүгінді. Тұрғындар тұрғын үймен қамту, білім беру мен денсаулық сақтау салаларын дамыту, сондай-ақ қоқыс мәселесін шешу туралы өз өтініштерін айтты.Маңғыстау облысы әкімінің баспасөз қызметіАқпарат көзі : https://www.gov.kz/memleket/entities/mangystau/press/news/details/887503

Бүгін, 21 қараша күні Ақтауда «Қыс-2024» республикалық командалық-штабтық оқу-жаттығуы басталды. Оқу-жаттығудың саптық көрсетіліміне облыс әкімі Нұрдәулет Қилыбай қатысып, азаматтық қорғаудың мемлекеттік жүйесін басқару органдары мен күштерінің қысқы кезеңдегі төтенше жағдайлардың алдын алу және оларды жою жөніндегі іс-қимылдарға әзірлігімен танысты.21-22 қараша аралығында өтетін оқу-жаттығуға азаматтық қорғау қызметтерінің жеке құрамынан 1002 адам, 337 бірлік техника мен арнайы техника жұмылдырылды. Сонымен қатар, 2925 тонна тұз бен 4604 текшеметр құм қоры дайындалды.Оқу-жаттығу аясында қысқы кезеңде орын алуы ықтимал төтенше жағдайларға жылдам әрекет ету үшін жанар-жағармай, азық-түлік, дәрі-дәрмек, электр және дизель генераторлары, жылу зеңбіректері, құм-қиыршық, тұз қоспалары дайындыққа келтірілді.Облыстық және республикалық маңызы бар жолдарды күтіп ұстау мақсатында 152 бірлік техника мен 398 адам жұмылдырылды.Саптық көрсетілім барысында облыс әкімі Нұрдәулет Қилыбай азаматтық қорғау қызметтері мен техникалардың кез келген төтенше жағдайға дайын болуының маңыздылығын атап өтті. Сондай-ақ, халық қауіпсіздігін қамтамасыз етуге жауапты органдардың бірлескен жұмысы қажеттігін айтты.Маңғыстау облысы әкімінің баспасөз қызметіАқпарат көзі : https://www.gov.kz/memleket/entities/mangystau/press/news/details/887658

Бүгін Қостанай облысы әкімдігінің кезекті отырысы өтті, онда өңірдің әлеуметтік-экономикалық дамуының маңызды мәселелері қаралды. Облыс әкімі Құмар Ақсақалов аграршыларды қолдау, өнеркәсіпті дамыту, өрт қауіпсіздігін қамтамасыз ету және жылу беру маусымындағы тұрақтылық сияқты бірқатар өзекті тақырыптарды қозғады.Диқаншыларды қолдау және ауыл шаруашылығын дамытуОблыс әкімі агроөнеркәсіп кешенінің өңірдің экономикалық өсуінің басты қозғалтқыштарының бірі ретіндегі маңыздылығын атап өтті. Биыл ауыл шаруашылығын қаржыландыру үш есеге ұлғайды, ал келесі жылы 2,6 есеге ұлғайту жоспарлануда. АӨК-те қайта өңделген тауарлардың үлесін 70%-ке дейін ұлғайту мақсатында ауыл шаруашылығы өнімдерін қайта өңдеу басты міндеттердің бірі болып қала береді.«Ауыл шаруашылығы тиімді және орнықты болу үшін өңдеуді дамыту және түпкілікті өнім шығару қажет. Нәтижесінде қосымша құн артып, жаңа жұмыс орындары ашылатын болады», - деді Құмар Ақсақалов.Алдағы жылдары облыста сүт фермаларын, ет кешендерін және бидай өңдеу зауыттарын салуды қоса алғанда, 30-дан астам ірі жобаны іске асыру жоспарлануда. Ең ірі жобалардың бірі – глютен, крахмал және биоэтанол зауыты.Өнеркәсіпті дамыту және өндіріс көлемін ұлғайтуОтырыста қаралған екінші мәселе өңірдің өнеркәсіп жағдайына қатысты болды. Өңір басшысы атап өткендей, Қостанай облысында көптеген экономикалық көрсеткіштер бойынша оң динамика байқалады. Алайда, жеңіл автомобильдер өндірісі сияқты кейбір салаларда шамалы төмендеу тіркелді. Бұл шығындарды металлургия және ауылшаруашылық техникасы сияқты басқа салалардағы өндірісті ұлғайту арқылы өтеу маңызды.Атап айтқанда, тракторлар мен болат прокатының өндірісі ұлғайтылады, сондай-ақ шойын құю және автомобильдерге арналған шанақтарды шығару бойынша жаңа жобалар іске қосылады.Жылу беру маусымындағы өрт қауіпсіздігіТөтенше жағдайлар департаментінің бастығы Дамир Мақсұтұлы Ермағамбетов жылу беру маусымында өрт қаупінің жоғары болуына қатысты проблемалар туралы айтты. Биыл өңірде жылу беру жүйелерін пайдалану ережелерін бұзумен байланысты бірнеше қайғылы жағдай орын алды. «Биыл облыста бірнеше қайғылы жағдай тіркелді, жылыту жабдықтарының ақаулығы салдарынан балалар қаза тапты», — деді ол.Облыс әкімі жылу беру жүйелерінің жай-күйін және пештер мен түтін мұржаларын үнемі тексеріп, алдын алу шараларын жүргізуді қатаң бақылау қажеттігін атап өтті. Бұл мәселеде азаматтардың жауапкершілігі де маңызды, өйткені олар жылыту жабдықтарындағы кез келген ақаулар туралы уақтылы хабарлауға тиіс.Әкімдіктің кезекті отырысында ауыл шаруашылығы мен өнеркәсіпті дамытуға, сондай-ақ жылу беру кезеңінде қауіпсіздікті қамтамасыз етуге үлкен көңіл бөлінді. Құмар Ақсақалов мемлекеттік құрылымдар мен бизнестің бірлескен күш-жігері өңірдің экономикалық және әлеуметтік дамуында елеулі нәтижелерге қол жеткізуге ықпал ететінін атап өтті.Ақпарат көзі : https://www.gov.kz/memleket/entities/kostanay/press/news/details/887156

Бүгін Ауыл шаруашылығы қызметкерлері күніне орай, салада тынымсыз еңбек етіп жүрген азаматтар мемлекеттік наградалар мен құрмет грамоталарын иеленді. Озат еңбеккерлерге облыс әкімі Асхат Шахаров марапаттарды табыстады.Жиында алдымен сөз сөйлеген аймақ басшысы биыл өңірімізде су тасқыны болғанына қарамастан, егін бітік шығып, шаруалар жылды жақсы көрсеткіштермен аяқтап отырғанын жеткізді. Атап айтсақ, биыл облыста мал басының орташа өсімі 8 пайызға жетсе, диқандар гектарына 14 центнерден өнім алды. Осылайша өңір бойынша 600 мың тоннаға жуық астық жиналды.«Баршаңызды ауыл шаруашылығы қызметкерлерінің күнімен шын жүректен құттықтаймын! Сіздер облыстың ғана емес, еліміздің ауыл шаруашылығы саласына зор үлес қосып келесіздер. Кеше ғана өткен ауыл шаруашылығы еңбеккерлерінің бірінші форумында Мемлекет басшысы Қасым-Жомарт Кемелұлы: «Ауыл шаруашылығы бәсекеге қабілетті озық сала болуы керек. Агроөнеркәсіп кешені экономикадағы басты қозғаушы күштің біріне айналуға тиіс», – деп атап өтті. Сондықтан сіздердің адал еңбектеріңіздің арқасында өңір халқы азық-түлікпен қамтамасыз етіліп, еліміздің басқа да маңызды бағыттарында дамуға мүмкіндік алып келеді. Өздеріңізге белгілі, Мемлекет басшысы аталған форумда озық технологияларды кеңінен енгізу бойынша тиісті тапсырмалар берді. Жаңа технологиялар ауыл шаруашылығы дақылдарын егу және жинау кезінде шығындарды азайтуға мүмкіндік береді. Осы мақсатта бәріміз жұмыстарды жандандыруымыз керек. Сондай-ақ, Президенттің тапсырмасына сәйкес, Ұлттық аграрлық ғылыми-білім беру орталығының Ақтөбе филиалы базасында Қазақ жылқы шаруашылығы және жемшөп өндіру ғылыми-зерттеу институты құрылып отыр. Бұл бастама облыстағы асыл тұқымды жылқылардың сапасын одан әрі жақсартып, санын арттыруға зор серпін береді.Бүгінгі салтанатты жиында баршаңызды мерекемен құттықтай отырып, отбасыларыңызға амандық, дендеріңізге саулық, еңбекте толағай табыстар тілеймін!», — деді Асхат Шахаров.Бұдан кейін облыс әкімі өңірде еңбек етіп жүрген шаруа қожалықтарының басшылары мен жұмысшыларына мемлекеттік және Ауыл шаруашылығы министрлігінің ведомстволық наградаларын табыс етті. Атап айтсақ, ІІІ дәрежелі «Еңбек даңқы» орденімен Әйтеке би ауданы «Құмқұдық» ЖШС механизаторы Ерғали Малайдаров, Қарғалы ауданы «Степное» ЖШС малшысы Батырқан Төлеуов, Хромтау ауданы «Жантізер» шаруа қожалығының шопаны Қайрат Оразалин марапатталса, «Ерен еңбегі үшін» медалін Мәртөк ауданындағы «Айс» ЖШС сауыншысы Асылбек Ертілеуов пен облыстың бас фитопотологі Айнагүл Түлекбаева алды.Сондай-ақ бір топ азаматқа Ауыл шаруашылығы министрлігінің «Еңбек ардагері» медалі, «Ауыл шаруашылығы саласының үздігі» төсбелгісі және Құрмет грамотасы табысталды.Салтанатты жиын соңында облыстық ардагерлер кеңесінің төрағасы Серік Шаңғұтов сөз сөйлеп, өңірдің ауыл шаруашылығы саласын өркендетуге қосқан үлестері үшін жиналғандарға өз ризашылығын жеткізді.Ақпарат көзі : https://www.gov.kz/memleket/entities/aktobe/press/news/details/887634

Ақтөбе қаласының бірнеше нүктесінде қойылған модульдік пунктерді сатып алуға «Halyk» қоры қолдау көрсетті. «Бүгінде Үкімет басшысының тапсырмасына сәйкес, Ақтөбе қаласында «Jumystap» әлеуметтік жобасы іске асырылуда. Өңірде 14-35 жас аралығында 266 мыңнан астам адам бар. Маңызды бастама осы жастардың өмір сүру сапасын арттыру, жаңа табыс көздерін ашу және тұрақты еңбекпен қамтуға бағытталған. Жоба аясында қор қолдауымен Ақтөбе қаласындағы халық көп жиналатын орындарға бес модульдік пункт тегін орнатылып отыр», - деді Асхат Шахаров.Жоба аясында жастарға бос жұмыс орындарын табуға, жаңа дағдыларды меңгеруге және еңбек нарығында өзін сынап көруге көмектесу көзделуде. Сондай-ақ, жұмыссыздарды ғана емес, қосымша кәсіп меңгергісі келетін немесе жұмыс орнын ауыстыруға ниет білдірген кез-келген азаматты қолдауға бағытталған. Студенттер, жұмыссыздар, ресми тіркелген азаматтар және зейнеткерлік жасқа дейінгі адамдар да жобаға қатыса алады. Сонымен бірге, мемлекеттік қолдау шаралары, бизнес ашуға өтінім беру, тұрғын үй мен жер алу кезегіне қою секілді басқа да әлеуметтік мәселелер бойынша тегін кеңестер беру жоспарланған.Ең маңыздысы ниет білдірушілер қысқа уақытта жаңа мамандықты тегін меңгеріп шығады. Жергілікті әкімдік пен еңбек мобильдігі орталығының бірлескен жұмысы арқылы жоба тиімділігін арттырылмақ, ал жобаның операторы ретінде облыстық жастар ресурстық орталығы тағайындалды.«Бұл жоба арқылы халықтың табысын арттырып, олардың өмір сүру сапасын жақсарта алатынымызға сенеміз. «Halyk» қоры елдімекендердегі халықтың әл ауқатын дамытуға арналған әлеуметтік бастамаларды қолдап, білім, денсаулық сақтау және спорт салаларын дамытуға үлес қосуға әрқашан дайын. Осы жоба мемлекеттік ұйымдар мен жеке қорлардың қоғам игілігі үшін бірлесе жұмыс істей алатынының жарқын мысалы», - деді «Halyk» қорының директоры Сағынбек Шункеев.Айтып өтейік, Ақтөбе облысының әкімдігі «Halyk» қайырымдылық қорымен өңірдегі әлеуметтік және қайырымдылық жобаларды дамыту туралы меморандумға қол қойды. «JUMYSTAP» әлеуметтік жобасы – бірлескен жобалардың нәтижесі.Ақпарат көзі : https://www.gov.kz/memleket/entities/aktobe/press/news/details/888042

Өңір басшысымен кездесуге оқудағы жетістіктерімен ерекшеленген, маңызды шараларда белсенділік көрсеткен студенттерқатысты. Олардың арасында білім беру және қоғамдық саланың дамуына үлес қосқан түрлі олимпиадалардың, конкурстар мен бастамалардың жеңімпаздары болды. Диалог алаңы ретінде Қ. Жұбанов атындағы өңірлік университеттің кітапханасы таңдалды.Асхат Шахаров жастарға қол жеткізген жетістіктері үшін алғысын білдіріп, жастарды одан әрі қолдаудың маңыздылығын атап өтті.«Сіздер – табандылық пен көшбасшылықтың үлгісісіз. Жетістіктеріңіз басқаларға үлгі, қажырлы еңбек пен білімге ұмтылу нәтиже беретінін дәлелдеп келесіздер», - деп атап өтті өңір басшысы.Кездесуде Президент ұсынған негізгі идеологиялық тұжырымдар, сондай-ақ қоғамның одан әрі дамуына негіз болатын жалпыға ортақ құндылықтар талқыланды. Сонымен қоса, оқу жағдайларын жақсартуға, талантты жастарды қолдауға, студенттерді әлеуметтік және еріктілер жобаларына тартуға қатысты мәселелер көтерілді. Қатысушылар өзін-өзі дамытудың жаңа мүмкіндіктерін ашубойынша өз идеялары мен ұсыныстарымен бөлісті.Басқосуға қатысушылар қоғамның негізгі проблемалары: нашақорлық, лудомания, вандализм және жастар арасындағы қылмыспен күресу мәселелерін талқыға салды. Әкім залда отырған жастарға арнаған сөзінде алға қойылған міндеттерді шешу үшін бірлескен күш-жігер қажет деді. Ол бүгін осы қиындықтарды жеңе отырып, ертең жарқын және табысты болашаққа қол жеткізуге болатындығын жеткізді.«Ұлттық құрылтайда сөйлеген сөзінде Мемлекет басшысы жастарға қатысты осы өзекті мәселелерге назар аударды. Бүгінгі таңда қоғамда лудомания, есірткі, вандализм сияқты жағымсыз құбылыстар кеңінен таралғанын мойындауымыз керек. Өкінішке орай, жастар арасында құқықбұзушылықтар жиі кездеседі. Біз мұндай кездесулерді көрсету үшін емес, тиімді өткізуге міндеттіміз. Осы мәселелерді көтеріп, оларды шешудің бірлескен жолдарын іздеуіміз керек. Өңірде халықтың 30 пайызы – жастар. Әсіресе, жастарды жұмыспен қамту мәселелеріне, ауыл жастарының проблемаларына көңіл бөлу аса қажет. Бұл кездесу маңызды және келесі жылға арналған жоспарларды айқындайды. Біз нақты стратегиялар құрып, нақты шешімдер әзірлеуіміз керек», - деді әкім кездесу барысында.Асхат Шахаров бүгінде облыста жас ұрпаққа даму үшін көптеген мүмкіндіктер жасалғанын атап өтті: коворкинг-орталықтар жұмыс істейді, гранттық қолдау бағдарламалары әзірленді, оқыту тренингтері мен шеберлік сыныптары өткізілуде. Әкім жастарды белсенді әрі сенімді, өз идеяларын ұсынудан қорықпауға және өз мақсаттарына берік болуға шақырды.«Біздің аймақтың болашағы – өздеріңізгебайланысты. Бойларыңыздағы талант, энергия және ұмтылыстарыңыз өңіріміздің өсіп-өркендеуіне сеп. Біз әрқашан қолдауға дайынбыз», - деп сендірді облыс әкімі.Ақпарат көзі : https://www.gov.kz/memleket/entities/aktobe/press/news/details/888165

Бүгін, Ақтөбе қаласында Қ.Жұбанов атындағы Ақтөбе өңірлік университетінің «Мәңгілік Ел» залында «Таза Қазақстан» республикалық бағдарламасы аясында жастар арасында «Өзіңнен баста» («Начни с себя») тақырыбында дөңгелек үстел өтті.Шараға студенттер, жастар қоғамдық ұйымдарының өкілдері, азаматтық қозғалыс көшбасшылары қатысты.Диалог алаңына белсенді ақтөбеліктер шақырылып, өздерінің өмірлік тәжірибелерімен бөлісті. Оның бірі - кәсіпкер, қоғам қайраткері Қайыржан Таңатаров. Ол жастарға қоршаған ортаны, табиғатты қорғауға үлес қосуға кеңес берді: «Биылдың өзінде «Таза Қазақстан» акциясы аясында көктем-күз айларында мүдделестермен жүздеген қарағай отырғызып, қаламыздың сәнін келтірдік. Сіздер де айналаңыздың күн сайын тазарып келе жатқанын байқайсыздар. Ақтөбеліктер өз аумақтарын тазалап, сыпырып, жинап, абаттандырумен айналысып, кіші отанның жасыл қорын толықтыруда. Біз бәріміз бірге экологиялық тепе-теңдікті сақтай аламыз».,«Жасыл ел» облыстық штабының төрағасы Нұржан Шаңғытбаев жастар арасында экомәдениетті қалыптастырудың, қоршаған ортаға қамқорлық құндылықтарын насихаттаудың маңыздылығын атап өтті.«Таза Қазақстан» аясында біз жастарды патриоттық бастамаға тарта отырып, облыстың қалалары мен ауылдарын абаттандыру бойынша көптеген іс-шаралар өткіздік. «Таза қала – таза жағалау», «Туған қалаңа ағаш сыйла», «Менің атаулы ағашым», «Бұлақ көрсең, көзін аш!», «Ардагерлерді ардақтайық!», «Jasyl cross-2024» және басқа экологиялық акциялар ұйымдастырылды. Мыңдаған жастар осындай маңызды және ауқымды челленджді қолдады. Біз аумақтарды тазалап, абаттандырып қана қоймай, басқаларға туған жерге деген сүйіспеншіліктің үлгісін көрсеттік», - деді ол.Басқа экобелсенділер де сөз сөйледі, балалар атқарылған жұмыстар туралы айтты.Кездесу соңында барлық қатысушылар келесі жылы да осындай жұмыс жалғасатынына сенім білдірді: жаңа жасыл аймақтар пайда болады, аулалар мен көшелер абаттандырылады.Дөңгелек үстел барысында тұрақты экологиялық акциялар мен ағартушылық жобаларды қоса алғанда, одан әрі жұмыстың негізгі бағыттары айқындалды.Ақпарат көзі : https://www.gov.kz/memleket/entities/aktobe/press/news/details/888452

Абай облысына жұмыс сапары барысында Сауда және интеграция вице-министрі Қайрат Төребаев жергілікті бизнес өкілдерімен кездесу өткізді. Кездесу барысында вице-министр министрліктің негізгі қызмет бағыттарын, оның ішінде ішкі және сыртқы сауданы дамыту, шикізаттық емес экспортты ілгерілету, техникалық реттеу, метрология және тұтынушылардың құқықтарын қорғау мәселелерін түсіндірді.«Министрліктің басты міндеттерінің бірі – қазақстандық өнімдерді халықаралық нарықтарға экспорттауды дамыту. Президент 2025 жылға дейін шикізаттық емес экспорт көлемін 41 млрд долларға жеткізу міндетін қойды. 2023 жылдың қорытындысы бойынша бұл көрсеткіш 35,6 млрд долларды құрап, жоспарланған көлемнен 2,3%-ға артық болды», – деп атап өтті Қайрат Төребаев.Бүгінде қазақстандық өнімдердің экспорты 135-тен астам елді қамтиды және бұл тауар ағынын арттырудың маңызды драйвері болып табылады. Қазіргі уақытта перспективалы бағыттар ретінде БАӘ (Дубай), Катар (Доха), Вьетнам (Нячанг), Қытай (Сиань), Иран (Тегеран) белгіленген.Министрлік экспортты дамыту және ілгерілету үшін операторларды анықтады. Алдыңғы қатарлы елдердің тәжірибесі бойынша, қазақстандық экспорттаушылар Экспорттық-несиелік агенттік арқылы қолдаудың кең ауқымын, оның ішінде сақтандыру және қаржылық шараларды ала алады. Сонымен қатар, QazTrade аясында экспорттаушыларға арналған 20-дан астам қолдау құралын қамтитын сервистік қолдау шоғырландырылған. Қайрат Төребаевтың айтуынша, бұл құралдардың ішінде көлік және маркетинг шығындарының, сондай-ақ шетелдегі көрмелер мен форумдарға қатысу шығындарының бір бөлігін өтеу қарастырылған.Соңғы үш жылдағы орташа жылдық қолдау көлемі 2,3 млрд теңгені құрады. 2020 жылдан бастап іске асырылып келе жатқан экспорттық акселерация бағдарламасы шағын және орта бизнеске жаңа өткізу нарықтарына шығуға тиімді көмек көрсетуде.Кездесу барысында аймақ бизнес өкілдерін толғандыратын әлеуметтік маңызы бар тауарлар бағасын реттеу, тұтынушылардың құқықтарын қорғау, экспорт және басқа да өзекті мәселелер талқыланды.«Қаражыра» АҚ бас директоры Ильяр Низаманов көмір экспортын жүзеге асыру мәселелерін талқылау үшін диалог алаңын құруды ұсынды. Вице-министр бұл мәселені Сауда және интеграция министрлігінің жедел экспорт штабының отырысында салалық министрліктер, бизнес, қауымдастықтар және «ҚТЖ» АҚ өкілдерінің қатысуымен қарауға болатынын атап өтті.Сапар аясында вице-министр сондай-ақ экспорттық әлеуеті жоғары аймақтың ірі кәсіпорындарына барды.Алғашқы нысан ретінде «Qazaq Astyq Group» ЖШС-ға барды. Бұл – күнбағыс тұқымын тәулігіне 1200 тоннаға дейін өңдейтін Қазақстандағы ең ірі кәсіпорын. Компанияның өнімдері Қазақстанның ішкі нарығында сатылады, сондай-ақ Қытайға, Еуропа мен Орталық Азия елдеріне экспортталады.Кейін вице-министр қаптама материалдарын өндіру бойынша жетекші кәсіпорын – «Казполиграф» өндірісіне барды. Бұл кәсіпорын өнімдерін Ресей, Қырғызстан және Өзбекстан елдеріне экспорттайды.Жұмыс сапары барысында аймақ кәсіпкерлерінің негізгі мәселелері анықталып, оларды мемлекеттік органдармен бірлесіп шешудің келесі қадамдары белгіленді.Ақпарат көзі : https://www.gov.kz/memleket/entities/mti/press/news/details/887275