Қарағандыда Қазақстанның еңбек сіңірген жаттықтырушысы Вера Карпованы еске алуға арналған спорт мектептерінің тәрбиеленушілері арасында төртсайыстан ХІХ Республикалық матчтық кездесу өтуде. Турнирде жүлделі орындар үшін еліміздің жеті облысынан және Астанадан 160 жас спортшы таласады.– Вера Карпованы еске алуға арналған жарыс 19-шы рет өткізілуде. Биыл оларға 2011–2012 жылы туған балалар қатысады – барлығы 160 спортшы (90 қыз және 70 ұл). Турнир көпсайысты қамтиды, өйткені менің анам Вера Карпова онымен айналысып, балаларды жаттықтырды, – дейді жеңіл атлетикадан ҚР Ұлттық құрама командасының бас бапкері Дмитрий Карпов. – Жеңіл атлетикадан Қарағанды мектебі – еліміздегі ең мықты мектептердің бірі. Жеңіл атлетикадан Қазақстанның барлық балалар чемпионаттарын негізінен Қарағанды облысының балалары жеңіп алады. Бұл ең танымал спорт түрі.Вера Карпова Қазақстанның 19 дүркін рекордсмені, КСРО чемпионатының, Еуропа Кубогының және басқа да көптеген халықаралық турнирлердің жеңімпазы болды. Қазақстанның ең мықты көпсайысшыларын жаттықтырды. 2007 жылы қайтыс болғаннан кейін оған жеңіл атлетикадан "Қазақстан Республикасының еңбек сіңірген жаттықтырушысы" атағы берілді.Елизавета Кошерникова Вера Карпованы еске алуға арналған турнирге бірінші рет қатысып отырған жоқ. Ол Павлодардан келді.– Бірінші сыныптан бастап жеңіл атлетикамен айналысамын. Қазір мен 13 жастамын. Жеңіл атлетика өте ұнайды, әрқашан жеңіске жету мүмкіндігі бар. Бұл жарыстарда мен биіктікке секіру бойынша үшінші орынды иелендім. Жаңа бастаған спортшыларға өз мақсаттарына жетуге кеңес беремін, – дейді жас спортшы.Төртсайысқа 60 метрге жүгіру, ұзындық пен биіктікке секіру, кросс (қыздар үшін 500 метр, ұлдар үшін 600 метр) кіреді. Жарыс жеке және командалық.Фото Анастасия Проскурякованікі Ақпарат көзі : https://www.gov.kz/memleket/entities/karaganda/press/news/details/888564

Қарағанды Назарбаев Зияткерлік мектебінің оқушылары жыл сайынғы "Қазақстан Білім Олимпиадасы" республикалық олимпиадасында 10 медаль жеңіп алды. Оған 9–12 сынып оқушылары қатысты. Олар өз білімдерін алты бағыт бойынша сынға салды: математика, химия, физика, информатика, география және биология.Барлық турлардың қорытындысы бойынша үш алтын медаль иегері – 12-сынып оқушысы Әмірхан Сандыбаев (биология), оныншы сынып оқушысы Алидар Айтжанов (химия) және оныншы сынып оқушысы Артур Штро (география).– Бұл олимпиадаға дайындық маған үш жылға жуық уақытты алды. Тапсырмалар қызықты болды, бірақ сонымен бірге өте қиын болды. Ең қызығы, мен One Piece анимесіне негізделген тапсырманы атаймын. Ал ең қиын тапсырмада органикалық қосылыстар мен олардың бір-бірімен реакцияларының сипаттамасы келтірілген, және бұл заттардың не екенін болжау керек еді, – деді жас химик Алидар Айтжанов.Оныншы сынып оқушысы қазірдің өзінде Назарбаев Университетіне түсуге дайындалып жатыр, онда ол химияны оқуды жалғастыруды жоспарлап отыр.Он бірінші сынып оқушысы Әділ Әміржановта (математика), 12-сынып оқушысы Талғат Бабусуновта (география), он бірінші сынып оқушылары Диас Ғайниде (география) және Батыр Есеновта (информатика) күміс медальдар.Қоланы тоғызыншы сынып оқушысы Евгения Меженина (биология), оныншы сынып оқушысы Сабина Ералиева (химия) және 11 сынып оқушысы Даниял Орысхан (математика) жеңіп алды.Ақпарат көзі : https://www.gov.kz/memleket/entities/karaganda/press/news/details/888631

Қарағанды облысының Ардагерлер кеңесін Ғабит Тұяқов басқарды. Ұйымның сандық құрамы да жаңартылды. Өңірде облыстық ардагерлер кеңесінің IV пленумы өтті.Бүгінгі таңда ардагерлер кеңесі маңызды рөл атқарады: аға буынның ешқайсысы назардан тыс қалмауы керек, деп есептейді "Ардагерлер ұйымы" РҚБ Орталық кеңесінің төрағасы Бақтықожа Ізмұхамбетов.– Бүгінде ардагерлер ұйымы барлық өңірлерде белсенді жұмыс істейді. 2019 жылы Ардагерлер туралы заң қабылданды, ол толықтырылды және қазір жұмысты жақсарту үшін жаңа ұсыныстар жиналуда. Бұл заң ардагерлерге өз мәселелерін шешуге көмектеседі. Төрт жылдан бері бағдарламаны Медиация туралы заң негізінде жүзеге асырып келеміз. Мыңдаған істер сотсыз шешілді. Біз судьялардың жүктемесін айтарлықтай төмендетіп қана қоймай, адамдардың қарым-қатынасын жақсарттық, – дейді Бақтықожа Ізмұхамбетов.Пленумда екі негізгі мәселе қаралды – кеткендердің орнына жаңа мүшелерді қабылдау және облыстық ардагерлер кеңесінің жаңа төрағасын таңдау.Дауыс беру арқылы Қарағанды облыстық ардагерлер кеңесінің төрағасы болып Ғабит Тұяқов сайланды. Бұған дейін ол Қарағанды қаласының Ардагерлер кеңесін басқарған.Жаңа төрағаны тағайындаумен Қарағанды облысының әкімі Ермағабет Бөлекпаев құттықтады. Ол Ғабит Тұяқовтың тәжірибесі мен кәсібилігі әрқашан қоғамның игілігіне бағытталғанын атап өтті.– Ғабит Шорынұлы көп жылдар бойы мемлекеттік қызметте жауапты қызметтер атқарды. Сіздің басшылығыңызбен ардагерлер кеңесі біздің қоғамның және жалпы елдің игілігі үшін маңызды жұмысын жалғастыратынына сенімдіміз. Осы мақсаттарға жету үшін біз сіздермен бірге жұмыс істейтін боламыз, – деді аймақ басшысы.Ғабит Тұяқов сенім үшін алғысын білдіріп, аға буынды қолдауға бағытталған ардагерлер кеңесінің қызметін жалғастыруға ұмтылатынын атап өтті.13 жыл аралығында облыстық ардагерлер кеңесінің жетекшісі Оралды Төреғожин болды.Ақпарат көзі : https://www.gov.kz/memleket/entities/karaganda/press/news/details/888717

Абай атындағы Қарағанды облыстық балалар кітапханасында облыс орталығының 90 жылдығына орай "Қарағандының өшпес есімдері" бейнерепортаждар байқауының жеңімпаздары марапатталды. Қарағанды, Саран, Абай, Шахтинск, Приозерск, Теміртау, Бұқар Жырау, Қарқаралы және Осакаров аудандарынан 14–15 жас аралығындағы оқушылар мен студенттер бақ сынасты."Байқау идеясы балалардың Қарағанды тарихын білу арқылы өлкетануға деген қызығушылығын оятуға және қаланың дамуына елеулі үлес қосқан адамдар туралы бейнерепортаж жасауға бағытталған", – дейді кітапханада.Қазылар алқасы байқауға ұсынылған 30 бейнерепортаждың ішінен үздіктерін таңдады.Бірінші орынды Ы. Алтынсарин атындағы Қарағанды мектеп-лицейінің оқушысы Жібек Қалдыбай иеленді. Екінші орын Бұқар Жырау ауданының С. Торайғыров атындағы мектеп оқушысы Сәкен Жұманға бұйырды. Үшінші орынды Қарағанды жоғары политехникалық колледжінің студенттері Александра Кривая мен Қарағанды қаласының Тәттімбет атындағы Өнер колледжінің студенті Анар Адамбай бөлісті.– Байқау өте ұнады, қиын болған жоқ. Мен адамдарға бірдеңе айтып, ақпарат тауып, бөліскенді ұнатамын. Болашақта журналист болуым мүмкін, – дейді жүлдегер Александра Кривая.Номинациялар бойынша жеңімпаз атанғандар:- "Креативті идея" – Павел Мерц (ерекше білім беру қажеттіліктері бар балаларды қолдау орталығы, Қарағанды);- "Үздік бейнесюжет" – Ернұр Сермаханов (Ғ. Мұстафин атындағы мектеп, Теміртау қ.);- "Үздік техникалық шешім" – Айзара Өмірбек (№85 орта мектеп, Қарағанды);- "Тақырыпты ашу шебері" – Іңкәр Өмірбек (Ж. Ақбаев атындағы мектеп, Қарағанды)."Көрермендер көзайымы сыйлығы" номинациясында Қарағанды жоғары политехникалық колледжінің студенті Бағым Жарқымбекованың бейнесюжеті көш бастады. Оның шығармашылық жұмысы YouTube-те, Абай атындағя балалар кітапханасының арнасында ең көп қаралған – 2381 рет.Жеңімпаздар жүлделер алды, байқаудың қалған қатысушыларына сертификаттар, ал жетекшілеріне алғыс хаттар табысталды.Ақпарат көзі : https://www.gov.kz/memleket/entities/karaganda/press/news/details/888764

Астанада жаратылыстану-математикалық цикл пәндері бойынша XVII Президенттік олимпиада аяқталды. Қарағанды облысының қатысушылары үш қола медаль, екі білім гранты және бір Құрмет грамотасын жеңіп алды.Президенттік олимпиада елордада 20–22 қараша аралығында өтті. Оған Қазақстан мектептерінің 11-ші сыныптарының 190 оқушысы қатысты. Қарағанды облысының намысын сегіз оқушы қорғады.Бұл олимпиаданың ерекшелігі – әркім бірден төрт пән бойынша тапсырмаларды орындауы керек еді: математика, физика, химия және биология.Қазылар алқасының құрамына Қазақстан және басқа елдердің ғалымдары мен ғылым докторлары, сондай-ақ өткен жылдардағы халықаралық олимпиадалардың жеңімпаздары кірді.Үшінші орынды Сарань бірінші лицейінен Алина Көпбаева, Қарағанды қаласының Ы. Алтынсарин атындағы мектеп-лицейінен Артем Михайлов пен Қ. Сәтбаев атындағы Қарағанды гимназиясынан Алексей Ким иеленді. Олар ҚР Білім министрлігінің III дәрежелі дипломдарын алды.Артем Михайловпен Алексей Ким де білім беру гранттарын жеңіп алды.Қарағандылық "Дарын" ММЛИ он бірінші сынып оқушысы Варвара Давыдова Құрмет грамотасын алды.Ақпарат көзі : https://www.gov.kz/memleket/entities/karaganda/press/news/details/888824

Қарағанды облысында агро саланың үздік өкілдері Кеншілер мәдениет сарайына жиналды. Кәсіби мереке құрметіне арналған салтанатта өңір басшысы Ермағанбет Бөлекпаев Ел Президентінің атынан наградалар, сондай-ақ Құрмет грамоталары мен алғыс хаттар табыс етті.Салтанатты рәсім басталар алдында аграрлық саланың жетістіктер көрмесі ұсынылды. Мұнда ауыл тұрғындары қолынан шыққан өнімдердің барлық спектрі көрсетілді. Фермерлер сортты картоп, көкөністер, дәнді дақылдар және т. б. әкелді.Биыл қиындықтарға қарамастан, аграршылар 1 миллион 300 мың тонна астық және шамамен 400 мың тонна картоп рекордтық өнім жинады. Табыс мал шаруашылығында да байқалады: мал басы мен ет өнімдерінің көлемі өсуде.– Сіздер еліміздің байлығын адал еңбегіңізбен арттырып, өңіріміздің экономикалық әлеуетін нығайтып жатырсыздар, – деді мереке сепебкерлеріне Ермағанбет Бөлекпаев. – Сіздердің кәсіби мерекелеріңіз биыл ерекше салтанатты болды. Ауыл шаруашылығы саласының үздік өкілдері ел Президентінің атынан мемлекеттік наградаларға ие болды. Олардың арасында біздің жерлестеріміз де бар. "Ерен еңбегі үшін" медалін Осакаров ауданының фермерлік шаруашылығының сауыншысы Татьяна Богдановна Москвина алды. Республика күнін мерекелеу қарсаңында "Шахтерское" ЖШС директоры Георгий Георгиевич Прокопқа алтын жұлдыз табысталып, "Қазақстанның Еңбек ері" атағына ие болды. Бұл сіздердің еңбегіңізді, туған жерге сіңірген еңбектің жоғары бағасы.Татьяна Москвина фермада 40 жылға жуық жұмыс істейді. Оның күнделікті қарамағында 35 ірі қара бар, жылына шамамен 100 тонна сүт береді. Жастар тәлімгері тәжірибесін әріптестеріне үйретуде.Мемлекет ауылды дамыту үшін көп жұмыс атқарды, деп атап өтті облыс әкімі. "Ауыл аманаты" бағдарламасы жаңа көкжиектерді ашуға көмектеседі. Жыл соңына дейін ауыл тұрғындары 61 – шағын несие алады, 800-ден астам жаңа жұмыс орны мен 60 ауыл шаруашылығы кооперативі құрылады.Сондай-ақ, қарағандылық аграршыларды ҚР Ауыл шаруашылығы министрлігі аппаратының басшысы Марат Оразаев құттықтап, ведомстволық наградаларды табыс етті.Биыл ерекше көзге түскен егістіктер мен фермалардың еңбеккерлері де номинациялар бойынша марапатталды.Нұра ауданының "Отқанжар" ЖШС-нің тұрғыны Берік Тұрыбеков үздік малшы болып танылды."Үздік құс өсіруші" – Виктор Колчев, "Ақнар" құс фабрикасының директоры."Үздік агроном" – Сергей Бутузов, Бұқар жырау ауданының "Нұр СХ” ЖШС."Үздік комбайнер" – Мәулен Бекмағанбетов, Ақтоғай ауданының "Ерасыл" ШҚ."Нәтиже Сүт Фабрикасы", Қарағанды мелькомбинаты, "Дедов" ЖШС Үздік қайта өңдеу кәсіпорындары ретінде атап өтілді.Ветеринарлық фельдшер Светлана Кизима "Мамандыққа адалдығы үшін" номинациясы бойынша марапатқа ие болды. Ол мамандыққа анасының ізімен келгенін айтты. Мектеп оқушысы фермада жұмыс істеуге ұмтылып отырған, жануарларға күтім жасауға көмектескен. Содан кейін Қарқаралы ауыл шаруашылығы техникумын үздік бітірген. Жарты ғасыр өмірін осы мамандыққа арнап, зейнеткерлікке шыққаннан кейін Абай аудандық ветеринариялық станциясында жұмысын жалғастыруда.Еңбек ері Георгий Прокоп бас награданы табыстай отырып, әріптестерін құттықтап, оларды әлеуметтік жауапкершілікке шақырды.– Ауыл шаруашылығы қызметкерлерінің бірінші форумында ел Президенті агроөнеркәсіптік кешенді дамыту жөніндегі нақты бағдарламаларды белгіледі. Мемлекет бізге көмектеседі, бірақ біз өзіміз де әлеуметтік жауапты болуымыз керек. Біз технологияны жетілдірдік, жұмысшыларымызды әлемдегі ең жақсы комбайндарға отырғыздық. Бірақ жайлы өмірсіз ауылдың болашағы жоқ, – деді ол.Жергілікті әртістер, қазақстандық эстрада әншісі Маржан Арапбаева, "Tengri" этно-тобы аграршыларға өз өнерін тарту етті. Ақпарат көзі : https://www.gov.kz/memleket/entities/karaganda/press/news/details/888974

Сондай-ақ, облыс әкімінің тапсырмасымен құмар ойынның құрбаны болған адамдарға көмек көрсетуге маманданатын клиникалық психологтарды оқытуға қаражат бөлінеді.Аймақ басшысы Асхат Шахаровтың төрағалығымен өткен өңірлік штаб отырысында құмар ойындар мен қаржы пирамидаларының қызметіне қатысты мәселелер қаралды. Бұл проблемалар халық арасында, әсіресе жастар арасында өзекті бола түсуде. Қатысушылар лудоманияның алдын алу жолдарын және азаматтардың ақпараттандырылу деңгейін арттыру шараларын талқылады.«Ел Президентінің тапсырмасына сәйкес лудоманияның алдын алу және осы тәуелділіктен зардап шеккендерге көмек көрсетуге қатысты шаралар қабылдануда. Көптеген адамдар, әсіресе жастар арасында құмар ойындарға тәуелді бола бастағанын ескере отырып, лудоманияның алдын алуға және емдеуге бағытталған кешенді шараларды әзірлеу қажет», - деп атап өтті облыс әкімі.Ақтөбе облысы бойынша Экономикалық тергеп-тексеру департаментінің басқарма басшысы Жадан Бисенбиннің мәліметінше, биыл 20 млрд теңгеге жуық шығынды құрайтын қаржы пирамидаларын құру және басқару фактілері бойынша 57 қылмыстық іс тіркелген.IMAS жүйесінің көмегімен жаңалықтар порталдары, блогтар, сайттар мен аккаунттар бақыланып отыр, күдікті мазмұны бар барлық заңсыз контентке тоқтау салынды. Осы жылдың өзінде 403 финпирамидалық сілтемебұғатталды және 23 мың жазылушысы бар 6 аккаунт жойылды.Өз кезегінде Ішкі саясат басқармасының басшысы Әлібек Байнешов халықтың қаржылық сауаттылығын арттыру, интернет-алаяқтық және лудоманияның алдын алу үшін қандай ақпараттық-түсіндіру жұмыстары жүргізіліп жатқаны туралы айтып берді.«Ақтөбе қаласында жастармен жұмыс істейтін мамандарға арналған мемлекеттік жастар саясаты мектебі өз жұмысын бастады. Жоба аясында жастар ресурстық орталықтарының қызметкерлері лудомания, репродукциялық саулық тақырыптары бойынша үш күндік оқыту бағдарламасын өткізді. Алғашқы курсқа Ақтөбе, Батыс Қазақстан, Атырау, Маңғыстау, Солтүстік Қазақстан облыстарының жастарынан 32 маман қатысты. Бұл аталған жобаның еліміздің барлық өңірлері үшін ауқымы кең екенін, маңыздылығын көрсетеді»,-деп атап өтті Әлібек Байнешов.Облыстық психикалық денсаулық орталығы басшысының орынбасары Гүлмира Оразова атап өткендей, барлық құмар ойыннан зардап шеккен азаматтар медициналық көмекке жүгінбейді. Бүгінгі таңда осы диагнозы бар науқастарды емдеу Жаңақоныс тұрғын алабында орналасқан орталық базасында жүзеге асырылады. Соңғы үш жылда төрт адам емделген, олар өздерінің ауруын мойындаудан қорықпапты және қолдау сұрай келген. Олар емдеу курсынан өтіп, динамикалық бақылауға алынған. Орталықта арнайы кабинет жұмыс істейді, онда пациенттер кеңес ала алады. Барлық өтініштер құпия түрде қаралады.Облыс әкімі жиын соңында құмар ойындарға тәуелділіктің таралуына қарсы күрес аясында оның зияны туралы мемлекеттік қызметшілер мен жалпы халық арасында насихаттау жұмыстарын күшейтуді тапсырды. Жастарға профилактикалық және түсіндіру жұмыстарын жүргізуге ерекше назар аударылуы тиіс. Түрлі алаңдарда, соның ішінде білім беру мекемелері мен мемлекеттік органдарда лудоманияның зияны және олардың адам өміріне, денсаулығы мен әл-ауқатына кері әсері туралы пікірталастар өткізу керек.Сондай-ақ, Асхат Шахаров ойынға тәуелділікке бейімділікті ерте кезеңдерде анықтауға мүмкіндік беретін бағдарламаны әзірлеу туралы ұсыныс жасады. Зардап шеккендерге білікті көмек көрсету үшін клиникалық психологтарды оқытуға қаражат бөлінеді. Лудоманияның алдын алу және халықтың әртүрлі топтары арасында тәуекел топтарын анықтау мақсатында скрининг жүргізу жоспарланған. Оқушыларға, қаржы қызметкерлеріне және мемлекеттік қызметшілерге ерекше көңіл бөлінеді. «Бұл құбылыстар, әсіресе жеңіл ақшаға оңай кенелудің құрбаны болған жастарға үлкен қауіп. Біз осындай схемаларды уақытылы анықтау және олардың таралуын болдырмасүшін күш біріктіруіміз керек», - деді аймақ басшысы. Ақпарат көзі : https://www.gov.kz/memleket/entities/aktobe/press/news/details/889072

Бүгін Астанада Қазақстан мен Ресей Федерациясының Ауыл шаруашылығы министрлері Айдарбек Сапаров пен Оксана Лут кездесті. Тараптар АӨК саласындағы өзара іс-қимылдың өзекті мәселелерін талқылады. «Қазақстан мен Ресей-ынтымақтастықтың барлық бағыттары бойынша стратегиялық әріптестер, бұл ретте агроөнеркәсіптік кешен онда ерекше орын алады. Бүгінгі кездесу - өзекті мәселелерді нақты талқылауға, ынтымақтастығымызды одан да нәтижелі ету үшін бар кедергілерді жою үшін шешімдер іздеуге ден қоюға тамаша мүмкіндік», - деді Айдарбек Сапаров.Ол кездесудің ауыл шаруашылығы өнімдерінің сауда мүмкіндіктерін кеңейту үшін маңыздылығын атап өтіп, ҚР мен РФ өз аумақтарында тауарлардың едәуір көлемінің транзитін қамтамасыз ететінін, соның ішінде астық бойынша айтылды.«Бірлескен күш - жігермен біз экономикалық байланыстарды тереңдетіп қана қоймай, өзара іс-қимылдың жаңа деңгейлеріне шыға аламыз, бұл біздің фермерлер үшін де, тұтынушылар үшін де тиімді болады», - деп қосты министр.Өз кезегінде Оксана Лут біздің елдеріміздің ынтымақтастықты кеңейту үшін айтарлықтай әлеуеті бар екенін атап өтті.Атап айтқанда, ғылыми-техникалық, ауыл шаруашылығы дақылдарын іріктеу, жануарлар генетикасы және биотехнология саласында. Бұдан басқа, Ресей мен Қазақстан АӨК үшін кадрлар даярлау бойынша өзара іс - қимылды күшейте алады-бірінші кезекте бірлескен желілік білім беру бағдарламалары мен қос дипломдық бағдарламаларды құру есебінен.Ресей Федерациясы Ауыл шаруашылығы министрінің Қазақстанға жұмыс сапары аясында екі елдің өкілдері бірқатар проблемалық мәселелерді қарастырды. Атап айтқанда, тауарлардың ветеринариялық бақылауындағы, өсімдік шаруашылығы өнімдері транзитінің сауда кедергілері мен күрделілігі талқыланды.Ғылыми-техникалық ынтымақтастық, оның ішінде селекция және тұқым шаруашылығы, аграрлық білім беру, техникалық реттеу бойынша өзара іс-қимыл және ЕАЭО шеңберіндегі тарифтік реттеу мәселелеріне ерекше назар аударылды.Сондай-ақ, Ресей делегациясына АӨК-де қолданылатын қазақстандық ақпараттық жүйелердің пулы таныстырылды.Айдарбек Сапаров деректерді жедел беру және біздің елдеріміз арасындағы тауарлардың қозғалысын есепке алу үшін ақпараттық жүйелерді синхрондаудағы елеулі прогреске назар аударды.Ақпарат көзі : https://www.gov.kz/memleket/entities/moa/press/news/details/889048

Жамбыл облысының 85 жылдығына орай халықаралық ғылыми-тәжірибелік конференция өтті.Келелі басқосуға Жамбыл облысының әкімі Ербол Қарашөкеев, ҚР Президентінің кеңесшісі Мәлік Отарбаев, ҚР Парламенті Сенаты мен Мәжіліс депутаттары, белгілі қоғам қайраткерлері, зиялы қауым өкілдері, сондай-ақ шетелдік және елімізге танымал ғалымдар, профессорлар, тарихшылар және өңір жұртшылығы қатысты.Алдымен Президент кеңесшісі Мәлік Отарбаевқа сөз берілді. Ол Мемлекет басшысы Қасым-Жомарт Тоқаевтың сәлемдемесін жеткізіп, жамбылдықтарды тарихи датамен құттықтады.– Талайғы тарихтың куәсі болған Жамбыл облысы ұлттық діңгегіміздің алтын қазығы саналады. Мұнда елдігіміздің тірегі болған құндылықтарымыз бен төл тарихымыз, мәдениет пен өркениетіміз қалыптасты.Жамбыл облысының жағдайы Президенттің жеке бақылауында. Өңірдің ауыл шаруашылығы саласында көш бастап тұрғанын жақсы білесіздер. Соңғы жылдары химия, тамақ өндірісі бойынша көрсеткіштер қуантарлық жағдайда. Құрылыс саласы қарқынды дамып, тұрғын үйлер бой көтеруде. Спорт саласындағы жетістіктер өзге өңірлерге қарағанда әлдеқайда көп. Білім мен ғылым саласындағы жетістіктер республикалық деңгеймен шектелмей, халықаралық және әлемдік деңгейге шығып отыр, – деп ел ағаларының қажырлы еңбегін атап өтті.Ербол Қарашөкеев конференция жұмысына сәттілік тілеп, құрметті қонақтарға ризашылығын жеткізді.– Жамбыл – тарихқа бай аймақ. Қасиетті өлкеде Түркі қағанаты мен ислам мәдениетінің негізі қаланып, Қазақ хандығының алтын қазығы қағылды.Тарихымызды айшықтаған Мұхаммед Хайдар Дулати, Манас жырының кейіпкері Манас батыр өмірінің көп бөлігі осы өңірде өткені тарих парағынан белгілі.Облыс орталығы Тараз қаласының да шежіресі тереңнен сыр шертеді. Тасын түртсең тарихы көрінетін шаһарға сонау заманнан бері құт-береке дарып, әлем елдері көз тігіп келеді.Тараз – мәдениет пен өркениеттің ордасы. Бір кездері Ұлы Жібек жолының торабындағы Тараз «саудагерлер қаласы» атанып, Батыс пен Шығыс мәдениетін байланыстырды.Бүгінде Жамбыл облысы алыс-жақын мемлекеттермен достық қарым-қатынас орнатып, мәдени-гуманитарлық, сауда-саттық байланысын нығайту үстінде.Мемлекет басшысы Қасым-Жомарт Кемелұлы Тоқаев Тәуелсіз мемлекеттер достастығы елдерінің кеңесінде «Достастық жәрмеңкесін» Таразда өткізуді ұсынуы бекер емес деп есептейміз.Бұл қасиетті Жамбыл өңірінің халықаралық аренада одан әрі танылуына ықпал ететіні сөзсіз, – деген облыс әкімі конференция арқылы тарих жаңа деректермен толығатынына сенім білдірді.Сондай-ақ ҚР Парламенті Сенатының депутаты Бекболат Орынбеков Сенат төрағасы Мәулен Әшімбаевтың құттықтау хатын оқып берді. ҚР Парламенті Мәжілісінің депутаты Ерболат Саурықов көне өркениеттің өзегі Әулиеата өңірінен бастау алғанын, оған елеулі оқиғалар мен археологиялық қазба байлықтар арқылы көз жеткізуге болатынын айтты.Қырғыз Республикасының Жамбыл облысындағы құрметті консулына кандидат Жанұзақ Бейсеубаев пен Қазақстан Республикасының Қырғыз Республикасындағы Елшілігінің кеңесші-уәкілі Жасұлан Ханалиев айыр қалпақты ағайынның ыстық сәлемін жолдады.Мадияр Елеуов, Дария Қожамжарова, Берекет Кәрібаев, Досбол Байгунаков, Жәкен Таймағамбетов, Төрәлі Қыдыр сынды белді тарихшылар тереңде жатқан тың деректерді сөйлетті. Спикерлер бұл өлкеде сыры ашылмаған құнды тарихи орындардың өте көп екенін алға тартып, зерттеу жұмыстарын жүргізу, объектілерді музейлендіру бойынша ұсыныс-пікірлерімен бөлісті.Жапония мемлекеті «Нара» ұлттық мәдени мұра мен ұлттық мәдени құндылықтарды зерттеу институтының PhD докторы Садакатцу Кунитакен жапон-қазақ археологиялық экспедициясының қорытындыларын баяндаса, Түркия елінен келген профессор Абдуллах Гүндоғдуды орта ғасырлардағы Талас пен Анадолы арасындағы өркениет қатынастары туралы ойларын ортаға салды.Конференция соңында ақын Маралтай Райымбекұлы көне Тараз туралы отты өлеңін оқып, көпшілікті маржан сөзбен сусындатты.Ақпарат көзі : https://www.gov.kz/memleket/entities/zhambyl/press/news/details/889059

Абай облысында ауыл шаруашылығы қызметкерлерінің форумы өтіп, өңірдің агроөнеркәсіп кешенінің дамуы қорытындыланып, алдағы жылдарға жоба-жоспарлар белгіленді.Жиында құттықтау сөз сөйлеген облыс әкімі Нұрлан Ұранхаев ауыл шаруашылығы қызметкерлерінің еңбегінің арқасында өңірдің экономикалық тұрақтылығы мен әл-ауқаты артып келе жатқанын атап өтті.«Абай облысы - экономикасының негізгі бөлігін аграрлық сектор құрайтын аймақтардың бірі. Агроөнеркәсіп саласында оң өзгерістер орын алып, өнім көлемі артты. Өндіріске жаңа технологиялар енгізіліп, тиімділікті арттыруға бағытталған қадамдар жасалуда. Бұл, әрине осы залда отырған, ата кәсіппен шұғылданатын өздеріңіздің еңбекқорлықтарыңыз бен жоғары кәсібиліктеріңіздің арқасында мүмкін болғанын ерекше атап өту қажет» деді аймақ басшысы.Облыс әкімі өңірдің ауыл шаруашылығы өнімдері ұсынылған көрмені тамашалады.Жалпы, биылғы жылдың 10 айының қорытындысы бойынша облыс диқандары айтарлықтай табысқа жетті. Ауыл шаруашылығы өнімдерінің жалпы көлемі 335,9 млрд теңгені құрады. Мал шаруашылығында 110,7% өсім байқалды. Шаруалар мемлекет қолдауын сезініп келеді.Биыл агроөнеркәсіп кешенін субсидиялауға 17,5 млрд теңге бөлініп, 2 мыңнан астам ауыл шаруашылығы тауар өндірушілерін қолдауға мүмкіндік туды.«Мал шаруашылығы саласындағы 10 айдың қорытындысы бойынша тірі салмақтағы барлық түрдегі ет және сүт өндірісінің өсуі тиісінше 102,8% және 102,6% құрады», - деді форумда облыстық Ауыл шаруашылығы басқармасының басшысы Ертай Қуанбаев.Форум барысында облыстың ауыл шаруашылығы саласының үздік қызметкерлері мемлекеттік наградалармен марапатталды. Еңбегімен ерекше көзге түскендерге «Құрмет», III дәрежелі «Еңбек даңқы» ордендері, «Ерен еңбегі үшін» медалі, сондай-ақ облыс басшылығы атынан Құрмет грамоталары мен Алғыс хаттар табысталды .Қазақстан Республикасы Президентінің Жарлығына сәйкес марапатталған:ҚР Президентінің Жарлығымен «Құрмет» ордені, Кусагова Сәуле Хасенқызы - «Атасу» шаруа қожалығының жетекшісі, Аягөз ауданы.«Құрмет» ордені, Ықыбаев Қадырбек Елубайұлы - «Ықыбай» шаруа қожалығының жетекшісі, Ақсуат ауданы.III дәрежелі «Еңбек Даңқы» ордені, Андрейцев Александр Григорьевич – «Труд» шаруа қожалығының механизаторы, Бородулиха ауданы.III дәрежелі «Еңбек Даңқы» ордені, Жұматай Сағдат Зақратұлы – «Дінмұхамед» шаруа қожалығының жылқышысы, Абай ауданы.«Ерен еңбегі үшін» медалі, Ақылбаев Ерлан Құмарбекович – «Елім-ай Көкпекті» жауапкершілігі шектеулі серіктестігінің механизаторы, Көкпекті ауданы.«Еңбек ардагері» медалімен, «Ауыл шаруашылығы саласының үздігі» төсбелгісімен және Қазақстан Республикасы Ауыл шаруашылығы министрлігінің Құрмет грамоталарымен марапатталғандар:«Еңбек ардагері» медалі, Майер Владимир Александрович - «Витязь» шаруа қожалығының жетекшісі, Бородулиха ауданы.«Еңбек ардагері» медалі, Ахмадиев Толеукан Каукенович - «Салтанат» шаруа қожалығының жетекшісі, Көкпекті ауданы.«Ауыл шаруашылығы саласының үздігі» төсбелгісі, Жоламанов Нұрлан Тоқанұлы - жеке кәсіпкер, Аягөз ауданы.«Ауыл шаруашылығы саласының үздігі» төсбелгісі, Жигитекова Нурбану Касеновна – «Салима» шаруа қожалығының жетекшісі, Жарма ауданы.«Ауыл шаруашылығы саласының үздігі» төсбелгісі, Турабаев Шоқан Кереуетович - «Жандос» шаруа қожалығының жетекшісі, Мақаншы ауданы.«Ауыл шаруашылығы саласының үздігі» төс белгісі, Ықыласов Айдын Закарияулы - «Ықылас» шаруа қожалығының жетекшісі, Үржар ауданы.Ауыл шаруашылығы саласының үздігі» төс белгісі, Тезеков Елік Ақантайұлы - «Ақантай» шаруа қожалығының жетекшісі, Жарма ауданы.Құрмет грамотасы, Понкратова Татьяна Владимировна – «Qazaq Astyq Group» жауапкершілігі шектеулі серіктестігінің өндіріс жетекшісі, Семей қаласы.Құрмет грамотасы, Левченко Павел Евгеньевич - «Светик» шаруа қожалығының жетекшісі, Үржар ауданы.Құрмет грамотасы, Берикболов Алибек Акирбаевич - «Ағайындар» шаруа қожалығының жетекшісі, Жарма ауданы.Абай облысы әкімінің Құрмет грамоталарымен және Алғыс хаттарымен марапатталғандар:Абай облысының әкімінің Құрмет грамотасы, Паязитова Екатерина Николаевна – жеке кәсіпкер, Семей қаласы.Абай облысы әкімінің алғыс хаты, Полюга Николай Владимирович - «Шығыс Қазақстан ұн-құрама жем комбинаты» акционерлік қоғамының бас инженері, Семей қаласы.Абай облысы әкімінің алғыс хаты, Куркембаев Арман Римбекович - «Шаған» шаруа қожалығының жетекшісі, Абай ауданы.Абай облысы әкімінің алғыс хаты, Хамзаев Ержан Мақсұтханұлы - «Абылай» шаруа қожалығының жетекшісі, Ақсуат ауданы.Абай облысы әкімінің алғыс хаты, Карменов Жаркынбек Хасенович – «Кенжехан» шаруа қожалығының жұмысшысы, Аягөз ауданы.Абай облысы әкімінің алғыс хаты, Янке Александр Рихардович - «BA Agro Group» жауапкершілігі шектеулі серіктестігінің жетекшісі, Бесқарағай ауданы.Абай облысы әкімінің алғыс хаты, Донов Александр Яковлевич - «Лазарев и К» жауапкершілігі шектеулі серіктестігінің механизаторы, Бородулиха ауданы.Абай облысы әкімінің алғыс хаты, Аукенов Болат Майжанұлы - «Майжан» жауапкершілігі шектеулі серіктестігінің жетекшісі, Жаңасемей ауданы.Абай облысы әкімінің алғыс хаты, Нургалиев Кабдужалел Кездыкбаевич - «Алғабас» шаруа қожалығының жетекшісі, Жарма ауданы.Абай облысы әкімінің алғыс хаты, Кенжебаев Кайрат Кумарович - жеке кәсіпкер, Көкпекті ауданы.Абай облысы әкімінің алғыс хаты, Касенгазин Бағдат Габбасович - «Айдын-Шалқар» шаруа қожалығының жетекшісі, Үржар ауданы.Абай облысы әкімінің алғыс хаты, Нарынов Асқар Толемешович - «Толемиш» шаруа қожалығының жетекшісі, Мақаншы ауданы.Ақпарат көзі : https://www.gov.kz/memleket/entities/abay/press/news/details/889050

Жұмыс сапары аясында облыс әкімінің орынбасары Жасұлан Сәрсебаев басқарма басшыларымен бірге Курчатов қаласына барды. Сапар барысында делегация қаладағы әлеуметтік маңызы бар нысандардың жағдайымен және құрылыс жұмысының барысымен танысты.«Берег» демалыс орталығы іссапардың алғашқы нысанының бірі болды. Мұнда ас үй, душ кабиналары мен үйлер жөндеуді қажет етеді. Алдағы уақытта үйлердің беріктігін арттыру үшін ылғалдан қорғайтын материалмен қаптап, оқшаулау жоспарлануда.Делегация аумағы 485,3 шаршы метрді құрайтын қалалық бассейнді аралап көрді. Демеушілер қаражатына салынған нысанның желдету жүйесін жөндеу қажет. Жобалық-сметалық құжаттамасы әзірленіп, бюджеттік өтінім 2025 жылға арналған жоспарға енгізілген. 120 орындық балабақша мектепке дейінгі білім берудің қолжетімділігін арттырудағы маңызды қадам болды. Қайта жаңғырту жұмысы аяқталғаннан кейін нысан осы жылдың үшінші тоқсанында пайдалануға берілді. Дегенмен, мәселе әлі толық шешілген жоқ, осы кезеңде қосымша жұмыс орындары ашылмаған. Жұмыс сапары барысында балабақшаны іске қосуға байланысты мәселелерді шешу қарастырылды.Делегация мүшелері 1971 жылдан бері жұмыс істеп келе жатқан Курчатов балалар мен жасөспірімдер спорт мектебіне де барды. Мектеп ғимаратының ауданы 1768 шаршы метрді құрайды. Төрт спорт залы бар, онда 17 жаттықтырушы жұмыс істейді. Мұнда көптеген жас спортшылар жаттығады. Жасөспірімдер спорт мектебі өскелең ұрпақты тәрбиелеуде, салауатты өмір салтын насихаттауда және Қазақстанды халықаралық аренада таныта алатын жоғары деңгейдегі спортшыларды даярлауда басты рөл атқарады. Спорт мектебінің жұмысы балалар мен жасөспірімдерді жан-жақты дамытуға, олардың денсаулығын нығайтуға және болашақта спорттағы жетістіктерге дайындауға бағытталған.Жұмыс сапарының нәтижесінде Курчатов қаласының дамып жатқаны, бірақ инфрақұрылымды жақсарту үшін қосымша инвестиция қажет екені айтылды. Әкім орынбасары Жасұлан Сәрсебаев басқарма басшыларына халықтың өмір сүру сапасын арттыру және өңірдің дамуын қамтамасыз ету мақсатында қолдау көрсетуді тапсырды.Ақпарат көзі : https://www.gov.kz/memleket/entities/abay/press/news/details/889051

Алматыда Almaty creative орталығында Мәдениет және ақпарат вице-министрі Евгений Кочетовтың креаторлармен кездесуі өтті. Оған режиссерлер мен продюсерлер, суретшілер қатысты.Кездесуде креативті индустрия саласындағы өзекті мәселелер талқыланды. Оның ішінде заңнамалық бастамалар, инфрақұрылымды дамыту, қазақстандық креативті өнімдер импорты сөз етілді.«Шығармашылық мамандарды қолдау – болашаққа жасалған инвестиция. Креативті индустрия бірегей өнім жасап, мәдени әлеуетті нығайта отырып, жаңа экономиканы қалыптастырады», – деді Almaty creative директорының міндетін уақытша атқарушы Бақыт Елубаева.Сондай-ақ кездесу аясында креаторларға креативті индустрияларды дамытуға қосқан үлесі үшін ҚР Мәдениет және ақпарат министрлігінің «Құрмет грамотасы» табысталды.«Креативті экономика саласындағы зерттеулер Қазақстандағы осы секторды дамыту үшін өте маңызды. 7 жылдан астам уақыт бойы әріптестеріммен бірге сапалы қолданбалы зерттеулер жасауға тырысып келеміз. Бұл грамота біздің жұмысымыздың министрлік тарапынан бағаланғанын растайды және бұл мен үшін өте маңызды», – деді Нархоз Университетінің креативті экономика жобаларының жетекшісі Дана Шаяхмет.Айта кетейік, бүгінде Алматы Қазақстандағы креативті индустриялардың орталығы. Мұнда елдегі креативті индустрия субъектілерінің үштен бірі тіркелген. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/889054

Мемлекет басшысы Франц Кафка атындағы халықаралық Алтын медаль сыйлығының лауреаты, қазақ руханиятының аса көрнекті өкілі, белгілі ақын Шөмішбай Сариевтің шығармашылығына арналған кешке барды.Концертте қазақстандық эстрада жұлдыздары өнер көрсетіп, эстрадалық-симфониялық оркестрдің сүйемелдеуімен ақынның «Айналдым сенен, Атамекен-ай», «Сәлем саған, туған ел», «Аяулым», «Домбыра туралы баллада», «Өкінбе сен», «Өмір-өзен», «Сағындым сағым жылдар», «Дос керек», «Сарыарқа» және тағы басқа өлеңдеріне жазылған, халық сүйіспеншілігіне бөленген әндер орындалды. АқордаАқпарат көзі : https://www.gov.kz/memleket/entities/mam/press/news/details/889057

«Астана Опера» театрында ұлы ақын, ағартушы, композитор, философ, қоғам қайраткері Абай Құнанбайұлының шығармашылығына арналған «Толық адам. Ой толғау. Хакім Абай» монооперасның премьерасы өтті.Шығарманың авторы және орындаушысы – Қазақстанның халық әртісі, ҚР Мемлекеттік сыйлығының лауреаты Шахимардан Әбілов дарынды пианист, халықаралық байқаулардың лауреаты Әлияр Өтетілеумен бірге өнер көрсетті.Жиналған қауым Абайдың «Көзімнің қарасы», «Сегіз аяқ», «Бойы бұлғаң» және басқа да танымал әндерін тыңдай алды. Ал, «Астана Опера» хор студиясының жас әртістері Шахимардан Әбіловпен бірге «Желсіз түнде жарық ай» және «Айттым сәлем Қаламқас» әндерін орындады. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/889061

Облыс әкімі Дастан Рыспеков жұмыс сапарымен Ұлытау ауданында болды. Өңір басшысы алдымен аудан орталығында орнатылған кәріз тазарту қондырғысының қазіргі жағдайымен танысып, нысанды жыл соңына дейін қабылдауды тапсырды. Абай көшесінде салынып жатқан 36 пәтерлі үш қабатты үйдің құрылысы да облыс әкімінің назарынан тыс қалмады. Өңір басшысына баспананың желтоқсанның соңына дейін аяқталатыны айтылды. Сонымен қатар Ұлытау облысының әкімі ауданда құрылысы жүріп жатқан аурухана мен емханадағы жұмыстарды бақылады. Өңір басшысы нысанға кадрлар тартуды және қызмет етуге келетін мамандарға баспана мәселесін қазірден шешу міндетін жүктеді. Сонымен қатар өңір басшысы Қарсақбайдағы балалар мен жасөспірімдер спорт мектебінің, биыл жаңартылып-жабдықталған Агротехникалық колледждің, металлургиялық зауыттың жағдайымен танысып, олардың жұмыс тиімділігін арттыру бойынша бірқатар ұсыныс пен тапсырма берді. Облыс әкімі Жезді кентіндегі жаяу жүргіншілерге арналған көпірдің жағдайын бақылап, оны тез арада қалыпқа келтіру бойынша міндеттемелер жүктеді. Сондай-ақ өңір басшысы сапар аясында №6 тірек мектебінің педагогикалық құрамымен және оқушыларымен жүздесіп, білім ошағының асханасын бақылады. Кенттегі құрылысы ұзаққа созылған денешынықтыру және сауықтыру кешеніндегі жұмыстар да облыс әкімінің сапары аясында қадағаланды. Өңір басшысына нысанның жыл соңына дейін толық аяқталатыны айтылды. Облыс әкімінің жұмыс сапары барысында Ұлытау ауданының тұрғыны Таңшолпан Зибаденова пәтерінің жылу сапасына қатысты мәселесін жеткізді. Өңір басшысы өз кезегінде азаматтың өтінішін заң шеңберінде шешу жолдарын қарастыруды тапсырды.Ақпарат көзі : https://www.gov.kz/memleket/entities/ulytau/press/news/details/889046

Ақмола облысының әкімі Марат Ахметжанов жұмыс сапары барысында Жарқайың ауданына барып, әлеуметтік осал топтарға арнап сатып алынатын пәтерлерді қарап шықты.Еске сала кетейік, Мемлекет басшысының тапсырмасы бойынша әлеуметтік осал топтағы азаматтарды баспанамен қамтамасыз ету мақсатында тұрғын үй сатып алудың жаңа тетігі енгізілді. Пәтерлерді сатып алуда олардың жайлылығы мен инфрақұрылымына ерекше көңіл бөлінеді.«Жастар» шағын ауданында 80 пәтерлі тұрғын үйдің қайта жөндеу жұмыстары аяқталып келеді. Бұл жоба «Мега Строй групп» серіктестігімен жүзеге асырылуда. Компания директоры Абзал Орынғали қазіргі таңда ғимараттың ішкі әрлеу жұмыстары жүргізіліп жатқанын хабарлады. Құрылыс алаңында 40-қа жуық жұмысшы еңбек етуде. Тұрғын үйдегі жұмыстар белгіленген кестеге сәйкес жүріп жатыр, ал пәтерлер әрленіп тапсырылады.Нысанды аралау барысында облыс әкімі құрылыс жұмыстарының сапасына ерекше назар аударды.«Мерзім мен сапа бір-бірімен тығыз байланысты болуы керек. Құрылыс пен әрлеудің әр кезеңін мұқият тексеру қажет, сонда тұрғындар көшіп кіргеннен кейін кемшіліктерге тап болмайды. Атқарылған жұмыстың сапасына мердігер жауапты», – деп атап өтті Марат Ахметжанов.Сондай-ақ, өңір басшысы Пригородное ауылындағы Дабыловтар отбасына берілген жаңа баспанаға барды. Ауыл тұрғындарына бұл үй су тасқыны себебінен зақымданған апатты жағдайдағы үйдің орнына берілді. Жалпы «Қазақстан халқына» қорының қаражаты есебінен ауылда 15 екі пәтерлі тұрғын үй салынған.Ақпарат көзі : https://www.gov.kz/memleket/entities/aqmola/press/news/details/889043

Абай облысының әкімі Нұрлан Ұранхаев азаматтарды жеке қабылдауын өткізді. Тұрғындар жұмыспен қамту, әлеуметтік қорғау және тұрғын үйге қатысты мәселелерді көтерді.Олардың әрбір өтініші мұқият тыңдалып, түсіндіру жұмысы жүргізілді. Қабылдау нәтижесінде аймақ басшысы аудан әкімдері мен тиісті басқарма басшыларына мәселелерді жедел шешу жөнінде нақты тапсырмалар берді.«Тұрғындардың мәселесін шешуге көмектесу – біздің басты міндетіміз. Біз олардың нақты қолдауды сезініп, өзгерістерді көруі үшін қолдан келгеннің бәрін жасаймыз», – деді Нұрлан Ұранхаев.Кездесуде тұрғын үймен қамтамасыз ету мәселесіне ерекше назар аударылды.«Біз бұл мәселенің әрбір отбасы үшін қаншалықты маңызды екенін түсінеміз. Мұқтаж жандар үшін баспананың қолжетімділігін арттыру және оны жүзеге асыруды жеделдету жөнінде шаралар қабылданады. Үй кезегі баспаналардың салынып, пайдалануға берілуіне сай алға жылжитын болады», - деді әкім.Қазіргі уақытта жалпы ауданы 246,9 мың шаршы метрді құрайтын 39 көппәтерлі және жеке тұрғын үй салынуда, 2100 отбасы баспанамен қамтамасыз етіледі. Алдағы үш жылда тағы 148 көпқабатты тұрғын үйді пайдалануға беру жоспарлануда. Бұл 6,8 мың отбасына жеке баспана сатып алуға мүмкіндік береді.Ақпарат көзі : https://www.gov.kz/memleket/entities/abay/press/news/details/889049

Мемлекеттік сатып алу – жаңашылдықтарды, озық технологиялар мен отандық өндірісті ілгерілетуге ықпал ететін тиімді тетік. Осыған орай ҚР Қаржы министрлігі өңірлерде «Мемлекеттік сатып алу туралы» Заңдағы негізгі өзгерістерді түсіндіруге арналған бизнес өкілдерімен, мемлекеттік сектормен және азаматтық қоғаммен өкілдерімен кездесулер өткізуді жалғастырып келеді.Бұл жолы кезекті кездесу Өскеменде өткізіліп, Қаржы вице-министрі Дәурен Кеңбейл мен Шығыс Қазақстан облысы әкімінің орынбасары Дархан Сапанов мемлекеттік сатып алу арқылы отандық тауар өндірушілерді қолдау түрлері туралы айтып берді. Іс-шараға Шығыс Қазақстан мен Абай облыстарының бизнес қауымдастығы, сондай-ақ мемлекеттік органдардың, бюджеттік ұйымдардың, ШОБ пен «Атамекен» ҰКП өңірлік филиалының өкілдері қатысты.Дәурен Маратұлы айтқандай, Мемлекет басшысы Қазақстан халқына Жолдауында отандық бизнестің сапалы дамуын ынталандырып, қолдауды тапсырған болатын. Осы тұрғыдан алғанда «Мемлекеттік сатып алу туралы» Заң аталған міндетті орындаудағы маңызды құрал болып саналады.«Мемлекеттік сатып алудың ашық және жақсы ұйымдастырылған жүйесі процестің барлық мүдделі тарабына, оның ішінде мемлекеттік секторға, бизнес пен азаматтарға тиімді. Өйткені бұл бәсекелестіктің артуына және көрсетілетін қызметтер мен тауарлардың сапасын жақсартуда септігі зор. Мысалы, сатып алуға қатысушылардың біліктілігін арттыру үшін тиісті беделі бар өндірушілер арасында сатып алуды жүзеге асыру ұсынылады. Өндіруші туралы ақпарат түрлі дерекқорларды пайдалана отырып қалыптастырылады. Бұл қызмет көрсетушілерді автоматты түрде таңдауға көшуге мүмкіндік береді», деді Қаржы вице-министрі.Бұдан басқа отандық тауар өндірушілерді қолдау мақсатында Қаржы министрлігі тек шағын және орта кәсіпкерлік субъектілерінен сатып алынатын тауарлардың, жұмыстар мен көрсетілетін қызметтердің жекелеген тізбесін бекітті.Заңның бірнеше бөлімі сатып алу процедурасын жеңілдетуге бағытталған, бұл оларды қысқа мерзімде өткізуге мүмкіндік береді. Бұдан бөлек тапсырыс берушілердің жоғары талаптарды белгілеу фактілерін болдырмау мақсатында қолданыстағы камералды бақылауды сақтау жоспарланған. Бұл ретте уәкілетті орган тарапынан сатып алу қорытындыларының күшін жою құқығы алынып тасталғанын айта кетейік. Мұндай кездесулер министрліктің іскер ортамен өзара іс-қимылды нығайту мен барлық мүдделі тарап үшін қолжетімді ақпаратты қамтамасыз ету жөніндегі стратегиясының маңызды бөлігі болып саналады. Ведомство Қазақстан экономикасын дамыта отырып, мемлекеттік сатып алу жүйесінің тиімділігін арттыру мен өзекті мәселелерді бірлесіп шешу үшін кәсіпкерлермен, ірі бизнес өкілдерімен және қоғамдық бірлестіктермен жүйелі диалог орнатуды жалғастырып келеді.Іс-шарадан кейін Д.Кеңбейл екі кәсіпорынға аялдады: Өскемен өнеркәсіп арматура зауыты мен «Рауан» тігін компаниясы.Өскемен өнеркәсіп арматура зауыты (ӨӨАЗ) – мұнай және газ құбырлары, химия және металлургия кәсіпорындары, энергетика кешені және ТКШ кәсіпорындарына, сондай-ақ мұнай саласына арналған жабдықтар мен құбыр арматурасын өндірумен айналысады. Зауыттың жобалық қуаты жылына 1834 тонна дайын өнім шығаруға қауқарлы. Кәсіпорын Қазақстанның көмірсутегі секторының ірі компанияларын: «Өзенмұнайгаз» АҚ, «Қазгермұнай» БК ЖШС «Ембімұнайгаз» АҚ, «Маңғыстаумұнайгаз» АҚ, «ҚазТрансОйл» АҚ, «СНПС-Ақтөбемұнайгаз» АҚ, «Қаражанбасмұнай» АҚ, «Қарашығанақ Петролиум Оперейтинг Б. В.» ЗТ АҚ, «МұнайТас Солтүстік-Батыс құбыр компаниясы» ЖШС, «Интергаз Орталық Азия» АҚ және басқалар ұйымдарды жабдықтармен қамтамасыз етіп келеді. «Рауан» ӨКК» ЖШС – арнайы киім тігетін кәсіпорын, сондай-ақ Қазақстандағы ерекше балаларға арналған киім шығаратын жалғыз өндіруші болып саналады. Мұнда церебралды сал ауруы бар балаларға белсенді өмір салтын жүргізуге көмектесетін бейімделу заттары жасалып, тігіледі. Өнімді жасау кезінде қолданылатын барлық зат ыңғайлы және ерекше балалардың қажеттіліктерін ескереді. Өскемен титан-магний комбинаты «Рауан» ӨКК арнайы киімдерін көтерме бағамен алатын тапсырыс берушілерінің бірі. Қазақстандағы тағы бір ірі кәсіпорны үшін мұнда арнайы киім топтамасы жасалып дайындалған.Ақпарат көзі : https://www.gov.kz/memleket/entities/minfin/press/news/details/888766

Загреб, 2024 жылғы 22 қараша – Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Хорватияға ресми сапарының екінші күні Хорватия Республикасының Премьер-министрі Андрей Пленковичтің қабылдауында болды.Қазақстан Президенті Қасым-Жомарт Тоқаевтың 2024 жылғы қарашада Бакуде СОР29 алаңында өткен Хорватия үкіметінің басшысымен екіжақты келіссөздерін жалғастыра отырып, тараптар саяси диалогты нығайтуға және екі ел арасындағы іскерлік байланыстарды кеңейтуге бағытталған алдағы қадамдарды талқылады.Атап айтқанда, Министр сұхбаттасын Мемлекет басшысының бастамасымен Қазақстандағы институционалдық саяси және әлеуметтік-экономикалық реформалармен таныстырды. Іске асырылып жатқан шаралар елімізде бизнесті ашуға және жүргізуге қолайлы жағдай жасауға ықпал ететіні аталып өтті.М. Нұртілеу хорват компанияларды Қазақстанмен сауда-инвестициялық әріптестікті орнатуға және дамытуға шақырып, энергетика, көлік және логистика, ауыл шаруашылығы, ақпараттық технологиялар, білім беру, туризм сияқты перспективалы бағыттарды атап өтті.Осы тұрғыда тараптар іскерлік байланыстарды арттыруға Экономикалық ынтымақтастық жөніндегі қазақ-хорват үкіметаралық комиссиясының және «Қазақстан-Хорватия» Іскерлік кеңесінің жұмысы ықпал етуі тиіс деген ортақ пікір білдірді, олардың келесі отырыстары Астанада 2025 жылы жоспарланып отыр.Өз кезегінде А. Пленкович сенім мен өзара қолдауға негізделген Астана мен Загреб арасындағы саяси диалог пен өзара тиімді әріптестікті нығайтуға деген өзара ұмтылысын растады.Кездесу қорытындысы бойынша тараптар екі ел арасындағы сындарлы өзара іс-қимылды, оның ішінде аса жоғары және жоғары деңгейдегі сапарларды ұйымдастыру және өткізу арқылы жалғастыру уағдаластығына қол жеткізді.Ақпарат көзі : https://www.gov.kz/memleket/entities/mfa/press/news/details/889037

Астанада Қазақстан велоспорт федерациясының дәстүрлі жылдық конгресі өтті. Бұл маңызды жиында федерация 2024 жылдың қорытындыларын шығарып, үздік спортшылар мен жаттықтырушыларды марапаттап, сондай-ақ велоспорт бойынша еліміздің үздік өңірін анықтады, деп хабарлайды елорда әкімдігінің ресми сайты.Спорттық-бұқаралық іс-шаралар және республикалық пен халықаралық жарыстардағы жетістіктер негізінде Астана қаласы «2024 жылғы үздік өңір» атағына лайық деп танылды. Марапатты елордалық Дене шынықтыру және спорт басқармасының бөлім басшысы Азамат Ағзамов қабылдады.«Бұл – біз үшін зор мақтаныш әрі маңызды марапат. Осындай жоғары бағаға ие болғанымызға қуаныштымыз. Бұл жетістік – біздің ұжымның үйлесімді жұмысының, әріптестеріміздің қолдауының және ортақ мақсаттарымызды бөлісетін жанашыр жандардың арқасы. Бұл табыс болашақта қоғам игілігіне бағытталған жаңа жобалар мен бастамаларға серпін беретініне сенеміз», – деді Азамат Ағзамов өз сөзінде.Сондай-ақ, осы іс-шарада №6 Балалар мен жасөспірімдердің мамандандырылған Олимпиадалық резерв спорт мектебінің жаттықтырушысы Вера Риве «Үздік жаттықтырушы» атанса, ал сол мектептің спортшысы Мұрат Күйтенов «Жылдың үздік спортшысы» атағын жеңіп алды.Бұдан бөлек, ардагер жаттықтырушылар Александр Кочетков пен Андрей Скляров федерацияның арнайы марапаттарымен марапатталды. Ал Владислав Горбунов велосипед спортын дамытуға қосқан үлесі үшін алғыс хатқа ие болды.Айта кетейік, 2024 жылы Астананың велоспорт мектебі қалалық Дене шынықтыру және спорт басқармасымен, сондай-ақ Қазақстан велоспорт федерациясымен бірлесіп, 100-ден астам бұқаралық іс-шара ұйымдастырды. Мектеп спортшылары республикалық және халықаралық деңгейде 300-ден астам медаль жеңіп алып, елорда спортының мәртебесін арттырды.Ақпарат көзі : https://www.gov.kz/memleket/entities/astana/press/news/details/888975