Қарағанды облысының жастар саясаты мәселелері жөніндегі басқармасын Айсұлу Ерниязова басқарды.Айсұлу Ерниязова еңбек жолын 2015 жылы әл-Фараби Қазақ ұлттық университетінің жастар ұйымдарымен жұмыс жөніндегі жетекші маманы болып бастаған, содан кейін сол жерде жастар ұйымдарымен жұмыс жөніндегі комитетті басқарған.Әр жылдары Алматы халықаралық бизнес университетінің жастар саясаты орталығының басшысы, «Алматы еріктілер лигасы» қоғамдық қорының атқарушы директоры, Халықаралық білім корпорациясының әлеуметтік даму департаментінің директоры, Jas Otan (Астана) жастар қанаты төрағасының орынбасары болған.2023 жылдан бастап мемлекеттік қызметте. Қазақстан Республикасы Ғылым және жоғары білім министрінің кеңесшісі болды.Осы уақытқа дейін Астанадағы "Жастар" ғылыми-зерттеу орталығы" ЖШС директоры болып жұмыс істеді.Ақпарат көзі : https://www.gov.kz/memleket/entities/karaganda/press/news/details/939033

Елнар Уахитов Қарағанды облысы Мемлекеттік сатып алу басқармасының басшысы қызметіне тағайындалды.Елнар Уахитов еңбек жолын 2003 жылы «Қарағанды Жылу» ЖШС материалдық-техникалық жабдықтау бөлімінің маркетинг және сапа жөніндегі менеджері болып бастаған. Содан кейін «Қарағанды Тех Сервис» ЖШС директоры, «Маркетингтік және талдамалық зерттеулер орталығы» АҚ өкілдігінің консультанты, Қарағанды облысы әкімінің тұрғын үй-коммуналдық шаруашылық жөніндегі орынбасарының бас маман-кеңесшісі болып жұмыс істеді.Әр жылдары Қарағанды облысының энергетика және коммуналдық шаруашылық басқармасы басшысының орынбасары, Қарағанды облысы әкімі аппаратының ұйымдастыру жұмысы бөлімінің меңгерушісі, Қарағанды облысының жолаушылар көлігі және автомобиль жолдары басқармасы басшысының орынбасары, Қарағанды облысының жолаушылар көлігі және автомобиль жолдары басқармасы көлік және байланыс бөлімінің басшысы, Шахтинск қаласы әкімінің орынбасары, Индустрия және жаңа технологиялар министрінің кеңесшісі қызметін атқарды.2017 жылдың қаңтарынан бастап осы күнге дейін Астана қаласы «Есіл» ауданы әкімінің орынбасары қызметін атқарған.Ақпарат көзі : https://www.gov.kz/memleket/entities/karaganda/press/news/details/939034

Қарағанды ЖЭО-3-те биыл үш қазандық агрегаты мен екі турбинаны күрделі жөндеу жоспарланған. Едәуiр сома 1977 жылы станция негiзi қаланғаннан бері жұмыс iстеп келе жатқан № 1 қазандықты жаңартуға көзделген. ЖЭО-1-де екі қазандық және бір турбина күрделі жөндеуден өтпек. Сондай-ақ, энергия көздерінде негізгі және қосалқы жабдықтарға ағымдағы жөндеу жұмыстары жүргізіледі.«Инвестиция орнына тариф» бағдарламасы туралы «Қарағанды Энергоцентр» компаниясында айтылды.2025 жылғы 1 ақпаннан бастап жылу және электр энергиясын өндіруге арналған жаңа тарифтер күшіне енді. Өзгерістерді тиісінше Табиғи монополияларды реттеу комитеті мен ҚР Энергетика министрлігі бекітті.Өндірістік шығындардан басқа тарифтер күрделі жөндеулерге, инвестициялық бағдарлама бойынша жабдықтарды жаңғыртуға арналған шығыстарды қамтиды.– 2025 жылы жөндеу науқанының құны 23,8 млрд теңгені құрайды. Бұл қаражат жабдықтардың сенімділігін қамтамасыз етуге, экологиялық тазалықты жақсартуға және қуаттылық бойынша шектеулерді алып тастауға жұмсалады. Барлығы екі станцияда шамамен 26 бірлік жабдық жөндеумен қамтылады, – деп хабарлады «Қарағанды Энергоцентр» ЖШС бас директоры Флюр Гарипов.Ол бұған дейін «Инвестиция орнына тариф» бағдарламасы бойынша жүзеге асырылған ірі жобаларды еске салды. 2012 жылы ЖЭО-3 жаңа турбина іске қосылды, 2016 жылы жаңа энергоблок салынды. Жыл сайынғы күрделі жөндеулермен қатар бұл станцияның тозуын төмендетуге мүмкіндік берді.Компания басшысының айтуынша, соңғы бес жылда қызметкерлердің жалақысы 100%-ға өсті. ЖЭО-3-те 900 адам, ЖЭО-1-де 300 адам жұмыс істейді. Кадрлар тапшылығы мәселесін ЖЭО-3 базасында оқу орталығын ашу және өңірдің колледждерімен дуальді оқытуды дамыту арқылы шештік, деп атап өтті Флюр Гарипов.ЖЭО-3 директоры Константин Пятков ескі қазандықтың алдағы күрделі жөндеуі туралы толығырақ айтып берді.– Жөндеу жұмыстарының ең үлкен көлемі осы қазандық бойынша. Қазандықтарды үлгілік жөндеу кезеңділігі төрт жылды құрайды. Ал биыл аса күрделі жөндеу жұмыстары жүргізіледі. Қазандықтың оттық камералары толығымен ауыстырылады – бұл шамамен 150 тонна металл. Сондай-ақ жылыту беті мен су экономайзері жаңартылады - бұл тағы 40 тоннаға жуық. Бұдан басқа, газ тазарту жабдықтарын қайта жаңарту көзделген. Екінші буын эмульгаторы үшінші буын жабдығына ауыстырылады. Бұл тазарту дәрежесін арттырады, сәйкесінше қоршаған ортаға шығарындыларды азайтады. Ал жалпы күрделі жөндеу нәтижесінде жабдықтардың сенімділігі, жұмыс тұрақтылығы артады, – деп түсіндірді ол.Спикерлер қажетті жабдықтарға шетелде тапсырыс берілетінін және оны жасау 90 күннен бастап жарты жылға дейін созылатынын айтты. Сондықтан барлық жөндеу науқанын бір жыл бұрын қалыптастырған. Биылғы жылыту маусымы аяқталғаннан кейін 2026 жылға арналған бағдарлама дайындалады.Бұдан басқа, энергия тапшылығы проблемасын шешу үшін ЖЭО-3-те кеңейту жөніндегі жобаны іске асыру басталды. 2028 жылға дейін жаңа энергоблок орнату жоспарлануда. Бұл станцияның электр қуатын 140 МВт және жылу қуатын 180 Гкал/сағ арттырады.– Барлық шарттарға қол қойылды: жобалау, жабдықтарды жеткізу және құрылыс-монтаждау жұмыстары. Құрылыс үшін жер телімін дайындадық. Жобаны іске асыру нәтижесінде қосымша 55 жұмыс орны құрылады, – деді Флюр Гарипов.Сондай-ақ, 2027 жылдан бастап іске асырылатын турбиналық жабдықтарды жөндеу бағдарламасы әзірленді.Ақпарат көзі : https://www.gov.kz/memleket/entities/karaganda/press/news/details/939040

Қарағанды облысының екі ауданының тұрғындары пәтер кілттерін алды. Бұқар жырау ауданының Көкпекті ауылында он отбасы жаңа баспанаға ие болды, ал Абай ауданында кезекте тұрған 30 адам қоныс тойын тойлады.«Самұрық-Қазына» ұлттық әл-ауқат қорының қолдауымен Көкпекті ауылында екі пәтерлі бес үй салынды. Әр пәтер үш бөлмелі. Жалпы ауданы - 84 шаршы метр.Кілттерді халықтың әлеуметтік осал топтарынан төрт отбасы, төрт көп балалы отбасы және үйлері апатты деп танылған екі отбасы алды.Екатерина Ақтұқашева үш баланы жалғыз өзі тәрбиелеп отыр.– Пәтерлер өте жақсы: жылы, едендер тегіс, жөндеу де сапалы жасалған. Мен бәрі соншалықты заманауи болады деп ойламаған едім. Көшіп келіп, тұра беруге болады! Жеке бөлмедегі тәуліктік қазандық - бұл керемет ыңғайлы. Пәтерде шаң да, түтін де болмайды, – дейді Екатерина Ақтұқашева. – Әсіресе балаларым бақытты! Менің екі оқушы балам және екі жастағы кішкентай балам бар. Енді олардың жеке үлкен бөлмесі болады.Тағы бір қоныс иелері – Батима Наскейдің көп балалы жанұясы. Он жыл бойы Сарытөбе мектебінде медбике болып жұмыс істеді, содан кейін көп балалы ана ретінде зейнетке шыққан. Отбасында бес бала бар.– Тұрғын үйді ұзақ уақыт жалға алып тұрып келдік. Енді пәтер кілтін алдық, – дейді Батима Наскей. – Үй өте жақсы, кең. Жақын арада көшеміз. Көп балалы аналарға қолдау көрсеткені үшін рахмет – бұл мемлекет тарапынан үлкен көмек!Жыл бойы Бұқар жырау ауданында кезекте тұрған 100-ден астам адамды баспанамен қамтамасыз ету жоспарланған.Сондай-ақ, Абай ауданының 30 тұрғыны жаңа пәтерлердің кілтін алды. Олардың арасында толық емес отбасылар, жетім балалар, мүмкіндігі шектеулі жандар, қандастар мен зейнеткерлер бар. «Халық Билдинг» ЖШС салған жаңа бес қабатты үйдегі пәтерлерді Мемлекет басшысының бастамасымен жергілікті атқарушы органдар сатып алды. Үйде 12 бір бөлмелі, 8 екі бөлмелі және 10 үш бөлмелі пәтер бар.Кілттерді тапсыру барысында Абай әкімі Сәбит Оспанов дайын тұрғын үйді жеке құрылыс салушылардан сатып алу кезекте тұрғандардың тұрғын үй мәселесін шешуде айтарлықтай ілгерілеуге мүмкіндік беретінін атап өтті.– Өмірлеріңізде жаңа тарау басталады, – деп құттықтады Сәбит Оспанов. – Сіздердің пәтерлеріңіз тек қабырға мен шатырға ғана емес, әрқашан жылы, қуаныш пен отбасылық игілік болатын нағыз жайлы ошаққа айналсын!Қоныс иелерінің арасында Ауғанстандағы соғыс ардагері Қайрат Борашев те бар.– Ардагерлер мен тұрмысы төмен адамдарға қамқорлық көрсетіп отырғаны өте қуанышты, – деді Қайрат Борашев. – Тамаша пәтер.Сонымен қатар, таяу арада Абайда өткен жылы құрылыс салушылардан сатып алынған тағы 10 жаңа пәтердің кілтін тапсыру жоспарланып отыр.Биыл құрылыс салушылардан дайын тұрғын үйді сатып алу бағдарламасы жалғасады. Абайда бұл жоба бойынша 90 отбасы, ал Топарда 40 отбасы пәтер алуы тиіс.2025 жылы Абайда 30а орамында бес қабатты кредиттік үйдің құрылысын аяқтау жоспарлануда. 80 пәтерлі үй 2023–2029 жылдарға арналған тұрғын үй-коммуналдық инфрақұрылымды дамыту тұжырымдамасы бойынша бюджет қаражаты есебінен салынуда. Пәтерлер кезекте тұрғандарға «Отбасы банк» тетіктері арқылы беріледі.Сондай-ақ, Абайда тағы бір бес қабатты үй мен екі пәтерлі бір қабатты үйлер салынып жатыр, Топарда екі көппәтерлі үй қалпына келтірілуде.Абай ауданының тұрғындарына пәтерлер кезек тәртібімен беріледі.Ақпарат көзі : https://www.gov.kz/memleket/entities/karaganda/press/news/details/939475

Қарағанды облыстық бейнелеу өнері мұражайы «Шығармашылық идеялар галереясы» көрмесіне шақырады. Келушілер болашақ дизайнерлер мен сәндік-қолданбалы өнер шеберлері – Қарағанды техникалық-құрылыс колледжінің студенттері қандай бағытта жұмыс істеп жатқанын көреді.Көрменің ашылуы 19 ақпанда сағат 16:00 болады.– Бұл Қарағанды техникалық-құрылыс колледжінің дизайн және сәндік-қолданбалы өнер бөлімімен біздің алғашқы ынтымақтастығымыз емес. Оқу орны айтарлықтай жоғары деңгейде. Студенттер мен олардың оқытушыларының жүзге жуық жұмыстары ұсынылады. Өнердің түрлері мен жанрлары әр түрлі: кескіндеме, графика, дизайн-жобалар, хендмейд және т. б., – деді көрменің кураторы Айгүл Омарова.Көрме 2 наурызға дейін жалғасады.Қарағанды техникалық-құрылыс колледжінде оныншы жыл қатарынан сәндік-қолданбалы өнер шеберлері даярлануда. Студенттерге қыш өңдеу, былғарыдан, киізден бұйымдар жасауды үйретеді.Ақпарат көзі : https://www.gov.kz/memleket/entities/karaganda/press/news/details/939504

Атырау облысының әкімі Серік Шәпкенов «КаР-Тел» компаниясының атқарушы директоры Евгений Настрадинді қабылдады, - деп хабарлайды әкімдіктің баспасөз қызметі.Қос тарап бірлесе атқарылатын жұмыстың жәй-жапсарын талқылап, аймақтың телекоммуникациялық инфрақұрылымын дамытудың негізгі бағыттары туралы ақылдасты.“КаР-Тел” ЖШС-гінің атқарушы директоры Евгений Настрадин компанияның жасаған жұмыстары мен алдағы жоспарын айтты.Былтыр компания 306 базалық бекет тұрғызып, модернизациядан өткізген, 15 дабылсыз аумақта байланыс реттелген. 2025-2026 жылдары қосарлы қызмет атқаратын тіректер орнатылып, “ақтаңдақтарды” жоюға күш салынады. Дәлірек айтқанда, 90 аумақта байланыс реттеледі. Бұдан бөлек, “КаР-Тел” компаниясы өңір тұрғандарының жоғары жылдамдықтағы интернетке үздіксіз қосылуын қамтамасыз ете отырып, үй интернеті желісін белсенді дамытуға ниетті.Аймақ басшысы ғаламтордың өмірдің ажырамас бөлшегіне айналғанын, ал оған қолжетімділік өлкенің дамуында маңызды роль ойнайтынын айтты. Облыс әкімі байланыс сапасын арттырып, қамту аумағын кеңейтуге бағытталған жобаларды қолдауға дайын екенін жеткізді.Кездесу соңында Атырау облысы әкімдігі мен «КаР-Тел» ЖШС-гі арасында аймақта байланыс пен интернетті дамыту жөніндегі меморандумға қол қойылды. Бұл құжат тараптардың өңірдегі, әсіресе ауыл-аймақтағы байланысты жандандырып, интернетті қолжетімді ету мақсатындағы телекоммуникациялық инфрақұрылымды дамытудағы келісімін бекітеді.Ақпарат көзі : https://www.gov.kz/memleket/entities/atyrau/press/news/details/939073

Атырау Жастар театрында әйгілі композитор Илья Жақановтың өмірі мен шығармашылығына негізделген «Еділ мен Жайық» мюзиклінің премьерасы өтті, - деп хабарлайды облыс әкімінің баспасөз қызметі. ⁃Біз бүгін қазақ мәдениеті мен руханияты үшін ерекше жайтқа куә болып отырмыз. Жоғары деңгейде өткен мюзиклдан алған әсерім ерекше. Өйткені сахнада Илья ағамызды сомдап жатса, қасымда кейіпкердің өзі отырды. Ілия Жақанов – қазақ музыка өнерінің дамуына өлшеусіз үлес қосқан, еліміздің мақтанышы. Оның өмірін жолын бір сахнада екі сағаттық қойылымда тамашаладық. Жолында кездескен қиындықтар мен аяқтан шалуды да көрсетті. Сол жолда таланты мен қызметін ұлтына арнады. Бұл сахналық туынды Қазақстанның түкпір-түкірінде сахналанса, Атырау өңірі үшін үлкен мақтаныш болар еді. Мюзикл көрерменнің жүрегіне жол тауып, қазақ мәдениетінің баға жетпес жауһарына айналады деп сенемін, - деді облыс әкімі Серік Шәпкенов. Мюзиклда И.Жақановтың соғыс жылдарымен тұспа-тұс келген балалық шағынан бастап бозбалалық дәурен, жігіттік кезеңдері және қайраткерлік шағындағы өмір иірімдері, елі мен жеріне деген азаматтық ұстанымдары, жан сарайынан ән болып өрілген адами сезімдері көркемдік тұрғыда көрініс тапты. Бала Ильяның бойына мейірім сыйлаған Жақан әке мен Балкен ана, өнерге іңкәр жігітке бата берген Ахмет Жұбанов, өнер жолында рухтас жандарға айналған Жұбан мен Шәмші бейнелері, елдікті ту еткен Махамбет батыр елесі — бәрі өмірі әнге айналған тұлғаның жан-сарайын айшықтайды. Қойылымда Жастар театрымен бірге «Sarmad» этно-фольклорлық және «Gazhap band» вокалдық-аспаптық ансамбльдері, Д. Нұрпейісова атындағы халықтық музыка академиясы, Атырау музыкалық колледжінің студенттері өнер көрсетті. Айта кетейік, қойылымның авторы Мәдина Омарова, ал қоюшы режиссері Қазақстанның еңбек сіңірген қайраткері, «Құрмет» орденінің иегері Асхат Маемиров.Ақпарат көзі : https://www.gov.kz/memleket/entities/atyrau/press/news/details/939079

Өткен демалыста аймақ басшысы Серік Шәпкенов “QazaqGaz” ҰҚ” АҚ-ның басқарма төрағасы Санджар Жаркешовпен жүздесіп, Қашағандағы газ өңдеу зауыты жобасын жүзеге асыруға қатысты мәселелерді талқылады.Кездесуде бас мердігерлер “KCG” ЖШС-гі, “Іntegra” ЖШС-гінен өкілдер де болып, құрылыстың қазіргі жағдайы, сондай-ақ жобаны іске асырудағы өзекті мәселердің шешімі турасында баяндады.Құрылыстағы жалпы прогрестің бүгінгі көрсеткіші — 42%. Соңғы мәліметтерге сай, құрал-жабдықтың 90%-ы жеткізілген, монтаж қарқынды жүріп жатыр. Құрылысқа 900-ден аса маман, 75 техника жұмылдырылған. Биылғы мамырдан бастап персонал санын 2000-ға жеткізу жоспарланған.“Нысанда құрылыс-монтаж жұмыстары белсенді жүріп жатыр. Көктем келе ірі технологиялық жабдықтарды орнатуды бастаймыз. Үкімет бекіткен кесте бойынша зауыт 2026 жылдың аяғында пайдалануға берілуі тиіс”,- деді Санджар Жаркешов.Облыс әкімі Серік Шәпкенов жобаны уақытында аяқтаудың маңызына тоқталып, мердігерлердің жұмысын қадағалау, кадрмен қамту, экологиялық қауіпсіздік сынды негізгі мәселелерге баса назар аударды. Аймақ басшысы жиын барысында жобаны іске асырушылардың жұмысын үйлестірудегі ашықтық пен жұмыстык мерзімге сай жүруін міндеттеді. Зауытты уақытында іске қосуға қажетті ресурсты жұмылдырып, тиімді әріптестік орнату керек.Ақпарат көзі : https://www.gov.kz/memleket/entities/atyrau/press/news/details/939563

Бүгін Мемлекеттік қызмет істері агенттігінде Премьер-министрдің орынбасары Қанат Бозымбаев пен Агенттік төрағасы Дархан Жазықбайдың қатысуымен сайланған аудандық маңызы бар қалалардың, ауылдардың, кенттердің, ауылдық округ әкімдерінің біліктілігін арттыру бағдарламасы ашылды. Іс-шараға Президент Әкімшілігінің лауазымды адамдары, Аманат партиясының және еліміздің өзге де саяси партияларының өкілдері, Президент жанындағы Мемлекеттік басқару академиясының оқытушылары, сондай-ақ өңірлерден аудан және ауыл әкімдері онлайн қатысты. Президент Қасым-Жомарт Тоқаев Қазақстан халқына жолдауында азаматтардың талабына сәйкес әкімдерді тікелей сайлау жүйесі іске қосылып, барша ауыл әкімдерінің 90 пайызға жуығы сайланғанын айта келе, олардың 60 пайызы бұрын мемлекеттік қызметте істемегенін атап көрсетті. Сонымен қатар, Үкіметтің кеңейтілген отырысында әкімдердің біліктілігін арттыруды Үкімет пен Агенттікке тапсырды.Бұл ретте, Агенттік төрағасы Д. Жазықбай Мемлекет басшысының тапсырмасын сапалы орындау мақсатында әкімдерді оқытудың тиімділігіне ерекше мән беру қажеттігіне тоқталды. Сонымен қатар, Д.Жазықбай «Cаяси партиялар Ауыл әкімдерін сайлау кезінде өздері ұсынатын кандидаттардың тұлғалық жауапкершілігі мен кәсіби даярлығына назар аударғаны жөн. «Адал Азамат» идеалдарына сай, шынайы мақсаты ел игілігіне әділ қызмет етуді көздейтін адамдардың жұмысынан қашанда оң нәтиже күтуге болады», - деді. Өз кезегінде әкімдердің кәсіби біліктілігін арттыру 17 модуль арқылы жүргізіледі.Атап айтқанда:- жергілікті бюджетті тиімді пайдалану;- мемлекеттік сатып алулар мен салықтар;- коммуналдық меншікті басқару, экология мен қоршаған ортаны қорғау;- кәсіпкерлікті дамыту және мемлекеттік қолдау, аймаққа инвестиция тарту;- мемлекеттік басқарудағы цифрлық технологиялар, жасанды интеллект құралдарын қолдану;- қабылданған шешімдердің сәттілігіне әсер етуі мүмкін тәуекелдерді басқару, тиімді коммуникациялар және өзге дағдыларды дамытуды көздейді.Бағдарлама практикалық жаттығулар, интерактивті пікірталастар, тренингтер, экономика, мемлекеттік басқару, құқықтану салалары бойынша сарапшылармен кездесу және оффлайн, онлайн форматта 240 академиялық сағат оқытуды қамтиды. Бұдан өзге, жұмыс барысында ең көп жол берілетін кемшіліктерді ескере отырып, практикалық кейстер және оларды тиімді шешу жолдары қаралатын болады.Оқытудың қорытындысына сәйкес әкімдер өңірлерді экономикалық дамытуға қатысты жобаларын қорғайды.Жиын барысында, әлемде цифрландыру мен технологияның қарқынды дамуына сәйкес елімізде өңірлердің экономикалық әлеуетін арттыру үшін білікті менеджерлерді қалыптастырудың маңыздылығын ескере отырып, әкімдердің біліктілігін арттыру барысында теориялық әрі практикалық тәсілдерді қолдану қажеттігі айтылды.Бағдарлама Президент жанындағы Мемлекеттік басқару академиясының базасында, республикалық маңызы бар қалалар мен облыстардағы филиалдары арқылы жүзеге асырылады.Ақпарат көзі : https://www.gov.kz/memleket/entities/aqmola/press/news/details/939954

Қытай Халық Республикасына ресми сапары аясында Алматы әкімі Ерболат Досаев Бейжің қалалық жоспарлау орталығына - қазіргі заманғы қала құрылысы және қаланы дамыту қағидаттарын көрсететін бірегей мекемеге барды.Ерболат Досаев экология, қала құрылысы мәселелерімен, Бейжіңнің 2016-2035 жылдарға арналған Бас жоспарының қалалық аумақтарды игеруге және оларды бірыңғай агломерацияға интеграциялауға жүйелі көзқарасты көрсететін негізгі аспектілерімен танысты.Алматы әкімі Алматы және Бейжің қалаларын дамытудағы жаңа тәсілдердің полиорталықтық даму бөлігіндегі ұқсастығын атап өтті. Қытай астанасында полиорталықтар New Town деп аталады. Мұндай тәсілдер ыңғайлы тұруды, инфрақұрылымды теңгерімді дамытуды және экологиялық тепе-теңдікті сақтауды қамтамасыз ете отырып, жүктемені орталық, аудандар және агломерация арасында бөлуге мүмкіндік береді.«Бейжіңдегі қала құрылысы орталығы жай ғана көрме емес, бұл жаһандық үдерістерге сай қаланың қалай дамитыны туралы жанды көрініс. Біз қаламыздың тұрақты дамуын қамтамасыз ете отырып, үздік тәжірибелер мен идеяларды Алматыда қолдануға мүдделіміз», - деп атап өтті Ерболат Досаев.Ақпарат көзі : https://www.gov.kz/memleket/entities/almaty/press/news/details/939919

ҚХР-на жұмыс сапары аясында Алматы әкімі Ерболат Досаев бұлтты есептеулер, үлкен деректер және интеллектуалды шешімдер әзірлеуде жетекші қытайлық Inspur Group компаниясының басшылығымен кездесті. Келіссөз барысында тараптар қалалық инфрақұрылымды цифрландыру, озық ІТ-шешімдерді енгізу және көлік жүйесін интеллектуалды басқару саласындағы ынтымақтастық мүмкіндіктерін қарастырды.Серіктестік аясында Inspur Group Алматыда бірқатар бастаманы жүзеге асыруды жоспарлап отыр. Атап айтқанда, көлікті басқару бойынша командалық орталық құру, серверлік жабдықтар мен цифрлық шешімдерді жеткізу, Алматыда зияткерлік көлік жүйесін (ITS) енгізу – бұл қаладағы жол қозғалысын үйлестіру тиімділігін арттыруға бағытталған. Бұған қоса, компания Алматыда көлік технологияларын дамыту, төтенше жағдайларға әрекет ету, су ресурстарын қорғау, денсаулық сақтау және зияткерлік терминалдар саласындағы шешімдерді әзірлеу жөніндегі ғылыми-зерттеу орталығын ашу мүмкіндігін қарастыруда.Кездесу соңында тараптар қалалық қызметтердің сапасын арттыру және Алматыдағы көлік легін басқаруды жақсарту мақсатында ынтымақтастық пен серіктестікті одан әрі дамыту жөнінде келісімге келді.Анықтама:Inspur Group – серверлік жабдықтар, бұлтты платформалар және бағдарламалық шешімдер жеткізетін әлемдегі ірі компаниялардың бірі. Ол Қытайдың ішкі нарығының 40%-ын қамтиды және 120-дан астам елде «ақылды қалалар», қозғалысты басқару, салықтық бақылау және цифрлық білім беру технологияларын әзірлеуге қатысады. Бүгінде Inspur жабдықтарын жеткізетін екі компания Қазақстанда жұмыс істейді. Орталық Азия аймағында зерттеу жұмыстарын жүргізуге арналған сервистік орталық ашу жоспарлануда. Сондай-ақ, LED/LCD дисплейлер, зарядтау бекеттері және басқа да технологиялық шешімдер шығаратын зауыт салу үшін жергілікті серіктестермен бірлесіп жұмыс істеу көзделіп отыр.Ақпарат көзі : https://www.gov.kz/memleket/entities/almaty/press/news/details/939928

Алматы мен Қытайдың ірі қалалары арасындағы әуе қатынасын кеңейту, сондай-ақ туристік және іскерлік байланыстарды нығайту мәселесі Алматы әкімі Ерболат Досаев пен Air China Limited әуе компаниясының төрағасы, China National Aviation Holding Company президенті Ма Чонсянь мырзамен кездесу барысында талқыланды. Бұл іс-шара Алматы әкімі Ерболат Досаевтың Қытай Халық Республикасына жасаған жұмыс сапары аясында Бейжіңде өтті.Кездесудің негізгі нәтижесі – Алматы әкімдігі мен Қытайдың ұлттық әуе тасымалдаушысы Air China арасындағы рейстерді ашуға жәрдемдесу жөніндегі меморандумға қол қоюы болды.Тараптар екі ел арасындағы экономикалық өсім мен мәдени алмасудың маңыздылығын атап, жолаушылар легін арттыру әрі Қазақстан мен Қытай туристеріне логистиканы жеңілдету мақсатында «Алматы-Бейжің» қосымша рейсін және «Алматы-Чэнду» жаңа рейсін іске қосу мүмкіндігін қарастырды.«Қол қойылған меморандум – Алматының халықаралық көлік байланысын дамытудағы маңызды қадам. Қытай – Алматы туризмін дамытудағы негізгі мақсатты нарықтың бірі. 2024 жыл Қытайдағы Қазақстан туризмі жылы болып жарияланды, ал биылғы жыл – Қазақстандағы Қытай туризмі жылы. Былтыр Алматыға Қытайдан 95,3 мыңнан астам турист келді, бұл 54%-ға өсім көрсетті. Жасалған келісім аясында туристік ағынның қарқынды дамуы жалғасады деп сенеміз», – деді Ерболат Досаев. «Tongcheng Travel Қытай агенттігінің «2025 жылдың болашағы ең зор жаңа бағыты» марапаты Алматының туристік әлеуетінің мойындалғанын және қытайлық туристердің аймаққа деген қызығушылығының артқанын көрсетеді. Жалпы, 2024 жылы Алматыға шамамен 2 миллион турист келді, оның ішінде 600 мыңнан астамы шетелдік. 2025 жылы 2,3 миллион турист, оның ішінде 700 мың шетелдік турист келеді деп күтілуде», – деді Ерболат Досаев.Өз кезегінде China National Aviation Holding Company президенті Ма Чонсянь мырза кездесуге алғыс білдіріп, болашақтағы жемісті ынтымақтастыққа ниетті екенін жеткізді. «Алматы – Қазақстанның мәдени, іскерлік және туристік орталығы, сондай-ақ Еуропа мен Азияны байланыстыратын маңызды буын. Қазақстанның басты «әуе қақпасы» ретінде Алматы Орталық Азия бойынша саяхаттардың бастапқы нүктесі болып табылады», – деді ол.Алматы-Бейжің бағытындағы қосымша рейс пен «Алматы-Чэнду» бағытындағы жаңа рейс 2024 жылдың маусым айында іске қосылады деп жоспарланып отыр. Қазіргі уақытта ҚР Көлік министрлігімен бірлесіп дайындық жұмыстары жүргізілуде. Тиісті бағыттар ұшу құқықтары бөлінгеннен кейін ашылады.«Алматы-Бейжің» қосымша рейсі мен «Алматы-Чэнду» жаңа рейсін биыл маусым айында іске қосу жоспарлануда. Қазіргі уақытта дайындық жұмыстары жүргізіліп жатыр, тиісті бағыттар ұшу құқықтары бөлінгеннен кейін ашылады.Айта кетейік, Қазақстанның ең ірі қаласы ретінде Алматы көлік инфрақұрылымын белсенді түрде жаңғыртып келеді. 2024 жылы жаңа халықаралық әуежай терминалының құрылысы аяқталып, оның өткізу қабілеті жылына 14 миллион жолаушыға дейін артты.Анықтама:Air China – Қытайдың жетекші әуе тасымалдаушысы және Star Alliance ғаламдық авиациялық альянсының мүшесі. Бейжіңдегі әуе паркінде 952 әуе кемесі бар, оның 535-і Air China компаниясына тиесілі. Қазіргі уақытта Алматыдан ҚХР-ның мына қалаларына тікелей рейс ашылған: Бейжің – айына 53 рейс (Air Astana – 22, China Southern Airlines – 31), Үрімжі – айына 61 рейс (Air Astana – 17, China Southern Airlines – 44), Сиань – айына 9 рейс (China Southern Airlines), Ханчжоу – айына 18 рейс (Loong Air), Санья – айына 9 рейс (Air Astana).Ақпарат көзі : https://www.gov.kz/memleket/entities/almaty/press/news/details/939941

Қасым-Жомарт Тоқаев күрестің халықаралық спорт аренасындағы еліміздің беделін нығайтуда айтарлықтай рөлге ие екенін айтты. Сонымен қатар әлемдік турнирлерде табысты өнер көрсетіп жүрген отандық балуандардың жетістіктерін жоғары бағалады.Мемлекет басшысы Қазақстанның Халықаралық күрес федерациясымен стратегиялық ынтымақтастықты одан әрі арттыруға ниетті екенін мәлімдеді. Қасым-Жомарт Тоқаевтың айтуынша, инфрақұрылымды жетілдіру, даярлықтың озық әдістерін енгізу және елімізде халықаралық турнирлерді өткізу осы спорт түрінің танымалдылығы мен бәсекеге қабілеттілігін еселеуге ықпал етеді.Ненад Лалович қонақжайлық танытқаны үшін Қасым-Жомарт Тоқаевқа ризашылығын білдіріп, ықпалдастықты жалғастыруға дайын екенін жеткізді. Ол Қазақстанды федерацияның маңызды серіктесі деп атап өтіп, біздің ұлттық күрес мектебінің зор табыстарына тоқталды. Ненад Лаловичтің айтуынша, қазақстандықтардың дені сау ұлт қалыптастыруға ұмтылысы спорт пен басқа да салаларда жоғары нәтижеге қол жеткізуге септігін тигізеді.Кездесуде Қазақстанның әлемдік спорт қоғамдастығындағы беделін нығайту және басымдыққа ие спорт түрі ретінде күресті одан әрі ілгерілету перспективасы талқыланды.Кездесу соңында Мемлекет басшысы Қазақстандағы күресті дамытуға қосқан үлесі үшін Халықаралық күрес федерациясының президентін II дәрежелі «Достық» орденімен марапаттады.t.me/aqorda_resmiАқпарат көзі : https://www.gov.kz/memleket/entities/tsm/press/news/details/939934

Мемлекет басшысының тапсырмасы бойынша Шығыс Қазақстан облысындағы Бұқтырма су қоймасы арқылы өтетін елдегі ең ұзын көпір жұмыс істеуде. Жоба өңірдегі көлік байланысының көпжылдық мәселесін шешуге бағытталған.«Жұрт жылдар бойы жазда – пароммен, қыста – мұздың үстімен жүретін. Бұл өте ыңғайсыз әрі қауіпті болғаны түсінікті. Енді мәселе біржола шешімін тапты»,- деді ҚР Президенті Қасым-Жомарт Тоқаев.Бүгінгі таңда Күршімдегі көпір Шығыс Қазақстан облысының Күршім, Үлкен Нарын, Марқакөл, Катонқарағай, Тарбағатай және Зайсан аудандарын Өскемен қаласымен байланыстыра отырып, көлік құралдарының жыл бойы қауіпсіз қозғалысын қамтамасыз етеді.Алғашқы төрт айда көпір арқылы 170 мыңға жуық автомобиль өткен. Яғни, күн сайын 1,5 мыңға жуық көлік көпірді пайдаланады. Бұған дейін аймақ тұрғындары 500 шақырымға дейін айналма жол жүруге мәжбүр болғанын айта кеткен жөн. Бұл жол жүру уақыты мен көлік шығынын едәуір арттырды.Көпірдің құрылысын Шығыс Қазақстан облысындағы отандық компания жүзеге асырды. Бұл өңірде жаңа жұмыс орындарымен қамтамасыз ете отырып, жергілікті ресурстарды, мамандарды тартуға мүмкіндік берді.Жоба озық инженерлік технологияларды қолдану арқылы және барлық сапа стандарттарына сәйкес жүзеге асырылды.Көпірдің жалпы ұзындығы - 1316 метрді, ені - 12,2 метрді құрайды. Бір жағында жаяу жүргіншілер жолағы салынған. Қысқы кезеңде конструкцияны қорғау үшін тіректердің әрқайсысында зақымданбайтын арнайы мұз кескіштер орнатылған.Сонымен қатар су бетінен көпірге дейінгі қашықтық 18 метрді құрайды. Бұл навигация кезеңінде кемелердің көпірдің астынан кедергісіз өтуіне мүмкіндік береді.Қауіпсіздікті қамтамасыз ету үшін Бұқтырма су қоймасы арқылы өтетін жаңа көпірде 102 бейнебақылау камерасы орнатылған, оның 62-сі көпірдің жоғарғы бөлігінде, 40-ы көпір асты аймағында орналасқан. Камералар онлайн режимінде жұмыс істейді, бұл жолдың жағдайын үнемі бақылауды қамтамасыз етеді.Өңір тұрғындары көпір су қоймасының екі жағындағы елді мекендер арасындағы көлік қатынасы мәселесін шешкенін айтады. Аталған көпір азаматтардың қауіпсіз қозғалысын қамтамасыз етіп, тауарлардың қозғалысын жеделдетіп, халықтың барлық қажетті қызметтері мен қажеттіліктеріне қол жеткізілді.Күршімдегі көпір – жай ғана құрылыс емес, барлық өңір үшін жаңа үдеріс пен жаңа мүмкіндіктердің символы іспеттес.Жергілікті тұрғын Айбар Еріков атап өткендей, көпір «үлкен әлемге ашылған есік» болды: «Қыста Бұқтырма су қоймасының арғы жағына өту үшін қалың мұздың қатуын күткеніміз есімде. Енді біз бұл туралы ойламаймыз! Көлікке отырасың – арғы жағадан шығасың. Біз үшін бұл көпір үлкен әлемге ашылған есік сияқты. Қалаға бару әлдеқайда жеңіл, жылдам және қауіпсіз». Шағын кәсіп иесі Айнаш Оразбаева өңірдегі сауда жандана түскенін мәлімдейді: «Бұрын бізге тауарларды жеткізу нағыз квест болатын: жазда – паром, қыста – мұз үстімен, ал маусымнан тыс уақытта ештеңе әкелмейтін. Енді тауарлар үзіліссіз жеткізіліп, дүкендердегі ассортимент өсті, бағалар тұрақталды. Көпір арқылы жұмыс істеу әлде қайда оңай, ал адамдардың өмір сүруіне ыңғайлы жағдай жасалды». Ауыр жүк көлігінің жүргізушісі Мұрат Рамазанов жолды және жолдағы уақытты үнемдеу туралы айтып берді: «Егер бұрын маған Бұқтырма су қоймасын айналып өту үшін қосымша 500 шақырым жүру керек болатын. Себебі мен табиғатымнан экстремалды жақсы көрмеймін және көлігімнің салмағымен мұздың беріктігін тексергім келмеді. Енді мен көпірден өтіп бара жатырмын. Бұл жанар майды ғана емес, уақытты да үнемдеп, жүйкенің де шаршамауына үлкен мүмкіндік».Күршімдегі көпір Шығыс Қазақстанның әлеуметтік-экономикалық дамуына серпін беріп қана қоймай, тұтастай алғанда елдің көлік-логистикалық саласының дамуына оң әсерін тигізіп, логистикалық бағыттарды жақсартып, шекара маңындағы елдермен үздіксіз байланыстарды қамтамасыз етті. Сондай-ақ көпір аймақтың туристік әлеуетін арттырып, өңірдегі және Бұқтырма су қоймасының көркем көрінісін тамашалауға мүмкіндік берері сөзсізАқпарат көзі : https://www.gov.kz/memleket/entities/transport/press/news/details/939046

Өткен демалыс күндері Иран Ислам Республикасының астанасы Тегеранда Қазақстан мен Иранның бизнес-форумы өтті. Оған 50-ден астам қазақстандық кәсіпкер мен 230 ирандық бизнес өкілі жиналды. Форум ҚР Сауда және интеграция министрі Арман Шаққалиев пен Иранның ауыл шаруашылығы министрі Голамрез Нури Гезельдженің төрағалығымен ұйымдастырылды. Тараптар өзара тиімді ынтымақтастық үшін елеулі әлеуетке ие екенін айтып, екі ел арасындағы сауда-экономикалық байланыстарды одан әрі дамытудың маңыздылығын атап өтті.Форум аясында B2B кездесулер, сондай-ақ келісімдерге қол қою рәсімі өтті. Қазақстанның сауда-экономикалық миссиясы барысында жалпы сомасы 92,8 млн АҚШ долларына 10 коммерциялық құжатқа қол қойылды, бұл Иран мен Қазақстан арасындағы сауда қатынастарын нығайтудағы маңызды қадам. Өз кезегінде Қазақстан Иран нарығына 250 млн доллар сомасына 75 өнім түрін жеткізуге дайын екенін білдірді.Жұмыс сапары аясында Арман Шаққалиев Иранның орталық мемлекеттік органдарының өкілдерімен, соның ішінде ауыл шаруашылығы, өнеркәсіп, шахталар және сауда министрлерімен, сондай-ақ жол және қала құрылысы министрімен келіссөздер жүргізді.Қазақстан ауыл шаруашылығы саласындағы екіжақты ынтымақтастықты дамытуға, сондай-ақ Иранға ауыл шаруашылығы өнімдерін жеткізуді ұлғайтуға үлкен мән беруді жалғастыруда. Мәселен, өткен жылдың қорытындысы бойынша екі ел арасындағы тауар айналымы 340 млн долларды құрады, бұл өткен жылмен салыстырғанда 12,3%-ға артық. Екіжақты ынтымақтастықтың басым бағыттарының бірі болып табылатын ауыл шаруашылығына ерекше назар аударылды. 2024 жылдың 12 айында Қазақстан мен Иран арасындағы ауыл шаруашылығы өнімінің тауар айналымы 219,8 млн долларды құрады, бұл 2023 жылдың сәйкес кезеңімен салыстырғанда 33,3%-ға артық. Қазақстан бидай, арпа, ұн және өсімдік майларын жеткізуді ұлғайтуға мүдделі. Иран дәстүрлі түрде Қазақстанның астық экспорты бойынша негізгі серіктестерінің бірі болып табылады және таяу жылдары Қазақстан астық экспортын ұлғайтуға ниетті.Иранның ауыл шаруашылығы министрі Голамреза Нури Гезельджемен кездесуде «QazTrade» сауда саясатын дамыту орталығы« АҚ Бас директоры Айтмұхамед Алдажаров Тегеранда Қазақстанның «QazTrade» тауарлар мен қызметтер экспортын ілгерілету жөніндегі ұлттық институтының серіктестік кеңсесін ашуды ұсынды. Бұл кеңсе қазақстандық кәсіпкерлерге жаңа серіктестер табуға және Иран нарығында өнімді тиімді жылжытуға мүмкіндік береді.«QazTrade» екіжақты сауда қатынастарын дамыту бойынша белсенді жұмыс жүргізуде және қазірдің өзінде Иранда үш табысты сауда-экономикалық миссияны ұйымдастырды. Олар - 2021 жылы (11-12 қазан), 2022 жылы (21-22 ақпан) және 2023 жылы (24-26 сәуір) өткен сауда экономикалық миссиялар. Осы миссиялардың қорытындысы бойынша маңызды келісімшарттарға қол қойылды: 2021 жылы 16 қазақстандық тауар өндіруші 5 млн АҚШ долларынан астам сомаға келісімге қол қойды, 2022 жылы 14 млн АҚШ долларынан астам сомаға келісімге қол қойған 15 компания қатысты, 2023 жылы 20 компания 60,4 млн АҚШ доллары сомасына экспорттық келісімшарттарға қол қойды.Сонымен қатар, сапар барысында Қазақстанның сауда министрі Иранның 100 ірі кәсіпкерін қамтитын «Корафарин» кәсіпкерлер кеңесімен кездесті. Кездесуде сауда-экономикалық ынтымақтастықты кеңейту перспективалары, сондай - ақ химия өнеркәсібінен тоқыма және орман өнеркәсібіне дейінгі әртүрлі салалардағы тауарлар өндірісі мен сұранысына қатысты мәселелер талқыланды.Арман Шаққалиевтің жұмыс сапары Каспий өңірі елдерінің сауда-өнеркәсіптік және ауыл шаруашылығы ынтымақтастығын дамытуға арналған үшінші Каспий экономикалық форумының пленарлық сессиясына қатысуымен жалғасуда. Министр өтпелі тарифтерді белгілеу, жүктерді декларациялау, бірыңғай IT-шешімдерді қолдану және транзиттік жүктерді шығару мәселелерін талқылай отырып, ТМТ дәлізі шеңберінде бірлескен жұмысты нығайтудың маңыздылығын атап өтті. Арман Шаққалиев Қазақстанның транзиттік және экспорттық мүмкіндіктері көрші елдердің инфрақұрылымдық мүмкіндіктеріне де байланысты екенін айтты.Ақпарат көзі : https://www.gov.kz/memleket/entities/mti/press/news/details/939797

Премьер-министрдің орынбасары – ұлттық экономика министрі Серік Жұманғарин әлеуметтік маңызы бар азық-түлік тауарларының (ӘМАТ) бағасын тұрақтандыру мәселесі бойынша кеңес өткізді.Ұлттық статистика бюросының мәліметінше, биылғы қаңтар айында Қазақстандағы жылдық инфляция деңгейі 8,9%-ды құрады. Баға динамикасына азық-түлікке жатпайтын тауарлар мен ақылы қызметтер әсер етті. Азық-түлікке жатпайтын тауарлардың жылдық өсімі 8,4%-ға, ал қызмет көрсету бағасы 13,8%-ға көтерілді.Сауда және интеграция бірінші вице-министрі Айжан Бижанованың айтуынша, соңғы аптада ӘМАТ бағасының индексі 0,3%-ға, жыл басынан бері 2,2%-ға өсті. Бұл көкөністердің маусымдық қымбаттауына (қырыққабат, сәбіз, пияз) байланысты. Сондай-ақ сиыр еті (1,2%) мен күнбағыс майы (1,1%) бағасының өскені тіркелді. Жыл басынан бастап 11 ақпан аралығында ең жоғары өсімі Ұлытау (4,8%), Ақтөбе (3,8%) және Шығыс Қазақстан (2,7%) облыстарында байқалды.Бағаны реттеу мақсатында аймақтардағы тұрақтандыру қорларынан өнімдерді саудаға шығару жалғастып жатыр. Ауыл шаруашылығы вице-министрі Ербол Тасжүрековтің айтуынша, жалпы қалыптасқан 156,9 мың тонна қордан тек 45,4 мың тонна көкөніс сатылды. Кейбір облыстарда көкөністі сату қарқыны белгіленген көлемнен төмен, бұл бағаның өсуіне әкелуде. Мәселен, Абай облысында 2,8 мың тонна картоптың тек 486 тоннасы ғана сатылып, нәтижесінде баға 24,2%-ға қымбаттаған. Кейбір өңірлерде сәбіз, қырыққабат және пияз бағасына қатысты осындай жағдай байқалады.Сондай-ақ ол әкімдіктердің мәліметінше, қаңтардың соңында қосалқы шаруашылықтардағы қорды есепке алмағанда, картоп қоры 327 мың тоннаны құрағанын айтты. Ал, 23 қаңтар мен 14 ақпан аралығында халықтың тұтыну көрсеткіші 73,5 мың тонна көлемінде болды. «Жеке қосалқы шаруашылықты есептемегенде, 253,5 мың тонна картоп қоры 2025 жылдың ерте пісетін өнімін алғанға дейін халықтың ішкі қажеттілігін толық жабуға мүмкіндік береді», — деді Ербол Тасжүреков.Серік Жұманғарин кеңеске қатысушылардың назарын азық-түлік бағасын тұрақтандыруға бағытталған шараларды жеделдету қажеттігіне аударды. Негізгі мақсат – тұрақтандыру қорларынан өнімдерді жедел шығару және өңірлер мен мегаполистерде апта сайынғы жәрмеңкелерді өткізу.«Бағаның ауытқуы мен сатудағы қандай болмасын шектеулерді болдырмау үшін тұрақтандыру пункттеріндегі өнім бағасындағы айырмашылықты жою қажет. Сондай-ақ коммуналдық базарлар мен сауда желілерімен тығыз жұмыс істеу керек. Ақпан-наурыз айларында тұрақтандыру қорларындағы өнімдерді сату және сәуір айында жаңа көкөністерді жеткізуді қамтамасыз ету қажет. Бұл ауыл шаруашылығы министрлігі мен сауда және интеграция министрлігінің маусымаралық кезеңде әлеуметтік азық-түлік бағасының тұрақтылығын сақтау үшін өңірлермен бірлесіп шешетін басты міндеттері», — деп түйіндеді Серік Жұманғарин. Дереккөз: https://primeminister.kz/news/kokonis-koryn-paydalanu-zhane-apta-sayyngy-zharmenkeler-serik-zhumangarin-aleumettik-manyzy-bar-azyk-tulik-bagasyn-turaktandyru-boyynsha-zhinalys-otkizdi-29700 Ақпарат көзі : https://www.gov.kz/memleket/entities/mti/press/news/details/939933

Астана, 2025 жылғы 17 ақпан – Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Астанаға ресми сапармен келген Мажарстанның Сыртқы экономикалық байланыстар және сыртқы істер министрі Петер Сийяртомен келіссөздер өткізді.Мажар министрінің осы сапары – оның Қазақстанға жетінші ресми сапары, бұл екі ел арасындағы берік әрі ұзақ мерзімді қарым-қатынастардың айқын көрінісі. Осыдан он жыл бұрын П.Сийярто алғаш рет Астанаға сапар жасап, бұл оқиға қазақ-мажар байланыстарын нығайтудағы маңызды меже болды.Тараптар ортақ тарихи тамырлар мен дәстүрлі достыққа негізделген стратегиялық серіктестікті тереңдетуге бейілділігін қуаттап, екіжақты ынтымақтастықтың кең ауқымды мәселелерін талқылады. Атап айтқанда, саяси, экономикалық, энергетикалық және мәдени-гуманитарлық өзара іс-қимылдың басым бағыттары қаралды.Сыртқы істер министрлері 2024 жылғы қарашадағы Қазақстан Президенті Қасым-Жомарт Тоқаевтың Будапештке сапары және 2023 жылғы қарашадағы Мажарстан Премьер-министрі Виктор Орбанның Астанаға сапары қорытындысы бойынша қол жеткізілген уағдаластықтардың іске асырылу барысын талқылады.Келіссөздер барысында сауда-экономикалық байланыстарды одан әрі кеңейтуге ерекше назар аударылды. Өткен жылы тауар айналымның көлемі 4,4%-ға өсіп, 200 млн АҚШ долларына жуықтады. Тараптар сауда айналымын 1 млрд долларға дейін ұлғайту бойынша мемлекет басшылары қойған мақсатқа жету үшін қосымша шаралар қабылдауға уағдаласты.Қазақстан экономикасына құйылған мажарлық тікелей инвестициялар көлемі 370 млн доллардан асты. Қазіргі уақытта жалпы құны 700 млн доллар болатын 16 бірлескен жоба іске асырылуда, оның ішінде энергетика және өнеркәсіп секторларында маңызды жобалар бар.Мәселен, мажар «MOL» мұнай-газ компаниясы Батыс Қазақстандағы ірі газ-конденсат кен орны – «Рожковское» кенішін игеруге 200 млн доллар инвестиция салды. «Globalia» компаниясы Қазақстанның бірнеше өңірінде күн электр станцияларын салып жатыр, ал «UBM» холдингі биыл 62 млн долларлық үш құрама жем зауытының құрылысын бастайды.Сұхбат шеңберінде экономикалық ынтымақтастықты тереңдетуге бағытталған маңызды бастамалар да қарастырылды. Атап айтқанда, Қазақстанда мажар банктердің филиалдарын ашу, Будапештте мультимодальды жүк терминалын салу, Қазақстан мұнайының Мажарстанға жеткізілімін арттыру, сондай-ақ уран мен стратегиялық маңызы бар минералдарды экспорттау мәселелері талқыланды. Осы бағыттағы маңызды қадам – бірлескен Инвестициялық қорды жақын арада құру болмақ.«Мажарстан – біз үшін бауырлас мемлекет, біз онымен стратегиялық серіктестікке ерекше мән береміз. Сауда-экономикалық ынтымақтастықты нақты әрі тиімді нәтижелермен байытуға ұмтыламыз», – деді Қазақстан СІМ басшысы.Өз кезегінде, мажар министрі Будапешттің Астанамен саяси ғана емес, экономикалық, инвестициялық және мәдени салаларда да екіжақты қатынастарды тереңдетуге ниетті екенін растады. «Біз Қазақстанмен ынтымақтастықты кеңейтуге дайынбыз және бұл екі елге де үлкен пайда әкелетініне сенімдіміз», – деп П.Сийярто атап өтті.Сұхбаттастар сондай-ақ ғылым және білім саласындағы ынтымақтастықтың маңыздылығына назар аударды. Мажарстан жыл сайын қазақстандық студенттерге 250 білім грантын ұсынады (қазіргі таңда мажар университеттерінде 1000-ға жуық қазақстандық студент білім алуда).Сонымен қатар 2025 жылғы мамыр айынан бастап Шымкент пен Будапешт арасында тікелей әуе рейсі ашылады. Бұл бауырлас халықтар арасындағы байланыстарды одан әрі нығайтып, түрлі салалардағы ынтымақтастыққа жаңа мүмкіндіктер туғызады.Келіссөздер аясында тараптар өңірлік және жаһандық күн тәртібіндегі өзекті мәселелер, оның ішінде Еуропа мен Таяу Шығыстағы қақтығыстар жөнінде пікір алмасты. Қазақстан мен Мажарстан сыртқы саяси ведомстволарының басшылары қарсыласушы тараптар арасында бейбіт әрі сындарлы диалогтың орнатылуына үміт білдірді.М.Нұртілеу Қазақстанның БҰҰ Жарғысының қағидаттарына, сондай-ақ еліміздің тек қана бейбіт жолмен шешуге бағытталған теңгерімді және прагматикалық сыртқы саясатқа берік екенін растады.Министрлер сондай-ақ БҰҰ, ЕҚЫҰ және басқа да көпжақты ұйымдар аясындағы ынтымақтастықтың келешегін талқылады.Мажарстанның Түркі мемлекеттері ұйымы (ТМҰ) жұмысына белсенді қатысуын ерекше атап өткен тараптар Будапештте өтетін алдағы бейресми ТМҰ саммитінің ортақ түркі мұрасымен байланысқан елдер арасындағы ынтымақтастықты нығайтудағы маңызды қадам болатынын жеткізді.Келіссөздер қорытындысы бойынша дипломатиялық академиялар арасындағы әріптестік және мажар тілін оқыту саласындағы ынтымақтастық туралы меморандумдарға қол қойылды.Қазақстанда 30-ға жуық мажар компания және 40 бірлескен кәсіпорын табысты жұмыс істеуде. 2005 жылдан бастап Мажарстаннан Қазақстан экономикасына тікелей инвестициялар көлемі 370 млн доллардан асты.Ақпарат көзі : https://www.gov.kz/memleket/entities/mfa/press/news/details/939880

ҚР Ұлттық кітапханасында «Сахара сандуғашы» кітабының таныстырылымы өтті.Басылым қазақ радиосының белгілі дикторы, Қазақстан мәдениетінің дамуына елеулі үлес қосқан көрнекті тұлға Сауық Жақанованың 80 жылдық мерейтойына орай жарық көрді.Сауық Жақанова өзінің көп жылдық ел мәдениетіне сіңірген еңбегі үшін «Құрмет» орденімен марапатталды.Іс-шараға мемлекет және қоғам қайраткерлері, шығармашылық зиялы қауым өкілдері, радио және телевизия қызметкерлері, журналистер, Сауық Жақанованың туыстары мен жақындары қатысты.Жиында Қазақстанның мәдениет және ақпарат министрі Аида Балаеваның құттықтау хаты оқылды.«Сіздің еліміз үшін сіңірген еңбегіңіз қазақ халқының тарихында алтын әріптермен жазылды. Радио, білім саласына қосқан үлесіңіз орасан зор. Қазақ радиосының сандуғашы атанып, жарты ғасырға жуық эфирде үздіксіз қызмет етіп, тыңдармандардың жүрегіне жол таптыңыз.Дикторлық шеберлігіңіз, эфирдегі ерекше үніңізбен қатар, өнгелі өмір жолыңыз ұрпаққа үлгі. Жұртшылық Сізді өз ісінің майталманы ғана емес, көптеген шәкірт тәрбиелеген ұлағатты ұстаз ретінде де ерекше құрмет тұтады», – делінген хатта.«Сахара сандуғашы» кітабында Сауық Жақанованың өмір жолы, радио мен теледивизиядағы шығармашылығы, сондай-ақ оқытушылық қызметі туралы баяндалады. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/939507

«Астана Балет» театры өткен демалыс күндері классикалық музыка сүйер қауымға «Есімдер» бірегей жобасы аясында ұмытылмас симфониялық және аспаптық өнер кешін сыйлады.«Есімдер» жобасының мақсаты – дүниежүзінде еліміздің музыка мәдениетінің символына айналған Қазақстанның танымал солисттері мен көрнекті музыканттарын бір сахнаға жинау.«Есімдер» жобасы аясында тек елде ғана емес, шетелдерде де жетістікке жеткен отандық классикалық музыканың көрнекті өкілдері Әмір Тебенихин, Жәния Әубәкірова және Марат Бисенғалиев өнер көрсетті.Концерт ұйымдастырушылары репертуарды мұқият таңдаған. Музыкалық кештің бірінші бөлімінде театр оркестрінің орындауында Франц Шуберттің әйгілі «№ 8 симфониясы» («Аяқталмаған») орындалды.Концерт барысында «Астана Балет» театрының сахнасында симфониялық оркестрмен бірге бүгінгі музыканың жарқын өкілдері, танымал халықаралық байқаулардың лауреаттары – скрипкашы Қаламқас Жұмабаева, виолончелші Ермек Құрманаев, сондай-ақ пианист, Қазақстанның еңбек сіңірген қайраткері Әмір Тебенихин өнер көрсетті. Олар 1803 жылы Людвиг ван Бетховен жазған әйгілі «Үштік концертін» шебер орындады.Музыка тарихына «Үштік концерт» солистер мен оркестрге арналған ең керемет шығармалардың бірі ретінде танылған. Оның күрделілігі мен әсемдігі орындаушылар арасында ерекше құрметке лайық, ал драмалық дамуы мен шеберлігі осы күнге дейін тыңдармандарды баурап алады.«Есімдер» жобасы әлі де жалғасын табады. Көрермен қауым танымал музыканттар мен әртістердің өнерін тамашалай алады. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/939921

27 ақпанда Роза Бағланова атындағы «Қазақконцерт» мемлекеттік академиялық концерттік ұйымының сахнасында «Дода» атты бірегей жоба ұйымдастырылады.Іс-шарада тартысқа толы шығармашылық сайыс пен тамаша шоу-бағдарлама ұсынылады. Сахнада шебер күйшілер, ансамбльдер мен солистер халық музыкасының үздік туындылары мен хореографиялық қойылымдарын орындайды.Кеш ерекше форматта өтеді. Өнерпаздар ұлттық мәдениетке терең бойлап, қазақ өнерінің қыр-сырын ашып көрсетеді. Қатысушыларға қызықты сұрақтар қойылады.Өнер сайысында Роза Бағланова атындағы «Қазақконцерт» мемлекеттік академиялық концерттік ұйымы мен Еркеғали Рахмадиев атындағы Мемлекеттік академиялық филармонияның белгілі әртістері өнер көрсетеді. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/939946