Бүгін, 18 қарашада, Қостанай облысына жұмыс сапарымен Қазақстан Республикасы Парламенті Сенатының спикері Мәулен Әшімбаев келді. Оны облыс әкімі Құмар Ақсақалов қарсы алды. Сапар барысында облыстың негізгі даму бағыттары талқыланды, оның ішінде өнеркәсіп, ауыл шаруашылығы, әлеуметтік инфрақұрылым және халықтың тұрмыс сапасын жақсарту мәселелері басты назарда болды.Машина жасау саласын дамыту және инвестициялық жобаларды қолдауҚұмар Ақсақалов атап өткендей, Қостанай облысы машина жасау саласын белсенді дамытуда. Бұл сала өңірдің өнеркәсіптік өсімінің қозғаушы күші болып табылады. Қазіргі уақытта Қазақстанда шығарылатын барлық автокөліктердің 60%-дан астамы облыстағы зауыттарда құрастырылады. Атап айтқанда, «СарыарқаАвтоПром» ЖШС кәсіпорнында биылғы жылдың 10 айында 66 мыңнан астам автокөлік шығарылды. Бұл сала қарқынды дамып келеді, алдағы уақытта өндіріс көлемін 270%-ға арттыру жоспарланған.Сонымен қатар, өңірде автомобиль жасау саласындағы ірі инвестициялық жобалар іске асырылуда. Олардың қатарында KIA автомобильдерін шығаратын зауыттың құрылысы бар. Кәсіпорынды іске қосу 2025 жылға жоспарланған, бұл 1,5 мың жаңа жұмыс орнын ашуға мүмкіндік береді. Құмар Ақсақаловтың айтуынша, мұндай жобалар өңір экономикасы үшін ғана емес, жоғары білікті мамандар даярлау үшін де маңызды. Dong-Eui оңтүстіккореялық университетімен бірлесіп Қостанай өңірлік университетінің студенттеріне арналған оқу және тәжірибе алмасу бағдарламалары әзірленуде.«Өнеркәсіптің, оның ішінде машина жасау саласының дамуы – бұл өңір экономикасына ғана емес, Мемлекет басшысы қойған стратегиялық міндетті жүзеге асыруға, яғни экономиканы әртараптандыру мен жастар мен жергілікті тұрғындарға жаңа жұмыс орындарын ашуға қосқан маңызды үлес», – деді Мәулен Әшімбаев.Инфрақұрылымды дамыту және ауылдық аймақтарды қолдауСапар барысында қозғалған басты тақырыптардың бірі – инфрақұрылымды дамыту және ауыл тұрғындары үшін қолайлы жағдай жасау болды. Құмар Ақсақаловтың айтуынша, биыл облыста сумен жабдықтау саласында ауқымды жұмыстар атқарылды. Сумен жабдықтау және су тарту бойынша 81 жобаны жүзеге асыруға 21 миллиард теңге бөлінген. Жыл соңына дейін 15 ауылдық елді мекен орталықтандырылған сумен жабдықтау жүйесіне қосылады, бұл ауылдық жерлерде ауыз суға қолжетімділікті 90%-ға дейін арттыруға мүмкіндік береді.Сонымен қатар, облыста тұрғын үй құрылысы қарқынды жүргізілуде. Жыл басынан бері 379 мың шаршы метр тұрғын үй пайдалануға берілді, ал жыл соңына дейін 5 мың пәтердің құрылысы аяқталады деп жоспарлануда. «Қостанай жастары» бағдарламасы аясында жастарға арналған тұрғын үй құрылысына ерекше көңіл бөлініп отыр. Бағдарлама арқасында шамамен 140 отбасы өздерінің тұрғын үй жағдайларын жақсарта алады. Бұл бағытта Сенат спикері өңір басшылығының ұстанымын қолдады.«Ауылдық аймақтар – бұл тек еңбек ететін орын ғана емес, сонымен бірге лайықты өмір сүру кеңістігі. Мемлекет басшысы ауылдық жерлердегі азаматтардың қала тұрғындарымен тең өмір сүру жағдайларын жасау қажеттігін нақты атап өтті», – деді облыс әкімі.Салық саясаты және бизнесті қолдауСапар барысында салық саясаты және жергілікті өндірушілерді қолдау мәселелері де талқыланды. Құмар Ақсақалов өңірдің машина жасаушылары атынан депутаттарға импортталатын жабдықтарға қосылған құн салығын төлеу жеңілдігін ұзарту туралы өтініш білдірді. Бұл қадам кәсіпорындардың қаржылық жүктемесін азайтуға және машина жасау мен ауыл шаруашылығы өндірісін одан әрі дамытуға ынталандыру болмақ.Инвестициялық климат және экономикалық өсімӨңір басшысының айтуынша, соңғы екі жылда облысқа 1 миллиард АҚШ долларынан астам шетелдік инвестиция тартылған. Алдағы жылдары шамамен 1,5 трлн теңге инвестиция тарту жоспарлануда. Құмар Ақсақаловтың пікірінше, машина жасау, металлургия және ауыл шаруашылығы өнімдерін қайта өңдеу сияқты негізгі салаларды дамыту Қостанай облысының елдегі өнеркәсіптік өндіріс көлемі бойынша үздік үштікке енуіне мүмкіндік береді.Мәулен Әшімбаевтың жұмыс сапары Сенат пен жергілікті билік органдары және мәслихат депутаттары арасындағы өзара іс-қимылды нығайтудағы маңызды оқиға болды. Өнеркәсіп, әлеуметтік инфрақұрылым және халықтың өмір сүру сапасын жақсарту мәселелерінде бірлескен жұмыс қажеттілігі облыс әкімі мен Сенат спикері тарапынан ерекше атап өтілді.Ақпарат көзі : https://www.gov.kz/memleket/entities/kostanay/press/news/details/885503

Астанада кемсітушілікке қарсы заңнама мәселелері жөніндегі ведомствоаралық жұмыс тобының үстіміздегі жылғы қорытынды отырысы өтті.Іс-шараға ҚР Мәдениет және ақпарат вице-министрі Айзада Құрманова, мемлекеттік органдар, азаматтық қоғам және құқық қорғау ұйымдарының өкілдері қатысты.Күн тәртібінің негізгі тақырыбы жыл бойы атқарылған жұмыстарды қорытындылау. Атап айтқанда, жұмыс тобы мүшелерінің адам құқықтарын қорғау саласындағы Қазақстанның құқықтық жүйесін одан әрі жетілдіру жөніндегі қорытынды ұсыныстары талқыланды.Отырыста мемлекеттік органдар, сарапшылар мен қоғамдық ұйымдар өкілдерінің баяндамалары тыңдалды. Қатысушылар Қазақстанда кемсітушілікке қарсы нормаларды қолданудың тұжырымдамалық тәсілдерін, халықаралық тәжірибесін және практикалық аспектілерін егжей-тегжейлі талқылады.Жиналыс қорытындысымен жұмыс тобы ҚР Үкіметіне кемсітушіліктің терминдері мен түрлерін нақты айқындауды енгізіп, шағымдарды беру және қарау тетіктерін жасап, сондай-ақ ұлттық заңнаманы халықаралық стандарттармен үйлестіруді қамтамасыз ететін кемсітушілікке қарсы заңнаманы жетілдіру мәселелері бойынша ұсыныстарды жолдауға келісті. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/885484

2024 жылғы 18 қарашада ҚР БЭЖ Солтүстік аймағы үшін жалпы белгіленген қуаты 100 МВт жел электр станцияларының құрылысына жобаларды іріктеу бойынша аукцион өткізілді.Аукциондық сауда-саттыққа қатысуға 7 компания жіберілді. Сауда-саттық сессиясы барысында қатысушылар 34 баға ұсынысын берді. Берілген өтінімдердің жалпы көлемі 600 МВт құрады. ЖЭС жобаларын іріктеу бойынша аукциондық сауда-саттықты өткізу кезінде шекті аукциондық баға 22.68 теңге/кВтсағ (ҚҚС-сыз) құрады.Сауда-саттық барысында аукциондық сауда-саттыққа қатысушылардан түскен өтінімдердің баға диапазоны 22.68-ден 11.83 теңге/кВт/сағ-қа (ҚҚС-сыз) дейін құрады.Аукциондық сауда-саттық қорытындысы бойынша мына компания жеңімпаз деп танылды:«Kaindy Energy» ЖШС, жобаның белгіленген қуаты 100 МВт, аукциондық бағасы 11.83 теңге/кВтсағ (ҚҚС-сыз). Жобаны Қостанай облысында орналастыру жоспарланған.Аукциондық сауда-саттықты ұйымдастыру және өткізу қағидаларының талаптарын сақтау мақсатында Қазақстан Республикасы Энергетика министрлігінің, «Атамекен» ҚР ҰКП, Азия даму банкі және USAID өкілдері бақылаушылар ретінде қатысты.Бақылаушылар аукционды ұйымдастырушы – «KOREM» АҚ электрондық сауда жүйесінің толық ашықтығын растайды.ЖЭК бойынша аукциондық сауда-саттық жеңімпаздарының тізілімімен аукциондық сауда-саттықты ұйымдастырушының ресми интернет-ресурсында танысуға болады: https://vie.korem.kz/rus/analitika/restr_pobed/ ҚР БЭЖ Оңтүстік аймағы үшін жалпы белгіленген қуаты 100 МВт ЖЭС құрылысына жобаларды іріктеу бойынша келесі аукцион 2024 жылғы 19 қарашаға жоспарланған.Аукциондық сауда-саттықты ұйымдастырушы – «Электр энергиясы мен қуаты нарығының қазақстандық операторы» АҚ.Ақпарат көзі : https://www.gov.kz/memleket/entities/energo/press/news/details/885485

НАЗАР АУДАРЫҢЫЗ, БАЙҚАУ!Ұлытау облысының кәсіпкерлік және өнеркәсіп басқармасы бизнес - идеяларды іске асыру үшін (акцизделетін өніммен байланысты қызметті қоспағанда) "Бір ауыл-Бір өнім" бағдарламасының финалистері және әлеуметтік кәсіпкерлік субъектілері үшін гранттарға конкурс жариялайды.Конкурсқа қатысу үшін үміткерлер бекітілген нысан бойынша электрондық өтінімді және Қағидаларға сәйкес конкурстық құжаттаманың толық пакетін тапсыруы қажет.Өтінімдер 2024 жылғы 18 қарашадан 2024 жылғы 22 қараша аралығында қабылданады.Өтінім беру орны: субсидиялаудың ақпараттық жүйесінің веб-порталы"KEZEKTE.KZ".Электрондық пошта мекенжайы: upp_ulytau@mail.ruБайланыс телефоны: 8 778 108 38 78Өтінімді дайындау, құжаттарды жинау және тапсыру мәселелері бойынша тұрғылықты жері бойынша кәсіпкерлік бөлімдеріне және ӨКП "Атамекен" және Ұлытау облысының қалалар мен аудандардағы филиалдарында.Мемлекеттік грант алуға үміткер кәсіпкерлер өтінімге PDF форматында сканерленген мынадай құжаттардың көшірмелерін тіркейді:1) өтінім берген кездегі жалдамалы жұмыскерлердің орташа саны туралы басшының қолымен және өтініш берушінің мөрімен расталған анықтама;2) бизнес-жобаны іске асыруға арналған шығыстарды берілетін мемлекеттік грант көлемінің кемінде 20 %-ы мөлшерінде бизнес-жобаға қатысатын ақшалай қаражатпен, жылжымалы/жылжымайтын мүлікпен қоса қаржыландырудың бар екенін растайтын құжаттар, кәсіпкердің ағымдағы шотында ақша қаражатының бар-жоғы туралы банктік шоттан үзінді-көшірме немесе бизнес-жобаға қатысатын жылжымалы және (немесе) жылжымайтын мүліктің бағалау құнын растайтын құжаттар;3) әлеуметтік кәсіпкерлік субъектісі немесе "Бір ауыл – бір өнім" бағдарламасының финалисі болып табылатын шағын және орта кәсіпкерлік субъектісі ретінде кәсіпкердің мәртебесін растайтын құжаттың көшірмесі.Ақпарат көзі : https://www.gov.kz/memleket/entities/ulytau/press/news/details/885464

Қазіргі нарықтық экономикада сатып алушылардың құқықтарын қорғау мен сауда орындарындағы ашықтық мәселесі аса маңызды. Сөреде тауар бағаларының көрсетілмеуі – бұл көптеген жағдайда жиі кездесетін жағдай. Мұндай жағдайдың пайда болуы құқықтық және экономикалық тұрғыдан бірқатар қиындықтар мен мәселелерді туындатуы мүмкін.ҚР «Әкімшілік құқық бұзушылық туралы» кодексінің 193-бабының 4-бөлігіне сәйкес Түркістан облысы бойынша сауда және тұтынушылардың құқықтарын қорғау департаменті 2024 жылы дүкендерде сөресінде тауар бағасын көрсетпегені үшін 68 кәсіпкерлік субъектісіне 924 756 теңге айыппұл түрінде шара қолданылды.Сөреде тауарлардың бағалары көрсетілмеген жағдайда сауда орындарында баға көрсетудің міндеттілігі мен оның дұрыстығын қадағалау үшін бақылауды күшейту қажет. Сондай-ақ, әкімшілік жауапкершілікті арттыру керек. Сөреде тауарлардың бағалары көрсетілмеген кезде тұтынушылардың құқықтары бұзылады, нарықтағы ашықтық пен әділ бәсекелестік принциптері сақталмайды. Мұндай жағдайларды болдырмау үшін, Түркістан облысы бойынша сауда және тұтынушылардың құқықтарын қорғау департаменті ҚР Сауда және интеграция министрлігі әзірлеген жадынамаларды Түркістан облысында орналасқан сауда орындарына таратылып нақты талаптар қойылды. Тек осы жағдайда ғана тұтынушылардың құқықтары толық қорғалып, нарықтың тұрақты әрі тиімді жұмыс істеуіне мүмкіндік туады.Құқықтық тұрғыдан ҚР «Тұтынушылардың құқықтарын қорғау туралы» заңына сәйкес, және «Сауда қызметін реттеу туралы» Заңының 9-бабы, 31-бабы 1-тармағының 2-тармақшасына сауда орындарында тауардың бағасы міндетті түрде көрсетілуі тиіс делінген. Бұл ереже тұтынушылардың өз құқықтарын толық түсінуі мен дұрыс шешім қабылдауын қамтамасыз етеді. Бағалар көрсетілмеген жағдайда сатып алушыға тауардың құнын алдын ала білу мүмкіндігі берілмейді, бұл заңға қайшы келеді. Сондай-ақ, Қазақстан Республикасында «Өнімдерді таңбалау және олардың бағаларын көрсету» туралы мемлекеттік стандарттар бар. Бұл стандарттар дүкендер мен сауда орындарының тауарлардың бағаларын нақты және анық көрсетуін талап етеді.Бағалары көрсетілмеген тауарлар супермаркеттер мен базарларда жиі кездеседі. Мұндай жағдайлардың орын алуына техникалық себептер, кейде дүкендер жүйесінің ақаулары немесе жаңа тауарлардың енгізілуі барысында бағалар уақытша көрсетілмей қалуы мүмкін. Бағаны алдын ала білмеу тұтынушыларға жоспарлау мен бюджеттеу қиындықтарын туғызады. Мысалы, баға соңғы сәтте белгілі болған жағдайда, сатып алушы өзінің шығыстарын қадағалай алмайды. Бағалары көрсетілмеген сауда орындары тұтынушылардың сенімін жоғалтуы мүмкін. Сатып алушы кез келген уақытта бағаны өзгертуі мүмкін екенін сезініп, өзіне қолайлы жағдай іздейді.Егерде өз құқығыңыздың бұзылғанын байқасаңыз, дүкен сөрелерінде тауар бағасы жазылмаған фактілерді анықтасаңыз немесе әлеуметтік маңызы бар азық-түлік тауарлары бағасының өсуі байқалса, я болмаса сапасыз қызмет алсаңыз Сауда және тұтынушылардың құқықтарын қорғау департаментіне сол кәсіпкерге қатысты арыз-шағым білдірсеңіз болады. Ол үшін «жедел желі» нөмірлеріне (+7771 322 8282, +7700 606 0071, +7775 224 5616, +7707 347 3876), сондай-ақ электронды және жазбаша өтініштерді департаменттің мекенжайына (Түркістан қаласы, Жаңа қала мөлтек ауданы, 32 көше, 16 ғимарат, А корпусы, 427 кабинет), «Е-otinish» ақпараттық жүйесі арқылы жіберуге болады.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885450

№ 1 облыстық перинаталды орталығында «Шала туылған нәрестелер күніне» орай салтанатты жиын өтті. Іс-шараға осы мекемеде мерзіміне жетпей туылып, тәжірибелі дәрігерлер жүргізген сапалы емнің арқасында ата-анасының көз қуанышына айналған сәбилер қонаққа келді. Сәбилердің құрметіне ұйымдастырылған жиынға арнайы келген аналар сәби сүю бақытын сезіндірген дәрігерлерге ерекше алғысын жеткізді. Шара барысында бүлдіршіндерді орталықтың бейінді мамандары тексеруден өткізді.Жиында №1 облыстық перинаталды орталығының басшысы Салтанат Жабағиева құттықтау сөз алып, әрбір сәбидің өмірі мен денсауылығы өте маңызды екенін тілге тиек етті. Мерзімінен ерте туылған балалар ұзақ мерзімді ерекше күтімді қажет екеніне тоқталып, орталыққа келген әрбір ана мен туылған сәбиге сапалы медициналық көмек көрсету үшін соңғы үлгідегі заманауи құрылғыларды пайдалана отырып, емдеу шаралары сапалы жүргізілетінін айтып өтті. Аналарға ерте босанудың алдын алу туралы маңызды ақпарат берді.Айта кетейік, №1 облыстық перинаталды орталығында жыл басынан бері 5505 сәби дүниеге келген. Оның ішінде, мерзіміне жетпей дүние есігін ашқан 1153 нәресте бар. Перинаталды орталықта он ай ішінде 118 егіз және 4 үшем туылған.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885452

Қарағанды облысы Бұқар Жырау ауданы Ботақара кентінде жасөспірімдер мен жастар арасында аңшы құстармен аң аулау бойынша Қазақстан чемпионаты өтті. Ең мықты бүркітші атағы үшін еліміздің 11 облысынан, Астана мен Алматыдан 60 спортшы бақ сынасты.Жарысқа олар 40 бүркіт, 17 қаршыға және 9 сұңқар алып келді. Аңшылар құстарды қолына тарту, аң аулау және олжа іздеу кезінде оларды бағыттау қабілетімен жарысты.Қарағанды облысынан өнер көрсеткен Қазбек Жандаулет бүркітпен аң аулауда үшінші болды. Бірінші және екінші орындарды Жамбыл және Алматы облыстарының өкілдері иеленді.Бір бүркітшіге бірден белгілі бір санаттағы бірнеше түрлі құстармен өнер көрсетуге рұқсат етілді. Ақмола облысынан Дархан Кеңес бүркіт пен де сұңқармен де жарысқа қатысты.– Менің үлкен ағам алдымен дәстүрлі аң аулауды бастады. Мен де бірте-бірте қызығушылық танытып, онымен бірге жаттығуды бастадым. Бізде сұңқарлар да, бүркіттер де бар. Уақыт болса, әртүрлі құстармен жұмыс істеуді үйренуге болады, – дейді ол. Чемпионатта Дархан сұңқарымен екінші орын алды. Ол сондай-ақ бүркіттермен аң аулайтын финалистердің қатарына кірді, бірақ бұл санатта жүлделі орын алған жоқ.– Дәстүрлі аң аулауда көптеген факторлар рөл атқаруы мүмкін. Бұл ауа-райы, жер бедері, қысым, құстың көңіл-күйі. Барлығы әрқашан бүркіттің шеберлігі мен тәжірибесіне байланысты бола бермейді, дегенмен олар да шешуші рөл атқарады. Менде әлі көп тәжірибе жоқ: әдетте менің ағам жарысқа барады, Мен үйде құстарды бақылап отырамын. Бірақ өткен жылы Көкшетаудағы жарыстарда бүркітпен үшінші орынға ие болдым, – деді Дархан Кеңес.Сұңқар аулауда бірінші орында Алматы облысының өкілі, ал үшінші орында – елорда тұрғыны болды.Түркістан, Жамбыл және Алматы облыстарының қатысушылары сұңқармен аң аулауда үздік атанды.Жеңімпаздар мен жүлдегерлерге 500, 300 және 200 мың теңгеге ақшалай сертификаттар табысталды.Фото Бұқар жырау ауданы әкімдігінен Ақпарат көзі : https://www.gov.kz/memleket/entities/karaganda/press/news/details/885259

Өңірлік кадр резервінің мүшесі Даут Дәулет Оралұлы Ақмола облысы Целиноград ауданының әкімі аппаратының басшысы лауазымына тағайындалды. Дәулет Даут 1996 жылғы 11 қазанда Көкшетау қаласында туған. 2018 жылы Л.Н.Гумилев атындағы Еуразия ұлттық университетін «Көлік, көлік техникасы және технологиялары» мамандығы бойынша бітірді.Еңбек жолын 2019 жылы Қазақстан Республикасының Ұлттық экономика министрлігінде сарапшы лауазымынан бастаған. 2021-2023 жж. аралығында министрліктің экономика салаларын дамыту департаменті салаларды институционалдық дамыту басқармасының бас сарапшысы лауазымында қызмет етті.2023 жылдан бастап бүгінгі күнге дейін Қазақстан Республикасы Ұлттық экономика министрлігі Экономика салаларын дамыту департаменті салаларды институционалдық дамыту басқармасының басшысы лауазымында қызмет атқарып келді.Ақпарат көзі : https://www.gov.kz/memleket/entities/aqmola/press/news/details/885458

Белгіленген тәртіпте мәдениет пен өнерге, кино мен креативті индустрияларға қатысты мәселелер қаралды.Министр келіп түскен өтініштерге нақты әрі егжей-тегжейлі жауап берді.Қосымша уақытты қажет ететін мәселелерді назарға алатынын айтты.Комитеттер мен құрылымдық бөлімшелердің басшыларына тиісті тапсырмалар берілді.Министрдің азаматтарды жеке мәселелері бойынша қабылдауы алдын ала жазылу арқылы тұрақты түрде өткізіледі. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/885476

Бүгін Мәдениет және ақпарат министрлігі ұйымдастырған «Масс-медиа туралы» Қазақстан Республикасының Заңының негізгі ережелерін түсіндіруге арналған алғашқы оқыту семинары өтті. Бұл шара мемлекеттік органдар өкілдеріне арналған оқыту бағдарламасы аясындағы іс-шаралар сериясының бастамасы болды.Іс-шараның басты мақсаты – заңнама нормаларын қолданудың бірыңғай тәсілін қалыптастыру және қатысушылардың құқықтық сауаттылығын арттыру.Семинар барысында Министрлік қызметкерлері масс-медиа туралы заңнаманың негізгі ережелеріне жан-жақты талдау жасап, егжей-тегжейлі түсініктемелер берді. Бұл қатысушыларға қолданыстағы түсініспеушіліктерді жоюға және кәсіби қызметте заңды нақты әрі дұрыс пайдалануға мүмкіндік берді.Сонымен қатар, Мәдениет және ақпарат министрлігі 2024 жылғы 22 қарашада сағат 15:00-де «БАҚ және журналистердің құқықтары мен міндеттері» тақырыбы бойынша оқыту семинарын өткізуді жоспарлап отыр. Осыған байланысты, масс-медиа өкілдерін семинарға қатысуға шақырамыз (тиісті zoom-сілтеме алу үшін келесі байланыстар бойынша хабарласу қажет: 8 (7172) 741268, 8 (7172) 741265).Ақпарат көзі : https://www.gov.kz/memleket/entities/mam/press/news/details/885477

Төтенше жағдайлар вице-министрі Кеген Тұрсынбаев жұмыс сапарымен Ақмола облысына келді.Сапар аясында ол Бурабай мен Бұланды аудандарындағы өрт сөндіру бөлімдеріне барып, құтқарушылардың жұмысымен және тұрмыс жағдайларымен танысты. Кеген Тұрсынбаев Ақмола облысы ТЖД аумақтық бөлімшелерін материалдық-техникалық қамтамасыз етуге ерекше назар аударды. Тексеру қорытындысы бойынша ол бірқатар нақты тапсырмалар берді.М.Ғабдуллин атындағы Азаматтық қорғау академиясына да барып, оқу орнының жаңа басшысын таныстырды. Полковник Жұмабек Хасенов тәрбие және идеологиялық жұмысты ұйымдастыруда үлкен тәжірибеге ие, қорғаныс министрлігінде түрлі басшылық қызметтер атқарды.Сонымен қатар сапар аясында вице-министр ТЖ департаментінің қызметкерлерімен кездесті. Әңгімелесу барысында өңірлік ТЖ департаменттері арасындағы өзара іс-қимыл, академия курсанттарының алдын алу сияқты іс-шараларда қолдануға болатын әлеуеті сияқты мәселелер көтерілді. Сондай-ақ вице-министр қызметтік-әскери тәртіпті бақылауды күшейтуге ерекше назар аударды.Ақпарат көзі : https://www.gov.kz/memleket/entities/emer/press/news/details/885466

Бүгін WorldSkills Kazakhstan-2024 жұмысшы мамандықтарының ұлттық чемпионаты қорытындыланды. Оған өңірлік кезеңдерден өткен 550-ден астам колледж студенттері қатысты. Үш күн бойы олар 30 құзыреттілік бойынша сынға түсті. Жұмыс алаңдарында қатысушылардың кәсіби дағдыларын 558 сарапшы бағалады.Оқу-ағарту министрі Ғани Бейсембаев IX республикалық кәсіби шеберлік чемпионатының жабылу рәсімінде сөйлеген сөзінде бұл шараның техникалық және кәсіптік білім беру жүйесі үшін аса маңыздылығын атап өтті. WorldSkills қозғалысы болашақ мамандардың әлеуетін танытып қана қоймай, олардың бәсекеге қабілеттілігін арттырады.«Президент жариялаған Жұмысшы мамандықтар жылы бүкіл ел үшін техникалық және кәсіптік білім берудің ерекше маңыздылығын дәлелдейді. Бүгінгі таңда жүйенің алдында экономикаға жаңа технологияларды енгізу, білікті кадрларға сұранысты арттыру және мамандарға қойылатын талаптарды өзгерту бойынша жаңа сын-қатерлер мен өршіл міндеттер тұр. Біз әрбір жас маманды еңбек нарығында сұранысқа ие сапалы біліммен және дағдылармен қамтамасыз ету үшін барлық қажетті шараларды қабылдаймыз», - деп атап өтті министр.Чемпионат қорытындысы бойынша 30 негізгі құзыреттілік бойынша 108 жеңімпаз анықталды. Олардың арасында электромонтаж, энергетика, кірпіш қалау, шанақты жөндеу, аспаздық және ресторан ісі, IT шешімдері, WEB-технологиялар, мобильді робототехника, мехатроника, прототиптеу секілді құзыреттіліктер болды. Жеңімпаздар 32 алтын, 37 күміс және 39 қола медаль иеленді. 155 қатысушы «Үздік медальонға» ие болды.Командалық есепте Астана қаласы мен Абай облысының құрама командалары көш бастады, екінші орынды – Алматы қаласы және үшінші орынды – Қарағанды облысы ие болды.Айта кетейік, жеңімпаздар еліміздің жетекші компанияларынан жұмысқа шақырулар алуда, сондай-ақ олар келесі жылы Данияда өтетін EuroSkills чемпионатына қатысу үшін ұлттық құрамаға кіру мүмкіндігіне ие болды.Анықтама үшін: Қазақстанның 772 колледжінде 565 мыңнан астам студент білім алады. Сұранысқа ие мамандықтар бойынша тегін техникалық және кәсіптік біліммен қамту 90%-ды құрады, оның 70%-ы техникалық мамандықтарға бағытталған. Ақпарат көзі : https://www.gov.kz/memleket/entities/edu/press/news/details/885449

Бүгін Ұлттық кәсіпкерлер палатасының қабырғасында Emission Removal Purchase Agreement (ERPA) Қазақстандағы алғашқы орман-климаттық жобаны іске асыру қорытындысы бойынша парниктік газдарды сіңіру жөніндегі келісімге қол қою рәсімі өтті. Рәсімге ҚР Экология және табиғи ресурстар министрі Ерлан Нысанбаев пен «Бәйтерек» ҰБХ» АҚ Басқарма төрағасы Рустам Қарағойшин қатысты. Іс-шараны «Атамекен» ҰКП Төралқа Төрағасы Райымбек Баталов ашып, бұл күнді Қазақстан экономикасы үшін жаңа мүмкіндіктердің ашылуы деп атап өтті.«Мұндай жобаларды іске асыру Қазақстанға тұрақты төмен көміртекті даму, климаттың өзгеруіне және жердің тозуына қарсы күрес мақсаттарына қол жеткізу процесін жеделдетуге мүмкіндік береді. Ауыл шаруашылығында көміртекті офсеттік жобаларды іске асыру үшін де үлкен перспектива бар екенін атап өткім келеді. Қазақстандық аграршылар үшін бұл ESG қағидаттарына сәйкес келудің және жер өңдеудің нөлдік технологиясымен, органикалық көміртектің жинақталуының арқасында топырақ құнарлылығын қалпына келтірумен процестерді жүргізудің тағы бір мүмкіндігі», - деді Баталов.Бастапқыда қазақстандық SAFC көміртегі жобасын әзірлеуші 1,5 мың гектар деградацияланған жерді жергілікті ағаш түрлерін пайдалана отырып қалпына келтіретін болады. Жоба шығарындыларды азайтуға және жергілікті биоәртүрлілікті сақтауға ықпал етеді әрі оны жүзеге асыру кезінде шамамен 1,2 млн көміртегі кредиті алынады. Жоба аясында жоспарланған 3,3 млн ағаштың ішінде бүгінде алғашқы 200 мың көшет отырғызылды. Айта кетейік, өнімділігі төмен ауыл шаруашылығы алқаптары мен тозған жайылымдар орман питомнигі – орман екпелері – орман шаруашылығы – экотуризм болып, орман экожүйесіне қайта құрылады.«Бұл жобаны ҚР Президенті мен «Атамекен» ҰКП қолдады. Енді біз оны іс жүзінде жүзеге асыруға кірісеміз. SEFE және SAFC құзыреттерін біріктіре отырып, біз шетелдік инвестицияларды тарту үшін Қазақстанның кең мүмкіншілігін көрсетеміз», - деп атап өтті «SAFC» ЖШС Бас директоры әрі негізін қалаушы Юрий Ким.Оң экологиялық әсерден бөлек, жобаның қызметі жергілікті әлеуметтік және экономикалық ортаға әсер етіп, аудан тұрғындарын жұмысқа орналастыру және оқыту мүмкіндіктерін туғызады. Қысқару болжамына сәйкес, 1 гектарға 30 жылда 1,2 млн тонна СО2, 1 жылда 26 тонна СО2 жойылады.Жоба бойынша серіктес ретінде «SEFE» британдық компаниясы күрделі салымдардан басқа, жобаны әзірлеуді, мониторинг, сондай-ақ маркетингтік қызметтерді ұсынады.«Жоғары сапалы көміртекті жою жобаларына инвестиция салу Париж келісіміне сәйкес жалпы климаттық мақсатқа жетудің негізгі құрамдас бөлігі болады. Бұл жоба 1 миллион тоннадан астам сіңірілген шығарындылар мен тиісті өтемақы төлемдерін өндіруге жәрдемдеседі», - деді Sefe портфельді басқару жөніндегі атқарушы вице-президенті Александр Демидов.Айта кетейік, Келісімге қол қойылғаннан кейін ҚР Премьер-Министрі Олжас Бектеновпен кездесу өткізіліп, пилоттық орман климаттық жобасын іске асыру бойынша мәселелер талқыланды.Ормандардың көбеюі біз үшін өте маңызды. Біз экологиялық жобаларға шетелдік инвестицияларды тарту үшін қолайлы жағдай жасауға тырысамыз. Үкімет экожүйені қалпына келтіруге, көміртегі ізін азайтуға, жасыл экономиканы дамытуға және басқа да негізгі мәселелерге бағытталған жобаларды қолдайды», — деп атап көрсетті Олжас Бектенов.Бүгінде барлық қажетті рәсімдер пысықталып, алғашқы оффтейк-келісімшартқа қол қойылды. Өткен халықаралық процедуралардың арқасында тәжірибені пайдалана алатын және кластер шеңберінде көміртегі шаруашылығына инвестиция сала алатын басқа қатысушылар үшін жол ашылды.Көміртекті жобаларды іске асыру – Қазақстан экономикасын әртараптандырудың жаңа кезеңі. Агро-индустриялық аймақтардың жобалары «көміртекті егіншілікті» енгізуді көздейді. Бұл болашақта ауыл шаруашылығы өнімін өндіруден түсетін пайдамен қатар, Қазақстанда парниктік газдар шығарындыларының саудасынан қаражат табуға мүмкіндік болатынын білдіреді. Естеріңізге сала кетейік, жоба өткен жылы «Атамекен» ҰКП, «SAFC» ЖШС және «SEFE Marketing & Trading» компаниясы арасындағы ынтымақтастық туралы меморандумға қол қойылғаннан кейін, ҚР Президентінің қатысуымен өткен СОР 28 Дүниежүзілік климаттық саммиті аясында бастау алды.Дереккөз: https://atameken.kz/kk/news/53123-v-kazahstane-zapushena-pervaya-lesnaya-ekosistema-v-npp-podpisali-istoricheskoe-soglashenie Ақпарат көзі : https://www.gov.kz/memleket/entities/ecogeo/press/news/details/885419

COP29 алаңында ҚР Экология және табиғи ресурстар Вице-министрі М.Ошурбаев ЮНИСЕФ ұйымдастырған балалар мен жастар фокусындағы ҰДАҮ мәселелері бойынша жоғары деңгейдегі панельдік сессияға қатысты.Қазақстан жаңа ҰДАҮ 3.0 әзірлеу кезінде білім берудің және әлеуетті нығайтудың маңыздылығын көрсететін ЮНИСЕФ тәсілдерін қабылдауға ниетті екендігі атап өтті. Атап айтқанда, ҰДАҮ-ге ілім беру, балалар мен жастардың осалдығы мәселелеріне арналған жеке тарауды енгізу жоспарлануда. Ақпарат көзі : https://www.gov.kz/memleket/entities/ecogeo/press/news/details/885448

Бүгін магистратураға түсуге арналған кешенді тестілеу басталды, ол 23 қарашаға дейін жалғасады. Естеріңізге сала кетсек, Кешенді тестілеуді тапсыруға өтініш қабылдау 28 қазан мен 10 қараша аралығында ҚР ҒЖБМ Ұлттық тестілеу орталығының сайтында app.testcenter.kz жүзеге асырылды.Магистратураға түсуге арналған кешенді тестілеуге 11 мыңға жуық өтініш қабылданды. Ең көп таңдалған білім беру бағыттары қатарында «Педагогикалық ғылымдар», «Инженерлік, өңдеу және құрылыс салалары» және «Бизнес, басқару және құқық» бар.Ғылыми-педагогикалық магистратураға түсу үшін кешенді тестілеу электрондық форматта өткізіледі және үш бөлімнен тұрады: шет тілі бойынша тест, оқуға дайындығын анықтауға арналған тест және білім беру бағдарламалары тобының бейіні бойынша тест. Барлығына 3 сағат 55 минут беріледі. Шекті балл – 75 балл.Естеріңізге сала кетсек, биыл бейінді магистратураға түсу форматына өзгерістер енгізілді. Бейінді магистратураға түсуге ниетті үміткерлер «Оқуға дайындығын анықтауға арналған тест» бөлімінен босатылды. Осылайша, олар тек білім беру бағдарламалары тобының бейіні бойынша тест тапсырады. Шекті балл кемінде 30 балл, оның ішінде әрбір бейінді пән бойынша кемінде 7 балды құрайды.Тестіленуші апелляцияға техникалық себептер бойынша тестілеу барысында, тестілеу тапсырмаларының мазмұны бойынша тестілеу аяқталғаннан кейін 30 минут ішінде өтініш бере алады. Апелляция бес күн ішінде қарастырылады, одан соң сертификат оқуға түсушінің Жеке кабинетінде қолжетімді болады.Магистратурада оқу үшін қысқы қабылдауға 4 мыңнан астам грант бөлінген.ҚР Ғылым және жоғары білім министрлігінің баспасөз қызметіМАГИСТРАТУРАҒА ТҮСУГЕ АРНАЛҒАН КЕШЕНДІ ТЕСТІЛЕУ БАСТАЛДЫАқпарат көзі : https://www.gov.kz/memleket/entities/zhetysu-oblysy/press/news/details/885283

Ұлытау облысының әкімі Дастан Рыспековтің төрағалығымен кезекті аппарат кеңесі өтті. Өңір басшысы күн тәртібіндегі мәселелерге көшпес бұрын қаржы басқармасы мен қоғамдық даму басқармасының басшыларын таныстырды. Жиын барысында ішкі нарықтағы тауарлардың қауіпсіздігін қамтамасыз ету мен сапасын жоғарылату шаралары және Ұлытау облысы елді мекендерінде байланыс сапасын жақсарту жайында қос сұрақ қаралды. Алғашқы мәселе бойынша Техникалық реттеу және метрология комитетінің Ұлытау облысы бойынша департаменті басшысы Болат Байкин мәлімдеме жасады. Бұл ретте облыс әкімі жауапты орынбасарларына өңірдегі аттракциондар мен балалар ойын алаңдарына арналған жабдықтар және жеделсатылардың қауіпсіздігін қамтамасыз ету мәселелерін өңірлік ахуалдық штаб отырысында қарастыруды тапсырды. Күн тәртібіндегі екінші сұрақ бойынша Ұлытау облысы цифрлық технологиялар басқармасының басшысы Ермек Жазылханұлы баяндама жасады. Өңір басшысы өз кезегінде Ұлытау ауданының әкіміне аймақтағы елдімекендердің байланыс сапасын жақсарту үшін мачта орнататын жерді рәсімдеу жұмыстарын жеделдетуді тапсырды.Ақпарат көзі : https://www.gov.kz/memleket/entities/ulytau/press/news/details/885358

Түркістан облысы бойынша мемлекеттік әлеуметтік медициналық сақтандыру жүйесіне тұрғындарды қамту шаралары тұрақты жүргізіліп келеді. Барлық медициналық мекемеге 2 миллионнан астам тұрғын тіркелген. Оның ішінде МӘМС жүйесінде сақтандырылмағандар саны 350 мың адамды құрап, өткен аймен салыстырғанда 23 пайызға азайып отыр. Осы бағытта атқарылып жатқан жұмыстар бүгін облыс әкімі Дархан Сатыбалдының төрағалығымен өткен аппарат мәжілісінде талқыланды. Өңір басшысы жауапты тұлғаларға арнайы түсіндіру жұмыстарын күшейтуді және анықтау жұмыстарын жалғастыруды тапсырды.– Міндетті әлеуметтік медициналық сақтандыру саласындағы жұмысты күшейтіңіздер. Әлі де немқұрайлы қарап отырғандар бар. Аудан, қала әкімдіктері жергілікті жауапты басқармамен бірлесіп, жеке кәсіпкерлерге, шаруа немесе фермерлік қожалықтарға ақпараттық-түсіндіру жұмыстарын ұйымдастырыңыздар. Субсидия алып, кәсібін жүргіземін деген әрбір адам төлеуі қажет. Сонымен бірге медициналық көмек сапасын да жақсарту керек. Жауапты мекеме басшылары өзара бірлесе жұмыс атқарулары тиіс, – деді Дархан Сатыбалды.Жиын барысында «Міндетті әлеуметтік медициналық сақтандыру» қорының Түркістан облысы бойынша филиалының директоры Бақыт Исмаханбетов баяндама жасап, облыс тұрғындарының сақтандыру санатына өтуі мен МӘМС аясында медициналық қызмет алудағы туындап жатқан өзекті мәселелерге тоқталды. Өңірде 27 мыңнан астам шаруа қожалықтары аталған МӘМС-ті төлемеген. Бұған дейінгі орын алған мәселелер «Е-Сақтандыру» жүйесі арқылы шешімін тауып отыр.Мобильді топтар соңғы 3 айда «Бір аптада – 3%, бір айда – 12%» ұранымен науқандық немесе тұрақты жұмысшыларды «көлеңкелі еңбек» нарығынан жарыққа шығаруға мұрындық болған. Жалпы тұрғындарды МӘМС-ке тарту жұмыстарын күшейту мақсатында өңірлік штаб отырыстары өтіп тұрады. Соның ішінде Д, Е категорияларындағы адам санын азайту бойынша жүйелі жұмыс жүргізіліп келеді.Айта кетейік, Мемлекеттік кірістер департаменті МӘМС жүйесі бойынша төлемдерді 2022-2023 жылдардан бері мүлдем төлем жасамаған 43 мыңнан аса адамға хабарлама жолданып, борышкерлердің есеп шоттары бұғатталған еді. Өткен айдың нәтижесімен 8 мыңнан астамы қарызын төлеген.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885289

Түркістан облысында «Таза Қазақстан» бағдарламасы тұрақты жүргізілуде. Келесі жылы да облыс көлемінде тазалық, абаттандыру жұмыстары жалғасып, жаңаша бағытта үйлестіріліп, жүйелене түседі. Түркістан облысының әкімі Дархан Сатыбалдының төрағалығымен өткен аппарат мәжілісінде осы саладағы мәселелер талқыланды. Маңызды жиында өңір басшысы тазалық пен абаттандыру шараларын тек сенбілікпен шектемей, осы бағыттағы жұмыстарды ширата түсуді тапсырды.– Президентіміздің бастамасымен қолға алынған «Таза Қазақстан» экологиялық акциясын келесі жылы да жалғастырып, апта сайын пысықтап отырамыз. «Таза Қазақстан» акциясы өмірлік дағдыға айналуы тиіс. Тұрғындар арасында да түсіндіру, экологиялық сауаттылықты көтеру жұмыстарын тоқтатпау керек. Әсіресе, облыс орталығы – Түркістан өзгелерге үлгі болуы тиіс. Бұл ретте полицияның да белсенділігі талап етіледі. Индустриалды аймақтарды тазалап, көгалдандыруды тапсырғанмын. Инвесторлар тарту үшін тазалық маңызды. Жұмысты ширатыңыздар. Күзгі ағаш егу науқанын сапалы атқару да маңызды. Осы аймаққа жерсінетін, өсетін ағаштар отырғызылуы қажет, – деді Дархан Сатыбалды.Мәжілісте Ұйымдастыру-инспекторлық жұмыс және аумақтық даму бөлімінің басшысы Нұркен Аралбеков аудан, қалаларда абаттандыру, көгалдандыру және тазалығына жүргізілген мониторинг нәтижесі туралы баяндады.Түркістан облысы әкімінің бірінші орынбасары Зұлпыхар Жолдасов «Таза Қазақстан» акциясы аясында бекітілген кестеге сәйкес атқарылып жатқан жұмыстарға тоқталды. Жыл соңына дейін бекітілген кестеге сәйкес, 807 тазалық шарасын өткізу жоспарланған. Қазіргі таңда аудан, қалаларда жалпы 732 ауқымды сенбілік өткізілді. Аудан мен қалаларға кіреберіс аумақтарын реттеу, тазалау жұмыстары жүргізілуде. Сондай-ақ келесі жылға бағдарлама аясында барлық мемлекеттік және жеке секторды қамтитын ауқымды іс-шараларды өткізу жоспарланып отыр. Іс-шара тек сенбілікпен шектелмей, бағдарламаны жаңа үлгіде өткізу бойынша Жол картасы әзірленуде.Телеграмм бот платформасында бүгінгі таңда, 546 өтінім түскен. Оның ішінде: 529 өтінім орындалған, 1 өтінім орындалу барысында, 16 өтінім мағынасыз болғандықтан қайтарылды.Облыс әкімінің тапсырмасымен Түркістан қаласындағы индустриалды аймақты секторларға бөліп, ретке келтіру жұмыстары жүргізілуде. Бүгінгі таңға 60 гектардан астам аумақ ретке келтірілді. Сондай-ақ бұл аймақта сенбі күні бекітілген басқармалар бірлесіп, жүмыс істеді. 880 ағаш отырғызылды және 2 шақырым жол бойы тазаланып, 1 шақырымнан астам жол жиегі әктелді. Бұл сенбілікке 9 басқарма немесе 315 мемлекеттік қызметшілер атсалысты.Биыл қоғамдық орындарда заң талаптарын бұзған тұлғаларға 26 113 мыңнан астам хаттама толтырылып 305,7 млн. теңгеге айыппұл салынды. Сондай-ақ абаттандыру қағидасына сәйкес іргелес жатқан аумақтың тазалығы бойынша 60 902 жеке тұрғын үй мен 29 954 кәсіпкерлік нысанына мониторинг жүргізілді. Нәтижесінде 1 381 ескерту және 647 айыппұл салынған. Қағиданың сапалы орындау бағытындағы жұмыстар күнделікті жүргізіледі. Жалпы «Таза Қазақстан» бағдарламасының өтуі тұрақты қадағалануда.Жиында облыс әкімі тарапынан аудан, қала әкімдері мен жауапты басқарма басшыларына тазалық, абаттандыру жұмыстарын жандандыру жөнінде тапсырмалар берілді.Түркістан облысы әкімінің баспасөз қызметіАқпарат көзі : https://www.gov.kz/memleket/entities/ontustik/press/news/details/885306

Алматыда Халықаралық студенттер күніне арналған «Almaty Students Week» ауқымды апталығы өз мәресіне жетті. Алматы қаласы Жастар саясаты басқармасының қолдауымен фестиваль аясында 28 іс-шара ұйымдастырылып, оған қаламыздың 15 000-ға жуық студенттері қатысты.Фестивальдің жарқын сәттерінің бірі – «CareerTime» кәсіптік бағдар беру фестивалі болды. Бұл ауқымды іс-шара жастардың кәсіби бағыт-бағдарын анықтауға және еңбек нарығының қажеттіліктерімен танысуға мүмкіндік берді. Фестивальге Алматы қаласының 26 жоғары оқу орны, 30 ірі компания 400 бос жұмыс орындарын ұсынды, ал қатысушылардың жалпы саны 2000-нан астам мектеп бітірушілері мен жұмыссыз жастарды құрады.«Almaty Students Week» фестивалі – қаламыздың белсенді жастарының басын қосқан үлкен алаң болды. Әрбір қатысушы өзін танытып қана қоймай, Алматы студенттер қауымдастығының дамуына өз үлесін қосты. Бұл фестиваль жастардың арманын жүзеге асыра алатындығын және маңызды құндылықтарды қолдайтындығын дәлелдеді. Біз студенттерімізбен мақтанамыз және олардың бастамаларын қолдаймыз». «ALMATY STUDENT’S WEEK» апталығы аясында «Ең үздік студенттік топ - 2024» байқауының финалдық кезеңі өтті. Байқау Алматыдағы ЖОО және колледж студенттерінің басын бір ортаға біріктірді. Байқауға қатысу үшін 30-дан аса өтінім келіп түсті. Сайысқа жалпы Алматының 300-ден астам студент жастары қатысуға ниет білдірді.Байқау қорытындасы бойынша Алматы мемлекеттік бизнес колледжінің «BusinessLAB» студенттік тобы қаланың «Ең үздік студенттік тобы» болып танылды. Ал II орынды Қазақ ұлтық аграрлық университетінің «DreamTeams» студенттік тобы, III орынды Қазақ ұлттық қыздар педагогикалық университетінің «Histrue» студенттік тобы иеленді. Жеңімпаздар дипломдар мен ақшалай сертификаттармен марапатталды. Апталықтың ерекше шараларының бірі Әуезов ауданы комьюнити орталығында өткен «PROдвижение»: Жас көшбасшылардың идеялар фестивалі болды. Мерекелік атмосфераны ерекше ету үшін іс-шара «Гарри Поттер» стилінде ұйымдастырылды. Сонымен қатар, Алматыда ерекше қажеттілігі бар жастар үшін қолжетімді ортаны құруға бағытталған «Alrathon» байқауы өтті. 100-ден астам қатысушылар топтарға бөлініп, өз жобаларын әзірлеп, сарапшылардың қолдауына ие болды. Бұл байқау жасанды интеллект технологияларын кеңінен насихаттауға және оларды әлеуметтік мәселелерді шешуде қолдануға мүмкіндік берді.«Алатау» дәстүрлі өнер театрында «Молодежная лига КВН Алматы» ойындары өтті. Қаламыздың әзілкеш студенттері бір сахнада бас қосты.Ал апталықтың әдемі нүктесі қаламыздың 1000-ға жуық студенттердің басын қосқан Медеуде өткен «ICE Party» болды. Мерекелік кеште студенттер үшін мұз үстінде қызықты конкурстар, интерактивті ойындар және флешмоб ұйымдастырылды. Шара барысында жас өнерпаздар өнер көрсетіп, көрермендерге ерекше көңіл-күй сыйлады «Ең алдымен, «Almaty Student Week» шарасын ұйымдастырған барша жандарға шынайы алғысымды білдіргім келеді. Осы іс-шараның арқасында мен тек білімімді жетілдіріп қана қоймай, сонымен қатар жаңа достар таптым. Осындай бастамалар бізді, студенттерді, жаңа идеяларға, дамуға және қаламыздың өміріне белсенді атсалысуға жетелейді. Ұмытылмас сәттер үшін алғыс айтамын!», - деді фестиваль қатысушысы Алдияр Бақытбеков.«Almaty Students Week» фестивалі студенттер күнін атап өтудің жаңа дәстүрлерін нығайтып, жастардың шығармашылығы мен өзін-өзі дамытуына жаңа мүмкіндіктер ашты. Алматы қаласы Жастар саясаты басқармасының мәліметінше, аталмыш жоба келесі жылы да жалғасын таппақ. Ақпарат көзі : https://www.gov.kz/memleket/entities/almaty/press/news/details/885341

Әлемге әйгілі Франкфурт кітап жәрмеңкесінің өкілдері алматылық кітапханалармен, баспалармен және жазушылармен ынтымақтастық орнатуға қызығушылық танытты.Алматы қаласының әкімі Ерболат Досаев Frankfurter Buchmesse президенті және атқарушы директоры Юрген Боосты қабылдады.Кездесу барысында Франкфурт тарапы Алматының көпұлтты қала ретіндегі бірегейлігін атап өтіп, ұзақ мерзімді әріптестік қарым-қатынас орнатуға ниет білдірді. Өз кезегінде Ерболат Досаев әкімдік тарапынан кітапханаларды жаңғыртуға және заманауи қоғамдық кеңістіктер құруға ерекше көңіл бөлінетінін айтты. Сондай-ақ Алматы қаласының кітапханаларында табысты енгізілген инновациялық және креативті шешімдер туралы баяндады.«Электронды кітаптарды пайдалану үрдісінің артуына қарамастан, баспа кітаптарын оқу сезімін, қағаз беттерін ұстап көру әсерін ештеңе алмастыра алмайтынына сенімдімін. Кітапханалардың белсенділігінен біздің тұрғындарымыздың кітапты өте жақсы көретінін байқаймыз, біз бұл бағытта белсенді жұмыс істеп жатырмыз. Бүгінде қаламыздағы кітапханалардың 95%-ы жаңғыртылды. Біз барлық ауданда заманауи кітапханалар ашып, халық көп жиналатын жерлерде – сауда және ойын-сауық орталықтарында, комьюнити орталықтарында және басқа орындарда автономды кітапханалар орнатып жатырмыз. Сонымен қатар, жазушылар мен заманауи авторларды қолдаймыз», – деді Алматы әкімі Ерболат Досаев.Франкфурт кітап жәрмеңкесінің президенті және атқарушы директоры Юрген Боос Алматыда жергілікті авторлар мен баспаларға арналған семинарлар өткізуге, сондай-ақ ауқымды кітап іс-шараларын ұйымдастыруда кеңес беруге дайын екенін білдірді.«Біз Қазақстанға арнайы келдік. Алматымен байланыс жасап, ынтымақтастық орнату біз үшін маңызды. Біз тек жәрмеңкелер өткізумен шектелмей, баспа ісін де дамытамыз. Мен баспа саласы үлкен өзгерістерді қажет етеді деп санаймын және осы салада тәжірибе алмасуға дайынбыз. Бұған дейін біз Мексикада, Оңтүстік Африка Республикасында және БАӘ-де өткен кітап жәрмеңкелерінің ұйымдастырушыларын кеңес беріп қолдадық. Яғни, бұл салада мол тәжірибеміз бар. Сондай-ақ, Қазақстанды Франкфурт кітап жәрмеңкесінің құрметті қонағы болуға шақырғымыз келеді», – деді Юрген Боос.Кездесу соңында тараптар 2025 жылы Алматыда бірлескен жобаларды дамыту және мәдени-іскерлік байланыстарды нығайту туралы уағдаласты. Ақпарат көзі : https://www.gov.kz/memleket/entities/almaty/press/news/details/885352