Бангкок, 2026 жылғы 14 тамыз – Қазақстан Республикасының Таиланд Корольдігіндегі Елшісі Марғұлан Баймұханның Таиландтың Сайлау комиссиясының мүшесі Ситтичоти Интарависетпен кездесуі өтті.

Кездесу барысында Елші Таиланд тарапын Қазақстандағы конституциялық және саяси жаңғыртудың негізгі бағыттарымен, оның ішінде заң шығару процесін оңтайландыруға және мемлекеттік басқару тиімділігін арттыруға бағытталған қос палаталы Парламенттен бір палаталы Құрылтайға көшу реформасымен таныстырды.

Ерекше назар 2026 жылғы 23 тамызға жоспарланған Қазақстан Республикасы Құрылтайы депутаттарының сайлауына аударылды. Жаңа Конституцияға сәйкес Құрылтай 145 депутаттан тұрады, олар бес жыл мерзімге бірыңғай жалпыұлттық сайлау округі бойынша партиялық тізімдер негізінде сайланады. Сайлауға жеті саяси партия қатысады.

Елші сондай-ақ Қазақстанның сайлау жүйесінің ерекшеліктерін таныстырды. Ел халқының саны шамамен 20,6 млн адамды, ал тіркелген сайлаушылар саны 12,6 млн адамды құрайды. Сайлаушылар тізімдерін өзектендіруге және азаматтарға сайлаушылар тізіміндегі өз деректерін тексеруге мүмкіндік беретін «Сайлау» ақпараттық жүйесін қолдануға ерекше назар аударылды.

Сонымен қатар, Елші Қазақстанның негізгі әлеуметтік-экономикалық көрсеткіштерімен таныстырды. Тәуелсіздік жылдары ел экономикасына шамамен 470 млрд АҚШ доллары көлемінде тікелей шетелдік инвестициялар тартылды. 2025 жылдың қорытындысы бойынша Қазақстан экономикасы 6,5%-ға өсіп, ЖІӨ 305 млрд АҚШ долларына жетті, жан басына шаққандағы ЖІӨ 15 мың АҚШ долларынан асты, ал жұмыссыздық деңгейі 4,6% болды.

Қазақстан-Таиланд байланыстарының дамуына да ерекше назар аударылды. 2025 жылы екіжақты тауар айналымы 255,1 млн АҚШ долларын құрап, шамамен 8%-ға өсті. 2025 жылы Таиландқа шамамен 200 мың Қазақстан азаматы барды. Екі ел арасындағы әуе қатынасы аптасына 23 тұрақты тікелей рейсті, ал чартерлік рейстерді қоса алғанда 35 рейске дейін қамтиды.

Өз кезегінде, Ситтичоти Интарависет Қазақстан тарапын Таиландтың сайлау жүйесінің ерекшеліктерімен таныстырып, екі елдің сайлау комиссиялары арасындағы өзара тиімді ынтымақтастық пен тәжірибе алмасуды одан әрі дамыту перспективалары жөніндегі өз пікірін білдірді.

Тараптар сайлау процесін ұйымдастыру, сайлау институттарын жетілдіру, саяси жаңғырту және мемлекеттік басқару салаларында кәсіби диалогты жалғастыруға, практикалық тәжірибе алмасуға және ынтымақтастықты дамытуға мүдделілік танытты.

Ақпарат көзі : https://www.gov.kz/memleket/entities/mfa-thailand/press/news/details/1274767?lang=ru