Қазақстан Республикасының Қаржы министрлігі Қытай қор нарығына жалпы сомасы 6,6 млрд юань болатын тәуелсіз (егеменді) панда-облигациялардың екінші шығарылымын сәтті орналастырды. Панда-облигациялар екі траншпен, атап айтқанда 1.82% жылдық мөлшерлемесіне сәйкес 5 млрд юань көлемінде 3 жылдық облигациялар және 1.95% жылдық  мөлшерлемесі бойынша 1,6 млрд юань көлемінде 5 жылдық облигациялар шығарылды.Қазақстан қытай нарығында аса жоғары кредиттік рейтингтері бар «А» санатындағы елдермен пара-пар шарттармен қаржыландыруды тарта білді. Инвесторлардың жоғары қызығушылығы елімізде жүргізіліп жатқан экономиканы әртараптандыру мен орнықты дамуды арттыруға бағытталған ауқымды реформалардың оң бағасын байқатып отыр.Бағалы қағаздардың шығарылымы S&P рейтинг агенттігінің Қазақстанның егеменді кредиттік рейтингін «Тұрақты» болжамға сәйкес «BBB-» деңгейінен «BBB» деңгейіне дейін көтерген соң орындалғанын айта кетейік. Бұл экономикалық өсімнің орнықты перспективалары мен мемлекеттік борыштың ІЖӨ-ге шаққанда 20,9% төмен екенін көрсетті. Осы ретте сыртқы мемлекеттік қарыз ІЖӨ-ге шаққанда 4,5% мөлшерінде екенін ескерсек, бұл әлемдегі ең төмен көрсеткіштердің бірі екенін айта кеткен орынды.Аталған шығарылым Қазақстан мен Қытай арасындағы мемлекетаралық қатынастарды одан әрі нығайту аясында өтті. Екі ел көшбасшылары ұстанған жүйелі саяси-экономикалық бағыт жан-жақты стратегиялық әріптестікті тереңдетуге, оның ішінде сауда-инвестициялық және қаржы салаларындағы байланысқа оң әсер етіп келеді. Қазақстандық эмитенттердің Қытай нарығына шығуы осы жолдың айқын дәлелі.Еліміздің халықаралық капитал нарықтарына қатысуын бірізді дамыту қаржыландыру көздерін кеңейтіп, займ портфелін әртараптандыруға және инвесторлардың алуан түрлі топтарына орнықты қолжетімділікті қалыптастыруға септігін тигізеді. ҚР Қаржы министрлігі әрмен қарай нарықтағы конъюнктураны және мемлекеттік қарызды тиімді басқару міндеттерін ескере отырып, мемлекеттік займ бағытында теңгерімді тәсілді ұстанатын болады. Үш және бесжылдық транштарды орналастыру Қазақстанның Қытай юаньдарындағы егеменді табысының ауытқуын одан әрі реттеуге әсер етіп, отандық квазимемлекеттік және корпоративті эмитенттердің кейінгі шығарылымдарына жол ашады.Осы орайда жоғарыда аталған шығарылымның басты ұйымдастырушысы China International Capital Corporation Limited (CICC) болғанын атап өткен жөн. Сондай-ақ бірлескен негізгі ұйымдастырушылардың қатарында China Construction Bank Limited (CCB), Chustrial and Commercial Bank of China Limited (ICBC), the Export-Import Bank of China және Bank of China Limited (BOC) бар. Мәміленің жергілікті менеджері Teniz Capital Investment Banking АҚ болды.  Ақпарат көзі : https://www.gov.kz/memleket/entities/minfin/press/news/details/1287189?lang=ru

Каспий теңізінің акваториясындағы әскери-теңіз күштерінің әртүрлі кемелер дивизионы базасында Ақтау гарнизонының арнайы бөлімшелері арасында Aktau water challenge-2026 жарысы өтті. Он кезеңнен тұратын сайысты ҚР Қарулы күштерінің Арнайы операциялар күштері ұйымдастырды. Оған Корғаныс министрлігі, ІІМ және ҰҚК Шекара қызметінің 8 командасы құрамында жүзден астам әскери қызметші қатысты. Бағдарламада бес метрлік биіктіктегі пирстен секіру, 100 метрге жүзу, туннельді, эстакаданы, понтондарды, торлы қабырғаларды еңсеру және су үстіндегі арнайы тапсырмаларды орындаудың шынайы жағдайларына барынша жақындатылған басқа да кедергілер қамтылды. Жарысқа тәжірибелі жауынгерлермен қатар мерзімді қызметтегі әскери қызметшілер де бақ сынады. Сайыстан алған әсерімен Теңіз жаяу әскері бригадасында бес айға жуық қызмет еткен «Морпех» командасының мүшесі кіші сержант Темірлан Құмаров бөлісті.– Біздің команда үшінші орынды иеленді, бұл өте жақсы нәтиже деп есептеймін. Жарысқа мұқият дайындалдық. Мен үшін ең қиыны бес метрлік биіктіктегі пирстен секіру болды. Жарыстың алты минуты тұтас бір сағаттай сезілді. 100 метрді уақытқа жүзіп өту және барлық су үсті кедергілерін еңсеру де оңай болған жоқ. Ұйымдастырушыларға осы сынақтан өтіп, өз күшімізді тексеруге мүмкіндік бергені үшін алғыс айтқым келеді, – деді ол.Жарыс қорытындысы бойынша бірінші орынды Арнайы операциялар күштерінің Jaubasar командасы иеленді. Екінші орынды Әскери-теңіз күштерінің диверсияға қарсы күштер мен құралдар ротасының құрамасы қанжығасына байлады. Үшінші орынды Теңіз жаяу әскері бригадасының «Морпех» командасы мен Ішкі істер министрлігінің «Барыс» командасы өзара бөлісті.Арнайы бөлімшелер жауынгерлерінің кәсіби даярлық деңгейін арттыруға және іс-қимыл дағдыларын жетілдіруге бағытталған аталмыш іс-шара жоғары деңгейде өтті. Сайыс жеңімпаздары кубоктармен марапатталып, барлық қатысушыларға грамоталар мен бағалы сыйлықтар табыс етілді.Aktau water challenge-2026 ұйымдастырушылары жарысты жыл сайын өткізіп, көптеген командаларды шақыруды және қатысушыларға қойылатын талаптарды күшейтуді жоспарлап отыр. Сондай-ақ сынақтан өту шарты жетілдіріліп, нысанаға оқ ату кезеңдері қосылатын болады.Ақпарат көзі : https://www.gov.kz/memleket/entities/mod/press/news/details/1287034?lang=ru

Премьер-министрдің орынбасары – ұлттық экономика министрі  –  Серік Жұманғариннің төрағалығымен өткен Үкіметтегі кеңесте отандық сәндік көшет шаруашылығын дамыту мәселелері қаралды.Мемлекет басшысының орман алқаптарын одан әрі қалпына келтіру және ұлттық саябақтар инфрақұрылымын дамыту жөніндегі алға қойған міндеті шеңберінде отандық сәндік өсімдіктерді өсіру шаруашылығын дамыту ерекше маңызға ие. Олар елді мекендерді абаттандыру және көгалдандыру бойынша жобаларды отырғызу материалымен қамтамасыз етеді. Кеңесте саланың негізгі мәселелері және отандық өндірісті кеңейту үшін қажетті шаралар қарастырылды.Қазіргі таңда Қазақстан импорттық отырғызу материалына тәуелділікті сақтап отыр. Сонымен қатар отандық көшет шаруашылықтарында өсірілген өсімдіктер жергілікті климаттық жағдайларға жақсы бейімделген және өмір сүру деңгейі жоғары. Сондай-ақ олар химиялық өңдеуге және өсу стимуляторларын қолдануға аз шығындарды қажет етеді. Бүгінде ішкі нарықтың көлемін және импортқа тәуелділік деңгейін бағалау қиын: ресми статистика сәндік өсімдіктердің өндірісін бөлек ескермейді.Сәндік көшет шаруашылығы – белгілі бір табиғи-климаттық жағдайларға бейімделген стандартталған отырғызу материалын өндіруге бағытталған өсімдік шаруашылығының жас, жоғары технологиялық және ғылымды қажет ететін кіші саласы. Бүгінгі таңда жасыл кеңістіктер абаттандыру элементі ғана емес, сонымен қатар экологиялық, инженерлік және эстетикалық функцияларды орындайтын қалалық инфрақұрылымның маңызды бөлігі болып саналады. Орталық Азия өсімдіктер питомнигі қауымдастығының өкілдері атап өткендей, салада сәндік дақылдарға стандарттар жоқ. Жерді пайдалану мәселесі де реттелмеген: ҚР Жер кодексінде сәндік көшет өсіруге арналған жердің жеке санаты жоқ. Жердің нысаналы мақсатының қолданыстағы түрлері, оның ішінде орман өсіру және бау-бақша өсіру, кейіннен қазу және трансплантациялау арқылы өсімдіктерді өсіруді көздейтін көшетжайлар қызметінің ерекшелігін ескермейді. Ауылшаруашылық жерлерінде жұмыс істеу кезінде күрделі жылыжайлар, қоймалар мен автоматты суару жүйелерін салуға шектеулер туындайды.Тағы бір мәселе сәндік көшет шаруашылығы саласындағы қызмет түрлерін жіктеуге қатысты. Сала өкілдерінің пікірінше, қолданыстағы жіктеу өсіру ерекшелігі мен отырғызу материалына қойылатын талаптарды ескере отырып нақтылауды қажет етеді. Сонымен қатар кеңеске қатысушылар отандық питомниктер желісін дамыту және экспорттық нарықтарға шығу үшін айтарлықтай әлеуетті атап өтті. Қазақстанның географиялық жағдайы климаттық жағдайлары ұқсас елдерге бағдарлануға мүмкіндік береді. Күрт континентальды климатта өсірілген өсімдіктер бейімделу мен өмір сүрудің бәсекелестік артықшылығына ие.Кеңес қорытындысы бойынша Серік Жұманғарин Экология министрлігіне Ауыл шаруашылығы, Өнеркәсіп министрліктерімен, әкімдіктермен және сала өкілдерімен бірлесіп сәндік көшет шаруашылығының жай-күйіне кешенді талдау жүргізуді тапсырды. Ол отандық өндіріс пен импорттың көлемін, өңірлердің қажеттіліктерін, сондай-ақ саланы дамыту үшін барлық кедергілерді қамтуы тиіс. Сондай-ақ мемлекеттік органдар бизнестің осы саладағы экономикалық қызмет түрлерінің жіктелуін жетілдіру және СЭҚ ТН егжей-тегжейін жетілдіру мәселелерін пысықтайды.Ақпарат көзі : https://www.gov.kz/memleket/entities/economy/press/news/details/1286854?lang=ru

Елордада Қорғаныс істері жөніндегі департаментінің жинау пункті базасында әскерге шақыру жасындағы жастарды Ұлттық қауіпсіздік комитеті Шекара қызметінің қатарына шығарып салу салтанатты рәсімі өтті. Іс-шараға Қорғаныс министрлігінің, ҰҚК Шекара қызметінің өкілдері, Қарулы күштердің ардагерлері, сондай-ақ әскерге шақырылушылардың туған-туыстары мен жақындары қатысты. Бозбалалар Шығыс Қазақстан облысының Күршім ауылында орналасқан, жарты ғасырдан астам тарихы бар әрі Қазақстан Республикасының Мемлекеттік шекарасын қорғау бойынша маңызды міндеттерді атқаратын әскери бөлімде қызмет ететін болады.– Отан шебін қорғау – үлкен мәртебе әрі зор абырой. Осыған лайықты ұл тәрбиелеп өсірген ата-аналарға шынайы алғысымды білдіремін. Әскерге шақырылушыларға мықты денсаулық, сенімділік, төзімділік пен әскери істі меңгеруде табыс тілеймін. Бұл қызмет сіздер үшін тұлға ретінде қалыптасу мен жарқын болашақ құру жолындағы маңызды қадам болсын, – деді Астана қаласы Қорғаныс істері жөніндегі департаментінің өкілі, запастағы полковник Ғани Артықов.Әскерге шақырылушылардың арасында жергілікті әскери басқару органына өз еркімен келген 19 жасар Берік Иноятов та бар. Ол биыл Астана қаласының Жоғары медициналық колледжін аяқтаған.– Нағыз азамат өз уақытында әскерде борышын өтеп, Отан алдындағы міндетін орындауы тиіс деп есептеймін. Бұрын шекарадағы қызмет туралы фильмдерді қарайтын едім, ал енді өзім осы атмосфераға еніп, нағыз өмір мектебінен өтіп, өзімді шыңдай түсемін. Мемлекеттік шекараны қорғауға өз үлесімді қоса алатыныма мақтанамын және әскери борышымды абыроймен орындауға тырысамын, – деп өз ойымен бөлісті. Шақырылушы Серікболсын Айнабековтің әжесі әскерге екінші немересін шығарып салып отыр.– Биыл дәл осы жерден үлкен немерем Диасты Шекара қызметіне шығарып салған едік. Ол қызметін аман-есен өтеп, оралды. Бүгін кезек Серікболсынға келді. Ол да ағасының жолын қуып, шекарада қызмет ететін болады. Бұл біздің отбасымыз үшін үлкен мақтаныш әрі жауапкершілік. Жігіттерімізге шын жүректен мықты денсаулық, төзімділік және сәтті қызмет тілеймін, – деді ол.Әскери қызметті өткеру кезеңінде сарбаздарға кредиттік демалыстар беріледі. Бұдан бөлек, запасқа шығарылғаннан кейін жауынгерлік даярлықтың үздіктері ҰБТ тапсырмай-ақ елдің жоғары оқу орындарына мемлекеттік грантқа түсе алады. Не болмаса келісімшарт бойынша әскери қызметін жалғастыруға мүмкіндіктері бар.Биыл Астанадан мерзімді әскери қызметке 1 400 азамат аттанады, олардың 190-ы ҰҚК Шекара қызметіне барады.Ақпарат көзі : https://www.gov.kz/memleket/entities/mod/press/news/details/1286412?lang=ru

«Сайран Арена» спорт кешенінде Қорғаныс министрлігінің, Бас штабтың және Қарулы күштердің құрылымдық бөлімшелері арасында өткен шағын футбол чемпионатының қорытындысы шығарылды. Биыл алғаш рет Қорғаныс министрінің бірінші орынбасары – Қарулы күштер Бас штабы бастығының кубогы үшін чемпионат ұйымдастырылды.Жарысқа 35 команда құрамында 350-ден астам спортшы қатысты. Төрешілік екі топ бойынша жүргізілді. Бірінші топқа Қорғаныс министрлігінің департаменттері, басқармалары мен орталықтары кірді. Екінші топта Қарулы күштердің бас басқармалары, басқармалары мен әскери бөлімдері бағын сынады.         Жеңімпаздар мен жүлдегерлерді Қорғаныс министрінің бірінші орынбасары – Қарулы күштер Бас штабының бастығы генерал-лейтенант Қаныш Әбубәкіров марапаттады.– Футбол алаңында команданың нәтижесі әр ойыншының іс-қимылына байланысты қалыптасады. Мұндай жарыстар әскери қызметшілердің дене дайындығын жетілдіруге, өзара іс-қимыл мен үйлесімділікті дамытуға, командалық рухты нығайтуға ықпал етеді. Осындай іс-шараларға қатысу тек дене дайындығын жоғары деңгейде ұстауға ғана емес, әскери ұжымдардың ауызбіршілігін арттыруға да мүмкіндік береді, – деп атап өтті ол.Жалпы командалық есепте бірінші топта Ұлттық әскери-патриоттық орталығының құрамасы жеңімпаз атанды. Екінші орынды Әскери-ғарыштық бағдарламалар орталығының командасы иеленсе, үшінші орын Халықаралық ынтымақтастық департаментінің командасына бұйырды.         Екінші топта чемпион атанған – Әскери полиция бас басқармасының командасы. Екінші орын 14776 әскери бөлімінің құрамасына берілсе, үшінші орын Қазақстан Республикасы Ұлттық қорғаныс университетінің (ҰҚУ) командасына тиесілі болды.Чемпионат қорытындысы бойынша жекелеген номинациялардағы үздіктер де анықталды. Бірінші топта «Үздік қақпашы» атағын сержант Сержан Жандыбаев, ал «Үздік шабуылшы» аталымын сержант Нұргелді Жәкенов иеленді. Екеуі де Ұлттық әскери-патриоттық орталығының өкілдері. «Үздік ойыншы» атағына Әскери-ғарыштық бағдарламалар орталығының майоры Думан Шәймерденов ие болды.         Екінші топта «Үздік қақпашы» номинациясы Әскери полиция бас басқармасының ефрейторы Жандос Айтмағамбетұлына бұйырды. «Үздік шабуылшы» атанған – 14776 әскери бөлімінің кіші сержанты Қуат Қажымұқанов. «Үздік ойыншы» атағын Қазақстан Республикасы Ұлттық қорғаныс университетінің қатардағы жауынгері Мәди Мәлікұлы алды.         Бұдан өзге Бас штаб бастығы генерал-лейтенант Қаныш Әбубәкіров чемпионат жүлдегерлері, ҰҚУ коменданттық взводында мерзімді әскери қызмет өткеріп жүрген қатардағы жауынгерлер Мәди Мәлікұлы мен Байжан Райымбекті 10 тәулік демалыспен марапаттады.Шағын футбол чемпионатының жеңімпаздары мен жүлдегерлеріне кубоктар, медальдар және дипломдар табысталды. Ақпарат көзі : https://www.gov.kz/memleket/entities/mod/press/news/details/1286345?lang=ru

          Қазақстан әскерінде бір сапта әртүрлі этнос өкілдері қызмет етеді. Әрқайсының мәдениеті, тілі және отбасылық дәстүрлері бар. Оларды біріктіретін ортақ құндылықтар – әскери борышқа адалдық, жауапкершілік және Отанды қорғауға әзір болу.         Әскери ұжымдарда Қазақстан этностарының тілдерін, дәстүрлері мен мәдениетін зерделеуге бағытталған мәдени-ағартушылық іс-шаралар, түрлі байқаулар мен кездесулер өткізіліп тұрады.         Бұл бағыттағы жұмыстың маңызды бөлігі – әскери қызметшілердің тіл мәдениетін дамыту және мемлекеттік тілге деген қызығушылығын арттыру. Осы тұрғыда қазақ тілі өте маңызды. Қазақ тілі – азаматтық бірегейліктің маңызды бөлігі ғана емес, сонымен қатар әскери қызметшілер арасындағы өзара түсіністік пен бірлікті нығайтуға ықпал ететін ортақ қарым-қатынас.         Қорғаныс министрлігі Қазақстан халқы тілдері күні қарсаңында әскери қызметшілер арасында «Тіл – татулық тірегі» байқауын өткізді. Іс-шара түрлі ұлттардан құралған әскери қызметшілердің қазақ тілінде білімін жетілдіруге, шығармашылық қабілеттерін ашуға және еліміздің мәдени мұрасымен танысуға мүмкіндік берді.         Қазақстан халқы тілдері күні еліміздің мәдени және тілдік әралуандығы Қазақстанның ажырамас бөлігі екенін, ал бірлік – баршамызға ортақ екенін тағы бір мәрте еске салады. Әскери ұжымдарда бұл қағидат түрлі этнос өкілдерінің ортақ міндеттерді бірлесе орындап, бір Отанға қызмет етуінен айқын көрінеді. Ақпарат көзі : https://www.gov.kz/memleket/entities/mod/press/news/details/1286344?lang=ru

Астана, 2026 жылғы 4 қыркүйек – Қазақстан Республикасы Сыртқы істер министрінің орынбасары Арман Исетов Швейцария Конфедерациясының Қазақстан Республикасындағы жаңадан тағайындалған Елшісі Кристин Хонеггер Золотухинді Астанадағы дипломатиялық миссиясын бастауына орай қабылдады.Кездесу барысында Швейцария Елшісі сенім грамоталарының көшірмелерін табыс етті. Тараптар екіжақты күн тәртібіндегі өзекті мәселелер, оның ішінде саяси диалогты одан әрі дамыту, сауда-экономикалық және инвестициялық өзара іс-қимылды кеңейту перспективалары жөнінде пікір алмасты Цифрландыру, экология, агроөнеркәсіптік кешен бастамасы аясында су ресурстарын басқару салаларындағы ынтымақтастықты тереңдету перспективаларына ерекше назар аударды.Кездесу қорытындысы бойынша А. Исетов Қазақстан-Швейцария ынтымақтастығын одан әрі нығайтудың маңыздылығын атап өтіп, Астана мен Берн арасындағы сындарлы өзара іс-қимылды жалғастыруға дайын екенін білдірді.Ақпарат көзі : https://www.gov.kz/memleket/entities/mfa/press/news/details/1286282?lang=ru

Қазақстан Республикасы Сыртқы істер министрінің орынбасары Арман Исағалиев Түркия Республикасының Қазақстан Республикасындағы Елшісі Мұстафа Капуджумен кездесті.Кездесу барысында Қазақстан мен Түркия арасындағы кеңейтілген стратегиялық әріптестіктің қазіргі жағдайы мен даму перспективалары талқыланды.Тараптар саяси-дипломатиялық, сауда-экономикалық, мәдени-гуманитарлық және білім беру салаларындағы ынтымақтастықты одан әрі нығайту мәселелері бойынша пікір алмасты.Тараптар екі елдің Мемлекет басшыларының сапарлары барысында қол жеткізілген уағдаластықтарды іске асыру және екіжақты ынтымақтастықты одан әрі дамыту мақсатында өзара іс-қимылды жалғастыруға дайын екендерін растады.Ақпарат көзі : https://www.gov.kz/memleket/entities/mfa/press/news/details/1286207?lang=ru

Жаңа оқу жылы басталысымен еліміздің барлық өңірлеріндегі білім беру ұйымдарында Қорғаныс министрлігінің бастамасымен «Ерлік сабақтары» өтеді. Әскери қызметшілер мен Қарулы күштердің ардагерлері оқушыларды әскери қызметтің ерекшеліктерімен таныстырып, ерлігі, табандылығы мен әскери борышына адалдығы бірнеше буынға үлгі болған батырлар жайында әңгімелеп береді. Әскердегі тәжірибелерін де айтып, мектеп оқушыларының сұрақтарына жауап береді.Астанадағы №107 жалпы білім беретін мектепте 9, 10 және 11-сынып оқушыларымен қорғаныс істері департаментінің өкілдері, Қарулы күштердің ардагерлері және «Жас сарбаз» әскери-патриоттық қозғалысының елордалық филиалының басшысы кездесті.Іс-шара барысында «Қарулы күштердің ардагерлері» РҚБ ұйымы төрағасының орынбасары генерал-майор Марат Нағұманов оқушыларға ел тарихын құрметтеудің, әскери борышты абыроймен атқарудың және Отанға адал қызмет етудің маңыздылығына тоқталды.Оқушыларға ел тарихындағы ерлікке толы оқиғалар, жауынгерлік дәстүрлер және Қарулы күштердің еліміздің егемендігі мен аумақтық тұтастығын қамтамасыз етудегі рөлі туралы бейнематериалдар көрсетілді. Мектеп оқушылары әскери қызметке, әскери оқу орындарына түсу талаптары мен шарттарына қатысты сұрақтар қойып, өздерін қызықтырған мәселелер бойынша жауап алды.– Оқушылардың бойына мектеп қабырғасынан бастап Отанға деген сүйіспеншілік, елге қызмет етуге ұмтылыс, жауапкершілік пен отансүйгіштік қасиеттерді қалыптастыру – ортақ міндетіміз. Бүгінгі «Ерлік сабағы» оқушыларға осы құндылықтарды тереңірек түсінуге мүмкіндік берді. Ел қорғаушылардың ерлік үлгілерін білу және олардың өмір жолынан тағылым алу жастардың бойында жақсы қасиеттердің қалыптасуына ықпал етеді, – деп мұндай кездесулердің оқушылардың бойында патриоттық құндылықтарды қалыптастырудағы маңызын атап өтті мектеп директоры Айгүл Бисенбина.Шара соңында XII Халықаралық «Айбын» әскери-патриоттық жастар жиынына белсенді қатысқан мектеп оқушылары Бейбарыс Ерғазыұлы мен Аяжан Тоқтарова Қорғаныс министрлігі Тәрбие және идеологиялық жұмыстар департаменті бастығының атынан алғыс хаттармен марапатталды.Ақпарат көзі : https://www.gov.kz/memleket/entities/mod/press/news/details/1285719?lang=ru

Мемлекет басшысының арнайы тапсырмасымен Премьер-министр Олжас Бектенов және Президент Әкімшілігінің басшысы Роман Скляр Алматы облысы мәслихаттары депутаттарының отырысына қатысты.Роман Скляр депутаттарға Президент Қасым-Жомарт Тоқаевтың Алматы облысының әкімі лауазымына екі кандидатты:  бұрынғы төтенше жағдайлар министрі Шыңғыс Әрінов пен Алматы облысы әкімінің орынбасары Ғани Майлыбаевты ұсыну туралы хатын оқыды. Жиынға 178 депутат қатысты. Ашық дауыс беру қорытындысы бойынша Шыңғыс Әріновтің кандидатурасын депутаттардың 83%-ы қолдады.Қазақстан Республикасы Президентінің тиісті Жарлығымен Шыңғыс Әрінов Алматы облысының әкімі болып тағайындалды.Өңір активімен өткен жиында Премьер-министр Олжас Бектенов Марат Сұлтанғазиевке облыстың әлеуметтік-экономикалық дамуына қосқан үлесі үшін алғыс білдірді. Үкімет жетекшісі Алматы облысының активіне өңірдің жаңа әкімі Шыңғыс Әріновті таныстырды. Жиында жаңа Конституцияның күшіне енуі елімізді одан әрі жаңғыртудағы маңызды жаңа тарихи кезеңнің бастауы болғаны атап өтілді. Үкімет алдында Мемлекет басшысы айқындаған мақсат экономиканың сапалы әрі орнықты өсуін қамтамасыз етуге қол жеткізу міндеті тұр.Олжас Бектенов Құрылтайдың бірінші сессиясында азаматтарымыз бен ел экономикасы үшін маңызды нысандардың құрылысын озық қарқынмен жүргізу туралы Президент тапсырмаларын орындауға баса назар аударды. Атап айтқанда, олар – халықтың өмір сүру сапасын одан әрі арттыруға аса қажетті әлеуметтік, инженерлік, энергетикалық және су инфрақұрылымы. Бүгінгі таңда Алматы облысының әкімдігіне денсаулық сақтау саласының бірқатар жаңа жобаларына қосымша қаражат бөлінді. Олардың ішінде Қарасай ауданында перинаталдық орталық пен емхана салу, Қаскелең қаласында жұқпалы аурулар ауруханасын, Іле ауданында перзентхана бөлімшесін жаңғырту жұмыстары бар. Нысандарды уақтылы пайдалануға беру қажет. Премьер-министр бөлінген қаражаттың мақсатты әрі тиімді жұмсалуын қатаң бақылауды тапсырды. Әрбір теңге өңір тұрғындары үшін нақты нәтиже әкелуі тиіс. Қадағалауды күшейту үшін «цифрлық теңге» тетігі қолданылатын болады. Сонымен қатар ауқымды құрылыс бағдарламаларын жүзеге асыру кезінде отандық тауар өндірушілерге басымдық берілуі тиіс. Бұл жергілікті құрылыс ұйымдарын жұмысқа тартуға, сондай-ақ қазақстандық құрылыс материалдары мен жабдықтарын қолдануға қатысты. Осы ретте Олжас Бектенов сатып алынатын қызметтер мен тауарларға бағаның алыпсатарлықпен өсуіне жол бермеуді тапсырды. Кәсіпкерлер үшін бұл – өндіріс көлемін ұлғайтуға берілген өте жақсы мүмкіндік, сол себепті отандық өндірушілер бағаны жасанды жолмен көтеруге емес, жұмыс көлемін ұлғайтуға баса мән беруі қажет. Аталған қадамдар кепілдендірілген пайда табуға, жаңа жұмыс орындарынашуға, жалақыны көтеруге мүмкіндік бередіі. Мұндай тәсіл ішкі өндіріс пен азаматтарды жұмыспен қамтудың барлық тізбегін ынталандыруды қамтамасыз етеді.Премьер-министр Алматы облысы әкімдігінің жұмысының негізгі басымдықтарын атап өтті. Ауылдық жерлерде әлеуметтік қызметтердің қолжетімділігін арттыру және қала мен ауыл арасындағы инфрақұрылымдық алшақтықты қысқарту бойынша міндеттер айқындалды. Елді мекендерді сапалы коммуналдық қызметтермен қамтуды арттырып, инфрақұрылымның авариялық жағдапйларын азайту қажет. Су, жылу, электрмен жабдықтау және су бұру жүйелерін кезең-кезеңімен жаңғыртуға, сондай-ақ жаңа электр қуатын өндіру көздерін салуға баса назар аударылды.АӨК саласында суармалы егіншілікті дамыту, су шығынын азайту, ауыл шаруашылығында су үнемдеу технологияларын кеңінен енгізу және өңір экономикасындағы агроөнеркәсіп кешенінің үлесін ұлғайту қажеттігі атап өтілді. Көлік қозғалысының қауіпсіздігін қамтамасыз ету үшін өңірдің автомобиль жолдарын жөндеу мен реконструкциялауды жандандыру тапсырылды. Өңірге инвестиция тартуды күшейту, өңдеу өнеркәсібін, агроөнеркәсіптік кешенді, туризмді және шағын және орта бизнесті дамытып, жаңа экономикалық өсу нүктелерін қалыптастыру, сонымен қатар Алатау қаласының әлеуетін тиімді пайдаланудың маңыздылығы атап өтілді.Олжас Бектенов Мемлекет басшысы қойған міндеттер барлық бағыттар мен салалар бойынша жүйелі әрі кешенді түрде жүзеге асырылуы тиіс екенін атап өтті. Өңірдің одан әрі әлеуметтік-экономикалық дамуын қамтамасыз ету үшін жан-жақты шаралар қабылдау қажет. primeminister.kzАқпарат көзі : https://www.gov.kz/memleket/entities/almobl/press/news/details/1285701?lang=ru

Қорғаныс министрінің орынбасары генерал-майор Алмаз Жұмакеев жұмыс сапарымен Жетісу, Үштөбе, Сарыөзек, Қонаев және Гвардейск гарнизондарына барып, әскери инфрақұрылым нысандарының жай-күйімен және әскери бөлімдердегі күнделікті қызметтің ұйымдастырылуымен танысты.Қорғаныс ведомствосы басшысының орынбасары салынып және қайта жаңғыртылып жатқан нысандарды, оның ішінде казарма, асханалар мен бірқатар кешендерді аралап көрді. Сондай-ақ әскери қалашықтардың абаттандырылу деңгейін тексерді.Тексеру барысында генерал-майор Алмаз Жұмакеев құрылыс нормалары мен белгіленген талаптардың сақталуына, пайдаланылатын материалдардың сапасына, сондай-ақ жұмыстың уақтылы орындалуына баса назар аударды.– Әскери инфрақұрылым – әскери қызметті ұйымдастырудың маңызды құрамдас бөлігі. Ол бөлімшелердің жауынгерлік әзірлігіне тікелей әсер етеді. Әрбір нысан сапа мен қауіпсіздік талаптарына сай болуы және белгіленген мерзімде пайдалануға берілуі тиіс, – деді Қорғаныс министрінің тыл және әскери инфрақұрылым жөніндегі орынбасары.Гарнизондарда генерал-майор А. Жұмакеев алдағы халықаралық оқу-жаттығуларға әскери полигондардың дайындығын тексерді. Ол полигондардың материалдық-техникалық қамтамасыз ету деңгейін, қажетті инфрақұрылымның болуын және оқу орындарының жай-күйін зерделеді.Жұмыс сапарының қорытындысы бойынша Қорғаныс министрінің орынбасары анықталған кемшіліктерді жоюды, жөндеу және құрылыс жұмыстарының сапасына бақылауды күшейтуді, сондай-ақ заманауи талаптарды ескере отырып, казармалар мен асханаларды жаңғырту жұмыстарын жалғастыруды тапсырды.Генерал-майор А. Жұмакеев әскери инфрақұрылым нысандарын қайта жаңғырту және жөндеу кезінде әскери қызметшілердің қауіпсіздігі, атқарылатын жұмыстардың сапасы және күнделікті қызметке қолайлы жағдай жасау басты назарда болуы керектігін атап өтті.Сондай-ақ ол әскери қызметшілердің әлеуметтік-тұрмыстық жағдайларын одан әрі жақсартуға ерекше көңіл бөлуді тапсырды.Ақпарат көзі : https://www.gov.kz/memleket/entities/mod/press/news/details/1285641?lang=ru

Бүгін Марат Сұлтанғазиев 2022 жылғы маусымнан бері басқарып келген Алматы облысының әкімі қызметінен кетті. Оның төрт жылдық басқару кезеңі әкімшілік бөліністен кейін өңірдің қалыптасуы және облыс орталығының Қонаев қаласына көшірілуімен тұспа-тұс келді. Осы уақыт ішінде облыс жалпы өңірлік өнім көлемі бойынша елдегі оныншы орыннан көшбасшы бестіктің қатарына көтеріліп, экономикасын екі есеге жуық ұлғайтты және инвестиция көлемін екі еседен астам арттырды, -  деп хабарлайды Алматы облысы әкімінің баспасөз қызметі.2022 жылы облыстың жалпы өңірлік өнімі шамамен 3,4 триллион теңгені құраса, бүгінде бұл көрсеткіш шамамен 6,8 триллион теңгеге жетті. Өнеркәсіп өндірісінің көлемі 1,6 триллионнан 2,6 триллион теңгеге дейін өсті. Оның шамамен 90 пайызы өңдеу өнеркәсібіне тиесілі.Осы кезеңде негізгі капиталға салынған инвестиция көлемі 614 миллиард теңгеден 1,35 триллионға артты. Өңірде жалпы құны 724 миллиард теңгені құрайтын 98 жоба іске асырылып, шамамен 11 мың жұмыс орны құрылды.Облыстың қаржылық базасы да өзгерді. Бюджеттің меншікті кірістері 2,4 есе өсті, ал республикалық бюджеттен берілетін трансферттердің үлесі 33 пайыздан 13 пайызға дейін төмендеді. Бұған дейін донор-аумақтар қатарында Қарасай және Іле аудандары болса, бүгінде олардың қатарына Еңбекшіқазақ, Талғар, Жамбыл аудандары мен Қонаев қаласы қосылды.Негізгі әлеуметтік мәселелердің бірі халық санының жылдам өсуіне байланысты мектеп тапшылығы болды. 2022 жылы облыста үш ауысымды 52 мектеп болса, қазір олардың саны 23-ке қысқарды. Төрт жыл ішінде 75 мектеп ашылды. Оның ішінде биыл жаңа оқу жылының басталуына дейін жалпы 4200 орынды бес мектеп пайдалануға берілді.Сонымен қатар жаңа облыс орталығының инфрақұрылымы қалыптасты. Қонаевта инженерлік желілер мен әкімшілік нысандардың құрылысы басталды. Алдағы уақытта мұнда театр, «Қонаев Арена», Оқушылар сарайы және басқа да әлеуметтік нысандар салу жоспарлануда.Төрт жыл ішінде облыста 3,7 миллион шаршы метр тұрғын үй пайдалануға берілді. 6,6 мың азамат баспанамен қамтылды. Олардың қатарында әлеуметтік осал топ өкілдері де бар.Алматы облысы ауыл шаруашылығының жалпы өнім көлемі бойынша Қазақстанда екінші орынды сақтап, республикадағы жалпы көлемнің 11,6 пайызын қамтамасыз етіп отыр. 2022-2025 жылдары мемлекетке пайдаланылмай жатқан 528 мың гектар ауыл шаруашылығы жері қайтарылды. Төрт жыл ішінде суару желілерін жаңғыртуға 16,3 миллиард теңге бағытталды, ал су үнемдеу технологиялары суармалы жердің 41,2 пайызына енгізілді.Туризм саласы да айтарлықтай дамыды. Биылғы жаздың өзінде Қапшағай су қоймасына екі миллионнан астам адам келді. Сонымен қатар Көлсай көлдері мен Қайыңдының, Көшпенділер қалашығының инфрақұрылымы дамып, танымал туристік нысандарға апаратын жолдар жөнделді. Алматы облысы ірі спорттық және мәдени-бұқаралық іс-шараларды өткізу алаңына да айналды.Сонымен бірге халық саны қарқынды өсіп келе жатқан облыс алдында жүйелі міндеттер сақталуда. Олардың қатарында агломерациядағы әлеуметтік және инженерлік инфрақұрылым тапшылығы, ауыл шаруашылығын сумен қамтамасыз ету және ірі инвестициялық жобаларды толық аяқтау қажеттігі бар.Ақпарат көзі : https://www.gov.kz/memleket/entities/almobl/press/news/details/1285546?lang=ru

Облыс әкімі Мұрат Ергешбаев «Roca Group» компаниясының басшысы Даниэль Эрнандеспен кездесті. Кездесуде санитарлық-техникалық бұйымдар зауытын салу және компанияның өндірістік жобаларын жүзеге асыру мәселелері талқыланды.Биыл тамыз айында Премьер-министрдің бірінші орынбасары Нұрлыбек Нәлібаевтың облысқа жұмыс сапары кезінде жыл соңына дейін смесительдер мен инсталляциялық жүйелерді құрастыру желісін іске қосу жоспарланғаны айтылған болатын. Қазіргі таңда құрастыру цехын орналастыру үшін «Панабек» және «Көлік құрылыс компаниясы» серіктестіктерінің өндірістік ғимараттары ұсынылды.Сонымен қатар «Панабек» серіктестігі санитарлық-техникалық бұйымдарды өндіруге қажетті металл инсталляцияларын әзірлеп, компания өкілдеріне таныстырды. Өнім сапасы «Roca Group» компаниясының талаптарына сәйкес келген жағдайда, жергілікті кәсіпкерлермен өзара тиімді әріптестік орнату мүмкіндігі қарастырылады. Жоба аясында жергілікті қамтуды арттыруға және компания өнімдерін өңірдегі құрылыс нысандарында пайдалануға басымдық беріледі.Атап айтқанда, әлеуметтік нысандарға, Президент саябағы аумағындағы бес және үш жұлдызды қонақүйлерге осы бұйымдар қолданылады.Облыс әкімдігі өңірдегі инвестициялық жобаларға және компанияға жан-жақты қолдау көрсетуге дайын.Ақпарат көзі : https://www.gov.kz/memleket/entities/kyzylorda/press/news/details/1285124?lang=ru

Алматы қаласы Қорғаныс істері жөніндегі департаментінің шақыру пунктінде 20 азаматты Қазақстан Республикасы Ұлттық қауіпсіздік комитетінің Шекара қызметіне мерзімді әскери қызметке салтанатты түрде шығарып салу рәсімі өтті.Салтанатты шараға қалалық Қорғаныс істері жөніндегі департаменттің басшылығы, жергілікті атқарушы органдардың өкілдері, Алматы қаласы мен Алматы облысының «Аналар жүрегі» сарбаздар аналары комитетінің мүшелері, ҰҚК Шекара қызметінің ардагерлері, сондай-ақ әскерге шақырылушылардың ата-аналары мен жақындары қатысты.Жастарға ардагерлер мен ата-аналар ақ жол, жүректеріне жігер, бойларына мызғымас қуат тіледі.– Бүгін біздің жігіттер азаматтық және әскери борышын өтеуге аттанып барады. Олардың әрқайсысы үшін бұл – тәртіпті, батылдықты және жауапкершілікті талап ететін өмірдің жаңа кезеңі. Олардың әскери қызметті абыроймен өткеріп, өмірлік тәжірибе жинақтап, ер-азамат болып елге оралатынына сенімдімін, – деді Алматы қаласы Қорғаныс істері жөніндегі департаменті бастығының орынбасары подполковник Нұржан Естаев.Салтанатты рәсім барысында жас сарбаздар мен олардың ата-аналарына арналған концерттік бағдарлама ұсынылды. Одан кейін әскери оркестрдің патриоттық шығармаларының сүйемелдеуімен әскерге шақырылушылар қызмет өткеру орнына аттанды. Алда оларды тәртіпке, жауапкершілікке және дербестікке баулитын маңызды өмір мектебі күтіп тұр.Айта кетейік, күзгі әскерге шақыру науқаны барысында Алматы қаласынан Қарулы күштерге, Мемлекеттік күзет қызметіне, Ұлттық ұланға, Шекара қызметіне және Төтенше жағдайлар министрлігіне мерзімді әскери қызметке мыңнан астам азаматты жіберу жоспарланып отыр.Ақпарат көзі : https://www.gov.kz/memleket/entities/mod/press/news/details/1285022?lang=ru

Бүгін облыс әкімі Мұрат Ергешбаевтың төрағалығымен мәжіліс өтті. Күн тәртібінде «Aksa Energy Qyzylorda» серіктестігіне төмендету коэффициентін қолдану мәселесі талқыланды.Мемлекет басшысының тапсырмасына сәйкес Қызылорда қаласында 240 МВт электр және 277 Гкал жылу энергиясын өндіретін жаңа жылу-электр орталығы салынды. Жобаға 215 млрд теңге инвестиция тартылып, нысан биыл толық пайдалануға берілді.Мамыр айында станцияда аттестаттау жүргізіліп, оның қорытындысы бойынша 255 МВт электр қуаты расталды. Маусымның 23-інде «KEGOC» АҚ-ның 220 кВ электр желісіндегі жоспарлы жөндеу жұмыстары барысында апатқа қарсы автоматика жүйесі іске қосылып, бу турбинасының жұмысы уақытша тоқтатылды. Қазіргі уақытта турбина дайындаушы зауытқа жіберіліп, қалпына келтірілуде.Осыған байланысты Жаңартылатын энергия көздерін қолдау жөніндегі қаржы-есеп айырысу орталығы тарапынан төмендету коэффициенті қолданылуда. Соңғы үш айда аталған төлемдер бойынша шамамен 1,8 млрд теңге көлеміндегі айырма қалыптасты.Технологиялық бұзушылық сыртқы факторлардың әсерінен орын алған. Осыған байланысты «Aksa Energy» жобасына төмендету коэффициентін қолдану мәселесін қайта қарау, сыртқы факторлардың әсерінен бұзушылық болған жағдайда осы коэффициентті қолдану тәртібін нормативтік-құқықтық тұрғыдан жетілдіру ұсынылды.Бұл шаралар энергетикалық нысанның тұрақты жұмысын қамтамасыз етуге, инвестициялық жобаларды қолдау тетіктерін жетілдіруге және өңірдегі инвестициялық ахуалды қолайлы ете түсуге мүмкіндік береді.Ақпарат көзі : https://www.gov.kz/memleket/entities/kyzylorda/press/news/details/1284517?lang=ru

32363 әскери бөлімінде әскери-есептік мамандықты меңгеруде жоғары нәтиже көрсеткен алты мерзімді әскери қызметшіге он тәуліктен демалыс берілді.Бұл – әскерге жаңа барған сарбаздардың тәртіптілігі, нормативтерді ойдағыдай орындағаны және кәсіби дағдыларын жетілдіруге деген ұмтылысы үшін берілген лайықты марапат.Демалыс алғандардың қатарында гвардия қатардағы жауынгері Байжан Жүнісов те бар. Демалысын ол туған-туыстарының ортасында өткізуді жоспарлап отыр.– Дайындық қарқынды өтті. Теорияны оқып, практикалық дағдыларды пысықтадық. Шапшаң әрі ұйымшыл әрекет етуді үйрендік. Қазір ең алдымен жақындарымды көріп, отбасыммен бірге уақыт өткізгім келеді. Қызметке оралған соң, жаңа күш-жігермен әскери міндетімді жалғастырамын, – деді сарбаз.Байжанның айтуынша, бұл марапат оған қызметін абыроймен аяқтап, жоғары оқу орнына түсу үшін қажетті сертификат алуға деген ынтасын арттырған.Дайындық барысында мерзімді қызметтегі сарбаздар әскери-есептік мамандықты меңгеріп, практикалық дағдыларын жетілдіріп, бөлімшемен бірге әрекет етуді үйренеді. Үздік нәтиже көрсеткен сарбаздарды қолбасшылық марапаттап, әскери қызметшілерді жоғары көрсеткіштерге қол жеткізуге ынталандырады.Алты сарбазға берілген он күндік демалыс жақындарымен қауышып, күш жинап, жақсы көңіл-күймен әскери қызметін жалғастыруға мүмкіндік береді.Ақпарат көзі : https://www.gov.kz/memleket/entities/mod/press/news/details/1284491?lang=ru

2025 жылы Қазақстанның Шанхай ынтымақтастық ұйымына (ШЫҰ) мүше мемлекеттермен тауар айналымы 72,6 млрд АҚШ долларын құрады. 2024 жылы бұл көрсеткіш 67,7 млрд доллар болған.Қазақстанның ШЫҰ елдеріне экспорты 30,7 млрд долларды, ал импорт көлемі 41,8 млрд долларды құрады.Қазақстанның ШЫҰ елдерімен саудасындағы негізгі серіктестері – Қытай, Ресей, Өзбекстан және Қырғызстан. 2025 жылы Қытаймен тауар айналымы 34,2 млрд доллар, Ресеймен 27,4 млрд доллар, Өзбекстанмен 4,8 млрд доллар және Қырғызстанмен 2,2 млрд доллар болды.Қазақстаннан ШЫҰ елдеріне экспортталған негізгі тауарлардың қатарында уран, мыс кендері мен концентраттары, шикі мұнай, мыс және мыс катодтары, табиғи газ, бидай және ферроқорытпалар бар.2025 жылы бірқатар ауыл шаруашылығы және өңдеу өнеркәсібі өнімдерінің экспорты өсті. Атап айтқанда, жануарларға арналған азық өнімдерінің экспорты 2,5 есеге артып, 614,9 млн долларға жетті. Күнбағыс майының экспорты 62,4%-ға өсіп, 633,7 млн долларды құрады. Бидай экспорты 17,1%-ға артып, 1,13 млрд долларға жетті. Арпа экспорты 22%-ға, бидай ұны 11,8%-ға, зығыр тұқымы 72,9%-ға өсті.ШЫҰ елдерінен Қазақстанға импортталатын негізгі тауарлардың қатарында жеңіл автомобильдер, автомобиль кузовтары, табиғи газ, мұнай өнімдері, алтын, есептеу машиналары және автомобильдер мен тракторларға арналған бөлшектер бар.Қазақстанның экспортында уран, мыс кені мен концентраттары, мұнай, мыс, табиғи газ және бидай негізгі позицияларды сақтап отыр. Сонымен қатар күнбағыс майы, жануарларға арналған азық, ұн, арпа және басқа да ауыл шаруашылығы өнімдері бойынша экспорт көлемінің өсуі қазақстандық өнімге сыртқы нарықтардағы сұраныстың бар екенін көрсетеді.Ақпарат көзі : https://www.gov.kz/memleket/entities/mti/press/news/details/1284124?lang=ru

Президент Жарлығына сәйкес Қазақстанда күзгі әскерге шақыру науқаны басталды. Оның аясында қалалық және аудандық шақыру комиссиялары жұмысқа кірісті.2026 жылдың желтоқсан айының соңына дейін әскерден кейінге қалдыруға немесе әскери қызметтен босатылуға негізі жоқ 18 бен 27 жас аралығындағы 23 000-ға жуық ер-азамат мерзімді әскери қызметке шақырылады. Олардың ішінде 12 000-нан астам адам – Қарулы күштер, 7 000 – Ұлттық ұлан, 3 000 – ҰҚК Шекара қызметі, 400-ден астам адам – Төтенше жағдайлар министрлігі, 300-ге жуығы – Мемлекеттік күзет қызметі қатарын толықтыратын болады.«Цифрлық шақыру» жүйесі мен «Smart военкомат» жобасының арқасында әскерге шақыру және әскери есепке алу қызметтерінің басым бөлігі проактивті форматта көрсетіледі. Тұрғылықты жері ауысқан кезде азаматтарды әскери есепке қою, 17 жастағы бозбалаларды тіркеу, сондай-ақ әскерге шақыруды кейінге қалдыру мен босатуды ұсыну қызметтері автоматтандырылды. Әскери есепке қатысты барлық мәліметтер азаматтарға eGov порталындағы жеке кабинетінде қолжетімді.Қорғаныс ведомствосы мерзімді әскери қызметтің беделін арттыру бағытындағы жұмысты жалғастыруда. Оның барысында әскери қызметшілер әскери-есептік мамандықпен қатар, еңбек нарығында сұранысқа ие 20-ға жуық жұмысшы кәсібін тегін меңгере алады. Олардың қатарында жүргізуші, байланыс маманы, парамедик, экскаваторшы және тағы басқалары бар.Бұдан бөлек, сарбаздар үшін әскери қызмет өткеру кезеңінде несие төлемдерін кейінге қалдыру және ҰБТ тапсырмай-ақ мемлекеттік білім беру гранты бойынша жоғары оқу орындарына түсу мүмкіндігі қарастырылған.Осылайша, Қорғаныс министрлігі әскери қызметті ұйымдастыру сапасын арттыруға, цифрлық сервистерді дамытуға және сарбаздардың ата-аналарымен өзара байланысты нығайтуға бағытталған жобаларды жүйелі түрде жүзеге асырып келеді. Бұл ретте қызмет өткеру қауіпсіздігіне, Қарулы күштердің ашықтығына және әскери қызметшілер үшін заманауи әлеуметтік-тұрмыстық жағдайлар жасауға ерекше назар аударылады.Мерзімді әскери қызмет – ол елдің қорғаныс қабілетін қамтамасыз ету жүйесінің маңызды элементі. Әскерде шыңдалған сарбаздар мемлекеттің жұмылдыру резервін құрайды. Ал әскери өмірдің өзі олардың бойында темірдей тәртіп пен жауапкершілікті, көшбасшылық қабілет пен ұжымда жұмыс істеу дағдысын қалыптастырады.Ақпарат көзі : https://www.gov.kz/memleket/entities/mod/press/news/details/1284023?lang=ru

Мемлекет басшысы жайлы қалалық ортаны қалыптастыруға, заманауи инфрақұрылымды дамытуға және азаматтардың сапалы демалысын қамтамасыз етуге үнемі назар аударып келеді.Бүгін Қостанайда еліміздегі ең ірі жабық аквапарк ашылды. Салтанатты шараға қатысқан облыс әкімі Құмар Ақсақалов заманауи кешеннің ашылуы – тұрғындардың отбасымен бірге демалып, уақытын қызықты өткізуге жасалған игі қадам екенін айтты.Аквапарктің жалпы аумағы екі есеге жуық ұлғайып, 9 мың шаршы метрден асты, ал су айдынының көлемі үш еседен астам артып, 1 мың шаршы метрден асты.Мұнда бір уақытта 500 адамға дейін демала алады. Аквапаркте бес бассейн, жеті су сырғанағы, оның ішінде үлкен сырғанақ, балалар аймағы, толқынды бассейн, джакузи және фуд-корт бар.«Аймағымызда спорттық және қоғамдық инфрақұрылым қарқынды дамып келеді. Соңғы 3 жылда 30-дан астам спорт нысаны ашылды. Қостанайда Үстел теннисі орталығының және Триатлон-парктегі көпфункционалды стадионның құрылысы аяқталуға жақын. «Астана» шағын ауданында Спорт сарайы, «Береке» шағын ауданында және Триатлон-парк маңында 2 фитнес-орталық салынады. Жекпе-жек сарайы мен ерекше қажеттіліктері бар жандарға арналған спорт кешенін салу жоспарланған», – деді аймақ басшысы.2022 жылдан бері 21 мыңнан астам ағаш отырғызылды. Жыл сайын 1 млн-нан астам гүл егіледі. Өткен жылы 5 саябақ пен сквер ашылды.Қала маңында экопарк құрылуда. «Береке» шағын ауданында жаңа саябақ салу жоспарда. Көркемсурет галереясы, жаңа сауда-ойын-сауық және қонақүй кешендері бой көтереді.  «Мұндай орындар көбірек болуы керек. Мұның барлығы тұрғындарға жайлы орта қалыптастыруға бағытталған. Басты мақсат – жастардың Қостанайда қалып, еңбек етіп, отбасын құрып, болашағын осы жерде көруіне жағдай жасау», – деді Қостанай облысының әкімі. Ақпарат көзі : https://www.gov.kz/memleket/entities/kostanay/press/news/details/1283947?lang=ru

Қорғаныс министрлігінің болашақ офицерлер мен әртүрлі деңгейдегі командирлер даярлайтын әскери оқу орындарында жаңа оқу жылы басталды.Білім күніне орай Қазақстан Республикасы Қорғаныс министрінің міндетін атқарушы авиация генерал-лейтенанты Дәурен Қосанов Қорғаныс министрлігі әскери оқу орындарының басшылығы және профессорлық-оқытушылық құрамымен бейнеконференция өткізді.Ол заманауи қарулы қақтығыстар тәжірибесіне қарай оқудың практикалық бағытын күшейтуге назар аударды.– Даярлықтың негізін практикалық сабақтар, қару-жарақ пен әскери техниканы қолдану, командалық-штабтық жаттығулар және ұрыс жағдайларын модельдеу құрауы тиіс. Біздің міндетіміз – жаңа буын офицерін даярлау. Ол кәсіби, технологияны жетік меңгерген, бастамашыл, жағдайды жедел бағалап, негізгі шешім қабылдай алатын және сол шешімі үшін жауап бере алатын маман болуы керек, – деді ол.Авиация генерал-лейтенанты Дәурен Қосанов әскери білім сапасы Қарулы күштердің жауынгерлік әзірлігі мен қабілетіне тікелей әсер ететінін атап өтті.– Цифрландыру және жасанды интеллект жылында ұшқышсыз басқарылатын жүйелер, робототехника, цифрлық технологиялар және авиация салаларындағы жаңа мамандықтар мен даярлау бағыттарын құруға және дамытуға ерекше назар аудару қажет, – деді ол.Әскери білім беруді цифрлық трансформациялау мәселесіне тоқталған Дәурен Қосанов жасанды интеллект технологияларын, цифрлық платформаларды, электрондық тренажерлерді, виртуалды зертханалар мен симуляциялық технологияларды оқу бағдарламасына белсенді енгізудің маңызын атап өтті.Авиация генерал-лейтенанты оқытушылардың қағазбастылығы мен бейінді емес жүктемесін азайту қажеттігіне де тоқталды. Бұл ретте «Askeri Ziyat» ақпараттық жүйесінің бірыңғай цифрлық білім беру ортасы ретіндегі рөліне назар аударды.– Цифрландыру оқытушыны артық жүктемеден босатып қана қоймай, білім беру сапасын арттыруы тиіс. Жасанды интеллектіні академиялық адалдықты сақтай отырып, ақпараттық қауіпсіздікті қамтамасыз ету, ең бастысы, қабылданған шешім үшін адамның жауапкершілігін сақтай отырып, сауатты әрі жауапкершілікпен пайдалану маңызды, – деді ол.Әскери оқу орындарының ғылыми әлеуетін нығайту мақсатында ведомство басшысының міндетін атқарушы перспективалы ғылыми зерттеулер әскерлердің нақты қажеттіліктеріне сай болуы, практикада қолданылуы және тиісті сынақтардан кейін Қарулы күштердің қызметіне енгізілуі керектігін атап өтті.Басым бағыттардың бірі ретінде болашақ офицерлерді тәрбиелеу, әскери тәртіпті нығайту және кандидаттарды іріктеу сапасын арттыру тапсырмалары белгіленді. Бұған қоса жауапкершілік, өзін-өзі тәрбиелеу, көшбасшылық қасиеттер мен әскери міндетті адал орындауға дайындықты қалыптастыруға ерекше мән беріледі.Кеңес соңында әскери оқу орындарының басшылығы мен профессорлық-оқытушылық құрамға жаңа оқу жылына арналған нақты тапсырмалар берілді.Ақпарат көзі : https://www.gov.kz/memleket/entities/mod/press/news/details/1283658?lang=ru