Түрлі мәселелер бойынша 12 адам қабылданды. Жер пайларын қайтару, соя сүтін өндіру бойынша жобаларды іске асыруға жәрдемдесу, құс шаруашылығын дамыту, жайылымға жер учаскелерін беру және т. б. мәселелер қаралды.Министр барлық өтініштерге егжей-тегжейлі жауап берді, сондай-ақ сұрақтар мұқият зерттелетініне және ескерілетініне сендірді.Министрлік басшылығы белгіленген кестеге сәйкес азаматтарды жеке мәселелері бойынша қабылдайды.Ақпарат көзі : https://www.gov.kz/memleket/entities/moa/press/news/details/889674

Су саласында ашықтықты қамтамасыз ету мақсатында Су ресурстары және ирригация министрлігі жыл сайын өз сайтында Қазақстанның су ресурстарын пайдалану туралы Ұлттық ақпараттық есеп жариялайтын болады. Жаңа Су кодексінің жобасында аталған норма қарастырылған.Ұлттық есеп - бұл еліміздің су қорының жай-күйі, қорғалуы және пайдаланылуы туралы өткен күнтізбелік жылға талдамалық есеп.Онда негізгі өзендердің сулылығы туралы мәлімет, су шаруашылығы бассейндері, өңірлер мен экономиканың салалары бөлінісінде су пайдалануды талдау, су шаруашылығы және гидротехникалық құрылыстардың, оның ішінде мемлекетаралық құрылыстардың саны мен жай-күйі туралы ақпарат көрсетіледі. Сондай-ақ, құжатта су қорын қорғау бойынша іске асырылған іс-шаралар, инвестициялық жобаларды іске асыру және заманауи технологияларды енгізу туралы мәліметтер жазылады.«Жаңа Су кодексінің жобасына сәйкес, орталық мемлекеттік және жергілікті атқарушы органдар есепті жылдан кейін 1 наурызға дейін есеп беру үшін ақпарат дайындауы тиіс. Ұлттық есеп 1 мамырдан кешіктірілмей жариялануы керек. Бұл Қазақстанның су ресурстарын басқару мен пайдаланудың ашықтығын қамтамасыз етеді»,- деді Су ресурстары және ирригация бірінші вице-министрі Болат Бекнияз.Ақпарат көзі : https://www.gov.kz/memleket/entities/water/press/news/details/889602

LRT желісі станцияларының темірбетонды негізгі құрылыстары 100% аяқталды, деп хабарлайды елорда әкімдігінің ресми сайты CTS-ке сілтеме жасап.Атқарылған жұмыстар аясында монолитті қаңқалар, көтергіш арқалықтар, платформалардың темірбетонды конструкциялары, ригельдер және басқа да элементтер салынды. Бұл үшін В45 маркалы 79 971 текше метр бетон мен 9,59 мың тонна арматура қолданылды.LRT желісі көп деңгейлі залдары мен платформалары бар 18 станциядан тұрады, олар екі түрге бөлінеді: жердегі (11 станция) және жер үсті (7 станция).Жер үсті станциялары Сығанақ көшесінде (2 станция), Ш. Қалдаяқов көшесінде (4 станция) және «Нұрлы жол» теміржол вокзалы ауданында (1 станция) орналасқан станциялар жолға орталықтандырылған орналасуымен ерекшеленеді. Станцияларға қауіпсіз кіру үшін жерүстінен өтетін екі өткел қарастырылған. Барлығы – 14 өткел.Биыл № 101 станциясының (100% дайын) қасбет жұмыстары аяқталды, оған 497,51 тонна металл конструкцияларын орнату және сыртқы панельдер мен витраждарды қаптау (4 765 м²) кіреді. № 109 және № 112 станцияларында 1 210,22 тонна металл конструкциялары орнатылды.2025 жылы барлық станция құрылысы толығымен аяқталады деп жоспарланып отыр. Соның ішінде қасбеттердің монтажы, жерүстінен өтетін өткелдердің құрылысы, ішкі әрлеу, жақын аумақтарды абаттандыру жұмыстары жүргізіледі.Ақпарат көзі : https://www.gov.kz/memleket/entities/astana/press/news/details/889591

Бүгін Алға ауданы активінің отырысында өңір басшысы Асхат Шахаров ауданның жаңа әкімін таныстырды.Бұл лауазымға Асланбек Шүйіншалиев тағайындалды. Асхат Шахаров ауданның жаңа әкіміне сәттілік тілеп, Алға ауданының әлеуметтік-экономикалық дамуына қатысты міндеттер қойды.Облыс әкімі атап өткендей, аудандағы экономика тұрақты дамып келеді, алайда одан әрі ілгерілеу үшін салаларды әртараптандыруға, инфрақұрылымды жаңғыртуға және инвестицияларды белсенді тартуға назар аудару қажет.«Алға ауданының экономикасы тұрақты дамуды көрсетіп отыр, алайда өңдеу өнеркәсібінің үлесі небәрі 1,1% құрайды. Соңғы үш жылда негізгі капиталға салынған инвестициялар көлемі 179,8 млрд теңгені құрады, оның тек 0,04%-ы – аудан үлесіне тиесілі. Қайта өңдеу мен тау-кен өнеркәсібіне инвестициялардың өсуін ынталандыру үшін инвесторларды тарту және қолайлы жағдайлар жасау қажет. Ауданда инвестиция көлемі 70 млрд теңге болатын «Aqtobecem» ЖШС базасында цемент өндіретін зауыт салу жоспарлануда, ол 385 жұмыс орнын қамтамасыз етеді. Алға индустриялық аймағында 2015 және 2017 жылдары іске қосылған екі ғана кәсіпорын жұмыс істейді, ал соңғы бес жылда жаңа инвестициялар мен кәсіпорындар болған жоқ. Өнеркәсіптік аймақтың әлеуетін пайдалана отырып, жаңа жобаларды жүзеге асыру бойынша жұмысты жандандыру қажет», - деп тапсырды ауданның жаңа әкіміне Асхат Шахаров.Сонымен қатар, өңір басшысы ауданның азық-түлік қауіпсіздігін қамтамасыз ету мақсатында құс шаруашылығын, өсімдік шаруашылығын, балық және қайта өңдеу шаруашылықтарын дамытуды тапсырды. Ауданның мүмкіндіктерін пайдалана отырып, туризмді дамыту үшін қолайлы жағдайлар жасау қажет. Аудандағы жолдардың сапасын жақсарту, санитарлық тазалықты жақсарту бойынша жеке тапсырмалар берілді.«Инфрақұрылымдық жобаларды, соның ішінде Алға-Тоқмансай трассасын, Алға-Қарабұлақ жолындағы көпірді және Талдысай ауылына кіреберіс жолды аяқтау үшін 2025 жылға арналған қаржыландыру мәселесін шешу қажет. Бұрынғы химия зауытының қалдықтары да өзекті мәселе: салмағы 2,6 млн тоннаны құрайтын қауіпті қалдықтардың 17 түрі анықталды. Аумақты тазартып, қоршап, тұрғындардың денсаулығына кері әсерін тигізбеу қажет», - деп әкім жұмыстың негізгі бағыттарына баса назар аударды.Алға ауданының жаңа әкімі барлық қойылған міндеттерді орындауға және күш-жігерін ауданның экономикалық әлеуетін дамытуға бағыттауға дайын екенін білдірді.Өз кезегінде ауданның бұрынғы әкімі Нұрбол Ержанов өз жұмысы кезеңінде көрсеткен сенімі мен қолдауы үшін алғысын білдіріп, ауданның жаңа әкіміне өңірдің дамуы үшін табыс пен жемісті жұмыс тіледі. Ақпарат көзі : https://www.gov.kz/memleket/entities/aktobe/press/news/details/889581

Астанада JOLTAP жобасы өз жұмысын жалғастыруда, оның аясында астаналықтар қазіргі кәсіптік мамандықтар бойынша тегін білім ала алады. Жоба түлектерінің бірі Рабиға Махмұт жаңа білімнің кәсіби деңгейін және қызмет құнын қалай арттыратынын айтты, деп хабарлайды елорда әкімдігінің ресми сайты.Рабиға бірнеше жылдан бері SMM маманы болып жұмыс істейді, бірақ еңбегінің ақысы азғантай болатын.«Курсқа дейін мен SMM маманы ретінде достарымнан аздаған ақшаға шағын жобаларды қабылдап жүрдім. Ата-аналарға арналған қызметтерді дамытуға көмектестім. Кәсіби өсу үшін қосымша білім қажет болды», – дейді жоба түлегі.Оған JOLTAP бағдарламасы туралы жоба бойынша мобилографияны үйренген әпкесі айтқан.«Бастапқыда күмән болғаны рас: тегін білім берудің сапасы еріксіз ойландыратын. Бірақ әпкем оқу үдерісінің анық, түсінікті және жүйелі екенін айтып сендірді. Осыдан кейін бағымды сынап көрмек болып, курсқа жазылдым. Алдымен SMM арқылы, содан кейін мақсатты жарнама арқылы. Ол кезде шағын интернет-дүкенім болатын, ал жарнама көздеген нәтижемді бере қоймады, сондықтан жарнамалық шығындардың тиімділігін арттыру үшін жарнаманы қалай жасау керектігін үйренгім келді», - дейді ол.Түлек SMM маманы үшін трендтерді ұстану және үнемі жаңа нәрселерді үйрену маңызды екенін атап өтті.«Осыған дейін жобаларды қалай жүргізу керектігі туралы жүйелі білім болған емес. Курстан кейін айқын көзқарасым пайда болды. Мұғалім бәрін анық-қанығына дейін түсіндіріп, оқу процесінде бізге қолдау көрсетті. Бұл курстар маған бұрын болмаған сенімділік берді», - деп атап өтті JOLTAP түлегі.Оның айтуынша, курс барысында ол мақсат қоюды және қателермен жұмыс істеуді де үйренді.«Мен көп жылдар бойы өз бетімше таргетингті зерттедім, бірақ жарнамаға қатысты сенімді емес едім. Соның салдарынан ақша ауаға кетіп қалатын. Курста мақсатты көрсеткіштерді қалай дұрыс қою керектігін, қандай қателіктер жіберілетінін, бюджетті қалай тиімді пайдалану керектігін білдім. Таргеттік жарнамадағы қателерді зерттеу өте пайдалы болды», - деп атап өтті Рабиға.Курстарды аяқтағаннан кейін Рабиға SMM маманы ретінде жұмысын ары қарай жалғастыруда, бірақ ендігі білім деңгейі бұрынғыдан да жоғары. Ол тек контент жасап қана қоймай, мақсатты жарнаманы жолға қоятын озық маманға айналғандықтан, өз еңбегінің ақысын көтере алды.«Курстардың нәтижесінде сертификат қана емес, сонымен қатар күнделікті қолданатын білім де бар. Бұл бізге үлкен жобаларда бірлесіп жұмыс істеуге және кірісті арттыруға мүмкіндік берді», - деді ол.Түлек JOLTAP жобасының қолжетімділігін жоғары бағалады.«Бұл Қазақстандағы ең жақсы жобалардың бірі деп айта аламын. Білікті мамандар материалдың жоғары сапасы мен өзектілігін қамтамасыз етеді. Тегін оқыту әрбір адамға қаржылық жағдайына қарамастан білім алуға мүмкіндік береді. Түлектерге қосымша карьералық мүмкіндіктері беріледі. Бұл курстарды достарым мен таныстарыма қуана-қуана ұсынамын», - деп сөзін түйіндеді ол.Цифрлық кәсіптерге оқытуға арналған қысқа мерзімді Freelance Mumkindik бағдарламасы тек Астана қаласының 18 бен 50 жас аралығындағы тұрғындарына қолжетімді. JOLTAP жобасы аясында оқыту тегін жүргізіледі. Оқуға жазылу «Баршаға мүмкіндік» модульдік пунктерінде жүргізіледі.Ақпарат көзі : https://www.gov.kz/memleket/entities/astana/press/news/details/889362

Астана қаласындағы Триатлон саябағында отбасылық жүгіру іс-шарасы ұйымдастырылды, деп хабарлады елорда әкімдігінің ресми сайты.Күз мезгілінің соңғы күндері болса да, Астанада қар түсіп, ауа райы төменгі градусты көрсетіп тұрғанына біршама болды. Алайда жексенбі күні қатты аяз болмай, қатысушыларға ауа райы қолайлы болды. Дәстүрлі отбасылық жүгіру сайысына 100-ге жуық отбасы тіркеліп, әкелер – 2,3 шақырым, аналар – 0,5 шақырым, балалар – 0,2 шақырымда жарысты.«Тұрақты жүгіретін жандар жазда және қыста жүгірудің айырмашылығын бірден сезінеді. Қыста жылдамдық азайып, көп қимылдауға тура келеді. Оның үстіне Астана қаласының қысы қатал болғандықтан, жергілікті тұрғындар ауа райына бейімделген. Әсіресе бала ата-анасы арқылы қыста да спортпен айналысуға болатынын көріп, қорқынышын азайтады.Балалар арасында 8-13 жас аралығы деп белгіленді. Неліктен? Cебебі, 8 жаста ғана баланың дене-бітімі қалыптасып, қатты жүгіруге бейімделеді. Қашықтық та қатты үлкен емес. Небәрі – 200 метр. Оның өзінде бұл санатты тағы 3-ке бөлдік: 8-9 жас, 10-11 жас, 12-13 жас. Өйткені физикалық тұрғыдан айырмашылық қатты білінеді.Бұндай шара әр жыл сайын тұрақты түрде ұйымдастырылады. Мақсатымыз – әр отбасыны салауатты өмір салтын ұстанып, спортпен айналысуға шақыру. Себебі, отбасылық эстафетаның ерекшелігі – отбасылар өзара бір-бірін қолдауды, сенім артуды, тіл табысуды үйренеді», - деді Астана қаласы әкімдігінің «Спорттық-бұқаралық іс-шараларды өткізу дирекциясы» КММ спорттық-бұқаралық іс-шараларды жоспарлау бөлімінің басшысы Көлбай Жанбек.Жарысқа қатысқан отбасылар жалпы сайыста емес, әр жеке категорияда жүлдегерлерді анықтап, жеке нәтижесіне байланысты естелік медальдар мен сыйақыға ие болды. Сондай-ақ, қатысушылар арасында лотерея арқылы 10 велосипед ойнатылып, ыстық шай мен сендвич таратылды. Ақпарат көзі : https://www.gov.kz/memleket/entities/astana/press/news/details/889526

Астанада кәмелетке толмағандар арасындағы құқық бұзушылықтар мен қылмыстардың, сол сияқты балалардың қадағалаусыз және бақылаусыз қалуының алдын алу мақсатында «Түнгі қаладағы балалар» жедел алдын алу іс-шарасы өткізілді, деп хабарлады елорда әкімдігінің ресми сайты.Түнгі қаладағы балалар» жедел алдын алу іс-шарасын өткізу кезінде Алматы және Нұра аудандарының ПБ ЖПҚБ ЮПБ қызметкерлері кәмелетке толмағандарды, ІІО есебінде тұрған қолайсыз отбасыларды, сондай-ақ өмірлік қиын жағдайлардағы отбасыларды тұрғылықты жері бойынша тексерді. Сондай-ақ кәмелетке толмағандардың түнгі уақытта тұрғын үйден тыс жерде, ойын-сауық орындарында заңды өкілдерінің еріп жүруінсіз болуына жол беру фактілерін анықтау мақсатында рейдтік іс-шаралар жүзеге асырылды.Іс-шараға Нұра және Алматы ауданы әкімдіктерінің қызметкерлері, қалалық Полиция департаментінің ювеналды полиция бөлімі, Білім басқармасы және елорда әкімдігінің Әйелдер істері және демографиялық саясат, кәмелетке толмағандар істері және олардың құқықтарын қорғау жөніндегі комиссия өкілдері қатысты.Іс-шара барысында полиция басқармасына 94 жасөспірім жеткізілді. 88 адам әкімшілік жауапкершілікке тартылды, оның ішінде ҚР ӘҚБтК-нің 442-бабы 2,3-бөлігі бойынша (кәмелетке толмағандардың заңды өкілдерінің еріп жүруінсіз түнгі уақытта тұрғын үйден тыс жерде болуы) – 68. 12 кәмелетке толмаған ІІО-ға орналастырылды.Астана әкімдігінің Әйелдер істері және отбасылық-демографиялық саясат жөніндегі комиссиясының хатшысы Қарлығаш Сәркенованың айтуынша, кәмелетке толмаған балалар арасындағы құқық бұзушылықтардың алдын алу және олардың құқықтарын қорғау мәселелері комиссияның ерекше бақылауында.Айта кетейік, бұл іс-шара жыл соңына дейін жалғасатын болады.Еске салсақ, Қазақстан Республикасының Әкімшілік құқық бұзушылық туралы Кодексінің 442-бабына сәйкес, 22.00-ден 6.00-ге дейін кәмелетке толмағандардың заңды өкілдерінің қарауынсыз ойын-сауық орындарына баруына тыйым салынған, сондай-ақ 23.00-ден 6.00-ге дейін кәмелетке толмағандардың тұрғын үйден заңды өкілдерінің ерік жүруінсіз шығуына тыйым салынады.Ақпарат көзі : https://www.gov.kz/memleket/entities/astana/press/news/details/889579

Италия мемлекетінің астанасы Римде өткен Халықаралық Fibonacci International Robot Olympiad әлемнің түкпір-түкпірінен робототехника әуесқойларының басын қосатын ең ірі жарыстарының бірі. 28 мемлекет қатысқан жарыста Бурабай ауданындағы Қызылағаш ауылы Абылайхан мектебінің командасы әлем чемпионы атанды.Еліміздің намысын Жеңіс Дидар, Қаппасов Дидар, Кәдірбай Нұрәлі қорғаған. Жетекшісі, информатика пәні мұғалімі Нұржан Әбілжанов.Жарыс 14 санат бойынша өтті. Бір санатқа бір мемлекеттен 5 команда қатыса алды.Нәтижесінде Қазақстаннан келген командалар үш орынға ие болды. Оның ішінде «Lego Line Following» санатында Ақмола ауылдық мектебінің командасында 1 орында.«Халықаралық деңгейдегі жарысқа қатысып, ел намысын қорғап, биік жетістіктеріне жеткендеріне қуанышты және жеңіспен оралуына ұстаздарымызға ризашылығымызды білдіреміз!» – деді бурабайлықтар.Естеріңізге сала кетейік, бұл команда Республикадан өтіп, Турция мемлекетінің Анталия қаласында өткен Азия чемпионатында үздік нәтиже көрсетіп Римге жолдама алған болатын.Айта кетейік, Ақмола облысында 200-ден астам мектеп робототехника кабинеттері мен элементтерімен жабдықталған және 80-нен астам робототехника үйірмелері жұмыс істейді.Ақпарат көзі : https://www.gov.kz/memleket/entities/aqmola/press/news/details/889558

Абай облысының әкімі Нұрлан Ұранхаев ағаш тақтайшаларын өндіруге арналған технологиялық желілерді жобалауға маманданған Shengsong компаниялар тобы өкілдерімен кездесті. Осы салада он жылдан артық тәжірибесі бар компания Қытайдың жетекші өндірушілерімен тығыз жұмыс істейді. Сондай-ақ, келіссөзге Beijing ZHAOSHANG Technology Co., LTD өкілдері де қатысты.Shengsong - Қытайдағы ағаш тақтайшаларын өндіруші ең ірі кәсіпорындардың бірі. Өнімдер қатарында ДСП, МДФ/ХДФ сияқты өте жұқа бөлшекті тақтайшалар бар. Компания E1, EO, CARB-P2 халықаралық стандарттарына сәйкес келетін экологиялық өнімге назар аударады. Сонымен қатар формальдегидсіз тақтайшалар шығарады. Жыл сайынғы өндірістік қуаттылығы 1 млн текше метрге жетеді.Алдағы жылдары Shengsong ағаш тақтайшаларын өңдеу, қаржылық қызметтер және жылжымайтын мүлік салаларында өз қызметін кеңейтуді жоспарлап отыр. Компанияның стратегиялық мақсаты-Қытайдың ағаш өңдеу саласының көшбасшысы болу.Кездесуде компания өкілдері бөлшекті тақтайшаларды шығаруға бағытталған өндірістік желіні салуға ниет білдірді."Біз өңіріміздің ағаш өңдеу өнеркәсібін дамытуға мүмкіндік беретін озық тәжірибелер мен технологияларды тартуға мүдделіміз. Жаңа өндіріс желісін салу жаңа жұмыс орындарын құру мен экономиканы нығайтуда маңызды қадам болары сөзсіз. Біз жобаны қолдаймыз", - деді облыс әкімі Нұрлан Ұранхаев.Кездесу Абай облысында ағаш өңдеуге инновациялық технологияларды енгізуге бағытталған перспективалы ынтымақтастыққа бастама болды.Ақпарат көзі : https://www.gov.kz/memleket/entities/abay/press/news/details/889525

Бүгін, 25 қараша күні Алға аудандық мәслихатының кезектен тыс жиырма жетінші сессиясы өтіп, оған депутаттармен қатар, Ақтөбе облысының әкімі Асхат Шахаров, аудандық мәслихат төрағасы Марат Тулеуов қатысты. Отырыс барысында өңір басшысы Алға ауданы әкімінің лауазымына Шүйіншалиев Асланбек Серікұлын тағайындауға ұсыныс білдірді, өмірбаянымен таныстырды. Мәслихат депутаттары облыс әкімін қолдап, ұсынысқа бірауыздан келісім берді.Облыс әкімі Асхат Шахаров, депутаттар жаңа аудан басшысының алдағы жұмысына сәттілік тіледі.Ақпарат Алға ауданы мәслихатының сайтында жарияланды. Ақпарат көзі : https://www.gov.kz/memleket/entities/aktobe/press/news/details/889390

Қазақстан Республикасы Президенті Әкімшілігінің және Алға аудандық мәслихаты депутаттарының келісімімен Асланбек Серікұлы Шүйіншалиев Алға ауданының әкімі лауазымына тағайындалды.Ол 1988 жылы дүниеге келген. Білімі - жоғары. Қазақ-Орыс Халықаралық университетінің «Құқықтану», Алматы экономика және статистика академиясының «Экономика», ҚР Президентінің жанындағы мемлекеттік басқару академиясының «Өңірлік даму» мамандықтары бойынша бітірген. Литва Мемлекетінің Миколос Ромерис Университетінде мемлекеттік басқару бағдарламасы аясында халықаралық тағылымдамадан өткен.Еңбек жолын 2007 жылы Алға аудандық қаржы бөлімінің іс-қағаздарын жүргізуші заңгері болып бастаған.2007 – 2009 жж. «АБУ-ГРУПП» ЖШС менеджері; 2009 – 2012 жж. Ақтөбе облысының балалардың құқықтарын қорғау департаментінің жетекші маманы, бас маманы, ҚР бәсекелестікті қорғау агенттігінің Ақтөбе және Батыс Қазақстан облыстары бойынша өңіраралық инспекциясының бас маманы; 2012 – 2016 жж. Қарғалы аудандық тұрғын үй - коммуналдық шаруашылығы, жолаушылар көлігі және автомобиль жолдары бөлімінің бастығы, Бадамша ауылдық округінің әкімі қызметтерін атқарған.2016 – 2021 жж. Алға аудандық қаржы бөлімінің басшысы, Ақтөбе облысы әкімі аппаратының облыстық терроризмге қарсы комиссияның жұмысын үйлестіру және құқыққорғау органдарымен өзара іс-әрекеттесу бөлімінің басшысы, Қарғалы ауданы әкімінің орынбасары болды.2021 – 2023 жж. Ақтөбе облысының жұмыспен қамтуды үйлестіру және әлеуметтік бағдарламалар басқармасын басқарды.2023 жылдың қараша айынан бастап Ақтөбе қаласының «Алматы» ауданының әкімі қызметін атқарып келді.Ақпарат көзі : https://www.gov.kz/memleket/entities/aktobe/press/news/details/889410

Астананың коммуналдық қызметтері тәулік бойы ауысымдық режимде қар тазалау жұмысын жүргізіп жатыр, деп хабарлайды елорда әкімдігінің ресми сайты.25 қарашада күндізгі ауысымда қала көшелерінің қары мен мұзын күреуге үш мыңнан астам жол жұмысшы және 1 100-ден астам арнайы техника шықты.24-25 қараша аралығында қар полигондарына мыңнан астам ауыр жүк рейсімен 10 мың текше метрге жуық қар шығарылды.Қыс мезгілінің басынан бастап қаладан 50 мыңға жуық рейс арқылы 560 мың текше метр қар шығарылды.Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.Төтенше жағдай туындаған кезде «112» нөміріне хабарласыңыз.Ақпарат көзі : https://www.gov.kz/memleket/entities/astana/press/news/details/889196

Астанада «Студенттік өзін-өзі басқару» жобасы аясында баскетбол және үстел теннисінен турнирлер өткізіледі, деп хабарлайды елорда әкімдігінің ресми сайты.«Студенттік өзін-өзі басқару» жобасын елорданың Жастар саясаты мәселелері басқармасының қолдауымен «Астана жастары» ЖРО ұйымдастырды.Ол студенттердің бастамаларын қолдауға және елорда студенттері арасында спорттық, шығармашылық және көшбасшылық қасиеттерді көрсету үшін белсенді платформа құруға бағытталған. Ұйымдастырушылар қаланың университеттерімен ынтымақтасады және жобаның шығармашылық және спорттық іс-шараларына қатысу үшін шақыру хаттарын жібереді.Студенттер арасында баскетбол, үстел теннисі, волейбол және футбол түрлерінен спорттық турнирлер өтеді.«Мен бұл жобаны барлық студент үшін барынша пайдалы деп санаймын, өйткені университеттерде спорттық жарыстар жеткіліксіз. Студенттер арасында спортпен белсенді айналысатындар көп, біз үшін бұл жоба салауатты өмір салтын ұстанудың мүмкіндігі болып саналады», - деп атап өтті ҚазАТУ-дың 2-курс студенті Иманғали Өкей.Сонымен, студенттер арасында баскетбол және үстел теннисінен екі спорттық турнир өтті. Оларға Esil University, ЕҰУ, ҚазАТУ, AITU және қаланың басқа да жоғары оқу орындарынан 70 студент қатысты.Айта кету керек, жоба елорда студенттерінің шығармашылық хоббиі мен қолдауына ерекше мән береді. Олар үшін төрт номинация бойынша конкурстар өтеді: вокалдық өнер, халық биі, заманауи би және музыкалық аспаптарда ойнау.«Әр номинацияға 50-ден 80-ге дейін адам қатысады. Қатысушылардың көпшілігі – өз университеттерінің жастар комитеттерінің белсенділері. Жобаның соңында біз барлық қатысушыны біріктіріп, үлкен іс-шара ұйымдастырамыз», - деп атап өтті елорда әкімдігінің «Астана жастары» Жастар ресурстық орталығының маманы Олжас Амангелді.Жобаның соңғы күнінде арнайы концерт өтіп, қатысушылар марапатталды.Ақпарат көзі : https://www.gov.kz/memleket/entities/astana/press/news/details/889200

Астанада профилактикалық аралау іс-шарасы өтті, оның аясында Астана және Ақмола облысы ТЖД, қалалық әкімдік қызметкерлері, полиция және еріктілер тұрғындарға өрт қауіпсіздігі ережелерін кезекті рет түсіндірді, деп хабарлайды елорда әкімдігінің ресми сайты.Іс-шара барысында мамандар тұрғындарға өрт қауіпсіздігі ережелерін түсіндіріп, жадынамалар таратып, пеш пен газ жабдықтарын қарап, халықтың әлеуметтік осал топтарының үйлерінде көміртегі тотығы датчиктерін орнатты.«Жыл басынан бері елордада 635 өрт оқиғасы тіркелді. Оның 255-і жеке тұрғын үй секторларында болды. Сондықтан жеке үйлердің өрт қауіпсіздігі ерекше бақылауда. Астана қаласы Төтенше жағдайлар департаментінің қызметкерлері жыл сайынғы жоспар құрып, алдын алу шараларын жүзеге асыруда. Бірінші кезекте халықтың әлеуметтік осал топтарымен, оның ішінде жатақханаларда және жеке тұрғын үй секторларында түсіндіру жұмыстары жүргізіледі. Астана әкімдігінің қолдауымен оларға арнап көміртегі тотығы датчиктері сатып алынды. Оларды біз қаланы аралау барысында орнатып жатырмыз. Астанада барлығы 1500-ден астам әлеуметтік осал отбасы тұрады. Айта кетейік, жыл басынан бері олар профилактикалық іс-шаралармен толық қамтылды, ал қазіргі уақытта біз қайта түсіндіру жұмыстарын жүргізіп жатырмыз. Біздің басты міндетіміз – азаматтардың қауіпсіздігін қамтамасыз ету», - дейді Астана ТЖД бастығының орынбасары Мадияр Мырзагелдиев.Жылыту кезеңінде өрт қауіпсіздігін қамтамасыз ету аясында профилактикалық іс-шараға қатысушылар бір күнде 1 527 жеке сектордағы үйді аралап шықты, онда өрт қауіпсіздігі ережелерін 2,5 мыңнан астам бұзушылық анықталды.Сондай-ақ, аралау барысында халықтың әлеуметтік осал топтарынан 149 отбасын қамтыды. 27 көміртегі тотығы датчигі орнатылды, ал 47 отбасында бұрын орнатылған датчиктер тексеріліп, батареялар ауыстырылды.Іс-шара соңында құтқарушылар азаматтар арасындағы қауіпсіздік мәдениетінің деңгейін арттыру арқылы өрт қаупін азайту және адамдардың өмірін сақтап қалуға болатынын атап өтті. Ақпарат көзі : https://www.gov.kz/memleket/entities/astana/press/news/details/889201

Тәуелсіздік алған жылдардан кейін Астанамыз бой көтеріп талай тарихи сәттерге қол жеткіздік. Бас қаламыз Астана атанғаннан күннен бастап жаңа қаланың дамуы басталып, бүгінгі күнге дейін жалғасын тауып жатыр. Осы аптада елордада ашылған тұңғыш қазақ мектебі Әлімхан Ермеков атындағы №38 мектеп-лицейі 25 жылдығын атап өтті, деп хабарлайды елорда әкімдігінің ресми сайты.Астанадағы қазақ мектептерінің көшін бастаған оқу орны тарихтан өзіндік орнын алды. Мектеп-лицейдің алғашқы директоры Жамал Қасымбектің көшбасшылығымен 3 жыл қатарынан, 2006, 2007, 2008 жылдары Астана қаласындағы «Үздік мектеп» номинациясын жеңіп алып, 2011 жылы «Көшбасшы мектеп», 2012 жылы «Үздік мектеп» номинациясын иеленген еді. 2013 жылы Лондондағы Халықаралық BID сапа бойынша конвенция №38 мектепті кемелдіктің бұлжымас сапасының беріктігі үшін «Алтын тәж» IQC жүлдесімен марапатаған мектеп ретінде тарихта өзіндік орны бар.Мектептің ширек ғасырлық мерейтойы барысында «Мектебіме ширек ғасыр» естеліктер кітабының тұсаукесері өткізілді. Мектепішілік «Әлімхан Ермеков» медалі осы мектепте еңбек жолын жас маман болып бастап, 15 жылдан астам үзіліссіз еңбек етіп жүрген ұстаздарға табысталды.№38 мектеп-лицейдің 25 жылдық мерейтойына арналған ғылыми-танымдық конференцияда Астана қаласы Білім басқармасының басшысы Қасымхан Сенғазыұлы, Астана қаласының бала құқықтары жөніндегі уәкілі Әсима Бимендина, қоғам қайраткері Әкім Ысқақ, әлімхантанушы ғалым Қанат Өскембаев, ЕҰУ экономикалық география кафедрасының аға оқытушысы Кайрат Сағынов, Пенсильвания университетінің ғылыми қызметкері, мектеп түлегі Айнұр Қадырбаева, мектептен шыққан 20 басшының атынан сөйлеген Сәуле Әзімханова осы №38 мектебінің Астананың білім тарихындағы көшбасшылық бейнесі мен тағылымдық тәжірибелеріне кең тоқталып талдады.Конференция соңы мектеп көркемөнерпаздарының мерекелік концертімен жалғасып, айтыскер ақын Нартау Тілеуқұл толғау арнаса, эстрада жұлдызы Гүлнұр Оразымбетова мен жас әнші Әйгерім Тілеубек әннен шашу шашты.Ақпарат көзі : https://www.gov.kz/memleket/entities/astana/press/news/details/889236

Алматыда Ш. Уәлиханов атындағы №12 мамандандырылған гимназияның 100 жылдық мерейтойына орай Республика Сарайында «Ғасыр мектебі» атты мерекелік концерт пен тарихи көрме өтті. Іс-шараға Алматы әкімі Ерболат Досаев, Қазақстанның білім министрі Ғани Бейсембаев, педагогтар, мектеп түлектері мен оқушылары қатысты.Қала басшысы Қазақстан Президенті Қасым-Жомарт Тоқаевтың құттықтау жеделхатын оқып, гимназия ұжымын 100 жылдығымен құттықтады.«Шежірелі білім ордасы кезінде Алматы қаласындағы балаларды қазақ тілінде оқытқан бірден-бір мекеме болды. Шын мәнінде, өткен ғасырдағы ана тіліміздің тағдыры осы мектептің тарихымен тығыз байланысты. Оның ұстаздары заманның қиындығына қарамастан, ұлттық педагогиканың дәстүрін сақтап қалуға және ел мүддесіне қызмет еткен зиялы қауымның тұтас буынын тәрбиелеуге зор үлес қосты. Гимназияның мыңдаған түлегі елімізді өркендету жолында тынымсыз тер төкті. Олардың арасында халқымыздың мақтанышына айналған біртуар тұлғаларымыз аз емес», - деп айтылған Мемлекеттік басшысының құттықтау сөзінде.№12 мамандандырылған гимназияның жүз жылдық мерейтойы «Кеше.Бүгін.Ертең» ұранымен ұрпақтар сабақтастығын атап өтті. Мектеп тарихына арналған «Ғасыр мектебі» көрмесі гимназияның қалыптасу кезеңдерін ғана емес, сонымен қатар елдің орта білім беру жүйесінің дамуын да көрсетеді.№12 гимназия Қазақ КСР Халық Комиссарлары Кеңесінің Қаулысымен 1924 жылы 22 қазанда аймақтық тәжірибелік-көрме мектебі ретінде құрылды. Бастапқыда оның тек бір сатысы болды – бастапқы. 1936 жылы дәл осы мектеп республикадағы толық орта білім беру жүйесін бастады.12-ші гимназия тарихындағы маңызды кезең Социалистік Еңбек Ері, 15 жыл директор болған Қазақстанның еңбек сіңірген мұғалімі Рафика Нұртазинаның есімімен байланысты. Оның бастамасы бойынша мектепте орыс тілін оқытудың ғылыми-әдістемелік жүйесі жасалды.1972 жылы мектеп республикада бірінші болып ағылшын тілін тереңдетіп оқытуды енгізді, бұл үш тілді білетін мамандарды даярлауға ықпал етті.Мектеп 70-тен астам академик, 300-ден астам ғылым докторы, 500-ден астам ғылым кандидаттары мен көптеген мәдениет қайраткерлерін тәрбиеледі.Түлектер қатарында: Күләш Байсейітова, Әбілхан Қастеев, Асқар Тоқпанов, Нұрғиса Тілендиев, Сыдық Мұхамеджанов, Әсет Бейсеуов, Мансұр Сағатов; мемлекет қайраткерлері Қайрат Сарыбай, Шамша Беркімбаева, Кенжалы Айманов, Марат Әшім, Жанар Айтжанова және басқа да көптеген танымал тұлғалар бар.2007 жылдан бастап №12 мамандандырылған гимназия Алматының үздік ондығына кіреді. 2015, 2017 және 2020 жылдары гимназия «Үздік мектеп», «Үздік мекеме», «Үздік педагогикалық ұжым» наградаларымен марапатталды. 2022-2023 оқу жылдарында гимназия «Үздік мамандандырылған гимназия» атағына ие болды. Бүгінгі таңда гимназия дарынды балаларды қолдау және дамыту бойынша жұмысты жалғастыруда, олардың қабілеттерін ашуға ерекше назар аударылуда.Ақпарат көзі : https://www.gov.kz/memleket/entities/almaty/press/news/details/889320

23 қарашадан бастап, сенбі-жексенбі күні Алматы қаласының Алатау ауданында жеке тұрғын үйлерде өрт қауіпсіздігін қамтамасыз ету бойынша «Өртсіз өмір - қауіпсіз болашақ» ауқымды профилактикалық акциясы өтті. Іс-шара Алматы қаласының Төтенше жағдайлар департаментімен және Өңірлік коммуникациялар қызметімен бірлесіп өткізілді. Акцияға БАҚ өкілдері, еріктілер және газ қызметінің қызметкерлері қатысты.Іс-шара барысында ТЖД мамандары 2297 үйдің тұрғындарын хабардар етті. Көмір және отынмен жылытылатын 16 мұқтаж отбасылар үйінде газ иісін анықтау датчиктері орнатылды.Алматы ТЖД басшысы Нұрлан Атығаев жеке тұрғын үйлердегі қауіпсіздікті арттыру бойынша қабылданып жатқан шаралар туралы хабарлады. Көп балалы отбасыларды, зейнеткерлер мен мүмкіндігі шектеулі азаматтарды қоса алғанда, халықтың әлеуметтік осал санаттарына ерекше назар аударылады.«2018 жылдан бастап Алматыда аз қамтылған отбасылар үшін өтеусіз негізде 1500-ге жуық газ иісін анықтайтын датчигі орнатылды. Алайда, кейбір тұрғындар оларды өшіріп тастайды, бұл үлкен қауіп төндіреді. Біз түсіндіру жұмыстарын жалғастырып, барлығын өрт қауіпсіздігі ережелерін сақтауға шақырамыз», - деп атап өтті Н. Атығаев.Аудан әкімдіктері атаулы көмек үшін халықтың әлеуметтік осал топтарына жататын 901 отбасын анықтады. Осы отбасылардың барлық 100% - ы профилактикамен қамтылған, оның ішінде 102 отбасы үйлерін қатты отынмен жылытады.Алатау ауданы әкімдігінің мәліметінше, демеушілер ХӘОТ үшін 200 датчик сатып алған. Датчиктерді орнату жұмыстары жалғасуда.«Қауіпсіздік үшін — Бірге», «Қөмек қолы» және «Таза түтін мұржасы» акциялары аясында 36 үйде атаулы өрт-профилактикалық көмек көрсетілді. Үйлерде түтін мұржаларын тазалау, жарықшақтарды бітеу, түтін арналары өтетін жерлерде қабырғаларды әктеу және іргелес аумақтарды тазалау жұмыстары жүргізілді. Сондай-ақ, 41 үйде газ иісін анықтайтын датчиктер орнатылған.Сонымен қатар, мұқтаж отбасыларға жылыту үшін отын беру бойынша іс-шаралар ұйымдастырылды.Көпшілікті қамту үшін жұмысқа еріктілер, газ қызметі, аудан әкімдігінің қызметкерлері мен қоғам белсенділері жұмылдырылды. Тұрғындарға ТЖД-ның 8 арнайы машинасының көмегімен қосымша ақпарат берілді, олар тұрғындарды жылыту маусымында өрт қауіпсіздігі ережелерін сақтау қажеттігі туралы хабардар етті.Сондай-ақ, мегаполистің ірі сауда орталықтарының бірінде ТЖД қоғамдық қабылдауы жұмыс істеді, онда барлық ниет білдірушілер өрт қауіпсіздігі саласында өздерін қызықтырған сұрақтарына жауап ала алды.Ақпарат көзі : https://www.gov.kz/memleket/entities/almaty/press/news/details/889323

Ағымдағы жылы атқарылған жұмыстардың нәтижесінде Қарағанды облысы бойынша 161 064,0 гектар ауыл шаруашылығы мақсатындағы жерлер мемлекетке қайтарылып, Жер ресурстарын басқару комитетімен 2024 жылға межеленген пайдаланылмай жатқан және Қазақстан Республикасының заңнамасын бұза отырып берілген 130 000,0 га жерді қайтару жөніндегі жоспар 23,9%-ға артығымен орындалды.Қарағанды облысының жер ресурстарын басқару департаменті тарапынан жердің пайдаланылуы мен қорғалуына мемлекеттік бақылауды жүзеге асыру барысында жер пайдаланушылар 11,5 мың гектар жерді игеруге кірісті, заңсыз берілген 4 050 га жердің жалдау шартының күші жойылды, сот шешімі бойынша 12 мың гектар жер мәжбүрлеп алынып , 6 335 га бойынша істер сотта қаралуда.Сонымен қатар, облыс бойынша қайтарылған жерлердің 94,3 мың гектары ерікті түрде бас тарту жолымен, ал 46,7 мың гектары жалдау шартының мерзімі өту себебімен қайтарылды.Ақпарат көзі : https://www.gov.kz/memleket/entities/moa/press/news/details/889305

Су ресурстары және ирригация министрлігі жаңа Су кодексінің жобасына су нысандарын ластанудан, бітелуден және сарқылудан қорғау бойынша жекелеген пункттер қосты.Мәселен, су нысандарына коммуналдық, өнеркәсіптік және басқа да қатты немесе ерімейтін қалдықтарды, сондай-ақ ластайтын заттарды тастауға тыйым салынады. Жіберілетін ағын су алдын ала тазалануы керек. Бұл ретте тазартылған ағын суды емдік-сауықтыру мақсатта пайдаланылатын су нысандарына жіберуге тыйым салынады.Су нысандарын сарқылудан қорғау үшін су пайдалану лимиттерін белгілеу, су ресурстарын басқарудың жаңа технологияларын енгізу әрі қолдану, су айындарын қорғау және басқа да іс-шаралар көзделеді.«Жаңа Су кодексінің жобасы су нысандарын қорғау жөніндегі іс-шараларды едәуір кеңейтеді және су пайдалануды реттеуді жетілдіреді. Су нысандары экожүйесін сақтау үшін судың ең төменгі рұқсат етілген деңгейі айқындалған - «экологиялық ағын» ұғымы енгізілуде. Бұл су көздерін сарқылудан және басқа да жағымсыз әсерлерден қорғайды»,- деді Су ресурстары және ирригация министрлігінің Су саясаты департаментінің директоры Серікжан Бекетаев.Ақпарат көзі : https://www.gov.kz/memleket/entities/water/press/news/details/889187

24 қарашада Атырау облысы Қызылқоға ауданының Миялы ауылында №10 жаңа өрт сөндіру бөлімінің салтанатты ашылуы өтті. Салтанатты рәсімге Қазақстан Республикасының Төтенше жағдайлар министрі генерал-майор Шыңғыс Әрінов, Атырау облысының әкімі Серік Шәпкенов және өңірлік ТЖ департаментінің бастығы Нұрлан Жаңабаев қатысты.Жаңа өрт сөндіру бөлімінің ашылуы өңір үшін маңызды оқиға. Ол қауіпсіздік жүйесін жақсартуға елеулі үлес қосатын болады. Ведомство басшысы жаңа нысанды салу мен жарақтандыру Қазақстан Президентінің қолдауымен және министрлік жүргізіп жатқан жүйелі реформалардың арқасында мүмкін болғанын атап өтті."Құтқарушылар күні қарсаңында елордада салынған жаңа бірегей депоға президент келді. Сол кезде мен Мемлекет басшысына ауылдық жерлерде өрт сөндірушілердің де осындай жағдайлары болатынына уәде бердім. Сондықтан бүгінде министрлік ауылдарға басымдық береді. Қазір біздің ауылдық өрт сөндіру бөлімдері ең заманауи техникамен жарақтандырылуда. Сонымен қатар қызметкерлердің әлеуметтік және тұрмыстық жағдайлары жақсартылуда. Обьектілерді жөндеу және жаңғырту жұмыстары жүргізілуде. Биыл Атырау гарнизоны төтенше жағдайларға жедел ден қоюға мүмкіндік беретін жаңа техника алды. Бұл өрт сөндіру депосы ауыл тұрғындары үшін қауіпсіздікті қамтамасыз етудің үлгісі болатынына сенімдімін. Министрлік ауылға ерекше назар аударады", - деді министр.Шыңғыс Әрінов облыс әкімі Серік Шәпкеновке өңірдің құтқару қызметтерінің инфрақұрылымын дамытудағы белсенді жұмысы үшін де алғысын білдірді, ал әкім өз кезегінде өрт сөндірушілер мен құтқарушыларға өз кәсібіне адалдығы мен төтенше жағдайлар кезіндегі жеделдігі үшін алғысын білдірді.Жергілікті бюджет есебінен салынған №10 жаңа өрт сөндіру бөлімі тиімді жұмыс істеу үшін қажетті барлық заттармен жабдықталған: бес бірлік заманауи өрт сөндіру және құтқару техникасы, ангар, байланыс пункті, психологиялық жеңілдеу және демалуға арналған бөлмелер, сондай-ақ жедел ден қоюға арналған екі шығу. Бөлімде жаңа формамен қамтамасыз етілген 58 қызметкер жұмыс істейді.Өңірде 14 өрт сөндіру бөлімі қызмет көрсетуде. Жаңа бөлімнің ашылуы Қазақстандағы қауіпсіздік жүйесін жетілдіру және азаматтарды төтенше жағдайлардан қорғауды нығайту бойынша тұрақты жұмыстың жарқын үлгісі болды. "Бұл өрт сөндіру бөлімін ашу ауыл тұрғындары үшін де, жалпы аймақ экономикасы үшін де қауіпсіздік деңгейін арттырудағы маңызды қадам болып табылады. Жаңа бөлім қауіпсіздікті қамтамасыз етуде сенімді тірек болатынына сенімдіміз", - деп Атырау облысының әкімі Серік Шапкенов атап өтті.Сонымен қатар ТЖ-ға ден қоюға дайындықты жақсарту аясында жыл басынан бері Атырау облысы ТЖ департаментінің автопаркі 56 заманауи автокөлікпен толықтырылды.Ақпарат көзі : https://www.gov.kz/memleket/entities/emer/press/news/details/889166