Алматы облыстық мәслихатының тұрақты комиссиялары көпшілік тыңдаулар өткізілетінін хабарлайдыКөпшілік тыңдаулар «Қазақстан Республикасындағы жергілікті мемлекеттік басқару және өзін-өзі басқару туралы», «Мемлекеттік жастар саясаты туралы» және «Мемлекеттік мүлік туралы» Қазақстан Республикасының заңдарына сәйкес өткізіледі.Көпшілік тыңдаулар барысында келесі мәселелер қаралады:1. Мемлекеттік жастар саясатының іске асырылу мәселесі.2. Еңбекшіқазақ ауданындағы білім беру ұйымдарының балансындағы пайдаланылмайтын 6 коммуналдық меншік объектісін сауда-саттыққа шығару мәселесі:2.1. Алға ауылы, Сұлтанбай көшесі, 53А мекенжайында орналасқан Алға орта мектебінің бұрынғы ғимараты;2.2. Еңбекшіқазақ ауданы, Жаңашаруа ауылы, Одаманов көшесі, 25 мекенжайында орналасқан Жаңашаруа орта мектебінің бұрынғы ғимараты;2.3. Еңбекшіқазақ ауданы, Жаңашаруа ауылы, Одаманов көшесі, 25 мекенжайында орналасқан Жаңашаруа мектебінің бұрынғы клуб ғимараты;2.4. Достық ауылы, Кенжебаев көшесі, 10-құрылыс мекенжайында орналасқан Қаратұрық орта мектебінің бұрынғы ғимараты;2.5. Ж. Қайыпов ауылы, Дарханбаевтар көшесінде орналасқан бұрынғы «Қазақстан» мектебінің ғимараты;2.6. Қайнар ауылы, Жәпеков көшесі, 2Б мекенжайында орналасқан Қызыл Қазақ бастауыш мектебінің бұрынғы ғимараты.3. Денсаулық сақтау басқармасына қарасты пайдаланылмайтын 1 коммуналдық меншік объектісін сауда-саттыққа шығару мәселесі:3.1. Іле ауданы, Ынтымақ ауылында орналасқан ФАП (фельдшерлік-акушерлік пункт) ғимараты.Өтетін күні мен уақыты: 2026 жылғы 5 тамыз, сағат 10:00.Өтетін орны: Қонаев қаласы, Қонаев көшесі, 5Б, Alatau Hub (2-қабат).Барлық ниет білдірген азаматтарды ашық пікір алмасуға және талқылауға белсенді қатысуға шақырамыз.Анықтама телефоны: 8 (72772) 20346Электрондық пошта: info@almoblmaslihat.gov.kz  Ақпарат көзі : https://www.gov.kz/memleket/entities/almobl-maslihat/press/news/details/1253306?lang=ru

Астана қаласы бойынша Мемлекеттік кірістер департаменті Астана күнімен шын жүректен құттықтайды!Астана – Тәуелсіз Қазақстанның жүрегі, ел дамуының жарқын үлгісі және болашаққа деген нық сенімнің символы. Бүгінде Елорда еліміздің саяси, экономикалық және мәдени орталығы ретінде қарқынды дамып, заманауи келбетімен, сәулетті ғимараттарымен және ерекше рухымен даралануда. Астана күні – ел бірлігін, ортақ жетістіктерді және Отанымыздың дамуына қосылған әрбір азаматтың үлесін айшықтайтын айрықша мереке. Елордамыз жылдан жылға көркейіп, тұрғындар үшін жайлы, заманауи және мүмкіндігі мол қалаға айналып келеді. Осы айтулы мереке күні барша қала тұрғындары мен қонақтарына зор денсаулық, бақ-береке, амандық пен мол табыс тілейміз. Әр шаңыраққа құт-береке қонып, бейбіт өмір мен татулық әрдайым салтанат құрсын. Астана одан әрі дамып, гүлденіп, еліміздің мақтанышы әрі жарқын болашағының символы болып қала берсін! Астана күні құтты болсын!Ақпарат көзі : https://www.gov.kz/memleket/entities/kgd-astana/press/news/details/1253295?lang=ru

Инвестициялық преференциялар – басым қызмет түрлері бойынша жаңа инвестициялық жобаларды іске асыруға арналған мемлекеттік қолдау шарасы.Не істеу қажет?1️⃣ Қазақстан Республикасында заңды тұлғаны тіркеу.2️⃣ Инвестициялық жоба мен бизнес-жоспарды әзірлеу.3️⃣ Инвестициялық преференциялар алу үшін elicense.kz порталы арқылы өтінім беру.Негізгі құжаттар:📄 өтінім;📄 заңды тұлғаның жарғысы;📄 инвестициялық жобаның бизнес-жоспары;📄 мемлекеттік заттай грантқа арналған құжаттар (берілген жағдайда);📄 салықтық преференциялар алу кезінде – жобалық құжаттамаға сараптама қорытындысы.Қандай мемлекеттік қолдау шараларын алуға болады?✅ кедендік баждарды төлеуден босату;✅ салықтық преференциялар;✅ инвестициялық субсидия;✅ мемлекеттік заттай грант.Инвестициялық преференциялар жобаны іске асыруға жұмсалатын шығындарды азайтуға және оның инвестициялық тартымдылығын арттыруға мүмкіндік береді.Барлық қызықтырған сұрақтар бойынша келесі сілтемелер арқылы хабарласуыңызды сұраймыз:- ҚР СІМ Инвестициялар комитетінің Инвестициялық преференциялар басқармасы: https://www.gov.kz/memleket/entities/invest?lang=kk- «KAZAKH INVEST» ұлттық компаниясы» АҚ: https://invest.gov.kz/kz/Ақпарат көзі : https://www.gov.kz/memleket/entities/tourism-vko/press/news/details/1253292?lang=ru

3 шілде күні аудандық мәдениет үйінде Қазақстан Республикасы Астана күніне арналған салтанатты мерекелік іс-шара өтті.Мереке Бейімбет Майлин ауданының әкімі Қайсар Батырханұлы Мыржақыповтың құттықтау сөзімен басталды.Іс-шараның ерекше әсерлі сәттерінің бірі – «Мерейлі отбасы» ұлттық конкурсының аудандық кезеңіне қатысушылар мен жеңімпаздарын салтанатты түрде марапаттау болды. Аудан әкімінің Алғыс хаттарымен Майер, Филькиных, Бабарыко және Бойко отбасылары марапатталды. Ал Горбенко және Сыздықовтар отбасылары аудандық кезеңнің жеңімпаздары атанып, облыстық кезеңде аудан намысын қорғайтын болды.Сондай-ақ республикалық олимпиадалардың, зияткерлік байқаулар мен спорттық жарыстардың жеңімпаздары және жүлдегерлері атанған, ауданымыздың абыройын асқақтатқан дарынды оқушылар марапатталды.Мерекелік көңіл күйді ауданның үздік шығармашылық ұжымдары мен өнерпаздарының қатысуымен өткен жарқын концерт жалғастырды. Астанаға, Қазақстанға, достық пен халық бірлігіне арналған әндер мен билер көрермендерге көтеріңкі көңіл күй сыйлап, мерекенің сәнін келтірді.Ақпарат көзі : https://www.gov.kz/memleket/entities/kostanai-bmalin-audany-akimat/press/news/details/1253283?lang=ru

Мангистау облысы бойынша Мемлекеттік кірістер департаментінің Заң басқармасы 2025 жылғы сот жұмысының қорытындысын шығарды. Департаменттің мемлекет мүддесі үшін кәсіби және қағидатты ұстанымының арқасында 15 талап-арыз қанағаттандырылып, 937,5 млн теңге көлемінде қаражат қорғалды.Ең маңызды істердің бірі ТОО «А» компаниясымен болған дау болды. Компания салықтық тексеру нәтижесі бойынша 700,2 млн теңге сомасына шығарылған хабарламаны даулап, негізгі құралдардың амортизациясы бойынша шегерімдерді негіздеуге тырысты. Алайда сот толығымен салық органының жағында тұрды. Неліктен сот салық төлеушіден бас тартты? ТОО «А» (шетелдік резидент емес компанияның филиалы) өзінің иелігінде болмаған және сатып алмаған жүзбелі бұрғылау қондырғысы (ЖБҚ) мен жабдықтың амортизациясы бойынша шығыстарды шегерімге жатқызуға әрекет жасады. Мүлік бас компаниядан ішкі орналастыру ретінде берілген.Сот анықтады:- Филиал дербес заңды тұлға болып табылмайды және салық есебінде бас ұйымға тиесілі активтерді мойындай алмайды.- ҚР Салық кодексінің 242-бабына сәйкес, шегерімге тек құжаттармен расталған салық төлеушінің нақты шығыстары жатады.- Уақытша әкелінген тауарлар өзгеріссіз күйінде қалуы тиіс (ҚР Салық кодексінің 303-бабы).- Бір жабдық бойынша қосарланған амортизацияға жол берілмейді.«Филиал бас компанияға тиесілі мүлік бойынша амортизациялық аударымдарды есептен шығаруға құқығы жоқ», — деп атап өтті сот, Департаменттің ұстанымын толығымен қолдады.Ақпарат көзі : https://www.gov.kz/memleket/entities/kgd-mangistau/press/news/details/1253254?lang=ru

Қазақстан Республикасының Қорғаныс министрі авиация генерал-лейтенанты Даурен Қосанов Ақтөбе облысына жұмыс сапарымен барды. Сапар аясында қорғаныс ведомствосының басшысы өңірдегі әскери инфрақұрылымның дамуымен танысып, жаңа нысандардың ашылу рәсіміне және елдің қорғаныс қабілетін одан әрі нығайтуға бағытталған бірқатар іс-шараға қатысты.Жұмыс сапарының негізгі оқиғасы Жем қаласында жаңа әскери бөлімнің ашылуы болды. Әскери құраманы құру өңірдің әскери қауіпсіздігін нығайту және Қарулы күштердің жедел мүмкіндіктерін арттыру жөніндегі міндеттерге сәйкес жүзеге асырылды.Қорғаныс министрі әкімшілік-штаб кешенін, казарма қорын, асхананы, мәдени-демалыс орталығын және әскери қалашықтың өзге де нысандарын аралап көрді.Қорғаныс ведомствосының басшысына жеке құрамды орналастыру жағдайлары, қызмет өткеруді ұйымдастыру, әскери қызметшілерді тамақтандыру мен бос уақытын ұйымдастыру, сондай-ақ әскери қызметті жайлы өткеруге және міндеттерді сапалы орындауға қолайлы жағдай жасайтын заманауи инфрақұрылымдық нысандар таныстырылды.Қорғаныс министрі заманауи әскери инфрақұрылымды дамыту Қарулы күштерді жаңғыртудың басым бағыттарының бірі екенін атап өтті. Әскери қалашықтарды кезең-кезеңмен жаңғырту, жаңа нысандар салу және қызмет жағдайларын жақсарту әскерлердің жауынгерлік әзірлігін арттыруға, жеке құрамды даярлау тиімділігін күшейтуге және мемлекеттің қорғаныс әлеуетін нығайтуға ықпал етеді.Ақпарат көзі : https://www.gov.kz/memleket/entities/mod/press/news/details/1253261?lang=ru

Алматы әкімі Дархан Сатыбалды Еуропалық қайта құру және даму банкінің (ЕҚДБ) президенті Одиль Рено-Бассомен кездесті. Тараптар бірлескен жобаларды жүзеге асыру және қала инфрақұрылымы, көлік, энергетика, цифрландыру салаларындағы ынтымақтастықтың келешегін талқылады.ЕҚДБ басшысының Қазақстанға сапары Қазақстан Республикасы Президенті жанындағы Шетелдік инвесторлар кеңесінің 38-пленарлық отырысы аясында өтіп жатыр.Дархан Сатыбалды ЕҚДБ-ның Қазақстанмен ынтымақтастығы басталғалы бері елдің дамуына қосқан үлесін жоғары бағалады.«Алматы – еліміздің ең ірі экономикалық орталығы әрі Қазақстан дамуының негізгі қозғаушы күштерінің бірі. Бүгінде қала республика экономикасының шамамен төрттен бір бөлігін қалыптастырып, жетекші іскерлік әрі инвестициялық орталық мәртебесін сақтап отыр. Біз үшін халықаралық серіктестермен қаржыландыру бағытында ғана емес, сонымен бірге олардың заманауи қалалық шешімдерді енгізудегі тәжірибесін пайдалану тұрғысынан да ынтымақтастықты дамыту маңызды», – деді Алматы әкімі.Кездесудің негізгі тақырыптарының бірі – ЕҚДБ, Қазақстанның даму банкі және Азия даму банкі қолдауымен жүзеге асырылып жатқан Алматыдағы 2-ЖЭО-ын жаңғырту жобасы болды.Сонымен қатар тараптар Алматы халықаралық әуежайын дамытуға бағытталған бірлескен жобаларды, оның ішінде жаңа жолаушылар терминалын салу, сондай-ақ Үлкен Алматы айналма автомобиль жолы (ҮАААЖ) жобасын талқылады.Кездесуде тұрақты даму мәселесіне де ерекше мән берілді. Алматы ЕҚДБ-ның Green Cities бастамасына қосылған Орталық Азиядағы алғашқы шаһар. Тараптар қала инфрақұрылымын жаңғырту, рельсті көлік жүйесін дамыту және жаңа инфрақұрылымдық жобаларды жүзеге асыру үшін «жасыл» қаржыландыру тетіктерін пайдалану бағытындағы ынтымақтастықты одан әрі жалғастыру жайын қарастырды.Ақпарат көзі : https://www.gov.kz/memleket/entities/almaty/press/news/details/1253252?lang=ru

Астанада Азия даму банкінің қолдауымен ұйымдастырылған Мемлекеттік-жекешелік әріптестікті (МЖӘ) дамыту бойынша халықаралық инвестициялық диалог өткізілуде. Іс-шараға мемлекеттік органдар, халықаралық қаржы институттары, инвесторлар, банктер мен жетекші халықаралық консультанттар қатысуда.Диалогтың негізгі мақсаты – инфрақұрылымдық жобаларға жеке капитал тарту перспективасын талқылау, мемлекеттік-жекешелік әріптестік тетігін жетілдіру және мемлекет, инвесторлар мен халықаралық қаржы институттары арасындағы өзара іс-қимылды нығайту.Бағдарламаның басты оқиғасы – халықаралық қаржы институттарының қатысуымен іске асырылатын ерекше маңызы бар МЖӘ жобаларының роудшоуы. Әлеуетті инвесторларға жеті ірі инфрақұрылымдық жоба ұсынылып отыр.Олардың қатарында Қарағанды, Семей, Ақтөбе мен Алматы қаласында университеттік аурухана салу, Алматыда Satbayev University жаңа студенттік жатақханаларын салу, «Алматы – Ыстықкөл» автомобиль жолының жобасын іске асыру, сондай-ақ Маңғыстау облысында теңіз суын тұщыландыру зауытын салу бар.Тақырыптық сессиялар шеңберінде қатысушыларға әлеуметтік инфрақұрылым жобалары, соның ішінде Семей мен Ақтөбеде салынатын ауруханалар мен Satbayev University студенттік жатақханаларының құрылысы егжей-тегжейлі айтылды.2026 жылғы 1 маусымдағы жағдайға қарағанда, Қазақстанда жалпы сомасы 3,65 трлн теңгеге 1 241 мемлекеттік-жекешелік әріптестік және концессия шарты жасалған. Тартылған инвестиция көлемі 1,42 трлн теңгеге немесе шамамен 2,9 млрд АҚШ долларына жетті.Таңертеңгілік сессия барысында халықаралық банкирлер мен мемлекеттік орган өкілдері инфрақұрылымды трансформациялау мәселесін талқыласа, түскі астан кейін қатысушылар практикалық бөлімге көшеді. Тәжірибелі спикерлер бизнес-идеяны әзірлеуден бастап оны нарыққа шығаруға дейінгі дайын кейстерді ұсынады. Ең бастысы, іс-шара шеңберінде market sounding (нарықтық консультациялар) сессиясы өткізілуде. Халықаралық инвестициялық диалог жүргізу Қазақстанның халықаралық капиталдың қатысуымен ауқымды инфрақұрылымдық жобаларды іске асыруда сенімді алаң ретіндегі ұстанымын нығайтуға, сондай-ақ мемлекеттік-жекешелік әріптестік тетіктерін дамытуға және ел экономикасына инвестиция тартуға қосымша серпін беруге арналған. Ақпарат көзі : https://www.gov.kz/memleket/entities/economy/press/news/details/1253235?lang=ru

Бүгін Премьер-министр Олжас Бектеновтің төрағалығымен ҚР Президенті жанындағы «Жасыл экономикаға» көшу жөніндегі кеңестің отырысы өтті. Күн тәртібінде қалдықтарды басқару, «Таза Қазақстан» тұжырымдамасын іске асыру, өнеркәсіп пен құрылыс салаларындағы энергия тиімділігін арттыру мәселелері қаралды. Кеңеске облыс әкімі Мұрат Ергешбаев селекторлық режим арқылы қатысты.Өңірде «Жасыл экономикаға» көшу тұжырымдамасы аясында энергия тиімділігін арттыру және қоршаған ортаға түсетін жүктемені азайтуда жүйелі жұмыс жүргізіліп келеді.Өткен жылы 280 шақырым электр желісі мен 87 қосалқы станцияға энергия үнемдейтін заманауи технологиялар енгізілді. Биыл 605 шақырым электр желісі мен 190 қосалқы станцияны жаңғырту жалғасуда. Сондай-ақ 8,7 шақырым жылу желісі жаңартылып, арнайы оқшаулағыш материалдармен қапталды. Бұл жылу беру жүйесіндегі шығынды едәуір қысқартты.Аймақта жаңартылатын энергия көздерін дамытуға да басымдық берілген. Қазір жалпы қуаттылығы 148 мегаватт болатын бес күн электр станциясы жұмыс істейді. Алдағы уақытта бір жел және үш күн электр станциясын іске қосу жоспарланып отыр.Қалдықтарды басқаратын 17 кәсіпорын биылғы бірінші тоқсанда 67 мың тонна қатты тұрмыстық қалдық жинап, оның 23 мың тоннасын қайта өңдеді. «Жасыл даму» АҚ қаржыландыруымен қалдықтарды сұрыптау, өңдеу және кәдеге жаратуға бағытталған 9 жоба жүзеге асырылуда.Салаға инвестиция тарту және озық технологияларды енгізу үшін халықаралық компаниялардың қатысуымен екі ірі инвестициялық жоба қолға алынған. Атап айтқанда, Оңтүстік Корея технологиясымен жылына 300 мың тонна қатты тұрмыстық қалдықтарды сұрыптау, өңдеу және кәдеге жарату зауыты, Германия технологиясымен жылына 240 млн дана шыны ыдыс шығаратын зауыт салынуда. Бұл – қалдықтарды қайта өңдеу үлесін арттырып, импортты алмастыруға және өңірдің экологиялық жағдайын жақсартуға ықпал ететін бастамалар.Ақпарат көзі : https://www.gov.kz/memleket/entities/kyzylorda/press/news/details/1253200?lang=ru

Әкімдік отырысына Жақсы ауданының маслихат төрағасы, ауыл және ауылдық округтердің әкімдері, жергілікті бюджеттен қаржыландырылатын атқарушы органдардың, аудандық аумақтық мемлекеттік органдардың басшылары, БАҚ өкілдері шақырылды.Отырыс барысында келесі мәселелер қаралды:Жақсы ауданындағы жолдардың құрылысы мен жөндеу жұмыстарының барысы туралы;Жақсы ауданында қоғамдық тәртіпті сақтау және жол қозғалысы қауіпсіздігін қамтамасыз ету туралы.Аудан әкімдігінің отырысынан кейін ағымдағы мәселелер бойынша кеңес өтті.Кеңестің күн тәртібінде келесі мәселелер қаралды:Жақсы ауданындағы жастарды қоса алғанда, халықтың көші-қонын төмендету жөніндегі Жол картасында көзделген іс-шараларды іске асыру және қол жеткізілген нәтижелер туралы;Ауыл шаруашылығы және ауыл шаруашылығы емес жобаларға жеңілдікпен кредит беру жобаларын іске асыру және шөп дайындау жөніндегі жұмыстардың барысы туралы;Орындаушылық тәртіп және мемлекеттік қызметшілердің Әдеп кодексінің нормаларын сақтау.Ақпарат көзі : https://www.gov.kz/memleket/entities/aqmola-zhaksy/press/news/details/1253190?lang=ru

Исламабад, 2026 жылғы 20 маусым – Қазақстан Республикасы Президентінің 2026 жылғы 3–4 ақпандағы Исламабадқа жасаған мемлекеттік сапары барысында қол жеткізілген уағдаластықтарды іске асыру шеңберінде, сондай-ақ Қазақстан мен Пәкістан Бокс федерациялары арасындағы өзара түсіністік туралы меморандумның және 2026 жылға арналған Жол картасына сәйкес, 2026 жылғы 16–20 маусым аралығында Қазақстан Бокс федерациясының делегациясы Исламабад қаласына іссапармен келді.Исламабад қаласындағы Қазақстан-Пәкістан «Достық» спорт орталығының базасында қазақстандық мамандар Дамир Буданбеков пен Нұржан Қондыбаев Пәкістан Бокс федерациясының боксшылары мен жаттықтырушылар құрамына арналған кешенді оқу-жаттығу семинарлары мен шеберлік сабақтарын өткізді.Аталған бастама спортшылардың техникалық, тактикалық және дене даярлығы деңгейін арттыруға, сондай-ақ тәжірибе алмасу және заманауи спорттық даярлық әдістемелерін енгізу арқылы жаттықтырушылардың кәсіби құзыреттерін жетілдіруге бағытталған.Баспасөз конференциясы барысында Қазақстанның Пәкістандағы Елшісі Е.Қыстафин спорт саласындағы екі ел арасындағы іс-қимылды одан әрі кеңейтудің маңыздылығын атап өтіп, бірлескен жобаларды жүзеге асыру өзара достық байланыстарды нығайтуға және спорт ұйымдары арасындағы ынтымақтастықты дамытуға ықпал ететінін мәлімдеді.Өз кезегінде Пәкістан Бокс федерациясының президенті И.Тунг аталған бағдарлама екіжақты өзара түсіністік туралы меморандум аясында іске асырылған алғашқы ірі практикалық жоба болғанын атап өтіп, Қазақстан серіктестерімен ынтымақтастықты одан әрі кеңейтуге мүдделілік білдірді.Сонымен қатар, оқу-жаттығу жиындарына қатысу үшін Исламабад қаласына пәкістандық текті танымал британдық кәсіпқой боксшы Амир Хан келіп, екі елдің жаттықтырушыларымен кездесіп, бокс әуесқойларына арналған шеберлік сабағын ұйымдастырды.Жабылу рәсімінде ПИР Өңіраралық үйлестіру министрлігінің Федералдық хатшысы А.Мохюддин Қазақстан тарапына алғыс білдіріп, елдеріміз арасындағы спорт дипломатиясын одан әрі дамытуға ниетті екенін растады.«Достық» спорт орталығын жабдықтармен және спорттық керек-жарақтармен қамтамасыз еткен «RDX» компаниясы Қазақстаннан келген қонақтарға арнайы естелік сыйлықтар әзірледі.Қазақстанның Пәкістандағы Елшілігі ҚР Бокс федерациясының президенті Шахмұрат Муталипке ҚР жаттықтырушылардың сапарын ұйымдастыруға көрсеткен жеке қолдауы және аталған бірлескен жобаны іске асыруға қосқан үлесі үшін алғыс білдіреді.Ақпарат көзі : https://www.gov.kz/memleket/entities/mfa-islamabad/press/news/details/1253193?lang=ru

 Қасым-Жомарт Тоқаев Пәкістан Ислам Республикасының Премьер-министрі Шахбаз Шарифті АҚШ пен Иран арасындағы Өзара түсіністік туралы меморандумның қол қойылуына дәнекер болған дипломатиялық әрекетінің нәтижелі аяқталуымен құттықтады.Президент осы тарихи келісімге қол жеткізуге ықпал еткен Пәкістанның конструктивті рөлін жоғары бағалап, Шахбаз Шарифтің көреген көшбасшылығын және оның қақтығыстарды бейбіт жолмен шешу қағидатын дәйекті түрде жақтайтынын атап өтті.Мемлекет басшысы аталған уағдаластық Таяу Шығыста және тұтас әлемде ұзақмерзімді тұрақтылықты қамтамасыз ету тұрғысынан айрықша мәнге ие екеніне назар аударды.Сондай-ақ Президент Исламабад өңірлік қауіпсіздік пен мемлекеттер арасындағы сенімді нығайтуға елеулі үлес қосуын жалғастыра беретініне үміт артатынын жеткізді.Қасым-Жомарт Тоқаев Қазақстанның Пәкістанмен сан қырлы ынтымақтастықты одан әрі кеңейтуге дайын екенін растап, Премьер-министрдің жауапты қызметіне табыс тіледі.Ақпарат көзі : https://www.gov.kz/memleket/entities/mfa-islamabad/press/news/details/1253184?lang=ru

Исламабад, 11 маусым 2026 жыл – Қазақстанның Пәкістандағы елшісі Е.Қыстафин мен Пәкістан Премьер-министрінің арнайы көмекшісі, Өнеркәсіп және өндіріс министрі Харун Ахтар Хан мырзамен кездесу өтті.Кездесу барысында екіжақты күн тәртібіндегі өзекті мәселелер мен ынтымақтастықты одан әрі дамыту перспективалары бойынша жан-жақты пікір алмасу болды. Сонымен қатар, тараптар 2026 жылғы ақпанда ҚР Президенті Қ.К. Тоқаевтың Пәкістанға мемлекеттік сапары аясында жеткен келісімдерді жүзеге асыруға өздерінің адалдығын растады.Өз тарапынан Х.Хан мырза Қазақстан кәсіпкерлеріне, Пәкістанмен сауда-экономикалық ынтымақтастықты дамытуға және өзара мүдделі бірлескен инвестициялық жобаларды іске асыруға толық қолдау көрсетілетінін жеткізді.Ақпарат көзі : https://www.gov.kz/memleket/entities/mfa-islamabad/press/news/details/1253172?lang=ru

Бүгін Қазақстан Республикасы Мемлекеттік қызмет істері агенттігінің облыс бойынша департаментінің өкілдері қала әкімдігінің мемлекеттік қызметшілерімен сыбайлас жемқорлыққа қарсы квиз өткізді.Іс-шара барысында Сыбайлас жемқорлықтың алдын алу басқармасының бас маманы Қапышев Багдат Агибаевич және Мемлекеттік қызмет саласындағы бақылау басқармасының бас маманы Бағда Бірлік Серікұлы сыбайлас жемқорлыққа қарсы заңнамадағы негізгі өзгерістер туралы айтып, қатысушылардың сұрақтарына жауап берді. Сонымен қатар мемлекеттік қызметте адалдық, заңдылық және қызметтік әдеп қағидаттарын сақтаудың маңыздылығына ерекше тоқталды.Сыбайлас жемқорлыққа қарсы квиз интерактивті форматта өтіп, қатысушылар өз білімдерін сынап, құқықтық сауаттылықтарын арттырып, сыбайлас жемқорлыққа қарсы заңнама талаптары бойынша білімдерін нығайтты.Ақпарат көзі : https://www.gov.kz/memleket/entities/kostanai-kalasy-akimat/press/news/details/1253176?lang=ru

ҚР Қаржы министрі Мәди Такиев  Қырғызстанда іссапармен болып, Қазақстанның 4 санаторлы-курорттық нысанның құрылысын пысықтады.Ведомство басшысы нысандардың қазіргі ахуалын, инженерлік және туристік инфрақұрылымның даму деңгейін, сондай-ақ оларды жаңғырту мен пайдалану тиімділігін арттыруға бағытталған инвестициялық жобалардың іске асырылу барысымен танысты.Әсіресе «Қазақстан» шипажайының құрылысына ерекше назар аударылды. Мұнда құрылыс-монтаждау жұмыстары бекітілген кестеге сәйкес жүргізіліп келеді. Аталған нысанды биыл төртінші тоқсанда пайдалануға беру жоспарланған. Осы жобаның нәтижесінде заманауи талаптарға толық сай келетін жаңа санаторлы-курорттық кешен іске қосылады деп межеленіп отыр.Қалған 3 нысанға келсек, заманауи шипажайды салу мен жаңғыртуға арналған жобалық-сметалық құжаттама әзірленіп жатыр. Бұл жобаларды іске асыру азаматтарға сапалы қызмет көрсетіп, тән сауықтыруға мүмкіндік береді. Сондай-ақ Ыстықкөл жағалауында еліміздің рекреациялық нысандарының туристік әлеуеті мен инвестициялық тартымдылығын арттыруға жол ашады.Бұл сапардың қорытындысына сәйкес Мәди Төкешұлы қолға алынған жобаларды белгіленген мерзімде іске асырып, сондай-ақ мемлекеттік активтерді тиімді пайдалану мен құрылыс жұмыстарының сапасына тұрақты бақылау жүргізу жөнінде бірқатар нақты тапсырма жүктеді.Ақпарат көзі : https://www.gov.kz/memleket/entities/minfin/press/news/details/1253166?lang=ru

 «Бірыңғай жинақтаушы зейнетақы қоры» АҚ (БЖЗҚ, Қор) азаматтарды қарттыққа қаражат жинауға қажетті сенімді құралдармен қамтамасыз ете отырып, елдің зейнетақы жүйесінде шешуші рөл атқарады. БЖЗҚ қазақстандықтарға цифрлық форматта түрлі қызметтер көрсетеді және оларды салымшылардың қажеттіліктеріне бейімдей отырып дамытуда. Қордың сайтта және мобильді қосымшада 24/7 режимінде көрсететін қызметтерінің қолжетімділігі – салымшылардың өз жинақтарына деген қызығушылығын арттырудың маңызды шарты.01.01.2026ж. мен 31.05.2026ж. аралығындағы 5 айда Қор салымшыларға 24,7 млн қызмет көрсетті. Көрсетілген қызметтердің жалпы санының 14,3 млн-ы электрондық форматта, 9,9 млн автоматты түрде жүргізілді. Осылайша, автоматты, электронды және қашықтықтан көрсетілген қызметтердің үлесі жалпы санның 98,7%-ын құрады. Салымшыларға 322,1 мың қызмет жүзбе-жүз көрсетілді, оның ішінде 313,4 мың қызмет тікелей Қордың кеңселерінде жүзеге асырылды.Естеріңізге сала кетейік, барлық зейнетақы шоттары БЖЗҚ-ға бірінші жарна түскен кезде автоматты түрде ашылады. Сондай-ақ, Қазақстан Республикасының 18 жасқа толмаған азаматтарына нысаналы талаптар автоматты түрде есептеліп, "Ұлттық қор – балаларға" бағдарламасы шеңберінде нысаналы жинақтарды алушыларға нысаналы жинақтарды есептеу және есепке алу үшін нысаналы жинақтау шоттары ашылады. Есепті кезеңде шартты зейнетақы шоттарын (жұмыс берушінің ЖМЗЖ аударуы нәтижесінде ашылатын ШЗШ) және нысаналы жинақтау шоттарын ("Ұлттық қор ­— балаларға" бағдарламасы аясында ашылатын НЖШ) қоса алғанда, зейнетақы жарналарының барлық түрлері бойынша автоматты режимде ашылған жеке зейнетақы шоттарының (ЖЗШ) жалпы саны 891,7 мыңға жетті. Жеке зейнетақы шотынан, шартты зейнетақы шотынан (ШЗШ), сондай-ақ нысаналы жинақтау шотынан (НЖШ) үзінді көшірме алу бұрынғысынша ең танымал қызмет санатында. Жыл басынан бері ЖЗШ, ШЗШ, НЖШ-дан 15,0 млн-нан аса үзінді көшірме берілді. Оның 13.3 млн-ы – электрондық, ал 1,5 млн үзінді көшірме автоматты түрде рәсімделді. Шоттың жай-күйіне қатысты ақпаратты жеке кабинет арқылы алу – зейнетақы жинақтарын қадағалаудың ең ыңғайлы, сенімді және жедел тәсілі. Қызмет тәулік бойы (24/7) онлайн режимде жұмыс істейді, бұл ақпаратты кез келген уақытта және әлемнің кез келген нүктесінен алуға мүмкіндік береді. Сонымен қатар, зейнетақы шоттары туралы ақпаратты БЖЗҚ сайты арқылы ғана емес, egov.kz электрондық үкімет порталы немесе оның мобильді қосымшасы арқылы да алуға болады. Бұл мемлекеттік қызметтерді бірыңғай платформалар арқылы алуға дағдыланған азаматтарға өте қолайлы. БЖЗҚ 2025 жылдан бастап жыл сайынғы үзінді көшірмелерді пошта арқылы автоматты түрде жіберу тоқтатылғанын ескертеді. Бірақ, зейнетақы жинақтарының жай-күйі туралы ақпаратты "БЖЗҚ" АҚ атына тиісті сұранысты жіберген пошта арқылы алу мүмкіндігі сақталады.Салымшылардың (алушылардың) Қор сайтындағы және ұялы қосымшасындағы Жеке кабинеттен үзінді көшірме алудан басқа өз деректемелеріне өзгерістер мен толықтырулар енгізу, шотының бар екендігі туралы анықтама алу, 1 немесе 2 топтағы мүгедектіктің мерзімсіз уақытқа белгіленуіне байланысты немесе ерікті зейнетақы жарналары бойынша зейнетақы төлемдерін тағайындау туралы өтініш беру сияқты қызметтерді пайдалануға мүмкіндіктері бар. Сондай-ақ, зейнетақы жарналарын төлеу туралы өтініштің мәртебесін қадағалау, инвестициялық портфельді басқарушыға (ИПБ) жинақтардың бір бөлігін аудару, зейнетақы калькуляторының көмегімен болашақ зейнетақыны болжамды есептеу және т.б. қызметтер қолжетімді. Өткен кезеңде салымшылардың зейнетақы жинақтарының бір бөлігін ИПБ сенімгерлік басқаруына аударуға 38,7 мың өтініші қабылданды, оның басым бөлігі – электрондық форматта.Есепті кезең ішінде деректемелерді өзгертуге 46,7 мың өтініш қабылданды. Оның 44,0 мыңы Қордың кеңселерінде орындалды. БЖЗҚ мамандарына қандай да бір қызмет түрі бойынша жүгіне отырып, салымшылар, әдетте, жинақтарды қалыптастыруға қатысты қосымша кеңестер ала алады. Ақпараттық-түсіндіру жұмыстары аясында 25,1 мың көшпелі таныстырылым өткізіліп, оған 505,1 мың адам қатысты. Бұқаралық ақпарат құралдарында БЖЗҚ хабарламалары бойынша 17,0 мың материал жарияланды.Салымшылар мен алушылардан кері байланыс (Call-орталық, веб-сайт арқылы кеңес, мессенджерлер, әлеуметтік желілер және басқа байланыс түрлері) арналары бойынша 192,5 мың өтініш түсті.Естеріңізге сала кетейік, кез келген компания Қор кеңсесіне барып жинақтаушы зейнетақы жүйесінің мәселелері бойынша таныстырылым мен кеңестер өткізуге өтінім бере алады. Ол үшін 1418 нөмірі бойынша байланыс орталығына қоңырау шалып, Қор сайты немесе ұялы қосымшасы арқылы хабарласу қажет.БЖЗҚ-ның кеңес беру қызметтерін мессенджерлер (+7 777 000 14 18 нөмірі бойынша WhatsАpp және Viber чат-боттары) арқылы, 1418 нөмірі бойынша байланыс орталығынан (Қазақстан бойынша қоңырау шалу тегін), enpf.kz корпоративтік сайтынан, сондай-ақ, Instagram, Facebook, ВКонтакте, Telegram, Одноклассники сияқты әлеуметтік желілердегі БЖЗҚ-ның ресми парақшаларынан алуға болады.  Ақпарат көзі : https://www.gov.kz/memleket/entities/akimat-karakiya/press/news/details/1255661?lang=ru

Қазақстан Республикасы Қарулы Күштерінің құрамалары мен әскери бөлімдерінде әскерлерді жауынгерлік әзірліктің жоғары дәрежелеріне келтіру бойынша кешенді тактикалық-саптық сабақтар өткізілді.Іс-шаралар барысында әскери қызметшілер әскерлерді жауынгерлік әзірліктің жоғары дәрежелеріне келтіру кезіндегі іс-қимыл тәртібін пысықтап, жауынгерлік даярлық бағдарламасында көзделген ұйымдастырушылық және практикалық іс-шаралар кешенін орындады.Әскери бөлімдердің аумағында жеке құрамның практикалық дағдыларын жетілдіруге арналған оқу орындары ұйымдастырылды. Жекелеген бөлімшелер оқу-жауынгерлік міндеттерді далалық жағдайда пысықтау үшін әскери полигондар мен оқу орталықтарына жоспарлы марштар жасады.Сабақтар жоспарлы оқу сипатында өтіп, далалық машықтану деңгейін арттыруға, әскери басқару органдарының, құрамалар мен бөлімшелердің үйлесімді іс-қимылын жетілдіруге, сондай-ақ Қарулы Күштердің мемлекеттің әскери қауіпсіздігін қамтамасыз ету жөніндегі міндеттерді орындауға әзірлігінің белгіленген деңгейін сақтауға бағытталды.Жауынгерлік әзірліктің тұрақты жоғары деңгейін сақтау – мемлекетті қорғау жөніндегі міндеттерді тиімді орындаудың негізгі шарттарының бірі. Осындай іс-шараларды жүйелі түрде өткізу әскери қызметшілердің кәсіби даярлығын жетілдіруге, бөлімшелер арасындағы өзара іс-қимылды нығайтуға және түрлі жағдайларда шешім қабылдау жеделдігін арттыруға мүмкіндік береді.Ақпарат көзі : https://www.gov.kz/memleket/entities/mod/press/news/details/1253116?lang=ru

Маңғыстау облысы бойынша Мемлекеттік кірістер департаменті, Қазақстан Республикасының Салық кодексінде уақытша қаржылық қиындықтарға тап болған салық төлеушілерді қолдау шаралары көзделгенін хабарлайды.Салық кодексінің 133-бабы 4-тармағына сәйкес салықтарды төлеу бойынша мүлік кепілінсіз және банк кепілдігінсіз кейінге қалдыру немесе бөліп төлеу мүмкіндігі қарастырылған.Сондай-ақ Қазақстан Республикасы Қаржы министрінің 2025 жылғы 31 қазандағы № 651 бұйрығымен салықтарды, төлемақыларды және өсімпұлдарды төлеу бойынша кейінге қалдыруды немесе бөліп төлеуді ұсынуға қатысты жекелеген мәселелер бекітілді. Қызметті кім ала алады?  Кейінге қалдыру немесе бөліп төлеу мүмкіндігін алу үшін келесі шарттарға сәйкес болу қажет:— берешек сомасы 1500 АЕК-тен аспауы тиіс;— 2026 жылы 1 АЕК мөлшері 4 325 теңге, тиісінше берешектің ең жоғары сомасы — 6 487 500 теңге;— салық төлеушіде бұрын берілген қолданыстағы кейінге қалдыру немесе бөліп төлеу болмауы қажет;— міндетті сипаттағы орындалмаған хабарламалар болмауы тиіс;— салық төлеуші ретінде тіркелген күннен бастап өтініш берген күнге дейін кемінде 2 жыл өтуі керек;— өтініш беру кезінде салық төлеуші қызметін тоқтата тұру мәртебесінде болмауы тиіс.Бұл шарттар көлденең мониторингке қатысушыларға қолданылмайды. Өтініш қалай беріледі? Кейінге қалдыру немесе бөліп төлеу туралы өтініш 12 айға дейінгі мерзімге Салық төлеушінің кабинеті арқылы электронды түрде беріледі.Өтініш бермес бұрын талаптарға сәйкестікті алдын ала тексеріңіз.Ақпарат көзі : https://www.gov.kz/memleket/entities/kgd-mangistau/press/news/details/1253064?lang=ru

2026 жылғы 2 шілдеде Қазақстан Республикасы Сыртқы істер министрлігінің Алматы қ. Өкілдігі Алматы қ. Қазақстан Республикасы Дипломатиялық қызмет күніне орай дипломатиялық қызмет ардагерлері мен Алматы қ. ҚР СІМ өкілдігінің қызметкерлері үшін салтанатты іс-шара өткізді. ҚР СІМ-нің атынан Қазақстан Республикасы Сыртқы істер министрлігінің Ерекше тапсырмалар жөніндегі елшісі – Алматы қаласындағы ҚР СІМ Өкілдік басшысы Жәнібек Әбдрашов Қазақстанның халықаралық аренадағы жетістіктерін, елдің көпжақты сыртқы саясатқа бейілділігін және бейбітшілік пен қауіпсіздікті нығайтуға бағытталған бастамалардың маңыздылығын атап өтіп, қонақтарды мерекемен құттықтады. Іс-шараның құрметті қонақтары дипломатиялық қызмет ардагерлері болды.Ақпарат көзі : https://www.gov.kz/memleket/entities/mfa-almaty/press/news/details/1253065?lang=ru

Құрметті Қазақстан Республикасының азаматтары!2026 жылғы 23 тамызда Қазақстан Республикасы Құрылтайы депутаттарының сайлауы өтеді.Осыған байланысты Испанияда тұрақты немесе уақытша тұратын Қазақстан Республикасының азаматтарын дауыс беруге шақырамыз.🗳 №434 сайлау учаскесі📍 Қазақстан Республикасының Испания Корольдігіндегі ЕлшілігіAvenida de Madroños, 43, Madrid🕖 Дауыс беру уақыты: 07:00–20:00Сондай-ақ Барселона қаласында көшпелі сайлау учаскесі ұйымдастырылады:📍 Қазақстан Республикасының Барселонадағы КонсулдығыPaseo de Gracia, 49, 2º-1a, Barcelona🕛 Дауыс беру уақыты: 12:00–14:00❗ Назар аударыңыз! Барселонадағы дауыс беру көшпелі сайлау учаскесі форматында өткізілетіндіктен, дауыс беру тек 12:00-ден 14:00-ге дейін жүзеге асырылады.Сайлау бюллетеньдерінің жеткілікті санын қамтамасыз ету мақсатында дауыс беруге ниет білдірген барлық азаматтарды төмендегі сілтеме арқылы алдын ала тіркелуге шақырамыз. Бюллетеньдер саны алдын ала берілген өтінімдер негізінде қалыптастырылады. Сондықтан алдын ала тіркелмеген жағдайда бюллетень берілмеуі мүмкін.🔗 Алдын ала тіркелу:https://forms.gle/rfi2xQci6t31DqVt6Баршаңызды сайлауға белсенді қатысуға шақырамыз!Ақпарат көзі : https://www.gov.kz/memleket/entities/mfa-madrid/press/news/details/1253051?lang=ru