Сот шешімімен ер адам кінәлі деп танылып, бір жыл мерзімге бас бостандығын шектеу жазасына сотталды. Сот үкімі заңды күшіне енгеннен кейін сотталған азамат Семей қаласының Затон аудандық пробация қызметіне есепке қойылды.

        Есепке қою барысында сотталған азаматқа жазаны өтеу тәртібі мен шарттары, сондай-ақ сот белгілеген шектеулерді бұзудың салдары жан-жақты түсіндірілді. Жүргізілген профилактикалық жұмыстарға қарамастан, сотталған азамат пробациялық бақылау талаптарын бірнеше рет бұзған: міндетті тіркеуге келмеген және тиісті рұқсатсыз түнгі уақытта тұрғылықты жерін тастап кеткен.

        Жүйелі түрде орын алған бұзушылықтарға байланысты сот бас бостандығын шектеу түріндегі жазаның өтелмеген бөлігін жеті ай мерзімге бас бостандығынан айыру жазасына ауыстыру туралы шешім қабылдады.

          — Мен өзімнің жауапсыз қарым-қатынасымның салдарын енді ғана түсіндім. Қазір ұлым 15 жаста. Осы уақыт ішінде мен оның өміріне іс жүзінде араласпадым және әке ретінде оған тиісті деңгейде көмектеспедім. Бұрын төлемдерді кейінге қалдыруға, жауапкершіліктен жалтаруға болады деп ойлайтынмын. Алайда уақыт өте келе жоғалтқан жылдардың қайтып келмейтінін түсіне бастадым. Ең қиыны — баламның менің қолдауымсыз ер жеткенін түсіну. Бүгінде алименттің жай ғана ақша емес, өз балаңның болашағына деген қамқорлық екенін түсіндім. Өз әрекеттеріме қатты өкінемін және қателіктерімді түзеткім келеді, — деді сотталған азамат.

        — Сотталған азаматқа қоғамнан оқшауланбай, өз мінез-құлқын түзетуге бірнеше рет мүмкіндік берілді. Бас бостандығын шектеу — адамның қоғамда қалуына, жұмысын сақтап қалуына, жақындарымен қарым-қатынасын жалғастыруына және заң талаптарын сақтау арқылы өзінің түзелгенін дәлелдеуге берілетін мүмкіндік. Алайда сотталған азамат белгіленген шектеулерді жүйелі түрде бұзып, пробация қызметінің талаптарын елемеді. Қызметкерлер оған бірнеше рет орын алуы мүмкін салдарлар туралы ескерткен, алайда ол тиісті қорытынды шығармады. Мұндай жағдайларда сот жазаны неғұрлым қатаң жаза түріне ауыстыру туралы шешім қабылдайды. Ата-аналық міндеттерін орындаудан жалтару, сондай-ақ жазаны өтеу тәртібін бұзу заңнамада көзделген жауапкершілікке әкеп соғады, — деп атап өтті Семей қаласы Затон ауданы пробация қызметі бөлімінің бастығы Ерик Усербаев.