Қарағанды облысында белгілі хирург, профессор Сергей Лохвицкийді мерейтойымен құттықтады. Ол 90 жасқа толды.Қарағанды облысының әкімі Ермағанбет Бөлекпаевтың атынан мерейтой иесін оның орынбасары Ораз Тәуірбеков құттықтап, медицина мен ғылымдағы сіңірген еңбегіне ризашылығын білдірді.– Сіздің өміріңіз – медицинадағы қажырлы еңбек, ғылыми жаңалықтар мен дәрігерлердің жаңа буынын тәрбиелеуге толы тұтас бір дәуір. Сіздің хирургия мен медициналық білімді дамытуға қосқан үлесіңіз өте зор.  Сіздің арқаңызда мыңдаған пациент өмір сүруге мүмкіндік алды, ал жүздеген шәкіртіңіз сіздің ісіңізді жалғастыруда, – деп атап өтті Ораз Тәуірбеков. – Сізге мықты денсаулық, сергектік, бақыт және игілік тілеймін! Сіздің өміріңіз қуанышқа, жақындарыңыздың жылылығына және оқушылардың алғысына толы болсын!Осы жылдар ішінде профессор Сергей Лохвицкий жүзден астам докторанттар мен магистранттарды тәрбиелеп шығарды, олар бүгінде Қазақстанның және одан тыс жерлердегі медициналық мекемелерде жетекші қызметтерде. Оның ғылыми еңбектері мен зерттеулері әлемдік медициналық тәжірибені байытып қана қоймай, көптеген өмірді сақтап қалуға да көмектесті.– Өткен жолыма баға бере отырып, мен ең үлкен ісім – хирургтар мектебімді дайындағанымды айта аламын деп санаймын. Менің мақтанышым – жоғары білікті маман болған шәкірттерім. Бүгінде олар хирургиялық ғылымды дамыта отырып, түрлі елдерде өмір сүріп, жұмыс істеуде, – деп атап өтті мерейтой иесі. – Сондай-ақ, бүгінгі таңда өңірдегі хирургияның айтарлықтай жоғары деңгейде екендігіне мен өте қуаныштымын, Бұл бір жағынан менің күш-жігерімнің және еңбегімнің арқасында деп ойлаймын.Сергей Викторович Лохвицкий 1935 жылы Мәскеуде дүниеге келген. 1958 жылы И. М. Сеченов атындағы Мәскеу медицина институтының емдеу факультетін бітіріп, 1975 жылға дейін Мәскеуде жұмыс істеген. 1975 жылы 40 жастағы Сергей Лохвицкий Қарағандыға көшу туралы шешім қабылдайды, онда оған медициналық институттың госпитальдық хирургия кафедрасының меңгерушісі лауазымын ұсынған. Бұл қадам тағдыршешті болып шықты.Сергей Лохвицкий «Парасат» орденімен марапатталған, Қазақстан Республикасының еңбек сіңірген қайраткері атағына ие.Ақпарат көзі : https://www.gov.kz/memleket/entities/karaganda/press/news/details/940738

Сандықтау ауданында спорт саласы қарқынды дамуда. Оқу орындарында спорттық құрал-жабдықтарды жаңарту жұмыстары жалғасуда, сондай-ақ жаңа спорт нысандарының құрылысы жүргізілуде.Жергілікті әкімдіктің мәліметінше, аудан халқының жартысына жуығы жүйелі түрде дене шынықтыру және спортпен айналысады. Тек өткен жылдың өзінде ауданнан спорт шебері, 15 спорт шеберіне үміткер, бірінші разрядты 5 спортшы және 95 бұқаралық разрядты спортшылар шықты.«Облыстық бюджеттен Балкашинодағы шаңғы-роллер трассасының күрделі жөндеу жұмыстарына қаржы бөлінді. Сондай-ақ көпфункционалды спорт алаңдарын орнату және жабық хоккей кортының құрылысына бюджеттік өтінімдер берілді», – деп мәлімдеді Сандықтау ауданы әкімінің орынбасары Сауле Жайылғанова.

«Таза Қазақстан» бағдарламасы аясында Алматыда белгіленген мерзімнен бұрын қаланың жол инфрақұрылымын ретке келтіру жұмыстары басталды. Қалалық мобилділік басқармасы магистральдық көшелерде жолдарда апатты жағдайлардың алдын алу мақсатында қыста пайда болған шұңқырлардың жойылатынын хабарлады.«Асфальтбетон зауыты мерзімінен бұрын іске қосылды, ол пилоттық режимде ауа температурасы минус -5 градусқа дейін төмендеген кезде асфальтбетон қоспасын тығыздауды қамтамасыз етуге мүмкіндік беретін энергия үнемдейтін қоспалары бар «жылы асфальт» беретін болады. Бұған дейін ҚР Көлік министрлігі хабарлағандай, бұл технологияны Қазақстандық жол ғылыми-зерттеу институты (ҚазжолҒЗИ) әзірлеп, Республикалық маңызы бар автожолда сынап көрді», - деп атап өтті басқарма.Қалалық мобилділік басқармасы жұмыс кезеңінде қозғалысқа ешқандай шектеулер болжанбайтынын атап өтті. Сонымен қатар, көше-жол желісін ағымдағы жөндеу бойынша негізгі жұмыстарды аудан әкімдіктері мен ҚМБ көктемгі-жазғы кезеңде жүргізетін болады.Естеріңізге сала кетейік, ағымдағы жылы қалалық мобилділік басқармасы желісі бойынша 300 шақырым жолды орташа жөндеу, 35 шақырым жаңа жол салу, Сейфуллин–Жансүгіров жолайрығын, Рысқұловтан Мөңке биге дейінгі Сайын көшесі мен Абай даңғылының қала шекарасына дейінгі аралықтарын іске қосу жоспарланған. Бұл жұмыстар сапалы жолдардың үлесін 2024 жылғы 92% - дан 2025 жылы 95% - ға дейін ұлғайтуға мүмкіндік береді.Ақпарат көзі : https://www.gov.kz/memleket/entities/almaty/press/news/details/940440

Алматы әкімі Ерболат Досаев Қытайға ресми сапары барысында ҚХР Жер сілкіністері агенттігінің президенті Ван Кунь мырзамен кездесті.Айта кетейік, Қытайдың Жер сілкіністері агенттігі (China Earthquake Administration, CEA) – елдегі сейсмикалық белсенділікті бақылау, болжау, сейсмикалық қауіп-қатерді бағалау және оған әрекет етуге жауапты мемлекеттік орган.Ерболат Досаев агенттіктің табиғи апаттар қаупін азайту бағытындағы жұмысы туралы танысып, Алматыда сейсмикалық қауіп-қатерді төмендету бойынша жүргізіліп жатқан шаралар туралы баяндады.«Қазақстан аумағының 40%-дан астамы жер сілкінісі қаупі бар аймақта орналасқан. Біз Еуразиядағы сейсмикалық белдеулер жүйесіне кіреміз. Ал Алматының өзі сейсмикалық белсенді аймақта орналасқан. Сондықтан «Алматы қаласын 2025 жылға дейін дамыту және 2030 жылға дейінгі орта мерзімді перспективалары» бағдарламасында сейсмикалық қауіпсіздікті қамтамасыз ету негізгі басымдықтың бірі», – деді Ерболат Досаев.Оның айтуынша, Алматыда күшті жер сілкіністерін болжау және ерте хабарлау үшін 28 станция жұмыс істейді, қосымша 70 станция орнату жоспарланған. Биылдың өзінде 30 станция орнатылса, 2026 жылдың соңына дейін тағы 40 станция іске қосылады.Кездесу қорытындысы бойынша Қазақстанның сейсмологиялық байқау және зерттеулер ұлттық ғылыми орталығы мен Қытайдың Жер сілкіністері агенттігінің Геофизика институты арасында сейсмикалық мониторинг және ерте хабарлау жүйелерін біріктіру бойынша бірлескен жұмыс туралы келісімге қол қойылды. Бұл құжат екі ел мамандарына сейсмикалық ақпаратпен нақты уақыт режимінде алмасуға мүмкіндік береді.«Халықты табиғи апаттар туралы алдын ала хабардар ету және олардың жер сілкінісіне дайындығын қамтамасыз ету – өзекті мәселенің бірі. Осыған байланысты CEA және Қытайдың Геофизика институтымен ынтымақтастық біз үшін өте маңызды», – деп атап өтті Ерболат Досаев.Өз кезегінде ҚХР Жер сілкіністері агенттігінің президенті Ван Кунь мырза қол қойылған келісім Қазақстан мен Қытай арасындағы сейсмикалық қауіпсіздік саласындағы ынтымақтастықты нығайтуға маңызды қадам болатынына сенім білдірді. Сондай-ақ, ол Алматының табиғи апаттарды мониторингтеу және оған әрекет ету бойынша үлкен әлеуетке ие екенін атап өтіп, CEA тарапынан сейсмикалық мониторинг пен ерте әрекет ету бойынша тәжірибе алмасу барысында жан-жақты қолдау көрсетілетінін айтты.Ақпарат көзі : https://www.gov.kz/memleket/entities/almaty/press/news/details/940441

ҚХР-ға ресми сапар аясында Алматы әкімі Ерболат Досаевтың Қытай Экспорттық-Импорттық банкінің (China Exim Bank) президенті Ван Чуньинмен кездесуі өтті.Келіссөздердің басты тақырыбы негізгі инфрақұрылымдық жобаларды қаржыландыру шарттарын талқылау, атап айтқанда, Алматы метрополитенінің желісін кеңейту болды.«Біз белсенді және жемісті ынтымақтастықтың негізі болып табылатын елдеріміздің көшбасшылары арасындағы тығыз саяси диалогты жоғары бағалаймыз. Алматыда метро желілерін салу жөніндегі жобалар Қазақстан Республикасы Үкіметінің кепілдігімен сыртқы қарыз алуды тарта отырып, ЕРС+F-келісімшарт қағидаты бойынша іске асырылатын болады. Біз осы жобаны қаржыландыру шарттары бойынша China Exim Bank ұсыныстарын егжей - тегжейлі талқылауға дайынбыз, сондай-ақ басқа да инфрақұрылымдық жобаларды іске асыруға қатысуға шақырамыз», - деп атап өтті Алматы әкімі Ерболат Досаев.Өз кезегінде, Ван Чуньин ханым Exim Bank Қазақстанда 16 жыл бойы түрлі жобаларды қаржыландырумен айналысып келе жатқанын және жол инфрақұрылымын, энергетиканы, өнеркәсіпті және жылжымайтын мүлікті салу объектілерін инвестициялауда мол тәжірибесі бар екенін хабарлады.«Біздің Қазақстанмен өзара іс-қимылымыздың маңызды саласы көлік, инфрақұрылымдық құрылыс салу болып табылады. 5 ірі жол жобасы бойынша бізде 2,4 млрд. АҚШ доллары көлемінде келісім шарт жасалған. Қазір біз Алматы әкімдігімен ынтымақтастық үшін барлық күш - жігерімізді жұмсауға дайынбыз», - деді Ван Чуньин.Кездесу қорытындысы бойынша тараптар бірлескен жұмысты жалғастыруға және серіктестік қатынастарды нығайтуға дайын екендіктерін білдірді.Анықтама:China Exim Bank (Қытай Эксим банкі) 1994 жылы құрылған. Банктің Қытайда, Парижде 32 филиалы, сондай-ақ Гонконгта, Африканың бірқатар елдерінде, Ресейде, Польшада, Чилиде және Өзбекстанда өкілдіктері бар. Банк Қытайдың сыртқы саудасын, инвестицияларын және халықаралық экономикалық ынтымақтастығын қолдаумен айналысады, тұрақты дамуды қолдау үшін «жасыл» несиелеуді белсенді түрде ілгерілетуде.Ақпарат көзі : https://www.gov.kz/memleket/entities/almaty/press/news/details/940691

ҚХР-ға жұмыс сапары аясында Алматы әкімі Ерболат Досаев Tus-Holdings Co. директорлар кеңесінің төрағасы Ван Цзюмен кездесті. Тараптар инновация, технологиялық даму және инвестициялық жобалар бойынша ынтымақтастықтың келешегін талқылады.Tus-Holdings Co. – Цинхуа университеті негізінде құрылған ғылыми-технологиялық инвестициялық мемлекеттік-жекеменшік холдингтік топ. Оның нарықтық капитализациясы 28 млрд АҚШ доллар. Компанияның әлемнің 80-ден астам қаласында инновациялық техноорталықтары, 200-ден астам технологиялық инкубаторлары және 400 технопаркі бар. Сондай-ақ, Tus-Holdings Co. Бейжіңде «TusPark» жобасын жүзеге асыруда. Бұл әлемдегі ең ірі университет жанындағы ғылыми-технологиялық парк.Кездесу барысында Қазақстанда бизнес-инкубатор, білім беру кластері және ғылыми парк құру сияқты жобаларды іске асыру мүмкіндігі қарастырылды.Ерболат Досаевтың айтуынша, Алматыда экономиканы әртараптандыру аясында жоғары технологиялық өндірістер, креативті индустрия, IT-сектор және туризм қарқынды дамып келеді. Қаладағы Индустриалды аймақ пен «ИТП» АЭА бүгінде автомобиль жасау, медициналық бұйымдар өндірісі, ғылыми-білім беру және АКТ (ақпараттық-коммуникациялық технологиялар) салаларында кластерлер қалыптастыратын негізгі алаңдарға айналған.«Өткен жылдың желтоқсан айында халықаралық рейтинг агенттігі Fitch Алматы қаласының тәуелсіз несиелік рейтингін «BBB+» деңгейінде растады. Бұл Қазақстан Республикасының «BBB» деңгейіндегі егемендік рейтингінен жоғары. Алматының жоғары несиелік рейтингі қарқынды экономикалық дамуымен, жергілікті бюджеттің кірістерінің айтарлықтай өсуімен және төмен қарыз жүктемесімен байланысты. Қазақстанның ең ірі экономикалық орталығы ретінде қаламыз Қытай инвестициялары үшін негізгі хаб болуға дайын», – деді Ерболат Досаев.Өз кезегінде, Tus-Holdings Co. директорлар кеңесінің төрағасы Ван Цзю «Алматы – Қазақстандағы ең инвестициялық тартымды өңірлердің бірі» екенін атады. Ол компанияның «ИТП» АЭА-пен серіктестікке қызығушылық білдіретінін және Қазақстанды ғылыми және технологиялық бастамаларды жүзеге асыру үшін болашағы зор нарық ретінде қарастыратынын айтты.Tus-Holdings Co. өкілдері биыл наурыз айында Қазақстанға келіп, жергілікті нарықты зерттеу мақсатында кездесу өткізуді жоспарлап отыр. Сондай-ақ, Алматыда 50/50 үлесімен бірлескен технопарк ашу мәселесі қарастырылады.Келіссөздердің қорытындысында Ерболат Досаев Tus-Holdings Co. өкілдеріне кездесуге уақыт бөлгені үшін алғыс білдіріп, технологиялық кәсіпкерлік экожүйесін дамыту аясында өзара тиімді серіктестікке сенім артатынын айтты.Ақпарат көзі : https://www.gov.kz/memleket/entities/almaty/press/news/details/940697

Бүгін, Алматы қ. жыл сайынғы халықаралық «Индустриялық құрылыс» конференциясы басталды. Конференцияның тақырыбы құрастырмалы бетон конструкциялық жүйелерге бағытталған.Конференция екі күнге созылады. Бірінші күні қатысушылар тақырыпқа қатысты өзекті мәселелер бойынша баяндамалар жасайды.Биыл шараға Германия, Эстония, Корея, Өзбекстан, БАӘ, Моңғолия және Қазақстанды қоса алғанда, әлемнің 10-нан астам елінен сарапшылар қатысуда.Конференция жетекші мамандарды озық шешімдерді талқылау, тәжірибе алмасу және іскерлік байланыстар орнату мақсатында біріктіріп, индустриялық құрылыстың жаһандық маңыздылығын айқындайды.ТМД елдерінің сейсмотұрақты құрылыс саласындағы Негізгі ұйымы және «ҚазҚСҒЗИ» АҚ атынан конференцияның ашылуында Бас директор Бегман Кульбаев құттықтау сөз айтты.Өз сөзінде ол «ҚазҚСҒЗИ» АҚ-ның индустриялық құрылыс саласындағы зерттеулер мен әзірлемелерге белсенді қатысатынын атап өтіп, ұйым жұмысының негізгі бағыттарына тоқталды. Атап айтқанда, Қазақстанда құрастырмалы темірбетонды қолдану бойынша ғылыми зерттеулер негізінде техникалық нормаларды әзірлеу, сондай-ақ құрастырмалы конструкциялардың сейсмотұрақтылығын зерттеу, бұл әсіресе Алматы және басқа да сейсмикалық қауіпті аймақтар үшін өзекті. Сонымен қатар, ол модульдік құрылыстың техникалық және экономикалық талдауына ерекше мән берді.Сондай-ақ, ол Негізгі ұйым аясында кәсіпорынның құрастырмалы темірбетон құрылыс жүйелерін пайдалану, сейсмикалық қауіпті аймақтарда азаматтық және қоғамдық ғимараттарды салу мәселелерін талқылау үшін алаң ұсынуға дайын екендігін баса айтты. Ақпарат көзі : https://www.gov.kz/memleket/entities/mps/press/news/details/940865

Астана қаласында Қожа Ахмет Ясауи атындағы ХҚТУ-дың Өкілетті Кеңесінің 78-мәжілісі өтіп, өзекті мәселелер қаралып, маңызды шешімдер қабылданды.Жиынға Өкілетті Кеңес Төрағасы, профессор Мухиттин Шимшек, Қазақстанның Ғылым және жоғары білім министрінің орынбасары Талғат Ешенқұлов, Түркия тарапынан Өкілетті Кеңес мүшесі Ибрахим Калын, Қазақстан Парламенті Сенатының депутаты, танымал ғалым және қоғам қайраткері Дархан Қыдырәлі, Түркия тарапынан Мәдениет және туризм вице-министрі Сердар Чам, Түркістан облысы әкімінің орынбасары Бейсенбай Тәжібаев, Қазақстанның Қаржы министрлігі Әлеуметтік сала бюджеті департаментінің директоры Жанар Алдасугурова және университет ректоры Жанар Темірбекова қатысты.Мәжіліс барысында Өкілетті Кеңес Төрағасы, профессор Мухиттин Шимшек алғы сөз сөйлеп, қатысушыларға сәттілік тіледі.Бұдан әрі күн тәртібінде университеттің дамуы мен стратегиялық бағыттарына қатысты маңызды мәселелер қарастырылды. Атап айтар болсақ, ректорат тарапынан атқарылған жұмыстардың есебі тыңдалып, 2025 жылдың бюджеті талқыланды.2025-2026 оқу жылы Түркия Республикасынан, Түркі тілдес республикалар мен туыстас қауымдастықтардан және басқа мемлекеттерден қабылданатын студенттер контингентін, ТүрТЕП бағдарламаларына қабылданатын студент контингентін белгілеу туралы ұсыныстар зерделенді. 2025-2026 оқу жылына шәкіртақы негізінде магистратура, докторантура және кәсіби біліктілікті арттыру мен тәжірибе алмасуға жіберілетін үміткерлердің санын және Ясауи атындағы докторантура бағдарламасының шәкіртақы контингенті мен мамандықтарын анықтау мәселесі қарастырылды. Университет құрамында "Заң" факультеті мен "Өнер, медиа және дизайн" факультетін ашу туралы шешім қабылданды. Дайындық орталығында "Жалпы пәндер" бөлімін құру ұсынысы қарастырылды.Күн тәртібінде, сондай-ақ, университеттің стратегиялық бағыттарын қамтитын басқа мәселелер де қарастырылды.Өкілетті Кеңес мәжілісіне қатысушылар отырыс қорытындысында жиынның нәтижелі өткенін тілге тиек етіп, қабылданған шешімдердің жемісті болатынына сенім білдірді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940560

Өткен демалыс күндері Иран Ислам Республикасының астанасы Тегеранда Қазақстан мен Иранның бизнес-форумы өтті. Оған 50-ден астам қазақстандық кәсіпкер мен 230 ирандық бизнес өкілі жиналды. Форум ҚР Сауда және интеграция министрі Арман Шаққалиев пен Иранның ауыл шаруашылығы министрі Голамрез Нури Гезельдженің төрағалығымен ұйымдастырылды. Тараптар өзара тиімді ынтымақтастық үшін елеулі әлеуетке ие екенін айтып, екі ел арасындағы сауда-экономикалық байланыстарды одан әрі дамытудың маңыздылығын атап өтті.Форум аясында B2B кездесулер, сондай-ақ келісімдерге қол қою рәсімі өтті. Қазақстанның сауда-экономикалық миссиясы барысында жалпы сомасы 92,8 млн АҚШ долларына 10 коммерциялық құжатқа қол қойылды, бұл Иран мен Қазақстан арасындағы сауда қатынастарын нығайтудағы маңызды қадам. Өз кезегінде Қазақстан Иран нарығына 250 млн доллар сомасына 75 өнім түрін жеткізуге дайын екенін білдірді.Жұмыс сапары аясында Арман Шаққалиев Иранның орталық мемлекеттік органдарының өкілдерімен, соның ішінде ауыл шаруашылығы, өнеркәсіп, шахталар және сауда министрлерімен, сондай-ақ жол және қала құрылысы министрімен келіссөздер жүргізді.Қазақстан ауыл шаруашылығы саласындағы екіжақты ынтымақтастықты дамытуға, сондай-ақ Иранға ауыл шаруашылығы өнімдерін жеткізуді ұлғайтуға үлкен мән беруді жалғастыруда. Мәселен, өткен жылдың қорытындысы бойынша екі ел арасындағы тауар айналымы 340 млн долларды құрады, бұл өткен жылмен салыстырғанда 12,3%-ға артық. Екіжақты ынтымақтастықтың басым бағыттарының бірі болып табылатын ауыл шаруашылығына ерекше назар аударылды. 2024 жылдың 12 айында Қазақстан мен Иран арасындағы ауыл шаруашылығы өнімінің тауар айналымы 219,8 млн долларды құрады, бұл 2023 жылдың сәйкес кезеңімен салыстырғанда 33,3%-ға артық. Қазақстан бидай, арпа, ұн және өсімдік майларын жеткізуді ұлғайтуға мүдделі. Иран дәстүрлі түрде Қазақстанның астық экспорты бойынша негізгі серіктестерінің бірі болып табылады және таяу жылдары Қазақстан астық экспортын ұлғайтуға ниетті.Иранның ауыл шаруашылығы министрі Голамреза Нури Гезельджемен кездесуде «QazTrade» сауда саясатын дамыту орталығы« АҚ Бас директоры Айтмұхамед Алдажаров Тегеранда Қазақстанның «QazTrade» тауарлар мен қызметтер экспортын ілгерілету жөніндегі ұлттық институтының серіктестік кеңсесін ашуды ұсынды. Бұл кеңсе қазақстандық кәсіпкерлерге жаңа серіктестер табуға және Иран нарығында өнімді тиімді жылжытуға мүмкіндік береді.«QazTrade» екіжақты сауда қатынастарын дамыту бойынша белсенді жұмыс жүргізуде және қазірдің өзінде Иранда үш табысты сауда-экономикалық миссияны ұйымдастырды. Олар - 2021 жылы (11-12 қазан), 2022 жылы (21-22 ақпан) және 2023 жылы (24-26 сәуір) өткен сауда экономикалық миссиялар. Осы миссиялардың қорытындысы бойынша маңызды келісімшарттарға қол қойылды: 2021 жылы 16 қазақстандық тауар өндіруші 5 млн АҚШ долларынан астам сомаға келісімге қол қойды, 2022 жылы 14 млн АҚШ долларынан астам сомаға келісімге қол қойған 15 компания қатысты, 2023 жылы 20 компания 60,4 млн АҚШ доллары сомасына экспорттық келісімшарттарға қол қойды.Сонымен қатар, сапар барысында Қазақстанның сауда министрі Иранның 100 ірі кәсіпкерін қамтитын «Корафарин» кәсіпкерлер кеңесімен кездесті. Кездесуде сауда-экономикалық ынтымақтастықты кеңейту перспективалары, сондай - ақ химия өнеркәсібінен тоқыма және орман өнеркәсібіне дейінгі әртүрлі салалардағы тауарлар өндірісі мен сұранысына қатысты мәселелер талқыланды.Арман Шаққалиевтің жұмыс сапары Каспий өңірі елдерінің сауда-өнеркәсіптік және ауыл шаруашылығы ынтымақтастығын дамытуға арналған үшінші Каспий экономикалық форумының пленарлық сессиясына қатысуымен жалғасуда. Министр өтпелі тарифтерді белгілеу, жүктерді декларациялау, бірыңғай IT-шешімдерді қолдану және транзиттік жүктерді шығару мәселелерін талқылай отырып, ТМТ дәлізі шеңберінде бірлескен жұмысты нығайтудың маңыздылығын атап өтті. Арман Шаққалиев Қазақстанның транзиттік және экспорттық мүмкіндіктері көрші елдердің инфрақұрылымдық мүмкіндіктеріне де байланысты екенін айтты.Ақпарат көзі : https://www.gov.kz/memleket/entities/ontustik/press/news/details/940563

Мемлекет басшысы айтқан «Дамыған аймақтар – қуатты экономика» қағидатын іске асыруда Түркістан облысында нақты қадамдар жасалуда. Сайрам ауданында салынып жатқан қуаты 1 мың МВт болатын электростанция іске қосылғандаТүркістан облысында энергия тапшылығы шешіледі. «Самұрық-Қазына» қорының еншілес ұйымы – «БГҚ Түркістан» ЖШС қолға алған бу-газ станциясының құрылысы Сайрам ауданының Қарамұрт елді мекенінде жүзеге асуда.Оңтүстік Кореяның «Doosan Enerbility» және Қазақстандық «Bazis Construction» компаниялар консорциумы іске асырып жатқан жоба 2 миллионнан астам тұрғыны бар Түркістан облысындағы энергия тапшылығын еңсеруге көмек көрсететін жаңа буын энергия өндіретін кәсіпорын болмақ.Құны 800 млрд теңге тұратын жоба толық өндірістік қуатына шыққанда 926,5 МВт электр қуатын өндіреді. Мұнда қойылатын газ турбиналық қондырғылар Германияның «Siemens Energy» компаниясының өнімі болса, бу турбиналық қондырғылар Чехияның «Doosan Skoda Power» компаниясының өнімі болмақ. Италиядан қазандық құрылғылары, Қазақстанның «Asia Trafo» компаниясынан қуат арттыру трансформаторлары әкелінеді. Үздік технологиялық шешімдер бойынша салынып жатқан кешен үшін 60 га жер бөлінген.Қазір мұндағы құрылысқа 11 компаниядан 2500-ге жуық адам тартылған. Оладың көбі – Төлеби, Сайрам ауданының тұрғындары. Құрылыс жұмыстары аяқталып, кәсіпорын тұрақты жұмыс істеуге көшкенде мұнда тұрақты жұмыспен қамтылатын азаматтардың саны 300-400-ге жетеді деген болжам бар.Қазір кәсіпорын қажеттілігі үшін жоғары қысымды газ жеткізуде магистральды газ құбыры салынып жатыр. Газ жүйелері тартылатын аймақтар бойынша жерлерді жекеменшік иелерінен сатып алу жұмыстары атқарылып, құрылыс-монтаждау жұмыстарының қарқыны артқан.Электр қуатын өндіретін аумақтан экономикаға оң әсерін беретін, жергілікті тұрғындарды тұрақты жұмыс орындарымен қамтитын және аймақтың өндірістік әлеуетін көтеруге баса мән берілуде. Оның ішінде осы аймақта өндірістік парк салу бастамасы жүзеге асырылмақ.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940567

«Таза Қазақстан» экологиялық мәдениетті дамытудың 2024-2029 жылдарға арналған тұжырымдамасын іске асыру аясында Мақтаарал ауданында тазалық іс-шарасын өткізу бойынша марафон басталды.Мырзакент кентінде бастау алған тазалық шарасына аудан әкімі Бақыт Асанов, аудандық мәслихаттың хатшысы Қадір Сәрсекбаев, «Amanat» партиясының аудандық филиалының төрағасы Мұхтар Сәрсенов, аудан әкімінің орынбасарлары Бауыржан Шомпиев пен Серік Тұрсынқұловтар, барлық қоғамдық ұйымдардың басшылары мен мүшелері, мемлекеттік мекемелердің, кәсіпкерлік нысандардың ұжымдары және кенттің тұрғындары қатысты.– Бұл іс-шараның мақсаты – тұрғындарымыздың экологиялық белсенділігін арттыру, табиғатты қорғауға қатысты жауапкершіліктерін күшейту және қоғамды тазалыққа шақыру. Марафон барысында әр кент пен округтің тұрғындары, мемлекеттік, жекеменшік мекемелердің қызметкерлері бірлесіп, сол аумақты қоқыстан тазартып, табиғатқа, туған жерге құрметпен қарау идеологиясы сіңіріледі, – деді Бақыт Насырханұлы.Марафон барысында 12 тоннадан астам күл-қоқыс шығарылып, бұл қоқыстар аудан аумағындағы қатты тұрмыстық қалдықтарға арналған полигонға төгілді.Сонымен қатар шараға 5 техника мен 500-ден аса адам қатысты.Айта кетейік, Мырзакент кентінде бастау алған марафон басқа да кенттер мен округтерде жалғасын табады. Орталық тұрғындары тазалық бойынша челленджді Жаңажол ауылдық округінің тұрғындарына жолдап, баршаны тұрып жатқан өлкемізді таза ұстауға шақырды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940580

Бауыр трансплантациясы – қазіргі заманғы хирургиядағы ең күрделі оталардың бірі. Алайда профессор Б.Баймаханов басқарған А.Сызғанов атындағы ҰҒХО мамандарының жоғары біліктілігі мен үйлесімді жұмысының арқасында өңірдегі операция сәтті өтті.Науқас Нурметова Ульяна, 48 жаста, бауыр циррозы ауруымен ауырды. 2019 жылдан бастап гастроэнтерологтың бақылауында болды, оған Child-Turcotte-Pugh жіктемесі бойынша В класты вирус этиологиялы бауыр циррозы диагнозы қойылған. Амбулаторлық және стационарлық ем қабылдап жүрген. Ауруы порталдық гипертензиямен, ісінумен, гиперспленизм синдромымен асқынып, науқастың жағдайын қиындата түсті. Ұзақ уақыт жүргізілген емдеу шараларына қарамастан, жағдайы нашарлап, оған бауыр трансплантациясы өмірін сақтап қалудың жалғыз мүмкіндігі болды.Донор ретінде науқастың 19 жастағы қызы Сахавитдинова Эльвира жан-жақты медициналық тексеруден өтті.Бауыр трансплантациясы Түркістан облыстық клиникасының базасында ұлттық ғылыми хирургия орталығының мамандары мен академик Б. Баймахановтың жетекшілігімен өткізілді. Бұл операция шеңберінде В.Мутагиров, М. Жұмабекова (анестезиологтар), М. Досханов, С. Тілеуов, Ж.Оспан (хирургтар) және облыстық клиникалық аурухананың мамандары белсенді жұмыс атқарды.Қазіргі уақытта науқас дәрігерлердің динамикалық бақылауында. Отадан кейінгі кезең ауыр асқынуларсыз өтіп, трансплантацияланған органның қызметі біртіндеп тұрақталып келеді.Бұл операция аймақ тарихындағы алғашқы бауыр трансплантациясы болды және Түркістан облысында трансплантология саласының дамуына жаңа мүмкіндік ашты.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940582

Түркістан облысында білім саласына жан-жақты қолдау көрсетіліп, білім сапасын көтеруге жағдай жасалуда. Осы ретте мектептерді жаңғырту жобасына Түркістан облысынан 115 мектеп енгізілген. 2025-2027 жылдары 115 мектептің ғимараттарына күрделі және ағымдағы жөндеу жұмыстарын жүргізу және асхана, кітапхана, спорт зал, сынып бөлмелерін жабдықтау, қауіпсіздік жүйесімен, пән кабинеттерімен, жиһаздармен қамтамасыз етуге болжаммен 64,3 млрд. теңге қаржы қажет екені анықталған.Бүгін облыс әкімдігінде мектептерді жаңғырту жобасы аясында атқарылатын жұмыстар мен жоспарлар талқыланды. Түркістан облысының әкімі Нұралхан Көшеров бюджетті үнемдеп әрі тиімді пайдалануды, құрылыс жұмыстарын сапалы және уақтылы атқаруды тапсырды.– Мектептерді күрделі жөндеу бойынша құрылыс жобаларын қайта қарап шығыңыздар. Жауапты басқармалар есебін шығарып, нақты мәлімет ұсынсын. Бюджеттің әрбір тиынын үнемдеу қажет. Нақты, қажетті жобаларға қолдау көрсетіледі. Мектептерді жаңғырту жобасын жүзеге асыру барысы қадағалауда болады, – деді Нұралхан Көшеров.Мемлекет басшысы Қасым-Жомарт Тоқаев 2024 жылғы, 2 қыркүйектегі Қазақстан халқына Жолдауында республика көлемінде 1300 мектепті жаңғыртудан (реновациядан) өткізу туралы тапсырма берген болатын. Түркістан облысынан осы жобаға 115 мектеп енгізіліп отыр.Жалпы реновацияға қажет қаражат көлемі 2025 жылы облыстық бюджет есебінен бөлінеді деп жоспарланған. Ал 2026, 2027 жылдары жаңғыртудан өтуі тиіс 74 мектепті жөндеуден өткізу үшін болжаммен 42,9 млрд. теңгені республикалық бюджеттен шешу жолдары салалық министрлікпен пысықталуда.2025 жылға жоспарланған 41 мектептің ішінде ағымдағы жөндеумен 15 мектеп қамтылса, 26 мектеп күрделі жөндеуден өтеді. 2025 жылы күрделі жөндеу жұмыстарын қажет ететін 26 мектептің 6-уының (2024 жылдан өтпелі) толық қаржысы облыстық бюджеттен қаралған. Ал 3 мектепті «Ауыл – Ел бесігі» бағдарламасымен жүзеге асыру көзделген.Айта кетейік, Түркістан облысында жалпы 1087 орта білім беру мекемесінде 554 753 оқушы оқып жатыр. Оның ішінде мемлекеттік 920 мектепте 503 665 оқушы оқыса, жекеменшік 167 мектепте 51 088 оқушы білім алуда.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940587

Түркістан облысының «Ашық әкімдік» кеңсесінің қоғамдық қабылдау алаңында облыс әкімінің орынбасары Ертай Алтаев тұрғындарды жеке қабылдап, өтініш-тілектерін тыңдады.Әкім орынбасарымен бетпе-бет кездесуге Сайрам, Жетісай, Келес, Ордабасы аудандарының тұрғындары арнайы келді. Шағымдар мен ұсыныстардың басым бөлігі мәдениет, спорт және ақпараттық салаларға қатысты болды. Атап айтқанда, БАҚ-қа қатысты ұсыныстар және мемлекеттік тапсырыс мәселелері бойынша өтініштер, облыстың құрметті азаматы мәртебесін беру, «Еңбек ардагері» төсбелгісін алу, мәдениет саласын дамыту, ауылдық шалғай жерге клуб салу, қоғамдық ұйым жұмыстарын жандандыру, асық ойынын Наурыз мерекесінде дәріптеу, футбол спортын дамыту жобалары ұсынылды.«Тұрғындардың арыз-шағымы назардан тыс қалмайды» деген облыс әкімінің орынбасары жеке қабылдауда тұрғындар тарапынан көтерілген әрбір мәселе хаттамаға енгізіліп, заң аясында тиісті жұмыстар жүргізілетінін айтты. Жауапты басшыларға мәселелерді зерделеп, шешуді тапсырды. Өтініштер бақылауға алынды.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940851

Бүгінде мемлекет халықты жұмыспен қамту бағытына ерекше назар аударып отыр. Бұл мәселе тұрғындарының 75 пайыздайы ауылды жерлерде тұратын Түркістан облысы үшін айрықша маңызға ие. Сол себепті облыс әкімі Нұралхан Көшеров жұмыспен қамту жұмыстарының жүйелі әрі сапалы түрде орындалуын өзі бақылап отырады. Жұмыспен қамтудың бір тетігі – субсидияланатын жұмыс орындары. Бұл бағытта атқарылатын жұмыстарды облыстық жұмыспен қамтудыүйлестіру және әлеуметтік бағдарламалар басқармасының басшысы Әсия Темірбаева баяндады.Жұмыс берушілер кәсіпорында субсидияланатын жұмыс орындарын ашып,«Мансап» орталығында тіркелген жұмыссыздарды қабылдай алады. Азаматтардың еңбекақысы толығымен немесе ішінара мемлекет тарапынан «Мансап» орталығы арқылы төленеді. Өткен жылы Түркістан облысында субсидияланатын жұмыс орындарына 33 мыңнан астам азамат жолданып, облыс көлемінде жоспар асыра орындалған.Субсидияланған жұмыс орындары бойынша жүргізілген зерделеу қорытындысы бірқатар кемшіліктердің бетін ашып, кейбір келісімшарттар бұзылды. Еңбек тәртібінің сақталуы бойынша мониторинг жұмыстары тұрақты жүргізілетін болады. Зейнетақы төлеу орталығы арқылы заңдылығы қадағаланады.«Таза Қазақстан» шарасы аясында көгалдандыру, абаттандыру және тазалау жұмыстарына аудан, қалаларға 6 мыңнан астам азамат жолданбақ. Талап – еңбек тәртібінің сақталуы. Сондай-ақ қоғамдық жұмысқа тартылғандарды барынша тұрақты жұмыспен қамту шаралары жүзеге асырылады.Облыс әкімі жұмыс орындарын ашу, жергілікті тұрғындарды жұмыспен қамтуға басымдық беруді тапсырды.– Мемлекет басшысының жүктеген тапсырмаларының бірі – жаңа жұмыс орындарын ашу, халықты тұрақты жұмыспен қамту. Сол себепті де, халықтың тұрмыс сапасын жақсарту – негізгі міндет. Осы тұрғыда, облысымызда тұрақты жаңа жұмыс орындарын ашуға және жергілікті тұрғындарды жұмыспен қамтуға басымдық беріледі, – деді облыс әкімі.Биыл 32 465 адамды уақытша жұмыс орындарына жолдау жоспарланған. Оның ішінде жастар практикасымен 11 мыңнан астам адам, қоғамдық жұмыс орындарына 14 мыңға жуық адам, әлеуметтік жұмыс орындарына 4 680 адам, «Күміс жас» жобасымен зейнеткерлікке жетпеген 50-61 жасқа дейінгі 2 760 азамат жұмыспен қамтылмақ. Субсидияланған жұмыс орындарын ұйымдастыру мақсатында жалпы сипаттағы трансферт есебінен 32 679 млн.теңге қаралған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/940890

Кадет сыныбы С.Ластаев атындағы орта мектепте салтанатты түрде ашылып, 7-сыныптың 20 оқушысы қабылданды. Сыныпқа осы ауданның тумасы, Катонқарағай аудандық ішкі істер бөлімінің милиция жүргізушісі аға сержант Бағыбек Тікебаевтың есімі берілді. Ол 1994 жылы 3 қыркүйекте тергеу-қамауға алынған қылмыскерлерді айдауылдау барысында қызметтік міндетін атқару кезінде қаза тапқан.Кадет сыныбының ашылуы өскелең ұрпаққа әскери-патриоттық тәрбие беруге, құқық қорғау органдарында қызмет етуге қызығушылықты арттыруға және оқушылардың кәсіби бағдарын айқындауға бағытталған.Оқушылар үшін полиция қызметкерлерінің киім үлгісіне сай форма дайындалды. Сынып қажеті құралдармен жабдықталды.ШҚО Білім басқармасының келісімімен кадеттердің оқу бағдарламасына құқық қорғау қызметінің негіздері, алғашқы әскери дайындық, алғашқы медициналық көмек көрсету сынды қосымша пәндер енгізілді. Оған полиция қызметкерлері мен тиісті сала мамандары тартылатын болады.Ақпарат көзі : https://www.gov.kz/memleket/entities/akimvko/press/news/details/940597

Жұмысшы мамандықтар жылында жоғары білікті кадрларды даярлауға баса назар аударып, практикаға бағдарланған білім беруді дамыту қажет.Осы мақсатта Алматы, Маңғыстау, Қарағанды және Шығыс Қазақстан облыстарындағы оқу орындары, әлеуметтік серіктес саналатын кәсіпорындар, «Атамекен» өңірлік ұлттық кәсіпкерлер палатасының өкілдері дуальды оқытудың маңызын талқылады.- Дуальды оқыту – елдің тұрақты дамуының маңызды бөлігі. 2024 жылы 4936 студент оқу бітіріп, оның 4275-і жұмысқа орналасты. Дуальды оқыту жүйесі бойынша кадрлар даярлау түлектердің жұмысқа орналасу деңгейін арттыруға әсер етеді, - деді ШҚО Білім басқармасы басшысының орынбасары Әлима Ақылбек.ШҚО Білім басқармасының мәліметінше, дуальды оқыту 44 мамандық бойынша 27 колледжде жүзеге асырылады. Яғни, 5000-нан астам студент білім алады. Дуальды оқытуға шамамен 448 кәсіпорын мен әлеуметтік серіктес компаниялар қатысады.- Дуальды оқыту жүйесін дамытуда тәлімгерлік маңызды рөл атқарады деп санаймыз. Білім алушылар уақытының 60%-ын тәжірибе алаңында өткізеді, - дейді ШҚО Кәсіпкерлер палатасының адами капиталды дамыту бөлімінің бастығы Әсет Әділхан.Семинарға қатысушылар дуальды оқытуды жүзеге асыру тәжірибесімен бөлісіп, осы бағыттағы өзекті мәселелерді шешу әдістерін талқылады.Ақпарат көзі : https://www.gov.kz/memleket/entities/akimvko/press/news/details/940637

Өскемен қаласында есту қабілеті бұзылған жеңіл атлеттер арасында Қазақстан чемпионатының ашылу рәсімі өтті. Жарысты ұйымдастырушылардың айтуынша, басты мақсат – спортшылардың шеберлігін арттырып, біліктілігін көтеру.– Чемпионатқа еліміздің 13 өңірінен 150-ден астам спортшы қатысуда. Жарыс барысында бірнеше медаль жиынтығы сарапқа салынады, сондай-ақ қараша айында Токиода өтетін Сурдлимпиада ойындарына алдын ала іріктеу жүргізіледі, – деп атап өтті Қазақстан құрамасының аға жаттықтырушысы Богдан Весельский.Жарыс бағдарламасына бірнеше жеңіл атлетика түрлері енген:Спринтерлік жүгіруОрта және ұзақ қашықтыққа жүгіруҰзындыққа және биіктікке секіруНайзаны сермеп секіруЭстафеталық жарыстар және басқа да дисциплиналар– Чемпионатқа Петропавл қаласынан 11 спортшыны алып келдік: 10 ересек спортшы мен бір қыз бала. Бұл жарыстан жоғары нәтижелер күтеміз. Себебі, чемпионат – 2025 жылдың қарашасында өтетін Сурдлимпиада ойындарына іріктеудің маңызды кезеңдерінің бірі, –деді "UNIT" спорт клубының жаттықтырушысы Рустам Шаке.Чемпионатқа Алматы, Павлодар, Маңғыстау, Қарағанды, Жамбыл, Ақмола, Қостанай, Шымкент, Шығыс Қазақстан, Абай облыстарынан және басқа да аймақтардан спортшылар қатысып жатыр.Ақпарат көзі : https://www.gov.kz/memleket/entities/akimvko/press/news/details/940836

Қазақстан Республикасы Мәдениет және ақпарат министрлігі мен Бірыңғай грант операторы 2025 жылға арналған үкіметтік емес ұйымдарға грант беру байқауын жариялады.Байқаудың мақсаты – азаматтық бастамаларды қолдау және азаматтық қоғам институттарын әлеуметтік саладағы өзекті мәселелерді шешуге тарту.Байқау аясында ҮЕҰ бірнеше басым бағыттар бойынша жобаларды ұсына алады:- Инклюзивті қоғамды дамыту;- Ауылдағы азаматтық бастамаларды дамыту;- Азаматтардың құқықтарын қорғау және қоғамдағы құқықтық мәдениетті арттыру жөніндегі шаралар мен іс-шараларды ұйымдастыру;- Төтенше жағдайлардағы және ТЖ салдарын жоюдағы волонтерлікті дамыту;- «Таза Қазақстан» акциясы аясында экологиялық волонтерлікті дамыту;- Медицина саласындағы волонтерлікті дамыту;- Тарих және мәдениет саласындағы волонтерлікті дамыту;- Әлеуметтік волонтерлікті дамыту;- Зооволонтерлікті дамыту.Толық ақпарат пен құжаттаманы cisc.kz сайтынан қарауға болады.ҚР Мәдениет және ақпарат министрлігінің баспасөз қызметіҮЕҰ-ға арналған гранттар беру байқауы басталдыАқпарат көзі : https://www.gov.kz/memleket/entities/zhetysu-oblysy/press/news/details/940375

Жетісу облысында үшінші қант зауытының құрылысын жүргізу туралы инвесторлармен келісімдер жасалуда. Соның нәтижесінде 1 млн. тоннаға дейін қант қызылшасын өңдеуге мүмкіндік туады. Бұл туралы облыс әкімі Бейбіт Исабаев «Jetisy» телеарнасы студиясында облыстық БАҚ өкілдеріне берген кеңейтілген сұхбаты барысында айтты, - деп хабарлайды Жетісу облысы әкімінің баспасөз қызметі.- Биыл Көксу қант зауытына 60 млн евроға модернизациялық жаңарту жұмыстары жүргізіледі. Сол арқылы зауыттың жылдық қуаттылығы 500 мың тоннаға жетеді. Ал Ақсу қант зауытының қуаттылығы - 350-400 мың тонна. Сонда қазірдің өзінде 800-900 мың тонна қызылша өңдеуге қабілетіміз бар. Жетісу жерінің құнары жеткілікті. Оған қоса суару жүйелерін жаңғыртып, суармалы жерлердің көлемін арттырамыз. Сол кезде қант қызылшасының көлемін 1 000 000 тоннаға жеткізуге мүмкіндігіміз бар. Мұндай мол өнімді үшінші қант зауытын іске қоссақ, өзімізде толықтай өңдей аламыз, - деді Б.Исабаев.Еске салсақ, былтыр Жетісу облысында 13 мың гектар жерден 630 мың тонна қант қызылшасы жиналды. Бұл - тәуелсіздік алған жылдардан бергі алғашқы мол өнім. Орташа көрсеткіш гектарына 450-500 центнерден айналды. Облыс әкімінің айтуынша, мұндай үлкен көрсеткіштің артында өте ауқымды жұмыс жатқанын анық. Ал өткізудегі уақытша қиындық Жамбыл облысындағы диқандардың жағдайына байланысты туындаған. Жамбыл облысынан 100 мың тонна қант қызылшасын қабылдап, Ақсу қант зауытына өңдеуге алынған.Биылғы жылдың жоспарларына тоқталған өңір басшысы ауыл шаруашылығы өнімдерін өңдеуге көп көңіл бөлінетінін атап өтті. Осы мақсатта облыста құс фабрикасын және жүгері өңдейтін зауыт салу туралы инвесторлармен жұмыс жүргізіліп жатыр.Жалпы өңірде өндірілетін қант қызылшасы, жүгері, бидай, ет, сүт сияқты ауыл шаруашылығы тауарларының 65%-ы өзімізде өңделеді. Өткен жылы ауыл шаруашылығындағы өсім 3% болды.Фотограф: Жеңіс Ысқабай, сол сияқты фотосуреттер облыс әкімі баспасөз қызметінің архивінен алынды. Ақпарат көзі : https://www.gov.kz/memleket/entities/zhetysu-oblysy/press/news/details/940667