Облыс әкімі Нұрлыбек Нәлібаевтың қатысуымен Парламент Сенаты Қаржы және бюджет комитетінің көшпелі отырысы өтіп, онда жаңартылған заңнама талаптарына сәйкес бюджет процесін іске асыру мәселелері талқыланды.Отырысқа Парламент Сенаты Қаржы және бюджет комитетінің төрағасы Сұлтанбек Мәкежанов, Ұлттық экономика министрлігі бюджет саясаты департаментінің директоры Гульором Муллабаева, Қаржы министрлігі бюджеттік жоспарлау департаментінің директоры Сейілхан Исмағұлов қатысты.Аймақ басшысы Президент тапсырмасында нақтыланған бюджет қаражатын ұтымды жоспарлау мен тиімді игеру міндетін атап өтті.«Мемлекет басшымыз Қасым-Жомарт Кемелұлы бюджет қаржысын тиімді жоспарлау, мақсатқа сай бөлу мен игеру жөнінде міндеттер жүктегені белгілі. Облыс бюджетінен әлеуметтік салаға 2023-2025 жылдары бөлінген қаражаттың мақсатты жұмсалуына жүргізілген зерделеу, бақылау шараларының нәтижесінде 100 млрд. теңгеге жуық қаржы үнемделді. Оның ішінде білім саласынан 58 млрд. 600 млн. теңге, «Арт спорт» бағдарламасынан 13 млрд. 100 млн. теңге, әлеуметтік қорғау саласынан 8 млрд. 200 млн. теңге үнемделіп, бюджет қазынасында қалды.Жаңадан жүзеге асырылатын инвестициялық жобаларға құжаттама әзірлеуге демеушілер есебінен 7 млрд. теңге бөлінді. Барлық 7 ауданда «Руханият орталықтарын» салып, бұған дейін әр жерде орналасқан мекемелерді бір орталыққа біріктірдік. Бұл ғимараттарды ұстап тұру шығындарын қысқартуға жол ашты. Мектептерге қосымша ғимараттар салу арқылы үш ауысымдық оқу мәселесін түбегейлі шешіп, жаңа мектеп салуға қажеттіліктің алдын алдық. Осылайша, бюджетке түсетін салмақ азайтылып, 13 млрд. 100 млн. теңге оңтайландырылды», – деді Нұрлыбек Машбекұлы.Мамандардың айтуынша, жаңа үшжылдық кезеңге арналған жалпы сипаттағы трансферттер Үкіметтің алдына қойылған негізгі міндеттерді шешуге, оның ішінде өңірлердің қаржылық дербестігін кеңейтуге, халық үшін әлеуметтік игіліктер мен мемлекеттік қызметтердің қолжетімділігін теңестіруге, сондай-ақ өңірлер арасындағы инфрақұрылымдық теңсіздіктерді азайтуға ықпал етеді.Жиынға қатысушылар бюджет процесін іске асыру барысында туындайтын өзекті мәселелерді, сондай-ақ елімізде қолданыстағы трансферттік тетіктерді талқылап, туындаған сұрақтарға жауап алды.Ақпарат көзі : https://www.gov.kz/memleket/entities/kyzylorda/press/news/details/1084984?lang=kk

Өнер орталығында «Қорқыт және Ұлы дала сазы» халықаралық фольклорлық-музыкалық өнер фестивалінің гала-концерті өтті. Фестиваль Қызылорда облысы әкімдігінің қолдауымен, халықаралық «Түркі мәдениеті және мұрасы» қорымен бірлесіп ұйымдастырылған.Оған «Түркі мәдениеті және мұрасы» қорының президенті Ақтоты Райымқұлова, Түркия, Әзербайжан, Қырғызстан, Өзбекстан және отандық белгілі ғалымдар, зерттеушілер, мәдениет пен өнер майталмандары, зиялы қауым өкілдері, қоғам қайраткерлері қатысты.Аймақ басшысы Нұрлыбек Нәлібаев фестивальдің түркі халықтарының мәдени байланысын нығайтудағы және ұлттық өнерді дәріптеудегі маңызын атап өтіп, бауырлас елдерден келген қонақтарға алғысын білдірді.«Президентіміз Қасым-Жомарт Кемелұлы күні кеше Әзербайжан Республикасының Габала қаласында өткен Түркі мемлекеттері ұйымының 12-ші саммитінде: «Түбі бір түркі жұртының тарихы тамырлас, халықтарымызға ортақ сан ғасырлық шежіреміз бар деп үнемі айтып жатырмыз. Мұның бәрі – берекелі бірлігіміз бен мәңгілік ынтымағымыздың алтын арқауы», – деген болатын.Бауырлас халықтардың рухын көтеру, фольклорлық-музыкалық өнерін дәріптеу, өзара мәдени байланысын нығайтуда фестивальдің маңызы зор.Қорқыт баба мұраларының Біріккен Ұлттар Ұйымы жанындағы ЮНЕСКО-ның ғаламдық материалдық емес мұралар тізіміне енгізілуі – жылдар бойы бірлесіп атқарған жұмысымыздың нәтижелі жемісі.Күллі түркі дүниесінің назарын өзіне аударған, кең даланы жырға бөлеп, нұрға толтырған бұл дәстүрлі өнер мерекесі – ұлттық рухымыздың, түркі жұртының мәңгілік мұрасы мен мәдени сабақтастығының жарқын көрінісі. Түркі халықтарының бірлігі мен рухани тұтастығы нығая берсін! Тәуелсіз еліміздің тұғыры биік, егемендігі еңселі болғай!», – деді Нұрлыбек Машбекұлы.«Түркі мәдениеті және мұрасы» қорының президенті Ақтоты Райымқұлова түбі бір түркі туыстардың басын қосқан халықаралық іс-шараны жоғары деңгейде ұйымдастырған Қызылорда облысының басшылығына алғысын айтты. Концертте әйгілі жыраулар мен жыршылардың қайталанбас мақамдарын бүгінге жеткізген, ұлттық өнеріміздің шынайы насихатшыларына айналған Сыр сүлейлерінің ізбасарлары Елмұра Жаңаберген, Ұлжан Байбосынова, Ақмарал Ноғайбаева, Шолпан Бимбетова, Майра Сәрсенбаева, Серік Жақсығұлов, Күнсұлу Түрікпен, Бисембек Төлеубай және Жетісу жыр мектебінің түлегі Нұржан Жанпейісов, Арқа мектебінің өкілі Біржан Есжанов, Салтанат Ерсұлтан жырдан шашу шашты.Ресей Федерациясының Алтай Республикасынан келген Урмат Ынтаев, Айдын Орсулов табиғатқа, ата-баба рухына және ерлік жырларына негізделген көшпелі халықтың әуені өз болмысын жоғалтпағанын тағы бір көрсетті. Көмеймен айту өнері мен топшур, қобыз сияқты көне аспаптардың үні Алтай халықтарында әлі күнге дейін сақталған. Бұл әуендер таудың желін, өзен суының сылдырын және малшы өмірінің тынысын бейнелейді.Әзербайжаннан келген «Карабах» мұғамшылар тобы ұлттық нақыштағы күрделі әуен өрнектерін орындап, көрерменді ерекше әсерге бөледі. Қырғыз елінің қомызшылар ансамблі мен Самат Кочербаев «Ақақ» шығармасын орындап, түркі халықтарының көне саз мұрасын жаңғыртты. Өзбекстанның «Шашмақом» ансамблі мен бишілер тобы ұлттық өнердің үздік үлгісін сахнаға шығарды. Алматы қаласынан келген «Арқайым» нео-этно фольклорлық ансамблі «Тенгир Азун» шығармасын орындап, ескі сарынды заманауи тәсілмен үйлестірді.Көне түріктердің көмеймен ән салу дәстүрі Тыва халықтарында жақсы сақталған. Олар көмеймен ән салуды «хоомей» деп атайды. Ықылым заманның мұра өнерін сақтап қалған халықтың «Эш» фольклорлық дуэті де бүгінгі фестивальдің құрметті қонағы болды. Түркия Республикасынан келген Синан Барыш, Камбер Нардың өнеріне көрермен ерекше қошемет көрсетті.Халықаралық фестиваль бүгінгі түркі мәдениеті мен музыкасы ортақ тарих пен рухани тамырдан нәр алғанын, туыс халықтардың әндері мен әуендері бір-бірімен үндесіп, бауырлас елдердің бірлігін күшейтетінін тағы бір дәлелдеді.Ақпарат көзі : https://www.gov.kz/memleket/entities/kyzylorda/press/news/details/1085079?lang=kk

Ақтау қаласының ең ірі сауда және ойын-сауық орталықтарының бірінде Маңғыстау облысындағы қорғаныс істері жөніндегі департаментінің бастамасымен әскери қызметке қабылдау бойынша бос орындар жәрмеңкесі өтті.Іс-шараның мақсаты – қала тұрғындарын әскери бөлімдердегі бос лауазымдар жөнінде хабардар ету, оған қоса Қазақстан Республикасының Қарулы күштеріндегі мерзімді және келісімшарттық әскери қызметті насихаттау болды.Жәрмеңкеге келген ақтаулықтар гарнизон бөлімдеріндегі бос орындармен танысып, кадр қызметінің өкілдеріне өз сұрақтарын қойып, әскери қызметке өту тәртібі жайлы кеңес алды.– Іс-шара барысында қатысушылар келісімшарт негізіндегі әскери қызметтің талаптары мен артықшылықтары жайында толық ақпарат алып, мерзімді қызметтің ерекшеліктерімен танысты. Бұдан өзге жергілікті әскери басқару органдары мен кадр бөлімдерінің өкілдеріне сұрақтарын қойды, – деді Маңғыстау облысы қорғаныс істері жөніндегі департаментінің бастығы полковник Руслан Балтеміров.Жәрмеңке қорытындысы бойынша шамамен жүз адам әскери қызмет туралы толық мәлімет алды. Оның ішінде 20 адам келісімшарт бойынша, ал тағы 15 азамат мерзімді әскери қызмет өткеруге ниет білдірді.Одан бөлек, әскердегі қызметтің шарттары мен артықшылықтары көрсетілген үш жүзге жуық ақпараттық парақша таратылды.Ұйымдастырушылардың айтуынша, мұндай жәрмеңкелер желтоқсан айына дейін әр апта сайын өткізіліп тұрады. Келесі кездесулер қаладағы түрлі сауда орталықтарында және Амфитеатр алаңында өтеді.Ақпарат көзі : https://www.gov.kz/memleket/entities/mod/press/news/details/1084789?lang=kk

Алматы облысында бір өркешті мың түйеден құралған керуен ресми түрде Гиннестің рекордтар кітабына енді. Бір шақырым қашықтықты жүріп өткен керуен 20 қыркүйекте Іле ауданы, Күрті ауылдық округінің Ақши ауылында ұйымдастырылған болатын.Әлемдік жетістік сертификатын Гиннестің рекордтар кітабының өкілі Ричард-Уильям Стэннинг табыстады. Ол қазақстандық жобаның ерекшелігіне ерекше тоқталды: «Бұл – айрықша жағдай. Өзге елдерде мұндай керуендер әртүрлі адамдардың жануарларынан құралады – бірінде төрт түйе, екіншісінде екі түйе болады. Ал Қазақстанда мың түйенің бәрі бір адамның иелігінде. Бұл – рекордты шынымен де ерекше әрі бірегей етеді. Қазақстан мені таңғалдырды, енді бұл елге турист ретінде де келгім келеді», – деді ол.Алматы облысының әкімі Марат Сұлтанғазиев те бұл оқиғаның ел үшін маңызын атап өтті: «Рекордтың ресми түрде мойындалуы – біздің ұлттық рухымыз бен мәдени мұрамызға көрсетілген үлкен құрмет. Мың түйеден құралған керуен халықты біріктіріп, қазақ дәстүрінің символына айналды», – деді аймақ басшысы.Идея авторы әрі керуен иесі, «Даулет-Бекет» ЖШС директоры Сыдық Даулетов жобаны дайындауға жарты жыл уақыт кеткенін айтты: «Түйе – еркіндікке үйренген жануар. Мың түйені бірге жинау оңай болған жоқ. Бірақ мақсат пен сенім болса, мүмкін емес дүние жоқ. Алдағы уақытта шұбат фестивалін өткізуді жоспарлап отырмыз. Халыққа осындай дәстүрімізді жаңғыртатын шаралар қажет», – деді ол.Ақпарат көзі : https://www.gov.kz/memleket/entities/almobl/press/news/details/1084793?lang=kk

Радиоэлектроника және байланыс әскери-инженерлік институты Алматы қаласы Әуезов ауданының оқуды аяқтаушы түлектері мен демалыс орталықтарының тәрбиеленушілеріне ашық есік күнін өткізді.Жас қонақтар институттың оқу-материалдық базасымен, курсанттардың оқу және тұрмыс жағдайларымен танысып, оқу орнына түсу ережесі мен әскери білімнің артықшылықтары жайында жан-жақты мәлімет алды.Оқушылар кафедралар мен оқу аудиторияларын, тренажер кешендерін аралап, жоғары технологиялық әскерлердің болашақ офицерлері қалай даярланатынын өз көздерімен көрді.Оларды, әсіресе, ұшқышсыз басқарылатын аппараттармен жұмыс істеу қатты қызықтырды. Балалар ұшуларды қызыға бақылап, заманауи технологиялардың әскери салада қалай қолданылатынын білді.Институттың курсанттары оқушыларға өздерінің оқу тәжірибелерін көрсетіп, таңдаған мамандықтары, ғылыми және спорттық жетістіктері, казармадағы өмірі туралы айтып берді. Тікелей әңгіме барысында оқушылар әскери формадағы қатаңдықтың артында еңбек, тәртіп және Отанға қызмет етуге дайындық жатқанын түсінді.Экскурсия барысында әскери-спорттық эстафета ұйымдастырылып, оның қорытындысы бойынша қатысушыларға алғыс хаттар мен сыйлықтар табыс етілді.Шара жылы және символдық атмосферада аяқталды. Қатысушылар нағыз сарбаз ботқасынан дәм татты.– Әскери институттың атмосферасы ерекше әсер қалдырды. Мұнда маңызды әрі сұранысқа ие мамандықтарға үйретеді. Осында оқу қызықты әрі абыройлы екеніне сенімдімін. Экскурсиядан кейін дәл осы оқу орнына түскім келді, – деді Ғ. Мүсірепов атындағы №86 мектеп-гимназиясының оқушысы Жалғас Әбдікәрім.Осындай кездесулер әскери жоғары оқу орнында игі дәстүрге айналған. Тұрақты түрде өтетін ашық есік күндері мен үгіт-насихат шаралары болашақ талапкерлерге әскери оқу орнының өмірімен танысып, сұрақтарына жауап алып, мамандықты саналы түрде таңдауға мүмкіндік береді.Ақпарат көзі : https://www.gov.kz/memleket/entities/mod/press/news/details/1084800?lang=kk

Алматы облысының Іле ауданында Тереңкара өзенінің арнасына құрылыс және тұрмыстық қалдықтар төгілу фактілері анықталды. Бұл жағдай жергілікті билік назарынан тыс қалмады. Ащыбұлақ ауылдық округі әкімдігі заң бұзушылықты жою және жерді қалпына келтіру (рекультивациялау) бойынша материалдарды сотқа жолдауға дайындық жүргізіп жатыр.Мәселе алғаш рет 2024 жылы Ащыбұлақ ауылдық округінің әкімі Бахтияр Қасымбектің бастамасымен көтерілген болатын. Ол өзен арнасына жасалған заңсыз әрекеттерге байланысты бірнеше рет бақылаушы және экологиялық мекемелерге ресми хаттар жолдаған. Әкімнің табандылығының арқасында жағдайға бірқатар мемлекеттік органдар назар аударып, экологиялық заң бұзушылықтарға ресми баға берілді.Тексеру барысында Түймебаев ауылындағы жер телімінің иесі аумақты өз бетінше тегістеп, өзеннің табиғи арнасын ішінара жауып тастағаны анықталды. Мұндай әрекеттер өзеннің тереңдігі мен ағысын өзгертеді, ал бұл өз кезегінде экожүйеге және жергілікті тұрғындардың қауіпсіздігіне қауіп төндіреді.Ащыбұлақ округі әкімдігінің мәліметінше, жер иесі экологиялық нормаларды бұзғаны үшін бірнеше рет әкімшілік жауапкершілікке тартылған. 2025 жылы Алматы облысы бойынша экология департаментінің тексерісі нәтижесінде оған 275 мың теңге көлемінде айыппұл салынып, заң бұзушылықтарды жою туралы нұсқама берілген. Алайда бұл талап әлі күнге дейін орындалмаған.Соған қарамастан, прокуратура ауыл әкімі Бахтияр Қасымбекке де әкімшілік айыппұл салған. Қадағалау органы оны уақтылы әрекет етпеді деп таныған. Әкімнің өзі бұл шешіммен келіспей, сотқа шағымдануға ниетті. Себебі дәл оның бастамасымен бұл мәселе алғаш көтеріліп, облыстық деңгейге жеткізілген.«Табиғи аумақтардың ластану фактілері назардан тыс қалмайды. Өзен арнасын қалпына келтіру және тәртіп орнату жұмыстары жалғасып жатыр. Әкімдік тарапынан бақылау күшейтіледі», – делінген Ащыбұлақ ауылдық округі әкімінің аппаратында.Қазіргі таңда барлық құжаттар Балқаш-Алакөл бассейндік инспекциясына, Экология департаментіне және Алматы облысы бойынша жер ресурстарын басқару департаментіне жолданған.Тереңкара өзені – Кіші Алматы өзенінің сол жақ саласы, ол Қапшағай су қоймасына құяды. Ащыбұлақ ауылдық округі аумағында өзеннің ұзындығы шамамен 17 шақырым, ал су қорғау аймағының ені – 120 метр. Экологтардың айтуынша, өзен арнасына кез келген араласу табиғи тепе-теңдікке айтарлықтай зиян келтіруі мүмкін.Ақпарат көзі : https://www.gov.kz/memleket/entities/almobl/press/news/details/1084815?lang=kk

Арқалық қаласында Республика күніне орай «Ұлы дала дүбірі» атты ұлттық ат спорты ойындары басталды. Іс-шараның мақсаты – ата-бабалар мұрасын сақтау мен дәріптеу, ұлттық спорт түрлерін дамыту және жас ұрпақты патриоттық рухта тәрбиелеу.Дәстүрлі түрде өткізіліп келе жатқан бұл жарысқа Арқалық қаласы мен оған қарасты ауылдық округтердің төрт құрама командасы қатысуда. Ұйымдастыру жұмыстарына қалалық дене шынықтыру және спорт бөлімі қолдау көрсетуде.Салтанатты ашылу рәсімі мемлекеттік рәміздерге құрмет көрсетуден басталды. Қатысушылар мен көрермендер алдында қала әкімі Әмірхан Асанов сөз сөйлеп, жарыстың мәні мен маңызын атап өтті. Іс-шара барысында Арқалық қаласының құрметті азаматы, белгілі қолөнер шебері және тарихшы-өлкетанушы Шөптібай Байділдин жас спортшыларға бата берді.Ат спорты ойындары екі күнге жоспарланған. Бағдарламада көкпар, тай жарыс, құнан жарыс және аламан бәйге сынды ұлттық спорт түрлері қамтылған. Жарыс барысында көрермендер өңір шабандоздарының шеберлігін тамашалай алады.Арқалық қаласында ұлттық ат спорты сайыстары жыл сайын көктем және күз мезгілдерінде дәстүрлі түрде ұйымдастырылады. Бұл шаралар өңірде ұлттық спортты дамытуға және жастардың салауатты өмір салтын қалыптастыруға бағытталған.Ақпарат көзі : https://www.gov.kz/memleket/entities/kostanay/press/news/details/1084818?lang=kk

XII Азаматтық форум аясында ҚР Оқу-ағарту министрі Жұлдыз Сүлейменованың білім беру және балалардың құқығын қорғау саласында жұмыс істейтін қоғамдық және үкіметтік емес ұйым өкілдерімен кездесуі өтті.Жиынға Қазақстан Азаматтық альянсының президенті Бану Нұрғазиева, ҚР Мәдениет және ақпарат министрлігі Азаматтық қоғам істері комитетінің төрағасы Гүлбара Сұлтанова, сондай-ақ 170-тен астам үкіметтік емес ұйым өкілдері қатысты.Іс-шара мемлекет пен азаматтық қоғам арасындағы ынтымақтастықтың негізгі бағыттарын талқылауға арналған алаңға айналды. Қатысушылар мектепке дейінгі тәрбие, қосымша білім беру, инклюзивті орта қалыптастыру және министрлікпен өзара байланысты жетілдіру мәселелері бойынша өз ұсыныстарын жеткізді.Жұлдыз Сүлейменова балаларды қорғау, тәрбиелеу және оқыту саласындағы бастамаларды табысты іске асыру азаматтық сектордың ықпалынсыз мүмкін еместігін атап өтіп, ҮЕҰ-мен тұрақты және ашық диалог орнатуға дайын екенін атап өтті.Кездесу қорытындысы бойынша министр азаматтық қоғам өкілдерін Қоғамдық кеңес жұмысына белсенді қатысуға және білім беру жүйесін дамытуға бағытталған нақты бастамаларды бірлесе жүзеге асыруға шақырды. ҚР Мәдениет және ақпарат министрлігінің баспасөз қызметіАқпарат көзі : https://www.gov.kz/memleket/entities/mam/press/news/details/1084820?lang=kk

Тараз қаласында «Оңтүстік» өңірлік қолбасшылығының құрылғанына 25 жыл толуына арналған салтанатты іс-шара өтті.Шараға Қазақстан Республикасы Қорғаныс министрінің бірінші орынбасары – Қарулы күштердің Бас штабы бастығы генерал-лейтенант Сұлтан Камалетдинов, Қорғаныс министрінің орынбасары генерал-майор Шайх-Хасан Жазықбаев, Құрлық әскерлерінің бас қолбасшысы генерал-майор Мереке Көшекбаев, Бас штаб бастығының орынбасары генерал-майор Асан Жүсіпов және «Оңтүстік» өңірлік қолбасшылығының басшылығы, әскери қызметшілер мен Қарулы күштердің ардагерлері қатысты.Іс-шара соғыс батырлары, аңыз қолбасшылар Сағадат Нұрмағамбетов пен Бауыржан Момышұлының ескерткіштеріне гүл қою рәсімінен басталды.Жеке құрамды құттықтау барысында генерал-лейтенант Сұлтан Камалетдинов «Оңтүстік» өңірлік қолбасшылығының әскери қызметшілері антқа адалдықтың, бірліктің және жоғары кәсібиліктің үлгісі екенін атап өтті.– Жиырма бес жыл – бұл мыңдаған әскери қызметшілер мен офицерлердің қажырлы еңбегі мен жаттығу жылдары. Сіздер бүгінде мемлекеттің қауіпсіздігі мен азаматтардың тыныштығын қамтамасыз етіп, даңқты дәстүрлерді абыроймен жалғастырып келесіздер, – деді генерал-лейтенант С. Камалетдинов.Мереке аясында «Даңқ» мұражайында жаңа экспозиция ашылып, естелік стела мен болашақ әскери қызметшілерге арналған уақыт капсуласы қойылды. Бұдан басқа заманауи қару-жарақ пен әскери техниканың үлгілері көрсетіліп, штаб аумағында ағаштар отырғызылды және өнерпаз әскери қызметшілердің концерті өтті.«Оңтүстік» өңірлік қолбасшылығы 2000 жылғы 15 қыркүйекте Қазақстан Президентінің Жарлығымен құрылды. Алғашында ол Тараз қаласында штабы бар Оңтүстік әскери округ ретінде құрылған болатын. 2003 жылы округ өңірлік қолбасшылыққа айналды. Бірінші қолбасшы генерал-майор Әлихан Жарболов болды. Оның басшылығымен бөлімдерді қайта орналастыру, құрамаларды жасақтау және жаңа міндеттерге бейімдеу бағытында ауқымды жұмыс басталды.Бүгінде бірлестікті генерал-майор Ержан Ыбыраев басқарады. Оның жетекшілігімен «Оңтүстік» өңірлік қолбасшылығы жауынгерлік әлеуетін нығайтып, әскерді дайындаудың заманауи тәсілдерін дамытып келеді.Бұл әскери құралым елдің оңтүстік шекарасының сенімді қалқаны болып қала бермек. Жеке құрам әрдайым жоғары жауынгерлік дайындық пен кез келген жағдайда тапсырмаларды орындауға әзірлігін көрсетіп жүр.Ақпарат көзі : https://www.gov.kz/memleket/entities/mod/press/news/details/1084858?lang=kk

Ұлт руханиятының ұлы тұлғасы, Халық қаһарманы, әйгілі композитор, күйші әрі дирижер Нұрғиса Тілендиевтің кіндік қаны тамған ауылында демеушілердің қолдауымен еңселі стела бой көтерді. Архитектуралық тұрғыдан ерекше пішінге ие бұл ескерткіште қазақтың қасиетті домбырасы мен пәктік пен сұлулықтың символы саналатын аққу бейнеленген.Салтанатты ашылу рәсіміне Алматы облысы әкімінің орынбасары Ғани Майлыбаев қатысып, өңір тұрғындарына облыс әкімі Марат Сұлтанғазиевтің құттықтауын және алғысын жеткізді. Шараға сондай-ақ ТҮРКСОЙ Жазушылар одағының төрағасы Ұлықбек Есдәулет, облыстық ардагерлер кеңесінің төрағасы Ерболат Тұрымбетов, ауыл тұрғындары мен зиялы қауым өкілдері қатысты. Іс-шара соңында қатысушылар стела орнатылған алаңға ағаштар отырғызды.Айта кетейік, бұған дейін Алматы облысында Нұрғиса Тілендиевтің 100 жылдық мерейтойына орай ескерткіш пен мәдениет үйі ашылған болатын. Сондай-ақ өңірдің өнерпаздары мен қолөнер шеберлері ұлы композитордың мерейтойына арналған іс-шаралар аясында Пекин, Бішкек және Мәскеу қалаларында Қазақстан мәдениетін жоғары деңгейде таныстырды.Жалпы, Нұрғиса Тілендиевтің ЮНЕСКО көлемінде аталып жатқан 100 жылдық мерейтойы аясында жыл басынан бері республикалық және халықаралық деңгейдегі мәдени іс-шаралар жүйелі түрде ұйымдастырылып келеді.Ұлы тұлғаға тағзым – ұлт рухын ұлықтау!Ақпарат көзі : https://www.gov.kz/memleket/entities/almobl/press/news/details/1084665?lang=kk

Елордада Екінші дүниежүзілік соғыстағы Жеңістің 80 жылдығына орай «Астана. Жеңіс жауынгерлері» атты кітаптың тұсаукесері өтті.Іс-шараны елорда әкімдігі, қорғаныс істері жөнідегі департаменті, «Қарулы күштердің ардагерлері» республикалық қоғамдық бірлестігі және қалалық ардагерлер кеңесі бірлесіп ұйымдастырды. Оған ардагерлер мен ел тарихына есімдері енген жауынгерлердің ұрпақтары қатысты.Кітап елордалық Ардагерлер кеңесінің бастамасымен, Астана әкімдігінің қолдауымен әзірленген. Негізгі мақсаты – жерлестеріміздің ерліктерін ұрпақ жадында сақтау және жастарды аға буынның жарқын үлгісі арқылы еңбексүйгіштікке баулу.– Бүгінгі тұсаукесер – бұл әкімдік, республикалық және қалалық ардагерлер ұйымдары және қорғаныс істері жөніндегі департаментінің бірлескен жұмысының нәтижесі, – деді «Қарулы күштердің ардагерлері» республикалық қоғамдық бірлестігі төрағасының орынбасары отставкадағы генерал-майор Марат Нағұманов. – Ақмола қаласы мен Ақмола облысынан әскерге шақырылған жауынгерлер мен тыл еңбеккерлерінің ерліктері туралы бұл кітап жас ұрпақты тәрбиелеу ісінде үлкен көмек болмақ.Қалалық ардагерлер кеңесінің төрағасы Сансызбай Есіловтің айтуынша, кітап елорда мектептерінің кітапханаларына табысталады. Бұл оқушыларға ақмолалық жауынгерлердің ерлігі мен тарихтағы жарқын беттермен танысуға мүмкіндік береді.Ақпарат көзі : https://www.gov.kz/memleket/entities/mod/press/news/details/1084666?lang=kk

Қарулы күштердің жеке құрамы Мемлекет басшысының бастамасымен «Таза Қазақстан» республикалық экологиялық акциясына қатысты. Іс-шара еліміздің барлық гарнизонын біріктірді. Астанада жалпықалалық сенбілікке Қорғаныс министрлігінің, Бас штабтың, әскери оқу орындарының басшылығы мен жеке құрамы, Ақмола өңірлік гарнизонының құрамалары мен әскери бөлімдері қосылды.Әскери қызметшілер көшелерді, скверлерді және үй маңындағы аумақтарды, оған қоса әскери қызметшілер мен олардың отбасы мүшелері тұратын аудандарды абаттандырды.Негізгі жұмыстар елорда көшелерінде және әкімшілік ғимараттарға іргелес жатқан учаскелерде жүргізілді. Бас штабтың жеке құрамы Қорғаныс министрлігі ғимаратының айналасын ретке келтірді. Құрлық әскерлерінің бөлімшелері гарнизонның әскери бөлімдері мен объектілері орналасқан жерлердегі аумақтарды тазартты.Әскери қызметшілердің мұндай акцияға қатысуы Қарулы күштердің әлеуметтік жауапкершілігінің және мемлекеттік экологиялық күн тәртібін қолдаудың айқын дәлелі. Өткізілген іс-шаралар азаматтық ынтымақтастықты нығайтуға, елді мекендер мен әскери қалашықтардың экологиялық жайын жақсартуға ықпал етті.Ақпарат көзі : https://www.gov.kz/memleket/entities/mod/press/news/details/1084685?lang=kk

Бүгін облыс әкімі Нұрлыбек Нәлібаевтың қатысуымен «Қорқыт және Ұлы дала сазы» халықаралық фольклорлық-музыкалық өнер фестивалінің аясында «Қорқыт мұрасы: Түркі әлеміне ортақ эпикалық құндылықтар» атты халықаралық ғылыми-теориялық конференция өтті.Алқалы жиынға «Түркі мәдениеті және мұрасы» қорының президенті Ақтоты Райымқұлова, Түркия, Әзербайжан, Қырғызстан, Өзбекстан және отандық белгілі ғалымдар, зерттеушілер мен мәдениет майталмандары қатысты.Аймақ басшысы Президент бекіткен «Түркі әлемінің келешегі – 2040» құжаты аясында ортақ құндылықтарды дәріптеу маңызды басымдық екенін атап айтты.«Президентіміз Қасым-Жомарт Кемелұлы «Түркі әлемінің келешегі – 2040» атты құжат бекітілді. Ең бастысы, бауырлас елдердің бірлігін бекемдей түстік. Ортақ құндылықтарымызды төрткүл дүниеге таныттық. Біз бабалар өсиетін орындап, түркі елдерінің ынтымағын нығайтып келеміз. Ендігі мақсат – өзара сенім мен бауырластыққа негізделген бірлігімізді сақтап, өскелең ұрпаққа табыстау», – деген болатын.Қорқыт ата – түбі бір түркі халықтарына ортақ рухани тұлға, ел бірлігі мен мәңгілік өмір идеясының символы. Оның даналығы, мұрасы, тағылымы ғасырлар бойы рухани тірегімізге айналып, ұлт пен ұрпақтың жадында сақталып келеді. Бүгінде Қорқыт мұрасын зерттеу – өткенді тану ғана емес, болашағымызға бағытталған рухани миссия. Осы мақсаттағы ғылыми ізденістер мен халықаралық байланыстар түркі халықтарының мәдени тұтастығын нығайтуға, рухани үндестігін арттыруға зор үлес қосты», – деді Нұрлыбек Машбекұлы.Конференцияда «Түркі мәдениеті және мұрасы» қорының президенті Ақтоты Райымқұлова, Әзербайжан Ұлттық Ғылым академиясы фольклор институтының директоры Хикмет Кулиев, Қазақ Ұлттық университетінің профессоры, филология ғылымдарының кандидаты Анарбай Бұлдыбай, Қырғыз Республикасы Ұлттық Ғылым академиясы Ш.Айтматов атындағы Тіл және әдебиет институтының бас ғылыми қызметкері, филология ғылымдарының докторы Жылдыз Орозобекова, Қажы Байрам Вели атындағы Анкара университетінің профессоры Мехмет Чевик, Түркияның белгілі этномузыкатанушысы, ғалым Фикрет Каракая, Өзбекстан Республикасы Ұлттық Ғылым академиясының Ә.Науаи атындағы Мемлекеттік әдебиет музейінің директоры, филология ғылымдарының докторы, профессор Жоппор Эшонкұлов, Қазақстанның еңбек сіңірген қайраткері, жырау, ұстаз Алмас Алматов, филология ғылымдарының кандидаты Рақыш Жұмашай, Т.Жүргенов атындағы Қазақ Ұлттық өнер академиясының доценті Ұлжан Байбосынова пікір білдірді.Айта кетейік, 2018 жылы Қорқыт ата мұралары ЮНЕСКО-ның материалдық емес мәдени мұралар тізіміне енді. Бүгінде ұлы ойшылдың рухына тағзым ету, мұрасын сақтау және кеңінен насихаттау бағытында жүйелі жұмыс жалғасуда.Бүгінде Қармақшы ауданындағы Қорқыт ата мемориалы – туристердің рухани демалыс орны, кешен басында келушілерге барлық жағдай жасалған. Қызылорда қаласындағы «Қорқыт ата кітабының 1300 жылдығына» арналған аллея жаңғыртылып, тұрғындардың саялы орнына айналды. Қорқыт ата халықаралық әуежайының жаңа терминалы іске қосылды.Ортағасырлық тарихи-мәдени мұраларды халықаралық деңгейде таныту үшін Ұлттық музей, ТҮРКСОЙ ұйымы және Түркияның Мәдениет және туризм министрлігімен бірлескен шаралар өткізілуде. Қазба жұмыстары кезінде табылған жәдігерлер негізінде «Шірік Рабат сақ жауынгері», «Сығанақ ханшайымы», «Түгіскен көсемі», «Жетіасар ақсүйек әйелі» мүсіндері жаңғыртылып, ғылыми айналымға енгізілді.Ақпарат көзі : https://www.gov.kz/memleket/entities/kyzylorda/press/news/details/1084429?lang=kk

Алматы облысы Іле ауданының Еңбек ауылында заманауи фельдшерлік-акушерлік пункттің (ФАП) құрылысы аяқталып, пайдалануға берілді. Нысан «Ауылдық денсаулық сақтауды жаңғырту» ұлттық жобасы аясында салынды және қаржыландыру мемлекетке қайтарылған активтер есебінен жүзеге асырылды.Жалпы ауданы 612 шаршы метрді құрайтын жаңа медициналық пункт Еңбек ауылының және Алатау қаласының іргелес аумақтарындағы 900-ге жуық тұрғынға қызмет көрсетеді. Мұнда фельдшер, акушер, санитар және күзетші жұмыс істейді. Ғимарат заманауи медициналық құрал-жабдықтармен қамтамасыз етіліп, науқастарды қабылдауға және медицина қызметкерлерінің жұмыс істеуіне барлық жағдай жасалған.Жаңа ФАП-тың ашылуы ауыл тұрғындарына уақытылы әрі сапалы алғашқы медициналық көмек алу мүмкіндігін кеңейтеді.Облыс әкімдігі таратқан ақпаратқа сәйкес, осындай жобалардың жүзеге асырылуы ауылдық жерлердегі медициналық қызметтердің қолжетімділігін арттырып, алғашқы медико-санитарлық көмек жүйесін нығайтуға жол ашады.«Біз мемлекетке қайтарылған активтердің нақты нәтижесін көріп отырмыз. Бұл қаражаттар әлеуметтік маңызы бар жобаларға бағытталып жатыр. Еңбек ауылындағы жаңа ФАП – осының жарқын мысалы. Қайтарылған ресурстар халық игілігіне жұмсалып, жергілікті өмір сапасын арттыруға қызмет етуде», – деді Алматы облысының әкімі Марат Сұлтанғазиев.Нысанның құрылысы Алматы облысының құрылыс басқармасының тапсырысы бойынша жүргізіліп, «АСК АуылҚұрылысы» ЖШС мердігер ұйымы тарапынан салынды.Аймақта мұндай бастамалар ауылдық инфрақұрылымды дамытуға және облыс тұрғындарына көрсетілетін медициналық қызмет сапасын арттыруға бағытталған маңызды қадам ретінде бағаланып отыр.Ақпарат көзі : https://www.gov.kz/memleket/entities/almobl/press/news/details/1084481?lang=kk

Астана 2025 жылғы, 8 қазан – Қазақстан Республикасының Сыртқы істер министрлігінде «Серіктестік арқылы бейбітшілік: Өңірлік қауіпсіздікті қамтамасыз етудегі азаматтық қоғамның рөлі» атты халықаралық конференция өтті.Іс-шараға мемлекеттік органдардың, дипломатиялық миссиялардың, халықаралық ұйымдардың, сондай-ақ Қазақстанның, Орталық Азия елдерінің, Еуропа мен Ұлыбританияның үкіметтік емес және зерттеу орталықтарының өкілдері қатысты.Форумның негізгі тақырыбы – қоғамдық тұрақтылықты нығайту, мемлекет пен азаматтық қоғам арасындағы серіктестікті дамыту және радикалданудың алдын алу мен экстремизмге қарсы іс-қимыл саласындағы халықаралық тәжірибемен алмасу болды.ҚР СІМ Ерекше тапсырмалар жөніндегі Елшісі Станислав Василенко қоғамдық дипломатияның өңірлік тұрақтылық пен сенімді нығайтудағы стратегиялық маңызын атап өтті. Еліміз бейбітсүйгіш сыртқы саясатын дәйекті түрде жүзеге асырып, сондай-ақ, азаматтық институттар қауіпсіздіктің белсенді субъектісіне айналатын «қоғам дипломатиясы» моделін дамытып отырғанын атап өтті.Конференция барысында «Терроризмге қарсы комитет» республикалық қоғамдық бірлестігінің төрағасы және Қазақстанның үкіметтік емес ұйымдары консорциумының жетекшісі Аманжол Уразбаев «Серіктестік арқылы бейбітшілік» жобасын іске асырудың нәтижелерін ұсынды. Ол құрылған Консорциум мемлекет, қоғам және сарапшылар біртұтас ерте әрекет ету және алдын алу жүйесі ретінде жұмыс істейтін азаматтық қауіпсіздік архитектурасының үлгісі болғанын атап өтті.Іс-шара аясында Қазақстанның ҮЕҰ консорциумы мен британдық «ConnectFutures» қоры арасында ынтымақтастық туралы меморандумға қол қойылып, радикалдануға қарсы іс-қимыл, зерттеу және білім беру саласындағы өзара әрекеттестіктің жаңа кезеңі басталды.Конференция Қазақстанның өңірлік диалог пен бейбітшілік дипломатиясының орталығы ретіндегі жетекші рөлін растады. «Серіктестік арқылы бейбітшілік» жобасы мемлекет пен азаматтық қоғамның өзара іс-қимылының тиімді үлгісі болып, бейбітшілік, сенім және тұрақтылықты нығайтуға үлес қосты.Ақпарат көзі : https://www.gov.kz/memleket/entities/mfa/press/news/details/1084598?lang=kk

ҚР Қаржы министрлігінің аппарат басшысы Эрнар Ержанов Алматы облысы бойынша Мемлекеттік кірістер департаментінің ұжымына жаңа басшы – Шыңғыс Әнуарбековті таныстырды.Шыңғыс Әлібекұлының салық қызметіндегі кәсіби тәжірибесі мол. Ол еңбек жолын 1998 жылы Алматы қаласы Түрксіб ауданы бойынша Салық комитетінде маман болып бастаған.Бұған қоса әр жылдары Алматы қаласы, Жамбыл, Ақмола және Қостанай облыстары бойынша салық департаменттерінде басшылық қызметтер атқарды. 2022 жылдың тамыз айынан бастап бүгінге дейін Астана қаласы бойынша Мемлекеттік кірістер департаментін басқарған.Ақпарат көзі : https://www.gov.kz/memleket/entities/minfin/press/news/details/1084402?lang=kk

Астанада ҚР Сауда және интеграция министрі Арман Шаққалиевтің азаматтық қоғам институттары, бизнес қауымдастық және профильді ассоциациялар өкілдерімен кездесуі өтті. Кездесудің басты тақырыбы - ішкі сауданы дамыту, отандық тауар өндірушілердің позицияларын күшейту және саланың нормативтік-құқықтық базасын жетілдіру болды. Кездесуге 120-дан астам адам қатысты, оның ішінде Қазақстан азаматтық альянсының президенті Бану Нұрғазиева, Қазақстан Парламенті Мәжілісінің депутаттары Альберт Рау мен Нұржан Әшімбеков, Сауда желілері Ассоциациясының өкілдері, еліміздің ірі сауда желілерінің басшылары мен базар иелері, сондай-ақ отандық тауар өндірушілер саласындағы профильді ассоциациялар мен Қазақстан Ұлттық кәсіпкерлер палатасының өкілдері болды. Іс-шараны ашқан министр азық-түлік қауіпсіздігін қамтамасыз ету, бағаның тұрақтылығы және отандық өндірушілердің сауда сөрелеріне қолжетімділігі Үкімет алдында тұрған стратегиялық міндеттер екенін, бұл мәселеге Мемлекет басшысы ерекше назар аударатынын атап өтті. Министрлік импортқа тәуелділікті азайтуға, жеке сауда маркасын дамытуға және елдегі бәсекеге қабілетті сауда экожүйесін қалыптастыруға бағытталған кешенді шараларды жүзеге асыруда. «Экономикалық үлес бойынша сауда жалпы ішкі өнімнің 16,5%-ын құрайды және 1,5 миллионнан астам адамды жұмыспен қамтып отыр. Соңғы бес жылда ішкі сауда айналымы шамамен 80%-ға өсті және 2024 жылы 70,7 трлн теңгені құрады. Бұл динамика сауданың жай ғана делдалдық қызмет емес, орнықты орта тапты қалыптастыратын және тұтынудың жаңа форматтарын дамытатын негізгі сала екенін көрсетеді», – деді Арман Шаққалиев. Сауда министрі «Береке Fest» акциясы аясында бизнестің көрсеткен әлеуметтік жауапкершілігі үшін алғысын білдірді. Сауда желілері акция аясында арнайы бұрыштар ұйымдастырып, агрофирмалардың ет пен ӘМАТ өнімдерін тікелей жеткізуін қамтамасыз етті. Акцияға 80-ден астам сауда желісі қатысты. Республика күніне орай ірі сауда орталықтары мен онлайн платформаларда азық-түлік және азық-түлікке жатпайтын кең ассортименттегі тауарларға жеңілдіктер беріледі. Жиында акцияның форматы талқыланды. Бірінші вице-министр Айжан Бижанова отандық өндірушілерді қолдауға бағытталған шаралар туралы хабарлады. Заңнамада қазақстандық азық-түлік және азық-түлікке жатпайтын тауарларға арналған сөрелердің кемінде 30%-ын отандық өнімдерге бөлу талаптары бекітілді. Бұл талаптар ірі сауда желілерінен бастап шағын дүкендер мен базарларға дейінгі барлық сауда форматтарына қатысты. Мемлекеттік қолдау аясында субсидиялау арқылы сөре кеңістігін қосымша 20%-ға ұлғайту қарастырылған, ал шарттар орындалмаса қаржыландыру тоқтатылады және қаржы кері қайтарылады. Өндірушілер мен сауда желілері және маркетплейстер арасындағы өзара әрекетті жеңілдету мақсатында QazTrade платформасында «Бір терезе» жүйесі құрылуда, ол отандық тауар өндірушілерд реестрімен интеграцияланады. Бұл шешім өнімнің нарыққа жылдам және ашық жолмен қолжетімді шығуы қамтамасыз етпек. Сауда орнын жалдау қатынастарына да үлкен мән берілуде. Жаңа ереже бойынша сауда орнын жалдау ақысы жылына бір рет өзгереді әрі ол туралы жарты жыл бұрын сатушыға хабарлануы керек. Кездесу барысында Magnum және SMALL&SKIF сауда желілерінің өкілдері жекесауда маркаларын дамытудағы табысты тәжірибелері туралы айтты. Бұл - бөлшек саудада негізгі стратегиялық бағыт, ол сатып алушылардың адалдығын нығайтып, бәсекелестік позицияларын күшейтеді. Жеке сауда маркасы – бір желі аясында эксклюзив ұсынылатын өнімдер. Олар қолжетімді бағада (салыстырмалы түрде 10–20% төмен), жоғары сапамен ерекшеленеді және экономнан премиумға дейінгі барлық баға сегменттерін қамтиды. SMALL&SKIF желісі отандық өндірушілермен ынтымақтастыққа басымдық береді. Бұл сапаны қамтамасыз етіп, жергілікті бизнесті қолдауға және сатып алушыларға бірегей ұсыныс жасауға мүмкіндік береді. Magnum желісінде жеке сауда маркасын дамуы жақсы нәтиже көрсетуде: соңғы 5 жылда желідегі осындай тауарлардың үлесі 1,7%-дан 11,9%-ға дейін өскен. Сауда желісі еліміздің 18 қаласында 71 өнім өндірушімен жұмыс істейді. Тараптар тұрақты жеткізу тізбегін дамытып, жергілікті өнімнің сөредегі позициясын нығайтуда. Сонымен қатар, картоп және көкөніс өсірушілер одағы, Қазақстанның жұмыртқа өндірушілер ассоциациясы, Қазақстанның сүт одағы, ет өңдеу кәсіпорындарының ассоциациясы және басқа да салалық ассоциациялардың өкілдері өз пікірлерін білдірді. Қатысушылар сенімді жеткізушілер ретінде қызмет етуге, ішкі нарықты тұрақты тауар мен қажетті ассортиментпен қамтамасыз етуге дайын екендерін айтты. Сондай-ақ отандық сауда желілерін қолдау мен тұрақты жеткізу тізбектерін дамытуға мүдделі екендерін жеткізді. Кездесуге келгенде жаңа Салық кодексінің ережелеріне ерекше назар аударды. Атап айтқанда, сауда және ауыл шаруашылығы кешені үшін жеңілдетілген арнайы режимдер сақталады, ауыл шаруашылығы тауарларын өндірушілерге табыстан 3% тұрақты ставка бойынша жеңілдетілген салық тәртібі енгізілді, ал агросектордағы заңды тұлғалар үшін ҚҚС жүктемесі төмендетілді. ҚҚС негізгі мөлшерлемесі 16% деңгейінде белгіленді, ал арнайы режимдер бойынша жұмыс істейтін шағын бизнес ҚҚС төлеуден босатылған. Сонымен қатар, өзін-өзі жұмыспен қамтығандар мен қайта өңдеушілерге салықтық преференциялар сақталады, соның ішінде ішкі өндіріс үшін қолданылатын импорттық шикізатқа ҚҚС төлеуді кейінге қалдыру мүмкіндігі қарастырылған. «Егер бизнес халыққа қызмет көрсетсе, қарапайым қызметтер ұсынса, шағын саудамен айналысса, жеңілдетілген салық жүйесі сақталады. Ал егер бизнес компанияларға қызмет көрсетсе, мемлекеттік тапсырыспен жұмыс істесе, ірі нысандар салса немесе ірі айналымы болса — бұл мүлдем басқа деңгей. Онда толық салық есептілігі болуы тиіс. Біз ашықтық принципіне сүйендік: қызмет оңай болған сайын, оны жеңілдетілген жүйе арқылы басқару оңайырақ», - деді ҚР Ұлттық экономика вице-министрі Ерлан Сағынаев. Ішкі нарықты қолдаудың негізгі бағыттары талқыланғаннан кейін, Қазақстанның Азаматтық Альянсы президенті Бану Нұрғазиева барлық тараптың күш-жігерін біріктірудің маңыздылығын атап өтті. «Бүгінгі кездесуге салалық үкіметтік емес ұйымдар, ассоциациялар мен отандық өндірушілер жиналды. Шынында да, азық-түлік қауіпсіздігі – бұл басты басымдық. Біз отандық өнімнің шын мәнінде бірінші орында тұрғанын, халықтың сапалы әрі денсаулыққа пайдалы өнім тұтынғанын қалаймыз. Бүгінде қазақстандық тауарларға сұраныс жоғары, сапасы да жақсы. Мемлекеттік органдар, бизнес және азаматтық сектор бірлесе отырып, отандық өндірісті дамытуға және көтеруге толық мүмкіндігіміз бар», – деді ол. Кездесуді қорытындылай келе, қатысушылар мемлекеттің, бизнестің және азаматтық қоғамның әділ, бәсекеге қабілетті және ашық нарық құру үшін тұрақты диалог жүргізудің маңыздылығын атап, әрі қарай ынтымақтастыққа дайын екендіктерін білдірді.Ақпарат көзі : https://www.gov.kz/memleket/entities/mti/press/news/details/1084036?lang=kk

2025 жылдың 9-10 қазанында ҚР Әділет министрі Ерлан Сәрсембаев Венеция комиссиясының 144-ші пленарлық отырысына еліміздің өкілі ретінде қатысты. Венеция комиссиясының пленарлық отырысына ҚР Конституциялық Сотының төрағасы Эльвира Азимова да қатысты.144-ші пленарлық отырыс кеңесінің күн тәртібіне Венгрия, Словакия, Испания, Армения, Грузия, Солтүстік Македония және Украина сияқты бірқатар елдердің заң жобалары мен құқықтық мәселелері бойынша тұжырымдамаларды талқылау енді.Сондай-ақ, Албания мен Молдова Республикасына қатысты алдыңғы отырыстарда қаралған құқықтық мәселелер бойынша тұжырымдамалар қарастырылды.Венеция комиссиясының 144-ші пленарлық отырысына қатысу барысында Әділет министрі Ерлан Сәрсембаев Кореяның Конституциялық сотының судьясы Ким Хён Думен кездесу өткізді. Кездесу барысында Ерлан Сәрсембаев елде жүргізіп жатқан цифрландыру және әділет органдарының ақпараттық жүйелеріне жасанды интеллект элементтерін енгізу туралы хабарлады.Ақпарат көзі : https://www.gov.kz/memleket/entities/adilet/press/news/details/1084126?lang=kk

Брюссель, 2025 жылғы 10 қазан – ҚР Энергетика министрі Ерлан Ақкенженов Брюссельде өткен «Global Gateway» форумына қатысып, Еуропалық Одақ өкілдерімен бірқатар стратегиялық кездесулер өткізді. Бұл сапар Қазақстанның Орталық Азиядағы ЕО үшін сенімді әрі негізгі серіктес ретіндегі мәртебесін нығайта түсті.Форум аясында министр Еуропалық комиссияның Халықаралық серіктестік жөніндегі комиссары Йозеф Сикеламен және тату көршілік пен кеңейту мәселелеріне жөніндегі комиссары Марта Коспен келіссөздер жүргізді. Кездесу барысында тараптар энергетикалық қауіпсіздік, «жасыл» экономикаға көшу мәселелерін талқылады.Ерлан Ақкенженов Қазақстанның 2060 жылға дейін көміртегі бейтараптығына қол жеткізуді стратегиялық мақсат ретінде айқындап отырғанын атап өтті. Сонымен қатар, елдің «жасыл» экономикаға көшу үдерісінде прагматикалық әрі теңгерімді ұстанымды басшылыққа алатынын жеткізді. Оның айтуынша, бұл процесс жаңартылатын энергия көздерін дамытумен қатар, қазіргі таңда дәстүрлі генерацияға негізделген ұлттық энергетикалық жүйенің сенімділігін қамтамасыз етуі тиіс.Сапар барысында инвестиция тарту мәселесіне ерекше назар аударылды. Министр Еуропалық қайта құру және даму банкінің (ЕҚДБ) президенті Одиль Рено-Бассомен, Француз даму агенттігінің (AFD) директоры Сириль Бельэмен және Италияның «Cassa Depositi i Prestiti» компаниялар тобы (CDP) басшыларымен кездесті.Сапардың негізгі нәтижелерінің бірі – Қазақстан мен Еуропаның жетекші қаржы ұйымдары Еуропалық қайта құру және даму банкі (EBRD) мен Еуропалық инвестициялық банк (EIB) арасында ынтымақтастық туралы меморандумдарға қол қойылуы болды. Құжаттар жаңартылатын энергия көздерін дамыту, электр желілерін жаңғырту және Қамбар-Ата ГЭС-1 секілді өңірлік жобаларға инвестиция тартуға бағытталған.Сондай-ақ форум аясында Герман халықаралық ынтымақтастық жөніндегі қоғамы (GIZ) ұйымдастырған «Орталық Азиядағы серіктестік диалогына» Қазақстан, Қырғызстан, Өзбекстан, Тәжікстан және Түрікменстанның энергетика министрлері қатысты. Басқосуда Ерлан Ақкенженов өңірлік электр саудасы, гидроэнергетика және жаңартылатын энергия стандарттары бойынша Қазақстанның ұстанымын білдірді. – Біздің Брюссельге сапарымыз Еуропамен энергетикалық әріптестікті тереңдетуге деген өзара қызығушылықтың жоғары екенін көрсетті. Қазақстан – сенімді энергия жеткізуші ел және «жасыл» энергетика мен сутегі өндірісінде Еуропа үшін стратегиялық серіктес болуға дайын. EIB және EBRD-пен жасалған келісімдер – еліміздің еуропалық бизнеске тұрақты ұзақмерзімді жобаларға арналған инвестициялық тартымдылығын айқындайды, – деді ҚР Энергетика министрі Ерлан Ақкенженов.Ақпарат көзі : https://www.gov.kz/memleket/entities/energo/press/news/details/1084143?lang=kk

2025 жылдың 4–9 қазан аралығында түркітілдес елдер арасында өткен алғашқы «TurkicSkills» халықаралық кәсіби шеберлік чемпионатында Алматы облысынан 20 маман қатысып, өңір намысын қорғады.Қатысушылар қатарында салалық сарапшылар, колледж директорлары мен орынбасарлары, педагогтар және өндірістік оқыту шеберлері болды. «TurkicSkills» чемпионаты техникалық және кәсіптік білім беру жүйесіндегі үздік тәжірибелер мен инновациялық тәсілдерді біріктіретін маңызды халықаралық алаң болып табылады. Шара барысында түркі елдерінің білім беру жүйелеріндегі жаңа үрдістер, әдістемелер және оқыту стандарттары таныстырылды.Чемпионат қорытындысы бойынша еліміздің 700 колледжі арасынан үздік деп танылған оқу орындары марапатталды. Солардың ішінде Алматы облысының Қызмет көрсету және тамақтандыру саласындағы инновациялық технологиялар колледжі «Үздік колледж» номинациясын иеленіп, өңірдің техникалық және кәсіптік білім беру жүйесіндегі көшбасшы оқу орындарының бірі екенін дәлелдеді.Аталған жетістік — облыс білім беру саласында инновациялық технологияларды енгізу, еңбек нарығының сұранысына сай мамандар даярлау және халықаралық деңгейде бәсекеге қабілеттілікті арттыру бағытында жүргізіліп отырған жүйелі жұмыстың нәтижесі.Сарапшылардың пікірінше, мұндай халықаралық чемпионаттар кәсіби білім сапасын жетілдіріп қана қоймай, жастардың жаңа кәсіптерге қызығушылығын арттырып, ел экономикасына үлес қосатын жоғары білікті кадрлар даярлауға серпін береді.Алдағы уақытта Алматы облысының білім беру жүйесі халықаралық ынтымақтастықты кеңейтіп, үздік тәжірибелер мен инновациялық тәсілдерді оқу процесіне енгізуді жалғастыратын болады.Ақпарат көзі : https://www.gov.kz/memleket/entities/almobl/press/news/details/1083999?lang=kk