2025 жылғы 22 қаңтардан бастап, 2026 жылға арналған Мемлекеттік кепілдендірілген тегін медициналық көмек (МКТМК) және Міндетті әлеуметтік медициналық сақтандыру (МӘМС) жүйесі аясында медициналық қызмет көрсетуге Міндетті әлеуметтік медициналық сақтандыру қорымен шарттың болмауына байланысты, денсаулық сақтау басқармасының бұйрығымен тіркелген халық аумақтық тиесілілігіне сәйкес аудандық медициналық ұйымдарға автоматты түрде қайта бөлінді:🔹 «Интермедикал» ЖШС (8 831 адам) және«BRT Clinic» ЖШС (1 513 адам)➡️ Талғар аудандық орталық ауруханасына бөлінді.🔹 «МЕД ЦЕНТР “МЕДИНА”» ЖШС (3 828 адам)➡️ Қарасай клиникалық көпсалалы орталық аудандық ауруханасына бөлінді.Маңызды: аумақтық қағидат бойынша жүзеге асырылған автоматты қайта бөлу пациенттің таңдау құқығын шектемейді. Әрбір азамат алғашқы медициналық-санитариялық көмек алу үшін медициналық ұйымды өз бетінше таңдауға құқылы.Ақпарат көзі : https://www.gov.kz/memleket/entities/almobl/press/news/details/1146782?lang=kk

Мол өнім тек күн сәулесі мен суға ғана байланысты емес. Табысты егіншіліктің басты шарты — өсімдіктерді дұрыс әрі теңгерімді қоректендіру. Тіпті ең сапалы тұқымдардың өзі қажетті қоректік заттармен қамтамасыз етілмесе, өз мүмкіндігін толық көрсете алмайды. Сондықтан арнайы биологиялық және минералды қоспаларды қолдану аса маңызды.Алматы облысы Еңбекшіқазақ ауданына қарасты Саймасай ауылында сәндік өсімдіктерге, көкөніс дақылдарына, жеміс-жидек ағаштарына арналған «Агроцен» биопрепаратының өндірісі іске қосылған. Бұл өнімді отандық Kazagrocen компаниясы әзірлеген және қазіргі таңда нарықта теңдесі жоқ құралдардың бірі саналады.Жеті жыл бұрын аталған жобаны дамытуға 700 миллион теңгеден астам инвестиция салынған. Қаражат отандық жемдік қоспалар мен минералды тыңайтқыштар өндіруге, сондай-ақ органикалық йод негізіндегі сусын концентраттарын әзірлеуге бағытталды. Қысқа мерзім ішінде кәсіпорын отандық нарықта ғана емес, ТМД елдерінде де өзін сенімді өндіруші ретінде көрсете білді. Минералды тыңайтқыштар көлемі 10 литрлік ыдыстарда шығарылады. Бүгінде компания шамамен 20 жергілікті тұрғынды тұрақты жұмыспен қамтып, жылына 25 тоннадан астам өнім өндіреді.Кәсіпорын қызметі ұрпақтар сабақтастығының нақты үлгісі болып отыр. Компанияның негізін қалаушы Иван Божков әкесі — Евгений Алексеевич Божков қалыптастырған ғылыми-өндірістік бағытты жалғастырып келеді. Ол шамамен 40 жыл бойы адам мен жануарлар ауруларының алдын алу, анықтау және емдеуге арналған йодорганикалық қосылыстар негізіндегі жаңа дәрілік препараттар мен биологиялық белсенді қоспаларды әзірлеумен айналысқан.Йод — адам, жануар және өсімдік ағзасының дұрыс дамуы мен қалыпты тіршілігі үшін аса маңызды микроэлемент. «Стеко ЛТД» компаниясымен бірлесіп, құрамына қосымша микроэлементтер енгізілген «Агроцен» биопрепараты жасалды. Бұл құрал өсімдіктердегі йод жетіспеушілігін тез әрі тиімді толықтырып, түрлі ауруларға қарсы тұру қабілетін арттырады. Препараттың ерекшелігі — құрамындағы органикалық йодтың қолданылуында. Бұл тәсіл өнімнің экологиялық қауіпсіздігін қамтамасыз етіп, мөлшері артқан жағдайда да уытты әсердің болмауына мүмкіндік береді.Препарат тұқымды егу алдында өңдеуге, сондай-ақ жапырақ арқылы қосымша қоректендіруге пайдаланылады. Соның нәтижесінде өнім көлемі артып, өсімдіктердің құрғақшылыққа, артық ылғалға, үсікке, көшет отырғызу кезінде болатын күйзелістерге және басқа да қолайсыз табиғи жағдайларға төзімділігі күшейеді. Ең жоғары тиімділік өсімдіктердің қарқынды өсу кезеңінде байқалады.Минералды тыңайтқыштарға арналған тәжірибелік зерттеулер Новосибирск мемлекеттік аграрлық университетінің базасында жүргізілуде. Мұнда өсімдіктерді қорғау құралдары, тыңайтқыштар және өсімдік шаруашылығына арналған басқа да өнімдер зерттеледі. Сонымен қатар Алматы облысындағы жылыжай шаруашылықтарында арнайы тәжірибелік алқаптар құрылып, препарат тұқымды залалсыздандыруға арналған өңдегіш ретінде және гербицидтермен бірге қолданылатын антидепрессант ретінде пайдаланылды. Зерттеу нәтижелері өсімдік сапасының жақсарғанын және өнім мөлшерінің артқанын көрсетті. Әсіресе «Агроцен» өсімдіктердің күйзелісін төмендету мақсатында қолданылған алқаптарда нәтиже жоғары болды.Ғылыми зерттеулер йод құрамды тыңайтқыштардың экологиялық таза, адам денсаулығына пайдалы, микроэлементтерге бай өнім — астық, жеміс және жидек алуға мүмкіндік беретінін дәлелдеді. Бұл көрсеткіштер бүгінде органикалық өнім өндіретін және экспортқа бағытталған жергілікті жылыжай кешендерінде тәжірибе жүзінде расталып отыр.2024 жылы кәсіпорын Cert International ұйымы берген ISO 9001 халықаралық стандарты бойынша сертификаттаудан сәтті өтіп, сапа менеджменті жүйесінің халықаралық талаптарға толық сай екенін растады.Қазіргі таңда Kazagrocen компаниясы агроөнеркәсіп саласын дамыту бағытындағы жұмысын жүйелі түрде жалғастыруда. Өндіріс көлемі ұлғайып, өнім өз нарықтық орнын тапты. Осыған байланысты келесі кезеңде өндірістік қуатты арттыру жоспарланып отыр. Ағымдағы жылы балықтарда кездесетін вирустық және бактериялық аурулардың алдын алуға арналған жемдік қоспалар шығаратын жаңа өндірістік желіні іске қосу, жұмыс орындарын көбейту және ауыл шаруашылығы өнімдерінің түрлерін кеңейту көзделген.Айта кету керек, өткен жылы қазақстандық шаруалар егіс алқаптарында шамамен 2 миллион тонна минералды тыңайтқыш пайдаланған. Ал әлем бойынша соңғы бес жылда жыл сайын 190–200 миллион тонна тыңайтқыш қолданылады.Ауыл шаруашылығы дақылдары, әсіресе жоғары өнім беретін заманауи гибридтер мен сұрыптар қоректік заттарға өте сезімтал. Сонымен қатар ауыр ауыл шаруашылығы техникасы мен химиялық өңдеулер топырақтың құнарлылығына кері әсерін тигізеді. Сондықтан тұрақты әрі мол өнім алу үшін топырақтағы негізгі микроэлементтердің деңгейін қолдан толықтыру қажет. Себебі оларсыз өсімдіктердің өсуі, гүлдеуі және жеміс салуы мүмкін емес. Ал микроэлементтердің жетіспеушілігі өнімнің азаюына әкелетіндіктен, оған жол беруге болмайды.Ақпарат көзі : https://www.gov.kz/memleket/entities/almobl/press/news/details/1146571?lang=kk

Алматы облысында көктемгі егіс науқанына дайындық мәселелері кең көлемде талқыланды. Облыс әкімінің орынбасары Бақытнұр Бақытұлының төрағалығымен өткен жиында агроөнеркәсіп кешеніндегі өзекті міндеттер, қаржыландыру тетіктері мен ресурстық қамтамасыз ету мәселелері күн тәртібіне шығарылды.Жиынға облыстық ауыл шаруашылығы басқармасының басшылығы мен жауапты мамандары, «Аграрлық несие корпорациясы» АҚ директорының орынбасары, сондай-ақ бейнебайланыс (ВКС) арқылы аудан және қала әкімдерінің орынбасарлары, салалық бөлім басшылары мен шаруа қожалықтарының жетекшілері қатысты.Кеңес барысында төрт негізгі бағытқа басымдық берілді. Атап айтқанда, көктемгі дала жұмыстарына дайындықтың нақты барысы, «Кең Дала» бағдарламасының іске асырылуы, су үнемдеу технологияларын енгізу және ауыл шаруашылығы тауар өндірушілерін дизель отынымен қамтамасыз ету мәселелері талқыланды.Алғашқы баяндама облыстық ауыл шаруашылығы басқармасының басшысы Ғалым Қасымұлы Тоқпейісовке ұсынылып, ол егіс науқанына дайындықтың қазіргі жай-күйі мен алдағы кезеңдегі негізгі міндеттерге тоқталды. Оның айтуынша, егіс жұмыстарын уақытында бастау үшін техника, тұқым, тыңайтқыш және жанар-жағармай мәселелері кезең-кезеңімен шешіліп жатыр.Ал «Аграрлық несие корпорациясы» АҚ директорының орынбасары Нұрмади Нұрланұлы Алибаев «Кең Дала» бағдарламасы аясында шаруаларды қаржыландыру тетіктерін түсіндіріп, жеңілдетілген несие мен қолдау шараларының қолжетімділігі туралы баяндады.Жиын қорытындысында облыс әкімінің орынбасары Бақытнұр Бақытұлы көктемгі егіс науқаны өңір экономикасы мен азық-түлік қауіпсіздігі үшін стратегиялық маңызға ие екенін атап өтті.«Көктемгі дала жұмыстары – ауыл шаруашылығының ғана емес, тұтас өңір экономикасының іргетасы. Сондықтан дайындық жұмыстары тұрақты әрі қатаң бақылауда болуы тиіс. Біз үшін басты міндет – егіс науқанын уақытында, сапалы өткізу және шаруаларды барлық қажетті ресурстармен толық қамтамасыз ету. Әсіресе, су үнемдеу технологияларын енгізу мен қаржыландырудың ашық әрі тиімді тетіктері маңызды», – деді ол.Сондай-ақ әкімнің орынбасары аудан және қала әкімдерінің орынбасарларына келесі жиында «Кең Дала» бағдарламасы бойынша нақты келісімшарттар мен қаржыландырудың барысы, дизель отыны мен минералды тыңайтқыштарды сатып алу, су үнемдеу технологияларын енгізу бойынша егжей-тегжейлі ақпарат ұсынуды тапсырды.Жиын соңында ауыл шаруашылығы басқармасына берілген тапсырмалардың орындалуын тұрақты бақылауда ұстау жүктелді. Өңірде көктемгі егіс жұмыстарын сапалы әрі уақтылы өткізу үшін барлық күш пен мүмкіндік жұмылдырылатыны атап өтілді.Ақпарат көзі : https://www.gov.kz/memleket/entities/almobl/press/news/details/1145520?lang=kk

«Алматы» ӘКК» АҚ-ның еншілес ұйымы — «МҚҰ «Almaty» ЖШС 2025 жылы «Almaty Business – 2025» өңірлік кәсіпкерлікті дамыту бағдарламасы аясында Алматының шағын және микро бизнесіне 72 жеңілдетілген несие берді. Жаңадан бастаған және жұмыс істеп тұрған кәсіпкерлер бизнесін дамыту үшін жылдық 2% және 6% жеңілдетілген мөлшерлемемен қаржы алды.Өткен жылы берілген несиелердің жалпы көлемі 3,2 млрд теңгеден асты. Бір қарыз алушыға берілетін қаржыландыру лимиті 78,64 млн теңге, ал ең жоғары несиелеу мерзімі 7 жыл болды.Салалық тұрғыда ең көп қаржыландырылған жобалар өндіріс және қайта өңдеу саласына тиесілі — бұл барлық қолдау тапқан жобалардың 32%-ы. Сондай-ақ, халыққа қызмет көрсету саласындағы жобалар – 24% және денсаулық сақтау – 21% болды. Бұдан кейін білім беру – 8%, креативті экономика – 7%, сондай-ақ туризм мен спорт – әрқайсысы 4% болды.«Almaty Business – 2025» бағдарламасы 2019 жылы іске қосылғалы бері «МҚҰ «Almaty» Алматыда жалпы сомасы 16,5 млрд теңге болатын 659 жобаны қаржыландырды. Әсіресе, ең үлкен қолдау өндірістік жобаларға – 29% және денсаулық сақтау саласындағы жобаларға – 16% бағытталды. Қаржыландырудың тағы 10%-ы әлеуметтік кәсіпкерлікке тиесілі, бұл жобалар жылдық 2% ең төменгі жеңілдетілген мөлшерлемемен несие алды.Аумақтық бөліністе ең көп жоба Бостандық ауданында қолдау тапты — 141 несие. Одан кейін Алатау ауданы — 110, Алмалы — 88, Медеу — 80, Әуезов — 77, Наурызбай — 67, Жетісу — 49 және Түрксіб — 47.МФО «Almaty»-дің жеңілдетілген несиелеу бағдарламасы аясында қалада шамамен 3 000 жаңа жұмыс орны құрылды. Сонымен қатар, бағдарлама бойынша қарыз алушылар бизнесін дамыту есебінен бюджетке шамамен 3 млрд теңге салық төледі.Қазіргі уақытта «Almaty Business» бағдарламасын ұзарту мәселесі қарастырылып жатыр. Бұл туралы қосымша хабарланады.Ақпарат көзі : https://www.gov.kz/memleket/entities/almaty/press/news/details/1144331?lang=kk

2025 жылы Алматы облысында халықты жұмыспен қамту бағытында ауқымды жұмыстар атқарылды. «Алматы облысының жұмыспен қамтуды үйлестіру және әлеуметтік бағдарламалар басқармасы» мемлекеттік мекемесіне қарасты «Алматы облысының еңбек мобильдігі орталығы» КММ өңірде жұмыспен қамту саласындағы мемлекеттік саясатты іске асыру шеңберінде нақты нәтижелерге қол жеткізді.Ресми деректерге сәйкес, жыл басынан бері облыс аумағында 70 876 жұмыс орны құрылды. Оның 56 978-і тұрақты, ал 13 898-і уақытша жұмыс орындары. Сонымен қатар, ұлттық жобалар аясында 3 243 жұмыс орны ашылған.Жұмыссыз азаматтарды нақты еңбек нарығына тарту мәселесіне де ерекше көңіл бөлінген. 2025 жылы 22 099 адам тұрақты бос жұмыс орындарына орналастырылды. Бұл көрсеткіш өңірдегі жұмыссыздық деңгейін төмендетуге айтарлықтай әсер еткен.Субсидияланатын жұмыс орындары бағдарламалары арқылы да мыңдаған азамат жұмыспен қамтылды. Атап айтқанда, жыл ішінде 12 256 жұмыссыз азамат осы бағыттағы жобаларға жіберілді. Оның ішінде 544 адам әлеуметтік жұмыс орындарына, 918 адам жастар практикасына, 7 686 адам қоғамдық жұмыстарға, 570 адам «Алғашқы жұмыс орны» жобасына, 1 517 адам «Күміс жас» бағдарламасына, ал 38 адам «Ұрпақтар келісімшарты» жобасына қатысқан.Кадр даярлау мен еңбек нарығының сұранысына бейімделу мақсатында қысқа мерзімді оқыту бағдарламалары да іске асырылды. Оқыту 6 колледжде және 10 оқу орталығында жүргізіліп, оған 707 жұмыссыз азамат қамтылды. Оқуды аяқтаған 504 адам алған мамандықтары бойынша тұрақты жұмыс орындарына орналасты.Кәсіпкерлікті қолдау бағытындағы маңызды тетіктердің бірі – қайтарымсыз мемлекеттік гранттар. 2025 жылы жаңа бизнесті бастау және дамыту үшін 400 айлық есептік көрсеткіш мөлшеріндегі 260 мемлекеттік грант берілді. Бұл қаржы азаматтардың өз кәсібін ашып, тұрақты табыс көзіне қол жеткізуіне мүмкіндік берді.Жалпы, атқарылған жұмыстар Алматы облысында жұмыспен қамту саясатының жүйелі түрде жүзеге асып жатқанын және еңбек нарығын тұрақтандыруға нақты ықпал етіп отырғанын көрсетеді.Ақпарат көзі : https://www.gov.kz/memleket/entities/almobl/press/news/details/1143119?lang=kk

2026 жылғы 18–19 қаңтар күндері Алматы облысында дәстүрлі Крещение рәсімі ұйымдастырылады. Өңірде рәсімді қауіпсіз өткізу мақсатында барлық талаптар сақталған 21 стационарлық орын белгіленіп, келісілген.Крещение рәсімі өтетін орындар: Қонаев қаласында – 1, Іле ауданында – 6, Талғар ауданында – 7, Жамбыл ауданында – 4, Қарасай ауданында – 1, Еңбекшіқазақ ауданында – 2. Барлық алаңдар қатысушыларға ыңғайлы кіріп-шығу жолдарымен, баспалдақтармен, жарықтандырумен және қауіпсіздікті қамтамасыз ететін қажетті құралдармен жабдықталады.Рәсім өтетін орындарда полиция қызметкерлері, төтенше жағдайлар қызметінің бөлімшелері және медицина қызметкерлері кезекшілік атқарады. Іс-шараларды үйлестіруді Алматы облысының Дін істері басқармасы мен аудандық және қалалық әкімдіктер жүзеге асырады.«Крещение рәсімі барлық ниет білдірушілер үшін ашық. Сонымен қатар қатысушылар қауіпсіздік талаптарын қатаң сақтауы, ауа райы жағдайын, өз денсаулығын ескеруі және суға түсуге алдын ала дайындалуы қажет. Крещение рәсімі – ең алдымен рухани дәстүр, сондықтан оған қатысу саналы әрі жауапты болуы тиіс», – деп атап өтті Алматы облысының Дін істері басқармасы.Ақпарат көзі : https://www.gov.kz/memleket/entities/almobl/press/news/details/1143035?lang=kk

Қазақстан Республикасының Денсаулық сақтау министрі Ақмарал Әлназарова Алматы облысына жасаған жұмыс сапары барысында Жамбыл ауданы Ұзынағаш ауылында пайдалануға берілген жаңа емхананың қызметімен танысты.Сапар барысында министр өңірдегі медициналық көмектің сапасын арттыру мәселесіне тоқталып, Мемлекет басшысының тапсырмасына сәйкес республика көлемінде 655 медициналық нысанның құрылысы аяқталып, пайдалануға беріліп жатқанын атап өтті. Сонымен қатар, 32 аудандық аурухананы жаңғырту жұмыстары жүргізілуде.«Алматы облысы – халқы тығыз орналасқан өңір. Жамбыл ауданындағы бұл емхана 200 мыңға жуық тұрғынға қызмет көрсетеді. Жаңа нысанның жұмысымен таныстық, алдағы уақытта бірқатар ұйымдастыру мәселелерін пысықтау қажет. Ең бастысы – халыққа қолайлы әрі сапалы медициналық көмек көрсету», – деді Ақмарал Әлназарова.Жаңа емхана тәулігіне 250 адам қабылдауға қауқарлы. Медициналық мекеме алғашқы медициналық-санитариялық көмектің барлық талаптарына сай және заманауи құрал-жабдықтармен толық қамтылған. Мұнда жоғары технологиялы диагностикалық аппараттар, цифрлық рентген, ультрадыбыстық зерттеу құрылғылары, зертханалық талдау жүйелері, телемедицина мүмкіндіктері мен жедел медициналық көмекке арналған жабдықтар орнатылған.Жамбыл аудандық ауруханасының директоры Дархан Сыбанбаев жаңа емхананың аудан тұрғындары үшін маңызын атап өтті.«Бұл емхананың іске қосылуы Жамбыл ауданы тұрғындары үшін үлкен мүмкіндік. Медициналық қызметтің қолжетімділігі мен сапасы айтарлықтай артады. Бүгінде мекемеде 324 қызметкер еңбек етеді, оның ішінде білікті дәрігерлер мен бейінді мамандар жеткілікті. Алдағы уақытта тұрғындарға көрсетілетін қызмет сапасын одан әрі жақсарту бағытында жүйелі жұмыс жүргіземіз», – деді ол.Айта кетейік, емхананың штаттық құрамында 324 қызметкер бар. Оның ішінде 98 дәрігер, 194 орта медициналық персонал, 24 кіші медициналық қызметкер және өзге бағыттағы 8 маман еңбек етеді.Сонымен қатар, Алматы облысында «Ауылдық денсаулық сақтауды жаңғырту» ұлттық жобасы аясында 38 денсаулық сақтау нысанының құрылысы жоспарланған болатын. Оның ішінде 13 дәрігерлік амбулатория, 14 фельдшерлік-акушерлік пункт және 11 медициналық пункт бар. Жобалардың жалпы құны 8,2 млрд теңгеден асады. Қазіргі таңда барлық 38 нысанның құрылысы толық аяқталған.Ақпарат көзі : https://www.gov.kz/memleket/entities/almobl/press/news/details/1143016?lang=kk

Қазақстан Республикасы Президентінің тапсырмаларына сәйкес және Үкіметтің жоспарлы жұмысы шеңберінде 2025 жылы Алматы облысын дамыту халықтың әл-ауқатын арттыруға және өңірдің экономикалық әлеуетін нығайтуға бағытталды. Жұмыс орындарын құруға және инфрақұрылымды кешенді жаңғыртуға, ең алдымен облыс тұрғындарының 80%-дан астамы тұратын ауылдық жерлерде баса назар аударылды.Жыл қорытындысы бойынша өңір экономикасының нақты көлем индексі 110,6%-ды құрады, бұл барлық негізгі салалар бойынша тұрақты өсім барын көрсетеді.Алатау қаласы және индустрия саласындағы көшбасшылықМемлекет басшысы белгілеп берген стратегиялық міндеттердің бірі – жаңа Алатау қаласын халықаралық индустриялық және іскерлік хаб ретінде дамыту. Бұл жобаны жүзеге асыру бүкіл облыстың өнеркәсіптік әлеуетін дамытуға қуатты серпін береді.2025 жылдың қорытындысы бойынша өңірде өнеркәсіп өндірісінің көлемі 10,1%-ға өсіп, 2,6 трлн теңгеге жетті. Алматы облысы азық-түлік өндірісі бойынша елімізде бірінші орынға берік орныққан. Экономиканың шикізаттық емес секторы да қатар дамып келеді.Жылдың маңызды жобаларының қатарында Galanz Bottlers компаниясының өндіріс ауқымын кеңейту, сондай-ақ Қарасай ауданында алюминий радиаторларын шығаратын «SL Group» ЖШС зауытын іске қосу оқиғалары бар. Жобаға салынған инвестициялар 7,3 млрд теңгені құрады, 100 тұрақты жұмыс орны құрылып, өнімнің импортын алмастыруға қол жеткізілді.Алматы облысы әкімінің орынбасары Рустам Исатаев атап өткендей, Алатау қаласында 32 негізгі инвестициялық жобадан тұратын пул құрылған.Бекітілген даму тұжырымдамасына сәйкес олардың 25-і төрт кластерге бөлінген: өндірістік-тамақ, логистикалық, туристік, сондай-ақ академиялық және фармацевтикалық. Ауқымды фармацевтикалық кластер құру үшін Hanteng BioPharma халықаралық конгломератына жер телімін бөлу стратегиялық маңызды қадам болды.Агроөнеркәсіп кешені – экономиканың іргетасыАгроөнеркәсіп кешені экономиканың негізгі секторы және облыстың ірі жұмыс берушісі болып қалып отыр. Оның тиімділігі рекордтық көрсеткіштерге жетті: бюджеттік субсидиялардың әрбір теңгесіне 17 теңге жалпы өнім өндірілді.Ауыл шаруашылығының жалпы өнім көлемі 798,4 млрд теңгені құрады. Өңір елімізде балмұздақ өндірісі бойынша көш бастап тұр (республикалық көлемнің 63%-ы), сондай-ақ сусындар, жүгері және алма шығару бойынша жетекші орындарға ие.2025 жылы агроөнеркәсіп кешеніне 148 млрд теңге инвестиция тартылды. Қазіргі заманғы агротехнологиялар қарқынды енгізілуде: суды үнемдейтін суармалы жер көлемі 3,3 есеге ұлғайып, 66 мың гектардан асты. Бұл аймақтың жүгері, алма және соя өсірудегі көшбасшы орынын сақтап қалуға мүмкіндік беріп отыр.Алматы облысы еліміздегі құс еті өндірісінің жалпы көлемінің 28,7%-ын қамтамасыз етеді және ет өндіру бойынша республикада екінші орында тұр – 133,9 мың тонна.Қосылған құны жоғары және өсу әлеуеті зор жобаларАлматы облысында жүзеге асырылып жатқан жобалар кешені өңір экономикасын дамытудың тұтас тетігі ретінде қалыптасқан: бұл аймақты шикізатқа тәуелді модельден өңдеуші экономикаға көшіруге, экспортты ұлғайтуға, импортқа тәуелділікті азайтуға және қала мен ауылдық жерлерде жаңа жұмыс орындарын ашуға бағытталған.Облыста 9 сүт өңдеу кәсіпорны жұмыс істейді. Онда дайын өнім өндіру көлемі 9,3%-ға өсіп, 241 мың тоннаға жетті, сауылған сүт көлемі – 313 мың тонна (+7,9%),  ал экспорт – 31,8 мың тонна (+15,7%).Қосылған құны жоғары тауарлар сегменті қарқынды дамып келеді. Бұл бағытта «Дәулет-Бекет» ЖШС (түйе сүтінен жасалатын өнімдер) және «NEO Milk» ЖШС (балаларға арналған және арнайы тағам өнімдері) сияқты кәсіпорындар табысты жұмыс істеп отыр. Аталған өндірістер фермерлерге тұрақты өткізу нарығын қамтамасыз етсе, халыққа сапалы өнім ұсынады, ал ел үшін экспорт көлемін арттырып, валюталық түсім әкеледі.Өңір еліміздегі жүгері егіс алқаптарының 28%-ын қамтиды (49 мың гектар). Жалпы өнім көлемі – 347 мың тонна. Қазіргі таңда оның 20%-ы өңделеді, алайда «Азия Агро Фуд» ЖШС, «Көк Теңіз» ЖШС, «Qaz Eco Dan» ЖШС және Harvest Agro Holding жобаларының іске асырылуы нәтижесінде бұл көрсеткіш 67%-ға дейін өсіп келеді. Бұл крахмал, сироптар, сондай-ақ тамақ және фармацевтика өнеркәсібіне арналған ингредиенттердің экспорттық әлеуетін айтарлықтай күшейтеді. Крахмал экспорты қазірдің өзінде 34,1%-ға артып, 27,3 мың тоннаға жетті.Жеміс өндіру көлемі бойынша облыс елде 2-орында тұр — 97 мың тонна. Өңдеумен «Fruit Art» ЖШС (сублимация) және «Агрофирма «Керуен» ЖШС (алма, шырындар, консервілеу) айналысады. Қуаттылығы 80 мың тонна болатын «QAZAQ Global Food JV» ЖШС зауыты салынуда. 2028 жылға қарай өңдеу көлемі 37 мың тоннадан 54 мың тоннаға дейін артады. Бұл өнім шығынын азайтып, бағаны тұрақтандыруға және өнімді жыл бойы экспорттауға мүмкіндік береді.Облыс елдегі құс еті өндірісінің 28%-ын қамтамасыз етеді. Жалпы өндіріс көлемі 133,8 мың тонна, экспорт – 11,9 мың тонна ($16,6 млн). «Прима Құс» ЖШС өндіріс қуатын 105 мың тоннаға дейін ұлғайтып, импортқа тәуелділікті азайтуға және жаңа жұмыс орындарын құруға ықпал етеді.«Балық мектебі» орталығы жұмыс істеп тұр, жалпы құны 2,3 млрд теңге болатын 6 жоба іске қосылды. Тауарлы балық өндірісі 16%-ға, экспорт көлемі 27%-ға артты. Балық өнімі Дания, Нидерланд және Польшаға экспортталады.«Айдарбаев» ШҚ және «Asia Pets» ЖШС балыққа және үй жануарларына арналған жем өндіреді. Жалпы облыс бойынша 423,8 мың тонна жем өндіріліп, соның 187 мың тоннасы экспортталды ($39,9 млн).Жалпы құны 12 млрд теңге «Қапшағай Бидай Өнімдері» ЖШС жобасының іске қосылуы 150-ден астам жұмыс орнын құрып, өсімдік майы, ұн және құрама жем өнімдерін экспорттауға мүмкіндік берді.Бұл жобалардың барлығы өзара тығыз байланысты: егіс алқаптары мен фермалар өңдеумен қамтылады, зауыттарға  – шикізат, халыққа – жұмыс орындары мен сапалы өнім, ал мемлекетке  – экспорт пен салық түсімі.Осылайша, Алматы облысы ауыл шаруашылығының азық-түлік қауіпсіздігін қамтамасыз етуге, экономикалық өсімді жеделдетуге және Қазақстанның әлемдік нарықтағы позициясын нығайтуға бағытталған заманауи индустрияға айналып жатқанын көрсетіп отыр.Өнімді қайта өңдеу саласындағы жетекші позицияларЖалпы облыстың тамақ өнеркәсібінде 504 млрд теңгеге дайын өнім өндірілді. 2025 жылы аймақ өз көрсеткіштерін дәйекті түрде жақсарта отырып, жетекші орынға шықты. 2023 жылы облыс 11% үлесіпен екінші орынды, 2024 жылы да 12,7% үлеспен екінші орынды, ал 2025 жылдың қорытындысы бойынша 13% үлеспен бірінші орынды иеленді.Бұдан басқа, Алматы облысы Қазақстанда балмұздақ жасау бойынша көш бастап тұр – 63%: ел бойынша жалпы көлемі 61 мың тонна болса, оның 38 мың тоннасы осы өңірден шығады. Бұл ретте таяу және алыс шет елдермен сыртқы сауда айналымында оң сальдо қалыптасып отыр. Мәселен, республика бойынша балмұздақ экспорты 11,5 мың тонна болса, импорт 13,2 мың тонна құрайды, ал Алматы облысы бойынша экспорт 12,9 мың тонна, импорт – 167 тонна.Өңір сонымен қатар көкөніс шырындарын өндіру бойынша да жетекші орынға ие, бұл – ел бойынша көрсеткіш: 3,8 мың тоннаның 55%-ы немесе 2,1 мың тоннасы.Тамақ өнеркәсібі үшін маңызды оқиға: 2026 жылғы наурызда PepsiCo компаниясы зауытының іске қосылуы, сол кезде Lay's чипстерінің бірінші партиясы шығарылатын болады. Жоба бойынша Алматы, Павлодар және солтүстік облыстардың фермерлерімен терең кооперация жасау қарастырылған. Үш жыл ішінде арнайы картопты жеткізуді толықтай оқшаулау жоспарлануда, бұл бүкіл аграрлық сектор үшін елеулі мультипликативті әсер бермек.Инфрақұрылым мен тұрғын үй құрылысына инвестиция тарту Өнеркәсіптің қарқынды дамуы ауқымды құрылыс жұмыстарымен қатар жүріп жатыр. Өңірдің негізгі капиталына салынған инвестиция көлемі 29,4%-ға артып, 1,3 трлн теңгеден асты. Қаражаттың едәуір бөлігі тұрғын үй құрылысы мен жол инфрақұрылымын дамытуға бағытталды.Жыл ішінде 1 млн шаршы метрден астам тұрғын үй пайдалануға берілді, бұл алдыңғы кезеңмен салыстырғанда 10,2%-ға көп. Құрылыс жұмыстарының көлемі 18,4%-ға артты.Алматы агломерациясын дамыту аясында ҮАААЖ-ға дейін тартылатын алты радиалды автомобиль жолының құрылысы жүргізілуде, олар кейіннен Алматы қаласының қарамағына беріледі.«Алматы – Бішкек» автожолын сегіз жолаққа, ал «Алматы – Талғар» автожолын төрт жолаққа дейін кеңейтуге бағытталған стратегиялық жобалар жүзеге асырылуда. Бұл көлік дәліздерінің өткізу қабілетін едәуір арттырады.Логистика саласында құрылыс қарқыны айқын байқалады: 2025 жылы «А» санатындағы 159 мың шаршы метр қойма пайдалануға берілді. Бұл ҮАААЖ іске қосылғанға дейінгі орташа жылдық көрсеткіштерден 16-17 есе жоғары. Қазіргі таңда еліміздегі «А» санатындағы барлық қойма алаңдарының 70%-дан астамы Алматы агломерациясының үлесіне тиесілі.Бизнестің қажеттіліктерін қамтамасыз ету мақсатында Үкімет Алатау қаласында 46 инфрақұрылымдық нысан салуды көздейтін Жол картасын бекітті. Индустриялық аймақтар мен жаңа өндірістерді іске қосу үшін қажет үш қосалқы станция салу және «Ынтымақ» су тарту нысанын қайта жаңғырту жобалары басымдықпен жүзеге асырылуда.Әлеуметтік басымдықтар: білім беру, медицина және өмір сүру сапасы Әлеуметтік саясаттың негізгі бағыты жастардың дамуына жағдай жасау және халық денсаулығын нығайту болып қала береді. Облыста үш ауысымды оқытуды жою мақсатында 25 білім беру нысаны, соның ішінде 17 «Жайлы мектеп» салынуда.Сонымен қатар ауылдық денсаулық сақтауды жаңғырту жөніндегі ұлттық жоба аясында 37 медициналық пункт салынуда. Әлеуметтік шаралар кәсіпкерлікті қолдаумен толықтырылып отыр: өз ісін дамытуға мемлекет тарапынан 27,5 млрд теңге бағытталып, соның нәтижесінде жүздеген сервистік кәсіпорындар мен фермерлік шаруашылықтар ашылды.2025 жылы экономиканың барлық салаларында 72,5 мыңнан астам жұмыс орны құрылды, оның 58,5 мыңы – тұрақты жұмыс орындары.Президент тапсырмасы бойынша өңірде сумен жабдықтау жобаларын жүзеге асыруға 30,5 млрд теңге бөлінді. Нәтижесінде ауыл халқының таза ауыз суға қолжетімділігі 99,4%-ға жеткізілді, ал газдандыру деңгейі 80%-ға жетті.Жалпы алғанда, жергілікті бюджет қаражатының 60%-дан астамы әлеуметтік салаға бағытталады. Қауіпсіздік мәселелеріне де ерекше назар аударылуда: «Заң және тәртіп» қағидатын іске асыру нәтижесінде облыста қылмыс деңгейі 10,7%-ға төмендеп, бұл халықтың өмір сүру сапасына тікелей оң әсерін тигізді. primeminister.kzАқпарат көзі : https://www.gov.kz/memleket/entities/almobl/press/news/details/1142563?lang=kk

Премьер-министр Олжас Бектенов Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында берген арнайы экономикалық аймақтарды, индустриялық аймақтарды дамыту және олардың қызметінің тиімділігін арттыру есебінен өңірлердің өнеркәсіптік әлеуетін арттыру жөніндегі тапсырмаларының орындалу барысын тексерді.Алматыда «Алатау» инновациялық технологиялар паркі» арнайы экономикалық аймағын аралау барысында Үкімет басшысы жоғары технологиялық өндірістерді дамыту, локализацияларды тереңдету және АЭА инфрақұрылымын кеңейту мақсатында жүргізіліп жатқан инфрақұрылым құру жұмыстарымен танысты.Арнайы экономикалық аймақты инфрақұрылым жағынан қамтамасыз ету жөніндегі жоспарлар туралы Алматы қаласы әкімінің орынбасары Олжас Смағұлов баяндады. «Алатау» инновациялық технологиялар паркі» АЭА жоғары технологиялық өндірістерге және R&D-ге арналған алаң ретінде дамуда. Оның қатысушыларының саны – 203 компания. Жұмыс істеп бастаған уақыттан бері резиденттер шамамен 399 млрд теңге инвестиция салған, 7,2 мың тұрақты жұмыс орны құрылып, 1 трлн теңге сомасында өнім өндірілген және қызметтер көрсетілген. Бүгінгі таңда АЭА аумағында құны 265 млрд теңге болатын 1000 жұмыс орны бар 24 жоба жүзеге асырылуда, соның ішінде 2025 жылы 355 жұмыс орны құрылған 19 млрд теңгелік 6 жоба іске қосылды.Алматы қаласы әкімдігінің деректері бойынша АЭА аумағы іс жүзінде 94% толған, бос учаскелер 7,7 га құрайды, бірақ жұмыс істеу мерзімі 2027 жылдың аяғымен шектеліп отыр, бұл капиталды көп қажет ететін және ұзақ мерзімді жобаларды жүзеге асыруды қиындатады және инвесторлар үшін тартымдылықты төмендетеді. Осыған байланысты, өсу қарқынын сақтау және жоспарланған бастамаларды жүзеге асыру үшін Премьер-министр АЭА-ның пайдалану мерзімін ұзартуды және оның аумағын кеңейтуді, сондай-ақ жаңа жоғары технологиялық өндірістерді әртараптандыру және іске қосу жөніндегі міндеттерді ескере отырып, рұқсат етілген қызмет түрлерінің тізбесін толықтыруды тапсырды.Премьер-министр Олжас Бектенов инвестициялық тартымдылықтың негізгі факторы ретінде АЭА мен инфрақұрылымдық дайындықты одан әрі дамытудың маңыздылығын атап өтті. Бұл жұмысты еліміздің барлық өңірлерінде жүзеге асыру қажет. Бұл мақсатта Үкімет болашақ инвестициялық жобалар үшін инфрақұрылымдарды жаңа сапада жақсарту жөнінде шаралар қабылдауда. Әкімдіктер осы бағытқа жекеменшік инвестицияларды тарту бойынша жұмысты жандандыруы тиіс.«Президент жариялаған Цифрландыру және жасанды интеллект жылында жоғары технологиялық жобаларды іске қосу үшін жағдай жасау қажет. Бұған қосалқы станциялар мен көлік желілерін қоса алғанда, қосымша инфрақұрылым құру кіреді.“Алатау” инновациялық технологиялар паркі" АЭА бүгінде технологиялық алаң ретінде жұмыс істеп тұр. Бірақ инвестициялық сұраныстың жоғары екенін ескере отырып, аймақты одан әрі дамыту қажет. Әкімдік Арнайы экономикалық аймақтың әкімшілігімен бірлесіп республикалық бюджетке тәуелділікті азайту үшін, бюджеттен тыс қаражаттар тартып, халықаралық қаржы ұйымдарымен ынтымақтастық орнатуы тиіс», – деп атап өтті Премьер-министр.«Алатау» инновациялық технологиялар паркі» АЭА аумағында орналасқан NERO Group өндірістік алаңының базасында Премьер-министрге есептегіш құралдарының отандық өндірісін дамыту туралы баяндалды.Бүгінгі таңда кәсіпорынның өндірістік желісіне жылу, су, электр энергиясы мен газды есепке алу жүйелері мен құралдары кіреді. Жобаның құны – 1,5 млрд теңге, қуаттылығы – жылына 10 мың бірліктен асады. 65 жұмыс орны ашылды, қызметкерлердің жалпы саны – 150 адам. Компания өндірістік және инженерлік құзыреттерді, соның ішінде бухгалтерлік есеп пен мониторинг жүйелеріне арналған бағдарламалық жасақтаманы біріктіреді.NERO Group құрылтайшысы Ерлан Нәбиев жалпы құны шамамен 44,8 млрд теңгені құрайтын 2025-2027 жылдарға арналған жоғары технологиялық өндірістерді локализациялаудың кешенді жобасын ұсынды. Бастама 650-ден астам жұмыс орнын ашуды, өндірістік алаңдарды 21 068 шаршы метрге дейін кеңейтуді және кабельдік өнімдер мен компоненттер өндірісін, газ есептеу құрылғыларын шығаруды кеңейтуді, сондай-ақ пилотсыз жүйелер мен робототехника шығаруды қоса алғанда, жаңа бағыттарды іске қосуды көздейді. Жоба инженер кадрларды даярлауды көздейді: бакалавриат бағдарламалары бойынша жылына 60 адам және біліктілікті арттыру бағдарламалары бойынша 200 адамға дейін.Сондай-ақ білім беруді, ғылым мен өндірісті интеграциялауды, дуальды білім беруді енгізуді және инженер мамандарды даярлауды көздейтін АЭжБУ мен ТКШ Қазорталығының қатысуымен Smart Energy ғылыми-білім беру кластерінің жобасы таныстырылды.UBTECH Robotics (Қытай) компаниясымен бірлесіп ЖИ базасында білім беру және сервистік роботтар өндірісін локализациялау жобасын жүзеге асыру жоспарлануда. Осы бағыт бойынша сұраныс қалыптасып, AI-зертханаларды енгізуге офтейк-келісімшарттар жасалды. Қуаты – жылына шамамен 25 мың жиынтық. Кейіннен ұлғайта отырып, 80 жұмыс орнын ашу көзделіп отыр.Бұдан бөлек, Премьер-министрге жылумен жабдықтауды бақылау үшін компанияның цифрлық шешімі ұсынылды. Жүйе автоматты түрде үйдегі есеп тораптарынан көрсеткіштерді жинайды және оларды «бағдаршам» аналитикасы бар веб-картада көрсетеді: жылынбау немесе қызып кету, жылуды тұтыну және ыстық су шығыны бойынша ауытқулар бар жерде. Бұл диспетчерлік қызметтер мен табиғи монополиялар субъектілеріне проблемалық мекен жайларды тезірек анықтауға және жедел әрекет етуге мүмкіндік береді. Шешім Қарағанды, Сәтбаев және Жезқазғанда енгізілді. Ерлан Нәбиев бастаманы кеңейтудің және оны табиғи монополиялар субъектілері үшін жылумен жабдықтау сапасын бақылаудың міндетті цифрлық контуры ретінде бекітудің маңыздылығын атап өтті.    Ақпарат көзі : https://www.gov.kz/memleket/entities/almobl/press/news/details/1142560?lang=kk

Премьер-министр Олжас Бектенов Алматы облысына жұмыс сапары барысында Президент белгілеген экономиканы әртараптандыру, өнеркәсіп өндірісі көлемін ұлғайту, терең өңдеу үлесін арттыру және экономиканың басым салаларына инвестициялар тарту жөніндегі мақсаттарға сай келетін бірқатар инвестициялық және өнеркәсіптік жобаның жүзеге асырылу барысымен танысты.Алматы облысының әкімі Марат Сұлтанғазиев 2025 жылдың қорытындысы бойынша өңірге 1,3 трлн теңге инвестиция тартылғанын, бір жылдағы өсім 29,4% болғанын баяндады. Экономиканың барлық салаларында 72 541 жұмыс орны құрылған, оның ішінде 58 528-і тұрақты жұмыс орны. Алматы облысы еліміздің негізгі индустриялық-логистикалық орталықтарының бірі ретінде өз ұстанымын дәйекті түрде нығайтып келеді. Мұнда көлік-логистикалық инфрақұрылымды дамыту өңірдің өңдеуші секторының өсуін ынталандыруда маңызды рөл атқарады.Сапар аясында Премьер-министр Қарасай ауданының Көкөзек ауылында орналасқан, шикізаттық емес секторды дамытумен айналысатын «Imagine Apple Logistics» ЖШС-нің логистикалық орталығын аралады. Жоба қойма, көлік және басқару процестерін біріктіруге, дистрибуциялық ағындарды шоғырландыруға, сондай-ақ, ішкі және аймақаралық нарықтар үшін тұрақты жеткізу тізбегін қалыптастыруға бағытталған. Оның аясында 50 млрд теңгеден астам инвестиция тарту және 1 мыңнан астам тұрақты жұмыс орнын ашу, сондай-ақ іргелес жол және әлеуметтік инфрақұрылымды дамыту қарастырылып отыр. Танысып шыққан соң Олжас Бектенов аталған логистикалық орталықты кеңейтуге және дамытуға жәрдемдесуді тапсырды. Өңірде логистикалық жобаларды жүзеге асыру нәтижесінде соңғы үш жылда қойма үй-жайларының жиынтық ауданы 17,5 есеге, яғни, 8,8 мың шаршы метрден 153,9 мың шаршы метрге дейін ұлғайды.Сондай-ақ, Үкімет басшысы Алматы облысында салынған, инвестиция көлемі 74 млрд теңге болатын KT&G компаниясының заманауи зауытының жұмысымен танысты. Өндірістің экспортқа бағдарлануына және Еуропа мен ТМД елдерінің нарықтарына шығу жоспарларына ерекше назар аударылды. 2025 жылдың қорытындысы бойынша кәсіпорын жергілікті бюджетке түсетін салық түсімдерінің шамамен 4%-ын қамтамасыз етті, бұл оның облыс бюджетінің кіріс бөлігін қалыптастырудағы елеулі үлесін көрсетеді.Өңірдің негізгі кәсіпорындарының қатарында тамақ өнімдерін өндіру бойынша жүйе құраушы болып саналатын «Маревен Фуд Тянь-Шань» компаниясы бар. Кәсіпорынның қазіргі таңдағы қуаттылығы жылына 160 мың тонна дайын өнімді құрайды, экспорт көлемі – 20 мың тоннадан асады. Жалпы, 2025 жылы өндірісті жаңғыртуға 35 млрд теңге инвестицияланды, 700-ге жуық жұмыс орны ашылды, бұл ретте қызметкерлердің 95%-ы жергілікті тұрғындар. 2026 жылы компания жаңа өндірістік желіге қосымша 4,5 млрд теңге салуды жоспарлап отыр. Бұл өндірістік қуатты 170 мың тоннаға дейін, ал қызметкерлер санын 780 адамға дейін арттыруға мүмкіндік береді. Ал жалпы 2030 жылға дейін «Маревен Фуд Тянь-Шань» ЖШС өндірісті кеңейтуге тағы 21 млрд теңге инвестиция салуға ниетті. Нәтижесінде 1 мыңға дейін жұмыс орнын ашу жоспарлануда, бұл жергілікті экономиканың дамуына және өңірдің азық-түлік қауіпсіздігін нығайтуға ықпал ететін болады.Сапар барысында агроөңдеуді дамытуға көңіл бөлінді. Премьер-министр «Қапшағай бидай өнімдері» зауытының базасында агроөнеркәсіптік кластердің қызметімен танысты, онда жаңғырту нәтижесінде ұн, өсімдік майы және мал азығын өндіру бойынша 1 млн тоннадан астам қуаттылық қалыптасты. Инвестиция көлемі 12 млрд теңгені құрады. Кәсіпорын тек жергілікті шикізат базасын пайдаланады және экспортқа бағдарланған: бір жарым айда шамамен 110 мың тонна өнім өндірілді, оның 98%-ы ҚХР нарығына, өнімдер ҚХР нарығына, Оңтүстік-Шығыс Азия елдеріне жеткізілді, өткен жылы алғаш рет қазақстандық астықты Вьетнамға жөнелту жүзеге асырылды. Ендігі жоспар – өндірістік қуатты екі есеге арттыру.Жобаны жүзеге асыру Алматы облысының экспорттық әлеуетін дамытуға елеулі үлес қосып, астық экспортының көлемін 10%-дан астам ұлғайтуға мүмкіндік берді.Кәсіпорындарды аралау қорытындысында Премьер-министр қайта өңдеу өндірістерін, логистиканы және қосылған құны жоғары өнім экспортын дамытудың басымдығын атап өтті, сондай-ақ салалық мемлекеттік органдар мен облыс әкімдігіне тұрақты жұмыс істеу және кәсіпорындарды одан әрі кеңейту үшін қажетті жағдайларды қамтамасыз етуді тапсырды.Жалпы алғанда, экспортқа бағдарланған кәсіпорындардың өндірістік қуаттарын дамыту және арттыру өңдеу өнеркәсібінің экспортын ұлғайтуға ықпал етеді, тек 2025 жылдың 8 айында оның көлемі $618,5 млн-ды құрады, бұл өткен жылдың сәйкес кезеңімен салыстырғанда 28,5%-ға артық,  осылайша экспорттың жалпы көлеміндегі өңделген тауарлардың үлесі шамамен 90%-ға жетіп отыр.«Біздің мақсатымыз – қосылған құны жоғары өнім шығару. Сондықтан кәсіпорындарға өсуі үшін тұрақты және болжамды жағдайларды қамтамасыз ете отырып, қайта өңдеуді, логистиканы және экспортты дәйекті түрде дамыту маңызды», — деп атап өтті Олжас Бектенов. primeminister.kzАқпарат көзі : https://www.gov.kz/memleket/entities/almobl/press/news/details/1141937?lang=kk

Премьер-министр Олжас Бектенов Алматы облысына жұмыс сапары аясында Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Қазақстан халқына Жолдауында Алатау қаласының базасында инвестицияларды, технологияларды және іскерлік белсенділікті тартудың жаңа полюсін қалыптастыру бойынша қойған міндеттерін жүзеге асыру барысымен танысты.Ұлттық экономика вице-министрі Бауыржан Омарбеков пен Алматы облысы әкімінің орынбасары Рустам Исатаев Премьер-министрді Алатау қаласының аумағындағы инвестициялық жобалардың жүзеге асырылу барысы, қала құрылысы мен инфрақұрылымдық жобаларды жүзеге асыруға дайындық туралы, сондай-ақ өңірді электр энергиясымен қамтамасыз ету, оның ішінде қажеттіліктерді ескере отырып жаңа өндірістерді іске қосу бойынша хабардар етті.ҰЭМ деректері бойынша бүгінгі таңда Алатаудың Бас жоспарына түзету енгізілді, инженерлік желілердің салалық схемалары, егжей-тегжейлі жоспарлау жобалары және инфрақұрылымдық дамудың Жол картасы бекітілді.Жол картасының бірінші кезеңі 365,1 млрд теңге сомасына 21 жобаны жүзеге асыруды көздейді. 2026-2027 жылдары қосалқы стансаларды, су жинау торабын және газ құбырларымен қатар, инженерлік инфрақұрылымның қолданыстағы нысандарын реконструкциялау мен жаңа объектілер салу жоспарланған. 2028-2030 жылдардағы екінші кезең 312,5 млрд теңгеге 9 жобаны қамтиды, оның ішінде екі қосалқы станса, автоматтандырылған газ тарату стансасы бар газ құбыры, кәріз тазарту және 49 шақырым автомобиль жолдарының құрылысы қамтылады.Тұтастай алғанда, 2050 жылға дейін инвестициялардың жалпы көлемі 10,4 трлн теңге деңгейінде инфрақұрылымдық жобалар пулы қалыптастырылды, оның 3,1 трлн теңгесін 2030 жылға дейін жүзеге асыру жоспарланып отыр. Инфрақұрылымды дамыту бюджет қаражаты есебінен ғана емес, сонымен қатар жеке инвестициялар мен EPC-келісімшарттарды тарта отырып қамтамасыз етіледі.Сондай-ақ тартылатын инвестициялар туралы ақпарат ұсынылады. Бүгінде жалпы құны 1,5 трлн теңге болатын 32 инвестициялық жоба қалыптастырылды. Аталған жобалардың 20-сы белсенді жүзеге асыру сатысында, оның 8-і – логистика, 6-уы – құрылыс және өнеркәсіп, 3-уі – туризм, 3-уі – тамақ өнеркәсібі саласында. Бұл жобаларды жүзеге асыру шамамен 1,2 трлн теңге инвестиция тартуға және 22 мыңнан астам жұмыс орнын ашуға мүмкіндік беретіні атап өтілді.Тамақ өнеркәсібі саласында Олжас Бектенов инвестицияларының жалпы көлемі шамамен $360 млн болатын PepsiCo Central Asia ауқымды жобасы бойынша жұмыстардың қарқынымен танысты. Жоба екі кезеңмен жүзеге асырылуда және қосылған құнның жаңа тізбегін қалыптастыруға, агроөнеркәсіптік кооперацияны дамытуға, ауыл шаруашылығы өнімдерін сақтау мен өңдеудің заманауи технологияларын енгізуге бағытталған. 900-ге дейін жұмыс орнын құру жоспарлануда, кәсіпорынның өндірістік қуаты 21 мың тоннаны құрайды.Премьер-министр Алатау қаласында «Mars Petcare Kazakhstan» ЖШС-нің үй жануарларына арналған дайын азық өндіру зауытына барды. Өндірістерді локализациялау және қайта өңдеу өнеркәсібін дамыту саясаты шеңберінде жүзеге асырылып жатқан жоба жылдың ортасында басталады.Iconic Towers зәкірлік жобасына арнайы назар аударылды. Оны салу туралы келісімге 2025 жылдың қыркүйегінде Мемлекет басшысының Қытайға мемлекеттік сапары аясында қол қойылған болатын. Инвестиция көлемі $800 млн-нан асады. Архитектуралық тұжырымдаманы әзірлеу үшін америкалық SOM компаниясы тартылды. Кешеннің жалпы ауданы 276,8 мың шаршы метрді құрайды және оған екі мұнара, кеңселер, пәтерлер, қонақ үй мен сауда орындары кіреді. Жобалық-сметалық құжаттаманы әзірлеуді 2027 жылдың сәуіріне дейін аяқтау жоспарлануда, құрылыс жұмыстарын биылғы мамыр айынан бастап, 2029 жылдың соңына дейін аяқтау жоспарлануда.Алатау қаласының жобаларын жүзеге асыруға байланысты, Алматы облысында электр энергиясын орташа тұтыну көлемі өсуде: қазір ол 750-800 МВт-ты құрайды. Бұл ретте 2030 жылға қарай болжамды өсім 2 064 МВт, 2050 жылға қарай – 4 164 МВт болуы мүмкін деп бағаланып отыр. Қолданыстағы қуат көздерінің тапшылығы қосалқы стансалар құрылысы мен реконструкциясын талап етіп отыр. Үкімет қазірдің өзінде 15 қосалқы станса салу туралы шешім қабылдады, бұл жаңа трансформаторлық қуат көлемін іске қосуға және инвесторларды электр энергиясымен қамтамасыз етуге мүмкіндік береді.Алатау қаласы бойынша бекітілген Жол картасы аясында шамамен құны 162 млрд теңге болатын тағы 11 қосалқы станса салу және реконструкциялау көзделгені атап өтілді, бұл – қаланың тұрақты дамуы мен инвестициялық жобаларды жүзеге асырудың негізгі шарты.«Инфрақұрылым әрқашан озық қарқынмен дамуы керек, бірақ біз сәл кешігіп келеміз. Жалпы мұндай мәселе еліміз бойынша бар. Қазір Президент бұған үлкен көңіл бөлуде. Мемлекет басшысының тапсырмасы бойынша Үкімет қажетті қаражат бөліп жатыр. Біз мемлекеттік қаржыны тұрақтандыру үшін салық реформасын жүргіздік. Бұл қаражат бізге инфрақұрылымға салу үшін қажет. Бұл ақша ешқайда кетпейді, тікелей экономикаға салынады. Егер мемлекет инфрақұрылымға инвестиция салса, онда инвесторлардың сенімі артып, келе бастайды. Даму осыдан басталады. Басқа жол жоқ. Сондықтан, біз инвестиция саламыз және осы жылдан бастап бюджеттің мүмкіндіктері басқаша болады. Бірге жұмыс істейтін боламыз», — деді Олжас Бектенов.Үкімет барлық қолдау шараларын көрсетіп жатыр. Қазіргі уақытта қала арнайы мәртебеге және қосымша институционалдық жағдайларға ие. Олжас Бектенов жергілікті атқарушы органдардың назарын қаланы дамыту жөніндегі жұмысты күшейту қажеттігіне аударды. Президент белгілеген міндеттер шеңберінде Алатау бүгінде іскерлік белсенділік пен инновацияның жаңа орталығы ретінде қалыптасуда, сондықтан қаланың сәулеті адам игілігіне бағытталған және бизнес үшін ыңғайлы болуы тиіс.Осыған байланысты Alatau City Authority Қоры мен Алматы облысының әкімдігіне инженерлік және әлеуметтік инфрақұрылымды дамыту, инвестициялар тарту, индустриялық, логистикалық және инновациялық жобаларды жүзеге асыру үшін қолайлы жағдайлар жасау мәселелерін қарастыра отырып, қаланы дамыту бойынша мемлекеттік қолдаудың жан-жақты шараларын қабылдау тапсырылды.Ақпарат көзі : https://www.gov.kz/memleket/entities/almobl/press/news/details/1141917?lang=kk

Алматы облысында техникалық және кәсіптік білім беру жүйесін халықаралық деңгейге көтеру бағытында жүйелі жұмыстар жүргізіліп жатыр. Өңір колледждері шет мемлекеттердің жетекші білім беру ұйымдарымен ынтымақтастық орнатып, тәжірибе алмасу мен білікті кадрлар даярлау ісін жаңа деңгейге шығаруда. Қазіргі таңда Алматы облысының колледждері Қытай, Оңтүстік Корея, Франция, Түркия, Өзбекстан және Қырғызстан елдерінің бірқатар оқу орындарымен ынтымақтастық туралы келісімшарттар жасаған.Атап айтқанда, Түркияның Анталия қаласындағы Мехмет Зеки Балджы жоғары мектебі (туризм және қонақ үй бизнесі), Францияның Париж қаласындағы Гийома Тирель лицейі және Элиза Лемонье лицейі облыс колледждерімен бірлескен жобаларды іске асыруға ниет білдірген.Сонымен қатар, Қытайдың Сиань қаласындағы кулинарлық колледжбен, Финляндиядағы ECEDU кәсіптік колледжі, Қырғыз Республикасындағы С. Ибраимов атындағы агротехникалық колледж, Қытайдың Чунцин қаласындағы оқу орындарымен және Кореяның OFECO.LTD компаниясымен ынтымақтастық жөнінде меморандумдарға қол қойылған.2024–2025 оқу жылында Алматы облысынан сегіз педагог шет мемлекеттерде тағылымдамадан өтті. Оның ішінде бес педагог Түркияда, ал үш педагог Францияда кәсіби тәжірибе жинақтаған.Колледж оқытушыларының айтуынша, халықаралық тәжірибе кәсіби дамуға тың серпін береді.- «Шетелде тағылымдамадан өту бізге заманауи оқыту әдістерін меңгеруге, өндіріс пен білімнің өзара байланысын терең түсінуге мүмкіндік берді. Бұл тәжірибе студенттермен жұмыс істеу сапасын арттыруға тікелей әсер етеді», – дейді Алматы облысы колледжінің басшысы Бақытгүл Кішібаева .Ал білім саласына жауапты мекеме өкілдері бұл бағыттағы жұмыстың алдағы уақытта да жалғасатынын атап өтті.- «Халықаралық әріптестік – техникалық және кәсіптік білім беруді жаңғыртудың маңызды тетігі. Біз колледждердің әлемдік стандарттарға сай дамуына және еңбек нарығына сұранысқа ие мамандар даярлауына басымдық беріп отырмыз», – дейді облыстық білім басқармасының өкілі Кенжегуль Дюсентаева.Бұдан бөлек, Қытай – Орталық Азия елдері арасындағы бірлескен жобалар аясында ауыл шаруашылығы мен техникалық мамандықтар бойынша кадр даярлайтын жеті колледж директоры және өндірістік оқыту жөніндегі бір директордың орынбасары 2025 жылғы 14–24 сәуір аралығында Қытайдың Чунцин қаласында оқу курсынан өтті. Нәтижесінде 49 ынтымақтастық меморандумына қол қойылды.Мамандардың айтуынша, бұл бастамалар Алматы облысы колледждерінің халықаралық стандарттарға сай дамуына, педагогтардың кәсіби деңгейін арттыруға және еңбек нарығына қажетті білікті мамандар даярлау сапасын күшейтуге мүмкіндік береді.Ақпарат көзі : https://www.gov.kz/memleket/entities/almobl/press/news/details/1140322?lang=kk

Әлеуметтік осал топ өкілдері үшін ақжолтай хабар. Биылдан бастап МӘМС жарналары жергілікті бюджет есебінен төленетін болады. Өткен жылы Үкіметтің кеңейтілген отырысында Мемлекет басшысы: «Әлеуметтік осал санаттарға жататын азаматтар үшін медициналық сақтандыруға аударымдар жергілікті бюджет есебінен төленуі тиіс», – деп атап өткен еді.Президенттің тапсырмасынан кейін МӘМС аясында бірқатар өзгерістер енгізілді. Заңдағы жаңашылдықтың арқасында 2026 жылы елімізде 1 млн адам МӘМС жүйесімен қосымша қамтылмақ.Жаңа жылдан бастап МӘМС жүйесіне 11 нозологияны қамтитын әлеуметтік мәні бар аурулардың (ӘМА) жаңартылған тізбесі енгізілді. Соған қарамастан, МӘМС жүйесіндегі медициналық көмектің қолжетімділігі мен көлемі өзгеріссіз қалады.18 жасқа толғаннан кейін де мемлекет мүгедектігі бар адамдар үшін сақтандыру жарналарын төлеуді жалғастырады. Сондай-ақ мемлекет жұмыссыз және әлеуметтік осал азаматтарды — МӘМС жүйесіндегі D және E санаттарын сақтандырумен қамтамасыз етеді.«Диспансерлік есепте тұрған осы санаттағы азаматтарға медициналық көмек көрсету үшін облыста 2,6 млрд теңге бөлінген. Қосымша түрде жұмыссыз азаматтар үшін 1,2 млрд теңге бөлу мәселесі қарастырылуда», – дейді Алматы облысы денсаулық сақтау басқармасының басшысы Ержан Сүлейменов.Айта кетейік, диагностика, консультациялар, емдеу және оңалту қызметтері қысқартылмайды және тоқтатылмайды — барлық медициналық қызметтер МӘМС жүйесі аясында толық көлемде көрсетіле береді.Халықтың басым бөлігін аталмыш жүйемен қамтуды оңтайландыру мақсатында жарналар мен аударымдардың негізгі шегі өзгертілді. Нақтыласақ, жұмыс берушілер жарналарды 40 ЕТЖ-дан аспайтын сомадан, ал қызметкерлер 20 ЕТЖ-ға дейінгі сомадан аударатын болады.«Бүгінде Алматы облысындағы медициналық мекемелерге 1 645 171 адам тіркелген. Оның ішінде МӘМС жүйесінде “Сақтандырылған” мәртебесі бар азаматтар саны 1 343 718 адамға жетіп жығылады», – деді Әлеуметтік медициналық сақтандыру қорының Алматы облыстық филиалының директоры Нұрлан Қыдырбаев.Қарасай ауданы бойынша МӘМС жүйесінің жауапты координаторы Гүлнара Жайсанбаеваның айтуынша, бір ғана Қарасай ауданында 309 557 адам сақтандыру мәртебесіне ие.«2025 жылы жергілікті құзырлы органдармен бірлесе жұмыс жасау барысында Қарасай ауданында 10 089 азамат МӘМС жүйесіне тіркелді», – дейді спикер.Еске саламыз, 1 қаңтардан бастап енгізілген өзгерістерді халыққа түсіндіру мақсатында медициналық ұйымдардың call-орталықтарының жұмысы күшейтілді.Ақпарат көзі : https://www.gov.kz/memleket/entities/almobl/press/news/details/1140287?lang=kk

Еңбекшіқазақ ауданына қарасты Ават ауылында лимон ағашын өсіруге арналған заманауи жылыжай кешені жұмысын бастады. Бұл – аудан аумағында алғаш рет қолға алынған жоба. Бір гектар аумаққа салынған кешен алғашқы өнімін екі жылдан кейін береді. Ал толық қуатына шыққан кезде жылдық өнім көлемі бірнеше тоннаға жетуі мүмкін.Жобаның бастамашысы – кәсіпкер Юрий Паскалов. Ол өткен жылдың көктемінде бір гектар жерге жылыжай салып, 1200 түп лимон көшетін отырғызған. Жобаға шамамен 500 миллион теңгеге жуық жеке қаражат инвестицияланған. Кешен заманауи талаптарға сай салынып, жыл бойы бірқалыпты температураны ұстап тұруға мүмкіндік береді.Жылыжайдың басты ерекшелігі – жылдың төрт мезгілінде де жабық күйде жұмыс істеуі. Қыстың қақаған аязында ішкі температура тұрақты сақталса, жаздың аптап ыстығында салқындықты ұстап тұратын заманауи құрылғылар орнатылған. Бұл технология лимон ағаштарының дұрыс өсіп-жетілуіне және сапалы өнім беруіне қолайлы жағдай жасайды.Кәсіпкердің айтуынша, кешен екі жылдан кейін ғана өнім бере бастайды. Алғашқы кезеңде әр түп лимон ағашы 25–30 килограмға дейін жеміс береді. Ағаш толық жетілгенде бұл көрсеткіш 100 килограмға дейін жетуі мүмкін.Кәсіпкер Юрий Паскалов жылыжайда қолданылып жатқан технологияларға тоқталды.Юрий Паскалов, кәсіпкер: «Мен бұл көшеттерді Шымкент қаласынан әкелдім. Қазіргі таңда жылыжайда тамшылатып суару технологиясын пайдаланып отырмыз. Кешен көгілдір отын арқылы бірқалыпты температурада жылытылып тұр. Қазір екі көмекшім бар. Егер ойдағыдай баптап-күтсек, екі жылдан кейін алғашқы өнімін көреміз», – дейді ол.Жергілікті билік өкілдерінің айтуынша, көктем мезгілінде жылыжай кешеніне баратын жол қайта жөндеуден өтеді. Сонымен қатар, өнім нарыққа шыққаннан кейін оны субсидиялау мәселесі де қарастырылмақ.Ават ауылдық округінің әкімі жобаның ұзақмерзімді екенін атап өтті.Момынжан Исламов, Ават ауылдық округінің әкімі: «Мемлекет тарапынан өнім алынып, нарыққа шыққаннан кейін субсидиялау мәселесін қарастыруға дайынбыз. Бұл – бір жылдық жұмыс емес. Шаруа қожалық болғандықтан, басқа да мемлекеттік қолдау тетіктері көрсетіледі. Кәсіпкердің алдағы уақытта тағы да жоспарлары бар», – деді округ әкімі.Қазіргі таңда кәсіпкер адам ағзасына аса пайдалы лимон жемісін өсіретін жылыжай кешенінің аумағын алдағы уақытта 5 гектарға дейін кеңейтуді жоспарлап отыр. Бұл жоба ауыл шаруашылығын дамытуға және жаңа жұмыс орындарын ашуға оң ықпал етпек.Ақпарат көзі : https://www.gov.kz/memleket/entities/almobl/press/news/details/1140071?lang=kk

Алматы облысында ұлттық тағам мәдениетін жаңаша танытатын ерекше гастрономиялық өнім пайда болды — түйе сүтінен дайындалатын балмұздақ. Сарыбұлақ ауылында өндірілетін бұл десерт дәстүрлі шұбаттың пайдасын сақтай отырып, заманауи форматта ұсынылып, бүгінде «қазақ балмұздағы» деген атауға ие болуда.Алматы облысында ұлттық тағам мәдениетін жаңа қырынан танытатын тосын гастрономиялық өнім пайда болды — түйе сүтінен, дәлірек айтқанда шұбаттан жасалған балмұздақ. Бұл өнімді Еңбекшіқазақ ауданына қарасты Сарыбұлақ ауылында 38 жастағы кәсіпкер Азангүл Албосын өндіреді. Табиғи құрамы, 20-дан астам дәм түрі және дәстүрге негізделген тұжырымдамасы бар бұл десертті жергілікті тұрғындар бүгінде «қазақ балмұздағы» деп атап кеткен.Жоба «Қазақтану» атты мәдени-ағартушылық бағыт аясында жүзеге асырылуда. Оның басты мақсаты — көне дәстүрлердің қазіргі заманмен үндесе отырып, жаңаша сипат ала алатынын көрсету. Мұнда ұлттық ас тек тағам ретінде ғана емес, тарихты, философияны және мәдени жадыны сақтаушы құндылық ретінде қарастырылады.Азангүл Албосынның негізгі мамандығы — заңгер. Қазақстанға қоныс аудармай тұрып, Қытайда сот болып жұмыс істеген. Тарихи Отанына оралу бала күнінен бергі арманы еді — ата-анасы ата-баба жері жайлы жиі әңгімелейтін, ал әкесі түйе шаруашылығын ашуды көп ойлайтын.Шамамен 15 жыл бұрын Азангүл Қазақстанға көшіп келіп, тұрмыс құрды. Жолдасы Жарқын Жұмағазымен бірге шаруа қожалығын дамыта бастады. Алғашында ешкі мен жылқы өсіріп, ешкі сүті мен қымыз сатты. Кейін тәуекелге барып, түйе шаруашылығымен айналысуға бел буды. Алғашқы түйелерді көліктерін сатып, сол қаржыға алған. Тәжірибені өз бетімен жинады: фермаларды аралап, білікті шаруалардан кеңес алып, шұбат дайындау технологиясын меңгерді.«Алғашқы кезде түйе сүтін базарларда, халық көп жиналатын жерлерде стақанмен саттық. Көлігіміз болмаған соң, күйеуім өзі көтеріп жүрді. Қиын болды, бірақ сұраныс артты. Кейін адамдар өздері бізге келе бастады», — деп еске алады Азангүл.Отбасы Сарыбұлақ ауылына 10 жыл бұрын қоныс аударған. Бүгінде фермада 80-ге жуық түйе бар. Мұнда өндірілетін шұбат, құрт пен майды тек аудан тұрғындары ғана емес, өзге өңірлерден де сатып алады. Үш жыл бұрын ерлі-зайыптылар бизнес-жоспар әзірлеп, оны Алматы облысының әкімі Марат Сұлтанғазиевке ұсынды. Жоба қолдау тауып, Қаражотын ауылдық округінен бос жатқан жер телімі берілді.«Түйе шаруашылығы — жай ғана кәсіп емес. Қазақ халқы үшін бұл — тіршілік көзі болған сала. Сүтін, жүнін, терісін — барлығын тұрмыста пайдаланған. Біз осы дәстүрдің болашағы бар екенін көрсеткіміз келеді», — дейді кәсіпкер.Азангүл қолөнермен де айналысады: түйе жүнінен көрпе, жастық, емдік белбеулер тігеді. Алдағы уақытта ауыл әйелдеріне арналған қолөнер мектебін ашуды армандайды.Шаруашылықтағы негізгі өнім — түйе сүті. Халықаралық оқудан өтіп, арнайы құрал-жабдық алғаннан кейін, өткен жылы Азангүл «Қазақ қызы» атты жеке брендімен шұбаттан балмұздақ шығара бастады.«Сүтті баяу қайнату керек. Бұл процесс 20 сағатқа дейін созылады. Сүт қоюланып, қоюландырылған сүт секілді болғанда, оған тосап қосамын. Қазір шамамен 20 түрлі дәм бар: шоколад, құрма, карамель, жидек, қауын және басқалары», — дейді ол.Балмұздақ толықтай табиғи өнім: консервантсыз, қант мөлшері аз. Дәмі классикалық балмұздақтан кем емес, ал пайдасы әлдеқайда жоғары — дәрумендер мен қоректік заттарға бай.Алғашында өнім Шелек ауылындағы шағын дүкенде сатылса, қазір Алматы қаласындағы дәмханалар мен мейрамханаларға тапсырыспен жеткізіледі. Қаптама дизайнын да Азангүлдің өзі әзірлеген.Өткен жылы кәсіпкер «Бір ауыл — бір өнім» жобасына қатысып, көрме қонақтарының оң бағасына ие болды. Алайда сол жолы мемлекеттік қолдауға қол жеткізе алмады.«Қазақстанды әлемге танытатын басты құндылық — оның дәстүрі мен мәдениеті. Бізде ұлттық гастрономиялық брендтер болуы керек. «Қазақстанда жасалған» деген таңбасы бар өнімдер көбейгенін қалаймын», — дейді Азангүл.Отбасының алдағы жоспары — түйе санын арттыру, бөтелкеге құйылған шұбат өндіретін цех ашу және балмұздақ өндірісін кеңейту.Қазақтың ұлттық асханасы — Ұлы дала көшпелілер өркениетінің айнасы. Азангүл Албосын — сол дәстүрді сақтап қана қоймай, оны заманауи тілде сөйлете білген жандардың бірі. Оның шұбаттан жасалған балмұздағы — тарих пен табиғилықты, жаңа идеяларды тоғыстырған, Отанның дәмі бар ерекше десерт.Айта кетейік, Қазақстанда түйе сүті өндірісі жылына 18 мың тоннадан асады.Ақпарат көзі : https://www.gov.kz/memleket/entities/almobl/press/news/details/1139790?lang=kk

Алматы облысында ауыл шаруашылығын дамытуға бағытталған мемлекеттік қолдау шаралары жүйелі түрде жүзеге асырылып келеді. 2026 жылы өңірде Солтүстік Қазақстан облысының тәжірибесі негізінде агроөнеркәсіп кешенін қолдауға республикалық бюджеттен қомақты қаражат бөлінді.Атап айтқанда, республикалық бюджеттен жалпы сомасы 4 млрд теңге қарастырылды. Оның 2,5 млрд теңгесі ірі агроөнеркәсіптік кәсіпорын – «АзияАгроФуд» акционерлік қоғамына жүгеріні терең өңдеу жобасын іске асыру және заманауи жабдықтар сатып алу үшін берілді. Аталған жоба биылғы жылы іске асырылмақ. Бұл жоба өңірде қайта өңдеу саласын дамытуға, қосылған құны жоғары өнім өндіруге және жаңа жұмыс орындарын ашуға мүмкіндік береді.Сонымен қатар, су ресурстарын тиімді пайдалану бағытында ірі ауыл шаруашылығы субъектісі – «Alfalfa» жауапкершілігі шектеулі серіктестігіне 1,5 млрд теңге көлемінде қаржы бөлініп, су үнемдеу технологияларын енгізу жұмыстары қолға алынды. Бұл жоба да 2026 жылы жүзеге асырылады. Аталған шара егіншілік саласындағы өнімділікті арттырып, су тапшылығының алдын алуға бағытталған.Алматы облысының Ауыл шаруашылығы басқармасы басшысының міндетін атқарушы Еркінбек Дауткуловтың айтуынша, ауыл шаруашылығына көрсетіліп отырған қолдау өңірдің аграрлық әлеуетін нығайтуда шешуші рөл атқарады: «Біз ауыл шаруашылығын экономиканың негізгі тіректерінің бірі ретінде қарастырамыз. Сондықтан өндірісті жаңғыртуға, қайта өңдеуді дамытуға және су үнемдеу технологияларын енгізуге басымдық беріліп отыр. Республикалық бюджеттен бөлінген қаржы нақты жобаларға бағытталып, өңірдің агроөнеркәсіп кешенін жаңа деңгейге шығаруға мүмкіндік береді», – деді ол.Мамандардың пікірінше, мұндай кешенді қолдау шаралары Алматы облысында ауыл шаруашылығы өнімдерінің көлемін ұлғайтып қана қоймай, саланың тұрақты дамуына, инвестициялық тартымдылықтың артуына және ауылдық аумақтардың әлеуметтік-экономикалық жағдайын жақсартуға оң әсерін тигізеді.Ақпарат көзі : https://www.gov.kz/memleket/entities/almobl/press/news/details/1138987?lang=kk

Алматы облысына жұмыс сапарымен Қазақстан Республикасы Парламенті Сенаты мен Мәжілісінің депутаттары келді. Халық қалаулылары өңірдегі бірқатар ауыл шаруашылығы нысандарын аралап, агроөнеркәсіп саласын дамытуға бағытталған заңнамалық өзгерістер жөнінде түсіндіру жұмыстарын жүргізді. Сапар барысында балық шаруашылығы, жем өндірісі, алма өсіру және көкөніс сақтау инфрақұрылымын дамыту мәселелеріне ерекше назар аударылды.Депутаттар Еңбекшіқазақ ауданында орналасқан «Айдарбаев» шаруа қожалығының жұмысымен танысты. Аталған қожалық мал және балық азығына арналған түйіршіктелген құрама жем өндірумен айналысады. Былтыр ғана іске қосылған өндіріс орны тәулігіне 3 500 тоннаға дейін өнім шығаруға қауқарлы. Кездесу барысында «Аквамәдениет туралы» заң аясындағы негізгі нормалар талқыланып, отандық балық шаруашылығын қолдауға бағытталған мүмкіндіктер түсіндірілді.ҚР Парламенті Сенатының депутаты Зәкіржан Кузиев бұл бағыттағы жұмыстардың маңыздылығын атап өтті:«Қазіргі таңда Алматы және Түркістан облыстарында балық шаруашылығын дамытуға барлық мүмкіндік бар. Сондықтан біз тек балық фермаларын ғана емес, жем өндірісін де қатар дамытуымыз қажет. Осында көтерілген мәселелер тиісті деңгейде қаралады. Бүгінде балық өсірушілер жемді Еуропадан алдырып отыр. Ал осындай өндірістерді қолдау арқылы салаға тың серпін беруіміз керек», – деді сенатор.Сапар аясында халық қалаулылары «Баймене» серіктестігіне қарасты алма бағын да аралады. Кәсіпорында алманың 8 түрі өсіріледі және жыл сайын нарыққа шамамен 6 мың тонна өнім шығарылады. Кездесу барысында ауыл шаруашылығын дамыту, өнімді сақтау, өткізу және қайта өңдеу мәселелері талқыланды. Кәсіпорын өкілдері саладағы нақты түйткілдерді көтеріп, мемлекеттік қолдау тетіктеріне қатысты сұрақтарын қойды.Серіктестіктің атқарушы директоры Рустам Аметов өндірісті кеңейту жоспарларымен бөлісті:«Бізде 200 гектарға жуық аумақта алма өсіріледі. Сақтау қоймамыз бен шырын шығаратын цехымыз бар. Негізгі бағытымыз – өндірісті ұлғайту. Қазіргі таңда бірнеше жобамыз бар, оны жақын уақытта жергілікті атқарушы биліктің қолдауымен жүзеге асырғымыз келеді», – деді ол.ҚР Парламенті Мәжілісінің депутаты Жанарбек Әшімжан агроөнеркәсіп мәселелерімен қатар әлеуметтік саланың да маңызын атап өтті:«Бұл тек балық немесе алма өндірушілерге ғана қатысты мәселе емес. Жалпы халықтың әлеуметтік саласына байланысты қордаланған түйткілдер аз емес. Сол мәселелерді Үкіметпен бірде келіссөз арқылы, бірде нақты шешімдер қабылдау арқылы жүйелі түрде шешуіміз керек», – деді мәжілісмен.Сонымен қатар депутаттар ауданда былтыр салынған заманауи көкөніс сақтау қоймасының жұмысымен танысты. Аталған қоймада көкөністің кез келген түрін ұзақ мерзімге сақтауға мүмкіндік бар. Халық қалаулылары кәсіпкерлердің ұсыныс-пікірлерін тыңдап, Алматы облысының өндірістік әлеуетін арттыруға бағытталған бастамалар алдағы уақытта да мемлекеттік қолдауға ие болатынын жеткізді.Ақпарат көзі : https://www.gov.kz/memleket/entities/almobl/press/news/details/1137606?lang=kk

2025 жылдың қортындысы бойынша Алматы облысында 27 360 жас азамат жұмысқа орналасты. "Enbek.kz" порталы арқылы 7 мыңға жуық жас тұрақты жұмыс тапты. Ал "Алғашқы жұмыс орны", жастар тәжірибесі, ұрпақтар келісімшарты сынды бағдарламалар аясында 3900 ден астам адам жұмыспен қамтылды. Бұдан бөлек, «Бизнес бастау» жобасымен өз ісін ашуға ниеттенген 91 жанға 1,5 млн теңге көлемінде мемлекеттік грант берілді. Сондай-ақ, «Тәуелсіздік ұрпақтары» гранттары табысталып, «Заңғар сыйлығы» аясында қаржылай қолдау көрсетілді.«Жасыл ел» жобасы аясында ауыл жастары маусымдық жұмыспен қамтылды. Өңір еріктілері республикалық «Игі істер» марафонында «Ең мейірімді аймақ» атағын иеленсе, «Жыл волонтері» халықаралық сыйлығымен 5 ұйым марапатталды. Волонтерлік қызметті дамыту мақсатында жаңа электронды қосымша дайындалды.Одан бөлек, түрлі форумдар өтіп, белсенді жастар өңірдің түкпір -түкпірінде бас қосты.Сонымен қатар Балқаш, Кеген, Райымбек және Қарасай аудандарында жастар орталықтары пайдалануға берілсе, Қонаевта коворкинг орталығы ашылды. Биыл да бұл игі бастама өз жалғасын табады. Ал, Еңбекшіқазақ пен Ұйғыр аудандарында 4 жаңа орталықтың ашылуы жоспарланып отыр._Алматы облыстық жастар саясаты басқармасы басшысының айтуынша, Іле, Талғар және Қарасай аудандарындағы жастар инфрақұрылымы мен жұмыс орындарын дамытуға арнайы жоспар әзірленуде: _*«Біз 3 жылға арналған арнайы жоспар әзірлеп отырмыз. Әр 9 аудан, 2 қаладан, әсіресе Алматыға жақын орналасқан Іле, Талғар, Қарасай аудандарынан миграция мәселелерін шешіп, сол жердегі тұрақты жұмыс орындарын қамтамасыз етуді көздеп отырмыз. Сонымен қатар, ауылдардағы жастарға арналған инфрақұрылымды қалыптастыруға басымдық береміз»,- деді Мәди Ахметов. *Айта кетейік, Алматы облысында 35 жасқа дейінгі жастар саны 432 мыңнан асады. Бұл өңір халқының бүгінгі күні шамамен 30%-ын құрайды. Жүзеге асырылып жатқан бастамалар жастардың әлеуетін арттыруға және әлеуметтік белсенділігін күшейтуге бағытталып отыр.Ақпарат көзі : https://www.gov.kz/memleket/entities/almobl/press/news/details/1137607?lang=kk

Биыл Алматы облысы үшін халықаралық инвестициялық ынтымақтастық негізгі бағыттардың біріне айналды. Өңір шетелдік және отандық серіктестермен жасалған келісімдерді бекітіп, ірі инвестициялық жобаларды іске асыруға және ұзақ мерзімді экономикалық әріптестікті дамытуға жағдай жасап отыр.Жыл қорытындысы бойынша ынтымақтастық пен инвестициялық жобаларды іске асыруға қатысты 40 меморандумға қол қойылды. Бұл құжаттар бойынша жоспарланған инвестициялардың жалпы көлемі 1,2 триллион теңгеден асады. Келісімдер облыс экономикасының маңызды салаларын, оның ішінде өнеркәсіп, логистика, өңдеу және инфрақұрылым бағыттарын қамтиды.Меморандумдардың бір бөлігі халықаралық кездесулер аясында, соның ішінде Алматы облысы әкімінің ресми шетелдік сапарлары кезінде қол қойылды. Бұл шетелдік компаниялармен тікелей байланыс орнатуға және өңірлер арасындағы ынтымақтастықты нақтылауға мүмкіндік берді.Халықаралық ынтымақтастықты дамытуда өңір үшін ең бастысы – нақты нәтиже мен экономикалық тиімділік. Сондықтан негізгі мақсат – жасалған келісімдерді нақты іске асатын инвестициялық жобаларға айналдыру.Қазіргі уақытта қол қойылған әрбір меморандум бойынша нақты жұмыс жүргізілуде. Жобалардың шарттары нақтыланып, іске асырылатын алаңдар қарастырылуда және жүзеге асыру кезеңдері белгіленуде. Бұл тәсіл келісімдерді іс жүзінде орындап, өңір экономикасына нақты пайда әкелуге бағытталған.Ақпарат көзі : https://www.gov.kz/memleket/entities/almobl/press/news/details/1136664?lang=kk

Мемлекет басшысының тапсырмасын орындау шеңберінде Денсаулық сақтау министрлігі базалық мемлекеттік медициналық көмектің бірыңғай пакетін қалыптастыру бойынша жүйелі жұмыс жүргізуде. Бұл тұрғыда әлеуметтік мәні бар аурулар мен динамикалық бақылауға жататын аурулардың тізбелері өзектендірілді.Біріншіден, әлеуметтік мәні бар аурулардың тізбесі инсульттан кейінгі жіті жағдайлармен толықтырылды (1 жыл бойы). Бұл көмектің сабақтастығын және медициналық оңалтудың ерте басталуын қамтамасыз етеді. МӘМС енгізілуімен халық үшін КТ және МРТ сияқты жоғары технологиялық зерттеулердің қолжетімділігі айтарлықтай артқанын атап өтемін.Екіншіден, қаржыландыруды оңтайландыру және қайталануды болдырмау мақсатында 4 ауру – балалардың церебральды сал ауруы, ревматизм, дәнекер тінінің жүйелі зақымдануы және қант диабеті – МӘМС жүйесі арқылы қаржыландыру үшін ДБЖА тізбесіне ауыстырылды.Бұл медициналық көмектің қысқаруына әкелмейтін әкімшілік шара екенін айта кеткен жөн. Іс – шаралардың барлық кешені – диагностика, емдеу, динамикалық бақылау және медициналық оңалту-медициналық көмек көрсетуді ұйымдастырудың қолданыстағы клиникалық хаттамалары мен стандарттарына сәйкес толық көлемде жүзеге асырылатын болады.Үшіншіден, бұл шешімді қабылдау кезінде біз әлеуметтік аспектілерді ескердік. Церебральды сал ауруы және 1 типтік қант диабеті сияқты аурулар балалық шақта пайда болады. Балалар сақтандыру сыйлықақыларын мемлекет төлейтін жеңілдік санатына жатады. Кәмелетке толған және осы пациенттер үшін мүгедектік расталған кезде мемлекет МӘМС жүйесіне жарналарды жүзеге асыруды жалғастырады, бұл медициналық көмектің өмір бойы қолжетімділігінің сақталуына кепілдік береді.Бүгінгі таңда Қазақстанда БЦА бар 27 932 пациент бар, оның 99%-ы МӘМС жүйесінде сақтандырылған.Қант диабетімен есепте тұрғандардың жалпы санының 95%-ды құрайтын 2 типтік ҚД ауруына келетін болсақ, медициналық көмектің көлемі (дәрі – дәрмекпен қамтамасыз ету, динамикалық бақылау, тәулік бойы, күндізгі стационарлар, медициналық оңалту) өзгермейді, бәрі бұрынғысынша қалады, тек қаржыландыру көзі ғана өзгереді (МӘМС). Бұл ретте, диспансерлік пациенттердің 96%-ы МӘМС жүйесінде сақтандырылған.ҚД мыңдаған қазақстандықтардың өмір сүру сапасына әсер ететін аурулардың бірі ретінде мемлекеттің ерекше бақылауында қалады. Бірақ сонымен бірге, бұл ауру басқарылады, мұнда пациенттің рөлі өмір салтын өзгерту, жаман әдеттерді жою бөлігінде өте жоғары. Азаматтардың сақтандыру жауапкершілігі мәселесіне ерекше назар аударғым келеді. Сақтандыру мәртебесі толыққанды медициналық көмек алудың негізгі шарты болып қала береді.Мысалы, сақтандыру жарналарының орташа мөлшері айына 51 мың теңгеге жуық болғанда МӘМС жүйесі консультациялық-диагностикалық қызметтер мен дәрілік препараттарға қолжетімділікті қамтамасыз етеді, олардың құны 2 типтік қант диабетін емдеу жағдайында 600 мыңнан 6,5 миллион теңгеге дейін жетуі мүмкін. Бұл сақтандыру моделінің тиімділігін және МӘМС жүйесіне қатысудың маңыздылығын көрнекі растау. Осылайша, БЦА және басқа да созылмалы аурулары бар пациенттерге медициналық көмек көрсетудің барлық кепілдіктері МӘМС жүйесінде сақтандыру мәртебесі сақталған жағдайда толық көлемде сақталады.Медициналық көмектің көлемі жөніндегі мәселеге қатысты мынаны хабарлаймын: пациенттерге медициналық көмек көрсетудің көлемі мен шарттары өзгеріссіз қалады. Амбулаториялық бақылау, дәрі-дәрмекпен қамтамасыз ету, медициналық оңалту, стационарлық көмек (күндізгі және тәулік бойғы стационарлар) қоса алғанда, медициналық көмектің барлық кешені толық көлемде сақталды.Денсаулық сақтау министрлігі мынаны ерекше атап көрсетеді: МӘМС пакетіне ауыстырылған аурулары бар пациенттер үшін медициналық көмек, сондай-ақ қаржыландыру көлемі қысқармайды.Бұл ретте сақтандыру мәртебесінің маңыздылығына ерекше назар аударғым келеді. Жұмыссыздарды қоса алғанда, экономиканың ресми секторында жұмыс істемейтін азаматтар үшін мемлекеттік қолдау тетігі көзделген. Мұндай жағдайда жұмыссыз ретінде тіркеліп, тиісті жеңілдікті мәртебе алу қажет.Осыдан кейін МӘМС жүйесіне сақтандыру жарналары жергілікті атқарушы органдардың қаражаты есебінен жүзеге асырылатын болады, бұл 1 млн. астам азаматты міндетті сақтандыру жүйесі шеңберінде медициналық көмектің барлық түрлеріне толық қол жеткізуге кепілдік береді.Осылайша, медициналық көмектің бірыңғай пакетіне ауыса отырып, консультациялық-диагностикалық қызметтердің барлық түрлеріне қолжетімділік, негізгі ауруды да, қосалқы патологияларды да емдеуді қоса алғанда, тәулік бойы және күндізгі стационарда емдеуді қамту, оңалту қызметтерін көрсетуді кеңейту ұлғаяды.Ақпарат көзі : https://www.gov.kz/memleket/entities/almobl/press/news/details/1136662?lang=kk