Әзербайжан Республикасының Төтенше жағдайлар министрі генерал-полковник Кямаледдин Гейдаровтың бұйрығына сәйкес қазақстандық құтқарушылар «Әзербайжан әуе жолдары» ұшақ апатының салдарын жойғаны және құтқару операциясына қатысқаны үшін «Ынтымақтастық үшін» төсбелгісімен марапатталды.  Марапаттарды Ақтау қаласында Әзербайжан Республикасының Бас консулы Айхан Сүлейманлы табыстады.  Қазақстан ТЖМ-ның наградталған қызметкерлері:- Сейталин Азамат Серікұлы- Аминов Тимур Владимирович- Айдаров Қани Манапұлы- Қараев Саясат Мұсаұлы- Кенжеғалиев Мәжит Серікбайұлы- Күлханов Азымбек Шындәулетұлы- Күзембаев Ербол Ахметұлы- Меңдібаев Наурызбек Ерланұлы- Нұғыманов Ардақ Қойшыбекұлы- Тілеубергенова Айман Мыңбайқызы  Бұл марапат Қазақстан мен Әзербайжан арасындағы төтенше жағдайлар саласындағы берік ынтымақтастықты білдіреді.           Ақпарат көзі : https://www.gov.kz/memleket/entities/emer/press/news/details/941385

  Төтенше жағдайлар министрлігі өскелең ұрпаққа өрт қауіпсіздігі ережелерін үйрету мақсатында еліміздің барлық оқушылары үшін Бірыңғай өрт қауіпсіздігі күнін өткізді. Профилактикалық жұмыстармен 100 мыңнан астам оқушы және 3 мыңнан астам мектеп қамтылды.  Акция шеңберінде оқушыларға, педагогтар мен ата-аналарға өрт қауіпсіздігінің негізгі аспектілерін қамтитын дәрістер мен нұсқамалар ұйымдастырылды. Zoom платформасы арқылы интерактивті сабақтар мен онлайн сабақтар өткізілді, онда қауіпсіз мінез-құлықтың негізгі ережелері, сондай-ақ өртке байланысты қауіптер туралы хабардарлықты арттыруға мүмкіндік беретін тестілік онлайн-сауалнамалар көрсетілді.  Бұдан басқа өрт сөндіру құралдары мен көрнекі материалдардың көрмелері, мектеп ғимараттарынан эвакуациялау бойынша жаттығулар ұйымдастырылды. Акцияға министрлік қызметкерлерінен басқа өңірлік білім басқармалары, жұртшылық және БАҚ қатысты.  Төтенше жағдайлар министрлігі өрт туындаған кездегі сақтық шаралары туралы халықтың қауіпсіздігі мен хабардар болу деңгейін арттыру бойынша жұмысты жалғастыруда.Ақпарат көзі : https://www.gov.kz/memleket/entities/emer/press/news/details/941617

Жетісу облысында қазіргі кезде газдандыру деңгейі 56,5% құрайды, яғни 63 елді мекен газдандырылды. Ал биылғы жылдың қорытындысы бойынша тағы 63 жобаны іске асырудың арқасында газдандыру деңгейі 71,4% жетеді. Осылайша 500 мыңнан астам тұрғыны бар 126 елді мекен газға қол жеткізеді. Бұл туралы облыс әкімі Бейбіт Исабаев «Jetisy» телеарнасы студиясында облыстық БАҚ өкілдеріне берген кеңейтілген сұхбаты барысында айтты, - деп хабарлайды Жетісу облысы әкімінің баспасөз қызметі.- Облыс қайта құрылған кезде 5 елді мекенге ғана газ жеткізілген, яғни газдандыру көрсеткіші 29 % болған. Биыл газбен қамтамасыз етілген елді мекендер саны 63-ке жетіп, тұрғындарды газдандыру көрсеткіш 56,5% құрады. Мемлекет басшысының тапсырмасын орындау аясында жылдың соңына дейін тағы 63 елді мекен газға қосылады, соның ішінде 45 жобаның жұмыстары қазір жүріп жатыр, 18-інің жобалық-сметалық құжаттары дайын. Осы аталған жобалар іске асырылғаннан кейін биылғы жылдың қорытындысы бойынша 500 мыңнан астам тұрғыны бар 126 елді мекенге газ жеткізіп, халықты газдандыру деңгейі 71,4 % болады. Оған қоса «Талдықорған – Үшарал» бағытындағы газ құбырының құрылысын былтыр бастадық. Ол биылғы жылдың соңына дейін бітеді. Ақсу, Сарқан, Алакөл аудандарының 66 елді мекенін газдандыру бойынша жобалық-сметалық құжаттама әзірленіп жатыр. Магистраль құрылысы біткеннен кейін газ тарту жұмыстарына кіріседі. Соның нәтижесінде 192 елді мекен газдандырылып, облыстың 624 мыңнан астам тұрғыны немесе халықтың 91 пайызы газға қол жеткізеді, - деді Б. Исабаев.Ал газ құнын қостыруға қатысты мәселенің өңір басшысы осыдан бір жарым жыл бұрын қолға алынғанын айтты. Газ қосу құнының жоғарылығының себебін зерделеп қарағанда, газ қосу нарығында 1-2 компания монополист болып отырғаны байқалған. Дегенмен қабылданған шаралардың арқасында бәсекелестік ортаны дамыту арқылы газ қостыру құнын қазандық пен қажетті жиынтықтарды қоспағанда 170-175 мың теңгеге дейін төмендетуге мүмкіндік туды (газ құбырының ұзындығы 25 метрге дейін). Оған қоса, бір жарым жылдың ішінде 1600 газ қазандығын сатып алуға 500 миллион теңге бөлінді, тұрғындарға қазандықтың төлемін 10 айға дейін бөліп төлеуге жеңілдікті жағдай жасалып отыр. Жетісу облысы әкімінің баспасөз қызметі.Фотограф: Жеңіс Ысқабай, сол сияқты фотосуреттероблыс әкімі баспасөз қызметінің архивінен алынды. Ақпарат көзі : https://www.gov.kz/memleket/entities/zhetysu-oblysy/press/news/details/941317

Бүгін облыс әкімі Бейбіт Исабаев өңірдегі қоғамдық кеңестің жаңадан қалыптастырылған құрамымен кездесіп, өткен жылдың қорытындылары мен бірлескен жоспарларын талқылады, - деп хабарлайды Жетісу облысы әкімінің баспасөз қызметі.Мемлекет басшысы Қасым-Жомарт Тоқаев атап өткендей, қоғамдық кеңестер мемлекет пен қоғам арасындағы байланысты нығайтатын маңызды құрал екенін тілге тиек еткен облыс басшысы қоғамдық кеңестің жұмысын өзекті әлеуметтік, экономикалық және қоғамдық мәселелердің айналасына шоғырландырудың маңыздылығы туралы ойын жеткізді. Бұл ретте қоғамдық кеңес аталған мәселелерді зерттеп, талдап, өз ұсыныстары мен пікірлерін енгізуі пайдалы болмақ.- Сіздерді жергілікті атқарушы органдармен тығыз ынтымақтастықта жұмыс істеуге шақырамын. Біздің тарапымыздан қоғамдық кеңестердің әлеуетін арттыру және еңбек ету үшін қолайлы жағдайлар жасау мақсатында қажетті қолдау көрсетіледі. Мәслихат депутаттарын, қоғамдық кеңес мүшелерін, жергілікті атқарушы органдарды – бәрімізді ортақ басты мақсат біріктіреді, ол – Президенттің жүргізген реформаларын іске асыруды жалғастырып, құқықтық мемлекет, әділ қоғам орнату және халықтың өмір сүру сапасын жақсарту. Сондықтан сіздермен ашық, әділ, конструктивті диалог жасай отырып, өзара тең дәрежеде қоян-қолтық жұмыс істеуіміз керек - деген Б. Исабаев Қоғамдық кеңес мүшелеріне өткен жылдық қорытындылары мен алдағы жоспарлар жайлы қысқаша баяндап берді. Халықтың алдындағы жауапкершілікті сезіне отырып жұмыс атқарудың нәтижелі болатынына сенім білдірді.Өз кезегінде Қоғамдық кеңестің төрағасы Әсет Қыдырманов, «Ерлік» тірек-қимыл қозғалысы кем мүгедектер қоғамдық бірлестігінің төрайымы Роза Ақжаркенова, облыстық Азаматтық альянс президенті Дәния Қыдырбаева, «Мейірімді Жетісу» волонтерлік фронт-офисінің жетекшісі Шырай Саматқызы және Қоғамдық кеңестің басқа да мүшелері ойларын ортаға салды. Олар Қоғамдық кеңес оның әрбір мүшесі үшін үлкен мектеп, жаңа тәжірибе екенін айта келе, өзара әріптестік қатынастардың жаңа кезеңінде халықтың сеніміне сай және ұсыныс-тілектерін негізге ала отырып жұмыс істейтіндерін айтты.Еске салсақ, облыстық қоғамдық кеңес жаңа құрамда жұмысын 32 мүшесімен бастады. Кеңес құрамы 72% жаңартылды. Олардың 84,4 % - азаматтық қоғамның өкілдері, яғни оның ішінде үкіметтік емес ұйымдардың, бизнес қауымдастықтың, саяси партиялардың, кәсіподақтың, этно-мәдени орталықтардың, БАҚ-тың, білім беру саласының өкілдері де бар. Жетісу облысы әкімінің баспасөз қызметі.Фотограф: Дмитрий ЕрофеевАқпарат көзі : https://www.gov.kz/memleket/entities/zhetysu-oblysy/press/news/details/941797

Бүгін облыс әкімі Бейбіт Исабаев Өзбекстан Республикасының Қазақстандағы Төтенше және Өкілетті Елшісі Бахтиер Ибрагимовпен кездесті. Тараптар екіжақты ынтымақтастықтың мүмкіндіктері мен әлеуеті жайлы мәселелерді талқылады, - деп хабарлайды Жетісу облысы әкімінің баспасөз қызметі.Ресми делегацияны жылы қарсы алған өңір басшысы Жетісу облысының әлеуметтік-экономикалық дамуының негізгі бағыттары жайлы қысқаша айтып берді.- Жетісу - аграрлық аймақ. Біз қант қызылшасы, жүгері, бидай, майлы дақылдар, ет, сүт сияқты өзімізде өндірілетін ауыл шаруашылығы өнімдерінің 65%-ын өңдейміз. Облысымыздың өндірістік әлеуеті жақсы. Біз кремний, шойын, қорғасынды-қышқылды аккумулятор батареяларын, темірбетон бұйымдарын, мәрмәр үгінділерін, шифер және басқа да тауарларды экспорттаймыз. Сонымен қатар Жетісу облысы тиімді геостратегиялық және геоэкономикалық жағынан ерекшеленеді. Жетісу - Қытаймен арадағы шекарада 5 кеден бекеті бар республикадағы жалғыз өңір. Батыс Еуропа – Батыс Қытай трансконтинентальды автобаны біздің территория арқылы өтеді. Сондай-ақ біздің аумағымызда «Қорғас – Шығыс қақпасы» арнайы экономикалық аймағы және «Қорғас» шекара маңы ынтымақтастығы халықаралық орталығы орналасқан. Туризм саласында да үлкен әлеуетіміз бар. Яғни Алакөл, Балқаш көлдерінің жағалауы, сол сияқты экологиялық және тау туризмі де белсенді дамып келеді. Жалпы өңірде агроөнеркәсіптік кешенді дамыту, көлік және логистика, туризм, баламалы энергетика және өнеркәсіп - жалпы 5 стратегиялық бағытта инвесторлар тарту жұмыстары жүргізілуде, - деді Б.Исабаев.Өз кезегінде Бахтиер Ибрагимов жылы кездесу үшін алғысын білдіріп, екіжақты қарым-қатынастарды одан әрі кеңейтудің мүмкіндіктерін атап өтті. Сол сияқты Өзбекстанды дамытудағы басымдықтардың бірі саналатын туризм саласында тәжірибе бөлісуге дайын екенін жеткізді. Сондай-ақ елші мырза Жетісудан ет экспорттауға қызығушылық танытты.Сонымен қатар өңірлік ынтымақтастықтың алдағы мүмкіндіктерін талқылай отырып, тараптар бұл таныстық кездесу экономикалық, сауда және мәдени байланыстарды нығайтуға ықпал ететініне сенім білдірді.Жетісу облысына жасаған сапары барысында Өзбекстанның Төтенше және Өкілетті Елшісі бастаған ресми делегация Талдықорғанда бизнес-қауымдастықпен кездесті, ал ертең «Қорғас – Шығыс қақпасы» АЭА, «Қорғас» ШЫХО, сондай-ақ «Нұр жолы» автомобиль өткізу пунктінің жұмысымен танысады.Атап өтсек, 2024 жылдың қорытындысы бойынша Жетісу облысы мен Өзбекстан арасындағы тауар айналымы 17 млн. АҚШ доллары көлемінде. Жетісу облысы әкімінің баспасөз қызметі. Фотограф: Дмитрий ЕрофеевАқпарат көзі : https://www.gov.kz/memleket/entities/zhetysu-oblysy/press/news/details/941806

2025 жылғы 30 наурызға бірмандаттық аумақтық сайлау округтері бойынша  мәслихаттардың шығып қалған депутаттарының орнына сайлау тағайындалуына байланысты Атырау облыстық аумақтық сайлау комиссиясы Қазақстан Республикасы Президентінің жанындағы Мемлекеттік басқару академиясының Атырау облысы бойынша филиалымен бірлесіп 2025 жылғы 10-19 ақпан аралығында «Бірмандаттық аумақтық сайлау округтері бойынша  мәслихаттардың шығып қалған депутаттарының орнына сайлауды ұйымдастыру және өткізу ерекшеліктері» тақырыбында оқыту семинарларын ұйымдастырды. Оқыту семинарларымен 8 қалалық, аудандық аумақтық сайлау комиссияларының 56 мүшесі және 87 бірмандаттық аумақтық округтік сайлау комиссияларының 435 мүшесі қамтылды.Оқыту семинарларында дәріс жүргізген облыстық аумақтық сайлау комиссиясының мүшелері қатысушылардың сұрақтарына толық жауаптарын беріп, өз тәжірибелерімен алмасты.Алдағы наурыз айында осы тақырыпта облыс бойынша 276 учаскелік сайлау комиссияларының 1085 мүшелері үшін оқыту семинарлары ұйымдастырылатын болады.Ақпарат көзі : https://www.gov.kz/memleket/entities/atyrau/press/news/details/941519

Қазақстан халқы Ассамблеясының 30 жылдығы аясында Ақтөбеде «Бірлік пен келісімнің 30 жылы» атты республикалық конференция өтті.Конференцияға Қазақстан халқы Ассамблеясы төрағасының орынбасары Марат Әзілханов, облыс әкімі Асхат Шахаров, сондай-ақ Қазақстан халқы Ассамблеясы жанындағы Республикалық этномедиация кеңесінің мүшелері, Атырау, Батыс Қазақстан және Маңғыстау облыстарынан келген делегаттар, өңірлік Ассамблея өкілдері, құқыққорғау және мемлекеттік органдардың қызметкерлері қатысты.Қазақстан халқы Ассамблеясы төрағасының орынбасары Марат Әзілханов конференция қатысушыларын Ассамблеяның 30 жылдығымен құттықтап, осындай ауқымды шараны ұйымдастырғаны үшін Ақтөбе облысының Ассамблея мүшелеріне алғыс білдірді.Сонымен қатар, ол Ассамблеяның 30 жылдығына арналған іс-шаралар жоспарымен бөлісті. 1 наурыз – Қазақстан халқы Ассамблеясының құрылған күні республикалық форум өтеді. Оның аясында «Бейбітшілік және келісім» сарайында дөңгелек үстел отырысы ұйымдастырылады, елдің барлық өңірлеріндегі Достық үйлерінде аймақтық форумдар өткізіледі. Бұдан бөлек, көмекке мұқтаж жандарға қолдау көрсету мақсатында «Қайырымдылық керуені» акциясы ұйымдастырылып, Ассамблея ардагерлерін марапаттау, фестивальдер, көрмелер мен концерттер өткізу жоспарлануда.Облыс әкімі конференция қатысушыларын құттықтап, Қазақстан халқы Ассамблеясының қоғамдағы маңызын атап өтті.«Қазақстан халқы Ассамблеясының 30 жылдығы – біздің ортақ өміріміз бен дамуымыздың негізі болған үйлесім мен бірліктің белгісі. Ассамблея – тұрақтылығымыздың, достыққа негізделген этносаралық қарым-қатынастар мен азаматтық келісімнің алтын діңгегі. Ол қоғамдағы бейбітшілік пен тыныштықты нығайтуға белсенді ықпал етіп қана қоймай, сондай-ақ елдегі барлық этнос арасындағы өзара түсіністік пен құрметтің тереңдеуіне ықпал етіп келеді. Ақтөбе облысында 950 мыңнан астам адам тұрады, олардың 85%-ын қазақтар, ал 15%-ын түрлі этнос өкілдері құрайды. Өңірде 90-нан астам этнос өкілі өмір сүреді, оның әрқайсысы өзін осы ұлы да біртұтас елдің ажырамас бөлігі ретінде сезінеді.Қазақстан халқы Ассамблеясының ұлттық бірлікті нығайтудағы және қоғамдық келісімді сақтаудағы рөлі баға жетпес. Бұл – түрлі этнос пен мәдениет өкілдері арасындағы өзара түсіністік, сыйластық пен достықты нығайтуға белсенді түрде ықпал ететін қуатты институт», – деді өңір басшысы.Конференция барысында қатысушылар этномедиация саласындағы тәжірибелерімен бөлісіп, оны одан әрі дамыту, жүйелеу және этносаралық келісімді нығайту жолдарын талқылады.Конференция қорытындысы бойынша этномедиация саласындағы өңіраралық ынтымақтастықты дамыту жөнінде өзекті ұсынымдар әзірленді. Бұл ұсыныстар қазіргі тәжірибелерді жақсартуға ғана емес, сонымен қатар еліміздегі этносаралық келісім мен әлеуметтік тұрақтылықты одан әрі нығайтуға ықпал ететін болады.Ақпарат көзі : https://www.gov.kz/memleket/entities/aktobe/press/news/details/941434

Іс-шара барысында Ассамблеяның 30 жылдығына дайындық, қоғамдық жобаларды іске асыру, сондай-ақ белсенділердің елдегі бірлік пен келісімді нығайтуға қосқан үлесіне байланысты мәселелер қаралды.Кездесуге қатысушылар ҚХА-ның этномәдени бірлестіктері мен қоғамдық құрылымдарының қызметін жетілдіру бойынша пікір алмасып, одан әрі өзара іс-қимыл перспективаларын талқылады.Ақпарат көзі : https://www.gov.kz/memleket/entities/aktobe/press/news/details/941785

 Ақтөбе облысының әкімі Асхат Шахаров және ҚХА Төрағасының орынбасары Марат Әзілханов заманауи құрал-жабдықтармен қамтылған орталықтың алғашқы қонақтары болды. Меймандар тілек тақтасына лебіздерін жазып, жастарға сәттілік тіледі. Жаңа коворкинг орталығы Қазақстан халқы Ассамблеясының 30 жылдығы аясында жұмысын бастады. 72 шаршы метрлік бөлмеде жастардың жан-жақты дамуына қажетті барлық техника бар, кітап сөресі қазақтың ақын-жазушыларының шығармаларымен толықтырылыпты. Ән айтып, күй тартуды жақсы көретін жастар үшін түрлі аспаптар қойылған. Пікірталас алаңы да жасалған.Коворкинг орталық ашу туралы бастаманы «Ассамблея жастары» бірлестігінің мүшесі Данил Цой облыстық Ассамблеяның өткен сессияларының бірінде өңір басшысы алдында көтерген еді. Жалынды жастың ұсынысына Асхат Шахаров қолдау білдірді.Мұнда жастар бір-бірімен тығыз байланыс орнатып, ұлттық бірлік, бейбітшілік пен достық құндылықтарын насихаттап, сондай-ақ түрлі этникалық топтар арасында өзара түсіністікті нығайтып, жаңа идеяларын жүзеге асыруға ниетті. Олар ұсыныс-тілектерін Асхат Шахаров және Марат Әзілхановпен кездесуінде де тілге тиек етті.Өңір басшысы өз сөзінде қоғамда пікірі бар жастардың артқанын алға тартып, оларды әрқашан қолдайтынын алға тартты. Жаңа коворкинг орталығы жастардың елге пайдалы бастамаларын жүзеге асыруына серпін беретініне сенім білдірді.«Ассамблея жастары» республикалық қоғамдық бірлестігінің облыстық филиалына 300-ге жуық жас мүше, оның ішінде 70-тей жас – Ақтөбе қаласында. Ассамблеяның «Жаңа толқын» арнайы жобасы аясында жастардың жобалары мен бастамаларын қолдау мақсатында жоғары және арнаулы оқу орындарында студенттік ассамблеялар құру қолға алынды, бүгінгі күнге дейін қызмет етіп келе жатырған «Достық» клубтарының құрылымы кеңейіп, жұмыс бағыттары өзгерді.Былтырғы жылы Мемлекет басшысының сессия отырысында берген тапсырмасына сәйкес, этномәдени бірлестік басшыларының жаңа жас орынбасарлары тағайындалып, облыстық Ассамблеядағы жастардың жалпы үлесі 22%-ға артты.Ақпарат көзі : https://www.gov.kz/memleket/entities/aktobe/press/news/details/941788

Бесқарағай ауданында жоба құны 250 млн теңге тұратын балық шаруашылығы бар. Глуховка ауылдық округінде орналасқан «Маклаков Н.» жеке кәсіпкерлігі бұл кәсіппен айналысқалы біраз жыл болды. Кәсіпкер өз қаражаты есебінен 6 жасанды тоған жасап, 4 түрлі балықтың түрін өсіруді жолға қойған. Аталған жоба балық шаруашылығы мен экотуризмді дамытуды көздейді. Сол арқылы аудан экономикасын нығайтуға және өңірдің туристік әлеуетін арттыруға күш салуда.«Жасанды тоғандарымызда 30 тонна құбылмалы бақтақ (Радужная форель), 3,5 тонна сібір бекіресі, 15 тонна тұқы (карп), 15 тонна сазан өсірілуде. Аталған балық уылдырықтарын Алматы қаласынан арнайы алдырып, Семейдегі Қазтұтынуодағы агробизнес және экономика колледжінің зертханасында шамалы уақытқа дейін сақтаймыз. Уылдырық шабаққа айналысымен, біздегі тоғандарға жіберіледі. Яғни, біз аталған оқу-орнымен ғылыми-зерттеу бағытында тығыз қарым-қатынаста жұмыс жасаймыз», - дейді кәсіп иесі Наиль Маклаков.Кәсіпкер бұдан бөлек экотуризм саласын дамытуға да үлес қосып отыр. Балықшылар мен туристер үшін ағаштан салынған 4 демалыс кешені мен жеке пайдалануға арналған 4 моншаны іске қосқан.Шаруашылық барысымен танысқан аудан әкімі Нұрбек Қошқарбаев жұмыс сапасын жоғары бағалап, мұндай бастамалардың экономиканы әртараптандырудағы маңыздылығын атап өтті. Сондай-ақ, әкім табиғи ресурстарды тиімді пайдалану мен экологиялық стандарттарды сақтау қажеттігін ерекше назарға алу керектігін айтты.Өз кезегінде кәсіпкер өндіріс көлемін ұлғайту, жаңа жұмыс орындарын ашу және қосымша тоғандар салу арқылы жобаны кеңейту жоспарларын ортаға салды. Сонымен бірге, экотуризмді дамыту мақсатында туристік қызметтерді одан әрі жетілдіру бағытында жұмыстар жүргізілетін болады.Ақпарат көзі : https://www.gov.kz/memleket/entities/abay/press/news/details/941307

Абай облысына 2024 жылы «Жұмыс күшінің ұтқырлығын арттыру үшін ерікті түрде қоныс аудару» бағдарламасы аясында 530 адам көшіп келді. Олардың 310-ы Алматы, Астана, Шымкент қалаларынан және Алматы, Жетісу, Қызылорда, Жамбыл, Түркістан, Маңғыстау облыстарынан қоныс аударған. Сондай-ақ ҚХР, Моңғолия, Түрікменстан, Өзбекстан және Ресей елдерінен 220 қандас тарихи атамекеніне оралды.Мемлекеттік қолдау шаралары аясында 503 адамға көшу шығыстарын өтеу үшін бір реттік материалдық көмек көрсетіліп, 152 отбасының тұрғын үй жалдау және коммуналдық шығындары өтелді. 112 отбасына тұрғын үй сатып алуға экономикалық ұтқырлық сертификаты берілді. Сертификат сомасы бір отбасына тұрғын үй құнының 50 пайызы яғни 1160 АЕК-тен аспайтын мөлшерде болады.«Жаңа тұрғылықты жерінде ерікті түрде өңіраралық қоныс аударуды қолдау аясында мемлекеттік қолдау шаралары қарастырылған. Атап айтар болсақ, көшуге бір реттік материалдық көмек беріледі. Бұл отағасына және отбасының әрбір мүшесіне 70 АЕК құрайды. Қоныс аударушылар мен қандастарға қажет болған жағдайда техникалық және кәсіптік білім алу үшін оқытуға, қысқа мерзімді кәсіптік оқытуға жіберіледі. Сондай-ақ, жұмысқа орналасу, кәсіпкерлікті дамытуға жәрдемдесу шаралары көрсетіледі», - дейді Абай облысының жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбек.Тұрғын үйді жалдау (жалға алу) және коммуналдық қызметтерге ақы төлеу бойынша шығыстары төленеді. Қалаға қоныс аударғандарға бір адам үшін 20 АЕК, отбасы мүшелерінің саны 2-4 адам болса - 25 АЕК, отбасы мүшелерінің саны бес және одан көп болған жағдайда 30 АЕК. Ал ауылға көшіп келгендерге бір адамға 15 АЕК, отбасы мүшелерінің саны 2-4 адам болған кезде 18 АЕК, отбасы мүшелерінің саны бес және одан көп болған жағдайда 21 АЕК төленеді.2025 жылы «Жұмыс күшінің ұтқырлығын арттыру үшін ерікті түрде қоныс аудару» бағдарламасы шеңберінде 499 адамға (244 қандас, 255 қоныс аударушы) қоныс аударушылар мен қандастарды қабылдаудың өңірлік квотасы жоспарланған.Ақпарат көзі : https://www.gov.kz/memleket/entities/abay/press/news/details/941460

Қазақстан Республикасының Энергетика министрлігі экспорттық операциялардың рентабельділігін арттыру және елдің энергетикалық қауіпсіздігін нығайту үшін мұнайды тасымалдаудың жаңа мүмкіндіктері мен маршруттарын дәйекті түрде дамытуда.Еуропа елдерімен энергетикалық ынтымақтастықты кеңейту және экспорттық маршруттарды әртараптандыру шеңберінде қазақстандық мұнайды Венгрияға жеткізу мәселесі пысықталуда.Бүгінгі таңда қазақстандық тараптан тасымалдаудың техникалық мүмкіндігі расталды, бұл алдағы қадамдарға негіз жасайды. Коммерциялық шарттар жөніндегі келіссөздер мұқият зерделеуді қажет ететін күрделі және көп сатылы процесс, сондықтан келесі кезең «ҚазМұнайГаз» АҚ (ҚМГ) мен венгриялық MOL Group компаниясы арасындағы негізгі коммерциялық шарттарды, оның ішінде жеткізу көлемі, баға белгілеу және транзит шарттары мәселелерін талқылау болады. Мұнайдың сынақтық жеткізілімдерін өткізу ынтымақтастықтың ұзақ мерзімді перспективаларын бағалау үшін құрал ретінде қарастырылады.Тұрақты жеткізудің нақты мерзімі мен шарттары келіссөздер аяқталғаннан кейін және тиісті құжаттарға қол қойылғаннан кейін айқындалады.Еске салайық, 17 ақпанда Астанада Қазақстан Республикасының Энергетика министрі Алмасадам Сәтқалиев пен Венгрияның Сыртқы экономикалық байланыстар және сыртқы істер министрі Петер Сиярто энергетика саласындағы ынтымақтастықтың қазіргі жағдайы мен даму перспективаларын, оның ішінде қазақстандық мұнайды жеткізу мәселелерін талқылаған болатын.Ақпарат көзі : https://www.gov.kz/memleket/entities/energo/press/news/details/941275

Ағымдағы жылдың 18-19 ақпанында «ҚазТрансОйл» АҚ базасында Қазақстан Республикасының Энергетика министрлігінің «Мұнай мен газды сақтау және тасымалдау» бағыты бойынша салалық біліктілік шеңберін және кәсіптік стандарттарын талқылау бойынша жұмыс тобының кездесуі өткізілуде.Жұмыс тобының отырысында ҚР Еңбек және халықты әлеуметтік қорғау министрлігінің «Еңбек ресурстарын дамыту орталығы» АҚ Кәсіптік біліктілік жөніндегі ұлттық органының, «Kazenergy» қауымдастығының, «ҚазТрансОйл» АҚ-ның, «QazaqGaz» ҰК АҚ-ның, «Интергаз Орталық Азия» АҚ-ның және олардың еншілес ұйымдарының өкілдері қатысты.Жұмыс тобының отырысын салалық кеңестің төрағасы Ляззат Ахмурзина және ҚР ЭМ Газ өнеркәсібі мен мұнайды тасымалдау және өңдеу Департаменттерінің өкілдері ашты. Кездесудің негізгі мақсаты мұнай-газ және мұнай-газ көлігі салаларындағы кәсіптік стандарттарды (КС) және салалық біліктілік шеңберлерін әзірлеу және өзектендіру жөніндегі 2025 жылғы жоспарды іске асыру болып табылады. ҚР Энергетика министрлігі мұнайды тасымалдау және өңдеу департаментінің директоры Дәулет Арықбаев кадрлық әлеуетті дамыту үшін кәсіптік стандарттардың маңыздылығын атап өтті.Салалық кеңес төрайымы Л. Ахмурзина саланың кәсіби біліктілік картасына шолу жасады. Сондай-ақ, салалық талдау жүргізілгенге дейін саланың шекарасын анықтаудың маңыздылығын атап өтті.Газ саласы департаменті директорының орынбасары Ержан Қошқаров жұмысшы мамандықтарының дамуы және олардың мамандардың біліктілігін арттырудағы рөлі туралы айтып берді. Сондай-ақ, кәсіби біліктілік жөніндегі Ұлттық органның сарапшылары салалық біліктілік шеңбері және КС әзірлеу ережелері, ұлттық сабақтардың жіктеуіші мәселелері бойынша жаңа өзгерістермен таныстырды.Бұл бағыттағы жұмыс жалғасатын болады. Ақпарат көзі : https://www.gov.kz/memleket/entities/energo/press/news/details/941610

Қарағандыда 22 ақпанда жаппай шаңғы жарысы өтеді. Спорттық шара Қазақстан халқы Ассамблеясының 30 жылдығына арналған. Барлық ниет білдірушілер – оқушылардан бастап зейнеткерлерге дейін қатыса алады."Өтініштер wintersport_kz@mail.ru электрондық поштасына және WhatsApp 8-708-972-80-57 нөміріне қабылданады. Бір айналым – 1,5 км", – деп хабарлады Дене шынықтыру және спорт басқармасы.Жарыс бағдарламасы жеті жүгіруден тұрады: үшеуі – 4-сыныптан 11-сыныпқа дейінгі мектеп оқушылары арасында, екеуі – колледждер мен ЖОО студенттері арасында, сондай-ақ ерлер мен әйелдер, ардагерлер арасында жеке жарыстар болады.Қатысушылар Қарағанды орталық саябағында «Green City Park» тұрғын үй кешені жағынан үшінші шағын көлдің жанында жиналады. Жарыс сағат 12:00 басталады.Ақпарат көзі : https://www.gov.kz/memleket/entities/karaganda/press/news/details/940932

Қарағанды мен Теміртауда жұмысқа орналасқысы келетін тұрғындар үшін бос жұмыс орындары жәрмеңкесі ұйымдастырылады.Облыстың еңбек ұтқырлығы орталығы жұмыссыз қарағандылықтарды 21 ақпанда сағат 12:00 Бұқар жырау даңғылы, 9 мекен-жайы бойынша орналасқан жоғары политехникалық колледжге шақырады.Байланыс телефондары: 60-50-50, Whatsapp: (8-775) 644-35-80.Жұмыс іздеп жүрген теміртаулықтарды 20 ақпанда сағат 16:00-де Чайковский көшесі, 2/1 мекенжайындағы Жастар орталығында күтеді.Телефон: (8-7213) 91-64-20.Жәрмеңкелерде облыс кәсіпорындары сұранысқа ие жұмыс орындарын ұсынады. Олардың ішінде дәнекерлеуші, электрик, сатушы, кассир, жүргізуші және т. б. бос орындар бар. Ізденушілер жұмыс тауып, түрлі мемлекеттік органдардың өкілдерінен кеңес ала алады.Жұмысшы мамандықтар жылы шеңберінде ұйымдастырылған бос жұмыс орындары жәрмеңкесінің мақсаты жұмыс беруші мен ізденуші арасындағы тікелей байланыс арқылы жұмыссыздарды жұмысқа орналастыруға жәрдемдесу болып табылады.Бүгінгі таңда Қарағанды облысы бойынша enbek.kz электрондық еңбек биржасында 3 мыңнан астам бос жұмыс орны қолжетімді.Ақпарат көзі : https://www.gov.kz/memleket/entities/karaganda/press/news/details/940946

Жол-көлік оқиғаларының алдын алу және жол қозғалысын бақылауды күшейту мақсатында 18–21 ақпанда Қарағанды облысының полиция департаменті «Қауіпсіз жол» республикалық жедел алдын алу іс-шарасын өткізеді, деп хабарлайды Polisia.kz.Бұл күндері аймақ жолдарында полиция жасақтары көп болады. Полиция қызметкерлері еріктілермен және қоғам өкілдерімен бірлесіп, жүргізушілерге ғана емес, жаяу жүргіншілерге де ерекше назар аудара отырып, рейдтер өткізеді.Бұдан басқа, қоғамдық көліктер – автобустар мен таксилер тексеріледі, сондай-ақ шетелдік тіркелген автомобиль жүргізушілерінің тәртібіне бақылау күшейтілді.Қабылданған шараларға қарамастан, жыл басынан бері облыс аумағында 44 жол-көлік оқиғасы тіркелген. Жол-көлік оқиғасы салдарынан 5 адам қаза тауып, 58-і түрлі жарақаттар алған. Патрульдік полиция қызметкерлері жол қозғалысы ережелерін бұзудың 15 850 оқиғасын тіркеді, оның ішінде 83 көлік құралын мас күйінде жүргізу оқиғасы бар. Ақпарат көзі : https://www.gov.kz/memleket/entities/karaganda/press/news/details/941286

15 жас суретшінің 30-дан астам жұмысы "Дала. Көшпенділер" атты көрме өтеді. Экспозиция 20 ақпанда сағат 16:00 ашылады.Көрме – көшпенділердің дәстүрлері мен олардың қазіргі қоғамға ықпалы туралы ойланатын алаң. Қарағандылық жас суретшілер өз шығармашылықтарымен көшпелі халық өмірінің тарихы мен философиясы туралы әңгімелейді.Көрмеде түрлі жанрдағы және түрлі қырлы жұмыстар: пейзаждар, портреттер, графика, абстрактілі суреттер, тоқыма бұйымдары ұсынылады.Экспозиция 2 наурызға дейін жалғасады.Мұражайдың мекен-жайы: Бұқар жырау даңғылы, 76.Жұмыс уақыты: жұмыс күндері – 10:00-ден 18:00-ге дейін, демалыс күндері - 10:00-ден 17:00-ге дейін.Анықтама телефоны: (8-7212) 475-475.Ақпарат көзі : https://www.gov.kz/memleket/entities/karaganda/press/news/details/941310

Алматыда олимпиада чемпионы және еңбек сіңірген спорт шебері Ермахан Ыбырайымовтың жүлдесі үшін қыздар арасында бокстан VII Халықаралық турнир аяқталды. Қарағанды облысынан он спортшы қатысып, оның бесеуі медальмен оралды.Турнирге Моңғолия, Қытай, Қырғызстан, Өзбекстан және Қазақстанның 19 өңірінен 270-тен астам спортшы қатысты.Қарағанды облысының намысын 15–18 жас аралығындағы он бойжеткен қорғады.Олардың екеуі – Шахтинск қаласында тұратын апалы-сіңлілі Аяулым мен Камила Оспановалар 63 кг және 70 кг дәрежесінде алтын медальға ие болды. Қарағандылық Алина Құдайгенова 60 кг және Айдана Убайдоллақызы 80 кг салмақта күміс медаль алды. Үшінші орын 48 кг санатында өнер көрсеткен қарағандылық Айжан Мұратқа бұйырды.– Турнир біз үшін жақсы өтті. Қыздар айтарлықтай бәсекелестікке қарамастан лайықты нәтиже көрсетті, – деп атап өтті Қарағанды облыстық бокс федерациясының персонал және жалпы мәселелер жөніндегі бас менеджері Айгүл Байманова.Қазір біздің спортшылар бірден бірнеше маңызды жарысқа – бокстан Латвиядағы халықаралық чемпионатқа, Қазақстан мен Азия чемпионаттарына дайындалуда.Ақпарат көзі : https://www.gov.kz/memleket/entities/karaganda/press/news/details/941353

Қарағанды облысының Бұқар жырау және Осакаров аудандарында пилоттық режимде «Қайта бастау» жобасы іске қосылды. Оның мақсаты – несие бойынша қарызы бар адамдарға көмек көрсету.«Қайта бастау» жобасы аясында қарызы бар адамдар үшін қаржылық сауаттылық сабақтары өткізіледі, тұрақты жұмыс табуға және банктерден қарызды қайтарудың жеке және жайлы шарттарын алуға көмектеседі.Бұл бағдарламаға 90 және одан көп күн қарызы бар қарыз алушылар қатыса алады. Бұл ретте қарыз сомасы маңызды емес. Алайда, егер адамның түрлі банктер мен микроқаржы ұйымдарынан бірнеше қарызы болса, онда оған қатысуға жол берілмейді.Жұмыспен қамту және әлеуметтік бағдарламалар бөлімдері қатысушылармен жеке шарттар жасасады, онда күрделі қаржылық жағдайдан шығу үшін қажетті барлық қадамдар жазылады.Бірінші кезекте қаржылық сауаттылық курсынан өту керек. Оны Amanat партиясының «Қарызсыз қоғам» жобасы бойынша өткізеді. Онлайн да, офлайн форматында да айналысуға болады.Содан кейін, егер қажет болса, борышкерге жұмысқа орналасуға көмектеседі. Бұл үшін облыста табысты жұмыс істейтін бірнеше әлеуметтік бағдарламалар іске қосылады. Олардың ішінде әлеуметтік жұмыс орындары, жастар практикасы, «Ұрпақтар келісімшарты», «Күміс жас» және «Алтын жас» жобалары, қоғамдық жұмыстар мен бизнес-идеяларды іске асыруға арналған гранттар бар.«Қайта бастау» жобасының қорытынды кезеңі – банктен немесе микроқаржы ұйымынан кредитті өтеудің жеке шарттарын алу. Оған оқудан өткен және жұмыс тапқан қатысушыларға жұмыспен қамту және әлеуметтік бағдарламалар бөлімдерінің мамандары көмектеседі.«Қайта бастау» жобасының қатысушысы болу үшін ауылдық округ әкімдігіне немесе жұмыспен қамту және әлеуметтік бағдарламалар бөлімдеріне жүгіну қажет.Байланыс телефондары:Осакаров ауданының жұмыспен қамту және әлеуметтік бағдарламалар бөлімі – (8-7214) 94-13-74;Бұқар жырау ауданының жұмыспен қамту және әлеуметтік бағдарламалар бөлімі – (8-7215) 42-10-38;Қарағанды облысының жұмыспен қамтуды үйлестіру және әлеуметтік бағдарламалар басқармасы – (87212) 43-16-75. Ақпарат көзі : https://www.gov.kz/memleket/entities/karaganda/press/news/details/941382

Астанада ITMLab әлеуметтік жобасының соңғы кезеңі өтті, онда қатысушылар сарапшылар мен әлеуетті инвесторларға мүгедектігі бар адамдардың өмір сүру сапасын жақсарту үшін өз әзірлемелерін ұсынды. Бұл техникалық оңалту құралдарының прототиптері, сонымен қатар қол жетімді және инклюзивті ортаны құруға бағытталған әртүрлі технологиялар.Бұдан бұрын хабарланғандай, ITMlab жобасы аясында Астана және Алматы қалаларында хакатондар өткізілді, оның барысында мүгедектігі бар адамдардың өмір сүру сапасын арттыру бойынша ең қызықты және өзекті стартап-жобалар іріктелді. Финалдық таныстырылым барысында 18 команда өз жобаларын ұсынды, олардың идеялары бір ай ішінде кәсіби оқытушылардың жетекшілігімен пысықталды. Презентациялар аяқталғаннан кейін қазылар алқасы прототиптерді жүзеге асыруға арналған гранттар алған 6 команданы таңдады.Соңғы кезеңде сарапшылар мен әлеуетті инвесторларға дайын әзірлемелер ұсынылды. Әрбір жоба терең зерттеулер барысында анықталған нақты қажеттіліктер мен жағдайларға негізделген. Бұл шешімдер технологияның қолжетімділігін арттыруға, коммуникацияларды жақсартуға және инклюзивті қоғамды дамытуға бағытталған.Shaka – көру қабілеті бұзылған адамдардың күнделікті өмірде бағыт-бағдар алуына көмектесетін вибромоторлар мен сенсорлары бар қолғап.Fenix Recovery – арнайы орталықтарда да, үй жағдайында да қолдануға болатын экзоскелет пен ықшамды локомоторлы тренажер.Bulan – мүгедектігі бар адамдардың арбасына арналған оңтайландырылған электронды құрылғы.РиМы – Брайль қарпіне бейімделген электронды дисплей.«Жан» ҚБ – ақ таяқтарға арналған тозуға төзімді ұштықтарды өндіру.Procrastinators – ымдау тілін мәтінге және керісінше нақты уақыт режимінде аударатын қосымша. «Бұл жобалар бірнеше ай бойы дайындалып, тиянақты және қажырлы еңбекті көп қажет ететін процестерден өтті. Бұл әлемді өзгерту өз қолымызда тұрғандығының дәлелі. ITMLab жобасы біздің елдегі инклюзивтілікті ілгерілетуге көмектеседі деп сенеміз. ITMLab жобасы одан әрі дамиды, ол біздің елімізде инклюзияны ілгерілету бойынша осындай жаңа бастамаларға есік ашады деп үміттенемін», – деп атап өтті «IteachMe» ҚҚ директоры Захира Бегалиева.Осы ITMLab жобасын іске асыру қол жетімді инклюзивті ортаны дамытуға, сондай-ақ инновациялық шешімдер үшін жағдай жасауға елеулі үлес қосқан бас серіктес – «Шеврон» компаниясының қолдауының арқасында мүмкін болды. ҚР Еңбек және халықты әлеуметтік қорғау министрлігі сараптамалық қолдау мен консультацияларды қамтамасыз ете отырып, жобаға жәрдемдесті, бұл идеяны табысты іске асыру үшін маңызды негіз болды.ҚР Еңбек және халықты әлеуметтік қорғау министрі Светлана Жақыпова алғы сөзінде мүгедектігі бар адамдардың өмір сүру сапасын арттыру үшін әлеуметтік жобаның маңыздылығын атап өтті.«ITMLab жобасының соңғы кезеңі шеңберінде оңалтудың техникалық құралдарын әзірлеуге цифрлық технологияларды қосу бөлігінде бастамалар ұсынылды. Бүгін біз жастардың осындай дамыту үдерістеріне қалай қатысатынына куә болып отырмыз. Бұл мүгедектігі бар адамдарға көмекке келетін, олардың өмір сүру сапасын жақсартатын инновациялар», – деді ЕХӘҚМ басшысы.Іс-шара қорытындысы бойынша мүдделі инвесторлар мен бизнес өкілдері ең перспективалы командаларға ынтымақтастық, тәлімгерлік және кәсіби білім алмасуды ұсынды. Бұл формат қатысушыларға өз идеяларын ұсынып қана қоймай, оларды одан әрі дамыту үшін құнды ұсыныстар мен қолдау алуға мүмкіндік берді.Ақпарат көзі : https://www.gov.kz/memleket/entities/enbek/press/news/details/941652