Қарғалы ауданына жұмыс сапары кезінде облыс әкімі орталық ауруханаға барып, диагностикалық бөлімшені орналастыру үшін салынатын қосымша жобамен танысты.Аудандық аурухананың бас дәрігері Берік Жаржанов бұл нысан пациенттерге қызмет көрсету сапасын едәуір жақсартуға және диагностика мүмкіндіктерін кеңейтуге мүмкіндік беретінін айтты.Аурухана 1955 жылы салынған. Оның жанында 54 төсек-орынға шақталған стационар жұмыс істейді. Сондай-ақ, бір ауысымда 150 науқасқа қызмет көрсететін емхана бар. Ауруханаға 6 дәрігерлік амбулатория және ауданның 9 медициналық пункті бекітілген. Аурухана ұжымы 162 адамды құрайды.«Қарғалы ауданы қарқынды дамуда. Мұнда жаңа үйлер салынуда, халық саны артып келеді. Жапсарлас нысанды салу және денсаулық сақтау инфрақұрылымын жақсарту - бұл процестің маңызды қадамы. Аудан тұрғындары сапалы медициналық қызмет алуы үшін біз денсаулық сақтау жұмыстарын қолдап, жақсартуды жалғастырамыз», - деді облыс әкімі.Өңір басшысы ауруханаға қосымша құрылыс салу жобасын қаржыландыру мәселесі облыстық мәслихат сессиясында қаралатынын атап өтті.Ақпарат көзі : https://www.gov.kz/memleket/entities/aktobe/press/news/details/938841

Абай облысының ядролық медицина және онкология орталығында SOMATOM go.Sim компьютерлік томографы мен TrueBeam сәулелік терапия жүйесі іске қосылды. Аталған қондырғылар «Қазақстан Халқына» Қоғамдық Қорының қолдауымен алынып отыр. Шараға Абай облысының әкімі Нұрлан Ұранхаев, «Қазақстан Халқына» Қоғамдық Қорының басқарма төрайымы Ләззат Шыңғысбаева, орталық ұжымы қатысты.«Бүгінгі қуанышты оқиға Абай облысы әкімдігімен бірлесе іске асырған сәтті жобалардың бірі болды. Облыс тұрғындарының денсаулығын жақсартуда бұл заманауи қондырғылардың тигізер пайдасы мол екені анық. Біз Абай облысымен денсаулық саласында ғана емес, білім, спорт сияқты өзге де әлеуметтік салаларда бірлесе жұмыс жасап келеміз. Әріптестігіміз алдағы уақытта да жалғаса береді», -деді «Қазақстан Халқына» Қоғамдық Қорының басқарма төрайымы Ләззат Шыңғысбаева.Жоғары технологиялық қондырғылар диагностика мен емдеудің сапасын арттыруға, өңіріміз ғана емес бүкіл Қазақстанның тұрғындары үшін заманауи онкологиялық көмектің қолжетімділігін кеңейтуіне ықпал етеді.«SOMATOM go.Sim компьютерлік томографы сәулелік терапияны дәл жоспарлау үшін ісіктерді егжей-тегжейлі бейнелеуге, кескіннің жоғары сапасын сақтай отырып, сәулелену дозасын азайтуға, ағзаның табиғи физиологиялық процестерін( тыныс алу, жүрек соғысы) ескере отырып, емдеу процедурасын жүргізуге мүмкіндік береді. Сондай-ақ, сәтті емдеу мүмкіндігін арттыра отырып, сәулелік терапияның ең күрделі әдістерін жоспарлау процесін жеделдетеді»,-дейді ядролық медицина және онкология орталығының директоры Саят Таңатаров.Ал, TrueBeam сәулелік терапия жүйесі тек қатерлі жасушаларға әсер ететін сәулеленудің инновациялық әдістерін қолдануға, динамикалық бақылау технологиясының арқасында ең күрделі және қозғалмалы ісіктерді емдеуге мүмкіндік береді. Одан бөлек, сеанстардың ұзақтығын азайтып, жайлылықты арттырады. Ең бастысы, емделушілердің өмір сүру сапасын бұзбайды.Демек, алдағы уақытта орталықта ем қабылдаушылар жаңа қондырғылардың арқасында сырқатының диагноздарын дәл анықтап, дәрігерлердің одан арғы көмегіне жүгіне алады.Ақпарат көзі : https://www.gov.kz/memleket/entities/abay/press/news/details/938278

ТЖ вице-министрі генерал-майор Кеген Тұрсынбаев Төтенше жағдайлар министрінің атынан «Өркен» шаруа қожалығының басшысы Талғат Мұсірәтке тұрғын үйдегі өрт кезінде көрсеткен ерлігі мен жанқиярлығы, адам өмірлерін сақтап қалғаны үшін «Өртте көрсеткен қайсарлығы үшін» медалін табыстады. Вице-министр медальді тапсыра отырып: «Талғат Мүсірәт батылдықты ғана емес, сонымен қатар үлкен жауапкершілікті талап ететін нағыз ерлікті көрсетті. Оның бұл әрекеті шабыттандырып, барлығына үлгі болады. Мұндай адамдар өз заманының нағыз батырлары және біз олардың ерліктерін мақтан тұтамыз», - деп атап өтті. Естеріңізге сала кетейік, 2025 жылдың 7 ақпанында Шығыс Қазақстан облысы Зайсан ауданы Айнабұлақ ауылында жеке тұрғын үйде өрт шыққан. Өрт сөндіру бөлімшелері келгенге дейін көршісі Талғат Мүсірәт өз өмірін қатерге тігіп, терезе арқылы қатты түтіндеген үйге кіріп, қарт әйел мен төрт баланы құтқарып, қауіпті аймақтан шығуға көмектесті. Өрт сөндірушілер сол жерге келіп, 30 шаршы метр аумақтағы өртті жойды. Өрттің себебі электр жабдықтарын монтаждау кезінде өрт қауіпсіздігі талаптарын сақтамау болды, Батырдың өзі марапатқа ризашылығын білдіріп: «Мен адамдарға қауіп төніп тұрғанын көргенде шетте қарап тұра алмадым. Мен түйсігіммен әрекет еттім, егер де тағы да осындай жағдайға тап болсам, де солай істейтін едім. Мен үшін ең бастысы – құтқарылған өмір», - деп айтып өтті.Ақпарат көзі : https://www.gov.kz/memleket/entities/emer/press/news/details/938649

2025 жылғы 14 ақпанда ҚР Президенті жанындағы Орталық коммуникациялар қызметінде «Су тасқыны кезеңіне дайындық туралы» тақырыбында баспасөз конференциясы өтті. Спикер ретінде ҚР ТЖМ Төтенше жағдайлардың алдын алу комитеті төрағасының міндетін атқарушы Жылқайдаров Әсет Думанұлы сөз сөйледі. Төтенше жағдайлар министрлігі орталық мемлекеттік және жергілікті атқарушы органдармен бірлесіп су тасқыны кезеңіне дайындық жөніндегі іс шаралар кешенін жалғастыруда. Су тасқынының болжамды тәуекелдеріне байланысты оңтүстік және батыс өңірлерде орналасқан учаскелерде жағдайды бақылайтын және қалыптасқан жағдай туралы өзекті ақпаратты беретін тәулік бойы қызмет атқаратын бекеттер қойылды. «Жағдай нашарлаған кезде біз зардап шеккен өңірлерге қосымша күштер мен құралдарды жедел жеткіземіз, сондай-ақ халықты эвакуациялауға және авариялық-құтқару жұмыстарын жүргізуге дайындаламыз», - деп Әсет Жылқайдаров хабарлады. Дайындық шеңберінде азаматтық қорғаныстың әскери бөлімдері жоғары дайындыққа келтірілді, жедел кезекшілікте құтқару авиациясы бар. Тәулік бойы режимде ТЖМ жедел су тасқынына қарсы штабы жұмыс істейді, оған ІІМ, Қорғанысмині, ҰҰ, Қазгидромет, Қазсушар және Қазавтожол сияқты негізгі мемлекеттік органдардың мамандары тартылған. Сондай-ақ іс-қимылдарды жедел үйлестіру үшін өңірлерде осындай штабтар да жұмыс істейді. Жеделдікті жақсарту үшін командалық-штабтық машиналар базасында жедел басқару топтары құрылды, ол ықтимал төтенше жағдайлар аймақтарынан нақты уақыт режимінде ақпаратты беруге мүмкіндік береді. Сондай-ақ жедел ден қою үшін күштер мен құралдар резерві дайындалды. Сондай-ақ жедел ден қою үшін күштер мен құралдар резерві дайындалды. Қазгидрометтің алдын ала болжамы бойынша 9 өңірде (Ақтөбе, Абай, Ақмола, ШҚО, БҚО, Қарағанды, Ұлытау, СҚО, Қостанай облыстары) жоғары су басу қаупі күтілуде. ТЖМ су тасқыны салдарын азайту және азаматтардың қауіпсіздігін қамтамасыз ету үшін барлық қажетті шараларды қабылдауға дайын. Ақпарат көзі : https://www.gov.kz/memleket/entities/emer/press/news/details/938734

Серік Төленбергенов Шығыс Қазақстанға жұмыс сапары аясында ШҚО ТЖД өнеркәсіптік қауіпсіздік басқармасында кеңес өткізді. Өндірістік объектілердегі авариялар мен оқиғалардың алдын алу, кеніштерде позициялау жүйесінің бар-жоғын бақылау, өнеркәсіпте цифрлық технологияларды қолдану, өндіріс қауіпсіздігі бойынша заманауи шешімдерді енгізу мәселелері талқыланды. Серік Төленбергенов ШҚО ТЖД бастығымен жергілікті атқарушы органдардың өкілдерімен және Кәсіби әскерилендірілген авариялық-құтқару қызметтерінің республикалық орталық штабының басшылығымен бірлесіп облыстың бірқатар өнеркәсіптік объектілерін аралап шықты. Сондай-ақ «Қазмырыш» ЖШС Шығыс Қазақстан тау-кен байыту кешенін алқап кенішіне барды, онда кен өндіру процестері бүкіл ТМД бойынша жалғыз «Rail veyor» көлік жүйесімен бақыланатын өндіріс басқармасының орталығымен танысты. ҚР ТЖ вице-министрі қауіпсіздік мониторингі жүйесін, шахтадағы басты желдету қондырғысының жұмысын, бетон-толтырымдық кешеннің жұмысын, үйінді астында іздеу жүйесін және персонал мен өздігінен жүретін жабдықты жақындастыру жүйесін зерделеді. Серік Төленбергенов жұмыс сапарының аясында кәсіпорындардағы жарақаттанудың алдын алу, инциденттер мен авариялар қаупін азайту бойынша тапсырмалар берді. Ақпарат көзі : https://www.gov.kz/memleket/entities/emer/press/news/details/938866

Композитор, дирижер, «Отырар сазы» оркестрінің негізін қалаушы ретінде ол қазақ даласының терең жанын музыка арқылы жеткізді.Қонаев қаласында ұлы маэстроның 100 жылдығына арналған салтанатты іс-шара өтті. Кешке көрнекті мәдениет қайраткерлері, оның мұрасын құрметтейтіндер және қазақ халқының дәстүрі мен бірегейлігін бейнелейтін өнерге жақын жандар жиналды.Мәдениет үйі лық толды: адамдар бірнеше ұрпақтың жадында қалған таныс әуендерді қайта тыңдау үшін келді. Композитордың Мемориалдық музейінен алынған көрме құнды экспонаттарды ұсынды: қолжазбалар, жеке заттар, фотоматериалдар және залды қазақ тарихының рухымен толтырған аңызға айналған домбыра.– Мұндай ұлы тұлғаларды ұлықтау – біздің парызымыз, себебі мәдениетімізді қолдап, келер ұрпаққа жеткізсек қана ол мәңгі жасайды, – деп атап өтті Алматы облысының әкімі Марат Сұлтанғазиев. Жыл бойы өңірде Тілендиевтің мерейтойына арналған іс-шаралар өтеді: ескерткіштер орнату, мемориалдық орындарды қалпына келтіру, оның есімін қоғамдық маңызы бар нысандарға беру жоспарлануда.Концерттік бағдарламада әрбір қазақстандыққа таныс шығармалар орындалды. «Алтынай» мемлекеттік халық би ансамблі көркем қойылымдарын ұсынса, «Үшқоңыр» ансамблі дала рухы мен халық философиясына толы күйлерді орындады.Қазақстан Республикасы Президентінің кеңесшісі Мәлік Отарбаев Мемлекет басшысы Қасым-Жомарт Тоқаевтың атынан құттықтау жолдап, композитордың қазақ аспаптық музыкасын дамытудағы рөлінің маңыздылығын атап өтті.– Оның шығармашылығы ұлттық музыканы жаңа деңгейге көтеріп, қазақ күйінің қайталанбас үнін әлемге танытты. Оның туындылары – біздің мәдени мұрамыздың ажырамас бөлігі, – деді Отарбаев. – ЮНЕСКО-ның 2025 жылды Нұрғиса Тілендиев жылы деп жариялауы оның дүниежүзілік маңызын айғақтайды.Мерекелік бағдарламада Майра́мбек Беспаев, Тамара Асар, Айгүл Қосанова, Мадина Сәдуақасова, Мирас пен Құралай, Гүлнұр Оразымбетова сынды танымал орындаушылар өнер көрсетті. Олар композитордың дарыны мен мұрасына деген құрмет пен сүйіспеншілікке толы әндерді орындады.Актерлер Ерлан Біләл, Еділ Рамазан және Ақбота Рахат Тілендиевтің өмірі мен тағдырына арналған өлеңдерді оқыды. Ол жастайынан ерлік көрсетіп, майданға аттанды, кейін бар ғұмырын қазақ музыкасын дамытуға арнады.Кештің ерекше қонағы – композитордың қызы Динара (Дінзухра) Нұрғисақызы Тілендиева болды. Қазақстандық дирижер, 2011 жылғы Қазақстанның еңбек сіңірген қайраткері, ол 2009 жылдан бері Н.Тілендиев атындағы Мемлекеттік академиялық фольклорлық-этнографиялық «Отырар сазы» оркестрінің көркемдік жетекшісі және бас дирижері қызметін атқарып келеді. Оның шараға қатысуы дәстүр сабақтастығы мен ұлы композитордың музыкалық мұрасын сақтаудың маңыздылығын айқындай түсті.Оның музыкасы – заманның айнасы, халықтың дәстүрі мен құндылықтарын жеткізетін тірі тарих. «Аққу» күйі, «Құстар әні» әні, «Махамбет» оркестрлік поэмасы әлі күнге өзекті болып, концерт залдарында орындалып, жас музыканттарға шабыт беруде.Мерейтойлық кеш Нұрғиса Тілендиев мұрасының маңыздылығын тағы бір мәрте еске салды. Оның шығармалары ұрпақтарды біріктіріп, дала рухын, еркіндік пен туған жердің шексіз махаббатын жеткізуді жалғастыруда.Ақпарат көзі : https://www.gov.kz/memleket/entities/almobl/press/news/details/941821

«Таза Қазақстан» бағдарламасы аясында Алматыда белгіленген мерзімнен бұрын қаланың жол инфрақұрылымын ретке келтіру жұмыстары басталды. Қалалық мобилділік басқармасы магистральдық көшелерде жолдарда апатты жағдайлардың алдын алу мақсатында қыста пайда болған шұңқырлардың жойылатынын хабарлады.«Асфальтбетон зауыты мерзімінен бұрын іске қосылды, ол пилоттық режимде ауа температурасы минус -5 градусқа дейін төмендеген кезде асфальтбетон қоспасын тығыздауды қамтамасыз етуге мүмкіндік беретін энергия үнемдейтін қоспалары бар «жылы асфальт» беретін болады. Бұған дейін ҚР Көлік министрлігі хабарлағандай, бұл технологияны Қазақстандық жол ғылыми-зерттеу институты (ҚазжолҒЗИ) әзірлеп, Республикалық маңызы бар автожолда сынап көрді», - деп атап өтті басқарма.Қалалық мобилділік басқармасы жұмыс кезеңінде қозғалысқа ешқандай шектеулер болжанбайтынын атап өтті. Сонымен қатар, көше-жол желісін ағымдағы жөндеу бойынша негізгі жұмыстарды аудан әкімдіктері мен ҚМБ көктемгі-жазғы кезеңде жүргізетін болады.Естеріңізге сала кетейік, ағымдағы жылы қалалық мобилділік басқармасы желісі бойынша 300 шақырым жолды орташа жөндеу, 35 шақырым жаңа жол салу, Сейфуллин–Жансүгіров жолайрығын, Рысқұловтан Мөңке биге дейінгі Сайын көшесі мен Абай даңғылының қала шекарасына дейінгі аралықтарын іске қосу жоспарланған. Бұл жұмыстар сапалы жолдардың үлесін 2024 жылғы 92% - дан 2025 жылы 95% - ға дейін ұлғайтуға мүмкіндік береді.Ақпарат көзі : https://www.gov.kz/memleket/entities/almaty/press/news/details/940440

Алматы облысында су тасқыны жағдайына байланысты күнделікті мониторинг жүргізілуде. Төтенше жағдайлардың алдын алу үшін жаңадан әзірленген "Tasqyn" ақпараттық жүйесі енгізіліп, мамандар арнайы оқытылуда. Бұл жүйені Қазақстан Республикасының Цифрлық даму, инновациялар және аэроғарыш өнеркәсібі министрлігі әзірлеген.Облыста су деңгейін бақылау үшін 42 гидропост орнатылды, оның ішінде 27-сі "Қазгидрометке", ал 15-і "Қазселденқорғау" мекемесіне тиесілі. Бақылау нәтижесінде өзен арналарының су өткізу қабілеті тұрақты екені анықталды. Аймақтағы "Қапшағай", "Күрті", "Бартоғай" және "Бестөбе" су қоймаларында су толтыру штаттық режимде жүргізілуде. Бүгінде су толтыру деңгейі 31%-дан 92%-ға дейінгі көрсеткіштерді құрайды: Бестөбе – 30,5% Күрті – 53,9% Бартоғай – 78,3% Қапшағай – 92,6% Қалған су қоймалары транзиттік режимде жұмыс істеп, тұрақты мониторинг жүргізілуде. Облыстың 4 ауданында су тасқыны қаупі жоғары деп танылған 13 учаске анықталды. Бұл аймақтарда 11 мыңнан астам тұрғын үй және 34 мыңнан астам адам тұрады.Су тасқыны қаупін азайту үшін келесі жұмыстар атқарылды: 63,6 км арық пен 30 км канал тазартылды. 78 су өткізу құбыры (автомобиль және теміржол астындағы) қалпына келтірілді. Елді мекендерден қар шығару үшін 6 арнайы орын белгіленді, мердігерлік ұйымдармен келісім жасалды. 17 мың м³ қар шығарылды. Төтенше жағдайлардың алдын алу шаралары аудандар жоғары деңгейде ұйымдастырылды.Су тасқынына қарсы іс-шаралар үшін облыста 1136 маман және 347 арнайы техника дайындалды. Оның ішінде: 155 бірлік – трактор, бульдозер, экскаватор 108 бірлік – кран, тиегіш, самосвал 65 бірлік – эвакуациялық техника 19 бірлік – жоғары өтімді техника (трекол, УАЗ, т.б.) 130 мотопомпа, 36 жүзу құралы 8,2 мың тонна инертті материал, 81,5 мың қап 76 тонна жанар-жағармай (48 тн бензин, 28 тн дизель отыны) Барлық техниканың дайындығы тексерілді.Сонымен қатар, Алматы қаласы мен Алматы облысының шекаралас аудандарындағы өзендердің деңгейі ерекше бақылауға алынды. Облыстың төтенше жағдайлар қызметтері барлық аудандар мен қалалар әкімдіктерімен тығыз байланыста жұмыс істеуде. Су тасқыны қаупі бар учаскелерде алдын алу шаралары күшейтіліп, бақылау жұмыстары жүргізілуде.Қазіргі таңда өңірдегі су тасқыны жағдайы тұрақты және қатаң бақылауда.Ақпарат көзі : https://www.gov.kz/memleket/entities/almobl/press/news/details/940365

2024 жылы Алматы облысының диқандары 49,1 мың гектар жерге жүгері егіп, толық өнім жинады. Орташа өнімділік гектарынан 55 центнерді құрап, жалпы 270,7 мың тонна өнім алынды. Бұл – өңірдің соңғы жылдардағы ең жақсы көрсеткіштерінің бірі.Жиналған өнімнің негізгі бөлігі (175 мың тонна) мал азығына бағытталды, тағы 94 мың тонна өңдеуге жіберілді, ал 1,3 мың тоннасы келесі жылғы егу жұмыстарына қалдырылды. Негізгі өңдеушілер «Жаркент крахмал-патока зауыты» (78 мың тонна), «АзияАгроФуд» (60 мың тонна) және «Көк Теңіз» (14 мың тонна). Жүгерінің орташа сатып алу бағасы тоннасына 55-60 мың теңге болса, құс фабрикалары оны килограмына 74 теңгеден сатып алды.Ауыл шаруашылығы өндірушілерін қолдау мақсатында өңірде жүгері өңдеу субсидияланады. 2024 жылы бұл мақсатқа 1,5 млрд теңге бөлініп, фермерлерге өңдеуге тапсырылған әр тонна үшін 18 мың теңгеден өтемақы берілді. Облыста 102,6 мың тонна астық сақтай алатын үш лицензияланған қойма жұмыс істейді.«Алматы облысында жүгері өндірісінің тұрақты өсуі – дұрыс жүргізілген аграрлық саясаттың, фермерлерді қолдаудың және заманауи технологияларды енгізудің нәтижесі. Өңір елдегі басты астық өндірушілердің бірі болып қала береді. Ал келесі жылы біз егістік алқаптарын ұлғайтуды жоспарлап отырмыз», – деп атап өтті облыс әкімдігі.2025 жылы жүгері егістік алқаптары 52,6 мың гектарға дейін ұлғайтылады, былтырғы жылмен салыстырғанда 3,5 мың гектарға артық. Бұл өңірдің елдегі астық нарығындағы орнын одан әрі нығайтуға мүмкіндік береді.Ақпарат көзі : https://www.gov.kz/memleket/entities/almobl/press/news/details/938789

Алматы ипподромының иелері наурыз айының соңына дейін оның даму бағдарламасын ұсынуы тиіс. Бұл туралы шаһар басшысы Жетісу ауданы тұрғындарымен кездесу барысында мәлімдеді.Қала әкімінің айтуынша, өткен жылдан бері ипподром иелерімен келіссөздер жүргізіліп жатыр. Олар наурыз айының соңына дейін даму бағдарламасын ұсынуы керек, бұл ең алдымен, айтарлықтай қаржыны қажет етеді. Дегенмен, Ерболат Досаев ипподромның мақсатты бағыты өзгеріссіз қалатынын атап өтті.«Егер меншік иелері жаңарту жұмыстарын жүргізбесе, біз жаңа инвестор іздейміз немесе бұл міндетті қала өз мойнына алуы мүмкін, бірақ бұл өте қымбат жоба. Жазға дейін Алматы ипподромының болашағы қалай болатынын анықтауға тырысамыз», – деді Ерболат Досаев.Ақпарат көзі : https://www.gov.kz/memleket/entities/almaty/press/news/details/937913

Биыл өңірде 806,4 мың га алқапта көктемгі далалық жұмыстарын жүргізу жоспарлануда.Егіс жұмыстарына дайындық облыс әкімі Асхат Шахаровтың төрағалығымен өткен аппарат мәжілісінде талқыланды.Ауыл шаруашылығы басқармасының басшысы Асқар Жүсібәлиевтің ақпаратына сүйенсек, дәнді дақылдар 458 мың га, майлы дақылдар 67 мың га, мал азығы дақылдары 274 мың га, картоп 3,5 мың га және көкөніс бақша дақылдары 3,4 мың га жерге егіледі.Көктемгі егіске 51 мың тонна ауыл шаруашылығы дақылдарының тұқымы қажет болса, бүгінгі таңда 47 мың тонна құйылды немесе 92%. Аудандарда тұқым себу жұмыстары жалғасуда.Көктемгі далалық жұмыстарына 6,2 мың тонна арзандатылған дизель бөлінді. Энергетика министрлігі тарапынан жақын арада дизель отынына баға белгіленген соң заңнамға сәйкес жеткізуші операторды анықтау жұмыстары жүргізіледі. 1528 трактор, 135 егіс кешені, 1446 мың тұқымсепкіш пен 1432 мың жер өндейтін техника жұмылдырылмақ.«Кең дала-2» бағдарламасы бойынша «Аграрлық несие корпорациясы» АҚ және «Ақтөбе» ӘКК арқылы егіс науқанын жүргізуге жылдық 5% сыйақы мөлшерлемесімен қазіргі уақытта 3,9 млрд теңгеге өтінімдер қабылданып, 2,0 млрд теңгесі мақұлданды және 532,6 млн теңге несие берілді. Өтінімдерді қабылдау жалғасуда. Бұдан өзге, өсімдік шаруашылығы саласын субсидиялауға 1,2 млрд теңге бөлінді, қаржы тұқым шаруашылығын дамытуға; минералды тыңайтқыштар, пестицидтер және суармалы судың құнын арзандатуға бағытталады», - деп мәлімдеді Асқар Жүсібәлиев.Басқарма басшысы атап өткендей, Мемлекет басшысының елімізде тұқым шаруашылығын дамыту туралы тапсырмасына сәйкес 2024-2028 жылдарға арналған кешенді жоспар бекітілді. Жоспарға сәйкес өңірлерде ауыл шаруашылығы дақылдарының элиткалық тұқым үлесін көтеру көзделген. Бұл мақсатта облыстың астықты аудандары Әйтеке би, Қарғалы, Мәртөк, Хромтау аудандарында алдыңғы қатарлы шаруашылықтар базасында тұқым шаруашылығы субъектілерін құру бойынша жұмыстарды ұйымдастыру қажет.Қолданыстағы субсидиялау тетігін пайдалана отырып, элиталық тұқымға субсидияланатын егіс көлемін 15-тен 30%-ға, бірінші репродукциялы тұқымға 20-дан 40%-ға дейін ұлғайту ұсынылды. Бұл өз кезегінде тұқым өндірісін ұлғайтуға ынталандырып, шаруашылықтардың сапалы тұқымға қолжетімділігін арттырады.Облыс әкімі егіс науқанына дайындықты жылдамдатуды және белгіленген мерзімдер аясында барлық қажетті жұмысты орындауды тапсырды. Сондай-ақ оларға аталған төрт ауыл шаруашылығы ауданында жетекші шаруашылықтар базасында тұқым шаруашылығы субъектілерін құруды ұйымдастыру тапсырылды.«Барлық дайындық жұмыстары уақытында аяқталуы керек және біз ауыл шаруашылығы өндірушілерінің тұқымдарды, техниканы және отынды қоса алғанда, қажетті ресурстармен қамтамасыз етуіміз керек. Тұқым жинау мәселесімен айналысуға тиіспіз. Қорды дәл жоспарлаған жөн. Аудан әкімдері картоп пен көкөніс дақылдарын отырғызу алаңдарын кеңейту, шаруашылықтарды тарту және әсіресе суармалы жерлерді пайдалану мәселесін пысықтауы керек. Бұл өңірдің өнімділігін арттыру және азық-түлік қауіпсіздігін қамтамасыз ету үшін маңызды қадам», - деп атап өтті Асхат Шахаров.Ақпарат көзі : https://www.gov.kz/memleket/entities/aktobe/press/news/details/935135

Қарғалы ауданы Петропавл ауылының маңында су тасқынына қарсы іс-шаралар аясында жағалауды нығайту жұмыстары жүргізілді. Өңір басшысы Қарғалы ауданына жасаған сапарында жұмыстардың орындалу барысымен танысты. Петропавл ауылы Жақсы Қарғалы өзенінің жағасында орналасқан. Сондай-ақ, елді мекеннен бір шақырым жерде №2 бөгет бар. Су тасқыны кезінде су басуды болдырмау үшін ауылдан 2500 метр қашықтықта жағалауды нығайту жұмыстары жүргізілді. Желтау ауылдық округінің әкімі Азамат Рзагулов Петропавлда 2,5 мыңнан астам адам тұратынын, 60-тан астам үй бар екенін айтты. Былтырғы көктемде өзендегі су деңгейі көтерілген, бірақ ауылға су кірген жоқ. Жазда суды бұру жұмыстары жүргізіліп, биіктігі 1,5 метр және ені 3 метрлік топырақтан тығыз үйінді салынған. Жұмыстар аяқталды. Сонымен қатар, өзен арнасы тазартылды. Бөгетті сумен толтыру үшін өзеннен бес шақырымдық канал салу жоспарлануда. Асхат Шахаров су тасқынына қарсы техника, қаптар мен құм дайындауды тапсырды. Сондай-ақ, әкім жергілікті тұрғындармен кездесті. Олар осы жазда Жездібай ауылында атқарылған жұмыстар мен салынған жаңа жол үшін алғыс білдірді. «Бүкіл облыс бойынша біз елді мекендердің кіреберіс жолын саламыз. Болашақта Петропавл маңынан өтетін республикалық трассаны жөндейміз. Ауылдың әлеуеті зор. Ең алдымен, облыс орталығына жақын орналасқаны тиімді. Ауыл кеңейіп, жаңа үйлер салынуда. Мұнда қажетті инфрақұрылым бар. Қазір су тасқынына дайындық аясында бүкіл облыс бойынша жағалауды нығайту жұмыстарын жүргізіп, бөгеттерді ретке келтіріп, өзен арналарын тазарттық. Барлық іс-шаралар су тасқыны қаупін азайту және тұрғындардың қауіпсіздігін қамтамасыз ету мақсатында өткізіледі», - деп қорытындылады әкім. Ақпарат көзі : https://www.gov.kz/memleket/entities/aktobe/press/news/details/938554

Астана қаласы әкімдігінің «Жастар» театры Қазақстанның Еңбек Ері Әкім Таразидің «Жолы болғыш жігіт» пьесасын сахналады. Мемлекет басшысы Қасым-Жомарт Тоқаев 2025 жылды «Жұмысшы мамандықтар жылы» деп жариялады, деп хабарлайды елорда әкімдігінің ресми сайты.Спектакльдің қоюшы режиссері – мәдениет саласының үздігі Нұрфат Вахитов. Оның айтуынша, елу жылдан астам уақыт бұрын жазылған туындының түпнұсқадағы тілі, айтар ойы, құрылымы сақталып, тек қазіргі заманға сай өзгерістер енгізілген.«Спектакльдің негізгі айтар ойы – қазіргі жастардың жаңашыл идеяларын жүзеге асыруы үшін қолдау көрсету маңыздылығы. Олардың мүмкіндіктерін арттырып, қоғамға пайда әкелетін бастамаларын дамыту жолдары қарастырылады. Биыл «Жұмысшы мамандықтар жылы» болғандықтан, спектакльде жұмыскерлердің рөлі де ерекше көрсетіледі. Сонымен қатар, ауыл шаруашылығын дамытудың жаңа мүмкіндіктері туралы ой қозғалады», – дейді Нұрфат Вахитов.Автордың жары, көрнекті жазушы-драматург, Абай атындағы Мемлекеттік сыйлықтың лауреаты Роза Мұқанова спектакльді тамашалап, оң бағасын берді.«Жастар» театры осы шығарманы толыққанды түсіне ала ма, астарлы мағыналарды жеткізе ала ма, Кірпішбай мен Асау Бөкеннің бейнелері қалай шығады деген күмәнмен келген едім. Бірақ спектакльді көргеннен кейін бұл күмәнім түгелдей жойылды. ХХІ ғасырда тағы да Кірпішбаймен кездесіп отырмыз. Қоғам өзгермеді. Бірақ соны өзгертетін күш – реформатор Асау Бөкендер. «Жаңа Қазақстан», «Әділетті қоғам», «Еститін мемлекет» – бұл Асау Бөкен. Бізге осындай кейіпкерлер керек. Спектакль жастарға рух беретіндей сахналанды», – деді Роза Мұқанова.«Жастар» театрында басты кейіпкер Асау Бөкенді актер Ербол Тілеукенов сомдайды. Ақпарат көзі : https://www.gov.kz/memleket/entities/astana/press/news/details/937639

Қыс мезгілі басталғалы елорданың коммуналдық қызметтері тәулік бойы үздіксіз жұмыс істеп келеді. Қалада қар шығару жұмысы күндіз-түні жалғасып жатыр, деп хабарлайды Астана әкімдігінің ресми сайты.14 ақпан күндізгі ауысымда қар тазалау жұмысына 2557 жол жұмысшысы мен 1274 бірлік арнайы техника жұмылдырылды.14-іне қараған түні елордадан 2117 рейс арқылы қар полигондарына 28 мың текше метрден астам қар шығарылды.Қыс мезгілінің басынан бері 465 703 ауыр жүк көлігімен қаладан 5,7 миллион текше метрден астам қар шығарылды.Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.Төтенше жағдай туындаған кезде «112» нөміріне хабарласыңыз.Ақпарат көзі : https://www.gov.kz/memleket/entities/astana/press/news/details/938072

Қ. Мұхамедханов атындағы №90 гимназияда «Біртұтас тәрбие: ұлттық құндылықтар мен заманауи қоғам үндестігі» тақырыбында республикалық семинар өтті, деп хабарлады елорда әкімдігінің ресми сайты.Семинарға ҚР Оқу-ағарту министрлігінің, Ы. Алтынсарин атындағы Ұлттық білім академиясының өкілдері, облыстардың, Астана, Алматы және Шымкент қалаларының Әдістемелік орталықтары басшыларының орынбасарлары, әдіскерлері, мемлекеттік және жеке меншік білім беру ұйымдары мамандары қатысты.«Бұрын «Тәрбие тұжырымдамасы» бойынша экологиялық, дене тәрбиесі, ұлттық тәрбие, адамгершілік тәрбие деп бөліп-бөліп қарастыратынбыз. Ал 2024-2025 оқу жылында Оқу-ағарту министрлігінің, Ы.Алтынсарин атындағы ұлттық білім академиясының жетекшілігімен каскаттық әдіс бойынша «Біртұтас тәрбие» бағдарламасы қайта жаңғыртылып, оқу-тәрбие процесіне қайта енгізілген болатын. Соған байланысты әр өңірдегі білім басқармалары мен әдістемелік орталықтардың басшылары, орынбасарлары және мамандары қажетті білім алған еді. Олар кейін өз өңіріндегі мамандарды оқытты. Осы процесті әрі қарай жалғастыру мақсатында және «Біртұтас тәрбие» бағдарламасы негізінде ұлттық құндылықтарды пәнге кіріктірудің тиімді жолдарын ұйымдастыру бойынша республикалық семинар өткізіп отырмыз. Семинарға әр өңірден 3 делегаттан келіп отыр, жалпы 60-қа жуық қатысушы бар», - деді Астана қаласы Білім басқармасы Әдістемелік орталығы басшысының орынбасары Жангелді Әмірғали.Семинар аясында әр өңірден келген мамандар бағдарлама бойынша бірлесіп жұміс істеудің әдіс-тәсілдерін талқылау үшін педагогикалық хакатон өткізілді. Одан басқа түрлі тақырыптар бойынша тәжірибелік алаңдар жұмысы ұйымдастырылатын болады.Айта кетейік, семинардың келесі күні Qundylyq talks форматында пленарлық сессия жұмысы өтпек.Ақпарат көзі : https://www.gov.kz/memleket/entities/astana/press/news/details/938161

8-13 ақпан аралығында Өскемен қаласында шайбалы хоккейден ерлер арасындағы VI Қысқы Спартакиаданың жеңімпаздары анықталды, деп хабарлайды елорда әкімдігінің ресми сайты.Бес күнге созылған тартысты додада Шығыс Қазақстан облысының командасы (4 жеңіс) алтын медальға ие болды. Астана қаласының хоккейшілері 3 жеңіс, 1 жеңіліспен Спартакиаданың күміс жүлдесін еншілесе, Алматы қаласы (2 жеңіс, 2 жеңіліс) үздік үштікті қорытындылады.ШҚО мен Астана қаласының хоккейшілері 2013, 2017, 2025 жылдың шешуші ойындарында тағы жолықты. Финалдық матчта елордалықтар жылдам екі шайба соғып, біршама уақыт алда тұрған еді. Алайда жанкүйерлердің қызу қолдауымен алаң иелері екінші кезеңде алға шығып, 6:2 есебімен жеңіске жетті.Жалпы, турнирде Астана, Алматы, Қарағанды, Солтүстік Қазақстан және Шығыс Қазақстан облыстарынан 97 хоккейші бақ сынады.Ақпарат көзі : https://www.gov.kz/memleket/entities/astana/press/news/details/938292

Астанада өнерлі зейнеткерлерінен құралған «Сағыныш сазы» ансамбліне 5 жыл толды. Осыған орай ұжым елордада арнайы концертін өткізді, деп хабарлайды қала әкімдігінің ресми сайты.Ансамбль өз жұмысын 2019 жылдың желтоқсан айында Сарыарқа ауданына қарасты қалалық ардагерлер ұжымында бастаған. Өнер ұжымының репертуары алғаш құрылған кезде халық әндерін орындаудан басталған еді. Үнемі шығармашылық ізденісте жүрген ансамбльдің репертуарында 80-ге жуық ән бар.Жақында өнер ұжымы өзінің бес жылдық мерейтойына орай есептік концерт ұйымдастырып, өнерсүйерді қауымды әуезді әндерімен таңқалдырды. Концерттік бағдарламада терме, халық және эстрадалық әндермен қатар, күй орындалды.«Біздің «Сағыныш саз» ансамблінде 63-78 жас аралығындағы 20-ға жуық өнерлі зейнеткер бар. Олар өз репертуарларын үнемі жаңартып тұрады. Соңғы кезде эстрадалық жанрды жаңғыртып келеді. Олардың орындауындағы «Қайдасың», «Махаббат мұңы», «Сағыныш сазы», «Есіл ағады», «Тамшылар» т.б әндері көрермен көңілінен орын алуда. Ансамбль өнерпаздары қаламызда өтетін мәдени іс-шараларға белсене қатысып, өнер жолындағы жүкті бірлесе көтеріп, киелі сахна төрінде өнер көрсетуден жалыққан емес» - деп сөзін түйіндеді Есіл ауданы бойынша БҰӨСО-ның мәдени ұйымдастырушысы Гүлшат Әлекешқызы.Бүгінде «Сағыныш сазы» ансамблі өз замандастарының сүйікті әншілеріне айналып, қала тұрғындарын өнердегі жетістіктерімен қуантып келеді.Атап айтқанда, 2024 жылы Түркістан қаласында өткен «Astana Stars» «TURKESTAN GRAND FESTIVAL» байқау-фестиваліне қатысып, бас жүлдені жеңіп алды.Ақпарат көзі : https://www.gov.kz/memleket/entities/astana/press/news/details/938298

«AMANAT» партиясының Астана қалалық филиалы жанындағы Білім және денсаулық мәселелері бойынша қоғамдық кеңесінің көшпелі отырысы өтті, деп хабарлады елорда әкімдігінің ресми сайты.Кеңес мүшелері елордадағы Техникалық колледждің тыныс-тіршілігімен, өндірістік шеберлік сыныптары мен зертханалардың жұмысымен танысты.«Лифт шаруашылығы және эскалаторлар» арнайы пәндер оқытушысы Гүлнәр Кенжебекова «Оқу полигоны» шеберлік сағатында «Көтергіш-көлік жабдықтарын пайдалану және қызмет көрсету» туралы баяндады.\«Машина жасау технологиясы» өндірістік оқыту шебері Дәулет Кеңесұлы «Аймақтық құзыреттілік орталығы» шеберлік сағатында «Сандық бағдарламалы басқару станоктардағы жұмыстардың қыр-сырын түсіндіріп берді.Сондай-ақ өзге де оқытушылар өз тәжірибелерін бөлісті.Мәселен, «CББ бағдарламалау виртуалды сыныбы» зертханасында өткен шеберлік сағатында өндірістік оқыту шебері Бақыт Сариева, ал өндірістік оқыту шебері Ғалымжан Бижігітов «Индустрия 4.0» шеберлік сағатында келушілерге жұмысшы мамандығының маңыздылығын айтып, өз салалары бойынша жан-жақты әңгімеледі.Бұдан әрі колледж студенттері станоктармен, түрлі жабдықтармен қалай жұмыс істейтінін көрсетті.«AMANAT» партиясы Астана қалалық филиалының атқарушы хатшысы Мұхаммед Болысбектің айтуынша, биыл Жұмысшы мамандықтар жылы болғаннан кейін қандай да бір мәселелер болса, оны көтерген дұрыс. Ол мәселе шешімін табады.«Колледждердегі мамандықтар бойынша қоғамда өзгеше көзқарас бар. Біз сол теріс көзқарасты жоюымыз қажет. Маман иелерінің мәртебесін көтеріп, насихаттауымыз керек. Қоғамдық кеңес мүшелері бүгінгі кездесуден алған әсерлерін бөлісіп жатса, нұр үстіне нұр болар еді. Алда барлық техникалық колледжді аралап шығу жоспарымызда бар. Кейін қорытынды жиын өткізуіміз керек. Оған Мәжіліс пен мәслихат депутаттарын, барлық колледж директорларын шақырып, көтерілген мәселелерді айтып, сол тарапта жұмыс істеуіміз қажет», - деді Мұхаммед Болысбек.Осы орайда «AMANAT» партиясының Астана қалалық филиалы жанындағы Білім және денсаулық мәселелері қоғамдық кеңесінің мүшелері, колледж басшылары мен оқытушылар өздерін мазалайтын проблемаларды ортаға салып, оның шешілу жолдарын бірге қарастырды.Ақпарат көзі : https://www.gov.kz/memleket/entities/astana/press/news/details/938305

Астана қаласындағы Т.Айбергенов атындағы №16 орта мектептің «Жас сақшы» сыныбы iKomek 109 орталығының қызметімен танысты, деп хабарлады елорда әкімдігінің ресми сайты.Жұмысшы мамандықтар жылы аясында ұйымдастырылған іс-шарада 6-сынып оқушылары iKOMEK109 орталығының қала тыныштығын сақтауға қалай үлес қосатынын өз көздерімен көріп, атқаратын рөлі туралы мол мағлұмат алды.Ұйымдастырушылардың айтуынша, орталыққа оқушылар жиі келіп тұрады.«Оқушылар 24/7 режимінде желіде болатын операторлардың жұмысын, жедел әрекет ету арқылы тұрғындардың қауіпсіздігін қамтамасыз етуге атсалысатын видеобақылау операторларының қызметін көрді. Ең бастысы, оқушыларға әр азамат қоғамдық жауапкершілік арқылы өз ортасына, тұрып жатқан жеріне, елінің дамуына қандай зор үлес қоса алатынын жеткізе алдық деп есептеймін», - деді Астана қаласы әкімдігінің iKomek 109 «Қалалық мониторинг және жедел әрекет ету орталығы» басшысы Асқар Тақсымов.Күніне қала тұрғындарынан орта есеппен 6 мың қоңырау түсетін орталықтың қарбалас тыныс-тіршілігін танысқан оқушылар қоғамдық жауапкершіліктің маңыздылығын түсінгендей.Ал бұл, өз кезегінде, жас ұрпаққа тәртіп сақтау мен қауіпсіздікті қамтамасыз ету мәселелеріне саналы түрде қарауға мүмкіндік бермек. Ақпарат көзі : https://www.gov.kz/memleket/entities/astana/press/news/details/938307

Астана қаласында Алматы ауданы Ардагерлері кеңесінің V пленумы өтті. Жиынға Астана қаласы ардагерлер Кеңесінің төрағасы Сансызбай Есілов, Алматы ауданының әкімі Рүстем Тәуекелов, Астана қаласы мәслихатының депутаты, «AMANAT» партиясы Алматы ауданы филиалының төрағасы Азамат Айтқожин және Астана қаласы Мәслихатының депутаттары мен аудан ардагерлер Кеңесінің мүшелері қатысты, деп хабарлайды елорда әкімдігінің ресми сайты.Өмірден өткен ардагерлерді бір минуттық үнсіз еске алудан кейін пленум отырысын Алматы ауданы ардагерлер кеңесі төрағасы Марат Мұстафин ашып, аудандық ардагерлер кеңесінің 2024 жылы атқарған жұмысы мен 2025 жылға арналған міндеттері туралы баяндама жасады.«Өткен жыл еліміздің өмірінде маңызды оқиғалар көп болды. Дегенмен ардагерлеріміз алға қойған міндеттерді абыроймен атқарды. Былтырғы жылы біздің Алматы ауданында зейнеткердің саны 36 мыңға жетті. Олардың 8 мыңнан астамы Алматы ауданы ардагерлер Кеңесінің құрамында болса, 66-сы бастауыш ардагерлер ұйымдарына біріктірілген. Аудан ардагерлері Кеңесінде 4 Ұлы Отан соғысының және 267 тыл ардагерлері бар. Төртеуі ҚР-ның алдындағы ерекше еңбегі үшін марапатталған, және «Қазақстанның Еңбек Ері» сыйлығын алған 4 адам бар», – деген Марат Кәрімұлының баяндамасынан кейін талқылау басталып басқа да қатысушыларға сөз берілді.Осылайша күн тәртібінде ардагерлердің бастауыш ұйымдардың жаңа төрағалығын жаңа құрылған Сарайшық ауданына тапсыру және оларды Алматы аудандық ардагерлер Кеңесінің мүшелігінен шығару сияқты мәселелер қаралып, ардагерлер кеңесінің 2024 жылы атқарған жұмыстарының қорытындысы шығарылып, 2025 жылғы міндеттері бекітілді.Ақпарат көзі : https://www.gov.kz/memleket/entities/astana/press/news/details/938310