Өңірлік коммуникациялар қызметінде кедендік әкімшілендірудің негізгі аспектілеріне, 2026 жылдың бірінші жартыжылдығындағы жұмыс қорытындыларына және ішкі отын нарығын қорғау шараларына арналған баспасөз конференциясы өтті. Жиын барысында Павлодар облысы бойынша МКД Кедендік әкімшілендіру басқармасының басшысы Тілектес Түсетаев кедендік төлемдердің бюджетке түсуі, цифрлық технологияларды енгізу және тауарларды мемлекеттік шекара арқылы өткізу кезіндегі құқық бұзушылықтармен күрес мәселелерін егжей-тегжейлі баяндады.

Спикер елдегі жанар-жағармай материалдарының (ЖЖМ) тапшылығын болдырмау мақсатында Үкімет енгізген мұнай өнімдерін әкетуге қойылған уақытша шектеулердің сақталуын бақылауға ерекше назар аударды. Ведомствоның үйлесімді іс-қимылдарының нәтижесінде шекара маңындағы аймақта 4 мың литрге жуық заңсыз жанармай қолға түсірілді, оның ішінде 1500 литрге жуығын бензин және 2500 литрден астамын дизель отыны құрады. Жүргізілген талдау көрсеткендей, шекарадағы мұндай құқық бұзушылықтарды негізінен жанармайды канистрлермен алып өтуге тырысатын жеңіл көліктегі азаматтар жасайды. Осы тектес фактілердің жолын кесу үшін мобильді топтар шекара маңындағы трассаларды тәулік бойы патрульдеуді жүзеге асыруда.

Жұмыстың жалпы қорытындысына тоқталсақ, есепті кезеңде Департамент бюджетке 13 891,6 млн. теңге кедендік төлемдер мен салықтар аударды, бұл өткен жылдың сәйкес кезеңімен салыстырғанда 104%-ға өскенін көрсетеді. Сапалы әкімшілендірудің арқасында бюджетке қосымша 680 млн. теңге өндірілді. Процедураларды жаңғыртудағы маңызды қадам — жаңа «Keden» ақпараттық жүйесін енгізу болды, ол көптеген процестерді автоматтандыруға және тәуекелдер болмаған жағдайда декларацияларды шығарудың орташа уақытын 2-3 минутқа дейін қысқартуға мүмкіндік берді.

Кездесу соңында кедендік әкімшілендіру басқармасының басшысы барлық сыртқы экономикалық қызметке қатысушылардың кедендік ережелер мен валюталық реттеу нормаларын мүлтіксіз сақтауы маңызды екенін еске салды.

Павлодар облысы бойынша МКД түсіндіру жұмысы

және Байланыс-орталығы басқармасы

Ақпарат көзі : https://www.gov.kz/memleket/entities/kgd-pavlodar/press/news/details/1258542?lang=ru