Түркістан облысы әкімдігінде Мемлекет басшысы Қасым-Жомарт Тоқаевтың Үкіметің кеңейтілген отырысында берген тапсырмаларын орындау жолдары талқыланған мәжіліс өтті. Күн тәртібінде 6 мәселе қаралды. Атап айтқанда, экономиканы әртараптандыру, инфрақұрылымды және энергетиканы дамыту, денсаулық сақтау, білім беру және әлеуметтік салаларды дамыту, цифрлық технологияны жан-жақты енгізу, салық-бюджет саясатын реформалау және «Заң мен тәртіп» қағидасын іске асыру жөніндегі жоспарлар баяндалды. Түркістан облысының әкімі Нұралхан Көшеров жауаптыларға өңір экономикасын көтеру бағытындағы жұмыстарды жандандыруды тапсырды.– Мемлекет басшысы экономикамыздың көлемін арттыруды және өңіріміздің жалпы ішкі өнімін өсіруді тапсырды. Өңдеу өнеркәсібін жедел дамытуды және инвестиция таруға баса мән беруді айрықша атап өтті. Өңірге жеке инвестиция тарту – аудан, қала әкімдерінің ең басты міндеті. Облыста жұмыс істеп тұрған өндіріс орындарын жаңғыртумен қатар жаңа өндіріс орындарын ашуға баса мән беру қажет. Шетелдік және отандық инвесторларға бірдей ұстаным мен талап қойылуы керек және олар экологиялық талаптарды міндетті түрде орындаулары қажет. 2025-2027 жылдар аралығында жүзеге асырылатын 85 инвестициялық жобаның пулы қалыптасты. Осы жобаларды іске асыру бойынша жеке-жеке жұмыс жоспарын әзірлеуді тапсырамын, – деді Нұралхан Көшеров.Мәжілісте облыс әкімінің бірінші орынбасары Зұлпыхар Жолдасов пен облыс әкімінің орынбасары Бейсенбай Тәжібаев жетекшілік ететін салалары бойынша жоспарларын баяндаса, басқарма басшыларының да есептері мен жоспарлары тыңдалды. «Заң мен тәртіп» қағидасын іске асыру бойынша Түркістан облысының полиция департаментінің бастығы Мұрат Қабденов баяндама жасады.Облыс әкімі Нұралхан Көшеров экономиканы әртараптандыру, облыс аумағында жер қойнауын пайдаланушыларымен жасалған әрбір келісімшарт міндеттемелерінің толық орындалуын қамтамасыз ету, агроөнеркәсіп кешенін дамыту және су ресурстарын үнемдеп пайдалану, суды көп қажет ететін дақылдарды азайтып, құрғақшылыққа төзімді дақылдарды көбейтуді және су үнемдейтін технологияларын енгізуді тапсырды.Жауаптыларға негізгі басымдықтарды айқындап, стратегиялық маңызы бар жобаларды қаржыландыру және жеке инвестиция тарту жұмыстарын жүргізуді, туризм, инфрақұрылымды дамыту, ауыз су, газ мәселесін шешу, құрылыс жұмыстарының сапасын арттыру, медицина, білім, әлеуметтік саладағы мәселелерді шешу жөнінде тапсырма берді. «Жұмысшы мамандықтар жылы» аясында жүйелі іс атқару, цифрлық технологияны енгізу, бюджетті тиімді игеру, өзіндік кірістерді арттыру, жұмыс орындарын ашу бағытында да жұмыс жанданады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/928148

Түркістан облысы әкімдігі жанындағы құқық бұзушылық профилактикасы жөніндегі ведомствоаралық комиссия отырысы өтті. Мәжіліске Түркістан облысының әкімі Нұралхан Көшеров төрағалық етті. Күн тәртібінде 4 мәселе қаралды.2024 жылдың қорытындысы бойынша облыстағы қылмыстардың және жол-көлік оқиғаларының деңгейі туралы ҚР Бас прокуратурасының Құқықтық статистика және арнайы есепке алу жөніндегі комитетінің Түркістан облысы бойынша департаменті бастығының орынбасары Е.Пралиев пен Түркістан облысы полиция департаменті бастығының бірінші орынбасары Б.Айтпаев баяндама жасады.Кеден саласындағы құқық бұзушылықтар мен өзекті мәселелер туралы Түркістан облысы мемлекеттік кірістер департаменті, кедендік әкімшілендіру басқармасының басшысы С.Маликов, Түркістан облысы бойынша экономикалық тергеп-тексеру департаменті басшысының орынбасары Д.Сүлейменовтің есебі тыңдалса, пробация қызметі есебіндегілермен қайта қылмыстың алдын-алу шараларының тиімділігі мен оларға құқықтық әлеуметтік көмек көрсету туралы Түркістан облысы прокуратурасының үкімдердің орындалуын қадағалау басқармасының басшысы Н.Мықтыбаев, Түркістан облысы бойынша қылмыстық-атқару жүйесі департаментінің бастығы С.Жұмағұлов, Түркістан облысы жұмыспен қамтуды үйлестіру және әлеуметтік бағдарламалар басқармасының басшысы Ә.Темірбаева баяндама жасады. Сонымен бірге теміржол саласындағы құқықтық тәртіп пен қауіпсіздік жағдайы да талқыланды. Бұл туралы Түркістан станциясындағы желілік полиция бөлімінің бастығы Д.Орынбаевтың ұсыныстары қаралды. Облыс әкімі аталған мәселелерді бақылауда ұстап, тиісті жұмыстар атқаруды тапсырды.– Қылмыстар деңгейі өскен аудан, қалаларда және қоғамдық орындарда рейдтік іс-шараларды күшейтіп, қылмыстардың алдын алу және жол-көлік оқиғаларын болдырмау мақсатында тиісті жұмыстарды жандандыру керек. Пробация есебінде тұрған азаматтардың қайта қылмысқа баруының алдын-алу бойынша тиісті жұмыстарды атқарып, пробация есебінде тұрған азаматтарды толық жұмыспен қамту үшін тиісті жұмыстарды ширатуды тапсырамын, – деген Нұралхан Көшеров жауаптыларға «Атамекен», «Қапланбек», «Қазығұрт» кеден бекетін қайта құру шараларын уақтылы аяқтау және «Жібек жолы» кеден бекетін толық жаңғырту бойынша жұмыстарды сапалы атқаруды тапсырды.Сонымен қатар кеден бекеттерінде адамдар мен көліктердің ретсіз жиналуының алдын алу, импортталатын тауарларды декларациялау жұмыстарын қатаң бақылау, халықаралық жүк айналымы көлемін арттыру бойынша ұсыныстар енгізу, кеден бекеттері мен өткізу пункттеріндегі жолаушылар мен жүктердің қауіпсіздігін қатаң қамтамасыз ету мәселелері де айтылып, тиісті тапсырмалар берілді.Айта кетейік, 2024 жылы Түркістан облысында қылмыстық құқықбұзушылықтардың саны 3,5%-ға (5 453-тен 5 262-ге дейін) азайған. Аймақта қауіпсіздікті сақтау, елді мекендерді дамыту, азаматтардың құқығын қорғау, тұрғындарды жұмыспен қамту бағытында жүйелі жұмыстар жалғасады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/928165

Қазақстан сәуір айына дейін 11 млрд текше метр су алады. ҚР Су ресурстары және ирригация министрі Нұржан Нұржігітов осы жөнінде келісімге келді.Душанбе қаласында Орталық Азияның Мемлекетаралық су шаруашылығын үйлестіру комиссиясының (МСШҮК) 88-ші отырысы өтті. Жиынға Қазақстан, Өзбекстан, Тәжікстан және Түрікменстан су шаруашылығы ведомстволарының басшылары қатысты.Тараптар Сырдария және Әмудария өзендері бассейндерінде вегетация аралық кезеңнің өту барысын қарастырды.Айта кетейік, келісілген су көлемі Сырдария өзені арқылы Түркістан облысының Шардара су қоймасына келеді. Оның ішінде 1,6 млрд текше метр су Арал теңізіне жіберіледі.«Бұл биыл суару кезеңі үшін қажет су көлемін жинауға, сондай-ақ Қазақстанның оңтүстік облыстарындағы экожүйені сақтау іс-шараларын жүзеге асыруға мүмкіндік береді. Еліміздің оңтүстігіндегі жағдай батыс пен солтүстіктен өзгеше екенін атап өтемін. Мұнда үлкен көлемдегі су тасқыны болған жоқ. Ал жазда суармалы суға деген сұраныс өте жоғары. Сондықтан да біз оңтүстікті сумен қамтамасыз ету бойынша мүлдем басқа жұмыс жүргізіп жатырмыз. Су дипломатиясы – біздің министрлік жұмысының маңызды бағыты. Осы келіссөздердің нәтижесінде өткен жылы еліміздің оңтүстігін сумен тұрақты қамтамасыз еттік. Біз су бөлу және трансшекаралық су нысандарын қорғау жөніндегі барлық мәселелерді Орталық Азия елдеріндегі әріптестерімізбен бірлесе отырып шешеміз», - деді Су ресурстары және ирригация министрі Нұржан Нұржігітов.Ақпарат көзі : https://www.gov.kz/memleket/entities/water/press/news/details/927334

«Астана жастары» жастар ресурстық орталығының еріктілері кезекті акция өткізіп, зейнеткерлердің ауласындағы қарын күреп, қолғабыс етті, деп хабарлайды елорда әкімдігінің ресми сайты.«Таза Қазақстан» және «Игі істер марафоны» аясында «Астана жастары» еріктілері астаналық қарттардың аулаларын тазартуды жалғастыруда.10-ға жуық ерікті Сарыарқа ауданының тұрғынына бірнеше күн тоқтаусыз жауып, жиналған қарды күреуге көмектесті.Еріктілер қала тұрғындарын бір-біріне көмектесуге, игі істерде жарысуға шақырды.«Біз жалғызбасты зейнеткерге барып, ауласындағы қарды тазалауға көмектестік. Біздің волонтерлар қарт кісілерге апта сайын қолғабыс етіп тұрады. Біз осылайша өзгелерге үлгі көрсетіп, игі істерге шақырамыз», - дейді «Астана жастары» волонтері Индира Маремова.Ақпарат көзі : https://www.gov.kz/memleket/entities/astana/press/news/details/928203

Қостанай облысының прокуратурасы «Заң және Тәртіп» қағидатын ұстана отырып, ата-аналардың алименттерді уақытылы төлеуін қамтамасыз ету бойынша қабылданған шараларға талдау жүргізді.Өңірде соңғы үш жылда сотталған қасақана борышкерлердің саны екі есеге артты. 2024 жылы прокуратураның үйлестіруімен 96,3 млн теңге сомаға алимент төлемегені үшін 61 ата – ана сотталды, оның ішінде 6 адам бас бостандығынан айырылды.Мысалы, бір азамат 4 жыл ішінде ұлына алимент төлемей, қарыз сомасы 4,4 млн теңгені құраған. Федоров ауданының прокуроры сотқа дейінгі тергеу бастап, сот үкімімен борышкерге бір жылға бас бостандығын шектеу тағайындалды.Қылмыстық жауаптылықтан басқа әкімшілік жазалау шаралары қолданылады. Барлығы 327 адам әкімшілік жауапкершілікке тартылды, оның 122-сі әкімшілік айыппұлға, 205-і қамауға алынды.Борышкерлер сонымен қатар елден тыс жерлерге шығу, лицензияларды, рұқсаттар мен арнайы құқықтарды алу және пайдалану, өз мүлкіне билік ету құқығымен уақытша шектеледі.Жұмысқа орналасқысы келетіндерге және алимент төлеуді дұрыс төлегісі келетіндерге жұмыспен қамту органдары арқылы көмек көрсетіледі. 360-тан астам борышкер жұмысқа орналастырылды, бұл балаларды ай сайынғы алимент төлемдерімен қамтамасыз етуге мүмкіндік берді.Қадағалау актілері бойынша Қостанай облысының прокуратурасы 275 кәмелетке толмағандардың құқықтарын қорғап, 286,4 млн теңгеге берешекті өтеуге қол жеткізді. 85 сот орындаушысы тәртіптік жауапкершілікке тартылды, оның біреуі әрекетсіздіктің жүйелілігі үшін мемлекеттік лицензиясынан айырылды.Алиментті уақытылы төлеу - бұл ата-ананың міндеті және баланың әл-ауқатын қамтамасыз етудегі маңызды қадам. #Зәң_және_ТәртіпАқпарат көзі : https://www.gov.kz/memleket/entities/kostanay/press/news/details/928168

Қостанайда «Баян Сұлу» АҚ-ның жаңа өндірістік кешені – «Кондитерлік астана» жобасының алғашқы тасын қалау рәсімі өтті. Бұл жоба отандық өнеркәсіптің дамуына серпін беріп қана қоймай, Мемлекет басшысының алдағы үш жыл ішінде ауыл шаруашылығы шикізатын өңдеу үлесін 70%-ға дейін жеткізу жөніндегі тапсырмасын іске асырудың маңызды кезеңі болмақ.Биік мақсаттар: импортқа тәуелділікті азайту және технологиялық дамуЖаңа кешеннің өндірістік қуаты жылына 16 мың тонна өнімді құрайды. Бұл отандық өндірушінің ұннан жасалатын кондитерлік өнімдер нарығында, оның ішінде тоқаш пен бисквит сегменттерінде көшбасшылық орын алуына мүмкіндік береді. Кәсіпорында заманауи технологиялар қолданылады, олар ауыл шаруашылығы шикізатынан бастап дайын өнім шығаруға дейінгі толық өндірістік циклді қамтамасыз етеді.Қостанай облысы әкімінің орынбасары Арман Әбенов өз сөзінде атап өтті:"Мемлекет басшысы экономиканы әртараптандыру, оның ішінде ауыл шаруашылығы шикізатын қайта өңдеу деңгейін үш жыл ішінде 70%-ға дейін жеткізу міндетін қойды. Осындай ауқымды жобалардың іске асырылуымен біз негізгі азық-түлік өнімдері бойынша импортқа тәуелділікті азайтып, отандық шикізатты тереңдетіп өңдеу деңгейін көтеріп, өңірдің экспорттық әлеуетін арттыра аламыз. Бұл жоба – бизнестің және мемлекеттік қолдаудың үйлесімді жұмысының нақты көрінісі", – деді ол.Кәсіпорын өкілдері кешеннің іске қосылуы отандық өндірістің бәсекеге қабілеттілігін арттыруда маңызды рөл атқаратынын атап өтті:"Біздің мақсатымыз – тек ішкі нарықты қамтамасыз ету ғана емес, сонымен қатар Қазақстанның халықаралық нарықтағы орнын нығайту. Жаңа фабрикадағы инновациялық өндіріс желілері өнімнің әлемдік стандарттарға сай болуын қамтамасыз етеді. Біз **«Кондитерлік астана» тек Қостанай облысының ғана емес, бүкіл Қазақстанның мақтанышы болатынына сенімдіміз»" – деп атап өтті «Баян Сұлу» АҚ президенті Тимур Садыков.Ұрпақтар сабақтастығы: ардагер пікіріЖаңа кешеннің құрылысының басталуына орай өткен салтанатты шарада 40 жылдан астам осы салада қызмет еткен зейнеткер Алла Лайконина сөз сөйледі. Ол қарапайым жұмысшыдан кәмпит цехының басшысына дейінгі жолды жүріп өтті. Оның пікірі компанияның дамуы мен саладағы өзгерістердің маңыздылығын көрсетті."Мен бұл салада бүкіл ғұмырымды өткіздім. Соңғы жылдары өнеркәсіптің қалай дамып келе жатқанын, жаңа технологиялар мен жобалардың іске асырылып жатқанын ерекше байқаймын. Жаңа зауыттың ашылуы – бұл жай ғана өндірістік қадам емес, біздің дұрыс бағытта келе жатқанымыздың айқын дәлелі. Мемлекеттің біздің саланың дамуына ерекше көңіл бөліп отырғаны – үлкен қуаныш. Бұл мен үшін зор мақтаныш, өйткені Қостанай Қазақстанның нағыз кондитерлік астанасына айналып келеді", – деді ол.Жаңа өндірістік кешен 260 жаңа жұмыс орнын ашады, бұл облыстың әлеуметтік-экономикалық дамуына оң ықпал етеді. Жоба аясында кәсіпорын заманауи жабдықтармен жұмыс істейтін жоғары білікті мамандарды даярлауды көздеп отыр.Қостанай – кондитерлік өнеркәсіптің орталығыБүгінгі таңда Қазақстанның отандық өндірушілері 300-ден астам түрлі кондитерлік өнім шығарады, оның 55%-ы ішкі нарықта сатылса, 45%-ы экспортқа жіберіледі. Жаңа кешеннің іске қосылуы компанияның ішкі нарықтағы көшбасшылық ұстанымын нығайтуға және экспорт көлемін арттыруға мүмкіндік береді.Жалпы құны 14 миллиард теңгеден асатын бұл жоба жеке инвестицияларды тарту және елдің азық-түлік қауіпсіздігін қамтамасыз ету стратегиясының маңызды бөлігі болып табылады."Мемлекеттік қолдау үшін алғысымыз шексіз. Бұл жоба Қостанай облысында бизнесті дамыту үшін қолайлы жағдай жасалғанының дәлелі. «Кондитерлік астана» бүкіл сала үшін жаңа дәуірдің бастамасы болады және Қостанайды Қазақстанның кондитерлік астанасына айналдырады деп сенеміз", – деп қорытындылады кәсіпорын өкілі.ҚорытындыЖаңа кешеннің құрылысы – ауыл шаруашылығы шикізатын терең өңдеу және отандық өнімнің бәсекеге қабілеттілігін арттыруға бағытталған ұлттық стратегияларды жүзеге асырудағы маңызды қадам. Қостанай облысы өнеркәсіптік даму орталығы ретіндегі орнын одан әрі нығайтып, бизнестің және мемлекеттің табысты серіктестігін көрсетіп отыр.Ақпарат көзі : https://www.gov.kz/memleket/entities/kostanay/press/news/details/928173

Мемлекет басшысы Қасым-Жомарт Тоқаев тұрғын үй салу кезінде оның халық үшін қолжетімді болуын қамтамасыз етуге және құрылыс сапасына ерекше көңіл бөлуге бірнеше рет баса назар аударған болатын.Осы тапсырмаларды орындау аясында Қостанай облысының әкімі Кумар Ақсақалов өңірдегі ірі құрылыс нысандарын аралап шықты. Ол «Астана» және «Бәйтерек» шағын аудандарындағы, сондай-ақ «Береке» шағын ауданындағы тұрғын үйлердің құрылыс қарқынын тексерді. Мұнда мемлекеттік бағдарламалар аясында қолжетімді тұрғын үйлер салынып жатыр.**«Мемлекет басшысының тапсырмасына сәйкес, біз тек жаңа тұрғын үйлер ғана емес, сонымен бірге қолайлы қала ортасын қалыптастырып жатырмыз. Тұрғын үйлер тек қолжетімді ғана емес, жоғары сапа стандарттарына сәйкес болуы керек, ал жаңа шағын аудандардың инфрақұрылымы заманауи талаптарға сай болуы қажет.Бүгін мен негізгі нысандардағы құрылыс барысымен танысып, құрылыс компанияларының өкілдерімен кездестім. Жұмыстар белгіленген кестеге сәйкес жүргізіліп жатқанын тексердік. Өңіріміз тұрғын үй құрылысы бойынша жақсы қарқын көрсетіп отыр, ал 2025 жылы бұл бағыттағы жұмысты жалғастырамыз»,** – деп атап өтті облыс әкімі Кумар Ақсақалов.Құрылыс көлемінің өсуі және жаңа сапа стандарттарыҚұрылыс саласының дамуы өңір экономикасына айтарлықтай әсер етуде. 2024 жылы Қостанай облысында орындалған құрылыс жұмыстарының жалпы көлемі 315,3 млрд теңгені құрады, ал нақты көлем индексі 2023 жылғы деңгейден 124,9%-ға жетті. Бұл өңірдегі құрылыс жұмыстарының шамамен 25%-ға артқанын көрсетеді, бұл республикадағы ең жоғары өсім көрсеткіштерінің бірі.Сонымен қатар, 500 мың шаршы метр тұрғын үй пайдалануға берілді, бұл 2023 жылмен салыстырғанда 4,8%-ға артық. Осы көрсеткіштің нәтижесінде 5000-нан астам отбасы баспаналы болды.Тұрғын үй құрылысы кезінде жергілікті өндірістегі құрылыс материалдарын қолдануға ерекше назар аударылады. Бұл құрылыс шығындарын төмендетіп қана қоймай, сонымен қатар жергілікті кәсіпорындардың дамуына ықпал етіп, жаңа жұмыс орындарын ашуға мүмкіндік береді.2024 жылы Қостанай облысында құрылыс материалдарын өндіру көлемі 51,6 млрд теңгені құрады, бұл өткен жылмен салыстырғанда 3,6%-ға жоғары. Оның ішінде:кірпіш өндірісі 22,1%-ға артты,бетон бұйымдары 6,7%-ға көбейді,цемент-бетон плиталарының өндірісі 15,8%-ға өсті.Бұл көрсеткіштер құрылыс саласының қарқынды дамып жатқанын және сапалы құрылыс материалдарына сұраныстың артып отырғанын көрсетеді.«Астана» және «Бәйтерек» шағын аудандарының құрылыс барысыҚостанай ауданында ауқымды тұрғын үй жобасы – «Астана» және «Бәйтерек» шағын аудандарының құрылысы жалғасуда. Мұнда 154 көпқабатты үй салынып, нәтижесінде 60 мың адам баспанамен қамтамасыз етіледі.Қазіргі таңда 13 тұрғын үйдің құрылысы жүріп жатыр, олардың пайдалануға берілуі 2025 жылдың қыркүйегіне жоспарланған. Сонымен қатар, 7 он алты қабатты, 14 тоғыз қабатты және 13 бес қабатты тұрғын үйдің жобалау жұмыстары жүргізілуде.Жаңа шағын аудандар қажетті инфрақұрылыммен қамтамасыз етіледі:Мектептер мен балабақшаларМедициналық мекемелерСауда және ойын-сауық орталықтарыСпорт нысандары мен саябақтарКең жолдар, велосипед жолдары, «ақылды» аялдамалар мен бейнебақылау жүйелері«Біз жай ғана тұрғын үйлер салып жатқан жоқпыз, біз толыққанды инфрақұрылымы бар заманауи тұрғын үй кешендерін құрудамыз. Бұл кешенді тәсіл мыңдаған отбасы үшін жайлы өмір сүру жағдайларын қамтамасыз етуге мүмкіндік береді», – деді облыс әкімі.2025 жылға арналған жоспарлар2025 жылы өңірде жаңа тұрғын үй жобалары жүзеге асырылады:500 мың шаршы метр тұрғын үй пайдалануға беріледі,Әлеуметтік осал топтарға арналған 1000 жалдамалы пәтер сатып алынады,«Отбасы банк» арқылы 5,5 млрд теңгеге 253 пәтер сатылады.ҚорытындыҚостанай облысында тұрғын үй құрылысы қарқынды дамуда.Өңір Президенттің халықты қолжетімді әрі сапалы баспанамен қамтамасыз ету жөніндегі тапсырмасын орындайды.Жаңа инфрақұрылым дамып, халықтың өмір сүру сапасы артуда.2025 жылы құрылыс жұмыстары жалғасады, ал тұрғын үймен қамту мемлекеттік саясаттың басым бағыттарының бірі болып қала береді.«Біздің басты мақсатымыз – халық үшін қолайлы өмір сүру жағдайларын жасау. Бұл бағыттағы жұмыстар жалғасады», – деп қорытындылады облыс әкімі.Ақпарат көзі : https://www.gov.kz/memleket/entities/kostanay/press/news/details/928143

Елордадағы Qazaqstan жеңіл атлетика спорт кешенінде IX қысқы Азия ойындарына Қазақстан ұлттық құрамасының спортшыларын салтанатты шығарып салу рәсімі өтті. Сары құрлық бәсекесі 7-14 ақпан күндері Қытай Халық Республикасының Харбин және Ябули қалаларында өтеді.Салтанатты жиынға ҚР Туризм және спорт министрі Ербол Мырзабосынов, Ұлттық Олимпиада комитетінің өкілдері, 1998 жылғы қысқы Олимпиада ойындарының жүлдегері, 1996 жылғы қысқы Азия ойындарының екі дүркін чемпионы Людмила Прокашева, шорт-тректен ҚР еңбек сіңірген жаттықтырушысы Мәдіғали Қарсыбеков, спорт ардагерлері, жаттықтырушылар мен қоғам өкілдері қатысты.Іс-шара барысында IX қысқы Азия ойындарының ашылу рәсімінде Ту ұстайтын спортшыларға Қазақстан Республикасының Туы салтанатты түрде тапсырылды. Харбиндегі Ойындардың ашылу салтанатында еліміздің байрағын хоккейден ҚР спорт шебері Әділ Бекетаев пен шорт-тректен халықаралық дәрежедегі спорт шебері Ольга Тихонова алып шығады. Өз кезегінде Әділ Бекетаев Ту ұстаушы ретінде көпшіліктің алдына шығып, салтанатты түрде ант берді.Қазақстан құрамасынан Ойындарға 137 спортшы қатысады. Олар 6 спорт түрінен 10 дисциплинада (конькимен жүгіру спорты, шорт-трек, мәнерлеп сырғанау, биатлон, керлинг, шаңғы жарыстары, тау шаңғысы, фристайл, ски-альпинизм, шайбалы хоккей) өнер көрсетеді. Ұлттық команда 51 медаль жиынтығына таласады.Ербол Мырзабосынов спортшыларға сәттілік тілеп, сары құрлық бәсекесінің еліміз үшін маңызды дода екенін атап өтті.«IX қысқы Азия ойындарының басталуына санаулы күндер қалды. Қазақстан ұлттық құрамасы қысқы Азия ойындарына толық дайын. Оған қажетті барлық жағдай жасалды. Ойындарға сапалы дайындалу үшін ұлттық құрама 137 оқу-жаттығу жиынын өткізді. Спортшыларымыз 86 халықаралық жарыста өнер көрсетіп, 33 медаль жеңіп алды. Жалпы, елімізде қысқы спорт түрлерінде жеңістермен өрілген жақсы дәстүр бар. Бүгінде тек елімізге ғана емес, бүкіл әлемге танымал даңқты спортшыларымыз халықаралық қысқы жарыстарда өнер көрсетіп, үнемі жүлдегерлер қатарынан көрініп жүр. Алдағы қысқы Азия ойындарына қатысатын барлық спортшыға сәттілік тілеймін. Қысқы Азия ойындары – еліміздің спорттық әлеуетін көрсетіп қана қоймай, әрбір спортшы үшін үлкен жетістіктерге жетуге талпыныс болатын маңызды кезең. Құраманың әр жеңісі – еліміз үшін үлкен қуаныш!», – деді Ербол Мырзабосынов.Ақпарат көзі : https://www.gov.kz/memleket/entities/tsm/press/news/details/928196

Қазақстанның көлік министрі Марат Қарабаев Қазақстан мен Ресей үкімет басшыларының екіжақты кездесуінің қорытындысы бойынша көлік саласының қарқынды дамуы және транзиттік дәліздер мен инфрақұрылымды жақсартуға бағытталған бірқатар маңызды бастамалар туралы айтты. Кездесуде қаралған басты мәселенің бірі екі ел де белсенді дамып келе жатқан Солтүстік-Оңтүстік дәлізінің жұмысы. Бұл бағыт Беларусь пен Ресейді Қазақстанмен байланыстырады, содан кейін Түрікменстан арқылы Оңтүстік Кавказға жол ашады. Сонымен қатар біздің еліміз Ақтау және Құрық порттарының мүмкіндіктерін кеңейте отырып, ресейлік экспорттаушылар үшін қолайлы жағдайлар жасауда. Ресейдің Махачқала портында да тереңдету жоспарлары талқыланды.Сондай-ақ министр Қытай, Ресей және Қазақстан арасындағы транзиттік ағындарды дамытудағы маңызды қадам болатын Қытаймен шекарадағы жаңа үшінші теміржол өткізу пункті жобасының перспективаларын атап өтті.«Өткізу бекеттері бойынша бірлескен жұмысты атап өтпеске болмайды. Біз биыл алты өткізу пунктінде жаңғыртуды бастаймыз. Бұл, әрине, олардың өткізу мүмкіндігін 2 есеге немесе одан да көпке арттырады. Біз Қазақстан Республикасының аумағында да, Ресей Федерациясының аумағында да бір мезгілде жаңғырту үшін жұмысты қатар жүргізуді талқыладық. Осы кезеңде бекеттер жабылмай, белгілі бір қалыпта жұмыс істей алатындай етіп жұмыс істеу тетігін әзірлеу талқыланды», — деп түйіндеді Марат Қарабаев. @KZgovernmentАқпарат көзі : https://www.gov.kz/memleket/entities/transport/press/news/details/927848

Қарағанды академиялық музыкалық комедия театры камералық музыка кешін дайындауда. Өнер сүйер қауым серенадаларды тамашалай алады. Бағдарламада ұлы композиторлар Вольфганг Амадей Моцарт, Эдвард Эльгар және Петр Чайковскийдің шығармалары орындалады.Концерт 14 ақпанда қызыл зал сахнасында өтеді. Басталуы 18:30.Дирижерлік пультте халықаралық конкурстардың лауреаты – Қарағандыға Ташкенттен келген дарынды жас музыкант Руслан Бекмаев болады."Моцарт серенадасы сіздерге үйлесімге қаныққан классикалық дыбыстың жеңілдігі мен қуанышын сыйлайды. Эльгардың лирикалық серенадасы сіздердің алдарыңызда нәзік меланхолия мен аристократиялық нәзіктік әлемін ашады. Ал кешті Чайковскийдің ұлы серенадасы аяқтайды, онда жарқын көңіл-күй мен жігерлендіретін қуат шынайы сиқырлы музыкалық желіге ұласады", – деп театрдың өкілдері музыкалық оқиғаны өткізіп алмауға шақырады.Ақпарат көзі : https://www.gov.kz/memleket/entities/karaganda/press/news/details/927381

Саран мектептерінде ерекше жоба – «Әжелер мектебі» іске қосылды. Аға буын өз білімі мен тәжірибесін балалармен бөліседі.«Әжелер мектебі» – Саран қаласының білім беру бөлімінің жобасы. Ол әрбір қалалық мектепте жұмыс істейді. Оқу орындарының әкiмшiлiгi мен қамқоршылық кеңесi он оқушының әжесін iрiктейдi. Оқу жылы барысында жобаға қатысушылар балалармен кездеседі және олармен шеберлік сыныптары, дөңгелек үстелдер, дәрістер және т. б. өткізеді.Әрбір отырыста нақты тақырып талқыланады.– Дәрістер немесе кездесу тақырыбы жобаға қатысушыға байланысты: біреулер балаларға өлеңдер жазуды үйретеді, біреулер өздерінің отбасылық және жеке тәжірибелерінен қызықты оқиғалар айтады, мысалы, мықты отбасын құру, мамандықты қалай таңдау, балаларды қалай тәрбиелеу туралы баяндап береді. Мысалы, Қазақстан халқы Ассамблеясының өкілдері балаларға киізден кәдесыйлар жасауды үйретті, – деп түсіндірді Саран әкімдігінің баспасөз хатшысы Думан Әлімжанов.Сондай-ақ, «Әжелер мектебі» жобасы бойынша интерактивті танымдық ойындар өткізіледі. Кездесулердің бірінде мектеп оқушыларының әжелері түрлі ұлттардың дәстүрлі киімдері туралы әңгімелеп, түрлі тілдерде әндер шырқады.Кездесулер Саран мектептерінде тұрақты түрде өткізіледі. Әжелердің оқушылармен талқылайтын іс-шаралар жоспары бекітілді.Ақпарат көзі : https://www.gov.kz/memleket/entities/karaganda/press/news/details/927436

Бұқар жырау ауданында дарынды әнші, композитор, халық ақыны Доскей Әлімбаевтың есімі берілген ауылда жаңа Мәдениет үйі ашылды. Биыл Қазақ КСР-інің еңбек сіңірген мәдениет қайраткерінің туғанына 175 жыл толады.Доскей ауылының тұрғындары Мәдениет үйін салуды көптен бері өтініп келеді. Жаңа ғимаратта 200 орындық көрермендер залы, үйірмелерге арналған бөлмелер бар. Мұнда тек балалар ғана емес, белсенді зейнеткерлер де өз өнерлерін ортаға салады. Домбыра, би және т. б. үйірмелері жұмыс істейтін болады. Мәдениет үйі «Ауыл – Ел бесігі» арнайы жобасы бойынша салынған.– Президент Қасым-Жомарт Тоқаев: "Мәдениет пен өнер – ел өміріндегі маңызды сала. Өнер – ұлттың жаны, ал мәдениет – оның рухани келбеті. Бұл екі құндылық – біздің өркениетіміздің негізі және ұлттық сананың көрінісі" деп атап өткен болатын. Шынында да, қазақ халқының бірегей рухы оның өнері мен мәдени мұрасынан көрінеді, – деді Бұқар жырау ауданының әкімі Ерлан Құсайын.Аудан басшысы жаңа Мәдениет үйі үшін сегіз домбыра мен баян сатып алуға сертификаттар табыс етті. Ақпарат көзі : https://www.gov.kz/memleket/entities/karaganda/press/news/details/927526

Қарағанды облысында кәсіптік бағдарлау ерте жастан басталуы тиіс деп есептейді. Дәл осы мектепке дейінгі жылдары болашақ мамандықтардың негізі қаланады және баланың белгілі бір бағыттарға қызығушылығы пайда болады.Мемлекет басшысы Қасым-Жомарт Тоқаев "балаларды ерте кәсіптік бағдарлау ерекше маңызға ие болып отыр. Өскелең ұрпақ болашақ мамандық таңдауға саналы түрде қарауы тиіс... " деп бірнеше рет атап өткен болатын.Біздің әрқайсымыз бала кезімізде дәрігер немесе мұғалім болуды армандаймыз, ал жас өткен сайын бағдарлар өзгерді. Балаға болашақ мамандығын анықтауға көмектесу үшін оған түрлі салаларда өзін мүмкіндігінше ерте сынап көруге мүмкіндік беру маңызды. Осындай тәсілді Шахтинск қаласындағы «Салтанат» балабақшасы қолданады, онда 2021 жылдан бастап «Ерекше ғылым» жобасы іске асырылуда.– Сабақтар ойын түрінде өтеді. Балаларға эксперимент арқылы және қолжетімді тілмен жаңбыр қайдан келетінін, температура не екенін, компастың қалай жұмыс істейтінін түсіндіреді, – дейді «Салтанат» бөбекжай-бақшасының директоры Ирина Обердерфер. – Балалар химия, биология, физика, инженерлер мен зерттеушілер сияқты бағыттарда өздерін ғалым ретінде сынай алады, бұл болашақ мамандық таңдаудың алғашқы қадамы болуы мүмкін.2024 жылдан бастап бұл жоба Қарағанды облысының білім беруді дамыту жол картасының «Қызығушылық танытқандарға арналған ерекше ғылым» бағдарламасының бір бөлігі болды. Жобаға өңірдің 22 мектепке дейінгі ұйымы қосылды, ал «Салтанат» педагогтары шеберлік сабақтарын өткізіп, әріптестерін оқыта бастады.Бағдарламаның ерекшелігі – сабақтастық: мектептермен ынтымақтастық ғылымды тереңдетіп оқытуға біртіндеп көшуге ықпал етеді, ал Шахтинск технологиялық колледжімен өзара іс-қимыл болашақ мамандықты таңдауға көмектеседі.Мектепке дейінгі балалар мен техникалық мамандарды даярлайтын оқу орны қалай байланысты? Колледж оқытушылары «ТехноМалыш: Болашақ инженерлерге арналған радиоконструкторлар» жобасын жүргізуде. Студенттермен бірге арнайы балалар радиоконструкторлары әзірленді.– Бұл жиынтықтар 5–6 жастағы балаларға электроника мен ойын түрінде бағдарламалау негіздерін меңгеруге көмектеседі. Балалар радиоқабылдағыштар сияқты қарапайым электронды құрылғыларды жинай алады және есейген сайын күрделі жобаларға, мысалы, шамдарға, сигнализацияға және ақылды үйдің макетіне көшеді, – деп түсіндірді «Электроника» құзыреттілік орталығының бас сарапшысы, колледждегі арнайы пәндер оқытушысы Михаил Правосудов.Бұдан басқа, колледж оқытушылары тәрбиешілерге арналған бояу кітапшасы мен әдістемелік ұсынымдар жасауды жоспарлап отыр.– Жобаның басты мақсаты – ерте жастан балалардың техникалық дағдыларын дамыту, техникалық ойлау қабілетін қалыптастыру және оларды заманауи технологиялармен таныстыру, – дейді колледж директорының орынбасары Валентина Тарасова. – Статистика бойынша, балалардың 26% техникалық ойлау қабілетіне ие. Болашақта мүмкіндігінше көп техникалық маман алу үшін бізге бұл қабілеттерді ерте кезеңде дамыту маңызды.Колледжде екі құзырет орталығы – «Электроника» және «Компьютерлік ойындарды 3D-модельдеу», сондай-ақ студенттік конструкторлық бюро жұмыс істейді. Мұнда 8–9 сынып оқушылары үшін білім беру ортасын құруды қоса алғанда, техникалық шығармашылық пен инновацияларды дамытуға бағытталған жобалар іске асырылуда.– Біз "Мектеп-колледж-ЖОО-жұмыс беруші" үздіксіз кәсіптік білім беру жүйесін құрып жатырмыз, – дейді Валентина Тарасова. – Биыл қорытынды жасап, қорытындылау кезеңін жоспарлап отырмыз.Сондай-ақ колледжде жобалармен алмасу үшін веб-платформа және бағдарламалау, электроника және 3D-модельдеу бойынша интерактивті құралдар әзірленуде.Бұл бастамалардың барлығы ортақ мақсат – жоғары технологиялар мен инженерия саласында жұмыс істейтін болашақ мамандарды даярлау болып табылады. Ақпарат көзі : https://www.gov.kz/memleket/entities/karaganda/press/news/details/927718

Қарағандыда суретші Вениамин Шамшиннің жеке көрмесі ашылады. Экспозицияда оның жұбайының жеке коллекциясынан суреттер ұсынылады.Вениамин Шамшин – 50-ші жылдардан бері Қарағандыда өмір сүрген суретші. Ол социалистік реализм жанрында сурет салған. Оның портфолиосында композициялар, портреттер мен тұрмыстық сюжеттер бар.Олардың ішінен көрмені ұйымдастырушылар замандастарының әдеттегі портреттерін қызықты деп санайды.– Вениамин Шамшиннің үлкен жеке көрмесін ұйымдастыру – оның жұбайының арманы болатын. Көзі тірісінде ол өте белсенді болған, көрмелері жиі ұйымдастырылып тұратын, бірақ ол қайтыс болғаннан кейін 2004 жылы ауқымды экспозициялар болған жоқ. Біз суретшінің жесірімен кездесіп, көрме алдындағы жұмыстарды тамашаладық. Әрине, олардың барлығы жоғары бағаланатын дүниелер, – деді көрме өтетін «Алтын ғасыр» галереясының жетекшісі Бибігүл Исполова.Кәсіби көрермен үшін Вениамин Шамшиннің жұмыстары портрет өнері бойынша тамаша оқу материалы болады. Басқалары үшін бұл экспозиция – классикалық бейнелеу өнерін түсінуді кеңейтуге мүмкіндік береді.Көрме 1–13 ақпан аралығында Комиссаров көшесі, 35а мекен-жайы бойынша «Алтын ғасыр» галереясында өтеді. Кіру тегін.Ақпарат көзі : https://www.gov.kz/memleket/entities/karaganda/press/news/details/927758

Мемлекеттік қызметке түсуге ниет білдірген қарағандылық студенттерге бейресми жағдайда мемлекеттік басқару, әкімшілендіру және медиа сауаттылық негіздері оқытылады. Қазақстан Республикасы Президенті жанындағы Мемлекеттік басқару академиясының облыстық филиалында «Елге қызмет» жастар клубы ашылды.Қатысушылар мемлекеттік органдарда жұмыс істеуге ниет білдірген қарағандылық ЖОО-ның белсенді студенттері қатарынан іріктелді. Клубта мемлекеттік басқару және әкімшілік, заңнама, экология және т.б. бағыттар бойынша бірнеше топ құрылды. Әр бағыт бойынша арнайы дәрістер мен семинарлар өткізілетін болады. Сондай-ақ, клубта барлық қатысушылар оқып-үйренуі тиіс жалпы пәндер қарастырылған, олар – медиа сауаттылық, сыбайлас жемқорлыққа қарсы мәдениет, тұлғаны дамыту, мемлекеттік басқару негіздері және т. б.Сабақтар әр жұма сайын өткізіледі. Бір курс алты айға есептелген.– Біз жастар үшін бейресми, жайлы жағдай жасағымыз келеді. Былайша айтқанда - шенеуніктік тәсілсіз. Себебі мемлекеттік мекемелердегі көпшілікті дәл осы жайт қорқытады. Біз, керісінше, клуб мүшелерімен шай ішіп, әркімге өз пікірін білдіруге, идеяларды талқылауға мүмкіндік бере аламыз, – дейді клуб жетекшісі Ернар Рақышев.Қазір клуб мүшелерінің алғашқы тобын жинақтау аяқталуға жақын. Екінші лектің басталу күні - осы жылдың қыркүйек айы. Клубқа қатысуға өтінімді WhatsApp +7-771-527- 06-27 нөміріне немесе Instagram @elgeqyzmet _ jastary жеке хабарламаларына жазу арқылы беруге болады. Ақпарат көзі : https://www.gov.kz/memleket/entities/karaganda/press/news/details/927838

Алматы қаласында таңғы сағат 5-тен бастап қар жауа бастады, ол 1 ақпанға қараған түнге дейін жалғасады. «Қазгидромет» РМК болжауынша жауын-шашын мөлшері 8-9 мм-ге дейін жетуі мүмкін.Көктайғақтың алдын алу және жол қауіпсіздігін қамтамасыз ету мақсатында қар жауар алдында жолдар 180 м³ сұйық реагентпен өңделді. Жолға құм-тұз қоспасын себуге 152 арнайы техника жұмылдырылды, сағат 17:00-дегі жағдай бойынша 1250 тонна көктайғаққа қарсы материал пайдаланылды.Қардың жиналып қалуын тездетіп жою үшін қауіпті жол учаскелерінде, түсу және көтерілу аймақтарында, жолайрықтардың бұрылыс бөліктерінде 46 жедел бригада күшейтілген режимде жұмыс істеуде. Олар тәулік бойы кезекшілік етуде.Күндізгі уақытта қар тазалау жұмыстарына 455 бірлік арнайы техника және 1060 жол жұмысшысы тартылды. Сондай-ақ, жаяу жүргіншілер жолдарын, қоғамдық орындарды, қоғамдық көлік аялдамаларын және жерүсті өткелдерін механикаландырылған тазалау үшін 95 бірлік шағын көлемді техника қолданылады.Қаланың барлық аудан әкімдіктерінде қар күреу жұмыстарын бақылау үшін тәулік бойы кезекшілік ұйымдастырылды.«Қазгидромет» мәліметінше, бүгін қар кейде орташа қарқынмен жауып, кешкі 20:00-ге дейін 5-6 мм-ге дейін жетуі мүмкін. Қар 31 қаңтар күні тағы жауып, тағы 3 мм қосымша жауын-шашын түсуі ықтимал.30 қаңтар күні ауа температурасы шамамен 0°С болады. 31 қаңтарға қараған түні температура -6…-8°С-қа дейін төмендеп, күндіз -2…-4°С аралығында сақталады.Алматы қаласының Коммуналдық инфрақұрылымды дамыту басқармасы қала тұрғындары мен қонақтарын жолда мұқият болуға, жол қозғалысы ережелерін сақтауға және жол жүру кезінде ауа райын ескеруге шақырады.Ақпарат көзі : https://www.gov.kz/memleket/entities/almaty/press/news/details/928176

Елордада әлеуметтік маңызы бар азық-түлік өнімдерін шығаратын 30-дан астам кәсіпорын бар. 2027 жылға қарай агроөнеркәсіп кешенінде 7 инвестициялық жоба жүзеге асырылады. Бұл туралы Астана қаласы Инвестициялар және кәсіпкерлікті дамыту басқармасының басшысы Халел Әкімжанов мәлім етті, деп хабарлайды қала әкімдігінің ресми сайты.Бүгінде қаланың агроөнеркәсіп кешенінде әлеуметтік маңызы бар азық-түліктің 3 түрін шығаратын 30-дан астам кәсіпорын жұмыс істейді. Олардың қатарында 6 ұн тарту зауыты, 28 наубайхана және бір макарон өнімдерін шығаратын кәсіпорын бар.«2024 жылы елордада 159 мың тоннадан астам азық-түлік өнімдері өндірілді. Оның ішінде 124,6 мың тонна ұн, 15,5 мың тонна нан және 19,3 мың тонна макарон өнімдері бар», - деді Халел Әкімжанов.Агроөнеркәсіп кешеніндегі 2025-2027 жылдарға арналған Жол картасы аясында елордада 1,7 мыңға жуық жаңа жұмыс орны ашылған 7 инвестициялық жоба жүзеге асырылуда.Оның ішінде дайын және жартылай фабрикат өнімдерін шығаратын зауыттар, сүт өңдеу цехы, көкөніс сақтау қоймасы, астық өңдеу зауыты бар.2023 жылы Астанада сыйымдылығы 13 мың тонна болатын 2 көкөніс сақтау қоймасы пайдалануға берілді.2026 жылы елордада инвестициялық жобалардың ішінде жоғарыда айтылған тағы бір көкөніс сақтау қоймасы пайдалануға берілмек. Жалпы, қазіргі таңда Астанада 47,5 мың тонна өнімді сақтайтын 8 көкөніс сақтау қоймасы жұмыс істейді.Астанада сауда базарларының жаңа форматқа көшуіне ерекше көңіл бөлініп жатыр. Осылайша, 2024 жылы елордада «Көктал» базары (Тілендиев даңғылы, 12) пайдалануға берілді.Сонымен қатар, Жол картасы аясында елордада 7 сауда базарын жаңғырту жоспарланған. Базарларды жаңғырту сауда үй-жайларын жаңартуды, жаңа қойма кешендерін салуды және көлік инфрақұрылымын жақсартуды қамтиды.«Бұл 1000-нан астам жұмыс орнын ашуға және 6 мыңнан астам кәсіпкер үшін сауда жағдайын айтарлықтай жақсартуға мүмкіндік береді. Базарлар заманауи бақылау-кассалық жүйелермен жабдықталып, тауарларды сақтау жағдайлары жақсарады», - деді қала әкімдігінің басшысы.Ақпарат көзі : https://www.gov.kz/memleket/entities/astana/press/news/details/927923

Алматы метрополитенінің бекеттерінде жолаушылардың қауіпсіздігін арттыру үшін уақытша қоршауларды орнату жұмыстары басталды.«Қолданыстағы бекеттерді жобалау кезінде метрополитен нысандарын салуды реттейтін нормативтік құжаттарда платформаларға автоматты жылжымалы есіктер орнату көзделмеген болатын. Бұл құжаттарға өзгеріс тек 2022 жылы енгізілді. Біз жолаушылардың қауіпсіздігін қамтамасыз ету тұрғысынан осы үдерісті қалай ұйымдастыруға болатынын ойладық. Бұл жүйелі тәсілді қажет етеді, сондықтан қазіргі уақытта салынып жатқан және жобаланатын бекеттерде платформалық қоршаулар орнату қарастырылған», – деді Алматы метрополитенінің директоры Алмасбек Орынбеков.Қоршаулар вагондардың арасындағы кеңістікті шектеу үшін орнатылады және метрополитеннің пайдалану шығыны есебінен жүзеге асырылады, яғни бюджет қаражаты тартылмайды. Бұл жолаушылардың қауіпсіздігін арттыруға бағытталған уақытша шешім, ол тұрақты платформалық есіктер (screen doors) орнатылғанға дейін қолданылады.«Қазіргі уақытта біз вагондар арасындағы уақытша бөлу конструкцияларын монтаждауды жалғастырудамыз, сонымен қатар сынақ іс-шараларының кешенін жүзеге асырып жатырмыз. Желіде мен композицияны тоқтату кезінде бөлімдердің бірі вагонаралық кеңістікке қатысты ығыстырылған фотосуретті көрдім. Осы эпизодты тағы да тест процесінің бір бөлігі екенін түсіндіргім келеді. Мұндай жағдайлар мұқият талданады. Жұмыс процесі тоқтамайды-инженерлер жүйенің жұмысын қамтамасыз ету үшін монтаждау жұмыстарын көпсатылы тексерулер арқылы синхрондайды», - деп сөзін жалғастырды Метрополитен директоры.Оның айтуынша, алдымен тот баспайтын жылтыр металдан жасалған тіректер орнатылады, кейіннен оларға соққыға төзімді шыңдалған шыныдан жасалған қоршаулар бекітіледі. Бұл жұмыстар жақында аяқталады деп жоспарланып отыр.«Автоматтандырылған платформалық қоршауларды орнату ұзақ уақытты қажет етеді, өйткені ол үшін жобалау, техникалық-экономикалық негіздеме, қаржыландыру, сондай-ақ мемлекеттік сатып алу рәсімдерін өткізу қажет. Осыған байланысты жолаушылардың қауіпсіздігі үшін уақытша металл қоршаулар орнатылып жатыр», - деп сөзін түйіндеді Алмасбек Орынбеков.Ақпарат көзі : https://www.gov.kz/memleket/entities/almaty/press/news/details/927915

Алматыда Н.Сац атындағы орыс мемлекеттік академиялық балалар мен жасөспірімдер театрының ғимаратын реконструкциялау жұмыстары жақында басталады. Реконструкциялау жобасы мемлекеттік сараптамадан өтті, қала әкімдігі құрылыс жұмыстарын жүргізетін мердігер ұйымды анықтау үшін байқау жариялады. Алматының Құрылыс басқармасы жобада қандай шешімдер қарастырылғанын және оны жүзеге асыруға не үшін 21,7 млрд теңге бөлінгенін түсіндірді. «Ғимарат 1980-жылдары салынған және содан бері оған ешқашан күрделі жөндеу жүргізілмеген. Театр ұжымы ғимараттың мүшкіл жағдайына қоғамның назарын бірнеше рет аударған. Қала әкіміне жүгінгеннен кейін ол мегаполис үшін маңызы зор нысанды реконструкциялауға тапсырма берді. Техникалық зерттеу барысында жабдықтардың, инженерлік желілердің, шатырдың, қасбет тақталарының және ішкі әрлеу жұмыстарының едәуір тозғаны анықталды. Шатырдан аққан су сахна мен көрермен залына дейін жетеді, қасбеттің тақталары құлап, жүргіншілерге қауіп төндіріп отыр, ал ескі электр сымдары өрт қаупін тудырады. Қазіргі таңда ғимарат қауіпсіздік талаптарына сәйкес келмейді және эстетикалық көрінісін жоғалтқан», – деді басқарма басшысы Алмас Шабдарбаев. Реконструкциялау жобасы қоғам өкілдері мен сарапшылар арасында кеңінен талқыланды. Жобаға сәйкес, тірек құрылымдары нығайтылады, шатыр мен қасбет тақталары ауыстырылады, барлық инженерлік коммуникация жаңартылады. Ғимарат толық автоматты өрт сөндіру жүйесімен жабдықталады. Сондай-ақ, театр жабдықтары, сахна, жарықтандыру толықтай жаңартылып, орындықтар арасындағы өтпелер кеңейтіліп, мүмкіндігі шектеулі жандар үшін қолайлы жағдай жасалады. «Ғимарат жергілікті маңызға ие тарихи және мәдени ескерткіш болғандықтан, оның сәулет элементтерін қалпына келтіру мен сақтауға ерекше назар аударылды. Мысалы, бастапқы жобаға сәйкес, холлдың еден жабынының тарихи келбеті мен ғимараттың фойесіндегі мозаика да қалпына келтіріледі», – деді басқарма басшысы.Бұл жұмыстардың барлығы 14,6 мың шаршы метр болатын қолданыстағы ғимаратты реконструкциялау жұмыстары аясында жүргізіледі.Сонымен қатар, жанында 10 мың шаршы метрлік үш қабатты жаңа ғимарат салынады. Жаңа ғимаратта 200 орындық сахнасы бар зал, грим бөлмелері, шеберханалар мен цехтарға арналған бөлмелер, декорацияларды сақтауға арналған қоймалар, көркемдік жетекші қызметкерлерге арналған кабинеттер, балалар театр студиясына арналған оқу сахнасы мен сыныптар орналасады. Екі ғимаратты галереялық өткел байланыстырады.Театр – кеңсе ғимараты емес, сондықтан оның жарықтандыру жабдықтары, дыбыс аппаратурасы, желдету және кондиционерлеу жүйелері, декорация механизмдері бар сахналар сияқты арнайы техникалық жүйелерді орнатуды қажет етеді. Акустика мен жарықтандыруды монтаждау ерекше күрделі жұмыстың бірі. Театр – бұл құрылым мен техникаға үлкен жүктеме түсетін орын, сондықтан жабдықтау қатаң стандартқа сай болуы тиіс, бұл актерлердің, техникалық қызметкердің және көрермендердің қауіпсіздігін қамтамасыз етеді. «Бөлінген қаражаттың құрылымын қарасақ, екі ғимаратты заманауи жабдықпен толық қамтамасыз етуге шамамен 6 млрд теңге қажет. Қолданыстағы ғимаратты реконструкциялауға 6 млрд теңге және жаңа ғимарат салуға шамамен 9 млрд теңге қарастырылған. Сонымен қатар, екі ғимаратты байланыстыратын галерея салынады, сыртқы желілер ауыстырылады және іргелес аумақты көгалдандыру мен көркейту жұмыстары жүргізіледі. Бұл ауқымды жоба, жұмыс аяқталғаннан кейін театр қаланың шығыс бөлігінде тұрғындар жиі келетін орынға айналады деп сеніммен айтуға болады», – деді Алмас Шабдарбаев. Айта кетейік, негізгі ғимараттың реконструкциялау жұмыстарын осы жылдың соңына дейін аяқтау жоспарланған, ал жобаның толық аяқталуы 2026 жылдың бірінші тоқсанына белгіленген. Ақпарат көзі : https://www.gov.kz/memleket/entities/almaty/press/news/details/927922

Облыс әкімі Асхат Шахаровтың төрағалығымен төтенше жағдайлардың алдын алу және жою жөніндегі облыстық комиссияның кезектен тыс отырысы өтті.Оған қала және аудан әкімдері, басқарма басшылары, гидрометеорологиялық қызмет пен коммуналдық ұйымдардың өкілдері қатысты. Күн тәртібінде ауа-райының болжамына сәйкес көктемде болуы мүмкін су тасқынына дайындық және өңірдегі гидротехникалық құрылыстардың жағдайы талқыланды.Төтенше жағдайлар департаментінің бастығы Қахарман Оразалин әкімге облыста өзендердің жағалаулары мен арналарын нығайту, бөгеттер салу және жөндеу, сондай-ақ арықтар мен каналдарды тазарту жұмыстары жүргізіліп жатқанын баяндады. Жоспарланған 135 инженерлік іс-шараның 115-і орындалды, тағы 12-сі жүріп жатыр.Сондай-ақ, Қахарман Оразалин Елек, Ырғыз, Сағыз, Темір, Ойыл, Кенжалы, Үлкен Қобда, Ор өзендері және Шалқар көлінде мұз кептелістерінің алдын алу бойынша жарылыс жұмыстарына арналған 15 учаске анықталғанын хабарлады. Су тасқынына ден қою үшін облыстың азаматтық қорғау қызметінің құралдарынан 2 454 адамнан, 866 бірлік техникадан, 102 жүзу құралынан және 441 мотопомпадан тұратын топ құрылған.«Қазгидромет» облыстық филиалының директоры Айгүл Саймованың айтуынша, күзде жауын-шашынның аздығынан топырақ құрғақ күйінде қалған. Оның қату тереңдігі былтырғы жылмен салыстырғанда 8 см-ге артық.Үш айда қар аз жиналды, бірақ синоптиктер ақпан және наурыз айлары қар түрінде жауын-шашынды болатынын жоққа шығармайды. Ақпан айында күрт жылыну күтіліп отырған жоқ, ал күндіз облыстың негізгі бөлігінде максималды температура 0-5°C аяз, солтүстікте – 8-10°C дейін аяз болады.«Қазсушар» облыстық филиалының директоры Ринат Шауенов облыс орталығындағы үш су қоймасының жай-күйі және олардың алдағы су тасқынына дайындығы туралы айтып берді.Мекеме директоры баяндағандай, «Қазсушар» теңгерімінде 27 нысан бар, оның ішінде: Ақтөбе, Қарғалы және Сазды су қоймалары, Ойыл ауданында Тамдыкөл бас шлюзі-реттегіші, 6 аудандағы көлтабанды суару жүйелері, бөгеттер мен Ырғыз ауданындағы топтық су құбырлары бар.«Ақтөбе су қоймасын қауіпсіз пайдалану мақсатында 2024 жылы Су ресурстарын басқару жүйесін дамытудың 2024-2030 жылдарға арналған тұжырымдамасына сәйкес, Ақтөбе қаласының өнеркәсіп кәсіпорындары мен облыс бойынша егіс алқаптарына су берудің авариялық жағдайлары мен үзілістерін болдырмау мақсатында Елек өзеніндегі Ақтөбе су қоймасына жасалған қайта жаңарту жұмыстары (реконструкция) аяқталды. Қойманың жобалық көлемі 245 млн. м3 құрайды», - деп атап өтті Ринат Шауенов. Сонымен қоса, былтырғы су тасқынында Сазды су қоймасына су ағынының үлкен көлемі келіп, су төгілетін шөмішті қашыртқының (ковшовый водосброс) бұзылды. Бүгінде ақау жойылды, бұл нысан да күрделі жөндеуден өтті. Су қоймасындағы судың нақты көлемі 2,5 млн. м3, жобалық көлемі 7,5 млн. м3.Ал Қарғалы су қоймасында ағымдағы жөндеу жұмыстары жүргізілді. Дегенмен, биыл қоймада қайта жаңарту жұмыстары (реконструкциялау) жасалады. Бөлінген 140 млн.теңгеге жобалық-сметалық құжаттама жасалынып жатыр. Бұл қойманың жобалық көлемі 280 млн. м3 құрайды. Үш су қоймасында да көктемгі су тасқынына дайындық үшін инертті материалдар мен жанар-жағармай әзірленген, дизельді резервтік электрогенераторлар қондырылды. Облыс әкімі Асхат Шахаров мекеме басшысына бірқатар тапсырма берді. «Көктемгі су тасқыны кезеңінде су қоймаларының деңгейін үнемі бақылап, Төтенше жағдайлар департаментімен және «Қазгидромет» мекемесімен бірлесе отырып, суды қауіпсіз ағызу жұмыстарын ұйымдастыру қажет», - деді аймақ басшысы. Ақтөбе облысының гидротехникалық құрылыстарға қызмет көрсету жөніндегі мемлекеттік мекемесінің басшысы Мамырғали Аққағазов 174 гидротехникалық құрылыстың жай-күйі туралы хабарлады.Қазір 19 нысанда жөндеу жұмыстары жүргізілуде, 15 ақпанға дейін Ойыл мен Ырғыз ауылдарындағы бөгеттердің құрылысын аяқтау жоспарлануда. Сондай-ақ, бірнеше аудандағы бөгеттердің жағалауын тазарту жұмыстары жүргізілді. Су деңгейін және гидротехникалық құрылыстардың жай-күйін үнемі бақылау жүзеге асырылады, мұз кептелістерін жоюға дайындық жүргізіледі.Баяндамашыларды тыңдағаннан кейін, облыс әкімі азаматтық қорғау қызметтеріне су тасқынына байланысты төтенше жағдайлар туындаған жағдайда дайындықты қамтамасыз ету үшін жергілікті әкімдіктермен жұмысты үйлестіруді тапсырды.«Биыл ерте су тасқыны болуы мүмкін. Сондықтан біз кез келген күтпеген жағдайларға дайын болуымыз керек. Барлық күш-жігер қажетті ресурстар мен жабдықтарды барынша жедел дайындауға бағытталуы тиіс. Бірінші наурызға дейінгі мерзімде арықтарды, су бұру арналарын, өзен арналарын, су өткізу құрылыстары мен көпірлерді қардан, қоқыстан және қамыстан тазарту жұмыстарын жүргізуді тапсырамын. Көктемгі су тасқыны кезеңінде төтенше жағдайлардың алдын алу және жою үшін техника мен жабдықтарды дайындауды ұйымдастыру қажет. Су басу қаупі бар учаскелер үшін жеткілікті мөлшерде инертті материалдар мен қапшықтарды дайындаңыздар. Эвакуацияланатын халық пен ауыл шаруашылығы жануарларын орналастыру үшін орындар ұйымдастыру, сондай-ақ жанармайдың, азық-түлік пен дәрі-дәрмектің, әсіресе көлік қатынасы үзілуі мүмкін елді мекендерде қажетті қорларды қалыптастыру қажет. Барлық қолда бар малды аудандардың жалпы базасына енгізу керек. Сондай-ақ, елді мекендердің аумағынан, соның ішінде әлеуметтік нысандардың айналасынан қар шығару жұмыстарын жүргізу қажет. Бұл іс-шаралар су тасқыны кезінде халықтың қауіпсіздігін қамтамасыз ету үшін өте маңызды. Барлығы үйлесімді және жедел жұмыс істеуі керек», - деп тапсырды әкім.Әкімнің тапсырмасы бойынша жақын арада командалық-штабтық оқу-жаттығулар өтеді, оған барлық азаматтық қорғау қызметтері, оның ішінде құтқарушылар, әскери қызметшілер, полицейлер және жергілікті атқарушы органдардың өкілдері қатысады. Оқу-жаттығу барысында су тасқыны қаупіне дайындық және барлық сценарийлер пысықталады.Ақпарат көзі : https://www.gov.kz/memleket/entities/aktobe/press/news/details/928102