2024 жылы елорда соттарында Орталықтандырылған мұрағат құрылып, оған 1949 жылғы материалдарды қоса алғанда, 103 мыңнан астам қылмыстық және азаматтық істер сақтауға жіберілді. Осы және өзге де өткен жылдың қорытындылары, сондай-ақ алдағы уақытта атқарылатын жұмыс жоспары туралы Астана қаласы бойынша Сот әкімшілігі департаментінің басшысы Елдос Жұмақсанов Коммуникациялар қызметінде өткен брифингте айтты, деп хабарлайды қала әкімдігінің ресми сайты.«Бұл өзгерістер судьялар мен қызметкерлердің еңбек жағдайын жақсартып қана қоймай, елордалық соттарға жүгінген азаматтардың жайлылығын қамтамасыз етті. Біз 2025 жылы инфрақұрылымды жақсарту бойынша жұмысты жалғастырамыз», - деді Елдос Жұмақсанов.Өткен жылдың мамыр айында елорда соттарында Орталықтандырылған мұрағат құрылды. 1949 жылғы материалдарды қосқанда 103 мыңнан астам қылмыстық және азаматтық істер сақтауға берілді. Мұрағат жұмысының тиімділігін арттыру үшін құжаттарды алғашқы және қайталама ғылыми-техникалық өңдеу жүргізілді.2024 жылы Астана соттары 27 мыңнан астам атқару парағын шығарды.«Сот шешімдерінің орындалуын жақсарту – біздің басым бағыттарымыздың бірі. Негізсіз бас тартуларды тексеру қорытындысы бойынша 10 жеке сот орындаушысы тәртіптік жауапкершілікке тартылды. Біз бұл жұмысты одан әрі жетілдіретін боламыз», - деді Жұмақсанов.2025 жылы департамент екінші жартыжылдықта қолданысқа енгізілетін «Төрелік 2.0» жаңа автоматтандырылған жүйесін іске қосуды жоспарлап отыр. Бұл платформа сот процестерін жетілдіріп, азаматтар үшін ашық әрі ыңғайлы етеді.Ақпарат көзі : https://www.gov.kz/memleket/entities/astana/press/news/details/918166

2024 жылы Астанада қалалық Полиция департаменті Есірткі қылмысына қарсы күрес басқармасы қызметкерлерінің жедел әрекетінің арқасында есірткінің заңсыз айналымына қатысты 238 сайт бұғатталды. Бұл туралы Коммуникациялар қызметінде өткен брифингте Астана қалалық полиция департаменті Есірткі қылмысына қарсы күрес басқармасының аса маңызды істер бойынша аға жедел уәкілі, полиция подполковнигі Әлия Қибатқызы айтты, деп хабарлайды қала әкімдігінің ресми сайты.«Қазақстан Республикасында нашақорлыққа қарсы күрес жөніндегі 2023-2025 жылдарға арналған кешенді іс-шаралар жоспарын іске асыру аясында 2024 жылдың есепті кезеңінде ПД бөлімшелері жыл басында есірткіге қатысты 1100-ден астам құқық бұзушылықты қозғады. 405 қылмыстық іс қозғалса, оның 283-і есірткі бизнесіне қатысы бар тұлғаларға қатысты. Заңсыз айналымнан 300 келіден астам түрлі есірткі заттары тәркіленді. «Есірткілердің синтетикалық түрлері» бойынша есірткіге қатысты құқық бұзушылықтың 681 фактісі анықталды. Осы жылдың басынан бастап Қазақстан Республикасы Қылмыстық кодексінің 299-1 бабына сәйкес интернет-ресурстар саласында 31 қылмыстық іс қозғалды. Оның барысында 238 есірткі сайты бұғатталды», - деді ол.Әлия Қибатқызы есірткі қылмысы үшін жауапкершілікке қатысты қылмыстық заңнамадағы өзгерістерді де түсіндірді.Сондай-ақ, Әлия Қибатқызы биылғы мемлекеттік органдармен, ҮЕҰ және құқық қорғау органдарымен бірлесіп алдын алу шаралары жүргізіліп жатқанын, оның ішінде үгіт-насихат жұмыстары, семинарлар, лекциялар, дөңгелек үстелдер, кездесулер, спорттық турнирлер, жарыстар, рейдтер өткізіліп жатқанын атап өтті.Ақпарат көзі : https://www.gov.kz/memleket/entities/astana/press/news/details/918224

Астанада 18-19 қаңтар күндері барлық православие шіркеулерінде Крещение мерекесі рәсімі өтеді, деп хабарлайды елорда әкімдігінің ресми сайты.Астанада дәстүрлі шомылу қалалық жағажайда (амфитеатр маңында) өтеді, ол үшін төрт ойық дайындалды.18-19 қаңтарда Астанада мерекелік діни рәсімдер, крестпен дәстүрлі шеру және жаппай шомылу жоспарланған.Іс-шара қаланың барлық православие шіркеуінде өтеді: Успен соборында (Күйші Дина көшесі, 27), Константин-Еленин шіркеуінде (Республика даңғылы, 12), Саров Серафим шіркеуінде (Бөгенбай батыр даңғылы, 8).Суға түсу орындары 18 қаңтар күні сағат 20:00-ден (су маңына жарық орнатылғаннан кейін) 19 қаңтар күні сағат 02:00-ге дейін жұмыс істейді.Жаппай шомылу да 19 қаңтар күні таңғы сағат 08:00-ден 19 қаңтар күні сағат 23:00-ге дейін жалғасады.Діни рәсім кезінде тұрғындардың қауіпсіздігін Төтенше жағдайлар департаментінің судан құтқару қызметі мен Астана қаласы Полиция департаментінің қызметкерлері қамтамасыз етеді. Суға түсу орындарында жедел жәрдем бригадалары кезекшілік етеді.Елорда тұрғындары мен қонақтарын суға түсу кезінде қауіпсіздік шараларын сақтауға және ауа райы жағдайын ескеруге шақырамыз.Белгіленген шомылу орындарында қауіпсіздік ережелерін есте ұстаған жөн: ойық маңында 3 адамнан аспауы керек, тек құтқарушылар мен медицина қызметкерлерінің бақылауымен суға түсу қажет. Суға кірмес бұрын, денені қыздыратын жаттығу жасап, рәсімнен кейін өзіңізді сүлгімен ысқылап, жылы заттарды киіп, ыстық шай ішуіңіз керек. Суға түсу кезінде денсаулығыңыз нашарлағанын сезсеңіз, дереу шомылу орнындағы кезекші дәрігерлерге жүгініңіз.Оқыс жағдайдың алдын алу үшін құтқарушылар мынаны ескертеді:- жабдықталмаған орындарда құтқарушылар мен дәрігерлердің қатысуынсыз суға түсуге тыйым салынады;- Балаларды қараусыз қалдыруға болмайды. Бала жақсы жүзе алса да, суық су мен стрестік жағдай оған кері әсер етуі мүмкін;- Мұзды суға секіріп түсуге болмайды. Жарақат алып қалуыңыз әбден мүмкін;- Ішімдік ішуден аулақ болыңыз. Мас күйінде мұзды түрлі қауіпті салдарға әкелуі мүмкін.Ақпарат көзі : https://www.gov.kz/memleket/entities/astana/press/news/details/918293

2025 жылдың басынан бері Астананың көптеген кітапханаларында заманауи «Таза Қазақстан» бұрыштары ашылды. Бұл бұрыштарда экологиялық ағарту, қоршаған ортаны қорғау, мәдени орындарды сақтау туралы кітаптар, журналдар мен ақпараттық материалдар орналастырылған, деп хабарлайды елорда әкімдігінің ресми сайты.Сонымен қатар, бұрышта экологияға арналған кітаптар мен ғылыми басылымдар жинағы бар. Сондай-ақ жас оқырмандармен байқаулар, кездесулер өткізіліп тұрады.«Таза Қазақстан» бұрышы экологиялық саналы қоғамды қалыптастыру үшін білім мен технологияны біріктірудің ерекше үлгісі болды. «Кітапхананы жөндеу – шығармашылықпен айналысатындар үшін де үлкен мереке», - деп атап өтті №15 көпшілік кітапханасының меңгерушісі Сәуле Рахимова.Атап айтқанда, тақырыптық кітап көрмелері: №5 балалар кітапханасында – «Таза Қазақстан – таза болашаққа жол», №8 балалар кітапханасында – «Табиғат әлемін кітаппен ашамыз», зағиптарға және көзі нашар көретін азаматтарға арналған мамандандырылған кітапханада – «Табиғатты қорғау – қасиетті іс», Орталық балалар мен жасөспірімдер кітапханасында – «Экология – ел тағдыры».Бұл ретте кітапханаларда экология бойынша лекциялар мен шеберлік сабақтары өткізіліп, бірлескен сенбілік, іргелес аумақтарды көгалдандыру, қоқыс шығару жұмыстары ұйымдастырылып жатыр. Іс-шаралардың бәрі қала тұрғындарының экологиялық сауаттылығын арттыруға бағытталған.Кітаптар әртүрлі жас топтарына бағытталған және өз бетінше оқуға және отбасылық оқуға арналған кітаптарды қамтиды.Қаланың 22 кітапханасы, мекенжайы, телефондары және жұмыс уақыты туралы толық ақпаратты Instagram желісіндегі @kitap_qala_astana ресми парақшасында білуге болады.Ақпарат көзі : https://www.gov.kz/memleket/entities/astana/press/news/details/918231

Астанада биыл 200-ге жуық мектеп оқушысы жұмысшы мамандығы бойынша диплом алады, деп хабарлайды қала әкімдігінің ресми сайты.2023 жылы техникалық және кәсіптік білім беруде колледждер базасында жоғары сынып оқушыларының кәсіби біліктілігін арттыру мақсатында пилоттық жоба іске қосылған. Онда таңертең мектепте сабақ оқитын оқушы түстен кейін қайта кәсіби білім беретін арнайы оқу орынына барып білім алады. Бағдарламаның ерекшелігі жоғарғы сынып оқушысы мектепте білім алумен қатар бір мамандықты игеріп, оқуды бітіргеннен кейін атестатпен қоса диплом алады.Оқу жүктемесінің мөлшері күніне төрт сағаттан аспайды. Білім алу үшін оқу уақытының көлемі кемінде 48 кредитті құрауы тиіс. Оқу мерзімі – 1 жыл 5 ай.Пилоттық жоба аясында елордада үш мемлекеттік колледж таңдап алынды. Бүгінде 156 оқушы «Автокөлік құралдарына техникалық қызмет көрсетіп жөндеу және пайдалану», «Тігін өндірісі және киім дизайны», «Аспазшы» мамандықтарын оқып, практикалық тәжірибеден өтіп жатыр.Биыл мамыр айында жобаның алғашқы білім алушыларына колледж дипломы табысталады.Астана қаласының білім басқармасы, колледж және мектеп әкімшілігі, ата-аналар әр ай сайын балалардың оқу үлгеріміне бақылау жасау мақсатында мониторинг жүргізеді.Айта кетейік, жұмысшы мамандықтар жылына орай пилоттық жобаның ауқымы кеңейтіледі.Биыл қала колледждері 300-ден астам оқушы қабылдап, тігінші, наубайшы, аспаз, шаштараз, флорист, мобильді өндіріс маманы, электр газ салушы мамандықтары оқытылады деп жоспарланып отыр.Ақпарат көзі : https://www.gov.kz/memleket/entities/astana/press/news/details/918492

Астана әкімдігінің бастамасымен Жеңістің 80 жылдығына орай Ұлы Отан соғысы ардагерлеріне төленетін төлемақы мөлшері 2,5 есеге ұлғайды. Осылайша, астаналық ҰОС ардагерлерінің әрқайсысына 5 миллион теңгеден беріледі. Қазір елордада 6 ардагер тұрады.Бұдан басқа, жеңілдіктер бойынша Ұлы Отан соғысының ардагерлеріне теңестірілгендер (ЧАЭС қатысушылары мен мүгедектерінен басқа) (ҰОС кезеңінде қызмет өткерген әскери қызметшілер, фашистік Германияға қарсы іс-қимылдарға қатысқан адамдар, Ленинград қаласында блокада кезеңінде жұмыс істеген азаматтар, концлагерьлердің кәмелетке толмаған тұтқындары, әскери қызметшілер, жаралануы салдарынан мүгедектігі бар адамдарға, азаматтық немесе әскери мақсаттағы объектілердегі радиациялық апаттар, ядролық сынақтар салдарынан мүгедектігі белгіленген адамдарға, мүгедектігі ата-анасының бірінің радиациялық сәулеленуінен генетикалық жолмен берілген) – 45 АЕК (176 940 теңге) мөлшерінде.Өзге мемлекеттердің аумағындағы әскери қимылдардың ардагерлері (Ауғанстандағы әскери қимылдардың ардагерлерінен басқа) (тәжік-ауған секторында, Ирактағы халықаралық бітімгершілік операциясында тапсырмаларды орындаған әскери қызметшілер), Таулы Қарабақтағы ұлтаралық қақтығысты реттеуде) – 45 АЕК (176 940 теңге) .«Ардагерлер туралы» Қазақстан Республикасының Заңында көзделген өзге де тұлғаларға (тыл еңбеккерлері, қайтыс болған әскери қызметшілердің отбасылары, қайтыс болған Ұлы Отан соғысы ардагерінің жұбайы) – 15 АЕК (58 980 теңге) мөлшерінде.Ақпарат көзі : https://www.gov.kz/memleket/entities/astana/press/news/details/918518

Астанада 18-19 қаңтарда кезекті қалалық ауыл шаруашылығы жәрмеңкесі өтеді, деп хабарлайды елорда әкімдігінің ресми сайты.Жәрмеңкеде Қазақстанның түрлі өңірлерінен – Ақмола, Абай, Шығыс Қазақстан және Қызылорда облыстарынан жергілікті фермерлер мен өндірушілердің өнімдері тікелей ұсынылатын болады. Қала тұрғындары мен қонақтары көкөністер мен жемістерді, ет, ұн, сүт өнімдерін, кондитерлік өнімдерді, табиғи шырындарды және т.б. сатып ала алады.Іс-шара Нұрғиса Тілендиев даңғылы, 12а мекенжайы бойынша «Koktal» сауда-ойын-сауық орталығында өтеді.Жәрмеңке әр демалыс күндері сағат 10:00-ден 22:00-ге дейін жұмыс істейді.Ақпарат көзі : https://www.gov.kz/memleket/entities/astana/press/news/details/918542

Қарқынды дамып келе жатқан елордалық кәсіпорын «Астана-Теплотранзит» АҚ заманауи технологиялармен, механизмдермен және жабдықтармен қайта жарақтандыруды, сонымен қатар барлық мамандық бойынша инженерлік-техникалық қызметкерлерді оқытып, аттестациялайды. Бүгінде мұнда 700-ден астам қызметкер жұмыс істейді. Олардың бірі экскаваторшы Ислам Кажатов өз жұмысы туралы тоқталып, «Жұмысшы мамандықтары жылы» туралы ойымен бөлісті, деп хабарлайды Астана әкімдігінің ресми сайты.Жас мамандардың бірі Ислам Қажатов 2,5 жылдан бері экскаваторшы болып еңбек етіп келеді.«Біздің басты міндетіміз – қала тұрғындарының, әсіресе балалар мен қарттардың қыста тоңбауын қамтамасыз етіп, әрбір үйге жылу беру. Жылыту маусымы аяқталғаннан кейін біз келесі маусымға дайындықты бастаймыз. Яғни, жоспарлы жөндеу жүргізіп, инвестициялық бағдарлама бойынша іс-шаралар өткіземіз. Біздің реттеушілер құбырларды ауыстыру қажет жерлерді тексереді және сол учаскелерде ақауларды жою жұмысы жүргізіледі. Апаттық жағдайдағы үзілістер мен кемшін тұстарын жоюмен де айналысамыз», — деді Ислам Қажатов.Айтуынша, үлкен техника оны бала кезінен қызықтырып келген.«Кішкентай кезімнен әкеммен бірге әртүрлі көлікке отырдым, содан бері үлкен техникаға деген қызығушылығым арта бастады. Есейген сайын көліктерге көбірек назарым ауып, оны жүргізуді үйрендім. Жас ұлғайған сайын тәжірибе келеді, мамандыққа деген қызығушылық артады», - деп атап өтті астаналық.Қасым-Жомарт Тоқаев Қазақстан халқына арнаған Жолдауында еліміздің кадрлық әлеуетін арттырудың маңыздылығына тоқталып, 2025 жылды Жұмысшы мамандықтары жылы деп жариялады. Ислам Кажатов бұл бастаманың өзектілігі туралы пікірімен бөлісті.«Мен өскелең ұрпаққа техникалық білімді таңдап, арнайы техниканы басқаруды үйрену туралы кеңес бергім келеді. Бұл – қаланың өмірлік маңызды функцияларын үздіксіз қамтамасыз ету үшін маңызды жұмыс орындары. Оның үстіне, олар ылғи да өзекті болып қала береді. Уақыт өтіп, жұмыс күшінің қатары толығуды қажет етеді. Сондықтан бүгінгі ұрпақтың бізден қалыспай, сұранысқа ие мамандықтарды меңгеруі маңызды», - деп баса айтты.Ақпарат көзі : https://www.gov.kz/memleket/entities/astana/press/news/details/918551

1) Айтыңызшы, БЖЗҚ-дан берілетін төлемдер бойынша 2025 жылы өзгерістер бола ма? Еңбек сіңірген демалысқа 2025 жылға дейін шыққан зейнеткерлерге БЖЗҚ-дан төленетін зейнетақы төлемдерінің мөлшері 1 қаңтардан бастап 5% ұлғаяды. Естеріңізге сала кетейік, БЖЗҚ-дан берілетін төлемдер Қазақстан Республикасы Үкіметінің 2023 жылғы 30 маусымдағы қаулысымен бекітілген Зейнетақы төлемдерінің мөлшерін есептеу әдістемесіне сәйкес жүзеге асырылады. Әдістемеге сай, зейнетке шығатын азаматтарға ай сайын берілетін төлем былай есептеледі: төлем ала бастайтын алғашқы жылы зейнетақы жинақтарының сомасы зейнетақы жинақтарының 6,5% төлем мөлшерлемесіне көбейтіліп, 12-ге бөлінеді. Одан кейінгі жылдары ай сайынғы төлем зейнетақы төлемдерін индекстеудің 5% мөлшерлемесіне ұлғайып отырады. Бұл ретте БЖЗҚ-дан берілетін ай сайынғы төлем республикалық бюджет туралы заңда тиісті қаржы жылына белгіленген ең төменгі күнкөріс деңгейінің (бұдан әрі - КД) кемінде 70% мөлшерінде жүзеге асырылады (2025 жылғы ең төменгі күнкөріс деңгейі - 46 228 теңге). Мерзімсіз уақытқа белгіленген 1 немесе 2 топтағы мүгедектігі бар адамдар, сондай-ақ зиянды және қауіпті өндірістерде жұмыс істеп, зейнет жасына толған, олардың пайдасына жиынтығында кем дегенде алпыс ай міндетті кәсіптік зейнетақы жарналары төленген адамдар сияқты белгілі бір санаттағы алушылар үшін Әдістемеде ай сайынғы зейнетақы төлемінің мөлшерін арттыратын түзету коэффициенттері көзделген. Жоғарыда көрсетілген шарттардың біреуінен артығын қанағаттандыратын адамдар үшін ең үлкен мәнге ие түзету коэффициенті қолданылады. БЖЗҚ-дан берілетін зейнетақы төлемдері жеке зейнетақы шотындағы зейнетақы жинақтары таусылғанға дейін жүзеге асырылады. 2) Жұмыс берушінің міндетті зейнетақы жарнасының 2025 жылға арналған мөлшерлемесі қандай? 2025 жылғы 1 қаңтардан бастап Қазақстанда жұмыс берушінің міндетті зейнетақы жарнасының (ЖМЗЖ) мөлшері ұлғайды. Қазір ол - 2,5%. Естеріңізге сала кетейік, 2024 жылдың 1 қаңтарынан бастап Қазақстанның жинақтаушы жүйесі жаңа құрамдауыш – жұмыс берушінің міндетті зейнетақы жарнасымен (ЖМЗЖ) толықтырылды. Қолданысқа енгізілген өзгерістерге сай, әрбір жұмыс беруші қызметкерлердің кірістерінен төленетін 10% міндетті зейнетақы жарналарынан (МЗЖ) бөлек, өз қаражаты есебінен 1975 жылғы 01 қаңтардан бастап туған қызметкерлерінің пайдасына қосымша жарна төлеуге міндеттелді. Жыл сайын ЖМЗЖ мөлшері кезең-кезеңімен өсіп отырады (2024 жылы 1,5%, 2025 жылы 2,5%, 2026 жылы 3,5%, 2027 жылы 4,5%) және 2028 жылы 5% жетеді. ЖМЗЖ есептелетін сома тиісті күнтізбелік жылға белгіленген ең төменгі жалақыдан (ЕТЖ) кем болмауы және оның 50-еселенген мөлшерінен аспауы тиіс. Жұмыс берушілер зейнет жасындағы, 1-ші және 2-ші топтағы мерзімсіз мүгедектігі бар, әскери қызметшілер мен оларға теңестірілген адамдар, сондай-ақ 1975 жылдың 1 қаңтарына дейін туған адамдардың пайдасына ЖМЗЖ төлеуден босатылды. 3) Жұмыс берушінің міндетті зейнетақы жарналары мұраға беріле ме? Жұмыс берушінің міндетті зейнетақы жарналары бірінші төлем түскен кезде автоматты түрде ашылатын және жұмыскерлердің меншігі болып табылмайтын шартты жинақтаушы шоттарға аударылады. Тиісінше, оларды мұраға қалдыруға болмайды. Жүйеден шыққан (ҚР азаматтығынан айырылған немесе қайтыс болған) адамдар үшін төленген жарналар қалған қатысушылар арасында бөлініп, өмір бойы төленетін болады. 4) Тұрғын үй жағдайларын жақсарту және/немесе емделу ақысын төлеуге арналған біржолғы зейнетақы төлемдерін алуға болатын қолжетімді соманы қалай тексеруге болады? Міндетті зейнетақы жарналары есебінен біржолғы зейнетақы төлемдерін (БЗТ) жүзеге асыру, сондай-ақ инвестициялық портфельді басқарушыға міндетті зейнетақы жарналары (МЗЖ), міндетті кәсіптік зейнетақы жарналары (МКЗЖ), ерікті зейнетақы жарналары (ЕЗЖ) есебінен сенімгерлік басқаруға беруге болатын зейнетақы жинақтарының қолжетімді сомасы туралы ақпаратты мынадай тәсілдермен алуға болады:БЖЗҚ сайтындағы жеке кабинетте;БЖЗҚ ұялы қосымшасындағы жеке кабинетте;kz веб-порталы мен eGov mobile ұялы қосымшасында.Қадамдық нұсқаулық enpf.kz сайтында орналастырылған. 5) Салымшы өзінің зейнетақы жинағының жай-күйін қалай қадағалай алады?БЖЗҚ-да шот ашқан кезде шоттардың жай-күйі туралы ақпарат алу тәсілі болып, әдетте, enpf.kz сайтындағы немесе БЖЗҚ/ЕНПФ ұялы қосымшасындағы жеке кабинет арқылы алу әдісі айқындалады. Бұл мүмкіндік шоттары бұрын ашылған тұлғаларға да берілген. Алғаш рет жүгінген кезде қарапайым тіркелу рәсімінен өту жеткілікті.Сондай-ақ, салымшылар шоттардың жай-күйі туралы ақпаратты egov.kz электрондық үкімет порталы арқылы ала алады.Егер салымшылар (алушылар) бұрын ақпарат алудың "электрондық пошта арқылы" немесе "пошта байланысы қызметтері арқылы" тәсілдерін таңдаған болса, онда бұл тәсілдер шот иелері оларды өз бетінше (жеке кабинет немесе БЖЗҚ кеңсесі арқылы) өзгертпейінше әрекет ететін болады. Бұл ретте Сіз өз шоттарыңыздың жай-күйі туралы ақпаратты БЖЗҚ ақпараттық жүйесінде өзекті электрондық мекенжайыңыз немесе тұрғылықты мекенжайыңыз көрсетілген жағдайда ғана аласыз.Заңнамаға сәйкес, электрондық немесе тұрғылықты мекенжайыңыз өзгерген жағдайда, бұл туралы БЖЗҚ-ға 10 күнтізбелік күн ішінде хабарлау қажет. Жаңа электрондық немесе тұрғылықты мекенжайыңыз туралы хабарламаған жағдайда, бұрынғы мекенжайыңыз бойынша жіберілген хабарлама (үзінді көшірмесі бар конверт) БЖЗҚ-ға қайтарылады және болашақта Қор салымшы (алушы) жаңа мекенжайы туралы хабардар еткен сәтке дейін ақпарат беруді (жеткізуді) жүзеге асырмайды.Электрондық мекенжайыңызды немесе тұрғылықты мекенжайыңызды қоса алғанда, өз деректемелеріңізді БЖЗҚ сайтындағы немесе ұялы қосымшасындағы жеке кабинетте де өзектендіруге болады.Ақпарат көзі : https://www.gov.kz/memleket/entities/abay/press/news/details/917864

Абай облысының әкімі Нұрлан Ұранхаев Семейдегі Әміре Қашаубаев атындағы мемлекеттік филармонияға барып, өнер ұжымының бүгінгі тыныс-тіршілігімен танысты. 80 жылдық тарихы бар филармония 2020 жылдан бері бұрынғы «Еңлік-Кебек» кинотеатрының ғимаратында орналасқан. Алайда, кинотеатрды 2019 жылға дейін сенімгерлік басқаруға алған серіктестік ешқандай жөндеу жүргізбеген.Филармония өз қарамағына алысымен ғимараттың шатыры, кіші залы, су желісіне ағымдағы жөндеу жүргізген. Сонымен қатар ұзақ жылдар бойы шешімін таппаған жылу жүйесі іске қосылды. Ғимаратта 259 адамға арналған үлкен, 180 адамға арналған кіші зал бар.Ғимараттың іші-сыртын аралаған аймақ басшысы филармония директорының өтінішін тыңдады. Филармония директоры өнер ұжымының әртістеріне жеке дайындық залы керектігін айтты.«Бұл қаламыздағы өзіндік архитектуралық үлгісі бар тарихи ғимараттардың бірі. Біз оның негізгі қалпын сақтай отырып, көптің көңілінен шығатындай жаңғырту жұмысын жүргізгеніміз дұрыс. Сонымен қатар, ауласын абаттандыруды да ұмытпағанымыз жөн. Ал, мекеме ауласына қосымша жаңа ғимарат салу мәселесін жан-жақты ойластырып, шешуіміз қажет», -деді облыс әкімі.Аймақ басшысы осы мәселелер бойынша жауапты тұлғаларға нақты тапсырмалар жүктеді.Ақпарат көзі : https://www.gov.kz/memleket/entities/abay/press/news/details/918337

Семей қаласының халықаралық әуежайы жолаушыларға ыңғайлы және қауіпсіз қызмет көрсету мүмкіндіктерін кеңейтуде. Мүмкіндігі шектеулі азаматтардың кедергісіз қатынауы үшін амбулаториялық лифт сатып алынды.«Амбулаториялық лифт жай ғана құрал емес, кешенді техника. Мұндай техника еліміздің басқа қалаларында қолданыста бар. Бірақ олар шетелде шығарылған. Ал, біздегі амбу-лифт отандық өнім. «STAHLBAU» ЖШС құрастырған техника облыстық әкімдіктің қолдауымен сатып алынды. Бүгін алғаш рет «Алматы-Семей» бағытындағы жолаушылар үшін сынақтан өткізіп көрдік. Енді күнделікті жұмыс істейтін болады», - дейді әуежай директоры Ғазизбек Саматов.Амбулаториялық лифт – мүмкіндігі шектеулі азаматтарды әуе кемесінің бортына отырғызуға және түсіруге арналған. ҚР заңнамасының талаптары және халықаралық стандарт бойынша барлық әуежайларда міндетті түрде осындай мамандандырылған арнайы техника болуы тиіс.Өткен жылдың соңында әуежай облыс әкімдігінің қолдауымен 110 адамды тасымалдауға арналған заманауи автобусқа қол жеткізген болатын.Ақпарат көзі : https://www.gov.kz/memleket/entities/abay/press/news/details/918340

Су ресурстары және ирригация министрлігі 2024 жылы еліміздің су шаруашылығы нысандарын дамыту бойынша 137 жобаны іске асыруды бастады. Сондай-ақ, 201 жоба бойынша жобалау-сметалық құжаттама әзірленіп жатыр.Атап айтқанда, 700 мың гектардан астам суармалы жерді қалпына келтіру және жақсарту, сондай-ақ жалпы ұзындығы 7000 шақырым канал салу және реконструкциялау жұмысы жүргізілуде.«Бұл жұмыстар Су ресурстарын басқару жүйесін дамытудың 2024-2030 жылдарға арналған тұжырымдамасына және Су саласын дамытудың 2024-2028 жылдарға арналған кешенді жоспарына сай жүргізілуде. Бұдан бөлек, аталған құжаттарда өнімсіз шығындарды азайту және қосымша су көлемін жинау бойынша да көптеген іс-шаралар қарастырылған. Мысалы, 2024 жылы Ақтөбе су қоймасын реконструкциялау жұмыстары аяқталды. Түркістан облысындағы Бәйдібек-ата және Қарақуыс су қоймаларының құрылысы, сондай-ақ Қапшағай және Киров су қоймаларын реконструкциялау басталды»,- деді ҚР Су ресурстары және ирригация министрлігі Су ресурстарын реттеу, қорғау және пайдалану комитеті төрағасының орынбасары Гүлмира Имашева.Ақпарат көзі : https://www.gov.kz/memleket/entities/water/press/news/details/918080

Батыс Қазақстан облысының жер ресурстарын басқару департаменті ҚР АШМ ЖҚҚК тексеру барысында ауданы 2,8895 га жер учаскесінің пайдаланылмағаны анықталды. Бұл учаске Орал қаласында орналасып, акционерлік қоғамға ғимарат салу үшін бөлінген болатын.Тексеру нәтижесінде жер пайдаланушыға бір жыл ішінде бұзушылықтарды жою туралы нұсқама берілді. Алайда, нұсқамада көрсетілген талаптар орындалған жоқ.Департамент тарапынан ӘҚБтК 462-бабының 3-тармағына сәйкес әкімшілік құқық бұзушылық туралы хаттама толтырылды. Сот шешімімен жер пайдаланушыға айыппұл салынып, учаске мемлекеттік меншікке қайтарылды.Ақпарат көзі : https://www.gov.kz/memleket/entities/moa/press/news/details/918577

Атырау облысындағы Бақсай каналында балық шабақтарының жиналу фактісі анықталды.2025 жылғы 15 қаңтар сағат 19:00-дегі жағдай бойынша 1,8 млн-нан астам шабақ құтқарылды. Тірі шабақтар аталған каналдан 55 шақырым жерде орналасқан Жайық өзеніне жіберілуде. Құтқару жұмыстарына 60 адам қатысуда, олардың қатарында әкімдік өкілдері, әскери қызметшілер, еріктілер және балық шаруашылығы субъектілері бар. Сондай-ақ, 12 бірлік техника жұмылдырылған.Құтқару кезінде балықтардың мұзданудың салдарынан суда еріген оттегінің төмен болуына байланысты жартылай әлсіреген күйде болғаны анықталды. Жайық өзеніне жіберілгеннен кейін балықтардың қалпына келуі және белсенділігі байқалады.Сонымен қатар, өлген шабақтарды жинау жұмыстары қатар жүргізілуде.Жағдай ерекше бақылауға алынды.Ақпарат көзі : https://www.gov.kz/memleket/entities/moa/press/news/details/918611

«Қазақстан темір жолы» ҰК» АҚ-ның еңбек ұжымы елорда көшелерін қардан тазалау жұмысына жұмылдырылған коммуналдық қызметкерлерге ыстық шай мен бауырсақ таратты., деп хабарлайды Астана қаласы әкімдігінің ресми сайты.Игі іс-шараға 20-ға жуық адам қатысты.«Президент Қасым-Жомарт Тоқаев осы жылды Жұмысшы мамандықтар жылы етіп жариялады. Осыған орай біз, яғни «Қазақстан темір жолы» ҰК» АҚ-ның қызметкерлері күн сайын кез келген ауа райында қалада жайлылық пен тәртіпті қамтамасыз етіп жүрген жандарға алғысымызды білдірдік. Игі іс-шараға 20-ға жуық адам қатысты. Осылайша 60-70 адамға ыстық шай мен бауырсақ тараттық. Жалпы мұндай акцияларды біз жиі ұйымдастырып тұрамыз», - деді «Қазақстан темір жолы» ҰК» АҚ Астана қаласы бойынша тасымалдауды басқарудың автоматтандырылған орталығының бағыттар бойынша аға диспетчері Санат Жүрсін.Ал өз кезегінде елордалық коммуналдық қызметкерлер ұйымдастырушыларға алғыс білдірді.«Уақыт тауып, осындай игі іс-шараны өткізген ұйымдастырушыларға рақмет. Қолға алған әрбір істеріңізге береке тілеймін. Халқымыз әрдайым ауызбіршілікте, татулықта болсын. Еліміз өсіп-өркендей берсін», - деді коммуналдық қызметкерлер. Ақпарат көзі : https://www.gov.kz/memleket/entities/astana/press/news/details/917177

Біржан сал ауданының Бұланды ауылындағы мектеп оқушылары үшінші тоқсаннан бастап жаңа мектепте оқуды бастады. Бүгін Бұланды мектебінің 80 орындық жаңа ғимаратына 56 оқушы мен мектеп ұжымы қадам басты. Жаңа мектеп заманауи стильде салынған және барлық қажетті заманауи жабдықтармен қамтамасыз етілген. Мұнда балалардың сапалы білім алуына барлық жағдай жасалған. Әр кабинетке интерактивті тақталар орнатылған. Сондай-ақ ерекше білім беру қажеттіліктері бар балалар үшін инклюзия кабинеті бар. «Мектеп ғимараты жарық әрі кең. Мұнда білім алатын оқушылар заманауи талаптарға сай жақсы, терең білім алады деп сенеміз», – деп атап өтті ата-аналар. Айта кетейік, Бұланды ауылының мектебі 2019 жылы апатты деп танылып, 2021 жылы жаңа ғимараттың құрылысы басталған. Құрылыс кезеңінде мектеп оқушылары орман шаруашылығы ғимаратында оқыған.Ақпарат көзі : https://www.gov.kz/memleket/entities/aqmola/press/news/details/917762

  Төтенше жағдайлар министрлігі 2025 жылғы су тасқыны кезеңіне белсенді дайындықты жалғастыруда. Су тасқынына қарсы іс-шараларды іске асыру бойынша жергілікті атқарушы органдарды үйлестіру жүзеге асырылады.   Бүгінгі күні өңірлерде 2025 жылғы су тасқыны қаупін барынша азайту республикалық және өңірлік бағдарламалық құжаттармен (әлеуметтік-экономикалық дамудың кешенді жоспарлары және Өңірлерді дамыту жоспарлары, су тасқыны кезеңіне дайындық жөніндегі инженерлік жұмыстардың өңірлік жоспарлары) іске асырылуда.   Бұдан басқа 2024 жылғы су тасқыны кезеңі аяқталғаннан кейін жергілікті атқарушы органдар ТЖМ аумақтық бөлімшелерімен бірлесіп су тасқыны қаупі бар елді мекендер мен учаскелердің тізбесіне түзету және нақтылау жүргізді, 2024 жылдың қорытындысы бойынша олардың саны 1 223 құрады.   Шығыс Қазақстанда су тасқынының алдын алу мақсатында жазғы-күзгі кезеңде қалалар мен аудандардың су тасқынына қарсы жұмыс жоспарлары бойынша 33 іс-шара, инженерлік жұмыстар жоспары бойынша 55 іс-шара толық көлемде орындалды, сондай-ақ облыстың автомобиль жолдарында алдын алу іс-шаралары жүргізілді, іс-шаралар барысында зардап шеккен учаскелер қалпына келтірілді, су өткізу құбырлары (құрылыстары) ауыстырылды. Жағалауды нығайтатын бөгеттердің, қорғандардың сыни белгілерінен жоғары көтерілуіне ерекше назар аударылды, бұл елді мекендерді су басу қаупін барынша азайтуға және су көлемін алдыңғы жылдарда байқалғаннан артық қабылдауға мүмкіндік береді. Жағалауды нығайту бойынша жүргізілген жұмыстардың көлемі 64 км, бөгеттерді, үйінділерді, біліктерді жөндеу (салу) – 36 км құрады, 19 км өзендерің арнасы тазартылды. Бұдан басқа 58 км арықтар, каналдар салу, 3 көпірлерді жөндеу, 45 су өткізгіш құбырларды (құрылыстарды) ауыстыру, 283 км арықтар мен каналдарды тазарту бойынша жұмыстар жүргізілді.   Жол картасы, инженерлік жұмыстар , су тасқынына қарсы іс-шаралар жоспарлары бойынша су тасқынына қарсы іс-шараларды орындау тасқын сулардың зиянды әсерінің мөлшерін едәуір азайтуға мүмкіндік береді: ол елді мекендерді су тасқынынан қорғау, материалдық залалды азайту, халық арасында зардап шегушілердің  алдын алу. Сонымен қатар  таулы өзендерге мұздың қатуы кезеңінде екі рет әуеден барлау жүргізілді. Өңірде болжау элементтері бар гидропосттар бойынша бастапқы деректерді, сондай-ақ су тасқынына қарсы жүргізілетін жұмыстар бойынша ақпаратты көрсете отырып, облыстың цифрлық картасын әзірлеу бойынша жұмыс жүргізілуде.   Әкімдіктерде құм салынған қаптар, инертті және жанар-жағармай материалдарының резерві жасалуда. Қазіргі уақытта жергілікті атқарушы органдармен 83 мыңнан астам текше метр қар шығарылды.   Батыста су тасқынына қарсы іс-шаралар жалғасуда. Орал қаласы аумағындағы қауіпті учаскелер бақылауда. Облыс әкімінің  орынбасары Бақытжан Нарымбетов, қала әкімі Мұрат Байменов және қалалық төтенше жағдайлар басқармасы бастығының уақытша міндетін атқарушы Олжас Абдрахман қауіпті учаскелерді, яғни, «Венера», «Речник», «Ягодка» бау-бақша серіктестіктері, Дерқұл, Коминтерн ауылдарын аралап шықты.   Бүгінгі күні су басу қаупі бар бірқатар елді мекендер аумағын қорғау үшін топырақпен бекіту, каналдар қазу, су өткізу құрылыстарын орнату, су бұру арықтарын салу, еріген қар суы жиналатын арналарды тазарту жұмыстары жүргізілуде. Атқарылып жатқан жұмыстарға баса назар аударылып, мердігерлерге нақты тапсырмалар беріліп, уақытында орындалуы талап етілді.   Павлодар облысында көктемгі су тасқынының ықтимал салдарын жоюға бағытталған іс-шаралар кешені белсенді түрде жүргізілуде. Бекітілген инженерлік жұмыс жоспарын іске асыру шеңберінде 47 іс-шара дайындалды, оның 21-і орындалып, аяқталды. Жер үйінділерін нығайту және бұру арналары жүйесін құру ағымдағы жұмыстардың негізгі екпіні болып табылады, бұл аумақтардың су тасқыны қатерлеріне төзімділігін едәуір арттыруға мүмкіндік береді. Бұл жұмыс әртүрлі мемлекеттік құрылымдар арасындағы өзара іс-қимылдың арқасында жүзеге асырылады.   Мәселен Ақсу қаласында шағын аудандарды оңтүстік-шығыс жағынан қорғайтын жер үйіндісінің құрылысы аяқталды. Маңызды нысан – «Атамекен-Ақсу-Көктөбе-Үлкен Ақжар-Курчатов» автожолындағы жасанды үйінді, ол көлік жолдарын сенімді қорғауды қамтамасыз етеді. Жол шеттерін тереңдету және су өткізу құбырларын орнатуды қоса алғанда, қосымша жұмыстар Көктөбе-Кеңтүбек ауданында және басқа да аудандарда жүзеге асырылуда.   Жалпы су тасқыны кезеңіне дайындық бойынша іс-шаралар жалғасуда және тұрақты бақылауда.              Ақпарат көзі : https://www.gov.kz/memleket/entities/emer/press/news/details/916843

Қазақстан Республикасының Президенті Әкімшілігімен келісім бойынша Ақмола облысы әкімінің бұйрығымен Досұлан Айтбаев Ақмола облысы әкімінің орынбасары болып тағайындалды.Досұлан Ерланұлы Айтбаев Л.Н. Гумилев атындағы Еуразия ұлттық университетін, А. Байтұрсынов атындағы Қостанай мемлекеттік университетін бітірген. Саясаттану магистрі. Мемлекеттік қызметте 17 жылдық еңбек өтілі бар.Еңбек жолын 2008 жылы Қостанай облысы Жангелдин ауданы әкімі аппаратының бас маманы ретінде бастаған.Қостанай облысы әкімі аппараты мен Қазақстан Республикасы Мәдениет және ақпарат министрлігінде, Білім және ғылым министрлігінде, Қазақстан Республикасы Президенті Әкімшілігінде түрлі жауапты қызметтер атқарған.Тағайындалғанға дейін Ақмола облысы әкімі аппаратының басшысы лауазымында болды.Ақпарат көзі : https://www.gov.kz/memleket/entities/aqmola/press/news/details/918016

Ақмола облысының Жарқайың ауданындағы «Жастар» шағын ауданында 80 пәтерлі тұрғын үйдің кілттерін салтанатты түрде табыстау рәсімі өтті. Қайта жөндеуден өткен бұл тұрғын үй әлеуметтік жағынан осал топтарға арналған, олардың тұрғын үй жағдайы Мемлекет басшысының тұрғын үй мәселелерін шешуге бағытталған әлеуметтік бастамалары аясында жақсартылды.Іс-шараға Ақмола облысы әкімінің бірінші орынбасары Елдос Рамазанов қатысып, өз сөзінде: «Бұл үй — тек қабырғалар ғана емес, көптеген отбасы үшін жаңа өмір бастамасы, олар мемлекеттік қолдаудың арқасында баспанаға ие болды», — деп атап өтті.Бақытты қоныстанушылардың қатарында 17 көпбалалы отбасы, 36 жалғызбасты ана, 16 жетім бала, 8 мүмкіндігі шектеулі жан, 2 зейнеткер және мүмкіндігі шектеулі баланы тәрбиелеп отырған бір отбасы бар.«Мемлекеттік қолдаудың арқасында біз енді жайлы жағдайларда өмір сүріп, балаларымыздың болашағын жоспарлай аламыз», — деп ризашылығын білдірді көпбалалы ана Сәрсек Гүлжанат.Осы жоба аясында басқа да азаматтар санатын қолжетімді және жайлы баспанамен қамтамасыз ету жұмыстары жалғасын табады, бұл өңір тұрғындарының өмір сапасын жақсартуға ықпал етеді.Ақпарат көзі : https://www.gov.kz/memleket/entities/aqmola/press/news/details/918332

Облыс әкімінің төрағалығымен өткен аппараттық жиында электрондық сауда нарығын дамыту мәселесі қаралды. Мәселені талқылау барысында Асхат Шахаров отандық өнімді әлемдік нарықта ілгерілету үшін қосымша табыс көзі ретінде электрондық сауданы пайдалану қажеттігін атап өтті.Кәсіпкерлік басқармасының басшысы Алмас Салықбаевтың айтуынша, облыста 36 мыңнан астам ШОБ субъектісі тіркелген. Оның ішінде 4726 кәсіпкерлік субъектісі интернет желісімен тапсырыс беру арқылы бөлшек саудамен айналысады.Кәсіпкерлер өз бизнестерін кеңейту үшін интернет-дүкендер мен әлеуметтік медиа сияқты әртүрлі платформаларды белсенді пайдаланады. Көптеген туристік агенттіктер мен қонақ үйлер өз қызметтерін онлайн платформалар арқылы да ұсынады. Тұрғындар қажетті тауарларға қолжетімді баға және маркетплейстер арқылы кең көлемде тапсырыс бере алады.Халық арасында ең танымал интернет-дүкендер мен маркетплейстер: Kaspi, Wildberries, Ozon және тағы да басқалары.Ұлттық статистика бюросының мәліметінше, 2023 жылы бөлшек сауданың жалпы көлеміндегі электрондық коммерцияның (маркетплейстерді қоса алғанда) үлесі 12,7% құрады. Ақтөбе облысында электрондық коммерция көлемі 2023 жылдың қорытындысы бойынша 7,9 млрд теңгеге жетті (Қазақстан бойынша 6-орын). Болжам бойынша, 2024 жылы бұл көрсеткіш 9,0 млрд теңгені құраған.ҚР Сауда және интеграция министрлігі «Атамекен» ҰКП-мен бірлесіп, отандық маркетплейстердің ұсыныстарын ескере отырып, электрондық коммерция кәсіпкерлерін оқыту курстарын іске қосты. Былтырғы жылы 9 оқыту семинары өткізілді, оның 7 онлайн-форматта.«Қазпошта» АҚ АОФ директоры Динара Хасанғалиева атап өткендей, «Қазпошта» Қазақстанның барлық аумағында тауарларға халықтың қолжетімділігін қамтамасыз ете отырып, инфрақұрылымдық алаң ретінде электрондық сауданы дамытуға ықпал етеді.«Біз компанияның экожүйесін дамытып жатырмыз, Keden, Keruen қызметтері іскерлік серіктестікті дамытудың негізгі қызметтерінің біріне айналды. Бүгінде АҚШ, Германия, ҚХР, Оңтүстік Кореяның әлемдік электрондық алаңдарында тапсырыс берген клиенттер өз тауарларын Қазақстанда көрсетілген мекенжайға дейін ала алады. Qazpost Keruen сервисін жетілдіру және Ұлыбритания, Түркия және Біріккен Араб Әмірліктері сияқты елдерді қосу жоспарлануда», - деді Динара Хасанғалиева.Облыс әкімі сауда саласындағы процестерді цифрландыруды жеделдетуді және озық IT-шешімдерді енгізуді, отандық онлайн-дүкендерді дамытуға ерекше назар аударуды тапсырды. Ол үшін төлем жүйелерінің тұрақты жұмыс істеуін қамтамасыз ету, көлік-логистикалық инфрақұрылымды жетілдіру және курьерлік қызметтер жұмысының тиімділігін арттыру керек.Ақпарат көзі : https://www.gov.kz/memleket/entities/aktobe/press/news/details/917967