ҚР Парламент Мәжілісі «Еуропалық қайта құру және даму банкін құру туралы келісімнің 1-бабына Сахараның оңтүстігіндегі Африка елдері мен Иракқа банктің операцияларын географиялық қамтуды шектеулі және біртіндеп кеңейтуді жүзеге асыруға мүмкіндік беретін түзетулерді ратификациялау туралы» Заң жобасын мақұлдады.Еуропалық қайта құру және даму банкі (ЕҚДБ, Банк) – өтпелі экономикасы бар елдерді қолдау мен дамытуға бағытталған халықаралық қаржы ұйымы.Банк Сахараның оңтүстігіндегі Африка елдері мен Ирак мемлекетіне операцияларды кеңейту бойынша ұсынысты жеткізді.ЕҚДБ қызметінің кеңеюі (жаңа елдерге) банктің қазіргі операцияларның қарқынын төмендетпейді, сондай-ақ оның міндеттемелері мен тұрақтылығына әсері жоқ.Африка мен Жерорта теңізі қарқынды дамып келе жатқан аймақтардың бірі, сол секілді ЕҚДБ-ның осы елдермен тығыз экономикалық байланыстары бар екенін ескерсек, банктің бұл бастамасы экономикалық тұрғыдан негізделген және оның стратегиялық мақсаттарына сәйкес келіп отыр.Аталған түзетулер Басқарушылар кеңесімен 2023 жылы мақұлданған болатын.Ақпарат көзі : https://www.gov.kz/memleket/entities/minfin/press/news/details/887713

ҚР Парламент Мәжілісі «Қарапайым операцияларға жарғылық капиталды шектеуді жою мақсатында Еуропалық қайта құру және даму банкін құру туралы келісімнің 12-бабының 1-тармағына түзетулерді ратификациялау туралы» Заң жобасын мақұлдады.Еуропалық қайта құру және даму банкі (ЕҚДБ, Банк) – экономикасы өтпелі елдерге қолдау көрсету мен дамытуды көздейтін халықаралық қаржы ұйымы.ЕҚДБ жедел шешімдер қабылдау мен өзінің кредиттік қызметін жоспарлау үшін Басқарушылар кеңесінен Директорлар кеңесінің деңгейіне капиталдың жеткіліктігі жөніндегі нормативтердің тиісті деңгейін белгілеу бойынша өкілеттіктерді беруге бастама көтерді.Бұл өзгеріс банк капиталын пайдаланудың тиімділігі мен икемділігін арттырады.Аталған түзетулер 2023 жылы Басқарушылар кеңесімен мақұлданған болатын. Ақпарат көзі : https://www.gov.kz/memleket/entities/minfin/press/news/details/887757

ҚР Парламент Сенатында Қаржы министрі Мәди Такиев «2025-2027 жылдарға арналған республикалық бюджет туралы» заң жобасын таныстырды. Оны талқылау барысында өңірлердегі инфрақұрылымды дамытуға қатысты түзетулер енгізілді. Сенаторлар ұсынған түзетулерге байланысты аталған реформаны Мәжіліске қайтару туралы шешім қабылданды.Құжат еліміздің 2029 жылға дейінгі әлеуметтік-экономикалық даму болжамы негізінде әзірленді. 2025 жылы түсімдер биылғы жоспармен салыстырғанда 1,2 трлн теңгеге ұлғайып, 21,7 трлн теңгеге артады. 2027 жылға қарай тапшылық ІЖ-ге шаққанда 1,9% дейін төмендейді.2025 жылға арналған түсімдер мен тапшылықты ескере отырып, бюджет шығыстары былтырғы кезеңмен салыстырғанда 1,7 трлн теңгеге ұлғайып, 25,8 трлн теңге көлемінде болады деп жоспарланып отыр.«Заң жобасын талқылау кезінде Парламент Сенатында бірқатар түзету енгізілді. Таза ауыз сумен қамтамасыз етуге, газбен жабдықтау, жылу мен электр энергетикасы, көлік инфрақұрылымы, ИКИ жүйесі мен өңірлерді дамытуға, сондай-ақ «Ауыл – ел бесігі» жобасын іске асыруға қосымша шығыстар қарастырылған. Бюджет әлеуметтік бағдарланған күйінде қалып отыр. Әлеуметтік салаға 2025 жылы биылғы кезеңге қарағанда 871 млрд теңге өсіммен 9,8 трлн теңге бөлу жоспарланған. 2025 жылы шығыстардың жалпы көлеміндегі үлесі 38% мөлшерінде болады», деді Мәди Төкешұлы.Мәселен, әлеуметтік төлемдерді индекстеу мен төлем алушылар контингентін ұлғайтуды ескере отырып, азаматтарды әлеуметтік қамсыздандыруға және әлеуметтік көмек көрсетуге 6 трлн теңге сомасында ақша бөлу көзделіп отыр.2025 жылы білім беру бағытына 1 трлн теңгеден аса сома жұмсалмақ.2025-2027 жылдары денсаулық сақтау саласына арналған шығындар 7,6 трлн теңгеге артып, оның ішінде 2025 жылы – 2,5 трлн теңге, 2024 жылғы өсімге қарағанда 188 млрд теңгеге ұлғаяды. Тұтастай алғанда, ТМККК шығыстарының көлемі 2025 жылы 1,6 трлн теңге сомасында жоспарлануда. МӘМС-ке 675 млрд теңге қарастырылған, оның ішінде мемлекет жарналарын төлеуге 668 млрд теңге.2025 жылы туризм мен спортты дамытуға республикалық бюджеттен 141 млрд теңге, ал мәдениет пен ақпарат саласына 165 млрд теңге көлемінде қаражат қарастырылмақ.Келесі жылы өңірлерді қолдауға республикалық бюджет есебінен 7,5 трлн теңге бөлінеді.Сонымен қатар 2025 жылы көлік саласын дамытуға 568 млрд теңге аудару көзделіп отыр.Су ресурстарын тиімді басқару бойынша 2024 жылмен салыстырғанда 53 млрд теңгеге немесе 61% өсіммен 139 млрд теңге бөлінетін болады.2025 жылы күштік құрылымдардың шығыстары 2,7 трлн теңге болады. Осы арқылы еліміздің қорғаныс қабілеті мен қауіпсіздігін қамтамасыз етуге, құқықтық тәртіпті қорғау және ішкі тұрақтылықты қолдау жөніндегі іс-шараларға толық көлемде қажетті сома қарастырылады.«Сенатта көптеген негізгі бағыт бойынша қосымша қаражатты бөлуді қарастыратын түзетулер кешені қабылданды. Ақшаның үлкен көлемі әлеуметтік салаға, өңірлерді біркелкі дамытуға және бизнесті ілгерілетуге арналған. Айталық, келесі жылы экономиканың нақты секторын қолдауға 2,1 трлн теңге бөлінеді. Оның ішінде Мемлекет басшысының тапсырмасына сәйкес агроөнеркәсіптік кешенді дамытуға айрықша ден қойылып отыр. Бұл бағытқа 2025 жылы биылғы кезеңмен салыстырғанда 30% өсіммен 635 млрд теңге қарастырылған. Әлеуметтік салаға арналған ақша сомасы шығыстардың басым бөлігін құрайтынын атап өткім келеді. Денсаулық сақтау, білім беру ісі және азаматтарды қолдауға қосымша қаражат бөлінді», - деп түйіндеді М.Такиев. Ақпарат көзі : https://www.gov.kz/memleket/entities/minfin/press/news/details/887948

Астана, 2024 жылғы 21 қараша – Қазақстан Республикасы Сыртқы істер министрінің орынбасары Роман Василенко Солтүстік Македонияның Елшісі Сали Лиманиді еліміздегі дипломатиялық миссиясының аяқталуына байланысты қабылдады.Қазақстандық дипломат С. Лиманиге ҚР Премьер-Министрінің орынбасары – Сыртқы істер министрі Мұрат Нұртілеудің атынан алғыс грамотасын табыстап, Солтүстік Македония Елшісінің Қазақстандағы қызметі барысында екіжақты саяси және сауда-экономикалық байланыстарды дамытуға қосқан елеулі үлесін атап өтті. 88 жылдық тарихы бар «Alkaloid» танымал фармацевтикалық компанияның Қазақстан нарығына кіруі және Солтүстік Македония делегациясының Астанадағы Дүниежүзілік көшпенділер ойындарына қатысуы ерекше аталып өтті.Сұхбаттастар екіжақты қарым-қатынастарға екі ел басшылары Қасым-Жомарт Тоқаев пен Гордана Силяновска-Давкованың COP29 шеңберінде Бакуде өткен кездесуінің маңызды серпін бергенін, сондай-ақ келесі жылы Солтүстік Македония басшысына Қазақстанға сапармен келу шақыруын атап өтті. Биыл Солтүстік Македонияда ашылған ҚР Елшілігінің екіжақты ынтымақтастықтың әрі қарай тереңдеуіне ықпал ететініне сенім білдірілді.Кездесудің соңында Р. Василенко С. Лиманиге алдағы қызметіне сәттілік тіледі.Өз кезегінде Астанада төрт жыл тиімді еңбек еткен Солтүстік Македония Елшісі Қазақстан тарапына жылы қабылдау үшін алғыс білдіріп, екі ел арасындағы ынтымақтастықтың жалғасуына үміт артты.Анықтама: 2024 жылдың қаңтар-қыркүйек кезеңінде Қазақстан мен Солтүстік Македония арасындағы сауда айналымы 5,7 млн АҚШ долларын (экспорт – 204 мың, импорт – 5,5 млн) құрады. Импорттың негізгі тауарлары – бөлшек саудаға арналған дәрілік заттар.Ақпарат көзі : https://www.gov.kz/memleket/entities/mfa/press/news/details/888092

Исламабад, 2024 жылғы 19-20 қараша – Исламабадқа сапары аясында Қазақстан Сыртқы істер министрінің орынбасары Әлібек Бақаев Пәкістан Сыртқы істер министрінің орынбасары Ахмед Насим Варайчпен екіжақты саяси консультациялардың үшінші отырысын өткізді.Консультациялар барысында тараптар екіжақты күн тәртібіндегі мәселелердің кең ауқымын талқылап, түрлі салаларда, әсіресе сауда-экономикалық және көлік-логистикалық бағыттар бойынша ынтымақтастықтың оң қарқынын атап өтті. Бұл ретте саяси диалогты одан әрі нығайту, парламентаралық байланыстарды дамыту және қауіпсіздік саласында өзара іс-қимылды жолға қоюдың маңыздылығы айтылды. Білім беру, мәдениет, туризм және спорт салаларындағы ынтымақтастық мәселелеріне ерекше назар аударылды.Келіссөздер барысында тараптар халықаралық күн тәртібіндегі мәселелер және өңірдегі оқиғалар бойынша пікір алмасып, көпжақты ұйымдар аясындағы ынтымақтастықты одан әрі нығайту маңыздылығын атап өтті.Іс-сапар шеңберінде Ә. Бақаев Пәкістанның негізгі федералды ведомстволарының басшыларымен бірқатар кездесулер өткізді. Атап айтқанда, Өнеркәсіп және өндіріс, Ұлттық азық-түлік қауіпсіздігі және зерттеулер федералды министрі Рана Танвир Хуссейнмен, Экономикалық істер министрінің бірінші орынбасары – Федералды хатшы Қазым Ниязбен және Сауда министрінің бірінші орынбасары – Федералды хатшы Джавад Паул Хаваджамен келіссөздер жүргізді.Кездесулер барысында тараптар ауыл шаруашылығы саласындағы ынтымақтастықты, екіжақты сауданы арттыру және 13-ші Қазақстан-Пәкістан үкіметаралық комиссиясының отырысын мазмұндық толықтыру мәселелерін талқылады. Сондай-ақ қазақстандық және пәкістандық кәсіпкерлер арасында өзара іс-қимыл үшін қолайлы жағдайлар жасау мақсатында шарттық-құқықтық базаны нығайтудың маңыздылығын атап өтті.Сонымен қатар іс-сапар аясында «Пәкістанмен сауда-экономикалық ынтымақтастығының контекстінде Қазақстанның іскерлік және инвестициялық мүмкіндіктері» тақырыбында дөңгелек үстел ұйымдастырылды. Оған ірі бизнес өкілдері мен Пәкістанның жетекші қалаларының сауда-өнеркәсіп палаталарының басшылары қатысты.Өзінің сөзінде Ә. Бақаев Қазақстанның инвестициялық климаты мен іскерлік мүмкіндіктері туралы баяндап, пәкістандық кәсіпкерлерді қазақстандық іскерлік топтарымен ынтымақтастықты белсенді түрде жолға қоюға және дамытуға шақырды.«Kazakh Invest» ҰК» АҚ басқарушы директоры Азамат Қожанов пәкістандық кәсіпкерлердің қызығушылығын тудыратын Қазақстан экономикасының нақты секторлары бойынша презентациялар жасады.Ақпарат көзі : https://www.gov.kz/memleket/entities/mfa/press/news/details/888135

Загреб, 2024 жылғы 21 қараша – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Хорватияның Сыртқы және еуропалық істер министрі Гордан Грлич-Радманның шақыруымен Хорватия Республикасына ресми сапармен келді.Қазақстанның сыртқы саяси ведомствосы басшысының Загребке сапары қазақ-хорват ынтымақтастығының дамуына жаңа сапалы серпін беретін екіжақты қатынастар тарихындағы алғашқы сапар.Тараптар саяси диалогты, сауда-экономикалық және инвестициялық өзара іс-қимылды, сондай-ақ мәдени-гуманитарлық байланыстарды нығайтуды қоса алғанда, екіжақты ынтымақтастықтың кең ауқымды мәселелерін талқылады. Қазақстан мен Хорватия энергетика, көлік, соның ішінде азаматтық авиация, ауыл шаруашылығы, цифрландыру және инновация, сондай-ақ білім беру және туризм сияқты салаларда өзара тиімді ынтымақтастықты тереңдету үшін айтарлықтай әлеуетке ие екендігі аталып өтті.ҚР СІМ басшысы Хорватия Қазақстанның Балқан мен Еуропалық Одақтағы бұрыннан келе жатқан және жақын серіктесі екенін мәлімдеді. «Біз достық пен өзара сенімге негізделген барлық деңгейдегі мағыналы саяси диалогымызды жоғары бағалаймыз. Экономикалық өзара іс-қимыл – қазақ-хорват қатынастарының негізгі бағыттарының бірі», – деді М.Нұртілеу.Хорватия Қазақстанның Оңтүстік Шығыс Еуропадағы сауда серіктестері арасында үшінші орынға ие. 2023 жылдың қорытындысы бойынша өзара тауар айналымы 432 млн АҚШ долларын құрады.Осы тұрғыда екінші отырысы 2025 жылы Астанада өтуі жоспарланған Сауда-экономикалық ынтымақтастық жөніндегі үкіметаралық комиссияның жұмысын жандандыру туралы уағдаластыққа қол жеткізілді.Өз кезегінде Хорватияның министрі Загреб Астанамен қарым-қатынасты одан әрі ілгерілетуге мүдделі екенін және өзара қызығушылық тудыратын барлық салаларда өзара тиімді әріптестікті ілгерілету үшін барлық күш-жігерді жұмсауға дайын екенін жеткізді.Халықаралық күн тәртібінің өзекті мәселелері, сондай-ақ БҰҰ, ЕҚЫҰ және басқа да көпжақты құрылымдар аясындағы өзара іс-қимыл жөнінде пікір алмасылды. Орталық Азия мен Балқандағы әріптестік аспектілеріне, жаһандық және өңірлік тұрақтылықты қамтамасыз ету мәселелеріне ерекше назар аударылды.Кездесу қорытындысы бойынша Қазақстан Сыртқы істер министрлігі мен Хорватия Сыртқы және еуропалық істер министрлігі арасындағы 2025-2027 жылдарға арналған ынтымақтастық бағдарламасына, сондай-ақ ҚР Мемлекеттік басқару академиясы жанындағы Дипломатия институты мен Хорватия дипломатиялық академиясы арасындағы ынтымақтастық туралы Меморандумға қол қойылды.Ақпарат көзі : https://www.gov.kz/memleket/entities/mfa/press/news/details/888189

Astana Hub халықаралық технопаркінің резиденті — қазақстандық Call2action.ai стартабы АҚШ нарығында қарқынды дамып жатыр. АҚШ-тың 40-тан астам транспорттық компаниясы инновациялық өнімге қызығушылық танытып, оның екеуі коммерциялық негіздегі клиентке айналса, үшеуі пилот аясында ынтымақтастық орнатты.Call2action.ai — генеративті жасанды интеллект (GenAI) негізіндегі тасымал мен логистика салаларында жұмысқа алу процесін автоматтандыру үшін әзірленген әлемдегі алғашқы шешім. Стартап пайдалануға дайын SaaS-шешім ұсынып, жұмысқа алу процесін ыңғайлы ғана емес, экономикалық тұрғыдан тиімді етеді.Жобаның бастапқы гипотезасы өз тиімділігін дәлелдеп, командаға қарқынды түрде алға жылжып, трекшнді арттыруға ықпал етті. Нәтижесінде, стартап инвестициялық кезеңді ашып, венчурлық қорлар және бизнес-періштелермен келіссөздер жүргізуде. Олардың кейбірі жергілікті эдвайзер рөлінде болысып, инвестор атануды жоспарлап отыр.«АҚШ нарығы Қазақстан нарығынан біршама ерекшеленеді, бірақ біз тасымал мен логистика саласындағы жұмысқа алу процесін трансформациялау үшін зор әлеует көрдік. Silicon Valley Residency Program бағдарламасына қатысуымыздың арқасында Astana Hub пен Цифрлық даму министрлігінің қолдауымен Кремний алқабында акселерациядан өтіп, бірнеше ай ішінде айтулы нәтижелерге қол жеткіздік: 40-тан астам транспорттық компания қызығушылық танытты, олардың екеуімен келісімшарттар жасалды, үш компания пилоттық жобаларды іске қосты. Бізде pre-seed кезеңі үшін әлеуетті инвесторлар бар, сондай-ақ Persol Group пен Mitsui Group сияқты ірі жапондық корпорациялардың назарын аудардық. Мұндай сұранысты ескере отырып, өніміміз бірнеше жыл ішінде миллиард долларлық құнға жетеді деп үміттенеміз», — деді Ерсұлтан Джусакинов, Call2action.ai бас директоры және негізін тең қалаушы.Call2action.ai командасы АҚШ-тағы инновациялық орталықтармен ынтымақтастықты дамытуды жалғастыруда, оның ішінде негізін Орталық Азиядан шыққандар қалаған Silkroad Innovation Hub бар. Стартап TechCrunch Disrupt пен CESV 2024 сияқты ең ірі халықаралық көрмелерде өз әлеуетін көрсетіп, жаһандық нарықта болашағы зор ойыншы ретінде танылды. Сондай-ақ Call2action.ai Mitsui Group-тің 2025 жылы басталатын акселерациялық бағдарламасына іріктелді.Еске салсақ, бұған дейін Орталық Азияның 22 перспективті стартабы, оның ішінде Call2action.ai де бар, AlchemistX & Silicon Valley Residency Program аясында Кремний алқабында акселерациялық бағдарламалардан өту мүмкіндігіне ие болды. Бұл бағдарламалар Astana Hub және Silkroad Innovation Hub-тың, ҚР Цифрлық даму министрлігінің, Дүниежүзілік банк пен FPIP жобасының қолдауымен жүзеге асырылды. Ақпарат көзі : https://www.gov.kz/memleket/entities/mdai/press/news/details/887430

Қазақстан Республикасының Энергетика министрлігі сұйытылған мұнай газына шекті көтерме бағаны белгілеу туралы бұйрықтың қолданылуын тоннасына 45 158 теңге деңгейінде ұзарту туралы НҚА жобасын жариялағанын хабарлаймыз. Бұйрық жобасына сәйкес шешім 2025 жылдың 1 қаңтарынан бастап күшіне енеді.Ақпарат көзі : https://www.gov.kz/memleket/entities/energo/press/news/details/887548

Қазіргі уақытта Қазақстан Республикасының Үкіметі мен Ресей Федерациясының Үкіметі арасындағы 2010 жылғы 9 желтоқсандағы Қазақстан Республикасына мұнай және мұнай өнімдерін жеткізу саласындағы сауда-экономикалық ынтымақтастық туралы келісімнің (бұдан әрі – Келісім) қолданылуын ұзарту (қайта бастау) рәсімдері жүргізілуде.Мұнай және мұнай өнімдерін жеткізу туралы келісім аясында бажсыз жеткізу жағдайында ресейлік мұнай өнімдерін импорттау мүмкіндігі бар.Осыған байланысты Келісімнің қолданылуын қайта бастау туралы хаттамаға қол қоюға Қазақстан Республикасы Үкіметі қаулысының тиісті жобасы дайындалды (2024 жылғы 1 қаңтардан 2028 жылғы 1 қаңтарға дейін).Келісім жобасы «Ашық НҚА» порталында жарияланды.Ақпарат көзі : https://www.gov.kz/memleket/entities/energo/press/news/details/887631

Жыл басынан бері мүгедектігі бойынша және асыраушысынан айырылу жағдайы бойынша мемлекеттік әлеуметтік жәрдемақыларды (бұдан әрі – МӘЖ) төлеуге республикалық бюджеттен 508,3 млрд теңге жұмсалды. Бұған қосымша Мемлекеттік әлеуметтік сақтандыру қорынан (бұдан әрі – МӘСҚ) еңбекке қабілеттілігінен айырылу және асыраушысынан айырылу бойынша шамамен 66,5 млрд теңге сомасына әлеуметтік төлемдер жүзеге асырылды.2024 жылғы 1 қарашадағы жағдай бойынша мүгедектігі бойынша МӘЖ алушылар саны шамамен 542,2 мың адамды, асыраушысынан айырылу жағдайы бойынша – шамамен 177,9 мың адамды құрайды.Мүгедектігі бойынша мемлекеттік әлеуметтік жәрдемақылардың мөлшері мүгедектіктің тобына және себебіне, сондай-ақ тиісті қаржы жылына арналған «Республикалық бюджет туралы» заңда белгіленген ең төмен күнкөріс деңгейінің шамасына байланысты болады.Асыраушысынан айырылу жағдайы бойынша мемлекеттік әлеуметтік жәрдемақылардың мөлшері қайтыс болған асыраушының асырауындағы адамдардың санына, қайтыс болу себептеріне және ең төмен күнкөріс деңгейіне байланысты болады.Бұдан басқа, міндетті әлеуметтік сақтандыру жүйесіне қатысушыларға әлеуметтік тәуекелдер туындаған жағдайда МӘСҚ-тен әлеуметтік төлемдер жүзеге асырылады. Мәселен, 2024 жылғы 1 қарашадағы жағдай бойынша 99,9 мың адам еңбек ету қабілетінен айырылу бойынша әлеуметтік төлем, ал 66,3 мыңға жуық отбасы асыраушысынан айырылу бойынша әлеуметтік төлем алды.Төлемдердің мөлшері жеке және мыналарға байланысты: соңғы 2 жылда МӘСҚ-ға әлеуметтік аударымдар жүргізілген орташа айлық табыс, еңбекке қабілеттілігінен айырылу коэффициенттері, асырауындағы адамдар саны, міндетті әлеуметтік сақтандыру жүйесіне қатысу өтілі және табысты ауыстыру.Бұл төлемдер республикалық бюджеттен төленетін ұқсас жәрдемақыларға қосымша жүзеге асырылады.2024 жылғы 1 қаңтардан бастап мүгедектігі бойынша және асыраушысынан айырылу жағдайы бойынша мемлекеттік әлеуметтік жәрдемақылардың мөлшері ең төмен күнкөріс деңгейінің ұлғаюына байланысты 7%-ға өсті. ҚР Үкіметінің шешімі бойынша еңбекке қабілеттілігінен айырылу және асыраушысынан айырылу бойынша МӘСҚ-дан төленетін төлемдердің мөлшері де 7%-ға артты.Мысалы, 2024 жылғы 1 қаңтардан бастап жалпы аурудан мүгедектігі бойынша МӘЖ мөлшері 1-топ үшін – 95 496 теңгені, 2-топ үшін – 76 397 теңгені, 3-топ үшін 52 089 теңгені құрайды.2024 жылғы 1 қарашадағы жағдай бойынша еңбекке қабілеттілігінен айырылу бойынша әлеуметтік төлемдердің орташа мөлшері 59 256 теңгені, асыраушысынан айырылу бойынша – 63 743 теңгені құрайды.Ақпарат көзі : https://www.gov.kz/memleket/entities/enbek/press/news/details/887374

Қазақстан Республикасы Еңбек және халықты әлеуметтік қорғау бірінші вице-министрі Ақмәди Сарбасов Әзербайжанда өткен БҰҰ-ның Климаттың өзгеруі жөніндегі конференциясының бірқатар сессияларына қатысты. Іс-шарада климаттың өзгеруі жағдайындағы инклюзивтілік және гендерлік теңдік мәселелері, сондай-ақ экологияны қорғау үшін үкіметтер, кәсіподақтар мен жұмыс берушілер қабылдаған шаралар талқыланды.Ақмәди Сарбасов баяндамасында климаттың өзгеруі тек экологиялық ғана емес, сонымен бірге жүйелі тәсілді қажет ететін әлеуметтік проблема екенін атап өтті.«Климаттың өзгеруі – бұл жалпыға әсер ететін және кешенді тәсілді қажет ететін әлеуметтік сынақ. Экологиялық тұрақтылық экономика мен қоғамның тұрақты дамуымен тығыз байланысты, бұл халықтың барлық топтарының қатысуы мен күш-жігерін талап етеді», – деп атап өтті ол.Бірінші вице-министр Қазақстанда іске асырылып жатқан кешенді шаралар туралы, оның ішінде 2060 жылға дейінгі көміртегі бейтараптығына қол жеткізу стратегиясы, Экологиялық және Әлеуметтік кодекстердің ережелері, Инвестициялық саясат тұжырымдамасы және қауіпсіз еңбекті қамтамасыз ету жөніндегі бағдарламалар туралы егжей-тегжейлі айтты.А. Сарбасов гендерлік теңдік мәселелеріне ерекше назар аударды.«Әйелдер жұмыс орындарын жоғалту тәуекелінің жоғарылауына тап болады, өйткені экологиялық өзгерістермен байланысты тұрақты энергетика және құрылыс мамандықтары негізінен ерлер кәсібіне бағытталған. Біздің климаттық шараларымыз қазір бар теңсіздікті ушықтырмау үшін инклюзивтілік пен гендерлік теңдік қағидаттарын ескеруі керек, бұл ретте керісінше, әйелдер мен басқа да осал топтардың экологиялық өзгермелілікке тең қатысуы үшін жағдай жасалуы тиіс», – деп атап өтті ол.Бірінші вице-министр сонымен бірге осы экологиялық өзгерістерге байланысты жұмысынан немесе табысынан айырылуы мүмкін адамдар үшін кедейлік және әлеуметтік оқшаулануды болдырмауға қабілетті болатындай әлеуметтік қорғау жүйесін құрудың маңыздылығын атап өтті. Әлеуметтік қорғау бағдарламалары адамдардың жаңа экономикаға енуіне көмектесетін қайта даярлау және бейімделу мүмкіндіктерін қарастыруы керек. Олар жұмыскерлердің жаңа жұмыс орындарына ауысуын қолдап әрі қауіпсіздігін де қамтамасыз етуі тиіс.А. Сарбасов тиімді құрал ретінде – «Электрондық еңбек биржасын» мысалға келтірді, ол жұмыс іздеу және кадрларды іріктеу мүмкіндігі бар жұмысқа орналастыру бойынша бірыңғай цифрлық алаң болып табылады.Сөз соңында бірінші вице-министр еңбек қауіпсіздігі мен гигиенасын арттырудың, сапалы жұмыс орындарын құрудың және процестің барлық қатысушылары арасындағы әлеуметтік диалогты нығайтудың маңыздылығын талқылады. Ақпарат көзі : https://www.gov.kz/memleket/entities/enbek/press/news/details/887787

ҚР Еңбек және халықты әлеуметтік қорғау министрлігі 2025 жылдың қаңтарындағы демалыс күнін ауыстыруды көздейтін бұйрық дайындады.ҚР Еңбек және халықты әлеуметтік қорғау министрінің «2025 жылы демалыс күнін ауыстыру туралы» бұйрығына сәйкес, 2025 жылғы 5 қаңтардағы жексенбі, яғни демалыс күні 2025 жылғы 3 қаңтарға, жұмаға ауыстырылады.Осылайша, аптасына бес күн жұмыс жасайтын қазақстандықтар 1-4 қаңтар, ал жұмыс аптасы алты күнді құрайтын азаматтар – 1-3 қаңтар күндері демалатын болды.Демалыс күнін ауыстыру жұмыс уақытын оңтайлы бөлуге және азаматтардың демалысы үшін қолайлы жағдай жасауға мүмкіндік береді.Ақпарат көзі : https://www.gov.kz/memleket/entities/enbek/press/news/details/887881

Мүгедектігі бар адамдардың заңды құқықтарын қамтамасыз ету және олар үшін қолжетімді ортаны қалыптастыру мақсатында Қызылорда облысында 1 248 әлеуметтік инфрақұрылым нысаны толық бейімделді.Қазіргі уақытта Қазақстан Республикасында мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі 2025 жылға дейінгі ұлттық жоспар, «Аманат» партиясының 2023-2027 жылдарға арналған жол картасы, сондай-ақ Мемлекет басшысының тапсырмасы бойынша бастамашылық жасалған «Халықпен бірге» жобасы іске асырылуда. «Amanat» партиясының жол картасына сәйкес интерактивті қолжетімділік картасына (бұдан әрі – Карта) енгізілген 35 мыңнан астам нысанды бейімдеу жоспарлануда. Жыл сайын нысандардың 20% бейімделеді:2023 жылы – 20%;2024 жылы – 40%;2025 жылы – 60%;2026 жылы – 80%;2027 жылы – 100%.Қазіргі уақытта ел бойынша 20 849 объект толығымен бейімделген. Қызылорда облысында 2024 жылы 948 нысанды бейімдеу жоспарланған болатын, алайда өңір жоспарды асыра орындады: 1248 нысанға қолжетімділік қамтамасыз етілді. Оның ішінде мүгедектігі бар адамдардың барлық санаттары үшін қол жетімді:- денсаулық сақтау объектілері – 128;- білім беру объектілері – 586;- мәдениет нысандары – 117;- сауда және қызмет көрсету объектілері – 31;- мемлекеттік және квазимемлекеттік ұйымдар – 250;- спорт нысандары – 19;- көлік инфрақұрылымы объектілері – 11;- қоғамдық тамақтандыру, сауда, қызмет көрсетуді ұйымдастыру – 92;- әлеуметтік қорғау объектілері – 8;- басқалары – 6.«Мен күн сайын Қызылордадағы дүкен, дәріхана, аурухана сияқты өзге де түрлі әлеуметтік маңызы бар мекемелерге барамын. Мен үшін олардың қол жетімді болуы маңызды. Қазір көптеген нысандар кресло-арбалардағы адамдарға арналған көтергіштермен, арнайы қызмет көрсету аймақтарымен жабдықталған. Жаңа ғимараттар халықтың аз қозғалатын топтарының қажеттіліктерін ескере отырып салынуда, пандустармен, тұтқалармен, лифттермен және тактильді белгілермен жабдықталып жатыр. Жұмыс істеп тұрған нысандардың иелері оларды қол жетімді ету үшін өзгерістер енгізетінін бөлек атап өтемін. Біз сондай-ақ кәсіпкерлерге өз ұсыныстарымызды да жеткіземіз. Мысалы, «Отбасы банк» АҚ филиалында көтергіш құрылғы орнатылған, ол маған бөгде адамның көмегінсіз жүруге мүмкіндік береді. Мен жиі баратын Халыққа қызмет көрсету орталықтарында бағыттаушы жолақтар, белгілер және көмек көрсететін қызметкерлер де қарастырылған. Бұл өте ыңғайлы», – деп бөлісті бірінші топтағы мүгедектігі бар Сағатбек Сиюов.Бұдан басқа, биыл мемлекеттік бақылау шеңберінде ҚР ЕХӘҚМ Халықты әлеуметтік қорғау саласындағы реттеу және бақылау комитетінің Қызылорда облысы бойынша департаменті әлеуметтік инфрақұрылым объектілеріне 104 тексеру жүргізді. Оның ішінде: профилактикалық бақылау шеңберінде 39 тексеру, жоспардан тыс 6 тексеру, прокуратураның талабы бойынша 59 тексеру болды.Тексеру қорытындысы бойынша анықталған бұзушылықтарды жою туралы 31 ұйғарым беріліп, 6,4 млн теңгеден астам сомаға 53 әкімшілік айыппұл салынды.Объектілердің меншік иелеріне профилактикалық бақылау жүргізу кезінде бұзушылықтар алғаш рет анықталған кезде оларды әкімшілік жауапкершілікке тартпастан жою туралы нұсқамалар ғана берілетінін атап өту қажет. Нұсқама белгіленген мерзімде орындалмаған жағдайда айыппұл салынады.Ақпарат көзі : https://www.gov.kz/memleket/entities/enbek/press/news/details/888264

ТЖМ құрама командасы «Қорғаныс министрі Кубогы» қоян-қолтық ұрысы бойынша Әлем кубогының финалына қатысуда. Құрама команда 1 ер адам мен 9 әйел адамнан жасақталған. Турнир 2024 жылғы 21-23 қараша аралығында Астана қаласы Ж. Үшкемпіров атындағы спорт кешенінде өтуде.Мұндай деңгейдегі сайыс Қазақстан тарихында тұңғыш рет өтіп жатыр. 15 елден 200-ден астам спортшы қатысуда. Әлем кубогын ұйымдастырушылар – Қазақстан Республикасы Қорғаныс министрлігінің Армия орталық спорт клубы мен еліміздегі Қоян-қолтық ұрыс қауымдастығы. Спортшылар «Сайыс», «Өзін-өзі қорғау» және «Өзін-өзі қорғау 1+1» пәндерінде 10 салмақта өнер көрсетуде.ҚР ТЖМ құрамасы ерлер арасында 67 кг салмақ дәрежесінде және әйелдер арасында 48-ден 70 кг-ға дейінгі салмақ дәрежесінде өнер көрсететін болады. Команда құрамында қоян-қолтық ұрыстан әлем, Азия және Еуропа жүлдегерлері мен чемпиондары бар.Спортшыларымызға сәтті өнер көрсетулерін тілейміз! ТЖМ Кадр және тәрбие жұмысы департаментіАқпарат көзі : https://www.gov.kz/memleket/entities/emer/press/news/details/887636

Сауд Арабиясының Эр–Рияд қаласында 17-21 қараша аралығында өткен өрт сөндірушілер мен құтқарушылардың халықаралық спорт федерациясының XXV халықаралық конференциясы аяқталды.Конференция барысында жарыстарды өткізу ережесіндегі маңызды өзгерістер, сондай-ақ төрешілер корпусын таңдаудағы жаңа тәсілдер талқыланды. Кәсіпқойлықтың жоғары деңгейін қамтамасыз ету мақсатында судьяларды даярлауға, оларды оқытуға және сертификаттауға ерекше назар аударылды. 2025 жылы халықаралық жарыстар мен әлем чемпионаттарын өткізу үшін бас төрешілер комиссиясы бекітілді.Сонымен қатар Эр–Рияд қаласының 2025 жылғы қазан айының соңында ерлер арасында ХХ әлем чемпионатын және әйелдер арасында өрт-құтқару спортынан ХІ әлем чемпионатын өткізуге дайындығы расталды. Ұйымдастырушылар қатысушылар мен көрермендер үшін инфрақұрылымды, қауіпсіздік пен жайлылықты жақсарту жоспарларын ұсынды. Эр-Рияд позитивті имидж құру және іс-шараға халықаралық назар аудару үшін белсенді жұмыс істейді.Естеріңізге сала кетейік, конференцияға 19 елден өрт–құтқару қызметтерінің, өрт–құтқару спорты қауымдастықтары мен федерацияларының басшылары қатысты. Қазақстан ТЖМ атынан Өртке қарсы қызмет комитетінің төрағасы Рамиль Камалов және Қазақстандық өрт сөндірушілер мен құтқарушылар спорт федерациясының атқарушы директоры Дәурен Данаев қатысты. ҚР ТЖМ Өртке қарсы қызмет комитеті Ақпарат көзі : https://www.gov.kz/memleket/entities/emer/press/news/details/887710

ТЖМ аумақтық бөлімшелер тұрғын үй секторында өрт қауіпсіздігін арттыру бойынша белсенді жұмыс атқаруда. Жамбыл облысында әлеуметтік осал топтарға ерекше көңіл бөлінуде, 3957 әлеуметтік осал топқа жататын отбасы тұрады. Жыл ішінде өрт қауіпсіздігіне арналған екі айлық ұйымдастырылды. Алдын алу іс-шаралары аясында құтқарушылар 12 586 тұрғын үйді аралап, 27 689 адамға жылыту маусымында өрт қауіпсіздігі ережелерін сақтау бойынша нұсқаулықтар өткізді, сондай-ақ 3516 тұрғынның қатысуымен 293 жиын ұйымдастырылды.2024 жылдың 1 маусымынан бастап әлеуметтік осал отбасылардың үйлеріне 1722 датчик орнатылды. 6-14 қараша аралығында Сарысу, Талас және Жуалы аудандарында жергілікті атқарушы органдармен бірлесіп, көмірқышқыл газын анықтайтын датчиктер орнатылып, пештер тазаланды. Тұрғын үй секторында халыққа жадынамалар таратылып, қауіпсіздік бойынша нұсқаулықтар берілді.«Цифрландыру мақсатында ТЖД адамдар көп жиналатын орындарда QR-кодтарды орналастыру бойынша жұмыс жүргізуде. Осы QR-кодтарды сканерлеу арқылы тұрғындар әртүрлі төтенше жағдайларда әрекет ету ережелерімен таныса алады», - ТЖД бастығының орынбасары Ералы Ақылбеков атап өтті.ТЖМ өрт қауіпсіздігі ережелерін сақтаудың маңыздылығын еске салады. Тек бірлескен күш-жігер арқылы қайғылы оқиғалардың алдын алып, адамдардың өмірін сақтап қалуға болады. Ақпарат көзі : https://www.gov.kz/memleket/entities/emer/press/news/details/887945

Көкшетауға жұмыс сапары аясында ТЖ вице-министрі Ерлан Нұрпейісов Ақмола облысы ТЖД-да өткен жұмыс кеңесіне қатысты. Іс-шара барысында су тасқынына дайындық және су тасқынына қарсы іс-шараларды өткізу мәселелері көтерілді.Вице-министр ВКС режимінде су тасқынына бейім аудандарда жүргізілген жұмыс туралы ТЖД аумақтық бөлімшелерін тыңдады. Бұдан өзге су тасқынына қарсы іс-шараларды орындау бойынша жергілікті атқарушы органдармен жұмысты жандандыру, қысқы кезеңдегі ТЖ алдын алу қажеттігін атап өтіп, материалдық-техникалық жарақтандыру мәселелерін қозғады.Сонымен қатар кеңес барысында вице-министр департамент басқармалары мен қызметтерінің басшыларын тыңдады. Кеңес қорытындысы бойынша ол бірқатар тапсырмалар берді.Ақпарат көзі : https://www.gov.kz/memleket/entities/emer/press/news/details/887953

2024 жылғы 21 қарашада барлық өңірлерінде «Азаматтық қорғаудың мемлекеттік жүйесінің басқару органдары мен күштерін қысқы кезеңдегі төтенше жағдайлардың алдын алу және оларды жою жөніндегі іс-қимылдарға дайындау» тақырыбында «Қыс-2024» командалық-штабтық оқу-жаттығуы басталды.Оқу-жаттығу азаматтық қорғау мемлекеттік жүйесінің және халықтың қысқы кезең жағдайында төтенше жағдайларды жоюға дайындығы мен қабілеттілігін арттыру, азаматтық қорғау қызметтері мен құралымдарының қысқы кезеңдегі ТЖ-ға ден қоюға дайындығын тексеру мақсатында өткізіледі.Оқу-жаттығудың жедел штабы Ақмола облысы Көкшетау қаласында орналасқан. Оқу-жаттығудың басшысы ҚР Төтенше жағдайлар вице-министрі Е.С. Нұрпейісов.«Қыс-2024» РКШОЖ-ның бірінші кезеңі сағат 08:00-де басталды. «Дабыл-1001» сигналы бойынша азаматтық қорғаудың мемлекеттік жүйесінің басқару органдары мен күштері, ТЖМ, Қазақстан Республикасы Ұлттық ұланының бөлімдері мен бөлімшелері дайындыққа келтірілді.Көкшетау қ. «Болашақ сарайында» мемлекеттік органдардан, республикалық оқу-жаттығу штабы мүшелерінен құрылған жедел топтар жиналып, оларға қойылған міндеттер жеткізілді. Республикалық азаматтық қорғау қызметтеріне, жергілікті атқарушы органдарға қиын қысқы жағдайларда жұмыс істеу үшін өздерінің авариялық-құтқару қызметтері мен құралымдарының дайындығын тексеру міндеті қойылды.Республикалық азаматтық қорғау қызметтерімен, облыстардың, Астана, Алматы және Шымкент қалаларының төтенше жағдайлардың алдын алу және оларды жою жөніндегі комиссияларымен бұдан әрі басқару тапсырмалары мен сигналдарын, іс-шаралардың орындалуы туралы ақпаратқа сұраныстар мен хабарламаларды беру үшін тұрақты байланыс орнатылды. Төтенше жағдайларды жою және бағынысты күштерге қолайсыз жағдай туындаған кездегі функционалдық міндеттерді орындауға тапсырма беру жөніндегі іс-қимыл жоспарлары нақтыланды.Оқу-жаттығудың екінші кезеңінде басқару органдарына «Қарғын–2002» басқару сигналы, дауылды ескерту және оқу-жаттығу тақырыбына байланысты тиісті кіріспе жеткізілді. Қалыптасқан жағдайды бағалау және төтенше жағдайдың салдарын жоюға шешім қабылдау кезінде басқару органдарының іс-қимыл алгоритмі пысықталды.Сонымен қатар оқу-жаттығу шеңберінде еліміздің барлық өңірлерінде ТЖ-ны жою жөніндегі іс-қимылдарды пысықтау бойынша командалық-штабтық жаттығулар, авариялық-құтқару қызметтерімен және азаматтық қорғау құралымдарымен практикалық іс-қимылдар өткізіледі. Ақпарат көзі : https://www.gov.kz/memleket/entities/emer/press/news/details/888005

Өңірдің авариялық-құтқару қызметтерінің қысқы кезеңдегі төтенше жағдайларға дайындығын Қарағанды облысының әкімі Ермағанбет Бөлекпаев пен ТЖ департаментінің бастығы Марғұлан Аманбаев тексерді.Оқу-жаттығу арнайы техниканы тексеруден басталды. Қарағандыдағы «Шахтер» стадионының сыртында полиция бөлімшелері, автомагистральдарда қауіпсіздікті қамтамасыз ететін жол ұйымдары, әскери-құтқару қызметтері және Апаттар медицинасы орталығы қызметкерлері сап түзеді.Құтқарушылар қыста жұмыс істеуге 76 бірлік жоғары өтімді және инженерлік техника дайындады. Барлық жерүсті көліктері, вахталық автомобильдер тартылатын болады. ТЖ және облыстық Азаматтық қорғау қызметтері департаментінің автопаркі жыл сайын республикалық және жергілікті бюджеттер есебінен жаңартылып отырады. Жақында үш жоғары өтімді көлік – жол талғамайтын, батпақта жүре алатын арнайы техника сатып алынды.«Қазір барлық құрылымдардың дайындығына тексеру жүргізілуде: ТЖ департаменті, полиция, Ұлттық ұлан, барлық аудандар мен қалалар әкімдіктері, жол қызметтері. Біз құтқару жұмыстарына 5 мыңнан астам адам мен мыңнан астам техниканы тарта аламыз», – дейді ТЖ департаментінің бастығы Марғұлан Аманбаев.Қарағанды облысында ұзындығы 574 шақырым болатын 590 қарлы учаске күшейтілген бақылауға алынды. Сондай-ақ, 19 жылыту пункті мен 6 трассалық медициналық-құтқару пунктінің жұмысы ұйымдастырылды. ТЖ жағдайында жол бойындағы сервистің 300-ден астам нысаны тартылатын болады.Оқу жаттығулары Теміртау маңындағы трассада да ұйымдастырылды. Мұнда құтқарушылар далада қалып қойған автобустан адамдарды құтқару кезінде іс-әрекеттерді пысықтады, сондай-ақ жоғалған адамды іздестірді.Өңірде барлығы 26-дан астам тактикалық-арнайы оқу-жаттығулар өткізілді, онда далалық басқару пунктінің жұмысы көрсетілді: штабтар, медициналық пункттер, тамақтану, жылыту және психологиялық көмек пункттері орналастырылды.Ақпарат көзі : https://www.gov.kz/memleket/entities/emer/press/news/details/888059

2024 жылғы 21 қарашада Қызылорда қаласында «Сол жағалау» шағын ауданында «Болашақ» саптық қарау өткізілді және облыстық азаматтық қорғау қызметтерінің дайындығы тексерілді. Іс-шараға Қызылорда облысының әкімі Нұрлыбек Нәлібаев қатысты.Сонымен бірге «Қорқыт Ата» атындағы әуежай маңында оқу-жаттығудың практикалық кезеңі өткізілді. Оқу-жаттығудың бірінші кезеңінде шартты жол-көлік оқиғасы орын алды. Облыстық әуежайдың маңында автокөлігі мен маркалы автобусының соқтығысуы салдарынан жол-көлік оқиғасы орын алғандығы жөнінде хабарлама Департаментке келіп түсті. Соның салдарынан оқиға орнында көлік кептелісі пайда болды. Сонымен бірге жеңіл автокөліктің жүргізушісі апат салдарынан қысылып қалған және жарақат алған. Автобустың ішіндегі жолаушыларға зақым келді. Жергілікті полиция қызметі қоғамдық тәртіпті сақтау және оқиға орнын қоршау жұмысын жүргізді. Зардап шегушілерді жедел құтқару жасағының құтқарушылары көліктен шығарып, Апаттар медицина орталығының дәрігерлері алғашқы медициналық көмек көрсетті. Ауыр жарақат алған жолаушыларды жедел жәрдем қызметінің мамандары ауруханаға жеткізді. Кептелісте қалған жолаушылар арнайы автобуспен жылыту пункттеріне жеткізілді. Ыстық тамақпен және керек-жарақтармен қамтамасыз етілді. Ал, екінші кезеңде «Қорқыт Ата» әуежайының маңында іздеу-құтқару жұмысы жүргізілді. Департаменттің Жоспарлау және жедел басқару орталығына «Қорқыт Ата» әуежайының маңында екі адам мал іздеп шығып, хабар-ошарсыз кеткендігі жөнінде хабарлама келіп түсті. Ауа-райы күрт салқындап, қалың қар жауды. Аталған хабарламаға сәйкес шұғыл іздеу-құтқару тобы құрылды. «Қазавиақұтқару» АҚ-на тиесілі «Еврокоптер» тікұшағын пайдалана отырып, іздеу-құтқару жұмысы жүргізілді. Белгіленген орынға тікұшақ қонып, кинологиялық топтар мен құтқарушылар «квадроцикл» көлігімен екі бағытта іздеу-құтқару жұмысын жүргізді. ҚР Ұлттық Ұлан №5547 әскери бөлімінің әскери қызметішлер де іздеу жұмысына белсене атсалысты. Құтқарушылар жоғалып кеткен адамдарды дер кезінде тапты. Табылған адамдарға медициналық көмек көрсетілді. Зардап шегушілерді тікұшақты пайдалана отырып, «Қорқыт Ата» әуежайына жеткізді. Апаттар медицинасы орталығының филиалының бригадасы және «Қызыл Ай» қоғамының қызметкерлері зардап шегушілерді ауруханаға жатқызды.Оқу-жаттығу қорытындысы бойынша азаматтық қорғау қызметтерінің қысқы кезеңдегі төтенше жағдайларға ден қоюға дайындығына баға берілді.Ақпарат көзі : https://www.gov.kz/memleket/entities/emer/press/news/details/888096