Қонаев қаласындағы «Қапшағай бидай өнімдері» ЖШС істен шыққан элеваторды жаңғыртуда. Мұндағы ескі станоктар түгелдей ауыстырылып, үш түрлі зауыт салынып жатыр. Оның бірі сұйық май шығаратын болса, келесілері жемдік ұн мен ұн өндіретін зауыт.Дайын өнім Қазақстанның нарығында саудаланып қана қоймай, Қытайға экспортталады. Тартылған инвестицияның көлемі 8 млрд. теңгені құрап отыр.«Бүгінде теміржол ауыстырылып, контейнер терминалы, қоймалар, зауыттар салынып жатыр. Құрылысқа 200-ге жуық адам тартылған. Сондай-ақ 2 гектар жер қосымша сатып алынды. Жобасы жасалуда. Зауыт биыл қолданысқа беріледі. Жылына 1 000 000 тонна өнім экспортқа шығарылады деп жоспарлап отырмыз», - деді ЖШС бас директорының орынбасары Ринат Тоқпанов.Зауыт керекті материалдармен өзін-өзі қамти алады. 2-3-қабаттарда қап шығаратын станоктар қойылған. Қазір бұл жерде 250 адам еңбек етіп жатса, қосымша 300 жұмыс орны құрылады.Айта кетейік, Қонаев қаласының инвестициялық пулына 39 жоба енгізілген. Инвестицияның жалпы көлемі 2,4 трлн.теңгені құрайды. Нәтижесінде 17 000 тұрақты жұмыс орны пайда болады. Қазір шаһарда 12 түрлі өндіріс ошағы қызмет етеді. Ақпарат көзі : https://www.gov.kz/memleket/entities/almobl/press/news/details/1006735?lang=kk

Мемлекет басшысының «Заң және тәртіп» бастамасын іске асыру аясында Алматы облысының Талғар ауданындағы бірқатар мектептер мен колледждерде құқықтық мәдениетті қалыптастыруға бағытталған арнайы оқу сабағы енгізіледі.Жобаны жүзеге асыру мәселелері Президенттің ішкі саясат және коммуникациялар жөніндегі көмекшісі Арман Қырықбаевтың өңірге жұмыс сапары барысында өткен кеңесте талқыланды.Мемлекет басшысы «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында «Қоғамымызда заң мен тәртіп үстемдік құруға тиіс. Бұл – бүкіл қоғамның және әр адамның қауіпсіздігін қамтамасыз етуге қатысты ең басты талап. Біз сонда ғана Әділетті, Таза және Қауіпсіз Қазақстанды құра аламыз», – деген болатын.Құқықтық сана мен тәртіпке құрметті қалыптастыру бала кезден басталуы тиіс. Бұл жоба осы маңызды міндетті жүзеге асыруды көздейді.Кеңес жұмысына құқық қорғау органдарының өкілдері, облыстық білім басқармасының басшылығы мен педагогтар қауымдастығы қатысты. Оның қорытындысы бойынша жобаны Талғар ауданындағы 3 колледж бен 10 мектепте пилоттық негізде енгізу туралы шешім қабылданды. Сабақтар жаңа оқу жылынан бастап 7–10-сыныпта оқитын 7 500-ден астам оқушыны қамтитын болады.Жобаны Оқу-ағарту министрлігі мен Бас прокуратура бірлесіп әзірледі. Оның басты мақсаты – жас ұрпақтың бойында заң үстемдігіне, азаматтық жауапкершілікке және Отанға адал қызмет етуге деген саналы көзқарас қалыптастыру.Сабақ барысында құқықбұзушылықтардың алдын алу, буллингке қарсы күрес, өзара құрмет пен ынтымақтастықты нығайту, сондай-ақ гуманистік құндылықтарды дәріптеу мәселелеріне ерекше назар аударылады.Курсты жүргізетін негізгі тұлғалар – құқық қорғау органдарында ұзақ жылдар бойы мінсіз қызмет атқарған, мол тәжірибесі бар ардагер мамандар. Бас прокуратура қоғам мен мемлекетке адал қызмет етудің үлгісін көрсете алатын 26 білікті маманнан құралған арнайы оқытушылар тобын дайындады.«Адал әрі жауапты азамат тәрбиелеу – мемлекеттік саясаттың стратегиялық міндеті. Заң – кез келген мемлекеттің берік іргетасы. Заңға құрмет болған жерде әділет, қауіпсіздік және даму болады. Сондықтан жас ұрпаққа құқық пен тәртіпке деген саналы көзқарас қалыптастыру – бәріміздің ортақ парызымыз. Жаңа оқу курсы дәл осы құндылықтарды насихаттауға бағытталған», деді  Арман Қырықбаев.Пилоттық кезең өз тиімділігін дәлелдесе, жоба еліміздің басқа өңірлерінде де кеңінен жүзеге асырылады.Кеңес соңында Арман Қырықбаев жауапты мемлекеттік органдарға нақты тапсырмалар беріп, жобаның барлық кезеңде сапалы әрі нәтижелі орындалуын қамтамасыз етуді жүктеді.  Ақпарат көзі : https://www.gov.kz/memleket/entities/almobl/press/news/details/1005279?lang=kk

Қытайдың Цзинань қаласында Қазақстан мен Қытай кәсіпкерлері арасындағы өзара іс-қимылдың маңызды алаңына айналған ірі бизнес-форум өтті. Іс-шараны салтанатты түрде Алматы облысының әкімі Марат Сұлтанғазиев ашты. – "Бүгінгі форум Алматы облысы мен Шаньдун провинциясы арасындағы серіктестікті нығайтып қана қоймай, Қазақстан мен Қытай арасындағы екіжақты экономикалық ынтымақтастықтың жаңа көкжиектерін ашады. Біздің өңір "Бір белдеу – бір жол" бастамасын іске асыруда стратегиялық маңызға ие. Біз шетелдік инвесторларға дамыған инфрақұрылым, қолайлы логистикалық жағдай және жан-жақты мемлекеттік қолдау ұсынамыз. Форум тікелей іскерлік байланыстар орнатуға және бірлескен бастамаларды табысты іске асыруға тиімді алаң болады деп сенемін", - деді Марат Сұлтанғазиев.Форум аясында ауыл шаруашылығы техникасы мен құрылыс материалдарынан бастап жаңа материалдар, электр көліктері, косметика және химиялық өнімдерге дейінгі әртүрлі салаларды қамтитын 124 компанияның өкілдері және 300-ден астам қатысушы бас қосты. Іс-шараның ерекшелігі – қатысушылардың деңгейі: олардың қатарында жылдық кірісі 1 миллиард юаньнан асатын оннан астам ірі компания бар.Форумды Шаньдун провинциясының 16 қаласының өнеркәсіп және ақпараттық технологиялар департаменттері, шағын және орта бизнесті дамыту орталықтары мен жетекші салалық қауымдастықтар ұйымдастырды. Бұл шара Қытай тарапының Қазақстанмен экономикалық байланыстарды нығайтуға деген өсіп келе жатқан қызығушылығын айқын көрсетеді.Облыс әкімінің айтуынша, соңғы екі жылда Алматы облысы жалпы өңірлік өнім көлемі бойынша елімізде 10-орыннан 5-орынға көтерілді. Бүгінде өңірде қытайлық капиталдың қатысуымен бірқатар ірі инфрақұрылымдық және инвестициялық жобалар іске асырылып жатыр. Облыс аумағында Қытай және бірлескен инвесторлардың қатысуымен 143 кәсіпорын жұмыс істейді. Қытай мен өңір арасындағы тауар айналымы тұрақты түрде жылына 1 миллиард АҚШ долларынан асады.Цзинань қаласында өткен бизнес-форум Қазақстан мен Қытай арасындағы нақты ынтымақтастықты тереңдетуге және жаңа инвестициялық жобаларды іске асыруға арналған маңызды алаңға айналды.Ақпарат көзі : https://www.gov.kz/memleket/entities/almobl/press/news/details/1004348?lang=kk

Бүгін, Алматы облысының әкімі Марат Сұлтанғазиев Қытайдың Шаньдун провинциясының губернаторы Чжоу Найсян мырзамен бауырлас қалалармен ынтымақтастық жөніндегі халықаралық конференция аясында кездесу өткізді.Өз сөзінде өңір басшысы қытайлық тарапқа жылы қарсы алғаны үшін алғыс білдіріп, Шаньдунды Қытайдың жетекші экономикалық әрі мәдени өңірлерінің бірі ретінде атап өтті. «Біз Қытай мен Қазақстан арасындағы серіктестікті дамытудағы провинцияның рөлін жоғары бағалаймыз», — деді Марат Сұлтанғазиев.Алматы облысы — агроөнеркәсіп, логистика және туризм салалары дамыған оңтүстік-шығыс Қазақстанның экономикалық тірек аймағы. Өңір «Бір белдеу — бір жол» бастамасын жүзеге асыруға белсенді қатысып келеді. Кездесуде екіжақты сауда қарым-қатынасының серпініне айрықша назар аударылды. 2023 жылы Алматы облысы мен Қытай арасындағы тауар айналымы 1,082 млрд АҚШ долларын, ал 2024 жылы 1,023 млрд АҚШ долларын құрады. Бүгінде өңірде қытайлық және бірлескен капиталмен жұмыс істейтін 143 кәсіпорын бар.«Біз Шаньдунды тек экономикалық әріптес ретінде емес, орнықты әрі өзара тиімді дамуды ілгерілетудегі сенімді одақтас ретінде қарастырамыз», — деді өңір басшысы. Ол ынтымақтастықтың негізі сенім, тәжірибе алмасу және ортақ болашаққа ұмтылыс болуға тиіс екенін атап өтті.Кездесу соңында Марат Сұлтанғазиев Алматы облысы мен Шаньдун провинциясы арасындағы байланысты нығайтуда бұл кездесудің жаңа кезеңнің бастауы болатынына сенім білдірді.Ақпарат көзі : https://www.gov.kz/memleket/entities/almobl/press/news/details/1004358?lang=kk

Қытайға жасаған ресми сапары аясында Алматы облысының әкімі Марат Сұлтанғазиев Қытайдың ең ірі логистикалық компанияларының бірі – YTO Express Co. штаб-пәтеріне барды. Сапар барысында компанияның негізін қалаушы әрі Директорлар кеңесінің төрағасы Ю Вэйцзяомен кездесу өтті.YTO Express – Қытайдың экспресс жеткізу нарығындағы «үлкен бестікке» кіретін көшбасшы компаниялардың бірі және халықаралық логистикалық желіні белсенді түрде дамытып келеді. Компания әуе, теңіз және құрлық арқылы тасымалдау қызметін көрсетіп, зияткерлік сұрыптау орталықтарын басқарады және логистика саласына арналған IT-шешімдер ұсынады. Бүгінде YTO әлем бойынша 5 100-ден астам филиалға, 133 логистикалық хабқа және 80 000 терминалға иелік етеді.Әкім осындай жаһандық операторлармен әріптестіктің стратегиялық маңыздылығын атап өтті, әсіресе Алматы облысын «Бір белдеу – бір жол» бастамасы аясында көлік-логистикалық хаб ретінде дамыту тұрғысынан. Бүгінде Алматы облысы YTO компаниясының жаһандық логистикалық стратегиясындағы басым бағыттардың бірі болып отыр. Бұл қатарда Дубай, Сидней және Лос-Анджелес сияқты ірі қалалар да бар.Тараптар YTO компаниясының Алматы облысындағы қатысуын кеңейту, бірлескен инфрақұрылымдық жобаларды жүзеге асыру және инновациялық логистикалық шешімдерді дамыту мәселелерін талқылады.Сапар өңірге жоғары технологиялық инвестицияларды тарту мен экономикалық серіктестікті нығайту жолындағы маңызды қадам болды.Ақпарат көзі : https://www.gov.kz/memleket/entities/almobl/press/news/details/1003823?lang=kk

Қытайға жасалған іскерлік сапар аясында Алматы облысынан барған делегация фотоэлектрлік компоненттерді әзірлеу және өндіру саласындағы әлемдік көшбасшылардың бірі — Astronergy компаниясының өндірістік қуаттарын аралады.Сапардың мақсаты — күн энергетикасы саласындағы озық технологиялармен танысу және жаңартылатын энергия көздері бағытындағы ынтымақтастықтың келешегін талқылау болды. Қазақстандық делегация өндіріс үдерісінің жоғары деңгейде автоматтандырылуын, өнім сапасын бақылаудағы инновациялық тәсілдерді және кәсіпорын ауқымын жоғары бағалады.Astronergy компаниясы жоғары тиімділікке ие күн панельдерін өндіруге маманданған және «жасыл» технологиялар саласындағы жаңа шешімдерді белсенді түрде енгізіп келеді. Өндірістік желілер бойынша экскурсия барысында Алматы облысының өкілдеріне өндіріс технологиялары, өнімді сынақтан өткізу кезеңдері және экологиялық қауіпсіздікті қамтамасыз ету жүйесі туралы жан-жақты ақпарат берілді.Сапар қорытындысы бойынша тараптар болашақта ынтымақтастықты жалғастыруға, соның ішінде Қазақстан аумағында технологияларды жергіліктендіру және жаңартылатын энергетиканы дамыту саласындағы тәжірибе алмасу бағытында өзара қызығушылық білдірді.Ақпарат көзі : https://www.gov.kz/memleket/entities/almobl/press/news/details/1003824?lang=kk

Алматы облысы делегациясының Қытай Халық Республикасына жасаған ресми сапары аясында облыс әкімі Марат Сұлтанғазиев Қытайдың жетекші компанияларының өкілдерімен кездесті. Бұл кездесу халықаралық экономикалық ынтымақтастықты кеңейтудің маңызды кезеңіне айналды.Кездесуге Zhuhai Shixi Technology Co., Ltd, Wanjia Hotel Group Co., Ltd, және AT Partner Company сияқты жоғары технологиялар мен туризм саласындағы бірлескен жобаларға қызығушылық танытқан ірі компаниялардың өкілдері қатысты.Келіссөздер барысында Алматы облысының табиғи жауһары саналатын Көлсай аймағында аспалы жолдар салу жобасына ерекше назар аударылды. Кездесу нәтижесінде инфрақұрылымды дамыту және экологиялық туризм салаларындағы ынтымақтастықты көздейтін өзара түсіністік туралы меморандумға қол қойылды.Мұнай-газ секторына инвестиция тарту мәселесі бойынша негізгі әріптес ретінде Jinxiang Investment Group компаниясы танылып, оны директорлар кеңесінің төрағасы Хуан Сян Мяо таныстырды. Сондай-ақ кездесуге қазақстандық «Слава Мұнай» ЖШС өкілдері де қатысты.Энергетика саласы да маңызды тақырыптардың бірі болды. Жасыл энергетиканы дамыту перспективалары Ronghao Energy (басшысы Эрик Гао) және Zhongtai Group компанияларының қатысуымен талқыланды.Кездесу аясында зияткерлік жүйелер, технологиялар және өнеркәсіптік автоматтандыру салаларында ұсыныстармен алмасу өтті. Іс-шараға Jiangsu Slenline Intelligent Systems, Leng Dengke, Gaosong және Helong Explosion компанияларының өкілдері қатысты. Алматы облысының агроөнеркәсіптік кешенін дамытуға ерекше қызығушылық білдірген компаниялардың бірі – Қытайда жаңғақ пен снек өнімдерінің ірі дистрибьюторы болып саналатын Three Squirrels Co., Ltd. Компания атынан Пан Даовэй (Pan Daowei) сөз сөйледі.Алматы облысы шетелдік инвестициялар үшін ашық екенін және  шетелдік серіктестерге қолайлы жағдайлар, әрі тиімді рәсімдер және жобаларды іске асырудың барлық кезеңінде кешенді қолдау көрсетуге дайын екенін облыс әкімі Марат Сұлтанғазиев атап өтті.Ақпарат көзі : https://www.gov.kz/memleket/entities/almobl/press/news/details/1003825?lang=kk

Алматы облысында 17 917 түлек үшін қоңырау соңғы рет соғылады. Олар үлкен өмірге қанат қағуға бір табан жақын тұр. Үкілеген үмітті арқалағандардың 1433-і «Алтын белгі» төсбелгісіне үмітті. Ал, 1513 оқушы «Үздік аттестат» иегері атануға құлық танытуда. 11 жылдық тәлім мен тәрбие, білім мен білік , бағы мен бабы қатар сыналар тұста алыс емес. Түлектер жылдағыдай ҰБТ тапсырады. Биыл 14 123 бала тестілеуден өтеді. Алматы облысы білім басқармасы басшысының орынбасары Диана Тетенқызы биылғы 2024-2025 оқу жылы жемісті болғанын алға тартуда. Оның айтуынша, оқушылар 17 халықаралық, 150-ге жуық республикалық білім бәйгелерінің тұғырынан көрінген. Сонымен қатар, Республика бойынша 25 оқушы 1 орын, 30 оқушы 2 орын, 75 оқушы 3 орыннан көрінген. Бірер күнде барлық білім ұяларында соңғы қоңырау соғылады. Алайда, білім саласындағы жұмыстар аяқталмақ емес. Оқушылардың жазғы демалысын ұйымдастыру да білім саласының бір бағыты. Спикер, жазғы демалыс кезеңінде 30 лагерь жұмыс жасайтынын айтты. Облыс оқушыларының 92%-ы жазғы демалыспен және сауықтырумен қамту жоспарлануда. «Жекелеген санаттағы 2017 оқушысы мен тәрбиеленушілердің жазғы демалысын ұйымдастыруға 282,3 млн. теңге бөлінді»,-деді облыстық білім басқармасы басшысының орынбасары Диана Онбырбаева. Айта кетейік, «Қазақстан халқына» қорынан 165,6 млн. теңгеге, барлығы 1400 жолдама беріледі. Балалар «Тау-Жанашар» «Альтаир» «Облыстық балалар сауықтыру лагері» сынды орындарда жазғы демалыстарын тиімді өткізетін болады.Ақпарат көзі : https://www.gov.kz/memleket/entities/almobl/press/news/details/1003467?lang=kk

Қазақстан Республикасының Ауыл шаруашылығы министрі Айдарбек Сапаров жұмыс сапарымен Алматы облысындағы көктемгі дала жұмыстарының барысымен танысып, өңірдің диқандарымен кездесті. Сапар аясында агроөнеркәсіптік кешенді дамытудың негізгі бағыттары айқындалды.Министрдің сапары Жамбыл ауданындағы «Олжас» шаруа қожалығының жұмысымен танысудан басталды. 2013 жылы құрылған шаруашылықтың жалпы жер көлемі – 2600 гектар, оның 1500 гектары суармалы алқаптар. Алайда су тапшылығына байланысты қазір тек 600 гектар жер өңделуде. Мұнда бидай, арпа, жүгері және 60 гектар жерге егілген жоңышқа өсіріледі. Қожалық барлық қажетті техникамен жабдықталған, 20 адам жұмыспен қамтылған. Жалпы инвестиция көлемі шамамен 1 миллиард теңгені құрайды.— Бізде су жетіспейді. Су болмаса, егіс көлемін ұлғайту мен өнімділікті арттыру мүмкін емес. Ауыл шаруашылығы министрлігі мен Су ресурстары министрлігі бұл мәселені бірлесіп шешеді деп үміттенеміз, — деді шаруашылық басшысы Хамза Бабалықов.Министр көктемгі дала жұмыстарының елдің азық-түлік қауіпсіздігі мен болашақ өнім көлеміне тікелей әсер ететінін атап өтті. 2025 жылы Қазақстанда егіс алқаптарының жалпы көлемі 23,7 млн гектарға жетпек, бұл өткен жылмен салыстырғанда 413 мың гектарға артық. Алматы облысында 436,8 мың гектар жерге егін егу жоспарланып отыр.Егісті әртараптандыру жалғасуда: майлы дақылдарға 3,3 млн гектар, мал азығы дақылдарына тағы 3,3 млн гектар бөлінеді, бұл өткен жылмен салыстырғанда 127 мың гектарға көп.Мемлекеттік қолдау көлемі де артып келеді. Мемлекет басшысының тапсырмасы бойынша агроөнеркәсіптік кешенді жеңілдікпен несиелеу көлемі 2025 жылы рекордтық 700 млрд теңгеге жетеді. Бүгінгі таңда 491,5 млрд теңгеге 7 мыңнан астам өтінім қабылданып, 440 млрд теңгеге өтінімдер қаржыландырылған. Алматы облысынан 12,6 млрд теңге көлемінде 302 өтінім түскен, оның 174-і мақұлданған. Ауыл шаруашылығы техникасын лизингке алу бойынша тек 2,9 млрд теңгеге 142 өтінім берілген, бұл салада ақпараттық түсіндіру жұмыстарын күшейту қажет.Облыстағы ауыл шаруашылығы техникасының 60%-дан астамы тозған. Өткен жылы жаңа техника сатып алуға 120 млрд теңге бөлінсе, 2025 жылы бұл көрсеткіш 200 млрд теңгеге дейін өседі. «ҚазАгроҚаржы» арқылы шаруалар жылдық 6% мөлшерлемемен 10 жылға техника алу мүмкіндігіне ие.Жаңа өзгерістердің бірі – көктемгі және күзгі дала жұмыстарына арналған тікелей жеңілдетілген несиелеу тетігінің енді мал шаруашылығына да қолданылуы. Алғашқы кезеңде ірі және ұсақ мал бордақылау алаңдары мен құс фабрикаларын қолдауға 50 млрд теңге бөлінеді.Жамбыл, Іле, Еңбекшіқазақ, Қарасай, Талғар аудандары мен Қонаев және Алатау қалаларынан келген аграршылармен өткен кездесуде қаржыландыру, ресурспен қамтамасыз ету, «Кең дала 2» бағдарламасының жүзеге асуы сияқты мәселелер талқыланды. Шаруалар бұл бағдарламаның оңтүстік өңір ерекшеліктерін ескермейтінін айтты. Мысалы, бір гектар картопқа 495 мың теңге бөлінсе, тұқымының өзі 750 мың теңгеге дейін жетеді.«Атамекен» ҰКП АӨК департаментінің директоры Нұрлан Нұрбеков бағдарламаның ескіргенін және өңір жағдайына бейімдеу қажет екенін атап өтті. Министр Айдарбек Сапаров жауапты құрылымдарға бір ай ішінде бағдарламаның параметрлерін қайта қарап, тиісті өзгерістер енгізуді тапсырды.Қаржы құралдары және микронесиелеу департаменті директорының орынбасары Олжас Тлебалдин гектарға берілетін орташа несие көлемін арттыру мәселесі қарастырылып жатқанын хабарлады.Алматы облысы ауыл шаруашылығы басқармасының мәліметінше, 2024 жылы өңірдегі өңделетін жер көлемі 424 мың гектарға жетіп, былтырғы жылмен салыстырғанда 13 мың гектарға артқан. Көктемгі егіс жұмыстары барлық аудандарда аяқталған, тек Кеген мен Райымбек аудандарында ауа райының әсерінен шамамен екі апта кеш басталған.Министрдің жұмыс сапары ауыл шаруашылығын тиімді дамыту тек мемлекет пен шаруалардың тығыз ынтымақтастығы негізінде мүмкін екенін көрсетті. Осындай кездесулер жергілікті жерлердегі нақты мәселелерді тыңдап, аграршылардың қажеттіліктеріне сай шешімдер қабылдауға жол ашады.Ақпарат көзі : https://www.gov.kz/memleket/entities/almobl/press/news/details/1003482?lang=kk

2025 жылғы 21 мамырда Қытай Халық Республикасының Бейжің қаласында халықаралық көрме өтті. Көрме аясында Алматы облысының кәсіпорындары қазақстандық өнімдердің кең ассортиментін ұсынды. Іс-шара өңірдің экспорттық әлеуетін ілгерілетуге, сауда-экономикалық байланыстарды кеңейтуге және отандық брендтерді Қытай нарығында танымал етуге бағытталған.            Өңір атынан 12 кәсіпорын қатысып, 150-ден астам өнім түрін – азық-түліктен бастап, биоқоспалар, ұн, құрама жем және шарапқа дейін – ұсынды. Таныстырылған өнімдердің жалпы көлемі 250 келіден астам және 1000-нан аса қаптама бірлігін құрады.            Алматы облысынан көрмеге қатысушылар:«Даулет-Бекет» ЖШС – түйе сүтінен жасалған құрғақ өнімдер;«Сары-Бұлақ компаниясы» ЖШС – тауық жұмыртқасы мен құс еті;«NEO MILK» ЖШС – бие, ешкі және түйе сүтінен жасалған биоқоспалар;«GALANZ Bottlers» ЖШС – шай негізіндегі сусындар, алкогольсіз сусындар және квас (300-ден астам бөтелке);«Цесна» ЖШС – ұн және макарон өнімдері; «АзияАгроФуд» АҚ (AAFD) – ұн, құрама жем, дәнді дақылдар, патока, глютен, кебек және таныстырылым материалдары;«Алматинский продукт» ЖШС – кондитерлік өнімдер (93 қаптама, 17 кг);«Arba Wine» ЖШС – ақ, қызыл, газдалған және раушан түсті шараптардың 18 үлгісі;«Gold Product» ЖШС – 14 бөтелке шарап және бренди;«Байсерке Агро» ЖШС – компанияның қызметі мен ауыл шаруашылығы өнімдері бойынша таныстырылым.            Көрме қытайлық дистрибьюторлар, сауда желілері және HoReCa секторы өкілдері тарапынан үлкен қызығушылық тудырды. Табиғи әрі сапалы отандық өнімдер келушілердің жоғары бағасына ие болды.            «Халықаралық көрмелерге қатысу – біз үшін жаңа серіктестер табуға, өнімге деген сұранысты тексеруге және сыртқы нарықтағы орнымызды нығайтуға үлкен мүмкіндік. Қытай нарығы өзінің ауқымы мен экологиялық таза өнімге деген жоғары сұранысымен ерекше маңызды», – деді көрме қатысушысы, «NEO MILK» ЖШС директоры Аманбаев Болат Бейсенғалиұлы.            «Біз бейтарап (шикізаттық емес) экспортты дамыту жөніндегі мемлекеттік бағдарлама аясында экспорттаушыларымызға қолдау көрсетуді жалғастырамыз. Мұндай іс-шараларға қатысу – өнім жеткізу географиясын кеңейтуге ғана емес, сонымен қатар өңірдің сапалы аграрлық және қайта өңдеу өнімдері орталығы ретіндегі имиджін нығайтуға мүмкіндік береді», – деді Алматы облысы кәсіпкерлік және индустриялық-инновациялық даму басқармасының басшысы.            Алматы облысының кәсіпорындарының Пекин қаласында өткен халықаралық көрмеге қатысуы айтарлықтай нәтижелер берді: қазақстандық өнімдердің кең ассортименті қытайлық аудиторияға таныстырылып, тікелей байланыстар орнатылды, дистрибьюторлармен, сауда желілері мен HoReCa секторының өкілдерімен келіссөздер жүргізілді, нақты ынтымақтастық ұсыныстары алынды. Көрме табиғи және экологиялық таза өнімдерге жоғары сұраныстың бар екенін көрсетіп, өңірдің сапалы аграрлық және өңдеу өнімдерін жеткізуші ретінде имиджін нығайтты, сонымен қатар Алматы облысының экспорттық мүмкіндіктерін Қытай нарығында кеңейтті.Ақпарат көзі : https://www.gov.kz/memleket/entities/almobl/press/news/details/1003215?lang=kk

Алматы облысында қазақ күресінен «Алатау арланы» облыстық турнирі аяқталды. Қарасай ауданы «Үшқоңыр» спорт кешенінде аудандық және қалалық сайыстарда топ жарған балуандар күш сынасты. Жарыс жеңімпаздары «Қазақстан барысы» республикалық чемпионатына жолдама алды. Турнирдің салтанатты ашылу рәсімінде елімізге белгілі эстрада әншілері өнер көрсетті. Жарысты ұйымдастырушылар мен құрметті қонақтар қатысушыларға сәттілік тіледі. «Қазақ күресі отандық спорттың брендіне айналды. Елімізде ұлттық спортқа деген қызығушылық артып келеді. Алматы облысының өзінде 2000-нан астам адам қазақ күресімен шұғылдануда. «Казақстан барысы» республикалық турнирі қазақ күресінің әлемдік аренаға шығуына жол ашты. Бұл спорт жастар арасында отаншылдық рухты оятып, ұлттық құндылықтарға деген құрметті еселей түседі», – деді Алматы облыстық дене шынықтыру және спорт басқармасы басшысының міндетін атқарушы Рахман Шахарбек. Салтанатты ашылу рәсімінен кейін жеребе арқылы балуандар кім мықтыны анықтау үшін бозкілемде белдесті. «Жарысқа аудандық және қалалық сайыстардан үздік шыққан, 18 жастан асқан, салмағы 90 келіден жоғары 32 балуан бақ сынауға келді. Олардың арасында 9 балуан ҚР спорт шебері және бір халықаралық спорт шебері бар. Биылғы бәсекеге қатысушылардың арасында жастардың көп болғаны қуантады. Турнир жеңімпазына «Алтын белбеу» мен 2 000 000 теңге, екінші орынға – 1 000 000 тенге, ал үшінші орынға 500 мың теңге ақшалай сыйлық табысталады», - деді турнирдің бас төрешісі Қапар Рауанов.Жарыс қорытындысы бойынша, үшінші орын Еңбекшіқазақ ауданынан келген балуан Нұрғали Жолтаевқа бұйырды. Екінші орынды Балқаш ауданының балуаны Әлімжан Жұмахметов иеленді. Ілелік Жігер Сәкенұлы қарсылас шақ келтірмей «Алатау арланы – 2025» турнирінің жеңімпазы атанды. «Күреспен мектепте оқып жүргенде айналыстым. Спорт менің серігіме айналды. Қызметіме де көп пайдасын тигізіп келеді. Қазір жасым 34-те. Осы жылдар ішінде көптеген жетістікке жеттім. Қазақ күресі, самбо және дзюдодан спорт шеберімін. Республикалық жарыстардың жеңімпазы атандым. Самбодан Азия чемпионатында топ жардым. Өткен жылы дайындығым дұрыс болмай, жақсы нәтиже көрсете алмадым. Ал биыл облыстық полиция департаменті жарысқа тыңғылықты дайындалуыма жағдай жасады. Соның арқасында жеңіс тұғырынан көріндім. Ендігі кезекте «Қазақстан барысы» республикалық турниріне дайындықты бастаймын». – деді Жігер Сәкенұлы. Облыстық турнир жеңімпазына «Алтын белбеумен» қатар ақшалай сыйлық табысталды. Күміс және қола жүлдегер атанғандар да ақшалай сыйлыққа ие болды.Ақпарат көзі : https://www.gov.kz/memleket/entities/almobl/press/news/details/1002326?lang=kk

Аспан асты елінің астанасында қазақ саз өнерінің сайыпқыраны, композитор, дирижер, Қазақстанның Халық артисі Нұрғиса Тілендиевтің 100 жылдығына арналған халықаралық мәдени кеш өтті.Мерейтой аясында Бейжіңнің орталық концерт залында «Әлқисса» атты шығармашылық бағдарлама ұйымдастырылып, кеш барысында қазақтың біртуар сазгерінің өмірі мен шығармашылығына арналған музыкалық туындылар орындалды.Салтанатты іс-шараға Алматы облысының әкімі Марат Елеусізұлы Сұлтанғазиев қатысып, құттықтау сөз сөйледі. Өңір басшысы өз сөзінде екі ел арасындағы мәдени ықпалдастықтың маңыздылығын атап өтті.«Нұрғиса Тілендиев – қазақ руханиятының алтын қазығы. Оның мәңгілік әуендері — халқымыздың жүрегінде сақталған ұлттық кодтың бір бөлігі. Ұлы тұлғаның ғасырлық мерейтойының Бейжіңде аталып өтуі – Қазақстан мен Қытай арасындағы достықтың, өзара құрмет пен мәдени байланыстардың биік көрінісі», – деді Марат Сұлтанғазиев.Ресми бөлімнен кейін шығармашылық кеш жалғасып, көрермен назарына Н.Тілендиев атындағы «Отырар сазы» фольклорлы-этнографиялық оркестрінің орындауындағы шығармалар ұсынылды. Оркестрге Қазақстанның еңбек сіңірген қайраткері, сазгердің қызы Дінзухра Тілендиева дирижерлік етті.Сонымен қатар сахна төрінде дәулескер күйші, Қазақстанның халық артисі Секен Тұрысбек, ҚР еңбек сіңірген қайраткерлері Нұркен Әшіров пен Мадина Сәдуақасова, сондай-ақ Алматы облысының өнерпаздары өнер көрсетті. Шара аясында қазақтың дәстүрлі қолөнері мен жеңіл өнеркәсіп өнімдерінің көрмесі де ұйымдастырылды.Концертке қатысқан Бейжің қаласының тұрғыны Қаламқас Серікқызы өз әсерімен бөлісті:«Нұрғиса Тілендиевтің музыкасы – жүрекке жететін шын өнер. Күй мен әуен арқылы туған елдің рухы мен болмысы сезілді. Қытайда туып-өссем де, қазақ болып туғаныма тағы бір мәрте мақтандым», – деді ол.Айта кетейік, ЮНЕСКО көлемінде аталып жатқан мерейтой аясында Нұрғиса Тілендиевтің шығармашылығын насихаттауға бағытталған халықаралық шаралар жыл бойы жалғасады. Алматы облысы бұл бастаманың бел ортасында.Ақпарат көзі : https://www.gov.kz/memleket/entities/almobl/press/news/details/1001849?lang=kk

2025 жылғы 21 мамырда Алматы облысының әкімі Марат Сұлтанғазиев Бейжің қаласына жасаған жұмыс сапары аясында Қытай Халық саяси консультативтік кеңесінің Бейжің қалалық комитеті төрағасының орынбасары Ван Хонгпен кездесті. Тараптар екіжақты серіктестікті нығайту және негізгі бағыттардағы өзара іс-қимылды кеңейту мәселелерін талқылады.– Қытай – бай тарихи мұрасы мен зор қазіргі заманғы әлеуеті бар ел. Оның жүрегінде орналасқан Бейжіңде болу – мен үшін үлкен мәртебе, – деді өңір басшысы.Марат Сұлтанғазиевтің айтуынша, Қазақстан, оның ішінде Алматы облысы, Қытаймен серіктестікті стратегиялық басымдық ретінде қарастырады.– Қытаймен ынтымақтастық – жай дипломатиялық қадам емес. Бұл – өзара сенімге, прагматизм мен ортақ мүддеге негізделген жол, – деп атап өтті әкім Қасым-Жомарт Тоқаевтың сөзін келтіре отырып.Кездесу барысында Марат Сұлтанғазиев Алматы облысында агроөнеркәсіптік кешен, логистика, шекара маңы саудасы, жаңартылатын энергетика және мәдени байланыстар қарқынды дамып келе жатқанын айтты. Бұл салалар Қытаймен ынтымақтастықты жаңа деңгейге көтеруге мүмкіндік береді.Әкім «Бір белдеу – бір жол» бастамасына Алматы облысының белсенді қатысуына ерекше назар аударды. Оның айтуынша, соңғы екі жылда өңір экономикасы айтарлықтай серпіліс жасап, жалпы өңірлік өнім көлемі бойынша республикада 10-орыннан 5-орынға көтерілді.Кездесу барысында мәдени байланыстар да ерекше назарда болды.– Біздің қарым-қатынас тек экономикамен шектелмейді. Біз мәдени жақындасуға үлкен мән береміз. Жуырда Бейжіңде Нұрғиса Тілендиевтің 100 жылдығына арналған концерт өтті. Бұл – халықтарымыздың рухани үндестігінің жарқын белгісі, – деді Марат Сұлтанғазиев.Ақпарат көзі : https://www.gov.kz/memleket/entities/almobl/press/news/details/1001860?lang=kk

Халықаралық сауда-өндірістік «Маревен Фуд Тянь-Шань» компаниясы 10 жылдық мерейтойына орай Алматы облысының Денсаулық сақтау басқармасына 10 заманауи жедел жәрдем автокөлігін сыйға тартты.– «Біздің ойымызша, денсаулық сақтау саласы – елдегі ең маңызды салалардың бірі. Сондықтан жедел жәрдем көліктерін сыйлау – өңірдің әлеуметтік қамтамасыз етілуіне қосқан үлесіміз деп білеміз», – деді компанияның басқарушы директоры Алексей Сердюков.– «Сіздер өндірілетін өнімнің сапасы ғана емес, сонымен қатар әлеуметтік жауапкершілік арқылы да халық игілігі үшін барлық салада, соның ішінде денсаулық сақтау жүйесін қолдау бағытында еңбек етіп жатқандарыңызды дәлелдедіңіздер.Бұл сіздердің компанияларыңыздың осы саладағы әлеуметтік жауапкершілігі жоғары бизнестің халықпен қарым-қатынаста қалай әрекет етуі керектігінің жарқын үлгісі деп санаймын. Осыған орай, Алматы облысының Денсаулық сақтау басқармасы, облыс әкімдігі және өңір тұрғындарының атынан көрсеткен қолдауларыңыз үшін шынайы алғысымды білдіремін. Өз кезегінде басқа да ірі бизнес өкілдері де сіздерден үлгі алады деп сенемін», – деді Алматы облысының Денсаулық сақтау басқармасының басшысы Ержан Сүлейменов.Компания 2015 жылы Қазақстанда тіркеліп, 2018 жылы Қонаев қаласының маңында заманауи өндірістік-логистикалық кешен ашылды.«Маревен Фуд Тянь-Шань» Қазақстандағы жетекші азық-түлік өндіруші компаниялардың ТОП-10 қатарына кіреді.Айта кету керек, компания негізінен жергілікті шикізатты пайдаланады, ал өндірілетін өнімдер ҚР заңнамасының талаптары мен регламенттеріне қатаң сай келеді.Ақпарат көзі : https://www.gov.kz/memleket/entities/almobl/press/news/details/999252?lang=kk

2025 жылы Алматы облысында көгалдандыру және экологияны жақсарту мақсатында 76 703 түп ағаш отырғызылды. Бұл жұмыстар «Таза Қазақстан» ұлттық жобасы аясында және өңірлік бағдарламалар шеңберінде жүргізілді.Ең көп ағаш отырғызылған аймақ – Қонаев қаласы. Мұнда 12 446 түп ағаш отырғызылып, жасыл аймақтардың аумағы едәуір кеңейтілді. Екінші орында — Еңбекшіқазақ ауданы (9 429 түп), ал үздік үштікті Ұйғыр ауданы (6 190 түп) түйіндейді.Сонымен қатар, көктемгі экологиялық акцияларға жалпы білім беретін мектеп оқушылары да белсенді атсалысты. Олар 11 237 түп ағаш отырғызып, қоршаған ортаны қорғауға өз үлестерін қосты.Ағаш егу жұмыстарының аудан бойынша көрсеткіші төмендегідей:• Жамбыл ауданы – 8 800 түп• Іле ауданы – 5 693 түп• Талғар ауданы – 5 660 түп• Қарасай ауданы – 5 477 түп• Балқаш ауданы – 4 670 түп• Райымбек ауданы – 3 311 түп• Кеген ауданы – 2 920 түп• Алатау қаласы – 870 түпБұл көрсеткіштер – өңірдің экологиялық жағдайын жақсартуға, жасыл белдеулер қалыптастыруға және ауаның сапасын арттыруға бағытталған кешенді шаралардың бір бөлігі. Көгалдандыру жұмыстары жалғасады және жыл соңына дейін 41 970 түп ағаш отырғызу жоспарлануда.Ақпарат көзі : https://www.gov.kz/memleket/entities/almobl/press/news/details/998845?lang=kk

Алматы облысы Талғар ауданына қарасты Бесағаш ауылында өңірдегі алғашқы қос функциялы тірек іске қосылды. Бұл – базалық станция мен көше шамының қызметін біріктіретін заманауи инженерлік шешім. Болашақта мұндай құрылымдар бейнебақылау жүйесімен де жабдықталуы мүмкін. Жоба Huawei компаниясының бастамасымен, Алматы облысының цифрлық технологиялар басқармасы мен «КаР-Тел» ЖШС (Beeline сауда белгісі) арасындағы өзара ынтымақтастық туралы меморандум аясында жүзеге асырылды.Дәстүрлі антенналардан айырмашылығы — көлемді әрі көзге ұрмайтын бұл тірек ықшам әрі функционалды дизайнмен ерекшеленеді. Ол елді мекеннің келбетіне үйлесімді еніп, бірнеше функцияны қатар атқарады: байланыс операторларының жабдықтарын орналастыруға мүмкіндік беріп, көше жарығымен қамтамасыз етеді. Бұл – ауылдық және қалалық инфрақұрылым үшін тиімді шешім.Қос функциялы тіректің басты артықшылықтарының бірі – орнату мерзімінің қысқалығы. Егер стандартты байланыс мұнарасын салу алты айдан астам уақытты алса, бұл құрылым небәрі бір ай ішінде орнатылады. Бұл, әсіресе, мобильді байланысты жақсарту мен бейнебақылау жүйесін енгізу аса қажет өңірлер үшін маңызды.«КаР-Тел» ЖШС-нің техникалық директоры Олег Снимщиковтың айтуынша, бұл жобаның болашағы зор: «Мұндай тіректерді бүкіл Алматы облысына енгізуді жоспарлап отырмыз. Бұл, әсіресе, ауылдық жерлерде байланыс сапасын арттырып, өңірдің цифрлық инфрақұрылымының маңызды бөлігіне айналады», — деді ол.Қос функциялы тірек тек байланыс үшін емес, қоғамдық кеңістіктерді жарықтандыру арқылы түнгі қауіпсіздікті қамтамасыз етеді. Алдағы уақытта мұндай құрылымдарға бейнебақылау камераларын орнату арқылы жергілікті билік көшелердегі жағдайды бақылап, қоғамдық қауіпсіздікті арттыра алады. Осылайша, тірек — ақылды әрі көпфункционалды қоғамдық кеңістіктің бір бөлігіне айналады.Ауылдық жерлерде жеке инфрақұрылым тартуға мүмкіндік бола бермейтін жағдайда мұндай шешімдер аса өзекті. Кешенді тәсіл ресурстарды үнемдеуге және заманауи технологияларды ең қажет жерлерге енгізуге септігін тигізеді.Huawei Technologies Kazakhstan компаниясы атап өтті: «Біз әрқашан технологияларды адамдарға жақындатуға тырысамыз. Көшені жарықтандырып, байланыс сигналын күшейтетін тірек – бұл футуризм емес, жайлы әрі заманауи өмір сүру салтына жасалған нақты қадам. Ең бастысы – бұл қадам Бесағаш секілді ауылдардан басталуы біз үшін маңызды».Қазіргі таңда осындай тірек Алматы қаласында да орнатылып жатыр — іске қосу мамыр айына жоспарланған. Бұл жоба тек ауылдық емес, мегаполис жағдайында да қолдануға болатынын көрсетеді.Сонымен қатар, бұл пилоттық жоба мемлекет пен бизнес арасындағы жаңа форматтағы серіктестікке жол ашады. Мұндай бастамалар технологиялық дамуға ғана емес, сонымен қатар жаңа жұмыс орындарын құруға, халықтың цифрлық сауаттылығын арттыруға және жергілікті қауымдастықтарды дамытуға ықпал етеді.Бесағаш ауылындағы жоба – заманауи технологиялық шешімдерді жылдам, сапалы және қоршаған ортаның эстетикасын ескере отырып іске асыруға болатындығын дәлелдейтін мемлекеттік және жеке сектордың бірлескен жұмысының жарқын мысалы.Ақпарат көзі : https://www.gov.kz/memleket/entities/almobl/press/news/details/998864?lang=kk

Ақмола облысында ауыл шаруашылығы алқаптарын шегіртке зиянкестерінен қорғау бағытында жоспарлы жұмыстар жүргізілуде. Биыл облыстың 11 ауданында итальяндық шегірткеге қарсы химиялық өңдеу 226,5 мың га алаңда, олардың республикалық бюджет қаражаты үшін 89,0 мың га және облыстық бюджет қаражаты есебінен 137,5 мың га алаңда жүргізілетін болады.Осы орайда жақында Жарқайың ауданында шегірткелі зиянкестерге қарсы күрес жөніндегі жедел штабтың көшпелі отырысы өтті. Іс-шараға Ақмола облысы әкімінің орынбасары Мұрат Балпан, ҚР АШМ Агроөнеркәсіптік кешендегі мемлекеттік инспекция комитетінің Ақмола облыстық аумақтық инспекциясының басшысы Жасұлан Қожабеков, Республикалық фитосанитариялық диагностика және болжамдар әдістемелік орталығы Ақмола филиалының жетекшісі Нұрбек Садықов, сондай-ақ ауданның ауыл шаруашылығы тауарын өндірушілері қатысты.Шара барысында ауыл шаруашылығы алқаптарын өңдеуге арналған арнайы бүріккіш техникалар, шегірткелі зиянкестердің ошақтарын бақылауға арналған автокөліктер, кең аумақтарды шолуға арналған ұшқышсыз ұшу аппараттары (дрондар) іс жүзінде көрсетілді. Барлық техника жұмыс барысындағы режимде таныстырылып, мамандар мониторинг пен өңдеу алгоритмдерін таныстырды.«Химиялық өңдеулердің ең үлкен көлемі Жарқайың ауданына тиесілі. Бұл ауыл шаруашылығы дақылдарына айтарлықтай қауіп төндіреді. Бұған дейін мамандар шегіртке зиянкестерінің ошақтарын анықтаған болатын. Бүгін бұл аумақтар жедел штаб мүшелеріне көрсетілді. Қазіргі таңда зиянкестер дернәсіл сатысында, сондықтан жақын күндері бұл жерлерде химиялық өңдеулер жүргізілетін болады, – деді фитосанитариялық диагностика және болжамдар орталығының облыстық филиалының жетекшісі Нұрбек Садықов.Биыл Жарқайың ауданында алғаш рет РМК-ның «Фитосанитария» шаруашылық жүргізу құқығындағы кәсіпорнының ұшқышсыз авиациялық жүйелері қолданылуда. Бұл дрондар ауыл шаруашылығы алқаптарында 5 000 гектарға дейінгі аумақты өңдеуге жұмылдырылған. Бір дронның өнімділігі – тәулігіне 50 гектарға дейін.Бүгінгі таңда республикалық бюджет есебінен аудан аумағында 3 800 гектар жер өңделді. Жер бедерінің күрделілігіне байланысты кейбір өңдеу жұмыстары дельтаплан көмегімен жүргізілді: соның ішінде 2 310 гектар — Пригородное ауылының аумағы, 1 490 гектар — Валиханов ауылдық округі де енеді.Ақмола облысы әкімінің орынбасары Мұрат Балпан шегірткеге қарсы іс-шараларды уақытылы әрі жауапкершілікпен жүргізудің маңыздылығын атап өтті.«Біздің алдымызда тұрған негізгі міндет – зиянкестердің таралуына жол бермеу. Ол үшін барлық қызметтердің үйлесімді жұмысы, заманауи технологияларды пайдалану және жағдайды тұрақты бақылау қажет. Біз егінді қорғап, өңірдің азық-түлік қауіпсіздігін қамтамасыз етуіміз керек», – деді облыс әкімінің орынбасары Мұрат Балпан.Жиын қорытындысында ол химиялық өңдеу кезеңінде барлық қызметтердің үйлестірілген, сапалы және уақытылы жұмысын қамтамасыз етуді тапсырды.  Ақпарат көзі : https://www.gov.kz/memleket/entities/aqmola/press/news/details/998589?lang=kk

Алматы облысында жазғы туристік маусымға дайындық аяқталуға жақын. Биылғы жылы ерекше назар — демалушылардың қауіпсіздігі мен цифрлық технологияларға аударылып отыр.Акиматтың мәліметінше, өңірде 120 ресми жағажай жабдықталған. Барлық демалыс аймақтары тұрақты бақылауда болады — құтқарушылар кезекшілік етеді, хабарлау жүйелері жұмыс істейді және алғаш рет жасанды интеллектпен жабдықталған бейнебақылау камералары орнатылды. Бұл құрылғылар қауіпті әрекеттерді анықтай алады: мысалы, адам қалқымалардың ар жағына жүзіп кетсе немесе суда тұрақсыз күйде болса.Камералардан келіп түсетін барлық мәліметтер нақты уақытта облыстық ТЖД-ның Жедел әрекет ету орталығына жеткізіледі. Бұл жағдайларға жедел әрекет етуге және жалпы қауіпсіздік деңгейін арттыруға мүмкіндік береді.Алматы облысы туризм басқармасының басшысы Қуаныш Мирамбекұлының айтуынша: «Тек өткен жылдың өзінде Қонаев қаласы мен оның маңын бір жарым миллионнан астам турист келді. Биыл бұл көрсеткіш екі миллионнан кем болмайды деп күтіп отырмыз. Біз туристік инфрақұрылымды дамытып, цифрлық шешімдерді енгізіп жатырмыз. Демалыс жайлы әрі қауіпсіз болуы үшін барлық жағдай жасалуда».Қапшағай су қоймасы өңірдегі басты демалыс орындарының қатарында қала бермек — енді мұнда заманауи қауіпсіздік жүйелері мен сапалы қызмет ұсынылады.Ақпарат көзі : https://www.gov.kz/memleket/entities/almobl/press/news/details/998308?lang=kk

Облыс орталығында Вернадский мен Әшімов көшелерінің қиылысында орналасқан 45 пәтерлі екі жаңа тұрғын үйдің құрылысы аяқталуға жақын. Бұл үйлер қала тұрғындары үшін ерекше сәулет үлгісінде салынған және қолайлы жоспарымен, заманауи жобалық шешімдерімен ерекшеленеді.Қазіргі таңда үйлердің құрылысы толық аяқталып, абаттандыру жұмыстары жүргізілуде. Жақын күндері жаңа пәтер кілттері иелеріне табысталмақ.Ақмола облысының әкімі Марат Ахметжанов тұрғын үйлердің құрылыс барысымен танысты.«Integra» құрылыс компаниясының өкілі Дәурен Тлеубердиновтің айтуынша, бүгінде аумақты абаттандыру жұмыстары жүріп жатыр. Апта соңына дейін асфальт төсеу жоспарланған. Аулада спорт және балалар алаңдары қарастырылған.Айта кету керек, бұл көпқабатты тұрғын үй кешені төрт үйден тұрады. Екі тұрғын үйдің тұрғындары облыс әкіміне алғыстарын білдірді.«Жаңа ойын алаңында күні бойы балалар ойнап жүреді. Аула көркейіп, жайлы әрі тартымды бола түсті», – деді шағынаудан тұрғыны Сәкен Төканов. Ақпарат көзі : https://www.gov.kz/memleket/entities/aqmola/press/news/details/997844?lang=kk

2025 жылғы 1 сәуірге Абай облысы жағдай бойынша еліміздегі халық саны 601,4 мың адамды құрады, оның ішінде қалалықтар – 374,4 мың (62,3%), ауылдықтар – 227,0 мың адам (37,7%). 2025 жыл басымен салыстырғанда халық саны 3,1 мың адамға немесе 0,5%-ға кеміді.Халықтың табиғи қозғалысы2025 жылғы қаңтар-наурыз Абай облысы халқының табиғи өсімі 2024 жылғы қаңтар-наурыз салыстырғанда (972 адам) 29,6%-ға азайды, 684 адамды құрады. Табиғи өсімнің жалпы коэффициенті 1000 адамға шаққанда 4,62 адамды құрады.АХАТ органдары ұсынған азаматтық хал актілерінінің жазбаларындағы мәліметтердің нәтижесінде, 2025 жылғы қаңтар-наурыз туылғандар саны 1926 адамды құрады, бұл 2024 жылғы тиісті кезеңге қарағанда 17,0%-ға аз (2320). 1000 адамға шаққандағы жалпы туу коэфициенті  13,02  туылғандарды құрады.Қарастырылып отырған кезеңде қайтыс болғандар саны 1242 адамды құрады, бұл 2024 жылғы қаңтар-наурыз қарағанда 7,9%-ға аз (1348 адам). Өлім-жітімнің жалпы коэффициенті 1000 адамға 8,40 қайтыс болғандарды құрады.2025 жылғы қаңтар-наурыз облыста 1 жасқа дейін шетінеген 15 нәресте тіркелді және 2024 жылғы тиісті кезеңмен салыстырғанда (21 шетінеген нәресте) 28,6% есе азайды. Нәресте өлім-жітімінің коэффициенті 1000 туғандарға шаққанда 7,79 оқиғаны құрады.Халықтың көші-қоныКөші-қон қызметі органдары ұсынған мәліметтерді өңдеу нәтижесінде халықтың көші-қоны 2025 жылы 1-тоқсанда  облысымызға тұрғылықты тұруға келгендердің тіркелу саны - 3199 адамды, елімізден кеткендердің саны - 5292 адамды,  көші-қонның айырымы – 2093 адамды құрады.Еліміздегі негізгі көші-қон алмасуы ТМД  мемлекеттерімен өтуде. ТМД елдерінен келгендердің саны-14 адам, ал  сол елдерге кеткендердің - 28 адам, көшіп-қонушылардың жалпы санынан үлесі 87,5%  және 84,8% құрады.  Осының келгендермен  және кеткендердің көп бөлігі Россей Федерациясына тиесілі, 14 адам  келіп және 28 адам көшіп кеткен.Алыс шетел елдерімен теріс сальдо, облысқа келгендер - 2 адам құраса, кеткендер саны - 5 адам, оң сальдо Қытай Халық республикасымен  оң сальдо қалыптасты.Облыс  ішінде қоныс аударатын көшіп-қонушылар саны - 3183 адамға азайған, келгендер - 5259 адам құраса, кеткендер -  2076 адам құрады._________________________________________________________________________________________________________________Әдіснамалық түсіндірмелерХалықтың табиғи өсімі - белгілі бір кезеңде тірі туылғандар мен өлгендер санының арасындағы  айырмашылығына тең. Халықтың табиғи қозғалысы жөніндегі деректер АХАТ органдарында тіркелген азаматтық хал актілерінің жазулары негізінде жиналады және өңделеді. Туылғандар санына тек тірі туылғандар енгізілген.Туудың жалпы коэффициенті - бала туылу қарқындылығының барлық халыққа қатынасы бойынша анықталатын көрсеткіш. Кезең бойына тірі туылғандардың жалпы санының халықтың кезеңдік орташа санына қатынасын көрсетеді. Әдетте, 1000 халыққа  шаққанда есептеледі.Өлімнің жалпы коэффициенті - халықтың өлімінің қарқындылығын анықтайтын көрсеткіш. Кезең бойына өлгендердің жалпы санының халықтың кезеңдік орташа санына қатынасын көрсетеді. Әдетте 1000 халыққа шаққанда есептеледі.Нәресте өлімінің коэффициенті - 1 жасқа дейінгі балалар өлімінің деңгейін анықтайтын көрсеткіш. 1 жасқа дейінгі өлгендер саны тірі туылғандар санына қатынасымен есептеледі. Нәрестелер өлімі коэффициенті 1000 тірі туғандарға  есептелінеді.Халықтың көші-қоны - тұрған жерін ауыстыруға байланысты қандайда болса өңірдің шекарасы арқылы адамдардың (көшіп-қонушылардың)  орын ауыстыруы.Көшіп-қонушы - тұрақты тұратын жерін ауыстырумен көші-қон жасайтын адам.Келгендер саны - есепті кезеңде сырттан осы өңірге көшіп келген адамдар саны.Кеткендер саны – есепті кезеңде сыртқа осы өңірден көшіп кеткен адамдар саны.www.stat.gov.kz / Официальная статистика / По отраслям / Демографическая статистикаӘлеуметтік және демография статистикасы бөлімінің  басшысы: С.А. КондратьеваТел. +7 7222 36-25-49Адрес:180000, Cемей қаласыМәңгілік ел көшесі, 25 © Қазақстан Республикасы Стратегиялық жоспарлау және реформалар агенттігі Ұлттық статистика бюросыАқпарат көзі : https://www.gov.kz/memleket/entities/abay/press/news/details/996778?lang=kk