Премьер-министрдің орынбасары – ұлттық экономика министрі Серік Жұманғариннің төрағалығымен өткізілген кеңесте Жеңіл өнеркәсіпті дамытудың 2026-2030 жылдарға арналған кешенді жоспарының жобасына енгізілген кәсіпорындарды жергіліктендіруді арттыру туралы келісімдердің тетігі мен қарсы міндеттемелері қаралды.7 бөлім мен 30 іс-шарадан тұратын Кешенді жоспар жобасы жеңіл өнеркәсіп кәсіпорынын қолдаудың орта және ұзақ мерзімді шараларын қамтиды.Негізгі орта мерзімді шара қатарына кәсіпорынды шикізатпен қамтамасыз ету, өткізу нарығын кеңейту, мемлекеттік сатып алу тетігін жетілдіру және отандық өндірушілерге тең бәсекелестік жағдай жасау жатады.Сатып алу рәсімін жеңіл өнеркәсіп кәсіпорынының өндірістік циклі ерекшелігіне бейімдеуге ерекше назар аударылады. Атап айтқанда, мемлекеттік сатып алудағы өнімді жеткізу мерзімін ұлғайтудың мүмкіндігі пысықталуда.Ұзақ мерзімді шаралар шеңберінде шикізат пен дайын өнімді толық қадағалау жүйесін, сондай-ақ өндірісті жергіліктендіруді арттыру  келісімі тетігін енгізу мәселесі қаралды.Ұсынылып отырған тетік мемлекет пен саладағы кәсіпорындар арасында келісім жасауды қарастырып, бұл ретте компаниялар қарсы міндеттемелерді өзі қабылдаған кезде қосымша қолдау шарасын ала алады.Атап айтқанда, келісімде өндіріс көлемін ұлғайту, жергіліктендіру деңгейін арттыру, қызметкерлердің жалақысын арттыру, персоналдың біліктілігін арттыру, жаңа жұмыс орындарын құру және мүгедек адамдарды жұмысқа орналастыру міндеттемелерін бекіту жоспарлануда.Осындай келісім жасасқан кәсіпорындар үшін арнайы инвестициялық келісімшартты, жеңілдікпен қаржыландыруды және өзге де ынталандыру тетігі секілді мемлекеттік қолдау шараларын алу мүмкіндігі көзделеді.Талқылауды қорытындылай келе, Серік Жұманғарин мүдделі мемлекеттік органдарға, салалық қауымдастықтар мен бизнес өкілдеріне маусымның соңына дейін ұсынылған тетіктерді пысықтап, келісілген ұсыныстар беріп, оларды Жеңіл өнеркәсіпті дамытудың кешенді жоспары шеңберінде одан әрі іске асыруды тапсырды.Ақпарат көзі : https://www.gov.kz/memleket/entities/economy/press/news/details/1241291?lang=ru

Қазақстан Республикасы Сыртқы істер министрінің орынбасары Әлібек Қуантыров «Astana Mining & Metallurgy» 16-шы Халықаралық тау-кен металлургия конгресіне қатысу үшін Астанаға келген Швеция Сыртқы істер министрлігінің Сыртқы сауда жөніндегі мемлекеттік хатшысы Диана Янсемен кездесті.Тараптар Қазақстан-Швеция ынтымақтастығының қазіргі жағдайы мен одан әрі даму перспективаларын талқылады. Олар екіжақты қарым-қатынастағы ілгерілеушілік серпінді, саяси диалогтың, парламентаралық байланыстардың күшеюімен және сауда-экономикалық ынтымақтастықтың кеңеюімен қатар жүретінін атап өтті.Бірлескен жобаларды жүзеге асыруға және өнеркәсіптік ынтымақтастықты дамытуға ерекше назар аударылды. Атап айтқанда, тараптар «Väderstad» пен «AgromashHolding KZ» АҚ арасындағы Қазақстанда жоғары технологиялық ауыл шаруашылығы техникасын өндіруді жергіліктендіру бойынша ынтымақтастық перспективаларын, «Astana Motors» АҚ-мен бірлесіп жүк көліктерін жинау жобасы бойынша «Volvo Trucks» компаниясымен ынтымақтастықты және SKF-пен серіктестікті одан әрі дамытуды талқылады.Қазақстан нарығында табысты жұмыс істеп келе жатқан швед компанияларының, соның ішінде «Ericsson», «Epiroc», «Sandvik», «Scania» және «AstraZeneca» компанияларының үлесі ерекше атап өтілді.Тараптар бірлескен бастамаларды ілгерілету, инвестициялық жобаларды қолдау және іскерлік байланыстарды кеңейту үшін тұрақты платформа ретінде қызмет ететін сауда-экономикалық және инвестициялық ынтымақтастық бойынша Қазақстан-Швеция екіжақты комиссиясын құрудың маңыздылығын атап өтті.Одан әрі ынтымақтастықтың перспективалы салаларына жаңартылатын энергия көздері, таза технологиялар, сумен жабдықтау шешімдері, ауыл шаруашылығы, көлік және логистика, цифрлық мемлекеттік басқару және жасанды интеллект жатады. Кездесуден кейін көп қырлы серіктестікті одан әрі нығайтуға және жаңа бірлескен жобаларды жүзеге асыруға өзара қызығушылық расталды.2005 жылдан 2025 жылға дейін Швециядан Қазақстанға тікелей инвестициялардың жалпы көлемі 705,6 млн АҚШ долларын құрады. Республикада денсаулық сақтау, технология, энергетика, қоршаған ортаны қорғау, көлік, ауыл шаруашылығы, өнеркәсіп және білім беру салаларында жұмыс істейтін шамамен 60 швед капиталы бар компания жұмыс істейді.Ақпарат көзі : https://www.gov.kz/memleket/entities/mfa/press/news/details/1241168?lang=ru

АҚШ-тың Нью-Йорк штатындағы Канастота қаласында Халықаралық бокс даңқы залының (IBHOF) жаңа мүшелерін салтанатты түрде қабылдау рәсімі өтті. Қазақстан тарихында осы элиталық клубқа енген алғашқы өкіл — Геннадий Головкин болды. Оның спорттағы зор жетістіктері өзін аңызға айналған спортшы әрі өз дәуірінің ең үздік боксшыларының бірі ретінде мойындатты.Головкин Даңқ залына алғашқы мүмкіндіктен-ақ қабылданды. Бұл кәсіби бокс әлеміндегі ең жоғары құрметтің бірі саналады. Енді қазақстандық боксшының есімі осы спорт түрінің ұлы тұлғалары — Мұхаммед Әли, Майк Тайсон, Флойд Мейвезер және Мэнни Пакьяо сынды саңлақтармен бір қатарда тұр.Спорттық еңбегіне көрсетілген құрметтің белгісі ретінде Геннадий Головкин Даңқ залы музейіне өзінің әйгілі чемпиондық шапанын табыстады. Ол бұл шапанды көптеген жекпе-жектерде киіп шыққан және ол боксшының жарқын мансабының ажырамас нышанына айналған.Головкинмен бірге «2026 жылғы классқа» Men's Modern санатында америкалық Антонио Тарвер мен Ұлыбритания өкілі Найджел Бенн, сондай-ақ Women's Modern санатында жапониялық Наоко Фудзиока және мексикалық Джеки Нава енгізілді.Әуесқой бокста Геннадий Головкин 350 жекпе-жектің 345-інде жеңіске жетіп, ұзақ жылдар бойы Қазақстан ұлттық құрамасының көшбасшысы болды және ел намысын ең ірі халықаралық турнирлерде абыроймен қорғады.Кәсіпқой боксқа ауысқаннан кейін Геннадий Головкин XXI ғасырдағы орта салмақтағы ең үстем чемпиондардың біріне айналды. Ол кәсіби мансабында 45 жекпе-жек өткізіп, 42 жеңіске қол жеткізді, оның 37-сін нокаутпен аяқтады. Қарағандылық былғары қолғап шебері WBA, WBC, IBF және IBO тұжырымдары бойынша чемпиондық белбеулерді, сондай-ақ The Ring чемпиондық атағын иеленді. Сонымен қатар ол ұзақ уақыт бойы салмақ дәрежесіне қарамастан әлемнің үздік боксшылары қатарынан түспеді.HBO телеарнасымен келісімшартқа қол қою оған әлемдік деңгейдегі танымалдыққа жол ашты. Агрессивті мәнер, көрерменді тәнті ететін жекпе-жектер және жойқын соққы күші Головкинді әлемдік бокстың ең жарқын жұлдыздарының біріне әрі миллиондаған жанкүйердің сүйіктісіне айналдырды.Мансабы барысында ол бірқатар айтулы жетістіктерге қол жеткізді. Тоғыз жыл бойы қатарынан тіркелген 23 нокауттық жеңіс орта салмақ дәрежесі үшін рекорд болды. Оның еншісінде чемпиондық титулдарды 21 мәрте сәтті қорғау көрсеткіші бар. Ал мерзімінен бұрын аяқталған жеңістер үлесінің 90 пайыздан асуы әлем чемпиондары арасындағы ең жоғары көрсеткіштердің бірі ретінде Гиннестің рекордтар кітабына енгізілді.Бүгінде Геннадий Головкин Қазақстанның намысын рингтен тыс жерде де қорғап келеді. Ол Қазақстан Ұлттық Олимпиада комитеті мен World Boxing ұйымдарын басқарады. Осылайша ол халықаралық спорт федерациясының президенті болып сайланған Қазақстанның алғашқы өкілі атанды.Халықаралық бокс даңқы залы 1989 жылы Канастота қаласында Эд Брофи негізін қалаған ұйым болып саналады және кәсіби бокстағы жетістіктерді мойындайтын әлемдегі басты институттардың бірі ретінде танылған. Ұйым осы спорт түрінің тарихын сақтаумен айналысады. Бүгінде оның мүшелерінің саны 300 адамнан асады.Геннадий Головкиннің IBHOF қатарына қабылдануы оның жеке жетістіктерінің мойындалуы ғана емес, сонымен бірге бүкіл қазақстандық спорт үшін тарихи оқиға болды.Olympic.kz мәліметі бойыншаАқпарат көзі : https://www.gov.kz/memleket/entities/karaganda/press/news/details/1241007?lang=ru

Бүгін облыс әкімі Мұрат Ергешбаев,облыстық мәслихат төрағасы Мұрат Тлеумбетов Жаңақорған ауданына жұмыс сапары барысында Ақжол ауылының тұрғындарымен және Жаңарық, Әбдіғаппар, Өзгент ауылдарының ақсақалдарымен кездесті. «Руханият орталығында» өткен жиынға аудан активі қатысып, өңірдің әлеуметтік-экономикалық даму бағыттары мен алдағы міндеттер талқыланды.Кездесуде аймақ басшысы өңдеу өнеркәсібін дамыту, өндіріс көлемін ұлғайту, инвестиция тарту және жаңа жұмыс орындарын құруға бағытталған жобаларды қолдау қажеттігін атап өтті. Сонымен қатар, ауданның туристік әлеуетін тиімді пайдаланып, нақты жобаларды жүзеге асыруды тапсырды.–Өнеркәсіп өндірісі, өңдеу өнеркәсібі саласына жетекшілік ететін аудан әкімінің орынбасары,кәсіпкерлік және өнеркәсіп бөлімінің басшысы, жұмысты күшейту керек.2023 жылдан күріш көлемі 1147 гектарға қысқарған. «Ауыл аманаты» жобасы ұсынған мүмкіндіктерді пайдалануды тапсырамын. Ауданда 175 шаруашылық каналы бар, оларды бетондау жобаларын әзірлеудегі жұмысты жеделдетіңіздер.Жаңақорғанның туристік әлеуетін тиімдіпайдаланып, нақты жобаларға айналдыру керек. Қаратаудың етегінде орналасқан ауданның табиғиерекшеліктері, тарихи орындары меншипажайлары, мәдени-рухани құндылықтары ішкі және сыртқы туризмді дамытуға мүмкіндік береді, – деді аймақ басшысы.Кейінгі төрт жылда барлық ауданда жаңадан 1800-ге жуық пәтер пайдалануға берілсе, оның 254-і Жаңақорған ауданында. Сапасына қатысты кемшіліктерді мердігер мекемелер толықтай қалпына келтірді. Биыл да тұрғын үйлер салу жоспарланған. Осы ретте облыс әкімі салаға жетекшілік ететін аудан әкімінің орынбасары, құрылыс бөлімінің басшысына дайындық жұмыстарын ұйымдастыруды міндеттеді.Ауданда газдандыру деңгейі 53 пайыз, бүгінде5 елді мекенге жоғары қысымды газ құбыры салынуда. Аудан әкімдігі облыстық энергетика және тұрғын үй-коммуналдық шаруашылық басқармасымен бірлесіп, ауылдарды кезең-кезеңімен табиғи газға қосу жұмысынұйымдастыруы тиіс.Айта кетейік, аудан экономикасының негізгі салаларында тұрақты даму үрдісі сақталып, бірқатар бағыт бойынша оң нәтижеге қол жетті.Ауыл, орман және балық шаруашылығы өнімдерінің жалпы көлемі өткен жылдың тиісті кезеңімен салыстырғанда 105,6 пайызға артты.Негізгі капиталға тартылған инвестиция көлемі 25,3 млрд теңге болған. Құрылыс жұмыстарының көлемі, пайдалануға берілген тұрғын үйлердің жалпы ауданы жағынан да өсім бар.Кездесуде тұрғындар мен ауыл ақсақалдары ауданның дамуына қатысты өзекті мәселелер мен ұсыныстарын ортаға салды. Аймақ басшысы көтерілген әрбір мәселе жан-жақты зерделеніп, тиісті заңды шешім қабылданатынын жеткізді.Ақпарат көзі : https://www.gov.kz/memleket/entities/kyzylorda/press/news/details/1240879?lang=ru

Радиоэлектроника және байланыс әскери-инженерлік институтының оқу-жаттығу орталығында әскер сапын толықтырған сарбаздардың әскери ант қабылдау рәсімі салтанатты түрде өтті. Бұл күні Жетісу облысынан, сонымен қоса Астана және Шымкент қалаларынан шақырылған жүзден аса әскерге жаңа келгендер Отанға адал қызмет етуге ант берді.Олардың қатарында Жаркент қаласынан шақырылған 18 жастағы Рахат Қабылжан да бар. Өткен жылы ол достарымен бірге әскерге баруға ниет білдіріп, жергілікті әскери басқару органына барған. Алайда кәмелет жасына толмағандықтан әскерге алынбаған. Отан қорғаушы күні қарсаңында Жаркент қаласының әкімдігі тұрғындар арасында бағалы сыйлықтар ұтысын ұйымдастырып, лоттардың бірі ретінде әскери қызметке мотивация ретінде «әскерге жолдаманы» қосқан болатын. Мұндай ерекше сыйлықты Рахат Қабылжан ұтып алды. Әскерге баратын жасқа толған жас жігіт бірден Қазақстан Қарулы күштері қатарында қызмет етуге аттанды.– Бұл тосын сый мені қатты қуантты. Жас жауынгер курсынан өткен уақыт ішінде өмірге деген көзқарасым өзгерді. Мінез шыңдалып, жауапкершілігім мен тәртібімнің артқанын байқадым, – деді қатардағы жауынгер Рахат Қабылжан.Ант берер алдында әскер қатарына қосылғандар жас жауынгер курсын сәтті аяқтап, саптық, тактикалық және атыс даярлығының негіздерін меңгерді, оған қоса әскери қызмет жағдайына бейімделді.Салтанатты рәсім аяқталғаннан кейін жас сарбаздар қоян-қолтық ұрыс тәсілдерін көрсетіп, әскери оркестрдің сүйемелдеуімен салтанатты маршпен жүріп өтті.Алда жауынгерлерді кіші мамандарды даярлау бағдарламасы бойынша үш айлық қарқынды оқу күтіп тұр. Осы уақыт ішінде олар күрделі әрі сұранысқа ие әскери мамандықтарды меңгеріп шығады. Олардың қатарында арнайы байланыс және радиотехникалық әскерлер мамандары, радиолокациялық станциялар мен радиобиіктік барлау құралдарының операторлары, зениттік-зымыран кешендерін сүйемелдеу операторлары, сондай-ақ дизельші-электриктер бар.Биылғы жылдың жаңалығы – ұшқышсыз ұшатын құрылғыларды басқару курсының енгізілуі. Бұл бағыт бойынша әскерге жаңа келгендердің барлығы дайындықтан өтеді.Оқу аяқталғаннан кейін күзет ротасының әскери қызметшілері әскери институтта қызметін жалғастырады. Ал қалған мерзімді қызмет сарбаздары Әуе қорғанысы күштерінің әуе шабуылына қарсы қорғаныс әскерлерінің құрамындағы әскери бөлімдерге жіберіліп, елдің әуе шебін қорғауға жауынгерлік кезекшілікке түседі.Ақпарат көзі : https://www.gov.kz/memleket/entities/mod/press/news/details/1240781?lang=ru

Алматыда Ауғанстан мәселелері бойынша Еуропалық Одағы мен Орталық Азия мемлекеттерінің Арнайы өкілдері мен уәкілдерінің 8-інші кездесуі өтті.Кездесу барысында қатысушылар Ауғанстандағы ахуалдың қазіргі жай-күйіне, оның өңірлік қауіпсіздік пен тұрақтылыққа әсеріне, сондай-ақ Ауғанстанның орнықты әлеуметтік-экономикалық дамуына жәрдемдесу мақсатындағы халықаралық ынтымақтастықтың келешегіне қатысты жан-жақты пікір алмасты.     Тараптар өңірлік өзара байланыстарды нығайту мәселелерін, оның ішінде Ауғанстан аумағы арқылы өтетін көлік-логистикалық және транзиттік дәліздерді дамыту перспективаларын талқылады. Мұндай бастамалар Орталық және Оңтүстік Азия арасындағы көлік-коммуникациялық, сауда-экономикалық ынтымақтастықты кеңейтуге, сондай-ақ Еуропалық кеңістігіндегі байланыстарды нығайтуға ықпал ететініне назар аударылды. Кездесу барысында Қазақстан Республикасының өңірлік сын-қатерлерді шешуде саяси-дипломатиялық тетіктерді нығайтуға, тату көршілік, сенім және ынтымақтастық қағидаттарын ілгерілетуге бағытталған дәйекті ұстанымы ерекше аталып өтті.Қазақстан Республикасының Президенті Қасым-Жомарт Тоқаев жүргізіп отырған сыртқы саяси бағдарға сәйкес, еліміз Орталық Азиядағы өңірлік кооперацияны дамытуға, тепе-теңдік қағидаттарын ілгерілету және халықаралық қатынастардағы Біріккен Ұлттар Ұйымының үйлестіруші рөлін күшейтуге айрықша мән береді.   Қатысушылар Қазақстанның Ауғанстан мәселесі бойынша өзара халықаралық диалогты дамытудағы, ауған халқына гуманитарлық көмек көрсетудегі, білім беру бағдарламаларын жүзеге асырудағы және өңірлік экономикалық ықпалдастықты ілгерілетудегі үлесін жоғары бағалады.  БҰҰ-ның Ауғанстанды қолдауға бағытталған халықаралық күш-жігерді үйлестірудегі маңызды рөліне ерекше назар аударылды. Алматы қаласында орналасқан Орталық Азия мен Ауғанстанға арналған БҰҰ Тұрақты даму мақсаттары жөніндегі Өңірлік орталығының қызметі жоғары бағаланып, оның құрылуы Қазақстан Президентінің БҰҰ алаңдарында көтерген халықаралық ынтымақтастықты нығайтуға және өңірдің орнықты дамуына бағытталған бастамаларының нақты нәтижесі екендігі аталып өтті.        Пікірталас барысында Алматы қаласының көпжақты дипломатияның, өңіраралық өзара іс-қимылдың және қауіпсіздік, орнықты даму мен гуманитарлық ынтымақтастық мәселелері бойынша келісілген ұстанымдарды қалыптастырудың маңызды халықаралық орталығы ретіндегі рөлінің артып келе жатқаны айтылды.Кездесу қорытындысы бойынша қатысушылар Орталық Азия мемлекеттері, Еуропалық Одақ және Біріккен Ұлттар Ұйымы құрылымдары арасындағы ынтымақтастықты одан әрі нығайтуға, Ауғанстандағы бейбітшілік пен тұрақтылықты қамтамасыз етуге, орнықты дамуды қолдауға, сондай-ақ бүкіл өңірдің қауіпсіздігі мен өркендеуіне жәрдемдесуге бейілділігін растады.       Қазақстан Республикасы Біріккен Ұлттар Ұйымының қамқорлығымен халықаралық өзара іс-қимыл тетіктерін нығайтуға, өңірлік ынтымақтастықты дамытуға және сындарлы дипломатияны ілгерілетуге бағытталған күш-жігерін алдағы уақытта да жалғастыра береді. Бұл қызмет бейбітшілік, өзара құрмет және ортақ жауапкершілік қағидаттарына негізделеді.   Іс-шараға Қазақстан Республикасының, Қырғыз Республикасының, Тәжікстан Республикасының, Түрікменстан, Өзбекстан Республикасының Еуропалық Одақтың және Біріккен Ұлттар Ұйымының өкілдері қатысты.Ақпарат көзі : https://www.gov.kz/memleket/entities/mfa/press/news/details/1240612?lang=ru

 Қазақстан Республикасы Қарулы күштері Тылы бастығының басқармасында цифрлық трансформация сыныбы пайдалануға берілді.Жаңа алаң әскери логистика, жабдықтау және материалдық құралдарды есепке алу үдерістерінің тиімділігін арттыруға бағытталған заманауи цифрлық шешімдерді әзірлеу, талқылау және сынақтан өткізу орталығы ретінде қызмет атқарады.Салтанатты ашылу рәсіміне Қорғаныс министрінің тыл және әскери инфрақұрылым жөніндегі орынбасары генерал-майор Алмаз Жұмакеев қатысты. Өз сөзінде ол елімізде жарияланған Цифрландыру және жасанды интеллект жылы аясында әскерді қамтамасыз ету жүйесіне заманауи технологияларды кеңінен енгізу ерекше маңызға ие екенін атап өтті.Оның айтуынша, интеллектуалды шешімдерді қолдану материалдық құралдарды есепке алу мен мониторинг жүргізу үдерістерінің ашықтығын қамтамасыз етіп қана қоймай, әскери бөлімдердің қажеттіліктеріне жедел ден қоюға мүмкіндік береді. Бұл өз кезегінде басқару тиімділігін арттырып, материалдық-техникалық қамтамасыз ету жүйесінің сапасын жаңа деңгейге көтереді.Қарулы күштер Тылының бастығы полковник Арман Мансұров жаңа сынып материалдық-техникалық қамтамасыз ету саласындағы озық бастамаларды әзірлеу мен енгізудің маңызды орталығына айналатынын атап өтті. Оның пікірінше, бұл алаң мамандардың тәжірибе алмасуына, инновациялық тәсілдерді сынақтан өткізуіне және ресурстарды басқаруға арналған заманауи цифрлық құралдарды әзірлеуіне қолайлы жағдай жасайды.Іс-шара барысында қатысушылар қазіргі кезеңдегі әскерді қамтамасыз етуді ұйымдастырудың өзекті мәселелерін жан-жақты талқылады. Атап айтқанда, ұшқышсыз авиациялық жүйелер мен роботтандырылған кешендерді дамыту, материалдық қамтамасыз ету базаларының инфрақұрылымын жетілдіру, әскери тасымалдарды ұйымдастыру, әскери қызметшілерді киім-кешекпен қамтамасыз ету, сондай-ақ тамақтандыру нысандары қызметкерлерінің арнайы киім үлгілерін біріздендіру мәселелеріне ерекше назар аударылды.Кездесу қорытындысы бойынша генерал-майор Алмаз Жұмакеев жазғы оқу кезеңіне арналған басым міндеттерді айқындады. Ол басқару үдерістерін одан әрі цифрландыру, қамтамасыз ету жүйесінің тиімділігін арттыру және жеке құрамды сапалы даярлау бағытындағы жұмысты жүйелі түрде жалғастыру қажеттігін атап өтіп, алдағы кезеңге арналған негізгі міндеттер мен даму бағыттарын белгіледі.Ақпарат көзі : https://www.gov.kz/memleket/entities/mod/press/news/details/1240574?lang=ru

Сол жағалаудағы «Қайсар Арена» стадионында жергілікті «Қайсар» мен Ақтау қаласының «Каспий» футбол командалары арасында Қазақстан Премьер-лигасының 13-ші туры аясында кезекті матч өтті.Оған облыс әкімі Мұрат Ергешбаев, облыстық мәслихат төрағасы Мұрат Тлеумбетов барып, жергілікті командаға қолдау білдірді.Тартысты кездесудің алғашқы таймында «Қайсар» сапындағы Нұрдаулет Ағзамбаев пен Имо Эзикель қарсылас қақпасына гол соғып, команданы алға шығарды. Осылайша жергілікті команда 2:1 есебінде жеңіске жетті.Ақпарат көзі : https://www.gov.kz/memleket/entities/kyzylorda/press/news/details/1240520?lang=ru

15 маусым күні аймақ басшысы Мұрат Ергешбаев Жаңақорған ауданының тұрғындарымен кездеседі.Сонымен қатар, аудандағы әлеуметтік нысандардың жұмысымен танысып, ауылдық елді мекендерге барады.Ақпарат көзі : https://www.gov.kz/memleket/entities/kyzylorda/press/news/details/1240508?lang=ru

Облыс әкімі Мұрат Ергешбаев «BI Group» компаниясының акционері, директорлар кеңесінің мүшесі Бауыржан Исабаевпен кездесті. Кездесуде өңірде инвестициялық жобаларды іске асыру, инфрақұрылымды дамыту, көшелерді абаттандыру және қаланың шет аймақтарына әлеуметтік нысандар салу мәселелері талқыланды.Кейінгі жылдары «BI Group» компаниясының ауқымды инвестициялық және инфрақұрылымдық жобалары өңір келбетін жаңғыртқаны белгілі. Атап айтқанда, «Сыр жұлдыздары» шығармашылық-инновациялық академиясы – бір мезетте 500 оқушыны, тәулігіне 3 мыңға дейін баланы қабылдайтын көпфункционалды орталық. Мұнда спорттық және шығармашылық үйірмелермен қатар, робототехника, жасанды интеллект, 3D модельдеу және түрлі оқу-зертханалық кабинеттер жұмыс істейді.Ботаникалық бақ – экологиялық мәдениетті дамытуға және жаңа қоғамдық кеңістіктер құруға бағытталған жоба. Бақта әлемнің түрлі аймақтарынан әкелінген 92 түрлі 3300-ден астам өсімдік өсіріледі, нысан заманауи микроклиматтық және суару жүйелерімен жабдықталған.Жақында пайдалануға берілген «AI-KERIM» оқу-сауықтыру орталығы халықаралық стандарттарға сай, 300 орынға арналған көпфункционалды кешен ретінде қызмет атқарады. Құрамында әкімшілік блок, event-аймақ, жатақхана бар.Бұдан бөлек, қалалық мәдени-демалыс паркі мен Президент саябағы қайта жаңғыртылып, заманауи демалыс аймағына айналды. Мұнда субұрқақтар, амфитеатр, спорт және ойын алаңдары, жүгіру, велосипед жолақтары салынып, 31 гектар аумаққа жасыл желек егілді.Ақпарат көзі : https://www.gov.kz/memleket/entities/kyzylorda/press/news/details/1240503?lang=ru

Облыс әкімі Мұрат Ергешбаев, ҚР Төтенше жағдайлар министрі, генерал-лейтенант Шыңғыс Әрінов, құқық қорғау органдарының бірінші басшылары және зиялы қауым өкілдері Қарауылтөбе ауылдық округіндегі «Ауыл құтқарушылары» республикалық бағдарламасы аясында салынған кезекті өрт сөндіру бекетінің ашылу рәсіміне қатысты. Шарада облыс әкімі төтенше жағдайлар қызметінің техникалық әлеуетін арттыру және тұрғындардың қауіпсіздігін қамтамасыз ету бағытында атқарылып жатқан жұмыстарға тоқталды. «Облыс, аудан орталықтарынан шалғайда орналасқан елді мекендердегі халықтың қауіпсіздігі аса маңызды. Осыған орай күні кеше Төтенше жағдайлар министрі Шыңғыс Сайранұлы Аралдағы Қамыстыбас және Қазалыдағы Жанқожа батыр ауылдық округтерінде «Ауыл құтқарушылары» бағдарламасы аясында салынған өрт сөндіру пункттерін табыстады.Бүгін аталған бағдарламамен Қарауылтөбеде салынған өрт сөндіру бекетін ресми түрде іске қосамыз. Бұдан бөлек, Қызылорда қаласы мен Қазалы, Шиелі аудандарындағы сала қызметкерлерінің пайдалануына 11 заманауи өрт сөндіретін және арнайы жабдықталған жеңіл автокөлік бердік. Облыста 2023-2025 жылдары 2 млрд. теңгеден астам қаржыға 17 өрт сөндіру техникасы, 4 арнайы жабдықталған жеңіл автокөлік, 90 цифрлық радиобайланыс жүйесі, 50-ден астам арнайы құрал-жабдық алынды. Осы жылы 2,8 млрд теңгеге 20 өрт сөндіру автокөлігі сатып алынады деп жоспарлануда. Жаңа техникалар алдағы уақытта табысталады. Бұл – өңіріміздің төтенше жағдайлар саласы қызметкерлеріне үлкен қолдау», – деді Мұрат Нәлқожаұлы. Ашылу рәсімінде Шыңғыс Әрінов, ел ағасы Аманкелді Досмаханұлы сөз сөйлеп, өрт сөндіру бекетін ашуға атсалысқандар мен азаматтық қорғау саласында қажырлы еңбек еткен сала қызметкерлері облыс әкімінің Алғыс хатымен және Төтенше жағдайлар министрлігінің наградаларымен марапатталды. Бұдан кейін Шыңғыс Сайранұлы төтенше жағдайлар қызметінің жеке құрамымен кездесті. Жасөспірімдерге арналған «Batyr Kids Team» спорт залына, үнемделген қаржы есебінен жөндеуден өткен департамент ғимаратына барды. Жедел-құтқару жасағының бөлімшесімен танысып, олардың материалдық-техникалық жағдайын көрді.Айта кетейік, «Ауыл құтқарушылары» республикалық бағдарламасының мақсаты – өртке қарсы қызметі жоқ шалғай елді мекендерде жедел және тиімді көмек жүйесін құру. Бүгінде осы бағдарлама шеңберінде аймақта 35 бекет салынған. Бекеттер 25 өрт сөндіру автокөлігімен, 12 тіркеме, 8 тасымал, 2 стационарлық радиостанциямен, өрт құрал- жабдықтары және жауынгерлік киімдермен жабдықталған.Ақпарат көзі : https://www.gov.kz/memleket/entities/kyzylorda/press/news/details/1240483?lang=ru

Аймақ басшысы Мұрат Ергешбаев қала аумағындағы бірқатар нысанды аралап, алдымен Тасбөгеттегі бас су жинау қоймасына барды. Нысанның тәуліктік қуаты 56 500 текше метр, «Степь», «Арай» және «Бас тоғаннан» алынған таза су арнайы су сақтау қоймаларына жиналады. Кейін насос станциясы арқылы төрт су құбыры желісімен қала тұрғындарына жеткізіледі. Сырдария өзенінен алынатын су механикалық тазартудың бес кезеңінен өткізіледі. Зертхана мамандары ауызсудың сапалық құрамын тәулік бойы тұрақты бақылауда ұстап, тиісті сараптамалар жүргізеді.Облыс әкімі жауапты басшыларға жұмысты жүйелі үйлестіріп, тұрақты бақылауды тапсырды.Бүгінде «Қызылорда автобус паркі» ЖШС-нің 300 қоғамдық көлігі қала аумағына 32 бағыт бойынша қатынайды. Серіктестікте 700-ге жуық адам еңбек етеді.Мұрат Нәлқожаұлы жолаушыларға көрсетілетін қызмет сапасын арттыруды тапсырды.Келесі нысан - Абай даңғылы бойындағы тұрғын үйлер аулаларына салынып жатқан спорт және балалар ойын алаңдарының құрылысы. 1,9 млрд теңгенің жобасы аясында 29 тұрғын үйдің ауласына ойын, шағын футбол және воркаут алаңдары салынады. Бас мердігер – «Еңбек» РМК.Өңір басшысы балалар қауіпсіздігін басты назарда ұстап, құрылысты сапалы әрі белгіленген мерзімде аяқтауды тапсырды.Бұдан кейін Қорқыт ата атындағы Қызылорда университеті жанынан бой көтеріп жатқан Инжинирингтік парктің құрылыс алаңына барды. Парк құрамында археология және физика-химиялық талдау әдістері зертханалары, жасанды интеллект және академиялық басымдық орталықтары, робототехника, жерді қашықтан зондтау және ІТ зертханалары жұмыс істейді.Сонымен қатар 90 орындық дәрісхана, 140 орындық конференц-зал және заманауи компьютерлік аудиториялар қарастырылған. Нысанды осы жылы пайдалануға беру жоспарланған.Ақпарат көзі : https://www.gov.kz/memleket/entities/kyzylorda/press/news/details/1240494?lang=ru

Сыр өңіріне жұмыс сапарымен келген ҚР Төтенше жағдайлар министрі, генерал-лейтенант Шыңғыс Әрінов, облыс әкімінің орынбасары Бахыт Жаханов «Ауыл құтқарушылары» республикалық бағдарламасы аясында Арал ауданының Қамыстыбас және Қазалы ауданының Жанқожа батыр ауылдық округтерінде салынған өрт сөндіру пункттерінің ашылу рәсіміне қатысты.«Ауыл құтқарушылары» республикалық бағдарламасының мақсаты – өртке қарсы қызметі жоқ шалғай елді мекендерде жедел және тиімді көмек жүйесін құру. Табиғи жағдайлар мен қашықтықты ескере отырып, тұрғындардың қауіпсіздігіне уақытылы ден қою өте маңызды. Бүгінде осы бағдарлама шеңберінде аймақта 35 бекет салынған.Рәсімде Шыңғыс Әрінов сөз сөйледі. Әрі қарай облыс әкімінің орынбасары төтенше жағдайлардың алдын алудағы, тұрғындар қауіпсіздігін қамтамасыз етудегі өрт сөндіру бекеттерінің маңыздылығына тоқталды.«Сыр өңірінде Президентіміздің, Үкіметтің тапсырмасымен азаматтық қорғау саласын жетілдіруге, төтенше жағдайлардың алдын алу шараларын күшейтуге, материалдық-техникалық базасы мен кадрлық әлеуетін арттыруға айрықша басымдық берілуде. Бүгін міне, Арал мен Қазалының Қамыстыбас, Жанқожа батыр ауылдарында өрт сөндіру пункттерін ашамыз.Жалпы төтенше жағдайдың алдын алып, адам өмірін құтқару – жоғары әрі жауапты миссия. Елдің амандығы, қоғамның тыныштығы үшін өз өмірін қатерге тігу кез келген адамның қолынан келе бермейді. Осы салада аянбай еңбек етіп жүрген қызметкерлерге барша Сыр жұртшылығының атынан зор алғысымды білдіремін! Бүгінгі жаңадан табыстағалы тұрған заманауи техникалар ел игілігіне қызмет ете берсін», – деді Бахыт Дүйсенұлы.Салтанатты рәсімде өрт сөндіру бекетін ашуға атсалысқандар мен азаматтық қорғау саласында қажырлы еңбек еткен қызметкерлер облыс әкімінің Алғыс хатымен және Төтенше жағдайлар министрлігінің наградаларымен марапатталды.Ауылдық жерде төтенше жағдай болғанда алғашқы минуттар шешуші рөл атқарады. Бүгінде елімізде арнайы дайындықтан өткен еріктілерді біріктіретін «Ауыл құтқарушылары» ерікті өрт сөндіру пункттері жұмыс істейді. Бұл – ТЖМ-нің кәсіби күштері келгенге дейін әрекет етіп, алғашқы шараларды қабылдайтын ауыл тұрғындары.Еріктілерді іріктеу және дайындау белгіленген талаптарға сәйкес жүргізіледі. Ведомстволық бағдарлама аясында теориялық және практикалық дайындықтан өтеді, өрт сөндіру құралдарымен жұмыс істеуді, алғашқы дәрігерлік көмек көрсетуді үйренеді.Төтенше жағдай кезінде олар бірінші болып әрекет етеді, жағдайды бағалайды, өз мүмкіндіктері шегінде өртті оқшаулау шараларын жүргізеді, радиобайланыс арқылы ақпарат беріп, кәсіби өрт сөндірушілерді шақырады.Өңірде 2023-2025 жылдары 2 млрд. теңгеден астам қаржыға 17 өрт сөндіру техникасы, 4 арнайы жабдықталған жеңіл автокөлік, 90 цифрлық радиобайланыс жүйесі, 50-ден астам арнайы құрал-жабдық алынды.Биыл 2,8 млрд теңгеге 20 өрт сөндіру автокөлігі сатып алынады деп жоспарлануда. Жаңа техникалар алдағы уақытта ел игілігіне табысталады.Ақпарат көзі : https://www.gov.kz/memleket/entities/kyzylorda/press/news/details/1240474?lang=ru

Облыс әкімі Мұрат Ергешбаев, ҚР Төтенше жағдайлар министрі, генерал-лейтенант Шыңғыс Әрінов, құқық қорғау органдарының бірінші басшылары және ел ағаларының қатысуымен азаматтық қорғау саласының қызметкерлеріне 11 заманауи өрт сөндіру және арнайы жабдықталған жеңіл автокөлік кілтін табыстау рәсімі өтті. Рәсімде облыс әкімі саланы қолдау мемлекеттің маңызды бағыттардың бірі екенін атап өтті. «Мемлекет басшысы Қасым-Жомарт Кемелұлы: «Табиғи және техногендік апаттар туындаған кезде құтқарушылардың еңбегі ерекше мемлекеттік мәнге ие болады. Мемлекет сіздердің қажырлы еңбектеріңізді бағалайды», - деген болатын.Азаматтық қорғау органдары - төтенше жағдайлардың алдын алу және жоюға бағытталған жұмысты атқаратын еліміздегі маңызды құрылымдардың бірі. Олардың басты міндеті – өз өмірлерін қауіп-қатерге тіге отырып, халықтың қауіпсіздігін қамтамасыз ету. Бүгінде Президентіміздің, Үкіметтің тапсырмасымен қолдау шаралары жүйелі жүргізілуде. Біз бұл бағыттағы жұмыстарды одан әрі жалғастырамыз. Бүгінгі жаңадан табыстағалы тұрған өрт сөндіру техникалары игіліктеріңізге қызмет етсін! Еліміз тыныш, халқымыз аман, Тәуелсіздігіміз баянды болғай!», - деді Мұрат Нәлқожаұлы. Салтанатты шарада Шыңғыс Әрінов сөз сөйлеп, төтенше жағдайлар саласында аянбай еңбек етіп жүрген қызметкерлер мен сала ардагерлері облыс әкімінің Алғыс хатымен және Төтенше жағдайлар министрлігінің наградаларымен марапатталды.Шара соңында аймақ басшысы және Төтенше жағдайлар министрі жаңа техникалар мен жеңіл көліктердің кілтін салтанатты түрде табыстап, №6 өрт сөндіру бөлімінің жұмысымен танысты. Айта кетейік, күні кеше Аралдың Қамыстыбас және Қазалының Жанқожа батыр ауылдық округтерінде «Ауыл құтқарушылары» республикалық бағдарламасы аясында жаңа өрт сөндіру бекеттері ашылған болатын.Ақпарат көзі : https://www.gov.kz/memleket/entities/kyzylorda/press/news/details/1240475?lang=ru

Қазақстан Республикасы Сыртқы істер министрінің орынбасары Әлібек Қуантыров Аймақтық инвестициялық штабтың отырысына қатысты.Отырыс барысында аймақтың әлеуметтік-экономикалық дамуы үшін маңызды бірнеше инвестициялық жобаларды жүзеге асыруға қатысты мәселелер талқыланды. Қаржыландыруды тартуға, нормативтік-құқықтық базаны жетілдіруге, инфрақұрылымды дамытуға және инвесторларды мемлекеттік қолдауға ерекше назар аударылды.Министрдің орынбасары  Атырау облысы елдің негізгі экономикалық орталықтарының бірі болып табылатынын, Қазақстандағы мұнай өндірісінің 60%-дан астамын және газ өндірісінің шамамен 80%-ын құрайтынын айтты. Ол аймақ экономикасын одан әрі әртараптандырудың, мұнай-химия кешенін, энергетиканы, логистиканы және жоғары қосылған құн өндірісін дамытудың маңыздылығын атап өтті.Сондай-ақ, Үкіметтің 2029 жылға қарай Қазақстан экономикасын 450 млрд долларға дейін жеткізу және кем дегенде 150 млрд доллар тікелей шетелдік инвестицияларды тарту мақсатын қойғанын атап өтті. Осыған байланысты аймақтық инвестициялық штабтардың тиімді жұмыс істеуі және жоғары сапалы аймақтық инвестициялық портфельдерді әзірлеу ерекше маңызға ие екендігіне назар аударылды.Отырыс шеңберінде «Силлено», «KMG PetroChem», «Атырау вагон зауыты», «Фибратекс» және «Бутадиен» компанияларының стратегиялық жобаларын іске асыру мәселелері, сондай-ақ Атырау облысында мердігерлер мен қосалқы мердігерлерді тіркеу арқылы аймақтың салық базасын кеңейту бастамалары қарастырылды.Атырау арнайы экономикалық аймағын дамытуға, соның ішінде коммуналдық инфрақұрылым құрылысына және АЭА ішкі ережелерін жеделдетіп бекітуге арналған бөлек талқылау болды.Жұмыс сапары аясында Әлібек Қуантыров аймақтағы бірнеше өнеркәсіптік кәсіпорындарға да барды. «Талшықтекс» ЖШС-не бару барысында тоқыма өндірісін дамыту және шикізатты терең өңдеу жобаларын жүзеге асыру мәселелері қарастырылды. «Фибратекс» ЖШС-ның өндірістік қуатын кеңейту перспективалары және инвестициялық бастамаларды мемлекеттік қолдау шаралары талқыланды.Қазіргі уақытта облыста жалпы сомасы 7 трлн теңгеден асатын және 6000-нан астам тұрақты жұмыс орнын құратын 60 инвестициялық жоба пулы құрылды. Бұл жобаларды іске асыру аймақ экономикасын одан әрі әртараптандыруға, оның өнеркәсіптік әлеуетін нығайтуға және инвестициялық тартымдылығын арттыруға мүмкіндік береді. Ақпарат көзі : https://www.gov.kz/memleket/entities/mfa/press/news/details/1240358?lang=ru

 Талдықорған гарнизонында 37-десанттық-шабуылдау бригадасының 400-ден астам әскери қызметшісі алғаш рет парашютпен секіруді орындады. Жас сарбаздар үшін бұл әуе-десанттық даярлықтың маңызды кезеңі әрі мінез-құлық пен ерік-жігерді сынайтын нағыз сынақ болды.Секірулер 800 метр биіктіктен, қауіпсіздік шараларын қатаң сақтай отырып және тәжірибелі нұсқаушылардың тұрақты бақылауымен орындалды. Дайындықтың барлық кезеңі алдын ала мұқият пысықталды.18404 әскери бөлімі командирнің әуе-десанты даярлығы жөніндегі орынбасары подполковник Бекдәулет Оспанов секірулер алдында барлық десантшылар толықтай жерүсті даярлық курсынан өткенін атап өтті.– Сарбаздар парашют жүйесінің құрылысын оқып, әуедегі және жердегі әрекет ету тәртібін пысықтады. Қауіпсіздік шараларына ерекше назар аударылды. Секіруге тек дайындықтың барлық элементтерін жетік меңгерген әскери қызметшілер ғана жіберілді. Біз үшін әрбір жауынгердің әуеге толық дайындықпен, сабырлы әрі сенімді түрде көтерілгені маңызды, – деді ол.Қарқынды оқу-жаттығу шамамен алты айға созылды. Осы уақыт ішінде жас десантшылар теориялық және психологиялық дайындықтан өтті. 18404 әскери бөлімі базасында жүргізілген бұл оқу кезеңі олардың жан-жақты даярлығын қамтамасыз етті.Тәжірибелі нұсқаушылардың айтуынша, дәл осы кезеңде әскери қызметшілерде дене дайындығы, тәртіптілік, өзіне сенімділік және күйзеліс жағдайына төзімділік секілді қажетті қасиеттер қалыптасады.– Әрине, қобалжу болды, сонымен бірге өзімді жеңуге деген үлкен ынтаны да сезіндім. Парашют ашылғаннан кейін сөзбен айтып жеткізу қиын сезім пайда болады екен. Бұл менің өмірімдегі ұмытылмайтын сәт, – деді мерзімді қызметтің сарбазы қатардағы жауынгер Біржан Абай.Осылайша алғашқы парашюттік секірулерді сәтті орындаған әскери қызметшілер нағыз десантшы қатарына қосылып, жаңа сынақтарға дайын екендерін дәлелдеді.Ақпарат көзі : https://www.gov.kz/memleket/entities/mod/press/news/details/1240334?lang=ru

Қорғаныс министрінің тәрбие және идеологиялық жұмыс жөніндегі орынбасары генерал-майор Асқар Мұстабеков Қарулы күштердің Арнайы операциялар күштеріне қарайтын әскери бөлімдерде болды.Генерал-майор Асқар Мұстабеков әскери бөлім командирлерінің инфрақұрылымды одан әрі дамыту, материалдық-техникалық базаны жетілдіру, жауынгерлік және арнайы даярлық нәтижелері туралы баяндамаларын тыңдады.Арнайы операциялар күштерінің нұсқаушылары оған әскери қызметшілер қару-жарақ пен әскери техниканы меңгеру машықтарын жетілдіретін оқу-жаттығу кешенінің қалай жабдықталғанын көрсетті.Арнайы операциялар күштерінің қолбасшылығы Қорғаныс министрінің орынбасарына Қарулы күштерді цифрлық трансформациялау және жасанды интеллект технологияларын енгізу бағытындағы жұмыстары жайлы мәлімдеді. Цифрлық офицерлер басқару мен әскери қызметшілерді даярлау үдерістерін жетілдіруге арналған Centrum бағдарламасы мен «Арнайы операциялар күштері жауынгерінің жеке профилі» жобасын таныстырды.Генерал-майор Асқар Мұстабеков әскерге жуырда келген сарбаздармен кездесіп, олардың қызметі мен тұрмыс жағдайына, әскери ортаға бейімделу барысына, моральдық-психологиялық күйіне және қойылған міндеттерді орындауға дайындығына мән берді.Сапар соңында Қорғаныс министрінің орынбасары тәрбие және идеологиялық жұмысты барынша жетілдіру, әскери тәртіпті нығайту және бөлімдердегі қызмет қауіпсіздігін қамтамасыз ету жөнінде бірқатар тапсырмалар берді.Ақпарат көзі : https://www.gov.kz/memleket/entities/mod/press/news/details/1240325?lang=ru

Астана, 2026 ж. 12 маусым – Қазақстан Республикасының Сыртқы істер министрі Ермек Көшербаев Қазақстан Республикасындағы Таиланд Корольдігінің Елшісі Пияпин Нийомрерксті қабылдады. Кездесу барысында тараптар қазақ-тай ынтымақтастығының қазіргі жағдайы мен даму перспективаларын талқылады, сондай-ақ сауда, инвестиция, тасымалдау және логистика, цифрландыру, маңызды минералдар мен энергетика, электроника және озық өндіріс, сондай-ақ туризм салаларындағы өзара іс-қимылды одан әрі кеңейту мәселелері бойынша пікір алмасты.Алдағы екіжақты іс-шаралардың кестесіне, оның ішінде Таиланд Корольдігі Премьер-министрінің орынбасары – Сыртқы істер министрі С.Пуангкеткеоның ү.ж. 24-26 маусымда Қазақстан Республикасына ресми сапарына ерекше назар аударылды. Сонымен қатар, халықаралық және өңірлік күн тәртібіндегі өзекті мәселелер бойынша пікір алмасу болды.Ақпарат көзі : https://www.gov.kz/memleket/entities/mfa/press/news/details/1240289?lang=ru

Астана, 2026 жылғы 12 маусым – Қазақстан Республикасының Сыртқы істер министрі Ермек Көшербаев Франция Республикасының Қазақстан Республикасындағы Елшісі Сильван Гиогені қабылдады.Кездесу барысында тараптар қазақ-француз стратегиялық әріптестігінің өзекті бағыттарын талқылады. Саяси диалогты одан әрі ілгерілету, сауда-экономикалық байланыстарды кеңейту, мәдени-гуманитарлық және білім беру салаларындағы ынтымақтастықты дамыту мәселелеріне ерекше назар аударылды. Сондай-ақ көпжақты алаңдар аясындағы өзара іс-қимылдың перспективалары қарастырылды.Екіжақты сауда көлемін ұлғайтуға және іскерлік байланыстарды нығайтуға ықпал ететін бірлескен инвестициялық және экономикалық жобаларды жүзеге асыру мәселелері кездесу күн тәртібіндегі маңызды тақырыптардың бірі болды.Кездесу қорытындысы бойынша тараптар Астана мен Париж арасындағы көпқырлы ынтымақтастықты одан әрі тереңдетуге өзара бейілділігін растады.Ақпарат көзі : https://www.gov.kz/memleket/entities/mfa/press/news/details/1240263?lang=ru

Қостанай облысының әкімі Құмар Ақсақалов «Осьминог» аквапаркінің құрылыс жұмысымен танысуға барды. Аймақ басшысымен бірге өңіріміздің белсенді жастары да бой көтеріп жатқан еліміздегі ең үлкен жабық аквапаркте болды.«Облыс экономикасы барлық бағыттар бойынша дамып келеді. Бұл – өнеркәсіп, ауыл шаруашылығы, құрылыс, көлік, шағын және орта бизнес. Өңдеу өнеркәсібі бойынша кәсіпорындар, фабрикалар, зауыттар салынуда. Биыл өңірімізде жеңіл автокөліктерге арналған автокомпоненттер шығаратын зауыт іске қосылады. 800 жаңа жұмыс орны құрылады. Дәл осындай жеңіл автокөліктерге арналған автокомпоненттер шығаратын тағы бір зауыт салу туралы шешім қабылданды, онда да 800 жаңа жұмыс орны ашылады», – деді аймақ басшысы.Алдағы уақытта сондай-ақ, «Кондитерлік астана» фабрикасы іске қосылады, онда да 260 жаңа жұмыс орны құрылады. Қостанай қаласында «Кайзен» зауытының базасында қуаттылығы 40 мың тонна ірі макарон фабрикасы салынады. Лисаков қаласында май экстракциялау зауыты салынып жатыр.Ауыл шаруашылығында тауарлы-сүт фермалар, бордақылау алаңдары, қайта өңдеу цехтары бар. Құрылыс өз қарқынымен жүріп жатыр. Биыл 520 мың шаршы метр тұрғын үй салу жоспарда.Үш жыл ішінде Қостанай қаласы халқының саны 13,2 мың адамға көбейді. Мұның бәрі экономиканың даму нәтижесі. Қалада жаңа қоғамдық орындар, жаңа демалыс аймақтары пайда болуда. Marriott, Novotel және Holiday Inn қонақ үйлері салынады. Жақын күндері әуежай-отель ашылады.«Экономиканың дамуымен және фабрикалар мен зауыттардың ашылуымен қатар, тұрғындар отбасыларымен бірге демалатын орындар да қатар ашылуы тиіс. Қонақтар үшін Қостанай облысының өзіндік ерекшеліктері болуы керек. Сондай ерекшеліктердің бірі – еліміздегі ең үлкен «Осьминог» жабық аквапаркі болмақ», – деді Құмар Ақсақалов.Мемлекет Басшысының бұқаралық спортты дамыту және ұлт денсаулығын нығайту жөніндегі тапсырмасына сәйкес, аймағымызда спорт инфрақұрылымының саны артып келеді.Соңғы үш жылда өңірде 30-дан астам спорт нысаны пайдалануға берілді. 18 дене шынықтыру-сауықтыру кешені, 8 спорт залы, 4 жабық хоккей корты, 2 стадион, ат манежі және бассейн ашылды. Былтыр «Трудовые резервы» спорт кешені жаңғыртылды.Қазіргі уақытта «Осьминог» аквапаркін жаңғырту жұмыстары қарқынды жүріп жатыр. Нысанның қасбетін әрлеу, инженерлік желілер тарту, еден төсеу және бассейндерді безендіру жұмыстары жүргізілуде.Құрылыс жұмысы аяқталғаннан кейін аквапарктің жалпы аумағы екі есеге кеңейіп, 9 мың шаршы метрден асады. Су айдынының көлемі үш есе өсіп, 1 мың шаршы метрден астам ұлғаяды. Демалыс нысаны 500 келушіні қабылдайды.Бірінші қабатта толқынды бассейн, ересектерге арналған джакузи бассейні, сырғанақтары бар бассейн және балалар бассейні бар аквааймақ, 100 адамға арналған фуд-корт орналасады.  Ақпарат көзі : https://www.gov.kz/memleket/entities/kostanay/press/news/details/1240251?lang=ru