Берлин, 2026 жылғы 29 наурыз – Германия астанасында көктем мен жаңарудың мерекесі – Наурызға арналған бірқатар салтанатты іс‑шаралар өтті.

Мерекелік бағдарламалар Қазақстан Республикасының Германия Федеративтік Республикасындағы Елшілігінің қолдауымен ұйымдастырылып, мемлекеттік құрылымдар, іскер топтар, мәдени ұйымдар, дипломатиялық корпус өкілдерін, қазақстандық диаспора мүшелерін және Берлин тұрғындарын біріктірді.

Қазақстанның Германиядағы Елшісі Нұрлан Онжанов өз құттықтау сөзінде Наурыздың тарихи және халықаралық маңызын атап өтіп, оның ЮНЕСКО мен БҰҰ тарапынан мойындалғанын еске салды. Сондай‑ақ ол Наурыздың жаңару, бейбітшілік және халықтар арасындағы өзара түсіністік символы ретіндегі рөлін ерекше атап өтті. Елші Наурыздың құрмет, бірлік және жасампаздыққа ұмтылу сияқты құндылықтары Қазақстан мен Германия арасындағы мәдениетаралық диалог пен ынтымақтастық идеяларымен үндесетінін айтты.

Қонақтардың ерекше назарын бай мәдени бағдарлама аудартты. Шымкент қаласынан келген «Қаған» этно‑фольклорлық ансамблі дәстүрлі қазақ күйлерін, заманауи этно‑шығармаларды және неміс әуендерінің өзіндік интерпретацияларын орындап, көрермендердің ыстық ықыласына бөленді.

Кештің көрнекті сәттерінің бірі – танымал әнші Хелена Голдтың өнер көрсетуі болды. Ол бала кезінде Қазақстаннан Германияға қоныс аударғанымен, қазақ мәдениетімен тығыз байланысын сақтап қалған. Әнші қазақ тілінде ән орындап, бұл бағдарламаның ерекше әсерлі сәтіне айналып, көрермендердің шынайы қошеметіне ие болды.

Қатысушылар қазақ мәдени мұрасының элементтерімен – дәстүрлі киіз үймен, қолданбалы‑сәндік өнермен және ұлттық тағамдармен танысып, өздерін қазақ даласының бір бөлшегіндей сезінді. Шарада бешбармақ, қуырдақ, палау, шашлық, бауырсақ және мерекенің басты символы – Наурыз көже ұсынылды. Қонақжайлық пен бірлік атмосферасы қатысушыларға мереке рухын сезінуге және Қазақстанның бай дәстүрлерімен жақынырақ танысуға мүмкіндік берді.

Берлинде өткен Наурыз мерекесі қай жерде жүрсе де отандастарымызды ортақ құндылықтар, туған жерге деген сағыныш және мәдени мұраны сақтау ұмтылысы біріктіретінін тағы бір мәрте дәлелдеді.

Қазақстан Республикасының Германиядағы Елшілігі серіктестерге, қатысушыларға және қонақтарға мерекелік іс‑шараларды ұйымдастыруға қосқан үлестері мен мәдени диалогты қолдағандары үшін алғыс білдіреді.

Ақпарат көзі : https://www.gov.kz/memleket/entities/mfa-berlin/press/news/details/1189137?lang=kk