Ағымдағы жылдың 1 тоқсанында Қостанай облысының әкімдігі Қостанай облысының әкімдігінің жанындағы құқық бұзушылықтардың алдын алу жөніндегі ведомствоаралық комиссияның отырысын өткізді, онда жол қауіпсіздігін қамтамасыз ету жөніндегі өзекті мәселелердің бірі қаралды.             Жол-көлік оқиғаларын азайту, жол инфрақұрылымын жақсарту бойынша қабылданып жатқан шаралар мен, өңірде 2024 жылдың қорытындысы бойынша айтарлықтай қаражат бөлінуіне қарамастан жол-көлік құқық бұзушылықтарының өсуі байқалады.Өңір басшысы бірқатар өңірлердің әкімдерін, мүдделі органдарды тыңдап, жол қауіпсіздігін қамтамасыз ету шараларын күшейтуді тапсырды.Сондай-ақ, қалалар мен аудандар әкімдерінің назарын көлік инфрақұрылымын құруға аударды.Қостанай облысы бойынша Құқықтық статистика және арнайы есепке алу комитетінің департаментіне облыстан Полиция департаментімен, Қостанай қаласының әкімдігімен бірлесіп, Облыс орталығының жол инфрақұрылымын жаңғыртудың 2025-2030 жылдарға арналған жол картасын әзірлеу тапсырылды.Ақпарат көзі : https://www.gov.kz/memleket/entities/kostanay/press/news/details/988152?lang=kk

Қасым-Жомарт Тоқаевқа өңірдің негізгі әлеуметтік-экономикалық көрсеткіштері, сондай-ақ Алматы агломерациясын дамыту жоспары жөнінде баяндалды.Марат Сұлтанғазиев соңғы 3 жылда облыстың жалпы өңірлік өнімі 1,8 есе артып, 3,4 триллион теңгеден 6 триллион теңгеге өскенін айтты. Биылғы қаңтар – қазан айлары аралығындағы қысқа мерзімді экономикалық индикатор 109,7 пайызды құрады. Халықаралық компаниялардың қатысуымен тағам өнеркәсібі, логистика және металлургия салаларында жалпы сомасы 470 миллиард теңгеден асатын 13 инвестициялық жоба іске асырылуда.Президентке биылғы тоғыз айда өңдеу өнеркәсібінің экспорты 28,5 пайыз ұлғайып, 618,5 миллион долларға жеткені жөнінде мәлімет берілді. Бұл ретте экспорттың 90 пайызы жоғары деңгейде қайта өңделген өнімге тиесілі.Мемлекет басшысына Алматы облысы ауыл шаруашылығына арналған мемлекеттік субсидияларды тиімді пайдаланатын жетекші өңірлердің бірі екені айтылды: яғни бір теңге субсидияға 17 теңгеге дейін ауыл шаруашылығы өнімі өндіріледі. Тауарлы сүт фермаларының саны 11-ге дейін көбейді.Қасым-Жомарт Тоқаевқа облыстың әлеуметтік дамуы туралы ақпарат ұсынылды. Биылғы он айда 950 мың шаршы метрге жуық тұрғын үй салынған. Үш ауысымды мектептер саны 52-ден 28-ге дейін қысқарды.Сонымен қатар Президентке Қапшағай су қоймасы мен ұлттық табиғи парктер айналасындағы туризм кластерінің даму барысы таныстырылды. Облысқа келген туристер саны 2,2 миллион адамға жеткен. Бұл былтырғы осындай кезеңмен салыстырғанда 36 пайызға артық.Кездесу соңында Мемлекет басшысы облыс әкіміне өңірдің өнеркәсіп және аграрлық әлеуетін нығайту, логистика, туризм салаларын дамыту, сондай-ақ тұрғындарды толғандыратын өзекті мәселелерді кешенді түрде шешу жөнінде бірқатар нақты тапсырма берді. www.akorda.kzАқпарат көзі : https://www.gov.kz/memleket/entities/almobl/press/news/details/1116701?lang=kk

Астана, 2025 жылғы 28 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Моңғолия Премьер-министрі орынбасарының инвестициялар жөніндегі штаттан тыс кеңесшісі Сайран Қадырұлымен кездесу өткізді.Кездесу барысында тараптар сауда-экономикалық, инвестициялық және мәдени-гуманитарлық салалардағы екіжақты ынтымақтастықты нығайту мәселелерін талқылады.М.Нұртілеу Моңғолияның Азиядағы Қазақстанның маңызды серіктестерінің бірі екенін және екі ел арасындағы достық рухында дамып келе жатқан тығыз қатынастардың орнағанын атап өтті.Ауыл шаруашылығы, логистика, энергетика және білім беру сияқты салалардағы бірлескен жобаларды іске асыру мәселелеріне ерекше назар аударылды.Кездесу қорытындысы бойынша сұхбаттастар екіжақты ынтымақтастықты одан әрі дамыту бойынша өзара күш-жігерді жалғастыруға дайындықтарын растады.Ақпарат көзі : https://www.gov.kz/memleket/entities/mfa/press/news/details/985208?lang=kk

Алматы облысы әкімінің орынбасары Болат Күренбековтың төрағалығымен «Ұлы дала жорығы» халықаралық марафон-бәйгесін ұйымдастыруға байланысты көшпелі жиын өтті. Жиынға аудан әкімдерінің орынбасарлары, облыстық басқарма басшылары мен тиісті департамент өкілдері қатысты.Қатысушылар жарыстың жоспарланған маршрутымен жүріп өтіп, дайындық барысын пысықтады. Жиын қорытындысы бойынша жұмыс жоспарына сәйкес нақты тапсырмалар жүктелді.Айта кетейік, “Ұлы дала жорығы” жобасы 2022 жылдан бастап жүзеге асырылуда. Алғашқы жорық сол жылы елордамыз Астанадан бастау алып, Түркістан қаласына 1200 шақырымды құрайтын маршрутпен жүріп өтті. Жобаның авторы - Бақытжан Тұрлыбеков. Алматы облысында “Ұлы дала жорығы” 2025 жылғы 9 - 14 мамыр күндері өтеді. Бұл марафон-бәйге халықаралық деңгейде ұйымдастырылып, бірқатар елдің шабандоздарының басын біріктіреді. «Ұлы дала жорығы» халықаралық марафон-бәйгесі 500 шақырым қашықтықта Алматы облысында өткізілуі жоспарланып отыр. Марафон-бәйгеге қатысуға 15-ке жуық мемлекет қатысады деп күтілуде, олар Ресей, Қырғызстан, Түркия, Иран, Мажарстан және т.б.Бұл шара ұлттық спортты дамытуға және халықаралық деңгейде танытуға бағытталған маңызды қадам болмақ. Ақпарат көзі : https://www.gov.kz/memleket/entities/almobl/press/news/details/985238?lang=kk

Алматы облысында әлемдік қант өнеркәсібінің көшбасшыларының бірі – Al Khaleej Sugar компаниясының зауыты салынуы мүмкін. Жобаны жүзеге асыру мәселелері облыс әкімі Марат Сұлтанғазиев пен компанияның басқарушы директоры, шейх Джамаль Аль Гурайр арасындағы кездесуде талқыланды.“Алматы облысы аграрлық әлеуеті жоғары өңір. Дамуды жалғастыру үшін бізге заманауи технологиялар мен сенімді серіктестер қажет. Бүгінгі кездесу – өңір экономикасы үшін маңызды қадам”, – деді Марат Сұлтанғазиев.Кездесу барысында зауыттың орнын таңдау, қант қызылшасы үшін егістік алқаптарды ұйымдастыру және оларды сумен қамтамасыз ету мәселелері қарастырылды. Қонаев қаласына жақын орналасқан аумақ логистикалық тұрғыдан тиімді деп танылды. Алайда су мәселесі шешілмеген күйінде қалып отыр – егістіктерді суару үшін баламалы су көздері іздестірілуде.“Біз үшін егістік алқаптарды сенімді әрі жеткілікті су көздерімен қамтамасыз ету өте маңызды. Жобаны тиімді жүзеге асыру үшін гидрология саласындағы үздік мамандарды тартамыз”, – деді шейх Джамаль Аль Гурайр.Инвесторлар зауытты толықтай автономды ету мақсатында жел электр станцияларын салу мүмкіндігін де қарастыруда.“Біздің мақсатымыз – толықтай дербес кәсіпорын құру. Қайта жаңартылатын энергия көздерін пайдалану қоршаған ортаға әсерді азайтып, зауыттың ұзақ мерзімді тұрақты дамуын қамтамасыз етеді”, – деп қосты шейх Аль Гурайр.Al Khaleej Sugar – әлемдегі ең ірі автономды және энергия үнемдейтін қант зауыты. Компания әлемдік тазартылған қант нарығының шамамен 3 пайызын қамтиды. Шейх Аль Гурайр қант өнеркәсібінен бөлек, фарфор, құрылыс материалдары, жылжымайтын мүлік және көлік салаларында да табысты жобаларды жүзеге асырып келеді.Кездесу қорытындысында тараптар өңірдің гидрологиялық ресурстарын жан-жақты зерттеу үшін кәсіби консультанттар мен мамандандырылған ұйымдарды тартуға уағдаласты. Бұл шешім суару мәселесін тиімді шешіп, инвестициялық жобаны сәтті іске асыруға мүмкіндік береді.Ақпарат көзі : https://www.gov.kz/memleket/entities/almobl/press/news/details/984528?lang=kk

Алматы облысында «Таза Қазақстан» акциясы аясында көгалдандыру бойынша ауқымды жоспар жүзеге асырылуда.2025 жылға бекітілген өңірлік жоспарға сәйкес, облыс қалалары мен аудандарында 110 мыңнан астам ағаш отырғызу жоспарланған. Облыс әкімдігінің мәліметінше, көктемгі кезеңде ғана 65 мыңнан астам көшет отырғызылды.Ағаш отырғызу жұмыстары барлық аймақтарды қамтиды: ең көп ағаш Еңбекшіқазақ ауданында, Қонаев қаласында және Талғар ауданында отырғызылуда. Сонымен қатар, Балқаш, Жамбыл, Іле, Қарасай, Кеген, Райымбек, Ұйғыр аудандарында және Алатау қаласында да белсенді жұмыстар жүргізілуде.Айта кету керек, көшеттердің басым бөлігін әлеуметтік жауапкершілігі жоғары азаматтар, кәсіпкерлер, кәсіпорындар мен ұйымдар өз қаражаттары есебінен қамтамасыз етті. Бұл қоғамның экологиялық мәселелерді шешуге және туған жердің болашағына деген қамқорлығына нақты үлес қосып отырғанының жарқын көрінісі.«Жасыл аймақтар құру — тек қана абаттандыру емес, бұл — тұрғындардың денсаулығы мен жайлы өміріне салынған инвестиция. Мұндай бастамалар экологиялық мәдениетті қалыптастырып, тұрақты өмір салтын насихаттауға ықпал етеді», — деп атап өтті облыстық тұрғын үй-коммуналдық шаруашылығы және абаттандыру басқармасында.Күзгі отырғызу науқаны көктемде басталған жұмыстарды жалғастырады. Жыл соңына дейін отырғызылған ағаштар саны 110 670-ке жеткізіледі деп жоспарлануда. Акцияға мемлекеттік органдар, волонтерлер, оқушылар, кәсіпкерлік қауымдастығы, аудан мен қала тұрғындары, аға буын өкілдері, қоғамдық ұйымдар, Қазақстан халқы Ассамблеясының мүшелері мен жастар белсене қатысуда.Өңір басшысы Марат Сұлтанғазиев экологиялық бастамалардың күнделікті өмірдің бір бөлігіне айналуы қажет екенін бірнеше рет атап өткен болатын.Ақпарат көзі : https://www.gov.kz/memleket/entities/almobl/press/news/details/984451?lang=kk

Қазыбек бек ауылында газ құбырын іске қосу өңірді толық газдандыру жолындағы маңызды кезең болды.Алматы облысында газдандырудың ауқымды бағдарламасы жалғасып жатыр. Соңғы маңызды оқиғалардың бірі – Жамбыл ауданы Қазыбек бек ауылында газ тарату желілерінің іске қосылуы. Бұл жай ғана инфрақұрылымдық жоба емес, бұл мыңдаған адамдардың өмір сүру сапасын жақсарту.Құрылыстың ашылуына облыс әкімінің орынбасары Әсет Масабаев келді. Оның айтуынша, тұрақты газбен жабдықтау - бұл тек жайлылық қана емес, ауыл экономикасының жарқын болашағы.- «Газдың пайда болуы шағын бизнесті дамытуға, өндіріс ашуға, инвестиция тартуға мүмкіндік туғызады. Бұл тұрақты өсу мен жұмыспен қамтуға бағытталған қадам. Газ Қазыбек бек ауылынан бөлек, тағы да бес ауылды қамтиды», - деп атап өтті Масабаев.Газ құбырларын жүргізу жұмыстары 2023 жылдың желтоқсанында басталып, 2024 жылдың соңында аяқталды. Негізінен кесте бойынша құрылысқа 26 ай берілген болатын. Жұмыс жоспарланған уақыттан да ерте аяқталды. Жобаның жалпы құны – 4,2 млрд теңгені құрады.Жергілікті тұрғындар жобаның жүзеге асатынына ұзақ уақыт сенбегендерін жасырмады. Себебі, ауылда бұл құбырлар 2011 жылдан бері жатқан екен, ал оны іске қосу үнемі кейінге қалдырылып келіпті.— «Енді біздің үйіміз жылы әрі таза болады. Енді көмір жағып, отын жарып, пеш тазалап жүрмейміз. Бұрынғыдан қарағанда қолайлы жағдай жасалды», — деп қуанышымен бөлісті көпбалалы ана Алия Турсынова.Қазыбек бектің тарихы – өңірді газдандырудың ауқымды бағдарламасындағы бір ғана эпизод. Қазіргі уақытта, өңірлік сызба аясында 157 елді мекен көгілдір отынға қосылып, 1,2 млн адамды қамтыды. Бұл облыстың жалпы халқының 77%-ын құрайды.2024 жылы 17 ауыл газбен қамтылды. Ал 2025 жылдың соңына дейін газдандыру деңгейін 59,5%-ға (169 елді мекен) дейін жеткізу жоспарланып отыр. 2025 жылы жаңа жобаларды іске асыруға 6,7 млрд теңгеден астам қаражат қарастырылды. Тағы 1,4 млрд теңгесі жобалық-сметалық құжаттаманы дайындауға бағытталды.Жұмыстар Қонаев, Балқаш, Жамбыл және Іле аудандарында жүргізіліп жатыр. Билік жобаның нақты қажеттіліктер мен тұрақты даму қағидаттарын ескере отырып, кезең-кезеңімен жүзеге асырылатынын атап айтты.Өңірді газдандыру 2030 жылға дейін толық аяқталады деп жоспарланып отыр. Бұл тұрмыстық жағдайларды жақсартуға ғана емес, сонымен қатар экологияға жүктемені азайтуға, экономикалық өсуге және ауылдық жерлерге инвестициялар тартуға жағдай жасауға мүмкіндік береді.Қолжетімді көгілдір отын – болашаққа сенімді қадам.Ақпарат көзі : https://www.gov.kz/memleket/entities/almobl/press/news/details/984349?lang=kk

Алматы, 2025 жылғы 25 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу және ҚКП ОК Саяси бюросының мүшесі, Қытай Халық Республикасының Сыртқы істер министрі Ван И Қазақстан мен Қытай арасындағы Стратегиялық диалогтың екінші отырысына қатысты. Қытай СІМ басшысы 26 сәуірде өтетін «Орталық Азия – Қытай» форматындағы сыртқы істер министрлерінің кездесуіне қатысу үшін Алматыға жұмыс сапарымен келді.Стратегиялық диалог отырысы барысында тараптар саяси, сауда-экономикалық және мәдени-гуманитарлық ынтымақтастықтың кең ауқымды мәселелерін талқылады. Министрлер биік және жоғары деңгейлерде қол жеткізілген уағдаластықтардың іске асырылу барысын қарастырды, сондай-ақ екіжақты өзара іс-қимылдың барлық спектрі бойынша қазақ-қытай қатынастары дамуының оң серпінін атап өтті.Сауда-экономикалық байланыстарды арттыру бойынша бірлескен күш-жігерге ерекше назар аударылды. Қазақстанның Қытайға шикізаттық емес экспортын ұлғайтуды қоса алғанда, индустриялық-инвестициялық, энергетикалық, транзит-көліктік және инновациялық ынтымақтастықты бірлесіп дамытуда жаңа тәсілдерді әзірлеу қажеттілігі баса айтылды.«Әрқашан дами беретін байланысымыз геосаяси сын-қатерлер мен конъюнктуралық үрдістерге ұшырамайды. Қытай біз үшін мейірімді көрші және сенімді дос қана емес, сонымен қатар жан-жақты байланысы бар жақын ел», – деп мәлімдеді М.Нұртілеу.Былтыр екіжақты тауар айналымы рекордтық көрсеткіш – 43,8 млрд АҚШ долларын құрады. Екі мемлекет те жақын арада өзара сауда көлемін екі есеге арттыруға ұмтылуда. Қазақ-қытай инвестициялық пулы шамамен 66,4 млрд АҚШ доллары сомасына 224 жобаны қамтиды.«Біз Қазақстанды Қытайдың көршілес мемлекеттермен қарым-қатынасында басты серіктес ретінде қарастырамыз. Қытай Қазақстанның аумақтық тұтастығын, егемендігін және қауіпсіздігін қорғауда, сондай-ақ ұлттық ерекшеліктеріне сәйкес елдің дамуына бағытталған күш-жігерін нық қолдайды», – деп мәлімдеді Ван И.Сыртқы саяси ведомстволарының басшылары биыл жоспарланған екіжақты сапарлар мен іс-шаралар кестесін талқылады, сондай-ақ халықаралық күн тәртібіндегі өзекті мәселелер бойынша «сағаттарды теңестірді».Кездесу қорытындысы бойынша ҚР-ҚХР сыртқы істер министрліктері арасында 2026-2028 жылдарға арналған ынтымақтастық туралы меморандумға қол қойылды және Гуанчжоу қаласында Қазақстан Республикасының Бас консулдығын құру туралы ноталармен алмасу рәсімі өтті.Ақпарат көзі : https://www.gov.kz/memleket/entities/mfa/press/news/details/984217?lang=kk

Қазақстан халқы Ассамблеясының XXXIV сессиясына Қостанай облысынан келген делегация қатысуда. Бұл сессия Ассамблеяның құрылғанына 30 жыл толуына арналған және Астана қаласында өтуде.Қостанай облысының делегациясын облыс әкімінің орынбасары Арман Әбенов бастап барды. Сессия жұмысына этномәдени бірлестіктердің төрағалары, облыстық мәслихат депутаттары, қоғам қайраткерлері мен жастар өкілдері қатысуда. Бұл – қоғамның барлық қабатын қамтитын, этносаралық келісімді нығайтуға бағытталған ортақ ұмтылыстың айғағы.Қазақстан халқы Ассамблеясы үш онжылдық бойы еліміздегі қоғамдық келісім мен тұрақтылықты қамтамасыз етуде маңызды рөл атқарып келеді. Бұл сессия – тәжірибе алмасу, жаңа бастамаларды талқылау және болашаққа арналған стратегияларды қалыптастыру алаңы.Ақпарат көзі : https://www.gov.kz/memleket/entities/kostanay/press/news/details/983765?lang=kk

Астана, 2025 жылғы 25 сәуір – Қазақстан Республикасының Сыртқы істер министрлігінде Орталық Азия елдері үшін үйлестіру функциялары бар Қазақстандағы Көші-қон жөніндегі халықаралық ұйым миссиясының қатысуымен ұйымдастырылған «Адам саудасына қарсы іс-қимылдың өзекті мәселелері» тақырыбында Қазақстанда аккредиттелген дипломатиялық корпус өкілдеріне арналған брифинг өтті.Брифингке ҚР Парламенті Мәжілісінің депутаттары, Бас прокуратураның, Ішкі істер министрлігінің, Еңбек және халықты әлеуметтік қорғау министрлігінің, сондай-ақ адам саудасына қарсы күрес саласында жұмыс істейтін үкіметтік емес ұйымдардың өкілдері қатысты.Шетелдік дипломаттар Қазақстанда адам саудасына қарсы күресті күшейту, оның ішінде қылмыстар үшін жазаны қатаңдату және алдын алу механизмдерін дамыту бойынша қабылданып жатқан шаралармен таныстырылды. Сонымен қатар қатысушыларға «Адам саудасына қарсы іс-қимыл туралы» ҚР Заңының орындалуы туралы ақпарат берілді. Ақпарат көзі : https://www.gov.kz/memleket/entities/mfa/press/news/details/983770?lang=kk

Мессенджерлерде Қостанай облысының әкімі бейнеленген жалған видео таратылуда. Онда облыс әкіміне қауіп төніп тұрғаны жөнінде айтылған-мыс. Аталған видео жасанды интеллект көмегімен жасалған.Бұл жалған ақпаратты тарату фактісі бойынша Қостанай облысы әкімдігі құқық қорғау органдарына ресми түрде өтініш жолдады.Зиянкестер анықталып, қолданыстағы заңнамаға сәйкес жауапкершілікке тартылады.Азаматтарды жалған ақпарат таратқаны үшін заң алдында жауап беретінін ескертеміз және ақпаратты тек ресми дереккөздерден тексеруге шақырамыз.Қостанай облысы әкімінің баспасөз қызметіАқпарат көзі : https://www.gov.kz/memleket/entities/kostanay/press/news/details/983939?lang=kk

Қарасай ауданына қарасты Шамалған ауылында орналасқан Úshqońyr спорт кешенінде «Алатау лига-2025» жобасының салтанатты ашылу рәсімі өтті. Шараға Қонаев, Алатау қалаларынан және облыстың тоғыз ауданынан келген 11 команда өкілдері қатысты.Жобаның ұйымдастырушылары – облыстық дене шынықтыру және спорт басқармасы мен Алматы облыстық дене шынықтыру және спортты дамыту орталығы. Облыс әкімінің орынбасары Болат Күренбеков өз сөзінде «Алатау лигасы» екінші жыл қатарынан өткізіліп жатқанын және осы уақыт аралығында айтарлықтай нәтижелерге қол жеткізілгенін атап өтті: 140-тан астам клуб ашылып, 13,5 мыңнан астам тұрғын тұрақты түрде спортпен шұғылдануға мүмкіндік алды. Халықтың дене шынықтырумен айналысу деңгейі 39%-дан 41,4%-ға дейін өскен.Салтанатты шараны жас спортшылар – каратэ мен футбол секциясының тәрбиеленушілері көрсетілім өнерлерімен әрледі. Облыстық дене шынықтыру және спорт басқармасының міндетін атқарушы Рахман Шахарбек жаңа бастама 10 мыңнан астам адамды қамтығанын, олардың басым бөлігі ауылдық жерлерде тұратынын айтты.Жобаның басты құндылығы – ірі ареналар мен заманауи спорт кешендерінен шалғайда орналасқан жастарға өз қабілеттерін көрсетуге мүмкіндік беру. Сонымен қатар, бұл жоба «жаппайлықтан – шеберлікке» қағидаты негізінде құрылып отыр. Себебі «Алатау лига» жобасының аудандық және облыстық деңгейдегі жарыстарына негізінен 16-23 жас аралығындағы спортшылар қатысуда. Бұл – болашақта кәсіби футбол, баскетбол, волейбол және үстел теннисі клубтарына қосыла алатын жастар.«Жалпы, облысымызда спортқа қолжетімділікті қамтамасыз ету бойынша үлкен жұмыс жүргізілуде, – деді ол. – Мысалы, өткен жылы Еңбекшіқазақ және Райымбек аудандарында жаңа спорт кешендері ашылды. Бүгінгі таңда облыс аумағында 1880-нен астам спорт нысаны жұмыс істейді».Айта кету керек, жоба аясында әрбір ауылдық округте футбол, волейбол және баскетбол бойынша әуесқой клубтар құрылды. Барлығы – 140-тан астам клуб. Биыл жарыс бағдарламасына үстел теннисі де енгізілді.«Алатау лига-2025» спорттық жобасының алғашқы кезеңі 15 сәуірде облыстың барлық аудандарындағы ауылдық округтерде басталды. Бұл кезең 15 мамырға дейін жалғасады. Жеңімпаздар мен жүлдегерлер 20 тамыз бен 20 қыркүйек аралығында өтетін екінші кезеңге жолдама алады. Ал үшінші, финалдық кезең 10-25 қазан аралығында өтеді. Төрт спорт түрі бойынша үздік шыққан командалар кубоктармен, медальдармен, құрмет грамоталарымен және қомақты ақшалай сыйлықтармен марапатталады. Жалпы жүлде қоры – 16 миллион теңге.Ақпарат көзі : https://www.gov.kz/memleket/entities/almobl/press/news/details/983131?lang=kk

Қостанай облысының әкімі Құмар Ақсақаловтың бастамасымен және «Қазақстан халқына» қоғамдық қорының қолдауымен қалалық онкологиялық диспансерге заманауи жабдық – сызықтық үдеткіш пен компьютерлік томограф (КТ) орнатылады.Бұл шешім өңір тұрғындарына онкологиялық көмектің сапасын арттыруға және жоғары технологиялы емге қолжетімділікті кеңейтуге бағытталған.Бұл науқастарға не береді?Сызықтық үдеткіш – бұл сәулелік терапияда қолданылатын алдыңғы қатарлы жабдық. Ол:•ісікке дәл бағытталған әсер етуге, сау тіндерді зақымдамауға,•емдеу параметрлерін әр науқасқа бейімдеуге,•жанама әсерлерді азайтып, қалпына келу үдерісін жеделдетуге мүмкіндік береді.Сонымен қатар, дәл осы құрылғымен бірге заманауи КТ-аппарат орнатылады. Ол ісік үдерісінің орналасуын барынша дәл анықтауға мүмкіндік береді. Бұл сәулелік терапия жоспарын құруда өте маңызды.Бұл неге маңызды?Қазіргі таңда емдеу 1993 және 2006 жылдары орнатылған ескі аппараттарда жүргізілуде. Олардың техникалық ресурсы әбден таусылған, ал дәлдік пен қауіпсіздік деңгейі қазіргі заманғы стандарттарға сәйкес келмейді.Сонымен қатар, Қостанай облысының шамамен 20% пациенті осындай емді Астана қаласындағы республикалық клиникаларда немесе шетелде алуға мәжбүр. Бұл өз кезегінде науқастар мен олардың отбасыларына қосымша қаржылық және логистикалық салмақ түсіреді.Енді облыс тұрғындары заманауи емді өз өңірінде ала алады. Бұл:•терапияға кезек пен күту мерзімін едәуір қысқартуға,•басқа өңірлерге көшу және тұру шығындарын азайтуға,•сәулелік терапияны уақтылы бастауды қамтамасыз етуге мүмкіндік береді.Қаржыландыру және мерзімдерЖабдықты сатып алу мен орнату жобасының құны 2,5 миллиард теңгеден асады. Қаржыландыру «Қазақстан халқына» қоры мен жергілікті атқарушы органдардың бірлескен күшімен қамтамасыз етіледі.Жабдықты орнату және медицина қызметкерлерін оқыту жұмыстары алдағы уақытта жүзеге асырылады. Барлық шаралар денсаулық сақтау жүйесін жаңғырту жөніндегі мемлекеттік бағдарлама аясында іске асырылады.Қостанай облысының әкімі Құмар Ақсақаловтың пікірі:«Онкология – әр минуты маңызды сала. Біз тек жабдықты жаңартып жатқан жоқпыз – біз адамдарға үміт пен мүмкіндік береміз. ‘Қазақстан халқына’ қорымен бірлесіп, сапалы медицинаны халыққа жақын әріАқпарат көзі : https://www.gov.kz/memleket/entities/kostanay/press/news/details/983277?lang=kk

Астана, 2025 жылғы 24 сәуір – Бүгін Астанада Экономикалық, ауыл шаруашылығы, экологиялық, техникалық, өнеркәсіптік және технологиялық ынтымақтастық жөніндегі Қазақстан-Аустрия үкіметаралық комиссиясының (ҮАК) кезекті 12-ші отырысы өтті.Іс-шара Қазақстан Республикасы Сыртқы істер министрінің орынбасары Роман Василенко мен Аустрия Республикасы Экономика, энергетика және туризм федералдық министрлігінің Экономика, инновациялар және халықаралық ынтымақтастық жөніндегі бас директоры Флориан Фраушердің тең төрағалығымен өтті. Отырысқа екі елдің салалық министрліктері мен ведомстволарының өкілдері де қатысты.ҮАК күн тәртібіне сәйкес тараптар Қазақстан мен Аустриядағы қазіргі экономикалық жағдайды, екі үкіметтің экономикаларды дамыту бойынша қабылдап жатқан шараларын, сондай-ақ екіжақты және көпжақты ынтымақтастықтың өзекті мәселелерін талқылады.ҚР Сыртқы істер министрінің орынбасары Аустрия делегациясын жүргізіліп жатқан реформалар, Еуропалық одақпен ынтымақтастықты кеңейту, экономиканы әртараптандыруға бағытталған нақты қадамдар, сондай-ақ Қазақстанда шетелдік инвестициялар тарту мен бизнес жүргізу үшін қолайлы жағдайлар жасау жөніндегі шаралар туралы хабардар етті.Р.Василенко атап өткендей, 2009 жылы Венада өткен алғашқы отырыстан бері бірлескен комиссия Қазақстан мен Аустрия арасындағы сауда-инвестициялық ынтымақтастықты нығайтуға маңызды үлес қосып келеді. Ол екіжақты серіктестіктің жоғары деңгейі мен «Andritz Hydro», «PlanRadar» және басқа да ірі аустриялық компаниялардың қазақстандық нарықтағы табысты тәжірибесін атап өтіп, екі ел арасындағы іскерлік белсенділікті одан әрі арттыруға шақырды.Өз кезегінде Аустрияның Экономика, энергетика және туризм федералдық министрлігінің бас директоры Ф.Фраушер Қазақстанның Орталық Азиядағы Аустрияның жетекші серіктесі екенін атап өтіп, Қазақстанмен ынтымақтастықтың барлық басым бағыттары бойынша серіктестікті нығайтуға мүдделілігін білдірді.ҮАК отырысы аясында Қазақстан мен Аустрия делегациялары энергетика, оның ішінде жаңартылатын энергия көздері, тау-кен өнеркәсібі, көлік, ауыл шаруашылығы, денсаулық сақтау, туризм және цифрландыру салаларындағы ынтымақтастықтың перспективаларын талқылады.Тараптар өзара тиімді болуы мүмкін жобалар жөніндегі өзекті ақпарат алмасуды жалғастыру, өңіраралық және іскерлік байланыстарды нығайтуға жәрдемдесу, сондай-ақ екі ел кәсіпкерлерінің сапарларын ұйымдастыру арқылы екіжақты сауда-экономикалық көрсеткіштерді арттыруды жалғастыру туралы уағдаласты.Сондай-ақ Шығыс Қазақстан облысы мен Штирия, Түркістан облысы мен Каринтия, Павлодар облысы мен Жоғарғы Австрия арасындағы ынтымақтастық туралы меморандумдар аясында өңіраралық әріптестікті дамыту мүмкіндіктері аталып өтті.Сол күні Астанада Қазақстан-Аустрия Іскерлік кеңесінің 10-шы отырысы өтті. Онда Қазақстан Республикасының инвестициялық әлеуеті таныстырылып, машина жасау, ауыл шаруашылығы және өзге де салалардағы ынтымақтастық мәселелері қаралды.Қазақстандық статистикаға сәйкес 2024 жылдың қорытындысы бойынша Қазақстан мен Аустрия арасындағы тауар айналымы 280,8 млн АҚШ долларын құрады (экспорт – 4,1 млн доллар, импорт – 276,7 млн доллар). 2024 жылы Аустриядан Қазақстанға тікелей шетелдік инвестициялардың жалпы ағыны 20,7 млн долларды құрады, ал 2005 жылдан бері бұл көрсеткіш 3 млрд доллардан асты. Қазақстанда аустриялық капиталдың қатысуымен шамамен 180 кәсіпорын тіркелген.Ақпарат көзі : https://www.gov.kz/memleket/entities/mfa/press/news/details/983290?lang=kk

Астана, 2025 жылғы 23 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Пәкістан Ислам Республикасының Қарулы күштері Құрлық әскерлерінің бас қолбасшысы Сайед Асим Мунирмен кездесу өткізді.Тараптар Қазақстан мен Пәкістан арасындағы серіктестіктің жай-күйі мен даму перспективаларын талқылап, екі ел арасындағы сауда-инвестициялық және көлік-логистикалық ынтымақтастық мәселелеріне ерекше назар аударды.Атап айтқанда, екіжақты іскерлік байланыстардың әлеуетін ашуға ықпал ететін транзит-көліктік өзара іс-қимылын кеңейту мүмкіндіктері және осы бағыттағы нақты жобалар қарастырылды.М.Нұртілеу ауыл шаруашылығы, логистика, денсаулық сақтау, фармацевтика және ақпараттық технологиялар салаларындағы бірлескен жобаларды іске асырудың маңыздылығын атап өтті.Ақпарат көзі : https://www.gov.kz/memleket/entities/mfa/press/news/details/982440?lang=kk

Астана, 2025 жылғы 23 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Хорватия Республикасының Сыртқы және еуропалық істер министрі Гордан Грлич-Радманмен Қазақстанға жасаған ресми сапары аясында кездесу өткізді.Келіссөздердің басты тақырыптары саяси, сауда-экономикалық және мәдени-гуманитарлық салалардағы өзара іс-қимыл мәселелері болды. Ерекше назар Хорватия Премьер-министрі Андрей Пленковичтің Қазақстанға алдағы сапарына және оның Астана халықаралық форумына қатысуына аударылды. Сонымен қатар тараптар 2024 жылғы қарашада М.Нұртілеудің Загребке жасаған сапары барысында қол жеткізген уағдаластықтарды іске асырудың практикалық қырларын егжей-тегжейлі талқылады.«Хорватия – Қазақстанның Балқан аймағындағы және Еуропалық одақтағы негізгі серіктестерінің бірі. Экономикалық ынтымақтастық – қарым-қатынасымыздың басымдығы әрі оны ілгерілететін маңызды қозғаушы күш», – деп атап өтті Қазақстан СІМ басшысы.Өткен жылы өзара сауда көлемі 282 млн АҚШ долларын құрап, Хорватияны Еуроодақ елдері арасында Қазақстанның ірі 15 сауда серіктесінің қатарына енді.Өз кезегінде Г.Грлич-Радман Хорватия Үкіметінің Қазақстанмен өзара қызығушылық тудыратын барлық салада жан-жақты ынтымақтастықты нығайтуға берік ниетін растады. Басты басымдық берілген бағыттар ретінде энергетика, көлік және логистика, фармацевтика, туризм және ауыл шаруашылығы аталып өтті.Министрлер сапар аясында ұйымдастырылған «Қазақстан-Хорватия» бизнес-форумы мен «Astana Hub» халықаралық IT-стартаптар паркіне жасалатын сапар екі елдің іскер топтары үшін байланыстарды кеңейтуге және қолайлы жағдай жасауға ықпал ететініне сенім білдірді.ҚР СІМ басшысы бүгінгі іс-шараны Қазақстан мен Хорватия арасындағы экономикалық байланыстарды нығайтуға бағытталған саяси диалогты жандандырудың бастамасы болатынын баса айтты. Бұл кездесу дәстүрлі достық екіжақты қарым-қатынастардың дамуындағы өсіп келе жатқан динамиканы көрсететінін атап өтті.Мәдени-гуманитарлық салада екі елдің сыртқы саяси ведомстволарының басшылары студенттерге өзара стипендиялар беру туралы уағдаластыққа қол жеткізді.Өңірлік және жаһандық күн тәртібіндегі өзекті мәселелерді талқылау барысында Қазақстан тарапы БҰҰ Жарғысының қағидаттарына және еліміздің жанжалдарды тек бейбіт жолмен шешуге бағытталған теңгерімді әрі прагматикалық сыртқы саясатына берік бейілділігін растады.М.Нұртілеу Орталық Азия мен Ауғанстан үшін Тұрақты даму мақсаттары жөніндегі БҰҰ Өңірлік орталығын Алматы қаласында құру процесінде көрсеткен қолдауы үшін хорват тарапына алғысын білдірді.Келіссөздердің қорытындысы бойынша тараптар екіжақты және көпжақты ынтымақтастықты одан әрі нығайтуға бағытталған бірлескен күш-жігерді жалғастыруға уағдаласты.Ресми келіссөздермен қатар министрлер екі елдің іскер топтарының қатысуымен «Қазақстан-Хорватия» бизнес-форумын ашты. Іс-шара энергетика, құрылыс, ақпараттық технологиялар, туризм және ауыл шаруашылығы сияқты салалардағы екіжақты ынтымақтастықтың келешегін талқылауға арналған алаңға айналды.Қазақстан мен Хорватия кәсіпкерлері сауда-экономикалық байланыстарды кеңейтуге, сондай-ақ тұрақты серіктестікті дамытуға бағытталған бірлескен жобаларды іске асыруға мүдделілігін растады.Сапар аясында хорват министрі Қазақстан Президенті Қасым-Жомарт Тоқаевтың қабылдауында болды.Ақпарат көзі : https://www.gov.kz/memleket/entities/mfa/press/news/details/982157?lang=kk

Қарасай ауданына қарасты Көкөзек ауылында «KT&G Kazakhstan» ЖШС зауытының салтанатты ашылу рәсімі өтті. Бұл — Оңтүстік Кореяның KT&G корпорациясының Қазақстандағы алғашқы жобасы және ол толығымен жеке инвестициялар арқылы жүзеге асырылды.Жаңа кәсіпорын өңірдегі ең ірі өндірістік нысандардың бірі болмақ. Жалпы инвестиция көлемі — 70 миллиард теңге, бұл қаржының барлығы компанияның жеке капиталы есебінен құйылған. Зауыт жобалық қуатына шыққан соң Еуразия мен ТМД нарығына сапалы өнім жеткізуді қолға алады. Зауыт арқылы Қазақстан бюджетіне жыл сайын шамамен 25 миллиард теңге салық түседі деп күтілуде.Қазіргі таңда зауытта 130 қызметкер жұмыс істейді. Алдағы уақытта кәсіпорын кеңейген сайын жұмыс орындарының саны артады.«Бұл зауыт — біз үшін маңызды қадам. Қазақстан — зор әлеуетке ие болашағы бар нарық. Біз бұл серіктестіктің табысты болатынына сенімдіміз», — деді «KT&G Kazakhstan» ЖШС бас директоры Пак Хён Ук.Зауыттағы өндіріс процесі толықтай автоматтандырылған және халықаралық сапа стандарттарына толық сәйкес келеді. Шикізатты сатып алудан бастап, дайын өнімді орауға дейінгі барлық кезеңде қатаң бақылау жүйесі жұмыс істейді.Алматы облысының әкімі Марат Сұлтанғазиев бұл жобаның өңір үшін маңыздылығын ерекше атап өтті:«KT&G зауытының ашылуы — бұл тек жаңа өндірісті іске қосу емес. Бұл — Қазақстан мен Корея арасындағы 33 жылдық серіктестіктің нәтижесі және Алматы облысының инвестициялық тартымдылығының жарқын дәлелі. Біз халықаралық серіктестік үшін барлық жағдайды жасап, біздің өңірді таңдайтын компанияларды әрдайым қолдаймыз», — деді әкім.Ашылу рәсіміне 100-ден астам құрметті қонақ қатысты. Олардың арасында Корея Республикасының Қазақстандағы Төтенше және Өкілетті Елшісі Чжо Тэ-ик пен KT&G корпорациясының бас директоры Банг Кёнг Ман болды. Қонақтар үшін қазақ-корей мәдени бағдарламасы ұйымдастырылып, өндіріс цехтарына экскурсия өткізілді.Жаңа зауыттың іске қосылуымен KT&G Еуразия нарығындағы өз позициясын күшейтіп, Қазақстан экономикасына қомақты үлес қосуда — жұмыс орындарын ашып, экспортты қолдап, жергілікті өндірісті дамытуға атсалысуда.Ақпарат көзі : https://www.gov.kz/memleket/entities/almobl/press/news/details/981386?lang=kk

Астана, 2025 жылғы 22 сәуір – Қазақстан Республикасы Сыртқы істер министрінің орынбасары Әлібек Қуантыров Қазақстандағы миссиясының аяқталуына орай Алжир Халық Демократиялық Республикасының Елшісі Камаль Финништі қабылдады.Тараптар екіжақты өзара іс-қимылдың оң динамикасын атап өтіп, екі ел арасындағы өзара тиімді серіктестікті одан әрі тереңдетуге ортақ мүдделілік бар екенін растады.Елші Қазақстанда іске асырылып жатқан жүйелі саяси реформаларды атап өтті. Оның айтуынша, бұл өзгерістер Қазақстан халқының әділетті, ашық әрі тұрақты мемлекет құруға деген ұмтылысын көрсетеді.Өз кезегінде, министрдің орынбасары Астана мен Алжир арасындағы саяси, сауда-экономикалық және мәдени-гуманитарлық ынтымақтастықты дамытуға алжирлік дипломаттың қосқан үлесін ерекше атап өтті.Қазақ дипломаты Алжирдың Елшісіне алдағы кәсіби қызметіне табыс тілеп, Қазақстан мен Алжир арасындағы достық қарым-қатынастардың бұдан әрі де табысты дамитынына сенім білдірді.Кездесу соңында Алжир дипломатына Қазақстан Республикасы Премьер-министрінің орынбасары – Сыртқы істер министрі Мұрат Нұртілеудің атынан алғыс хат пен естелік кәдесый табысталды.Ақпарат көзі : https://www.gov.kz/memleket/entities/mfa/press/news/details/981456?lang=kk

Қостанай облысының әкімі Құмар Ақсақалов облыс орталығындағы жол жөндеу жұмыстарының барысын тексерді. Сапар барысында жұмыс қарқынына, мерзімдердің сақталуына және жөндеу сапасына ерекше назар аударылды.2025 жылы Қостанайда жалпы ұзындығы 45 шақырымды құрайтын 91 көше жөнделеді. Оның ішінде үш көше толық реконструкциядан өтеді. Жөндеу жұмыстары қолайлы ауа райымен бірге басталып кетті.Негізгі нысандардың қатарында Сьянова, Қайырбеков, Назарбаев, Баймағамбетов, Гоголь, Мәуленов, Герасимов, Маяковский, Әл-Фараби, Перронная көшелері және басқалары бар. Сонымен қатар, аулаларды абаттандыру бағдарламасы аясында 49 аула жөнделетін болады.Биыл жолдарды жөндеуге 9 миллиард теңге бөлінді — бұл өткен жылмен салыстырғанда екі есе көп.Ағымдағы жөндеу жұмыстарының сапасына ерекше назар аударылып отыр. Облыс әкімінің тапсырмасы – барлық жұмыстарды мерзімінде аяқтап, сапалы жол жабындысын қамтамасыз ету. Қала көшелерінде шұңқырлар болмауы тиіс, ал жұмыстар тұрғындардың күткен талабына сай жүргізілуі қажет.Жөндеу жұмыстарының орындалуы тұрақты бақылауда болады.Ақпарат көзі : https://www.gov.kz/memleket/entities/kostanay/press/news/details/980614?lang=kk

Алматы облысының орталығы – Қонаев қаласында жаңғыртудан өткен қалалық кітапхана пайдалануға берілді. Жоба облыс әкімдігінің қолдауымен жүзеге асты.Кітапхана заманауи стандарттарға сай жабдықталып, бір мезетте 100 адамға қызмет көрсетуге мүмкіндік береді. Мұнда жоғары жылдамдықты интернет, коворкинг аймақтар, шығармашылық кеңістіктер мен заманауи әдебиеттер қоры қарастырылған.Ашылу рәсімінде Алматы облысы әкімінің орынбасары Болат Күренбеков бұл жобаның өңірдің рухани-мәдени өміріндегі маңызына тоқталды:– Бұл жай ғана жаңартылған ғимарат емес, білімге, оқуға және дамуға жетелейтін заманауи мәдени ортаны қалыптастырудың бір қадамы. Мемлекет басшысы Қасым-Жомарт Тоқаев кітапхана ісінің маңызын бірнеше рет атап өткен болатын. Біз бұл бағытта жүйелі жұмыстарды жалғастырамыз, – деді ол.Айта кетейік, Үкімет қаулысымен Қазақстанда "23 сәуір – Ұлттық кітап күні" ретінде бекітілген. Бұл – қоғамда оқу мәдениетін қалыптастыруға бағытталған маңызды бастама.Болат Күренбековтің айтуынша, биыл жаңғырту жұмыстары Ұйғыр ауданындағы, Еңбекшіқазақ ауданының Шелек ауылындағы және Қарасай ауданының Жандосов ауылындағы кітапханаларда да жүргізіледі.Салтанатты шараға Қазақстан Жазушылар одағының төрағасы Мереке Кұлкенов, жазушы Сауле Досжан, ҚР Ұлттық кітапханасының директоры Ғазиза Нұрғалиева және мәдениет саласының өкілдері қатысты.Рәсімнен кейін қонақтар жаңартылған кітапхананың жұмысымен танысты. Мамандардың айтуынша, бұл мекеме енді тек оқу орны ғана емес, сонымен қатар қарым-қатынас, даму мен жаңа идеялардың орталығына айналып отыр.Ақпарат көзі : https://www.gov.kz/memleket/entities/almobl/press/news/details/980325?lang=kk