ТУРИНДЕГІ УНИВЕРСИАДАДА ЕЛІМІЗДІҢМЕМЛЕКЕТТІК ТУЫ КӨТЕРІЛДІБүгін ХХХІІ Дүниежүзілік қысқы студенттік ойындарының спортшылар қалашығында Мемлекеттік ту көтеру рәсімі өтті.ҚР Ғылым және жоғары білім министрі Саясат Нұрбек XXXII Дүниежүзілік қысқы универсиада ашылуына орай қазақстандық спортшыларға үндеу жолдап, қолдау көрсетті. Әлемнің түрлі елдерінен 2000-ға жуық студент-спортшы қатысатын осы беделді жарыста Қазақстанның намысын ұлттық және жастар құрамаларын 103 спортшы қорғайды.Министрдің айтуынша, жастардың жан-жақты дамуына, соның ішінде спортпен белсенді айналысуына жағдай жасау – министрліктің негізгі міндеттерінің бірі. Саясат Нұрбек сондай-ақ талантты студенттерге республикалық және халықаралық жарыстарға қатысу мүмкіндіктерін ұсынуға ерекше назар аударды.«Президент спортты дамытуға ерекше мән беріп отыр. Бұл – тек спорт саласын ғана емес, жалпы халықтың денсаулығын нығайтуға, өмір сапасын жақсартуға бағытталған стратегиялық ұстаным. Мемлекет басшысының бұл бастамасы спортты дамыту мен дене шынықтыруды халық арасында кеңінен насихаттау қажеттілігін айқындайды», – деді министр.Саясат Нұрбек өз сөзінде спортшыларға жеңіс тілеп, оларды сәттілікке жетелейтінін айтып, барлық қазақстандықтар олардың жетістіктерін асыға күтіп отырғанын атап өтті.Сондай-ақ сайыс алдында қазақстандық делегацияны бастап барған ғылым және жоғары білім вице-министрі Талғат Ешенқұлов ұлттық құрама өкілдерімен кездесіп, соңғы дайындық жұмыстарын пысықтады.Ақпарат көзі : https://www.gov.kz/memleket/entities/sci/press/news/details/917031

Астана, 2025 жылғы 10 қаңтар – Қазақстан тарапының шақыруымен Қырғыз Республикасының Сыртқы істер министрі Жээнбек Кулубаев Астанаға алғашқы ресми сапарын жасады.Келіссөздер барысында Қазақстан Премьер-Министрінің орынбасары – Сыртқы істер министрі Мұрат Нұртілеу мен Қырғызстан Сыртқы істер министрі Жээнбек Кулубаев екіжақты ынтымақтастықтың кең ауқымды мәселелерін, саяси, сауда-экономикалық, инвестициялық, су-энергетикалық, транзит-көліктік және мәдени-гуманитарлық өзара іс-қимылдың басымды бағыттарын талқылады. Достық, бауырластық және тату көршілік қағидаттарына негізделген одақтастықты тереңдетуге өзара бейілділік расталды.ҚР Сыртқы істер министрі мемлекет басшыларының саяси ерік-жігерінің арқасында қазақ-қырғыз қатынастары өзара іс-қимылдың жаңа сапалы деңгейіне көтерілгеніне назар аударды. Атап айтқанда, Қырғыз Республикасының Президенті Садыр Жапаровтың ресми сапарының қорытындысы бойынша Қазақстан мен Қырғызстан арасындағы одақтастық қатынастарды тереңдету және кеңейту туралы шартқа қол қойылып, екі ел арасындағы достық байланыстарды жан-жақты нығайтуға бағытталған бірқатар экономикалық және мәдени-гуманитарлық іс-шаралар өткізілді.«Қырғызстан біз үшін тек сенімді одақтас қана емес, сонымен қатар жақын көрші және бауырлас халық. Бізді ғасырлар бойы қалыптасқан достық байланыстар, ортақ рухани құндылықтар және біртұтас түркі тамырлар біріктіреді», – деді М.Нұртілеу.Өз кезегінде Ж.Кулубаев екі ел арасындағы қарым-қатынастар бүгінгі таңда жаңа сапалы деңгейге көтеріліп, тереңдетілген одақтастық сипатқа ие болғанын растады.Сыртқы саяси ведомстволардың басшылары 2024 жылғы 19 сәуірде Астанада өткен Қазақстан мен Қырғызстанның Жоғары мемлекетаралық кеңесінің 6-шы отырысында қол жеткізілген келісімдердің орындалу барысын жан-жақты талқылады. Тараптар екі ел арасындағы парламентаралық және үкіметаралық байланыстарды одан әрі кеңейтуге жәрдемдесуді жалғастыруға уағдаласты.Тараптар экономикалық ынтымақтастықты кеңейтудің маңыздылығын ерекше атап өтті. Қазіргі таңда Қазақстан Қырғызстанның ең ірі сауда серіктесінің «үштігіне» кіреді. Қабылданып жатқан шаралардың арқасында соңғы жылдары екіжақты тауар айналымы тұрақты түрде 1,5 млрд АҚШ долларынан асып отыр. Жоғары деңгейде қол жеткізілген келісімдерді жүзеге асыру аясында министрлер өзара сауда көлемін 3 млрд АҚШ долларына дейін жеткізуге жәрдемдесу жөнінде уағдаласты. Осы орайда тараптар қазақ-қырғыз шекарасында Индустриялық сауда-логистикалық кешенін іске қосудың, екіжақты тауар айналымының номенклатурасын кеңейтудің, бизнес-форумдар мен сауда миссияларын тұрақты түрде өткізудің, сондай-ақ өңіраралық байланыстарды одан әрі дамытудың маңыздылығын атап өтті.Екі елдің кәсіпкерлік ортасы үшін қолайлы жағдай жасауға ерекше назар аударылды. Қазақстан Қырғызстан экономикасына 1,3 млрд доллардан астам инвестиция салды.Министрлер энергетика, көлік және логистика салаларындағы ынтымақтастықтың айтарлықтай әлеуетін, сондай-ақ бірлескен жобаларды іске асыру перспективаларын атап өтті. Осы бағыттарда өзара тиімді әріптестікті дамытуға қолдау көрсетуге дайын екенін білдірді.Бөлек тармақ ретінде екі мемлекет арасындағы берік және ұзақ мерзімді қатынастардың негізі болып табылатын мәдени-гуманитарлық байланыстарды тереңдету мәселелері қаралды.Өткен жылы Қазақстанда Қырғызстанның Мәдениет күндері және бірқатар ірі шаралар, оның ішінде бірлескен концерттер, кино күндері, жастар мен ақсақалдар форумдары үлкен табыспен өткізілді. Биыл қазақ-қырғыз киносының өзара күндерін және кезекті 3-ші қазақ-қырғыз жастар форумын өткізу жоспарлануда.Қазақстан тарапы «KazAID» агенттігінің Орталық Азия елдерінің жас дипломаттарына арналған білім беру курстарын өткізуді, сондай-ақ студенттермен академиялық алмасуларды және медициналық жоғары оқу орындары оқытушыларының біліктілігін арттыруды жалғастыратынын хабарлады. Осыған байланысты Қазақстан тарапы Қырғызстанды аталған бағдарламаларға белсенді қатысуға шақырды.Кездесу барысында министрлер өңірлік және халықаралық күн тәртібіндегі өзекті мәселелерін талқылады. Тараптар БҰҰ, ШЫҰ, ТМҰ, ТМД, ҰҚШҰ, АӨСШК сияқты көпжақты құрылымдар аясында тығыз ынтымақтастықты жалғастыруға, сондай-ақ екі мемлекеттің халықаралық бастамаларын ілгерілету барысында өзара қолдау көрсетуге бейілділіктерін растады.СІМ басшылары Орталық Азиядағы өңірлік ынтымақтастықты дамыту, бейбітшілік пен тұрақтылықты нығайту жолындағы бірлескен күш-жігер, сондай-ақ Орталық Азия мемлекеттері басшыларының консультативтік кездесулері мен Халықаралық Аралды құтқару қоры аясындағы ынтымақтастық мәселелеріне жан-жақты тоқталды. Осы тұрғыда тараптар сыртқы істер министрліктері арасындағы өзара іс-қимылды одан әрі нығайтуға дайын екендігін білдірді, оның ішінде Сыртқы істер министрлері кеңесі және екі елдің сыртқы саяси ведомстволары арасындағы 2024-2026 жылдарға арналған Ынтымақтастық бағдарламасы аясында өзара әрекеттесуді жалғастыруға уағдаласты.Қырғыз Республикасының Сыртқы істер министрі Ж.Кулубаев ресми сапар аясында Қазақстан Республикасының Президенті Қасым-Жомарт Тоқаевтың қабылдауында болды.Ақпарат көзі : https://www.gov.kz/memleket/entities/mfa/press/news/details/916369

Астана, 2025 жылғы 13 қаңтар – Қазақстан Республикасы Сыртқы істер министрінің орынбасары Роман Василенко Аустрия Республикасының Қазақстан Республикасындағы жаңадан тағайындалған Елшісі Андреа Бахерден сенім грамоталарының көшірмелерін қабылдады.Сұхбат барысында тараптар саяси, экономикалық және мәдени-гуманитарлық салалардағы Қазақстан мен Аустрия арасындағы ынтымақтастықтың өзекті мәселелерін талқылады және 2024 жылы екі елдің өзара іс-қимылының қорытындыларын шығарып, алдағы іс-шаралар кестесін мақұлдады.Жоғары және аса жоғары деңгейдегі тұрақты саяси диалогты құптай отырып, тараптар Қазақстан Президенті Қасым-Жомарт Тоқаевтың Аустрия Президенті Александр Ван дер Белленмен 2022 жылы кездесуінің қорытындысы бойынша қол жеткізілген уағдаластықтардың, сондай-ақ 2024 жылы өткен Қазақстан мен Аустрияның сыртқы саяси ведомстволары басшыларының бірқатар келіссөздерінің іске асырылу барысын талқылады.Министрдің орынбасары Қазақстан Аустриямен қарым-қатынасты жан-жақты нығайтуға маңызды мән беріп отырғанын және өзара тиімді сауда-инвестициялық әріптестікті кеңейтуге мүдделі екенін атап өтті.Осыған байланысты Экономикалық, ауыл шаруашылық, экологиялық, өнеркәсіптік, техникалық және технологиялық ынтымақтастық жөніндегі Қазақстан-Аустрия үкіметаралық комиссиясының (ҮАК) және Іскерлік кеңестің екіжақты ынтымақтастықты нығайтудағы және өзара іс-қимылдың жаңа перспективалық салаларын айқындаудағы орталық рөлі аталып өтті.ҮАК тең төрағасы ретінде Р. Василенко осы жылдың көктемінде Астана қаласында комиссияның кезекті отырысын өткізуге мүдделілігін растады, сондай-ақ Қазақстанда аустриялық компаниялар, инвесторлар, қаржы институттар үшін қолайлы жағдайлар жасалғанына және шетелдік капитал мен технологияларды тартатын түрлі жобаларға, оның ішінде Транскаспий халықаралық көлік бағытының дамытуына қатысу мүмкіндігіне бөлек тоқтады.Екіжақты ынтымақтастықтың шарттық-құқықтық базасын кеңейту мәселелеріне ерекше назар аударылды.Кездесу соңында Министрдің орынбасары Аустрия Елшісіне Қазақстанда табысты қызмет тіледі.Анықтама: 2023 жылдың қорытындысы бойынша Қазақстанның Аустриямен тауар айналымы 332,6 млн АҚШ долларын (экспорт – 9,7 млн, импорт – 322,9 млн) құрады. 2024 жылғы қаңтар-қараша аралығында тауар айналымы 257,4 млн АҚШ долларын (экспорт – 4,1 млн, импорт – 253,3 млн) құрады. 2005 жылдан бері Аустрияның Қазақстанға тікелей инвестицияларының жалпы көлемі 3 млрд долларды құрады. Қазақстанда аустриялық капиталдың қатысуымен 180-ден астам кәсіпорын тіркелген. Ақпарат көзі : https://www.gov.kz/memleket/entities/mfa/press/news/details/916912

«Бабаларын қалтқысыз қастерлей білген халық өскелең ұрпағының да болашағын қамдай алмақ» дейді дана халқымыз. Бүгін қаламыздың төрінде көрнекті қоғам қайраткері, еліміздің мақтанышы Дінмұхамед Ахметұлы Қонаевты еске алып, ескерткішіне гүл шоқтарын қою рәсімі өтті.Ғасырда бір туатын арда азаматты ұлықтауға Димекеңнің көзін көрген қоғам қайраткерлері, ардагерлер мен қала тұрғындары жиналды. Тіпті оңтүстік өңірдің шалғай аудандарынан да тау тұлғаның ізгілікті істері мен шарапатын көрген қариялар да ортадан табылды.Шара барысында ширек ғасыр ел басқарған тұлға жайлы жылы естеліктер мен лебіздер төгілді.-Ол кісінің жарқын бейнесі, қажымас қайраты ұрпақ жадында мәңгі сақталарына сенімдіміз. Дінмұмамед Қонаев ел үшін өлшеусіз еңбек еткен ерен тұлға десек, артық айтпағанымыз болар. Дінмұхаммед Ахметұлы билік тізгінін ұстаған жылдары кең байтақ қазақ жерінде 68 жұмысшылар кенті мен 43 қала пайда болды. Осы еңбегінің өзі үлкен ерлік. Халқына адал қызмет еткен қайраткер деп айта аламын. Дара тұлғаның ізгі жолы жастарға үлгі болып, жастар арасында насихатталуы керек, - деді Шымкент қаласы мәслихатының төрағасы болып Бахадыр Нарымбетов. Салтанатты шарадан кейін қазақ халқының ардақты перзенті Дінмұхамед Қонаевтың рухына тағзым етіліп, құран бағышталды.Ақпарат көзі : https://www.gov.kz/memleket/entities/shymkent/press/news/details/916750

Қала әкімі Ғабит Сыздықбеков кезекті аралау барысында Қаратау ауданында орналасқан жоғары көпсалалы аграрлық колледжінің оқу-өндірістік базасы мен оқу корпусының жұмысымен танысты. Колледж басшылығы білікті маман даярлау мен ауыл шаруашылығы саласында инновациялық жобаларды енгізу бойынша атқарылып жатқан жұмыстар туралы ақпарат берді.Әкім оқу орнының әлеуетімен танысу барысында түлектерді жұмыспен қамтудың маңыздылығын атап өтті. Сонымен қатар, жауапты тұлғаларға Шымкентте шетелдік инвесторлармен бірлесіп жүзеге асырылатын жобаларға отандық ауыл шаруашылығы дақылдарының сорттарын енгізу мәселесін қарастыруды және қамтамасыз етуді тапсырды.Сондай-ақ, “Dala Fruit” ЖШС-нің қызметімен танысты. Компания жоғары технологияларды пайдалана отырып, алма өсіру, сақтау және сатумен айналысады. Сондай-ақ бақ шаруашылығы саласындағы әлемдік озық тәжірибені қолданады. Бұл тәжірибе Шымкенттің ауыл шаруашылығы саласын дамыту үшін үлгі бола алады.Ақпарат көзі : https://www.gov.kz/memleket/entities/shymkent/press/news/details/916763

Бүгін Шымкент қаласында Қазақстан Республикасы Парламенті Мəжілісінің депутаты Ажар Сағандықова этномәдени бірлестіктерінің төрағаларымен кездесу өткізіп, маңызды мәселелерді талқылады. Кездесу барысында жастардың ұлттық кодты жоғалтпау мәселесі басты назарда болды. Төрағалар ұлттық құндылықтарды сақтау, әр этностың дәстүрлерін насихаттау және жастарды отаншылдыққа тәрбиелеу жолдары туралы өз ойларымен бөлісті. Олар қазақ халқының мәдениеті мен тарихы туралы білімді арттыру, сондай-ақ түрлі этностар арасындағы түсіністік пен бірлікті нығайту қажеттігін атап өтті.Келесі әңгіме барысында ұлтаралық байланыс пен татулық мәселелері де көтерілді. Төрағалар Қазақстандағы этносаралық келісімнің маңызына тоқталып, елімізде тұратын әр түрлі ұлт өкілдерінің бір-біріне құрметпен қарауы керектігін айтты.Сонымен қатар, жұмыс істейтін азаматтардың жалақысын көтеру мәселесі де қозғалды. Олар азаматтардың әлеуметтік жағдайын жақсарту, еңбек қатынастарын реттеу бойынша ұсыныстарын білдірді.Кездесу соңында депутат этномәдени бірлестіктерінің жұмысын қолдайтынын, ұлттық келісімді сақтау жолында бірлесе жұмыс істейтінін жеткізді.Ақпарат көзі : https://www.gov.kz/memleket/entities/shymkent/press/news/details/916768

Шымкент қаласы әкімдігі заңсыз берілген жер телімдері мен нысандарды мемлекет меншігіне қайтару бойынша жүйелі жұмыс жүргізіп келеді. Өткен жылдың соңында “Орталық су-спорт кешені” МКҚК сенімгерлік басқарудан мемлекет меншігіне қайтарылды.2017 жылы Оңтүстік Қазақстан облысы әкімдігінің қаулысымен “Орталық су-спорт кешені” МКҚК сатып алу құқығымен сенімгерлік басқаруға берілген. Нысанның нарықтық құны 1 млрд 213 млн 700 мың теңгені құрады. Электронды сауда нәтижесінде жеңімпаз атанған “GRAND TRUST” ЖШС-мен сенімгерлік басқару туралы келісімшарт жасалды. Келісімшартқа сәйкес, сенімгерлік басқарушы нысанға 500 млн теңге инвестиция салып, салықтық міндеттемелерін уақытылы орындауға тиіс болған.Алайда келісімшарт талаптары орындалмады. Басқарушы компанияның міндеттерін адал орындамауы салдарынан бүгінде ғимарат пайдалануға жарамсыз күйге түсті. Қабырғалары жарылған, кейбір еден жабындары опырылған. Алдын ала тексеру барысында кешеннің қауіпсіздік талаптарына сай келмейтіні және оны пайдалану азаматтардың өмірі мен денсаулығына қауіп төндіретіні анықталды.“GRAND TRUST” ЖШС директоры Садықов Ақнұр Смаилұлының басшылығымен сенімгерлік басқарушы компания жыл сайын жергілікті бюджеттен қаржыландырылып отырды. 2018-2024 жылдар аралығында ғимаратты ұстау және су спорты түрлері бойынша спортшыларды даярлау үшін 1 млрд 218 млн теңгеден астам қаражат бөлінген. Сонымен қатар, 2021-2024 жылдар аралығында мемлекеттік спорттық тапсырысты жан басына қаржыландыру аясында Орталық су-спорт кешенінде жұмыс істеген “Су спорты түрлері орталығы” ЖШС жалпы сомасы 335 миллион теңге көлемінде қаражат алған.Бұған қоса, компанияның бюджетке салықтық міндеттемелер бойынша 111 млн теңгеден астам қарызы және сот шешіміне сәйкес шамамен 179 млн теңге қарызы бар. Осыған байланысты Шымкент қаласы әкімдігі “GRAND TRUST” ЖШС-мен жасалған сенімгерлік басқару келісімшартын бұзу туралы талап арыз берді. Арыз Шымкент қаласының мамандандырылған ауданаралық сотымен қанағаттандырылды. Айта кету керек, тексерулердің қорытындысы бойынша барлық материалдар жағдайды талдау және құқықтық бағалау үшін тиісті органдарға беріледі.Қала әкімінің тапсырмасы бойынша биыл “Орталық су-спорт кешеніне” күрделі жөндеу жүргізу жоспарлануда. Сондай-ақ, мегаполис басшысы сенімгерлік басқаруға берілген барлық нысандарға жан-жақты тексеру жүргізуді және мүмкін бұзушылықтарды анықтауды тапсырды.Қала басшысы алдағы уақытта мемлекеттік меншік нысандарына қатысты немқұрайлы қатынасты болдырмау үшін сенімгерлік басқару шарттарының сақталуын бақылауды күшейту қажеттігін атап өтті. Мұндай жағдайлар тек қалалық бюджетке зиян келтіріп қана қоймай, тұрғындардың сенімі мен қаланың беделіне нұқсан келтіреді.Шымкент қаласы әкімінің баспасөз қызметіАқпарат көзі : https://www.gov.kz/memleket/entities/shymkent/press/news/details/916805

ҚР халықаралық астық нарықтарындағы өз позициясын нығайтуды жалғастыруда. ҚТЖ деректері бойынша 2024 жылдың қорытындысы бойынша 10,6 млн тонна астық тасымалданды, оның ішінде экспорт 8,1 млн тоннаны құрады.Экспорттық бағыттардың ішінде: Өзбекстан (3,3 млн тонна), Қытай (1,7 млн тонна). Тәжікстанға 1,2 млн тонна астық жеткізілді, бұл 2023 жылмен салыстырғанда 20% - ға артық. Қырғызстанға 140 мың тонна астық экспортталды, бұл 2023 жылғы көрсеткіштен 1,9 есе көп.Иран мен Әзірбайжан нарықтары қалпына келтірілді. Иранға астық жеткізу көлемі 2 есеге (526 мың тонна), Әзірбайжанға - 1,8 есеге (211 мың тонна) өсті.2024 жылдың қыркүйегінен желтоқсанына дейін 5 млн тонна жаңа астық тасымалданды, бұл 2023 жылдың сәйкес кезеңінен 50% - ға артық. Экспорт көлемі 57% - ға өсіп, 3,9 млн тоннаны құрады.Оның ішінде Өзбекстанға 1.5 млн тонна (өсім 45%), Тәжікстанға - 633 мың тонна (57%), Ауғанстанға - 190 мың тонна (51%), Қытайға - 592 мың тонна (2%) экспортталды.Иранға жеткізілім 30 есе артып, 455 мың тоннаны құрады, Әзірбайжанға 188 мың тонна экспортталды (2023 жылдың қыркүйек-желтоқсанында жеткізілім болған жоқ).Ақпарат көзі : https://www.gov.kz/memleket/entities/moa/press/news/details/916638

Павлодар облысында «Turkey PVL» ЖШС құс фабрикасының құрылысының екінші кезеңін аяқтады.«Turkey PVL» – өңірде күркетауық етін өндіруге маманданған жалғыз кәсіпорын. Компанияның өнімі Қазақстанда «Павлодар күркетауығы» брендімен танымал.Кәсіпорын вертикалды интеграцияланған: күркетауықтарға арналған жем өздерінің құрама жем зауытында өндіріледі, құс өсіру мен инкубациясы да кәсіпорынның өз ішінде жүзеге асырылады. Бұл өндірістің барлық кезеңдерінде жоғары сапаны қамтамасыз етуге мүмкіндік береді.2025 жылдың басында кәсіпорындағы құс басы саны 95 мыңды құрады, ал өндіріс көлемі 3 мың тоннаға жетті. Компания өндіріс қуатын арттыру жұмыстарын жалғастыруда: 2024 жылы фабрикада жылдық қуаттылығы 3,5 мың тонна болатын 10 құс қорасы пайдалануға берілді.Жалпы, инвестициялық жобаны толық жүзеге асырғаннан кейін құс фабрикасының жылдық қуаттылығы 8 мың тоннаға жетеді.Ақпарат көзі : https://www.gov.kz/memleket/entities/moa/press/news/details/916781

Ауыл шаруашылығы вице-министрі Аманғали Бердалин «KazBeef» ЖШС кәсіпорын қызметімен танысты. Кәсіпорын «алаңнан сөреге дейін» толық өндірістік циклды жүзеге асырады: асыл тұқымды мал өсіруден бастап етті өңдеуге дейінгі барлық кезеңдерді қамтиды.Аманғали Бердалин жоғары өнімді ангус тұқымды асыл тұқымды мал өсіруге маманданған мал репродукторын аралап, жануарларды өсіру процесімен, азықтандыру рационымен және мал ұстау шарттарымен танысты.Репродукторда 1 200 ірі қара мал (ІҚМ) бар.15 000 басқа арналған толық цифрландырылған бордақылау алаңы жұмыс істейді, онда 11 000 ІҚМ ұсталады.Вице-министр компания басшылығымен ветеринариялық қауіпсіздік, дайын өнімнің өзіндік құнын төмендету және жануарлардың денсаулығын жақсарту мәселелерін талқылады.2020 жылдан бастап «KazBeef» ЖШС-ға Feedlot Health Management Service (FHMS) компаниясы малды азықтандыру және олардың жағдайын бақылау мәселелері бойынша кеңес беріп келеді. Мал орта есеппен 250-300 күн бордақыланады. Америкалық диетологтар әзірлеген рацион үш кезеңнен тұрады: 6 айға дейін сүтпен қоректендіру, 10-12 айға дейін жайылымда жаю, 550 кг салмаққа жеткенше теңгерімді астықпен бордақылау.Келесі нысан – «KazBeef Processing» ет өңдеу кешені болды. Бұл кәсіпорын 2018 жылдан бастап салқындатылған және мұздатылған өнімдер, соның ішінде жартылай фабрикаттар, қосымша өнімдер, тартылған ет және бургерге арналған котлеттер шығарады. Кешеннің өндірістік қуаты тәулігіне 150 ІҚМ-ды құрайды. Өнімдер Қазақстанның ішкі нарығына жеткізіледі, сондай-ақ Парсы шығанағы елдеріне және Орталық Азияға, оның ішінде БАӘ мен Өзбекстанға экспортталады.Компания басшылығымен өткен кеңесте Мемлекет басшысының ауыл шаруашылығы өнімдерін терең өңдеуді дамыту және экспорт нарықтарын кеңейту жөніндегі тапсырмасын орындау аясында өндіріс көлемін ұлғайту жоспарлары талқыланды. Вице-министр өндірістің барлық кезеңдерінде, соның ішінде мал сою мен өңдеуде жоғары ветеринариялық қауіпсіздік стандарттарын сақтау қажеттігін атап өтті.Ақпарат көзі : https://www.gov.kz/memleket/entities/moa/press/news/details/916982

Осы ұсынымдарды «Дәнді және майлы дақылдар. Қазақстан» зерттеу бюросы әзірледі.Дәнді дақылдар2025 жылдың басы Қазақстанның астық нарығында бағаның өсуімен ерекшеленді.элеватардан, ҚҚС-мен, тг/кгАғымдағы бағаӨзгерістерҰсынымМүмкінмаксМүмкін минжұмсақ бидай 3 сыныпты, 28 клк +113+25САТУ14590жұмсақ бидай 3 сыныпты, 25 клк дейін65-САТУ9570жұмсақ бидай 3 сыныпты, 23 клк дейін65+7САТУ8560жұмсақ бидай 4 сыныпты, 20 клк дейін58+5САТУ8050жұмсақ бидай 5 сыныпты, 17клк дейін48-САТУ6535арпа 2 сыныпты56+1САТУ6035Дурум (прот 14+)85-САТУ12070Дурум (прот 15+)102-САТУ15090 Ең көп қымбаттағаны – 28 глютенді 3-сыныпты бидай. Сондай-ақ, 23 және 20 глютенді 3-сыныптың бағасы да өсті, бірақ сәл төменгі пропорцияда.4-сыныпты бидайдың бағасы 1 килограмға 5 теңгеге көтерілді.Арпаның бағасы 1 килограмға 1 теңгеге өсті.Сауалнамаға қатысушылардың айтуынша, мерекелерден кейінгі нарық біртіндеп жанданып келеді, бірақ шаруалар әлі белсенділік танытпауда.Соған қарамастан, астық нарығына қатысушылар бағаның өсуін күтуде.Трейдерлердің айтуынша, әзірге Өзбекстан мен Ауғанстаннан жақсы бағалар ұсынылған жоқ, бірақ импорттаушылар «жақын арада бағаның ағымдағы деңгейден жоғары болатынын хабарлайды» деп үміттенуде. Майлы дақылдар / бұршақМайлы дақылдар нарығында зығырдан басқа өнімдердің бағасы бұрынғы деңгейде сақталды.тг/кг, с НДС, с элеватораАғымдағы бағаӨзгерістерҰсынымМүмкінмаксМүмкін минЗығыр212+6САТУ200170Рапс208-САТУ250180Күнбағыс161-САТУ190160Мақсары116-САТУ11085Соя186-САТУ285200Қыша қара/ақ215-САТУ300200Бұршақ (сары)*92-САТУ17080Жасымық қызыл**189-САТУ220180Жасымық жасыл (үлкен көлемде) **307-САТУ450350 Түсініктеме:Ағымдағы баға – бұл Қазақстан ішіндегі элеваторда немесе вагонда ҚҚС-пен бірге келісімшарт жасалатын орташа салмақталған бағалар. Бағалар аймаққа, сапа көрсеткіштеріне және жеткізу шарттарына байланысты өзгеруі мүмкін.Ұсыныстар:Стоп – тиімдірек баға болғанға дейін сауданы тоқтату ұсынылады.Қажет болғанда сату – техникалық немесе қаржылық қажеттіліктерге байланысты сату ұсынылады.Сату – жақын болашақта тиімді перспективалар байқалмағандықтан, өнімді сату ұсынылады.Максималды баға – ағымдағы сауда маусымында баға жете алатын жоғары шек. Бұл пікір түпкілікті емес және жағдайға байланысты өзгеруі мүмкін.Минималды баға – ағымдағы маусымда дақыл бағасы жетуі мүмкін төменгі шек.Ақпарат көзі : https://www.gov.kz/memleket/entities/moa/press/news/details/917012

ІҚМ бруцеллезбен сырқаттанушылық тұрақты түрде төмендейді.Соңғы үш жылда инфекция 0,08% - дан аспайды.Сондай-ақ, 2024 жылдың қорытындысы бойынша ел аумағында бруцеллез бойынша қолайсыз пункттерді тіркеудің 2023 жылмен салыстырғанда 30% - ға төмендеуі байқалады.Бұл туралы ҚР АШМ Ветеринарлық бақылау және қадағалау комитетінде хабарлады.Атап айтқанда, 2024 жылға арналған Серологиялық зерттеулер жоспарына сәйкес "ИНСПЭК" ЖШС-де 2000-нан астам ІҚМ басы зерттелді, олардың 53-і оң жауап берді.Шаруашылық мәртебесін анықтау мақсатында қосымша диагностикалық зерттеулер жүргізілді, оның нәтижелері бойынша бруцеллезбен ауырған 95 бас ІҚМ анықталды.Ветеринариялық-санитариялық қағидаларға сәйкес барлық жануарлар санитариялық союға тапсырылды.Шаруашылықта 13 200 шаршы метр аумақта дезинфекция жүргізілді.10 қаңтарда шаруашылықта шектеу шаралары енгізілді. ҚР АШМ КВКН "Республикалық эпизоотияға қарсы жасақ" РММ күштерімен сауықтыру іс-шаралары жүргізілуде.Жағдай ветеринарлық қызметтің бақылауында.Ақпарат көзі : https://www.gov.kz/memleket/entities/moa/press/news/details/917041

Жетісай қаласындағы Қ.Мұңайтпасов атындағы орталық стадионында Түркістан облысы дене шынықтыру және спорт басқармасының Жетісай аудандық №1 Балалар мен жасөспірімдер спорт мектебінің футболдан ашық біріншілігі өтті.Тұрар Рысқұловтың 130 жылдығы аясында «Біз – нашақорлыққа қарсымыз» ұранымен 2014-2015 жылы туылған жасөспірімдер арасында өткен турнирге көршілес аудан, қалалардан 10 команда қатысып, өзара мықтыларды анықтады.Жарыс қорытындысы бойынша өзгелерден ептілігі мен ұйымшылдығын көрсеткен «Arman's akademi» футбол мектебінің командасы жүлделі ІІІ орынды иеленсе, Түркістан облысы дене шынықтыру және спорт басқармасының Жетісай аудандық №1 Балалар мен жасөспірімдер спорт мектебінің құрамасы ІІ орынды еншіледі. Ал Кентау қаласының жасөспірімдер командасы І орынды иеленіп, жарыстың чемпионы атанды. Одан бөлек, үздік ойын өрнегін көрсетіп, көрермендердің ыстық ықыласына бөленген бірқатар ойыншы түрлі номинацияларға ие болды.Жеңімпаз командалар мен номинацияларға ие болған жекелеген ойыншы Жетісай аудандық №1 Балалар мен жасөспірімдер спорт мектебінің директоры Ғабит Жанаевтың дипломдарымен, кубок-медальдарымен марапатталды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916992

Мемлекет басшысы Қасым-Жомарт Тоқаев елді мекендерде денсаулық сақтау саласындағы инфрақұрылымды жақсартып, қолжетімділікті арттыруды тапсырған болатын. Осы бағытта Түркістан облысында ауқымды жұмыс атқарылуда. Түркістан облысы әкімінің орынбасары Бейсенбай Тәжібаевтың айтуынша, өңірде тұрғындардың қажеттілігін қамтамасыз ету, медициналық көмек көрсету сапасын арттыру мақсатында заманауи медициналық нысандар салуға, бейінді мамандар даярлауға басымдық берілуде.– Түркістан облысында былтыр 55 денсаулық сақтау нысанының құрылысы қолға алынды. «Ауылда денсаулық сақтауды жаңғырту» ұлттық пилоттық жобасы аясында 48 медициналық-санитариялық алғашқы көмек нысандарының құрылысы жүргізілді. Бірнеше медициналық нысанға жөндеу жұмыстары жүргізілуде. Нәтижесінде ауылдар мен елді мекендердің 100 мыңнан астам тұрғыны медициналық көмекпен қамтылмақ. Сонымен бірге өңірдегі ауруханалар мен емханаларға заманауи құрылғылар, жедел жәрдем көліктері алынды. Ауылдарда медициналық қызметтің қолжетімділігін арттыру жұмысы жалғасады, – дейді Бейсенбай Тәжібаев.Жаңадан ашылатын нысандарда санитарлық талаптар, өрт қауіпсіздігі сақталған. Заманауи медициналық құрал-жабдықтармен жабдықталған. Бұл мекемелер ауыл тұрғындарына сапалы алғашқы медициналық-санитариялық көмек түрлерін көрсетеді.Бүгінгі таңда жалпы 58 медициналық нысанының қажеттілігі анықталып, оның 25 нысанын 2025 жылға іске асыру жоспарлануда.Облыс тұрғындарын білікті медицина мамандарымен қамту ісі де тұрақты зерделеніп, тиісті жұмыс жүріп жатыр. Өңірде 423 бейінді маман бойынша тапшылық бар екені анықталған. Оның ішінде, 141-і Түркістан қаласындағы салынып жатқан 570 төсек-орындық облыстық көпбейінді ауруханаға тиесілі. Мамандармен қамту үшін 5 жылдық жоспар бойынша резидентураға 639 грант бөлу жоспарлануда. Ал 2023 жылдан бері 176 грант игерілді.Түркістан облыстық денсаулық сақтау басқармасына қарасты медицина ұйымдарында жалпы 24 мыңнан астам медицина қызметкері жұмыс істейді. Былтыр 40 дәрігер Ресейде, 234 орта буын медицина қызметкері Астана қаласындағы ҚР іс басқармасы медициналық ауруханасында біліктілігін арттырған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916493

Бұқаралық спортты дамыту арқылы салауатты өмір салтын насихаттау мақсатында Жұмысшы мамандықтары жылын қолдау және Шардара ауданының 60 жылдық мерейтойы аясында аудандық «Қыс-2025» марафоны өтті. Марафонға 200 жуық адам қатысып, жүгіру қашықтығы Абай алаңы мен орталық стадионға дейінгі қашықтықта 3 шақырымды құрады.Игі шараға аудан әкімі Арман Қарсыбаев арнайы қатысып, қатысушыларға сәттілік тіледі.«Мемлекет басшысы 2025 жылды Жұмысшы мамандықтар жылы деп жариялаған болатын және де Шардара ауданының құрылғанына 60 жыл толуына орай, өткізіліп отқан «Шардара аудандық Қыс-2025» марафонының ашылу салтанатымен шын жүректен құттықтаймын. Бүгін біз елімізге, соның ішінде ауданымыздың маңызды және айтулы оқиғаның аясында ұйымдастырылған марафонда жолығып тұрмыз. Бұл спорттық мереке ғана емес, ерік-жігердің, батылдықтың мерекесі. Шардара ауданында осындайауқымды іс-шараның өтіп жатқанына қуаныштымын. Марафон арқылы бұқаралық спорт, салауатты өмір салты насихатталады. Мұндай шаралар елімізде бұқаралық спорттың дамуына зор септігін тигізеді деп сенемін»,— деді аудан әкімі.Мәреге алғашқы болып келген марафоншылар аудан әкімінің атынан арнайы Алғыс хат, медаль мен бағалы сыйлықтарға ие болды. Жарыста ерлер мен әйелдердің үздіктері жеке-жеке анықталды.Атап айтсақ, ерлер арасында үздік болып, I-орынды алған Сакен Адырбай, II-орынды Заби Ерасыл және жүлделі III-орынға Расбай Ғаби ие болды. Ал нәзік жандылардан I-орын Тазетдинова Элеанораға бұйырса, II-орын Лаура Кенжебекқызы иемденді, сондай-ақ, III-орынды Ерман Ақниет жеңіп алды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916508

Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жобасы аясында бүгін Жетісай ауданында ауқымды сенбілік өтті.Қоғамның назарын тұрғылықты жерінің тазалығын сақтауға аударып, экологиялық мәдениетті қалыптастыруда маңызы зор шараға аудан әкімі Серік Мамытов пен аудандық мәслихат төрағасы Медет Қасымов бастаған мемлекеттік және квазимемлекеттік мекеме қызметкерлері, жергілікті тұрғындар қатысты.Мыңға жуық адам мен 8 техника жұмылдырылған санитарлық тазалық жұмыстары қала, кент және барлық ауылдық округтерде арнайы бекітілген кесте негізінде жүргізілді. Мемлекеттік және квазимемлекеттік мекеме қызметкерлері өздеріне бекітілген көшелерде тазалық жұмыстарын жүргізсе, аудан тұрғындары үйіргелік жерлерін күл-қоқыстардан тазартты. Сонымен қатар сенбілік барысында саябақтар мен көшелер, арық-атыздар тазаланды.Сондай-ақ көппәтерлі тұрғын үйлердің маңы мен аулалары, көше бойларында бей-берекетсіз жатқан қоқыстар, ирригациялық жүйелер тазаланған жаппай сенбілікте мыңға тарта қара ағаш пен қара тал, можжевельник көшеттері отырғызылды.Сенбілікті ұйымдастырушылардың айтуынша, тазалық жұмыстары қала, кент, барлық округтерде, елді мекендерде жыл он екі ай жалғасады. Сонымен қоса әрбір мекеме мен әрбір аула тұрғындарға бекітіліп беріліп, тазалықты сақтауға ауыл ақсақалдары да жұмылдырылады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916510

Түркістан облысында көктемгі су тасқынына дайындық жұмысы күшейтіле түсті. Аталған мәселе облыс әкімі аппаратының апталық мәжілісінде талқыланды. Түркістан облысының әкімі Нұралхан Көшеров жауапты мекеме басшылары мен аудан, қала әкімдеріне су тасқынына қарсы дайындықты күшейтіп, жұмысты сапалы атқаруды тапсырды.– Су басу қаупі бар аймақтарды түгел зерделеп, қауіпсіздікті күшейтіңіздер. Өңірдегі су қоймалар, каналдар, өзендер мен көлдер, жалпы су нысандары қатаң бақылауда болуы тиіс. Немқұрайдылыққа жол берілмесін. «Шардара» су қоймасын бақылауда ұстап, аймақтағы су нысандары бойынша бекітілген іс-шараларды жүйелі атқарыңыздар, – деген Нұралхан Көшеров аталған мәселеге байланысты аудан, қала әкімдері мен жауапты құрылым басшыларының есептерін тыңдады. Нақты міндеттер жүктеді.Түркістан облысының Төтенше жағдайлар департаментінің бастығы, азаматтық қорғау полковнигі Асқар Төлешевтің айтуынша, бүгінгі таңда «2024-2025 жылғы қыс-көктемгі су тасқынына қарсы инженерлік іс-шаралар» жоспарының 28 іс-шарасы толығымен аяқталып, 3 іс-шара бойынша жұмыстар жалғасуда. Аяқталған 28 іс-шараның нәтижесінде 68,2 шақырым қашыртқы арналар механикалық тазалаудан өткен. Келес ауданында арық-атыздың 14 шақырымы қоқыстан тазартылды. Сарыағаш қаласында каналдардың 350 метрі бетондалған. Сайрам ауданындағы Арыс өзенінде 500 метр арнаны түзету жұмыстары жүргізіліп, Сауран, Отырар аудандарында 5 тоспа орнатылған. Атқарылған жұмыстар бүгіннің өзінде жоғары нәтижесін беруде.Сонымен қатар «2024-2025 жылғы күз-көктемгі су тасқыны кезеңіндегі төтенше жағдайлардың алдын алу іс-шараларын жүргізу» жоспары аясында 461 шақырым арықтар (саны – 1203), жалпы ұзындығы 654 шақырымды құрайтын 165 канал, 30 шақырым дюбинг-өткелдер тазалаудан өткізілген.Аталған жұмыстарды жүргізуге 263 техника жұмылдырылған. Бұдан бөлек, су тақыны кезеңіне 109 мың қап, 1416 тонна инертті материалдар дайындалды. Төтенше жағдай қауіпі туындағанда ыстық тамақ пен тұрмыстық қажеттіліктер үшін кәсіпкерлермен меморандум түзіліп, 141 тонна жанар - жағармай дайындалған. Республикалық, облыстық маңыздағы жолдардағы жалпы 5 123 өткелдің (оның ішінде 4 591 құбыр, 532 көпір) 4098-і тазаланса, темір жол астындағы жалпы 353 өткелдің (оның ішінде 231 құбыр, 122 көпір) 282-сі қоқыстан тазаланған.Облыс аумағында жалпы 42 су қоймасы орналасқан. Су қоймалардың орташа толу деңгейі 33 %-ды құрайды. Бүгінге «Шардара» су қоймасына секундына 1215 текше метр су келіп, қоймадан жалпы 1305 текше метр су шығарылуда. Нақты көлемі 86 пайызға жетті.Мәжілісте «Қазсушар» РМК Түркістан филианың директоры Қазыбек Бедебаевтың да баяндамасы тыңдалып, су нысандарына қатысты жобаларды уақтылы әрі сапалы атқару жөнінде ұсыныс берілді.Айта кетейік, облыста көктемгі су тасқыны кезеңінде төтенше жағдайлардың алдын алу мақсатында жалпы 1064 жеке құрам, 124 техника, 11 қайық пен 92 мотопомпа дайындыққа келтірілген. Көктемгі су тасқынына қарсы дайындық барысы облыс әкімдігінің қатаң бақылауына алынған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916695

Түркістан облысында «Таза Қазақстан» бағдарламасы тұрақты жүргізілуде. Бекітілген кесте бойынша бүгінгі таңда облыс көлемінде жалпы 800-ден аса ауқымды сенбілік өткізілді. Оған 299 мыңнан астам тұрғын атсалысып, 1500-ден аса техника жұмылдырылды. Сондай-ақ 1 миллионнан аса ағаш отырғызылып, 3 мың тонна қоқыс шығарылды. Бұл туралы Түркістан облысының әкімі Нұралхан Көшеровтың төрағалығымен өткен аппарат мәжілісінде айтылды.Өңір басшысы тазалық, көгалдандыру және абаттандыру жұмыстарын жүйелі түрде жалғастыруды тапсырып, бұл бағыттағы жұмыстарды тиісті деңгейде ұйымдастыру керектігін айтты. Сонымен қоса елді мекендерде тазалықты сақтау, экологиялық сауаттылықты көтеру, түсіндіру жұмыстары жалғаса беретінін жеткізді.Жиында облыс әкімінің бірінша орынбасары Зұлпыхар Жолдасов «Таза Қазақстан» акциясы аясында атқарылған жұмыстар туралы баяндады. Оның айтуынша, «Таза Қазақстан» бағдарламасы тұрақты қадағалауда тұр.Бүгінгі таңда осы бағдарламаның өңірдегі «Телеграмм бот» платформасына 859 өтініш пен хат түскен. Оның ішінде, 852 өтініш орындалған. 7 өтінім мағынасыз болғандықтан қайтарылған. Былтырдан бері қоғамдық орындарда заң талаптарын бұзған тұлғаларға 26 702 мыңнан астам хаттама толтырылған, бұл көрсеткіш 2023 жылмен салыстырғанда 2 есеге артып отыр. Жалпы 318,5 млн теңгеге айыппұл салынған. Бұл бағдарлама бойынша жұмыс жалғасады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916748

Мемлекет басшысының ауыл шаруашылығында жалпы өнімінің көлемін 2 есеге ұлғайту жөніндегі тапсырмасымен Түркістан өңірінде негізгі капиталға инвестция тарту, су үнемдеу технологияларын ендіру, ғылыми негізде минералды тыңайтқыштарды енгізу, заманауи тауарлы сүт фермасын құру жоспарлары толығымен жүзеге асты. Ал жалпы өнім көлемі 1,1 трлн. теңгеге жетті. Бүгінде аймақта көктемгі дала жұмыстарына дайындық қарқынды жүріп жатыр. Аталған мәселе облыс әкімі аппаратының апталық мәжілісінде талқыланды. Түркістан облысының әкімі Нұралхан Көшеров жауаптыларға тиісті тапсырмалар берді.– Түркістан ооблысының негізгі драйверлерінің бірі – ауыл шаруашылығы. Егістін науқаны бізде өзге аймақтардан ерте басталады. Сондықтан көктемгі дала жұмыстарын сапалы жүргізген жөн. Мемлекеттік тетіктердің бәрін пайдаланып, диқандарға, шаруаларға тиісті қолдауларды көрсету керек. Ауыл шаруашылығы бойынша бекітілген индикаторлар орындалуы тиіс, – деді Нұралхан Көшеров.Түркістан облыстық ауыл шаруашылығы басқармасы басшысының міндетін уақытша атқарушы Әлібек Плаловтың айтуынша, биыл ауыл шаруашылығы дақылдары егетін аумақ өткен жылдан 27 мың гектарға ұлғайып, 896 мың гектарға жеткізіледі. Оның ішінде: жаздық дақылдар – 518 мың гектар, күздік егіс – 204 мың гектар, ескі жоңышқа – 174 мың гектар.Егіс құрылымын қалыптастыруда рентабельділігі жоғары дақылдарға басымдық берілуде. Атап айтқанда, мақта 31 мың гектарға (137,1 мың га) дәнді дақылдар 3 мың гектарға (333,6 мың га) майлы дақылдар 2 мың гектарға (72,7 мың га) артығымен орналастырылады. Ал бақша дақылдары 8 мың гектарға (66,3 мың га), малазықтық дақылдар 6 мың гектарға (223,3 мың га) қысқартылмақ.Көктемгі дала жұмыстарына 61,5 мың тонна жеңілдетілген жанар-жағармайға қажеттілік анықталды. Босату жұмыстары ақпан айынан басталады. Тауар өндірушілерде жаздық дақылдардың қажетті тұқым көлемі жеткілікті. Минералдық тыңайтқыштармен қамтамасыз ету үшін, облыстық бюджеттен 7 млрд теңге қаралды. Отандық тыңайтқыш өндіруші «ҚазАзот» АҚ, «Қазфосфат» ЖШС-мен облысқа жеткізілетін қажетті тыңайтқыш көлемі келісілді. Көктемгі дала жұмыстарын несиелендіруге 13 млрд теңгеге өтініш берілді. Бүгінгі күнге 4 млрд теңгеге өтінім қабылданып, 2 млрд теңгені құрайтын жобалар мақұлданып, қаржыландыру жұмыстары жүргізілуде.Дала жұмыстарына қолданыстағы 25 мың техника қызмет атқарады. Ауыл шаруашылығы құрылымдарында 12 мың трактор, 1 мың дән сепкіш, 554 соқа, 1 мың қопсытқыш құралдары бар. Дала жұмыстарына техниканың 98 пайызы дайын. Өткен жылы мемлекеттік қолдаулардың тұрақты көрсетілуінің нәтижесінде, ауыл шаруашылығы техникалары 6,3%-ға жаңарды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916961

Облыс әкімінің орынбасары Нұрбол Тұрашбеков жетекшілік ететін салаларының басшыларымен лездемелік мәжіліс өткізіп, жұмыс аптасының міндеттерін белгіледі. Ауыл шаруашылығы басқармасына аудан-қала әкімдіктерімен бірлесе отырып, субсидия бағыттарындағы өзгерістер, жаңа технология енгізудегі артықшылықтар бойынша шаруалар арасында түсіндіру жұмыстарын жандандыруды тапсырды.2024 жылдың қорытындысымен Түркістан облысында құрылған кооператив саны 62-ні құрады. Оның 37-і қаржыландырылып, нәтижесінде 23 кооператив қызмет көрсету үшін техникалар сатып алды, 14 кооператив қайта өңдеу цехтарын іске қосты. 148 азамат тұрақты жұмыспен қамтамасыз етілді. «Ауыл аманаты» жобасын кооперацияға бағдарлау ісі биыл да жалғасын табады.Су шаруашылығы нысандарын қалпына келтіру бойынша І кезеңге 14 жоба ұсынылып, 166 шақырым су арнасын бетонмен қаптау көзделуде. Жоба толық іске асқан жағдайда іргелес жатқан 53,3 мың гектар жерге ағын су жеткізу жақсармақ. «Тұран су» және «Қазсушар» мекеме басшыларына облыстағы механикалық тазалаудан өткен және тазалауды қажет ететін су арналарына қатысты тиянақты сараптама ұсыну жүктелді.2025 жылдың бекітілген жоспарын талдай келе Нұрбол Тұрашбеков: «Болжанып отырған көрсеткіштер меже деп қабылданбасын. Жұмысты дұрыс үйлестіріп, барлық қарым-қабілетті жұмсаған жағдайда күткеннен де жоғары нәтижеге қол жеткізуге болатынын естеріңізге саламын. Мүмкіндіктерді шектемеңіздер. Көктемгі дала жұмыстары басталғанша шаруалар мен дихандарға мемлекеттік бағдарламалар жөнінде мейлінше мол ақпарат беріп, түсіндіруді қолға алыңыздар, заңдылығы бойынша құқықтық анықтамалар әзірлеңіздер», деді.Мәжіліс барысында сонымен қатар, басқармалардағы орындаушылық тәртіп жайы қозғалды, хаттамалық тапсырмалардың есебі қаралды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/916996