Алматы облысының орталығы – Қонаев қаласында жаңғыртудан өткен қалалық кітапхана пайдалануға берілді. Жоба облыс әкімдігінің қолдауымен жүзеге асты.Кітапхана заманауи стандарттарға сай жабдықталып, бір мезетте 100 адамға қызмет көрсетуге мүмкіндік береді. Мұнда жоғары жылдамдықты интернет, коворкинг аймақтар, шығармашылық кеңістіктер мен заманауи әдебиеттер қоры қарастырылған.Ашылу рәсімінде Алматы облысы әкімінің орынбасары Болат Күренбеков бұл жобаның өңірдің рухани-мәдени өміріндегі маңызына тоқталды:– Бұл жай ғана жаңартылған ғимарат емес, білімге, оқуға және дамуға жетелейтін заманауи мәдени ортаны қалыптастырудың бір қадамы. Мемлекет басшысы Қасым-Жомарт Тоқаев кітапхана ісінің маңызын бірнеше рет атап өткен болатын. Біз бұл бағытта жүйелі жұмыстарды жалғастырамыз, – деді ол.Айта кетейік, Үкімет қаулысымен Қазақстанда "23 сәуір – Ұлттық кітап күні" ретінде бекітілген. Бұл – қоғамда оқу мәдениетін қалыптастыруға бағытталған маңызды бастама.Болат Күренбековтің айтуынша, биыл жаңғырту жұмыстары Ұйғыр ауданындағы, Еңбекшіқазақ ауданының Шелек ауылындағы және Қарасай ауданының Жандосов ауылындағы кітапханаларда да жүргізіледі.Салтанатты шараға Қазақстан Жазушылар одағының төрағасы Мереке Кұлкенов, жазушы Сауле Досжан, ҚР Ұлттық кітапханасының директоры Ғазиза Нұрғалиева және мәдениет саласының өкілдері қатысты.Рәсімнен кейін қонақтар жаңартылған кітапхананың жұмысымен танысты. Мамандардың айтуынша, бұл мекеме енді тек оқу орны ғана емес, сонымен қатар қарым-қатынас, даму мен жаңа идеялардың орталығына айналып отыр.Ақпарат көзі : https://www.gov.kz/memleket/entities/almobl/press/news/details/980325?lang=kk

Капшагай су қоймасының жағалауы көп жылдар бойы назардан тыс қалып келген еді. Енді бұл аумақ мүлде жаңа кейіпке енді: балалар және спорт алаңдары, субұрқақтар, суға түсуге арналған ыңғайлы баспалдақтар, орындықтар мен жарықтандыру жүйесімен жабдықталған заманауи қоғамдық кеңістікке айналды. Ауқымды жобаны жүзеге асыруға «КСЖ Freedom Life» АҚ қолдау көрсетті.Құрылыс жұмыстары 2024 жылдың жазында басталып, толық абаттандырумен сәтті аяқталды. Жаңа брусчатка төселіп, орындықтар мен қоқыс жәшіктері орнатылды, жарықтандыру жүйесі толық жаңартылды. Жаңа алаңда балалар мен спорттық алаңдар, ашық аспан астындағы жаттығу құрылғылары мен демалыс аймақтары пайда болды. Жағалау енді субұрқақтармен, жағажайға түсуге арналған баспалдақтармен толыққан. 2025 жылғы наурызда соңғы кезең – гүлзарлар отырғызу мен қылқанжапырақты және жапырақты ағаштарды егу жұмыстары да аяқталды.“Бұл тек абаттандыру емес — бұл тұрғындар мен қонақтар үшін жайлы әрі тартымды қоғамдық кеңістік қалыптастыруға бағытталған маңызды қадам. Қонаев қаласы мен Капшагай жағалауы — су туризмінің ірі орталықтарының бірі. Жаңарған жағалау өңірдің инфрақұрылымын жетілдіріп қана қоймай, оның инвестициялық әлеуетін де арттырады”, — деді Алматы облысының әкімі Марат Сұлтанғазиев.Ұзындығы 1 шақырым болатын жағалау бүгінде демалыс, серуендеу, спортпен шұғылдану мен отбасылық уақыт өткізу үшін барлық жағдай жасалған кең әрі заманауи кеңістікке айналды. Жобаның жүзеге асуына «КСЖ Freedom Life» компаниясы 4,53 миллиард теңге көлемінде қаржылық қолдау көрсетті. Бұл — бизнестің мемлекетпен тиімді әріптестігінің жарқын көрінісі.“Бұл кеңістікті шын мәнінде заманауи әрі тартымды ету үшін біз айтарлықтай ресурстар, уақыт пен күш жұмсадық. Бұл — жай ғана инфрақұрылымды жақсарту емес, бұл — Қонаев қаласының болашақ дамуына қосқан нақты үлесіміз. Біз қаланың зор әлеуетіне сенеміз. Мұндай жобалар оның өмір сүруге жайлылығын арттыра түседі”, — деді Freedom Holding Corp. бас атқарушы директоры Тимур Турлов.Жағалаудың ресми ашылуынан кейін нысан коммуналдық меншікке берілді. Қонақтар үшін арнайы экскурсия ұйымдастырылып, отандық өнерпаздар мен би ұжымдарының қатысуымен мерекелік концерт өтті.“Біз ірі холдинг ретінде ESG қағидаттарын ұстана отырып, қалалық ортаны жайлы әрі шабыт сыйлайтын етіп қалыптастыруға бағытталған жобаларға басымдық береміз. Freedom Life компаниясы соңғы алты жылдан бері өмірді сақтандыру саласындағы цифрлық қызмет көрсету бойынша көшбасшы болумен қатар, әлеуметтік маңызы бар бастамаларға да ерекше көңіл бөліп келеді. Қонаевтағы жағалауды абаттандыру — бизнестің қалалық инфрақұрылымды дамытуға қосқан маңызды үлесі. Бұл — біздің саналы стратегиямыздың ажырамас бөлігі, халқымыздың жарқын болашағына бағытталған нақты қадам”, — деді КСЖ Freedom Life басқарма төрағасы Азамат Ердесов.Іс-шара барысында Алматы облысының әкімі Капшагай су қоймасының экожүйесін сақтау және Қонаев қаласын өңірдің басты туристік бағыттарының біріне айналдыру жөніндегі жоспарларымен бөлісті:“Алда әлі де ауқымды жұмыстар күтіп тұр. Туристерге қолайлы жағдай жасау үшін заманауи инфрақұрылым дамытылады. Сонымен қатар “Ұлы дала жорығы” және өрік фестивалі сияқты ірі іс-шаралар өтеді. Алдағы уақытта халықаралық деңгейдегі жағажай мен бес жұлдызды екі қонақүйдің құрылысы да қолға алынбақ”, — деді Марат Сұлтанғазиев.Ақпарат көзі : https://www.gov.kz/memleket/entities/almobl/press/news/details/979610?lang=kk

Алматы облысының әкімі Марат Сұлтанғазиев жұмыс сапары барысында Талғар және Іле аудандарына барып, «Жайлы мектеп» ұлттық жобасының жүзеге асу барысымен танысты. Өңір басшысы үш білім беру нысанын аралап көрді. Жобалардың іске асуы 2 800-ден астам жаңа оқушы орнының құрылуына ықпал етіп, қолданыстағы мектептерге түсетін жүктемені едәуір азайтады.Сапардың алғашқы нысаны — Талғар ауданы Жаңалық ауылындағы 900 орындық мектептің құрылысы. Жоба 2023–2025 жылдар аралығында жүзеге асырылуда. Бас мердігер — «AK Construction Company» ЖШС, жобалаушы — «Капремпроект» ЖШС, техникалық қадағалаушы — «Стройинтеграция» ЖШС.Қазіргі уақытта нысанның 90%-ы дайын, ал жабдықтардың 50%-ы орнатылған. Құрылыстың негізгі жұмыстары аяқталып, аумақты абаттандыру және технологиялық жабдықтарды жеткізу жұмыстары жалғасып жатыр. Барлық жұмыстар алдағы екі аптада толық аяқталады деп жоспарлануда.Келесі нысан — Іле ауданы Тлендиев ауылындағы 900 орындық мектеп. Құрылыс белгіленген кестеге сай жүргізілуде: жер жұмыстары аяқталып, ғимараттың қаңқасы мен қабырғалары тұрғызылды, шатыр мен қасбеттік жұмыстар, сондай-ақ инженерлік желілерді тарту жұмыстары жүргізілуде. Жоба 2023–2025 жылдар аралығында республикалық бюджет есебінен қаржыландырылуда. Тапсырыс беруші — «Samruk-Kazyna Construction» АҚ, мердігер — «Exclusive Construction» ЖШС.Сапардың соңғы нысаны — Талғар ауданы Талдыбұлақ ауылындағы 600 орындық мектеп. Құрылыс жұмыстары аяқталу сатысында: ғимараттың қаңқасы тұрғызылып, ішкі әрлеу, инженерлік жүйелерді орнату және аумақты абаттандыру жұмыстары жүргізілуде. Мердігер — «Диал строй» ЖШС.Сапар қорытындысында облыс әкімі Марат Сұлтанғазиев нысандардың жоғары дайындық деңгейін атап өтіп, заманауи білім беру инфрақұрылымын қалыптастыруда кешенді тәсілдің маңызын ерекше атап өтті:— Мектеп — бұл жай ғана ғимарат емес. Бұл — балалар өздерін жайлы, қауіпсіз әрі сенімді сезінетін орта. Аудан әкімдеріне аумақты көгалдандыру, ағаш отырғызу секілді жұмыстарға ерекше көңіл бөліп, жан-жақты қолдау көрсетуді тапсырамын. Біз бұл мектептерді балаларымыз үшін салып жатырмыз, ал олар ең үздік жағдайға лайық, — деді облыс әкімі.Аталған мектептердің пайдалануға берілуі 2 467 оқушыны заманауи оқу жағдайымен қамтамасыз етеді және аудандардың әлеуметтік дамуына серпін береді. «Жайлы мектеп» ұлттық жобасы Алматы облысында жоспарлы түрде жүзеге асырылып жатыр.Ақпарат көзі : https://www.gov.kz/memleket/entities/almobl/press/news/details/979506?lang=kk

Астана, 2025 жылғы 18 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу жұмыс сапарымен Астанаға келген Бенин Республикасының Сыртқы істер министрі Олушегун Аджади Бакаримен кездесу өткізді.Бенин сыртқы саяси ведомствосы басшысының Қазақстанға алғашқы сапары екіжақты қарым-қатынастар тарихындағы маңызды кезең болып, екі ел арасындағы өзара іс-қимылға жаңа серпін берді.Келіссөздер барысында тараптар саяси, экономикалық және мәдени-гуманитарлық салаларды қамтитын өзара іс-қимылдың негізгі бағыттары бойынша кең ауқымды мәселелерді талқылады.Министрлер сауда, логистика және цифрландыру сияқты стратегиялық маңызды салалардағы ынтымақтастықты кеңейтуге ерекше назар аударды. Осы тұрғыда шарттық-құқықтық базаны жетілдіруге және әртүрлі деңгейлерде сапарлармен алмасуды жандандыруға дайындықтарын растады.«Жаңа геосаяси жағдайда Қазақстан Африка құрлығымен экономикалық саясатында тең құқықты және өзара тиімді серіктестікті басты орынға қояды. Біз ауыл шаруашылығы, көлік және логистика, қаржы, цифрландыру және телекоммуникациялық технологиялар сияқты перспективалы бағыттарда Бенинмен ынтымақтастықты дамытуға мүдделіміз», – деп атап өтті М.Нұртілеу.Өз кезегінде Бенин СІМ басшысы Қазақстанның ел ішіндегі және халықаралық аренадағы жетістіктеріне таңданысын білдірді. «Қазақстанның табыстары – Үкіметтің тиімді жұмысы мен Президент Қасым-Жомарт Тоқаевтың жеке үлесінің нәтижесі. Елдеріміз ортақ құндылықтарды бөліседі, дәл осы негізде біз берік, серпінді және нәтижелі қарым-қатынастар орнатуға ұмтыламыз», – деді ол.2024 жылдың қорытындысы бойынша Қазақстан мен Африка арасындағы тауар айналымы 700 млн АҚШ долларынан асты және байланыстарды одан әрі нығайту мақсатында қазақ тарапы Бенинге сауда миссиясын жіберуге дайындығын жеткізді.Ауыл шаруашылығы өнімдерінің экспорты аясында Бенинге астық, ұн, өсімдік майлары, тыңайтқыштар және органикалық өнімдерді жеткізу перспективалары қарастырылды. Сондай-ақ тараптар Бениндегі ауыл шаруашылығы мен геологиялық барлау қажеттіліктері үшін пайдалы болуы мүмкін жер шарын қашықтықтан зондтау бойынша қазақстандық спутниктік қызметтерді пайдалану мүмкіндігін талқылады.Көлік байланысын дамыту мәселесіне ерекше назар аударылды. Қазақстан Қытайдан Еуропаға жер үсті транзитінің 90%-ын қамтамасыз етеді, ал Бенин Котону порты арқылы Батыс және Орталық Африкаға қақпа ретінде маңызды рөл атқарады. Осыған байланысты тараптар «Бір белдеу, бір жол» бастамасы және Орта дәліз аясында ынтымақтастықты дамыту, екі елдің көлік ведомстволары мен логистикалық компаниялары арасында келіссөздер жүргізу қажеттігін атап өтті.Ақпараттық технологиялар мен цифрландыру саласындағы жоғары әлеует аталып өтті. Бенинмен цифрлық ынтымақтастық бойынша Жол картасын қабылдауға дайындық расталды, сондай-ақ бениндік компаниялар Орталық Азиядағы ең ірі IT-стартап технопаркі – «Astana Hub» жұмысына қосылуға шақырылды.Сонымен қатар тараптар азық-түлік қауіпсіздігі контексіндегі Ислам ынтымақтастығы ұйымы аясындағы ынтымақтастықты талқылады. Қазақстан Бениннің Азық-түлік қауіпсіздігі жөніндегі Ислам ұйымына қызығушылық танытқаны үшін алғыс білдіріп, оның Жарғысын жақын арада ратификациядан өткізетініне үмітін жеткізді.ҚР СІМ басшысы Алматыда Орталық Азия мен Ауғанстан үшін БҰҰ-ның Орнықты даму мақсаттары жөніндегі өңірлік орталығын құру туралы қазақстандық бастаманы қолдағаны үшін Бенин тарапының ұстанымына ризашылық білдірді.Кездесу қорытындысы бойынша екіжақты ынтымақтастықты одан әрі нығайту мақсатында Қазақстан мен Бенин сыртқы саяси ведомстволары арасында Саяси және дипломатиялық консультациялар бойынша өзара түсіністік туралы меморандумға қол қойылды.Ақпарат көзі : https://www.gov.kz/memleket/entities/mfa/press/news/details/979277?lang=kk

Қостанай облысы Полиция департаменті мен аймақ прокуратурасының бастамасымен "Жастар сарайы" мәдени орталығында " Жастар. Энергия. Болашақ" атауымен жастар форумы өтті. Кездесудің басты тақырыбы жастар арасында нашақорлық пен құқық бұзушылықтың алдын алу болды.Іс-шара қаланың әртүрлі оқу орындарынан мыңға жуық оқушылар мен студенттерді жинады және жастар мен мемлекеттік құрылымдар өкілдері арасындағы ашық диалог үшін маңызды платформа болды.Негізгі бағдарлама басталғанға дейін форумға қатысушылар арнайы техника, криминалистикалық зертхана және жауынгерлік қару-жарақ ұсынылған арнайы көрмеге қатысты. Мұның бәрі Полиция департаментінің аймақтағы есірткі қылмысына қарсы күресті қалай жүргізіп жатқанын айқын көрсетті.Іс-шараның орталық бөлігіне Қостанай облысы ПД бастығы Ерлан Файзуллин, облыс прокурорының бірінші орынбасары Бауыржан Бекбосынов, қылмыстық істер жөніндегі мамандандырылған ауданаралық соттың төрағасы Жолдыбай Метаев, облыс әкімі аппараты басшысының м.а. Альфия Мұсабаева, З.Алдамжар атындағы Қостанай әлеуметтік-техникалық университетінің бірінші проректоры Дастан Беков, облыстық психикалық денсаулық орталығының психолог-наркологы Гүлсім Бисімбаева қатысты.Іс-шара спикерлері есірткінің заңсыз айналымына байланысты құқық бұзушылықтардың статистикасымен бөлісті, осындай қылмыстар үшін қылмыстық жауаптылықтың жас шектері мен мерзімдерін еске салды. Сондай-ақ, олар есірткі заттарының адам ағзасына зиянды әсері және оларды қолданудың ықтимал теріс салдары туралы айтты.Ашық диалог барысында студенттер маңызды және өзекті сұрақтар қою арқылы белсенділік танытты: есірткімен күресу үшін қандай шаралар қабылданады, әр адам нашақорлықтың алдын алуға қалай қатыса алады және осы салада заңды бұзғаны үшін қандай құқықтық салдарлар бар секілді сұрақтар қойылды."Нашақорлық-бұл таңдау емес, тұзақ. Ол денсаулықты ғана емес, адамның психикасын да бұзады. Есірткіні сақтау, олардың санына қарамастан, әрқашан қылмыс ретінде қарастырылады. Әрбір бірінші қолдану-бұл тұзаққа қадам. Есірткіге сіздің өміріңізді бұзуға мүмкіндік бермеңіз", - деді Ерлан Файзуллин.Сондай-ақ, форумда "Есірткіге қарсы үздік бейнеролик" шығармашылық байқауының қорытындысы шығарылды. Жеңімпаздар: үшінші орынды Қазтұтынуодағы Қостанай жоғары колледжінің студенті Денис Никитин, екінші орынды Қостанай индустриалды педагогикалық колледжінің студенті Никита Гирш, ал бірінші орынды Политихникалық Жоғары колледждің студенті Ольга Сабакарь алды. Барлық жүлдегерлер естелік сыйлықтармен және грамоталармен марапатталды.Сондай-ақ, есірткіге қарсы фильмдер мен әлеуметтік роликтерді өз еркімен түсірген азаматтық белсенділер атап өтілді: Әнуар Бұкабаев, Workspace бейне студиясының жетекшісі, "Есірткі курьері" фильмінің авторы және есірткіге қарсы тақырыпта 5 әлеуметтік бейнеролик түсірген Ілияс Қапанов бар.Форум биліктің, білім беру мекемелерінің және белсенді жастардың күш-жігерін біріктіре отырып, Қостанайдың қоғамдық өміріндегі маңызды оқиғаға айналды. Ол тек бірлескен жұмыс пен ашық диалог есірткі қаупіне тиімді қарсы тұруға және жауапты ұрпақты қалыптастыруға көмектесетінін көрсетті."Жастардың энергиясы-болашақтың энергиясы. Оны дамыту, құру және жауапкершілік жағына бағыттау маңызды", - деп атап өтті ұйымдастырушылар.Ақпарат көзі : https://www.gov.kz/memleket/entities/kostanay/press/news/details/979292?lang=kk

Токио, 2025 жылғы 17 сәуір – Қазақстан Республикасының Елшісі Ерлан Баударбек-Қожатаев Жапонияның Императоры Нарухитоға сенім грамоталарын табыстады.Императорлық сарайда өткен салтанатты рәсім барысында Жапония монархы Президент Қасым-Жомарт Тоқаевқа өзінің ізгі тілектерін жолдады. Сондай-ақ ол 2024 жылғы Қазақстандағы су тасқынынан кейін қалпына келтіру жұмыстарының барысы туралы сұрап, Қазақстан халқына өзінің қолдау сөздерін жолдады.Өз кезегінде Елші Қазақстанның Жапониямен кеңейтілген стратегиялық серіктестікті нығайтуға ниетті екенін мәлімдеп, қарым-қатынасты одан әрі дамыту үшін өзінің барлық күш-жігерін жұмсауға дайындығын айтты. Сондай-ақ мүмкіндікті пайдалана отырып, ол екіжақты қарым-қатынастарды нығайтуға қосқан үлесін жоғары бағалап, 2021 жылы Күншығыс орденімен (Алтын және Күміс жұлдыз) марапаттағаны үшін Жапония Императорына алғысын білдірді.Іс-шара қорытындысы бойынша Император қазақ дипломатына екі ел арасындағы қатынастарды нығайту жөніндегі дипломатиялық миссиясын орындауда табыс тіледі.Сенім грамоталарын тапсыру рәсіміне Жапония Үкіметінің атынан билеуші Либералды-демократиялық партияның мүшесі, Білім, мәдениет, спорт, ғылым және технологиялар министрі Тошико Абэ қатысты.Екіжақты сұхбат барысында Т.Абэ Е.Баударбек-Қожатаевты Қазақстанның Жапониядағы Елшісі міндетін ресми атқаруды бастағанымен құттықтап, тараптар Қазақстан мен Жапония арасында ынтымақтастықты дамыту перспективалары туралы пікір алмасты.Ақпарат көзі : https://www.gov.kz/memleket/entities/mfa/press/news/details/980481?lang=kk

Женева, 2025 жылғы 17 сәуір – Қазақстан Республикасының Дүниежүзілік сауда ұйымы (ДСҰ) мен халықаралық экономикалық ұйымдар жанындағы Тұрақты өкілі Қайрат Төребаев ДСҰ Бас директоры Нгози Оконджо-Ивеалаға сенім грамоталарын тапсырды.Кездесу барысында тараптар ДСҰ аясындағы ынтымақтастықты одан әрі тереңдетуге өзара мүдделілігін растады. Қ. Төребаев Қазақстанның Сауда саясатын шолу процесіне ДСҰ Бас директорының тікелей қатысуы мен тұрақты қолдауына алғысын білдіріп, жаһандық сауда саласындағы тұрақсыздық жағдайында сындарлы диалогты сақтаудың маңыздылығын атап өтті.ДСҰ-ға мүше бірқатар елдер, соның ішінде Америка Құрама Штаттары қабылдаған соңғы сауда шаралары аясында Қ. Төребаев мұндай дауларды шешудің басты халықаралық алаңы ретінде ДСҰ-ның рөлін сақтау қажеттігін ерекше атап өтті. Ол Бас директор мен ДСҰ Бас кеңесінің төрағасы жүргізіп отырған тиісті консультациялар ұйымдастыру жөніндегі күш-жігерін қолдайтынын білдіріп, мүше елдер арасындағы ашық диалог пен көпжақты үдерістерге барынша тартылудың өзектілігін атап өтті.Кездесу барысында ДСҰ реформасына ерекше назар аударылды. Қазақстанның Тұрақты өкілі Ұйым ережелерін жаңғырту мен оның институттарының тиімділігін арттыру көпжақты сауда жүйесіне деген сенімді қалпына келтірудің шешуші тетігі екенін айтты. Ол Қазақстанның реформалар процесіне белсенді әрі сындарлы үлес қосуға, сондай-ақ күн тәртібіндегі өзекті мәселелер бойынша прагматикалық әрі инклюзивті шешімдерді қолдауға дайын екенін жеткізді.Тараптар сондай-ақ Ұйым алдында тұрған негізгі институционалдық және функционалдық сын-қатерлерді, соның ішінде бюджет тапшылығы, дауларды шешу механизмі дағдарысы және шешім қабылдау үдерісінің ашықтығын арттыру қажеттілігін талқылады. Сонымен қатар Хатшылықты реформалау жөніндегі бастамалар мен келесі ДСҰ Министрлік конференциясына дайындық мәселелері қарастырылды.ДСҰ Бас директоры Нгози Оконджо-Ивеала Қазақстанға көпжақты сауда жүйесіне тұрақты қолдау көрсетіп, Ұйым жұмысына белсенді қатысып отырғаны үшін алғысын білдірді. Ол Қазақстанның реформалар процесінде жауапты әрі белсенді қатысушы ретінде өзін көрсеткенін және түрлі елдер тобының мүдделерін ескере алатын теңгерімді ұстанымын ерекше атап өтті.Ақпарат көзі : https://www.gov.kz/memleket/entities/mfa/press/news/details/979589?lang=kk

Ыстанбұл, 2025 жылғы 17 сәуір – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Түркияның жетекші «Orzax» және «Alarko Holding» компанияларының басшыларымен екіжақты кездесулер өткізді.Келіссөздер барысында Қазақстанның агроөнеркәсіп кешені мен тамақ өнеркәсібін дамытуға бағытталған инвестициялық жобаларды жүзеге асыру мәселелері талқыланды.М.Нұртілеу Қазақстан Түркиямен сауда-экономикалық ынтымақтастықты нығайтуға айрықша мән беретінін атап өтіп, экономиканың басым секторларына тікелей инвестициялар тартуға мүдделі екенін жеткізді.«Orzax» компаниясының бас директоры Юнус Эмре Алимоглу Түркістан облысында биологиялық белсенді қоспалар шығару жобасы туралы мәлімет берді. Ол мемлекет тарапынан көрсетілген уақтылы қолдаудың арқасында жоба бекітілген кестеге сәйкес іске асырылып жатқанын атап өтті.«Alarko Holding» басқарма төрағасы Иззет Гарих Шымкент қаласында заманауи жылыжай кешені құрылысының барысы туралы айтып, жобаның табысты іске асырылатынына және компанияның Қазақстандағы қызметін кеңейтетініне сенім білдірді.Сұхбаттастар инвестициялық серіктестікті нығайтуға өзара бейілділігін растап, перспективалы жаңа бағыттар бойынша өзара іс-қимылды кеңейтуге дайын екенін білдірді.Ақпарат көзі : https://www.gov.kz/memleket/entities/mfa/press/news/details/978610?lang=kk

Алматы облысы әкімінің өкімімен Тоқпейісов Ғалым Қасымұлы Алматы облысы ауыл шаруашылығы басқармасының басшысы болып тағайындалды.Ғалым Қасымұлы 1967 жылы Алматы облысы, Балқаш ауданында дүниеге келген, білімі жоғары, 1999 жылы Қазақ мемлекеттік басқару академиясын «бухгалтерлік есеп және аудит» мамандығы, М.Х. Дулати атындағы Тараз мемлекеттік университетін «құқықтану» мамандығы бойынша бітірген.Еңбек жолын «Жиделі» ұжымшарының жұмысшысы болып бастаған.Әр жылдары «Қарой» ұжымшарының есепшісі, «Ақдала» күріш ұжымшары бригадирінің көмекшісі, еңбек жөніндегі экономисі, бөлім бастығы, Балқаш ауданы Ақдала ауылының әкімі, Жамбыл облыстық аумақтық балық шаруашылығы басқармасының бастығы, Көксу ауданы әкімінің орынбасары, Алматы облысы әкімі аппараты бөлімінің меңгерушісі, Көксу ауданының әкімі, Алматы облысы жер қатынастары басқармасының басшысы, Балқаш ауданының әкімі, Алматы облысы әкімінің кеңесшісі болып жұмыс  істеді.2024 жылдың ақпан айынан бастап Алматы облысы жұмылдыру дайындығы басқармасының басшысы лауазымында қызмет етті.Ақпарат көзі : https://www.gov.kz/memleket/entities/almobl/press/news/details/978227?lang=kk

Астана, 2025 жылғы 17 сәуір – Қазақстан Республикасы Сыртқы істер министрінің орынбасары Роман Василенко Италияның Қазақстандағы жаңадан тағайындалған Елшісі Антонелло Де Риудан сенім грамоталарының көшірмелерін қабылдады.Кездесу барысында тараптар қазақ-итальян стратегиялық серіктестіктің өзекті мәселелері мен болашағын талқылады. Екі елдің іскер топтары үшін қолайлы жағдай жасау және сауда-экономикалық байланыстарды нығайту мәселелеріне ерекше назар аударылды.Тараптар қатынастардың серпінді әрі тұрақты дамуын атап өтіп, алдағы жоғары деңгейдегі іс-шаралар кестесін талқылады.Дипломаттар биік деңгейдегі диалогты дамыту көп қырлы қазақ-итальян ынтымақтастығын кеңейтудің маңызды кезеңі болатынына сенім білдірді.Өз кезегінде Италия Елшісі жылы қабылдау үшін алғыс айтып, екі ел арасындағы өзара тиімді серіктестікті дамытуға ниетті екенін растады.Кездесу соңында Р. Василенко А. Де Риуға дипломатиялық миссиясында табыс тіледі.Анықтама: Италия – 2024 жылғы сыртқы сауда айналымының жалпы көлеміндегі үлесі 14,1% құрайтын Қазақстанның үшінші сауда әріптесі. 2024 жылы екіжақты тауар айналымы 20 млрд АҚШ долларын құрады (2023 ж. салыстырғанда 24%-ға өсу). 2005 жылдан бері Италиядан Қазақстанға құйылған тікелей шетелдік инвестиция көлемі 7,6 млрд доллар құрады. Қазақстанда энергетика, жаңартылатын энергия көздері, инжиниринг және ауыл шаруашылығы салаларында 270 итальян компаниялары жұмыс істейді.Ақпарат көзі : https://www.gov.kz/memleket/entities/mfa/press/news/details/977950?lang=kk

16 сәуірде Қазақстанның бас қаласында II Орталық Азия медиафорумы басталды.Форумға Қазақстан, Өзбекстан, Қырғызстан, Әзербайжан, Тәжікстан, Түрікменстан, Ұлыбритания, Қытай, Катар, Ресей және басқа да елдерден журналистер, медиа компания басшылары, саясаткерлер, халықаралық ұйымдардың өкілдері мен беделді сарапшылардан тұратын 700-ден астам қатысушы жиналды.Форумның мақсаты – Орталық Азия медиа өкілдері мен халықаралық серіктестер арасындағы ынтымақтастықты нығайту, цифрлық трансформацияның өңірлік ақпараттық кеңістікке әсерін талқылау, сондай-ақ климаттың өзгеруі мен геосаяси тұрақсыздық сияқты жаһандық сын-қатерлерді қарастыру.Форум Орталық Азия елдерінің ақпарат министрлерінің жұмыс бабы бойынша кездесуінен басталды. Спикерлер қатарында – Қазақстан Республикасының Мәдениет және ақпарат министрі Аида Балаева, Өзбекстан, Қырғызстан, Тәжікстан салалық ведомстволарының өкілдері және өңірдің негізгі медиа құрылымдарының жетекшілері бар.Іс-шараның ашылу рәсімінде Аида Балаева форумды ақпараттық ынтымақтастыққа арналған бірегей алаң екенін атап өтіп, Орталық Азия мемлекеттері басшыларының бастамасы арқасында бірлескен медиажобалар жасау мен гуманитарлық байланыстарды нығайту жұмыстары жандана түскенін айтты.«Бүгінгі форум өзекті мәселелерді ашық талқылап қана қоймай, аймақтағы бірлескен ақпараттық жұмыстың ортақ тәсілдерін әзірлей алатын бірегей алаңға айналды. Орталық Азия көшбасшылары деңгейінде ақпараттық саладағы ынтымақтастықты жандандыру мәселесі бірнеше рет талқыланғаны мәлім. Былтыр Астанада өткен Консультативтік кездесуде Президентіміз Қасым-Жомарт Тоқаев бірлескен медиаөнімдер жасау туралы бастама көтерді.Қазақстан Орталық Азияның ортақ телеарнасын құру және аймақтың әлеуеті, осы аумақта тұратын халықтардың достығы мен бірлігі туралы хабардар ететін тележобаларды, сондай-ақ біздің халықтарымыздың тарихы мен ерекшелігі туралы танымдық теле-радио бағдарламалар топтамасын дайындау идеясын қолдады.Осылайша, қазіргі уақытта Орталық Азия елдері өңірдегі ақпараттық ынтымақтастықты нығайтуға бағытталған бірлескен телеарна мен өңірлік медиаплатформаны іске қосу мүмкіндігін қарастыру үстінде»,– деді министр.Сонымен қатар Аида Балаева Орталық Азиядағы гуманитарлық ынтымақтастықтың жаңа деңгейге көтерілгенін атап өтті. Бірлескен медиажобалар жүзеге асырылып жатыр. Атап айтсақ, Астанада «Euronews»-тің Орталық Азия бойынша өкілдігі ашылды, мәдениет күндері өткізіліп, арналар трансляциясы кеңеюде, креативті индустрия дамып келеді және жалған ақпаратпен күрес жұмыстары күшейтілуде.Сондай-ақ ақпараттық ынтымақтастықты одан әрі нығайту және медиа саласындағы өзара байланысты дамыту мақсатында бірқатар жобалар талқыланып, жоспарланды. Олардың қатарында – Орталық Азия журналистика академиясын құру, креативті индустрияны дамыту, өңірлік журналистика сыйлығын тағайындау, жаңа тележобаларды іске асыру және өңір елдерінің контентін халықаралық медиаплатформаларда кеңінен таныту мәселелері бар.Форумның түстен кейінгі бөлімінде болашақ ақпараттық кеңістікті қалыптастыру, жасанды интеллект пен көп деректер дәуіріндегі медиа саласының цифрлық трансформациясы, елдің имиджін қалыптастырудағы әлеуметтік желілердің рөлі және басқа да мәселелер қарастырылады.Форум 17 сәуір күні де жалғасады. Екінші күні республикалық және Орталық Азия медиа өкілдері мен жоғары оқу орындары студенттеріне арналған шеберлік сабақтары өтеді. Спикерлер қатарында – Ұлыбритания, АҚШ және Ресейден келген танымал сарапшылар бар. ҚР Мәдениет және ақпарат министрлігіАқпарат көзі : https://www.gov.kz/memleket/entities/almobl/press/news/details/977876?lang=kk

Астана, 2025 жылғы 16 сәуір – Қазақстан Республикасы Сыртқы істер министрінің орынбасары Роман Василенко Албанияның Қазақстанға жаңадан тағайындалған Елшісі (қоса атқарушы) Блерта Кадзадештен сенім грамоталарының көшірмелерін қабылдады.Кездесу барысында дипломаттар Қазақстан мен Албания арасындағы саяси, экономикалық және мәдени-гуманитарлық салалардағы қазіргі ахуал мен өзара іс-қимылдың келешегін талқылап, екіжақты шарттық-құқықтық базаны кеңейту мәселелері бойынша пікір алмасты, сондай-ақ әртүрлі деңгейдегі алдағы байланыстардың күн тәртібін қарастырды.Министрдің орынбасары Қазақстан мен Албания арасындағы сындарлы диалогтың дәйекті дамып келе жатқанын атап өтіп, қазақ тарапының серіктестікті одан әрі нығайтуға және практикалық ынтымақтастықты тереңдетуге мүдделілігін жеткізді.Сұхбат барысында 2023 жылы Астанаға Албания Президенті Байрам Бегайдың жасаған ресми сапарының маңыздылығы мен Албания Премьер-министрі Эди Раманың 2025 жылғы 29-30 мамырда өтетін Астана халықаралық форумына қатысуы ерекше аталып өтті.Тараптар 2024 жылы Тиранада Қазақстан Елшілігінің ашылуы екіжақты қатынастарды күшейтудің маңызды қадамы болғанын және ынтымақтастықты одан әрі дамыту үшін берік институционалдық негіз қалағанын баса айтты.Сонымен қатар 2025 жылғы наурызда Тирана қаласында өткен СІМ аралық алғашқы саяси консультациялардың өзектілігіне де назар аударылды. Кездесу барысында екіжақты ынтымақтастықтың кең ауқымды мәселелері қарастырылды. Атап айтқанда, келешегі зор бағыттар ретінде туризм, көлік және логистика, жаңартылатын энергия көздері, сондай-ақ ауыл шаруашылығы салалары айқындалды.Кездесу соңында Р.Василенко Б.Кадзадешке дипломатиялық миссиясында толағай табыс тіледі.Өз кезегінде Албания Елшісі жылы қабылдау үшін алғыс білдіріп, екі ел арасындағы табысты серіктестікті дамыту үшін барлық күш-жігерін жұмсауға дайын екенін растады.Ақпарат көзі : https://www.gov.kz/memleket/entities/mfa/press/news/details/977725?lang=kk

Астана, 2025 жылғы 16 сәуір – Қазақстан Республикасы Сыртқы істер министрінің орынбасары Әлібек Бақаев Мьянма Одағы Республикасының Қазақстандағы жаңадан тағайындалған Елшісі (қоса атқарушы) Тит Линн Оунның сенім грамотасының көшірмесін қабылдады.Ә.Бақаев Мьянманың дипломатын тағайындалуымен құттықтап, оның қызметі екі ел арасындағы достық қарым-қатынасты одан әрі дамытуға ықпал ететініне сенім білдірді. Министрдің орынбасары сондай-ақ Мьянмадағы жойқын жер сілкінісінің нәтижесінде қаза болғандар мен жарақаттанғандар санының артуына байланысты көңіл айтты.Кездесу барысында тараптар саяси, сауда-экономикалық және гуманитарлық салалардағы екіжақты ынтымақтастықтың қазіргі жағдайы мен даму келешегін талқылады. Сұхбаттастар БҰҰ, Азиядағы ынтымақтастық диалогы және басқа халықаралық алаңдар шеңберінде көпжақты форматтағы тығыз ынтымақтастықты жалғастыруға дайындық білдірді.Өз тарапынан Елші Қазақстан мен Мьянма арасындағы қарым-қатынастарды одан әрі нығайту үшін барлық күш-жігерін жұмсауға әзірлігін растады.Кездесудің соңында тараптар өзара қызығушылық тудыратын барлық бағыттар бойынша байланыстарды сақтауға және ынтымақтастықты жалғастыруға келісті.Ақпарат көзі : https://www.gov.kz/memleket/entities/mfa/press/news/details/977724?lang=kk

Қостанайда Қазақстан халқы Ассамблеясы Қостанай облыстық филиалы кеңесінің отырысы өтті. Іс-шараға облыс әкімі Құмар Ақсақалов қатысып, Ассамблеяның 30 жылдығына орай атқарылған жұмыстардың қорытындысы мен алдағы міндеттер талқыланды.Жиынды ашқан өңір басшысы Мемлекет басшысы Қасым-Жомарт Тоқаевтың басшылығымен елімізде қоғамдық келісімді, ұлттық бірлікті және тұрақты дамуды нығайтуға бағытталған жүйелі саясат жүргізіліп жатқанын атап өтті. Қостанай облысы бұл бастамаларды өңірлік деңгейде табысты жүзеге асырып келеді. Негізгі басымдық – тұрақтылық, татулық және этностардың өңір дамуына толыққанды қатысуы.– Экономикада, инфрақұрылымда, әлеуметтік салада қол жеткізіп жатқан жетістіктеріміз – ең алдымен, тұрақтылық пен қоғамдағы өзара сенімнің нәтижесі. Осы ретте Қазақстан халқы Ассамблеясының рөлі ерекше. Ассамблеяның жұмысы арқасында өзара құрмет, түсіністік пен азаматтық жауапкершілікке негізделген орта қалыптасуда, – деді Құмар Ақсақалов.Отырыс барысында өңірдің негізгі жетістіктері атап өтілді:Өткен жылы облыста жалпы құны 126 млрд теңге болатын 7 ірі өндірістік жоба іске қосылып, 1 400 жаңа жұмыс орны ашылды;АӨК саласында ірі сүт-тауарлы фермалар іске қосылып, ірімшік өндіру кешені мен «Кондитерлік астана» фабрикасының құрылысы басталды;KIA автозауытын салу жұмыстары жүріп жатыр — бұл компанияның Оңтүстік Кореядан тыс алғашқы ірі жобасы;Биыл 307 млрд теңгеге 11 инвестициялық жобаны іске асыру жоспарланған;Газбен жабдықтау, электр станцияларын салу, жолдарды жөндеу жұмыстары ауқымды түрде жүргізілуде.Облыс әкімі атап өткендей, Қостанай өңірінде қалыптасқан ішкі тұрақтылық пен этносаралық келісім – инвестиция тартудағы негізгі факторлардың бірі. Бүгінде өңірде 1400-ден астам шетелдік компания табысты жұмыс істеуде. Бұл – өңірдің ашықтығы мен сенімділігіне дәлел.Ассамблея өз қызметі арқылы этностардың мәдениеті мен тілін сақтап, мемлекеттік тілді ілгерілетіп, біртұтас азаматтық қоғам құруға үлес қосып келеді. Бүгінде өңірде 9 жексенбілік мектеп жұмыс істейді, «Мәміле» онлайн-клубы арқылы 16 мыңнан астам адам қазақ тілін үйреніп жатыр. «Мемлекеттік тілге жеті қадам» жобасы балалар мен жастар арасында кең қолдау тапты.Сондай-ақ Ассамблея жанындағы жастар қанатының бастамасымен жүзеге асырылып жатқан «Жастар жолы» жобасы еңбек ұжымдарын, оқушылар мен ауыл жастарын біріктіруде.Кеңес соңында Құмар Ақсақалов Қазақстан халқы Ассамблеясының 30 жылдығына орай бірқатар азаматтарға мерекелік медальдарды табыстап, алғыс білдірді.– Біз татулық пен бірлікті нығайтуға, өңірімізде тұратын барлық этностардың мүддесін ескеруге бағытталған бастамаларды әрі қарай да қолдай береміз. Тұрақты қоғам – дамудың берік негізі. Болашағымызды бірге қалыптастырамыз, – деді облыс әкімі.Ақпарат көзі : https://www.gov.kz/memleket/entities/kostanay/press/news/details/977479?lang=kk

Астана, 2025 жылғы 16 сәуір – Қазақстан Республикасы Сыртқы істер министрінің орынбасары Роман Василенко Болгарияның Қазақстандағы Елшісі Боян Хаджиевті қабылдады.Кездесу барысында тараптар Қазақстан мен Болгария арасындағы өзекті мәселелерді талқылап, алдағы жоғары деңгейдегі іс-шараларға дайындыққа, сондай-ақ саяси диалогты кеңейту перспективаларына ерекше назар аударды. Атап айтқанда, Болгария Президенті Румен Радевтің биыл Қазақстанға ресми және іскер делегациямен бірге жасайтын сапарына дайындық барысын қарастырды.Елшінің ақпараты бойынша Қазақстанға келуге және қазақ әріптестерімен ынтымақтастық орнатуға мүдделі көптеген болгар компанияларының арасында фармацевтика, ауыл шаруашылығы, көлік, құрылыс, туризм, энергетика, соның ішінде атом және жаңартылатын энергетика салаларындағы компаниялар бар.Дипломаттар екі мемлекет арасындағы дәстүрлі достық қатынастарды одан әрі дамыту жолдарын, соның ішінде шарттық-құқықтық базаны кеңейту және ведомствоаралық өзара іс-қимылды жандандыру тұрғысынан жан-жақты қарастырды.Сауда-экономикалық және инвестициялық ынтымақтастық мәселелеріне аса назар аударылды. Осыған байланысты биыл мамыр айында Софияда өтуі жоспарланған Қазақстан-Болгария Үкіметаралық экономикалық ынтымақтастық жөніндегі комиссияның бесінші отырысына дайындық мәселелері талқыланды (тең төрағалар – Қазақстан Премьер-министрінің орынбасары – Ұлттық экономика министрі Серік Жұманғарин және Болгарияның Экономика және өнеркәсіп министрі Пламен Дилов).Кездесу қорытындысында тараптар Астана мен София арасындағы мазмұнды диалогты жалғастыруға және жан-жақты өзара іс-қимылды тереңдетуге дайын екенін растады.Анықтама: 2024 жылы Қазақстан мен Болгария арасындағы тауар айналымы 375,2 млн АҚШ долларын құрады (оның ішінде Қазақстан экспорты – 303,6 млн доллар, импорты – 71,6 млн доллар). 2024 жылғы 9 айының қорытындысы бойынша Қазақстан экономикасына 6,2 млн доллар көлемінде болгар инвестициясы тартылды, бұл жылдық мақсатты тікелей шетелдік инвестициялар көлемінің (6,3 млн доллар) 98,4%-дан астамын құрайды.Ақпарат көзі : https://www.gov.kz/memleket/entities/mfa/press/news/details/977446?lang=kk

 Алматы облысы әкімдігінде облыс әкімінің орынбасары Рустам Исатаев төрағалығымен Оңтүстік Кореяның RETD CO., LTD компаниясы делегациясымен ресми кездесу өтті. Кездесудің негізгі тақырыбы – Алматы мен Қонаев қалаларын жалғайтын перспективалық маглев негізіндегі жеңіл рельсті көлік (LRT) жобасын талқылау болды.Кездесуді ашқан Рустам Исатаев көлік инфрақұрылымын дамытудың стратегиялық маңыздылығына тоқталды:«Алматы облысы – инвестициялық және инфрақұрылымдық әлеуеті жоғары, қарқынды дамып келе жатқан өңір. Біз көлік қолжетімділігін арттыруға және тұрғындардың өмір сапасын жақсартуға басымдық береміз. Маглев технологиясын қолданатын LRT жобасы – осы бағыттағы маңызды қадамдардың бірі», – деді облыс әкімінің орынбасары.RETD CO., LTD компаниясының атқарушы директоры Ли Чан Ук магнитті ілініс технологиясының артықшылықтары және компанияның Азия елдеріндегі осындай инфрақұрылымдық жобаларды жүзеге асырудағы тәжірибесі туралы айтып берді.«Біздің тәжірибеміз бен технологиямыз Қазақстан үшін пайдалы болады деп сенеміз. Маглев – бұл болашақтың көлігі, және біз Алматы облысының ауқымды дамуына үлес қосуға дайынбыз», – деді ол.Өз сөзінде Рустам Исатаев Оңтүстік Кореяның Қазақстанның негізгі экономикалық серіктестерінің бірі екенін атап өтті. Бүгінде Алматы облысында корей капиталының қатысуымен 15 кәсіпорын жұмыс істейді.Кездесуге облыстық басқармалар мен бөлім басшылары, жолаушылар көлігі және автомобиль жолдары басқармасы, кәсіпкерлік басқармасы, сондай-ақ «Алматы облысының өңірлік даму орталығы» ЖШС өкілдері қатысты.Тараптар LRT жобасын жүзеге асыру өңірдің көлік жүйесін дамытудың жаңа кезеңіне жол ашып, технологиялық және экономикалық серпін беретіндігіне сенім білдірді. Әкім орынбасары жобаның барлық кезеңдерінде жергілікті атқарушы органдар тарапынан толық қолдау көрсетілетінін атап өтті. Ақпарат көзі : https://www.gov.kz/memleket/entities/almobl/press/news/details/977404?lang=kk

Бүгін Қонаев қаласындағы Алматы облысы әкімдігінің ғимаратында Қазақстан халқы Ассамблеясының алдағы 34-сессиясына арналған облыстық ҚХА Кеңесінің отырысы өтті. Бұл шара Ассамблеяның 30 жылдығына орай ұйымдастырылған айтулы оқиғалардың бірі болды.Кеңес отырысын Қазақстан халқы Ассамблеясының Алматы облыстық филиалының төрағасы, облыс әкімі Марат Сұлтанғазиев ашып, қатысушыларды мерейлі датамен құттықтады. Өз сөзінде ол: «Тұрақтылық пен этносаралық келісім – ел дамуының негізі. Ассамблея бұл бағыттағы маңызын үнемі дәлелдеп келеді. Ол – қоғамдағы бірліктің, бейбітшілік пен өзара түсіністіктің тірегі», – деп атап өтті.Күн тәртібінде бірқатар маңызды мәселелер қаралды. Атап айтқанда, облыстық Ассамблея төрағасының қоғамдық орынбасарларын сайлау өтті. Бұл қызметке «Барбанг» республикалық қоғамдық бірлестігінің филиалы мен «Ронаи» этномәдени орталығының төрағасы Гамзе Бадриевич Гейдаров пен облыстық ақсақалдар кеңесінің төрағасы Амангелді Дәнибекұлы Беспаевтың кандидатуралары ұсынылып, бірауыздан қолдау тапты.Сонымен қатар, Ассамблея құрамына жаңа мүшелер қабылданып, облыстық ішкі саясат басқармасының басшысы Ерік Әзілжанович Әбитов олардың ел бірлігін нығайту жолындағы белсенділігін атап өтті.Жиын барысында Қазақстан халқы Ассамблеясының 30 жылдық мерейтойына арналған арнайы медальдар мен ҚХА мүшесі куәліктері табысталды. Ел ішіндегі келісімді сақтау жолында еңбегі сіңген 35 белсенді азамат марапаттарға ие болды.ҚХА Кеңесінің мүшесі, қоғам қайраткері Асылы Осман өз сөзінде Ассамблеяның ел ішіндегі татулық пен тұрақтылықты сақтаудағы маңызды рөлін атап өтті: «Ассамблея – біздің бірлігіміздің жүрегі. Ол – достық пен өзара құрметтің символы. Алдағы уақытта да бұл құрылым ел мүддесіне қызмет ете беретініне сенемін», – деді ол.Кеңес соңында облыс әкімі Марат Сұлтанғазиев барлық қатысушыларға алғыс білдіріп, Ассамблеяның алдағы кезеңдегі негізгі міндеттеріне тоқталды. Ол этносаралық диалогты дамыту, жастар бастамаларын қолдау және отансүйгіштік рухты нығайтудың аса маңызды екеніне тоқталып:«Қазақстан халқы Ассамблеясы бұдан әрі де еліміздегі бейбітшілік пен тұрақтылықтың берік тірегі болып қала береді», – деп қорытындылады.Қазақстан халқы Ассамблеясының 30 жылдығы – тек мерейтой ғана емес, бұл еліміздің бірлік жолындағы жетістіктерін саралайтын, болашаққа нық қадам басуға серпін беретін маңызды кезең.Ақпарат көзі : https://www.gov.kz/memleket/entities/almobl/press/news/details/976831?lang=kk

Астана, 2025 жылғы 15 сәуір – Қазақстан Республикасы Сыртқы істер министрлігінде Қазақстан мен Түрікменстанның сыртқы саяси ведомстволары арасында екі мемлекеттің құзыретті органдары өкілдерінің қатысуымен консулдық мәселелер бойынша кезекті қазақ-түрікмен консультациялары өтті.Қазақ делегациясын СІМ Консулдық қызмет департаментінің директоры Азамат Аубеков, ал түрікмен делегациясын СІМ Консулдық қызмет департаментінің басшысы Довлетмырат Муратов басқарды.Конструктивті және достық атмосферада өткен консультациялар барысында тараптар консулдық саладағы екіжақты қарым-қатынастардың жай-күйін талқылады. Атап айтқанда, жеке және заңды тұлғалардың құқықтары мен мүдделерін қорғау, азаматтық мәселелер, сондай-ақ екі ел азаматтарының өзара сапарларына қатысты жағдайларға ерекше назар аударылды.Кездесу қорытындысы бойынша тараптар тиісті хаттамаға қол қойып, консулдық қатынастардың барлық саласы бойынша ынтымақтастықты одан әрі нығайтуға ниетті екенін растады.Ақпарат көзі : https://www.gov.kz/memleket/entities/mfa/press/news/details/976812?lang=kk

15 сәуір күні Қостанай облысының әкімі Құмар Ақсақаловтың төрағалығымен мемлекеттік қызметтердің сапасы мен қолжетімділігін арттыру мәселелері бойынша кеңейтілген отырыс өтті. Жиынға облыстық басқарма басшылары, «Азаматтарға арналған үкімет» мемлекеттік корпорациясы облыстық филиалының өкілдері және цифрландыру саласының мамандары қатысты.Негізгі басымдық — сапа мен ыңғайлылықОтырысты ашқан өңір басшысы мемлекеттік органдардың басты міндеті — электрондық қызметтерді жай ғана қолжетімді ету емес, олардың тұрақты, түсінікті әрі азаматтар үшін қолайлы болуын қамтамасыз ету екенін атап өтті.«Адамдар үшін қызметтің онлайн болуы емес, оның шын мәнінде жеңіл әрі тиімді болғаны маңызды», — деді облыс әкімі.Электрондық қызметтердің өсімі байқаладыИнформатизация басқармасының мәліметінше, соңғы үш жылда облыста көрсетілетін электрондық қызметтердің үлесі 91%-дан 98,3%-ға дейін артқан. Әсіресе денсаулық сақтау саласында ілгерілеу бар — қазір талдау нәтижелерін алу, анықтамаларды рәсімдеу секілді қызметтерді «Дамумед» қосымшасы арқылы оңай алуға болады. Сонымен қатар, автокөлікті тіркеу, мекенжай бойынша тіркелу, жүргізуші куәлігін ауыстыру рәсімдері де едәуір жеңілдеген.ХҚКО — жаңа кеңістік, жаңа стандарттарТұрғындар тарапынан ХҚКО ғимаратына (Тәуелсіздік көшесі, 46) қатысты көптеген шағымдар түскен. Осыған байланысты халыққа қызмет көрсету бөлімдерін Тәуелсіздік көшесі, 114 мекенжайындағы кең әрі қолайлы ғимаратқа көшіру туралы шешім қабылданды. Бұл қадам көрсетілетін қызметтер аумағын екі есе ұлғайтып, автотұрақ мәселесін шешуге мүмкіндік береді.Сонымен қатар, әкімшілік блок Майлин көшесі, 2/2 мекенжайына көшіріледі. Облыс әкімі жаңа кеңселерді заманауи техникамен жабдықтауды «Азаматтарға арналған үкімет» корпорациясына, ал ХҚКО-ларды жаңғырту тұжырымдамасын әзірлеуді облыстық цифрландыру басқармасына тапсырды. Құжат бір ай ішінде дайындалып, цифрлық даму министрлігіне жолдануы тиіс.Бірыңғай төлем құжаты — 1 қыркүйекке дейін енгізіледіЖиында сондай-ақ, тұрғын үй-коммуналдық шаруашылық саласына қатысты деректерді бір жүйеге біріктіретін республикалық «Бірыңғай төлем құжаты» жобасын өңірде енгізу мәселесі қаралды. Бұл тұрғындарға барлық коммуналдық қызметтерді бір жерден, екінші деңгейлі банктер арқылы онлайн төлеуге мүмкіндік береді. Қажет жағдайда қағаз түбіртек те беріледі.«Азаматтар түрлі түбіртектер жинап, кезек күтуге мәжбүр болмауы керек. Барлығы бір жерде, қолжетімді және түсінікті болуы тиіс», — деді облыс әкімі.Осыған орай облыстық энергетика және ТКШ басқармасына аталған жобаны 1 қыркүйекке дейін іске асыру тапсырылды.Жауапкершілікті арттыру және сапаны бақылауКеңес қорытындысы бойынша облыс әкімі барлық мемлекеттік органдардың басшыларына қызмет сапасын бақылауды күшейтуді, қызметкерлердің біліктілігін арттыруды және заңбұзушылықтарға жол бермеуді тапсырды.«Әрбір қабылданған шешіміміз бір сұраққа жауап беруі тиіс: бұл азаматқа жеңілірек, жылдамырақ, түсініктірек бола түсті ме?» — деп қорытындылады әкім.Жартыжылдық қорытындысы бойынша аудан, қала әкімдері мен басқарма басшыларының осы саладағы жұмысы жеке-жеке қаралатын болады.Ақпарат көзі : https://www.gov.kz/memleket/entities/kostanay/press/news/details/976742?lang=kk

14 сәуір күні Қостанайда Қазақстан тарихындағы алғашқы толыққанды кәсіби әйелдер футбол чемпионатының басталуы өтті. Жарысқа ерлер Премьер-лигасының құрамын қайталайтын 14 команда қатысуда. Бұл — әйелдер футболын және жалпы отандық спортты дамытудағы маңызды қадам.Маусымның ашылу ойыны Қостанай стадионында өтті. Әйелдер командасы «Тобыл» Астана қаласының «Жеңіс» командасымен кездесіп, 3:1 есебімен сенімді жеңіске жетті. Ойын жоғары қарқында өтіп, жанкүйерлердің ыстық қолдауына ие болды.Қостанай облысының әкімі Құмар Ақсақалов матчқа қатысып, команданы маусымның сәтті басталуымен құттықтады.– Мұндай маңызды оқиғаның дәл өңірімізде өтуі – біз үшін қуанышты. Бұл — қостанайлық спорт үшін тарихи сәт. «Тобыл» командасының болашағы зор екеніне сенімдімін, – деді өңір басшысы.Массалық және кәсіби спортты дамыту, жастардың өзін-өзі дамытуына жағдай жасау – облыс жұмысының басым бағыттарының бірі. Әйелдер чемпионаты аясында өтетін ойындар қыз-келіншектерді спортқа тартуға және өңірдегі спорт инфрақұрылымын нығайтуға серпін береді.Ақпарат көзі : https://www.gov.kz/memleket/entities/kostanay/press/news/details/976436?lang=kk