QYZPU 80 ЖЫЛДЫҚ МЕРЕЙТОЙЫН АТАП ӨТТІ Алматыда Қазақ ұлттық қыздар педагогикалық университетінің 80 жылдық мерейтойы атап өтілді. Университетте «Білімді қыздар – білімді ұлт» халықаралық форумы өтіп, мерейтой аясында еліміздің білім және ғылым саласына еңбегі сіңген тұлғалар, университет түлектері және профессорлық-оқытушылық құрамы марапатталды. Мерейтой барысында университет тарихындағы айтулы оқиға – QyzPU жаңа оқу ғимаратының ашылу рәсімі өтті. Жаңа корпустың лентасын ҚР Ғылым және жоғары білім министрі Саясат Нұрбек, ҚР еңбек сіңірген қайраткері, университет түлегі Орынша Қарабалина, және Университеттің Директорлар Кеңесінің Төрағасы Омархан Өксікбаев кесті. Министр Саясат Нұрбек университеттің профессорлық-оқытушылық құрамына ғылым мен білім саласына қосқан үлестері үшін алғыс білдіріп, марапаттар табыстады. Ведомство басшысы университеттің тек білім беру ордасы ғана емес, ұлттық құндылықтарды дәріптеп, қоғамға жеткізетін маңызды орталық екенін ерекше атап өтті. Министр өз сөзінде педагогикалық университеттің 80 жылдық тарихына тоқталып, осы уақыт ішінде оқу орнын тәмамдаған түлектердің еліміздің түкпір-түкпірінде ұстаздық қызметте, қоғамдық жұмыстарда, сондай-ақ өнер мен мәдениет салаларында жемісті еңбек етіп жүргенін атап өтті. Университеттің жетістіктері мен қоғамға қосқан үлесі оның ұлттық білім беру жүйесіндегі ерекше рөлін көрсетеді. Уиверситетте Пәнаралық ғылыми зертхананың ашылу рәсімі өтті. Салтанатты шараға химия ғылымдарының докторы, профессор Мұхамедқали Матаев және Университеттің Директорлар Кеңесінің Төрағасы Омархан Өксікбаев қатысып, лентасын қиды. «Университет жас мамандарды тәрбиелеп қана қоймай, ғылым саласын дамытуға да ден қойып отыр. Үлкен ғылыми ордаға айналуына көңіл бөліп, зертханалар ашып жатырмыз. Зертханадағы оқудың 30%-ы оқу-әдістемелік болса, 70%-ы ғылыми тәжірибе жинақтауға бағытталған. Ғалымдардың осы зертханалардағы тәжірибесінің арқасында елімізде ғылыми жаңалықтар болады сенімдемін. Сондықтан бұл университет тек мұғалім даярлауға ғана емес, ғылымды дамытуға да үлес қосады», - деді Омархан Өксікбаев. Зертханалық орталық «химия-биология-физика» бағытындағы іргелі және қолданбалы ғылыми зерттеулер жүргізуге негізделген, болашақта басқа да бағыттарды қамтиды деп жоспарлануда. Ол әртүрлі салаларда зерттеулер жүргізуге арналған заманауи құрылғылармен жабдықталған. Орталықта түрлі бағыттағы зертханалар бар: спектрлік талдау зертханасы, рентгендік фазалық талдау зертханасы, жаңа материалдарды синтездеу зертханасы, кванттық магнитометриялық зерттеулер зертханасы, электрондық құрылымдық зерттеулер зертханасы, табиғи қосылыстар химиясы зертханасы, креативті идеялар және ынтымақтастық зертханасы, биомедициналық зерттеулермен айналысатын биомедициналық зерттеулер зертханасы және жаңа биологиялық өнімдер мен технологияларды жасау үшін биотехнология және гендік инженерия бойынша зерттеулер жүргізілетін биотехнологиялық зерттеулер жасайтын зертхана. Сондай-ақ жаңа идеялар мен креативті бастамаларға арналған «QyzPU Unispace» коворкинг орталығы ашылды. Мерейтой аясында өткен маңызды оқиғалардың бірі QyzPU мен әлемнің жетекші университеттері арасындағы стратегиялық келісімге қол қою болды. QyzPU Michigan State University, Sussex University арасында ынтымақтастық туралы келісімге қол қойды. Сонымен қатар QyzPU, Education University of Hong Kong және Абай атындағы Қазақ ұлттық педагогикалық университеті арасында ұстаздар біліктілігін арттыру академиясын құру туралы шартқа қол қойылды.Ақпарат көзі : https://www.gov.kz/memleket/entities/sci/press/news/details/885732

Алматыда Қорғаныс, Төтенше жағдайлар министрліктері, Ұлттық ұлан және «Тұран» университеті арасындағы ынтымақтастық пен өзара іс-қимыл туралы меморандумға қол қою рәсімі өтті.Парламент Мәжілісінің Халықаралық істер, қорғаныс және қауіпсіздік комитеті ғылыми және қолданбалы психология бағыты бойынша білім беру қызметінде күштік құрылымдар мен жоғары оқу орны арасындағы байланыстарды дамытудың бастамашысы болып отыр.Іс-шараға «Тұран» университетінің профессорлық-оқытушылық құрамы, Қорғаныс, Төтенше жағдайлар министрліктерінің, Ұлттық ұланның, Алматы қаласы қорғаныс істері жөніндегі департаментінің, бас әскери клиникалық госпитальдің өкілдері, Десанттық-шабуылдау әскерлері, Әуе шабуылына қарсы қорғаныс бөлімшелерінің, әскери оқу орындарының психологтары қатысты.Құжатқа Қорғаныс министрлігінің атынан Құрлық әскерлері әскери институтының бастығы генерал-майор Бауыржан Ибатулин, Ұлттық ұланнан Бас қолбасшының тәрбие және әлеуметтік-құқықтық жұмыстар жөніндегі орынбасары Халық қаһарманы, генерал-майор Қайрат Үмбетов, Төтенше жағдайлар министрлігі атынан Алматы қаласы Төтенше жағдайлар департаментінің бастығы полковник Нұрлан Атығаев, «Тұран» университетінен оқу орнының ректоры Рахман Алшанов қол қойды. – Бүгін Парламент Мәжілісінің Халықаралық істер, қорғаныс және қауіпсіздік комитетінің арқасында біз психологиялық жұмыс сияқты күрделі және жауапты бағытты дамытуда тағы бір қадам жасадық. Келісім қолданбалы және ғылыми отандық психологияны дамытуға, күштік құрылымдар мен «Тұран» университеті арасында білім беру бағдарламаларын іске асыруға бағытталған ведомствоаралық жұмысты тиімді құруға мүмкіндік береді деп санаймын, – деп түсіндірді Құрлық әскерлері әскери институтының бастығы генерал-майор Бауыржан Ибатулин.Меморандум бірлескен оқу-білім беру бағдарламаларын әзірлеп, іске асыруды, жоғары оқу орны студенттерінің тәжірибе мен тағылымдамадан өтуін ұйымдастыруды, ғылыми-әдістемелік семинарлар, ғылыми-практикалық конференциялар және басқа да іс-шаралар шеңберінде тәжірибе алмасуды көздейді. Мұның бәрі білім беруді тереңдетуге және зерделейтін мамандық бойынша практикалық іс-әрекет дағдыларын қалыптастыруға бағытталған ұзақ мерзімді және өзара тиімді ынтымақтастық үшін жұмыс істейтін болады.Ақпарат көзі : https://www.gov.kz/memleket/entities/mod/press/news/details/885751

Сағадат Нұрмағамбетов атындағы Құрлық әскерлерінің әскери институтында соңғы екі жылда білім ордасын аяқтап, рота командиріне дейін өскен жас офицерлермен кездесу өтті. Іс-шараға профессор-оқытушылар құрамы, жоғары оқу орнының курсанттары, Қарулы күштердің ардагерлері, әскери мектептердің тәрбиеленушілері мен жас офицерлердің туған-туыстары қатысты.Қарулы күштердің сапалы жаңа офицерлер корпусын қалыптастыру жөніндегі Қорғаныс министрлігінің 2013 жылдан бері жұмыс істеп келе жатқан бағдарламасын басшылыққа ала отырып, жоғары оқу орындары өз түлектерінің келешегін қадағалайды. Құрлық әскерлері бас қолбасшысының орынбасары полковник Бауыржан Әбіров 14 үздік жас офицерге «Үздік маман» белгісін және бағалы сыйлықтар табыс етті.Қарулы күштердің ардагері генерал-полковник Әлібек Қасымов түлектерді айтулы күнмен құттықтады. – Әрбір офицер мәдениеті жоғары және өз ісінің майталманы болып қана қоймай, оны жеке құрамнан талап етуі маңызды. Барлық жағынан салмақты болуға тырысып, әсіресе қол астындағылардың әрекеттерін бағалауға қатысты мәселелерді қарастырған кезде асығыс шешім қабылдамау керек. Сонда ғана сендерге сеніп тапсырылған бөлімшелер жауынгерлік даярлықта жоғары нәтижелерге қол жеткізіп, әскери тәртіптің қажетті деңгейін сақтай алады, – деді ол.Жас офицерлердің кәсіби қалыптасуы жеке өміріндегі маңызды оқиғалармен қатар жүретіні анық. Іс шара барысында аға лейтенант Дмитрий Фоменко өзінің сүйіктісі Аринаға отау құруға ұсыныс жасады. Демек, отбасын құру арқылы Дмитрийдің сенімді тылы пайда болады да, қызметке деген ынтасы арта түседі.Салтанатты шара Қарулы күштер Ұлттық әскери-патриоттық орталығы филиалының шығармашылық тобы дайындаған мерекелік концертпен аяқталды.Ақпарат көзі : https://www.gov.kz/memleket/entities/mod/press/news/details/885784

«Мұз-2024» республикалық үгіт-насихаттық-профилактикалық іс-шарасы аясында Қарағанды облысының Төтенше жағдайлар департаменті облыстың барлық аймақтарында ауқымды рейдтер мен үгіт-насихаттық іс-шаралар кешені жүргізді. Іс-шараларға ауқымды патрульдеу, халықты түсіндіру және ақпараттық материалдарды тарату кіреді. Оларды жүзеге асыруға волонтерлер, жергілікті атқарушы органдардың өкілдері, Қазақстан Республикасы Ұлттық ұланының әскери қызметшілері, полиция қызметкерлері және басқа да мүдделі құрылымдар тартылды.«Жұмыс жоғары деңгейде ұйымдастырылған: негізгі тәуекел аймақтары қамтылған, мұздағы қауіпсіздік ережелері туралы халықтың барынша хабардар болуы қамтамасыз етілген, барлық тартылған қызметтер арасында тығыз өзара іс-қимыл орнатылған. Соның арқасында қыс мезгіліндегі төтенше жағдайлардың алдын алу мен жедел әрекет ету деңгейін арттыруға мүмкіндік туды», - Қарағанды облысы ТЖД бастығының орынбасары Роллан Есмағанбетов деп атап өтті.Департамент бұл бағыттағы жұмысты белсенді түрде жалғастырып, облыстың су айдындарында жазатайым оқиғалардың алдын алу шараларын күшейтуде.Ақпарат көзі : https://www.gov.kz/memleket/entities/emer/press/news/details/885727

17-21 қараша аралығында Сауд Арабиясының астанасы Эр-Рияд қаласында Халықаралық өрт сөндірушілер мен құтқарушылар спорт федерациясының XXV халықаралық конференциясы өтуде. Конференцияға 19 елден өрт–құтқару қызметтерінің, өрт–құтқару спорты қауымдастықтары мен федерацияларының басшылары қатысуда.Қазақстан ТЖМ атынан Өртке қарсы қызмет комитетінің төрағасы Рамиль Камалов және Қазақстандық өрт сөндірушілер мен құтқарушылар спорт федерациясының атқарушы директоры Дәурен Данаев қатысуда.Конференцияда өрт сөндірушілер мен құтқарушылардың халықаралық спорт федерациясын одан әрі дамыту, халықаралық ынтымақтастық, 2025 жылы өрт–құтқару спорты бойынша әлем чемпионаттарын ұйымдастыру және өткізу мәселелері талқылануда. Конференцияны Сауд Арабиясы Корольдігі ІІМ Азаматтық қорғаныс Бас басқармасы ұйымдастырды.Халықаралық өрт сөндірушілер мен құтқарушылар спорт федерациясының директоры Андрей Калинин Қазақстан ТЖ министрі Шыңғыс Әріновке және Қазақстан спорт федерациясының атқарушы директоры Дәурен Данаевқа Алматы қаласындағы әлем чемпионатын жоғары деңгейде ұйымдастырғаны және өткізгені үшін шын жүректен алғысын білдірді. Ол кәсіби дайындық пен іс-шараларды ұйымдастырудың жоғары деңгейінің арқасында Қазақстан басқа елдер үшін үлгі болғанын атап өтті. Директордың сөзінде мұндай іс–шаралар түрлі елдердің құтқарушылары арасындағы бауырластықты нығайтуға, өрт қауіпсіздігі саласындағы практикалық дағдыларды жақсартуға және балалар мен жастар арасында өрт-құтқару спортын танымал етуге ықпал ететіні туралы айтылды.ҚР ТЖМ Өртке қарсы қызмет комитетінің төрағасы Рамиль Камалов халықаралық жарыстарға қатысу тәжірибе алмасу үшін жаңа көкжиектер ашатынын және қазақстандық құтқарушылардың кәсібилік деңгейін арттыратынын атап өтті. Біздің команданың халықаралық аренадағы жетістігі қызмет қызметкерлерінің жоғары дайындығы мен жауапкершілігін растайды. ҚР ТЖМ Өртке қарсы қызмет комитеті Ақпарат көзі : https://www.gov.kz/memleket/entities/emer/press/news/details/885777

Қазақстандық білім беру ұйымдарында тамақтандыру сапасына күнделікті мониторинг жүргізу енгізілдіБұл туралы ҚР Үкіметінің отырысында баяндама жасаған Оқу-ағарту министрі Ғани Бейсембаев мәлімдеді, деп хабарлайды ведомствоның баспасөз қызметі.Министрдің айтуынша, биылғы жылы тиісті нормативтік құқықтық талаптар күшейтілді. Атап айтқанда, білім беру ұйымдарындағы тамақтандыру стандарттары Дүниежүзілік денсаулық сақтау ұйымының ұсыныстарына сәйкес қайта қаралды.«Мектепке дейінгі және орта білім беру ұйымдарындағы тамақтандыру сапасын арттыру мақсатында күнделікті мониторинг енгізілді. Мектеп аспаздарының біліктілігіне, олардың білімі мен еңбек өтіліне қойылатын талаптар күшейтілді. Өнім берушілердің қызметін бастамас бұрын санитариялық-эпидемиологиялық қорытындысы болуы туралы шарт бекітілді. Сондай-ақ ас блогына бейнебақылау орнату міндеттелді», - деді министр.Сонымен қатар Ғани Бейсембаев «Әлеуметтік әмиян» жобасы аясында тегін тамақ алатын балаларды автоматтандырылған түрде есепке алу жұмыстары жүргізілуде екенін атап өтті.Денсаулық сақтау министрлігімен бірлесіп білім беру ұйымдарында тамақтанудың жаңа стандарты әзірленді, оны 2025 жылдан бастап қолданысқа енгізу жоспарлануда. Естеріңізге сала кетейік, бұдан бұрын екі ведомство басшысы мұндай шешімді білім беру ұйымдарындағы тамақтандыру сапасына бірлесіп бақылау жүргізу барысында қабылдаған болатын.Ақпарат көзі : https://www.gov.kz/memleket/entities/edu/press/news/details/885721

ҚР Үкімет басшысының тапсырмасына сәйкес Оқу-ағарту министрлігі Денсаулық сақтау министрлігімен бірлесіп еліміздегі мектеп асханаларының санитариялық-эпидемиологиялық талаптарға сәйкестігіне мониторинг жүргізді. Республикалық мониторингтің қорытындылары туралы Ғани Бейсембаев баяндады.Оқу-ағарту министрі республикалық мониторинг қорытындысында мектептегі тамақтандырудың ұйымдастырылу сапасына қатысты сұрақтардың туындауы атқарушы органдар тарапынан әлі де болса бақылаудың жеткіліксіздігін көрсеткенін, сондай-ақ мұны заңнама талаптарының бұзылу фактілерінен де анық аңғаруға болатынын атап өтті. Мониторинг тобы заң талаптарын бұзылуы бойынша 771 фактіні анықтаған.Сондай-ақ Министрлік мектепте тамақтандыруды ұйымдастыру бойынша кешенді бағалау жүргізді. Бағалау кезінде тамақтандыру сапасына жүргізілген мониторинг нәтижелері, асханалардың қажетті материалдық-техникалық жабдықталуы, 1 оқушыға шаққандағы өңірлердегі тамақтану құны, ата-аналар арасында жүргізілген сауалнама нәтижелері ескерілді. Оның нәтижесінде Жамбыл, Маңғыстау, Алматы, Атырау облыстарының және Шымкент қаласы әкімдіктерінің тарапынан мектептерде сапалы тамақтануды ұйымдастыруға тиісті деңгейде көңіл бөлінбей отырғандығы анықталды.«Қазіргі таңда Министрлік мектепте тамақтандыру қызметтерін сатып алу кезінде өнім берушілерді іріктеу талаптарын бұзғаны үшін лауазымды тұлғаларға әкімшілік жауапкершілік енгізу мәселесін пысықтауда», - деп қорытындылады Ғани Бейсембаев.Естеріңізге сала кетейік, бұған дейін министрлік талаптарды күшейтіп, білім беру ұйымдарында тамақтандыруды ұйымдастыруға қатысты 7 нормативті-құқықтық актіні қайта қараған болатын.Ақпарат көзі : https://www.gov.kz/memleket/entities/edu/press/news/details/885752

Жетісу облысы Кербұлақ ауданы Қоғалы ауылында «Жанұя» отбасын қолдау орталығы ашылды. Бұл – облыстағы осындай төртінші орталық. Бұған дейін мұндай орталықтар өткен жылы Панфилов, Сарқан аудандары мен Текелі қаласында іске кіріскен болатын, - деп хабарлайды Жетісу облысы әкімінің баспасөз қызметі.«Жанұя» отбасын қолдау орталығы Мемлекет басшысының тапсырмасына сәйкес әлеуметтік жағынан осал отбасылардың өмір сүру сапасын жақсарту, олардың экономикалық дербестігіне және азаматтардың өмірлік қиын жағдайдан шығуына қолдау көрсету мақсатында жұмыс жасамақ.Қоғалыда кезінде аудандық емхана болып, кейін біршама уақыт бос тұрған ғимаратқа ағымды жөндеу жұмысы жасалып, құрал-жабдықтары сатып алынған. Оған жергілікті бюджеттен арнайы қаражат қарастырылды. Сөйтіп орталық іске кірісті.Аталған нысанның директоры Дәурен Жұмағалиевтің айтуынша, орталықта 15 адамға арналған жатын орын және балалар ойын бөлмесі бар, кір жуатын орын, асхана, тынығу бөлмесі жан-жақты жабдықталған. Алдағы уақытта мекемеге арнайы көлік беріледі деп күтілуде. Мұнда 19 адам тұрақты жұмыс істейді. Жаңа мекеме толықтай мемлекеттен қаржыландырылады.– Бұл орталықта отбасылық жанжалдарды шешуге бағытталған шаралар іске асырылып, қиын жағдайға тап болған адамдарға әлеуметтік, заңдық, психологиялық қолдау көрсетіледі. Тұрмыстық зорлық-зомбылық белгілері бар адамдарға бір айға дейінгі мерзімде уақытша тұру мүмкіндігі беріледі. Бұл мекеменің кәсіби мамандары өңірдегі түрлі әлеуметтік-тұрмыстық мәселелердің оң шешілуіне ықпал етеді деп сенемін, - дейді Д. Жұмағалиев.Жергілікті тұрғындар мұндай орталықтардың болғаны дұрыс деп есептейді.- Отбасы – мемлекеттің бір бөлшегі. Мемлекет мықты болуы үшін алдымен әр отбасы берік болуы керек. Қазіргі кезде әртүрлі әлеуметтік-тұрмыстық жағдайларға байланысты отбасылар, әсіресе жас отбасылар түрлі қиындықтармен бетпе-бет келіп жатады. Ажырасу да жиіліп кетті. Сондықтан дер кезінде отбасыларға қолдау көрсетудің маңызы зор, - дейді Қоғалы ауылдық округінің ақсақалдар кеңесінің төрағасы Серік Турбеков.Ендігі ретте өмірлік қиын жағдайға тап болған адамдарды ерте анықтау мен қолдауды ұйымдастыру үшін аудан бойынша мобильді топтар құрылады. Мобильді топ құрамында ауыл округтерінің әкімдері, әлеуметтік мәселелер жөніндегі қызметкерлер, білім беру мен денсаулық сақтау салалары және ішкі істер органдарының өкілдері қамтылады, яғни бұл істе барлық сала мамандары бірлесіп жұмыс істейді.Жалпы Жетісу облысында «Жанұя» отбасын қолдау орталықтары 2023 жылы Панфилов, Сарқан аудандары мен Текелі қаласында ашылған. Оларға 82 отбасы тіркеліп, психологиялық және әлеуметтік көмектер беріліп, қызмет көрсетілген. Ал биыл Кербұлақ ауданы Қоғалы ауылындағы орталықпен қатар жыл соңына дейін Қаратал, Алакөл аудандарында осындай нысандар ашылады, 2025 жылы Ескелді, Көксу, Ақсу аудандарында ашу жоспарланған. Жетісу облысы әкімінің баспасөз қызметі.Ақпарат көзі : https://www.gov.kz/memleket/entities/zhetysu-oblysy/press/news/details/885621

Астана қаласында 11 және 18 қараша аралығында өткен «WorldSkills Kazakhstan – 2024» республикалық чемпионатының жеңімпаздары анықталды. Қатысушылар 29 құзыреттілік бойынша бақ сынасты. Республикалық сайыста Түркістан облысының колледж студенттері 2 алтын, 1 күміс, 4 қола және 11 ерекше медальонға ие болды. Ал республика бойынша жалпы командалық есеппен Түркістан облысы 6 орыннан көрінді.Нақтырақ айтқанда, «Сән технологиясы» құзыреттілігі бойынша Түркістан жоғары көпсалалы қолөнер колледжінің студенті Жанерке Сауран І орынды және «Сырлау және әрлеу жұмыстары» құзыреттілігі бойынша Кентау көпсалалы коледжінің студенті Жанар Серік І орынды жеңіп алды. Жүлделі ІІ орынды «Кірпіш қалау» құзыреттілігі бойынша Түркістан индустриалды-құрылыс колледжінің намысын қорғаған Нурдавлат Жалолов иеленді. «Бастауыш білім беру» құзыреттілігінен Түркістан жоғары көпсалалы, қол өнер колледжінің студенті Айым Момбекова, «Ақпараттық кабельдік желілер» құзыреттілігі бойынша Түркістан Ахмет Ясауи кәсіби колледжінен Оразәлі Егізбай, «Мобильді робототехника» құзыреттілігі бойынша Түркістан Ахмет Ясауи кәсіби колледжінің студенттері Айдын Ермахан мен Ернұр Дүйсенбек, «Плитка жапсырудан» Анвар Исмаилов атындағы кәсіптік колледж студенті Мухаммадали Авазханов ІІІ орынды місе тұтты.Бұдан бөлек, Түркістан облысының намысын қорғап барған 11 студент арнайы медальондармен марапатталды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885664

Түркістанда 17 қараша – Халықаралық студенттері күні қарсаңында колледж студенттері арасында өткен «Спорт – біздің серігіміз!» атты спартакиада өз мәресіне жетті. Жабылу салтанатында Жастар ресурстық орталығының басшысы Ернар Бектаев сөз сөйлеп, жеңімпаздарды құттықтады.«Бұл спартакиада – спортты насихаттаудың жарқын үлгісі. Қатысушылардың ынта-жігері, спортқа деген құштарлығы ерекше болды. Барша жеңімпазды құттықтаймын және жастарымызды алдағы уақытта да осындай белсенділік танытып, жоғары жетістіктерге жете беруге шақырамын» деді.Шара барысында қатысушылар спорттың төрт түрінен сынға түсіп, өз шеберліктерін көрсетті. Аталған спартакиада жастар арасында достықты, бірлікті нығайтып, салауатты өмір салтын дәріптеуде үлкен үлес қосты.Сайыстың қорытындысы бойынша жеңімпаздар мен жүлдегерлер анықталып, марапатталды. Атап айтқанда 1-орынды Түркістан жоғары көпсалалы, қолөнер колледжі иеленді. Ал 2-орын Сайрам ауданының Д.Қонаев атындағы аграрлық-техникалық колледжіне, 3-орын – Ерқанат Тәңірбергенов атындағы Түркістан индустриалды-техникалық колледжіне бұйырды. Сонымен қатар, жекелей марапаттар табысталды. «Үздік ойыншы» номинациясымен Айдос Қалданбек, «Үздік шабуылшы» номинациясымен Өмірзақ Нұрсәт марапатталды.Айта кетейік, Түркістан облысы қоғамдық даму басқармасының «Жастар ресурстық орталығы» КММ-нің ұйымдастырған іс-шараның мақсаты салауатты өмір салтын насихаттау арқылы жастардың денсаулығын нығайту, әртүрлі оқу орындарының студенттері арасында достық қарым-қатынасты арттыру, жастардың спортқа деген қызығушылығын оятып, олардың шеберлігін шыңдау.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885666

Түркістан облысының цифрландыру, мемлекеттік қызметтер көрсету және архивтер басқармасының басшысы Марат Айнабеков Сарыағаш, Келес аудандарына іс-сапармен барды. Алдымен Сарыағаш ауданына қарасты Тың елді мекенінде орнатылған «Билайн» ұялы байланыс операторының орнатқан базалық станциясының жұмысымен танысты. Бүгінде станциядағы интернет желісінің жылдамдығы 106 мбит/с құрайды. Сонымен қатар, аудандағы Сіргелі елді мекенінде «Кселл» ұялы байланыс операторының орнатқан базалық станциясымен танысты. Онда интернет желісінің жылдамдығы 30 мбит/с. Бұдан бөлек, Алғабас елді мекенінде орнатылған «Кселл», «Билайн» байланыс операторларының орнатқан базалық станцияларының жұмысы таныстырылды. Онда интернет желісінің жылдамдығы 100 мбит/с құрайды.Сонымен қатар, басқарма басшысы Келес ауданына қарасты Абай ауылында орнатылған қоғамдық қауіпсіздікті қамтамасыз ететін бейнебақылау камераларын орнату барысымен танысты. Одан бөлек, аудандағы «Кселл» және «Билайн» ұялы байланыс операторларының тарапынан орнатылған базалық станцияларға барып, интернет желісінің жылдамдығының артқанына көз жеткізді. Айта кетейік, өңірдегі аудан-қалаларда жалпы бейнебақылау жүйесін арттыру жұмыстарын жүргізу негізінде биыл 200 дана бейнебақылау камерасын орнату жоспарлауда.Түркістан облысының Өңірлік коммуникациялар қызметіАқпарат көзі : https://www.gov.kz/memleket/entities/ontustik/press/news/details/885667

Түркістан облысының әкімі Дархан Сатыбалдының тапсырмасы бойынша, өңірдегі ауылдардың экономикасын өркендетіп, тұрғындар үшiн қолайлы өмір сүру ортасын қалыптастыру бағытында «Үлгілі ауыл» байқауы қолға алынған болатын. Осы орайда, «Үлгілі ауыл» байқауының жеңімпазын анықтау мақсатында облыстық конкурстық комиссияның отырысы өтті.Салалық басқармалар басшылығы, облыстық мәслихат, қоғамдық бірлестіктердің өкілдері қатысқан жиында қорытынды жасалып, аталған байқаудың жеңімпаздары анықталды. Нақтырақ айтқанда, Қазығұрт ауданы, Шарбұлақ ауылы бас жүлдені жеңіп алды. Жүлделі І орын Шардара ауданы, Көксу ауылына бұйырса, ІІ орын Сарыағаш ауданы, Мәдениет ауылына, ІІІ орын Созақ ауданы, Жартытөбе ауылына бұйырды. Байқау ережесіне сәйкес, бас жүлде иегеріне, яғни Қазығұрт ауданындағы Шарбұлақ ауылы үшін қажетті әлеуметтік нысан анықталып, 2025 жылға аталған нысанның құрылысы үшін облыстық бюджеттен тисті қаражатты бөлінеді деп жоспарланған.Естеріңізде болса, ережеге сәйкес байқау екі кезеңде өткізілді. Бірінші кезеңі – сәуір мен тамыз аралығында аудан көлемінде ұйымдастырылса, ал екінші кезең – облыстық деңгейде қыркүйек пен қараша аралығында жалғасын тапты. Байқаудың аудандық кезеңіне 16 аудан, қаладан жалпы 75 ауыл қатысқан. Нәтижесінде, облыстық кезеңге 16 ауыл (әр аудан, қаладан – 1-ден) жолдама алып, бақ сынады.Айта кетейік, арнайы құрылған жұмысшы топ барлық ауданды аралап, жеңімпаз ауылды анықтады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885671

Су сөздігіӨзендерді санациялау – өзендерді тазалау және тереңдету, олардың өткізу қабілетін арттыру мақсатында жүзеге асырылады. Бұл су тасқыны кезінде су басу қаупін азайтуға мүмкіндік береді.Ақпарат көзі : https://www.gov.kz/memleket/entities/water/press/news/details/885643

Су және ирригация министрлігінің бассейндік инспекциялары Төтенше жағдайлар министрлігі және жергілікті атқарушы органдармен бірлесіп еліміздегі 1502 гидротехникалық құрылысқа зерделеу жүргізді.Зерделеу су тасқыны кезеңіне дайындық аясында жүргізілді. Тексеру нәтижесінде гидротехникалық құрылыстардың иелеріне анықталған кемшіліктерді жою бойынша ұсыныстар берілді.Айта кетейік, елімізде 8 бассейндік инспекция бар. Ол Арал-Сырдария, Балқаш-Алакөл, Ертіс, Есіл, Жайық-Каспий, Нұра-Сарысу, Тобыл-Торғай және Шу-Талас бассейндік инспекциялары.«Барлық су қоймалары бекітілген кесте бойынша жұмыс істейді, жоспар су тасқынына қатысты болжамдарға байланысты түзетілетін болады. Көктемгі су тасқыны кезінде еріген қар суын қабылдауға бос орынды қамтамасыз ету үшін елдің солтүстік, батыс, шығыс және орталық су қоймаларынан су жіберілді. Қазақстанның оңтүстігіндегі су қоймалары су жинау режимінде жұмысын жалғастыруда»,- деп мәлімдеді Су ресурстарын реттеу, қорғау және пайдалану комитеті төрағасының міндетін атқарушы Гүлмира Имашева.Ақпарат көзі : https://www.gov.kz/memleket/entities/water/press/news/details/885659

2024 жылғы 24-30 қараша аралығында Алматы қаласында XVII «Еуразия» халықаралық кинофестивалі өтеді. Биылғы фестивальге 15-тен астам ел қатысады.Кинофестивальді ҚР Мәдениет және ақпарат министрлігі мен Шәкен Айманов атындағы «Қазақфильм» ұлттық киностудиясы ұйымдастыруда.Биылғы конкурс бағдарламасында үш құрлықтан келген 12 фильм көрсетіледі. Қатысушылары саналуан, ауқымы кең фестивальде ұсынылған фильмдер түрлі мәдениеттер мен көзқарастардың бай палитрасын көрсетеді. Конкурс Бангладеш пен Оңтүстік Кореядан бастап, Австрия мен Катарға дейінгі елдердің туындыларын қамтиды. Еуропа, Азия және Таяу Шығыстан келген шығармашылық топтар әмбебап тақырыптар мен жергілікті контекстті біріктіретін жұмыстарды ұсынбақ.2024 жылы «Еуразия» тек фильмдер фестивалі ғана емес, кино әлеміне саяхат болмақ. Іс-шара көрермендер мен қатысушыларға ұмытылмас әсер сыйлап, жаңа мүмкіндіктер ашады.Фестиваль демеушілері: Bazis-A халықаралық құрылыс компаниясы, KAZ Minerals тау-кен компаниясы, Sarens Kazakhstan, Salem Entertainment, Kinopark Theatres кинотеатрлар желісі және Astana Motors.Кинофестивальдің толық бағдарламасымен сілтеме арқылы таныса аласыз. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/885656

Бүгін облыс әкімі Серік Шәпкеновтің төрағалығымен облыстық Қазақстан халқы Ассамблеясының XXVІІІ сессиясы өтті,-деп хабарлайды облыс әкімінің баспасөз қызметі.Аймақ басшысы жиында өңірлік Ассамблея жұмысының маңызына тоқталып, этносаралық тұрақтылықты сақтауда бірлескен жұмыстар жалғаса беретінін айтты.- Мемлекет басшысы Қасым-Жомарт Кемелұлы Тоқаев қазіргі күрделі кезеңде елдің бірлігі мен ынтымағын сақтау – ең басты міндет екенін баса айтты. Бұл айналамыздағы геосаяси ахуал күрделеніп тұрған қазіргідей сын сағатта аса маңызды. Елдің бірлігі мен ынтымағын сақтау – бізге жүктелген ең басты міндет. Бұл тұрғыда баршаңыз татулық жолын жалғауға лайықты үлес қосады деген сенімдемін. Тәуелсіздік пен отаншылдық бірлік пен ынтымақтың негізін қаласа, әділдік пен жауапкершілік заң мен тәртіпті қамтиды. Еңбекқорлық пен кәсіби біліктілік - жасампаздық пен жаңашылдықтың кілті. Еліміздің жаңа буыны арасында осы құндылықтарды насихаттау ХХІ ғасырдың жаһандық қауіп-қатерлерін еңсеруге сенімді негіз болады,-деді С.Шәпкенов.Сессия отырысында қоғамдық келісім мен жалпыұлттық бірлікті қамтамасыз ету, тұрақтылықты сақтау, этносаралық келісімді нығайту туралы бірқатар мәселе талқыланды.Сессия қорытындысында ҚР-ның ел бірлігін нығайтуға, татулық пен келісімді сақтауға және рухани мәдениетті дамытуға қосқан елеулі үлесі үшін Атырау облысы Қазақстан халқы Ассамблеясы Ақсақалдар кеңесінің төрағасы Кеңес ҚосыбаевҚазақстан халқы Ассамблеясының «Бірлік» алтын медалімен марапатталды. Ал аналар кенесінің мүшесі Сара Ізмұханбетоваға ел бірлігін, қоғамдық келісім мен қазақстандық патриотизмді нығайтуға қосқан лайықты үлесі үшін Қазақстан халқы Ассамблеясының «Құрмет грамотасы» табыс етілді.Оған қоса, өңірлік Ассамблея өкілдеріне Атырау облысы әкімінің Алғыс хаты мен Құттықтау хаты берілді.Ақпарат көзі : https://www.gov.kz/memleket/entities/atyrau/press/news/details/885559

Астаналық колледж студенттері «Worldskills-2024» чемпионатында жоғары нәтижеге қол жеткізіп, топ жарды, деп хабарлайды елорда әкімдігінің ресми сайты.14-18 қараша күндері өткен республикалық чемпионатқа еліміздің әр өңірінен 550-ден астам студент 30 құзіреттілік бойынша өзара сайысып, біліміділігі мен тәжірибелерін ортаға салды. Олардың арасында электромонтаж, энергетика, кірпіш қалау, шанақты жөндеу, аспаздық және мейрамхана ісі, IT шешімдері, WEB-технологиялар, мобильді робототехника, мехатроника, прототиптеу сияқты құзыреттіліктер болды.Барлық командалық есеп бойынша Астана қаласының студенттері 5 алтын, 1 күміс, 5 қола медальды, сондай-ақ кәсіпқойлық үшін 6 медальон алып, еліміз бойынша командалық есепте бірінші орынды жеңіп алды.Республикалық байқаудың қорытынды кешіне ҚР Оқу-ағарту министрі Ғани Бейсембаев қатысып, барлық студентті жарқын белесімен құттықтады.Айта кетейік, жеңімпаздар келесі жылы Данияда өтетін EuroSkills чемпионатына қатысу үшін ұлттық құрамаға кіру мүмкіндігіне ие болды.Ақпарат көзі : https://www.gov.kz/memleket/entities/astana/press/news/details/885571

Көкшетау қаласында тұрғын үй қорын жаңғырту бағдарламасы аясында Уәлиханов – Гоголь, Саин-Быковский көшелерінің учаскесіндегі ескі 8 пәтерлі алты үйді бұзу сәтті аяқталды. Бұл кезең қалалық инфрақұрылымды жаңартудағы және тұрғындар үшін қолайлы жағдай жасаудағы маңызды қадам болды.Бұзылған үйлер техникалық жағынан қанағаттанарлықсыз жағдайда болды, бұл адамдардың қауіпсіздігіне қауіп төндірді. Оның орнына осы аумақта абаттандырылған аула аумақтарын, көгалдандыруды және сапалы инженерлік инфрақұрылымды қоса алғанда, өмір сүру жағдайлары жақсартылған заманауи тұрғын үй кешендері салынатын болады.Жаңғырту бағдарламасы тұрғын үй қорын жаңартып қана қоймай, азаматтардың өмір сүру деңгейін арттыруға мүмкіндік береді. Бағдарламаны іске асыруды бастау үшін бұрынғы меншік иелерінен 6 үйде 48 пәтер сатып алынды. Тұрғындар ақша алды немесе жаңа үйдегі тиісті алаңдағы пәтерлерді алады.Жоба Ақмола облысының әкімінің тапсырмасы бойынша уәкілетті ұйым – «Kokshe» ӘКК» АҚ іске асырылуда. «KOKSHETAU ENGINEERING» ЖШС еншілес компаниясы жақын арада инвесторлар мен құрылысты ұйымдастыру арасында конкурс өткізетін болады.«Конкурстық рәсімдер шеңберінде таңдалған инвестор құрылысты қаржыландыруды өз мойнына алады және болашақта басқа да қайта құру жобалары үшін пайдаланылатын көші-қон қоры үшін 48 пәтерді қайтаруға міндеттенеді. Қалған пәтерлер жобаның өтелуін қамтамасыз ету үшін нарықта іске асырылатын болады. Нысандардың құрылысын аяқтау және пайдалануға беру 2025 жылдың қараша айына жоспарланған», - деп атап өтті «KOKSHE» ӘКК» АҚ басқарма төрағасының орынбасары Әли Әлиев.Жалпы, Көкшетау қаласы бойынша тозығы жеткен үйлер жинақы орналасқан 11 жергілікті аймақты жаңғырту жоспарланған. Барлығы 800-ге жуық патер бұзылады. Ақпарат көзі : https://www.gov.kz/memleket/entities/aqmola/press/news/details/885575

15 қарашада Астана қаласында өткен ауыл шаруашылығы қызметкерлерінің бірінші форумы аясында Мемлекет басшысы Үкіметке Жылқы шаруашылығы институтын құруды тапсырды. Президент Қасым-Жомарт Тоқаевтың тапсырмасын орындау мақсатында Ақтөбе ауыл шаруашылығы тәжірибе стансасының негізінде «Қазақ жылқы шаруашылығы және жемшөп өндіру ғылыми-зерттеу институты» ЖШС құрылды. Айта кетейік, мекеме «Ұлттық ғылыми-білім беру орталығы» құрамында.Жаңа құрылған институттың жұмысы – асыл тұқымды жылқылардың сапасын жақсартуға, жылқы шаруашылығын белсенді дамытуға, ғылыми-зерттеу жұмыстарын жүргізуге және отандық тұқымды сыртқы нарыққа шығаруға бағытталған. Алдағы бес жылда асыл тұқымды жылқы санын 6-7 пайызға арттыру көделіп отыр.Жергілікті қостанай, адай және соғымға арналған мұғалжар, жәбе, күшім генотиптерін көбейту үшін селлекциялық және асылдандыру бағытында жұмыстар белсенді жүргізілмек. Ол үшін жылқылардың әртүрлі генетикалық топтары туралы ақпаратты сақтайтын деректер қорын және ұрықтар мен эмбриондар банкі құрылмақ. Сондай-ақ, биелерді қолдан ұрықтандыру зертханалық пунктін салып, арнайы жылқы өсіруші мамандарын дайындау жоспарланып отыр. Арнайы жылқы ветеринарлық клиникасын ашу арқылы ветеринариялық қызмет көрсету деңгейінің сапасы жақсарады - дейді мамандар.2035 жылға дейін жылқы шаруашылығында ғылыми зерттеулердің басым бағыттарының бірі отандық популяциядағы жылқылардың генетикалық әлеуетін селекциялық, технологиялық әдістермен арттырып, Қазақстанның әртүрлі өңірлерінің тауар шаруашылықтарына кеңінен енгізу. Мұның бәрі өсірілетін тұқымдардың өнімділігінің 20-25%-ға өсуін қамтамасыз етеді.Белгіленген жоспарларды іске асырудың негізгі шарттарының бірі шетелдік ғылыми-зерттеу орталықтарымен, университеттермен және халықаралық стандартқа сай зертханаларымен бірлесе жұмыс істеу. Бірлескен ғылыми-техникалық бағдарламаларды іске асыру және шетелдік әріптестермен ақпарат алмасу арқылы еліміздің жылқы шаруашылығына озық тәжірибелерді енгізуге және оны халықаралық аренада бәсекеге қабілетті етуге мүмкіндік бар.Ақпарат көзі : https://www.gov.kz/memleket/entities/moa/press/news/details/885568

Жыл басынан бері көпбалалы отбасыларға берілетін мемлекеттік жәрдемақымен орта есеппен 575,8 мың отбасы жалпы сомасы 389,8 млрд теңге мөлшерінде қамтылды, оның ішінде қазан айында 570 мың отбасына 41 млрд теңге мөлшерінде жәрдемақы төленді.Бұл мемлекеттік жәрдемақыға бірге тұратын 4 және одан да көп кәмелетке толмаған немесе 23 жасқа дейінгі күндізгі бөлімде оқитын студент балалары бар отбасылар табысына қарамастан үміткер бола алады.Төлем мөлшері бала санына қарай есептеліп төленеді және 2024 жылы:- 4 баласы бар отбасыларға – 16,03 АЕК немесе 59 183 теңге;- 5 балаға – 20,04 АЕК немесе 73 988 теңге;- 6 балаға – 24,05 АЕК немесе 88 793 теңге;- 7 балаға – 28,06 АЕК немесе 103 598 теңге;- 8 және одан да көп баласы бар отбасыларға – әрбір балаға 4 АЕК немесе 14 768 теңге мөлшерінде төленеді.2024 жылғы 1 қаңтардан бастап балалы отбасыларға тағайындалатын мемлекеттік жәрдемақылардың мөлшері 7%-ға артқанын атап өтеміз.Биыл көпбалалы отбасыларға мемлекеттік жәрдемақы төлеуге 474 млрд теңге қарастырылған.Ақпарат көзі : https://www.gov.kz/memleket/entities/enbek/press/news/details/885600