Бүгін «Өнер орталығында» облыс әкімі Нұрлыбек Нәлібаевтың қатысуымен «Заң және Тәртіп» қоғамдық қауіпсіздікті күшейту мен өзара іс-қимылдың басымдықтары» тақырыбында форум өтті. Алқалы жиынға ҚР Парламент Сенаты мен Мәжілісінің депутаттары Наурызбай Байқадамов, Мұрат Әбенов, Мархабат Жайымбетов, Абзал Құспан, облыс прокуроры Ризабек Ожаров, құқық қорғау органдары мен жауапты сала басшылары, қоғам қайраткерлері, зиялы қауым өкілдері қатысты.Аймақ басшысы қоғамдық қауіпсіздік пен заңдылықты қамтамасыз ету бағытында атқарылған жұмыстарға тоқталып, алдағы бірлескен маңызды міндеттерді айқындады.«Биыл 1 сәуірде Үкімет қаулысымен «Қоғамда заң мен тәртіп идеологиясын ілгерілету жөніндегі 2025 – 2030 жылдарға арналған тұжырымдама» бекітіліп, нақты міндеттер белгіленді.Өңірімізде «Заң мен Тәртіп» қағидасын іске асыруда облыс прокуроры Ризабек Кәрімұлымен бірлесіп кешенді шараларды қолға алып, жаңа бастамаларға үздіксіз қолдау көрсетіп келеміз. Құқық қорғау органдарымен бірлесе жүргізілген кешенді әрі үйлесімді шаралардың нәтижесінде өңірімізде ахуал тұрақты. Статистикалық ақпараттарды салыстырмалы түрде қарасақ, аймақта 2015 жылы 6 мыңға жуық қылмыс тіркелген болса, нақты жұмыс нәтижесінде бұл көрсеткіш 1158-ге дейін азайды. Соңғы үш жылда құқық бұзушылық көрсеткіші едәуір қысқарды. Бүгінде тіркелген қылмыстық құқық бұзушылық саны бойынша Қызылорда облысы республикадағы ең төменгі позицияда, яғни 20 өңірдің ішінде 19-шы орындамыз. Біздің міндет – тек көрсеткішті ғана емес, құқық бұзушылықты тұрақты түрде төмендету. Жол-көлік оқиғаларын азайтуда жол инфрақұрылымын дамытуға басымдық бердік. Түрлі гаджеттер мен смартфондағы бағдарламалар көмегімен жасалатын алаяқтық, кибершабуыл схемалары сәт сайын өзгеріп жаңаруда. Қаржы пирамидалары, лудомания, интернет буллинг азаматтарды қиын жағдайда қалдыруда. Мүдделі құқық қорғау органдары қолда бар ресурстармен шектелмей, қылмыстық әрекеттерге тосқауыл қоятын жаңа тетіктерді дамытуы тиіс. Осы бағыттағы қылмыстарды анықтауда жасанды интеллектті пайдалану – орнықты шешімнің бірі. Бүгінгі форум – біздің алдағы жұмыстарымызды жаңа формацияда жүргізуге өз септігін тигізеді деп сенемін», – деді Н.Нәлібаев.Басқосуда облыс прокурорының орынбасары Нұрболат Дүйсенбаев, Парламент Сенатының депутаты Наурызбай Байқадамов, мемлекет және қоғам қайраткері Оразкүл Асанғазы, Парламент Мәжілісінің депутаттары Мұрат Әбенов пен Абзал Құспан сөз сөйлеп, форум жұмысына сәттілік тіледі.Құқық бұзушылықтардың алдын алуда ерекше белсенділік танытып, киберкеңістіктегі заңсыз әрекеттердің жолын кесуге үлес қосқан мамандарға облыс әкімінің сыйлық сертификаттары мен облыс прокурорының Алғыс хаты табысталды.Соңғы үш жылда полиция органдарының материалдық-техникалық базасын жақсартуға облыстық бюджеттен 8 млрд.теңгеге жуық қаржы бөлінді. Биыл бұл мақсатқа 2 млрд. 800 млн. теңге қаралып, заманауи құрылғылармен, жабдықтармен қамтамасыз етілуде.Республикада алғашқы болып облыстың барлық ауданында полиция бөлімдерінің Жедел басқару орталықтары ашылды. Қауіпсіздікті күшейту, жедел әрекет ету мақсатында бейнебақылау камераларының желісі көбейтілді.Барлық ауданға құны 2 млрд. 200 млн. теңге болатын 539 бейнебақылау, 49 жылдамдық өлшейтін камера орнатылды. Соңғы жылдары полиция қызметкерлеріне замануи құрылғылармен жабдықталған 128 жаңа автокөлік табысталды. Биыл тағы 31 қызметтік автокөлік тапсырылып, арнайы құрал-жабдықтар көбеймек. Бұл мақсаттағы жұмыстар алдағы уақытта да жалғасын табады. Ашықтық қағидатына сәйкес қала, аудандарда құқық қорғау органдарының бірінші басшыларымен бірге қоғамдық қабылдаулар тұрақты өткізіліп келеді. Бұл өз кезегінде тұрғындардың мемлекеттік органдарға деген сенімділігін арттырып, әділетті қоғам құруға тың серпін бермек.Ақпарат көзі : https://www.gov.kz/memleket/entities/kyzylorda/press/news/details/1018507?lang=kk

Қарағандылық ескекшілер Тайландтан жеті медаль: үш алтын, үш күміс және бір қола алып келді. Байдарка мен каноэде есуден Азия чемпионатында 15 елдің 300-ге жуық спортшысы бақ сынасты. Континенттік біріншілік 18 жасқа дейінгі жасөспірімдер мен 23 жасқа дейінгі жасөспірімдер арасында өтті.Қазақстан құрамасы жалпыкомандалық екінші орынды иеленді. Оған қарағандылықтардың елеулі үлесі бар.Алтын медальді Денис Кленин (к1, 1000 м) жеңіп алды. Дмитрий Холмогоров тұғырдың ең жоғарғы сатысына екі рет көтерілді (микс, 500 м; к2, 500 м).Сонымен қатар, Кленин мен Холмогоров бірлесе екінші орынды (к4, 500 м) иеленді.Вероника Трапезниковада екі күміс (к2, 500 м; к4, 500 м). Ульяна Иванова қола жүлдеге ие болды (с2, 500 м).Қарағанды облысы дене шынықтыру және спорт басқармасының баспасөз қызметінің ақпараты бойыншаАқпарат көзі : https://www.gov.kz/memleket/entities/karaganda/press/news/details/1018258?lang=kk

Қазақстан құрамасы Қытайда өткен Әлем кубогында сенсация тудырды. Бұл Қарағанды облысының спортшыларының еңбегі.13-15 маусым аралығында Сиань қаласында көркем (синхронды) жүзуден Әлем кубогының суперфиналы өтті. Жарысқа 16 елден 125 спортшы қатысты. Қазақстан құрамасына 14 жүзуші енді.Бұған дейін бірінші кезең Францияда, екіншісі Египетте, ал үшіншісі Канадада өткен болатын."Әлем кубогының төрт кезеңінің қорытындысы бойынша әйелдер дуэтінде біздің қыздарымыз Ясмин Тұяқова, Арина Пушкина және Даяна Жаманчалова күміс медальға ие болды. Техникалық, еркін және акробатикалық бағдарламалар бойынша топтық өнер көрсетуде Наргиза Болатова, Виктор Друзин, Ксения Макарова, Арина Мясникова және Ясмин Тұяқова қола жүлдеге ие болды", - деп хабарлады Қарағанды облысының дене шынықтыру және спорт басқармасы.Ақпарат көзі : https://www.gov.kz/memleket/entities/karaganda/press/news/details/1018312?lang=kk

Мемлекет басшысы өз Жолдауында инфрақұрылымдық мәселелерді шешудің маңыздылығын, оның ішінде автожолдар желісін дамытуды ерекше атап өтті. Бұл – экономикалық өсудің және азаматтардың әл-ауқатын арттырудың маңызды алғышарттарының бірі. 2025 жылы Қостанай облысында автожол саласының қаржыландыруы едәуір ұлғайды – өткен жылмен салыстырғанда бюджет 31%-ға артып, 106 млрд теңгені құрады. Оның ішінде 47,1 млрд теңге немесе 44,4% республикалық маңызы бар жолдарды жөндеуге бағытталды. Ауқымды жөндеу жұмыстары Биылғы жылы бірқатар маңызды жол учаскелерінде жөндеу жұмыстары жүргізілуде:•Сарыкөл ауылынан Солтүстік Қазақстан облысының шекарасына дейінгі жол;•Арқалық – Ұлытау облысының шекарасы бағыты;•Ұзынкөл – Троебратное жолы;•Қарабалық ауылынан Ресей Федерациясының шекарасына дейінгі жол;•Қарасу ауданына қарасты Октябрьское ауылынан Ақмола облысының шекарасына дейінгі жол;•Бестөбе ауылынан Ақтөбе облысының шекарасына дейінгі жолда жөндеу басталды. Бұдан бөлек, 14 маусымда Президенттің тапсырмасына сәйкес “Орталық – Батыс” автожолының құрылысы басталды. Бұл жоба Қостанай облысының оңтүстік өңірлерін елдің негізгі көлік тораптарының біріне айналдырмақ. Рудный қаласына жаңа серпін Рудный қаласында транзиттік жүк көліктерінен туындайтын орталық көшелердегі жүктемені азайту мақсатында айналма жол салу жоспарлануда. Жоба келесі жұмыстарды қамтиды:•16,9 км ұзындықтағы жаңа жол құрылысын,– оның ішінде 4,3 км – жаңа жол салу,– 11,2 км – бар жолды қайта жаңғырту;•маршрут Белозерка және Балықты ауылдары арқылы өтіп, Юбилейное ауылы маңындағы жаңа жолайырыққа шығады;•жобаның алдын ала құны – шамамен 25 млрд теңге;•құрылысты биыл бастап, 2028 жылы аяқтау жоспарлануда. Қостанай – Рудный автожолы Аймақтағы ең көп жүктемелі жол учаскелерінің бірі – Қостанай – Рудный бағыты (ұзындығы 31,5 км) да назардан тыс қалған жоқ. Бұл жолмен тәулігіне 10–13 мың көлік өтеді. Жөндеуге 6,5 млрд теңге бөлінді. Қазіргі уақытта:•оң жақ бөлікке асфальт төсеу жұмыстары 89%, сол жақта – 32% орындалды;•153 дана көше шамының тіректері орнатылды;•барлық жұмыстарды қазан айында аяқтау жоспарланып отыр. Қорытынды Жол-көлік инфрақұрылымын жүйелі дамыту – жолдардағы қауіпсіздікті қамтамасыз етіп, логистикалық шығындарды азайтуға және азаматтар мен бизнестің жайлы қозғалысына мүмкіндік береді.Ақпарат көзі : https://www.gov.kz/memleket/entities/kostanay/press/news/details/1018081?lang=kk

Қарағанды облысы жыл соңына дейін 500 мыңға жуық турист қабылдауға дайын. Өңір инфрақұрылымға, цифрлық шешімдер мен сервиске белсенді түрде инвестиция салып, қауіпсіздік пен жайлылықты күшейтуде. Негізгі назар - Балқаш курорттық аймағы мен Қарқаралыдағы экотуризмді дамытуға аударылады.Бұл туралы облыс әкімі Ермағанбет Бөлекпаевтың төрағалығымен өткен аппарат отырысында айтылды.Балқашта әуежайды, жағажай мен жағалауды қайта жаңарту жалғасуда. Жаңғыртудан кейін әуежайдың өткізу қабілеті 30%-ға артады. Жаңа авиарейстерді іске қосу және қозғалысы шектеулі жолаушыларға толық бейімделу көзделген.Қала сумен жабдықтау мәселесін де шешуде. Балқаш әкімі Сапар Сатаевтың хабарлауынша, Барковский және Рембаза аудандарында жаңа магистральға қосылу есебінен су қысымы тұрақтандырылды. Торанғалық және Шұбартүбек ауылдарында су құбырының құрылысы басталды. Жергілікті тазарту құрылғыларын орнату қарастырылуда - жоба инвесторлармен бірлесіп іске асырылып жатыр.Биылғы маусымда «Қарағанды-Балқаш» бағытында вагондарды ұлғайтуды қоса алғанда, қосымша автобус, теміржол және авиамаршруттар ашылды.Осы аптада, 20-21 маусымда жаздың басты оқиғасы - BalkhashTourFest өтеді. Бағдарламада - ақпараттық тур және QAZ ELI туристік қызметтерін брондаудың алғашқы отандық онлайн-жүйесінің тұсаукесері қарастырылған.Кәсіпкерлік басқармасының басшысы Ирина Любарская цифрлық шешімдерді енгізу туралы айтып берді. WhatsApp-та ЖИ базасында тәулік бойы чат-бот жұмыс істейді, онлайн-гидке қолжетімділігі бар QR-кодтар пайда болды. visitqaraganda.kz турпорталы жаңа ақпаратпен толықтырылып, қонақ үйлерді онлайн-брондау жүйесі енгізілуде.Қарқаралыда сондай-ақ инфрақұрылым мен тарихи-мәдени мұра нысандарына ерекше назар аударылады. Жыл соңына дейін «Қарағанды-Қарқаралы» тас жолының жөндеу жұмыстары аяқталады. Ұлттық паркте бағыттар орнатылып, «Бұғылы» аймағына инженерлік желілер тарту басталды.Шілде айында мұнда халықаралық трейлер-марафон өтетін Qarkaraly Bugyly Fest - 2025 өтеді.Ермағанбет Бөлекпаев әкімдіктер мен «ҚазАвтоЖол» компаниясына автожолдар бойында және көпшілік демалатын орындарда санитарлық-гигиеналық тораптар салуды қамтамасыз етуді тапсырды.-  Қауіпсіздік мәселелеріне ерекше назар аударылады. Көпшілік демалатын орындарда тәртіп пен тазалықты қамтамасыз ету қажет. Қосымша мангалдар, барбекю-аймақтар, санитарлық тораптар мен қоқысқа арналған контейнерлер орнату қажет, - деп атап өтті өңір басшысы. - Біз туризмді дамытып қана қоймай, адамдар демалғысы келетін атмосфера қалыптастырамыз. Бұл әркімнің жеке жауапкершілігі маңызға ие жүйелі жұмыс.Ақпарат көзі : https://www.gov.kz/memleket/entities/karaganda/press/news/details/1018137?lang=kk

Елімізде жыл сайын 14 маусым «Дүниежүзілік донор күні» ретінде аталып өтіледі. Бұл – өз еркімен қан тапсырып, мыңдаған адамның өмірін құтқаруға үлес қосып жүрген азаматтарға алғыс білдіретін ерекше мереке.Қан – өмірлік маңызы бар, ешқандай жасанды баламасы жоқ құнды ресурс. Сол себепті де донор болу – бұл жай ғана қайырымдылық емес, бұл – шынайы ерлік пен адам өмірін сақтауға бағытталған нақты қадам.Осы атаулы дата аясында Шымкент қалалық қан орталығында арнайы акция бастау алды. «Қан тапсырып, үміт сыйлаңыз! Адам өмірін бірге сақтаймыз!» тақырыбында ұйымдастырылған іс-шараға бірқатар белсенді азаматтар алғашқылардың бірі болып қатысып, қан тапсырды.Айта кетейік, игі іс-шара барысында тұрақты донорларға ерекше құрмет көрсетіліп, алғыс хаттар мен естелік сыйлықтар табысталды. Қан орталығының мамандары оларға донор болудың маңыздылығын түсіндіріп, әр адамның бұл іске өз үлесін қоса алатынын атап өтті.Дәрігерлердің мәлімдеуінше, азаматтар бір реттік қан тапсыру арқылы үш адамның өмірін құтқаруға септігін тигізе алады. Сондықтан да бұл әр азамат үшін маңызды зор қадам болып табылады. Қан тапсыру акциясы жалғасын табады.Өзіңізді жақсы сезінсеңіз, жеңіл тамақтанып, жеке куәлігіңізбен Шымкент қаласы, Нұрсат шағынауданындағы №442 мекенжайында орналасқан Шымкент қалалық қан орталығына келіңіз.Ұйымдастырушылар барлық қала тұрғындарын алдағы уақытта да осы игі іске белсене қатысуға шақырады.Есіңізде болсын, Сіздің бір тамшы қаныңыз – бір адамның өмірін құтқаруы мүмкін.Қосымша мәліметтер үшін 8747 292 65 93 ұялы байланыс нөміріне (ock_uko@mail.ru@shymkent.donor) хабарласа аласыздар.Ақпарат көзі : https://www.gov.kz/memleket/entities/shymkent/press/news/details/1017500?lang=kk

Биылғы жылдың 13 маусымда Қазақстан Республикасы мен Өзбекстан Республикасы Президенттерінің тапсырмаларын орындау шеңберінде «Атамекен» (Түркістан облысы, Қазақстан Республикасы) және «Гүлстан» (Сырдария облысы, Өзбекстан Республикасы) өткізу пункттерінің түйіскен жерінде ҚР Сауда және интеграция министрі Арман Шаққалиев пен Өзбекстан Республикасы инвестициялар, өнеркәсіп және сауда министрі Лазиз Құдратовтың төрағалығымен «Орталық Азия» халықаралық өнеркәсіптік кооперация орталығын (ХШЫО) құру мәселелері бойынша көшпелі кеңес өтті.Кеңес барысында тараптар ХШЫО дамуының бастапқы контурларын таныстырды. Қатысушылар инфрақұрылымдық қамтамасыз ету және орталықтың тиімді жұмыс істеуіне қатысты мәселелерді егжей-тегжей талқылады. Құрылыс кезеңдерін жоспарлауға, орталықтар арасында арнайы (түйіспелі) өту үшін орынды таңдауға, сондай-ақ шекара маңы өңірінің көлік-логистикалық әлеуетін одан әрі дамытуға ерекше назар аударды.Жекелеген блокпен кооперацияның перспективалық бағыттары мен инвесторларды тарту модельдерін қоса алғанда, ХШЫО-ны нақты өнеркәсіптік жобалармен толықтыру бойынша ұсыныстар қаралды. Бірлескен өндірістік бастамаларды іріктеу тетіктері, қосылған құн тізбегін қалыптастыру тәсілдері, сондай-ақ Орталық резиденттері үшін мемлекеттік қолдау шаралары мен қолайлы режимдер талқыланды.Кеңес қорытындысы бойынша екі елдің жергілікті атқарушы органдарына жоспарланып отырған Өнеркәсіптік және логистикалық дамуды ескере отырып, ХШХО болашағына іргелес аумақтардың инфрақұрылымдық дайындығын қамтамасыз ету тапсырылды.Сондай-ақ, сапар барысында қазақстандық делегация Сырдария облысының Сырдария қаласында орналасқан ТМД-дағы полимерлі қаптаманың ірі өндірушілерінің бірі - «SIRDARYO MEGA LUKS» ЖШС БК қызметімен танысты.Компания жіптен бастап дайын Боппленкаларға, стрейчпленкаларына, полипропилен пакеттеріне және үлкен сөмкелерге дейін өндірістің толық циклін жүзеге асырады. Кәсіпорын айына 36 млн қап пен жұмсақ контейнер шығарады, еуропалық өндірушілердің заманауи жабдықтарымен жабдықталған және өнімдерді ТМД өңіріне, Еуропа, Таяу Шығыс елдеріне және т. б. экспорттайды.Ақпарат көзі : https://www.gov.kz/memleket/entities/mti/press/news/details/1017517?lang=kk

2025 жылғы 14 маусымда Қазақстан Республикасы Ұлттық ұлан академиясының жас офицерлерінің салтанатты шығарылымы өтті.Іс – шараға Ішкі істер министрінің орынбасары-Ұлттық ұланның Бас қолбасшысы генерал-майор Балтабеков Аңсаған Скендерұлы, Солтүстік Қазақстан облысы әкімінің бірінші орынбасары Тасмағанбетов Марат Иманбайұлы, Тәжікстан Республикасы ІІМ Ішкі әскерлерінің өкілдері, сондай-ақ өңірдің жергілікті атқарушы органдарының бірінші басшылары қатысты.Іс-шара аясында түлектерге әскери оқу орнын бітіргені туралы дипломдар табысталды. Олардың арасында үкіметаралық келісімдер шеңберінде оқудан өткен Тәжікстан Республикасынан келген төрт офицер бар.Биыл Академия әскери бөлімдерге Қазақстанда да, шетелде де қызмет ететін 200-ге жуық офицерді жібереді.Академияны үздік бітірген бес түлекке ерекше назар аударылды. Бұл жас офицерлер Қазақстан Республикасының Президенті – Қарулы Күштердің Жоғарғы Бас қолбасшысы Қасым-Жомарт Тоқаев пен еліміздің ішкі істер министрі полиция генерал-лейтенанты Ержан Сәденовтің қолынан мерзімінен бұрын лейтенанттық погондар алды. Олар: Диас Беделбай, Әділет Шалқарұлы, Азамат Зулкарнаев, Думан Айткенов, Әмір Төлеуханов.Қазақстан Республикасы Ұлттық ұлан академиясы түрлі мамандықтар мен офицерлік кадрлардың әскери мамандарын даярлауда шешуші орынды иеленуді жалғастыруда. Бұл республиканың бүкіл аумағында қауіпсіздік пен тұрақтылықты қамтамасыз ете отырып, Құқық қорғау күштері үшін офицерлерді дайындайтын елдегі жалғыз оқу орны.Ақпарат көзі : https://www.gov.kz/memleket/entities/sko/press/news/details/1017518?lang=kk

 Бүгін медицина қызметкерлерінің кәсіби мерекесіне орай облыс орталығында салтанатты жиын өтті. Шараға Батыс Қазақстан облысының әкімі Нариман Төреғалиев қатысып, ақ халатты абзал жандарды шын жүректен құттықтады.Салтанатты жиында аймақ басшысы өңірдегі денсаулық сақтау саласында атқарылып жатқан жұмыстарға тоқталып, медицина мамандарының қоғамдағы орны ерекше екенін атап өтті.«Күні кеше Мемлекет басшысы Қасым-Жомарт Тоқаев медицина қызметкерлерін кәсіби мерекелерімен құттықтап, олардың қоғамдағы рөлі зор екенін атап өтті. Президент: «Дәрігер болу – жүректің ісі. Біз сіздердің ерліктеріңізді бағалаймыз»дей келе, ақ халатты абзал жандардың еңбегін ескеріп, мәртебесін жоғарылатты.Облыс көлемінде де денсаулық саласын қолдау мақсатында ауқымды нақты жұмыстар атқарылып келеді», - деді Нариман Төреғалиев.Өңір басшысы өз сөзінде «Ауылдық денсаулық сақтауды жаңғырту» ұлттық жобасы аясында облысымызда 50 медициналық нысанның құрылысы жоспарланын, оның бүгінде 38 нысаны пайдалануға берілгенін хабарлады. Қалған 12 нысанның құрылысы маусым-шілде айларында аяқталмақ. Сонымен қатар, 2023–2025 жылдар аралығында өңірде денсаулық сақтау инфрақұрылымын дамыту бағытында: 37 нысанда күрделі жөндеу жүргізілсе, тағы 5 нысанның күрделі жөндеу жұмыстары аяқталуға жақын. Сондай-ақ, 8 модульдік медициналық ғимарат сатып алынып, қолданысқа берілді.2023-24 жылдары облыстағы денсаулық сақтау ұйымдарына су жаңа 131 санитариялық автокөлік берілді. 405 бірлік медициналық құрал-жабдық сатып алынып, оған жергілікті бюджеттен 3 миллиард теңге қаражат бөлінген.Жиын барысында сала үздіктеріне «Еңбек ардагері» медалі және ҚР Денсаулық сақтау министрлігінің «Денсаулық сақтау ісінің үздігі» және «Денсаулық сақтау ісіне қосқан үлесі үшін» төсбелгілері, “Құрмет” грамоталары, сондай-ақ облыс әкімінің алғыс хаттары табыс етілді.Мерекелік шара концерттік бағдарламаға ұласты.БҚО әкімдігінің баспасөз қызметіАқпарат көзі : https://www.gov.kz/memleket/entities/bko/press/news/details/1017539?lang=kk

Бүгін Шымкент қаласында Shymkent Usta Fest – тұтас ағаштан жасалатын қолөнер шеберлерінің халықаралық фестивалі басталды. Іс-шара Шымкент қаласы әкімдігінің қолдауымен ұйымдастырылуда.Қаладағы «Арбат» алаңында өтіп жатқан фестивальдің ашылу рәсіміне Шымкент қаласы әкімінің орынбасары Сәрсен Құранбек арнайы қатысып, шеберлерге сәттілік тілеп, фестивальдің маңыздылығына тоқталды.Айта кетейік, Shymkent Usta Fest фестивалі елімізде тұңғыш рет Шымкент қаласында өтуде. Оған елімізден өзге, Өзбекстан, Қырғызстан, Моңғолия және Ресей Федерациясынан келген ағаш өңдеу өнерінің шеберлері қатысып жатыр.Фестиваль бағдарламасы аясында алты күн бойы «Арбат» алаңында жәрмеңкелер, көрмелер және түрлі мәдени іс-шаралар ұйымдастырылады. Қала тұрғындары мен қонақтары ұлттық нақыштағы ерекше бұйымдарды тамашалап қана қоймай, олардың жасалу барысын да көре алады.Фестивальдің салтанатты жабылу рәсімі мен гала-концерті 20 маусым күні өтеді.Ақпарат көзі : https://www.gov.kz/memleket/entities/shymkent/press/news/details/1017543?lang=kk

 Сіздерді кәсіби мерекелеріңіз — Медицина қызметкері күнімен шын жүректен құттықтаймыз!Біз дәрігерлеріміз бен мейіргерлеріміздің жетістіктерін мақтанышпен атап өтеміз, олар жыл сайын жүздеген мың науқасты қабылдап, миллиондаған жедел жәрдем шақыртуларына қызмет көрсетіп, мыңдаған күрделі операцияларды сәтті жасап, сәбилердің аман-есен дүниеге келуіне көмектесіп келеді.Ұлт денсаулығын нығайту - мемлекетіміздің басты басымдықтарының бірі.Қазақстанда медицинаның бірнеше бағыты халықаралық деңгейде табысты бәсекеге қабілетті. Бүгінде еліміздің әрбір тұрғынына медициналық-санитариялық алғашқы көмек те, жоғары технологиялық медициналық қызметтер де қолжетімді.Сіздердің тынымсыз еңбектеріңіз үшін алғысымыз шексіз!Сіздерге және отбасыларыңызға зор денсаулық, мол оптимизм, құрмет пен амандық тілейміз!Ақпарат көзі : https://www.gov.kz/memleket/entities/dsm/press/news/details/1017584?lang=kk

 Облыстық жедел және шұғыл медициналық жәрдем станциясы ғимаратының алдында медицина қызметкерлері күніне арналған салтанатты шара өтті.Салтанатты рәсім аясында 15 медициналық ұйымға жаңа жедел жәрдем көліктері беріліп, 4 дәрігерге қызметтік пәтер кілттері табысталды. Саладағы үздік мамандар республикалық және өңірлік деңгейдегі марапаттарға, «Ерен еңбегі» медаліне, «Денсаулық сақтау ісінің үздігі» төсбелгісіне, сондай-ақ Денсаулық сақтау министрлігі, әкімдік және кәсіподақ ұйымының құрмет грамоталары мен алғыс хаттарына ие болды.Іс-шараға облыс әкімінің орынбасары Ғалымжан Елеуов, денсаулық сақтау басқармасының басшысы Ерлан Сұлтангереев, «QAMQOR» кәсіподағының төрағасы Қайрат Сабыр, саланың ардагерлері мен өңірдің медициналық қауымдастығының өкілдері қатысты.Бұл күн тек мереке ғана емес, сонымен қатар халықтың денсаулығы мен өмірін қорғап жүрген барлық мамандардың еңбегіне көрсетілген үлкен құрмет болды.  Ақпарат көзі : https://www.gov.kz/memleket/entities/aktobe/press/news/details/1017550?lang=kk

Ұлт рухын ұлықтаған мергендер сайысы 18 өңірден 270 спортшыны біріктірді 14 маусым күні Батыс Қазақстан облысының орталығы – Орал қаласы тағы бір тарихи оқиғаның куәсі болды. Мұнда ересектер арасында дәстүрлі садақ атудан Қазақстан Республикасының чемпионатының ресми ашылу салтанаты өтті.Ұлттың өткенін ұлықтап, рухани тұғырын биіктететін бұл бірегей додаға еліміздің 18 өңірінен 270-ке жуық таңдаулы мерген жиналды. Бұл көрсеткіш – ұлттық спортқа деген қызығушылықтың, әрі оны дамытуға бағытталған нақты қадамдардың нәтижесі.Садақ ату – тек спорт емес. Бұл — ғасырлар бойы ұрпақтан ұрпаққа жалғасып келе жатқан төл мұра, жауынгерлік өнер мен рухани тектіліктің символы. Бүгінде бұл өнер жаңа серпін алып, спорт түрі ретінде қарқынды дамып келеді.Чемпионат — осы үрдістің айғағы. Жарыс аясында қатысушылар ежелгі садақ түрлері мен оқ ату әдістерін меңгеріп, шеберліктерін ортаға салуда. Әрбір оқ — дәлдік қана емес, тарихпен тілдесу, ата-баба рухымен үндесу.Турнирдің бағдарламасына бірнеше күрделі және дәстүрлі нысаналар енгізілген. Әр нысана — ежелгі жекпе-жек немесе аңшылық дәстүрдің көрінісі:Пута нысанасы — 9 оқ, 7 мүмкіндікҚалқан нысанасы — 9 оқ, 7 мүмкіндікОрта Азия нысанасы — 6 оқ, 6 мүмкіндікЖамбы нысанасы — 5 оқ, 5 мүмкіндікЖарыс барысында мергендер тек спорттық дағдысын ғана емес, шыдамдылық, зейін, сабыр мен үйлесімді қимыл секілді қасиеттерді де паш етеді.Чемпионаттың салтанатты ашылу рәсіміне ел көлемінде ұлттық спортты дамытуға үлес қосып жүрген бірқатар белгілі тұлғалар қатысты. Олар қатысушыларға сәттілік тілеп, ұлттық өнердің өрістеуіне атсалысып жүрген азаматтарға алғыстарын білдірді.Салтанатты рәсімде сөз алған «Sadaq Aty» республикалық дәстүрлі садақ ату федерациясының президенті Диас Ахметов ұлттық спорттың мән-маңызы туралы былай деді:«Дәстүрлі садақ ату — біздің тарихи болмысымыздың ажырамас бөлігі. Бұл — тек дене жаттығуы емес, рух тәрбиесі. Біз тек мергендер жарысын өткізіп жатқан жоқпыз, біз ұлттың рухын оятатын, тамырымызға қайта жан бітіретін шара ұйымдастырып отырмыз. Бүгінгі чемпионат — жастарға ұлттық құндылықтарды сіңірудің нақты жолы»Чемпионаттың жоғары деңгейде өтуіне Батыс Қазақстан облысының Дене шынықтыру және спорт басқармасы, БҚО дәстүрлі садақ ату федерациясы және «Sadaq Aty» республикалық федерациясы ұйытқы болды.Жарыс 16 маусым күні өз мәресіне жетеді.Ақпарат көзі : https://www.gov.kz/memleket/entities/bko/press/news/details/1017527?lang=kk

Сапалы ауыз сумен қамтамасыз ету - басты міндеттерінің бірі. Қарағанды облысының әкімі Ермағанбет Бөлекпаев жобаларды жеке бақылауында ұстап отыр. Бұқар жырау ауданында тұрғындармен кездесуден кейін, Доскей ауылының тұрғындары жаңа су құбырымен байланысты проблемаларға шағымданды, өңір басшысы жағдайды анықтау үшін ауылға келді. Облыс әкімімен бірге прокуратура, МСҚБ басқармасының өкілдері де болды.Доскейдегі су құбырын қайта жаңарту жұмыстары өткен жылы аяқталды. Нысан қазір Доскей ауылдық округі әкімі аппаратының балансында тұр. Жаңа желілерге абоненттердің бір бөлігі қосылған, қайта қосуды тамызға дейін аяқтау жоспарланған.Ұңғымалардың бірінде мердігер кепілді міндеттемелер бойынша ақаулы сорғыны ауыстырды. Сонымен қатар, қуаттылығы жоғары жаңа терең сорғылар орнатылды.Облыс әкімі мердігерлер мен авторлық қадағалауды тыңдады. Кездесуде ауыл тұрғындары тек су құбырына ғана қатысты емес сұрақтарын да ортаға салды.Ермағанбет Бөлекпаев туған ауылының проблемаларын көтеріп, сындарлы әрекет етуге тырысатын бастамашыл топқа алғысын білдірді.- Сіздердің ауыл тынысына немқұрайлы қарамайтындарыңыз өте маңызды! - деп атап өтті облыс әкімі. - МСҚБ өкілдерінің қатысуымен жұмыс тобын құруды тапсырамын.Доскейде кәріз желілерін қайта жаңарту жобасы да бақылауда. Жұмыстар өткен жылы басталған, биыл аяқталуы тиіс. Бүгінгі таңда алты көшеге жаңа құбырлар салынып, құдықтар орнатылды.Облыс әкіміне жол жұмыстары туралы да баяндалды. «Қарағанды - Тоғызқұдық - Ботақара» жолы, соның ішінде Доскей арқылы өтетін учаскеде жөндеу жұмыстары жүргізілуде. Биыл ауылда 7 шақырым жол ретке келтіріледі.Кейін Ермағанбет Бөлекпаев тағы да Доскейге келіп, тұрғындармен кездесіп, нәтижесін жеке өзі тексеретінін айтты.Ақпарат көзі : https://www.gov.kz/memleket/entities/karaganda/press/news/details/1017636?lang=kk

Өңірде  ақ халатты абзал жандар ұлықталды. Медициналық қызметкер күніне орай өткен салтанатты жиында облыс әкімі Ғауез Нұрмұхамбетов денсаулық сақтау саласының  мамандарын құттықтап, марапаттарды табыс етті. "Дәрігер болу – жай ғана мамандық емес. Бұл – жанқиярлықты, табандылық пен үлкен жүректі қажет ететін ерекше миссия. Сіздер күн сайын адамдарға үміт, саулық және өмір сыйлайсыздар", -  деді өңір басшысы.  🏥 Облыста медициналық көмектің сапасын жақсарту бойынша жүйелі жұмыс жүргізілуде:  🏡 Ауылдарда 46 медициналық нысан салынды — 55 мың ауыл тұрғыны сапалы медицинаға қол жеткізді  🏢 3 заманауи емхана пайдалануға берілді  💰 Медициналық жабдықтарды сатып алуға бөлінетін қаржы 1,5 есе өсіп, 8,5 млрд теңгеге жетті  🧲 Ангиограф, МРТ, КТ, УДЗ және рентген алынуда  👩‍⚕️ Тар бейінді мамандарға 8,5 млн теңге көтермеақы төленуде  ⚡ Облыста алғаш рет қатерлі ісікті емдеуге арналған инновациялық желілік үдеткіш іске қосылды "Бүгінгі марапаттар – сіздердің еңбектеріңізге берілген әділ баға мен қоғамның шынайы алғысының көрінісі. Кәсіби мерекелеріңізбен шын жүректен құттықтаймын! Сіздерге мықты денсаулық, отбасы амандығын және толағай табыстар тілеймін!", - деді облыс әкімі.Ақпарат көзі : https://www.gov.kz/memleket/entities/sko/press/news/details/1017684?lang=kk

2025 жылдың қаңтар-мамыр аралығында Қазақстан Республикасы Сауда және интеграция министрлігі Тұтынушылардың құқықтарын қорғау комитеті мен оның аумақтық департаменттері азаматтарға тауарлар, қызметтер мен жылжымайтын мүлік сатып алу барысында құқықтық көмек көрсетіп, олардың бұзылған құқықтарын қалпына келтіру бағытында ауқымды жұмыс жүргізді.Осы аралықта тұтынушылардың шағымдары бойынша жалпы сомасы 881,3 миллион теңгеден астам қаражат қайтарылды. Шағымдар көбінесе сапасыз тауарлар (автокөліктер, косметика, ұялы телефондар), орындалмаған қызметтер (шипажай жолдамалары, қоғамдық тамақтану, фитнес, туризм), сондай-ақ рәсімделмеген немесе уақтылы берілмеген жылжымайтын мүлікке қатысты болды.Азаматтарға нақты көмек көрсетілген мысалдар:Алматы қаласында тұтынушы 215 млн теңгеге сатып алған, бірақ үшінші тұлғаға сатылып кеткен жылжымайтын мүлік объектісіне қатысты дау департаменттің араласуымен оң шешімін тапты.Қарағанды облысында 45 күннен аса уақыт берілмеген пәтер бойынша шарт талаптарының орындалуы қамтамасыз етіліп, тұтынушы 33,5 млн теңге тұратын жылжымайтын мүлікке қол жеткізді.Семей қаласында қоғамдық тамақтану орнында тұтынушының тапсырысы орындалмай, мекеме тұтынушылар бұрышын орналастыру міндетін орындамағаны үшін әкімшілік жауапкершілікке тартылды.Ақтөбе облысында тұтынушының туроператорларға қатысты шағымы бойынша сотқа дейінгі және сот процесінде департамент мамандары қолдау көрсетіп, нәтижесінде 6,6 млн теңге өтемақы өндіріліп берілді.Павлодар мен Жетісу облыстарында ондаған тұтынушының құқықтары топтық негізде қорғалды: косметика жиынтығы үшін рәсімделген 10,8 млн теңге несие мен жеткізілмеген смартфондар үшін 7,2 млн теңге қайтарылды.Түркістан облысында Дубай қаласына орындалмаған тур үшін 1,2 млн теңге қайтарылып, Шымкентте санитарлық талаптарға сәйкес келмейтін жерде көрсетілген фитнес қызметтері үшін тұтынушыларға өтемақы берілді.Азаматтар тіпті 700 теңге тұратын сапасыз ойыншыққа қатысты да өтемақы талап етіп, өз құқықтарын қорғады.Бұл деректер – жай статистика емес. Әрбір өтініштің артында нақты тағдыр, үміт пен әділеттілікке деген сенім жатыр. Қазақстандықтар өз құқықтарын қорғауда белсенділік танытып келеді. Біз осы үрдісті жоғары бағалаймыз.Комитет пен оның аумақтық департаменттері бұдан әрі де тұтынушылардың мүдделерін қорғауға, заңнаманың орындалуын қамтамасыз етуге және құқықтық мәдениетті арттыруға күш салуды жалғастырады.Тұтынушылардың құқықтарын қорғау – бұл ұран емес, нақты әрекет.Ақпарат көзі : https://www.gov.kz/memleket/entities/mti/press/news/details/1017681?lang=kk

Петропавлда облыстың жалпы білім беретін мектептерінің есепшілері мен директорлары үшін әйелдерге арналған түзету мекемесіне — №50 мекемеге профилактикалық экскурсия ұйымдастырылды. Іс-шара қоғамда заң мен тәртіп идеологиясын ілгерілету жөніндегі тұжырымдаманы іске асыру және СҚО әкімдігі жанындағы сыбайлас жемқорлыққа қарсы іс-қимыл жөніндегі ведомствоаралық комиссияның хаттамалық тапсырмасын орындау аясында өткізілді.Бастама бюджет қаражатын басқаруға жауапты тұлғалар арасында сыбайлас жемқорлыққа қарсы мәдениетті қалыптастыруға және білім беру саласындағы алдын алу шараларын күшейтуге бағытталған.Экскурсия барысында қатысушыларға сыбайлас жемқорлық құқықбұзушылықтарының құқықтық салдары, сотталғандардың ұсталуы жағдайлары туралы айтылып, нақты сот тәжірибесінен мысалдар келтірілді. Мұндай кездесулер қызметтік міндеттерді орындауда заң талаптарын сақтау мен жеке жауапкершіліктің маңыздылығын еске салады.Ақпарат көзі : https://www.gov.kz/memleket/entities/sko/press/news/details/1017710?lang=kk

Бүгін Бескөлдегі ипподромда ұлттық ат спортының басты оқиғаларының бірі — бәйгеден ел чемпионатының 4-іріктеу кезеңі өтті. Қомақты жүлде қоры мен финалға жолдама үшін елдің мықты шабандоздары бақ сынасты.Солтүстік Қазақстан облысының намысын 13 спортшы қорғап, жорға жарысы бойынша екі солтүстікқазақстандық шабандоз жүлделі орындарға ие болды! 🥈 Әлия Тоқтасынова және Град Лок есімді аты — екінші орын🥉 Андрей Ровдо және Триумф есімді аты — үшінші орын. Бұл жеңістер — солтүстікқазақстандық спортшылардың жоғары деңгейде дайындалғанын және ұлттық спорт түрлерінде көшбасшы болуға деген ұмтылысын дәлелдейді.Ақпарат көзі : https://www.gov.kz/memleket/entities/sko/press/news/details/1017715?lang=kk

«Бәйтерек» ұлттық басқарушы холдингінің компаниялар тобына кіретін «ҚазАгроҚаржы» АҚ өз қаражаты есебінен жаңа лизинг бағдарламасын нарыққа шығарды. Бағдарлама қажеттіліктері қолданыстағы жеңілдетілген бағдарламалардан асып түсетін ауыл шаруашылығы өндірушілеріне бағытталған. Жаңа өнім шаруаларға қазір қолжетімді.Бағдарлама «Бәйтерек» Холдингінің еншілес компанияларды қаржыландыру бағдарламалары бойынша мөлшерлемелерді біріздендіру жөніндегі жаңа стратегиясының шеңберінде әзірленді және жылдық 12,6% мөлшерлемені, 10 жылға дейінгі лизинг мерзімін және 15%-дан басталатын авансты көздейді. Қаржыландыру тек компанияның меншікті қаражаты есебінен жүзеге асырылады, бұл өнімді ағымдағы сұраныс жағдайында ұзақ мерзімді инвестициялық ресурстарға өте икемді етпек.«Жаңа бағдарлама – нарық сұранысына біздің стратегиялық жауабымыз. Жеңілдетілген механизмдерден қалыс қалған бағыттар мен техника түрлері жетерлік. Оларды қаржыландыруға да қажеттілік сақталып отыр. Өз ресурстарымызды пайдалана отырып, біз мемлекеттік бағдарламалардан тыс қалғандар үшін қосымша мүмкіндіктерге жол ашып отырмыз.  Бұл жеңілдетілген шешімдерге балама емес, оларды логикалық және дер кезінде толықтыру», - деп атап өтті «ҚазАгроҚаржы» АҚ басқарма төрағасы Айдар Прашев.Осылайша, бағдарлама шеңберінде 2025 жылы АӨК субъектілерінің кең ауқымын қамти отыра, 20 млрд теңге шамасында қаржыландыру жоспарланып отыр.  Жаңа өніммен қатар, «ҚазАгроҚаржы» отандық техниканы жылдық 5%-бен лизингке берудің флагмандық жеңілдетілген бағдарламасын іске асыруды жалғастыруда. 2025 жылы оған 200 млрд теңге бөлінді, қазірдің өзінде 76 млрд теңге сомасына 4 мыңнан астам техника сатып алу қаржыландырылды. Сондай-ақ, «Қазақстанда жасалған», 6%-бен «Жеңілдетілген лизинг», «Өз жем-шөбіміз» бағдарламалары да қолданыста, осы бағдарламалар бойынша қаржыландыру 18,5 млрд теңге көлемінде деп болжанған.Бұл құралдардың барлығы ауыл шаруашылығын дамытуға, азық-түлік қауіпсіздігін нығайтуға және отандық машина жасауды қолдауға бағытталған.Дереккөз: ҚР Ауыл шаруашылығы министрлігінің ресми сайтыАқпарат көзі : https://www.gov.kz/memleket/entities/zhetysu-oblysy/press/news/details/1017722?lang=kk

ЖАЛПЫ ЕРЕЖЕ1.1. Жетісу облысы әкімі «Құлагер» сыйлығы үшін журналистер арасындағы байқау – облыстағы бұқаралық ақпарат құралдары (бұдан әрі – БАҚ) мен жаңа медиа өкілдері арасында дәстүрлі түрде өткізілетін байқау.Байқаудың ұйымдастырушысы – Жетісу облысының қоғамдық даму басқармасы (бұдан әрі – ҚДБ).1.2. «Құлагер» байқауы Жетісу облысының дамуын ақпараттық қолдауға бағытталған облыстық ауқымдағы іс-шара.1.3. Байқауға Жетісу облысының әлеуметтік-экономикалық дамуы мен өзге де өзекті мәселелерін жариялап жүрген штаттық немесе штаттан тыс авторлар, өңірлік газеттердің редакциялары, телерадиокомпаниялар, шығармашылық бірлестіктер, ақпараттық агенттіктер мен жаңа медиа өкілдері қатыса алады.БАЙҚАУДЫҢ МАҚСАТЫ МЕН  МІНДЕТТЕРІ2.1. Жетісу облысы әкімінің БАҚ өкілдері арасындағы  «Құлагер» байқауы халықты облыс аумағында атқарылып жатқан жұмыстардан хабардар ету мақсатында өтеді.2.2.    Байқаудың негізгі мақсаттары:- бұқаралық ақпарат құралдарын дамыту және ілгерілету;- жаңа медианы танымал ету (блогинг, мобильді журналистика және т.б.);- Жетісу облысының әлеуметтік-экономикалық даму қарқынын көрсету.2.3      Байқаудың негізгі міндеттері:Баспа, электронды БАҚ және жаңа медиа өкілдерінің кәсіби дамуын, шығармашылықта өзін-өзі дамытуын моральдық және материалдық тұрғыда ынталандыру;Облыстағы журналистика қоғамдастығында жаңа перспективалы есімдерді анықтау.КОНКУРСҚА ҚАТЫСУШЫЛАРҒА ҚОЙЫЛАТЫН  ТАЛАПТАР3.1. Жетісу облысы әкімінің БАҚ өкілдері арасындағы «Құлагер» байқауына қатысушылар:- өңірлік БАҚ, Республикалық БАҚ облыстағы меншікті қызметкелері;- жеке үміткерлер – өңірлік және республикалық БАҚ-та жұмыс істейтін журналистер (штаттық және штаттан тыс қызметкерлер), облыстық, қалалық, аудандық мерзімді басылымдар, телерадиокомпаниялар мен басқа да ақпараттық ұйымдардың өкілдері;- жаңа медиа өкілдері (блогерлер, қауымдастық әкімшілері және басқалар).3.2.   Үміткер ұсынылған материалдардың заңды құқықтарына толық жауапты. Үміткер туралы ақпарат өтінімді толтыру кезінде қолданылған орфография мен пунктуацияны сақтай отырып жарияланады;3.3. Өткен жылы (2024 жыл) конкурстың жеңімпазы атанған БАҚ және жаңа медиа өкілдері ағымдағы конкурсқа қатыспайды.                                                           КОНКУРС АТАЛЫМДАРЫ4.1. Байқау келесі аталымдар бойынша өткізіледі:         «Үздік мақала»;«Үздік телесюжет»;«Үздік оператор»;«Үздік бейне жұмыс»;«Үздік баспадизайн»;«Жұмысшы мамандықтарының жылы», «Таза Қазақстан», «Адал Азамат», «Заң және тәртіп» тықырыптарындағы үздік блогерлік жұмыс»;«Үздік фото».АРНАЙЫ НОМИНАЦИЯЛАР    «Үздік баспасөз қызметі»;«Ардагер журналист»;«Бейсен Құранбек атындағы кәсіби шеберлігі үшін».КОНКУРС МАТЕРИАЛДАРЫН БАҒАЛАУ  ӨЛШЕМДЕРІ:5.1.  Байқау бір кезеңде өткізіледі.5.2. Үміткерлер тек бір номинацияға ғана  қатыса алады. Тіркелген баспасөз, электрондық БАҚ-та және жаңа медиада 2024 жылғы 1 маусымнан бастап 2025 жылғы 23 маусым аралығында эфирге шыққан, жарияланған бір материал  ұсынылуы тиіс.5.3.  Берілген материалдардың біліктілік талаптарына сәйкестігін бағалау үшін   ұйымдастырушылар әділқазылар алқасын құрып, бекітеді. Қазылар алқасы тиісті біліктілік талаптарына сәйкес материалдарды сараптамалық бағалау әдісімен саралайды.  5.4. БАҚ материалдарын бағалау өлшемдері (1-ден 5 баллға дейін):Ұсынылған аталымға сәйкестігі;Мәселенің әлеуметтік маңызын азаматтық тұрғыдан көрсету шеберлігі;Материалды ұсынудағы жаңалық және ерекшелік, кәсібилік пен публицистикалық шеберлік;Жарияланым сапасы (тұжырымдар, цифрлар, фактілер);Фотосуреттердегі арнайы эффектілер 30% дан аспауы керек, авторлық құқық бұзылмауы қажет.БЕЙНЕМАТЕРИАЛҒА ҚОЙЫЛАТЫН ЖАЛПЫ ТЕХНИКАЛЫҚ ТАЛАПТАР:Файл көлемі: 25 ГБ дейін;Формат: mp4;Видеокодек: H264 (MainConcept);Bitrate: 3 600-ден 10 000 kbps-ге дейін;Разрешение: 1280х720 немесе 1920 х 1080;Framerate: 25fps;Keyframe: әрқайсысы 25;Қажет болған жағдайда қазылар алқасының мүшелері әр номинацияға қосымша талаптар қоюы мүмкін.БАЙҚАУДЫҢ ӨТУ ТӘРТІБІ6.1.    Өтінімдер осы Ереже жарияланған күннен бастап 2025 жылғы  24 маусымға  дейін қабылданады. Конкурсқа 2024 жылдың 1 маусмынан 2025 жылғы 23 маусым аралығында интернетті қоса алғанда, тіркелген газеттерде, тағы басқа да  БАҚ-та, телеэфирлерде, әлеуметтік желілерде, блогтарда  жарияланған материалдарды ұсынуға болады.6.2.    Байқаудың қазылар алқасы берілген материалдарды бағалайды және ең үздік жұмыстарды іріктейді, солардың ішінен жеңімпазды анықтайды. Материалдардың авторы қазылар алқасы үшін жасырын болады.БАЙҚАУДЫ ҰЙЫМДАСТЫРУ КОМИТЕТІ7.1. Байқауды үйлестіру ұйымдастыру комитетіне жүктеледі.7.2. Ұйымдастыру комитеті байқауды өткізу кезінде деректер базасын әзірлеп, оның ішіне, байқауға қатысушылардың жіберген жұмыстарын, байқауға  қатысушылардың тізімін, байқау жеңімпаздарының тізімін енгізеді.7.3. Ұйымдастыру комитеті жұмыс барысында осы Ережені  басшылыққа алады.КОНКУРСТЫҢ ҚАЗЫЛАР АЛҚАСЫ8.1. Конкурстық жұмыстарды бағалау үшін ұйымдастыру комитеті әр аталым бойынша  қазылар алқасын құрады;   8.2. Қазылар алқасы ізденушілер ұсынған материалдарды қарайды, саралайды және сараптамалық бағалау жасайды;  8.3.    Қазылар алқасының құрамына конкурстың ұйымдастырушысы –қоғамдық журналистік ұйымдардың, республикалық және аймақтық БАҚ өкілдері, қоғамдық бірлестіктер және т.б. 8.4. Қазылар алқасы байқау ұйымдастырушылары тарапынан бекітіледі. КОНКУРС ҚОРЫТЫНДЫСЫН ШЫҒАРУ9.1. Қазылар алқасы конкурстың қорытындысы бойынша жеңімпаздарды анықтайды.9.2.  Марапатқа лайық материалдар болмаған жағдайда қазылар алқасы жүлделі орын бермеу жөнінде байқау  ұйымдастырушыларына ұсыныс жасауға хақылы. 9.3.  Ресми қорытындыларды шығару және жеңімпаздарды бағалы сыйлықтармен марапаттау 2025 жылдың 27 маусымда өтеді. Ресми марапаттау салтанатына жүлделі орын алған журналистер, журналистік ұжымдар, қазылар алқасының мүшелері, ұйымдастырушылар мен демеушілер, мемлекеттік органдардың, іскер, академиялық және журналистік топтардың өкілдері қатысады.9.4. Қазылар алқасымен анықталған байқаудың жеңімпаздары сертификатпен, мүсіншемен және ақшалай сыйақымен марапатталады.БАЙҚАУҒА МАТЕРИАЛДАРДЫ ҰСЫНУ  ШАРТТАРЫ10.1.    Байқауды өткізудің белгіленген мерзімінен бұрын немесе кейін жарияланған, сондай-ақ, бұрын жарияланып, қайта басылған материалдар байқауға қабылданбайды. Ұсынылған материалдардың коммерциялық сипаты болмауы керек. 10.2.    Конкурстық материалдар келесі мекенжайда қабылданады: Талдықорған қаласы, Балапанов көшесі, №28-үй, Жетісу облысының қоғамдық даму басқармасы  немесе мына электрондық мекенжай бойынша: 7su-smi@mail.ru .10.3.    Байқау жұмыстарының тілі – қазақ, орыс;10.4.    Материалдар баспа немесе электрондық түрде қабылданады.10.5.  Электронды басылымдарда өтінімдерді қабылдаудың шарттары:Материалдар MP4, full HD форматта қабылданады;Материалдың хронометражы 5 минуттан аспауы тиіс;Фотосуреттер ең төменгі кеңейтумен 2398х3602 пиксельден бастап.10.6.  Конкурстық материалдар өңделмейді және қайтарылмайды. Байқауға берілген материалдар бұқаралық ақпарат құралдарында, сондай-ақ интернет ресурстарда  және басқа да дереккөздерде  толық немесе ішінара жариялануы мүмкін.Дереккөз: Жетісу облысының қоғамдық даму басқармасыЖетісу облысы әкімінің БАҚ өкілдері арасындағы «Құлагер» байқауының ережесіАқпарат көзі : https://www.gov.kz/memleket/entities/zhetysu-oblysy/press/news/details/1017748?lang=kk