2025 жылдың 14–15 қарашадағы ҚР Президенті Қасым-Жомарт Тоқаевтың Өзбекстанға мемлекеттік сапары аясында ҚР Әділет министрлігі мен Өзбекстан Республикасы Әділет министрлігі арасындағы ынтымақтастықты нығайту мақсатында 2026–2027 жылдарға арналған ынтымақтастық бағдарламасына қол қойылды.Аталған бағдарлама зияткерлік меншік саласында өзара әрекеттесуді, сот сараптамасын цифрландыру саласындағы зерттеу және тәжірибе алмасуды, сондай-ақ нотариат саласындағы цифрландыру мәселелерін және өзге де бағыттар бойынша ынтымақтастықты қамтиды.Осы екіжақты құжатқа қол қоюдан бұрын қалыптасқан ынтымақтастық негіздерін одан әрі нығайтуға және екі ведомство арасындағы әріптестікті кеңейтуге ықпал ететін маңызды қадам болмақ.Ақпарат көзі : https://www.gov.kz/memleket/entities/adilet/press/news/details/1106092?lang=kk

Жыл басынан бері облыс бойынша акцияға 800 мыңға жуық адам, 8 836 кәсіпорын мен ұйым қатысып, 4 мыңға жуық техника жұмыс істеген. 11 мың тоннадан астам қоқыс жиналған. Сондай-ақ 109,8 мың ағаш егіліп, 3 048 көпқабатты тұрғын үйдің ауласы, 55 саябақ пен сквер, 1090 тарихи-мәдени ескерткіш және 1055 әлеуметтік нысан тазартылған.– "«Таза Қазақстан» республикалық экологиялық акциясы аясындағы іс-шаралар жоспарға сәйкес орындалуда. Онлайн-платформа арқылы да жұмыс жүргізілуде. Бүгінгі күнге дейін Telegram-ботқа 1123 өтініш келіп түсті, оның 880-і орындалды, 233-і кері қайтарылды, ал 10-ы орындалу үстінде. Бүгін осы жылғы соңғы сенбілікті өткіздік. Ауа райының қолайсыздығына бойланысты акция аясындағы жұмыстарды келесі жылы жалғастыратын боламыз", – деді облыстық тұрғын үй-коммуналдық шаруашылық және абаттандыру басқармасының көгалдандыру және абаттандыру бөлімі басшысы Бекзат Кәрімов.– "Бүгін әріптестерімізбен «Таза Қазақстан» экологиялық акциясы барысында өткізіліп жатқан сенбілікке қатыстық. Мұндай шаралардан қалыс қалған емеспіз. Еліміздің таза болуына әрбір азамат үлесін қосуы керек", – деді шараға қатысқан Ермек Ибрагимов.Ақпарат көзі : https://www.gov.kz/memleket/entities/almobl/press/news/details/1106078?lang=kk

Ақтау гарнизонында «Әскер аналар көзімен» акциясы аясында теңіз жаяу әскерлерінің туыстарымен Қорғаныс министрінің тәрбие және идеологиялық жұмыс жөніндегі орынбасары, вице-адмирал Серік Борамбаев кездесті.Іс-шараға «Батыс» өңірлік қолбасшылығы әскерлерінің қолбасшысы генерал-майор Бауыржан Артықов, Ақтау гарнизонының әскери прокуроры әділет майоры Саян Акиров, 25744 әскери бөлімінің қолбасшылығы, әскери полиция мен әскери-тергеу басқармасының өкілдері қатысты. Қонақтарға сарбаздардың қызмет жағдайлары, тұрмысы мен оқу процесінің ұйымдастырылуы туралы жан-жақты ақпарат берілді. Олар казармаларды, оқу корпустарын, жаттығу сыныптарын және ақпараттық-тәрбие жұмысы жүргізілетін бөлмелерді аралады.Бұдан бөлек, бөлімше басшылығы жиналыс өткізді. Үздік танылған сарбаздардың ата-аналарына Отан қорғаушыларды тәрбиелегені үшін алғыс ретінде грамота мен гүлдер табысталды. Сарбаз асханасында ата-аналар мен жауынгерлерге ортақ түскі ас ұйымдастырылды. Бұл ата-аналарға балаларының тамақтану жағдайын көріп қана қоймай, олармен тілдесіп, жаңалықтарды бөлісуге мүмкіндік берді.Батыс Қазақстан облысынан әскер қатарына шақырылған сарбаздың анасы өз әсерін былай жеткізді: – Барлығын өз көзімізбен көруге мүмкіндік жасаған ұйымдастырушыларға алғыс айтамын. Өзімізді қызықтырған барлық сұрақтарға жауап алдық. Сондай-ақ, ұлымның жетістіктері үшін бригада командирінен грамота алу мен үшін қуанышты жәйт. Барлық жаңадан шақырылған сарбаздарға қызметте табыс, ал аналарға сабыр тілеймін, – деді Үміт Бахитова.Іс-шараны ұйымдастыруға Маңғыстау облысы бойынша «Аналар жүрегі» сарбаз аналары комитетінің өкілі Гүлмира Жанысбаева ерекше қолдау көрсетті. Ол көптеген жылдар бойы әскер мен қоғам арасындағы байланысты нығайтуға белсенді атсалысып, әскери қызметшілердің отбасыларына көмек көрсетіп, Қазақстан әйелдерін патриотизм мен азаматтық жауапкершілікке баулуға үлес қосып келеді.Акция басшылықтың әскер мен әскери қызметшілердің отбасылары арасындағы ашық диалогтың маңызын, сондай-ақ сарбаздардың бейімделуі мен қызмет етуіне барынша қолайлы жағдай жасауға ұмтылысын айқын көрсетті.Ақпарат көзі : https://www.gov.kz/memleket/entities/mod/press/news/details/1106074?lang=kk

14 қарашада Екінші ауыл шаруашылығы қызметкерлерінің форумы өтті, ол Жұмысшы мамандықтар жылына арналды. Шараға еліміздің барлық өңірлерінен аграрлық сала мамандары жиналды. Форум алаңында АӨК-ті дамыту бағыттары, соның ішінде цифрлық технологияларды енгізу және ауыл шаруашылығы өндірісінің тиімділігін арттыру мәселелері талқыланды. Мемлекет басшысы отандық өндірушілер ұсынған заманауи цифрлық шешімдер көрмесімен танысты.Форумның маңызды бөлігі — мемлекеттік наградаларды табыстау рәсімі болды. Президент Қасым-Жомарт Тоқаев ауыл шаруашылығы саласының 30 үздік қызметкерін марапаттап, олардың көп жылдық еңбегіне және АӨК дамуына қосқан үлесіне алғысын білдірді.Жоғары мемлекеттік наградаларға Қостанай облысының өкілдері де ие болды:•Александр Кисель, Қостанай ауданы «Абиль» шаруа қожалығының бас агрономы, «Еңбек даңқы» III дәрежелі орденімен марапатталды.•Тұрсынбай Садвакасов, Қостанай қаласындағы «Уйкескен» ЖШС директоры, сондай-ақ «Еңбек даңқы» III дәрежелі орденін алды.Президенттің мемлекеттік наградаларды табыстауы – жерлестеріміздің кәсіби шеберлігіне, адалдығына және өңірдің агроөнеркәсіптік кешенін дамытуға қосқан зор үлесіне берілген жоғары баға. Бұл марапат Қостанайлық ауыл еңбеккерлерінің еңбегі ең жоғары деңгейде құрметтелетінін айқын көрсетеді.Форум ауыл шаруашылығының маңыздылығы мен стратегиялық рөлін тағы бір мәрте дәлелдеп, сала үздіктерінің еңбегі лайықты бағаланған маңызды алаңға айналды.Ақпарат көзі : https://www.gov.kz/memleket/entities/kostanay/press/news/details/1106033?lang=kk

Токио, 2025 жылғы 14 қараша – Қазақстан Республикасы Сыртқы істер министрінің орынбасары Әлібек Бақаев Қазақстан мен Жапония сыртқы саяси ведомстволары арасындағы саяси консультациялардың кезекті отырысына қатысты.Жапонияның Мемлекеттік сыртқы істер министрі Аяно Кунимицумен өткен кездесуде тараптар екіжақты ынтымақтастықтың қазіргі жағдайы мен даму перспективаларын, қол жеткізілген уағдаластықтардың орындалуын және алдағы іс-шаралар кестесін талқылады. А.Кунимицу Қазақстанның Орталық Азия өңіріндегі маңызды рөлін атап өтіп, Токионың Астанамен кеңейтілген стратегиялық серіктестікті одан әрі тереңдетуге бейілділігін растады.Жапония Сыртқы істер министрлігінің Орталық Азия бойынша Арнайы өкіл, Елші Масаки Ишикавамен жүргізілген келіссөздер барысында екіжақты қатынастардың өзекті мәселелері мен шарттық-құқықтық базаны кеңейту, сондай-ақ ынтымақтастықтың визалық және консулдық-құқықтық аспектілері қарастырылды. «Орталық Азия + Жапония» Диалогының бірінші саммитіне дайындық барысында ерекше мән берілді. Сонымен қатар қауіпсіздік саласындағы ахуалды қоса алғанда, халықаралық және өңірлік күн тәртібіндегі негізгі мәселелердің кең ауқымы бойынша терең пікір алмасу орын алды.Бұдан басқа, Ә.Бақаев Жапонияның Экономика, сауда және индустрия министрлігінің өкілдерімен кездесу өткізіп, оның барысында Қазақстандағы жапон компанияларының инвестициялық қызметін кеңейту перспективалары талқыланды.Ақпарат көзі : https://www.gov.kz/memleket/entities/mfa/press/news/details/1106041?lang=kk

Радиоэлектроника және байланыс әскери-инженерлік институтында мерзімді қызметтегі сарбаздарды запасқа шығаруға арналған салтанатты рәсім өтті.Әскери жоғары оқу орнының күзгі шақырылымдағы қарауыл ротасының жауынгерлері өз міндеттерін абыроймен атқарып, қызметтерін лайықты деңгейде аяқтады.Олардың еңбегі еленіп, әрбір сарбазға алғыс хаттар мен бағалы сыйлықтар табысталды. Жыл ішінде қызметімен ерекшеленген әскери қызметшілерге кезекті әскери атақтар берілді.Бұл шақырылымда жауынгерлік және кәсіби даярлықта жоғары нәтижелер көрсеткен алты сарбаз білім гранттарына ие болды. Оның бесеуі Қазақстан Республикасы Қорғаныс министрлігінің әскери жоғары оқу орындарында білімін жалғастырса, біреуі әл-Фараби атындағы Қазақ ұлттық университетіне оқуға түсетін болды. Сонымен қатар төрт сарбаз Қарулы күштер қатарында келісімшарт негізінде қызметін жалғастыруға шешім қабылдады.– Қызмет мен үшін маңызды өмірлік белес болды. Ол маған азаматтық борышымды өтеуге мүмкіндік беріп, жоғары оқу орнына жол ашты. Қолдау көрсеткені және өсуге жағдай жасағаны үшін Қорғаныс министрлігіне алғыс айтамын, – деді мерзімді қызметтің қатардағы жауынгері Диляр Зияудинов.Радиоэлектроника және байланыс әскери-инженерлік институты қарауыл ротасы құрылғаннан бері мерзімді қызметтегі он төрт сарбаз білім грантына ие болды. Он бесі Қорғаныс министрлігінің әскери жоғары оқу орындарына оқуға түскен, ал бесеуі келісімшарт бойынша қызметін жалғастырған.Ақпарат көзі : https://www.gov.kz/memleket/entities/mod/press/news/details/1106017?lang=kk

Қазақстан Республикасының Ұлттық валютасы күнін қорғаныс ведомствосының қаржыгерлері де кәсіби мерекесі ретінде атап өтеді.Қарулы күштердің қаржылық қамтамасыз ету жүйесі – сан алуан үдерістерден құралған күрделі, әрі тұтас құрылым. Ол армияның барлық тыныс-тіршілігін қамтиды. Әскердің материалдық-техникалық жарақтануы, инфрақұрылымның дамуы мен оны ұстап тұру, әскери қызметшілерді лайықты әлеуметтік пакетпен қамтамасыз ету, кәсіби әскери білім беру, сапалы медициналық қызмет көрсету – мұның бәрі қаржыгерлердің үйлесімді еңбегінің нәтижесі.Әскери қаржыгерлердің табанды еңбегінің арқасында әскери ведомствода мемлекеттік жоспарлау, материалдық ресурстар есебі және қаржылық қамтамасыз ету бойынша заманауи жүйе қалыптасты. Оның негізін бюджетті жоспарлау процесі құрайды. Бұл сала жылдар бойы түбегейлі жаңарып, тиімділікті арттыру жолында үлкен өзгерістерді бастан кешірді.Көпдеңгейлі қаржылық қамтамасыз ету жүйесі әскери шығыстарды реттеуге, әскердің қажеттіліктерін дер кезінде қанағаттандыруға, қаржы жоспарының дайындалуы мен орындалуының әр кезеңінде бюджет қаражатының жұмсалуын бақылауға мүмкіндік береді.Кәсіби мереке қарсаңында қызметтік міндеттерін мінсіз атқарып, үлгілі қызметімен ерекшеленген бірқатар әскери қаржыгерлер «Ел қорғаны» ведомстволық медалімен және «Қаржы қызметінің үздігі» төсбелгісімен марапатталды. Ең үздік мамандарға басшылық тарапынан грамоталар, алғыс хаттар және бағалы сыйлықтар табысталды.Ақпарат көзі : https://www.gov.kz/memleket/entities/mod/press/news/details/1106000?lang=kk

Қабыл, 2025 жылғы 13 қараша – Ауған халқына соңғы жойқын жер сілкіністерінен кейін қолдау көрсету мақсатында Қазақстан Республикасы Ауғанстанға құрамында 13 дәрігері бар (хирургтер, нейрохирургтер, травматологтар және т.б.) гуманитарлық миссияны жолдады.Сонымен қатар Ауғанстанға 18 тонна дәрі-дәрмек, медициналық құрал-жабдықтар, шатырлар және алғашқы қажеттіліктегі өзге де заттар түрінде гуманитарлық көмек көрсетілді.Қабыл қаласына барған медициналық миссия мен гуманитарлық жүкті Қазақстанның Ауғанстандағы Уақытша сенімді өкілі Ғазиз Ақбасов, сондай-ақ Ауғанстан Денсаулық сақтау министрлігі мен Табиғи апаттарға қарсы күрес жөніндегі ұлттық агенттігінің басшылық өкілдері қарсы алды.Қазақстандық медициналық бригада ауған әріптестерімен бірге шұғыл медициналық көмекке мұқтаж жандарға жедел жәрдем көрсетеді және консультациялық қолдау жүргізеді.Гуманитарлық көмек Ауғанстандағы ҚР Елшілігінің, ҚР Төтенше жағдайлар, Денсаулық сақтау және Қорғаныс министрліктерінің, сондай-ақ «KazAID» халықаралық даму агенттігінің қолдауымен жүзеге асырылды.Бұл миссия Қазақстанның қиын кезеңде ауған халқымен ынтымақ қағидаттарына берік ұстанымын көрсетеді.Ақпарат көзі : https://www.gov.kz/memleket/entities/mfa/press/news/details/1105902?lang=kk

Алматы облысында жастардың жоғары білімге қолжетімділігі артып келеді. Биыл мектеп бітірген 17 940 түлектің жартысына жуығы – 7 681 жас мемлекеттік грант есебінен жоғары оқу орындарына қабылданған. Бұл көрсеткіш соңғы жылдары өңірдің білімге басымдық беріп отырғанын айғақтайды.Грант иегерлерінің ең көп саны Талғар ауданында тіркелді. Сондай-ақ Іле, Еңбекшіқазақ, Қарасай аудандары мен Қонаев қаласы да жоғары нәтижелер көрсеткен.Сала мамандарының айтуынша, биыл педагогикалық бағыт ең танымал мамандықтардың бірі болған – 1 440 түлек осы саланы таңдаған. Одан кейін 770 жас медициналық мамандықтарға, 543-і аграрлық бағытқа құжат тапсырған. Қалған 4 928 түлек инженерия, IT және әлеуметтік-экономикалық мамандықтарды таңдаған.Өңір үшін биылғы маңызды жаңалықтардың бірі – 27 түлектің Қытай Халық Республикасындағы Синьцзян университетінен тегін білім алуға грант иеленуі. Шетелге аттанған жастар Талғар, Іле, Қонаев, Еңбекшіқазақ, Қарасай, Жамбыл аудандары мен Алматы қаласынан. Бұл – Алматы облысы мен Қытай арасындағы ынтымақтастық нәтижесінде жүзеге асып жатқан халықаралық білім беру бағдарламасының бір бөлігі.Шетелде білім алып жүрген студенттердің өзі бұл мүмкіндікті үлкен қолдау деп бағалайды.«Алматы облысы әкімдігі берген гранттың арқасында Қытайда оқуға мүмкіндік алдым. Бұл – сапалы білім алып, елге келіп өзім таңдаған мамандық бойынша қызмет етуге ашылған жол», – дейді Синьцзян университетінің студенті Нұрәли Қыдырхан.Синьцзян медициналық университетінде оқып жүрген Қарақат Тұрғынбай да жағдайдың жақсы екенін айтады.«Бөлмеде екі студент тұрамыз, оқу базасы өте мықты. Түрлі елден келген жастармен танысып, тәжірибе алмасып жүрміз. Бұл болашақта білікті маман болуға үлкен ықпал етеді», – дейді ол.Синьцзян қаржы және экономика университетінің студенті Аяулым Арыстанбекова халықаралық білім берудің жаңа мүмкіндіктер ашатынын атап өтті.«Әлемдік деңгейдегі университетте оқу – үлкен мәртебе. Алматы облысы мен Қытай арасындағы келісімдердің нәтижесінде көптеген студент тегін оқып жатыр. Бұл біліммен елге оралып, Отанға қызмет етуге ниеттіміз», – дейді ол.Сонымен қатар, облыс әкімінің жергілікті бюджет есебінен бөлінген 30 гранты да биыл талапкерлерге қолжетімді болды. Оның 17-сі медицина саласына (оның ішінде 12 – интернатура), 7 грант аграрлық бағытқа, 6 грант педагогикалық мамандықтарға берілген.Өңір билігінің айтуынша, бұл гранттар Алматы облысының кадрлық әлеуетін арттыруға, ауылдық өңірлерге білікті ұстаздар мен дәрігерлерді тартуға және жастардың жоғары білімге қолжетімділігін кеңейтуге бағытталған.Ақпарат көзі : https://www.gov.kz/memleket/entities/almobl/press/news/details/1105833?lang=kk

Бүгін Алматы облысында 42 шақырымдық «Ұзынағаш – Отар» жолының ашылуы өтті. Аталған жолдың іске қосылуымен магистралді жаңарту толығымен аяқталды. Енді Алматыдан Шымкентке дейінгі жол толық төрт жолақты болып, жүріп-тұру әлдеқайда ыңғайлы болмақ.Ашылу салтанатына ҚР Көлік вице-министрі Мақсат Қалиақпаров, Алматы облысы әкімінің орынбасары Рустам Исатаев және өңір ақсақалдары қатысты. Рәсімде қозғалысты бастау батырмасы басылып, жаңа жол арқылы алғашқы болып 15 көліктен тұратын автоколонна жүріп өтті.Биыл біз ел бойынша 13 мың шақырым жолда жөндеу және қайта жаңарту жұмыстарын жүргізу арқылы рекордтық нәтижеге қол жеткіздік. Бұл – Мемлекет басшысының қолдауы мен жол саласының қызметкерлерінің күнделікті атқарып жүрген ерен еңбегінің арқасы. Олар азаматтар үшін қауіпсіз, әрі ыңғайлы жолдар салып, өңірлердің дамуына жаңа мүмкіндіктер ашуда», – деді іс-шара барысында Көлік вице-министрі Мақсат Қалиақпаров.Сонымен қатар жолды ашу салтанатының аясында жобаны іске асыруға ерекше үлес қосқан жұмысшылар марапатталды. Оларға ведомстволық медальдар, Алғыс хаттар және Көлік министрлігінің Құрмет грамоталары табысталды.Айта кетейік, бүгін ашылған «Ұзынағаш – Отар» күре жолында негізгі құрылыс-монтаж жұмыстары өткен жылы басталып, небәрі екі жылда толық аяқталды. Жобаға 163 бірлік техника, 290 маман жұмылдырылып, екі асфальт-бетон зауыты мен төрт жол-құрылыс басқармасы жұмыс істеді.42 шақырымдық «Ұзынағаш – Отар» тасжолының ашылуымен Алматы мен Шымкент арасындағы жол толық төрт жолақты болып, жүріп-тұру әлдеқайда ыңғайлы, әрі қауіпсіз болмақ. Бұл магистральдің өткізу қабілетін арттырып, жол жүру уақытын қысқартады, қозғалыс қауіпсіздігін жақсартады және өңірлер арасындағы көлік байланыстарын нығайтып, Орталық Азия мемлекеттерімен экономикалық қатынастарды одан әрі күшейтері сөзсіз.Ақпарат көзі : https://www.gov.kz/memleket/entities/almobl/press/news/details/1105785?lang=kk

Алматы облысында қазақ тілі мен әдебиеті пәні мұғалімдерінің облыстық Тіл форумы өтті. Шараға өңірдің білім беру ұйымдары мен тіл оқыту орталықтарынан 150-ге жуық маман қатысты. Форум барысында педагогтер кәсіби біліктілікті арттыру, оқыту әдістемесін жетілдіру және цифрлық технологияларды тиімді пайдалану мәселелерін талқылады.Форум екі бөлімнен тұрды: TEDx форматына негізделген пленарлық жиын және тәжірибе алмасуға арналған секциялық сабақтар. Жиынның негізгі мақсаты – қазақ тілін оқыту сапасын арттыру, оқушылардың оқу және тілдік сауаттылығын дамыту, педагогтердің шығармашылық әлеуетін күшейту.Қатысушылар форумның мұғалімдерге жаңа әдістемелерді меңгеруге, озық тәжірибелермен бөлісуге және инновациялық тәсілдерді сабақ үдерісіне енгізуге мүмкіндік беретінін атап өтті.Қазақ тілі мен әдебиеті пәнінің мұғалімі Дарья Ерболатқызы функционалдық сауаттылық пен жасанды интеллектті қолдану мәселелерінің өзектілігін айтты:«Мен функционалдық сауаттылық секциясында спикер ретінде қатыстым. Әр мектептің тәжірибесін талдау, ЖИ-пен жұмыс жүргізу — қазіргі таңда өте маңызды тақырыптар», – деді ол.Бұл Тіл форумының Алматы облысында екінші мәрте ұйымдастырылуы. Биыл форумға 150-ден аса педагог қатысты.Алматы облысы Тілдерді дамыту басқармасының басшысы Салтанат Беспаева мұғалімдерге әдістемелік қолдаудың маңызын атап өтті:«Қазақ тілі мен әдебиеті пәні мұғалімдері заман талабына сай білім беруі қажет. Біз өз тарапымыздан жан-жақты әдістемелік көмек көрсетуге дайынбыз. Форумның басты мақсаты — қазақ тілінің тазалығын сақтап, оқыту сапасын арттыру», – деді ол.Халықаралық «Qazaq Tili» қоғамының президенті Рауан Кенжеханұлы білім саласындағы тіл оқытудың сапасы жалпы тіл саясатына әсер ететінін атап өтті:«Егер білім беру жүйесінде тіл оқыту ісі дұрыс жолға қойылса, түлектер қазақша сауатты сөйлеп, әдемі жаза алады. Бұл өз кезегінде тілдің басқа салаларда да кеңінен қолданылуына жол ашады», – деді ол.Шара барысында қазақ тілін дамытуға үлес қосқан ғалымдар мен тіл жанашырлары марапатталды. Ұйымдастырушылар Тіл форумын жыл сайын өткізіп, мемлекеттік тілді оқыту сапасын одан әрі арттыруды жоспарлап отыр.Ақпарат көзі : https://www.gov.kz/memleket/entities/almobl/press/news/details/1105705?lang=kk

Бейжің, 2025 жылғы 13-14 қараша – Қытай Халық Республикасына жұмыс сапары аясында Қазақстан Республикасы Президентінің халықаралық инвестициялық және сауда-экономикалық ынтымақтастық жөніндегі көмекшісі Мұрат Нұртілеу Қытайдың бірқатар негізгі мемлекеттік органдарының басшылығымен, соның ішінде Сыртқы істер министрлігі, Сауда министрлігі және Ұлттық даму және реформалар комитеті (ҰДРК) басшыларымен кездесулер өткізді.ҚКП ОК Саяси бюросының мүшесі, ҚКП ОК Сыртқы істер жөніндегі комиссиясы Хатшылығының басшысы, Қытайдың Сыртқы істер министрі Ван Имен болған кездесуде М.Нұртілеу екі ел көшбасшыларының жетекшілігімен екіжақты қатынастар сапалы жаңа деңгейге көтерілгенін атап өтті. Қазақстан бірлескен сауда-экономикалық және инвестициялық ынтымақтастықты дәйекті түрде ілгерілетуге, «Бір белдеу – бір жол» бастамасы аясындағы өзара іс-қимылды кеңейтуге және екі елдің мәңгілік жан-жақты стратегиялық серіктестігін нығайтуға ниетті.Өз кезегінде Ван И Қазақстанмен сауда-экономикалық ынтымақтастықты үйлестірудің негізгі бағыттары, оның ішінде энергетика, көлік байланыстылығы, сондай-ақ ядролық энергетика мен жасанды интеллектті қамтитын жаңа салалар бойынша өзара әрекеттестікті одан әрі тереңдетуге дайын екенін білдірді.ҚХР Сауда министрі Ван Вэньтаомен кездесуде өзара сауда көлемін арттыру, қазақстандық өнімнің жеткізілімдерін ұлғайту, экспортталатын тауарлар ассортиментін кеңейту, электрондық коммерция саласындағы ынтымақтастықты дамыту, өзара саудадағы кедергілер мен «тар жерлерді» жою мәселелері талқыланды.Сонымен қатар ҚХР ҰДРК төрағасының орынбасары Чжоу Хайбинмен кездесу өтіп, инвестициялық ынтымақтастық, өнеркәсіптік кооперация және цифрлық технологиялар, «Бір белдеу – бір жол» бастамасы аясындағы өзара іс-қимыл және көлік байланыстылығын нығайту мәселелері қарастырылды.Сапар барысында ҚР Президентінің көмекшісі сондай-ақ Қытайдың іскер топтарымен бірқатар кездесулер өткізіп, қазақстандық ауыл шаруашылығы өнімдерін жеткізу, АӨК, металлургия, көлік және логистика, цифрлық технологиялар және жасанды интеллект салаларындағы бірлескен жобаларды жүзеге асыру мәселелерін талқылады. Ақпарат көзі : https://www.gov.kz/memleket/entities/mfa/press/news/details/1105678?lang=kk

2025 жылдың 13 қарашасында Ташкент қаласында Орталық Азия мемлекеттері мен Әзербайжанның Сауда және инвестициялар министрлері кеңесінің алғашқы отырысы өтті. Іс-шараға Қазақстан Республикасының атынан ҚР Сауда және интеграция министрі Арман Шаққалиев қатысты. Министр өз сөзінде Қазақстан мен Өзбекстан Орталық Азиядағы экономикалық өсімнің негізгі қозғаушы күші екенін алға тартты. Бүгінде екі елдің үлесіне өңірішілік өзара сауданың шамамен 80 пайызы тиесілі. Биылғы жылдың тоғыз айының қорытындысы бойынша екіжақты тауар айналымы 3,4 млрд АҚШ долларына жетіп, 18 пайыздан астам өсім көрсетті. Арман Шаққалиев бұл нәтижелер Қазақстан мен Өзбекстан үкіметтері, сондай-ақ іскер топтар арасында қалыптасқан тұрақты ынтымақтастықтың тиімділігін дәлелдейтінін атап өтті. Министр тараптар алдына қойылған стратегиялық міндет – өзара сауданы 10 млрд АҚШ долларына дейін ұлғайту екенін жеткізді. Бұл мақсатқа жету үшін дәстүрлі шикізат саудасынан бірлескен өндірістерді дамытуға, өнеркәсіптік кооперацияны күшейтуге және жоғары қосылған құнды экспорттық тізбектер қалыптастыруға көшу қажеттігін алға тартты. Бүгінде Қазақстанда өзбек капиталының қатысуымен 2400-ден астам кәсіпорын жұмыс істейді, олардың ішінде 500-ге жуық кәсіпорын бірлескен компаниялар. Екіжақты ынтымақтастықтың инвестициялық портфелі жалпы құны 1,7 млрд АҚШ долларынан асатын 78 жобаны қамтиды. Соның ішінде 13 жоба 220,9 млн АҚШ доллары көлемінде сәтті іске асырылған. Арман Шаққалиев агроөнеркәсіптік кешенді дамыту бағытына ерекше тоқталды. Қазақстан Өзбекстанмен бірлесіп толық өндірістік тізбектер құруды – бордақылау алаңдарын ұйымдастыруды, ет және сүт өнімдерін қайта өңдеуді, май-тоң май саласын дамытуды, сондай-ақ шекара маңында агрокластерлер қалыптастыруды ұсынды. Қазақстан тарапы көлемі шамамен 14,5 млн тоннаны құрайтын агроөнеркәсіптік өнімдердің экспорттық қоржынын кеңейтуге дайын екенін атап өтті. Бұл қоржынға дәнді және бұршақ дақылдары, майлы дақылдар, ұн және өсімдік майы кіреді. Осындай бастамаларды іске асыру азық-түлік қауіпсіздігін арттырып қана қоймай, бірлескен өнімді Қытай, Таяу Шығыс және Оңтүстік Азия нарықтарына шығару мүмкіндігін кеңейтеді.Сондай-ақ тараптар үшін басым бағыттардың бірі - көлік-логистикалық ынтымақтастық. Қазақстан мен Өзбекстан транзиттік дәліздерді дамытуды өңірлік сауданы нығайтудағы стратегиялық фактор ретінде қарастырады. Өткен жылы Транскаспий халықаралық көлік бағдары арқылы Қазақстан аумағымен тасымалданған жүк көлемі шамамен 2,8 млн тоннаны құрап, алдыңғы жылмен салыстырғанда 35 пайызға артты. Қазақстандық тарап тарифтік саясатты үйлестіруді, логистикалық процестерді цифрландыруды жеделдетуді, инфрақұрылымды жаңғыртуды және «қағазсыз сауда» тетіктерін енгізуді ұсынды. Бұл шаралар бизнес шығындарын азайтып, көлік дәліздерінің өткізу қабілетін арттыруға бағытталған. Министр цифрлық трансформация саласындағы ынтымақтастықты да ерекше атап өтті. Қазақстан IT саласының даму қарқыны бойынша өңірде жетекші орынға ие. IT-қызметтердің экспорты 2020 жылғы 50 млн АҚШ долларынан 2024 жылы 600 млн АҚШ долларына дейін өсті. Цифрлық экожүйенің дамуына 30 елден 1300-ден астам IT-компанияны біріктіретін Astana Hub халықаралық технопаркі айтарлықтай үлес қосып отыр. Ел жасанды интеллект технологияларын белсенді дамытуда: ұлттық Alem.AI кластері құрылды, биометриялық цифрлық идентификатор жүйелері енгізілді. Қазақстандық Biometric.Vision және Alaqan Technologies компаниялары биометрия және цифрлық сәйкестендіру саласындағы инновациялық шешімдерімен халықаралық нарыққа шығуда. Министрдің айтуынша, Қазақстан мен Өзбекстан арасындағы цифрлық интеграция сауда операцияларын жеделдетіп, тауарлар мен адамдардың қозғалысын жеңілдетуге, сондай-ақ мемлекеттік және бизнес-сервистер үшін бірыңғай цифрлық кеңістік қалыптастыруға мүмкіндік береді. Министрлер кеңесінің отырысынан кейін делегациялар Бостандық ауданындағы Chimgan Resort кешенінде «Шекарасыз ынтымақтастық» ұранымен өткен «Great Silk Road Business Cooperation Forum – 2025» халықаралық форумына қатысты. Форумға өңірдің алты елінен министрліктердің, сауда палаталарының және ірі компаниялардың өкілдері қатысып, кооперация, логистика және инвестициялар саласындағы өзекті мәселелер талқыланды. Қазақстаннан форумға ұлттық оператор QazTrade басшылығымен ұйымдастырылған бизнес-миссия құрамында шамамен 50 компания қатысты.Ақпарат көзі : https://www.gov.kz/memleket/entities/mti/press/news/details/1105615?lang=kk

Астана, 2026 жылғы 9 наурыз – Қазақстан Республикасының Сыртқы істер министрі Ермек Көшербаев Израиль Мемлекетінің Сыртқы істер министрі Гидеон Саармен телефон арқылы сөйлесті.Тараптар Таяу Шығыстағы ағымдағы ахуалды талқылап, екіжақты ынтымақтастықтың өзекті мәселелерін қарастырды.Сұхбат барысында Е.Көшербаев израильдік әріптесіне Израильде жүрген ҚР азаматтарын эвакуациялауға жәрдем көрсету туралы өтініш білдіріп, бұл мәселе еліміз үшін басым міндеттердің бірі екенін атап өтті.Өз кезегінде Г.Саар Израиль тарапы Қазақстан азаматтарын эвакуациялау мәселесін шешуге бар күш-жігерін салатынын жеткізіп, бұл мәселені өзінің жеке бақылауына алатынына сендірді.Ақпарат көзі : https://www.gov.kz/memleket/entities/mfa/press/news/details/1177161?lang=kk

Маңғыстау облысындағы «Оймаша» полигонында «Батыс» өңірлік қолбасшылығы теңіз жаяу әскерлері бригадасының 600-ден астам жас сарбазы алғаш рет жауынгерлік дайындық бойынша тәжірибелік сабақтарға қатысты.Бұл іс-шаралар жауынгерлер үшін кәсіби дағдыларын қалыптастырудағы маңызды кезең болды. Әскери қызметшілер кедергілер жолағынан өтіп, АК-74 автоматыннан оқу-жаттығу атыстарын орындады, сондай-ақ ең жауапты сынақтардың бірі – танк астынан өту сынағы болды.Жиын бастығының тәрбие және идеологиялық жұмыстар жөніндегі орынбасары гвардия майоры Ратбек Қуатбеков бұл жаттығудың теңіз жаяу әскерінен барынша төзімділік пен сабырлықты талап ететінін атап өтті.– Қазіргі заманның жауынгері тек дене күші жағынан емес, рухани тұрғыдан да дайын болуы тиіс. Танк астынан өту – ішкі қысымды жеңіп, өз-өзіне деген сенімділікті нығайтуға көмектесетін маңызды кезең. Бүгінгі нәтижелер жас сарбаздардың тапсырманы лайықты деңгейде орындай алатынын көрсетті, – деді тәрбиеші офицер.Көптеген жауынгерлер үшін бұл сабақтар нағыз сынақ қана емес, қызметтегі өз рөлін терең сезінудегі маңызды қадам болды.– Бүгін алғаш рет ұрыс қаруынан оқ аттым. Бұл – ерекше жауапкершілік пен мақтаныш сезімі. Ең қиын сынақ танк астынан өту болды. Бұл сәт есімде мәңгі сақталады, – деді Батыс Қазақстан облысынан шақырылған қатардағы жауынгер Әділ Алхамов.Алдағы демалыс күндері жас сарбаздар Әскери ант беріп, теңіз жаяу әскерлері бригадасының шабуылдаушы батальондарының қатарына ресми түрде қосылып, Отан қорғау жолындағы қызметін бастайды.Ақпарат көзі : https://www.gov.kz/memleket/entities/mod/press/news/details/1105347?lang=kk

Қазақстан Республикасының Ұлттық қорғаныс университетінде Қарулы күштердің бас сержанты шебер-сержант Темірбек Халықовтың басшылығымен сержанттардың бүкілармиялық кеңесі өтті.Жиынға Қарулы күштер түрлерінің, әскер тектері мен өңірлік қолбасшылықтардың, бас басқармалар мен басқармалардың сержанттары қатысты. Іс-шара барысында 2025 оқу жылының қорытындылары шығарылып, алдағы кезеңге арналған міндеттер талқыланды.Қарулы күштердің бас сержанты шебер-сержант Темірбек Халықовтың айтуынша, кеңестің негізгі мақсаты сержанттар корпусында басым бағыттарды айқындау және оның жеке құрамды тәрбиелеудегі рөлін күшейту болды.– Сержант – командирдің тірегі әрі бағыныстыларына үлгі. Бөлімшенің бірлігі мен жауынгерлік дайындығы солардың жауапкершілігі мен кәсібилігіне байланысты, – деді бас сержант.Жиында тәртіп мәселесі мен қызметтік лауазымдарды толықтыруға ерекше көңіл бөлінді. Сержанттық кадрларды іріктеудің сапасын арттыру, профилактикалық жұмыстар жүргізу, әскери қызметшілерді біліктілікті арттыру курстарында дайындауды кеңейту қажеттігі атап өтілді.Есептік кезеңдегі қызметтік нәтижелер бойынша әскери басқару органдарының рейтингі жасалды. Қарулы күштердің түрлері арасында Құрлық әскерлері (шебер-сержант Мейірбек Рақымбеков), өңірлік қолбасшылықтар мен әскер тектері арасында Әуе қорғанысы күштері әуе шабуылына қарсы қорғаныс әскерлері (штаб-сержант Толқынжан Ходиметов), бас басқармалар мен басқармалар арасында Әскери полиция бас басқармасы (штаб-сержант Алтынбек Әміржанов) үздік деп танылды.Жеңімпаздарға ауыспалы кубоктар мен құрмет грамоталары табыс етілді.Ақпарат көзі : https://www.gov.kz/memleket/entities/mod/press/news/details/1105264?lang=kk

ҚР Қарулы күштері Ұлттық әскери-патриоттық орталығының Әскери-тарих музейінде соғыс жылдарында қаза тапқан сарбаздарды еске алуға арналған салтанатты шара өтті.Оған Л.Н. Гумилев атындағы Еуразия ұлттық университетінің курсанттары, ардагерлер ұйымдарының өкілдері және «Жас сарбаз» әскери-патриоттық клубтарының тәрбиеленушілері қатысты.Іздеушілер мен музей қызметкерлері жиналғандарға экспедиция барысында табылған архивтік материалдар, фотосуреттер және хаттарды таныстырды. Олар Қазақстан дивизиялары шайқасқан майдандар және қазақстандық жауынгерлердің қандай жағдайда қаза тапқандары туралы баяндады. Шара қатысушылары оларды  бір минуттық үнсіздікпен еске алды.– Біз сарбаздарымыздың рухы алдында  үлкен жауапкершілікті сезінеміз. Әлі аты-жөні белгісіз жауынгерлерді іздеп таппайынша, біздің жұмысымыз жалғасады. Бұл – жеңімпаздар ұрпағы және олардың туыстары алдындағы борышымыз, – дейді «Мемориалдық аймақ» іздестіру жасағының жетекшісі Майдан Құсайынов.Іздестіру жасағының мүшелері «Батырлық пен борышқа адалдық» медалін бірнеше жылдық архивтік іздестіру жұмыстарының нәтижесінде есімдері мен тағдыры анықталған сегіз қазақстандық сарбаздың туыстарына салтанатты түрде тапсырды.– Біздің отбасымыз үшін бұл жай ғана марапат емес – бұл қайта қауышқан естелігіміз. Біз атамыздың тағдыры туралы көп жылдар бойы ештеңе білмедік. Ол біз үшін ерлік пен Отанға адалдықтың үлгісі болды, – деді қызыл әскер сарбазының немересі Омархан Бірімжан.Қаза тапқан жауынгерлердің туыстарымен кездесуге Астана қаласының ардагерлер кеңесінің өкілдері келді. Олар музейге және жауынгерлердің туыстарына «Жеңіс жауынгерлері» атты кітапты сыйға тартты. Кітапта қазақстандықтардың ерліктері суреттелген.Іс-шара Астана қаласы ардагерлер кеңесінің құрамындағы «Әдемі» ансамблінің өнер көрсетуімен аяқталды.Ақпарат көзі : https://www.gov.kz/memleket/entities/mod/press/news/details/1105259?lang=kk

Қазақстанның Даму банкі ("Бәйтерек" холдингінің еншілес ұйымы) Қазақстанның 17 серпінді жобасының 14-ін қаржыландыруға қатысуды жоспарлап отыр.Банктің қатысу үлесі бастамаларға қатысты 2,6 трлн теңгеге жетуі мүмкін. Бұлар ел ішіндегі жалпы сомасы 6,9 трлн теңгеге жоғары технологиялық қайта өңдеу үлесін арттыратын болашақ металлургиялық және агроөнеркәсіптік кластерлер.Банк Павлодар облысында металлургиялық кластердің бірінші кезегін іске асыруды мақұлдады. Енді Екібастұзда "Mineral Product International" ЖШС қуаттылығы жылына 80 000 тонна ферроқорытпа зауытын салмақ. Оның іске қосылуы Қазақстанның ішкі қайта өңдеу және экспорттық әлеуетін арттырады. 527 тұрақты және 1000-нан астам уақытша жұмыс орны ашылады.Сараптаманың үшінші кезеңі Қарағанды облысында №8-9 (жылына 2,45 млн тонна кокс) жаңа кокс батареялары мен табиғи газ құбырын салатын "Qarmet" АҚ кешенді жаңғырту жобасынан өтуде. Жоба ішкі металлургияны өзіміз өндірген кокспен қамтамасыз етіп, импортты қысқартуға және өндірістік қуатты арттыруға мүмкіндік береді.Құжаттарды жинаудың екінші кезеңінде Қостанай облысында жобалық қуаты жылына 2 млн тонна болатын "QazIron" АҚ (ERG) ыстық брикетті темір (ЫБТ) өндіру зауытының жобасы тұр. Ол әлемдік нарықта сұранысқа ие доменсіз, "жасыл" металлургия үшін премиум шикізат шығарып, 3000-ға жуық маманға жұмыс береді.Қаржыландыру үшін құжат жинаудың бірінші кезеңі қазір Абай облысында қуаты жылына 300 мың тонна мыс болатын "KAZ Minerals Smelting" ЖШС мыс балқыту зауытының жобасы бойынша жүргізілуде. Кәсіпорында мыңдаған тұрақты жұмыс орны ашылып, жоғары экспорттық әлеуеті бар дайын мыс қорытпасы өнеркәсіптік өндірісіне көшуге мүмкіндік береді.Астанада қарыз алушының өз қаражаты есебінен "Kazak Protein" ЖШС бидай мен бұршақты терең өңдеу бойынша интеграцияланған агроөнеркәсіптік кешеннің құрылысы басталды. ҚДБ-да бұл жоба сараптаманың үшінші кезеңінде. Кәсіпорын тірі бидай глютенін және модификацияланған бидай крахмалын шығарады. Болашақта Қостанай облысындағы Qostanai Grain Industry жобасымен бірлесіп, кәсіпорындар астықты тереңдете өңдеудің және ел үшін стратегиялық маңызды импорттық ингредиенттерді алмастырудың негізіне айналмақ. Сонымен қатар қосылған құны жоғары қазақстандық тереңдетілген экспорттық өнім желісін көбейтеді.ҚДБ мен оның еншілес ұйымы ӨДҚ қаржыландыруының арқасында қуаттылығы жылына 120 мың автомобильге дейін жететін Astana Motors Manufacturing Kazakhstan мультибрендтік зауытын салу жобасы рекордтық мерзімде аяқталды. Бұл өз алаңында бірден үш жетекші қытай брендінің өндірісін біріктірген әлемдегі алғашқы кәсіпорын: Chery, Changan және Great Wall Motor (Haval және Tank).Барлық жобалар қатаң іріктеу критерийіне жауап береді. Оның құны кемінде 100 млрд теңге, өнімді қайта бөлудің орташа және жоғары деңгейі, стратегиялық маңыздылығы, экспортқа және импортты алмастыруға бағдарлануы есепке алынады.Анықтама:Үкімет жалпы құны шамамен 16 трлн теңгені құрайтын, 28 мыңнан астам жұмыс орын ашуды көздейтін 17 ірі жобаның тізбесін бекітті. Бұл жобалар қара және түсті металлургия, мұнай-, газ және көмір химиясы, химия өнеркәсібі, автомобиль өндірісі, туризм және азық-түлік өнеркәсібі сияқты бағыттарды қамтиды.Қазіргі таңда екі жоба іске қосылды: KIA автомобильдерін шығаратын зауыт және Chery, Haval және Changan маркалы мультибрендті автозауыт. Қалған 15  жоба әртүрлі кезеңде жүзеге асырылып жатыр.Ақпарат көзі : https://www.gov.kz/memleket/entities/economy/press/news/details/1105195?lang=kk

Брюссель, 2025 жылғы 12 қараша – Бельгия астанасында Берлин еуразиялық клубының 44-ші кезекті отырысы өтті. Іс-шара «Орта дәліз және Ғаламдық қақпа (Global Gateway)» тақырыбына арналды. Талқылаудың барысында Еуропа мен Азия арасындағы өзара көлік байланысының жаңа архитектурасын қалыптастырудағы Қазақстанның өсіп келе жатқан рөлі сөз болды.Отырысқа Қазақстан мен Еуропалық одақтың мемлекеттік органдарының өкілдері, бизнес қауымдастықтар, сарапшылар мен ғылыми орта, сондай-ақ логистикалық компаниялар мен қаржы институттарының өкілдері қатысты.Германиядағы Қазақстанның Төтенше және Өкілетті Елшісі Нұрлан Онжанов өз сөзінде Қазақстанның Еуропалық одақтың тасымалдау тізбегі географиясында маңызды орынға ие болып келе жатқанын атап өтті.«Бұл уақытша құбылыс емес, экономикалық әлеуетіміздің серпінді өсуіне және құрлықтар арасындағы байланысты қамтамасыз ететін инфрақұрылымның дамуына негізделген ұзақ мерзімді үрдіс. Біз Еуропалық одақпен және Германиямен, әсіресе көлік пен логистика салаларында әріптестікті нығайтып келеміз», – деді Елші.ЕО жанындағы Қазақстанның Тұрақты өкілі Роман Василенко Қазақстан мен Еуропалық одақ арасындағы қатынастардың маңызды тарихи кезеңі – Кеңейтілген әріптестік пен ынтымақтастық туралы келісімнің 10 жылдығы қарсаңында бұл шараның ерекше мәнге ие екенін атап өтті. Келісім екіжақты және өңірлік өзара іс-қимылдың 29 бағытын қамтиды.Сонымен қатар, Қазақстан мен Еуропа арасындағы қарым-қатынастардың серпінді дамып келе жатқанын және көлік байланысын нығайту мәселесі көпқырлы ынтымақтастықты тереңдетудің негізгі факторына айналғанын айтты.Р.Василенко Еуропалық одақтың Транскаспий халықаралық көлік бағытын (ТХКБ) дамытуға үлкен қызығушылық танытып отырғанын, осы мақсатқа шамамен 20 млрд. еуро бөлуді жоспарлағанын атап өтті. Сондай-ақ еуропалық институттарды Орта дәліздегі «тар тұстарды» еңсеруге бағытталған практикалық жобаларды жүзеге асыруға шақырды.Германия экономикасы Шығыс комитетінің атқарушы директоры Михаэль Хармс өз сөзінде «Global Gateway» бастамасы тек Қытай мен Еуропаны байланыстырумен шектелмейтінін атап өтті.М.Хармстың сөзінше «Бұл сонымен қатар өңіраралық сауданы дамыту және ЕО-ның көршілік саясатын нығайту — Орталық Азияны, Кавказды және Еуропалық одақты заманауи, орнықты көлік және цифрлық дәліздер арқылы байланыстыру бастамасы. Сауданың нығайуы инвестициялардың келуіне жол ашады. Сенімді логистика - тауарлардың нарыққа уақытылы жеткізілуін қамтамасыз етіп, жаңа құн тізбектерін және өнеркәсіптік серіктестікті қалыптастырады. Көлік инфрақұрылымынсыз, маңызды шикізатқа қол жеткізудің де мәні жоғалады».Қазақстан Республикасының Көлік вице-министрі Жәнібек Тайжанов көлік саласын дамытудың негізгі бағыттары туралы баяндама жасады.Панельдік пікірталас барысында нақты салалар бойынша ынтымақтастықтың келешегі, сондай-ақ неміс және еуропалық логистикалық компаниялардың Қазақстан аумағындағы қызметін кеңейту тәжірибесі мен жоспарлары талқыланды.Отырыс қатысушылары көлік инфрақұрылымын дамыту, бағыттарды әртараптандыру және экологиялық тұрғыдан орнықты шешімдерге көшу Қазақстан мен Еуропалық одақ арасындағы әріптестіктің басты бағыттарына айналып отырғанын атап өтті.Берлин еуразиялық клубының кезекті отырысы - Қазақстанның Шығыс пен Батыс арасындағы көлік байланыстарының жаңа жүйесінде негізгі буынына айналуы арқылы, Орталық Азияның әлемдік экономикадағы рөлін нығайтып отырғанындығын көрсетті.Ақпарат көзі : https://www.gov.kz/memleket/entities/mfa/press/news/details/1105572?lang=kk

Қорғаныс министрлігінің ақпараттық-түсіндіру тобы азаматтарға әскери қызмет, әлеуметтік кепілдіктер және жастарға жаңа мүмкіндіктер туралы айтып, ел өңірлерінде ауқымды науқанды жалғастыруда. «Біртұтас ел – біртұтас жер» әскери-патриоттық акциясы Қарағандыдан Қостанайға дейінгі ондаған елді мекендерді қамтыды.Қорғаныс министрлігі әскери қызметтің ашықтығына, сеніміне және беделін арттыруға баса назар аудара отырып, халықпен жұмысты күшейтуде.Әскери қызметшілер мерзімді қызмет өткерудің, әскери жоғары оқу орындарына түсудің және әлеуметтік кепілдіктер алудың негізгі мәселелерін түсіндіріп, әртүрлі жастағы азаматтармен, оқушылардан бастап аға буын өкілдеріне дейін кездесулер өткізуде.«Біртұтас ел – біртұтас жер» акциясы осы науқанның басты бөлігіне айналды. Қарағанды облысында кездесулер облыс орталығында, Қарқаралы, Шахтинск және Теміртауда өтті. Қостанай облысында әскерилер Қостанайға ғана емес, Рудный, Тобыл қалаларына да барып, жастар мен еңбек ұжымдарына ерекше назар аударды.Бағдарламаны Жеңістің 80 жылдығына арналған көшпелі көрмелер, одан өзге Ұлттық әскери-патриоттық орталығының орталық ансамблі әртістерінің концерттік қойылымдары толықтыруда. Мұндай іс-шаралар жауынгерлік дәстүрдің атмосферасын жеткізуге, патриотизм сезімін нығайтуға және Отан қорғаушы рөлінің маңыздылығын көрсетуге септігін тигізеді.Отбасылық құндылықтарға да ерекше назар аударылуда. Балалардың бойында жауапкершілік пен Отанға деген сүйіспеншілік сезімін қалыптастыратын белсенді азаматтық ұстанымын көрсететін ел тарихын құрметтейтін ата-аналар. Акция аясында мамандар отбасының Қазақстанның болашақ қорғаушыларын тәрбиелеуге қалай әсер ететінін түсіндіруде.Ақпарат көзі : https://www.gov.kz/memleket/entities/mod/press/news/details/1105104?lang=kk