Өткен айда Алматы облысының Мемлекеттік сәулет-құрылыс бақылау басқармасы (ГАСК) инспекторлары ауқымды тексерістер жүргізіп, құрылыс нормалары мен ережелерін бұзудың жүздеген фактісін анықтады. Тексерістердің қорытындысы бойынша 78 әкімшілік материал әзірленді. Олардың 28-і облыстық соттарға жолданды, ал қылмыстық іс қозғалмаған құқықбұзушыларға жалпы сомасы 14 644 140 теңге айыппұл салынды.Тексерістер барысында 23 заңсыз құрылыс нысаны анықталды. Олардың материалдары да сотқа жолданды. Заңсыз салынған құрылыстар, оның ішінде Талғар ауданындағы көпқабатты тұрғын үй кешені, бұзылуға жатады. Қазіргі уақытта 4 сабан үй бұзылды, ал 7 нысанға бұзу туралы талап-арыздар жолданды.Қонаев қаласындағы оқу корпусы, «Eco-Park Alatau» ТК-ның кәріз жүйелері және Райымбек ауданындағы су бөгеттері құрылысы барысында көптеген бұзушылықтар анықталды. Жауапқа тартылған мердігерлер мен техникалық қадағалау ұйымдарына қатысты шаралар қабылданды. 61 құрылыс компаниясы жауапқа тартылды, оның екіуі — ТОО «Sheberbuild» және ТОО «Жаңарту» — сот шешімімен лицензиясынан айрылған.«Алматы облысындағы құрылыс саласын тәртіпке келтіру бойынша жұмыстар жүргізіліп жатыр. Біздің тексерістеріміз тек рәсім ғана емес, қауіпсіздік пен заңдылықты қамтамасыз ету үшін күрес, — деді Алматы облысы сәулет-құрылыс бақылау (ГАСК) басшысының міндетін атқарушы Өзенбаев Ғабиден. — Құрылыс нормаларын бұзушылар заң арқылы қатал жазаланатын болады. Біз облыс бойынша, әрбір құрылыс нысаны барлық талаптар мен стандарттарға сай болғанша алған беттен қайтпай тексеруді жалғастыра береміз!»Алматы облысы мемлекеттік сәулет-құрылыс бақылау басқармасы (ГАСК) облыстағы құрылыс нормалары мен ережелерінің сақталуын қамтамасыз ету жұмысын жалғастыра береді.Ақпарат көзі : https://www.gov.kz/memleket/entities/almobl/press/news/details/890045

2024 жылғы 1 қарашадағы жағдай бойынша жергілікті атқарушы органдардың рұқсатымен Қазақстан аумағында 13 246 шетел азаматы еңбек етеді.Шетел жұмыс күшін (бұдан әрі – ШЖК) тартуға рұқсаттардың арасында мынадай санаттар бар: басшылар мен олардың орынбасарлары үшін 543 рұқсат (бірінші санат), құрылымдық бөлімшелердің басшылары үшін 2 514 рұқсат (екінші санат). Тартылған ШЖК негізгі бөлігі үшінші (мамандар) және төртінші (білікті жұмысшылар) санаттарға жатады – тиісінше олар 4 859 және 917 адам. Сондай-ақ маусымдық жұмыстарға 1 120 адам, ал корпоративтік ауыстыру аясында 3 293 адам тартылды.Қазіргі уақытта Қазақстанда ШЖК пайдаланатын 1 789 жұмыс беруші бар. Оларда 389,8 мыңнан астам Қазақстан азаматы жұмыс істейді, бұл қызметкерлердің жалпы санының 96,8% - ы.Экономикалық қызмет түрлері бойынша ең көп жұмыс істейтіндер құрылыс саласында – 5 155 адам, өңдеу өнеркәсібі – 1 387 адам, әкімшілік және көмекші қызметтер – 1 363 адам, тау – кен өнеркәсібі және карьерлерді қазу – 1 359 адам, ауыл, орман және балық шаруашылығы – 1 168 адам.Еңбек мигранттары келетін негізгі елдер: Қытай – 4 664 адам, Өзбекстан – 1 230 адам, Түркия – 1 150 адам, Үндістан – 1 108 адам.Ішкі еңбек нарығын қорғау мақсатында ҚР Еңбек және халықты әлеуметтік қорғау министрлігі жыл сайын республикаға шетел мамандарын тартуға квота белгілейді және бөледі. 2024 жылы жалпы квота республикадағы жұмыс күшінің санына қатысты 0,23% немесе 17,2 мың бірлік мөлшерінде белгіленді.Ақпарат көзі : https://www.gov.kz/memleket/entities/enbek/press/news/details/890105

Астана, 2024 жылғы 22 қараша – Қазақстан Республикасы Сыртқы істер министрінің орынбасары Әлібек Бақаев Түркі Академиясының Президенті Шахин Мұстафаевты қабылдады.Кездесу барысында тараптар ұйымның ағымдағы қызметі мен 2025 жылы жоспарланған іс-шараларды талқылап, ынтымақтастықтың басым бағыттары бойынша пікір алмасты.Бұдан бөлек, қазақстандық тарап ү.ж. 9-11 қыркүйекте Бакуда тиісті комиссия бекіткен Ортақ түркі әліпбиін қабылдау бойынша Академия жұмысының маңыздылығын атап өтті.Ә.Бақаев Академияның жұмысы түркі мемлекеттерінің ғылым, білім және мәдениет саласындағы ынтымақтастығын тереңдетуге, ортақ тарихи-мәдени мұраны нығайтуға көмектесуге, сондай-ақ оның бүкіл ТМҰ әлемінде танытуға бағытталуы керек екенін атап өтті.Түркі Академиясы 2010 жылғы 25 мамырда Қазақстан Республикасының бастамасымен құрылған. Академияны құру туралы келісімге 2012 жылғы 23 тамызда Бішкек қаласында (Қырғызстан) Түркі мемлекеттері ынтымақтастық кеңесінің ІІ-ші саммиті барысында қол қойылды. Мүшелері: Әзербайжан, Қазақстан, Қырғызстан және Түркия. Бақылаушы мемлекеттер: Мажарстан, Өзбекстан.Ақпарат көзі : https://www.gov.kz/memleket/entities/mfa/press/news/details/889829

2024 жылы 16 535 этникалық қазақ тарихи отанымен табысып, қандас мәртебесін алды. Жалпы 1991 жылдан бері республикаға 1 млн 144,9 мың этникалық қазақ оралды.Жыл басынан Қазақстанға келген қандастардың 45,9%-ы Қытайдан, 39,2% – Өзбекстаннан, 5,8% – Моңғолиядан, 5,2% – Түрікменстаннан, 2,8% – Ресейден және 1,1% басқа елдерден.Осы жылғы 1 қарашадағы жағдай бойынша еңбекке қабілетті жастағы этникалық қоныс аударушылар саны 57,4%-ды, еңбекке қабілетті жастан кіші 33,2%-ды және зейнеткерлер 9,4%-ды құрайды.Еңбекке қабілетті жастағы қандастардың ішінен білім деңгейі бойынша 17,8%-ы жоғары білімді, 24,8%-ы орта кәсіби білімді, 54,4%-ы жалпы орта білімді, және 3% білім жоқ.Қоныс аударған этникалық қазақтар республиканың түрлі өңірлеріне қоныстанды.Сонымен бірге, қандастарды қоныстандыру үшін келесідей еңбек күші тапшы өңірлер анықталды: Ақмола, Абай, Қостанай, Павлодар, Шығыс және Солтүстік Қазақстан облыстары.Қоныстандыру өңірлерінде 2024 жылға арналған қандастарды қабылдау квотасы 3 033 адамды құрайды. 2024 жылғы 1 қарашадағы жағдай бойынша қоныстандыру өңірлеріне 2 841 қандас қоныс аударды.Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (258,4 мың теңге) мөлшерінде; тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (55,3-ден 110,7 мың теңгеге дейін) мөлшерінде.Жыл басынан бері 2 390 қандасқа түрлі қолдау шаралары көрсетілді. Атап айтқанда, 763 адам тұрақты жұмысқа орналастырылды.Сонымен қатар ерікті қоныс аударудың тиімділігін арттыру мақсатында азаматтарды солтүстік өңірлерге қоныс аударуға қатысатын жұмыс берушілерді қолдау бойынша институционалдық шаралар қабылданды. Тұрғын үй сатып алу, салу үшін немесе ипотекалық тұрғын үй қарыздары бойынша бастапқы жарнаның бір бөлігін жабу үшін экономикалық ұтқырлық сертификаты тұрғын үй құнының 50%-ы немесе бір отбасына 4,28 млн теңгеге дейін мөлшерінде біржолғы өтеусіз және қайтарымсыз негізде енгізілді.Естеріңізге сала кетейік, өткен жылда пилоттық режимде Қазақстан елшіліктері арқылы «бір терезе» қағидаты бойынша қандас мәртебесін беру тетігі іске асырылды. Пилоттық жоба шеңберінде елімізге бару, жұмыс орны, тұрғын үй беру мүмкіндіктері туралы мәселені шешуге және республика аумағына кірмей-ақ қандас мәртебесін алуға болады. Бүгінгі таңда этникалық қазақтардан жаңа форматта 21 166 өтініш қабылданды.Ақпарат көзі : https://www.gov.kz/memleket/entities/enbek/press/news/details/889235

Загреб, 2024 жылғы 22 қараша – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Хорватия Республикасына ресми сапары аясында экономиканың түрлі секторларын ұсынатын жетекші хорват компанияларының басшыларымен кездесу өткізді.Атап айтқанда, іс-шараға келесі фирмалардың өкілдері қатысты: «INA» – Балқан өңіріндегі ең ірі мұнай кәсіпорындарының бірі; «JANAF» – «Jadranski naftovod» мұнай құбырлары жүйесінің операторы; әртүрлі жүк түрлерін ауыстырып тиеуді қамтамасыз ететін Риека порты; «JGL» – дәрілік препараттардың кең желісін өндіруші Ядран-Гален зертханасы. Сондай-ақ кездесуге Хорватия экономика палатасының құрамына кіретін әрі туризм, сауда және консалтингтік қызметтер саласында жұмыс істейтін компаниялардың өкілдері қатысты.Кездесудің негізгі мақсаты екіжақты іскерлік серіктестіктің перспективаларын талқылау және ағымдағы геосаяси және геоэкономикалық шындықтарды ескере отырып, оны дамытудың жаңа бағыттарын айқындау болды.ҚР СІМ басшысы сұхбаттастарға Қазақстанда жүргізіліп жатқан негізгі саяси және әлеуметтік-экономикалық реформалар туралы ақпарат берді. Еліміздегі жүйелі қайта құрулар, сондай-ақ инфрақұрылымды, көлік пен логистиканы дамытуға ауқымды инвестициялар, цифрландырудың жоғары деңгейі Қазақстанда бизнес жүргізу үшін қолайлы жағдайларды қамтамасыз ететіні аталып өтті.Министр хорват компанияларын қазақстандық серіктестермен ынтымақтастық орнату мен дамытуға және іскерлік байланыстарды кеңейтуге шақырды. Іскерлік байланыстарды кеңейтудің негізі екі ел арасындағы барлық деңгейлерде жүргізілетін саяси диалогтың оң динамикасы болып табылатынына назар аударылды.Қазақстан мен Хорватияның тиімді геостратегиялық орналасуын назарға ала отырып, сауда-экономикалық және инвестициялық серіктестікті дамытуға екі тараптың Еуропа мен Азия арасындағы негізгі көлік-транзиттік хаб ретінде өз позицияларын нығайтуға ұмтылуы ықпал етеді.Кездесуге қатысушылар энергетика, көлік және логистика, агроөнеркәсіптік кешен, IT-технологиялар, білім беру, туризм сияқты салаларда өзара тиімді бірлескен жобалардың елеулі әлеуетінің бар болуы туралы ортақ пікірге келді.Осыған байланысты хорват компанияларына перспективалы жобаларды айқындау жөніндегі екіжақты тетіктері – Экономикалық ынтымақтастық жөніндегі үкіметаралық комиссия мен «Қазақстан-Хорватия» Іскерлік кеңесінің мүмкіндіктерін пайдалану ұсынылды, олардың келесі отырыстары Астанада 2025 жылы жоспарлануда.Кездесу қорытындысы бойынша өзара тиімді барлық салаларда екіжақты ынтымақтастықты дамыту мақсатында екі елдің үкіметтері мен іскер топтары арасында байланысты қолдау уағдаластығына қол жеткізілді. Ақпарат көзі : https://www.gov.kz/memleket/entities/mfa/press/news/details/889104

Загреб, 2024 жылғы 22 қараша – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Хорватияға ресми сапарының екінші күні Хорватия Республикасының Премьер-министрі Андрей Пленковичтің қабылдауында болды.Қазақстан Президенті Қасым-Жомарт Тоқаевтың 2024 жылғы қарашада Бакуде СОР29 алаңында өткен Хорватия үкіметінің басшысымен екіжақты келіссөздерін жалғастыра отырып, тараптар саяси диалогты нығайтуға және екі ел арасындағы іскерлік байланыстарды кеңейтуге бағытталған алдағы қадамдарды талқылады.Атап айтқанда, Министр сұхбаттасын Мемлекет басшысының бастамасымен Қазақстандағы институционалдық саяси және әлеуметтік-экономикалық реформалармен таныстырды. Іске асырылып жатқан шаралар елімізде бизнесті ашуға және жүргізуге қолайлы жағдай жасауға ықпал ететіні аталып өтті.М. Нұртілеу хорват компанияларды Қазақстанмен сауда-инвестициялық әріптестікті орнатуға және дамытуға шақырып, энергетика, көлік және логистика, ауыл шаруашылығы, ақпараттық технологиялар, білім беру, туризм сияқты перспективалы бағыттарды атап өтті.Осы тұрғыда тараптар іскерлік байланыстарды арттыруға Экономикалық ынтымақтастық жөніндегі қазақ-хорват үкіметаралық комиссиясының және «Қазақстан-Хорватия» Іскерлік кеңесінің жұмысы ықпал етуі тиіс деген ортақ пікір білдірді, олардың келесі отырыстары Астанада 2025 жылы жоспарланып отыр.Өз кезегінде А. Пленкович сенім мен өзара қолдауға негізделген Астана мен Загреб арасындағы саяси диалог пен өзара тиімді әріптестікті нығайтуға деген өзара ұмтылысын растады.Кездесу қорытындысы бойынша тараптар екі ел арасындағы сындарлы өзара іс-қимылды, оның ішінде аса жоғары және жоғары деңгейдегі сапарларды ұйымдастыру және өткізу арқылы жалғастыру уағдаластығына қол жеткізді.Ақпарат көзі : https://www.gov.kz/memleket/entities/mfa/press/news/details/889037

Бүгін Қостанай облысында Ауыл шаруашылығы, тамақ және қайта өңдеу өнеркәсібі қызметкерлерінің күніне арналған мерекелік іс-шаралар өтті. Бұл күні өңірдің және тұтастай алғанда еліміздің агроөнеркәсіптік кешенін дамытуға елеулі үлес қосатын үздік аграрийлер құрметке ие болды.Қостанай облысының әкімі Құмар Ақсақалов құттықтау сөзінде аталған мерекенің өңір үшін, атап айтқанда Қазақстанның азық-түлік қауіпсіздігін қамтамасыз ету үшін ауыл шаруашылығы қызметкерлері еңбегінің маңыздылығын атап өтті.«Біз астықты өлкеде тұрамыз және облысымыздың жетістіктері жермен жұмыс істейтін адамдардың еңбегіне тікелей байланысты. Сіздердің қажырлы еңбектеріңіздің арқасында біз рекордтық өнім жинадық, ал біздің облысымыз дамып, ауыл шаруашылығы саласына инновацияларды енгізуді жалғастыруда», — деді Ақсақалов.Іс-шарада өзінің кәсіби қызметінде жоғары нәтижелерге қол жеткізген қызметкерлерге Қазақстан Республикасының мемлекеттік наградалары:«Парасат» ордені:• «ПКФ Қайрат» ЖШС директоры (Қамысты ауданы) ТөремұратӨтеповке• «Жас Қанат 2006» ЖШС бас директоры (Рудный қ.) Қайрат Маишевқа• «Құрмет» ордені:• «Тогас и К» ЖШС директоры (Қарабалық ауданы) Руслан Қабаевқа• «Асар 1» шаруа қожалығының басшысы (Арқалық қ.) Николай Поспеловқа•III дәрежелі «Еңбек даңқы» ордені «Жаңабек» ЖШС (Алтынсарин ауданы) агрономы Төлеген Сүлейменовке;• «Ерен еңбегі үшін» медалін ҚР АШМ АӨК ҚМИ «Республикалық фитосанитариялық диагностика және болжамдар әдістемелік орталығы» РММ Қамысты аудандық филиалы басшысының міндетін атқарушы Елизавета Рязанцеваға табысталды.Сонымен қатар, Қазақстан Республикасы Ауыл шаруашылығы министрлігінің ведомстволық наградалары:• «Еңбек ардагері» медалі: Қали Балгураевқа (Амангелді ауданы), Иван Шписке (Денисов ауданы), Абай Өмірбаевқа (Қамысты ауданы) және басқаларға;• «Ауыл шаруашылығы саласының үздігі» төсбелгісі «Айдала» ЖШС директоры (Алтынсарин ауданы) Лариса Стороженкоға, «Сарыағаш» ЖШС бас агрономы (Денисов ауданы) Берік Сейітмұратовқа және басқаларға;• ҚР Ауыл шаруашылығы министрлігінің «Құрмет грамотасы» агрономдарды, шаруашылықтардың басшылары мен механизаторларын қоса алғанда, бір топ саланың үздік қызметкерлеріне табысталды.Бұл марапаттар – Қостанай облысының ауыл шаруашылығында және қайта өңдеу кәсіпорындарында жұмыс істейтін қызметкерлердің жоғары кәсібилігі мен өз ісіне адалдығының белгісі.Ақпарат көзі : https://www.gov.kz/memleket/entities/kostanay/press/news/details/888937

Астана, 2024 жылғы 22 қараша – Қазақстан Республикасының Сыртқы істер министрлігінде Бала құқықтары туралы конвенцияны (БҚК) Қазақстан Республикасының ратификациялағанына 30 жыл толуына және Бүкіләлемдік бала күніне арналған ескерткіш пошта блогына мөр басу салтанатты рәсімі өтті.БҚК Қазақстан өз тәуелсіздігінің алғашқы жылдарында ратификациялаған халықаралық келісімдердің бірі болды. Осы арқылы еліміз әр бала үшін тең құқықтарды қамтамасыз ету бойынша жаһандық міндеттемелерді өз еркімен қабылдады. Конвенция балаларға қолайлы қоғам құрудың негізгі құжатына және Қазақстанның ЮНИСЕФ-пен ұзақ мерзімді ынтымақтастығының негізіне айналды.Рәсімге ҚР СІМ Көпжақты ынтымақтастық департаментінің директоры Дидар Теменов, Қазақстандағы БҰҰ Балалар қорының (ЮНИСЕФ) өкілі Рашед Мұстафа Сарвар және «Қазпошта» АҚ басқарушы директоры – басқарма мүшесі Талғат Ғазизов қатысты. Шараға сондай-ақ дипломатиялық миссиялардың басшылары мен халықаралық ұйымдардың өкілдері қатысты.Өз сөзінде Д.Теменов Бала құқықтары туралы конвенцияның маңыздылығын тек Қазақстан үшін ғана емес, бүкіл әлемдік қауымдастық үшін де ерекше екенін атап өтті. Сонымен қатар Президент Қасым-Жомарт Тоқаев 2024 жылғы 2 қыркүйектегі Қазақстан халқына Жолдауында балалардың әл-ауқатын жақсартуды «Қазақстан мемлекеттік саясатының басты басымдығы» деп атағанын еске салды. Дипломат ұлттық деңгейде балалар құқықтарын жүзеге асыруға қолдау көрсеткен барлық серіктестерге алғысын білдіріп, болашақтағы тиімді ынтымақтастыққа сенімін жеткізді.Қазақстандағы ЮНИСЕФ өкілі соңғы 30 жылда Қазақстан мен ЮНИСЕФ балалардың әл-ауқатын жақсарту бағытында бірлесіп жемісті жұмыс атқарғанын атап өтті. Бұл денсаулық сақтау, білім беру және балаларды қорғау салаларындағы айтарлықтай прогресті қамтиды. «Бұл мерейтой тек өткенді қорытындылауға ғана емес, жаңа сын-қатерлер мен басымдықтарды анықтауға да мүмкіндік береді. Әр балаға қолдау көрсету үшін тұрақты шешімдер әзірлеуді жалғастыру және олардың құқықтарын тұрақты даму мақсаттарына сәйкес қорғау өте маңызды», – деп атап өтті ЮНИСЕФ өкілі.Өз тарапынан Т. Ғазизов «Қазпошта» компаниясының СІМ және ЮНИСЕФ бастамасын мақтанышпен қолдайтынын айтты. Оның сөзінше, «ескерткіш пошта блогы маңызды әлеуметтік мәселелерге назар аударып, балаларға Қазақстан бойынша тең мүмкіндіктер жасау жолындағы ортақ мақсатымызды білдіреді».Анықтама: Бала құқықтары туралы конвенция Қазақстан Республикасының Біріккен Ұлттар Ұйымының Балалар қорымен ынтымақтастығының негізі болып саналады. 1994 жылғы 25 қарашада Қазақстан Республикасының Үкіметі мен ЮНИСЕФ арасында ынтымақтастық туралы Негізгі келісімге қол қойылды.Ақпарат көзі : https://www.gov.kz/memleket/entities/mfa/press/news/details/888953

ҚР Еңбек және халықты әлеуметтік қорғау министрлігінде ведомство басшысы Светлана Жақыпованың төрағалығымен алқа отырысы өтті, онда 2024 жылдың 10 айындағы жұмыс қорытындылары мен 2025 жылға арналған жоспарлар талқыланды.Алқа отырысына вице-министрлер, аппарат басшысы, комитет төрағалары, департамент директорлары, әкімдердің орынбасарлары, Еңбекминінің ведомстволық бағынысты ұйымдарының, сондай-ақ еліміздің барлық өңірлерінің жұмыспен қамтуды үйлестіру және әлеуметтік бағдарламалар басқармаларының, еңбек мобильділігі орталықтарының басшылары қатысты.Күн тәртібінде 2025-2030 жылдарға арналған инклюзивті саясат тұжырымдамасын қабылдау және одан әрі іске асыру, арнаулы әлеуметтік қызметтер көрсететін ұйымдардың қызметін лицензиялау, жұмыспен қамтуға жәрдемдесу шараларын көрсету және атаулы әлеуметтік көмек (бұдан әрі – АӘК) жүйесін трансформациялау мәселелері тұрды.Өз сөзінде вице-министр Асқарбек Ертаев 2025 жылғы 1 қаңтардан бастап арнаулы әлеуметтік қызметтер көрсететін ұйымдардың қызметін лицензиялау енгізілетінін айтты. Осы қызметтерге тарифтерді қалыптастыру әдістемесінің жобасы әзірленді.Сондай-ақ, 2025-2030 жылдарға арналған инклюзивті саясат тұжырымдамасының жобасы әзірленді, ол Үкімет аппаратының қарауында.«Тұжырымдама жобасының тұжырымдамалық жаңалығы мүгедектіктің медициналық-әлеуметтік-әлеуметтік-құқық қорғау моделіне көшу бойынша жағдайлар жасау болып табылады. Инклюзивті саясатты іске асырудың жаңа тәсілдері ерекше қажеттіліктері бар адамдардың қоғамға толыққанды әлеуметтік ықпалдасуы үшін жағдай жасауға бағытталған пәрменді шаралар кешенін қабылдауды көздейді. Тұжырымдама жобасы 13 бағытты көздейді және 56 іс-шарадан тұрады», – деп атап өтті Ертаев.Вице-министр Асқар Биахметов өңірлік жұмыспен қамту карталары шеңберінде 804 мыңнан астам адам жұмысқа орналастырылғанын, оның ішінде 260 мыңы – Мемлекет басшысының «10 мың тұрғынға 100 жаңа жұмыс орны» бастамасы аясында жұмысқа орналастырылғанын хабарлады. Ол министрлік зейнетақы жарналары мен электрондық еңбек шарттары бойынша деректерді талдай отырып, ақпараттық жүйелер арқылы апта сайынғы жұмысқа орналасу мониторингін жүргізетінін атап өтті.Бұдан басқа Жұмысшы мамандықтар жылы шеңберінде жұмыскерлер құқықтарын қорғау, жұмысшы кадрларды даярлау жүйесін жетілдіру, жұмыс берушілерді мамандарды оқытуға тарту, сондай-ақ жұмысшы кәсіптерінің беделін арттыру жөніндегі шаралар жоспарланған.Атаулы әлеуметтік көмек көрсету тетіктерін жетілдіру жөніндегі жоспарлар туралы вице-министр Олжас Анафин айтып берді. «Мемлекет басшысы азаматтардың шығыстарын ескере отырып, АӘК көрсету тәсілдерін қайта қарау міндетін қойды. Осыған байланысты Отбасының цифрлық картасын пайдалана отырып, мемлекеттік және мемлекеттік емес ұйымдардың жүйелерімен интеграциялау арқылы АӘК-ті трансформациялау үдерісі жүретін болады. АӘК тағайындау тетігіндегі алдағы өзгерістер шын мәнінде мұқтаж азаматтарды анықтауға және оларға мемлекет тарапынан нысаналы қолдауды қамтамасыз етуге мүмкіндік береді», – деді Олжас Анафин.Мемлекеттік еңбек инспекциясы комитеті төрағасының м.а. Мұрат Мұратбеков 10 айда 4,5 мыңнан астам тексеру жүргізілгенін, 7 мыңнан астам бұзушылық анықталғанын баяндады. Жұмыс берушілерге 2 723 ұйғарым беріліп, 339 млн теңге сомасына 3 207 әкімшілік айыппұл салынды. Республикамыздың 268 кәсіпорны 4,3 млрд теңге сомасына жалақы бойынша берешек екені анықталды. Қабылданған шаралардың нәтижесінде 3,2 млрд теңге төленді, 16,6 мың қызметкердің құқықтары қорғалды.Отырысты қорытындылай келе қатысушылар жыл соңына дейін шешілуі тиіс басты міндеттерді, сондай-ақ 2025 жылға жоспарланған негізгі іс-шараларды талқылады. Әлеуметтік қолдау, қызметтерді цифрландыру және жұмыспен қамтуға жәрдемдесу шараларының тиімділігін арттыруда басымдықтар берілді.Еңбек және халықты әлеуметтік қорғау министрі Светлана Жақыпова қойылған міндеттерді сапалы орындаудың маңыздылығын атап өтіп, оларды іске асырудың ашық мониторингін қамтамасыз ету қажеттігіне назар аударды. Ол сондай-ақ азаматтарды әлеуметтік қорғауды нығайтуға, еңбек құқықтарын бақылауды күшейтуге және халықтың осал топтарын қолдау тетіктерін жетілдіруге бағытталған бірқатар нақты тапсырмалар берді. Ақпарат көзі : https://www.gov.kz/memleket/entities/enbek/press/news/details/888715

Бүгін Қостанай облысы әкімдігінің кезекті отырысы өтті, онда өңірдің әлеуметтік-экономикалық дамуының маңызды мәселелері қаралды. Облыс әкімі Құмар Ақсақалов аграршыларды қолдау, өнеркәсіпті дамыту, өрт қауіпсіздігін қамтамасыз ету және жылу беру маусымындағы тұрақтылық сияқты бірқатар өзекті тақырыптарды қозғады.Диқаншыларды қолдау және ауыл шаруашылығын дамытуОблыс әкімі агроөнеркәсіп кешенінің өңірдің экономикалық өсуінің басты қозғалтқыштарының бірі ретіндегі маңыздылығын атап өтті. Биыл ауыл шаруашылығын қаржыландыру үш есеге ұлғайды, ал келесі жылы 2,6 есеге ұлғайту жоспарлануда. АӨК-те қайта өңделген тауарлардың үлесін 70%-ке дейін ұлғайту мақсатында ауыл шаруашылығы өнімдерін қайта өңдеу басты міндеттердің бірі болып қала береді.«Ауыл шаруашылығы тиімді және орнықты болу үшін өңдеуді дамыту және түпкілікті өнім шығару қажет. Нәтижесінде қосымша құн артып, жаңа жұмыс орындары ашылатын болады», - деді Құмар Ақсақалов.Алдағы жылдары облыста сүт фермаларын, ет кешендерін және бидай өңдеу зауыттарын салуды қоса алғанда, 30-дан астам ірі жобаны іске асыру жоспарлануда. Ең ірі жобалардың бірі – глютен, крахмал және биоэтанол зауыты.Өнеркәсіпті дамыту және өндіріс көлемін ұлғайтуОтырыста қаралған екінші мәселе өңірдің өнеркәсіп жағдайына қатысты болды. Өңір басшысы атап өткендей, Қостанай облысында көптеген экономикалық көрсеткіштер бойынша оң динамика байқалады. Алайда, жеңіл автомобильдер өндірісі сияқты кейбір салаларда шамалы төмендеу тіркелді. Бұл шығындарды металлургия және ауылшаруашылық техникасы сияқты басқа салалардағы өндірісті ұлғайту арқылы өтеу маңызды.Атап айтқанда, тракторлар мен болат прокатының өндірісі ұлғайтылады, сондай-ақ шойын құю және автомобильдерге арналған шанақтарды шығару бойынша жаңа жобалар іске қосылады.Жылу беру маусымындағы өрт қауіпсіздігіТөтенше жағдайлар департаментінің бастығы Дамир Мақсұтұлы Ермағамбетов жылу беру маусымында өрт қаупінің жоғары болуына қатысты проблемалар туралы айтты. Биыл өңірде жылу беру жүйелерін пайдалану ережелерін бұзумен байланысты бірнеше қайғылы жағдай орын алды. «Биыл облыста бірнеше қайғылы жағдай тіркелді, жылыту жабдықтарының ақаулығы салдарынан балалар қаза тапты», — деді ол.Облыс әкімі жылу беру жүйелерінің жай-күйін және пештер мен түтін мұржаларын үнемі тексеріп, алдын алу шараларын жүргізуді қатаң бақылау қажеттігін атап өтті. Бұл мәселеде азаматтардың жауапкершілігі де маңызды, өйткені олар жылыту жабдықтарындағы кез келген ақаулар туралы уақтылы хабарлауға тиіс.Әкімдіктің кезекті отырысында ауыл шаруашылығы мен өнеркәсіпті дамытуға, сондай-ақ жылу беру кезеңінде қауіпсіздікті қамтамасыз етуге үлкен көңіл бөлінді. Құмар Ақсақалов мемлекеттік құрылымдар мен бизнестің бірлескен күш-жігері өңірдің экономикалық және әлеуметтік дамуында елеулі нәтижелерге қол жеткізуге ықпал ететінін атап өтті.Ақпарат көзі : https://www.gov.kz/memleket/entities/kostanay/press/news/details/887156

Астана, 2024 жылғы 21 қараша – Қазақстан Республикасы Сыртқы істер министрінің орынбасары Роман Василенко Солтүстік Македонияның Елшісі Сали Лиманиді еліміздегі дипломатиялық миссиясының аяқталуына байланысты қабылдады.Қазақстандық дипломат С. Лиманиге ҚР Премьер-Министрінің орынбасары – Сыртқы істер министрі Мұрат Нұртілеудің атынан алғыс грамотасын табыстап, Солтүстік Македония Елшісінің Қазақстандағы қызметі барысында екіжақты саяси және сауда-экономикалық байланыстарды дамытуға қосқан елеулі үлесін атап өтті. 88 жылдық тарихы бар «Alkaloid» танымал фармацевтикалық компанияның Қазақстан нарығына кіруі және Солтүстік Македония делегациясының Астанадағы Дүниежүзілік көшпенділер ойындарына қатысуы ерекше аталып өтті.Сұхбаттастар екіжақты қарым-қатынастарға екі ел басшылары Қасым-Жомарт Тоқаев пен Гордана Силяновска-Давкованың COP29 шеңберінде Бакуде өткен кездесуінің маңызды серпін бергенін, сондай-ақ келесі жылы Солтүстік Македония басшысына Қазақстанға сапармен келу шақыруын атап өтті. Биыл Солтүстік Македонияда ашылған ҚР Елшілігінің екіжақты ынтымақтастықтың әрі қарай тереңдеуіне ықпал ететініне сенім білдірілді.Кездесудің соңында Р. Василенко С. Лиманиге алдағы қызметіне сәттілік тіледі.Өз кезегінде Астанада төрт жыл тиімді еңбек еткен Солтүстік Македония Елшісі Қазақстан тарапына жылы қабылдау үшін алғыс білдіріп, екі ел арасындағы ынтымақтастықтың жалғасуына үміт артты.Анықтама: 2024 жылдың қаңтар-қыркүйек кезеңінде Қазақстан мен Солтүстік Македония арасындағы сауда айналымы 5,7 млн АҚШ долларын (экспорт – 204 мың, импорт – 5,5 млн) құрады. Импорттың негізгі тауарлары – бөлшек саудаға арналған дәрілік заттар.Ақпарат көзі : https://www.gov.kz/memleket/entities/mfa/press/news/details/888092

Исламабад, 2024 жылғы 19-20 қараша – Исламабадқа сапары аясында Қазақстан Сыртқы істер министрінің орынбасары Әлібек Бақаев Пәкістан Сыртқы істер министрінің орынбасары Ахмед Насим Варайчпен екіжақты саяси консультациялардың үшінші отырысын өткізді.Консультациялар барысында тараптар екіжақты күн тәртібіндегі мәселелердің кең ауқымын талқылап, түрлі салаларда, әсіресе сауда-экономикалық және көлік-логистикалық бағыттар бойынша ынтымақтастықтың оң қарқынын атап өтті. Бұл ретте саяси диалогты одан әрі нығайту, парламентаралық байланыстарды дамыту және қауіпсіздік саласында өзара іс-қимылды жолға қоюдың маңыздылығы айтылды. Білім беру, мәдениет, туризм және спорт салаларындағы ынтымақтастық мәселелеріне ерекше назар аударылды.Келіссөздер барысында тараптар халықаралық күн тәртібіндегі мәселелер және өңірдегі оқиғалар бойынша пікір алмасып, көпжақты ұйымдар аясындағы ынтымақтастықты одан әрі нығайту маңыздылығын атап өтті.Іс-сапар шеңберінде Ә. Бақаев Пәкістанның негізгі федералды ведомстволарының басшыларымен бірқатар кездесулер өткізді. Атап айтқанда, Өнеркәсіп және өндіріс, Ұлттық азық-түлік қауіпсіздігі және зерттеулер федералды министрі Рана Танвир Хуссейнмен, Экономикалық істер министрінің бірінші орынбасары – Федералды хатшы Қазым Ниязбен және Сауда министрінің бірінші орынбасары – Федералды хатшы Джавад Паул Хаваджамен келіссөздер жүргізді.Кездесулер барысында тараптар ауыл шаруашылығы саласындағы ынтымақтастықты, екіжақты сауданы арттыру және 13-ші Қазақстан-Пәкістан үкіметаралық комиссиясының отырысын мазмұндық толықтыру мәселелерін талқылады. Сондай-ақ қазақстандық және пәкістандық кәсіпкерлер арасында өзара іс-қимыл үшін қолайлы жағдайлар жасау мақсатында шарттық-құқықтық базаны нығайтудың маңыздылығын атап өтті.Сонымен қатар іс-сапар аясында «Пәкістанмен сауда-экономикалық ынтымақтастығының контекстінде Қазақстанның іскерлік және инвестициялық мүмкіндіктері» тақырыбында дөңгелек үстел ұйымдастырылды. Оған ірі бизнес өкілдері мен Пәкістанның жетекші қалаларының сауда-өнеркәсіп палаталарының басшылары қатысты.Өзінің сөзінде Ә. Бақаев Қазақстанның инвестициялық климаты мен іскерлік мүмкіндіктері туралы баяндап, пәкістандық кәсіпкерлерді қазақстандық іскерлік топтарымен ынтымақтастықты белсенді түрде жолға қоюға және дамытуға шақырды.«Kazakh Invest» ҰК» АҚ басқарушы директоры Азамат Қожанов пәкістандық кәсіпкерлердің қызығушылығын тудыратын Қазақстан экономикасының нақты секторлары бойынша презентациялар жасады.Ақпарат көзі : https://www.gov.kz/memleket/entities/mfa/press/news/details/888135

Загреб, 2024 жылғы 21 қараша – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Хорватияның Сыртқы және еуропалық істер министрі Гордан Грлич-Радманның шақыруымен Хорватия Республикасына ресми сапармен келді.Қазақстанның сыртқы саяси ведомствосы басшысының Загребке сапары қазақ-хорват ынтымақтастығының дамуына жаңа сапалы серпін беретін екіжақты қатынастар тарихындағы алғашқы сапар.Тараптар саяси диалогты, сауда-экономикалық және инвестициялық өзара іс-қимылды, сондай-ақ мәдени-гуманитарлық байланыстарды нығайтуды қоса алғанда, екіжақты ынтымақтастықтың кең ауқымды мәселелерін талқылады. Қазақстан мен Хорватия энергетика, көлік, соның ішінде азаматтық авиация, ауыл шаруашылығы, цифрландыру және инновация, сондай-ақ білім беру және туризм сияқты салаларда өзара тиімді ынтымақтастықты тереңдету үшін айтарлықтай әлеуетке ие екендігі аталып өтті.ҚР СІМ басшысы Хорватия Қазақстанның Балқан мен Еуропалық Одақтағы бұрыннан келе жатқан және жақын серіктесі екенін мәлімдеді. «Біз достық пен өзара сенімге негізделген барлық деңгейдегі мағыналы саяси диалогымызды жоғары бағалаймыз. Экономикалық өзара іс-қимыл – қазақ-хорват қатынастарының негізгі бағыттарының бірі», – деді М.Нұртілеу.Хорватия Қазақстанның Оңтүстік Шығыс Еуропадағы сауда серіктестері арасында үшінші орынға ие. 2023 жылдың қорытындысы бойынша өзара тауар айналымы 432 млн АҚШ долларын құрады.Осы тұрғыда екінші отырысы 2025 жылы Астанада өтуі жоспарланған Сауда-экономикалық ынтымақтастық жөніндегі үкіметаралық комиссияның жұмысын жандандыру туралы уағдаластыққа қол жеткізілді.Өз кезегінде Хорватияның министрі Загреб Астанамен қарым-қатынасты одан әрі ілгерілетуге мүдделі екенін және өзара қызығушылық тудыратын барлық салаларда өзара тиімді әріптестікті ілгерілету үшін барлық күш-жігерді жұмсауға дайын екенін жеткізді.Халықаралық күн тәртібінің өзекті мәселелері, сондай-ақ БҰҰ, ЕҚЫҰ және басқа да көпжақты құрылымдар аясындағы өзара іс-қимыл жөнінде пікір алмасылды. Орталық Азия мен Балқандағы әріптестік аспектілеріне, жаһандық және өңірлік тұрақтылықты қамтамасыз ету мәселелеріне ерекше назар аударылды.Кездесу қорытындысы бойынша Қазақстан Сыртқы істер министрлігі мен Хорватия Сыртқы және еуропалық істер министрлігі арасындағы 2025-2027 жылдарға арналған ынтымақтастық бағдарламасына, сондай-ақ ҚР Мемлекеттік басқару академиясы жанындағы Дипломатия институты мен Хорватия дипломатиялық академиясы арасындағы ынтымақтастық туралы Меморандумға қол қойылды.Ақпарат көзі : https://www.gov.kz/memleket/entities/mfa/press/news/details/888189

Жыл басынан бері мүгедектігі бойынша және асыраушысынан айырылу жағдайы бойынша мемлекеттік әлеуметтік жәрдемақыларды (бұдан әрі – МӘЖ) төлеуге республикалық бюджеттен 508,3 млрд теңге жұмсалды. Бұған қосымша Мемлекеттік әлеуметтік сақтандыру қорынан (бұдан әрі – МӘСҚ) еңбекке қабілеттілігінен айырылу және асыраушысынан айырылу бойынша шамамен 66,5 млрд теңге сомасына әлеуметтік төлемдер жүзеге асырылды.2024 жылғы 1 қарашадағы жағдай бойынша мүгедектігі бойынша МӘЖ алушылар саны шамамен 542,2 мың адамды, асыраушысынан айырылу жағдайы бойынша – шамамен 177,9 мың адамды құрайды.Мүгедектігі бойынша мемлекеттік әлеуметтік жәрдемақылардың мөлшері мүгедектіктің тобына және себебіне, сондай-ақ тиісті қаржы жылына арналған «Республикалық бюджет туралы» заңда белгіленген ең төмен күнкөріс деңгейінің шамасына байланысты болады.Асыраушысынан айырылу жағдайы бойынша мемлекеттік әлеуметтік жәрдемақылардың мөлшері қайтыс болған асыраушының асырауындағы адамдардың санына, қайтыс болу себептеріне және ең төмен күнкөріс деңгейіне байланысты болады.Бұдан басқа, міндетті әлеуметтік сақтандыру жүйесіне қатысушыларға әлеуметтік тәуекелдер туындаған жағдайда МӘСҚ-тен әлеуметтік төлемдер жүзеге асырылады. Мәселен, 2024 жылғы 1 қарашадағы жағдай бойынша 99,9 мың адам еңбек ету қабілетінен айырылу бойынша әлеуметтік төлем, ал 66,3 мыңға жуық отбасы асыраушысынан айырылу бойынша әлеуметтік төлем алды.Төлемдердің мөлшері жеке және мыналарға байланысты: соңғы 2 жылда МӘСҚ-ға әлеуметтік аударымдар жүргізілген орташа айлық табыс, еңбекке қабілеттілігінен айырылу коэффициенттері, асырауындағы адамдар саны, міндетті әлеуметтік сақтандыру жүйесіне қатысу өтілі және табысты ауыстыру.Бұл төлемдер республикалық бюджеттен төленетін ұқсас жәрдемақыларға қосымша жүзеге асырылады.2024 жылғы 1 қаңтардан бастап мүгедектігі бойынша және асыраушысынан айырылу жағдайы бойынша мемлекеттік әлеуметтік жәрдемақылардың мөлшері ең төмен күнкөріс деңгейінің ұлғаюына байланысты 7%-ға өсті. ҚР Үкіметінің шешімі бойынша еңбекке қабілеттілігінен айырылу және асыраушысынан айырылу бойынша МӘСҚ-дан төленетін төлемдердің мөлшері де 7%-ға артты.Мысалы, 2024 жылғы 1 қаңтардан бастап жалпы аурудан мүгедектігі бойынша МӘЖ мөлшері 1-топ үшін – 95 496 теңгені, 2-топ үшін – 76 397 теңгені, 3-топ үшін 52 089 теңгені құрайды.2024 жылғы 1 қарашадағы жағдай бойынша еңбекке қабілеттілігінен айырылу бойынша әлеуметтік төлемдердің орташа мөлшері 59 256 теңгені, асыраушысынан айырылу бойынша – 63 743 теңгені құрайды.Ақпарат көзі : https://www.gov.kz/memleket/entities/enbek/press/news/details/887374

Қазақстан Республикасы Еңбек және халықты әлеуметтік қорғау бірінші вице-министрі Ақмәди Сарбасов Әзербайжанда өткен БҰҰ-ның Климаттың өзгеруі жөніндегі конференциясының бірқатар сессияларына қатысты. Іс-шарада климаттың өзгеруі жағдайындағы инклюзивтілік және гендерлік теңдік мәселелері, сондай-ақ экологияны қорғау үшін үкіметтер, кәсіподақтар мен жұмыс берушілер қабылдаған шаралар талқыланды.Ақмәди Сарбасов баяндамасында климаттың өзгеруі тек экологиялық ғана емес, сонымен бірге жүйелі тәсілді қажет ететін әлеуметтік проблема екенін атап өтті.«Климаттың өзгеруі – бұл жалпыға әсер ететін және кешенді тәсілді қажет ететін әлеуметтік сынақ. Экологиялық тұрақтылық экономика мен қоғамның тұрақты дамуымен тығыз байланысты, бұл халықтың барлық топтарының қатысуы мен күш-жігерін талап етеді», – деп атап өтті ол.Бірінші вице-министр Қазақстанда іске асырылып жатқан кешенді шаралар туралы, оның ішінде 2060 жылға дейінгі көміртегі бейтараптығына қол жеткізу стратегиясы, Экологиялық және Әлеуметтік кодекстердің ережелері, Инвестициялық саясат тұжырымдамасы және қауіпсіз еңбекті қамтамасыз ету жөніндегі бағдарламалар туралы егжей-тегжейлі айтты.А. Сарбасов гендерлік теңдік мәселелеріне ерекше назар аударды.«Әйелдер жұмыс орындарын жоғалту тәуекелінің жоғарылауына тап болады, өйткені экологиялық өзгерістермен байланысты тұрақты энергетика және құрылыс мамандықтары негізінен ерлер кәсібіне бағытталған. Біздің климаттық шараларымыз қазір бар теңсіздікті ушықтырмау үшін инклюзивтілік пен гендерлік теңдік қағидаттарын ескеруі керек, бұл ретте керісінше, әйелдер мен басқа да осал топтардың экологиялық өзгермелілікке тең қатысуы үшін жағдай жасалуы тиіс», – деп атап өтті ол.Бірінші вице-министр сонымен бірге осы экологиялық өзгерістерге байланысты жұмысынан немесе табысынан айырылуы мүмкін адамдар үшін кедейлік және әлеуметтік оқшаулануды болдырмауға қабілетті болатындай әлеуметтік қорғау жүйесін құрудың маңыздылығын атап өтті. Әлеуметтік қорғау бағдарламалары адамдардың жаңа экономикаға енуіне көмектесетін қайта даярлау және бейімделу мүмкіндіктерін қарастыруы керек. Олар жұмыскерлердің жаңа жұмыс орындарына ауысуын қолдап әрі қауіпсіздігін де қамтамасыз етуі тиіс.А. Сарбасов тиімді құрал ретінде – «Электрондық еңбек биржасын» мысалға келтірді, ол жұмыс іздеу және кадрларды іріктеу мүмкіндігі бар жұмысқа орналастыру бойынша бірыңғай цифрлық алаң болып табылады.Сөз соңында бірінші вице-министр еңбек қауіпсіздігі мен гигиенасын арттырудың, сапалы жұмыс орындарын құрудың және процестің барлық қатысушылары арасындағы әлеуметтік диалогты нығайтудың маңыздылығын талқылады. Ақпарат көзі : https://www.gov.kz/memleket/entities/enbek/press/news/details/887787

ҚР Еңбек және халықты әлеуметтік қорғау министрлігі 2025 жылдың қаңтарындағы демалыс күнін ауыстыруды көздейтін бұйрық дайындады.ҚР Еңбек және халықты әлеуметтік қорғау министрінің «2025 жылы демалыс күнін ауыстыру туралы» бұйрығына сәйкес, 2025 жылғы 5 қаңтардағы жексенбі, яғни демалыс күні 2025 жылғы 3 қаңтарға, жұмаға ауыстырылады.Осылайша, аптасына бес күн жұмыс жасайтын қазақстандықтар 1-4 қаңтар, ал жұмыс аптасы алты күнді құрайтын азаматтар – 1-3 қаңтар күндері демалатын болды.Демалыс күнін ауыстыру жұмыс уақытын оңтайлы бөлуге және азаматтардың демалысы үшін қолайлы жағдай жасауға мүмкіндік береді.Ақпарат көзі : https://www.gov.kz/memleket/entities/enbek/press/news/details/887881

Мүгедектігі бар адамдардың заңды құқықтарын қамтамасыз ету және олар үшін қолжетімді ортаны қалыптастыру мақсатында Қызылорда облысында 1 248 әлеуметтік инфрақұрылым нысаны толық бейімделді.Қазіргі уақытта Қазақстан Республикасында мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі 2025 жылға дейінгі ұлттық жоспар, «Аманат» партиясының 2023-2027 жылдарға арналған жол картасы, сондай-ақ Мемлекет басшысының тапсырмасы бойынша бастамашылық жасалған «Халықпен бірге» жобасы іске асырылуда. «Amanat» партиясының жол картасына сәйкес интерактивті қолжетімділік картасына (бұдан әрі – Карта) енгізілген 35 мыңнан астам нысанды бейімдеу жоспарлануда. Жыл сайын нысандардың 20% бейімделеді:2023 жылы – 20%;2024 жылы – 40%;2025 жылы – 60%;2026 жылы – 80%;2027 жылы – 100%.Қазіргі уақытта ел бойынша 20 849 объект толығымен бейімделген. Қызылорда облысында 2024 жылы 948 нысанды бейімдеу жоспарланған болатын, алайда өңір жоспарды асыра орындады: 1248 нысанға қолжетімділік қамтамасыз етілді. Оның ішінде мүгедектігі бар адамдардың барлық санаттары үшін қол жетімді:- денсаулық сақтау объектілері – 128;- білім беру объектілері – 586;- мәдениет нысандары – 117;- сауда және қызмет көрсету объектілері – 31;- мемлекеттік және квазимемлекеттік ұйымдар – 250;- спорт нысандары – 19;- көлік инфрақұрылымы объектілері – 11;- қоғамдық тамақтандыру, сауда, қызмет көрсетуді ұйымдастыру – 92;- әлеуметтік қорғау объектілері – 8;- басқалары – 6.«Мен күн сайын Қызылордадағы дүкен, дәріхана, аурухана сияқты өзге де түрлі әлеуметтік маңызы бар мекемелерге барамын. Мен үшін олардың қол жетімді болуы маңызды. Қазір көптеген нысандар кресло-арбалардағы адамдарға арналған көтергіштермен, арнайы қызмет көрсету аймақтарымен жабдықталған. Жаңа ғимараттар халықтың аз қозғалатын топтарының қажеттіліктерін ескере отырып салынуда, пандустармен, тұтқалармен, лифттермен және тактильді белгілермен жабдықталып жатыр. Жұмыс істеп тұрған нысандардың иелері оларды қол жетімді ету үшін өзгерістер енгізетінін бөлек атап өтемін. Біз сондай-ақ кәсіпкерлерге өз ұсыныстарымызды да жеткіземіз. Мысалы, «Отбасы банк» АҚ филиалында көтергіш құрылғы орнатылған, ол маған бөгде адамның көмегінсіз жүруге мүмкіндік береді. Мен жиі баратын Халыққа қызмет көрсету орталықтарында бағыттаушы жолақтар, белгілер және көмек көрсететін қызметкерлер де қарастырылған. Бұл өте ыңғайлы», – деп бөлісті бірінші топтағы мүгедектігі бар Сағатбек Сиюов.Бұдан басқа, биыл мемлекеттік бақылау шеңберінде ҚР ЕХӘҚМ Халықты әлеуметтік қорғау саласындағы реттеу және бақылау комитетінің Қызылорда облысы бойынша департаменті әлеуметтік инфрақұрылым объектілеріне 104 тексеру жүргізді. Оның ішінде: профилактикалық бақылау шеңберінде 39 тексеру, жоспардан тыс 6 тексеру, прокуратураның талабы бойынша 59 тексеру болды.Тексеру қорытындысы бойынша анықталған бұзушылықтарды жою туралы 31 ұйғарым беріліп, 6,4 млн теңгеден астам сомаға 53 әкімшілік айыппұл салынды.Объектілердің меншік иелеріне профилактикалық бақылау жүргізу кезінде бұзушылықтар алғаш рет анықталған кезде оларды әкімшілік жауапкершілікке тартпастан жою туралы нұсқамалар ғана берілетінін атап өту қажет. Нұсқама белгіленген мерзімде орындалмаған жағдайда айыппұл салынады.Ақпарат көзі : https://www.gov.kz/memleket/entities/enbek/press/news/details/888264

Астана, 2024 жылғы 20 қараша – Қазақстан Республикасы Сыртқы істер министрінің орынбасары Роман Василенко Финляндия Республикасының Қазақстан Республикасындағы жаңадан тағайындалған Елшісі Янне Хейсканенмен кездесу өткізді.Кездесу барысында тараптар екіжақты қатынастарға үлкен серпін берген Қазақстан Президенті Қасым-Жомарт Тоқаев пен Финляндия Президенті Александр Стуббтың Бакуде өткен жақындағы кездесуін атап өтіп, фин басшысына келесі жылы Қазақстанға сапармен келуге шақыру жасалды.Сауда-экономикалық ынтымақтастық жөніндегі үкіметаралық комиссияның нәтижелі жұмысын құптай отырып, тараптар қазақ-фин әріптестігін одан әрі нығайтуға өзара мүдделілік білдірді.Министрдің орынбасары екіжақты қатынастардың шарттық-құқықтық базасын кеңейту және іскерлік байланыстарды арттырудың маңыздылығын, сондай-ақ Финляндиямен көпжақты мәселелер бойынша, соның ішінде БҰҰ, ЕО және ЕҚЫҰ шеңберіндегі тығыз ынтымақтастықты атап өтті.Қазақ тарапы Финляндияға 2025 жылы ЕҚЫҰ-ға төрағалық ету жөніндегі жауапты миссиясына сәттілік тілеп, ұйымның қазіргі күрделі дағдарысқа қарамастан, диалог пен ынтымақтастық үшін бірегей әрі маңызды алаң болып қалатынын атап өтті. Р. Василенко келесі жылы 50 жылдық мерейтойы аталып өтетін Хельсинки қорытынды актісі ережелерінің, , сондай-ақ 2010 жылы Астана саммитінде қабылданған қорытынды декларациясы мен ЕҚЫҰ-ның басқа да негізгі құжаттардың маңыздылығын атады.Кездесу соңында Р. Василенко Финляндия Елшісіне Қазақстандағы миссиясында табысты және жемісті жұмыс тіледі.Анықтама: 2023 жылы Қазақстан мен Финляндия арасындағы тауар айналымы 208,2 млн АҚШ долларын құрады (экспорт – 3,1 млн, импорт – 205,1 млн). 2024 жылғы қаңтар-қыркүйек айларында тауар айналымы шамамен 142 млн долларды құрады (экспорт – 8 млн, импорт – 134 млн). 2005 жылдан бері Финляндияның Қазақстанға тікелей инвестицияларының жалпы көлемі 432,8 млн АҚШ долларын құрады. Қазақстанда фин капиталының қатысуымен 71 кәсіпорын тіркелген.Ақпарат көзі : https://www.gov.kz/memleket/entities/mfa/press/news/details/887023

Астана, 2024 жылғы 20 қараша – Қазақстан Республикасы Сыртқы істер министрінің орынбасары Роман Василенко Кипр Республикасының Қазақстан Республикасындағы жаңадан тағайындалған Елшісі Петрос Накусистен сенім грамоталарының көшірмелерін қабылдап, қызметіне сәттілік тіледі.Сұхбат барысында тараптар екіжақты ынтымақтастықтың басымды перспективалық бағыттарды талқылады. Кипр Сыртқы істер министрі Константинос Комбостың 2024 жылғы наурыздағы Астанаға ресми сапарының қорытындысы бойынша қол жеткізілген екіжақты келісімдердің негізінде саяси диалогты құрудың, сондай-ақ Қазақстан мен Кипр арасындағы сауда-экономикалық әріптестікті кеңейтудің маңыздылығы аталып өтті.Р. Василенко Кипр Республикасы басшылығының Қазақстанда Елшілікті ашу туралы шешімін құптап, қазақ-кипр қарым-қатынастарын одан әрі ілгерілету жолында маңызды рөл атқаратынына сенім білдірді. Кездесу барысында екі мемлекеттің БҰҰ Жарғысын құрметтеуге міндеттемесі аталып өтіп, кипр мәселесі іргелі құжатқа сәйкес әлемдік ұйымның қамқорлығымен шешудің маңыздылығы туралы айтылды.Кездесу соңында кипр дипломаты жылы қабылдау үшін алғысын жеткізіп, екі ел арасындағы ынтымақтастықты нығайтуға бар күш-жігерін салуға дайын екенін растады.Анықтама: 2024 жылдың қаңтар-қыркүйек айларында екі ел арасындағы тауар айналымы 6,1 млн АҚШ долларын (экспорт – 5,2 млн, импорт – 918,6 мың) құрады, бұл 2023 жылғы көрсеткіштен 5 есеге жоғары – 1,6 млн доллар (экспорт – 243,6 мың, импорт – 1,4 млн). 2005 жылдан бері Кипрден ҚР-ға тікелей шетелдік инвестициялардың көлемі 4,5 млрд доллардан астамын құрады. 2024 жылғы 1 қарашадағы көрсеткіш бойынша ҚР-да 60 бірлескен кәсіпорын тіркелді.Ақпарат көзі : https://www.gov.kz/memleket/entities/mfa/press/news/details/886935

Шымкент-Түркістан, 2024 жылғы 16-19 қараша – Қазақстан Республикасы Сыртқы істер министрлігі Қазақстан Республикасының ЮНЕСКО және ИСЕСКО істері жөніндегі Ұлттық комиссиясы және Халықаралық Орталық Азия зерттеулер институтымен бірлесе отырып, қазақстандық дипломаттардың мәдени және табиғи мұраны сақтау саласындағы әлеуетін арттыруға бағытталған жыл сайынғы курстарды өткізді.2022 жылдан бастап іске асырылып келе жатқан бағдарлама дипломаттардың кәсіби даярлығын арттыру және әлемдік аренада мәдени және табиғи құндылықтарды ілгерілету мақсатында әлемдік мұраны сақтау жөніндегі халықаралық құралдарды қолдану туралы теориялық және тәжірибелік білім береді.Бұл курстар Қазақстан аумағында алғаш рет ұйымдастырылды. Жетекші өңірлік және халықаралық сарапшылармен бірге курс қатысушылары ЮНЕСКО-ның Дүниежүзілік мұраның негізгі нысандары – Қожа Ахмет Ясауи кесенесі мен Ақсу-Жабағлы табиғи қорығын, сондай-ақ Түркістан, Отырар, Сауран, Күлтөбе ежелгі қалашықтарды қоса алғанда, «Ұлы Жібек жолы» трансұлттық номинациясының әлеуетті ескерткіштерін аралап көрді.Бұл бағдарлама Қазақстанның жоғары халықаралық стандарттарға сәйкес өзінің бірегей мұрасын сақтап қалуға деген бейілділігін көрсетеді.ЮНЕСКО-ның Дүниежүзілік мұра тізіміне Қазақстаннан алты номинация шеңберінде он жеті нысан енгізілген, бұл ЮНЕСКО-ның Дүниежүзілік мәдени және табиғи мұраларды қорғау туралы конвенциясына сәйкес олардың сақталуын қамтамасыз етеді. Қазіргі уақытта Қазақстан Дүниежүзілік мұра комитетінің мүшесі бола отырып, ЮНЕСКО-ның осы беделді тізіміне жаңа нысандарды енгізу жөніндегі шешімдерді қабылдауда және оларды қорғау жөнінде ұсыныстар береді.Ақпарат көзі : https://www.gov.kz/memleket/entities/mfa/press/news/details/886814