Құрметті Сағадат Нұрмағамбетов атындағы Құрлық әскерлері әскери институтының ардагерлері, профессорлық-оқытушылық құрамы, курсанттар және түлектер!Сіздерді еліміздің әскери білім беру жүйесінде ерекше орны бар даңқты оқу орнымыздың 55 жылдық мерейтойымен шын жүректен құттықтаймын!Елу бес жыл – бұл биік белестер мен тарихи жетістіктерге толы шежірелі жол. Осы уақыт ішінде Құрлық әскерлері әскери институты еліміздің қорғаныс қабілетін нығайту жолында мыңдаған кәсіби офицерді даярлаған ұлт армиясының тірегі, әскери кадрлар дайындайтын іргелі білім ордасына айналды. Бұл оқу орнын тәмамдаған түлектер Отанға адал қызмет етіп, ерлік пен батылдықтың, патриоттық рухтың үлгісін көрсетуде.Институтқа Қазақстан Республикасының тұңғыш Қорғаныс министрі, Кеңес Одағының Батыры, Халық қаһарманы армия генералы Сағадат Нұрмағамбетовтың есімінің берілуі – үлкен мәртебе әрі зор жауапкершілік. Бұл есім жоғары талаптар мен үздіксіз даму қағидатын айқындайды. Сіздер бұл міндетті абыроймен атқарып келесіздер. Оқытудың озық әдістемелерін енгізіп, жаңа технологиялар мен заманауи қару-жарақтарды меңгеру арқылы офицер кадрларын даярлауда үздік үлгі көрсетіп отырсыздар.Мерейтой аясында институт ардагерлеріне баға жетпес тәжірибесі, қажырлы еңбегі және әскери білімнің қалыптасуына қосқан өлшеусіз үлесі үшін шексіз алғысымды білдіремін. Профессорлық-оқытушылық құрамға кәсіби біліктілігі, Отанға деген адалдығы және жаңа буын офицерлерін тәрбиелеуге сіңірген еңбегі үшін ерекше ризашылығымды жеткіземін. Курсанттарға әскери ғылымды меңгеруде табандылық, мықты денсаулық және Отанға адал қызмет ету жолында толағай табыс тілеймін.Сағадат Нұрмағамбетов атындағы Құрлық әскерлері әскери институты алдағы уақытта да еліміздің қорғаныс саласына үлес қосатын кәсіби офицерлерді даярлауда көшбасшы болып қала беретініне сенімім мол.Сіздерге зор денсаулық, амандық, табысты қызмет және ашық аспан тілеймін!Ақпарат көзі : https://www.gov.kz/memleket/entities/mod/press/news/details/1060267?lang=kk

Жастар еңбек жасақтары жыл сайын облыстың барлық өңірлерінде маусым мен қыркүйек аралығында құрылады және жазғы кезеңде жастарды жұмыспен қамтудың пәрменді шараларының бірі болып табылады.  Ағымдағы жылы «Жасыл елде» 2000-ға жуық жас бала жұмыс істеді, оның жартысынан астамы-ауыл жастарының өкілдері. Сонымен қатар, облыс орталығында да, басқа өңірлерде де жастардың еңбек жасақтарында жұмыс істеуге деген қызығушылығының артуы байқалады. Осыған байланысты жалдау ұлғайтылды.«Жасыл ел» табыс табу мүмкіндігінен басқа, жастардың экологиялық ойлауын, дербестікке ұмтылуын, еңбекқорлығын қалыптастырады, сондай-ақ жастардың әлеуметтенуіне және өзін-өзі жүзеге асыруына ықпал етеді. Сонымен қатар, өткен маусымнан бастап жастар еңбек жасақтарының жауынгерлері экологиялық квесттерге, «Таза ойындар» ойындарына және «Таза Қазақстан» шеңберіндегі басқа да акцияларға белсенді қатысады, бұл еңбек күндерін одан да қызықты етеді.Ақпарат көзі : https://www.gov.kz/memleket/entities/kostanay/press/news/details/1060048?lang=kk

Алматы қаласында С.Нұрмағамбетов атындағы Құрлық әскерлерінің әскери институты 55 жылдық мерейтойын атап өтуде.Елу жылдан астам тарихында бұл оқу орны кәсіби офицер кадрларын даярлаудағы жетекші орталықтардың біріне айналып, елдің қорғаныс қабілеті мен қауіпсіздігін нығайтуға сүбелі үлес қосты.1970 жылы негізі қаланған институт алғашқы жылдардан-ақ кәсіби әскери мамандар даярлайтын білім ордасы ретінде танылды. Бүгінде бұл – заманауи әскери жоғары оқу орны. Мұнда жаңа буын офицерлері тәрбиеленуде. Олар Отанға адалдығымен, жоғары кәсіби даярлығы, әскери тәртібі және көшбасшылық қасиеттерімен ерекшеленеді.55 жыл ішінде Құрлық әскерлерінің әскери институты мыңдаған офицерлерді дайындап шығарды. Олардың көпшілігі жоғары әскери шендерге қол жеткізіп, қорғаныс саласында, мемлекеттік билік құрылымдарында және халықаралық ұйымдарда жауапты қызметтер атқаруда. Түлектердің арасында үш қорғаныс министрі, белгілі әскери қолбасшылар, әскер бөлімдері мен құрамаларын басқарған командирлер бар. Олардың бәрі де Қазақстан армиясының дамуына зор үлес қосты.Құрлық әскерлері әскери институтының бастығы генерал-майор Бауыржан Ибатулин атап өткендей, 55 жыл – ерлік пен елге адал қызмет етудің, Отан алдындағы парызға деген беріктіктің шежіресі.– Біздің түлектеріміз Қарулы күштер қатарында абыроймен қызмет етіп жүр, ал қазіргі курсанттар аға буынның даңқты дәстүрлерін лайықты жалғастыруда. Институт әрқашан абыройдың, ар-намыстың және патриотизмнің символы болып қала береді, – деді ол.Институттың мерейтойы – отандық әскери білім беру саласындағы маңызды белес. Бұл – білікті кадрлар даярлау ісіндегі оқу орнының маңызын, сондай-ақ Қазақстан Республикасының тәуелсіздігі, аумақтық тұтастығы мен егемендігін нығайтудағы рөлін айшықтайтын оқиға.Ақпарат көзі : https://www.gov.kz/memleket/entities/mod/press/news/details/1060054?lang=kk

Бүгін Риддер қаласында 600 орынға арналған жаңа №12 мектептің салтанатты ашылуы өтті. Бұл оқу орны «Келешек мектептері» ұлттық жобасы аясында салынды және қаланың ең маңызды әлеуметтік нысандарының біріне айналды.Салтанатты жиынға Шығыс Қазақстан облысының әкімі Нұрымбет Сақтағанов жұмыс сапары аясында қатысты.— Мұндай мектептердің салынуы — болашаққа салынған инвестиция. Біз үшін балалардың жайлы әрі қауіпсіз жағдайда білім алуы, ал мұғалімдердің сапалы жұмыс істеуіне барлық мүмкіндіктердің болуы өте маңызды. Бұл — қаланың және өңірдің дамуына негіз, — деп атап өтті облыс әкімі.«AN Groups» компаниясы салған жаңа мектеп қазіргі заманғы білім беру стандарттарына толық сәйкес келеді. Мұнда кең әрі жарық сыныптар, арнайы пәндік кабинеттер, акт және спорт залдары жабдықталған, сондай-ақ цифрлық оқытуға қажетті барлық техника орнатылған.— Бізде мұндай көлемде жабдық бұрын-соңды болмаған, бұл — шын мәнінде «болашақтың мектебі», — деп бөлісті оқу орнының шаруашылық меңгерушісі.Ата-аналар мен мұғалімдер бұл оқиғаны ұзақ күттік дейді. Енді жүздеген бала жайлы жағдайда білім алып, мектеп тек оқу орны ғана емес, мәдени өмірдің де орталығына айналмақ.— Мұндай керемет мектепте сабақ оқымау немесе үй тапсырмасын орындамау ұят сияқты, — дейді оқушылар.Айта кетейік, биыл бұл мектепте алғаш рет 30-дан астам бала партаға отырды.Риддерде жаңа білім беру мекемесінің ашылуы — білім сапасын арттыру мен өсіп келе жатқан ұрпаққа тең мүмкіндік жасау жолындағы маңызды қадам.Ақпарат көзі : https://www.gov.kz/memleket/entities/akimvko/press/news/details/1059917?lang=kk

Бүгін Білім күніне орай Алматы облысында 491 мектептің есігі айқара ашылып, 362 мыңнан астам оқушы жаңа оқу жылын бастады. Оның ішінде 35,5 мың бүлдіршін алғаш рет мектеп табалдырығын аттап отыр.Жаңа оқу жылының басты ерекшелігі – өңірде 9 жаңа мектеп пайдалануға берілді. Оның 8-і ұлттық «Келешек мектеп» жобасы аясында салынса, тағы біреуі жеке инвестордың қаражаты есебінен бой көтерді. Бұл нысандар заманауи талаптарға сай жабдықталып, оқушылар үшін қолайлы орта қалыптастырды.Алматы облысында жаңа оқу жылына орай білім беру ұйымдары оқулықтармен 100 пайыз қамтамасыз етілді. Бұл мақсатқа 3 млрд теңге бөлініп, барлығы 808 568 жаңа және қайта басылған кітап сатып алынды.4-сынып оқушылары үшін алғаш рет қазақ тілінде оқытатын мектептерге арналған орыс тілі, сондай-ақ ағылшын, неміс, француз тілдері, еңбекке баулу, бейнелеу өнері, цифрлық сауаттылық және жаратылыстану пәндерінен жаңа оқулықтар енгізілді. Орта және аға буынға арналған қазақ және орыс тілі мен әдебиеті, математика, физика, химия, биология, Қазақстан тарихы, ағылшын тілі және көркем еңбек пәндері бойынша жаңартылған басылымдар жеткізілді.Сонымен қатар «Қазақстан географиясы» (7–8 сынып), «Қазақстан тарихы» (8 сынып), «Бастапқы әскери және технологиялық дайындық» (10–11 сынып) және «Құқық негіздері» (11 сынып) оқулықтары қайта басылып шықты.Ақпарат көзі : https://www.gov.kz/memleket/entities/almobl/press/news/details/1059884?lang=kk

Бүгін, Қазақстан Республикасы Конституциясы күніне орай, Еңбекшіқазақ ауданында екі жаңа мектептің салтанатты ашылуы өтті.Ұлттық «Келешек мектебі» жобасы аясында заманауи оқу орындары пайдалануға берілді:Алмалы ауылында – 600 орындық,Қаражота ауылында – 300 орындық мектеп.Екі мектеп бір бағдарлама бойынша салынғанымен, жобалары әртүрлі. Бұл әр аумақтың ерекшелігін ескеруге мүмкіндік берді. Білім ордалары заманауи кабинеттермен, зертханалармен және спорттық инфрақұрылыммен толық жабдықталған.Сонымен қатар, осы жоба аясында Ащысай және Сатай ауылдарында тағы екі мектептің құрылысы жалғасуда. Олардың ашылуы алдағы уақытта жоспарланған. Ал Төле би ауылында жаңа мектеп мемлекеттік қамтамасыз ету бағдарламасы бойынша салынуда.Мұндай жобалардың жүзеге асырылуы ауыл балаларының білім алу жағдайын едәуір жақсартып, өңірдің болашағына маңызды үлес қосады.Ақпарат көзі : https://www.gov.kz/memleket/entities/almobl/press/news/details/1059758?lang=kk

Алматы облысында Конституция күні жаңа оқу жылының басталуына орай салтанатты іс-шаралар өтті. Ұлттық «Келешек мектеп» жобасы аясында өңірде сегіз жаңа мектеп пайдалануға берілсе, тағы бір 2000 орындық мектеп Қарасай ауданында инвестордың есебінен ашылды. Барлық білім ошақтары заманауи робототехника, лингвистика, дизайн және графика кабинеттерімен, кітапханалармен, спорт және акт залдарымен жабдықталған. Өткен жылы облыста 9 мектеп салынса, алдағы жылдары тағы 26 білім ошағы бой көтермек.«Келешек мектептерінің» құрылысы ең алдымен үш ауысымды оқыту мәселесін шешуге бағытталған. Жалпы 2022–2025 жылдары облыста үш ауысымды білім беруді жою және орын тапшылығын шешу үшін 43 мектеп салынды. Олардың жалпы сыйымдылығы – 43 525 орын. (2022 жылы – 5 мектеп/750 орын, 2023 жылы – 14 мектеп/14 400 орын, 2024 жылы – 15 мектеп/17 275 орын, 2025 жылы – 9 мектеп/8 000 орын). Соның нәтижесінде үш ауысымды мектептердің саны 52-ден 26-ға қысқарды (Жамбыл ауданында – 2, Іле ауданында – 16, Еңбекшіқазақ ауданында – 1, Талғар ауданында – 4, Қарасай ауданында – 1, Алатау қаласында – 2). Жаңа білім беру кешендері халық тығыз орналасқан аймақтардағы жүктемені азайтып, мыңдаған балаға қолайлы жағдай туғызады.Айрықша назар Талғар ауданының Төңкеріс ауылына аударылды. Мұнда 600 орындық жаңа «Келешек мектебі» ашылып, салтанатты шараға облыс әкімі Марат Сұлтанғазиев қатысты.– Бүгін Төңкеріс ауылының балалары толық жабдықталған жаңа мектепте оқу жылын бастайды. Балаларымыз осында сапалы білім алып, үлкен жетістіктерге жетіп, білімді әрі шығармашыл тұлға болып қалыптасатынына сенімдімін, – деді аймақ басшысы.Жаңа оқу жылының қарсаңында өңірде дәстүрлі «Мектепке жол» акциясы өтті. Әлеуметтік жағынан аз қамтылған санаттағы 60 948 балаға қолдау көрсетілді. Бұл мақсатқа «Всеобуч» қоры есебінен 2,8 млрд теңгеден астам қаржы бөлінді. Әр балаға 46 228 теңге көлемінде көмек берілді. Бұл көрсеткіш үш жыл бұрынғыдан 2,5 есе артық. Салыстырмалы түрде алғанда: 2024 жылы 56 974 балаға 2,47 млрд теңге бөлінсе, биылғы жылы 60 мыңнан астам балаға 2,81 млрд теңге көлемінде көмек көрсетілді. Барлық төлемдер 1–20 тамыз аралығында жүргізілді.Мереке күні облыс әкімі Қонаев қаласындағы ерекше әлеуметтік қолдауды қажет ететін балалар орталығына да барды. Мұнда 24 бала тәрбиеленуде. Олардың бір бөлігі биыл колледжге түссе, қалғаны қала мектептерінде оқуларын жалғастыруда. Әкім тәрбиеленушілермен әңгімелесіп, олардың толыққанды дамуы мен әлеуметке бейімделуі үшін жағдай жасаудың маңыздылығын атап өтті.Жалпы Алматы облысында жаңа оқу жылында 491 мектеп өз есігін ашты. Білім ордаларына 362 мыңнан астам оқушы келсе, олардың ішінде 35,5 мыңнан астамы алғаш рет мектеп табалдырығын аттады. Яғни облыстағы әр оныншы оқушы – биылғы бірінші сыныптың шәкірті. Бұл көрсеткіш өңірде бала санының тұрақты өсіп келе жатқанын айғақтайды.Ақпарат көзі : https://www.gov.kz/memleket/entities/almobl/press/news/details/1059761?lang=kk

2025 жылдың 29 тамызында Қонаев қалалық көпсалалы ауруханасында заманауи жапондық жабдықтармен жабдықталған эндоскопиялық орталық жұмысын бастады.Жаңа медициналық нысан асқазан-ішек жолдары, тыныс алу жүйесі және бірқатар басқа да ағзалардың ауруларын ерте анықтау мен емдеудің сапасын жақсартуға бағытталған.Эндоскопия – хирургиялық араласусыз ішкі ағзаларды зерттеуге мүмкіндік беретін заманауи диагностикалық әдіс. Бұған дейін тек республикалық клиникаларда ғана қолжетімді болған мұндай қызмет енді Қонаев тұрғындары мен Алматы облысы халқы үшін қолжетімді болмақ.Орталық меңгерушісі, Ресейде маманданудан өткен дәрігер Тахир Шкуралиевтің айтуынша, жаңа қондырғылар эндоскопиялық және рентгенологиялық зерттеулерді қатар жүргізуге жол ашады. Бұл асқазан-ішек жолдарының жоғарғы бөлігін, өт жолдары мен ұйқыбезді дер кезінде тексеріп, емдеуге мүмкіндік береді. Сонымен қатар, эндоскопиялық гемостаз, полипэктомия сияқты аз инвазивті операциялар да жасалмақ.Ашылу рәсіміне Алматы облысы Денсаулық сақтау басқармасының басшысы Ержан Сүлейменов, жетекші дәрігерлер мен БАҚ өкілдері қатысты.Пациенттерді қабылдау учаскелік дәрігерлер мен емханалар мамандарының жолдамасы бойынша жүзеге асырылады. Барлық тексерулер мен емдеу шаралары мемлекеттік сапа және қауіпсіздік талаптарына сай жүргізіледі.«Бұл орталықтың ашылуы өңір медицинасы үшін үлкен жетістік. Алматы облысының тұрғындары жоғары технологиялы әрі қолжетімді медициналық қызметке ие болды. Мұндағы мамандар шетелдік және отандық ғылыми орталықтарда арнайы дайындықтан өткен. Заманауи жабдықтар ауруларды ерте кезеңде анықтап, қатерлі ісіктердің алдын алуға мүмкіндік береді. Тексеру нәтижелері де жедел дайындалады», — деді Алматы аймақтық көпсалалы клиниканың директоры, облыстың штаттан тыс бас дәрігері Саяхат Олжаев.Айта кетейік, облыстық денсаулық сақтау басқармасының мәліметінше, жыл соңына дейін өңірдің тағы үш ауданында осындай орталық ашу жоспарлануда.Ақпарат көзі : https://www.gov.kz/memleket/entities/almobl/press/news/details/1059725?lang=kk

Алматы облысында Қазақстан Республикасы Конституциясының 30 жылдығына арналған іс-шаралар өтті. Салтанатты жиынға облыс әкімі Марат Сұлтанғазиев қатысып, бірқатар азаматтарға мемлекеттік наградалар табыстады. 6 тұрғын «Қазақстан Конституциясына 30 жыл» мерекелік медалімен марапатталса, 9 адам облыс әкімінің Құрмет грамотасын, тағы 13 азамат Алғыс хатын алды.Аймақ басшысы Қонаев қаласындағы ерекше әлеуметтік қызметті қажет ететін балаларға арналған облыстық қолдау орталығында болып, мекеменің жағдайымен танысты. Қазіргі таңда орталықта 24 тәрбиеленуші бар. Олардың 18-і мектепке барып жүр, 4 бала колледжге қабылданса, 2 тәрбиеленуші балабақшаға қатысуда. Балаларды тасымалдау үшін орталықтың өз автобусы жұмыс істейді.Сонымен қатар әкім индустриялық аймақтағы ауқымды жобаның жүзеге асырылу барысын көрді. Қайрат индустриялық аймағында «Almaty Guangjin Investment Management Consulting» компаниясы жалпы аумағы 300 мың шаршы метр болатын өндірістік және әкімшілік нысандар тұрғызуда. Жобаға 750 млн АҚШ доллар инвестиция тартылып, 2028 жылға қарай 3 мыңға жуық жұмыс орны ашылады деп күтілуде. Жылдық тауар айналымы 1,3 млрд АҚШ долларына жетіп, оның 900 млн доллары экспортқа бағытталмақ.Қарасай ауданында әкім Қаскелең қаласындағы Абылай хан көшесінің абаттандыру жұмыстарымен танысты. Жоба құны – 1,176 млрд теңге. 2025 жылы осы мақсатқа 492 млн теңге бөлінеді. Марат Сұлтанғазиев мердігер ұйымдарға тұрғындардың пікірін ескеріп, жұмысты сапалы әрі уақытылы атқару қажеттігін айтты. Сондай-ақ, ауданда жастар паркі мен ресурс орталығы жыл соңына дейін пайдалануға берілмек.Қоғамдық қауіпсіздікті қамтамасыз ету мақсатында Қарасай ауданында мемлекеттік-жекеменшік әріптестік аясында 1075 бейнебақылау камерасы және 52 интеллектуалды аппараттық кешен орнатылған. Оның ішінде Қаскелең қаласының өзінде 252 камера мен 24 заманауи кешен жұмыс істеп тұр. Жүйе бейнебақылаудан бөлек, адам жүзін тану, адамдар көп жиналған жерді анықтау және ұмыт қалған заттарды байқау мүмкіндіктерімен жабдықталған. Барлық деректер аудандық полиция бөлімінің жедел орталығына түсіп, тәулік бойы бақыланады.Ал Талғар ауданында облыс әкімі Төңкеріс ауылында салынған жаңа мектептің ашылуына қатысты. «Болашақ мектептері» жобасы аясында бой көтерген үш қабатты ғимараттың сыйымдылығы – 600 орын. Жалпы ауданы 8,8 мың шаршы метрді құрайтын нысанда 281 оқу кабинеті, 176 орындық асхана және 138 орындық акт залы бар. Жобаның құны – 5,324 млрд теңге.Облыс әкімінің жұмыс сапары өңірде әлеуметтік инфрақұрылым, өнеркәсіп және қоғамдық қауіпсіздік жүйесінің тұрақты дамып келе жатқанын көрсетті. Мұның барлығы Алматы облысы тұрғындарының өмір сапасын жақсартуға бағытталған.Ақпарат көзі : https://www.gov.kz/memleket/entities/almobl/press/news/details/1059726?lang=kk

Қонаев қаласында Мемлекеттік Туды 55 метрлік тұғырға көтеру салтанаты өтті. Елдік пен Тәуелсіздіктің символына айналған бұл рәсім Қазақстан Конституциясының 30 жылдығына арналды.Іс-шара Мемлекеттік Туды алып кіруден және Әнұранды орындаудан басталды. Алматы облысының әкімі Марат Сұлтанғазиев құттықтау сөз сөйлеп, Конституцияның ел тұрақтылығы мен дамуының басты кепілі екенін атап өтті.Өз сөзінде өңір басшысы:«Ата Заңымыз – Тәуелсіз Қазақстанның даму бағдары мен тұрақтылығының кепілі. Соның арқасында халықтың әл-ауқаты артып, әлеуметтік қорғау жүйесі нығайды, азаматтардың құқықтық мәдениеті қалыптасты. Алматы облысы да тұрақты өсім көрсетіп келеді. Қонаев қаласының жаңа мәртебесі мен Алатау қаласының құрылуы – өңір дамуының айқын дәлелі», – деп атап өтті.Мерекеге орай 28 тұрғын марапатталды. Олардың ішінде «Қазақстан Конституциясына 30 жыл» мерекелік медалі иегерлері, облыс әкімінің Құрмет грамотасы мен Алғыс хаттарына ие болған азаматтар бар.Жалпы, Алматы облысында Конституцияның 30 жылдығына арналған 180-нен астам іс-шара ұйымдастырылып, оған 30 мыңға жуық адам қатысты.Ақпарат көзі : https://www.gov.kz/memleket/entities/almobl/press/news/details/1059722?lang=kk

2025 жылғы 29 тамызда Қостанай қаласында, «Жастар сарайы» жастар сарайында Қазақстан Республикасы Конституциясының 30 жылдығына арналған ауқымды салтанатты іс-шара өтті. Бұл — жыл сайын 30 тамызда аталып өтетін маңызды мемлекеттік-құқықтық дата.Қостанай облысының әкімі Құмар Ақсақалов құттықтау сөз сөйлеп, Қазақстанның халықаралық аренада лайықты орын алып, бүкіл әлемнің құрметіне ие болғанын атап өтті. Бүгінде еліміздің экономикасы нығайып, жаңарып, азаматтарға жаңа мүмкіндіктер ашты, халықтың тұрмыс деңгейі айтарлықтай өсті. Қазақстан бейбітшілік пен келісім басты құндылыққа айналған, көпұлтты қоғамы бірліктің әрі өзара құрметтің үлгісіне айналған мемлекетке айналды.Салтанат барысында облыс әкімі еңбек сіңірген азаматтар мен қоғам өкілдеріне Құрмет грамоталарын табыстады. Марапатталғандардың қатарында мемлекеттік қызмет ардагерлері, әділет органдарының қызметкерлері, полиция, бұқаралық ақпарат құралдары мен ішкі аудит саласының өкілдері бар.Ресми бөлімнен кейін қонақтарға мерекелік концерт ұсынылды. Көрермендер Қостанай облысының шығармашылық ұжымдарының, оның ішінде филармония ансамбльдерінің, камералық орындаушылардың және балалар би студияларының өнерін тамашалады. Конституцияны «тұрақтылықтың, келісімнің және сенімді ілгерілеудің символы» ретінде дәріптеген әуендер орындалды.Қазақстан Республикасының Конституциясы 1995 жылғы 30 тамызда жалпыхалықтық референдумда қабылданып, қазіргі мемлекеттіліктің іргетасы болып табылады. Оның мәтінінде адам құқықтары мен бостандықтары, азаматтардың жынысына, ұлтына, дініне және өзге де ерекшеліктеріне қарамастан теңдігі сияқты құндылықтар айқын бекітілген. Осы жылдар ішінде Негізгі заң бірнеше рет толықтырылып, жетілдірілді. 1995 жылғы алғашқы кезеңдерде талқылауға 3 миллионнан астам азамат қатысып, 55 бап бойынша 1100-ден астам ұсыныс енгізілген болатын.Аймақтарда да мерекелік іс-шаралар өтті. «Алтын дән» мәдениет үйінде «Елдіктің асыл тірегі – Ата Заң» атты салтанатты жиын ұйымдастырылып, онда жергілікті тұрғындар мен «Таза Қазақстан» бағдарламасы аясындағы «Арман ауласы» байқауының жеңімпаздары марапатталды. Бұл аудандық деңгейдегі шара Қостанай облысының бүкіл өміріне оң ықпал ететін маңызды тұлғаларды қамтыды.Конституция күніне арналған жыл сайынғы салтанатты шаралар — елдің басты заңына көрсетілген құрмет қана емес, сонымен қатар өңірлік бірліктің, дамудың және азаматтардың еңбегіне деген құрметтің символы. Бұл мерекенің қорытындысы Конституцияның әлі де халықты біріктіріп, құқықтарды қорғап, Қостанай облысының жарқын болашағына сенімді негіз құрып отырғанын айқын көрсетеді.Ақпарат көзі : https://www.gov.kz/memleket/entities/kostanay/press/news/details/1059653?lang=kk

Душанбе, 2025 жылғы 29 тамыз – Тәжікстан Республикасына жұмыс сапары аясында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу ел астанасындағы бірқатар тарихи және мәдени нысандарға барды.М.Нұртілеу бастаған қазақ делегациясы 1995 жылғы 7 сәуірде тәжік-ауған шекарасындағы Тәуелсіз Мемлекеттер Достастығының сыртқы шекарасын қорғау кезінде әскери борышын атқару барысында ерлікпен қаза тапқан қазақстандық жауынгерлерге арналған монументке гүл шоқтарын қойды.Сонымен қатар Әбілқасым Фирдауси атындағы мәдениет және демалыс саябағында 2024 жылы Душанбеде орнатылған қазақтың ұлы ақыны, ойшылы және ағартушысы Абай Құнанбайұлының бюстіне гүл шоқтары қойылды.Аталған іс-шаралар Қазақстанның тарихи жадыны сақтау және Қазақстан мен Тәжікстан халықтарын біріктіретін рухани құндылықтарға құрмет көрсетуге бейілділігінің айқын көрінісі болды.Қазақстандық жауынгерлерге арналған монумент 2007 жылғы 15 желтоқсанда Қазақстанның Тәжікстандағы Елшілігінің, ҚР Қорғаныс министрлігінің, ҚР Ұлттық ұланының және өзге де қоғамдық ұйымдардың қолдауымен ашылып, 2021 жылы қайта қалпына келтірілді.Ақпарат көзі : https://www.gov.kz/memleket/entities/mfa/press/news/details/1059588?lang=kk

Қорғаныс министрлігінде Қазақстан Республикасы Конституциясы күніне арналған салтанатты жиын өтті.Мерекелік шараға министрліктің басшылық құрамы, Қарулы күштердің түрлері мен әскер тектерінің, әскери бөлімдер мен мекемелердің, оқу орындарының өкілдері, әскери қызметшілер, азаматтық персонал және Қарулы күштердің ардагерлері қатысты.Қорғаныс ведомствосының басшысы авиация генерал-лейтенанты Дәурен Қосанов еліміздің әлеуметтік-экономикалық, саяси және құқықтық дамуына Конституцияның өлшеусіз үлес қосып келе жатқанын атап өтті. Ол елдің егемендігі, аумақтық тұтастығы мен азаматтарының қауіпсіздігінің тірегі — қуатты жауынгерлік әлеуеті бар Қарулы күштер екенін қадап айтты.– Қазақстан әскери қызметшілері әуеде, құрлықта және теңізде қызмет атқарып, жауынгерлік кезекшілік жүргізуде, оқу-жаттығуларға қатысып, БҰҰ шеңберіндегі бітімгерлік миссияларға да атсалысуда. Осы арқылы олар халықаралық міндеттемелерді орындап қана қоймай, сонымен бірге еліміздің бейбітсүйгіш әрі ынтымақтастық қағидаттарын дәйекті жүзеге асыратын мемлекет ретіндегі беделін арттыруға үлес қосуда, – деді авиация генерал-лейтенанты Д. Қосанов.Сондай-ақ, ол Қарулы күштердің жауынгерлік әзірлігін арттыру, техникалық қайта жарақтандыру, цифрлық технологияларды енгізу, әскери ғылымды дамыту және кадрлық әлеуетті нығайтуға бағытталған басымдықтарды атап өтті.Мерейтойға орай Мемлекет басшысының Жарлығымен бекітілген «Қазақстан Конституциясына 30 жыл» мерекелік медалімен марапаттау рәсімі өтті. Бұл марапатқа Қарулы күштер қатарынан 9 адам ие болды. Сонымен бірге, Қорғаныс министрінің атынан әскери қызметшілер мен азаматтық персонал өкілдеріне грамоталар, алғыс хаттар табысталып, Қарулы күштердің ардагерлеріне құттықтау хаттар жолданды.Салтанатты шара барысында қатысушылар назарына Конституцияның 30 жылдығына арналған бейнеролик пен Ұлттық әскери-патриоттық орталықтың Әскери-тарихи музейі дайындаған көрме ұсынылды.Жиын ҚР Қарулы күштері Ұлттық әскери-патриоттық орталығының шығармашылық ұжымы дайындаған мерекелік концертпен аяқталды. Орталық ансамбльдің солистері «Қазақстан», «Ата заң», «Туған ел», «Атамекен» және «Егемен Қазақстан» атты патриоттық әндерді орындады.Ақпарат көзі : https://www.gov.kz/memleket/entities/mod/press/news/details/1059560?lang=kk

Еңбекшіқазақ ауданында көкөніс пен жемістерді терең өңдейтін заманауи зауыт салу бойынша жаңа инвестициялық жобаның жүзеге асырылуы басталды. Жобаның бастамашысы – қазақстандық «Qazaq Global Food JV» ЖШС компаниясы.Алматы облысының кәсіпкерлік және индустриялық-инновациялық даму басқармасының басшысы Қуаныш Бахытұлының айтуынша, бұл кәсіпорынның іске қосылуы өңірдің өнеркәсіптік әлеуетін арттыруға, жаңа жұмыс орындарын ашуға, заманауи технологияларды енгізуге және облыстың елдегі индустриялық өсім орталықтарының бірі ретіндегі позициясын нығайтуға мүмкіндік береді.Оның сөзінше, жобаның басты құндылығы – ауыл шаруашылығы тауар өндірушілері үшін нақты пайдасында.«Бұл фермерлер үшін жаңа мүмкіндіктер. Олардың өнімі енді тек шикі күйінде сатылмайды, заманауи зауытта өңделеді. Бұл – тұрақты өткізу нарығы, шаруашылықтардың табыстылығының артуы және өнімнің ысырабын азайту. Сонымен қатар, дайын өнімнің бір бөлігі экспортқа жөнелтіледі, бұл жергілікті өндірушілерге жаңа нарықтарды ашады», – деді Қуаныш Бахытұлы.Қазіргі уақытта жоба бастамашысы мен Түркияның көкөніс пен жемісті өңдеу саласындағы жетекші компанияларының бірі – Göknur Gıda арасында «Off-take» келісімшарты жасалды. Компания зауыттың алма шырыны концентратын және өзге де өнімдерін экспортқа шығаруда стратегиялық серіктес болады. Келісім кәсіпорынға ұзақ мерзімді, кепілді өткізу мүмкіндігін беріп, шетелдік нарықтарға шығуға кең жол ашады.Өңдеу қуаттарының дамуы кең ауқымды әсерге ие: жаңа зауыт бәсекелі нарықты қалыптастырып, азық-түлік қауіпсіздігін нығайтады және өңір ішінде қосымша құн жасайды.«Бүгінде концентраттар мен өңделген өнімдердің едәуір бөлігі шетелден, әсіресе Қытайдан және басқа да елдерден әкелінеді. Зауыттың іске қосылуы импортқа тәуелділікті азайтып, жоғары қосылған құнға ие отандық өндірісті қалыптастырады. Бұл – облыс экономикасы үшін алға жасалған қадам, ал фермерлер үшін тұрақты даму кепілі», – деп толықтырды Қуаныш Бахытұлы.Жоба қаржылық тұрғыдан да ерекше маңызды. Ол Қазақстанда алғаш рет «Бәйтерек» холдингі аясында қол қойылған «Кепілдік қоры – 2» жаңа кепілдендіру құралы арқылы жүзеге асырылуда. Жалпы құны – 9,5 млрд теңге, оның ішінде 7,1 млрд теңгені Қазақстанның Даму Банкі қаржыландырған. Инвестор ішінара кепіл ретінде «Даму» қорының 2,8 млрд теңге көлеміндегі кепілдігін пайдаланды. Бұл жаңа тетік өнеркәсіп, агроөнеркәсіп және инфрақұрылым салаларында ірі жобаларды іске қосуға мүмкіндік беріп, мемлекеттік бизнесті қолдау шараларының тиімділігін дәлелдейді.Қорытындылай келе, Қуаныш Бахытұлы жобаның табысты жүзеге асырылуы облыс әкімдігінің жүйелі және жан-жақты қолдауымен қамтамасыз етіліп отырғанын атап өтті.«Мұндай ауқымды бастамаларды іске асыру барлық тараптың үйлестірілген жұмысын қажет етеді. Бұл ретте Алматы облысының әкімдігі инвестордың негізгі серіктесі болып табылады. Біз жобаны әзірлеу кезеңінен бастап сүйемелдеп келеміз: жер телімін бөлу, қажетті келісімдерден өткізу, рұқсат құжаттарын дайындау және инфрақұрылыммен қамтамасыз ету. Әр кезеңде тиісті ведомстволармен өзара іс-қимыл жасалып, мерзімдердің сақталуы бақыланады. Осындай жүйелі жұмыс инвестор үшін барынша қолайлы жағдай жасап, өндірісті сәтті іске қосуға кепілдік береді», – деді Қуаныш Бахытұлы.Ақпарат көзі : https://www.gov.kz/memleket/entities/almobl/press/news/details/1059497?lang=kk

Қарағанды облысында ауқымды стратегиялық «Жауынгерлік достастық - 2025» оқу-жаттығуы жалауын көтерді. Шараны Қазақстан Республикасы Қорғаныс министрінің орынбасары - Қарулы күштері Әуе қорғанысы күштерінің бас қолбасшысы генерал-майор Қайрат Садықов салтанатты жағдайда ашты.Әскери жаттығулар Сарышаған полигонында өтуде. Оған Әуе шабуылына қарсы қорғаныс әскерлері мен Әскери-әуе күштерінің бөлімшелері тартылып отыр. Жаттығудың мақсаты – түрлі әскер түрлері арасындағы өзара іс-қимылды жетілдіру, шартты қарсыластың әуе шабуылдарын тойтару әрекеттерін пысықтау, сондай-ақ жеке құрамның жауынгерлік машығын арттыру.– Авиация мен әуе шабуылына қарсы қорғаныс бөлімшелерінің кешенді әрекеттері шынайы ұрыс жағдайына барынша жақын ортада ұйымдастырылады. Баршаңызға жүктелген міндеттерді сәтті орындап шығуды тілеймін, – деді оқу-жаттығуға қатысушыларға қарата сөйлеген сөзінде генерал-майор Қайрат Садықов.Оқу-жаттығу аясында ұшқышсыз ұшу аппараттары, радиоэлектрондық күрес құралдары мен зениттік-зымыран кешендері қолданылатын түрлі тактикалық эпизодтар іске асырылады. Әуе шабуылына қарсы қорғаныс бригадаларының есептоптары зениттік зымырандарды іс жүзінде ұшырып көреді. Ұшу экипаждары әуе және жер үсті нысандарына авиациялық соққылар жасауды пысықтайды.Осындай ауқымдағы жаттығулар Қазақстанның әуе кеңістігін қорғауға бағытталған міндеттерді орындауға дайындықты арттырып, еліміздің қорғаныс қабілетін нығайта түседі. Бұл – Қазақстан Республикасы Қарулы күштерінің әуе қорғанысы жүйесін жетілдіру жолындағы маңызды кезең болмақ.Ақпарат көзі : https://www.gov.kz/memleket/entities/mod/press/news/details/1059486?lang=kk

Душанбе, 2025 жылғы 29 тамыз – Душанбе қаласына жасаған жұмыс сапары аясында Қазақстан Республикасы Премьер-министрінің орынбасары – Сыртқы істер министрі Мұрат Нұртілеу Тәжікстан Республикасының Сыртқы істер министрі Сироджиддин Мухриддинмен кездесу өткізді.Сыртқы саяси ведомстволардың басшылары саяси, экономикалық, су-энергетикалық, көлік-транзиттік және мәдени-гуманитарлық салаларда биік және жоғары деңгейде қол жеткізілген уағдаластықтардың практикалық жүзеге асыру барысын жан-жақты талқылады. Тараптар қазақ-тәжік стратегиялық серіктестігі мен одақтастығын одан әрі нығайтуға бейілділігін нақты растады.Министрлер алдағы жылдары екіжақты тауар айналымын 2 млрд АҚШ долларына дейін ұлғайту бойынша мақсатқа қол жеткізу үшін практикалық қадамдар қабылдаудың маңыздылығын атап өтті. Бұл тұрғыда Қазақстанның тәжік нарығына 200 млн АҚШ долларына дейін соммаға ауыл шаруашылығы, тамақ өнеркәсібі және машина жасау өнімдерін жеткізуді кеңейтуге дайындығы айтылды.Сұхбаттастар өңірлік кооперацияны одан әрі дамыту бойынша, сондай-ақ Орталық Азиядағы бейбітшілік пен тұрақтылықты нығайту жөніндегі бірлескен күш-жігердің, оның ішінде одақтастық пен стратегиялық серіктестік рухында Орталық Азия мемлекеттері басшыларының консультативтік кездесулері, Халықаралық Аралды құтқару қоры, АӨСШК, ШЫҰ, ТМД, ҰҚШҰ және басқа да халықаралық алаңдар шеңберінде өзара іс-қимылдың қажеттілігіне назар аударды.«Қазақстан Орталық Азияда тұрақтылық пен қауіпсіздікті нығайтуға бағытталған Тәжікстанның күш-жігерін жоғары бағалайды. Орталық Азияны ХХІ ғасырда дамыту мақсатындағы достық, тату көршілік және ынтымақтастық туралы шартқа қол қою – еліңіздің өңірлік өзара іс-қимылды жан-жақты дамытуға бейілділігінің жарқын дәлелі», – деді М.Нұртілеу.Өз кезегінде С.Мухриддин Тәжікстан Президенті Эмомали Рахмон қол қойған аталған Шарт Орталық Азияда тең құқылы және өзара тиімді ынтымақтастықтың берік архитектурасын қалыптастыруға ықпал ететініне сенім білдірді.Кездесу қорытындысы бойынша тараптар екі ел халықтарының игілігі үшін өзара қарым-қатынасты одан әрі тереңдетуге, жан-жақты ынтымақтастықты дамытуға және достық байланыстарды нығайтуға дайын екенін растады.Ақпарат көзі : https://www.gov.kz/memleket/entities/mfa/press/news/details/1059245?lang=kk

Радиоэлектроника және байланыс әскери-инженерлік институтының базасында «Ақпараттық қауіпсіздік» мамандығы бойынша 30 әскери міндеттіге арналған жиын өз мәресіне жетті.Әскери жиынға шақырылған запастағы офицерлер бір ай бойы казармада тұрып, армиялық тәртіпке толықтай бағынып өмір сүрді. Теориялық және практикалық сабақтар барысында олар жалпы әскери пәндерді меңгеріп, ақпарат пен мемлекеттік құпияларды қорғаудың заманауи тәсілдерін игерді.Радиоэлектроника және байланыс әскери-инженерлік институтының Ақпаратты қорғау кафедрасының бастығы полковник Арман Укашев бұл жиынның мақсаты мамандарды қайта даярлау арқылы әскери-оқытылған резервтің әлеуетін нығайту екенін атап өтті. Оның айтуынша, мұндай жиындар ел әскерінің мобилизациялық дайындығын арттыруға үлкен сеп болмақ.Жиынға қатысушылардың бірі – Астанадан шақырылған запастағы лейтенант Нұрасыл Жексембаев. Қазіргі таңда ол банк саласында қызмет етеді.– Бұл жиын біздің әрқайсымыз үшін маңызды белес болды. Қорғаныс саласы тек әскери күшпен шектелмей, ақпараттық қауіпсіздік саласындағы терең білімді де талап ететінін айқын ұғындық, – деді ол.Жиын соңында қатысушыларға арнайы сертификаттар табысталды. Ерекше көзге түскен әскери міндеттілер алғыс хаттармен марапатталды.Бұл осы мамандық бойынша өткізілген екінші оқу-жаттығу жиыны екенін айта кету керек. Сондай-ақ, жиын кезінде әскери міндеттілердің негізгі жұмыс орындары, қызметтік лауазымдары мен айлық жалақылары сақталып, республикалық бюджет есебінен төленді.Ақпарат көзі : https://www.gov.kz/memleket/entities/mod/press/news/details/1059114?lang=kk

ҚР Ұлттық экономика министрлігінде Премьер-Министрдің орынбасары-ұлттық экономика министрі Серік Жұманғариннің төрағалығымен кеңес өтті. Оған Жоғарғы және Кассациялық соттардың, Сот әкімшілігінің, Қаржы және Әділет министрліктерінің, Бас прокуратураның, «Атамекен» ҰКП мен Кәсіпкерлер құқықтарын қорғау жөніндегі уәкілдің өкілдері қатысты.Кеңесте салықтық тексерулер мен камералдық бақылауға байланысты өзекті мәселелер қаралды. Тараптар мемлекеттік кірістер органдарының сот жүйесі және бизнес қауымдастықпен өзара іс-қимыл тәртібін талқылап, қолданыстағы тәжірибені жетілдіру жолдарын ұсынды.Әсіресе тәуекелдерді басқару жүйесі негізінде тағайындалатын жоспарлы салықтық тексерулер, соттарда мұндай тексеру туралы бұйрықтардың әкімшілік акт ретінде қаралуы, олардың нәтижелеріне шағымдану тәжірибесі, бюджеттен ҚҚС-ты қайтару және мерзімінде қайтарылмаған жағдайда өсімпұл өндіру мәселелері қозғалды. Сондай-ақ, рәсімдік бұзушылықтар негізінде мемлекеттік кірістер органдарының актілері мен әрекеттерінің күшін жоюға қатысты проблемалар талқыланды.Кеңес қорытындысы бойынша Серік Жұманғарин Ұлттық экономика министрлігі жанынан жұмыс тобын құруды тапсырды. Оның міндеті - мемлекеттік органдар мен бизнес өкілдерін біріктіре отырып, салықтық әкімшілендіру мен камералдық бақылаудағы түйткілді мәселелерді шешудің ортақ жолдарын әзірлеу.Ақпарат көзі : https://www.gov.kz/memleket/entities/economy/press/news/details/1059094?lang=kk

Қазақстан Республикасы Ұлттық экономика вице-министрі Бауыржан Омарбеков жұмыс сапары аясында Қызылорда облысының Шиелі ауданы тұрғындарымен кездесті. Кездесу барысында инфрақұрылымды дамыту, әлеуметтік қолдау шаралары және кәсіпкерлік белсенділікті ынталандыру мәселелері негізгі назарда болды.Халық алдында сөйлеген сөзінде вице-министр шағын және орта бизнесті мемлекеттік қолдау тетіктері туралы айтты. Оның ішінде – несиелерді субсидиялау мен кепілдендіру, әлеуметтік және инфрақұрылымдық жобаларды жүзеге асыру, жаңа жұмыс орындарын ашу және ауылдық аумақтарға инвестиция тарту шаралары бар.Ауданның экономикалық көрсеткіштері оң динамиканы көрсетуде. 2025 жылғы қаңтар–шілде айларында өнеркәсіп өндірісінің көлемі 43,7 млрд теңгені құрап, физикалық көлем индексі 101,2 % болды. Өңдеу өнеркәсібінде өсім 3,5 % деңгейінде қалыптасып, жалпы көлемі 35,9 млрд теңгеге жетті. Ауыл шаруашылығы саласы 7,5 млрд теңге көлемінде өнім шығарып, ФКИ 102,4 % көрсетті. Негізгі капиталға салынған инвестициялар да айтарлықтай артты: 1 тамыздағы индексі – 128,8 %.Бизнесті қолдау нақты жобалар арқылы да жүзеге асуда. Мәселен, ағымдағы жылдың 1 тамызына дейін ауданда жалпы несие сомасы 191 млн теңгені құрайтын 4 жобаға субсидия берілді, төленген субсидия көлемі – 172 млн теңге. Бұдан бөлек, 421 млн теңгеге 3 жобаға кепілдік беріліп, оның ішінде кепілдендірілген сомасы 329 млн теңгені құрады.Сапар барысында Бауыржан Омарбеков бірқатар нысандарды аралады. Солардың ішінде биыл мамыр айында Шиелі кентінде «Ауыл аманаты» жобасы аясында ашылған шағын өндірістік орталық бар. Оның базасында тігін цехы, кондитерлік және жартылай фабрикаттар шығаратын цехтар жұмыс істейді. Сондай-ақ вице-министр «Ауыл – Ел бесігі» бағдарламасы бойынша күрделі жөндеуден өткен спорт кешенін көрді. Аталған бағдарлама аясында 2023–2024 жылдары ауданның дамуына 1 млрд теңге бөлінсе, 2025 жылы 4 жобаны жүзеге асыруға 818 млн теңге қарастырылған.Кездесу барысында тұрғындар «Дипломмен – ауылға!» бағдарламасына қатысу мәселесін көтерді. Бағдарламаға жас мамандармен қатар тәжіриебелері бар мамандар да қызығушылық танытып отырғаны атап өтілді. Вице-министрдің айтуынша, жобаға жас бойынша шектеу қойылмаған, басты талап – кәсіби біліктілік. Себебі тәжірибелі мамандардың жинақталған тәжірибесі ауылдағы қызмет сапасын арттыруда маңызды рөл атқарады.Вице-министр Бауыржан Омарбеков «Дипломмен – ауылға!» бағдарламасы ауылдық жерлерде еңбек етіп, өңірлердің дамуына үлес қосуға дайын барлық дипломы бар мамандарға қолжетімді екенін атап өтті.Ақпарат көзі : https://www.gov.kz/memleket/entities/economy/press/news/details/1058743?lang=kk

Сағадат Нұрмағамбетов атындағы елордалық әскери колледжде Тыл қызметі күніне арналған салтанатты шара өтті.Мерекеге Қорғаныс министрлігінің басшылығы, Қарулы күштер түрлері мен әскер тектерінің тыл қызметі құрамының өкілдері, ардагерлер және оқу орнының курсанттары қатысты. Қорғаныс министрінің атынан құттықтау сөз сөйлеген оның тәрбие және идеологиялық жұмыс жөніндегі орынбасары вице-адмирал Серік Борамбаев тыл бөлімшелерінің әскердің күнделікті тіршілігі мен жауынгерлік қабілетін қамтамасыз етудегі маңызын атап өтті. Ол әскери қызметшілерге кәсіби шеберліктері мен қызметке деген адалдықтары үшін алғыс білдірді. Салтанатты рәсім барысында вице-адмирал Серік Борамбаев бірқатар әскери қызметшілерге министрдің атынан «Ел қорғаны» медалін, «Қазақстан Республикасы Қарулы күштерінің үздігі» төсбелгісін және алғыс хаттар табыс етті.Сонымен қатар, Қарулы күштердегі тыл қызметінің бөлімшелері арасындағы байқау жеңімпаздары анықталды. Ең үздік рота шаруашылығы, асхана, монша-кір жуу кешені, азық-түлік, киім-кешек, жанар-жағармай қоймалары, автожанармай құю бекеті мен өрт сөндіру депосы марапатқа ие болды. Жеңімпаздарға марапаттарды Тыл бастығы полковник Арман Мансұров табыстады. Өз кезегінде Тыл ардагерлер кеңесінің төрағасы запастағы генерал-майор Қажығали Мұқатов Қорғаныс министрінің бастамасын жалғастыра отырып, «Мектепке жол» акциясы аясында әскери қызметшілердің балаларына мектеп сөмкелерін тарту етті.Шара соңында ҚР Қарулы күштері Ұлттық әскери-патриоттық орталығының Орталық ансамблі әсерлі концерт қойып, мерекелік көңіл-күй сыйлады.Ақпарат көзі : https://www.gov.kz/memleket/entities/mod/press/news/details/1058679?lang=kk