Қонаевта сүт безі қатерлі ісігіне қарсы айлық аясында «Қызғылт қазан» марафоны өтті.Оған 150-ге жуық әйел қатысты. Марафоншылар түрлі жас категориялары бойынша сынға түсті. Сондай-ақ қаланың белсенді жасы 50-ден асқан тұрғындары скандинавиялық жүріс бойынша жарысты.Марафоншылар Жамбыл көшесіндегі аллея арқылы жағажайға дейінгі және қайтар бағыттағы жолды еңсерді.«Қоғамда әйелдердің орны бөлек. Нәзік жандыларсыз біздің өмірді елестету мүмкін емес. «Қызғылт қазан» айы сіздердің денсаулықтарыңызға, қатерлі ісіктің алдын алуға бағытталған ай. Тәні саудың – жаны сау. Сол себепті үнемі дәрігерлерге тексеріліп жүруге кеңес береміз. Марафонда баршаңызға сәттілік тілеймін!» – деді қала әкімінің орынбасары Төлеген Кенжебеков ашылу салтанатында.Ал қалалық көпсалалы аурухана директорының орынбасары Айсұлу Оңғарова сүт безі қатерлі ісігі жайлы деректерге тоқталып өтті.«Қызғылт қазан» – тек акция емес, бұл ауру туралы ақпараттандыру, қолдау мен әйелдер өмірін өзгертуге көмек көрсету айы. Егер обырды дер кезінде анықтаса, 90% жағдайда емделіп кетуге мүмкіндік бар. Маммологқа тексеріліп, УДЗ-дан жыл сайын өтіп тұрыңыздар. Бүгінгі марафон денсаулыққа ұмтылу мен тек алға бағыт алудың нышаны болсын! Бақыт, шаттық, табыс!» – деді ол.Жарыс нәтижесінде жеңімпаз атанғандарға бағалы сыйлықтар, медальдар мен ақшалай сыйлықтар табыс етілді.«30 жасқа дейінгілердің арасында 1-орынды иелендім. Жарыс өтетіні туралы естіген сәттен-ақ қатысуға бел будым. Ұйымдастырушыларға рақмет! Қаламыздың әйелдері аман болсын! Марафон жоғары деңгейде өтті», – деді Аделина есімді қатысушы пікірін білдіріп.Сонымен қатар жылжымалы медициналық кешенде 65 әйел маммография мен УДЗ-дан тегін өтті.Қонаев қаласының әкімдігі марафонның өтуіне демеушілік көрсетіп, серіктес болған кәсіпкерлерге алғысын білдіреді.Ақпарат көзі : https://www.gov.kz/memleket/entities/almobl-densaulyk/press/news/details/1090557?lang=kk

Бүгін Мемлекет басшысы жариялаған «Жұмысшы мамандықтар жылы» аясында Алматы облысында еңбек адамдары мен жас мамандарға арналған «ENBEK FEST» республикалық жастар слеті өтті.Ауқымды шараға еліміздің 7 өңірінен келген жұмысшы жастар қатысты. Слеттің басты мақсаты – еңбек адамының мәртебесін арттыру, жас мамандардың кәсіби дамуына мүмкіндік беру және өндіріс саласындағы жаңа идеялар мен тәжірибелерді ортаға салу.Форум аясында «Jas Talks» панельдік сессиясы ұйымдастырылды. Онда арнайы шақырылған спикерлер — «Даулет Бекет» ЖШС басшысы Сыдық Даулетов, «Шин Лайн» қайырымдылық қорының президенті Дамир Дигай, Алматы облыстық мәслихатының депутаты Сергей Горяной және «Alatau Hub» жетекшісі Бексұлтан Нұрақын жастармен өз тәжірибелерін бөлісіп, еңбек жолындағы жетістіктері туралы айтты.Слет қатысушылары үшін мазмұнды бағдарлама әзірленген. Жастар Іле ауданындағы «Даулет Бекет» ЖШС түйе шаруашылығына және «Шин Лайн» ЖШС кәсіпорнына барып, өндіріс процесімен танысты. Сонымен қатар, Кеген ауданына қарасты «Қара» шатқалы мен әйгілі «Көлсай» көлдеріне экскурсия ұйымдастырылады.Фестиваль аясында көшбасшылық қабілетті арттыруға бағытталған дәрістер, зияткерлік ойындар мен мәдени бағдарламалар өткізіледі. Ал 22 қазан күні Кеген ауданындағы «Қара» шатқалында өтетін салтанатты жабылу рәсімінде белсенділік танытқан жұмысшы жастар марапатталады.«Бүгін өтіп жатқан республикалық жастар слеті – еңбек адамдарының мәртебесін көтеріп, жас мамандарды қолдауға бағытталған маңызды алаң деп есептеймін. Мұндай кездесулер арқылы жастар өндіріс саласындағы нақты мүмкіндіктермен танысып, өз бағыттарын анықтай алады. “ENBEK FEST” – өз ісін сүйетін жастардың тәжірибе алмасуына, жаңа идеялар мен серіктестіктердің қалыптасуына мүмкіндік беретін тамаша бастама. Еңбек адамдарының еңбегін дәріптейтін мұндай шаралар жастарға үлкен мотивация береді», – деді «Фирма БЕНТ» ЖШС көпірлі кран машинисті Дильфуза Бақытжанова.Слеттің ашылу салтанатында Алматы облысы әкімінің орынбасары Ғани Майлыбаев қатысушыларға жылы лебізін білдіріп, жастардың ел дамуына қосар үлесін атап өтті:«Барлықтарыңызды осы форумда көргеніме қуаныштымын, құрметті қатысушылар! Тарих пен табиғат тоғысқан қасиетті өңір – Алматы облысына қош келдіңіздер. Бұл слет – кәсіби дамудың жаңа мүмкіндіктерін ашатын маңызды алаң. Құрметті жастар, сіздер еліміздің тірегі, экономикамыздың қозғаушы күші, ел ертеңінің иесісіздер. Қазақстанның жаңа дәуірі сіздердің қолдарыңызбен қалыптасады».«ENBEK FEST» республикалық жастар слеті – еңбек адамының мәртебесін көтеріп, жас мамандарды қолдауға бағытталған жыл сайынғы дәстүрлі шаралардың бірі ретінде еңбек мәдениетін дәріптеуге серпін берді.Ақпарат көзі : https://www.gov.kz/memleket/entities/almobl/press/news/details/1090558?lang=kk

Брюссель, 2025 жылғы 21 қазан – Қазақстан Республикасы 20–21 қазан  Бельгияның Көркемөнер корольдік мұражайында өткен Global Tourism Forum 2025 халықаралық форумына қатысты. World Tourism Forum Institute (WTFI) ұйымдастырған бұл форум «Өзгермелі әлемдегі туризмді қайта ойлау» ұранымен өтіп, әлемнің елуге жуық елінен келген мыңнан астам қатысушыны біріктірді. Форумның ашылуында БҰҰ Дүниежүзілік туристік ұйымының жаңадан сайланған Бас хатшысы Шейха әл-Нувайс, Түркі мемлекеттері ұйымының Бас хатшысы Кубанычбек Омуралиев және ЕО-ның туризм және көлік жөніндегі комиссары Апостолос Цетзекостас сөз сөйледі.Қазақстан Республикасының Бельгия Корольдігіндегі Елшілігінің қолдауымен және Almaty Tourism Bureau қатысуымен еліміздің ұлттық стендінің тұсау кесері өтті. Онда Қазақстанның туристік және инвестициялық әлеуеті, табиғи және мәдени мұрасы, сондай-ақ тұрақты туризмді дамыту перспективалары таныстырылды.Форум аясында Қазақстан Республикасының Бельгиядағы Елшісі Роман Василенко мен Global Tourism Forum Президенті Булут Багджы арасында кездесу өтті. Тараптар туризм саласындағы халықаралық ынтымақтастықты кеңейту және тәжірибе алмасу мәселелерін талқылады.Булут Багджы келесіні атап өтті: «Қазақстан туристік саланы дамытуда заманауи тәсілдерді ұлттық табиғи және мәдени құндылықтарды сақтаумен тиімді ұштастыра отырып, әсерлі прогресс көрсетуде. Біз бұл елге жаңа туристік және инвестициялық бағыт ретінде қызығушылықтың артып келе жатқанын байқаймыз».Global Tourism Awards 2025 марапаттау рәсімі барысында Алматы қаласы «Tourism Innovation and Urban Transformation» саласындағы арнайы марапатқа ие болды. Бұл жүлде Алматының туристік тәжірибені жақсартуға бағытталған инновациялық шешімдер енгізу және қалалық инфрақұрылымды дамыту бойынша жеткен нәтижелерін мойындау болып табылады.Сонымен қатар, Global Tourism Forum Президенті Булут Багджы Қазақстан Республикасының Президенті Қасым-Жомарт Тоқаевтың атына арналған хрусталь панноны Қазақстанның Елшісі Роман Василенкоға табыс етті. Бұл сыйлық Мемлекет басшысының халықаралық ынтымақтастықты нығайту және тұрақты туризмді әлемдік деңгейде ілгерілету жолындағы  жасаған қолдауының жоғары бағасы ретінде берілді.Қазақстанның Global Tourism Forum 2025 форумына қатысуы елдің тұрақты туризмді дамыту мен халықаралық әріптестікті тереңдету бағытындағы өсіп келе жатқан рөлін тағы да айқындады.Ақпарат көзі : https://www.gov.kz/memleket/entities/mfa-brussels/press/news/details/1090576?lang=kk

   Қазақстанда кедендік төлемдер мен салықтарды төлеу кезіндегі жеңілдіктерді беру тәртібі Еуразиялық экономикалық одақтың (ЕАЭО) нормаларымен, халықаралық шарттармен және ұлттық заңнамамен реттеледі.      Бұл — бизнесті мемлекеттік қолдаудың және сыртқы экономикалық қызметті ынталандырудың маңызды тетігі.      Кедендік-тарифтік жеңілдіктерге қатысты барлық мәселелер ЕАЭО деңгейінде толық реттелмеген. Сондықтан Одаққа мүше мемлекеттер қосымша қолдау шараларын дербес белгілеуге құқылы.      Қазақстанда бұл тәртіп Кеден кодексі мен Қазақстан Республикасының Салық кодексінде айқындалған.      Жеңілдіктер сыртқы экономикалық қызметке қатысушылардың қаржылық жүктемесін азайтуға, инвестициялық тартымдылықты арттыруға және отандық кәсіпорындардың бәсекеге қабілеттілігін күшейтуге мүмкіндік береді.      Кедендік баждардан босату. Кедендік баждарды төлеуден босатудың негіздері төмендегілерде көзделген:ЕАЭО туралы шарттың құрамындағы Бірыңғай кедендік-тарифтік реттеу туралы хаттамаға №6 қосымшада (Қазақстан Республикасының 2014 жылғы 14 қазандағы №240-V Заңымен ратификацияланған);Кеден одағы комиссиясының 2009 жылғы 27 қарашадағы №130 шешімінде.       Кедендік баждар төлеуден келесі тауарлар босатылады:    •    гуманитарлық немесе техникалық көмек ретінде әкелінетін;    •    шетелдік құрылтайшының жарғылық капиталға қосқан үлесі ретінде әкелінетін;    •    ЕАЭО кемелерінің теңіз аулау өнімдері;    •    валюта мен бағалы қағаздар;    •    табиғи апаттардың зардаптарын жоюға арналған тауарлар.       Бұл жеңілдіктер жалпы сипатқа ие және тауардың шыққан еліне тәуелді емес.      Оларды қолдану тәртібі Кеден одағы комиссиясының 2011 жылғы 15 шілдедегі №728 шешімімен бекітілген.       ҚҚС бойынша жеңілдіктер.  Қазақстан Республикасының Салық кодексінің 399-бабына сәйкес, қосылған құн салығын төлеуден келесі тауарлар босатылады:    •    гуманитарлық және қайырымдылық мақсаттарда әкелінетін;    •    өндірістік қажеттіліктерге арналған, соның ішінде жабдықтар, шикізат және материалдар.       Аталған жеңілдіктерді қолдану тетігі ҚР Қаржы министрінің 2018 жылғы 23 ақпандағы №267 бұйрығымен бекітілген.       Кедендік алымдар бойынша жеңілдіктер. «Кедендік реттеу туралы» ҚР Кодексінің 80-бабына сәйкес, кейбір жағдайларда тауарларды декларациялау үшін алынатын кедендік алымдар төленбейді.       Мұндай жағдайлар халықаралық шарттармен және ұлттық актілермен айқындалады.      Құжаттарды ұсыну тәртібі ҚР Қаржы министрінің 2018 жылғы 14 ақпандағы №179 бұйрығымен бекітілген.       Бизнесті және инвестицияны қолдау. Осылайша, заңда көзделген кедендік төлемдер мен салықтар бойынша жеңілдіктер — бұл өндірістік дамуды ынталандырудың, инвестиция тартудың және қазақстандық компаниялардың халықаралық нарықтағы позициясын нығайтудың тиімді тетігі.       Жеңілдіктер бизнесті жүргізуге қолайлы жағдай жасап, елдегі экономикалық белсенділіктің өсуіне ықпал етеді.Ақпарат көзі : https://www.gov.kz/memleket/entities/kgd-akmola/press/news/details/1090481?lang=kk

Қазақстан мен Әзербайжан арасындағы тауар айналымы екі есе ұлғайып, серіктестіктің жаңа деңгейіне шықты. Екі елдің ынтымақтастығы сауда, өнеркәсіп, логистика және цифрландыру салаларында дамуда.Бұл жайлы Астанада өткен Қазақстан–Әзербайжан бизнес-форумында ҚР Сауда және интеграция вице-министрі Айдар Әбілдабеков хабарлады. 2025 жылдың қаңтар–тамыз айларында өзара тауар айналымы $343,3 млн-ға жеткен. Оның ішінде Қазақстан экспорты $290,8 млн болса, Әзербайжаннан импорт 58%-дан астам өскен.Вице-министрдің айтуынша, Қазақстан Әзербайжанға экспортталатын тауар түрлерін кеңейтуді ұсынып отыр. Бұл бағытта еліміз жалпы көлемі 14,5 млн тонна болатын ауыл шаруашылығы өнімдерін жеткізуге дайын. Олардың қатарында дәнді және майлы дақылдар, ұн, май және картоп бар.«Бүгінде бізге тұрақты өндірістік байланыс пен ортақ жобалар құру маңызды. Кооперацияның мәні осында. Біз бәсекелестік арқылы бөлек емес, бірге дамимыз»,- деді ол.Форум аясында Қазақстан мен Әзербайжан өкілдері 16 келісім мен меморандумға қол қойды. Құжаттар өнеркәсіп, туризм, білім, цифрлық технология және логистика салаларын қамтиды. Серіктестік аясында «Қазпошта» мен Zira Port, «Атамекен» ҰКП мен KOBIA агенттігі және екі елдің бірқатар жеке компаниялары арасында меморандумдар бекітілді.Ынтымақтастықтың маңызды бағыттарының бірі – экспортты қолдау жөніндегі ұлттық институттар QazTrade пен AZPROMO арасындағы өзара меморандум.«Біз агроөнеркәсіп пен өндірістік кооперацияда үлкен мүмкіндік көріп отырмыз. Қазақстан әзербайжандық әріптестерімен бірге жаңа өндірістер ашуға, өңдеу мен қаптама саласын дамытуға және үшінші елдердің нарығына шығуға дайын. Кооперация біз үшін жай ғана ұран емес, компанияларға нақты келісім жасауға көмектеседі»,- деді QazTrade бас директоры Айтмұхаммед Алдажаров. Ақпарат көзі : https://www.gov.kz/memleket/entities/mti/press/news/details/1090511?lang=kk

Қостанайда барлығы үш жерасты өткелі бар. Солардың ішінде бұл өткел – толық жаңартылған алғашқысы.Мердігер ұйым – «БАСТИОН құрылыс фирмасы» ЖШС жұмыстарды екі ай ішінде сапалы әрі ескертусіз орындады.Өткелдің қауіпсіз әрі қолайлы болуы үшін барлық жағдай жасалған: мүмкіндігі шектеулі азаматтарға арналған пандустар, жаңа жарықтандыру, бейнебақылау, түтіннен қорғау жүйесі, гранитпен қаптау және поликарбонат панельдерден жасалған кіреберіс аркалар орнатылды.Бұл нысан ең алдымен тұрғындардың, әсіресе балалардың қауіпсіздігі үшін маңызды, себебі маңайда екі мектеп орналасқан.Өткелге жапсарлас жерде бизнес нысаны – дәріхана бар. Кәсіпкер ай соңына дейін ғимараттың қасбетін жөндеп, оны тәртіпке келтіреді. Нәтижесінде нысан жаңартылған өткелмен бірыңғай келбетке ие болады.Сондай-ақ «Солнечный» дүкенінің жанындағы аумақ қаралды. Келесі жылы мұнда автотұрақты жөндеу, сыртқы инженерлік желілер мен қасбеттерді, соның ішінде супермаркеттің өзін де ретке келтіру жоспарлануда. Нәтижесінде бұл аумақта біртұтас сәулеттік келбет қалыптасады.Ақпарат көзі : https://www.gov.kz/memleket/entities/kostanai-kalasy-akimat/press/news/details/1090450?lang=kk

 🔹Бүгін Шымкент қаласында Қазақстан халқы Ассамблеясының 30 жылдығына орай «Елдесу және татуласу» жобасы аясында «Медиация – татулық тірегі» тақырыбында форум басталды.🔹Екі күнге жоспарланған іс-шараның мақсаты – жергілікті медиаторлардың тәжірибесін арттыру арқылы этномедиацияның әлеуетін дәріптеу және дау-дамайды реттеудегі үздік тәжірибелелік кейстермен бөлісу.🔹Форумға қалалық ішкі саясат және жастар істері жөніндегі басқармасының басшылығы, қалалық ҚХА төрағасының орынбасары, құқық қорғау органдары мен әділет департаментінің қызметкерлері, медиация оралықтарының кәсіби медиаторлары, мектеп психологтары, қалалық ҚХА жанындағы қоғамдық құрылымдар мен этномәдени бірлестіктердің өкілдері қатысты.🔹Қатысушылар алдында қалалық ішкі саясат және жастар істері жөніндегі басқармасы басшысының міндетін атқарушы Заңғар Үсіпахметов сөз сөйлеп, «Елдесу және татуласу» жобасы аясында ұйымдастырылған іс-шараның маңыздылығына тоқталды. Этномедиация әлеуетін ұтымды пайдаланудың қоғамдағы татулық пен тұрақтылықты сақтауға қосатын қомақты үлесі туралы айтты.– Өркениетті қоғамның басты шарты – заңның үстемдігі мен құқықтың салтанат құруы. Медиация – тараптарды татуластырып, өнбес даудың өріс алуына жол бермейді. Мемлекет басшысының этномедиацияны әрі қарай дамыту ісін Қазақстан халқы Ассамблеясына жүктеуі уақыт талабынан туындап отыр, – деді Заңғар Нышанбекұлы.🔹Форумның алғашқы күні қатысушыларға Қазақстан Республикасы Президентінің жанындағы Мемлекеттік басқару Академиясы Абай облысы бойынша филиалының директоры, кәсіби медиатор Әсет Абжақов сөз сөйлеп, медиация саласындағы заманауи тәсілдер мен этномедиация тәжірибесін дамыту бағытында мазмұнды презентация ұсынды. Сондай-ақ аталған академия өкілі, кәсіби медиатор Гүлжан Қожахметова қатысушыларға дау-жанжалды шешудің тиімді модельдері мен медиатордың кәсіби этикасы туралы тәжірибелік дәріс өтті.🔹Айта кетейік, форумның жалғасы 22 қазанда Шымкент қаласындағы Ж.Тәшенов университетінің «М.Байғұт атындағы студенттер үйі» ғимаратында өтеді. Бағдарламаға сәйкес кәсіби медиаторлар қатысушылар алдында этномедиацияны дамытуға арналған тақырыптарда дәрістер өтіп, өз тәжірибелері мен үздік тәсілдерді бірлесе талқылайды. Форум соңында қатысушыларға арнайы сертификаттар табысталады.#ҚХА30жыл #30летАНК #Шымкент #shymkent

20 қазанда «Amanat» партиясының қалалық филиалында қала әкімінің кезекті азаматтарды қабылдауы өтті.Қабылдаулар халықтың проблемалық мәселелерін жедел шешу, сондай-ақ жергілікті билік органдары мен қала тұрғындары арасындағы кері байланысты нығайту мақсатында тұрақты негізде жүргізіледі.Кездесуде тұрғын үй-коммуналдық шаруашылық, абаттандыру, әлеуметтік қолдау және көлікпен қамтамасыз ету мәселелеріне қатысты өтініштер қаралды. Азаматтардың барлық өтініштері жұмысқа қабылданды.Әрбір мәселе бойынша тиісті органдарға әрі қарай қарау және қажетті шаралар қабылдау үшін тиісті түсіндірмелер мен тапсырмалар берілді.Шахтинск қаласы әкімдігінің баспасөз қызметіАқпарат көзі : https://www.gov.kz/memleket/entities/karaganda-shahtinsk/press/news/details/1090351?lang=kk

Бүгін, 2025 жылғы 21 қазанда Тереңкөл ауданының кәсіпкерлерімен "Алдаспан" орталығында дөңгелек үстел форматында семинар өтті. Іс-шараны Тереңкөл ауданының мемлекеттік кірістер басқармасы ұйымдастырды. Семинар аудандық кәсіпкерлер палатасы филиалының директоры Мұса Әбдіхаевтың қатысуымен, МКБ басшысы Мейрамбек Рахметовтың басшылығымен өтті. Кездесудің негізгі тақырыбы – 2026 жылғы 1 қаңтардан бастап күшіне енетін жаңа Салық кодексінің ережелерін түсіндіру. Іс-шарағаауданныңшағынжәнеортабизнесөкілдеріқатысты. Семинарда қаралған негізгі мәселелер: сараланған салық мөлшерлемелерін енгізу, жеке табыс салығының прогрессивті мөлшерлемелерін белгілеу, қосылған құн салығын (ҚҚС) реформалау, сән-салтанат салығын енгізу, арнайы салық режимдеріндегі өзгерістер, салық төлеушілермен өзара іс-қимылдың сервистік моделіне көшу, салықтық әкімшілендіруді цифрландыру, салық есептілігі нысандарын қысқарту. Семинарға қатысушыларға өзекті мәселелер бойынша түсініктемелер беріліп, оларды толғандыратын тақырыптарға ашық диалог форматында жауаптар берілді. Іс-шара жұмыстың ашықтығын және қаржылық сауаттылық деңгейін арттыруға ықпал ететін кәсіпкерлермен ашық қарым-қатынас үшін диалог алаңын құруға ұмтылысын атап өтті. Павлодар облысы бойынша МКДтүсіндіру жұмысы және Байланыс-орталығы басқармасы Ақпарат көзі : https://www.gov.kz/memleket/entities/kgd-pavlodar/press/news/details/1090393?lang=kk

Осло, 2025 жылғы 21 қазан – Республика күні қарсаңында Қазақстан Республикасының Норвегия Корольдігіндегі Елшілігі еліміздің қазіргі даму үрдістері мен қазақстан-норвегиялық қатынастардың жай-күйіне арналған дөңгелек үстел ұйымдастырды.Іс-шараға Норвегия Сыртқы істер министрлігінің, сараптамалық қауымдастықтың, үкіметтік емес ұйымдардың, бизнес құрылымдардың, бұқаралық ақпарат құралдарының өкілдері мен қоғам қайраткерлері қатысты.Елші Әділ Тұрсынов өз сөзінде Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында жария етілген саяси және экономикалық реформалар бағдарламасын егжей-тегжейлі таныстырды.Норвегиялық тарапқа Қазақстан Президенті бастамашылық еткен саяси жаңғыртулардың негізгі бағыттары, соның ішінде бір палаталы Парламент құру жөніндегі ұсыныс жеткізілді.Сонымен қатар қатысушылар еліміздің инвестиция тарту мен орнықты экономикалық өсімді қамтамасыз етуге бағытталған стратегиясын ілгерілететін «Born Bold» халықаралық ақпараттық кампаниясының жүзеге асырылу барысымен таныстырылды.Іс-шара аясында Осло қаласындағы «Қазақ-норвег мәдени орталығының» негізін қалаушы Алмагүл Калелова қонақтарға қазақ мәдениеті мен Норвегияда тұратын қазақ диаспорасы туралы мазмұнды әрі танымдық баяндама жасады.Кездесу соңында қатысушылар Астана мен Осло арасындағы екіжақты қарым-қатынастарының соңғы жылдары айтарлықтай жанданып, өзара ынтымақтастықтың жаңа перспективалары бар екенін атап өтті.Ақпарат көзі : https://www.gov.kz/memleket/entities/mfa-oslo/press/news/details/1090318?lang=kk

Алакөл ауданы бойынша Мемлекеттік кірістер басқармасында салық төлеушілердің өзекті мәселелеріне арналған Ашық есік күні өткізілді. Іс-шараның мақсаты – мемлекеттік кірістер органдарының қызметінің ашықтығы мен айқындығын арттыру, азаматтар мен кәсіпкерлердің сенімін нығайту, сондай-ақ сыбайлас жемқорлықтың алдын алу болып табылады.Іс-шара барысында басқарма қызметкерлері салық төлеушілер арасында сауалнама жүргізді, оның мақсаты – көрсетілетін мемлекеттік қызметтердің сапасына қанағаттанушылық деңгейін анықтау және сыбайлас жемқорлық тәуекелдеріне ықпал ететін факторларды айқындау.Сонымен қатар, басқарма мамандары 2026 жылдың 1 қаңтарынан бастап күшіне енетін жаңа Салық кодексінің негізгі ережелерін түсіндірді. Әсіресе шағын және орта бизнеске салық салу жүйесіндегі өзгерістерге, жеке табыс салығының прогрессивті шкаласының енгізілуіне, сондай-ақ салықтық шегерімдер мен арнаулы салық режимдерін қолданудың жаңа тәртібіне ерекше назар аударылды.Қатысушылар өздерін қызықтырған сұрақтарын қойып, ұсыныстарын білдіріп, салық салу және есептілік мәселелері бойынша білікті кеңестер алды.Мұндай іс-шаралар халықтың салықтық сауаттылығын арттыруға, салық төлеушілер мен мемлекеттік кірістер органдары арасындағы әріптестік қатынастарды нығайтуға және қоғамда сыбайлас жемқорлыққа қарсы мәдениетті қалыптастыруға ықпал етеді.Ақпарат көзі : https://www.gov.kz/memleket/entities/kgd-zhetysu/press/news/details/1090298?lang=kk

KAZAID ҚЫЗМЕТКЕРЛЕРІНІҢ КОРЕЯДАҒЫ ТАҒЫЛЫМДАМАСЫ2025 жылғы 21 қыркүйек пен 3 қазан аралығында KazAID қызметкерлері Сұлтан Керімсал мен Камила Шаймерденова Корея Республикасының Сеул қаласында өткен KOICA бағдарламасы «Capacity Building for International Development Agency in Emerging Donors & GPEDC Learning & Accelerating Program (2025)» аясында екі апталық тағылымдамадан өтті.Бағдарламаның мақсаты – жаңа және дәстүрлі донорлар арасындағы тәжірибе алмасу, сондай-ақ Кореяның ресми даму көмегін (ДРК) іске асырудағы институционалдық үлгісін зерделеу болды.Тағылымдама барысында қатысушылар Korea University, KOICA, Norad, БҰҰДБ және GPEDC мамандарының қатысуымен өткен дәрістер мен практикалық сессияларға қатысты. KazAID командасы KOICA агенттігінің жобалық циклі мен тиімділікті бағалау тәсілдерін, ашықтық пен ведомствоаралық үйлестіру механизмдерін, сондай-ақ цифрлық мониторинг құралдарын зерттеді.Жеке блоктар Оңтүстік–Оңтүстік ынтымақтастығына, ТДМ-дарды ұлттық және сыртқы саясатқа енгізу жолдарына және даму қаржыландыруындағы жеке сектордың рөліне арналды.Сонымен қатар, KazAID өкілдері Busan Global Partnership Forum және Seoul ODA Forum іс-шараларына қатысып, халықаралық дамудағы заманауи тәсілдермен танысты. Бағдарлама мәдени бөлікті де қамтыды — қатысушылар Сеулдің тарихи және қазіргі нысандарына барып, корей мәдениеті мен дәстүрлерімен танысты.Алынған тәжірибе KazAID институционалдық әлеуетін нығайтып, Қазақстанның халықаралық даму саласындағы беделін арттыруға елеулі үлес қосты.  Ақпарат көзі : https://www.gov.kz/memleket/entities/kazaid/press/news/details/1090256?lang=kk

Қасым-Жомарт Тоқаев:– Сізді мемлекеттік сапарыңыз аясында Қазақстанда қарсы алу – мен үшін үлкен мәртебе. Бұл – елдеріміздің арасындағы стратегиялық серіктестік пен одақтастық қатынастарды одан әрі дамыту тұрғысынан өте маңызды оқиға. Қазақстан мен Әзербайжан тек достас елдер емес, сондай-ақ бауырлас халықтар. Сондықтан Сіздің еліңізбен сан қырлы ынтымақтастықты өркендетуге баса мән береміз. Қазіргі кезде Әзербайжан Сіздің қуатты көшбасшылығыңызбен халықаралық аренадағы абырой-беделін елеулі түрде арттырды, өз өңірінде ықпалды мемлекет ретінде өте маңызды рөл атқарады. Біз үшін Әзербайжанмен сауда-экономикалық ынтымақтастықты және саяси серіктестікті нығайту – аса өзекті міндет, – деді Мемлекет басшысы.Ильхам Әлиев:– Бүгінде Қазақстан дамудың жоғары деңгейін көрсетіп отыр. Еліңіздегі қоғамдық-саяси жағдай тұрақты, экономикалық даму қалыпты. Сіз жүргізіп жатқан реформаларды зор қызығушылықпен бақылап отырмыз. Еліңізді жаңғырту мен әлеуетін арттыру жолындағы бағдарыңызды толық қолдаймыз. Екіжақты қарым-қатынастың стратегиялық, одақтастық сипат алғанын атап өттіңіз. Біз барлық бағыттағы ықпалдастықты нығайтуға ниеттіміз. Бүгінгі келіссөз, сондай-ақ Жоғары мемлекетаралық кеңес отырысы барысында ауқымды күн тәртібін тағы да пысықтап, өзара серіктестіктің алдағы қадамдарын айқындаймыз, – деді Әзербайжан Президенті.Мемлекеттер басшылары сауда-экономика, инвестиция, ауыл шаруашылығы және көлік-транзит салаларындағы ынтымақтастықты нығайту мәселесін жан-жақты талқылады.Сондай-ақ мәдени-гуманитарлық ықпалдастыққа назар аударды.Тараптар аймақтық және халықаралық күн тәртібіндегі өзекті мәселелер жөнінде пікір алмасты.

Ақордада Қазақстанға мемлекеттік сапармен келген Әзірбайжан Президентін ресми қарсы алу рәсімі өтті. Қасым-Жомарт Тоқаев пен Ильхам Әлиев өздерінің ресми делегацияларының мүшелерін таныстырды. Мемлекет басшыларын құрметті қарауыл бастығы қарсы алды. Екі елдің мемлекеттік әнұрандары шырқалды.

 Қасым-Жомарт Тоқаев пен Ильхам Әлиев бір-біріне ресми делегация мүшелерін таныстырды. Құрмет қарауылы ротасының бастығы мемлекеттер басшыларына рапорт берді. Бұдан соң екі елдің әнұрандары орындалды.

Wildberries дерегінше Республика күніне орай ұйымдастырылған «Береке Fest» акциясы аясында қазақстандық кәсіпкерлердің тауарларына сұраныстың артқанын тіркеді. Биылғы жылдың қазан айының ортасынан бастап Wildberries платформасында акция басталғалы бері қазақстандықтардың онлайн-сатып алуға деген қызығушылығы өткен аптамен салыстырғанда 5%-ға өскен*. Акцияға 8,5 мыңнан астам қазақстандық кәсіпкер қатысуда. Олар өз тауарларына 10%-дан 90%-ға дейін жеңілдік мөлшерін өз бетінше белгілейді. Сатып алушылар арасында ең жоғары сұранысқа ие болған тауар санаттары: • желі жабдықтары – +223% (ақшалай мәнде), • бау-бақша техникасы – +134%, • автокөлік электроникасы – +114%, • балалар тағамы – +101%, • асүйге арналған техника – +13%. Акция барысында ең көп сатылған тауарлар қатарына мыналар кірді: • шырынсыққыштар (сұраныс 18 есе артқан), • смартфондар (10 есе), • бау-бақша техникасы (электр аралар мен қар тазалайтын машиналар – 7 есе), • спорттық аксессуарлар (4 есе), • сымсыз шаңсорғыштар (2 есе). Сатып алуда ең белсенді өңірлер қатарында Алматы, Қарағанды, Астана, Павлодар, сондай-ақ Ақмола және Шығыс Қазақстан облыстары бар.«Береке Fest» акциясы Қазақстан Республикасы Сауда және интеграция министрлігінің бастамасымен 2025 жылғы қыркүйек айының соңында іске қосылды. Бүгінде бұл акцияға еліміздің 80-нен астам ірі сауда желілері қатысуда. Қазан айының ортасында аталған бастамаға Wildberries, Kaspi, Teez сынды ірі онлайн платформалар қосылып, акцияның ел аумағындағы қамту ауқымын кеңейтуге және отандық бизнесті қолдауға мүмкіндік берді. *Wildberries деректері бойынша, 2025 жылғы 21 қазанға дейінгі мәліметтер. Ақпарат көзі : https://www.gov.kz/memleket/entities/mti/press/news/details/1090202?lang=kk

2025 жылдың 21 қазанында Зияткерлік меншік құқығы бөлімінің басшысы Динара Хусаинова географиялық нұсқаулар мен тауар таңбаларын тіркеу мәселелері бойынша ақпараттық-түсіндіру жұмысы аясында «Атамекен Дос» ЖШС-не барды.Кездесу барысында географиялық нұсқауларды тіркеудің артықшылықтары, брендті құқықтық қорғау, өткізу нарығын кеңейту мүмкіндіктері, сондай-ақ өзгенің таңбаларын заңсыз пайдаланғаны үшін жауапкершілік шаралары талқыланды.Мұндай кездесулер кәсіпкерлерге зияткерлік меншік құралдарын дұрыс пайдаланып, өз бизнесін қорғауға және дамытуға мүмкіндік береді. Қостанай облысыӘділет департаментініңБаспасөз қызметі Ақпарат көзі : https://www.gov.kz/memleket/entities/adilet-kst/press/news/details/1090186?lang=kk

2025 жылғы 18 қазанда Алматы аймақтық көпсалалы  клиникада сүт безі қатерлі ісігіне қарсы күрес жөніндегі айлық аясында Ашық есік күні өткізілді. Іс-шараның мақсаты – халықты онкологиялық аурулардың алдын алу мен ерте кезеңде анықтаудың маңыздылығы туралы ақпараттандыру.Акция аясында 42 пациентке мамандар кеңес берді. Тексеру нәтижелері бойынша:•3 адамнан сүт безі қатерлі ісігі анықталды,•6 адамнан обыр алды жағдайлар тіркелді.Сондай-ақ, 53 диагностикалық зерттеу жүргізілді, оның ішінде ультрадыбыстық зерттеу және маммография бар.Мұндай іс-шаралар онкологиялық аурулармен күресте маңызды рөл атқарады, себебі олар ауруды ерте сатысында анықтауға мүмкіндік береді – бұл кезеңде емдеу тиімділігі жоғары. Клиниктің медицина қызметкерлері әйелдердің тұрақты тексеруден өтіп тұруы және қатерлі ісікке әкелетін қауіп факторлары туралы хабардар болуы – денсаулық пен өмірді сақтаудың басты кепілі екенін атап өтті.Ақпарат көзі : https://www.gov.kz/memleket/entities/almobl-densaulyk/press/news/details/1090195?lang=kk

2025 жылғы 18 қазанда Жамбыл ауданының Ұзынағаш ауылында Алматы облысы Денсаулық сақтау басқармасының 2025 жылдың 9 айының қорытындысы бойынша көшпелі алқа отырысы өтті. Іс-шара Алматы облысы әкімінің орынбасары Исатаев Рустам Маратұлының және облыстық Денсаулық сақтау басқармасының басшысы Сүлейменов Ержан Әбілхасымұлының төрағалығымен өтті.Жиынға медицина ұйымдарының басшылары, аудандық әкімдіктер мен салалық құрылымдардың өкілдері қатысты.Күн тәртібінде келесі мәселелер қаралды:•2025 жылдың III тоқсанындағы денсаулық сақтау жүйесінің қызмет қорытындылары;•санитариялық-эпидемиологиялық жағдай;•көрсетілген медициналық көмектің сапасы мен көлеміне жүргізілген мониторинг, келісімшарттық міндеттемелердің орындалуы;•жыл соңына дейінгі негізгі міндеттер мен саланың даму бағыттары.2024 жылдан бастап елімізде 2029 жылға дейінгі Ұлттық даму жоспары жүзеге асырылуда. Бұл құжат 3 бағытты, 42 нысаналы көрсеткішті және 98 іс-шараны қамтиды. Алматы облысында осы жоспар шеңберіндегі көрсеткіштер мен тапсырмаларды орындау бойынша белсенді жұмыс жүргізілуде.Инфрақұрылым және материалдық-техникалық жарақтандыру«Ауылдық денсаулық сақтауды жаңғырту» ұлттық жобасы аясында Алматы облысында 38 денсаулық сақтау нысаны салынуда, оның 21-і 2025 жылы пайдалануға берілді, ал қалған 16 нысанда құрылыс-монтаж жұмыстары жүргізілуде. Құрылыстарды аяқтау және пайдалануға беру қазан-қараша айларына жоспарланған. Сонымен қатар қосымша 7 нысанның құрылысы жалғасуда.2025 жылы өңірдегі медициналық ұйымдарға 177 бірлік заманауи медициналық жабдық жеткізу жоспарланған, оның ішінде:•24 бірлік ірі технологиялық техника: МРТ, ангиограф, жоғары сапалы УДЗ аппараттары, маммографтар, видеоэндоскопиялық және лапароскопиялық жабдықтар бар.Жыл соңына дейін медициналық ұйымдардың материалдық-техникалық жарақтандырылу деңгейі 93%-ға дейін жетеді деп күтілуде.Сонымен қатар 90 жедел жәрдем көлігін сатып алу бойынша жоба жүзеге асырылуда. Қазіргі таңда сатып алу рәсімдері аяқталуға жақын, көліктерді жеткізу 2025 жылдың соңына дейін жоспарланған.Жылжымалы медициналық кешен жұмысы«Қазақстан халқына» қоғамдық қоры арқылы алынған жылжымалы медициналық кешен 2025 жылдың ақпанынан қазан айына дейін 10 200 адамды қамтып, 10 500-ден астам диагностикалық процедура жүргізді. Тексеру нәтижесінде:•23 онкологиялық ауру жағдайы,•463 обыр алды жағдай анықталған.Алматы облысының денсаулық сақтау жүйесі негізгі бағыттар бойынша оң өзгерістерге қол жеткізіп отыр. Материалдық-техникалық база нығайып, медициналық көмектің сапасы мен қолжетімділігі артуда, инфрақұрылымдық жобалар табысты іске асырылуда.Сонымен қатар салада шешуді қажет ететін бірқатар өзекті мәселелер бар:•медициналық сақтандырумен қамтылмаған халықтың үлесі,•ауылдық жерлердегі медицина кадрларының тапшылығы,•алғашқы медициналық-санитариялық көмекті одан әрі жетілдіру қажеттілігі.Жыл соңына дейін қойылған міндеттерді толық орындау үшін жүйелі және үйлесімді жұмыс жалғасатын болады.Ақпарат көзі : https://www.gov.kz/memleket/entities/almobl-densaulyk/press/news/details/1090196?lang=kk

Алматы облысы тілдерді дамыту басқармасының басшысы лауазымына Салтанат Дауыспекқызы Беспаева тағайындалды.Салтанат Дауыспекқызы – өңірдің білім және мәдениет саласында ұзақ жылдық тәжірибесі бар білікті маман. Бұған дейін ол облыстық білім басқармасын, сондай-ақ Іле ауданының білім бөлімін басқарған.1975 жылы дүниеге келген. Білімі жоғары: 1999 жылы Қазақ ауыл шаруашылық институтын «Агроөндірістік кешеніндегі экономика және менеджмент» мамандығы бойынша, 2002 жылы Абай атындағы Алматы мемлекеттік университетін «Қазақ тілі және әдебиеті» мамандығы бойынша тәмамдаған. 2024 жылы Қазақ ұлттық аграрлық зерттеу университетінде «Іскерлік әкімшелендіру» мамандығы бойынша магистр дәрежесін иеленді.Еңбек жолын 2000 жылы Еңбекшіқазақ ауданындағы Ыбырай Алтынсарин атындағы орта мектептің қазақ тілі пәнінің мұғалімі ретінде бастаған. Кейін аталған мектептің педагог-ұйымдастырушысы, директордың тәрбие ісі жөніндегі орынбасары, Мұхтар Әуезов атындағы орта мектептің директоры болып еңбек етті.Әр жылдары Еңбекшіқазақ ауданының білім және мәдениет бөлімдерінде басшылық қызметтер атқарды. Сондай-ақ Алматы облысы білім басқармасының басшысы, Іле ауданы білім бөлімінің басшысы лауазымдарында қызмет етті.2025 жылдың 20 қазанынан бастап Салтанат Беспаева Алматы облысының тілдерді дамыту басқармасының басшысы болып тағайындалды.Ақпарат көзі : https://www.gov.kz/memleket/entities/almobl/press/news/details/1090174?lang=kk