Ақмола облысында халықты тұрғын үймен қамтамасыз ету бойынша Мемлекет басшысының тапсырмасын жүзеге асыру жалғасуда. Өткен жылы облыстың 10 өңірінде 850 пәтер сатып алынды. Биыл 1000-нан астам жаңа пәтердің кілтін тапсыру жоспарлануда. Бұл бағдарлама бойынша тұрғын үйге қойылатын негізгі талаптар – жоғары сапа, жақсы жөндеу жұмыстары, сондай-ақ мектеп пен басқа да әлеуметтік нысандардың жақын орналасуы.Аудан әкімдігінің қаражаты есебінен сатып алынған жаңа пәтерлердің иегерлері әлеуметтік осал топқа жататын 16 отбасы болды. Көпбалалы отбасылар, жетім балалар және қиын өмірлік жағдайға тап болған азаматтар Балкашино кентінен баспана алды. Әрбір пәтер кең асүймен, жайлы жатын бөлмелермен және жылы атмосфера қалыптастыратын жоғары сапалы әрлеу материалдарымен жабдықталған.Пәтер кілттерін табыстау барысында Сандықтау ауданының әкімі Серік Құдабай қолайлы тұрғын үйдің болуы азаматтардың өмір сүру сапасын арттырудың басты көрсеткіштерінің бірі екенін атап өтті.«Мемлекет басшысы Қасым-Жомарт Тоқаевтың бастамасымен халықты тұрғын үймен қамтамасыз етуге бағытталған бағдарламалар жүзеге асырылуда. Бүгінде мемлекеттік саясат халықтың өмір сүру сапасын жақсартуға бағытталған. Бұл бастаманың әлеуметтік осал азаматтарға, жетім балалар мен көпбалалы отбасыларға – қолдауға аса мұқтаж жандарға көмек көрсетуге арналуы ерекше қуантады», — деп атап өтті аудан әкімі.Құрылыс компаниясы өкілдерінің айтуынша, таза әрлеуі бар 16 пәтерлі тұрғын үй жарты жыл ішінде салынған. Құрылыста қазақстандық өндірістің, соның ішінде Көкшетау кірпіш зауытының материалдары қолданылды.Александра Гречихина өз баспанасын бес жылдан астам уақыт күткен. Пәтер кілтін алу оның өміріндегі маңызды оқиға болды.«Бүгін мен және отбасым үшін қуанышты күн. Біз екі бөлмелі пәтер алдық. Ел Президентіне тұрғын үймен қамтамасыз ету мәселесін шешкені үшін алғысымды білдіремін. Енді біз өз үйімізде тұрамыз», — деп өз қуанышымен бөлісті А. Гречихина.Пәтер иелерінің бірі – көпбалалы ана Олеся Шаталова.«Менің отбасым үшін бұл – нағыз бақыт! Біз жаңа үйге көшу мүмкіндігін ұзақ күттік. Енді әрқайсымызға жеткілікті орын болады және өміріміз әлдеқайда жайлы болатынына сенімдіміз. Бізге қолдау көрсеткендердің барлығына алғыс айтамын», — деді көпбалалы ана.Айта кетейік, 16 пәтерлі бұл үй Сандықтау ауданында сатып алынған алғашқы тұрғын үй кешені болды.Ақпарат көзі : https://www.gov.kz/memleket/entities/aqmola/press/news/details/942665

Бүгін ауданда «Алтын жас» белсенді ұзақ өмір сүру орталығының ашылуы өтті. Жоба ауданның жас кәсіпкері Саят Кемпіровтің бастамасымен жүзеге асырылды. 2024 жылы ол «Тәуелсіздік ұрпақтары» облыстық байқауына қатысып, орталықты ашуға грант жеңіп алды.«Мемлекеттік қолдаудың арқасында мен осы белсенді ұзақ өмір сүру орталығын аштым. Мұнда аға буын өкілдері тек қарым-қатынас жасап қана қоймай, өз таланттарын ашып, шығармашылықпен айналысып, спортпен шұғылданып, жаңа нәрселерді үйрене алады», – деді орталықтың директоры Саят Кемпіров.Орталықта түрлі үйірмелер, дене белсенділігі сабақтары, шығармашылық шеберлік курстары және әлеуметтік кездесулер өткізіледі. Сондай-ақ зейнеткерлер үшін медициналық кеңестер бұрышы қарастырылған.«Біз осындай орталықтың ашылғанына өте қуаныштымыз. Мұнда біз қызықты істермен айналысып, денсаулығымызды нығайта аламыз. Біздің жасымызда бұл ерекше маңызды», – деп атап өтті Ардагерлер кеңесінің төрайымы Ұлболсын Ахметова.Белсенді ұзақ өмір сүру орталығы шамамен күніне 20 адам қабылдап, онда 2 маман жұмыс жасайтын болады.Ақпарат көзі : https://www.gov.kz/memleket/entities/aqmola/press/news/details/942799

Абай облысының әкімі Берік Уәли облыс басшысы ретіндегі алғашқы кездесуін ақсақалдар және зиялы қауым өкілдерімен өткізді. Емен-жарқын әңгіме барысында өңірдің бүгінгі хал-ахуалы мен келешегіне қатысты өзекті мәселелер талқыланды.«Үлкеннің батасын алғанның ісі оңалар» деген сөз бар. Өздеріңізбен кездесіп, ақыл-кеңестеріңізді, ұсыныс-тілектеріңізді тыңдап, жұмыс барысында қолданып, іске асыру ниетім бар. Сіздердің қолдауларыңызбен облысымызды дамыту үшін бар-күш жігерімді саламын. Тарихи әділеттік орнап, осыдан үш жыл бұрын Мемлекет басшысы Қасым-Жомарт Тоқаев облысымызды қайтадан ашты. Ел ерекше қуанды. Енді қуанышты әсерден арылып, нақты жұмыс істейтін кез келді. Өңірде шешімін күткен өзекті мәселелер көп. Алда облыс құрылғаннан бергі атқарылған жұмысты жалғастырып, Президенттің тапсырмаларын орындау міндеті тұр», — деді облыс әкімі.Аймақ басшысы Президент жүктеген экономиканы әртараптандыруға, инвестициялық ахуалды жақсартуға, туризмді дамытуға, өңірдегі тарихи және мәдени орындардың әлеуетін ашуға ден қойылып, ауыл шаруашылығы, көлік-логистика салаларына ерекше көңіл бөлінетінін атап өтті. Кездесуде сөз алған ақсақалдар мен зиялы қауым өкілдері ауыл-аймақтарды дамытуға, туризм, ауыл шаруашылығы, мәдениет салаларына назар аударылса деген тілектерін жеткізді.«Жасыратыны жоқ, экономиканы жақсартып, әлеуметтік мәселені шешу үшін жақсы байланыс, игі қарым-қатынас та керек. Бұл ретте Берік Уәлиұлының тәжірибесі мол. Орталықта да, басқа өңірлерде де жұмыс істеп, мемлекеттік қызметте әбден шыңдалды. Елге қызмет етуге келген азаматымыздың жанынан табылып, төңірегіне топтасып, елдің береке-бірлігін көрсетуіміз керек»,- деді Абай облысы қоғамдық кеңесінің төрағасы Мейрамхат Айнабеков.Облыс басшысы аймақты дамыту бірлескен жұмысты қажет ететінін айтты.«Туған жерде қызмет істеу – үлкен абырой ғана емес, зор жауапкершілік. Семей - қазақ руханиятының темірқазығы, Алаштың астанасы. Алаш арыстарының ізі қалған қасиетті жер. Ахмет Байтұрсыновтың «Біз басқадан кем болмас үшін білімді, бай һәм күшті болуымыз керек» деген сөзі бар. Алаш ардақтысының осы өсиетін басшылыққа алып, сіздермен бірлесіп, өңірімізді дамыта берейік», -деді облыс әкімі Берік Уәли.Кездесу соңында Абай облысының абыз ақсақалы Молдабек Жанболатов аймақ басшысына ізгі лебізін білдіріп, ақ батасын берді. Ақпарат көзі : https://www.gov.kz/memleket/entities/abay/press/news/details/942796

Абай облысының әкімі Берік Уәли облыс орталығындағы ірі жылу қазандықтары мен №1 жылу электр орталығына барып, жұмысымен танысты. Қаланың оң жағалауындағы «Ғаббасов» қазандығы 70 көпқабатты үй, 15 әлеуметтік, 155 коммерциялық нысан мен 23 бюджеттік мекемені жылумен қамтамасыз етеді. 2025 жылы «103-103а» және «Ғаббасов» қазандықтары арасындағы жылу желілерін жалғастырғыш салу, «Орталық» жылу қазандығында коллектор мен сорғыны ауыстыру жоспарланған.Қазіргі таңда Қарағайлы ықшам ауданында блокты модулды қазандықтың құрылысы жүргізілуде. Жоба жеке инвестордың қаржысына жүзеге асырылуда. Нысан іске қосылған кезде аудандағы 44 көпқабатты үй мен 1200 орындық мектеп және өзге де әлеуметтік нысандар жылумен қамтылады.Нысандарды аралау барысында облыс әкімінің орынбасары Димитрий Гариков аймақ басшысына қаладағы жылу орталықтарының жұмысы мен №3 ЖЭО құрылысы туралы баяндады. Берік Уәли жылуға жауапты басшыларға апатты жағдайға жол бермес үшін жылу жүйелерін үнемі бақылауда ұстап, тұрғындардың өтініштеріне дер кезінде ден қоюды тапсырды.2024-2025 жылдардағы күзгі-қысқы кезеңге дайындық аясында облыста 22 жоба ақталды. Осы жобалар шеңберінде 26,1 шақырым жылу желісі мен 17 жылу көздерінде жұмыс жүргізілді. Семейде 14,7 шақырым қайта жаңарту, 4,8 шақырым желі мен 10 жылу көздері ағымдағы жөндеуден өтті. Жұмыстың нәтижесінде облыстың жылу желілерінің тозуы 64,2%-дан 60,3%-ға дейін төмендеді. 2025 жылы 5 жоба бойынша республикалық бюджетке өтінім жолданды.Аймақ басшысы сол жағалауда салынып жатқан Оқушылар сарайының құрылыс жұмысымен де танысты. Ғимараттың жалпы аумағы – 2,1 га, ауданы – 9 800 шаршы метр.Бүгінгі таңда құрылыс жұмыстарының 80 пайыздан астамы аяқталған. Жобаға сәйкес Оқушылар сарайы ғылыми-техникалық, көркем-эстетикалық, спорттық-сауықтыру, гуманитарлық, психологиялық, тарихи-өлкетану сынды алты негізгі бағытқа бөлінген.«Бұл нысан біздің қала үшін маңызды. Мектеп оқушыларының бос уақытын тиімді өткізуге мүмкіндік береді. Сондықтан ғимарат құрылысын дер кезінде аяқтау қажет. Әкімдік тарапынан қажетті көмек көрсетіледі», - деді Берік Уәли.Ақпарат көзі : https://www.gov.kz/memleket/entities/abay/press/news/details/942801

Ауқымды шараға Астана, Алматы, Ақтөбе, Қызылорда, Павлодар, Өскемен және Семей қалаларынан келген еліміздің 23 жетекші жоғары оқу орны қатысып отыр.Көрменің басты мақсаты – мектеп бітіруші түлектерге жоғары білім беру мүмкіндіктері туралы кең ақпарат ұсыну, кәсіби бағдар беру және жетекші оқу орындарымен тікелей байланыс орнату.Абай облысы әкімдігі мен білім басқармасының қолдауымен өтіп жатқан көрме екі күнге созылады. Көрменің ұйымдастырушысы – Vipusknik.kz республикалық интернет-порталы.Көрменің ашылуында Абай облысы әкімінің орынбасары Жасұлан Сәрсебаев оқу орны өкілдеріне алғыс білдіріп, білім көрмесінің маңыздылығына тоқталды. Қатысушы жетекші жоғары оқу орнының өкілдеріне алғыс хаттар табыстады.«Бұл көрме – түлектерге өз болашағын дұрыс жоспарлауға, еліміздің үздік жоғары оқу орындарының мүмкіндіктерімен танысуға берілген бірегей мүмкіндік. Мұндай бастамалар аймақтағы білім сапасын арттыруға, талапкерлердің кәсіби бағдарын айқындауға зор үлес қосады», — деді Жасұлан Сәрсебаев.Көрме барысында талапкерлер университет өкілдерімен кездесіп, оқу бағдарламалары, мамандықтар және қабылдау шарттары туралы ақпарат алады. Сондай-ақ Семей қаласының 59 мектебінен 9 мыңға жуық оқушының қатысуы жоспарланған. Бұдан бөлек, облыстың 100 аудан мектебінің оқушыларына арналған Zoom конференциясы ұйымдастырылып, 10 500-ден астам түлектің қатысуына мүмкіндік беріледі.Ақпарат көзі : https://www.gov.kz/memleket/entities/abay/press/news/details/942804

2025 жылғы 20 ақпанында орталық атқарушы органдар басшыларының халықпен кездесулері аясында ҚР Ауыл шаруашылығы вице-министрі Аманғали Бердалин Қызылорда облысының тұрғындарымен, соның ішінде ауыл шаруашылығы тауар өндірушілерімен кездесу өткізеді.Күн тәртібінде – өңірдің агроөнеркәсіптік кешенін дамытуға қатысты қабылданған шаралар.Кездесу сағат 11.30-де Достық үйінде өтеді (Қызылорда қ., Ы.Жахаев к-сі, 24А). БАҚ өкілдерін кездесуге қатысуға шақырамыз.Толық ақпарат үшін телефон: ++7 775 837 8519 – Асия Нурпейсова.Өңірдің АӨК-ін дамыту бойынша сұрақтар мен ұсыныстарды kuantaev.e@minagri.gov.kz. электронды поштасына жіберулеріңізді сұраймыз.Ақпарат көзі : https://www.gov.kz/memleket/entities/moa/press/news/details/941676

20 ақпаннан бастап «ҚазАгроҚаржы» АҚ («Бәйтерек» ҰБХ» АҚ компаниялар тобына кіреді) Қазақстанның ауыл шаруашылығы секторын қолдауға бағытталған лизингтің үш жеңілдетілген бағдарламасы бойынша өтінімдер қабылдауды бастайды. Бөлінген қаражаттың жалпы сомасы жылдық 6% мөлшерлеме бойынша 10,5 млрд теңге.Қаржыландыру былайша бөлінбек:«Өз жемшөбіміз» 3 млрд теңге;«Қазақстанда жасалған» 5 млрд теңге;«6%-бен жеңілдетілген лизинг» 2,5 млрд теңге .«Қазақстанда жасалған» бағдарламасы бойынша аграрлықтар аспалы, тіркемелі және өздігінен жүретін а/ш техникасын, сондай-ақ отандық өндірілген және құрастырылған көлік құралдарын жылдық 6% мөлшерлеме бойынша 10 жылға дейінгі мерзімге сатып алады. Аванс мөлшері лизинг нысанасының 15%-нан басталады.«Өз жемшөбіміз» бағдарламасы қазақстандық және шетелдік өндірістің жемшөп дайындайтын техникасы мен мобилді суару жүйесін қаржыландыруға бағытталған. Мұндағы мөлшерлеме де жылдық 6%-ды құрайды, мерзімі – 10 жылға дейін, аванс – кемінде 15%.«Жеңілдетілген лизинг» бағдарламасы фермерлерге отандық өндірілген/құрастырылған өздігінен жүретін а/ш техникасын жеңілдетілген шарттармен аванссыз 10 жылға дейінгі мерзімге 6% мөлшерлемемен сатып алуға мүмкіндік береді.«Лизингтің жеңілдетілген бағдарламалары біздің клиенттер арасында үлкен сұранысқа ие. Сондықтан, бос ақша қаражаты пайда болған сәтте, біз оларды лизингтің осы үш бағдарламасына бағыттауды шештік. Олар - «Қазақстанда жасалған», «Өз жемшөбіміз» және «Жеңілдетілген лизинг». Оған қоса, қазір алдағы егіс маусымына дайындалатын уақыттың дер кезі», - деп атап өтті «ҚазАгроҚаржы» АҚ басқарма төрағасының орынбасары Еркебұлан Жұмжаев.Өтінімдер қабылдау 20 ақпанда сағат 15.00-де Telegram-боттағы https://t.me/kaz_agro_finance_bot сілтемесінде басталады. Өтінім берген соң клиент 5 жұмыс күні ішінде «ҚазАгроҚаржы» АҚ филиалына құжаттардың толық пакетін ұсынуы тиіс.Бағдарлама шарттары бойынша қосымша ақпарат, сондай-ақ филиалдардың байланыс ақпараттары www.kaf.kz сайтында көрсетілген.Ақпарат көзі : https://www.gov.kz/memleket/entities/moa/press/news/details/942129

ҚР Ауыл шаруашылығы вице-министрі Азат Сұлтанов бастаған қазақстандық делегация Gulfood 2025 көрмесіне қатысуда.Делегация мүшелері Таяу Шығыс және Солтүстік Африка елдерінен өсімдік өнімдерін әлеуетті сатып алушылармен бірқатар кездесулер өткізді, сондай-ақ дистрибьюторлармен, бөлшек саудагерлермен және трейдерлермен келіссөздер жүргізді.Серіктестер тарапынан жоғары қызығушылық жеткізушілерді әртараптандыруға деген ұмтылысымен және Қазақстан өнімдерінің сапасымен, олардың жақсарту үшін үлкен әлеуеті бар екенімен түсіндіріледі.Айта кетейік, нарықтарды кеңейту мәселесі ҚР Ауыл шаруашылығы министрлігі үшін басым мәселелердің бірі болып қала береді. Мемлекет басшысының дәстүрлі өткізу нарықтарын сақтау, экспортты әртараптандыру және әртүрлі елдердің талаптарына бейімделген жеткізудің икемді схемаларын құру жөніндегі тапсырмасы шеңберінде барлық қажетті шаралар қабылдануда.Gulfood 129 елден 5,5 мыңнан астам компания және әлемнің 185 елінен 130 мыңнан астам келушілер қатысатын маңызды халықаралық платформа болып табылады. Олардың қатарында Таяу Шығыс, Солтүстік Африка, бірқатар Азия елдері мен Еуропаның өндірушілері мен сатып алушылары бар.2026 жылы қазақстандық өндірушілер 26-30 қаңтар аралығында екі алаңда: Дубайдың Дүниежүзілік сауда орталығында (DWTC) және Expo City-дегі Дубайдың жаңа Көрме орталығында (DEC) өтетін Gulfood көрмесіне қатысады.Ақпарат көзі : https://www.gov.kz/memleket/entities/moa/press/news/details/942275

Қазақстан Республикасының Ауыл шаруашылығы министрлігі сирек кездесетін және жойылып кету қаупі төнген балық түрлері мен басқа да су жануарларының шектеулі санын алуды көздейтін Үкімет қаулысының жобасын әзірледі.Жобаға сәйкес каспий итбалығы, арал пілмайы, арал қаязы, сылан және каспий албыртын алу жатады. Бұл шара ғылыми зерттеулер жүргізуге және өсімін молайту іс-шараларына бағытталған.Қаулы жобасы ғылыми ұсыныстарды ескере отырып әзірленді. Министрлік балықтарды алу қатаң шектеулі мөлшерде және уәкілетті органның бақылауымен жүзеге асырылатынын атап көрсетеді.Қабылданған шаралар осы түрлердің таралымдарының жай-күйін зерттеуге және оларды сақтау мен қалпына келтіру бағдарламаларын әзірлеуге көмектеседі деп болжануда.Ақпарат көзі : https://www.gov.kz/memleket/entities/moa/press/news/details/942466

Қазақстан Республикасының Парламентінің Сенаты Қазақстан мен Түркия үкіметтері арасындағы карантин және өсімдіктерді қорғау саласындағы ынтымақтастық туралы келісімді ратификациялады.Фитосанитарлық қауіпсіздікті қамтамасыз ету және карантиндік зиянды организмдердің әкелінуінің алдын алу мақсатында жасалған бұл құжат өсімдіктер карантині бойынша ғылыми ұйымдар арасындағы ынтымақтастықты, өсімдіктер карантині саласындағы жаңа нормативтік-құқықтық актілер мен карантиндік зиянды организмдердің ұлттық тізімдері туралы ақпарат алмасуды қарастырады.Сондай-ақ, келісімде карантиндік өнімдердің әкелінетін партияларына қойылатын талаптар, оларды алып жүретін құжаттар және тасымалданатын жүктердің транзиттік шарттары көрсетілген.Ауыл шаруашылығы вице-министрі Ермек Кенжеханұлының айтуынша, Түркиядан негізінен жаңғақтар, қызанақ, бұрыш жемістері, алма, цитрусты өсімдіктердің көшеттері, жеміс және гүл дақылдары әкелінеді. Ал Қазақстаннан экспортталатын негізгі карантиндік өнімдер – барлық дерлік дәнді (бидай, арпа, сұлы, күнбағыс) және бұршақты (асбұршақ, жасымық, ноқат) дақылдар.Соңғы үш жылда Түркияға шамамен 700 мың тонна өсімдік шаруашылығы өнімі экспортталды, ал импорт көлемі 40 мың тоннадан астам әртүрлі ауыл шаруашылығы дақылдары мен 2,7 миллион дана отырғызу және тұқымдық материалды құрады.«Осы кезеңде фитосанитарлық талаптарға сай келмейтін өнімдерді әкелуге 76 рет әрекет жасалды, олардың 6 жағдайында карантиндік объектілер анықталды. Карантиндік өнімдердің тасымалының артуына байланысты карантиндік объектілердің біздің елдеріміздің аумағына ену қаупі бар, бұл фитосанитарлық жағдайға кері әсер етуі мүмкін», – деп атап өтті вице-министр.Келісімді ратификациялау туралы заң жобасының қабылдануы екі елдің өсімдіктер карантині саласындағы қызметтеріне ынтымақтастықты жаңа деңгейге көтеруге мүмкіндік береді.Ақпарат көзі : https://www.gov.kz/memleket/entities/moa/press/news/details/942657

«JAN AHUAL» психологиялық қолдау орталығы ел Президентінің тапсырмасы бойынша психологиялық қызметті дамыту, сондай-ақ балаларға, жасөспірімдерге және олардың отбасыларына жан-жақты психологиялық көмек көрсету мақсатында ашылды.Мекемеге барған облыс әкімі Асхат Шахаров орталықты аралап, осындағы қызметкерлермен және жасөспірімдермен әңгімелесіп, жұмыс барысында қолданылатын әдістемелік құралдармен танысты. Бүгінгі күні өзекті мәселе саналатын кәмелетке толмағандар арасындағы аутодеструктивті мінез-құлық пен буллингке қатысты қабылдануы тиіс оңтайлы шешімдерді талқылады.Бүгінде орталықтағы «Жан сыры» кабинеттерінде жеке және топтық консультациялар тұрақты өткізілуде.Орталық қызметкерлері семинарлар мен жеке консультациялар өткізу арқылы әлеуметтік және отбасылық дағдарыстарды азайту бойынша белсенді жұмыс істеп жатыр. Осы уақытқа дейін ұйымдастырылған 87 семинар-практикум өткізілді, оған 7219 ата-ана қатысты, жалпы 9 240 ата-ана психологиялық қолдау алды, ал 851 ата-ана «Жан сыры» кабинетінде жеке консультациядан өтті.Сонымен қатар, «JAN AHUAL» орталығы арқылы психологиялық қызметтің есебі жүргізіліп, жүйелендіретін және мұғалімдерге мобильді көмек көрсететін бірыңғай электронды журнал енгізілген. Өңір мектептерінде қызмет ететін 497 педагог-психологтың біліктілікті арттыру курстары, сондай-ақ кешенді әдістемелік қолдау да осы орталық арқылы жүзеге асады. Әкіммен кездесуде психологтар терең психологиялық терапия жүргізу үшін клиникалық психотерапевтер мен суицидологтардың жетіспеушілігі мәселесін атап өтті.Асхат Шахаров жыл сайын жергілікті бюджеттен өңірге қажетті мамандарды даярлауға білім беру гранттары бөлінетінін түсіндірді. Ол жауапты салалық басқармаға мамандардың қажеттілігін анықтап, мәселені шешудің жолдарын қарастыруды тапсырды.Сондай-ақ, әкім облысымыздың педагог-психологтары үшін тәжірибе алмасу мүмкіндігін қарастыруды және коуч-тренерлерді тарта отырып, курстар ұйымдастыруды ұсынды.«Психологиялық қызмет балалардың әлеуметтік бейімделуіне, олардың психологиялық тұрғыдан нығаюына ықпал етеді. «JAN AHUAL» орталығы облыстың педагог-психологтары үшін бір-бірімен тәжірибе алмасатын, әдістемелік кеңес алатын, оқушылар мен олардың ата-аналары көмек алу үшін жүгінетін орынға айналды. Әрбір бала – еліміздің болашағы. Оларды дұрыс бағыттау, психологиялық тұрғыдан қолдау көрсету арқылы біз қоғамның дамуына және оның тұрақтылығын нығайтуға үлесі қосамыз», - деді әкім.Асхат Шахаров балалардың денсаулығы мен әл-ауқатын қамтамасыз ету жұмыстары жалғасатынын атап өтті. Балалардың психологиялық денсаулығын сақтау ғана емес, сонымен бірге олардың қауіпсіздігін қамтамасыз ету, толыққанды және үйлесімді дамуына жағдай жасау маңызды.Ақпарат көзі : https://www.gov.kz/memleket/entities/aktobe/press/news/details/942493

                     Ашық есік күні аясында облыс әкімі Асхат Шахаров пен облыс прокуроры Марат Әбішев кәсіпкерлермен кездесіп, бизнесті қорғау және инвесторлардың мүдделерін сақтау мәселелерін талқылады.Кездесу барысында кәсіпкерлердің құқықтық қорғалуын қамтамасыз ету, өңірдің инвестициялық ахуалын жақсарту және бизнес-қоғамдастықтың заңды құқықтарының сақталуына кепілдік беру мәселелері көтерілді. Бұл іс-шара билік органдары мен кәсіпкерлер арасындағы сындарлы диалог пен пікір алмасуға арналған тиімді алаңға айналды.Облыс әкімі Асхат Шахаров 2024 жылы өңір экономикасына 901,1 млрд теңге инвестиция, оның ішінде 337,4 млн АҚШ доллары көлемінде тікелей шетелдік инвестиция тартылғанын атап өтті. Сондай-ақ жаңа инвесторларды тарту үшін инфрақұрылымды жақсарту маңыздылығын айтты. Осы ретте «Бұхара-Орал» магистральды газ құбырының үшінші желісі пайдалануға берілгенін, бұл өңірдегі газ тапшылығы мәселесін шешіп, жаңа жобаларды газбен қамтамасыз етуге мүмкіндік беретінін айтты.Одан соң өңір басшысы Ақтөбе халықаралық әуежайы базасында құрылған арнайы экономикалық аймақтың (АЭА) маңыздылығына тоқталып, оның логистика, көлік және өңдеу өнеркәсібін дамытуға серпін беретінін жеткізді. Сонымен қатар, Хромтау қаласында индустриялық аймақ құрылғаны және инвестиция тарту бағытындағы жұмыстар жалғасып жатқанын баяндады. Ол тау-кен металлургия зауыты, фарфордан жасалған бұйымдар зауыты, көпсалалы клиника және органикалық тыңайтқыштар зауыты сияқты саладағы негізгі инвестициялық жобаларды тілге тиек етті. Бұл жобалар мыңдаған жұмыс орнын құрады және айтарлықтай инвестиция тартады.Мұнда кәсіпкерлерді қолдау мақсатында «Өркен-2» мемлекеттік бағдарламасы аясында Ақтөбе қаласында шағын және орта бизнеске жеңілдетілген несие беру жоспарланып отырғаны да айтылды.«Біз өңірдегі инвестициялық ахуалды жақсарту бойынша белсенді жұмыс жүргізіп жатырмыз. Былтыр облыс экономикасына 900 миллиард теңгеден астам инвестиция тартылды, бұл — жақсы нәтиже. Инфрақұрылымды дамыту, жаңа индустриялық аймақтар құру және бизнесті қолдауға арналған арнайы бағдарламаларды іске асыру жалғасады. Біз әрқашан әріптестікке ашықпыз және өңірде бизнес жүргізуге жан-жақты қолдау көрсетуге дайынбыз. Бірлесе отырып, экономикамызды дамытып, нығайта аламыз деп сенемін», —  деп атап өтті облыс әкімі Асхат Шахаров.Облыс прокуроры Марат Әбішев бизнесті және инвесторларды қорғау бағытында атқарылған жұмыстарға тоқталды. Оның айтуынша, 2023 жылдан бастап прокуратура инвестициялық жобаларды құқықтық сүйемелдеуді қамтамасыз етіп, мемлекеттік органдар тарапынан заң бұзушылықтардың алдын алуға белсенді атсалысып отыр.«2024 жылы прокуратура 30-дан астам инвесторға көмек көрсетті, олардың экономикаға қосқан үлесі — 345 миллиард теңге», — деді облыс прокуроры.Сондай-ақ прокурор «прокурорлық сүзгі» жүйесінің енгізілгенін алға тартты. Бұл механизм мемлекеттік органдардың бизнеске заңсыз араласуының, қызметті негізсіз тоқтату, келісімдерді біржақты бұзу сияқты әрекеттердің алдын алады.Одан соң инвесторларды қолдау жөніндегі ұлттық деңгейдегі серіктестік — «Бәйтерек» холдингінің басқарушы директоры Әлия Мырзагалиева кездесуге бейнебайланыс арқылы қосылып, инвесторлар мен бизнес-қоғамдастықты қолдау шаралары туралы айтты.Ал «Kazakh Invest» ұлттық компаниясы басқарма төрағасының орынбасары Азамат Қожанов Бас прокуратурамен тығыз ынтымақтастық орнатылғанын және инвесторлармен байланысты жедел әрі тиімді жүргізу маңызды екенін атап өтті.Кездесу барысында кәсіпкерлер өңір басшысы мен прокурорға тікелей сұрақтар қойып, бизнес жүргізу, инвестициялар тарту және құқықтық қорғау мәселелерін талқылады.Ақпарат көзі : https://www.gov.kz/memleket/entities/aktobe/press/news/details/942765

ШҚО әкімі Нұрымбет Сақтағанов Прапорщиково ауылында, 23-шағын ауданда және Қасым Қайсенов кентінде мектеп салу бойынша нақты тапсырмалар берді.Облыс әкімдігінің отырысында ШҚО Құрылыс, сәулет және қала құрылысы басқармасының басшысы Руфат Акрамов Прапорщиково ауылы мен Қасым Қайсенов кентінде жаңа мектептер салу үшін жер учаскелері анықталғанын мәлім етті.Болашақта қажетті жобалар әзірленіп, тиісті жұмыстар жүргізілетін болады. Нұрымбет Сақтағанов білім басқармасына бұл мәселені бақылауда ұстауды тапсырды. Жаңа мектептер облыс орталығында орын тапшылығы мәселесін шешуге көмектеседі.Ақпарат көзі : https://www.gov.kz/memleket/entities/akimvko/press/news/details/942363

Облыста ауыл тұрғындарын қолдау, жаңа жұмыс орындарын ашу және кәсіпкерлікті дамытуға бағытталған "Ауыл аманаты" бағдарламасы іске асырылуда.ШҚО Ауыл шаруашылығы басқармасының басшысы Ажар Қаджибекованың мәліметінше, 2023 жылы бағдарлама бойынша 1,5 млрд теңгеге несие беріліп, 235 жаңа жұмыс орны ашылды.2024 жылы 7 млрд теңге бөлу жоспарланған еді. Алайда республикалық бюджеттен 2,5 млрд теңге бөлінді.- Қазіргі таңда 1 млрд теңгеге 72 жоба мақұлданып, 163 жаңа жұмыс орны ашылады, - деді Ажар Каджибекова.Биыл бағдарламаны іске асыруға қосымша 3 миллиард теңге бөлінбек. Ауыспалы қаражатты ескерсе, бюджет 4,5 миллиард теңгені құрайды. Бұл шамамен 550 жобаны қаржыландыруға мүмкіндік береді. Оның ішінде туризм, ауылшаруашылық өнімдерін қайта өңдеу және фермерлерге техника сатып алу бар.Ақпарат көзі : https://www.gov.kz/memleket/entities/akimvko/press/news/details/942482

Шығыс Қазақстан облыстық сайлау комиссиясымен 2025 жылғы 18 ақпан күні Риддер қаласында «Шығыс Қазақстан облысы сайлау комиссияларының 2024 жылғы жұмысы және 2025 жылға қойылған міндеттер туралы» атты көшпелі семинар өткізілді.Семинар-тренингке 13 қалалық/аудандық аумақтық сайлау комиссиясының төрағалары, орынбасарлары мен хатшылары қатысты.Іс-шараға қатысушыларға ШҚО сайлау комиссиясының төрағасы К.К. Бичуинов, Риддер қаласы әкімінің орынбасары К. К. Төлеухан құттықтау сөз сөйледі.Өз сөздерінде спикерлер қазақстандық қоғамды демократияландыру, саяси реформаларды іске асыру мақсатында сайлау процесіне қатысушыларды тұрақты оқыту, жергілікті атқарушы органдар мен барлық деңгейдегі сайлау комиссиялары арасындағы диалогты дамыту қажеттігіне баса назар аударды.Семинар-тренинг іскерлік командалық ойын қағидаты бойынша жаңа форматта өтті, онда 4 команданың қатысушылары эрудицияларын көрсетіп, логикалық есептер мен сайлау заңнамасын білуге арналған кейстік тапсырмаларды шешті.Ақпарат көзі : https://www.gov.kz/memleket/entities/akimvko/press/news/details/942596

Елорданың Достық үйінде Қазақстан халқы ассамблеясының 30 жылдығына орай «Достық – бейбітшілік кепілі» атты дөңгелек үстел өтті, деп хабарлады елорда әкімдігінің ресми сайты.Ауқымды іс-шараға Қазақстан халқы ассамблеясының Астана қаласындағы орталықтарының басшылары, «AMANAT» партиясының белді мүшелері және мәслихат депутаттары қатысты.Астана қаласы Ішкі саясат басқармасы басшысының орынбасары Ләззат Құсайынова биыл саяси маңызы бар күндерге толы екенін, осыған орай құнды іс-шаралар ұйымдастырылуы керек екенін ескере отырып, жыл меморандуммен бастағалы отырғанын айтты.«Биыл – мерейтой мен төл мерекелерге толы жыл. Соның ішінде Ұлы Жеңіске 80 жыл, Абай Құнанбайұлының 180 жылдығы, сондай-ақ Қазақстан Республикасы Конституциясына 30 жыл және Қазақстан Халқы Ассамблеясына 30 жыл. Ұйым осы жылдар ішінде еліміздегі бейбітшілік пен келісімнің, өзара достықтың бірегей институтына айналды. Осы мерейтой аясында «AMANAT» партиясы Астана қалалық филиалы мен елордадағы Қазақстан халқы Ассамблеясы арасында меморандумға қол қойылды. Оның мақсаты бірлесе кешенді жұмыс істеу, соның ішінде еліміздегі бірлікті, бейбітшілік пен келісімді, түрлі этнос өкілдерінің өзара достығын әрі қарай нығайта түсу болмақ. », - деді AMANAT партиясы Астана қалалық филиалының атқарушы хатшысы Мұхаммед Болысбек.Бұдан соң партияның Астана қалалық филиалының атқарушы хатшысы Мұхаммед Болысбек пен Астана қаласы әкімдігінің «Қоғамдық келісім» КММ басшысы Нұрал Айдашев ортаға шақырылып, «AMANAT» партиясы Астана қалалық филиалы мен Астана қаласы Қазақстан халқы Ассамблеясы арасында өзара ынтымақтастық пен келісім туралы меморандумға қол қойылды.Дөңгелек үстел аясында этномәдени орталықтың басшыларымен жылдық жоспар талқыланды.Ақпарат көзі : https://www.gov.kz/memleket/entities/astana/press/news/details/942366

Елордалық полиция департаментінде әйелдерді зорлық-зомбылықтан қорғау бөлімшесінің құрылған күні салтанатты түрде атап өтілді. Ол 1999 жылы құрылған, деп хабарлайды Астана әкімдігінің ресми сайты.Салтанатты шараға мекеменің қызметкерлері мен ардагерлері, депутаттар мен үкіметтік емес сектор өкілдері жиналды.Бұл бөлімше алғашында әйелдердің конституциялық құқықтары мен бостандықтарын заңсыз шабуылдардан қорғауды қамтамасыз ету, зорлық-зомбылықтың алдын алу және оны тоқтату мақсатында құрылған. Алайда 2025 жылдың қаңтарынан бастап арнайы бөлімшенің өкілеттігі кеңейтілді. Енді отбасының барлық мүшесін қорғауға арналады.«Бұл мекеме 1999 жылдан бері жұмыс істеп келеді. Бірақ биылдан бастап құрылымымызды өзгерттік. Бұрын бөлімше әйелдерді зорлық-зомбылықтан қорғаумен айналысса, қазір балаларды, қарттарды және ер адамдарды да қорғаймыз», - деді Астана қалалық ПД Тұрмыстық зорлық-зомбылыққа қарсы күрес басқармасының бастығы Гүлмира Шрахметова.Тұрмыстық зорлық-зомбылыққа қарсы күрес басқармасының ерекше тапсырмалар жөніндегі аға инспекторы Әлия Жүсіпова іс жүзінде қалай өтетінін айтты.«Қала бойынша бөлімшеде 48 адам бар. Біздің міндетіміз – зардап шеккендерге қатысты жұмысты үйлестіру және алдын алу жұмыстарын жүргізу. Біз жұртқа тұрмыстық зорлық-зомбылыққа қатысты сұрақтары немесе басына түскеноқиғалары болса хабарласуға болатын бөлімше бар екенін түсіндіреміз. Қазір адамдар бізге бөлімшенің әлеуметтік желідегі парақшалары арқылы хабарласып жатыр. Сондай-ақ 111 сенім телефоны жұмыс істейді. Немесе 102 нөміріне хабарласуға болады», - деді Әлия Жүсіпова.Кездесуге қатысушылар жас қызметкерлермен тәжірибе алмасты. Іс-шара соңында бірқатар полиция қызметкеріне грамоталар мен бағалы сыйлықтар табыс етілсе, ардагерлер мен қоғам қайраткерлері алғыс хаттармен марапатталды.Ақпарат көзі : https://www.gov.kz/memleket/entities/astana/press/news/details/942494

Ақын Жұбан Молдағалиевтің 105 жылдығына орай елордалық мектеп оқушылары арасында шешендік өнерден сайыс өтті, деп хабарлайды Астана әкімдігінің ресми сайты.Тілдерді және архивтерді дамыту басқармасы мен «Руханият» ҚМУ-дің ұйымдастыруымен өткен шешендік өнер сайысы елордадағы №71 мектеп-лицейінде ұйымдастырылды. Оған лицейдің үздік жаттықтырушылары, мектепішілік және қалалық шығармашылық байқаулардың жеңімпаздары қатысты.Іс-шараның мақсаты – шешендік өнер мен қазақ тарихының маңызын жан-жақты насихаттау. Тілдік дағдыларға ерекше көңіл бөлінді.«Біздің студенттер арасында шығармашылықпен айналысатын балалар көп. Бірі сурет салуда үздік болса, енді бірі вокалға қызығады, ал біраз бөлігі шешендік өнерден талантты. Сондықтан мұндай іс-шаралар оқушылардың қабілетін ашып, дамытуға, ана тіліне деген сүйіспеншілігі мен құрметін нығайтуға септігін тигізеді», - деді мектеп директоры Майя Мұқашева.Сайыс жеңімпазы 7-сынып оқушысы Айару Есқожаева атанды.«Мұндай жарыстарда тәжірибем болса да сахнаға шыққанымда қобалжыдым. Меніңше, мұндай шаралардың пайдасы зор. Өзіміз үшін жаңа әрі қызықты нәрселер үйренеміз», - деді мектеп оқушысы.Жиын қорытындысы бойынша жеңімпаздар мен қатысушылар дипломдармен және алғыс хаттармен марапатталды.Ақпарат көзі : https://www.gov.kz/memleket/entities/astana/press/news/details/942497

Интернет және телефон алаяқтығымен күресу науқаны аясында елорданың Промышленный елді мекенінің тұрғындары мен «Қазақстанның қаржы мәдениеті» қоғамдық қорының төрағасы арасында кездесу өтті, деп хабарлайды Астана әкімдігінің ресми сайты.«Технологияның қарқынды дамып келе жатқанын және деректеріміздің қолжетімді болып келе жатқанын ылғи да есте ұстауымыз керек. Мысалы, алаяқтар тіркелу үшін жеке ақпарат талап етілетін ұтыс ойынын ұйымдастыруы мүмкін. Мұндай айла-шарғылардан ешкім де қорғалған емес, сондықтан азаматтарды алаяқтардың арбауына түсіп қалмауы үшін үнемі хабардар ету және түсіндіру жұмыстарын жүргізу маңызды. Біз бұл мәселеге неғұрлым көп көңіл бөлсек, қазақстандықтардың қаржылық және құқықтық сауаттылығы соғұрлым жоғары болады», - деп атап өтті қордың негізін қалаушы Юрий Ли.Кездесу барысында қатысушыларға түрлі алаяқтық схемалар, киберқылмыскерлер қолданатын айла-шарғылар, олардан қорғану жолдары айтылды.«Мұндай кездесулерді мүмкіндігінше жиі өткізу керек деп есептеймін. Бізге, яғни қарт кісілерге зейнетақымызды алған кезде, лотереяға қатысу үшін тауар сатып алудан бастап, банктік шоттарды жалған қорғауға дейін күмәнді қызметтерді ұсынатын түрлі нөмірлерден қоңыраулар түсе бастайды. Жақында маған қоңырау шалып, SIM картамның мерзімі өтіп кеткенін және оны тез арада SMS арқылы қайта ұзартуым керектігін айтты, бірақ мен алаяқты бірден таныдым. Қауіпсіздік деңгейін арттыру үшін мұндай тақырыптарды жиі талқылауымыз керек», - деді кездесуге қатысушы Нағима Жұмалиқызы.Жиын елордадағы Сарайшық ауданы әкімдігінің қолдауымен өтті.Ақпарат көзі : https://www.gov.kz/memleket/entities/astana/press/news/details/942514

Елордада «Цифрлы сот орындаушысы» жобасын енгізу нәтижесінде атқарушылық іс жүргізуді цифрландыру қарқынды дамыды. Бұл туралы Астана қаласы Әділет департаменті басшысының орынбасары, Астана қаласындағы кәмелетке толмаған балалалардың істері жөніндегі комиссияның мүшесі Жанна Сүйімбаева Коммуникациялар қызметінде өткен брифингте мәлім етті, деп хабарлайды елорда әкімдігінің ресми сайты.Елордалық Әділет департаменті 2024 жылы жеке сот орындаушылардың атқарған жұмысының қорытындыларын жариялады.«Астана қаласының жеке сот орындаушыларының өндірісінде жалпы сомасы 3,5 трлн теңгені құрайтын 746 673 атқарушылық құжат болды. 341 514 атқарушылық құжат аяқталып, оның ішінде 188 123 іс толық орындалды. Орындалған құжаттардың жалпы сомасы 79,3 млрд теңгені құрады.«Цифрлы сот орындаушысы» жүйесі арқылы 25 335 жеңілдетілген атқарушылық іс қозғалып, жалпы сомасы 539,2 млн теңгені құрады. Бұл азаматтарға 5 млрд теңгеге дейін үнемдеуге мүмкіндік берді, себебі жеке сот орындаушысының қызметіне арналған қосымша шығындар алынып тасталды», - дейді спикер.Сөзін жалғай отырып, «Цифрлы сот орындаушы» жүйесі қалай жұмыс істейтіні туралы қозғап өтті. Айтуынша, адами фактордың азаюына процестердің толығымен автоматтандырылуы себеп болған, сондықтан сот орындаушыларға жеке барудың қажеттілігі жоқ.«Борышкерлерге цифрлық хабарлама жіберу – қарыз туралы ескерту SMS (1414) және EGov Mobile push-хабарламалары арқылы жолданады.Нысаналы шектеу – егер дәстүрлі жеке сот орындаушысы барлық банк шоттарын бұғаттайтын болса, жаңа жүйе тек қарыз сомасы шегінде бір ғана шотқа шектеу қояды.Ыңғайлы онлайн төлем – қарызды онлайн төлеуге болады, төлем жасалғаннан кейін шектеулер автоматты түрде алынады», - дейді ведомство өкілі.Сонымен қатар, жеке сот орындаушыларды аттестаттау мәселесін де айтып өтті. 2024 жылы Астанада 258 жеке сот орындаушысы жұмыс істеді. Аттестаттау жылына кемінде бір рет өткізіледі және оған компьютерлік тестілеу мен әңгімелесу кіреді. Аттестациядан сәтті өткен үміткерлер жеке сот орындаушысы ретінде қызмет ету құқығына лицензия алады.«Атқарушылық іс жүргізуді цифрландыру – сот актілерін орындаудың әділ, ашық және ыңғайлы жүйесіне көшуге жасалған маңызды қадам. «Цифрлы сот орындаушысы» жүйесі азаматтардың қаржысын үнемдеуге және сот шешімдерін орындау мерзімін қысқартуға мүмкіндік беріп отыр», – деп атап өтті Астана қаласы Әділет департаменті басшысының орынбасары, кәмелетке толмыған балалалардың істері жөніндегі комиссияның мүшесі Жанна Сүйімбаева.Ақпарат көзі : https://www.gov.kz/memleket/entities/astana/press/news/details/942705