Жалпыға бірдей декларациялау дегеніміз не?

Бұл жеке тұлғалардың жекелеген санаттарының активтері, міндеттемелері, кірістері мен мүлкі туралы мәліметтерді ұсыну жүйесі. Екі нысан қолданылады:

- 250.00 — активтер мен міндеттемелер туралы декларация (міндеттеме туындаған кезде, әдетте бір рет);

- 270.00 — кірістер мен мүлік туралы декларация (күнтізбелік жыл үшін).

Мақсаты — кірістер мен мүліктің, оның ішінде шетелдік активтер мен ірі сатып алулардың ашықтығы.

2026 жылы барлық азамат декларация тапсыруға міндетті ме?

Жоқ. 2026 жылғы 1 қаңтардан күшіне енген жаңа Салық кодексіне сәйкес міндеттеме барлық адамға емес, кодексте тікелей көрсетілген тұлғаларға және заңда белгіленген негіздері бар адамдарға (шетелдік активтер, ірі сатып алулар, цифрлық активтер, жекелеген кіріс түрлері және т.б.) жүктеледі.

Студент, зейнеткер, үй шаруасындағы адам немесе жеке компания қызметкері мәртебесінің өзі, егер басқа негіздер болмаса, декларация тапсыруға міндеттемейді.

2025 жыл үшін 270.00 нысанын кім тапсырады (мерзімі — 2026 жылғы 15 қыркүйекке дейін)?

Оның ішінде:

1. сыбайлас жемқорлыққа қарсы заңнама және банктер, сақтандыру, бағалы қағаздар нарығы туралы заңдар бойынша кірістер мен мүлікті декларациялауға міндетті тұлғалар;
2. Салық кодексінде көзделген жағдайларда жекелеген басшылар / құрылтайшылар (қатысушылар) және олардың резидент жұбайлары;
3. кәсіпкерлік кірістен басқа, жеке тұлға өз бетінше салық салатын кіріс алған тұлғалар;
4. есепті жылдың 31 желтоқсанындағы жағдай бойынша ҚР шегінен тыс шетелдік банктердегі шоттарда жиынтығында 1 000 АЕК-тен асатын ақшасы бар тұлғалар;
5. шетелде тіркелуге / есепке алуға жататын мүліктің, шетелдік бағалы қағаздардың, шетелдік компаниядағы үлестің, инвестициялық алтынның, шетелде тіркелген зияткерлік меншік объектілерінің иелері;
6. есепті жылы жиынтық құны 20 000 АЕК-тен асатын мүлік сатып алған тұлғалар;
7. есепті жылдың 31 желтоқсанындағы жағдай бойынша цифрлық активтері бар тұлғалар.

Студент шетелде оқиды. Декларация керек пе?

Студент мәртебесінің өзі декларацияны талап етпейді және босатпайды.

Декларация мынадай негіздер болғанда керек:

- есепті жылдың 31 желтоқсанында шетелдік банк шоттарында жиынтығында 1 000 АЕК-тен астам қаражат;

- шетелде тіркелетін жылжымайтын мүлік, көлік немесе өзге мүлік;

- цифрлық активтер, шетелдік бағалы қағаздар, шетелдік компаниядағы үлес;

- жеке тұлға өз бетінше декларациялауға тиіс кіріс;

- 20 000 АЕК-тен асатын ірі сатып алулар.

Студент тек оқып жүрсе, ата-ана қаражаты / грант есебінен тұрса, шекті асатын шетелдік активтері және өзге негіздері жоқ болса — декларация тапсырудың қажеті жоқ.

Шетелдік стипендия мен грантқа салық салына ма?

2026 жылғы 1 қаңтардан күшіне енген жаңа Салық кодексіне сәйкес шетелде оқитын студенттердің гранттары мен стипендиялары жеке табыс салығынан босатылады.

Алайда:

- салықтан босату шетелдік шотты көрсету міндетін жоймайды, егер 31 желтоқсандағы қалдық 1 000 АЕК-тен асса;

- ҚР салық резиденті салықтан босатылмаған өзге шетелдік кірістерді ескереді;

- жаңа нормаға дейінгі кезеңдерде шетелдік стипендия жылдық кіріске енгізіліп, өз бетінше декларациялауды талап етуі мүмкін еді.

Резиденттік: ҚР азаматы, әдетте, кез келген қатарынан 12 ай ішінде Қазақстанда кемінде 183 күн болса немесе өмірлік мүдделерінің орталығы ҚР-да қалса (отбасы, баспана, жұмыс және т.б.) салық резиденті деп танылады.

Банк кэшбэгін декларациялау керек пе?

Банк картасы бойынша әдеттегі кэшбэк (сатып алу сомасының бір бөлігін қайтару, ұпай, бонус — мәні бойынша жеңілдік / шығысты өтеу) жеке тұлғаның кірісі деп танылмайды және 270.00 нысанында көрсетілмейді.

Бағалы қағаз, инвестициялық құрал, ETN түріндегі «кэшбэк» қаржылық кіріс ретінде бағаланып, декларациялануы мүмкін.

Қазақстандық банктердегі салым пайызы, ҚР-да төленіп, төлем көзінен салық салынған жалақы, зейнетақы, жәрдемақы, стипендия 270.00 нысанында әдетте «өз бетінше» кіріс ретінде қайталанбайды.

Сомасы 1 000 АЕК-тен аз шетелдік банк шотын көрсету керек пе?

Шектен төмен шоттың өзін, егер декларацияның басқа негіздері жоқ болса, көрсету міндетті емес.

Бірақ:

- шек есепті жылдың 31 желтоқсанындағы барлық шетелдік банктер бойынша жиынтық есептеледі;

- осы шотқа түскен кірістер (жалдау, шетелдік жұмыс берушінің жалақысы, дивидендтер және т.б.) шоттағы қалдыққа қарамастан декларациялануы мүмкін.

1 000 АЕК және 20 000 АЕК қанша теңге?

2025 жыл үшін (31.12.2025 ж. қалдықтар):

- 1 000 АЕК = 3 932 000 теңге;

- 20 000 АЕК ≈ 78 640 000 теңге.

2026 жылғы 1 қаңтардан АЕК — 4 325 теңге. 31.12.2026 ж. қалдықтарға сол күнгі АЕК қолданылады.

Криптовалюта мен цифрлық активтерді декларациялау керек пе?

Иә, есепті жылдың 31 желтоқсанында цифрлық активтер меншігінде болса — бұл 270.00 нысаны үшін дербес негіз.

Декларацияны қалай және қайда тапсыруға болады?

Электронды түрде:

- e-Salyq Azamat қосымшасы;

- Салық төлеуші кабинеті;

- egov.kz;

- ФСА тапсыру қосылған банк сервистері.

Қағаз түрінде — тұрғылықты (болатын) жері бойынша мемлекеттік кірістер органына / ХҚКО-ға не пошта арқылы.

Мерзімі: 15 қыркүйектен кешіктірмей.

Қабылдау мәртебесін сол қосымшадан көруге болады.

Мерзімінде тапсырмаса не болады?

Салық есептілігін ұсынбағаны немесе уақытылы ұсынбағаны үшін әкімшілік жауаптылық көзделген. Сондай-ақ декларацияланбаған шетелдік активтер мен кірістер халықаралық ақпарат алмасу аясында анықталуы мүмкін.

Ақпарат көзі : https://www.gov.kz/memleket/entities/kgd-mangistau/press/news/details/1291417?lang=ru