Электрондық шот-фактураларды (ЭШФ) уақытылы жазып беру – бұл жай ғана формальдылық емес, кез келген бизнестің қауіпсіздігі үшін маңызды процесс. Салық кодексі оларды ұсынудың нақты мерзімдерін және бұл талаптарды бұзғаны үшін қолданылатын салдарды белгілейді.

Құжаттарды жазып беруді соңғы күнге қалдырмаңыз! «ЭШФ АЖ» (ИС ЭСФ) жүйесіне кірудің бұғатталуы бүкіл компанияның жұмысын тоқтатып тастауы мүмкін.

ЭШФ жазып беру мерзімдері

- Жалпы мерзім: ЭШФ өткізу айналымы жасалған күннен ерте емес және осы күннен кейін 15 күнтізбелік күннен кешіктірілмей жазылады.

- Ай қорытындысы бойынша мерзім (келесі айдың 20-сына дейін): электр энергиясын, суды, газды өткізу кезінде, сондай-ақ коммуналдық қызметтер, байланыс және экспедиторлық қызметтер, банктік операциялар үшін қолданылады.

- Тауарлар экспорты: өткізу айналымы жасалған күннен кейін 20 күнтізбелік күннен кешіктірілмей.

- Сатып алушының талабы бойынша: егер бастапқыда ЭШФ жазып беру міндетті болмаса, бірақ клиент құжатты талап етсе, сізде айналым күнінен кейін 30 күнтізбелік күн бар.

ЭШФ-ны уақытылы жазбаудың негізгі тәуекелдері мен салдары

Салық органдары сіздің ЭШФ мәліметтеріңізді салық есептілігімен (декларациялармен) және жеткізушілеріңіздің мәліметтерімен салыстыра отырып, автоматты түрде өзара салыстыру бақылауын жүргізеді.

Кез келген сәйкессіздіктер елеулі салдарға әкеп соғуы мүмкін:

1. ЭШФ жазып беруді тоқтата тұру (бұғаттау)

Егер сіз төмендегі жағдайларды жасасаңыз, салық органы бір жұмыс күні ішінде «ЭШФ АЖ» жүйесіне кіруіңізді бұғаттауға құқылы:

- сәйкессіздіктерді жою туралы хабарламаны уақытылы орындамасаңыз;

- тексеру кезінде өзіңіздің нақты орналасқан жеріңізді растамасаңыз.

2. «Қара тізімге» (Тәуекелді салық төлеушілер тізіліміне) ену

ЭШФ жазып беруі тоқтатыла тұрған компаниялар туралы мәліметтер ресми интернет-ресурста ашық қолжетімділікте жарияланады. Бұл іскерлік беделге соққы болып табылады: адал контрагенттер сізбен жұмыс істеуден бірден бас тартады, өйткені олар сіздің құжаттарыңыз бойынша ҚҚС-ты (НДС) есепке жатқыза алмайды.

3. Сатып алушыларыңыздың ҚҚС бойынша мәселелері

Егер ЭШФ заң бұзушылықтармен жазылса (мысалы, ЖСН/БСН қате көрсетілсе немесе құжат электрондық цифрлық қолтаңбамен куәландырылмаса), сатып алушыңыз автоматты түрде ҚҚС-ты есепке жатқызу құқығынан айырылады.

Ұсыныстар

1. Салық төлеушінің кабинетін жүйелі түрде тексеріп тұрыңыз: егер камералдық бақылау бойынша сәйкессіздіктер туралы хабарлама келсе, түсініктеме жіберуге немесе қателерді түзетуге сізде 30 жұмыс күні бар. Бұл мерзімді елемеу «ЭШФ АЖ» жүйесінің бұғатталуына әкелетініне кепілдік береді.

2. ЭЦҚ-ның қолданылу мерзімі мен дұрыстығын қадағалаңыз: электрондық шот-фактура тек өзекті және дұрыс ЭЦҚ болған жағдайда ғана заңды түрде жарамды деп танылады.

3. Есіңізде болсын, қағаз чек ЭШФ-ны алмастыра алмайды: көп жағдайда бақылау-касса машинасының (БКМ) чегін беру сатып алушының талабы бойынша 15 күн ішінде толыққанды ЭШФ жазып беру міндеттемесінен босатпайды.

Павлодар облысы бойынша МКД түсіндіру жұмысы

және Байланыс-орталығы басқармасы

Ақпарат көзі : https://www.gov.kz/memleket/entities/kgd-pavlodar/press/news/details/1250279?lang=ru