Әл-Кувейт, 2026 жылғы 6 тамыз – Қазақстан Республикасының Кувейт Мемлекетіндегі Елшісі Ержан Елекеев Кувейт Мемлекетінің Сауда және өнеркәсіп министрі Осама Будаимен кездесу өткізді.

Кездесу барысында тараптар екіжақты сауда-экономикалық және инвестициялық ынтымақтастықтың қазіргі жай-күйі мен оны одан әрі дамыту перспективаларын, сондай-ақ өзара іс-қимылды кеңейтуге бағытталған нақты практикалық шараларды талқылады.

Қазақстан тарапы еліміздің әлеуметтік-экономикалық дамуының өзекті көрсеткіштерін таныстырды. 2025 жылдың қорытындысы бойынша Қазақстанның жалпы ішкі өнімі 6,5%-ға өсті. Экономиканың одан әрі өсуіне, экспорттық әлеуетті кеңейтуге және халықаралық азық-түлік қауіпсіздігін нығайтуға елеулі үлес қоса алатын агроөнеркәсіптік кешенді дамыту мәселесіне ерекше назар аударылды. Елші Қазақстанның әлемдегі бидай экспорттаушы жетекші он елдің қатарына және күнбағыс майын экспорттаушы алты ірі мемлекеттің қатарына кіретінін атап өтті.

Қазақстандық дипломат Қазақстанның Кувейт үшін сенімді азық-түлік дәлізін қалыптастыруға және жоғары сапалы ауыл шаруашылығы мен азық-түлік өнімдерін ұзақ мерзімді негізде жеткізуге дайын екенін атап өтті.

Тараптар сондай-ақ «Солтүстік-Оңтүстік» халықаралық көлік дәлізін Парсы шығанағы елдерінде салынып жатқан теміржол инфрақұрылымымен түйістіру перспективаларын талқылады. Бұл болашақта Орталық Азия мен Таяу Шығыс арасындағы жаңа көлік-логистикалық бағыттарды қалыптастыруға мүмкіндік береді.

Министр Осама Будаи Кувейттің Қазақстанмен, әсіресе азық-түлік қауіпсіздігі мен ауыл шаруашылығы өнімдерін жеткізу салаларындағы ынтымақтастықты одан әрі дамытуға мүдделі екенін растады.

Кувейт тарапы сондай-ақ негізгі азық-түлік тауарларының ұзақ мерзімді қорын қалыптастыруға және жеткізу тізбектерінің тұрақтылығын қамтамасыз етуге мүмкіндік беретін стратегиялық қоймалар құруға қызығушылық танытатынын жеткізді.

Кездесу қорытындысы бойынша Кувейт тарапына қазақстандық ауыл шаруашылығы өнімдерінің басым түрлерінің, оның ішінде бидай, арпа, күнбағыс майы және өзге де экспорттық әлеуеті жоғары өнімдердің үлгілерін жіберу туралы уағдаластыққа қол жеткізілді. Оларды қарағаннан кейін тараптар жеткізу шарттарын келісу және тиісті коммерциялық келісімдер жасасу бойынша келіссөздерді жалғастырады.

Тараптар сондай-ақ Қазақстанның ет өнімдерін Кувейтке жеткізу бағытында қол жеткізілген уағдаластықтарды оң бағалап, жеткізілетін өнім түрлерін кеңейту және жаңа практикалық келісімдерге қол жеткізуге үміт білдірді.

Кездесу соңында тараптар екіжақты сауданы дамыту, азық-түлік қауіпсіздігін нығайту және Қазақстан мен Кувейт арасындағы инвестициялық ынтымақтастықты кеңейту бағытындағы бірлескен жұмысты жалғастыруға өзара дайын екендіктерін растады.

Ақпарат көзі : https://www.gov.kz/memleket/entities/mfa-kuveyt/press/news/details/1270033?lang=ru