Астана, 2026 жылғы 10 маусым – «ҰАК «Қазатомпром» АҚ мен Cameco Corporation тең төрағалығымен Қазақстан-Канада іскерлік кеңесінің (ҚКІК) 7-ші отырысы өтті. Іс-шараға ҚР мемлекеттік органдарының басшылығы, Қазақстан мен Канаданың іскер топтары, сондай-ақ сараптамалық және академиялық ортаның өкілдерін қоса алғанда 100-ден астам адам қатысты.Қазақстан Республикасы Үкіметі атынан Сыртқы істер министрінің орынбасары Ә.Қуантыров іс-шараны ашты. Сонымен қатар ҚКІК тең төрағалары – «ҰАК «Қазатомпром» АҚ Басқарма Төрағасы М.Юсупов және Cameco Corporation Бас атқарушы директоры Т.Гитцель (бейнеүндеу форматында) сәлемдеме сөз сөйледі.Форумның іскерлік бағдарламасы екіжақты күн тәртібінің негізгі секторларындағы жасанды интеллектінің дамуы мен сауда-инвестициялық ынтымақтастыққа арналған екі тақырыптық сессиядан тұрды.Бірінші сессия шеңберінде ҚР Жасанды интеллект және цифрлық даму вице-министрі Б.Мұхаметқалиев цифрлық трансформация мен ЖИ саласындағы мемлекеттік саясаттың басымдықтарын таныстырып, қазақстандық нарықтағы шетелдік технологиялық компаниялар үшін нақты мүмкіндіктерді белгіледі. Telus Agriculture & Consumer Goods президенті К.Террис агроөнеркәсіптік кешенде ЖИ-шешімдерін қолдану тәжірибесі туралы баяндады. Бұдан басқа, спикерлер телекоммуникацияда, үлкен деректерді басқару саласында, өндірістік процестерде және т.б. ЖИ енгізу мен қолдану практикалары жайлы айтты. Талқылау қазақстандық-канадалық цифрлық технологиялар саласындағы ынтымақтастықтың кең ауқымды мүмкіндіктерін айқын көрсетті.Екінші панельдік сессияда «Атамекен» Ұлттық кәсіпкерлер палатасы Президиумының Төрағасы Қ.Шарлапаев Қазақстандағы іскерлік ортаның қазіргі жай-күйі мен даму перспективалары туралы хабарлады; инвесторлар үшін жағдайды жақсартуға ықпал ететін жүйелік реформаларға канадалық серіктестердің назарын аударды. «QazTrade» АҚ басшылығы екіжақты сауда ынтымақтастығын ынталандыру және Канадаға қазақстандық өнімнің экспортын кеңейтуге арналған қолданыстағы құралдарды таныстырды. B2Gold вице-президенті Н.Ридер, CanAgro директоры Р.Минин және Xena Distribution вице-президенті Э.Парди Қазақстанның тау-кен өндірісі, энергетика және агроөнеркәсіптік секторларында бірлескен жобаларды іске асыру перспективаларын талқылады.Іс-шара қорытындысы бойынша тараптар өзара іс-қимылды одан әрі тереңдетуге деген ортақ ерікті растады және отырыс барысында қол жеткізілген уағдаластықтарды жүйелі түрде іске асыру ниетін білдірді.Форумда канадалық бизнестің жоғары деңгейде өкілдік етуі канадалық іскер топтардың қазақстандық нарыққа деген қызығушылығының артып келе жатқандығын және елдің аймақтағы ең сенімді және қауіпсіз юрисдикция ретіндегі инвестициялық тартымдылығын растайды.ҚКІК-тің 7-ші отырысы екіжақты іскерлік диалогты ілгерілетудегі кезекті маңызды қадамға айналды және Қазақстан мен Канада арасындағы сауда-экономикалық қатынастардың дамуына қосымша серпін берді.Анықтама: Қазақстан-Канада іскерлік кеңесі екі елдің іскер қоғамдастықтары арасындағы сауда-экономикалық диалогты дамытудың негізгі механизмі болып табылады. Кеңес 2015 жылы құрылған және қазақстандық тараптан «ҰАК «Қазатомпром» АҚ, канадалық тараптан Cameco Corporation тең төрағалығымен жұмыс істейді. ҚКІК-тің 6-шы отырысы 2024 жылдың наурызында Торонто қаласында өтті.Ақпарат көзі : https://www.gov.kz/memleket/entities/mfa-ottawa/press/news/details/1238628?lang=ru

«Әділет» партиясының Іскерлік кеңесі алаңында Партия Төрағасы Айбек Дәдебай тау-кен металлургия кешені кәсіпорындарының басшыларымен, мемлекеттік органдардың және салалық қауымдастықтардың өкілдерімен кездесті. Кездесу барысында саланы дамыту, отандық кәсіпорындарға қолдау көрсету, жаңа өндіріс орындарын ашу, шикізатты терең өңдеу, инженерлік кадрлар даярлау сынды өзекті мәселелер талқыланды.Кездесуді ашқан Айбек Дәдебай Қазақстанның минералды шикізат қоры аса бай екенін атап өтті. Саланың әлеуеті ең алдымен ел экономикасын дамыту жолында қызмет етуге тиіс.«Бұл – тек экономикалық мәселе емес. Бұл – әділдік мәселесі. Жер байлығы халықтың әл-ауқатына айналуға тиіс. Сондықтан «Әділет» партиясы терең өңдеу ісін дамытуға, жаңа өндіріс орындарын ашуға және жоғары деңгейде өңделген өнім көлемін ұлғайтуға бағытталған Президенттің стратегиялық бағдарын толық қолдайды», – деді Партия Төрағасы.Оның айтуынша, табиғи ресурстарды пайдалану тәсілін өзгерту қажет. Мемлекет шикізатты экспорттап, сол шикізаттан өндірілген дайын өнімді сатып алып отырған кезде негізгі табыс, жаңа өндірістер мен жұмыс орындары Қазақстаннан тыс жерде қалыптасады. Сондықтан шикізатты терең өңдеу ісін дамыту қадамы өнеркәсіп саясатының негізгі басымдықтарының біріне айналуға тиіс.«Тау-Кен Самұрық» ҰТК» АҚ-ның мәліметінше, өткен жылғы қорытынды бойынша тау-кен металлургия кешені мемлекеттің жалпы ішкі өнімінің шамамен 8%-ын қамтамасыз етті. Өндірілген өнім көлемі 14 трлн теңгеден асып, экспорт көлемі 21,4 млрд АҚШ долларын құрады. «Тау-Кен Самұрық» ҰТК» АҚ басқарма төрағасы Нариман Абсаметовтің айтуынша, бүгінде тау-кен металлургия кешені мемлекет үшін стратегиялық маңызға ие болып отыр.«Сирек кездесетін минералдарға қолжетімділік мемлекеттің жаһандық бәсекеге қабілеттілігін айқындайтын маңызды факторлардың біріне айналуда. Қазақстан бірегей минералды шикізат базасына ие және оны тиімді игеру қадамы еліміздің әлемдік нарықтағы позициясын нығайтуға мүмкіндік береді», – деді Нариман Абсаметов.Талқылау барысында сала өкілдері бірқатар жүйелі мәселені көтерді. Атап айтқанда, Тау-кен өндіруші және тау-кен металлургиялық кәсіпорындардың республикалық қауымдастығының атқарушы директоры Николай Радостовец теміржол тасымалы сала үшін стратегиялық маңызға ие екенін атап өтіп, транзиттік тасымалдан түсетін кірістерді бөлудің неғұрлым теңгерімді тәсілін қарастыруды ұсынды.«Қазақмыс корпорациясы» ЖШС басқарма төрағасы Руслан Өскенәлі саланы одан әрі дамыту мәселесі мемлекет, бизнес және қоғам арасындағы тұрақты өзара іс-қимылды талап ететінін атап өтті.«Әділет» партиясының Іскерлік кеңесі отандық өнеркәсіпті дамытуға және Қазақстан экономикасын нығайтуға бағытталған бастамаларды әзірлейтін тиімді алаңға айналатынына сенімдімін», – деді Руслан Өскенәлі.Қатысушылар кәсіпорындарды жаңғырту, инвестиция тарту және білікті кадрлар даярлау мәселелеріне де ерекше назар аударды. Кездесуге қатысушылар табиғи ресурстар жаңа өндірістерді іске қосуға, заманауи технологияларды енгізуге және жаңа жұмыс орындарын ашуға негіз болуға тиіс екенін атап өтті.«Qarmet» АҚ басшысы Вадим Басин кәсіпорында жүргізіліп жатқан ауқымды жаңғырту жұмысы туралы айтып, қауіпсіздікке, еңбек жағдайына және кәсіби кадрларға инвестиция салмайынша өндірісті дамыту мүмкін емес екенін жеткізді.«Өнеркәсіп секторы үшін әділдік – адамның еңбегін құрметтеу деген сөз. Кәсіпорын қауіпсіздік есебінен емес, өз алдына дамуға тиіс. Инвестиция тек жабдықтарға ғана емес, адамдарға да бағытталуы керек», – деді Вадим Басин.Кездесуді қорытындылай келе Айбек Дәдебай бүгінде саланы дамыту мәселесін талқылап қана қоймай, оның жүзеге асырылуын қамтамасыз ету аса маңызды екенін атап өтті. Ол Іскерлік кеңес отырысының қорытындысы бойынша «Әділет» партиясы тау-кен металлургия саласын дамытуға арналған бірыңғай бастамалар топтамасын әзірлейтінін мәлімдеді. Оның негізіне бизнес өкілдерінің, салалық қауымдастықтардың және сарапшылар қоғамдастығының ұсыныстары енгізіледі.«Бүгін нақты әрі шын мәнінде аса маңызды өте көп ұсыныс айтылды. Олардың әрқайсысы жан-жақты қаралып, жүйеленіп, Іскерлік кеңестің алдағы жұмысының бір бөлігіне айналады. Біздің міндетіміз – бизнес пен мемлекет арасындағы диалогтың күн сайын жалғасуын қамтамасыз ету», – деп түйіндеді Айбек Дәдебай.Кездесу соңында «Әділет» партиясының жаңа мүшелеріне партиялық билеттер табысталды.

Қазан, 2026 жылғы 10 маусым – Қазақстан Республикасының Сыртқы істер министрі Ермек Көшербаев Ұжымдық қауіпсіздік туралы шарт ұйымы (ҰҚШҰ) Сыртқы істер министрлері кеңесінің кезекті отырысына қатысты.Кездесу барысында ҰҚШҰ-ға мүше мемлекеттердің сыртқы саяси ведомстволарының басшылары халықаралық және өңірлік ахуал, сондай-ақ оның Ұйымға мүше мемлекеттердің қауіпсіздігіне әсері жөнінде пікір алмасты.Қазақстан Сыртқы істер министрі өз сөзінде Ұжымдық қауіпсіздік туралы шарт ұйымы (ҰҚШҰ) өңірдегі бейбітшілікті, тұрақтылықты және орнықты дамуды қамтамасыз етудің маңызды тетігі екенін атап өтті. Ұйымға мүше мемлекеттер бірлескен күш-жігердің арқасында заманауи сын-қатерлер мен қауіптерге тиімді қарсы тұрып, қорғаныс саласындағы іс-қимылдарын үйлестіріп, дағдарыстық жағдайларға жедел ден қоюда.Сондай-ақ министр ҰҚШҰ форматындағы ынтымақтастық мәселелері бойынша Қазақстанның ұстанымы мен тәсілдері туралы хабардар етіп, Ұйымды одан әрі жан-жақты дамытуға бағытталған бірқатар ұсыныстарын ортаға салды.Ақпараттық және киберқауіпсіздікті қамтамасыз ету мәселелері бойынша күш-жігерді үйлестірудің маңыздылығын атап өтті. Осы тұрғыда қатысушыларды Қазақстандағы цифрлық технологиялар мен жасанды интеллект саласының дамуымен таныстырды. Атап айтқанда, Цифрлық кодекстің қабылдануы, «Alem AI» жасанды интеллект орталығының және суперкомпьютерлік кластердің іске қосылуы, сондай-ақ «Деректерді өңдеу орталықтарының алқабын» құру және «Astana Smart City» жобасын жүзеге асыру жөнінде ақпарат берді.Сондай-ақ Алматы қаласында Тұрақты даму мақсаттары бойынша цифрлық шешімдердің Азия-Тынық мұхиты өңірлік орталығын құру бастамасын қолдағаны үшін ҰҚШҰ-дағы серіктестерге алғысын білдірді.Отырыс қорытындысы бойынша министрлер ҰҚШҰ-ның 2030 жылға дейінгі Терроризмге қарсы стратегиясының жобасын мақұлдады.Сыртқы істер министрлері кеңесі ғарыш кеңістігінде қарулану жарысының алдын алу, ақпараттық-коммуникациялық технологияларды диверсиялық және террористік мақсаттарда пайдалану қатерлеріне қарсы іс-қимыл жасау қажеттілігі, халықаралық құқықтың рөлін нығайту және БҰҰ Жарғысының қағидаттарына бейілділік, сондай-ақ Ұлы Отан соғысының басталғанына 85 жыл толуына байланысты саяси мәлімдемелер қабылдады.Жалпы алғанда, тараптар ҰҚШҰ аясындағы өзара іс-қимылды дамытуға және Ұйымды одан әрі нығайтуға бейілді екендіктерін растады.Ресей Федерациясының төрағалығын ескере отырып, Сыртқы істер министрлері кеңесінің келесі отырысы 2026 жылғы қарашада Мәскеу қаласында ҰҚШҰ Ұжымдық қауіпсіздік кеңесінің сессиясы қарсаңында өтеді.Ақпарат көзі : https://www.gov.kz/memleket/entities/mfa/press/news/details/1238550?lang=ru

    Курчатов қаласында Ертіс өзенінің жағалауын тазартуға бағытталған «Ертіс таза жағадан басталады» атты экологиялық акция ұйымдастырылды.Шара барысында қала тұрғындары мен қонақтарының серуендеп, өзеннің табиғатын тамашалайтын ең сүйікті орындарының бірі – қалалық жағалау қоқыстан тазартылып, абаттандырылды.     Оған қала кәсіпорындары мен ұйымдарының өкілдері, волонтерлер, «Жасыл Ел» еңбек жасағының сарбаздары, Ардагерлер кеңесінің мүшелері бастаған 200-ге жуық курчатовтық қатысты.Экологиялық акция нәтижесінде 5 тонна қоқыс жиналып, арнайы орындарға шығарылды. Шараға қатысушылар қоршаған ортаны қорғаудың, тазалықты сақтаудың және табиғатқа ұқыпты қараудың маңыздылығын атап өтті.Қатысушылар жағалау тек демалыс аймағы ғана емес, сонымен қатар Курчатов қаласы тұрғындарының бірнеше буынын біріктіретін маңызды қоғамдық кеңістік екенін атап өтті.Ақпарат көзі : https://www.gov.kz/memleket/entities/abay-kurchatov/press/news/details/1238534?lang=ru

Прага, 2026 жылғы 9 маусым – Қазақстан Республикасының Прага қаласындағы Елшілігінде Чех Республикасы Қорғаныс министрлігінің Ардагерлер және әскери жерлеу орындары істері жөніндегі департаментінің өкілдері Павел Куглер, Мартин Жоур және Радим Храстпен кездесу өтті. Қазақстан Республикасының Чех Республикасындағы Төтенше және Өкілетті Елшісі Қайрат Әбдірахмановпен өткен әңгіме барысында екі ел аумағындағы әскери жерлеу орындарын іздестіру, зерттеу, қалпына келтіру және күтіп-ұстау бағытындағы Қазақстан-Чехия ынтымақтастығы мәселелері талқыланды.Архивтік-зерттеу жұмыстарына, қаза тапқан әскери қызметшілер мен бейбіт тұрғындардың тағдырын анықтауға, сондай-ақ ХХ ғасырдағы қайғылы оқиғалар мен екі дүниежүзілік соғыстың зардаптары туралы тарихи жадыны сақтауға ерекше назар аударылды. Осы тұрғыда Чех Республикасы Парламенті Депутаттар палатасы Төрағасының орынбасары Ян Бартошектің 2023 және 2025 жылдары Қазақстанға жасаған сапарларының маңызы атап өтілді. Аталған сапарлар аясында еліміздің бірнеше өңіріндегі чех ұлты өкілдері жерленген орындарға бару ұйымдастырылып, Қазақстанның мемлекеттік органдары мен сарапшылар қауымдастығы өкілдерімен кездесулер өткізілді, сондай-ақ ғылыми-тарихи конференция ұйымдастырылды.Тараптар әскери архивтерді қалпына келтіру, әскери жерлеу орындарының дерекқорын құру және осы саладағы халықаралық тәжірибені зерделеу бағытында мемлекеттік деңгейде жүйелі жұмысты жолға қоюдың маңыздылығын атап өтті. Мұндай жұмыс екі ел арасындағы гуманитарлық байланыстар мен өзара түсіністікті нығайтуға ықпал етеді.Әскери және мемориалдық нысандарға құрметпен қарау, әскери жерлеу орындарын іздестіру мен қалпына келтіру тарихи мұраны сақтаумен қатар, терең адамгершілік мәнге ие екені атап өтілді. Мұндай жұмыс соғыс құрбандарының есімін ұлықтауға, олардың ерлігін келер ұрпақтың жадында сақтауға және қақтығыстардың алдын алуға қызмет етеді.Қазақстандық дипломаттар чех тарапына шетелдегі чех жауынгерлері жерленген орындарды, сондай-ақ Чехия аумағындағы шетелдік, оның ішінде қазақстандық жауынгерлер жерленген орындарды сақтау және күтіп-ұстау мәселесі бойынша жүргізіп отырған үздіксіз әрі жүйелі жұмысы үшін алғыс білдірді.Кездесу қорытындысы бойынша тараптар жоғары деңгейде қол жеткізілген уағдаластықтар аясында ынтымақтастықты одан әрі дамытуға, сараптамалық білім мен тәжірибе алмасуға, сондай-ақ тарихи мұраны зерттеу және әскери жерлеу орындарын күтіп-ұстау саласындағы бірлескен бастамаларды іске асыруға өзара мүдделі екенін растады.Ақпарат көзі : https://www.gov.kz/memleket/entities/mfa-prague/press/news/details/1238521?lang=ru

Алматы қаласы бойынша Мемлекеттік кірістер департаменті қазіргі уақытта мемлекеттік шекараның Қазақстан-Ресей учаскесінде Ақтөбе облысы бойынша МКД-нің «Жайсан» автомобиль өткізу пунктінде жүк автокөлік құралдарының жиналуы байқалып отырғанын хабарлайды. Шектес өткізу пункті — Ресей Федерациясы Орынбор облысындағы «Илек-1» өткізу пункті.Осыған байланысты күту уақытын қысқарту, көлік құралдарының тұрып қалуына жол бермеу және логистикалық процестерді оңтайландыру мақсатында Алматы қаласы бойынша МКД сыртқы экономикалық қызметке қатысушыларға, тасымалдаушыларға, кеден өкілдеріне және тасымалдау процесінің өзге де қатысушыларына мыналарды қатаң түрде ұсынады:Көрсетілген бағыттағы ағымдағы көлік жүктемесін ескере отырып, жүру маршруттарын алдын ала жоспарлау.Балама бағыттарды пайдалану: қалыптасқан жағдай реттелгенге дейін көлік құралдарын «Әлімбет» автомобиль өткізу пункті арқылы өткізу ұсынылады.Жүргізушілер мен мүдделі тұлғаларды қозғалыс маршруттарындағы ықтимал өзгерістер туралы уақтылы хабардар ету.Жағдай уәкілетті мемлекеттік органдардың тұрақты бақылауында.Ақпарат көзі : https://www.gov.kz/memleket/entities/kgd-almaty/press/news/details/1238495?lang=ru

Іс-шара мәдениет қызметкерлерін, тарихшыларды, сәндік-қолданбалы өнер шеберлерін және ұлттық мұраға жанашыр азаматтарды бір арнаға тоғыстырды. Қатысушыларға Бейімбет Майлин ауданы әкімдігінің мәдениет және тілдерді дамыту бөлімінің басшысы Жанат Қазбекқызы Нұғманова құттықтау сөз арнады.Форум аясында «Мәдени мұра – ұлт қазынасы» атты аудандық көрме өз жұмысын бастады. Көрмеде аудандық тарихи-өлкетану музейі мен архивінің құнды құжаттары мен жәдігерлері, кітап көрмелері, сәндік-қолданбалы өнер шеберлерінің және өнер мектебінің жас суретшілерінің туындылары ұсынылды.Қонақтардың ерекше қызығушылығын қыш өнері, киіз басу, ұлттық әшекей бұйымдарын жасау және домбыра дайындау бойынша шеберлік сабақтары, сондай-ақ туған өлкенің тарихы мен мәдени мұрасына арналған танымдық дәрістер тудырды.Ақпарат көзі : https://www.gov.kz/memleket/entities/kostanai-bmalin-audany-akimat/press/news/details/1238459?lang=ru

2026 жылғы 9–10 маусымда Қазақстан Республикасы Орталық сайлау комиссиясы Сайлау процесіне қатысушыларды 2026 жылы оқытуды ұйымдастыру жөніндегі іс-шаралар кешені шеңберінде «Сайлау процесін ұйымдастыру мен өткізудің практикалық аспектілері» тақырыбында республикалық оқыту онлайн-семинарын өткізді.Іс-шара Қазақстан Республикасы Президенті жанындағы Мемлекеттік басқару академиясының базасында өтіп, тұрақты кәсіби негізде өз өкілеттіктерін жүзеге асыратын аумақтық сайлау комиссияларының 160 мүшесін қамтыды.Семинар бағдарламасы сайлауды ұйымдастырушылардың практикалық дағдыларын жетілдіруге және құқықтық құзыреттілігін арттыруға бағытталды. Оқыту барысында қатысушылар сайлау науқандарын ұйымдастыру мен өткізудің өзекті мәселелерін қарастырды.Тыңдаушылар Қазақстан Республикасының сайлау заңнамасындағы өзекті өзгерістер мен жаңашылдықтармен танысып, сондай-ақ электоралдық процесс шеңберінде азаматтардың өтініштерімен жұмыс істеу тәжірибесін талқылады.Сонымен қатар, сайлаушыларды ақпараттандыру, сайлауалды үгіт жүргізу және ұлттық байқау мәселелеріне ерекше назар аударылды. Практикалық жағдайларды талдауды қамтыған тиісті тақырыптық сабақтарды Орталық сайлау комиссиясының өкілдері өткізді.Сабақтар кейс-әдісті қолдана отырып, интерактивті форматта ұйымдастырылды. Қатысушылар шағын топтарда жұмыс істеп, нақты жағдайларды талқылап, практикалық шешімдерді бірлесіп әзірледі.Семинардың екінші күні толығымен «Стресс жағдайындағы коммуникациялар: сайлау процесіндегі келіссөздер жүргізу және жанжалдарды шешу» атты практикалық тренингке арналды. Оқу барысында қатысушылар тиімді коммуникация құралдарын меңгерді. Практикалық бөлім бейнекейстерді талдауды және рөлдік жаттығуларды қамтыды.Екі күндік оқу курсының қорытындысы бойынша тыңдаушылар кері байланыс алу мақсатында сауалнама толтырып, оқудан сәтті өткенін растайтын электрондық сертификаттарға ие болды.Бағдарлама каскадтық оқыту қағидаты бойынша жүзеге асырылды. Семинар аясында даярлықтан өткен аумақтық сайлау комиссияларының мүшелері алдағы уақытта өз өңірлерінде осындай оқыту іс-шараларын өткізеді. Мұндай тәсіл алынған білімнің кеңінен таралуына ықпал етіп, сайлау жүйесінің барлық деңгейінде кәсіби даярлықтың, құзыреттіліктің және құқықтық мәдениеттің бірыңғай стандартын қамтамасыз етеді.Ақпарат көзі : https://www.gov.kz/memleket/entities/election/press/news/details/1238451?lang=ru

2026 жылғы 9 маусымда Алматы қаласы бойынша Мемлекеттік кірістер департаменті Қазақстанда аяқ киім өнімдерін өткізетін ірі компаниялармен жұмыс кездесуін өткізді.Кездесудің мақсаты — нарықтың ашықтығын қамтамасыз ету үшін бизнес өкілдеріне тауарларды таңбалау және қадағалау қағидаларын түсіндіру.Әкімшілендірудегі 3 негізгі өзгерісЖаңа бақылаушы орган: 2026 жылғы ақпаннан бастап аяқ киім өнімдерін таңбалау жүйесін әкімшілендіру және бақылау функциялары Қазақстан Республикасы Қаржы министрлігінің Мемлекеттік кірістер комитетіне ресми түрде жүктелді.Бірыңғай оператор: Елдегі тауарларды таңбалау және қадағалау жөніндегі бірыңғай оператор ретінде конкурстық негізде «Қазақтелеком» АҚ айқындалды.Халықаралық интеграция: Қазақстанның ұлттық таңбалау жүйесі ЕАЭО-ға мүше мемлекеттердің ұқсас жүйелерімен толық интеграцияланған. Атап айтқанда, Ресей Федерациясымен интеграция 2022 жылғы қарашадан бастап, ал Беларусь Республикасымен 2023 жылғы қыркүйектен бастап жұмыс істейді. Бұл бірыңғай экономикалық кеңістікте тауарлардың қадағалануын қамтамасыз етеді.Салық төлеуші нені білуі керек?Код құрылымы: Таңбалау коды міндетті түрде тауар түрі, оның бірегей жеке нөмірі және өнімнің түпнұсқалығын растайтын криптографиялық қорғау элементтері туралы мәліметтерді қамтиды.Жұмыс тәртібі: Аяқ киімге сәйкестендіру құралдарын қолданудың қолданыстағы тәсілдері және тауар айналымына қатысушыларды ақпараттық жүйелерде тіркеу қағидалары түсіндірілді.Операцияларды көрсету: Кодтарды алу тәртібі және бизнестің таңбаланған тауармен жүргізілетін кез келген операцияларды жүйелерде қалай тіркеуі қажет екені түсіндірілді.Ақпарат көзі : https://www.gov.kz/memleket/entities/kgd-almaty/press/news/details/1238453?lang=ru

Кірістер басқармасындағы ақпаратты қорғау — салық төлеушілердің жеке деректерін, қаржылық мәліметтерін және мемлекеттік ақпараттық жүйелердегі құпия ақпараттарды сақтау мен қорғауға бағытталған шаралар жиынтығы. Негізгі мақсаттары: * салық төлеушілердің деректерінің құпиялылығын сақтау;* ақпараттың жоғалуына, өзгертілуіне немесе заңсыз таралуына жол бермеу;* кибершабуылдардан қорғау;* мемлекеттік ақпараттық жүйелердің қауіпсіз жұмысын қамтамасыз ету. Ақпаратты қорғау шараларына мыналар кіреді: Құпия сөздер мен электрондық қолтаңбаны қорғауЭЦҚ-ны бөтен адамға бермеу, күрделі пароль қолдану. Ақпараттық жүйелерді шектеулі қолжетімділікпен пайдалануҚызметкерлерге тек өз жұмысына қатысты мәліметтерге ғана рұқсат беріледі. Антивирус және киберқауіпсіздік жүйелеріВирустардан, хакерлік шабуылдардан қорғау. Деректерді резервтік сақтауМаңызды ақпараттың көшірмесін сақтау арқылы жоғалудан қорғау. Заңнамалық қорғауҚазақстанда бұл сала «Дербес деректер және оларды қорғау туралы» заңмен және ақпараттық қауіпсіздік талаптарымен реттеледі. Қазақстандағы негізгі орган — Қазақстан Республикасының Қаржы министрлігі Мемлекеттік кірістер комитеті. Ақпарат көзі : https://www.gov.kz/memleket/entities/kgd-zhetysu/press/news/details/1238442?lang=ru

Қазақстан Республикасы Сауда және интеграция министрлігінің Қызылорда облысы бойынша сауда және тұтынушылардың құқықтарын қорғау департаменті  тұтынушылардың сатып алынған тауарды, жұмысты және қызметті қайтару немесе айырбастау бойынша құқықтары туралы назарына жеткізеді.Тұтынушы ретінде өз құқықтарыңызды қорғауға көмектесетін негізгі ұсыныстар мен қадамдар төменде келтірілген:Негізгі құқықтарыңызды біліңізАқпарат алу құқығы: Тұтынушы тауар (жұмыс, қызмет), сондай-ақ сатушы (дайындаушы, орындаушы) туралы толық, анық және уақтылы ақпаратты қазақ және орыс тілдерінде алуға құқылы.Қауіпсіздік құқығы: Тауар (жұмыс, қызмет) тұтынушының өміріне, денсаулығына, мүлкіне және қоршаған ортаға қауіпсіз болуы тиіс.Тиісті сапа құқығы: Тұтынушы тиісті сападағы тауарды (жұмысты, қызметті) сатып алуға құқылы.Еркін таңдау құқығы: Шарт жасасуға мәжбүрлеуге жол берілмейді.Тауарды айырбастау немесе қайтару құқығы: Тұтынушы тиісті және тиісті емес сападағы тауарды айырбастауға немесе қайтаруға құқылы.Шығынды өтету құқығы: Тұтынушы тауардың (жұмыстың, қызметтің) кемшіліктері салдарынан оның өміріне, денсаулығына және (немесе) мүлкіне келтірілген зиянның (шығынның) толық көлемде өтелуіне құқылы.Құжаттарды алу құқығы: Тұтынушы сатушыдан (дайындаушыдан, орындаушыдан) тауарды сатып алу (жұмысты орындау, қызмет көрсету) фактісін растайтын құжатты немесе шартты алуға құқылы.Құжаттарды сақтаңызӘрқашан талап етіңіз және сақтаңыз: кассалық және тауарлық чектерді, түбіртектерді, жүкқұжаттарды, кепілдік талондарын, шарттарды және сатып алу немесе қызметке тапсырыс беру фактісін растайтын басқа да құжаттарды. Бұл дау туындаған жағдайдағы сіздің негізгі дәлеліңіз.Сапасыз тауарды сатып алған кездегі (немесе қызмет тиісті деңгейде көрсетілмеген кездегі) әрекеттерЕгер сізге тиісті емес сападағы тауар сатылса (және оның кемшіліктерін сатушы алдын ала ескертпесе), сіз ҚР Заңына сәйкес өз қалауыңыз бойынша мыналарды талап етуге құқылысыз:Сатып алу бағасын үйлесімді түрде азайтуды.Тауардың кемшіліктерін өтеусіз жоюды (жөндеу).Тауардың кемшіліктерін жоюға жұмсалған шығындарын өтеуді.Осыған ұқсас маркалы (модельді, артикулды) тауарға ауыстыруды.Сатып алу бағасын тиісті түрде қайта есептей отырып, басқа маркалы (модельді, артикулды) сондай тауарға ауыстыруды.Шартты бұзуды және тауар үшін төленген ақша сомасын қайтаруды.Ақпарат көзі : https://www.gov.kz/memleket/entities/kyzylorda-karmakshy/press/news/details/1238429?lang=ru

eGov.kz электрондық үкімет порталында заңды тұлғаларға арналған мемлекеттік тіркеу нөмірлік белгілеріне (МТНБ) тапсырыс беру қызметі автоматтандырылды. Енді ұйымдар өз автокөліктері үшін қалаған нөмірді онлайн таңдай алады.Жаңартылған «Заңды тұлғалардың автокөліктері үшін мемлекеттік тіркеу нөмірлік белгісіне тапсырыс беру» қызметі eGov.kz порталында қолжетімді. Алдағы уақытта бұл сервис eGov Business мобильді қосымшасының басты бетінде де пайда болады. Бұған дейін аталған қызмет тек жеке тұлғаларға ұсынылатын. 2026 жылдан бастап мемлекеттік тіркеу нөмірлік белгілерінің тізімі кеңейтіліп, «қалаулы» және «симметриялы» санаттар енгізілді.Қызметті eGov.kz порталында пайдалану үшін пайдаланушыға:eGov.kz порталында авторизациядан өтіп, «Азаматтарға» – «Көлік және коммуникациялар» – «Автомобиль көлігі» бөліміне өту;«Мемлекеттік тіркеу нөмірлік белгісін алуға тапсырыс беру» қызметін таңдау;қалаған нөмірді немесе комбинацияны таңдау;егер нөмір бос болмаса, басқа нұсқаны енгізу;нөмір бос болған жағдайда оның құны АЕК-пен және теңгемен көрсетіледі;міндетті жолдарды толтыру (облысты, нөмір берілетін ХҚКО-ны және нөмір түрін таңдау);мемлекеттік бажды төлеу;өтінімді қол қою құқығы бар ЭЦҚ арқылы растау;жеке кабинеттегі «Қызметтерді алу тарихы» бөлімінен электрондық құжат пен қызметтің нәтижесі туралы хабарламамен танысу.Дайын нөмірді алдын ала таңдалған ХҚКО-дан алу қажет. Нөмір автокөлікке мемлекеттік тіркеу рәсімі жүргізілгеннен кейін ғана ұйымға бекітіледі. Сондықтан автокөлікті қайта тіркеу немесе сатып алу кезінде нөмірдің ХҚКО-да дайын екеніне алдын ала көз жеткізген жөн. Қызмет көрсету мерзімі: Астана және Алматы қалаларында – 5 жұмыс күні, облыстар мен Шымкент қаласында – 15 жұмыс күні.Мемлекеттік қызмет ҚР Жасанды интеллект және цифрлық даму министрлігінің Мемлекеттік қызметтер комитеті, «Ұлттық ақпараттық технологиялар» АҚ және ҚР Ішкі істер министрлігінің бірлескен жұмысының нәтижесінде іске қосылды.Ақпарат көзі : https://www.gov.kz/memleket/entities/aqmola-selinograd/press/news/details/1238431?lang=ru

ҚҰРМЕТТІ ҚАЗАҚСТАНДЫҚТАР!2026 жылғы 15 наурызда республикалық референдумда қабылданған Қазақстан Республикасының Конституциясы 2026 жылғы 1 шілдеден бастап күшіне енді.Қазақстан халқының ерік білдіруімен еліміздің конституциялық дамуының жаңа кезеңінің негізі қаланды.1995 жылғы Қазақстан Республикасы Конституциясының күші жойылды.Жаңа Ата Заңымыздың күшіне енуі – мемлекет дамуындағы тарихи кезең және Конституция үстемдігіне, адам құқықтары мен бостандықтарының кепілдіктерін күшейтуге, құқықтық айқындылықты нығайтуға, мемлекеттік биліктің жауапкершілігін арттыруға, сондай-ақ азаматтардың мемлекет ісін басқаруға қатысуын кеңейтуге негізделген жаңа конституциялық үлгіні бекітеді.Конституция Қазақстан Республикасы қызметінің негізгі қағидаттарын едәуір жаңартып, кеңейтті. Бұлардың қатарына Егемендік пен Тәуелсіздікті қорғау, адам құқықтары мен бостандықтарын сақтау, заң мен тәртіп үстемдігін қамтамасыз ету, жалпыұлттық бірлікті нығайту, халықтың әл-ауқатын арттыру, жауапты әрі жасампаз отаншылдық идеясын ілгерілету, қоғамдық диалогты дамыту, еңбексүйгіштік, прогресс және білім құндылықтарын бекіту, жоғары экологиялық мәдениетті қалыптастыру, тарихи-мәдени мұраны сақтау және төл мәдениетті қолдау алғаш рет енгізіліп отыр.Қазақстан Республикасының Егемендігі, Тәуелсіздігі, унитарлығы, аумақтық тұтастығы және басқару үлгісі өзгермейді.Мемлекеттің стратегиялық даму бағдарлары – адам капиталын, білімді, ғылым мен инновацияны Қазақстан Республикасының ұзақ мерзімді дамуының негізі ретінде дамыту конституциялық деңгейде алғаш рет айқындалды.Ата Заңымыз Конституция үстемдігін мемлекеттің Негізгі Заңы ретінде, оның ең жоғары заңды күшін және Қазақстан Республикасының бүкіл аумағында тікелей қолданылуын бекітеді. Барлық заңдар мен өзге де нормативтік құқықтық актілер тек Конституцияның негізінде, сондай ақ оны орындау мақсатында қабылдануға және оған қайшы келмеуге тиіс.Бұған дейін сот төрелігі қағидаттарының қатарында бекітіліп келген заңның уақыт тұрғысынан қолданылуы туралы ережелер конституциялық құрылыс негіздерінің бірі ретінде конституциялық мәртебеге ие болды. Азаматтарға жаңа міндеттер жүктейтін немесе олардың жағдайын нашарлататын, жауаптылықты белгілейтін немесе күшейтетін заңдардың кері күшіне тыйым салу барлық мемлекеттік органдар мен лауазымды адамдар үшін жалпыға бірдей міндетті талап ретінде бекітілді.Конституциялық заңдармен реттелетін мәселелердің тізбесі кеңейтілді. Олардың қатарына Қазақстан Халық Кеңесінің құқықтық мәртебесі мен қызметі, астананың құқықтық мәртебесі, жоғары мемлекеттік билік органдарының ұйымдастырылуы, Конституциялық Сот, сот жүйесі, арнаулы құқықтық режимдер және мемлекеттік құрылыстың өзге де мәселелері енгізілді. Бұл олардың құқықтық реттелуінің тұрақтылығын арттыруды қамтамасыз етеді.Қазақстан Халық Кеңесіне заң шығару бастамасы құқығы беріле отырып, халқының мүддесін білдіретін жоғары консультативтік орган ретінде құрылды. Бұл қоғамның мемлекеттік саясатты қалыптастыру ісіне қатысуын күшейтеді. Заң шығарушы биліктің жаңа үлгісі жасалып, мемлекеттік институттар арасында өкілеттіктер қайта бөлінді.Адам құқықтарын қорғау үлгісі елеулі түрде жаңартылды. Конституция қылмыстық сот ісін жүргізудегі негізгі кепілдіктерді сот қызметінің қағидаттары ретінде емес, бас бостандығы нақты шектелген сәттен бастап барлық мемлекеттік органдар сақтауға міндетті әрбір адамның ажырамас құқықтары ретінде бекітті. Олардың қатарында нақты ұсталған сәттен бастап қорғалу құқығы, бас бостандықтың шектелуіне сот бақылауы, негізсіз ұстауға тыйым салу, сұрақтарға жауап бермеу құқығы, өз-өзіне және жақын туыстарына қарсы айғақ бермеу құқығы («Миранда қағидалары»), сондай-ақ кінәсіз презумпциясы бар.Мемлекеттің мемлекеттік органдар мен лауазымды адамдардың заңсыз әрекеттерінен келтірілген зиянды өтеу міндеті, зияткерлік меншікті қорғау құқығы, дербес деректерді қорғау мен цифрлық қауіпсіздікті қоса алғанда,  цифрлық құқықтарға кепілдіктер, сондай-ақ мемлекет пен азаматтардың экологиялық жауапкершілігі конституциялық деңгейде алғаш рет бекітілді.Жаңа Конституцияның күшіне енуімен Қазақстан Республикасының Конституциялық Соты жаңа Конституция үстемдігін, оның ең жоғары заңды күшін және конституциялық құндылықтардың бірыңғай түсінілуін қамтамасыз ете отырып, конституциялық бақылауды жалғастыра береді.Жаңа Конституцияның күшіне енуі Қазақстан Республикасының конституциялық дамудағы жаңа кезеңінің басталғанын білдіреді. Бұл кезеңде адам, оның қадір-қасиеті, құқықтары мен бостандықтары мемлекеттің ең жоғары құндылығы болып, Конституция үстемдігі орнықты дамудың, заңдылық пен әділдіктің берік негізі бола береді.Қазақстан Республикасының Конституциялық Соты Қазақстан Республикасының барша азаматтарын жаңа Конституцияның күшіне енуімен және еліміздің конституциялық дамуының жаңа кезеңінің басталуымен құттықтайды.Қазақстан Республикасы жаңа Конституциясының толық мәтіні төмендегі сілтеме бойынша қолжетімді: https://www.gov.kz/memleket/entities/ksrk/press/news/details/1159830?lang=kkАқпарат көзі : https://www.gov.kz/memleket/entities/ksrk/press/news/details/1250997?lang=ru

 Бүгін 15 наурыздағы республикалық референдумда қабылданған Қазақстан Республикасының жаңа Конституциясы күшіне енді. Мемлекет басшысы Қасым-Жомарт Тоқаевтың бастамасымен жүзеге асқан конституциялық реформа адам құқықтарын қорғауды күшейтуге, қоғамдық келісімді нығайтуға, тарихи-мәдени мұраны сақтауға және ұлттық құндылықтарды дәріптеуге негізделген мемлекеттік дамудың жаңа бағдарын айқындайды.Конституциядағы өзгерістер бірнеше маңызды бағытты қамтиды. Олар: мәдениет пен тарихи мұраны сақтау, сөз бостандығы және шығармашылық еркіндік, отбасы институтын қолдау, дін, волонтерлік және қайырымдылық қызмет. Аталған бағыттарға қатысты өзгерістердің іске асуы азаматтық қоғамның дамуына, құқықтық мәдениеттің нығаюына және қоғамдағы ашық диалогтың орнығуына тікелей ықпал етеді.Мәдениет саласындағы басты жаңалықтардың бірі – тарихи-мәдени мұраны сақтау мен ұлттық мәдениетті қолдаудың мемлекеттің негізгі қағидаттарының бірі ретінде бекітілуі. Бұл музейлердің, театрлардың, кітапханалардың, архивтердің, кинематография мен концерттік ұйымдардың дамуына, сондай-ақ шығармашылық орта өкілдерін қолдауға конституциялық деңгейде басымдық берілетінін көрсетеді.Архив, кітапхана және кітап ісі үшін бұл өзгерістер мұрағаттағы құжаттарды сақтауға, кітап оқу мәдениетін дамытуға, қорларды цифрландыруға, ұлттық әдебиетті кеңінен насихаттауға берік құқықтық негіз қалайды. Жаңа Конституция архивтер мен кітапханалардың тарихи мұраны сақтаудағы және жұртшылықтың білім алуына мүмкіндік жасайтын мекеме ретіндегі маңызын арттыра түседі.Конституцияда тіл мен мәдени әралуандылыққа қатысты қағидаттарға да ерекше мән берілген. Ата Заң әркімнің ана тілін, төл мәдениетін пайдалануға, қарым-қатынас, тәрбие, оқу және шығармашылық тілін еркін таңдауға кепілдік береді. 100-ден астам этнос өкілі тұратын және 1 мыңнан астам этномәдени бірлестік қызмет ететін Қазақстан үшін бұл қағидаттардың маңызы орасан. Олар еліміздегі мәдени мұраны сақтауға, тілдің дамуына және ортақ азаматтық бірегейлікті нығайтуға қызмет етеді.Конституциядағы өзгерістердің маңызды бағыты – сөз бостандығы және шығармашылық еркіндікті қамтамасыз ету. Жаңа Конституция сөз бостандығына, ғылыми, техникалық және көркем шығармашылық еркіндігіне, ақпаратты заңда белгіленген тәртіппен еркін алу және тарату құқығына кепілдік береді. Сонымен қатар цензураға тыйым салынып, зияткерлік меншік құқығының қорғалуы конституциялық деңгейде бекітіледі. Бұл бұқаралық ақпарат құралдарының, авторлар мен баспагерлердің, мәдениет пен өнер қайраткерлерінің, креативті индустрия өкілдерінің, сондай-ақ ақпараттық, білім беру және мәдени мазмұндағы өнім әзірлейтін ұйымдардың қызметін құқықтық тұрғыдан нығайтады.Бұл қағидаттардың кәсіби журналистика үшін маңызы зор. Бүгінде Қазақстанда бес мыңнан астам бұқаралық ақпарат құралы жұмыс істейді. Цифрлық платформалардың, әлеуметтік желінің, жасанды интеллект технологияларының қарқынды дамуы және ақпарат көлемінің артуы кәсіби журналистикаға қойылатын талапты күшейте түсті. Осындай жағдайда шынайы, тексерілген әрі сапалы ақпараттың құндылығы бұрынғыдан да артады. Бұқаралық ақпарат құралдары реформалардың мәні мен мазмұнын түсіндіріп, өзекті мәселелерді қоғам талқысына ұсынады. Сондай-ақ азаматтардың маңызды ақпараттан хабардар болуын қамтамасыз етіп, ашық диалог мәдениетінің қалыптасуына ықпал етеді.Конституцияда сөз бен шығармашылық еркіндігіне, ақпаратты заңда белгіленген тәртіппен еркін алуға, сондай-ақ зияткерлік меншік құқығын қорғауға берілген кепілдіктер креативті индустрияның дамуына да жол ашады. Бүгінде кино, музыка, театр, медиа, цифрлық контент, дизайн, блогинг, ойын индустриясы мен ұлттық қолөнер – мәдениеттің ажырамас бөлігі ғана емес, ел экономикасының өсіміне үлес қосып отырған маңызды бағыттар. Сондықтан жаңа конституциялық қағидаттар шығармашыл орта өкілдерін қолдауға, креативті кәсіпкерлікті дамытуға және отандық контенттің өрісін кеңейтуге негіз болады.Отбасы құндылықтарына қатысты Конституцияда неке ер мен әйелдің заңда белгіленген тәртіппен мемлекеттік тіркеуден өткен, ерікті әрі тең құқықты одағы екені нақты көрсетіледі. Сондай-ақ отбасы, ана, әке және бала мемлекеттің қорғауында болады. Бұл нормалар отбасы институтын нығайтуға, жауапты ата-ана рөлін қалыптастыруға, балаларды тәрбиелеуге және олардың құқықтары мен мүдделерін қорғауға бағытталған ақпараттық-ағартушылық мақсаттағы жұмыстардың құқықтық негізін күшейтеді.Дін саласына қатысты бірқатар қағидат та конституциялық деңгейде бекітіледі. Атап айтқанда, мемлекеттің зайырлы сипаты, заң алдында бәрінің тең болуы және дін мен мемлекеттің бөліну қағидаты сақталады. Сонымен қатар ар-ождан бостандығына кепілдік беріліп, конфессияаралық келісім қоғамның маңызды құндылықтарының бірі ретінде танылады. Діни білім беру ұйымдарын қоспағанда, білім беру мен тәрбие жүйесінің зайырлы сипаты Конституцияда көрініс табады.Бұл қағидаттардың Қазақстан үшін маңызы айрықша. Себебі еліміздегі орнықты дамудың негізі – бейбітшілік, сыйластық және қоғамдық келісім. Бүгінде елімізде этномәдени бірлестіктерді, қоғамдық ұйымдарды және азаматтық қоғамның өзге де институттарын қоса алғанда, 5 мыңға жуық ұйым жұмыс істейді. Жаңа конституциялық қағидаттар қоғамдық келісімді нығайтуды, жауапкершілік мәдениетін қалыптастыруды көздеп, мемлекет пен халық арасындағы байланысты бекемдейді.Жаңа Ата заң волонтерлік қызмет пен қайырымдылықты қолдауға қатысты да нормаларды қамтиды. Бұл аталған бағыттардың дамуына серпін беріп, қоғамдық белсенділіктің артуына, азаматтық бастамалардың кеңеюіне, ізгілік пен жанашырлық құндылықтарының кеңінен дәріптелуіне негіз болады. Елімізде волонтерлік, қайырымдылық, меценаттық және филантропиялық қызметке үлес қосқан азаматтар мен ұйымдарға үнемі қолдау көрсетіліп келеді.Осылайша, бүгіннен бастап Конституцияның жаңартылған нормалары мәдениет, ақпарат, архив, кітапхана, кітап ісі, дін салаларындағы және азаматтық қоғам институттарымен жүргізілетін жұмыстың негізгі бағдарын айқындайды. Жаңа Ата заң қағидаттары құқықтық мәдениеттің қалыптасуын, шығармашылық орта мен кәсіби журналистиканың дамуын, сондай-ақ азаматтық белсенділіктің артуын мақсат етеді.ҚР Мәдениет және ақпарат министрлігінің баспасөз қызметі

Құрметті отандастар!Жаңа Конституциямыздың заңды күшіне енуі – бүкіл еліміз үшін айрықша маңызды оқиға. Баршаңызды шын жүректен құттықтаймын!Бүгін тәуелсіз Қазақстан тарихының жаңа дәуірі басталады. Біз саяси-экономикалық реформалардың, ауқымды өзгерістердің және қарқынды дамудың даңғыл жолына түсеміз.Осы ерекше күн еліміздің бүкіл саяси жүйесін, сондай-ақ мемлекеттің және азаматтық қоғамның негізгі институттарын түбегейлі жаңғырту кезеңі басталғанын аңғартады.15 наурызда өткен жалпыұлттық референдумда Қазақстан халқы ел тағдырына тікелей ықпал ететін және мемлекеттің ондаған жылдарға арналған даму бағдарын айқындайтын таңдауын жасады. Миллиондаған отандасымыз берекелі бірлік танытып, шынайы отаншылдық пен жоғары жауапкершіліктің озық үлгісін көрсетті. Бұл тарихи шешімнің төл шежіремізде алтын әріппен жазылатыны анық.Бұдан былай Конституция күні «Наурызнама» онкүндігімен қатар аталып өтеді. Мұның символдық мәні зор. Конституция күні ел ішінде ғасырлар бойы орныққан көктемгі жаңару дәстүрлерін Ата заңның басты қағидаттарымен тоғыстырады, яғни азаматтарымыздың ырысты ынтымаққа, озық білімге, ел игілігі жолында адал еңбек етуге деген талпынысымен үндеседі.Біз нағыз Халық Конституциясының мызғымас құқықтық негізіне арқа сүйеп, барлық мақсат-мұраттарымызға міндетті түрде жетеміз. Заң мен Тәртіп, Еңбексүйгіштік пен Өрлеу, Тазалық пен Табиғатты аялау сынды жасампаздық құндылықтарын қоғамда берік орнықтырамыз. Бұған еш күмәнім жоқ.Біз бірлігі бекем, біртұтас ұлт ретінде әлемдік өркениеттің шыңын бағындырып, баршаға бірдей мүмкіндік беретін және барлық азаматтың жан-жақты дамуына жол ашатын мемлекетті – Әділетті Қазақстанды құрамыз!Қастерлі Отанымызды көркейту жолындағы жоспарларымызды ойдағыдай орындаймыз. Мен бұған кәміл сенемін!Қазақстан Республикасы жасай берсін!Халқымыз мәңгі жасасын! Дереккөз: akorda.kz Ақпарат көзі : https://www.gov.kz/memleket/entities/mfa-abudhabi/press/news/details/1251636?lang=ru

Голан жоталарындағы «БҰҰ-ның ажыратуды бақылау күштері» миссиясы командирінің резервтік бітімгерлік ротасының үшінші құрамымен миссия штабының бастығы полковник Ануп Бикрам Рана кездесті.Сапар барысында миссия өкілі инфрақұрылым нысандарын, инженерлік техниканы, операциялық құралдарды қарап шығып, жауапкершілік аймағындағы БҰҰ бақылау бекеттерінің жұмысымен танысты.Қазақстандық әскери қызметшілермен өткен кездесуде полковник Ануп Бикрам Рана қызметті ұйымдастыру, қауіпсіздікті қамтамасыз ету және қойылған міндеттерді одан әрі орындау мәселелерін талқылады. Тараптар миссия мандатын орындауға байланысты басым бағыттарға ерекше назар аударды.Еске сала кетейік, қазақстандық бітімгерлік контингент халықаралық бейбітшілік пен қауіпсіздікті сақтауға елеулі үлес қосып келеді. Олар жауапкершілік аймағындағы ахуалды тәулік бойы бақылап, аумақты патрульдейді және қақтығыс тараптары арасындағы атысты тоқтатуды қамтамасыз етуге қатысады.Бітімгерлер жергілікті аумақты жедел минасыздандыру, жарылғыш заттар мен қолдан жасалған жарылғыш құрылғыларды жою міндеттерін орындайды.Сонымен қатар олар миссия нысандары мен бекеттеріне қызмет көрсетіп, БҰҰ қызметкерлерінің қауіпсіздігін қамтамасыз етіп, гуманитарлық жүктерді алып жүреді және жергілікті халыққа медициналық көмек көрсетеді.Бітімгерлердің өз міндеттерін кәсіби, адал әрі мінсіз орындауы Қарулы күштердің және Қазақстанның халықаралық аренадағы беделін нығайтады.Ақпарат көзі : https://www.gov.kz/memleket/entities/mod/press/news/details/1238374?lang=ru

Хельсинки, 2026 жылғы 10 маусым - Қазақстанның Финляндиядағы Елшілігінде Ж.Аймауытовтың «Ақбілек» романына арналған әдеби кеш өтті. Іс-шара Қазақстан Президенті Қ.Тоқаевтың «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығын іске асыру аясында ҚР-дың Финляндиядағы Елшілігі мен «Сәуле» мәдени қоғамының бірлескен ұйымдастыруымен өткізілді.Іс-шара барысында қатысушылар көрнекті қазақ жазушысы, қоғам қайраткері әрі қазақ прозасының негізін қалаушылардың бірі Ж.Аймауытовтың өмір жолы мен шығармашылық мұрасымен танысты. Әсіресе қазақ әдебиетіндегі алғашқы психологиялық романдардың бірі саналатын және ұлттық мәдени мұрадан ерекше орын алатын «Ақбілек» романына ерекше назар аударылды.Әдеби кеш аясында шығарманы бірлесіп оқу және талқылау ұйымдастырылды. Қатысушылар романның негізгі сюжеттік желілерімен, идеялық мазмұнымен танысып, рухани төзімділік, білімнің рөлі, әйелдің қоғамдағы орны және ұлттық құндылықтарды сақтау мәселелері төңірегінде пікір алмасты. Сонымен қатар, қонақтар үшін Ж.Аймауытовтың өмірбаяны мен шығармашылығына арналған танымдық викторина өткізілді.Осындай іс-шараларды өткізу қазақ әдебиетін шетелде насихаттауға, мәдени байланыстарды нығайтуға, тарихи жадты сақтауға және отандастар мен шетелдік аудитория арасында кітап оқуға деген қызығушылықты арттыруға ықпал етеді. Мұндай бастамалар қоғамның рухани-адамгершілік тәрбиесіне оң әсерін тигізіп, Қазақстанның бай мәдени мұрасын халықаралық деңгейде кеңінен танытуға мүмкіндік береді. Ақпарат көзі : https://www.gov.kz/memleket/entities/mfa-helsinki/press/news/details/1238367?lang=ru

Жазғы туристік маусымда Ақмола облысына келетін туристер саны артады деп күтілуде. Болжам бойынша, өңірге жыл ішінде шамамен 2 миллион қонақ келеді. Туристерді тартатын негізгі орталық дәстүрлі түрде Бурабай курорты болады. Мұнда келушілерді қабылдауға арналған инфрақұрылым мен туристік нысандарды дайындау бойынша ауқымды жұмыстар аяқталды.Туристік маршруттарды дамытуға ерекше көңіл бөлінуде. Қазіргі уақытта қолданыстағы он бағыт абаттандырылып, Жүкей көлі мен Ақылбай ауылы маңында екі жаңа маршрут ашылуда. Сонымен қатар, курорттың ішкі инфрақұрылымы да қарқынды дамып келеді. Бурабайда сегіз бақылау алаңы салынды, жаңа саябақ аймағы ашылды, 45 пикник аймағы жабдықталды, ұзындығы 30 шақырым болатын велосипед жолы тағы 10 шақырымға ұзартылды, сондай-ақ 55 санитарлық-гигиеналық торап орнатылды.Көлік қолжетімділігі саласында да маңызды өзгерістер орын алуда. Осы айда Щучинск қаласындағы жаңғыртылған теміржол вокзалы пайдалануға беріледі. Вокзалдан жолаушыларды жайлы тасымалдауды қамтамасыз ету үшін жаңа автобус бағыттары іске қосылады.Курорттың қонақүй инфрақұрылымы да белсенді түрде дамуда. Шілде айында Mövenpick қонақүй кешенін, ал желтоқсан айында бес жұлдызды Radisson Blu Burabay қонақүйін ашу жоспарланған. Сонымен қатар, бес жұлдызды Dolce by Wyndham қонақүйінің құрылысы жалғасуда, ал шілде айында Holiday Inn Resort Burabay жобасын іске асыру басталады.Бурабайдың жаңа келбетіне айналатын тағы бір перспективалы жоба – заманауи конгресс-орталық. Қазіргі уақытта жобалық құжаттама мемлекеттік сараптамадан өтуде.Демалушылардың қауіпсіздігін 40 полиция қызметкері және құрамында 123 «ақылды» камерасы бар заманауи интеллектуалды бейнебақылау жүйесі қамтамасыз етеді. Щучье, Бурабай және Үлкен Шабақты көлдерінде үш құтқару станциясы жұмыс істейді. Олар жазғы маусым кезеңінде күшейтілген жұмыс тәртібіне көшірілген.Ақпарат көзі : https://www.gov.kz/memleket/entities/aqmola-tourism/press/news/details/1238373?lang=ru

Астана, 2026 жылғы 10 маусым – «KazAID» Қазақстандық халықаралық даму агенттігінің кеңсесінде агенттік басқарма төрағасының міндетін атқарушы Ж. Асановтың Иран Ислам Республикасының Қазақстан Республикасындағы төтенше және өкілетті елшісі Әли Акбар Джоукармен жұмыс кездесуі өтті.Иран Елшісі жақында 16 мамырда иран тарапына жеткізілген қазақстандық мейірім жәрдемі үшін ризашылық білдіріп, рахметін айтты.Ж. Асанов әңгіме болып отырған қайырым миссиясының ел Президенті Қ. Тоқаевтың тапсырмасы бойынша жүзеге асқанын айтып, Қазақстан мен Иран арасында талай ғасыр жалғасып келе жатқан жақын да туыстық қатынастарды атап өтті.  Әңгіме барысында екі жақ суды үнемді пайдалану және экономика мен әл-ауқатты көтеруге септігін тигізетін ғылыми-техникалық потенциалды көтеру мәселелеріне баса көңіл бөле отырып, екіжақты  әрекеттестік мүмкіндіктері жөнінде сөз қозғады.Кездесу соңында тараптар жұмыс бабында өзара байланысып тұруға уағдаласты. Ақпарат көзі : https://www.gov.kz/memleket/entities/kazaid/press/news/details/1238357?lang=ru

Қазақстан Республикасының Премьер-министрі Олжас Бектенов Astana Mining & Metallurgy 2026 конгресіне қатысу үшін келген Сауд Арабиясы Корольдігінің өнеркәсіп және минералдық ресурстар министрі Бандар әл-Хураифпен кездесу өткізді.Сауд Арабиясы Қазақстанның Таяу Шығыстағы негізгі сауда-экономикалық серіктестері қатарына кіреді. Қазақстан мен Сауд Арабиясы көшбасшыларының өзара қолдауы нәтижесінде сенімді әрі достық қарым-қатынастар орнағаны атап өтілді.2025 жылдың қорытындысы бойынша екі ел арасындағы өзара сауда көлемі 17%-ға артып, $11,7 млн-ды  құрады. Биылғы қаңтар-сәуір айларында тауар айналымы 2,9 есеге өсіп, $6,1 млн-нан асты. Кейінгі 20 жылда Сауд Арабиясы Корольдігінен Қазақстан Республикасына тартылған тікелей шетелдік инвестиция көлемі $115,3 млн-ды құрады. Биылғы ақпан айында қол қойылған Қазақстан – Сауд Арабиясы үйлестіру кеңесін құру туралы келісім және инвестицияларды өзара ынталандыру мен қорғау туралы келісім жаңа бірлескен бастамаларды жүзеге асыру үшін қосымша мүмкіндіктер ашады.Тау-кен металлургия кешеніндегі ынтымақтастықты одан әрі дамыту мәселелеріне, сондай-ақ аса маңызды минералдар саласындағы бірлескен жобаларды жүзеге асыру перспективаларына назар аударылды. Пайдалы қазбаларды барлау, өндіру және өңдеу, сондай-ақ қосылған құны жоғары өндірістерді дамыту саласындағы өзара іс-қимыл талқыланды. Кездесуге қатысушылар тау-кен металлургия және аса маңызды минералдар саласында екіжақты өзара іс-қимылды арттыруға дайын екендерін растады.Ақпарат көзі : https://www.gov.kz/memleket/entities/mfa-riyadh/press/news/details/1238321?lang=ru