Брюссель, 2026 жылғы 20 ақпан – Қазақстан Республикасының Бельгиядағы Елшісі Роман Василенко Лилль католик университетінің студенттерімен кездесу өткізді.

Ашық диалог барысында Елші ел дамуының негізгі бағыттарын, Бельгиямен, Люксембургпен және Еуропалық Одақпен ынтымақтастықтың басымдықтарын таныстырып, саяси және әлеуметтік-экономикалық салалардағы ағымдағы реформалар туралы баяндады.

Жаңартылған Конституция мен 15 наурызға жоспарланған республикалық референдумға ерекше назар аударылды. Елші конституциялық өзгерістер мемлекеттік басқарудың неғұрлым теңгерімді моделін қалыптастыруға, Парламенттің рөлін күшейтуге, тежемелік әрі тепе-теңдік тетіктерін дамытуға және адам құқықтарының кепілдіктерін кеңейтуге бағытталғанын атап өтті.

«Жаңа конституциялық модель – неғұрлым ашық, есеп беретін және әділетті мемлекет құруға бағытталған саналы қадам. 15 наурыздағы алдағы референдум институционалдық трансформацияны жалғастыру мен демократиялық қағидаттарды нығайтудың маңызды кезеңіне айналады», – деді Елші.

Студенттердің ең үлкен қызығушылығын цифрландыру және жасанды интеллектті дамыту, білім беру мүмкіндіктері, тіл және дін саясаты, елдің тарихи мұрасы мен соңғы әлеуметтік-экономикалық реформалар мәселелері тудырды. Пікірталас жандылы әрі интерактивті форматта өтті. Қатысушылар сондай-ақ Қазақстан Президенті Қ. Тоқаевтың америкалық The National Interest басылымында жарияланған жуырдағы мақаласын, Қазақстанның халықаралық аренадағы ұстанымын және академиялық ынтымақтастықты дамыту мәселелерін талқылады.

Кездесу қорытындысы бойынша тараптар диалогты жалғастыруға және білім беру мен жастар алмасуларын кеңейтуге қызығушылық білдірді.

Ақпарат көзі : https://www.gov.kz/memleket/entities/mfa-brussels/press/news/details/1166639?lang=kk