Әлемге әйгілі Франкфурт кітап жәрмеңкесінің өкілдері алматылық кітапханалармен, баспалармен және жазушылармен ынтымақтастық орнатуға қызығушылық танытты.Алматы қаласының әкімі Ерболат Досаев Frankfurter Buchmesse президенті және атқарушы директоры Юрген Боосты қабылдады.Кездесу барысында Франкфурт тарапы Алматының көпұлтты қала ретіндегі бірегейлігін атап өтіп, ұзақ мерзімді әріптестік қарым-қатынас орнатуға ниет білдірді. Өз кезегінде Ерболат Досаев әкімдік тарапынан кітапханаларды жаңғыртуға және заманауи қоғамдық кеңістіктер құруға ерекше көңіл бөлінетінін айтты. Сондай-ақ Алматы қаласының кітапханаларында табысты енгізілген инновациялық және креативті шешімдер туралы баяндады.«Электронды кітаптарды пайдалану үрдісінің артуына қарамастан, баспа кітаптарын оқу сезімін, қағаз беттерін ұстап көру әсерін ештеңе алмастыра алмайтынына сенімдімін. Кітапханалардың белсенділігінен біздің тұрғындарымыздың кітапты өте жақсы көретінін байқаймыз, біз бұл бағытта белсенді жұмыс істеп жатырмыз. Бүгінде қаламыздағы кітапханалардың 95%-ы жаңғыртылды. Біз барлық ауданда заманауи кітапханалар ашып, халық көп жиналатын жерлерде – сауда және ойын-сауық орталықтарында, комьюнити орталықтарында және басқа орындарда автономды кітапханалар орнатып жатырмыз. Сонымен қатар, жазушылар мен заманауи авторларды қолдаймыз», – деді Алматы әкімі Ерболат Досаев.Франкфурт кітап жәрмеңкесінің президенті және атқарушы директоры Юрген Боос Алматыда жергілікті авторлар мен баспаларға арналған семинарлар өткізуге, сондай-ақ ауқымды кітап іс-шараларын ұйымдастыруда кеңес беруге дайын екенін білдірді.«Біз Қазақстанға арнайы келдік. Алматымен байланыс жасап, ынтымақтастық орнату біз үшін маңызды. Біз тек жәрмеңкелер өткізумен шектелмей, баспа ісін де дамытамыз. Мен баспа саласы үлкен өзгерістерді қажет етеді деп санаймын және осы салада тәжірибе алмасуға дайынбыз. Бұған дейін біз Мексикада, Оңтүстік Африка Республикасында және БАӘ-де өткен кітап жәрмеңкелерінің ұйымдастырушыларын кеңес беріп қолдадық. Яғни, бұл салада мол тәжірибеміз бар. Сондай-ақ, Қазақстанды Франкфурт кітап жәрмеңкесінің құрметті қонағы болуға шақырғымыз келеді», – деді Юрген Боос.Кездесу соңында тараптар 2025 жылы Алматыда бірлескен жобаларды дамыту және мәдени-іскерлік байланыстарды нығайту туралы уағдаласты. Ақпарат көзі : https://www.gov.kz/memleket/entities/almaty/press/news/details/885352

Облыс әкімі Асхат Шахаровтың төрағалығымен өткен аппараттық жиында өңірдің азық-түлік қауіпсіздігін нығайту мәселесі қаралды.Ақтөбе облыстық ауыл шаруашылығы басқармасының басшысы Құсайын Сәрсембай ішкі нарықта тауарлардың қауіпсіздігін қамтамасыз ету және сапасын арттыруға қатысты қабылданып жатқан шаралар туралы мәлімдеді.Оның айтуынша, бүгінгі таңда Ақтөбе облысы азық-түліктің 32 түрінен 26 негізгі азық-түлік өнімі бойынша өзін-өзі қамтамасыз етеді. Бұл – ұн, нан, макарон, сиыр еті, қой еті, жылқы еті, қияр, қызанақ, ашытылған сүт өнімдері, өсімдік майы және т.б. Қалған 6 түрі – қарақұмық, күріш, қант, тұз, бұрыш, балық басқа аймақтардан жеткізіледі және ішінара импортталады.Бүгінгі таңда тұрақтандыру қорына 26 тонна қарақұмық жармасы, 594 тонна қант, 7 880 тонна бірінші сұрыпты ұн және 37 тонна күріш салынды.«Биылғы егіннен 61,8 мың тонна картоп, 43,4 мың тонна көкөніс, 40,0 мың тонна майлы дақылдар жиналды. Бұдан басқа, 2024 жылғы күзгі егіннен бастап желтоқсаннан сәуірге дейінгі маусымаралық кезеңде жергілікті тауар өндірушілермен «Пригородный» ЖШС, «Болат ЛТД» ЖШС, «Арман» ШҚ 4846 тонна картоп, 390 тонна сәбіз, 400 тонна пияз, 448 тонна қырыққабат жеткізуге шарттар жасалды. Бұл көлемдер көрсетілген кезеңге жеткілікті», - деді Құсайын Сәрсембай.Сонымен қатар, облыста қызанақ пен қияр өсірілетін 40 жылыжай жұмыс істейді. Биыл жылыжайларда 17,5 мың тонна қызанақ және 0,7 мың тонна қияр өсірілді. Жылыжай өнімдері облыстың базарлары мен дүкендеріне түседі.Жыл басынан бері 569 ауылшаруашылық жәрмеңкесі өткізіліп, онда тұрғындар жаңа өнімдерді нарық құнынан 10-15% төмен бағамен сатып алды.Жалпы, әлеуметтік маңызы бар азық-түлік тауарларының бағасын тұрақтандыру үшін жергілікті бюджеттен кәсіпкерлік субъектілеріне өңірге қажетті азық-түлікті жеткізуге кредиттер беруге 3764,3 млн. теңге бөлінді. Сондай-ақ, жергілікті жеткізушілер және өндірушілермен азық-түлік жеткізуге келісімшарттар жасалады. Бүгінгі таңда әлеуметтік маңызы бар азық-түлік тауарлары сауда желілеріне, дүкендерге және коммуналдық базарларға белгіленген бағамен жеткізілуде.Облыс әкімі Асхат Шахаров өңір көлемінде өткізіліп жатқан жәрмеңкелерде халық қарасы көп екенін, оны ұйымдастыру өз тиімділігін көрсеткенін және тоқтатпау қажеттігін алға тартты. Сондай-ақ, әлеуметтік маңызы бар азық-түлік өнімдерінің негізсіз өсуіне жол бермеу үшін олардың бағасына мониторингті күшейтуді тапсырды.Ақпарат көзі : https://www.gov.kz/memleket/entities/aktobe/press/news/details/885336

Шемонаиха ауданында 300 орынға шақталған жаңа мектептің құрылысы аяқталды.Бүгін білім ордасының техникалық ашылуы өтіп, құрылыс жұмыстарының барысымен облыс әкімі Ермек Көшербаев арнайы келіп танысты.– Мектеп керемет, сөз жоқ. Бірақ оның тиісті білім деңгейі де болуы керек. Ол жағы сіздердің қолдарыңызда, құрметті ұстаздар. Әрине, елімізде «Жайлы мектеп» жобасын бастаған Мемлекет басшысына зор алғыс айтамыз. Көріп отырғандарыңыздай, мұнда балаларға сапалы білім беру үшін барлық жағдай жасалыпты. Құрылыс жұмыстары абыроймен атқарылды, – деп атап өтті өңір басшысы.Жаңа мектеп Путейская көшесі, 16/1 мекенжайында орналасқан, оның жалпы ауданы – 5513,5 шаршы метр. Жобалау және салу жұмыстары «Samruk-Kazyna Construction» АҚ басшылығымен жүргізілген. Бас мердігер міндетін «Фирма Азия» ЖШС атқарған, ал техникалық және авторлық қадағалауды «Восток Инжиниринг» ЖШС және «БК «OST-проект» ЖШС жүзеге асырыпты.Мектеп директоры Назигүл Тотекинаның айтуынша, білім беру мекемесінде 1-11 сынып аралығындағы 335 оқушы, сондай-ақ мектепалды даярлық тобында 15 бала оқиды.– Біз барлық қажетті рәсімді жылдам аяқтаймыз деп үміттенеміз. Бұйырса, үшінші тоқсаннан бастап оқушыларымыз жаңа мектепте білім алатын болады, – дейді мектеп директоры.Облыстық білім басқармасының басшысы Иннеса Чернышева бұл мектеп 90 жыл бұрын салынған ескі ғимараттың орнында бой көтергенін айтты. Ыңғайлы мектеп заманауи кабинеттермен, қажетті техникамен жабдықталған және мүмкіндігі шектеулі жандарға толықтай бейімделген.Айта кетейік, қазір Шемонаиха қаласында төрт мектеп бар болса, оның бірі – осы білім ордасы. Алдағы уақытта №4 мектептің оқушылары мен педагогикалық құрамы жаңа ғимаратқа көшеді. Бұл, әсіресе, балаларын әбден ескірген мектепке беруге мәжбүр болған Теміржол ауданында тұратын ата-аналар үшін қуанышты жаңалық болғаны сөзсіз.Иә, Шемонаиха тұрғындары Шәкәрім атындағы №4 мектептің ашылуын асыға күтеді.– Мұндай мектептер ойластырылған мемлекеттік саясаттың нәтижесі деп түсіну керек. Аталмыш мектептерде балаларға жайлы жағдай жасалып қана қоймай, олардың жан-жақты дамуына да жол ашылады, – деп түйіндеді Ермек Көшербаев.Ақпарат көзі : https://www.gov.kz/memleket/entities/akimvko/press/news/details/885355

Қарағанды облысы ТЖД Өрт сөндіру және авариялық–құтқару жұмыстары қызметі №28 өрт сөндіру бекетінің қызметкері Роман Герасименко 85 кг салмақ дәрежесінде күміс медаль жеңіп алып, 15-18 қараша аралығында Қытайдың шығысындағы Хайнинг қаласында өткен гір спорты бойынша әлем кубогының вице-чемпионы атағына ие болды. Бұл жетістік гір көтеруден Қазақстан Республикасының спорт шебері Романның спорттық мансабындағы кезекті жетістігі болды.Спортшымызды лайықты медальмен құттықтаймыз және спорт ареналарында жаңа жеңістер тілейміз! Ақпарат көзі : https://www.gov.kz/memleket/entities/emer/press/news/details/885314

Елордадағы Beeline Arena спорт кешенінде 23-24 қараша күндері пара дзюдодан Grand Prix жарысы өтеді, деп хабарлайды қала әкімдігінің ресми сайты.Қазақстан ұлттық құрамасының пара дзюдошылары Париж Паралимпиадасында жоғары нәтижеге қол жеткізіп, 1 алтын, 1 күміс және 3 қола жүлде жеңіп алған. Енді санаулы айдан кейін қазақстандық спортшылар өз жанкүйерлерінің алдында шеберліктерін көрсетпек.Турнир барысында 10 салмақ дәрежесінде жүлделер сарапқа салынады. Жарыстың басты ерекшелігі – жаңа Олимпиада цикліне байланысты салмақ дәрежелерінің өзгеруі. Ерлер енді 70, 81, 95 және +95 келіде, ал әйелдер 52, 60, 70 және +70 келіде жүлде үшін күреседі. Сонымен қатар, Халықаралық дзюдо федерациясы тәжірибе ретінде Олимпиада бағдарламасына кірмейтін екі салмақта (ерлер – 64 келі, әйелдер – 46 келі) жүлделер үлестірмек.Бұл айтулы додаға 15 мемлекеттен 100-ге жуық спортшы қатысады. Қазақстан намысын Астана қаласының үш параспортшысы J1 санатында қорғайтын болады. Олар:Асылан Нұрдаулетов (73 кг);Бауыржан Арыстанбеков (90 кг);Ерболат Бекентаев (90 кг).Жарыстың ашылу салтанаты 23 қараша күні Beeline Arena спорт кешенінде сағат 15:00-де өтеді. Ал жарыстар күн сайын сағат 10:00-де басталады. Ақпарат көзі : https://www.gov.kz/memleket/entities/astana/press/news/details/885189

Әлеуметтік қызметтер үйі ғимаратында Алматыда үй кезегінде тұрған 124 азаматқа жалға берілетін пәтер кілті табысталды, деп хабарлайды aqshamnews.kzБаспаналы болу бақытына ие болғандар қатарында жетім балалар, І, ІІ топ мүгедектері, толық емес және көпбалалы отбасы мүшелері, зейнеткерлер мен мүгедек балаларды тәрбиелеп отырған ата-аналар бар. Алматы қаласының Коммуналдық инфрақұрылымды дамыту басқармасы басшысының орынбасары Ғалымжан Әбдішүкірұлы жүректері лүпілдеп, пәтер кілтін алуға келген тұрғындарды құттықтап, үйді пайдалану бойынша техникалық қызметке қатысты ережені егжей-тегжейлі түсіндіріп берді. Ол сондай-ақ, берілетін пәтерлердің жай-күйіне тоқталды."Қазір тұрғындар келісімшартқа қол қойғаннан кейін, үйлерінің кілтін алады. Берілетін пәтерлер дайын тұр. Онда жылу, ыстық-суық су, жарық бәрі қосылған. Кіре беруге яғни, қоныстануға болады. Бірақ, тұрғындар уақытша электр плиталарын қолдануға тура келеді. Ал газ пәтер иелеріне 100% қоныстанған соң беріледі", - деді Ғалымжан Әбдішүкірұлы."Бір сағат ерте келіп алдым. 9:00-ден бастап осында отырмын. Көп балалы ана ретінде 2005 жылдан бері пәтер кезегінде тұрдым. Осы үйді күткеніме 15 жыл болды. Міне, 74 жасқа келгенде маған осындай баспана бақыты бұйырыпты. Қуанышымда шек жоқ. Әлі сене алар емеспін. Барлығыңа рахмет", – дейді алматылық Айнагүл Еркешова.Пәтер кілтін алуға келген тұрғындардың арасында өзінің эмоциясын жасыра алмай, ерекше сезіммен әңгіме айтып отырған жас келіншекке жақындадық. Өзін Салтанат деп таныстырған жас ана бұл пәтерді 2014 жылдан бері күтіп жүр екен. "Бұл пәтерді күткенімізге 10 жыл болыпты. Енді біздің өзіміздің ас бөлмеміз, өзіміздің кір жуатын машинамыз, телевизорымыз болады. Дәл қазір жүрегім жарылардай қуанып тұрмын, кілт алғанда жылап та қалуым мүмкін", - дейді ерекше күтімді қажет ететін баланың анасы. Алматы қаласының әкімі Ерболат Досаевтың тапсырмасымен 2024 жылы қаладағы коммуналдық тұрғын үй қорынан 2000 жалдамалы пәтер бөлінген болатын. Бірінші жартыжылдықта Наурызбай мен Медеу аудандарында 1080 отбасы жалдамалы тұрғын үйден пәтер иеленді. Қараша айында тағы 920 алматылыққа кілт табысталып, олар Наурызбай ауданындағы жаңа пәтерлерге қоныстанады. Мәселен, 1 қарашада пәтер кезегінде тұрған – 201 тұрғынға, 5 қарашада – 200 тұрғынға, 7 қарашада 175 қала тұрғынына пәтер кілттері табысталды. Ал бүгін 15 қарашада әлеуметтік осал топқа жататын 124 алматылық қоныс тойын тойлағалы отыр. Ақпарат көзі : https://www.gov.kz/memleket/entities/almaty/press/news/details/885163

Бүгін ел Президенті Қасым-Жомарт Тоқаев Вьетнам коммунистік партиясы орталық комитеті саяси бюросының мүшесі, Хо Ши Мин атындағы ұлттық саясат академиясының директоры Нгуен Суан Тхангты қабылдады. Президент Вьетнамды Оңтүстік-Шығыс Азиядағы еліміздің негізгі серіктесі ретінде атады. Оның айтуынша, Қазақстан екі ел арасындағы сауда-экономикалық, инвестициялық, мәдени-гуманитарлық салалардағы ынтымақтастықты одан әрі нығайтуға дайын. Осы күні Астанада Шығыс Қазақстан облысы әкімдігі мен Вьетнам Социалистік Республикасының Бак Нинь провинциясы халық комитеті бауырлас қатынастар орнату туралы өзара түсіністік меморандумына қол қойды. Биыл мамыр айында Вьетнам делегациясы Шығыс Қазақстан облысына келіп, өңір басшысы Ермек Көшербаевпен туризм, ауыл шаруашылығы және өзара қызығушылық тудыратын басқа да салалардағы серіктестіктің болашағын талқыланды. Меморандум Шығыс Қазақстан облысы мен Бак Нинь провинциясы арасында ресми әріптестік байланыстар орнатуды көздейді. Бұл құжат әртүрлі салалардағы ынтымақтастықты кеңейтуге мықты негіз қалыптастырады. Құжаттағы негізгі тармақтардың бірі делегациялар алмасуды көздейді, ол басқару, экономика және мәдениет салаларында өзара түсіністік пен тәжірибе алмасуды тереңдетуге бағытталған. Тараптар тоқыма және жеңіл өнеркәсіп, ауыл шаруашылығы сияқты маңызды салаларда ынтымақтастықты белсенді дамытуға келісті. Әсіресе, көлік инфрақұрылымы мен логистиканы дамытуға ерекше назар аударылды. Бұл сауда мен ресурстар алмасу үшін жаңа мүмкіндіктер ашады. Денсаулық сақтау саласында озық тәжірибе алмасу және медициналық қызмет сапасын жақсарту бойынша жұмыстар күшейтіледі, ал мәдени салада туризм мен мәдени құндылықтарды танымал етуге арналған жобалар жүзеге асырылады. Сонымен қатар тараптар жергілікті кәсіпкерлер мен компанияларды жаңа инвестициялық мүмкіндіктер іздеу жолында қолдауға келісті. Бұл іскерлік байланыстарды кеңейтудің жаңа перспективаларын ашады.Меморандумның маңызды тармағы – Вьетнам мен Еуразиялық экономикалық одақ арасындағы еркін сауда туралы келісімнің мүмкіндіктерін пайдалану. Бұл екі жаққа да экономикаларын тиімді интеграциялап, сауда байланыстарын кеңейтуге мүмкіндік береді. Ақпарат көзі : https://www.gov.kz/memleket/entities/akimvko/press/news/details/885234

Шығыс Қазақстан облысының әкімі Ермек Көшербаев Израильдің Қазақстан мен Қырғызстан Республикасындағы елшісі Эдвин Натан Ябо Глусманмен кездесті.Айта кетейік, ол Еуропа, Латын Америка және БҰҰ бас ассамблеясында елшілік қызметті абыроймен атқарған. Шығыс Қазақстан облысы мен Израиль мемлекеті арасындағы өткен жылдың тауар айналымы 16,6 миллион АҚШ долларын құрап отыр. Импорттық тауарлардың дені химиялық өнеркәсіп өнімдерінен құралған. Оның ішінде каучук пен пластмасса бар. Облыс аумағында Израильдің екі кәсіпорны жұмыс істейді. Аймақ басшысы елшіні Шығыс Қазақстанның әлеуметтік-экономикалық даму бағыттарымен таныстырды. Кездесу барысында қос тарап медицина, туризм, инновациялық технологияларды дамыту бағыттарын кеңінен талқылады. Өскеменге жұмыс сапарымен келген Эдвин Натан Ябо Глусман бизнес-қауымдастық өкілдерімен кездесулер ұйымдастырмақ. Бұдан бөлек, Қазақстан-Американдық еркін университетінің студенттеріне инновациялық білім беру бойынша лекция оқуды жоспарлап отыр. Ақпарат көзі : https://www.gov.kz/memleket/entities/akimvko/press/news/details/885249

Алматыда «Таза Қазақстан» республикалық бағдарламасын іске асыру бойынша «Таза ауа» акциясы жалғасуда. Бұл бастама мегаполистердегі улы шығарындылардың негізгі көздерінің бірі болып табылатын автокөлікпен ауаның ластануымен күресуге бағытталған.Акция аясында ағымдағы жылдың 30 қазаны мен 8 қарашасы аралығында Полиция департаментінің қызметкерлерімен бірлесіп қала орталығында да, оның шетінде де орналасқан жылжымалы экологиялық бекеттерде 882 автокөлікке тексеру жүргізілді. Негізгі мақсат-көлік құралдарының пайдаланылған газдарының залалы мен түтінінің деңгейін бақылау. Бұл әсіресе Алматыда маңызды, онда автокөлік ластаушы факторлардың едәуір бөлігін құрайды.Мониторинг нәтижелері тексерілген автомобильдердің 45% - ы, атап айтқанда 398-і экологиялық стандарттарға сәйкес келмейтінін, олардың шығарындылары рұқсат етілген нормалардан асып түсетінін көрсетті. Бұл автокөлік иелерінің экологиялық жауапкершілігін арттыру және бақылауды күшейту қажеттілігін көрсетеді.Осыған байланысты құқық бұзушыларға қатысты әкімшілік хаттамалар жасалды. Ал қайталама бұзушылықтар анықталған 11 автокөліктен әкімшілік құқық бұзушылық туралы Кодекске сәйкес ақаулар жойылғанға дейін мемлекеттік нөмірлік белгілер тәркіленді. Олар пайдаланылған газ проблемаларын жойғанға дейін жұмысын жалғастыра алмайды.Бұл шаралар Алматыдағы экологиялық жағдайды жақсартудағы маңызды қадам болып табылады және ауаның ластану деңгейін төмендетуге ықпал етеді. Бақылауды күшейту жүргізушілердің жауапкершілік деңгейін арттырады және қаладағы ауа сапасын жақсартуға ықпал етеді деп күтілуде.Ақпарат көзі : https://www.gov.kz/memleket/entities/almaty/press/news/details/885121

Абай ауданына қарасты Саржал және Медеу ауылдық округтерінде жаңа пәтерлердің кілті салтанатты түрде табысталды. Мемлекеттік тұрғын үй кезегінде тұрған он азамат баспаналы болды.Бұл өңір тұрғындарының әл-ауқатын жақсартуға бағытталған бағдарламаның бір бөлігі. Биыл облыс әкімі Нұрлан Ұранхаевтың қолдауымен аудандағы сегіз ауылдық округ пен бір елді мекенде 70 жаңа жалдамалы пәтер кезең-кезеңімен беріліп жатыр.Кілт табыстау рәсімінде аудан әкімі Мейіржан Смағұлов тұрғындарды көптен күткен қоныс тоймен құттықтады.«Тұрғындардың жағдайын жақсарту – жергілікті атқарушы орган жұмысының басым бағыттарының бірі. Біз ауылдық елді мекендерде тұрғын үй салу және тұрғын үймен қамтамасыз ету шараларын жүзеге асыруды жалғастырудамыз», - деді Мейіржан Смағұлов.Салтанатты шара мерекелік концертке ұласып, халық жүрегінен орын тапқан әндер орындалып, қойылымдар қойылды.Ақпарат көзі : https://www.gov.kz/memleket/entities/abay/press/news/details/885140

Министрлік жыл басынан Қытай, Ресей және Орталық Азия мемлекеттерімен трансшекаралық өзендер бойынша 28-ге жуық отырыс өткізді. Су дипломатиясының нәтижесінде суару кезеңінде Шардара су қоймасына 4,8 млрд текше метр су түсті. Бұл өткен жылғы көрсеткіштен екі есе және келісілген көлемнен 1,1 млрд текше метрге артық. Мемлекетаралық «Достық» каналы арқылы келісілген көлемнен 41 млн текше метрге артық, 532,4 млн текше метр су келді. Қапшағай су қоймасы соңғы 10 жылда алғаш рет 18 млрд текше метрден артық су жинап, 100%-ға толды.Соңғы 5 жылда алғаш рет вегетация кезінде Аралға 977 млн текше метр су жіберіліп, жоспар 100%-ға жуық орындалды. Ал, жыл басынан бері теңізге 2 млрд текше метрден астам су түсті. Осының нәтижесінде, бүгінгі таңда Солтүстік Аралдың су көлемі 22 млрд текше метрге жетті.Ақпарат көзі : https://www.gov.kz/memleket/entities/water/press/news/details/885047

11.11.АШХАБАДҚазақстан 2025 жылдың сәуір айына дейін Сырдария өзені арқылы шамамен 11 млрд текше метр су алады. Орталық Азия елдерінің өкілдерімен келіссөздер жүргізген Су ресурстары және ирригация министрі Нұржан Нұржігітов осы жөнінде келісімге қол жеткізді. Министр Мемлекетаралық су шаруашылығын үйлестіру комиссиясының (МСШҮК) 87-ші отырысына еліміздің атынан қатысты.НӘТИЖЕСІНДЕ: 1 сәуірге дейін еліміздегі Шардара су қоймасына 11 млрд текше метр су келеді деп күтілуде. Бұл 2025 жылғы суару маусымында еліміздің оңтүстік аймақтарына қажет су көлемін жинақтауға мүмкіндік береді.11.11.БҚОБатыс Қазақстан өңірінде вегетациялық кезең сәтті өтті. Суармалы судың жылдық жоспары 20,6 млн.м3 құраса, шаруаларға толық көлемде су беріліп, жоспарға сәйкес жұмыс атқарылды.12.11.ҚЫЗЫЛОРДА ОБЛЫСЫШардара су қоймасынан Сырдария өзенінің төменгі ағысына вегетациялық кезеңде жоспар бойынша келетін су көлемі 500-550 м³/с болып белгіленсе, нақты 600-650 м³/с-қа дейін артық су түсті.13.11.ҚАРАҒАНДЫ ОБЛЫСЫҚарағанды облысының шаруалары су шығынын 1,5 есе азайтуға мүмкіндік беретін заманауи су үнемдеу технологияларын енгізуде. Бұл туралы Өңірлік коммуникациялар қызметінің алаңында Қарағанды облысы бойынша «Қазсушар» филиалы директорының міндетін атқарушы Ерғали Омаров айтып өтті.МАҢЫЗДЫ: Келесі жылы филиал Жартас су қоймасындағы каналдарды күрделі жөндеуді жалғастырады. Биыл Жартас су қоймасының Жартас және Малокомспай магистральдық арналары учаскелерінің бетон беткейлері мен түбіне жөндеу жүргізілді.14.11.АСТАНАМинистрліктің Су ресурстарын реттеу, қорғау және пайдалану комитеті бассейндік инспекцияларды жаңа жабдықтармен қамтамасыз ету бойынша жұмыс жүргізуде. Бүгінгі таңда бассейндік инспекцияларға 18 жеңіл автокөлік, көп функциялы құрылғылар, судың жылдамдығы мен шығынын өлшеуге арналған датчиктер берілді. Сондай-ақ бассейндік инспекциялар ғимараттарына жөндеу жұмыстары жүргізілуде.МАҢЫЗДЫ: Бүгінгі таңда бассейндік инспекциялардың жалпы штаты 241 адам. Министрлік құрылғаннан бері штат саны 1,5 есе ұлғайды. Бұл республиканың әрбір облыс орталығында бассейндік инспекция бөлімдерін ашуға мүмкіндік берді.14.11.АСТАНАСу ресурстары және ирригация министрлігі әзірлеген жаңа Су кодексі Үкімет, министрлік, өзге де мемлекеттік және жергілікті атқарушы органдардың, жергілікті уәкілетті органдардың құзыреттерін мұқият реттейді. Бұл су ресурстарын басқару ісін үйлестіруді жақсартуға ықпал етеді.МАҢЫЗДЫ: Жаңа Су кодексі жобасының негізгі мақсаты − экономиканың тұрақты дамуын қамтамасыз ету, азаматтардың өмір сүру сапасын жақсартуға және қоршаған ортаны сақтауға мүмкіндік беретін суды пайдаланудың қауіпсіз деңгейіне қол жеткізу мен оны қолдау болып табылады.15.11.АСТАНАСу ресурстары және ирригация бірінші вице-министрі Болат Бекнияз жаңа Су кодексінің жобасы туралы айтып берді. Жаңа Су кодексі жобасының негізгі мақсаты − экономиканың тұрақты дамуын қамтамасыз ету, азаматтардың өмір сүру сапасын жақсартуға және қоршаған ортаны сақтауға мүмкіндік беретін су пайдаланудың қауіпсіз деңгейіне қол жеткізу мен оны қолдау болып табылады. Ақпарат көзі : https://www.gov.kz/memleket/entities/water/press/news/details/885051

Ақмола облысы бойынша «Қазсушар» филиалы Сілеті су қоймасындағы қақпаларға жөндеу жүргізді. Сондай-ақ, Кеңбидай гидроторабындағы қақпаларды жөндеу және Шағалалы су қоймасындағы төменгі бьефті жөндеу жұмыстары аяқталды.Сонымен бірге, Подлесный және Қоянды су қоймалары мен «Айдабұлақ», «Щучье саяжайлары» және «Алексеевка» бөгеттеріне көп факторлы тексеру жүргізілді.Ақпарат көзі : https://www.gov.kz/memleket/entities/water/press/news/details/885065

Аграрлық мәселелер жөніндегі Комитеттің «Биылғы егінді сақтау, өткізу мәселелері және оларды шешу бойынша Үкіметтің жоспары» тақырыбындағы кеңейтілген отырысында Ауыл шаруашылығы министрі Айдарбек Сапаров ведомство шағын шаруашылықтардан сатып алудың басымдылығын белгілей отырып, жаңа егіннің астығын тікелей сатып алуды ұйымдастыру туралы мәселені пысықтап жатқанын хабарлады.«Үкімет резервінен 10 млрд теңге бөлу жоспарлануда. Бұл шара нарықты тұрақтандыруға және нарықтық құны бойынша 155 мың тонна астық сатып алуға мүмкіндік береді. 1 млн тоннаға жуық ауқымды сатып алу үшін 75 млрд теңге көлемінде қосымша қаржыландыру қажет», - деді министр.Астықтың ішкі бағасының төмендеуі кезеңінде азық-түлік келісімшарт корпорациясы фермерлерге астықты интервенциялық сатып алу арқылы тиімді бағамен сатуға көмектеседі, осылайша фермерлердің шығындарын азайтады. Жоғары баға кезеңінде мемлекеттік оператор астықты ұн тарту, мал және құс шаруашылықтарына нарықтық бағадан төмен бағамен өткізеді, осылайша түпкілікті өнім бағасының өсуін тежейді.Осылайша, азық-түлік корпорациясы өз қызметі шеңберінде форвардтық келісімшарттар мен тауарлық кредиттер беру, ұн тартатын, мал және құс шаруашылықтарына арзандатылған бидайды өткізу арқылы нарыққа жүйелі қолдау көрсетеді.Бұл тетік АӨК дамуын ынталандыра отырып, экономикаға мультипликативті әсер етеді, сондай-ақ әлеуметтік маңызы бар азық-түлік тауарларына бағаны тұрақтандыру түріндегі нүктелік әлеуметтік әсер етеді.Астықты үздіксіз экспорттау бойынша шаралар қабылданды: астықты тасымалдауға шамамен 11,8 мың бірлік астық тасушы және 16 мың бірлік жабық вагон тартылды.Жалпы, ағымдағы жылдың 10 айында ҚТЖ 7,9 млн тонна астық жүктерін тасымалдады, оның ішінде ішкі қатынастар бойынша 1,9 млн тонна және экспортқа 6 млн тонна жөнелтілді.Айта кетейік, бұл мәселелер кешенді тәсілді талап етеді, осыған байланысты тиімді шаралар қабылдау үшін министрлік барлық мүдделі тараптармен пысықтау жүргізуде.Ақпарат көзі : https://www.gov.kz/memleket/entities/moa/press/news/details/885135

Өткен демалыс күндері «Мұз-2024» республикалық үгіт-профилактикалық акциясына арналды, оның шеңберінде жалпы саны 2 мыңға жуық адамдардың санынан құрылған мобильді топтар елдің су айдындарында рейдтер мен патрульдер жүргізді.Қазақстанның солтүстігінде мұздың қалыңдығы 10-15 сантиметрге жеткен кезде, оңтүстігінде – су қоймалары енді ғана салқындай бастайды.ТЖМ құтқарушылары мұзда қауіпсіз болу және мұз астында балық аулау ережелерін түсіндіреді, құтқару кеудешелерінің жоқтығы үшін 8 бұзушы әкімшілік жауапкершілікке тартылды.Мұздағы балаларға ерекше көңіл бөлінеді, олардың ата-аналары шақырылады, қосымша нұсқаулар мен түсіндірме әңгімелер өткізіледі. Барлығы 3 972 адамға нұсқау берілді, оның 1 060–ы балық аулауды ұнататындар.ТЖМ қараңғыда, нашар көрінген кезде және мұз қату және мұз еру кезінде мұзға шығуға қатаң тыйым салынатынын, және мұздың қауіпсіз қалыңдығы бір адам үшін 10 сантиметрден кем емес екендігін тынымсыз ескереді.Мұзда болған кезде:1) мұздың жұқа және жетілмеген жерлеріне шығуға;2) мұздың жекелеген (қауіпті) учаскелерінде топтармен жиналуға;3) мұздағы ойықтарға, жарықтарға, ойықтарға жақындау;4) өткелдер үшін бөлінген орындардың шекарасынан тыс көлік құралдарымен мұзға шығуға;5) от жағуға;6) 20 сантиметрден аз қашықтықта екі тесікті, ал басқа жұп тесіктерден 2 метрден аз қашықтықта екі тесікті тесу;7) мұзда жабдықтар мен қоқыстарды қалдыруға жол берілмейді.«Мұз-2024» республикалық үгіт-профилактикалық акциясы жалғасуда! ТЖМ-нің негізгі міндеті – адам өлімінің алдын алу және су айдындарындағы (мұздағы) қысқы кезеңдегі төтенше жағдайларға (соның ішінде жұқа мұзға) жедел ден қою! ТЖМ Азаматтық қорғаныс және әскери бөлімдер комитеті Ақпарат көзі : https://www.gov.kz/memleket/entities/emer/press/news/details/885057

Бүгінде онлайн сауда жасау дәстүрлі сауда түріне қарағанда жиі қолданылады. Ол қаржы мен уақытты үнемдеуге мүмкіндік береді. Сауда көлемі өскен сайын қызмет сапасын жақсарту қажет. Мұндай кезде кәсіпкерлерге онлайн сауданың қыр-сырын түсіндіретін оқыту курстарына да сұраныс артады. Мәселен елордада JOLTAP әлеуметтік жобасы арқылы онлайн сауда негіздерін тегін меңгеруге болады, деп хабарлайды қала әкімдігінің ресми сайты.Әлеуметтік жоба негізіндегі курс онлайн дүкен ашып, оны дамыту жолдарын түсіндіреді. Тауарды иесіне дер кезінде жеткізу қызметінен бөлек, салық түрлеріне де тоқталады. JOLTAP әлеуметтік жобасы бойынша «Онлайн сауда негіздері» курсының оқытушысы Әйгерім Омышеваның айтуынша, елордалықтар бұл мамандық түрін 6 күнде меңгере алады.«Мен осы жылдың 30 қыркүйегінен бастап жоба қатысушыларына онлайн сауда жасау бойынша курс өткізіп келемін. Негізгі мамандығым - есеп және аудит. Банк саласында 10 жылдан аса жұмыс істеп, кейін өзім онлайн кәсіп бастадым. 2020 жылы тауарларымды Kaspi дүкені арқылы сата бастадым. Міне, осылайша, онлайн саудаға келдім. Сонымен қатар қазір JOLTAP жобасы арқылы қала тұрғындарына аптасына 6 күн бойы онлайн сауда жасауды оқытып жүрмін»,- деді Әйгерім Омышева.Елордалық кәсіпкер әрі жоба оқытушысы бастапқыда өзі де JOLTAP жобасы арқылы «Таргетолог» және SMM курстарын оқыған.«Мен бұл жоба туралы естіген кезде кәсіпкер ретінде заманауи курс түрлерін таңдадым. Себебі тауарды онлайн саудада тапсырыс берушінің мақсатына қарай контент дайындау керек. Одан бөлек жарнама жасау қажет. Жоба осындай мүмкіндіктер бергендіктен, бірден екі курсқа да жазылып, оқып алдым»,- деді жоба оқытушысы.Әйгерім Омышева онлайн сауданың қыр-сырын меңгерген соң өз курсын жазып, қызығушылық білдірген адамдарға ақылы курс өткізген. Тіпті, JOLTAP жобасына оқытушы болуға өзі ниет білдірген.«Мен жоба арқылы екі курсты аяқтаған соң оқытушы болуға тілек білдірдім. Ол кезде тек басқа маркетплейс арқылы онлайн сауда жасауды үйрететін курс болды. Осылайша, өзім жүргізіп отырған онлайн дүкен арқылы сауда негіздерін түсіндіруге болатынын айтым. Жарты жылдан кейін JOLTAP жобасы менің ұсынысымды қабыл алды», - деді ол.Алты күнге жалғасатын курс алдымен интернет дүкенге қалай тіркелу қажет, салық тәртібі мен оның түрлерімен танысудан басталады.«Курс бойынша алғашқы күні онлайн сауда туралы жалпы ақпарат беріліп, онлайн дүкенге тіркелу туралы айтамын. Екінші күні тауар сату тәсіліне тоқталсақ, үшінші күні сататын өнімді қайдан алуға болатынын талқылаймыз. Ол кезде шетелдік және қазақстандық тауар өндірушілерді салыстырамыз. Төртінші күні тапсырыс берушіге тауарды жеткізуге тоқталамыз. Онда онлайн дүкендегі жеткізу қызметінің түрлерімен таныстырамын. Бесінші күні тауардың сыртын қалай орау керек, оған қажетті затты қайдан алуға болатынын айтамын. Соңғы күні платформа тәртібі, тауарды қайтаруды рәсімдеу және кемшіліктермен жұмыс істеу туралы талқылаймыз»,- деді аталған курс оқытушысы.Бүгінде Әйгерім Омышева аталған курс бойынша 209 адамды оқытқан.«Бұл курсқа елордалықтардың қызығушылығы байқалады. Әр лекте 10-15 адам жиналады. Әріптесім Абылай Қалиевпен бірге осы курс бойынша жоба қатысушылырын оқытып жатырмыз. Қазір 31-лек аяқталды. Менің ойымша, JOLTAP жобасы ұсынатын курстардың өз дәрежесі бар. Қазір оқыту курстары көп қой, бірақ кейде сертификаттары жарамай жатады. Сондықтан бұл жоба беретін сертификат әрі қарай жұмыс табуға үлкен септігін тигізеді»,- деді курс оқытушысы.Айта кетейік, елордада JOLTAP жобасы бойынша 8 мыңға жуық азамат қысқа мерзімді оқудан өтті. Қалада «Баршаға мүмкіндік» модульдік пунктері жұмыс істейді. Онда тұрғындар 52 мемлекеттік қолдау шарасы, жұмысқа орналасу мүмкіндіктері, қысқа мерзімді оқуға жазылу бойынша кеңес ала алады.Ақпарат көзі : https://www.gov.kz/memleket/entities/astana/press/news/details/884942

Құрметті Көкшетау қаласының тұрғындары мен қонақтары!21-22 қараша аралығында Көкшетау қаласының аумағында «ҚЫС-2024» Республикалық командалық - штабтық оқу-жаттығулары өтеді. Іс-шаралардың мақсаты-мемлекеттік азаматтық қорғау жүйесінің басқару органдары мен күштерін даярлау.Оқу-жаттығулар азаматтық қорғау қызметтерінің және Республика мен облыстың жергілікті атқарушы органдарының қатысуымен өтеді. Қыс мезгіліндегі іс-шаралар пысықталатын болады.«ҚЫС-2024» барысында авариялық-құтқару жұмыстарын пысықтау, коммуналдық кәсіпорындардағы аварияларды жою жүргізілетін болады. Көптеген құтқару және арнайы техника тартылатын болады.Осыған байланысты Ақмола облысының ТЖ Департаменті Көкшетау қаласының тұрғындары мен қонақтарынан осы іс-шараларға түсіністікпен қарауды және шындыққа жанаспайтын ақпаратты таратпауды сұрайды.Ақпарат көзі : https://www.gov.kz/memleket/entities/aqmola/press/news/details/884961

«Таза Қазақстан» тұжырымдамасы аясында Алматыда қысқы кезеңде коммуналдық техниканың дайындығы көрсетілді. Қалалық инфрақұрылымды қыс мезгілінде сапалы қамтамасыз ету мақсатында арнайы техника паркі жаңартылды. Биыл 32 заманауи техника сатып алынып, олардың көмегімен тазалау жұмыстарының тиімділігі мен жылдамдығы арттырылмақ.Жаңа техниканың ішінде қоқысты конвейер арқылы контейнерлерге бір уақытта тиеу жүйесі бар алты сыпыру-жинау машинасы бар. Бұл машиналар қала көшелерінен қар мен қоқысты тез және сапалы тазалауға мүмкіндік береді. Сондай-ақ, төмен шу деңгейінде жұмыс істейтін бес электрлі сыпыру-жинау машинасы сатып алынды, бұл тұрғындардың тыныштығын бұзбай, түнгі уақытта тазалық жұмыстарын жүргізуге жағдай жасайды. Сонымен қатар, көктайғақпен күресуге арналған 3 сұйық реагент таратқыш техникасы бар. Олар реагенттерді жолға біркелкі себу арқылы қыс мезгілінде қала көшелеріндегі қауіпсіздікті айтарлықтай арттырады. Еріген қар суын сору арқылы су тасқынының алдын алады және қаланың дренаждық жүйесін жақсартатын екі ассенизатор машинасының маңызы зор.«Алматы тазалық» МКК директорының орынбасары Ертай Касеновтың айтуынша, қаладағы тазалау жұмыстары үнемі жетілдірілуде. «Қысқы кезеңде көше-жол желісін толық күтіп ұстауды қамтамасыз ететін 10 біріктірілген жол тазалау машинасы, сондай-ақ тротуарлар мен іргелес аумақтарды қар мен мұздан тазартуға арналған алты трактор сатып алынды», - деді ол.«Алматы Тазалық» МКК арнайы техника паркі жыл сайын жаңартылып отырады. Бұл компанияның жұмыс сапасын жақсартуға және қыс мезгілінде өнімділікті арттыруға бағытталған маңызды бөлігі. Осылайша, 2025 жылы 123 арнайы техниканы, соның ішінде жол тазалау машиналарын, жүк көліктерін, қоқыс таситын көліктерді, тротуарларды тазартуға арналған тракторларды, манипуляторлары бар автокрандарды және Jetbroom қар тазалау машиналарын сатып алу жоспарлануда, олар қала жолдарында одан да жоғары тазалау сапасы мен қауіпсіздікті қамтамасыз етеді.Арнайы техниканы жүргізетін кәсіпорын мамандары жаңа техникамен жұмыс істеу әлдеқайда ыңғайлы болғанын атады. «Бұрын бір көшені тазалауға көп уақыт кететін, қазір техниканың маневрлігінің арқасында бұл жұмыс әлдеқайда жылдам атқарылады. Бұл қала тұрғындарына ыңғайлы», - дейді арнайы техника жүргізушілерінің бірі.«Қазір бәрі техниканың қаншалықты заманауи және көпфункционалды екендігіне байланысты. Алматы бұл тұрғыда, бәлкім, алдыңғы қатарда. Панфилов көшесі мен басқа да скверді робот секілді кішкентай машиналар тазалап жүр», - дейді Алмалы ауданының тұрғыны Сымбат Байбазарова.«Қол еңбегінсіз, әрине, болмайды, бірақ өнімділік техникада. Қазір машиналар бәрін жасай алады. Бұрын мұндай жабдықты тек роликтерден көретінбіз, ал қазір олар біздің қаламызда көп. Ең бастысы, робот шаңсорғыш сияқты, бәрін таза, дыбыссыз және шығарындыларсыз жасайды. Олардың көбісі электрлі», - деді Бостандық ауданының тұрғыны Анна Листопадная сауалнама барысында.Алматыға 2024-2025 жылдардың қыс мезгілінде тиімді қызмет көрсету үшін қала көшелерінде 841 техника және 1 405 жұмысшы қызмет етеді. Бұл қар мен мұзды уақытылы тазалауға, көктайғақтың алдын алуға, сондай-ақ жол мен тротуардағы басқа қыстағы мәселелерді шешуге мүмкіндік береді. Ақпарат көзі : https://www.gov.kz/memleket/entities/almaty/press/news/details/884971

Әйтекебилік диқан, «Комсомол» ЖШС директоры Виталий Волынец еліміздің өнеркәсіптік және ауылшаруашылығы секторының дамуына ықпал етіп, әлеуметтік-экономикалық дамуына белсенді араласып, заманауи озық технологияларды ауыл шаруашылығына енгізгені үшін ҚР Президентінің Жарлығымен «Құрмет» орденінің иегері атанды.Виталий Волынец өмірінің 40 жылға жуық уақытын ауыл шаруашылығына арнап келеді. Оған Орденді Мемлекет басшысы Қасым-Жомарт Тоқаев Ауыл шаруашылығы қызметкерлерінің бірінші форумында салтанатты түрде табыстады.Виталий Волынец Ақтөбе облысы Мәртөк ауданында туып-өскен. Еңбек жолын 1981 жылы «Яйсан» совхозының тракторшы болып бастады. Қара теңіз әскери-теңіз флотында борышын өтеп келген соң, Жайсаң СПТУ №-13 механигі, сол уақытта осы оқу орнында Комсомол ұйымының хатшысы ретінде жұмыс істеді. 1998 жылы «Комсомол» өндірістік кооперативінің ауылдық жалпы жиналысында, бірауыздан «Комсомол» ЖШС төрағасы болып сайланып, бүгінге дейін басқарып келеді.«Комсомол» ЖШС – Әйтеке би ауданындағы ірі ауылшаруашылық тауарын өндірушілерінің бірі. Кәсіпорын егін салып, шөп шауып, жайылымдық жерінде мал өсіріп келеді. Машина-трактор паркі толық жабдықталған. 2024 жылы 11251,43 га жерге бидай егіп, әр гектардан 10 ц өнімділік алды. Шаруашылық тұрақты түрде 92 адамды, маусымдық жұмыс кезінде 200 адамды жұмыспен қамтып отыр.Туған өлкені өркендетуге үлес қосып жүрген меценат жағдайы төмен отбасыларға материалдық көмек көрсетуді, аудан көлемінде өтетін мәдени және спорттық шараларға үнемі ат салысып, демеушілік етуді міндетіне алған. Мәселен, үш жыл бұрын оның қаржыландыруымен ашылған «Жас арыстан» күрес мектебінде қазіргі уақытта 76 бала тегін спортпен шұғылдануда.Ақпарат көзі : https://www.gov.kz/memleket/entities/aktobe/press/news/details/884918

Бұл жоба 2021 жылы бастау алған.Қаратоғай ауылында көптен күткен спорт кешені есігін ашты. Президенттің бұқаралық және балалар спортын дамыту туралы тапсырмасына сәйкес, жаңа нысан ауыл жастарына дене шынықтырумен және спортпен айналысуға үлкен мүмкіндік береді. 3 жыл бұрын «Ер-Қанат сервис» ЖШС-мен келісімшарт жасалып, металл конструкциялардың толық монтаждау жұмыстары жүргізілді. Алайда, 2022 жылы құрылыс материалдарының қымбаттауына байланысты жоба уақытша тоқтатылды. Мердігер жобалық-сметалық құжаттаманы қайта түзету қажеттігін алға тартты. Облыс әкімінің бақылауында болған құрылысқа биылғы жылы Мәртөк ауданының бюджетінен 219 миллион теңге бөлініп, тоқтап қалған жұмыстар қайта жанданды. Бүгінгі таңда спорт кешені толық дайын. Қазірдің өзінде спорт кешенінде 42 бала қазақ күресімен тұрақты түрде айналысуда. Алдағы уақытта кешенде волейбол, футбол, еркін күрес, тоғызқұмалақ және үстел теннисі секілді спорттық үйірмелер ашу жоспарлануда. Нысанның ашылуымен бірге 10 адам тұрақты жұмыс орнымен қамтылды. Спорт кешенінің ашылу салтанатына аудан әкімі Медет Ысқақов қатысып, жиналған ауыл тұрғындарын құттықтады. Ол өз сөзінде бұл кешен ауыл жастарының спорттық белсенділігін арттырып, салауатты өмір салтын қалыптастыруға маңызды үлес қосатынын алға тартты.Ақпарат көзі : https://www.gov.kz/memleket/entities/aktobe/press/news/details/884938