Нью-Йорк, 2026 жылғы 14 шілде - БҰҰ Штаб-пәтерінде Азиядағы өзара іс-қимыл және сенім шаралары жөніндегі кеңеске (АӨСШК) мүше мемлекеттердегі волонтерлік қызметке арналған көрменің ресми ашылу рәсімі өтті. Іс-шараны БҰҰ жанындағы Қазақстанның Тұрақты өкілдігі, АӨСШК Хатшылығы және Әзербайжан (АӨСШК төраға елі) БҰҰ-ның Еріктілер бағдарламасымен бірлесіп ұйымдастырды. Бұл көрме БҰҰ Бас Ассамблеясы Президент Қасым-Жомарт Тоқаевтың бастамасымен жариялаған Орнықты даму мақсатындағы халықаралық волонтерлер жылына (2026 жыл) орайластырылған.

Рәсімді ашқан БҰҰ жанындағы Қазақстанның Тұрақты өкілі Қайрат Омаров ұсынылған экспозиция аймақтың ынтымақтастық пен жастар көшбасшылығына деген берік бейілділігін көрсететінін атап өтті. Ол жергілікті жерлердегі волонтерлердің риясыз еңбегі мен белсенділігі климаттың өзгеруіне қарсы күрестен бастап халықтың әлеуметтік осал топтарын қолдауға дейінгі БҰҰ Орнықты даму мақсаттарын ілгерілетуге маңызды үлес қосатынын айтты.

Сондай-ақ қонақтар алдында АӨСШК Бас хатшысы Қайрат Сарыбай сөз сөйлеп, волонтерлік институттың ұйымның адами өлшемін нығайтудағы және Азия құрлығындағы сенімді тереңдетудегі маңызды рөлін атап өтті. Ал Әзербайжанның Жастар және спорт министрінің орынбасары Индира Гаджиева жаңа буынның азаматтық белсенділігінің артып келе жатқан әлеуетіне тоқталды.

БҰҰ Штаб-пәтерінде орналасқан экспозицияға АӨСШК-ге мүше түрлі мемлекеттердің фотожұмыстары жинақталған. Қазақстандық фотосуреттерде «Таза Қазақстан» экологиялық қозғалысының жұмысы мен Арал теңізінің табанына сексеуіл отырғызу сәттері бейнеленген. Әзербайжан тарихи-мәдени мұраны қалпына келтіру бағдарламасының жобаларын, сондай-ақ Бакуде өткен COP29 климаттық конференциясы аясындағы волонтерлік бастамаларды ұсынды. Бангладеш пен Ресейден келген суреттерде су тасқыны кезіндегі азаматтарға көмек көрсету және жануарларды қорғау сәттері, ал Камбоджадан келген кадрларда аумақтарды минадан тазарту жұмыстары көрсетілген. Қытай, Қырғызстан, Үндістан және Өзбекстанның экологиялық әрі әлеуметтік жобалары Израиль, Таиланд және Түркияның теңдікті, достықты және балаларға қамқорлық жасауды ілгерілетуге бағытталған инклюзивті бағдарламаларымен қатар ұсынылған.

Ашылған экспозиция БҰҰ Штаб-пәтерінде өз жұмысын жалғастырады. Ол АӨСШК елдері еріктілерінің күнделікті күш-жігері жаһандық Орнықты даму мақсаттарын бүкіл адамзат игілігі үшін нақты әрі сезінерлік өзгерістерге қалай айналдыратынын халықаралық қоғамдастыққа айқын көрсетеді.

Ақпарат көзі : https://www.gov.kz/memleket/entities/mfa-kazakhstanun/press/news/details/1265002?lang=ru