Еңбекшіқазақ ауданы, Түрген ауылында бірнеше жыл бойы италиялық үлгіде дайындалған сапалы томат соустарын өндіру табысты дамып келеді. Бұл өнімдерді шығаратын Del Pomo компаниясы еуропалық сұрыптағы сүйкімді дәмі мен хош иісі бар қызанақтарды пайдаланады.Соус дайындаудың ерекше рецепті кәсіпорынның негізін қалаушы Андрей Неумывакин тарапынан әзірленген. Заилийский Алатауының баурайында Pelati, San Marzano және Appachi секілді италиялық қызанақ сорттары жерсініп, Del Pomo өнімдерінің негізгі шикізатына айналды. Компания жергілікті шаруа қожалықтарымен және фермерлермен тығыз ынтымақтастық орнатып, қызанақ жеткізуді жолға қойған.Del Pomo компаниясының құрылу тарихы да назар аударарлық. Шеф-повар, кулинария саласындағы халықаралық конкурстардың бірнеше дүркін жеңімпазы Андрей Неумывакин Қазақстан, Өзбекстан және Еуроодақтың үш бірдей шеф-поварлар қауымдастығының мүшесі саналады. Ол қоғамдық тамақтандыру саласына жаңа технологиялар мен санитарлық талаптарды енгізуге атсалысып келеді. Сонымен қатар ол Алматыдағы технологиялық, қаржылық және инновациялық колледждерде болашақ мамандарды оқытады.Өндіріс ашу идеясы бірнеше жыл бұрын пайда болды. Астанадағы мейрамхана кешенінде жұмыс істеп жүрген кезінде Андрей Александрович жаз айында екі тонна қызанақ сатып алып, авторлық рецепті бойынша соус дайындаған. Сол кезде ол жеке өндіріс ашу қажет екенін түсінеді. Осылайша, 2022 жылы Del Pomo атты томат соустарын шығаратын кәсіпорын өз жұмысын бастады. Бүгінде компания жылына 100 тоннадан астам өнім өндіріп, оны Алматы қаласы мен Алматы облысына жеткізеді. Негізгі тұтынушылар – мейрамханалар, кафе, қонақ үйлер, пиццериялар, көтерме ұйымдар, базарлар мен мектептер.Компанияның өнімдері табиғилығымен және жоғары сапасымен ерекшеленеді. Мысалы, Passata di pomodoro Arrabbiata соусы ащы дәмді ұнататындарға арналған: құрамында жіңішке ащылық беретін чили және паприка бар. Ал Passata di pomodoro per Pizza соусы піскен қызанақ, пияз, сарымсақ, жаңа піскен райхан, тимьян және розмарин қосындысынан дайындалып, қанық түсі мен хош иісімен ерекшеленеді. Барлық өнімдер химиялық қоспаларсыз, бояғыштарсыз, глютенсіз және дәм күшейткіштерсіз дайындалады.Жақында Del Pomo соустары Есік қаласы мен Түрген ауылындағы дүкендерге қойылып, жергілікті тұтынушылар арасында танымал бола бастады.Алдағы жылы кәсіпкер томат өнімдерін өндіретін жаңа желіні іске қосып, өндіріс көлемін бес есеге дейін ұлғайтуды жоспарлап отыр. Италиядан коммерциялық ұсыныс түсіп, кәсіпорын мемлекеттік қолдауға үміт артып отыр.Өңірдегі ауыл кәсіпкерлері жаңа тәсілдер мен заманауи технологияларды енгізу арқылы айтарлықтай нәтижелерге қол жеткізіп келеді. Бұл ретте өңдеу кәсіпорындарының рөлі ерекше, өйткені олардың жұмысы өңір экономикасының дамуына тікелей ықпал етеді.Ақпарат көзі : https://www.gov.kz/memleket/entities/almobl/press/news/details/1108606?lang=kk

Қарасай ауданында қазіргі таңда 80 мектеп жұмыс істейді. Оның 63-і – мемлекеттік, соның ішінде Әл-Фараби атындағы облыстық лицей бар. Қалған 17-сі – жеке меншік білім беру ұйымдары.2024 жылы «Келешек мектептер» ұлттық жобасы аясында Қаскелең қаласында, Қошмамбет, Елтай, Долан, Көкөзек және Кемертоған ауылдарында тұрғындар үшін жалпы 8100 орынға арналған жаңа форматтағы 6 мектеп пайдалануға берілді. Бұдан бөлек, жергілікті бюджет есебінен «Өмірұзақ» тұрғын үй кешенінде 900 орындық мектептің құрылысы аяқталып, оқу процесі басталды.2025 жылы Алмалыбақ ауылында 1500 оқушыға арналған жаңа мектептің құрылысы аяқталып, Білім күніне орай қолданысқа тапсырылды. Сонымен қатар «Асыл Арман» тұрғын үй кешені жанынан 2000 орындық Nomad International School ашылып, ұзақ жылдарға созылған үш ауысым мәселесін шешуге елеулі үлес қосты.Соңғы үш жылда ауданда барлығы 12 жаңа мектеп салынды. Соның нәтижесінде үш ауысымда білім беретін мектептер саны 12-ден 1-ге дейін қысқарды. Қазіргі таңда үш ауысымды оқу тек Бұлақты ауылындағы мектепте сақталған. Жыл соңына дейін бұл елді мекенде 900 орындық «Келешек мектеп» құрылысын аяқтау жоспарланған, осылайша ауданда үш ауысымды оқыту толық жойылады.Білім нысандарын күрделі жөндеу бағытында да жұмыстар атқарылуда. Абай ауылындағы М.Ғабдуллин орта мектебінің күрделі жөндеуі аяқталды. Шамалған ауылындағы Мұхтар Әуезов атындағы мектепте жөндеу жұмыстары қыркүйек айында басталды. Ал Қаскелең қаласындағы А.Пушкин атындағы мектептің жөндеу жұмыстарына қатысты жобалық-сметалық құжаттама әзірленуде.Ұмтыл ауылдық округіне қарасты Алмалыбақ ауылында орналасқан жаңа мектеп тек қазақ тілінде білім береді. 1500 орынға есептелген ғимаратта алғашқы жылы шамамен 1800 оқушы оқиды. 96 педагог еңбек ететін нысан заманауи жабдықтармен және отандық жиһаздармен толық қамтылған.Мектеп 10 блоктан тұрады. Үлкен және кіші сыныптарға арналған төрт спортзал, жас ерекшеліктеріне қарай бөлінген асханалар, кең акт залы, заманауи пән кабинеттері, химия және физика зертханалары, STEM кабинеті, VR көзілдірігі мен робототехникаға арналған құралдармен жабдықталған. Ғимаратқа Face ID жүйесі орнатылып, оқушылардың келіп-кетуі қауіпсіз бақылауға алынған.Жеке инвестиция есебінен салынғанымен, Nomad International School-да 2000-ға жуық бала мемлекеттік жан басына қаржыландыру аясында тегін оқиды. Барлығы 2500 бала қабылданған, оның ішінде 400-ге жуық оқушы ақылы түрде білім алады. Оқу ақысы – 50 мың теңге.Мектептің басты ерекшеліктері:– білім беру төрт тілде жүргізіледі (қазақ, орыс, ағылшын, қытай);– математика, физика, химия, биология пәндері тереңдетіліп оқытылады;– спорт инфрақұрылымы күшейтілген;– тәжірибелі жоғары оқу орындары оқытушыларының қатысуымен кәсіби дайындық ұйымдастырылады.Жаңадан пайдалануға берілген білім нысандары Қарасай ауданындағы демографиялық өсім мен мектеп жүктемесін айтарлықтай жеңілдетті. Мәселен, Алмалыбақ ауылында бұған дейін тек Әл-Фараби атындағы лицей мен мектеп-гимназия жұмыс істеген болса, бүгінде оқушылардың басым бөлігі жаңа орта мектепке бөлінді. Дәл осындай оң өзгерістер Кемертоған ауылында да байқалады, онда Л.Толстой атындағы мектептің жүктемесі Nomad International School есебінен төмендеді.Ақпарат көзі : https://www.gov.kz/memleket/entities/almobl/press/news/details/1108601?lang=kk

Облыс басшылығы мен ауылдық округ әкімдері арасындағы диалог мазмұнды әрі нақты сипатқа ие болуда. Бүгінде ауыл әкімдері мәселелерді ғана емес, оларды шешудің тиянақты ұсыныстарын, есептері мен нақты тетіктерін ұсынады.Осы бағыттағы жүйелі жұмысқа Қонаев қаласында жүзеге асқан «Әкімдер мектебі» жобасы елеулі үлес қосты. Жоба ауыл әкімдеріне заманауи басқару құралдарын меңгеруге мүмкіндік беріп, пікір алмасудың және тиімді шешімдер іздеудің алаңына айналды. Соның нәтижесінде мұндай кездесулердің сапасы едәуір артты.Облыстық әкімдікте өңірдің тоғыз ауданының ауылдық округ әкімдері бас қосты. Олар – округтердің дамуына жауапты, тікелей дауыс беру арқылы сайланған басшылар.Алматы облысының әкімі Марат Сұлтанғазиев атап өтті:«Ауыл – өңір экономикасының негізі. Мәселені облысқа жеткізбей, жергілікті жерде шешу маңызды. Егер ұсыныс ауыл тұрғындарының жағдайын жақсартуға бағытталған болса, біз оны қолдауға дайынбыз».Кездесуде жергілікті өзін-өзі басқару тетіктерін күшейту қажеттілігі айтылды. Оның ішінде әкімдердің сайлауалды бағдарламаларын орындау бойынша халық алдында тұрақты есеп беру практикасын заңмен бекіту ұсынылды.Бюджет мәселелері де кеңінен талқыланды. Ауыл әкімдеріне көлік иелері туралы ақпаратқа қол жеткізу, жылжымайтын мүлікті нарықтық құн бойынша бағалау және жеке табыс салығын жұмыс орны бойынша төлеу қағидатын енгізу жөнінде ұсыныстар жасалды. Бұл ауыл бюджеттерінің кіріс бөлігін нығайтуға мүмкіндік береді.Ауыл шаруашылығы өнімдерін өңдеу инфрақұрылымының дамуы — бизнес өсімінің маңызды шарты. Әкімдер шағын цехтар, сою пункттері мен қоймаларды өңірлік стандарттардың міндетті элементі ретінде енгізуді ұсынды.«Ауыл аманаты» жобасын іске асыру кезінде кепіл мәселесінің өзекті болып отырғаны айтылды. Қатысушылар «Даму» қоры арқылы кепілдік беру және тауарлық несие жүйесін енгізу бастамаларын қолдады. Сондай-ақ ауылдар мен кооперативтердің мамандануын нақты есепке алу қажеттілігі көтерілді.Әкімдік аппараттары қызметкерлерінің еңбекақысын арттыру және жаңа KPI әзірлеу мәселелері талқыланды. Бәсекеге қабілетті жалақы мен нақты көрсеткіштердің болмауы кадрларды тартуды қиындататыны атап өтілді. Осыған байланысты округтердің жеке даму бағдарламаларын жасап, әкімдіктердің нақты мүмкіндіктеріне сай KPI белгілеу ұсынылды.Пікірталас барысында жайылым тапшылығы, жер учаскелеріне қатысты ақпараттың қолжетімсіздігі, ауылдық аппараттарда мамандардың жетіспеушілігі сияқты мәселелер көтерілді. Жер және ветеринария мамандарының штаттық бірліктерін енгізу, сондай-ақ қатты тұрмыстық қалдықтар полигондарына арналған үлгілік жобаларды әзірлеу ұсынылды.Цифрландыру саласындағы кедергілер де айтылды. Мемлекеттік деректер базаларына қол жеткізудің шектеулілігі әлеуметтік-экономикалық мониторинг жүргізуді қиындатады және шалғай ауылдарда жедел жәрдем шақыруы мен кезбелік жануарларды ұстау жұмыстарының үйлесімділігіне әсер етеді.Барлық ұсыныстар жүйеленіп, тиісті мемлекеттік органдарға жолданатын болады. Алдағы уақытта ауыл әкімдері Мемлекет басшысының қатысуымен өтетін республикалық диалог алаңында өз бастамаларын таныстырады.Қазақстан Республикасы Президенті жанындағы Мемлекеттік басқару академиясының Алматы облысы бойынша филиалының директоры Қазыбек Дауталиев атап өтті: «Бүгінде ауыл басшылары кездесулерге шағыммен емес, идеямен келеді. Бұл – олардың кәсіби өсуінің және нәтижеге бағытталған жұмыстың көрсеткіші. Біздің міндет – осы қарқынға қолдау көрсетіп, тиімді жұмыс істеуге қажетті құралдармен қамтамасыз ету».Ақпарат көзі : https://www.gov.kz/memleket/entities/almobl/press/news/details/1108596?lang=kk

Алматы облысында көктемгі дала жұмыстарына 3 650 тонна , күзгі егін басындағы еңбекке 201 ауыл шаруашылығы тауар өндірушісінен 1 366,7 тонна дизель отынына өтінім қабылданып, шаруашылықтарға уақтылы жеткізілді. Бұл туралы облыстық ауылшаруашылығы басқармасы басшысының орынбасары Димаш Сыдықов баспасөз мәслихатында айтты.Дизель отыны аудандар бойынша нақты бөлініп, Райымбек ауданына 313,8 тонна, Жамбыл ауданына 193,6 тонна, Еңбекшіқазақ ауданына 162,3 тонна, Іле ауданына 186,5 тонна, Ұйғыр ауданына 37,8 тонна, Кеген ауданына 56,3 тонна, Қарасай ауданына 111,4 тонна, Талғар ауданына 120,9 тонна, Қонаев қаласына 159,1 тонна және Балқаш ауданына 25 тонна жөнелтілді.«2025 жылға облысқа 5 016,7 мың тонна дизель отыны жоспарланған. Сонымен қатар қосымша 3,0 мың тонна көлемінде сұраныс беріліп, ауыл шаруашылығы өндірушілерінен өтінім қабылдау жалғасып жатыр. Қазіргі таңда қосымша бөлінген көлемнің 43,3 тоннасы шаруашылықтарға жеткізілді», - дейді спикер. Ауыл шаруашылығы тауар өндірушілеріне ұсынылатын дизель отынының бағасы нарықтық деңгейден 26 пайыз төмен – литрі 250 теңге. Көктемгі және күзгі дала жұмыстарына арналған өтінімдерді қабылдау 1–30 желтоқсан аралығында жүргізіледі.Облыста ауыл шаруашылығы саласында техника паркін жаңарту бағытында да ауқымды жұмыстар атқарылып келеді. Биыл 490 бірлік жаңа техника сатып алу көзделген болса, қазіргі таңда 6,3 млрд теңгеге 391 бірлік техника алынған. Жоспардың 79,7 пайызға орындалған. Оның ішінде «ҚазАгроҚаржы» арқылы 4,5 млрд теңгеге 258 техника, ал шаруалардың өз қаражаты есебінен 1,8 млрд теңгеге 133 техника сатып алынды.Аталған шаралар өңірдің ауыл шаруашылығы тауар өндірушілерін қолдауға, маусымдық дала жұмыстарын уақытылы ұйымдастыруға және өнімділікті арттыруға елеулі ықпал етеді.Ақпарат көзі : https://www.gov.kz/memleket/entities/almobl/press/news/details/1108414?lang=kk

Ұйғыр ауданында жасөспірімдер арасында ВИЧ инфекциясы туралы ақпараттандыру деңгейін арттыру және салауатты өмір салтын насихаттау мақсатында ауқымды форум ұйымдастырылды. Іс-шара «ВИЧ-пен күрестегі қиындықтардан – тиімді өзгерістерге!» республикалық кампаниясы аясында өткізіліп, мамандар мен жасөспірімдер арасындағы ашық диалог алаңына айналды.Форумның басты мақсаты – оқушыларға ВИЧ инфекциясының жұғу жолдары мен алдын алу әдістері туралы дұрыс түсінік қалыптастыру, зиянды әдеттердің алдын алу және өз денсаулығына жауапкершілікпен қарау мәдениетін дамыту.Іс-шараны Ұйғыр аудандық орталық ауруханасының мамандары – білім беру саласы өкілдері, салауатты өмір салтын қалыптастыру бөлімінің қызметкерлері және жасөспірімдер денсаулық орталығының дәрігерлері ұйымдастырды. Сондай-ақ форумға Алматы облыстық ЖИТС-тің алдын алу және оған қарсы күрес орталығының мамандары қатысып, жасөспірімдермен ашық әңгіме құрып, өзекті сұрақтарға жауап берді.Форум бағдарламасына медицинаның әртүрлі бағыттары бойынша мамандардың баяндама-түсіндірулері енді. Олар психобелсенді заттардың зияны, зорлық-зомбылықтың алдын алу, салауатты өмір салты қағидаттары, сондай-ақ адам папилломасы вирусы және оның алдын алу тәсілдері туралы өзекті ақпарат ұсынды. Барлық ақпарат жасөспірімдердің денсаулыққа қатысты қауіптерді түсініп, олардан қорғану жолдарын меңгеруіне бағытталды.Форумға бес мектептің оқушылары, «Аяжан» медициналық колледжінің және Шонжы ауылындағы политехникалық колледждің студенттері барлығы 90 жас қатысты. Қатысушылар мұндай шаралардың ақпараттандыруды арттыруға, өзіне деген сенімді нығайтуға және денсаулыққа жауапкершілікпен қарау көзқарасын қалыптастыруға ықпал ететінін атап өтті.Іс-шара ұйымдастырушылары ВИЧ-тің алдын алу және салауатты өмір салтын насихаттау бағытындағы жұмыстардың жалғасатынын жеткізді. Алдағы уақытта оқу орындарында тұрақты кездесулер өткізу жоспарланып отыр. Бұл жастардың қамтылу аясын кеңейтіп, қоғамда денсаулыққа қамқорлық мәдениетін қалыптастыруға мүмкіндік береді.Ақпарат көзі : https://www.gov.kz/memleket/entities/almobl/press/news/details/1108186?lang=kk

Алматы облысының Іле ауданына қарасты Ақши ауылында ауыз суға қатысты туындаған күрделі мәселені шешу үшін жедел шаралар қабылданып жатыр. Жағдай облыс әкімі Марат Сұлтанғазиевтің тікелей бақылауында.Апаттың негізгі себебі — 1976 жылдары салынған «Бозой» топтық су құбырының толық тозуы. Соңғы күндері магистраль бірнеше жерде жарылып, ауылға су беру жиі үзілген. Тексеру барысында құбырдың 2 шақырымнан астам бөлігі жарамсыз деп танылып, бұл учаскелерді қалпына келтіру уақытша тоқтатылды.Ауыз су беру тоқтаған кезеңде Іле ауданы әкімдігі арнайы су таситын көліктерді жұмылдырып, тұрғындарды тәулік бойы ауыз сумен қамтамасыз етіп отыр.Мәселеге қатысты бірқатар ауыл тұрғындары облыс әкіміне әлеуметтік желі арқылы да жүгінген.Аппараттық кеңесте Марат Сұлтанғазиев мәселені шұғыл шешуді тапсырды. Жауапты басқармалар мен аудан әкімдігіне нақты міндет жүктеліп, төмендегі шаралар қолға алынды:• 18 қарашада ТЖД мен аудан әкімдігі апат орнын тексереді.Алматы облысының Төтенше жағдайлар департаменті мен Іле ауданының әкімдігі апат аймағын аралап, келтірілген шығынды нақтылайды.• 2,6 шақырымдық құбыр толық ауыстырылады.«Техногендік төтенше жағдай» режимі аясында шамамен 2,6 км су желісін қайта салу жоспарлануда. Қазіргі таңда жобалық-сметалық құжаттаманы жаңарту және жөндеу жұмыстарына қажетті қаржыны нақтылау жүріп жатыр. Құбырды толық ауыстыру Ақши ауылын ұзақ мерзім бойы тұрақты ауыз сумен қамтамасыз етуге мүмкіндік береді.18 қарашада Іле ауданының әкімі Қайыржан Жақсымбетов жағдай орнына барып, тұрғындармен кездесіп, түсіндіру жұмыстарын жүргізді. Әкімнің айтуынша, бір айдың ішінде барлық ақаулар қалпына келтіріліп, ауылға ауыз су қайта беріледі.Қазіргі уақытта елді мекенді сумен қамтамасыз ету үшін төрт су тасымалдау көлігі үздіксіз жұмыс істеп тұр.Ақпарат көзі : https://www.gov.kz/memleket/entities/almobl/press/news/details/1107733?lang=kk

Алматы облысында жастардың қауіпсіздігі мен салауатты дамуын қамтамасыз ету мақсатында «SAQTAN» жобасы жүзеге асырылуда. Жобаны облыстық жастар саясаты мәселелері басқармасының тапсырысы бойынша «Paryz еріктілері» жастар қоғамдық бірлестігі іске қосқан.Биылғы мамыр айынан басталған жоба алты негізгі бағытты қамтиды: ақпараттық-түсіндіру семинарлары, заңсыз есірткі жарнамаларына қарсы акциялар, түнгі рейдтер, спорттық іс-шаралар, әлеуметтік бейнероликтер және ақпараттық насихат жұмысы.«Кез келген жағдайда ақпараттық жұмыс алдыңғы шепте тұруы тиіс. Сондықтан біздің жұмыс тобы мен еріктілер бұл бағытта барын салды. Жоба шеңберінде тиісті мағлұматты жастарға сіңіру үшін 15 семинар өткізіп, 1200 жасқа құнды ақпарат бердік», — деді облыстық Жастар саясаты мәселелері жөніндегі басқарма басшысы Мади Ахметов.Жалпы, жоба алты бағыт бойынша жүзеге асырылуда.«Бірінші бағыт — ақпараттық-түсіндіру семинарлары. Проблемалық ахуалы бар елді мекендер мен колледждерде 11 семинар өткізіліп, 1100-ден астам жасқа тәуелділіктің түрлері, олардың психологиялық және әлеуметтік салдары, өмірлік дағдыларды дамыту және құқықтық сауаттылық жайлы нақты ақпарат берілді. Жастар мұндай кездесулердің қажеттілігін ерекше атап өтті», — дейді «Paryz еріктілері» жастар қоғамдық бірлестігінің төрағасы Әділет Айтқазы.Еріктілердің қатысуымен Қонаев қаласы мен бірнеше ауданда заңсыз есірткі жарнамаларына қарсы акциялар ұйымдастырылып, 1000-нан астам жарнама жойылды, 600 ақпараттық буклет таратылды. Бұл бастамаға жергілікті тұрғындар мен мектеп оқушылары да қатысып, қоғамның ортақ қауіпке біріге алатынын көрсетті.Облыстың 7 ауданы мен қаласында 10 түнгі рейд өткізіліп, жастардың құқық бұзушылыққа жол бермеуіне бағытталған түсіндіру жұмыстары жүргізілді. Сонымен қатар, 8 ауданның колледж студенттері арасында спартакиада ұйымдастырылып, футбол мен волейбол бойынша 1700-ге жуық студент қатысты. Финалдық кезеңде 300-ден астам жас өнер көрсетті.Әділет Айтқазының айтуынша, жоба аясында әлеуметтік бейнероликтер түсіріліп, TikTok, Instagram және YouTube желілерінде жарияланды. «Paryz еріктілері» парақшасында жарияланған 40 бейнеролик 190 мың қаралым жинап, жалпы жанама қамтылуы 395 мың адамға жетті.Бір сөзбен айтқанда, «SAQTAN» жобасы жастардың салауатты өмір салтын қалыптастыруға, зиянды әдеттерден аулақ болуына және қоғамда жауапкершілікті арттыруға нақты үлес қосып отыр.Ақпарат көзі : https://www.gov.kz/memleket/entities/almobl/press/news/details/1107736?lang=kk

Қонаев қаласында жуырда іске қосылған «Қапшағай Бидай Өнімдері» ЖШС-де өндірістік үдеріс біртіндеп қарқын алып жатыр.Кәсіпорын үш негізгі өнім түрін шығарады: өсімдік майы, құрама жем және ұн. Жаңа өндіріс ошағы қала тұрғындарын жұмыспен қамтуға да елеулі үлес қосуда.Басшылықтың айтуынша, алғашқы кезеңде білікті мамандар тапшылығы байқалған. Қазір бұл мәселе жүйелі түрде шешілуде.«Біз өңірдің түрлі ауылдарынан кәсіби мамандарды тартып, іріктеу жұмыстарын жүргіздік. Қызметкерлер үшін оқыту курстары ұйымдастырылды, жастарды дайындау қолға алынды. Бүгінде кәсіпорында 300-ден астам адам еңбек етеді», – деді кәсіпорын басшысының орынбасары Самат Бердикұлов.Комбикорм шығаратын негізгі учаскелердің бірін инженер Сергей Бедарев басқарады. Бұған дейін ол Қонаевтағы басқа зауытта жұмыс істеп, енді жаңа кәсіпорында өндіріс бөлімінің үйлесімді жұмысын қамтамасыз етеді.- «Менің мамандығым – инженер. Өндірісте дәлдік пен жауапкершілік бірінші орында. Әрбір кезең кәсіби көзқарас пен мұқият бақылауды талап етеді», – дейді ол.Оның жетекшілігіндегі учаскеде тәулігіне 1500 тоннаға дейін құрама жем өндіріледі. Ол өнім сапасын және технологиялық талаптардың орындалуын тұрақты қадағалап отырады.Айта кетейік, Мемлекет басшысы 2025 жылды Жұмысшы мамандықтар жылы деп жариялаған болатын. Бұл бастаманың негізгі мақсаты – еңбек адамының мәртебесін көтеру және техникалық мамандардың қоғамдағы рөлін арттыру. Қонаев қаласындағы жаңа кәсіпорын осы міндеттің нақты көрінісі болып отыр: мұнда жаңа жұмыс орындары ашылып, кәсіби шеберлердің еңбегі лайықты бағалануда.Ақпарат көзі : https://www.gov.kz/memleket/entities/almobl/press/news/details/1107646?lang=kk

Алматы облысының әкімдігі өңірдің барлық аумағын кешенді дамытуға ерекше көңіл бөлуде. Облыс құрамына тоғыз аудан кіреді — Балқаш, Еңбекшіқазақ, Іле, Жамбыл, Қарасай, Райымбек, Кеген, Ұйғыр және Талғар аудандары.Бүгінде солардың ішінде ең қарқынды дамып келе жатқан аудандардың бірі – Талғар ауданы. Мұнда заманауи инженерлік инфрақұрылымды қажет ететін жаңа әлеуметтік және коммерциялық нысандардың құрылысы мен қайта жаңғырту жұмыстары белсенді жүріп жатыр.2025 жылы 13 елді мекенді газдандыруға бағытталған құрылыс-монтаж жұмыстары жалғасуда. Жобаларды жүзеге асыруға 11 млрд теңге бөлінді: 250 млн теңге – республикалық бюджеттен, 8,5 млрд – жергілікті бюджеттен, 2,2 млрд – «Самұрық-Қазына» қорынан.Газдандыру Балқаш, Жамбыл, Қарасай, Ұйғыр аудандарында, Алатау және Қонаев қалаларында жүргізілуде. Үш жоба 2023 жылдан өтпелі.Талғар ауданында Кіші Байсерке және Еламан ауылдарындағы екі нысан толық аяқталды. Сонымен бірге инвесторлар Нұра, Өстемір, Туғанбай, Қаратұған, Достық және Жаналық ауылдарын қамтитын 10 елді мекенді газдандыру жобаларын іске асыруда. Барлық жұмыстар 2026 жылдың соңына дейін аяқталуы жоспарланған.2025 жылы электрмен қамтамасыз етудің 25 жобасына 6,7 млрд теңге бөлінді. Жұмыстар Іле, Жамбыл, Қарасай, Еңбекшіқазақ аудандарында, Алатау және Қонаев қалаларында жүргізілуде.Талғар ауданында Қызылқайрат, Нұра, Кіші Байсерке, Амангелді, Гүлдала және Кендала елді мекендерінде алты жоба толық аяқталды.398 км-ден астам электр желісі салынып, қайта жаңғыртылды, бұл 120 мыңнан астам тұрғынды тұрақты электрмен қамтамасыз етуге мүмкіндік берді. «Алатау Жарық Компаниясы» АҚ қосымша 1 185 км желіні және 871 трансформаторлық қосалқы станцияны жөндеп, инфрақұрылымның тозу деңгейін 72%-дан 66%-ға дейін төмендетті.2025 жылы 43 сумен жабдықтау жобасы (оның 30-ы – 2024 жылдан өтпелі) және кәріз жүйелерін салу бойынша 20 жоба іске асуда. Жалпы қаржыландыру көлемі – 28,9 млрд теңге. Қаражат республикалық және жергілікті бюджеттерден, «Самұрық-Қазына» қорынан және арнайы мемлекеттік қордан бөлінген.Сумен қамту желілерін салу және қайта жаңғырту бойынша жалпы құны 34 млрд теңгені құрайтын 18 жобалық-сметалық құжат (ПСД), ал кәріз желілері бойынша 1,4 млрд теңгеге екі ПСД әзірленді.Талғар ауданының Орман ауылын қоса алғанда, 11 блок-модульді су тазарту станциясын орнату жоспарланған.Жобалар іске асырылғаннан кейін 898 км инженерлік желі салынып, жаңғыртылады. Ауылдық елді мекендерде орталықтандырылған сумен қамту деңгейі 99,6%-ға жетеді деп күтілуде.Сонымен бірге Еламан ауылындағы және Талғар қаласындағы нысандарды қоса алғанда, алты проблемалық ұзаққа созылған құрылыс бар.Талғар ауданында 441 көпқабатты үй бар. 2018–2024 жылдары оларды жылумен қамту үшін 38 блок-модульді қазандық орнатылды. Бұл 177 үйді тұрақты жылумен қамтамасыз етті. Қазандықтарды «Талғар Жылу» МКК басқарады.2024 жылдан бастап 15 жаңа қазандық салу жобасы іске асырылуда. Биыл 1,7 млрд теңгеге тоғыз нысанның құрылысы аяқталып, 26 үй мен 1 630 тұрғын жылумен қамтамасыз етілді.Қазіргі уақытта Талғар қаласында үш қазандық бойынша жұмыстар жалғасуда. Бір жоба 2026 жылға қаржыландыруға ұсынылды, тағы екеуі мемлекеттік сараптамадан өтуде. Қарабулак ауылындағы блок-модульді газ қазандығы бойынша құжаттар қайта өңделіп, сараптамаға жіберілді. 2025 жылы Алматы облысында инженерлік инфрақұрылым – электр, газ, су және жылумен қамту салаларында ауқымды жұмыс жүргізілді.Барлық жобалар халықтың өмір сапасын жақсартуға, коммуналдық қызметтердің тұрақтылығы мен сенімділігін арттыруға, сондай-ақ инженерлік желілерді жаңғыртуға бағытталған.Ақпарат көзі : https://www.gov.kz/memleket/entities/almobl/press/news/details/1106948?lang=kk

Кездесу барысында тараптар екі министрліктің қызметі және құқық саласындағы негізгі жұмыс бағыттары туралы ақпарат алмасып, әріптестік мәселелерін талқылады.Мемлекеттік қызметтерді цифрландырудағы маңызды жетістіктерге, заң шығару процесіне цифрлық шешімдерді енгізу тетіктерін жетілдіруге, электрондық нотариат жүйесін одан әрі дамытуға, атқарушылық өндірісті цифрлық трансформациялауға, сондай-ақ авторлық сыйақыны төлеу процесін автоматтандыру заманауи шешімдеріне ерекше назар аударылды.Кездесу қорытындысы бойынша тараптар өткен диалогтың нәтижелілігін атап өтіп, конструктивті ынтымақтастық пен әріптестік өзара іс-қимылды одан әрі нығайтуға дайын екендерін білдірді.Ақпарат көзі : https://www.gov.kz/memleket/entities/adilet/press/news/details/1106799?lang=kk

2025 жылдың 14–15 қарашадағы ҚР Президенті Қасым-Жомарт Тоқаевтың Өзбекстанға мемлекеттік сапары аясында ҚР Әділет министрлігі мен Өзбекстан Республикасы Әділет министрлігі арасындағы ынтымақтастықты нығайту мақсатында 2026–2027 жылдарға арналған ынтымақтастық бағдарламасына қол қойылды.Аталған бағдарлама зияткерлік меншік саласында өзара әрекеттесуді, сот сараптамасын цифрландыру саласындағы зерттеу және тәжірибе алмасуды, сондай-ақ нотариат саласындағы цифрландыру мәселелерін және өзге де бағыттар бойынша ынтымақтастықты қамтиды.Осы екіжақты құжатқа қол қоюдан бұрын қалыптасқан ынтымақтастық негіздерін одан әрі нығайтуға және екі ведомство арасындағы әріптестікті кеңейтуге ықпал ететін маңызды қадам болмақ.Ақпарат көзі : https://www.gov.kz/memleket/entities/adilet/press/news/details/1106092?lang=kk

Жыл басынан бері облыс бойынша акцияға 800 мыңға жуық адам, 8 836 кәсіпорын мен ұйым қатысып, 4 мыңға жуық техника жұмыс істеген. 11 мың тоннадан астам қоқыс жиналған. Сондай-ақ 109,8 мың ағаш егіліп, 3 048 көпқабатты тұрғын үйдің ауласы, 55 саябақ пен сквер, 1090 тарихи-мәдени ескерткіш және 1055 әлеуметтік нысан тазартылған.– "«Таза Қазақстан» республикалық экологиялық акциясы аясындағы іс-шаралар жоспарға сәйкес орындалуда. Онлайн-платформа арқылы да жұмыс жүргізілуде. Бүгінгі күнге дейін Telegram-ботқа 1123 өтініш келіп түсті, оның 880-і орындалды, 233-і кері қайтарылды, ал 10-ы орындалу үстінде. Бүгін осы жылғы соңғы сенбілікті өткіздік. Ауа райының қолайсыздығына бойланысты акция аясындағы жұмыстарды келесі жылы жалғастыратын боламыз", – деді облыстық тұрғын үй-коммуналдық шаруашылық және абаттандыру басқармасының көгалдандыру және абаттандыру бөлімі басшысы Бекзат Кәрімов.– "Бүгін әріптестерімізбен «Таза Қазақстан» экологиялық акциясы барысында өткізіліп жатқан сенбілікке қатыстық. Мұндай шаралардан қалыс қалған емеспіз. Еліміздің таза болуына әрбір азамат үлесін қосуы керек", – деді шараға қатысқан Ермек Ибрагимов.Ақпарат көзі : https://www.gov.kz/memleket/entities/almobl/press/news/details/1106078?lang=kk

Қасым-Жомарт Тоқаев жаңадан құрылатын Жұмыс тобынан барлық аспектіні мұқият зерделеп, өзара тиімді ынтымақтастықты жолға қоюға қатысты ұсыныс беруді сұрады.Сонымен қатар Мемлекет басшысы көлік-транзит саласындағы ықпалдастықты кеңейтудің стратегиялық сипатына тоқталды. Атап айтқанда, тарифтерді оңтайландыру, әкімшілік кедергілерді азайту шаралары қабылданып, шекара маңы инфрақұрылымын дамыту және өткізу бекеттерін жаңғырту жұмыстары қолға алынды.Қасым-Жомарт Тоқаев екі ел үкіметтері логистикалық тізбектің барлық қатысушысына оңтайлы жағдай туғызып, инфрақұрылымдық, нормативтік және институционалдық міндеттерді шешуі қажет деп санайды.Бұдан бөлек, Мемлекет басшысы Транскаспий халықаралық көлік бағдарын, Солтүстік – Оңтүстік дәлізін, сондай-ақ Ауғанстан арқылы теміржол бағытын дамыту аясындағы тиімді ықпалдастықты жалғастыру өзекті екенін айтты.Қасым-Жомарт Тоқаев өзбек тарапын Транскаспий халықаралық көлік бағытын бірге өркендету үшін Ақтау және Құрық порттары бойынша серіктестік құрып, логистикалық жобаларды жүзеге асыруға шақырды.Қазақстан Президенті су-энергетика саласындағы конструктивті ынтымақтастық аса маңызды екенін жеткізді. Өйткені трансшекаралық өзендердің су ресурсын рационалды пайдалану – екі елдің тұрақты прогресіне ықпал ететін басты факторлардың бірі.Бұл орайда Қасым-Жомарт Тоқаев Қазақстан мен Өзбекстан үкіметтеріне су шаруашылығы саясатындағы тәсілдерді үйлестіру үшін жүйелі шаралар әзірлеуді ұсынды.

Алматы облысында жастардың жоғары білімге қолжетімділігі артып келеді. Биыл мектеп бітірген 17 940 түлектің жартысына жуығы – 7 681 жас мемлекеттік грант есебінен жоғары оқу орындарына қабылданған. Бұл көрсеткіш соңғы жылдары өңірдің білімге басымдық беріп отырғанын айғақтайды.Грант иегерлерінің ең көп саны Талғар ауданында тіркелді. Сондай-ақ Іле, Еңбекшіқазақ, Қарасай аудандары мен Қонаев қаласы да жоғары нәтижелер көрсеткен.Сала мамандарының айтуынша, биыл педагогикалық бағыт ең танымал мамандықтардың бірі болған – 1 440 түлек осы саланы таңдаған. Одан кейін 770 жас медициналық мамандықтарға, 543-і аграрлық бағытқа құжат тапсырған. Қалған 4 928 түлек инженерия, IT және әлеуметтік-экономикалық мамандықтарды таңдаған.Өңір үшін биылғы маңызды жаңалықтардың бірі – 27 түлектің Қытай Халық Республикасындағы Синьцзян университетінен тегін білім алуға грант иеленуі. Шетелге аттанған жастар Талғар, Іле, Қонаев, Еңбекшіқазақ, Қарасай, Жамбыл аудандары мен Алматы қаласынан. Бұл – Алматы облысы мен Қытай арасындағы ынтымақтастық нәтижесінде жүзеге асып жатқан халықаралық білім беру бағдарламасының бір бөлігі.Шетелде білім алып жүрген студенттердің өзі бұл мүмкіндікті үлкен қолдау деп бағалайды.«Алматы облысы әкімдігі берген гранттың арқасында Қытайда оқуға мүмкіндік алдым. Бұл – сапалы білім алып, елге келіп өзім таңдаған мамандық бойынша қызмет етуге ашылған жол», – дейді Синьцзян университетінің студенті Нұрәли Қыдырхан.Синьцзян медициналық университетінде оқып жүрген Қарақат Тұрғынбай да жағдайдың жақсы екенін айтады.«Бөлмеде екі студент тұрамыз, оқу базасы өте мықты. Түрлі елден келген жастармен танысып, тәжірибе алмасып жүрміз. Бұл болашақта білікті маман болуға үлкен ықпал етеді», – дейді ол.Синьцзян қаржы және экономика университетінің студенті Аяулым Арыстанбекова халықаралық білім берудің жаңа мүмкіндіктер ашатынын атап өтті.«Әлемдік деңгейдегі университетте оқу – үлкен мәртебе. Алматы облысы мен Қытай арасындағы келісімдердің нәтижесінде көптеген студент тегін оқып жатыр. Бұл біліммен елге оралып, Отанға қызмет етуге ниеттіміз», – дейді ол.Сонымен қатар, облыс әкімінің жергілікті бюджет есебінен бөлінген 30 гранты да биыл талапкерлерге қолжетімді болды. Оның 17-сі медицина саласына (оның ішінде 12 – интернатура), 7 грант аграрлық бағытқа, 6 грант педагогикалық мамандықтарға берілген.Өңір билігінің айтуынша, бұл гранттар Алматы облысының кадрлық әлеуетін арттыруға, ауылдық өңірлерге білікті ұстаздар мен дәрігерлерді тартуға және жастардың жоғары білімге қолжетімділігін кеңейтуге бағытталған.Ақпарат көзі : https://www.gov.kz/memleket/entities/almobl/press/news/details/1105833?lang=kk

Бүгін Алматы облысында 42 шақырымдық «Ұзынағаш – Отар» жолының ашылуы өтті. Аталған жолдың іске қосылуымен магистралді жаңарту толығымен аяқталды. Енді Алматыдан Шымкентке дейінгі жол толық төрт жолақты болып, жүріп-тұру әлдеқайда ыңғайлы болмақ.Ашылу салтанатына ҚР Көлік вице-министрі Мақсат Қалиақпаров, Алматы облысы әкімінің орынбасары Рустам Исатаев және өңір ақсақалдары қатысты. Рәсімде қозғалысты бастау батырмасы басылып, жаңа жол арқылы алғашқы болып 15 көліктен тұратын автоколонна жүріп өтті.Биыл біз ел бойынша 13 мың шақырым жолда жөндеу және қайта жаңарту жұмыстарын жүргізу арқылы рекордтық нәтижеге қол жеткіздік. Бұл – Мемлекет басшысының қолдауы мен жол саласының қызметкерлерінің күнделікті атқарып жүрген ерен еңбегінің арқасы. Олар азаматтар үшін қауіпсіз, әрі ыңғайлы жолдар салып, өңірлердің дамуына жаңа мүмкіндіктер ашуда», – деді іс-шара барысында Көлік вице-министрі Мақсат Қалиақпаров.Сонымен қатар жолды ашу салтанатының аясында жобаны іске асыруға ерекше үлес қосқан жұмысшылар марапатталды. Оларға ведомстволық медальдар, Алғыс хаттар және Көлік министрлігінің Құрмет грамоталары табысталды.Айта кетейік, бүгін ашылған «Ұзынағаш – Отар» күре жолында негізгі құрылыс-монтаж жұмыстары өткен жылы басталып, небәрі екі жылда толық аяқталды. Жобаға 163 бірлік техника, 290 маман жұмылдырылып, екі асфальт-бетон зауыты мен төрт жол-құрылыс басқармасы жұмыс істеді.42 шақырымдық «Ұзынағаш – Отар» тасжолының ашылуымен Алматы мен Шымкент арасындағы жол толық төрт жолақты болып, жүріп-тұру әлдеқайда ыңғайлы, әрі қауіпсіз болмақ. Бұл магистральдің өткізу қабілетін арттырып, жол жүру уақытын қысқартады, қозғалыс қауіпсіздігін жақсартады және өңірлер арасындағы көлік байланыстарын нығайтып, Орталық Азия мемлекеттерімен экономикалық қатынастарды одан әрі күшейтері сөзсіз.Ақпарат көзі : https://www.gov.kz/memleket/entities/almobl/press/news/details/1105785?lang=kk

Алматы облысында қазақ тілі мен әдебиеті пәні мұғалімдерінің облыстық Тіл форумы өтті. Шараға өңірдің білім беру ұйымдары мен тіл оқыту орталықтарынан 150-ге жуық маман қатысты. Форум барысында педагогтер кәсіби біліктілікті арттыру, оқыту әдістемесін жетілдіру және цифрлық технологияларды тиімді пайдалану мәселелерін талқылады.Форум екі бөлімнен тұрды: TEDx форматына негізделген пленарлық жиын және тәжірибе алмасуға арналған секциялық сабақтар. Жиынның негізгі мақсаты – қазақ тілін оқыту сапасын арттыру, оқушылардың оқу және тілдік сауаттылығын дамыту, педагогтердің шығармашылық әлеуетін күшейту.Қатысушылар форумның мұғалімдерге жаңа әдістемелерді меңгеруге, озық тәжірибелермен бөлісуге және инновациялық тәсілдерді сабақ үдерісіне енгізуге мүмкіндік беретінін атап өтті.Қазақ тілі мен әдебиеті пәнінің мұғалімі Дарья Ерболатқызы функционалдық сауаттылық пен жасанды интеллектті қолдану мәселелерінің өзектілігін айтты:«Мен функционалдық сауаттылық секциясында спикер ретінде қатыстым. Әр мектептің тәжірибесін талдау, ЖИ-пен жұмыс жүргізу — қазіргі таңда өте маңызды тақырыптар», – деді ол.Бұл Тіл форумының Алматы облысында екінші мәрте ұйымдастырылуы. Биыл форумға 150-ден аса педагог қатысты.Алматы облысы Тілдерді дамыту басқармасының басшысы Салтанат Беспаева мұғалімдерге әдістемелік қолдаудың маңызын атап өтті:«Қазақ тілі мен әдебиеті пәні мұғалімдері заман талабына сай білім беруі қажет. Біз өз тарапымыздан жан-жақты әдістемелік көмек көрсетуге дайынбыз. Форумның басты мақсаты — қазақ тілінің тазалығын сақтап, оқыту сапасын арттыру», – деді ол.Халықаралық «Qazaq Tili» қоғамының президенті Рауан Кенжеханұлы білім саласындағы тіл оқытудың сапасы жалпы тіл саясатына әсер ететінін атап өтті:«Егер білім беру жүйесінде тіл оқыту ісі дұрыс жолға қойылса, түлектер қазақша сауатты сөйлеп, әдемі жаза алады. Бұл өз кезегінде тілдің басқа салаларда да кеңінен қолданылуына жол ашады», – деді ол.Шара барысында қазақ тілін дамытуға үлес қосқан ғалымдар мен тіл жанашырлары марапатталды. Ұйымдастырушылар Тіл форумын жыл сайын өткізіп, мемлекеттік тілді оқыту сапасын одан әрі арттыруды жоспарлап отыр.Ақпарат көзі : https://www.gov.kz/memleket/entities/almobl/press/news/details/1105705?lang=kk

Өңірдегі 373 елді мекеннің 355-і кең жолақты интернетпен қамтылса, соның 352-і мобильді интернетті емін – еркін қолдана алады. Бұл туралы баспасөз мәслихатында Облыстық цифрлық технологиялар басқармасының басшысы Жандос Ақыл айтты. Ауылды жерлер енді интернеттен таршылық көрмейді.Жыл басынан бері облыстағы бірқатар ауылдар мобильді интернетпен қамтылды. Бұл қатарда, Еңбекшіқазақ ауданының Көкпек, Ұйғыр ауданының Рахат, Балқаш ауданының Қоскүмбез, Кеген ауданының Ақай Нүсіпбеков ауылдары бар. Аталған жұмыстар мұнымен тұралап қалмайды. Жыл соңына дейін Қарасай ауданының Көктөбе ауылында 4G іске қосылып, Кеген ауданының Талды ауылында интернет жылдамдығы арта түспек.- «Қолжетімді интернет» жобасы бойынша OneWeb спутнигі Қарасай ауданының Айқым, Кұрқұдық, Жыңғылды, Кеген ауданының Жіңішке, Балқаш ауданының Қасқаөгіз ауылдарына орнатылды. Жыл соңына дейін Жамбыл ауданының Қарабастау, сондай-ақ Қарасай ауданының Көктөбе ауылдары қосылады,-дейді спикер.Ендігіде үйлер мен мемлекетітк мекемелер былай тұрсын, қоғамдық орындарда да тегін Wi-Fi-ға қосылуға мүмкіндік болады.Ғаламторды кедергісіз қолдануға қолайлы жағдай жасалған соң да аймақта жасанды интелекттіні дамытуға басымдық берілуде. Қазіргі таңда 9 425 бейнабақылау камерасы ЖИ арқылы жұмыс істеп тұр. Олар тұлғаларды тану, қалдырылған қауіпті заттарды анықтау, сондай-ақ адамдардың шоғырлануын анықтау сияқты функционалмен қамтылған.Бүгінгі күні облыста республика бойынша алғашқы жасанды интеллект жүйесі – Qonaev AI пилоттық режимде іске қосылған. Жаңа жүйе әкімдіктер мен басқармалардың деректерін біріктіріп, тиісті шешімдер ұсынады.Айта кетейік, өңірдің цифрлық трансформация картасы әзірленген еді. Қазіргі уақытта бұл стратегиялық құжат Қазақстан Республикасының Жасанды интеллект және цифрлық даму министрлігінде қаралуда.Ақпарат көзі : https://www.gov.kz/memleket/entities/almobl/press/news/details/1104930?lang=kk

Еңбекшіқазақ ауданында биылғы жылдың соңына дейін «Келешек мектебі» мемлекеттік бағдарламасы аясында екі жаңа мектеп пайдалануға берілмек.Бүгінде Сатай ауылында 900 орындық және Ащысай ауылында 600 орындық мектептердің құрылыс жұмыстары аяқталу сатысында. Негізгі құрылыс кезеңдері толық орындалып, қазір нысандардың ішкі әрлеу жұмыстары мен аумақты абаттандыру жүргізілуде.Мектептерді пайдалануға беру биылғы жылдың соңына жоспарланған. Жаңа оқу орындары іске қосылған соң, оқушылар үшін үшінші тоқсаннан бастап заманауи әрі қолайлы жағдайда білім алу мүмкіндігі жасалады деп күтілуде.Айта кетейік, 2025 жылдың басынан бері «Келешек мектебі» бағдарламасы аясында ауданда екі мектеп салылып, пайдалануға берілген болатын. Бұл өз кезегінде ауданның білім беру инфрақұрылымын айтарлықтай жақсартып, үш ауысымда оқитын оқушылар санын азайтуға мүмкіндік берді.Ақпарат көзі : https://www.gov.kz/memleket/entities/almobl/press/news/details/1104945?lang=kk

Құс еті өндірісі бойынша республикада – 1-орын, сиыр еті мен жұмыртқа өндірісі бойынша – 2-орын, ал сүт өндіру көрсеткіші бойынша Алматы облысы елімізде 3-орында тұр.2025 жылдың  10 айының қорытындысы бойынша Алматы облысында мал шаруашылығы саласында тұрақты өсім сақталып отыр. Өңірде шаруашылықтарда сойылған және тірідей салмақта өткізілген мал мен құстың жалпы еті 218 мың тоннаны құрады. Бұл көрсеткіш өткен жылдың осы кезеңімен салыстырғанда 2,1%-ға жоғары.Республикалық жалпы көлемдегі облыстың үлесі 14%, бұл Алматы облысына ел бойынша бірінші орынды қамтамасыз етті.Соның ішінде:• Құс еті өндірісі – 113 мың тонна (республикалық көлемнің шамамен 30%-ы);• Сиыр еті өндірісі – 67 мың тонна, бұл көрсеткіш бойынша облыс Қазақстанда екінші орында.Сиыр сүтінің жалпы сауымы 265 мың тоннаны құрады. Өсім көлемі – 5,2%.Бұл көрсеткіш Алматы облысына сүт өндіру бойынша елдің үздік үш өңірінің қатарына енуге мүмкіндік берді.Өңірде 412 миллион дана тауық жұмыртқасы өндірілді. Бұл да облыстың елдегі ТОП-3 өңірдің қатарында екенін көрсетеді.«Бүгінде Алматы облысында мал шаруашылығын қолдау мен дамытуға ерекше көңіл бөлінуде. Нәтижесінде ет, сүт және жұмыртқа өндіру көлемі жыл сайын артып келеді. Бұл – ауыл еңбеккерлерінің тынымсыз еңбегі мен мемлекет тарапынан көрсетіліп жатқан жүйелі қолдаудың жемісі. Алдағы уақытта да өндіріс көлемін ұлғайту, заманауи технологияларды енгізу және өнім сапасын арттыру бағытындағы жұмыстар жалғасады», – Алматы облысының Ауыл шаруашылығы басқармасының мал шаруашылығы бөлімінің бас маманы Олжас Молдатаев.Жалпы алғанда, оң көрсеткіштер мал шаруашылығының тұрақты дамуын және Алматы облысының ішкі азық-түлік қауіпсіздігін қамтамасыз етудегі маңызды үлесін айғақтайды.Ақпарат көзі : https://www.gov.kz/memleket/entities/almobl/press/news/details/1104888?lang=kk

Түркияда Алматы облысы әкімінің кеңесшісі Самат Ахилбеков Nata Holding компаниясының директорлар кеңесінің төрағасы және негізін қалаушысы Намық Таникпен кездесті. Кездесуде жаңа қала салу және өңір инфрақұрылымын дамыту мәселелері талқыланды.Намық Таник ынтымақтастыққа қызығушылық білдіріп, Алматы облысына келіп, инвестициялық мүмкіндіктермен танысуға ниетті екенін жеткізді.«Қазақстан – зор әлеуеті бар ел, ал Алматы облысы ерекше маңызға ие. Біз өңірге келіп, заманауи қала құрылысына үлес қосуға дайынбыз», — деді Намық Таник.Кездесу барысында облыс делегациясы құрылыс, туризм және логистика салаларындағы жобаларды және мемлекеттік-жекеменшік әріптестік тетіктерін таныстырды.Nata Holding — Түркияның жетекші девелоперлік компанияларының бірі, VEGA брендімен жүзеге асырылған Vega AVM İstanbul (190 мың ш.м.) сияқты жобаларымен танымал. Компаниямен әріптестік өңірдің инфрақұрылымын дамытуға және халықаралық сапа стандарттарын енгізуге мүмкіндік береді.Ақпарат көзі : https://www.gov.kz/memleket/entities/almobl/press/news/details/1104169?lang=kk