Астанада Ішкі істер министрінің орынбасары – Ұлттық ұланның Бас қолбасшысы Аңсаған Балтабековтың төрағалығымен әскердің басшылық құрамының қатысуымен кеңейтілген кеңес өтті.Отырыста құқықтық тәртіп әскерлерінің 2025 жылдың бірінші тоқсанындағы қызметтік-жауынгерлік қызметінің қорытындылары егжей-тегжейлі талданды. Кеңес барысында өңірлік қолбасшылықтар қолбасшыларының, бөліністер басшыларының баяндамалары тыңдалды. Есептердің тыңдалуы әскердің ағымдағы жай-күйін жан-жақты бағалауға және алдағы кезеңге арналған жоспарларды белгілеуге мүмкіндік берді.Мәселен, 2025 жылдың бірінші тоқсанында Ұлттық ұлан бақылаушыларының қарауылдары мен әскери жасақтары 400-ге жуық ұялы телефон, 220-дан астам суық қару мен пышақтау-кесу құралдарын, 750 граммға жуық есірткі заттары мен 50 литрден аса спирті бар сұйықтық тәркіледі. Әскер қарауылдары түрмеге тыйым салынған заттарды кіргізудің 35 фактісіне тосқауыл болған. Сондай-ақ Қылмыстық-атқару жүйесі мекемесіне заңсыз жолмен рұқсат етілмеген зат алып кірмек болған 26 азаматты ұстаған.Бұдан бөлек, ұландықтар өрт сөндірудің және адамдарды құтқарудың 11 жағдайына тікелей атсалысқан. Әскери қызметшілер алғашқы тоқсанда 45 жоғалған зат пен 91 смартфон тауып, иелеріне қайтарды. Қызмет атқару кезінде жауынгерлер жүрек талмасы, демікпесі мен ұстамасы бар және басқа да себептерден зардап шеккен адамдарға жедел көмек көрсетті. Сондай-ақ өз-өзіне қол жұмсамақ болған немесе суға батып бара жатқан азаматтардың өмірін сақтап қалды.Өз сөзінде генерал-майор Аңсаған Балтабеков елордада өтетін әскери шерудің, сондай-ақ еліміздің аумағында Ұжымдық қауіпсіздік туралы шарт ұйымының қолдауымен өтетін "Кобальт-2025" халықаралық жаттығуларының дайындығына назар аударды.— Қазақстан Республикасының Президенті Қасым-Жомарт Тоқаев пен Ішкі істер министрі алдағы басымдықты нақты белгіледі: ішкі істер органдары мен Ұлттық ұлан әрқашан заңдылық пен тәртіптің үлгісі болуы тиіс. Құқықтық тәртіп әскері елдегі құқықтық тәртіпті нығайтуға және тұрақтылықты қамтамасыз етуге елеулі үлес қосуға міндетті. Бұл ретте бізге үлкен сенім артылып, жауапкершілік жүктелді. Қойылған міндеттердің көлемі жыл сайын артып келеді, сондықтан бүгінгі күні кәсіби, құзыретті кадрларды даярлау ісі қарқынды жүргізілуі қажет, — деді генерал-майор А.Балтабеков.Кеңес барысында Мемлекет басшысының ҚР ІІМ Ұлттық ұланын сандық және сапалық тұрғыда дамытуға бойынша тапсырмаларының іске асырылуына ерекше назар аударылды. Бас қолбасшы басшылық құрамға осы бағыттағы мақсаттардың орындалуын қатаң бақылауды тапсырды.Айта кетейік, бұған дейін Қазақстан Республикасы Ұлттық ұлан академиясында "Қазақстанның әскери қауіпсіздігін қамтамасыз ету аясында әскери білім беруді дамыту” тақырыбында VII Халықаралық ғылыми-практикалық конференция өткен болатын.Конференция барысында офицерлердің құқықтық мәдениетіне, әскери кадрларды даярлау бағдарламаларын жетілдіру және халықаралық ынтымақтастықты дамыту мәселелеріне ерекше назар аударылды.Кеңес қорытындысында генерал-майор Аңсаған Балтабеков алдағы кезеңге арналған бірқатар басым міндеттерді белгіледі. Негізгі тапсырмалардың бірі көктемгі әскерге шақыру науқанын жоғары деңгейде ұйымдастыру болды. Бұл құқықтық тәртіп әскерлерін жасақтау мен олардың жауынгерлік қабілетін сақтаудың маңызды аспектісі болып табылады. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/975148?lang=kk

Бастаушы ауылдық кітапханасында 11 сәуір күні 1 - сыныбымен Ғарышкерлер күніне арналған тәрбие сағаты өтті.Іс-шараның мақсаты: балалардың ғарышкерлік тарихына деген танымдық қызығушылығын қалыптастыру, оқушылардың зияткерлік және шығармашылық қабілеттерін дамыту. Бұл күні басты кейіпкер Юрий Алексеевич Гагарин болды, ол әлем тарихындағы ғарыш кеңістігіне ұшқан алғашқы адам. Балалар ғылымның дамуына баға жетпес үлес қосқан біздің қазақстандық ғарышкерлердің ғарышқа ұшуы туралы білді. Балалар ғарышкерлердің өмірінен қызықты деректерді білді, ғарыштық викторина сұрақтарына жауап берді.Ақпарат көзі : https://www.gov.kz/memleket/entities/vko-samar-bastaushy/press/news/details/975182?lang=kk

6 шілде — Астана күніне орай Қазақстан Республикасының Пусан қаласындағы Бас консулдығында азаматтарды қабылдау ЖҮРГІЗІЛМЕЙДІ.Құрметпен,Қазақстан Республикасының Пусан қаласындағы Бас консулдығы Ақпарат көзі : https://www.gov.kz/memleket/entities/mfa-busan/press/news/details/1253185?lang=ru

Алматыда Ұлы Отан соғысындағы Жеңістің 80 жылдығына арналған «Менің Жеңіс тарихым» челленджі басталды. Онлайн-акцияға мектеп оқушылары, жастар мен алматылықтар белсенді қатысып жатыр. Олар соғысқа қатысқан туыстарының немесе әскери жылдардағы отбасылық мұрағаттағы фотосуреттерін әлеуметтік желілерге жариялап, оларды қысқаша әңгімелермен немесе естеліктермен бірге ұсынуда.Алматылықтардың әрбір отбасы дерлік өз атасы мен әжесінің естелігін қастерлеп сақтайды – бұл қара-ақ фотосуреттер, сарғайған хаттар, жеке заттар болуы мүмкін. Біздің бейбіт күніміз үшін жанын қиған батыр ата-бабаларымыздың ерліктері, Отанына адал болған жүздеген мың қазақстандықтардың жадында мәңгілікке қалады!Мысалы, Алматы тұрғыны Ирина Амирова өз аталарының оқиғасымен бөлісті.«Біздің отбасымызда соғысқа екі арғы атам қатысқан. Бірі – жаяу әскер, екіншісі – сапер болған. Олар бір-бірімен таныс болмаған, бірақ олардың жолдары Жеңіске деген сенімде түйісті. Бірі аяғынан айырылып, бірақ өмірге деген сүйіспеншілікпен оралды. Екіншісі 1943 жылы Смоленск түбінде хабар-ошарсыз кеткен. Оның есімі обелискке қашап жазылған, біз жыл сайын мамырда сол жерге гүл апарамыз. Бұл екі тағдыр – соғыстың қос қыры: қаза қайғысы мен төзім. Отбасымыз олардың естелігін сақтайды, өйткені бұл бейбіт өмір бізге қандай бағамен келгенін ешкім ұмытпауы керек. Бұл – менің Жеңіс тарихым».Тағы бір әлеуметтік желі қолданушысы Айжан Маратова атасының ағасы туралы айтып берді.«Атамның ағасы Ленинградты жанкештілікпен қорғағандардың бірі болған. Соғыс жайлы сирек айтатын, көбіне үнсіз қалатын, ішкі жан-дүниесінде көп нәрсені жасырып жүретін. Жеңіс күні ол әрқашан сабырлы болатын. Бірақ бір жылы, бүкіл отбасымызбен қаза тапқандар ескерткішіне барғанда, оның ерні дірілдеп, көзінде жас жылтырап тұрғанын көрдім. Ол жай ғана былай деді: "Шынайы жеңіс – тек қалаларды азат етуде емес, фашизмді жеңуде емес. Жеңіс – халықтың бәрін бастан өткеріп, адамшылықтан айырылмай, аман қалғанында". Бұл сөздер мәңгі есімде қалды».Әлеуметтік желілерде алматылықтар өздерінің ата-әжелерінің соғыс жылдарындағы оқиғаларымен белсенді бөлісуде. Дәл осы жерде ерлікпен Отанын қорғаған атақты атқыштар дивизиялары құрылған болатын.Соғыстың алғашқы күндерінде Алматы маңында оқ ату мен қазіргі заманғы соғыс өнеріне үйрететін оқу-жаттығу алаңдары пайда болды. 1941 жылы тек Алматыдағы атқыштар-пулеметшілер училищесі ғана армияға 2429 жас офицер дайындады.Әскерге шақырылғандар мен еріктілер қатарынан генерал-майор Иван Панфилов басқарған аты аңызға айналған 316-атқыштар дивизиясы құрылды. Бұл дивизия соғыстың шешуші шайқастарында иық тірестіре ерлік көрсетті.1942 жылдың 13 тамызында Алматыдан майданға 100-атқыштар бригадасы аттанды. Ол алғашқы ұлттық құрамалардың бірі болды.Ақпарат көзі : https://www.gov.kz/memleket/entities/almaty-almaly/press/news/details/975126?lang=kk

Брюссель, 2025 жылғы 12 сәуір — Еуропалық Одақтың астанасы Брюссель қаласында Наурыз мейрамы салтанатты түрде аталып өтті. Іс-шараны Қазақстан Республикасының Бельгия Корольдігі мен Люксембург Ұлы Герцогтігіндегі Елшілігі ұйымдастырды. Демеушілік көмек көрсеткендер: Eurasian Resources Group (ERG), Jan De Nul, Ahlers, Turkish Airlines, Валлондық Брабанттағы Қазақстанның құрметті консулы А. Сусарова және т.б.Мерекелік шараға қазақ диаспорасының өкілдері, қазақстандық студенттер, Бельгия мен Люксембургтің мемлекеттік, қоғамдық ұйымдары мен іскер топтарының өкілдері, сондай-ақ бұқаралық ақпарат құралдарының өкілдері қатысты.Іс-шарада Қазақстан Республикасының Бельгиядағы Төтенше және Өкілетті Елшісі Марғұлан Баймұхан құттықтау сөз сөйледі. Ол, Наурыздың жаңару, бейбітшілік, келісім мен бірліктің символы екендігін атап өтіп, бұл мейрам Орталық Азия халықтарының терең мәдени дәстүрлерін бейнелейтінін және елдер арасындағы мәдени диалогты нығайтуға маңызды үлес қосатынын айтты.Қонақтарға мазмұнды мәдени бағдарлама ұсынылды: қазақтың салт-дәстүрлері, ұлттық ойындар (қанат тартыс, асық ату, садақ ату), музыкалық шығармалар көрсетілді. Көрнекті суретші Г. Тұрлымұратованың көркем шығармалар көрмесі мен ұлттық киімдер көрсетілімі үлкен қызығушылық тудырды. Сонымен қатар, спорттық шаралар (волейбол) және демеушілердің (Turkish Airlines) қолдауымен Қазақстанға авиабилеттің ұтыс ойыны өткізілді.Іс-шара аясында қазақтың ұлттық тағамдарының, соның ішінде молшылық пен берекенің символы — басты тағам саналатын наурыз-көженің дәмін тату ұйымдастырылды.Мереке аясында қайта жөнделіп, жаңғыртылған «Kazakhstan Born Bold» атты көпфункционалды спорт алаңының тұсау кесері өтті.Брюссельдегі Наурыз мейрамы Қазақстан мәдениетінің байлығы мен халықтар арасындағы достық байланыстарды нығайтудың, өзара түсіністік пен мәдениетаралық құрмет қағидаттарын ілгерілетудің жарқын көрінісіне айналды. Ақпарат көзі : https://www.gov.kz/memleket/entities/mfa-brussels/press/news/details/975097?lang=kk

Ұлттық ұлан спорт командасын даярлау орталығының аға маманы (дене шынықтыру және спорт бойынша аға нұсқаушысы) Милад Карими Хорватияның Осиек қаласында өткен спорттық гимнастикадан әлем кубогында қола медаль жеңіп алды.Едендегі еркін жаттығулар финалында ефрейтор Карими 13,966 ұпай жинап, жоғары шеберлік көрсетті. Бұл оған үшінші орынды жеңіп, құрмет тұғырына көтерілуге мүмкіндік берді.Хорватияда өткен дода Әлем кубогы сериясындағы төртінші кезең болды және қатысушылардың рекордтық санын жинады — яғни 35 ел спортшылары бақ сынады. Қазақстан құрамасының құрамында Нариман Құрбанов, Зейнолла Ыдырысов (атқа міну жаттығулары), Асан Сәлімов (тірек секіру) және Милад Карими өнер көрсетті. Милад тек едендегі еркін жаттығуларда ғана емес, сонымен қатар зілтемірде де бақ сынасты.Кезең қорытындысы бойынша Қазақстан екі қола медаль жеңіп алды. Нариман Құрбанов 14,233 ұпаймен ат спорты бойынша финалда үштікке ілінді.Ұландық Милад Каримидің жетістігі — оның жеке көрсеткіші ғана емес, сондай-ақ қатарында нағыз чемпиондар қызмет ететін Ұлттық ұлан үшін де үлкен мақтаныш. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/975096?lang=kk

Кеңес Одағының Батыры, Халық қаһарманы армия генералы Сағадат Нұрмағамбетов атындағы әскери колледжде көшет отырғызылды.Экологиялық акцияға Тәрбие және идеологиялық жұмыстар департаментінің бастығы әділет полковнигі Тілеухан Басқожаев, Әскери білім және ғылым департаментінің бастығы полковник Мұрат Олжабаев, армия генералы Сағадат Нұрмағамбетов атындағы әскери колледждің бастығы полковник Ғазиз Төлеушев, әскери қызметшілер мен кадеттер қатысты.– Бұл күндері "Таза Қазақстан" акциясы аясында Қарулы күштердің барлық әскери бөлімдерінде экологиялық акциялар өтуде. Әрбір отырғызылған көшет, ол тыл еңбеккерлері мен жалпы Жеңіс үшін күрескен жауынгерлерге құрмет пен ризашылықтың символы іспеттес, - деп атап өтті әділет поковнигі Тілеухан Басқожаев.  Әскери колледж бастығы полковник Ғазиз Төлеушев атап өткендей, оқу орнының аумағын көгалдандыру кадеттер үшін маңызды оқиға болып саналады.– Біз үшін де, тәрбиеленушілеріміз үшін де бұл көшеттер Ұлы Отан соғысының батырлары сыйлаған бейбітшіліктің символына айналады. Ал, бүгінгі күні елдің тыныштығын қорғауда тұрған қазіргі әскери қызметшілерге алғыс пен құрмет іспеттес, сондай-ақ ол болашақ ұрпаққа қазақстандық жауынгерлердің ерлігін  еске салады, – деді Ғазиз Төлеушев.Естеріңізге сала кетейік, "Таза Қазақстан" акциясы аясында Ұлы Отан соғысының батырларын еске алу үшін бүкіл ел бойынша мыңдаған көшеттер отырғызылады. Ақпарат көзі : https://www.gov.kz/memleket/entities/mod/press/news/details/975093?lang=kk

Телеграмм КС - https://t.me/consot_kz   Страсбург, 2025 жылғы 9-10 сәуір – ҚР Конституциялық Сотының Төрайымы Э.Азимова және ҚР Парламенті Сенатының Төраға орынбасары О.Перепечина Еуропа Кеңесінің (ЕК) штаб-пәтеріне жұмыс іссапарымен барды.Іссапар аясында қазақстандық делегация ЕК Бас хатшысы А.Берсе, ЕК Адам құқықтары жөніндегі комиссары М.О’Флаэрти, Еуропа Кеңесінің Парламенттік Ассамблеясы (ЕКПА) Президенті Т.Русопулос, ЕКПА-ның "Еуропалық консерваторлар, патриоттар және одақтастары" саяси фракциясының Төрағасы, Қазақстан бойынша баяндамашы Ж.Немет, Адам құқықтары жөніндегі Еуропалық сотының судьясы А.Арутюнян, Венеция комиссиясы хатшысының орынбасары Д.Фрейманн және Страсбург сотының төрағасы Ф.Бабомен кездесті.А.Берсемен кездесуде Қазақстан мен Еуропа Кеңесінің екіжақты ынтымақтастығын одан әрі дамыту мәселелері қарастырылды. Еуропалық ұйымның басшысы Қазақстандағы демократиялық процестер, конституциялық реформалар мен Парламент қызметі туралы жан-жақты ақпарат алды.Өз кезегінде ЕК Бас хатшысы А.Берсе Қазақстанды ұйымның маңызды серіктесі ретінде атап өтті. Оның айтуынша, Қазақстан мен Еуропа Кеңесін адам құқықтарын нығайтуға деген ортақ ұмтылыс біріктіреді. Ол Қазақстанның ұйым шеңберіндегі түрлі бастамаларға, соның ішінде сыбайлас жемқорлыққа қарсы күреске белсенді қатысуын жоғары бағалады. А.Берсе Еуропа Кеңесінің түрлі бағыттары бойынша бірлескен жұмысты жалғастырудың маңыздылығын атап өтті.Қазақстан делегациясы Адам құқықтары жөніндегі Комиссарға Президент Қ.Тоқаевтың елдің саяси және әлеуметтік-экономикалық жүйесін түбегейлі өзгертуге бағытталған бастамалары туралы ақпарат берді. Қазақстандағы реформалар халық сұранысымен байланысты екені және мемлекет қоғаммен ашық диалог орнатуға және адам құқықтарын сақтау тұрғысынан азаматтардың сұраныстарына жедел әрекет етуге ерекше көңіл бөлетіні айтылды.М.О’Флаэрти Қазақстандағы реформалардың оң нәтижелерін, өлім жазасының жойылуын ризашылықпен атап өтті. Ол билікті орталықсыздандыру процесінің маңыздылығын және Конституциялық соттың ұлттық құқық қорғау жүйесіндегі рөлін ерекше атап өтті. Мемлекеттің әлеуметтік осал топтарды қолдау жөніндегі бастамаларын қолдайтынын білдірді.ЕКПА Президентімен кездесуде парламентаралық ынтымақтастық мәселелері талқыланды. Парламенттік дипломатияның тікелей байланыстар орнатуда және маңызды мәселелерді шешуде маңызды рөл атқаратыны айтылды. Т.Русопулосқа ҚР Парламентінің реформаларды жүзеге асыру, заңнаманы жетілдіру және құқық үстемдігін нығайту бағытындағы заң шығару қызметі туралы ақпарат берілді. Сонымен қатар, ЕКПА Президентіне Қазақстанда Әлемдік және дәстүрлі діндер лидерлерінің съезі туралы айтылды.ЕКПА-дағы саяси фракция төрағасы Ж.Неметпен кездесуде Қазақстандағы адам құқықтарын қорғау жағдайы талқыланды. Еуропалық депутат адам құқықтары саласындағы реформаларды іске асырудың маңыздылығын атап өтіп, Қазақстанмен ынтымақтастықты дамытуға қолдау білдірді. Бұл контексте көршілестік саясаты шеңберінде Қазақстанмен ынтымақтастықтың басымдықтарын іске асыруға ерекше көңіл бөлінеді.Адам құқықтары жөніндегі Еуропалық сотта Қазақстандағы реформалар туралы егжей-тегжейлі әңгіме өтті. Судья А.Арутюнянға Конституциялық соттың қызметі және реформалар туралы жан-жақты ақпарат берілді. Конституциялық бақылаудың рөлі мен оны іске асыру тетіктері бойынша сындарлы пікір алмасу болды.Венециялық комиссияда өткен кездесуде одан әрі ынтымақтастықтың практикалық қадамдары қарастырылып, өзара іс-қимылдың басым бағыттары белгіленді.Қазақстанда Конституциялық соттың құрылуына байланысты реформалар Страсбург сотының Төрағасы Ф.Бабомен кездесу барысында талқыланды. Екі тарап өзара тиімді ынтымақтастықты дамытуға ұмтылысын растады. https://www.gov.kz/memleket/entities/mfa-strasbourg/press/news/details/975091?lang=kk Ақпарат көзі : https://www.gov.kz/memleket/entities/ksrk/press/news/details/975258?lang=kk

Облыс орталығындағы Кеңес Одағының Батыры Иманғали Білтабанов көшесіндегі ескерткіш тақтаға гүл шоқтарын қою рәсімі өтті. Ақтөбеліктер 10 сәуірде 100 жылдығы болған Ұлы Отан соғысының жауынгері, Кеңес Одағының Батыры Иманғали Білтабановты еске алуға арналған шараға көптеп жиналды. Олардың қатарында әскери қызметшілер, Қарулы күштердің ардагерлері, Ауған соғысына қатысушылар, сондай-ақ батырдың туыстары мен жақындары бар.Иманғали Білтабанов 1925 жылы Қобда ауданы Қосөткел ауылында дүниеге келген. 1943 жылы майданға шақырылып, 289-шы Нарва атқыштар полкінің құрамында соғысқан.Польша жеріндегі ұрыс қимылдары кезінде пулемет есептобының командирі сержант Иманғали Білтабанов Оппельн қаласының оңтүстігіндегі Одер өзенінен сәтті өтті. 1945 жылы 25 қаңтарда Батыс жағалаудағы Одерфельд ауылының маңындағы жағажайды ұстап тұру үшін болған шайқаста пулеметпен ондаған жау сарбазы мен офицерінің көзін жойды. Осы ұрыста жараланып, контузия алса да ұрыс алаңын тастап кетпеді. 1945 жылы 26 ақпандағы шайқаста ерлікпен қаза тапты.Көрсеткен ерлігі үшін КСРО Жоғарғы Кеңесі Президиумының Жарлығымен Иманғали Білтабановқа қаза тапқаннан кейін Кеңес Одағының Батыры атағы берілді.Қосөткел ауылындағы ауылдық округ батырдың есімімен аталады. Бір минут үнсіздікпен басталған салтанатты шара Иманғали Білтабановтың ескерткіш тақтасына гүл шоқтарын қоюмен аяқталды.Ақпарат көзі : https://www.gov.kz/memleket/entities/mod/press/news/details/975090?lang=kk

Елордалық әскери авиабазада БҰҰ миссиясы аясында (UNDOF) Голан жоталарында қызмет атқарып, бір жылдан кейін елге оралған Қазақстанның тұңғыш бітімгерлік контингентін салтанатты қарсы алу рәсімі өтті.Құрмет қарауыл ротасының сүйемелдеуімен бітімгерлік қызмет атқарған әскери қызметшілерді Қорғаныс министрлігінің басшылығы, Қарулы күштердің ардагерлері мен әріптестері қарсы алды.Қорғаныс министрі генерал-полковник Руслан Жақсылықов әр бітімгердің қолын алып, жеке құрамға алғысын білдірді. Ол сондай-ақ, Қазақстан армиясының тарихында алғаш рет Голан жоталарында "БҰҰ-ның бөлінуді бақылау жөніндегі күштері" миссиясында өзінің қару-жарағы мен техникасымен дербес ұлттық контингент орналастырылғанын атап өтті.- Бұл миссия аласапыран аймақта халықаралық бейбітшілік пен тұрақтылықты сақтау жөніндегі маңызды міндет болды. Сіздердің күш-жігерлеріңіз назардан тыс қалмай, халықаралық аренада Қазақстанның беделін жауапты, әрі бейбіт мемлекет ретінде одан әрі нығайтуға негіз болды. Адал қызметтеріңіз бен жауынгерлік тапсырманы орындаудағы жауапкершіліктеріңіз, сондай-ақ, қазіргі таңда басынан қиын кезеңді өткеріп жатқан адамдарға көмек қолын созғандарыңыз үшін алғыс айтамын, – деп атап өтті қорғаныс ведомствосының басшысы.Бітімгерлік ротасының командирі подполковник Жігер Аипов Фауар базасында миссияны орындау барысында қазақстандық контингент 600-ден астам тапсырманы орындағанын атап өтті.- Осыдан бір жыл бұрын біздің 139 адамнан тұратын алғашқы бітімгерлік контингентіміз Голан жоталарына аттанды. Жауапкершілік аймағында ротаның жеке құрамы жүктерді алып жүру бойынша патрульдік және гуманитарлық қызмет атқарды. Біз 4 эвакуация жасадық және 400-ден астам жарылмаған заттардың жойдық, - деді ол.Қиын-қыстау кезеңде ер адамдармен бірге БҰҰ-ның Голан жоталарындағы миссиясында 7 әйел әскери қызметші қызмет атқарды.Алға қойылған міндеттерді ойдағыдай орындағаны үшін қазақстандық бітімгерілік контингенттің жеке құрамы БҰҰ Миссиясы мен Хатшылығы басшылығының  жоғары бағасына ие болды.Ақпарат көзі : https://www.gov.kz/memleket/entities/mod/press/news/details/975054?lang=kk

Страсбург, 2025 жылғы 10 сәуір – Еуропа Кеңесінің Парламенттік Ассамблеясының (ЕКПА) көктемгі сессиясы аясында Қазақстандағы демократиялық өзгерістерді іске асыруға арналған «Демократиялық реформалар – тұрақтылық пен өркендеудің негізі» атты дөңгелек үстел өтті.Іс-шараға Қазақстан Республикасы Конституциялық Сотының Төрайымы Э.Әзімова, ҚР Сенаты Төрағасының орынбасары О.Перепечина, ЕКПА саяси тобының Төрағасы Ж.Немет, Венеция Комиссиясы хатшылығының директоры С.Гранат-Менгини, GRECO Атқарушы хатшысы Л.Стойка, Еуропа Кеңесі бағдарламаларын үйлестіру Директорат бөлімінің басшысы Ш.Дюрр, Қазақстан халқы Ассамблеясының өкілдері және халықаралық зерттеу орталықтарының сарапшылары қатысты.Э.Әзімова өз сөзінде Конституцияның үстемдігін нығайту үдерісін, конституциялық бақылау институтының дамуын және Қазақстандағы адам құқықтары мен бостандықтарын қорғаудағы сот билігінің рөлін атап өтті.Іс-шараға қатысушылары Президент Қ.Тоқаевтың Қазақстанның саяси жүйесін жаңғыртуға, ұлттық құқық қорғау тетіктерін күшейтуге, мемлекеттік басқару жүйесінің жауапкершілігін арттыруға бағытталған бастамаларының іске асырылу барысын талқылады.Сонымен қатар, адам құқықтарының күн тәртібіне, сот жүйесінің тәуелсіздігін қамтамасыз етуге, сыбайлас жемқорлыққа қарсы саясатқа және демократиялық құндылықтарды ілгерілету саласындағы халықаралық ынтымақтастыққа назар аударылды.Жүргізілген реформалардың нәтижесінде айтарлықтай оң өзгерістер орын алғаны атап өтілді.Еуропа Кеңесінің өкілдері Қазақстанмен өзара тиімді ынтымақтастықты дамытуға дайын екендіктерін растады және елдің құқық қорғау тәжірибелерін жетілдіру, адам құқықтары мен заң үстемдігін нығайту саласындағы ілгерілеуін ерекше атап өтті.Ақпарат көзі : https://www.gov.kz/memleket/entities/mfa-strasbourg/press/news/details/975085?lang=kk

2025 жылғы 11 сәуірде онлайн-форматта ҚР Цифрлық даму, инновациялар және аэроғарыш өнеркәсібінің бірінші вице-министрі Қаныш Төлеушин мен ПИР Ақпараттық технологиялар және телекоммуникацияның бірінші вице-министрі – федералды хатшысы Хан Заррар Хашам арасында келіссөздер өтті.Тараптар АТ саласындағы ынтымақтастықты жолға қою перспективаларын егжей-тегжейлі талқылап, нақты бағыттарды айқындады.Қаныш Төлеушин Қазақстанның ІТ-нарығындағы ағымдағы жағдай, онлайн-форматта мемлекеттік қызметтерді ілгерілетудегі прогресс, жасанды интеллект, блокчейн технологиялары, финтех және т.б. дамыту тұрғысында жүргізіліп жатқан жұмыстар туралы айтып берді.Өз кезегінде Федералды хатшы ПИР үкіметінің басымдықтары мен АТ секторында жүзеге асырылып жатқан саясат туралы хабардар етті.Х. З. Хашам Қазақстан тарапының айтылған ұсыныстарын қолдап, ҚР-мен ынтымақтастықты жандандыруға қызығушылық білдірді.Өз кезегінде, ҚР Елшісі Е.Қыстафин 2025 жылға жоспарланған іс-шаралар туралы айтып, осы жылдың сәуір айында Үкіметаралық Комиссия отырысы шеңберінде қол қоюға жоспарланған құжаттарды келісуді жеделдетуді ұсынды.Кездесу қорытындысы бойынша а.ж. сәуір айының соңында ақпараттық технологиялар және телекоммуникациялар жөніндегі Бірлескен жұмыс тобының 1-ші отырысын ұйымдастыруға уағдаластыққа қол жеткізілді, онда бірлесіп іске асыру үшін нақты жобалар қарастырылатын болады.Ақпарат көзі : https://www.gov.kz/memleket/entities/mfa-islamabad/press/news/details/975081?lang=kk

Вашингтон, 2025 жылғы 11 сәуір – Джорджтаун университетінде Еуразиялық, Ресейлік және Шығыс Еуропалық зерттеулер орталығы (CERES) ұйымдастырған «Crude Awakening» конференциясы өтті. Іс-шара аясында сарапшылар мен саясаткерлер Орталық Азиядағы өңірлік үдерістер мен энергетикалық қауіпсіздік мәселелерін кеңінен талқылады.Панельдік отырыстардың бірінде Қазақстан Республикасының Елшісі Ержан Ашықбаев негізгі спикер ретінде сөз сөйледі. «Энергетикалық болашақ және қазақстандық-америкалық қатынастар» тақырыбындағы баяндамасында Елші Қазақстан мен АҚШ арасындағы стратегиялық әріптестіктің өзектілігін атап өтіп, өңірдің энергетикалық трансформациясы экономикалық шынайылықтарды, орнықты даму қағидаттарын және өңірлік тұрақтылықты ескере отырып жүргізілуі тиіс екенін баса айтты.Елші Қазақстанның уран мен сирек кездесетін пайдалы қазбалар қорына бай ел ретінде жаһандық энергетикалық қауіпсіздікке қазірдің өзінде үлес қосып отырғанын және жаңа энергетикалық архитектураларды қалыптастыруға белсенді қатысуға дайын екенін еске салды. Бұл бағыттар қатарында бейбіт ядролық энергетиканы дамыту мен сирек кездесетін металдары саласындағы әріптестікті кеңейту бар.«Біз тек шикізат жеткізуші ғана емес, жаһандық энергетикалық көшудің толыққанды қатысушысы болуға ұмтыламыз», – деді ол.Конференция барысында өңірлік энергетика мәселелеріне қатысты сараптамалық пікірлерімен белгілі зерттеушілер Брианна Тодд (NESA орталығы), Артемий Калиновский (Temple университеті) және Вадим Гришин (Джорджтаун университеті) бөлісті. Олар Орталық Азия энергожүйесінің қайта құрылымдау үдерістері мен стратегиялық ресурстар бойынша әріптестіктің болашағын жан-жақты қарастырды.Сонымен қатар, Джорджтаун университеті жанынан Орталық Азияны зерттеуге арналған арнайы жұмыс тобын құру жоспары жарияланды. Бұл бастама өңірлік мәселелер бойынша академиялық және сараптамалық ынтымақтастықты одан әрі тереңдетуге бағытталған маңызды қадам болмақ.Конференцияға АҚШ-тың Қазақстандағы бұрынғы Елшісі Дэниел Розенблюм, сондай-ақ АҚШ-тың Түрікменстандағы бұрынғы Елшілері Стивен Манн мен Лора Кеннеди қатысты. Олар АҚШ-тың өңірдегі болашақ қатысуы мен энергетикалық трансформация үдерісіндегі жеке сектордың рөліне қатысты өз көзқарастарымен бөлісті.Іс-шара соңында қатысушылар Орталық Азияның орнықты энергетикалық болашағы тек халықаралық серіктестікті нығайту және ұзақ мерзімді стратегиялық көзқарасты қалыптастыру арқылы мүмкін болатынын атап өтті.Конференция қорытындылары АҚШ Әкімшілігінің Орталық Азияға бағытталған саясаты аясында жаңа тәсілдер мен ұсыныстар әзірлеу үшін пайдаланылуы жоспарлануда.Ақпарат көзі : https://www.gov.kz/memleket/entities/mfa-washington/press/news/details/975077?lang=kk

KazAID және ДДҰ денсаулық сақтау саласындағы ынтымақтастық мүмкіндіктерін талқылауда2025 жылғы 8 сәуір, Астана – «KazAID» Қазақстандық халықаралық даму агенттігінің Басқарма Төрағасы д-р. А. Арыстановтың ДДҰ-ның Еуропалық өңірлік бюросының ТБ жөніндегі өңірлік кеңесшісі д-р. А. Еділбаевпен және ДДҰ-ның Қазақстандағы елдік кеңсенің Денсаулық сақтау саласындағы саясат мәселелері жөніндегі кеңесшісімен д-р. С. Георгитамен техникалық кездесуі өтті.Кездесу барысында тараптар ағымдағы жылдың 7 сәуірінде басталған «Орталық Азия туберкулезден азат» бастамасын қоса алғанда, денсаулық сақтау саласындағы ынтымақтастық мүмкіндіктерін талқылады.Ақпарат көзі : https://www.gov.kz/memleket/entities/kazaid/press/news/details/975034?lang=kk

Астанада еліміздің Өнеркәсіп және құрылыс министрлігі өкілдерінің қатысуымен Қазақстан мен Үндістанның қорғаныс ынтымақтастығы мәселелері жөніндегі бірлескен жұмыс тобының кезекті отырысы өтті.Делегация басшылары Қазақстан Республикасы Қорғаныс министрінің орынбасары генерал-майор Бақытбек Сыдықов пен Үндістан Республикасы Қорғаныс министрлігінің Халықаралық ынтымақтастық жөніндегі біріккен хатшысы Шри Вишвеш Неги қорғаныс саласындағы екіжақты қатынастардың оң динамикасын атап өтті. Жауынгерлік дайындық, әскери білім беру және бітімгерлік бағыттары бойынша әскери ынтымақтастық белсенді дамып келеді.Әскери делегацияны қарсы алған Өнеркәсіп және құрылыс вице-министрі Рақымжан Исақұлов Үндістанмен әскери-техникалық ынтымақтастықты жандандыру Қазақстанның бейінді ведомстволарының басым міндеті екенін атап өтті.Шетелдік қонақтар Қазақстан Республикасының Ұлттық қорғаныс университетінде де болды. 2021 жылдан бастап осы оқу орнында Үнді мамандары қазақстандық әріптестеріне ағылшын тілін үйрену тәжірибесі мен әдіснамасын беріп келеді. Ақпарат көзі : https://www.gov.kz/memleket/entities/mod/press/news/details/975021?lang=kk

БҰҰ миссиясының жауапкершілік аймағында орналасқан Фауар базасында Қорғаныс министрінің орынбасары генерал-майор Шайх-Хасан Жазықбаев қазақстандық бітімгершілік контингенттерді ротациялау рәсімін өткізді. «БҰҰ бөлінуді бақылау жөніндегі күштері» миссиясы қолбасшысының бітімгершілік резервінің бірінші және екінші құрамдарының командирлері подполковниктер Жігер Аипов пен Жәнібек Нұрланов Қорғаныс министрлігі қолбасшылығының өкіліне әскери контингенттердің ауысуы туралы баяндады. Миссияны аяқтаған Қарулы күштер әскерилерінің алғашқы құрамы елге оралғалы жатса, олардың орнын екінші құрамдағы әскери қызметшілер басты.Қазіргі таңда контингенттің жеке құрамы орналасып, қызметке кірісуге дайындық жүргізуде. Рота штабы қызметті қабылдау және «БҰҰ-ның бөлінген аумақты бақылау күштері» миссиясы аясындағы міндеттерді нақтылауға бағытталған жұмыстармен айналысуда.Контингент командирі подполковник Жәнібек Нұрлановтың айтуынша, алдымен жеке құраммен теориялық сабақтар өтеді, кейін практикалық дайындық басталады. «Миссияға дайындық кезінде алынған кәсіби дағдылар біздің әскери қызметшілерге қойылған міндеттерді сапалы орындауға мүмкіндік береді», – деді ол.Еске сала кетейік, Қазақстанның алғашқы ұлттық бітімгерлік контингенті 2024 жылдың наурызында БҰҰ миссиясы аясында Голан жоталарына жіберілген болатын. Әскери қызметшілер мобильді патрульдеу, бақылау бекеттерін күшейту, эвакуация және минасыздандыру жұмыстарын орындады. Олар миссия қолбасшылығы мен БҰҰ басшылығынан жоғары баға алды.Осылайша, Қазақстан БҰҰ-ның бітімгерлік қызметіне қатыса отырып, халықаралық бейбітшілік пен тұрақтылықты қамтамасыз ету ісіне маңызды үлес қосып келеді.Ақпарат көзі : https://www.gov.kz/memleket/entities/mod/press/news/details/975007?lang=kk

Қазақстан Республикасы ІІМ Ұлттық ұланында "Таза Қазақстан" республикалық акциясы аясында ауқымды экологиялық іс-шара өтті. Әскери қызметшілер аумақтарды тазалауға, саябақ аймақтарын абаттандыруға, сондай-ақ шекараларды, ағаштарды, орындықтарды және шағын сәулет нысандарын бояуға белсенді қатысты.Әскери бөлімдерге іргелес жатқан учаскелерде тәртіп орнатуға ерекше назар аударылды, онда қызмет өткеру үшін де, жеке құрамның демалысы үшін де қолайлы және таза жағдайлар жасалды.Айта кетейік, бастаманың басты мақсаты — аумақтардың санитарлық жағдайын жақсарту ғана емес, сонымен қатар әскери қызметшілер бойында экологиялық мәдениетті, қоршаған орта үшін жауапкершілік сезімін және табиғатқа ұқыпты қарауды күшейту.Мұндай акциялар командалық рухты нығайтуға, тәртіпті арттыруға және патриоттық тәрбиеге ықпал етеді. ҚР ІІМ Ұлттық ұланының баспасөз қызметіАқпарат көзі : https://www.gov.kz/memleket/entities/kvv/press/news/details/974985?lang=kk

Болашақ футболшылар үшін жағымды жаңалық.Алматы облысында жас спортшылар үшін тың мүмкіндік туды. Райымбек ауылдық округіне қарасты Құмтоған ауылында еліміздегі алғашқы жеке меншік мамандандырылған футбол мектебі бой көтеруде. «Jeyran» футбол клубының бастамасымен қолға алынған ауқымды жобаның келер жылы пайдалануға берілуі жоспарланып отыр. Мектеп бір мезетте мыңға жуық шәкіртті қабылдай алады.Аталмыш оқу ордасын 2016 жылдан бері Алматы қаласында жұмыс істеп келе жатқан «Jeyran» футбол клубының құрылтайшылары қолға алған. Қазіргі таңда клуб құрамында 1800-ге жуық жас спортшы жаттығуда. Енді бұл тәжірибе облыс деңгейіне көшіріліп, футболға құмар ауыл балаларына да мүмкіндік берілмек.— Бұл базада бастапқыда мың шақты баламен бастаймыз. Олар 4 пен 18 жас аралығында болады. Жаттығу жасап, түрлі жарыстарға қатысады. Онлайн мектепте оқып, жатақханада тұрады. Құрылысын былтыр бастадық, келесі жылы аяқтаймыз, — дейді жобаның құрылтайшысы Асхат Машанов.Мектептің қаржылық жоспары да ауқымды. Жоба құны шамамен 1 миллиард теңгені құрап отыр. Қаржы директоры Абай Қанатаевтың айтуынша, кешен тек ойыншылар ғана емес, кәсіби жаттықтырушыларды да дайындайтын орталыққа айналмақ. Озық технологиялар, еуропалық стандартқа сай жасалған алаңдар, заманауи инфрақұрылым – бәрі де оқушылар үшін қолайлы жағдай жасауға бағытталған.— Біздің басты мақсатымыз – кәсіби футболшыларды тәрбиелеу. Бүгінде клубтан үш бала ұлттық құраманың сапына енсе, бірнешеуі кәсіби командаларда өнер көрсетуде, — дейді ол.Жалпы аумағы 7 гектарды құрайтын кешенде төрт блоктан тұратын ғимараттар бой көтеріп, құрылыс көлемі 5 мың шаршы метрге жуықтайды. Жасыл алаңдар мен 3 мың адамдық көрермен орындығы да қарастырылған.Алматы облыстық дене шынықтыру және спорт басқармасы басшысының міндетін атқарушы Рахман Шахарбектің айтуынша, бұл бастама өңірдегі бұқаралық спортты дамытуға серпін бермек.— Бұл – облыс үшін үлкен жаңалық. Біріншіден, балаларды спортқа баулимыз. Екіншіден, әлеуметтік осал топтардағы жеткіншектерге де мүмкіндік туады. Алдағы уақытта мемлекет пен жеке кәсіпкерлік арасындағы әріптестік аясында қолдау көрсету бағытында жұмыс жасаймыз, — дейді ол.Бүгінде құрылыс жұмыстарының 20 пайызы аяқталған. Жобалаушылардың айтуынша, келесі жылдың жазында мектеп толық жұмысын бастайды. Бұл – Қарасай ауданындағы спортқа құштар балалар үшін үлкен серпін, ал футбол арманға айналған жас өрендер үшін – нақты мүмкіндікАқпарат көзі : https://www.gov.kz/memleket/entities/almobl/press/news/details/975006?lang=kk

«Заң және Тәртіп» идеологиясын іске асыру шеңберінде Ақтөбе облысында алкогольдік масаң күйде көлік құралын басқарудың алдын алу бойынша жұмыстар жүргізілуде.Ағымдағы жылы Ақтөбе облысы бойынша мас күйінде автокөлік құралын басқарғаны үшін 13 тұлға қылмыстық жауаптылыққа тартылды.Ақтөбе қаласының №2 соты ҚК-нің 346-бабы 2-бөлігі (абайсызда мүліктің бүлінуіне алып келген, көлік құралдарын басқару құқығынан айырылған және алкогольдік масаң күйдегі адамның көлік құралын басқаруы) бойынша сотқа берілген сотталушыға қатысты қылмыстық істі қарады.Бұған дейін сотталушы ӘҚБтК-нің 608-бабының 1-бөлігі бойынша әкімшілік жауаптылыққа тартылған, ол бойынша 15 тәулікке қамаққа алынып, 7 жыл мерзімге, яғни 14.03.2030 жылға дейін, көлік құралын басқару құқығынан айырылған.Алайда сотталушы түзету жолына түспей, өзі үшін тиісті қорытынды жасамай, қылмыстық құқық бұзушылық жасаған.Сот мемлекеттік айыптау тарабының жаза түрі бойынша пікірін ескеріп, сот үкімімен сотталушыға көлік құралдарын басқару құқығынан өмір бойына айыра отырып, 4 жыл мерзімге бас бостандығынан айыру жазасы тағайындалды. Құрметті Ақтөбе облысының тұрғындары!Біз Сізге қылмыстың бұл түрі үшін өмір бойы көлік құралдарын басқару құқығынан айыра отырып, төрт жылдан алты жылға дейінгі мерзімге бас бостандығынан айыру түріндегі қылмыстық жауаптылық қарастырылғанын хабарлаймыз.Осылайша жол қозғалысы ережелерін қатаң сақтауға және көлік құралдарын алкогольдік немесе есірткілік масаң күйде басқармауға шақырамыз.#Заң_мен_Тәртіп#ЗАҢменТӘРТІП #ЖауапкершілікАқпарат көзі : https://www.gov.kz/memleket/entities/prokuratura-aktobe/press/news/details/975004?lang=kk

2025 жылғы 8 сәуірде Мехико қаласында Қазақстан Республикасының Мексикадағы Елшісі Алмұрат Тұрғанбеков Дүниежүзілік бокс кеңесінің (WBC) Президенті Маурисио Сулайманмен бокстан бірінші дүниежүзілік кубок – «Riyadh Season WBC Boxing Grand Prix» атты баспасөз конференциясы аясында кездесті.Сұхбат барысында тараптар Қазақстан мен WBC ұйымы арасындағы кәсіби бокс саласындағы ынтымақтастықтың перспективаларын талқылады. Жас таланттарды қолдау, бірлескен спорттық іс-шараларды өткізу, сондай-ақ қазақстандық боксшыларды әлемдік аренада ілгерілету мәселелері де қозғалды.Эр-Риядта (Сауд Арабиясы) ү.ж. 17-20 сәуірде өтетін алдағы «Riyadh season WBC Boxing Grand Prix» турниріне ерекше назар аударылды. Жарысқа 17-ге жуық қазақстандық былғары қолқап шеберлері қатысады.Кездесу жылы және достық атмосферада өтті. Оның қорытындысы бойынша тараптар Қазақстан мен WBC арасындағы спорттық байланыстарды нығайтуды жалғастыруға уағдаласты.«WBC» туралы анықтама: Дүниежүзілік бокс кеңесі (WBC) – штаб-пәтері Мехико қаласында орналасқан әлемдегі ең беделді кәсіби бокс ұйымы. 1963 жылы құрылған WBC барлық салмақ дәрежелерінде чемпиондық жекпе-жек өткізеді.Ақпарат көзі : https://www.gov.kz/memleket/entities/mfa-mexico/press/news/details/975003?lang=kk