Қазақстан тұрақты даму мақсаттарын қолдап KazAID агенттігінің әлеуетін арттыруда

2025 жылғы 30 маусым мен 2 шілде аралығында Севилья қаласында (Испания Корольдігі) өткен БҰҰ-ның Тұрақты даму мақсаттарын қаржыландыру жөніндегі IV халықаралық конференциясында Қазақстан атынан сөз сөйлеген ҚР Премьер-Министрінің орынбасары – Ұлттық экономика министрі Серік Жұманғарин мәлімдеме жасады.

«Мемлекеттік шығындарды қысқарту бойынша әлемдік үрдіске қарамастан, Қазақстан тұрақты даму мақсаттарына қол жеткізуге бағытталған негізгі бағыттарды – денсаулық сақтау, білім беру, инфрақұрылым және кедейлікпен күрес – қаржыландыруды жалғастырады. Біз KazAID – Қазақстанның халықаралық даму агенттігінің әлеуетін жаһандық қаржыландыру жүйесінің бір бөлігі ретінде арттыруды жалғастырамыз», – деді Серік Жұманғарин.

Конференция қорытындысы бойынша тұрақты қаржыландырудың жаңа архитектурасын қалыптастыруға бағытталған маңызды құжат – Севилья міндеттемесі қабылданды. Қазақстан бұл құжатты қолдап, халықаралық серіктестермен ашық диалогқа дайын екенін растады.

Дереккөз: https://www.gov.kz/memleket/entities/economy/press/news/details/1027797

Ақпарат көзі : https://www.gov.kz/memleket/entities/kazaid/press/news/details/1031072?lang=kk