15 қарашада Астана қаласында өткен ауыл шаруашылығы қызметкерлерінің бірінші форумы аясында Мемлекет басшысы Үкіметке Жылқы шаруашылығы институтын құруды тапсырды. Президент Қасым-Жомарт Тоқаевтың тапсырмасын орындау мақсатында Ақтөбе ауыл шаруашылығы тәжірибе стансасының негізінде «Қазақ жылқы шаруашылығы және жемшөп өндіру ғылыми-зерттеу институты» ЖШС құрылды. Айта кетейік, мекеме «Ұлттық ғылыми-білім беру орталығы» құрамында.Жаңа құрылған институттың жұмысы – асыл тұқымды жылқылардың сапасын жақсартуға, жылқы шаруашылығын белсенді дамытуға, ғылыми-зерттеу жұмыстарын жүргізуге және отандық тұқымды сыртқы нарыққа шығаруға бағытталған. Алдағы бес жылда асыл тұқымды жылқы санын 6-7 пайызға арттыру көделіп отыр.Жергілікті қостанай, адай және соғымға арналған мұғалжар, жәбе, күшім генотиптерін көбейту үшін селлекциялық және асылдандыру бағытында жұмыстар белсенді жүргізілмек. Ол үшін жылқылардың әртүрлі генетикалық топтары туралы ақпаратты сақтайтын деректер қорын және ұрықтар мен эмбриондар банкі құрылмақ. Сондай-ақ, биелерді қолдан ұрықтандыру зертханалық пунктін салып, арнайы жылқы өсіруші мамандарын дайындау жоспарланып отыр. Арнайы жылқы ветеринарлық клиникасын ашу арқылы ветеринариялық қызмет көрсету деңгейінің сапасы жақсарады - дейді мамандар.2035 жылға дейін жылқы шаруашылығында ғылыми зерттеулердің басым бағыттарының бірі отандық популяциядағы жылқылардың генетикалық әлеуетін селекциялық, технологиялық әдістермен арттырып, Қазақстанның әртүрлі өңірлерінің тауар шаруашылықтарына кеңінен енгізу. Мұның бәрі өсірілетін тұқымдардың өнімділігінің 20-25%-ға өсуін қамтамасыз етеді.Белгіленген жоспарларды іске асырудың негізгі шарттарының бірі шетелдік ғылыми-зерттеу орталықтарымен, университеттермен және халықаралық стандартқа сай зертханаларымен бірлесе жұмыс істеу. Бірлескен ғылыми-техникалық бағдарламаларды іске асыру және шетелдік әріптестермен ақпарат алмасу арқылы еліміздің жылқы шаруашылығына озық тәжірибелерді енгізуге және оны халықаралық аренада бәсекеге қабілетті етуге мүмкіндік бар.Ақпарат көзі : https://www.gov.kz/memleket/entities/moa/press/news/details/885568

«Азық-түлік келісімшарт корпорациясы» ҰК» АҚ Мемлекет басшысының тапсырмасына сәйкес 2024 жылғы 18 қарашадан бастап тікелей астықты сатып алу бағдарламасына қатысуға ауыл шаруашылығы тауарын өндірушілерден өтінімдерді қабылдауды бастайды. Бұл мақсаттарға 10 млрд теңге бөлінеді.Ең алдымен, астық сатып алу шағын шаруа қожалықтарының өз өнімдерін әділ бағамен өткізуін қамтамасыз ету үшін жүзеге асырылады. Бағдарламаның нәтижесінде шағын және орта ауыл шаруашылығы субъектілері мемлекеттік қолдау шараларын пайдалана алады. Сондай-ақ, артық астықты сатып алу тетігі ішкі нарықтағы баға конъюнктурасына делдалдардың ықпалын барынша азайтады.Азық-түлік келісімшарт корпорациясы белгіленген стандарттар мен сапа талаптарын сақтай отырып, ауыл шаруашылығы тауарын өндірушілердің астығын бәсекелестік шарттарда сатып алады.Тікелей сатып алу бағдарламасы бойынша алдын ала бағалар:3-сыныпты бидай (желімтегі 27%+) – 90 000 теңге ҚҚС-пен;3-сыныпты бидай (желімтегі 25%+) – 80 000 теңге ҚҚС-пен;3-сыныпты бидай (желімтегі 23%+) – 75 000 теңге ҚҚС-пен;4-сыныпты бидай (желімтегі 21%+) – 65 000 теңге ҚҚС-пен;4-сыныпты бидай (желімтегі 18%+) – 55 000 теңге ҚҚС-пен;5-сыныпты бидай (желімтегі 18%+) – 50 000 теңге ҚҚС-пен;2-сыныпты арпа (натурасы 630 г/л) – 50 000 теңге ҚҚС-пен.Бір агроөнеркәсіп кешенінен сатып алудың жиынтық көлемін көбірек фермерлік шаруашылықтарды мемлекеттік қолдау қажеттілігін қанағаттандыру үшін шектеу жоспарлануда.Ауыл шаруашылығы тауарын өндірушінің мәртебесін растау және өтінім бойынша астық сатып алу көлемін айқындау үшін әлеуетті өнім беруші 2024 жылғы "Барлық жерден ауыл шаруашылығы дақылдарын жинау туралы" анықтаманы және мемлекеттік уәкілетті орган растаған аттас есепті ұсынуға тиіс.Барлық рәсімдердің ашықтығын қамтамасыз ету мақсатында фермерлердің өтінімдерін қарау облыстардың Үйлестіру кеңестерінің қатысуымен жүргізілетін болады.Азық-түлік келісімшарт корпорациясының ақшалай қаражатын бөлгеннен кейін фермерлер астық жеткізгені үшін ақы ала алады. Қазіргі уақытта астық операторының ақша алуына қаржы-экономикалық негіздемені мақұлдау бойынша іс-шаралар жүргізілуде.Тікелей сатып алу бағдарламасына қатысуға өтінімдерді "Азық-түлік келісімшарт корпорациясы" ҰК" АҚ өңірлік өкілдіктері қабылдайды. Астықты қабылдаумен оператор айқындаған лицензияланған астық қабылдау кәсіпорындары айналысады.Астана қаласы, Мәскеу көшесі, 29/3, тел. (8-717-2) 59-12-32 (ішкі 2484; 2025;), 59-12-39 (ішкі 2375), 59-12-61 (ішкі 2261), 55-11-60 (ішкі 2476);Ақмола облысы: Көкшетау қ., Нұрсұлтан Назарбаев көш., 19, тел. (8-716-2) 55-11-51, 55-11-54, 42-25-22;Шығыс Қазақстан облысы: Өскемен қ., Бейбітшілік көш., 30, 206 кеңсе, тел. (8-723-2) 25-95-67, 56-06-57;Қостанай облысы: Қостанай қ., Тәуелсіздік көш., 147, тел. (8-714-2) 53-11-44, 53-12-44, 54-28-20;Солтүстік Қазақстан облысы: Петропавл қ., Партизанская көш., 160, тел. (8-715-2) 55-11-60, 42-22-66.«Азық - түлік келісімшарт корпорациясы» ҰК» АҚ - мемлекеттік астық операторы. Азық-түлік қауіпсіздігін және астықтың ішкі нарығын тұрақтандыруды қамтамасыз етеді, ауыл шаруашылығы тауарын өндірушілерге қаржылық қолдау көрсетеді, сондай-ақ астықты экспортқа жеткізумен айналысады.Ақпарат көзі : https://www.gov.kz/memleket/entities/moa/press/news/details/885534

«WorldSkills Kazakhstan 2024» жұмысшы кәсіптерінің ІХ чемпионатында Ақмолалық команда 2 алтын, 1 күміс және 4 қола медальдарын жеңіп алды.Үш конкурстық күн ішінде, 14-16 қараша аралығында «ЭКСПО» халықаралық көрме орталығының аумағында еліміздің колледж студенттері мәлімделген құзыреттіліктерде өздерінің дағдылары мен машықтарын көрсетті. 32 студенттен құрылған ақмолалықтар командасы барлық ұсынылған 30 құзырет бойынша қатысты.Бүгін Астанада Роза Бағланова атындағы «Қазақконцерт» концерт залында Ұлттық жұмысшылар чемпионатының салтанатты жабылуы өтті.Республикалық чемпионаттың қорытындысы бойынша Көкшетау қ. жоғары техникалық колледжінің екі өкілі Қожахмет Әділет пен Мацегора Сергей «Мобильді робототехника», сондай-ақ Степногорск қ. жоғары колледжінің Меруерт Хамзина «Визуалды мерчендайзинг және витринистика» құзыреттері бойынша чемпионаттың жеңімпаздары атанды.2 орын - Ильяс Гатин, «Мобильдік қосымшаларды әзірлеу» құзыреті Көкшетау қ. жоғары техникалық колледжі;3 орын – Қабибола Еламан, «Өнеркәсіптік автоматика» құзыреті, Шағалалы а. жоғары агротехникалық колледжі;3 орын – Беленец Каролина, «Кондитерлік іс» құзыреті, Щучинск қ. жоғары техникалық колледжі;3 орын – Червоняк Нина, «кескіндеме және сәндік жұмыстар» құзыреті, Көкшетау қ. жоғары техникалық колледжі;3 орын - Абраев Артур және Дьяченко Олег, «Мехатроника» құзыреті, Көкшетау қ. жоғары техникалық колледжі.Сонымен қатар, біздің қатысушылар 11 медальонмен марапатталды. Мұндай марапат өз құзыретінде халықаралық стандартқа қол жеткізген, бірақ жүлделі орынға дейін балдары сәл жетпеген мамандарға беріледі.Естеріңізге сала кетейік, ағымдағы жылы чемпионатқа 22 жасқа дейінгі 555 жас маман - WorldSkills өңірлік чемпионаттарының жеңімпаздары жиналды.Ақпарат көзі : https://www.gov.kz/memleket/entities/aqmola/press/news/details/885493

Елордада «WorldSkills Kazakhstan-2024» IX республикалық чемпионаты өтті. Бес күнге созылған сайыста Қазақстанның түкпір-түкпірінен келген 400 жас маман 30 құзыреттілік бойынша өз дағдылары мен кәсіби шеберліктерін көрсетті. Абай облысынан сегіз колледжден 32 студент пен 30 сарапшы қатысты.Облыс командасы былтырғы жетістігін қайталап, 39 ұпаймен бірінші орынға ие болды. Республикалық чемпионатта облыс командасы 30 құзыреттілік бойынша жоғары нәтижеге қол жеткізіп, 2 алтын, 6 күміс, 4 қола, 7 медальон иеленді. «Мехатроника» құзыреттілігі бойынша екі студент, ал қалған 29 құзыреттілік бойынша бір-бір студенттен сынға түсті.Республикалық кезең жеңімпаздары келесі жылдың 9-13 қыркүйегі аралығында Данияда өтетін EuroSkills-2025 халықаралық чемпионатында ел намысын қорғайды.Айта кетейік, өткен жылы да Абай облысының командасы «WorldSkills Kazakhstan-2023» чемпионатында 30 құзырет бойынша 6 алтын, 2 күміс, 3 қола медаль және 12 медальон жеңіп алып, командалық есепте үздік атанған.Бұл көрсеткіштер облыс студенттері мен колледждерінің кәсіби шеберлік деңгейінің жоғары екенін тағы да дәлелдеді. Өңірлік билік пен оқу орындары жастардың кәсіби дағдыларын дамыту үшін жағдай жасауда. Бұл аймағымыздың Қазақстандағы кәсіптік-техникалық білім беру саласындағы көшбасшылардың бірі ретінде дәлелдейді.Ақпарат көзі : https://www.gov.kz/memleket/entities/abay/press/news/details/885504

Өңірлік кадр резервінің мүшесі Даут Дәулет Оралұлы Ақмола облысы Целиноград ауданының әкімі аппаратының басшысы лауазымына тағайындалды. Дәулет Даут 1996 жылғы 11 қазанда Көкшетау қаласында туған. 2018 жылы Л.Н.Гумилев атындағы Еуразия ұлттық университетін «Көлік, көлік техникасы және технологиялары» мамандығы бойынша бітірді.Еңбек жолын 2019 жылы Қазақстан Республикасының Ұлттық экономика министрлігінде сарапшы лауазымынан бастаған. 2021-2023 жж. аралығында министрліктің экономика салаларын дамыту департаменті салаларды институционалдық дамыту басқармасының бас сарапшысы лауазымында қызмет етті.2023 жылдан бастап бүгінгі күнге дейін Қазақстан Республикасы Ұлттық экономика министрлігі Экономика салаларын дамыту департаменті салаларды институционалдық дамыту басқармасының басшысы лауазымында қызмет атқарып келді.Ақпарат көзі : https://www.gov.kz/memleket/entities/aqmola/press/news/details/885458

Төтенше жағдайлар вице-министрі Кеген Тұрсынбаев жұмыс сапарымен Ақмола облысына келді.Сапар аясында ол Бурабай мен Бұланды аудандарындағы өрт сөндіру бөлімдеріне барып, құтқарушылардың жұмысымен және тұрмыс жағдайларымен танысты. Кеген Тұрсынбаев Ақмола облысы ТЖД аумақтық бөлімшелерін материалдық-техникалық қамтамасыз етуге ерекше назар аударды. Тексеру қорытындысы бойынша ол бірқатар нақты тапсырмалар берді.М.Ғабдуллин атындағы Азаматтық қорғау академиясына да барып, оқу орнының жаңа басшысын таныстырды. Полковник Жұмабек Хасенов тәрбие және идеологиялық жұмысты ұйымдастыруда үлкен тәжірибеге ие, қорғаныс министрлігінде түрлі басшылық қызметтер атқарды.Сонымен қатар сапар аясында вице-министр ТЖ департаментінің қызметкерлерімен кездесті. Әңгімелесу барысында өңірлік ТЖ департаменттері арасындағы өзара іс-қимыл, академия курсанттарының алдын алу сияқты іс-шараларда қолдануға болатын әлеуеті сияқты мәселелер көтерілді. Сондай-ақ вице-министр қызметтік-әскери тәртіпті бақылауды күшейтуге ерекше назар аударды.Ақпарат көзі : https://www.gov.kz/memleket/entities/emer/press/news/details/885466

Бүгін магистратураға түсуге арналған кешенді тестілеу басталды, ол 23 қарашаға дейін жалғасады. Естеріңізге сала кетсек, Кешенді тестілеуді тапсыруға өтініш қабылдау 28 қазан мен 10 қараша аралығында ҚР ҒЖБМ Ұлттық тестілеу орталығының сайтында app.testcenter.kz жүзеге асырылды.Магистратураға түсуге арналған кешенді тестілеуге 11 мыңға жуық өтініш қабылданды. Ең көп таңдалған білім беру бағыттары қатарында «Педагогикалық ғылымдар», «Инженерлік, өңдеу және құрылыс салалары» және «Бизнес, басқару және құқық» бар.Ғылыми-педагогикалық магистратураға түсу үшін кешенді тестілеу электрондық форматта өткізіледі және үш бөлімнен тұрады: шет тілі бойынша тест, оқуға дайындығын анықтауға арналған тест және білім беру бағдарламалары тобының бейіні бойынша тест. Барлығына 3 сағат 55 минут беріледі. Шекті балл – 75 балл.Естеріңізге сала кетсек, биыл бейінді магистратураға түсу форматына өзгерістер енгізілді. Бейінді магистратураға түсуге ниетті үміткерлер «Оқуға дайындығын анықтауға арналған тест» бөлімінен босатылды. Осылайша, олар тек білім беру бағдарламалары тобының бейіні бойынша тест тапсырады. Шекті балл кемінде 30 балл, оның ішінде әрбір бейінді пән бойынша кемінде 7 балды құрайды.Тестіленуші апелляцияға техникалық себептер бойынша тестілеу барысында, тестілеу тапсырмаларының мазмұны бойынша тестілеу аяқталғаннан кейін 30 минут ішінде өтініш бере алады. Апелляция бес күн ішінде қарастырылады, одан соң сертификат оқуға түсушінің Жеке кабинетінде қолжетімді болады.Магистратурада оқу үшін қысқы қабылдауға 4 мыңнан астам грант бөлінген.ҚР Ғылым және жоғары білім министрлігінің баспасөз қызметіМАГИСТРАТУРАҒА ТҮСУГЕ АРНАЛҒАН КЕШЕНДІ ТЕСТІЛЕУ БАСТАЛДЫАқпарат көзі : https://www.gov.kz/memleket/entities/zhetysu-oblysy/press/news/details/885283

Алматыда Халықаралық студенттер күніне арналған «Almaty Students Week» ауқымды апталығы өз мәресіне жетті. Алматы қаласы Жастар саясаты басқармасының қолдауымен фестиваль аясында 28 іс-шара ұйымдастырылып, оған қаламыздың 15 000-ға жуық студенттері қатысты.Фестивальдің жарқын сәттерінің бірі – «CareerTime» кәсіптік бағдар беру фестивалі болды. Бұл ауқымды іс-шара жастардың кәсіби бағыт-бағдарын анықтауға және еңбек нарығының қажеттіліктерімен танысуға мүмкіндік берді. Фестивальге Алматы қаласының 26 жоғары оқу орны, 30 ірі компания 400 бос жұмыс орындарын ұсынды, ал қатысушылардың жалпы саны 2000-нан астам мектеп бітірушілері мен жұмыссыз жастарды құрады.«Almaty Students Week» фестивалі – қаламыздың белсенді жастарының басын қосқан үлкен алаң болды. Әрбір қатысушы өзін танытып қана қоймай, Алматы студенттер қауымдастығының дамуына өз үлесін қосты. Бұл фестиваль жастардың арманын жүзеге асыра алатындығын және маңызды құндылықтарды қолдайтындығын дәлелдеді. Біз студенттерімізбен мақтанамыз және олардың бастамаларын қолдаймыз». «ALMATY STUDENT’S WEEK» апталығы аясында «Ең үздік студенттік топ - 2024» байқауының финалдық кезеңі өтті. Байқау Алматыдағы ЖОО және колледж студенттерінің басын бір ортаға біріктірді. Байқауға қатысу үшін 30-дан аса өтінім келіп түсті. Сайысқа жалпы Алматының 300-ден астам студент жастары қатысуға ниет білдірді.Байқау қорытындасы бойынша Алматы мемлекеттік бизнес колледжінің «BusinessLAB» студенттік тобы қаланың «Ең үздік студенттік тобы» болып танылды. Ал II орынды Қазақ ұлтық аграрлық университетінің «DreamTeams» студенттік тобы, III орынды Қазақ ұлттық қыздар педагогикалық университетінің «Histrue» студенттік тобы иеленді. Жеңімпаздар дипломдар мен ақшалай сертификаттармен марапатталды. Апталықтың ерекше шараларының бірі Әуезов ауданы комьюнити орталығында өткен «PROдвижение»: Жас көшбасшылардың идеялар фестивалі болды. Мерекелік атмосфераны ерекше ету үшін іс-шара «Гарри Поттер» стилінде ұйымдастырылды. Сонымен қатар, Алматыда ерекше қажеттілігі бар жастар үшін қолжетімді ортаны құруға бағытталған «Alrathon» байқауы өтті. 100-ден астам қатысушылар топтарға бөлініп, өз жобаларын әзірлеп, сарапшылардың қолдауына ие болды. Бұл байқау жасанды интеллект технологияларын кеңінен насихаттауға және оларды әлеуметтік мәселелерді шешуде қолдануға мүмкіндік берді.«Алатау» дәстүрлі өнер театрында «Молодежная лига КВН Алматы» ойындары өтті. Қаламыздың әзілкеш студенттері бір сахнада бас қосты.Ал апталықтың әдемі нүктесі қаламыздың 1000-ға жуық студенттердің басын қосқан Медеуде өткен «ICE Party» болды. Мерекелік кеште студенттер үшін мұз үстінде қызықты конкурстар, интерактивті ойындар және флешмоб ұйымдастырылды. Шара барысында жас өнерпаздар өнер көрсетіп, көрермендерге ерекше көңіл-күй сыйлады «Ең алдымен, «Almaty Student Week» шарасын ұйымдастырған барша жандарға шынайы алғысымды білдіргім келеді. Осы іс-шараның арқасында мен тек білімімді жетілдіріп қана қоймай, сонымен қатар жаңа достар таптым. Осындай бастамалар бізді, студенттерді, жаңа идеяларға, дамуға және қаламыздың өміріне белсенді атсалысуға жетелейді. Ұмытылмас сәттер үшін алғыс айтамын!», - деді фестиваль қатысушысы Алдияр Бақытбеков.«Almaty Students Week» фестивалі студенттер күнін атап өтудің жаңа дәстүрлерін нығайтып, жастардың шығармашылығы мен өзін-өзі дамытуына жаңа мүмкіндіктер ашты. Алматы қаласы Жастар саясаты басқармасының мәліметінше, аталмыш жоба келесі жылы да жалғасын таппақ. Ақпарат көзі : https://www.gov.kz/memleket/entities/almaty/press/news/details/885341

Әлемге әйгілі Франкфурт кітап жәрмеңкесінің өкілдері алматылық кітапханалармен, баспалармен және жазушылармен ынтымақтастық орнатуға қызығушылық танытты.Алматы қаласының әкімі Ерболат Досаев Frankfurter Buchmesse президенті және атқарушы директоры Юрген Боосты қабылдады.Кездесу барысында Франкфурт тарапы Алматының көпұлтты қала ретіндегі бірегейлігін атап өтіп, ұзақ мерзімді әріптестік қарым-қатынас орнатуға ниет білдірді. Өз кезегінде Ерболат Досаев әкімдік тарапынан кітапханаларды жаңғыртуға және заманауи қоғамдық кеңістіктер құруға ерекше көңіл бөлінетінін айтты. Сондай-ақ Алматы қаласының кітапханаларында табысты енгізілген инновациялық және креативті шешімдер туралы баяндады.«Электронды кітаптарды пайдалану үрдісінің артуына қарамастан, баспа кітаптарын оқу сезімін, қағаз беттерін ұстап көру әсерін ештеңе алмастыра алмайтынына сенімдімін. Кітапханалардың белсенділігінен біздің тұрғындарымыздың кітапты өте жақсы көретінін байқаймыз, біз бұл бағытта белсенді жұмыс істеп жатырмыз. Бүгінде қаламыздағы кітапханалардың 95%-ы жаңғыртылды. Біз барлық ауданда заманауи кітапханалар ашып, халық көп жиналатын жерлерде – сауда және ойын-сауық орталықтарында, комьюнити орталықтарында және басқа орындарда автономды кітапханалар орнатып жатырмыз. Сонымен қатар, жазушылар мен заманауи авторларды қолдаймыз», – деді Алматы әкімі Ерболат Досаев.Франкфурт кітап жәрмеңкесінің президенті және атқарушы директоры Юрген Боос Алматыда жергілікті авторлар мен баспаларға арналған семинарлар өткізуге, сондай-ақ ауқымды кітап іс-шараларын ұйымдастыруда кеңес беруге дайын екенін білдірді.«Біз Қазақстанға арнайы келдік. Алматымен байланыс жасап, ынтымақтастық орнату біз үшін маңызды. Біз тек жәрмеңкелер өткізумен шектелмей, баспа ісін де дамытамыз. Мен баспа саласы үлкен өзгерістерді қажет етеді деп санаймын және осы салада тәжірибе алмасуға дайынбыз. Бұған дейін біз Мексикада, Оңтүстік Африка Республикасында және БАӘ-де өткен кітап жәрмеңкелерінің ұйымдастырушыларын кеңес беріп қолдадық. Яғни, бұл салада мол тәжірибеміз бар. Сондай-ақ, Қазақстанды Франкфурт кітап жәрмеңкесінің құрметті қонағы болуға шақырғымыз келеді», – деді Юрген Боос.Кездесу соңында тараптар 2025 жылы Алматыда бірлескен жобаларды дамыту және мәдени-іскерлік байланыстарды нығайту туралы уағдаласты. Ақпарат көзі : https://www.gov.kz/memleket/entities/almaty/press/news/details/885352

Облыс әкімі Асхат Шахаровтың төрағалығымен өткен аппараттық жиында өңірдің азық-түлік қауіпсіздігін нығайту мәселесі қаралды.Ақтөбе облыстық ауыл шаруашылығы басқармасының басшысы Құсайын Сәрсембай ішкі нарықта тауарлардың қауіпсіздігін қамтамасыз ету және сапасын арттыруға қатысты қабылданып жатқан шаралар туралы мәлімдеді.Оның айтуынша, бүгінгі таңда Ақтөбе облысы азық-түліктің 32 түрінен 26 негізгі азық-түлік өнімі бойынша өзін-өзі қамтамасыз етеді. Бұл – ұн, нан, макарон, сиыр еті, қой еті, жылқы еті, қияр, қызанақ, ашытылған сүт өнімдері, өсімдік майы және т.б. Қалған 6 түрі – қарақұмық, күріш, қант, тұз, бұрыш, балық басқа аймақтардан жеткізіледі және ішінара импортталады.Бүгінгі таңда тұрақтандыру қорына 26 тонна қарақұмық жармасы, 594 тонна қант, 7 880 тонна бірінші сұрыпты ұн және 37 тонна күріш салынды.«Биылғы егіннен 61,8 мың тонна картоп, 43,4 мың тонна көкөніс, 40,0 мың тонна майлы дақылдар жиналды. Бұдан басқа, 2024 жылғы күзгі егіннен бастап желтоқсаннан сәуірге дейінгі маусымаралық кезеңде жергілікті тауар өндірушілермен «Пригородный» ЖШС, «Болат ЛТД» ЖШС, «Арман» ШҚ 4846 тонна картоп, 390 тонна сәбіз, 400 тонна пияз, 448 тонна қырыққабат жеткізуге шарттар жасалды. Бұл көлемдер көрсетілген кезеңге жеткілікті», - деді Құсайын Сәрсембай.Сонымен қатар, облыста қызанақ пен қияр өсірілетін 40 жылыжай жұмыс істейді. Биыл жылыжайларда 17,5 мың тонна қызанақ және 0,7 мың тонна қияр өсірілді. Жылыжай өнімдері облыстың базарлары мен дүкендеріне түседі.Жыл басынан бері 569 ауылшаруашылық жәрмеңкесі өткізіліп, онда тұрғындар жаңа өнімдерді нарық құнынан 10-15% төмен бағамен сатып алды.Жалпы, әлеуметтік маңызы бар азық-түлік тауарларының бағасын тұрақтандыру үшін жергілікті бюджеттен кәсіпкерлік субъектілеріне өңірге қажетті азық-түлікті жеткізуге кредиттер беруге 3764,3 млн. теңге бөлінді. Сондай-ақ, жергілікті жеткізушілер және өндірушілермен азық-түлік жеткізуге келісімшарттар жасалады. Бүгінгі таңда әлеуметтік маңызы бар азық-түлік тауарлары сауда желілеріне, дүкендерге және коммуналдық базарларға белгіленген бағамен жеткізілуде.Облыс әкімі Асхат Шахаров өңір көлемінде өткізіліп жатқан жәрмеңкелерде халық қарасы көп екенін, оны ұйымдастыру өз тиімділігін көрсеткенін және тоқтатпау қажеттігін алға тартты. Сондай-ақ, әлеуметтік маңызы бар азық-түлік өнімдерінің негізсіз өсуіне жол бермеу үшін олардың бағасына мониторингті күшейтуді тапсырды.Ақпарат көзі : https://www.gov.kz/memleket/entities/aktobe/press/news/details/885336

Шемонаиха ауданында 300 орынға шақталған жаңа мектептің құрылысы аяқталды.Бүгін білім ордасының техникалық ашылуы өтіп, құрылыс жұмыстарының барысымен облыс әкімі Ермек Көшербаев арнайы келіп танысты.– Мектеп керемет, сөз жоқ. Бірақ оның тиісті білім деңгейі де болуы керек. Ол жағы сіздердің қолдарыңызда, құрметті ұстаздар. Әрине, елімізде «Жайлы мектеп» жобасын бастаған Мемлекет басшысына зор алғыс айтамыз. Көріп отырғандарыңыздай, мұнда балаларға сапалы білім беру үшін барлық жағдай жасалыпты. Құрылыс жұмыстары абыроймен атқарылды, – деп атап өтті өңір басшысы.Жаңа мектеп Путейская көшесі, 16/1 мекенжайында орналасқан, оның жалпы ауданы – 5513,5 шаршы метр. Жобалау және салу жұмыстары «Samruk-Kazyna Construction» АҚ басшылығымен жүргізілген. Бас мердігер міндетін «Фирма Азия» ЖШС атқарған, ал техникалық және авторлық қадағалауды «Восток Инжиниринг» ЖШС және «БК «OST-проект» ЖШС жүзеге асырыпты.Мектеп директоры Назигүл Тотекинаның айтуынша, білім беру мекемесінде 1-11 сынып аралығындағы 335 оқушы, сондай-ақ мектепалды даярлық тобында 15 бала оқиды.– Біз барлық қажетті рәсімді жылдам аяқтаймыз деп үміттенеміз. Бұйырса, үшінші тоқсаннан бастап оқушыларымыз жаңа мектепте білім алатын болады, – дейді мектеп директоры.Облыстық білім басқармасының басшысы Иннеса Чернышева бұл мектеп 90 жыл бұрын салынған ескі ғимараттың орнында бой көтергенін айтты. Ыңғайлы мектеп заманауи кабинеттермен, қажетті техникамен жабдықталған және мүмкіндігі шектеулі жандарға толықтай бейімделген.Айта кетейік, қазір Шемонаиха қаласында төрт мектеп бар болса, оның бірі – осы білім ордасы. Алдағы уақытта №4 мектептің оқушылары мен педагогикалық құрамы жаңа ғимаратқа көшеді. Бұл, әсіресе, балаларын әбден ескірген мектепке беруге мәжбүр болған Теміржол ауданында тұратын ата-аналар үшін қуанышты жаңалық болғаны сөзсіз.Иә, Шемонаиха тұрғындары Шәкәрім атындағы №4 мектептің ашылуын асыға күтеді.– Мұндай мектептер ойластырылған мемлекеттік саясаттың нәтижесі деп түсіну керек. Аталмыш мектептерде балаларға жайлы жағдай жасалып қана қоймай, олардың жан-жақты дамуына да жол ашылады, – деп түйіндеді Ермек Көшербаев.Ақпарат көзі : https://www.gov.kz/memleket/entities/akimvko/press/news/details/885355

Қарағанды облысы ТЖД Өрт сөндіру және авариялық–құтқару жұмыстары қызметі №28 өрт сөндіру бекетінің қызметкері Роман Герасименко 85 кг салмақ дәрежесінде күміс медаль жеңіп алып, 15-18 қараша аралығында Қытайдың шығысындағы Хайнинг қаласында өткен гір спорты бойынша әлем кубогының вице-чемпионы атағына ие болды. Бұл жетістік гір көтеруден Қазақстан Республикасының спорт шебері Романның спорттық мансабындағы кезекті жетістігі болды.Спортшымызды лайықты медальмен құттықтаймыз және спорт ареналарында жаңа жеңістер тілейміз! Ақпарат көзі : https://www.gov.kz/memleket/entities/emer/press/news/details/885314

Елордадағы Beeline Arena спорт кешенінде 23-24 қараша күндері пара дзюдодан Grand Prix жарысы өтеді, деп хабарлайды қала әкімдігінің ресми сайты.Қазақстан ұлттық құрамасының пара дзюдошылары Париж Паралимпиадасында жоғары нәтижеге қол жеткізіп, 1 алтын, 1 күміс және 3 қола жүлде жеңіп алған. Енді санаулы айдан кейін қазақстандық спортшылар өз жанкүйерлерінің алдында шеберліктерін көрсетпек.Турнир барысында 10 салмақ дәрежесінде жүлделер сарапқа салынады. Жарыстың басты ерекшелігі – жаңа Олимпиада цикліне байланысты салмақ дәрежелерінің өзгеруі. Ерлер енді 70, 81, 95 және +95 келіде, ал әйелдер 52, 60, 70 және +70 келіде жүлде үшін күреседі. Сонымен қатар, Халықаралық дзюдо федерациясы тәжірибе ретінде Олимпиада бағдарламасына кірмейтін екі салмақта (ерлер – 64 келі, әйелдер – 46 келі) жүлделер үлестірмек.Бұл айтулы додаға 15 мемлекеттен 100-ге жуық спортшы қатысады. Қазақстан намысын Астана қаласының үш параспортшысы J1 санатында қорғайтын болады. Олар:Асылан Нұрдаулетов (73 кг);Бауыржан Арыстанбеков (90 кг);Ерболат Бекентаев (90 кг).Жарыстың ашылу салтанаты 23 қараша күні Beeline Arena спорт кешенінде сағат 15:00-де өтеді. Ал жарыстар күн сайын сағат 10:00-де басталады. Ақпарат көзі : https://www.gov.kz/memleket/entities/astana/press/news/details/885189

Әлеуметтік қызметтер үйі ғимаратында Алматыда үй кезегінде тұрған 124 азаматқа жалға берілетін пәтер кілті табысталды, деп хабарлайды aqshamnews.kzБаспаналы болу бақытына ие болғандар қатарында жетім балалар, І, ІІ топ мүгедектері, толық емес және көпбалалы отбасы мүшелері, зейнеткерлер мен мүгедек балаларды тәрбиелеп отырған ата-аналар бар. Алматы қаласының Коммуналдық инфрақұрылымды дамыту басқармасы басшысының орынбасары Ғалымжан Әбдішүкірұлы жүректері лүпілдеп, пәтер кілтін алуға келген тұрғындарды құттықтап, үйді пайдалану бойынша техникалық қызметке қатысты ережені егжей-тегжейлі түсіндіріп берді. Ол сондай-ақ, берілетін пәтерлердің жай-күйіне тоқталды."Қазір тұрғындар келісімшартқа қол қойғаннан кейін, үйлерінің кілтін алады. Берілетін пәтерлер дайын тұр. Онда жылу, ыстық-суық су, жарық бәрі қосылған. Кіре беруге яғни, қоныстануға болады. Бірақ, тұрғындар уақытша электр плиталарын қолдануға тура келеді. Ал газ пәтер иелеріне 100% қоныстанған соң беріледі", - деді Ғалымжан Әбдішүкірұлы."Бір сағат ерте келіп алдым. 9:00-ден бастап осында отырмын. Көп балалы ана ретінде 2005 жылдан бері пәтер кезегінде тұрдым. Осы үйді күткеніме 15 жыл болды. Міне, 74 жасқа келгенде маған осындай баспана бақыты бұйырыпты. Қуанышымда шек жоқ. Әлі сене алар емеспін. Барлығыңа рахмет", – дейді алматылық Айнагүл Еркешова.Пәтер кілтін алуға келген тұрғындардың арасында өзінің эмоциясын жасыра алмай, ерекше сезіммен әңгіме айтып отырған жас келіншекке жақындадық. Өзін Салтанат деп таныстырған жас ана бұл пәтерді 2014 жылдан бері күтіп жүр екен. "Бұл пәтерді күткенімізге 10 жыл болыпты. Енді біздің өзіміздің ас бөлмеміз, өзіміздің кір жуатын машинамыз, телевизорымыз болады. Дәл қазір жүрегім жарылардай қуанып тұрмын, кілт алғанда жылап та қалуым мүмкін", - дейді ерекше күтімді қажет ететін баланың анасы. Алматы қаласының әкімі Ерболат Досаевтың тапсырмасымен 2024 жылы қаладағы коммуналдық тұрғын үй қорынан 2000 жалдамалы пәтер бөлінген болатын. Бірінші жартыжылдықта Наурызбай мен Медеу аудандарында 1080 отбасы жалдамалы тұрғын үйден пәтер иеленді. Қараша айында тағы 920 алматылыққа кілт табысталып, олар Наурызбай ауданындағы жаңа пәтерлерге қоныстанады. Мәселен, 1 қарашада пәтер кезегінде тұрған – 201 тұрғынға, 5 қарашада – 200 тұрғынға, 7 қарашада 175 қала тұрғынына пәтер кілттері табысталды. Ал бүгін 15 қарашада әлеуметтік осал топқа жататын 124 алматылық қоныс тойын тойлағалы отыр. Ақпарат көзі : https://www.gov.kz/memleket/entities/almaty/press/news/details/885163

Бүгін ел Президенті Қасым-Жомарт Тоқаев Вьетнам коммунистік партиясы орталық комитеті саяси бюросының мүшесі, Хо Ши Мин атындағы ұлттық саясат академиясының директоры Нгуен Суан Тхангты қабылдады. Президент Вьетнамды Оңтүстік-Шығыс Азиядағы еліміздің негізгі серіктесі ретінде атады. Оның айтуынша, Қазақстан екі ел арасындағы сауда-экономикалық, инвестициялық, мәдени-гуманитарлық салалардағы ынтымақтастықты одан әрі нығайтуға дайын. Осы күні Астанада Шығыс Қазақстан облысы әкімдігі мен Вьетнам Социалистік Республикасының Бак Нинь провинциясы халық комитеті бауырлас қатынастар орнату туралы өзара түсіністік меморандумына қол қойды. Биыл мамыр айында Вьетнам делегациясы Шығыс Қазақстан облысына келіп, өңір басшысы Ермек Көшербаевпен туризм, ауыл шаруашылығы және өзара қызығушылық тудыратын басқа да салалардағы серіктестіктің болашағын талқыланды. Меморандум Шығыс Қазақстан облысы мен Бак Нинь провинциясы арасында ресми әріптестік байланыстар орнатуды көздейді. Бұл құжат әртүрлі салалардағы ынтымақтастықты кеңейтуге мықты негіз қалыптастырады. Құжаттағы негізгі тармақтардың бірі делегациялар алмасуды көздейді, ол басқару, экономика және мәдениет салаларында өзара түсіністік пен тәжірибе алмасуды тереңдетуге бағытталған. Тараптар тоқыма және жеңіл өнеркәсіп, ауыл шаруашылығы сияқты маңызды салаларда ынтымақтастықты белсенді дамытуға келісті. Әсіресе, көлік инфрақұрылымы мен логистиканы дамытуға ерекше назар аударылды. Бұл сауда мен ресурстар алмасу үшін жаңа мүмкіндіктер ашады. Денсаулық сақтау саласында озық тәжірибе алмасу және медициналық қызмет сапасын жақсарту бойынша жұмыстар күшейтіледі, ал мәдени салада туризм мен мәдени құндылықтарды танымал етуге арналған жобалар жүзеге асырылады. Сонымен қатар тараптар жергілікті кәсіпкерлер мен компанияларды жаңа инвестициялық мүмкіндіктер іздеу жолында қолдауға келісті. Бұл іскерлік байланыстарды кеңейтудің жаңа перспективаларын ашады.Меморандумның маңызды тармағы – Вьетнам мен Еуразиялық экономикалық одақ арасындағы еркін сауда туралы келісімнің мүмкіндіктерін пайдалану. Бұл екі жаққа да экономикаларын тиімді интеграциялап, сауда байланыстарын кеңейтуге мүмкіндік береді. Ақпарат көзі : https://www.gov.kz/memleket/entities/akimvko/press/news/details/885234

Шығыс Қазақстан облысының әкімі Ермек Көшербаев Израильдің Қазақстан мен Қырғызстан Республикасындағы елшісі Эдвин Натан Ябо Глусманмен кездесті.Айта кетейік, ол Еуропа, Латын Америка және БҰҰ бас ассамблеясында елшілік қызметті абыроймен атқарған. Шығыс Қазақстан облысы мен Израиль мемлекеті арасындағы өткен жылдың тауар айналымы 16,6 миллион АҚШ долларын құрап отыр. Импорттық тауарлардың дені химиялық өнеркәсіп өнімдерінен құралған. Оның ішінде каучук пен пластмасса бар. Облыс аумағында Израильдің екі кәсіпорны жұмыс істейді. Аймақ басшысы елшіні Шығыс Қазақстанның әлеуметтік-экономикалық даму бағыттарымен таныстырды. Кездесу барысында қос тарап медицина, туризм, инновациялық технологияларды дамыту бағыттарын кеңінен талқылады. Өскеменге жұмыс сапарымен келген Эдвин Натан Ябо Глусман бизнес-қауымдастық өкілдерімен кездесулер ұйымдастырмақ. Бұдан бөлек, Қазақстан-Американдық еркін университетінің студенттеріне инновациялық білім беру бойынша лекция оқуды жоспарлап отыр. Ақпарат көзі : https://www.gov.kz/memleket/entities/akimvko/press/news/details/885249

Алматыда «Таза Қазақстан» республикалық бағдарламасын іске асыру бойынша «Таза ауа» акциясы жалғасуда. Бұл бастама мегаполистердегі улы шығарындылардың негізгі көздерінің бірі болып табылатын автокөлікпен ауаның ластануымен күресуге бағытталған.Акция аясында ағымдағы жылдың 30 қазаны мен 8 қарашасы аралығында Полиция департаментінің қызметкерлерімен бірлесіп қала орталығында да, оның шетінде де орналасқан жылжымалы экологиялық бекеттерде 882 автокөлікке тексеру жүргізілді. Негізгі мақсат-көлік құралдарының пайдаланылған газдарының залалы мен түтінінің деңгейін бақылау. Бұл әсіресе Алматыда маңызды, онда автокөлік ластаушы факторлардың едәуір бөлігін құрайды.Мониторинг нәтижелері тексерілген автомобильдердің 45% - ы, атап айтқанда 398-і экологиялық стандарттарға сәйкес келмейтінін, олардың шығарындылары рұқсат етілген нормалардан асып түсетінін көрсетті. Бұл автокөлік иелерінің экологиялық жауапкершілігін арттыру және бақылауды күшейту қажеттілігін көрсетеді.Осыған байланысты құқық бұзушыларға қатысты әкімшілік хаттамалар жасалды. Ал қайталама бұзушылықтар анықталған 11 автокөліктен әкімшілік құқық бұзушылық туралы Кодекске сәйкес ақаулар жойылғанға дейін мемлекеттік нөмірлік белгілер тәркіленді. Олар пайдаланылған газ проблемаларын жойғанға дейін жұмысын жалғастыра алмайды.Бұл шаралар Алматыдағы экологиялық жағдайды жақсартудағы маңызды қадам болып табылады және ауаның ластану деңгейін төмендетуге ықпал етеді. Бақылауды күшейту жүргізушілердің жауапкершілік деңгейін арттырады және қаладағы ауа сапасын жақсартуға ықпал етеді деп күтілуде.Ақпарат көзі : https://www.gov.kz/memleket/entities/almaty/press/news/details/885121

Абай ауданына қарасты Саржал және Медеу ауылдық округтерінде жаңа пәтерлердің кілті салтанатты түрде табысталды. Мемлекеттік тұрғын үй кезегінде тұрған он азамат баспаналы болды.Бұл өңір тұрғындарының әл-ауқатын жақсартуға бағытталған бағдарламаның бір бөлігі. Биыл облыс әкімі Нұрлан Ұранхаевтың қолдауымен аудандағы сегіз ауылдық округ пен бір елді мекенде 70 жаңа жалдамалы пәтер кезең-кезеңімен беріліп жатыр.Кілт табыстау рәсімінде аудан әкімі Мейіржан Смағұлов тұрғындарды көптен күткен қоныс тоймен құттықтады.«Тұрғындардың жағдайын жақсарту – жергілікті атқарушы орган жұмысының басым бағыттарының бірі. Біз ауылдық елді мекендерде тұрғын үй салу және тұрғын үймен қамтамасыз ету шараларын жүзеге асыруды жалғастырудамыз», - деді Мейіржан Смағұлов.Салтанатты шара мерекелік концертке ұласып, халық жүрегінен орын тапқан әндер орындалып, қойылымдар қойылды.Ақпарат көзі : https://www.gov.kz/memleket/entities/abay/press/news/details/885140

Министрлік жыл басынан Қытай, Ресей және Орталық Азия мемлекеттерімен трансшекаралық өзендер бойынша 28-ге жуық отырыс өткізді. Су дипломатиясының нәтижесінде суару кезеңінде Шардара су қоймасына 4,8 млрд текше метр су түсті. Бұл өткен жылғы көрсеткіштен екі есе және келісілген көлемнен 1,1 млрд текше метрге артық. Мемлекетаралық «Достық» каналы арқылы келісілген көлемнен 41 млн текше метрге артық, 532,4 млн текше метр су келді. Қапшағай су қоймасы соңғы 10 жылда алғаш рет 18 млрд текше метрден артық су жинап, 100%-ға толды.Соңғы 5 жылда алғаш рет вегетация кезінде Аралға 977 млн текше метр су жіберіліп, жоспар 100%-ға жуық орындалды. Ал, жыл басынан бері теңізге 2 млрд текше метрден астам су түсті. Осының нәтижесінде, бүгінгі таңда Солтүстік Аралдың су көлемі 22 млрд текше метрге жетті.Ақпарат көзі : https://www.gov.kz/memleket/entities/water/press/news/details/885047

11.11.АШХАБАДҚазақстан 2025 жылдың сәуір айына дейін Сырдария өзені арқылы шамамен 11 млрд текше метр су алады. Орталық Азия елдерінің өкілдерімен келіссөздер жүргізген Су ресурстары және ирригация министрі Нұржан Нұржігітов осы жөнінде келісімге қол жеткізді. Министр Мемлекетаралық су шаруашылығын үйлестіру комиссиясының (МСШҮК) 87-ші отырысына еліміздің атынан қатысты.НӘТИЖЕСІНДЕ: 1 сәуірге дейін еліміздегі Шардара су қоймасына 11 млрд текше метр су келеді деп күтілуде. Бұл 2025 жылғы суару маусымында еліміздің оңтүстік аймақтарына қажет су көлемін жинақтауға мүмкіндік береді.11.11.БҚОБатыс Қазақстан өңірінде вегетациялық кезең сәтті өтті. Суармалы судың жылдық жоспары 20,6 млн.м3 құраса, шаруаларға толық көлемде су беріліп, жоспарға сәйкес жұмыс атқарылды.12.11.ҚЫЗЫЛОРДА ОБЛЫСЫШардара су қоймасынан Сырдария өзенінің төменгі ағысына вегетациялық кезеңде жоспар бойынша келетін су көлемі 500-550 м³/с болып белгіленсе, нақты 600-650 м³/с-қа дейін артық су түсті.13.11.ҚАРАҒАНДЫ ОБЛЫСЫҚарағанды облысының шаруалары су шығынын 1,5 есе азайтуға мүмкіндік беретін заманауи су үнемдеу технологияларын енгізуде. Бұл туралы Өңірлік коммуникациялар қызметінің алаңында Қарағанды облысы бойынша «Қазсушар» филиалы директорының міндетін атқарушы Ерғали Омаров айтып өтті.МАҢЫЗДЫ: Келесі жылы филиал Жартас су қоймасындағы каналдарды күрделі жөндеуді жалғастырады. Биыл Жартас су қоймасының Жартас және Малокомспай магистральдық арналары учаскелерінің бетон беткейлері мен түбіне жөндеу жүргізілді.14.11.АСТАНАМинистрліктің Су ресурстарын реттеу, қорғау және пайдалану комитеті бассейндік инспекцияларды жаңа жабдықтармен қамтамасыз ету бойынша жұмыс жүргізуде. Бүгінгі таңда бассейндік инспекцияларға 18 жеңіл автокөлік, көп функциялы құрылғылар, судың жылдамдығы мен шығынын өлшеуге арналған датчиктер берілді. Сондай-ақ бассейндік инспекциялар ғимараттарына жөндеу жұмыстары жүргізілуде.МАҢЫЗДЫ: Бүгінгі таңда бассейндік инспекциялардың жалпы штаты 241 адам. Министрлік құрылғаннан бері штат саны 1,5 есе ұлғайды. Бұл республиканың әрбір облыс орталығында бассейндік инспекция бөлімдерін ашуға мүмкіндік берді.14.11.АСТАНАСу ресурстары және ирригация министрлігі әзірлеген жаңа Су кодексі Үкімет, министрлік, өзге де мемлекеттік және жергілікті атқарушы органдардың, жергілікті уәкілетті органдардың құзыреттерін мұқият реттейді. Бұл су ресурстарын басқару ісін үйлестіруді жақсартуға ықпал етеді.МАҢЫЗДЫ: Жаңа Су кодексі жобасының негізгі мақсаты − экономиканың тұрақты дамуын қамтамасыз ету, азаматтардың өмір сүру сапасын жақсартуға және қоршаған ортаны сақтауға мүмкіндік беретін суды пайдаланудың қауіпсіз деңгейіне қол жеткізу мен оны қолдау болып табылады.15.11.АСТАНАСу ресурстары және ирригация бірінші вице-министрі Болат Бекнияз жаңа Су кодексінің жобасы туралы айтып берді. Жаңа Су кодексі жобасының негізгі мақсаты − экономиканың тұрақты дамуын қамтамасыз ету, азаматтардың өмір сүру сапасын жақсартуға және қоршаған ортаны сақтауға мүмкіндік беретін су пайдаланудың қауіпсіз деңгейіне қол жеткізу мен оны қолдау болып табылады. Ақпарат көзі : https://www.gov.kz/memleket/entities/water/press/news/details/885051