Вильнюс, 2025 жылғы 18 қараша – Қазақстанның Литвадағы Елшісі Тимур Уразаев Литва Республикасы Сеймінің Төрағасы Юозас Олекас мырзамен екіжақты күн тәртібі мен халықаралық өзекті мәселелер бойынша пікір алмасу мақсатында кездесті.

Тараптар парламентаралық ынтымақтастықтың маңыздылығын атап өтті. Атап айтқанда, Литва–Қазақстан достық тобының белсенді жұмысы, Еуропа Кеңесі Парламенттік Ассамблеясы (ЕКПА) шеңберінде литвалық және қазақстандық делегациялар арасындағы диалогты ілгерілету, сондай-ақ екіжақты экономикалық ынтымақтастықты күшейтуге бағытталған шараларға қолдау көрсету мәселелері талқыланды.

Кездесу барысында көлік және логистика салаларындағы ынтымақтастықтың әлеуеті атап өтілді. Екі тарап та сауда қатынастарын үздіксіз қамтамасыз ету және Транскаспий халықаралық көлік бағдары (Орта дәліз) арқылы практикалық өзара іс-қимылды дамыту ортақ басымдық болып саналатынын атап өтті.

Сейм Төрағасына Қазақстанның цифрлық трансформациясы, IT және инновациялар салаларындағы өсіп келе жатқан мүмкіндіктер, оның ішінде елдің жетекші технологиялық бастамалары шоғырланған Astana Hub технопаркі аясындағы жобалар туралы ақпарат берілді.

Ақпарат көзі : https://www.gov.kz/memleket/entities/mfa-vilnius/press/news/details/1108931?lang=kk